11.8.2017   

MT

Il-Ġurnal Uffiċjali tal-Unjoni Ewropea

C 266/1

I.

A.

B.

C.

D.

E.

F.

G.

H.

II.

A.

B.

C.

D.

E.

F.

G.

H.

I.

J.

K.

L.

M.

III.

A.

A.1.

A.2.

A.3.

A.4.

B.

B.1.

B.2.

B.3.

B.4.

B.5.

C.

C.1

C.2

C.3

C.4

C.5

C.6

C.7

D.

D.1

D.2

D.3

D.4

E.

E.1.

E.2.

E.3.

E.4.

F.

G.

IV.

Anness I -

Anness II -

Anness III -

Anness IV -

Anness V -

Anness VI -

1.

Dan ir-rapport janalizza l-ġestjoni baġitarja u finanzjarja tal-Parlament Ewropew għas-sena finanzjarja 2016. Jiddeskrivi l-użu tar-riżorsi finanzjarji kif ukoll l-avvenimenti li kellhom influwenza sinifikanti fuq l-attivitajiet tas-sena finanzjarja (il-Partijiet I u II) u jagħti rendikont fil-qosor tar-riżultati li nkisbu fir-rigward tal-objettivi stabbiliti għas-sena 2016 (il-Parti III).

2.

Ir-rapport tfassal bi qbil mal-Artikolu 142 tar-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (1), minn hawn ’il quddiem “ir-Regolament Finanzjarju”, u mal-Artikolu 227 tar-Regolament ta’ Delega tal-Kummissjoni (UE) Nru 1268/2012 tad-29 ta’ Ottubru 2012 dwar ir-regoli tal-applikazzjoni tar-Regolament (UE, Euratom) Nru 966/2012 tal-Parlament Ewropew u tal-Kunsill dwar ir-regoli finanzjarji applikabbli għall-baġit ġenerali tal-Unjoni (2). L-analiżi hija bbażata fuq il-kontijiet baġitarji provviżorji stabbiliti mill-Uffiċjal tal-Kontabilità.

3.

L-approprjazzjonijiet finali tal-Parlament għall-2016 b’kollox ammontaw għal EUR 1 838 613 983, jiġifieri 19,39 % tal-Intestatura V tal-Qafas Finanzjarju Pluriennali (3). It-Tabella 1 ta’ hawn taħt tipprovdi rendikont fil-qosor tal-implimentazzjoni tal-baġit tal-Parlament Ewropew matul is-sena finanzjarja 2016.

Tabella 1

Użu tal-approprjazzjonijiet

4.

L-approprjazzjonijiet inizjali fil-baġit tal-Parlament għall-2016 ammontaw għal EUR 1 838 388 600. Wara li ġie adottat baġit emendatorju (9) ta’ EUR 225 383, l-approprjazzjonijiet totali fil-baġit finali għall-2016 kienu ta’ EUR 1 838 613 983. Dan irrappreżenta żieda ta’ 2,4 % fuq il-baġit finali tal-2015 (EUR 1 794 929 112).

5.

L-impenji b’kollox ammontaw għal EUR 1 823 844 172, li jirrappreżentaw 99,2 % tal-approprjazzjonijiet finali (2015: 99,1 %). Il-pagamenti b’kollox ammontaw għal EUR 1 538 531 527, jiġifieri 84,4 % tal-impenji li ttieħdu (2015: 83,7 %).

6.

Ir-riporti awtomatiċi għas-sena finanzjarja 2017 b’kollox ammontaw għal EUR 285 312 645, li jirrappreżentaw 15,6 % tat-total tal-approprjazzjonijiet impenjati (2015: 16,3 %). Ma sar l-ebda riport mhux awtomatiku ta’ approprjazzjonijiet għas-sena finanzjarja 2017 skont l-Artikolu 13 tar-Regolament Finanzjarju.

7.

Ir-riporti awtomatiċi għall-2016 b’kollox ammontaw għal EUR 289 323 907 (2015: EUR 277 911 825). Il-pagamenti li jikkorrispondu għal dawk ir-riporti kienu ta’ EUR 267 999 422, jiġifieri 92,6 % (2015: 90,9 %). B’hekk l-approprjazzjonijiet ikkanċellati b’kollox ammontaw għal EUR 21 324 484, jiġifieri tnaqqis ta’ 15,8 % meta mqabbla ma’ dawk tal-2015 (EUR 25 315 611). Il-biċċa l-kbira ta’ dawn il-kanċellazzjonijiet kienu jikkorrispondu għall-artikoli li ġejjin: l-Artikolu 2 0 0 “Bini”, l-Artikolu 1 0 0 “Salarji u allowances”, l-Artikolu 2 0 2 “In-nefqa fuq il-bini”, l-Artikolu 3 2 4 “Produzzjoni u Tixrid”, l-Artikolu 4 0 2 “Finanzjament tal-Partiti Politiċi Ewropej” u l-Artikolu 4 0 3 “Finanzjament tal-fondazzjonijiet Politiċi Ewropej”. Il-kanċellazzjonijiet li jikkorrispondu għal dawn is-sitt artikoli jirrappreżentaw 82 % tal-ammont totali kkanċellat.

8.

L-ammonti kkanċellati u r-raġunijiet ewlenin għal dawn il-kanċellazzjonijiet qed jiġu ppreżentati fit-Tabella 2.

Tabella 2

Raġunijiet ewlenin għall-kanċellazzjonijiet tal-riporti awtomatiċi mill-2015 għall-2016

9.

Id-dħul totali fil-kontijiet sal-31 ta’ Diċembru 2016 kien ta’ EUR 183 381 513 (2015: EUR 176 367 724), inklużi EUR 30 589 787 bħala dħul assenjat (2015: 27 988 590).

10.

Fit-Tabella 3 nsibu analiżi, għal kull kapitolu, tal-evoluzzjoni tad-dħul mill-2015 għall-2016.

Tabella 3

Evoluzzjoni tad-dħul mill-2014 għal 2016

11.

Id-dħul assenjat li tqiegħed għad-dispożizzjoni fl-2016 b’kollox ammonta għal EUR 30 589 787 (2015: EUR 27 988 590). L-impenji b’kollox ammontaw għal EUR 12 032 487, jiġifieri rata ta’ impenn ta’ 39 % (2015: 54 %). Il-pagamenti b’kollox ammontaw għal EUR 7 602 676, li jirrappreżentaw 63 % tal-impenji li ttieħdu (2015: 83 %).

12.

L-approprjazzjonijiet minn dħul assenjat riportati għall-2016 jinkludu l-pagament ta’ EUR 85 897 000 li l-Istat Belġjan għamel fis-27 ta’ Jannar 2010, biex ikopri l-ispejjeż għall-art fejn jinsabu l-Binjiet D4 u D5 u l-ispejjeż ta’ żvilupp tas-saqaf li jagħti fuq l-istazzjon ferrovjarju ta’ Bruxelles-Luxembourg. Dan il-pagament jikkostitwixxi dħul assenjat estern skont it-tifsira tal-Artikolu 21(2) tar-Regolament Finanzjarju. Il-biċċa l-kbira tal-impenji fir-rigward ta’ dan id-dħul tikkonċerna x-xiri tal-Bini MARTENS, bi qbil mad-Deċiżjoni tal-Bureau tat-30 ta’ Novembru 2011. Fl-2016, il-pagamenti li saru fir-rigward ta’ dan il-proġett ta’ bini b’kollox ammontaw għal EUR 74 250 579.

13.

Ġiet ikkanċellata s-somma ta’ EUR 14 769 811 (2015: EUR 16 107 073), li tirrappreżenta 0,8 % mill-approprjazzjonijiet finali (2015:0,9 %), Ir-raġunijiet ewlenin għall-kanċellazzjonijiet qed jiġu ppreżentati fit-tabella ta’ hawn taħt:

Tabella 4

Raġunijiet ewlenin għall-kanċellazzjonijiet ta’ approprjazzjonijiet kurrenti fl-2016

14.

Matul is-sena finanzjarja, ġew approvati seba’ trasferimenti C (inkluż it-trasferiment imsejjaħ “ta’ tlaqqit”) bi qbil mal-Artikoli 27 u 46 tar-Regolament Finanzjarju. B’kollox dawn ammontaw għal EUR 66 655 000, li jikkostitwixxu 3,6 % tal-approprjazzjonijiet finali (fl-2015: saru sitt trasferimenti li rrappreżentaw 4,6 % tal-approprjazzjonijiet finali). Il-President awtorizza 16-il trasferiment P fuq approprjazzjonijiet kurrenti skont l-Artikolu 25(1) tar-Regolament Finanzjarju (11), li koprew total ta’ EUR 18 233 548, jiġifieri 1,0 % tal-approprjazzjonijiet finali (fl-2015: saru seba’ trasferimenti li rrappreżentaw 0,4 % tal-approprjazzjonijiet finali).

Tabella 6

Analiżi tat-trasferimenti C skont il-kategorija ta’ nfiq u skont l-objettiv

15.

Din it-taqsima tippreżenta l-użu tal-approprjazzjonijiet għal kull kapitolu baġitarju, is-sehem relattiv tagħhom fi ħdan il-baġit kumplessiv u l-evoluzzjoni fl-użu tagħhom waqt is-sena finanzjarja preċedenti. Erba’ kapitoli waħedhom jirrappreżentaw 70 % tal-impenji kollha kemm huma. Dawn kienu l-Kapitolu 10 “Membri tal-Istituzzjoni”, il-Kapitolu 1 2 “Uffiċjali u persunal temporanju”, il-Kapitolu 20 “Bini u nefqiet relatati” u l-Kapitolu 4 2 “Nefqa relatata mal-assistenza parlamentari”.

16.

Fit-Tabella 7 nsibu ppreżentata, għal kull kapitolu, l-evoluzzjoni tal-approprjazzjonijiet impenjati fl-2016 meta mqabbla ma’ dawk impenjati fl-2015. Il-Grafika 1 u l-Grafika 2 jservu ta’ illustrazzjoni tal-ishma relattivi u l-evoluzzjoni mill-2014 għall-2015.

Tabella 7

Evoluzzjoni tal-approprjazzjonijiet impenjati fl-2016 meta mqabbla ma’ dawk impenjati fl-2015

Grafika 1

Tqassim tal-impenji tal-2016 għal kull kapitolu

Grafika 2

Evoluzzjoni tal-approprjazzjonijiet impenjati fl-2016 meta mqabbla ma’ dawk impenjati fl-2015, għal kull kapitolu

17.

Is-salarju gross ta’ Membru jikkorrispondi għal 38,5 % tas-salarju bażiku ta’ mħallef fil-Qorti tal-Ġustizzja tal-Komunitajiet Ewropej (16). Ir-raġuni ewlenija għaż-żieda fl-impenji li jikkorrispondu għall-Partita 1 0 0 0 bejn l-2015 u l-2016 hija l-aġġustament tal-pagi bi 3,3 %, b’effett retroattiv mill-1 ta’ Lulju 2016. Is-salarju gross fix-xahar ta’ Membru żdied għal EUR 8 484 (EUR 8 213 bejn l-1 ta’ Lulju 2015 u t-30 ta’ Ġunju 2016). Għax-xhur bejn Lulju 2016 u Diċembru 2016, b’kollox tħallas ammont ta’ EUR 199 190 b’mod retroattiv.

18.

Kemm it-tnaqqis tal-impenji li jikkorrispondu għall-Partita 1 0 0 4 “Spejjeż għall-vjaġġi regolari” matul l-2015 u kemm iż-żieda tal-impenji li jikkorrispondu għall-Partita 1 0 0 5 “Spejjeż oħra għall-vjaġġi” jistgħu jiġu spjegati mill-bidla fil-kalendarju tal-attivitajiet tal-Parlament. Iż-żieda fil-ġimgħat ta’ attivitajiet parlamentari esterni wasslet għal tnaqqis fil-livell ta’ nfiq fir-rigward tal-vjaġġi regolari, filwaqt li kien hemm it-tendenza li l-vjaġġi fl-Istat Membru tal-elezzjoni jiżdiedu.

19.

Fl-2016, il-Membri b’kollox għamlu 29 641 vjaġġ (17). Il-maġġoranza tal-vjaġġi saru lejn Brussell (18 615) u lejn Strasburgu (8 687). Għal laqgħat f’postijiet oħra fl-Unjoni Ewropea saru 1 348 vjaġġ u għal laqgħat barra mill-Unjoni Ewropea saru 991 vjaġġ.

20.

Il-Partita 1 0 0 6 hija intenzjonata biex tkopri l-ispejjeż li jirriżultaw mill-attivitajiet parlamentari tal-Membri. Din l-allowance ammontat għal EUR 4 320 fix-xahar għal kull Membru fl-2016 (mhux mibdula meta mqabbla ma’ dik tal-2015) u tħallset darba fix-xahar fuq talba tal-Membru.

21.

It-tnaqqis li jikkorrispondi għall-Partita 1 0 2 0 “Allowances Tranżitorji” bejn l-2015 u l-2016 jirrifletti l-effett tal-eliminazzjoni gradwali tal-Membri li telqu mill-kariga wara l-elezzjonijiet fl-2014 u li applikaw għal allowance tranżitorja (18). F’Diċembru 2016, kienu biss tnejn mill-ex Membri li tħallsu allowance tranżitorja, meta mqabbla ma’ 12 f’Lulju 2016, 25 fi tmiem Diċembru 2015 u saħansitra 51 f’Lulju 2015. Barra minn hekk, modifika tar-regoli dwar it-tpaċija (19) wasslet biex, fl-2016, infetħu mill-ġdid 21 fajl, u rriżultat biex tħallsu EUR 752 696 bħala allowance tranżitorja.

22.

Il-Partita 1 0 3 0 “Pensjonijiet tal-irtirar (PEAM)” hija intenzjonata biex tkopri l-ħlas ta’ pensjoni tal-irtirar wara li jintemm il-mandat ta’ Membru li jikkwalifika skont il-kundizzjonijiet previsti fir-regolamenti l-antiki, li ġew ħadilhom posthom l-Istatut għall-Membri li daħal fis-seħħ fl-2009 (20). Id-drittijiet għal pensjoni tal-irtirar miksubin sad-data tad-dħul fis-seħħ tal-Istatut jinżammu. Id-dispożizzjonijiet dwar il-pensjoni tal-irtirar attwalment japplikaw biss għall-Membri eletti fi Franza jew fl-Italja, waqt li l-Membri l-oħra kollha għandhom id-dritt jaderixxu fi skemi pensjonistiċi organizzati mill-awtoritajiet nazzjonali tagħhom. Il-Membri tal-Parlament Ewropew eletti fl-Italja li ma jibbenefikawx minn skema pensjonistika fil-livell nazzjonali u l-Membri tal-Parlament Ewropew eletti fi Franza li kienu membri ta’ skema pensjonistika differenti minn dik tad-deputati tal-Assemblea Nazzjonali għandhom il-possibilità li jħallsu lill-baġit tal-Parlament Ewropew kontribuzzjonijiet ikkalkolati fuq l-istess bażi bħal dawk tad-deputati eletti għall-parlament nazzjonali fl-Italja u fi Franza, b’mod li jiksbu l-istess drittijiet għal pensjoni li jgawdu minnhom id-deputati eletti fil-parlament nazzjonali. Fi tmiem l-2016 kien hemm 390 benefiċjarju, imqabbla ma’ 458 fi tmiem l-2015. It-tnaqqis fl-għadd tal-benefiċjarji jispjega t-tnaqqis tal-impenji taħt il-Partita mill-2015 għall-2016.

23.

L-infiq relatat mal-uffiċjali u l-persunal temporanju ammonta għal EUR 625 820 200 fl-2016, u dan jagħmlu l-akbar kategorija ta’ nfiq, li tirrappreżenta 34 % tal-impenji totali tas-sena finanzjarja 2016. It-tkabbir taħt dan il-kapitolu huwa dovut essenzjalment miż-żieda li tikkorrispondi għall-Partita 1 2 0 0 “Rimunerazzjoni u allowances”, li tirrappreżenta 99 % tal-approprjazzjonijiet taħt il-Kapitolu 1 2.

24.

B’kollox, l-impenji li jikkorrispondu għall-Partita 1 2 0 0 “Remunerazzjoni u allowances” ammontaw għal EUR 621 577 767; żieda ta’ 5 % fuq dawk tal-2015. Din l-evoluzzjoni tirrifletti ż-żieda fir-rata ta’ karigi mimlija u tintegra l-progressjoni tal-karrieri, kif ukoll l-indiċizzazzjoni tas-salarji. Infatti, f’Diċembru 2016, ir-remunerazzjonijiet tal-uffiċjali u persunal ieħor tal-Unjoni Ewropea żdiedu bi 3,3 %, b’effett retroattiv mill-1 ta’ Lulju 2016.

25.

L-impenji li jikkorrispondu għall-Partita 1 2 0 4 “Drittijiet marbuta mad-dħul fis-servizz, trasferimenti jew tluq mis-servizz” ammontaw għal EUR 3 425 000; minħabba li daħlu fis-servizz u telqu minnu ammont akbar ta’ uffiċjali u aġenti oħra, l-impenji żdiedu b’34 % fuq dawk tal-2015.

26.

Fl-2016, 181 persuna ġew impjegati mas-Segretarjat Ġenerali bħala uffiċjali u persunal temporanju, u 76 ġew impjegati mal-gruppi politiċi bħala persunal temporanju. B’kollox, 6 181 persuna kienu qed jaħdmu mal-Parlament Ewropew bħala uffiċjali u persunal temporanju sal-31 ta’ Diċembru 2015, b’5 295 minnhom jaħdmu mas-Segretarjat Ġenerali u 806 mal-gruppi politiċi.

27.

F’dak li għandu x’jaqsam mal-proporzjon bejn sess u ieħor, in-nisa jirrappreżentaw 59 % tal-persunal totali tal-Parlament, 30 % tal-kapijiet tal-unitajiet, 30 % tad-diretturi u 26 % tad-diretturi ġenerali sal-31 ta’ Diċembru 2016. Il-grafika ta’ hawn taħt tippreżenta kif il-persunal huwa mqassam bejn sess u ieħor skont il-grupp ta’ funzjonijiet.

Grafika 3

Il-persunal tal-Parlament imqassam skont is-sess

Sors: DĠ PERSUNAL

28.

Ir-raġuni ewlenija għaż-żieda fl-approprjazzjonijiet impenjati fi ħdan dan il-kapitolu hija ż-żieda ta’ EUR 7,5 miljun fl-impenji għal persunal ieħor, fil-biċċa l-kbira dovuta għall-internalizzazzjoni tal-persunal fil-qasam tas-sigurtà. Impatt importanti ieħor kien iż-żieda fil-ħtieġa għal interpretazzjoni esterna fl-2016 (żieda ta’ EUR 2,2 miljuni fuq l-2015). L-impenji għat-traduzzjoni esterna kienu inqas b’16 %.

29.

Iż-żieda li tikkorrispondi għall-Partita 1 4 0 0 “Aġenti oħra” hija dovuta fil-biċċa l-kbira għar-reklutaġġ tal-aġenti kuntrattwali fil-kuntest tal-internalizzazzjoni tas-servizz ta’ sigurtà u l-indiċizzazzjoni tas-salarji. Sal-31 ta’ Diċembru 2015, il-Parlament kien qed jimpjega lil 1 538 persuna bħala aġenti kuntrattwali (fil-31 ta’ Diċembru 2015: 1 428, jiġifieri + 8 %). Il-Grafika 4 tippreżenta kif l-aġenti kuntrattwali huma mqassma skont il-grupp ta’ funzjonijiet (21) u skont is-sessi. Prinċipalment, din il-partita sservi biex tkopri r-remunerazzjoni u l-allowances tal-aġenti l-oħra, speċifikament l-aġenti kuntrattwali, il-kontribuzzjonijiet tal-impjegaturi għall-iskemi tas-sigurta’ soċjali differenti u l-impatti tal-koeffiċjenti ta’ korrezzjoni applikabbli għar-remunerazzjonijiet ta’ dawn l-aġenti, kif ukoll l-impjieg ta’ persunal temporanju.

Grafika 4

Persunal kuntrattwali skont il-grupp ta’ funzjonijiet u skont is-sess fl-2016

Sors: DĠ PERSUNAL

30.

L-evoluzzjoni fil-konfront tal-Partita 1 4 0 2 “Nefqa fuq l-interpretazzjoni” hija dovuta mill-bidliet fil-karatteristiċi tad-domanda, bħall-modifiki li ġew introdotti għall-istruttura tal-kalendarju tal-attivitajiet tal-Parlament u l-ħolqien ta’ żewġ kumitati ta’ inkjesta ġodda. Barra minn hekk, bħala medja, ir-rata ta’ kuljum għall-interpreti awżiljarji tal-konferenzi kibret minħabba żieda fis-salarji u adattament tal-allowances għal kuljum u l-limiti massimi għall-akkomodazzjoni waqt il-missjonijiet. L-impenji li jikkorrispondu għal din il-partita koprew l-onorarji, il-kontribuzzjonijiet għas-sigurtà soċjali, l-ispejjeż għall-vjaġġi u l-allowances ta’ sussistenza għall-interpreti awżiljarji tal-konferenzi impjegati mill-Parlament biex jiggarantixxi l-interpretazzjoni waqt il-laqgħat li organizza.

31.

L-aġenti għall-interpretazzjoni tal-konferenzi pprovdew 52 121 jum ta’ interpretazzjoni fl-2016 (żieda ta’ 1,3 % meta mqabbla mal-2015) għall-Parlament u istituzzjonijiet oħra (22) (meta l-Parlament kien obbligat jipprovdi dan is-servizz).

32.

L-evoluzzjoni fil-konfront tal-Partita 1 4 0 4 “Apprendistati, għotjiet u skambji ta’ uffiċjali” hija dovuta prinċipalment għaż-żieda fl-għadd ta’ esperti nazzjonali sekondati. L-impenji koprew ir-remunerazzjonijiet, l-allowances, l-ispejjeż għall-vjaġġi u l-ispejjeż tal-assigurazzjoni kontra l-mard u l-inċidenti tal-kategoriji ta’ persunal ikkonċernati.

33.

L-evoluzzjoni fil-konfront tal-Partita 1 4 2 0 “Servizzi esterni tat-traduzzjoni” hija dovuta parzjalment għat-tnaqqis fl-esternalizzazzjoni fl-2016 u parzjalment għall-fatt li, bħala medja, il-prezz għal kull faċċata ta’ traduzzjoni esternalizzata skont il-kuntratti l-ġodda fis-seħħ fl-2016 kien aktar baxx milli kien skont il-kuntratti li kienu ffirmati qabel.

34.

L-impenji li jikkorrispondu għall-Partita 1 6 1 2 “Taħriġ ulterjuri” koprew l-infiq fuq taħriġ maħsub biex itejjeb il-kompetenzi tal-persunal, kif ukoll il-prestazzjoni u l-effiċjenza tal-istituzzjoni. Fl-2016, b’kollox kien hemm 5 618-il parteċipazzjoni f’korsijiet lingwistiċi (2015: 5 606), 2 120 f’korsijiet ta’ taħriġ informatiku (2015: 2 284), u 874 f’korsijiet ta’ taħriġ finanzjarju (2015: 1 233). B’kollox kien hemm 11 873 parteċipazzjoni f’korsijiet interni ta’ taħriġ ġenerali (2015: 11 970), u 353 f’korsijiet esterni (2015: 341) (23).

35.

It-tnaqqis tal-impenji li jikkorrispondu għall-Partita 1 6 5 2 “Nefqiet kurrenti għall-operat amministrattiv tar-ristoranti u l-kantins” matul l-2015 jista’ jiġi spjegat permezz tal-implimentazzjoni tal-linji gwida strateġiċi għall-modernizzazzjoni tal-politika tal-Parlament dwar il-forniment tal-ikel għall-2014–2019, li ġew adottati mill-Bureau fl-10 ta’ Ġunju 2013. Abbażi ta’ dawn il-linji gwida, il-kuntratturi li jipprovdu s-servizzi ta’ forniment ta’ ikel fil-bini tal-Parlament ma baqgħux jiġu ssussidjati fi Brussell (minn Lulju 2015) u fi Strasburgu (minn Novembru 2016).

36.

L-approprjazzjoni li jikkorrispondu għall-Partita 1 6 5 4 huma intenzjonati biex ikopru l-kontribuzzjoni tal-Parlament għall-ispejjeż kollha taċ-ċentru għat-tfal żgħar u l-iskejjel materni esterni li magħhom ikun ġie konkluż ftehim (24). Ir-raġuni ewlenija għat-tnaqqis kienet li, kumplessivament, il-ħtiġijiet kienu aktar baxxi, peress li għadd ta’ postijiet fl-iskejjel materni privati fi Brussell baqgħu ma ttiħdux u kien hemm bżonn ta’ anqas interventi esterni.

37.

Inizjalment ma ddaħħlet l-ebda approprjazzjoni għall-Partita 2 0 0 1 “Ħlasijiet ta’ ċnus” fil-baġit 2016: l-approprjazzjonijiet għal din il-partita ġew miżjuda b’EUR 53 500 000 miljun sa tmiem is-sena finanzjarja, b’riżultat tat-trasferiment ta’ tlaqqit. L-ammont kollu ġie impenjat għall-proġett ta’ estensjoni tal-Bini Adenauer fil-Lussemburgu (il-proġett tal-KAD).

38.

L-impenji li jikkorrispondu għall-Partita 2 0 0 5 “Il-kostruzzjoni ta’ bini” koprew l-ispejjeż u x-xogħlijiet relatati mal-proġett tal-KAD (25) u b’kollox ammontaw għal EUR 11 113 598 (2015: EUR 8 969 858). Koprew ukoll l-ispejjeż u x-xogħlijiet relatati mar-rinnovament tal-Bini Havel fi Strasburgu, li ammontaw għal EUR 2 149 941 (2015: EUR 5 050 000), kif ukoll xi proġetti fi Brussell (li ammontaw għal EUR 4 525 268), prinċipalment fir-rigward tat-tnedija tas-sistemazzjoni tal-Bini Martens.

39.

Il-Partita 2 0 0 7 “Sistemazzjoni fil-bini” hija intenzjonata għall-finanzjament ta’ proġetti ta’ sistemazzjoni speċifiċi u individwali li ma jinvolvux xogħol rikorrenti. Iż-żieda fl-impenji li jikkorrispondu għal din il-Partita fl-2016 hija prinċipalment dovuta għall-investimenti eċċezzjonali fl-aspetti tas-sigurtà tal-bini, bħala konsegwenza tal-bidla fis-sitwazzjoni tas-sigurtà. L-investimenti kienu mmirati, fost affarijiet oħra, lejn ir-rinfurzar tal-entraturi tal-bini, ir-rinfurzar tal-ħġieġ biex isir reżistenti għall-balel sparati u t-tqawwija tal-perimetru ta’ sigurtà barra l-bini fi Brussell u Strasburgu. Il-proġetti l-oħra fi Brussell kellhom x’jaqsma, pereżempju, mal-modernizzazzjoni tal-lifts fil-Bini Spinelli, postijiet għall-qari ta’ dokumenti kunfidenzjali jew sigrieti u ċ-Ċentru ta’ Akkoljenza għall-Viżitaturi l-ġdid fil-Bini Atrium. Il-proġetti l-ewlenin l-oħra fi Strasburgu kienu: xogħlijiet biex ikun hemm sigurtà fis-swali ddedikati għall-informatika u t-telekomunikazzjonijiet, it-tiswija ta’ diversi ħsarat u x-xogħol ta’ tiswija għall-materjal ta’ iżolament min-nirien fil-Bini Weiss, il-konverżjoni ta’ tliet swali għal-laqgħat fil-Bini Pflimlin f’uffiċċji open plan u l-installazzjoni ta’ Parlamentarium żgħir.

40.

Il-Partita 2 0 2 2 “Manutenzjoni, żamma, operat u tindif tal-bini” tkopri l-manutenzjoni tal-bini (eż. it-tindif, l-ispazji bil-pjanti, eċċ.), u l-manutenzjoni tat-tagħmir u l-installazzjonijiet fil-bini (il-manutenzjoni strutturali u ta’ tip ieħor, is-sistemi tekniċi tal-bini, il-liftijiet, eċċ.). It-tnaqqis fil-konfront tal-partita matul l-2015 huwa dovut prinċipalment għal razzjonalizzazzjoni tas-servizzi tat-tindif, żieda indiċjarja li kienet anqas milli kien mistenni u tnaqqis tal-ispejjeż f’kuntratt ta’ manutenzjoni wara li ġew innegozjati xi emendi fl-2015.

41.

L-impenji li jikkorrispondu għall-Partita 2 0 2 6 “Sigurtà u sorveljanza tal-bini” koprew essenzjalment l-ispejjeż tal-għassa u tas-sorveljanza tal-bini okkupat mill-Parlament fit-tliet postijiet tax-xogħol tiegħu u l-uffiċċji tal-informazzjoni. It-tnaqqis tal-impenji fl-2016 jirriżulta mit-tlestija tal-internalizzazzjoni tas-servizzi tas-sigurtà fi Strasburgu, mid-dispożizzjonijiet il-ġodda rigward il-ħinijiet tal-ftuħ u tal-għeluq tal-bini u mill-fatt li bini partikolari fil-Lussemburgu ma baqax jintuża.

42.

L-infiq li jikkorrispondi għall-Partita 2 1 0 0 “Informatika u telekomunikazzjonijiet — attivitajiet rikorrenti tal-funzjonament” jirrigwarda l-funzjonament tajjeb tas-sistemi tal-informatika u t-telekomunikazzjonijiet tal-Parlament u b’mod speċifiku s-sistemi taċ-ċentru tal-informatika u t-telekomunikazzjonijiet, l-informatika dipartimentali u l-ġestjoni tan-netwerk. Iż-żieda ta’ 3 % tal-impenji li jikkorrispondu għal din il-partita bejn l-2015 u l-2016 tirrigwarda l-kapaċitajiet dejjem jiżdiedu taċ-ċentru tad-data minn sena għall-oħra, b’riżultat taż-żieda fl-għadd tal-applikazzjonijiet fuq is-servers tiegħu. Barra minn hekk, il-kuntratti qafas għall-manutenzjoni jiġu indiċizzati annwalment, u dan irriżulta biex l-infiq kompla jiżdied matul l-2016.

43.

L-infiq li jikkorrispondi għall-Partita 2 1 0 1 “Informatika u telekomunikazzjonijiet — attivitajiet rikorrenti relatati mal-infrastruttura” tirrigwarda l-attivitajiet rikorrenti ta’ ġestjoni u manutenzjoni tas-sistemi tal-informatika u t-telekomunikazzjonijiet tal-Parlament, u b’mod speċifiku l-infrastrutturi relatati man-netwerks, mas-sistemi tal-wajers, mat-telekomunikazzjonijiet, mal-apparat individwali, kif ukoll mas-sistemi ta’ votazzjoni. Iż-żieda ta’ 10 % fl-impenji bejn l-2015 u l-2016 tista’ tiġi spjegata prinċipalment mill-fatt li l-impenji baġitarji għal kuntratt sinifikanti partikolari ġew imposti fuq il-baġit 2015 għal sitt xhur biss.

44.

L-infiq li jikkorrispondi għall-Partita 2 1 0 2 “Informatika u telekomunikazzjonijiet — attivitajiet rikorrenti relatati mas-sostenn ġenerali lill-utenti” tirrigwarda l-attivitajiet rikorrenti ta’ għajnuna u ta’ sostenn ġenerali lill-utenti fir-rigward tas-sistemi tal-informatika u t-telekomunikazzjonijiet tal-Parlament, b’mod partikolari s-servizzi ta’ sostenn għall-Membri, kif ukoll għall-applikazzjonijiet amministrattivi u leġiżlattivi. It-tnaqqis ta’ 7 % fl-impenji bejn l-2015 u l-2016 fil-konfront ta’ din il-partita jista’ jiġi spjegat prinċipalment mit-trasferimenti interni ta’ approprjazzjonijiet lejn partiti baġitarji oħra fil-qasam tal-ICT (26), b’segwitu għal riorganizzazzjoni u trasferiment interni ta’ attivitajiet u responsabilitajiet li ma setgħux jitbassru meta tħejja l-baġit 2016.

45.

L-impenji li jikkorrispondu għall-Partita 2 1 0 3 “Informatika u telekomunikazzjonijiet — attivitajiet rikorrenti ta’ ġestjoni tal-applikazzjonijiet ICT” jirrigwardaw l-attivitajiet rikorrenti ta’ ġestjoni tal-applikazzjonijiet ICT tal-Parlament Ewropew, b’mod partikolari l-applikazzjonijiet relatati mal-Membri, dawk relatati mal-komunikazzjoni kif ukoll l-applikazzjonijiet amministrattivi u leġiżlattivi. L-impenji li jikkorrispondu għal din il-partita baqgħu stabbli bejn l-2015 u l-2016.

46.

L-impenji li jikkorrispondu għall-Partita 2 1 0 4 “Informatika u telekomunikazzjonijiet — Investimenti fl-infrastrutturi” jkopru l-investiment fl-infrastrutturi tas-sistemi tal-informatika u t-telekomunikazzjonijiet tal-Parlament, inklużi s-sistemi taċ-ċentru tal-informatika u t-telekomunikazzjonijiet, in-netwerks, is-sistemi ta’ cables, kif ukoll is-sistemi ta’ videokonferenzi. Ir-raġuni ewlenija għat-tnaqqis ta’ 12 % fil-konfront ta’ din il-partita hija li tqiegħdu anqas approprjazzjonijiet għad-dispożizzjoni biex jiġi akkwistat tagħmir ICT individwali.

47.

L-impenji li jikkorrispondu għall-Partita 2 1 0 5 “Informatika u telekomunikazzjonijiet — Investimenti fil-proġetti” jkopru l-investiment relatat ma’ proġetti eżistenti jew ġodda fil-qasam tal-ICT. L-investiment jinkludi l-applikazzjonijiet relatati għall-Membri, l-applikazzjonijiet fil-qasam leġiżlattiv, amministrattiv u finanzjarju, kif ukoll dawk relatati mal-governanza tal-ICT. Iż-żieda ta’ 78 % fl-infiq li jikkorrispondi għal din il-partita mill-2015 għall-2016 hija relatata prinċipalment mal-approprjazzjonijiet addizzjonali li ġew ipprovduti permezz ta’ trasferimenti interni, b’segwitu għal riorganizzazzjoni u trasferiment interni tal-attivitajiet fl-2016 bl-intenzjoni li ċerti proġetti informatiċi jiġu ġestiti b’mod aktar deċentralizzat, l-iżvilupp ta’ proġetti ġodda, pereżempju fil-qasam tad-diġitalizzazzjoni tal-proċessi, u d-deċiżjoni li hemm bżonn li ċerti żviluppi fi ħdan il-programm e-Parliament jiġu indirizzati aktar kmieni milli kien previst preċedentement.

48.

Il-partiti kollha f’dan il-kapitolu pprovdew finanzjament għat-trasferiment ta’ tlaqqit C8. Saru sforzi kontinwi biex in-nefqa amministrattiva kurrenti tiġi kkontrollata. Il-bidla fil-konfront tal-Artikolu 2 3 7 “Rilokazzjonijiet” tista’ tiġi spjegata minn nuqqas ta’ ħaddiema fil-qasam tal-għamara, li wassal għal żieda fid-domanda għal ħaddiema esterni fil-qasam. Iż-żieda fil-konfront tal-Artikolu 2 3 8 “Nefqiet amministrattivi oħra” hija dovuta prinċipalment minn żieda fil-ħtiġijiet għal uniformijiet ikkollegati mal-proċessi ta’ internalizzazzjoni tas-servizzi tat-trasport tal-Membri (ix-xufiera) u tas-sigurtà.

49.

Fl-2016, saru 34 457 missjoni (27) (2015: 34 459), li b’kollox jirrappreżentaw 99 660 jum fuq missjoni (2015: 98 674). Il-biċċa l-kbira tal-missjonijiet involvew vjaġġi bejn it-tliet postijiet tax-xogħol tal-Parlament (Brussell - 4 456 missjoni; Strasburgu - 21 393; u l-Lussemburgu - 2 187). Apparti żieda fil-jiem fuq missjoni, iż-żieda fil-konfront tal-Artikolu 3 0 0 “Nefqiet għall-missjonijiet tal-istaff u vjaġġar fuq xogħol bejn it-tliet postijiet ta’ xogħol” tista’ tiġi spjegata permezz ta’ adattament tal-allowances għas-sussistenza għal kuljum u l-limiti massimi għall-akkomodazzjoni (mill-10 ta’ Settembru 2016), li sar għall-ewwel darba f’disa’ snin (28).

50.

Ir-raġuni ewlenija għaż-żieda fil-konfront tal-Artikolu 3 0 4 “Nefqiet varji għal laqgħat” hija d-domanda li kienet ogħla milli kien mistenni għall-forniment tar-rinfreski, b’mod partikolari l-ilma minerali, li jiġu serviti waqt il-laqgħat uffiċjali u amministrattivi.

51.

Il-Partita 3 2 4 4 tkopri s-sussidji mogħtija għall-gruppi ta’ viżitaturi u l-ispejjeż ta’ superviżjoni u ta’ infrastruttura relatati, l-ispejjeż għall-ġestjoni tal-programm “Euroscola” u l-finanzjament ta’ traineeships għall-multiplikaturi ta’ opinjoni minn pajjiżi terzi. L-impenji li jikkorrispondu għal din il-partita naqsu meta mqabbla ma’ dawk tal-2015, minħabba t-tnaqqis fl-għadd ta’ viżitaturi fl-2016 b’segwitu għall-attakki terroristiċi fi Brussell.

52.

Il-Partita 3 2 4 2 “Nefqiet għall-pubblikazzjoni, it-tagħrif u l-parteċipazzjoni f’manifestazzjonijiet pubbliċi” tkopri b’mod partikolari l-infiq fuq il-pubblikazzjonijiet ta’ informazzjoni, l-attivitajiet ta’ informazzjoni, ir-relazzjonijiet pubbliċi, il-parteċipazzjoni f’avvenimenti pubbliċi, fieri kummerċjali u wirjiet fl-Istati Membri u fil-pajjiżi kandidati, kif ukoll l-aġġornament tal-Osservatorju Leġiżlattiv (OEIL). Fl-2016, kien hemm żieda limitata minħabba l-fatt li fit-tieni semestru tnieda l-Programm tal-Iskejjel Ambaxxaturi tal-Parlament Ewropew fl-Istati Membri kollha. Dan il-programm jinkludi diversi attivitajiet u huwa mmirat biex joħloq netwerk ta’ skejjel, għalliema u studenti li jinvolvu rwieħhom mal-Parlament Ewropew, il-Membri tiegħu u l-Uffiċċji tal-Informazzjoni sabiex iżidu l-għarfien rigward id-demokrazija parlamentari Ewropea u l-valuri taċ-ċittadinanza Ewropea (ara l-paragrafu 117 hawn taħt).

53.

Il-Partita 3 2 4 8 “In-nefqa għall-informazzjoni awdjoviżiva” tkopri l-ispejjeż marbuta mal-baġit operattiv tas-settur awdjoviżiv, ix-xandir dirett fuq l-internet tas-seduti plenarji u tal-laqgħat tal-kumitati parlamentari, kif ukoll il-ħolqien ta’ arkivji adegwati li jiggarantixxu li l-pubbliku jkollu aċċess permanenti għal din l-informazzjoni. Iż-żieda sostanzjali fil-konfront ta’ din il-partita mill-2015 għall-2016 kienet riżultat ta’ diversi avvenimenti eċċezzjonali imprevisti li kellhom jiġu koperti u l-interess dejjem jikber tal-Membri u l-istazzjonijiet televiżivi ġodda għall-installazzjonijiet awdjoviżivi tad-DĠ COMM.

54.

Fl-2016, il-produzzjoni ta’ materjal awdjoviżiv iġġenerat 1 831 proġett fuq Europe by Satellite (pereżempju, seduti plenarji, laqgħat tal-kumitati u avvenimenti politiċi), is-servizz fotografiku kopra 4 009 avvenimenti (inklużi 2 127 talba mill-Membri) u ġew prodotti 1 841 proġett radjufoniku, 3 861 servizz bilwieqfa quddiem kamera fil-faċilità Voxbox, 1 038 proġett multimedjatiku u 2 106 proġett televiżiv. Is-sistema Teletrax (218-il stazzjon Ewropew li jirrappreżentaw 80 % tal-pubbliku Ewropew) wettqet monitoraġġ ta’ 208 stazzjonijiet li użaw xbihat prodotti mis-servizzi tal-Parlament. Dawn ix-xbihat intużaw 66 251 darba għal tul totali ta’ 610 sigħat.

55.

Iż-żieda ta’ 4 % fil-konfront tal-Partita 3 2 1 0 “Akkwist ta’ appoġġ espert għas-Servizz ta’ Riċerka tal-Parlament Ewropew, il-Bibljoteka u l-Arkivji” matul l-2015 tista’ tiġi spjegata minn żieda fid-domanda (u l-offerta) għall-proġetti ta’ riċerka, inkluża l-ħidma editorjali fuqhom, kif ukoll żieda fl-għadd ta’ avvenimenti li ġew organizzati. Barra minn hekk, l-ispejjeż għas-sorsi ta’ informazzjoni fuq l-internet kienu ogħla, peress li l-offerta hija mfassla speċifikament biex tissodisfa l-ħtiġijiet ta’ informazzjoni tal-Membri.

56.

It-tnaqqis fir-rigward tal-Partita 3 2 0 0 “Akkwist tal-opinjoni tal-esperti” mill-2015 għall-2016 hija dovuta prinċipalment għas-sospensjoni tal-għarfien espert relatat mal-proġetti informatiċi li ttardjaw.

57.

L-Artikolu 4 0 0 “Nefqa amministrattiva kurrenti u nefqa marbuta mal-attivitajiet politiċi ta’ informazzjoni tal-gruppi politiċi u tal-Membri mhux affiljati” jkopri l-ispejjeż segretarjali, amministrattivi u ta’ funzjonament għall-gruppi politiċi u l-Membri mhux affiljati, kif ukoll l-ispejjeż marbuta mal-attivitajiet politiċi u ta’ informazzjoni tagħhom. Iż-żieda ta’ 3 % tal-impenji fil-konfront ta’ dan l-Artikolu matul l-2015 hija dovuta prinċipalment għall-fatt li l-2016 kienet l-ewwel sena sħiħa ta’ eżistenza tal-Grupp ENF (li twaqqaf nhar il-15 ta’ Ġunju 2015).

58.

L-Artikoli 4 0 2 u 4 0 3 huma relatati mal-għotjit li jintgħataw bħala appoġġ għall-programmi ta’ ħidma annwali tal-partiti politiċi fil-livell Ewropew jew tal-fondazzjonijiet politiċi fil-livell Ewropew. Il-partiti politiċi fil-livell Ewropew jikkontribwixxu għall-formazzjoni ta’ kuxjenza Ewropea u għall-espressjoni tar-rieda politika taċ-ċittadini tal-Unjoni (29). Fondazzjoni politika fil-livell Ewropew hi “entità jew network ta’ entitajiet li […] ikunu affiljati ma’ partit politiku f’livell Ewropew u li permezz tal-attivitajiet tagħhom, fil-limiti tal-għanijiet u l-valuri fundamentali mħaddna mill-Unjoni Ewropea, isostnu u jikkomplementaw l-għanijiet tal-partit politiku f’livell Ewropew” (30).

59.

Fil-każ tal-partiti politiċi u l-fondazzjonijiet Ewropej, ir-rata ta’ kofinanzjament massimu possibbli mill-Parlament hija ta’ 85 % tal-ispejjeż eliġibbli (31). Iż-żieda fil-konfront taż-żewġ artikoli mill-2015 għall-2016 tirriżulta mid-deċiżjonijiet tal-Bureau dwar il-konċessjoni ta’ għotjiet.

60.

Il-Membri jistgħu jużaw l-allowance tagħhom għall-assistenza parlamentari biex jimpjegaw assistenti parlamentari akkreditati (li jkunu jaħdmu fi Brussell jew Strasburgu taħt statut speċifiku), jew assistenti lokali (32) (li jaħdmu abbażi ta’ kuntratti taħt id-dritt nazzjonali fil-kostitwenzi tal-Membri). Fil-każ tal-assistenti lokali, l-allowance tkopri l-fatturi, is-salarji u l-ispejjeż tal-ivvjaġġar. Fil-każ tal-assistenti akkreditati, tkopri s-salarji, l-allowances, l-ispejjeż tal-missjonijiet, kif ukoll l-ispejjeż relatati mal-korsijiet ta’ taħriġ estern.

61.

Iż-żieda fl-impenji mill-2015 għall-2016 hija dovuta għall-fatt li, b’segwitu għal deċiżjoni mill-awtorità baġitarja, il-pakkett għall-assistenza parlamentari żdied mill-1 ta’ Jannar 2016 b’EUR 1 500 fix-xahar u għal kull Membru.

62.

Sal-31 ta’ Diċembru 2016 kien hemm 1 924 assistent parlamentari akkreditat jaħdmu mal-Parlament, 2 247 assistent lokali li kellhom kuntratt ta’ impjieg ma’ Membru (inklużi 68 impjegati minn gruppi ta’ Membri), 685 fornitur ta’ servizzi (apparti l-aġenti tal-pagament) u 731 aġent tal-pagament (inklużi 34 permezz ta’ gruppi). Bħala medja, kull Membru impjega 2,6 assistenti akkreditati u 3,0 assistenti lokali (33). Fl-2016, l-għadd tal-assistenti lokali impjegati minn kull Membru varja bejn iż-żero u għoxrin. Għalkemm 122 Membru ma kellhom l-ebda assistent lokali impjegat fi tmiem l-2016, 19-il Membru rreklutaw aktar minn 10 impjegati fl-Istat Membru tal-elezzjoni tagħhom. Barra minn hekk, 423 Membru ma kellhom l-ebda kuntratt fis-seħħ ma’ fornituri ta’ servizzi fi tmiem l-2016.

63.

Il-pagamenti tal-assistenza parlamentari fl-2016 fir-rigward tal-assistenti lokali li jgħixu barra miż-żona tal-euro saru billi ntużat rata tal-kambju stabbilita għas-sena kollha bejn l-euro u l-muniti l-oħra (ir-rata ta’ Diċembru 2015) bi qbil mar-regoli fis-seħħ.

64.

Waqt il-laqgħa tiegħu tas-26 ta’ Ottubru 2015, il-Bureau adotta diversi bidliet għall-Miżuri ta’ Implimentazzjoni tal-Istatut tal-Membri. Dawn il-bidliet irrikjedew adattament għal prattiki ġodda kemm min-naħa tal-amministrazzjoni u kemm min-naħa tal-Membri. Id-dispożizzjonijiet il-ġodda ġew implimentati tul l-2016.

65.

Dan il-kapitolu rrappreżenta 0,02 % tal-impenji tal-2016, u b’kollox ammonta għal EUR 420 000 (EUR 400 000 fl-2015).

66.

Il-kapitoli f’dan it-titolu jinvolvu biss approprjazzjonijiet proviżorji li jistgħu jiġu impenjati biss wara li jiġu trasferiti lejn partita operattiva. It-trasferimenti tal-approprjazzjonijiet provviżorji qed jiġu indirizzati fit-Taqsima I ta’ dan ir-rapport. L-approprjazzjonijiet inizjali li jikkorrispondu għal dan it-titolu kienu ta’ EUR 6 000 000 (2015: EUR 11 700 000), ammont li huwa ekwivalenti għal 0,3 % tal-baġit totali għall-2016.

67.

Fl-2016, l-attività leġiżlattiva żdiedet b’mod sostanzjali, peress li l-Parlament kien qed joqrob lejn nofs il-leġiżlatura 2014-2019 tiegħu. Id-Direttorati Ġenerali tal-Parlament għas-Servizzi ta’ Riċerka Parlamentari, għall-Politiki Interni u għall-Politiki Esterni pprovdew assistenza u għarfien lill-Membri u lill-kumitati parlamentari fil-ħidma parlamentari tagħhom. Komplew ir-razzjonalizzazzjoni u l-modernizzazzjoni tal-oqsma fundamentali tal-Amministrazzjoni tal-Parlament.

68.

Avveniment notevoli li seħħ fil-livell politiku fl-2016 kien ir-referendum li sar nhar it-23 ta’ Ġunju 2016 fir-Renju Unit (“il-vot dwar Brexit”). Il-President tal-Parlament issottolinja li, sakemm ir-Renju Unit jibqa’ membru sħiħ tal-Unjoni Ewropea, il-Membri u l-persunal Brittaniċi tal-Parlament Ewropew se jgawdu mill-istess drittijiet u obbligi li għandhom il-Membri u l-persunal l-oħra kollha tal-istituzzjoni. Ir-referendum kellu impatt konsiderevoli fuq id-Direttorati Ġenerali politiċi, li ntalbu jsegwu dan il-proċess u jħejju materjal analitiku abbażi ta’ ħidma ta’ ġbir ta’ informazzjoni biex jikkunsidraw l-impatt tat-tluq tar-Renju Unit fuq l-oqsma ta’ politika u l-leġiżlazzjoni fl-oqsma rispettivi tagħhom.

69.

Is-sena 2016 kienet ikkaratterizzata wkoll minn kuntest ta’ sigurtà dejjem tiddeterjora u attakki terroristiċi. Nhar it-22 ta’ Marzu 2016, seħħew attakki kkoordinati fl-ajruport ta’ Brussell u fl-Istazzjon tal-Metro ta’ Maelbeek, qrib il-bini tal-Parlament fi Brussell. L-istat ta’ allert fil-Parlament żdied għal-livell oranġjo matul il-perjodu bejn it-22 u d-29 ta’ Marzu u baqa’ fil-livell isfar għall-bqija tas-sena fit-tliet postijiet tax-xogħol u fl-Uffiċċji tal-Informazzjoni. L-attakk terroristiku qanqal azzjoni immedjata biex titqawwa s-sigurtà, b’mod speċjali fi Brussell, iżda wassal ukoll biex l-attivitajiet tal-Parlament ġew eżaminati mill-ġdid fid-dawl ta’ din ir-restrizzjoni.

70.

L-objettivi segwiti u r-riżultati miskuba fl-2016, li jinsabu ppreżentati hawn taħt, huma bbażati fuq il-prijoritajiet u d-deċiżjonijiet adottati mill-Bureau fl-2016, fuq il-linji gwida adottati mill-Parlament fir-riżoluzzjonijiet baġitarji tiegħu u fuq l-objettivi u r-riżultati tal-Parliamentary Project Portfolio (34).

71.

Il-kuntest imqalleb fil-qasam tas-sigurtà inkoraġġixxa t-tisħiħ tal-kooperazzjoni fil-qasam tas-sigurtà mal-awtoritajiet nazzjonali fil-pajjiżi ospitanti, b’mod partikolari mal-awtoritajiet Belġjani.

72.

Inħoloq Grupp ta’ Ħidma ta’ Livell Għoli dwar il-kwistjonijiet fil-qasam tas-sigurtà, li jinkludi għadd ferm limitat ta’ parteċipanti. Ġew diskussi żewġ kwistjonijiet essenzjali: il-ħtieġa ta’ definizzjoni ċara u rikonoxxuta tad-distrett Ewropew u l-implimentazzjoni ta’ korp speċifiku fi ħdan l-awtoritajiet Belġjani biex jeżamina, jissorvelja u jieħu azzjoni rigward kwalunkwe kwistjoni relatata mas-sigurtà ta’ dan id-distrett. Ġew indirizzati kwistjonijiet oħra ta’ ambitu aktar ġenerali, bħall-kopertura bis-CCTV, il-miżuri ta’ sigurtà speċifiċi għall-avvenimenti li jseħħu fl-ispazji pubbliċi, il-formalizzazzjoni ta’ ftehim dwar preżenza tal-pulizija u militari anke f’sitwazzjoni ta’ allert minimu u l-kontrolli ta’ sigurtà fuq il-fornituri esterni ta’ servizzi li jintużaw mill-istituzzjonijiet Ewropej. Intlaħaq qbil mal-awtoritajiet nazzjonali dwar dawn is-suġġetti differenti.

73.

Nhar id-9 ta’ Marzu 2015, il-Bureau adotta l-proġett iPACs (integrated Physical Access Control System — sistema integrata għall-kontroll tal-aċċess fiżiku) intenzjonat biex jinkisbu tekniki ta’ sigurtà ġodda u, b’hekk, biex tissaħħaħ is-sigurtà tal-istituzzjoni billi tiġi mgħammra b’għodda teknoloġika moderna, integrata, mhux invażiva u kapaċi tassimila l-iżviluppi teknoloġiċi tal-ġejjieni.

74.

Bi qbil mad-deċiżjoni tal-Bureau, ġie stabbilit kalendarju li jipprevedi implimentazzjoni gradwali fit-tliet postijiet tax-xogħol u durata globali stmata fuq ħames snin.

75.

L-implimentazzjoni ta’ dan il-proġett diġà nbdiet waqt is-sena finanzjarja 2015, bil-finalizzazzjoni tal-proċeduri ta’ sejħa għal offerti għall-akkwist ta’ għodda informatika u ta’ għarfien espert.

76.

Matul is-sena finanzjarja 2016, ġew finalizzati proċeduri ta’ sejħa għal offerti relatati ma’ apparat tekniku.

77.

Barra minn hekk, il-Bureau talab it-tisħiħ u l-organizzazzjoni mill-ġdid tal-entrati għal kull binja tal-Parlament fit-tliet postijiet tax-xogħol abbażi ta’ kunċett ta’ sigurtà ġdid. F’dan il-kuntest, għandu jiġi nnotat li l-entrati kollha tad-diversi binjiet tal-Parlament fi Brussell li kienu rinnovati matul is-snin finanzjarji 2015 u 2016, għal din l-okkażjoni ġew mgħammra b’tagħmir ġdid għall-kontroll fuq l-aċċess u ġew integrati fis-sistema iPACS il-ġdida.

78.

Il-badges il-ġodda b’teknoloġija sigura ġdida se jibdew jiġu prodotti b’mod gradwali matul is-sena finanzjarja 2017, jiġifieri ftit tard meta mqabbel mal-kalendarju inizjali tal-implimentazzjoni. Dan id-dewmien irriżulta mill-għażla li dawn il-badges ikollhom ċippa tal-aħħar ġenerazzjoni u mid-disponibilità ta’ din it-teknoloġija avvanzata fuq is-suq.

79.

Mill-2014 ’l hawn, il-Bureau ħa sensiela ta’ deċiżjonijiet maħsuba biex il-livell ta’ sigurtà u ta’ protezzjoni tal-bini tal-Parlament jiġi adattat għat-tipi l-ġodda ta’ riskji, peress li dawn il-binjiet ġew akkwistati u konċepiti qabel it-terroriżmu sar mifrux estensivament. F’April 2016, il-Bureau approva aġġornament komprensiv tax-xogħlijiet kollha għas-sistemi ta’ sigurtà u l-investimenti kollha fil-qasam li kienu diġà ġew approvati fir-rigward ta’ Brussell u Strasburgu, kif ukoll il-programmazzjoni tagħhom għas-snin finanzjarji 2016 u 2017.

80.

B’mod parallel, il-Bureau adotta wkoll sensiela ta’ miżuri bl-għan li jissaħħu s-sigurtà u l-livell ta’ protezzjoni tal-binjiet ċentrali tal-Parlament fi Brussell u fi Strasburgu kontra r-riskji ta’ intrużjoni jew ta’ attentati permezz tal-ħolqien ta’ perimetru estern madwar dawn il-binjiet.

81.

Il-Bureau għalhekk talab it-tisħiħ u l-organizzazzjoni mill-ġdid tal-entrati għal kull binja tal-Parlament fit-tliet postijiet tax-xogħol abbażi ta’ kunċett ta’ sigurtà ġdid li jkun kapaċi jiggarantixxi kemm ambjent tax-xogħol mingħajr periklu u seren għall-attivitajiet parlamentari, kif ukoll iż-żamma tal-ftuħ fir-rigward taċ-ċittadini li jikkaratterizza lill-Istituzzjoni.

82.

Waqt il-laqgħa tiegħu tal-11 ta’ April 2016, il-Bureau adotta l-proposta għall-internalizzazzjoni tas-servizz tat-trasport tal-Membri. L-objettiv ewlieni tal-internalizzazzjoni huwa t-titjib tas-sigurtà tal-Membri peress li l-Parlament se jkun jista’ jwettaq investigazzjonijiet ta’ sigurtà rigward ix-xufiera qabel jiġu impjegati u jipprovdi taħriġ u monitoraġġ kontinwi tal-persunal tiegħu. Ir-reklutaġġ tax-xufiera l-ġodda taħt l-istatut ta’ aġent kuntrattwali beda mill-bidu tal-2017.

83.

L-2016 kienet l-ewwel sena meta s-Servizz ta’ Riċerka għall-Membri kien kompletament operattiv f’termini tal-korp tal-persunal tiegħu, il-livell ta’ speċjalizzazzjoni politika tiegħu u l-firxa ta’ prodotti u servizzi tiegħu għall-Membri. Apparti li wieġeb diversi mistoqsijiet mingħand il-Membri jew l-uffiċċji tagħhom, is-Servizz iġġenera wkoll għadd dejjem jikber ta’ pubblikazzjonijiet għall-Membri u l-istituzzjoni kollha kemm hi, li kollha ġew iddisinjati biex ikunu ċari, b’ħafna kontenut, aċċessibbli u faċli biex jinqraw.

84.

Hemm diversi tipi ta’ pubblikazzjonijiet, li jvarjaw fit-tul u fil-livell ta’ dettall. In-noti “Mad-daqqa t’għajn” jipprovdu sommarju ta’ paġna jew tnejn dwar tema partikolari, filwaqt li l-“Briefings” joffru ħarsa aktar fid-dettall dwar politika, kwistjoni jew biċċa leġiżlazzjoni u jkollhom tul li jlaħħaq it-tnax-il paġna. L-“Analiżijiet fil-Fond” u l-“Istudji” jipprovdu analiżi ferm aktar komprensiva u dettaljata dwar l-istess elementi. Kumplessivament, fl-2016 is-Servizz ta’ Riċerka għall-Membri ġġenera 746 pubblikazzjoni stampata, li minnhom 330 kienu noti “Mad-daqqa t’għajn”, 384 kienu “Briefings” u 32 kienu “Analiżijiet fil-Fond” u “Studji”.

85.

Is-Servizz ta’ Riċerka għall-Membri ħadem ukoll mill-qrib maż-żewġ kumitati konsultattivi tal-UE — il-Kumitat Ekonomiku u Soċjali Ewropew u l-Kumitat tar-Reġjuni — kif previst fil-ftehimiet ta’ kooperazzjoni li ġew iffirmati magħhom fl-2014, u pprovda servizzi lil dawn il-korpi billi wieġeb għal talbiet speċifiċi għal riċerka u appoġġ f’forom oħra. Fl-2015 u fl-2016, ipprovda madwar 150 xogħol ta’ dan it-tip, skont kif inhu previst f’dawk il-ftehimiet.

86.

Il-Librerija tal-Parlament, apparti l-funzjoni ta’ librerija klassika, tipprovdi wkoll lill-Membri u l-persunal b’aċċess diġitali u fuq l-internet għal firxa estensiva ħafna ta’ sorsi ta’ għarfien, inklużi ħafna ġurnali, databażijiet u sorsi ta’ aħbarijiet u informazzjoni oħra b’abbonament.

87.

Barra minn hekk, l-unità l-ġdida bir-responsabilità għad-dritt komparattiv li nħolqot lejn tmiem l-2015, bdiet b’suċċess il-proċess li tibni ġabra ta’ riferiment f’dan il-qasam, kemm fuq livell fiżiku u kemm fuq livell elettroniku, u li tistabbilixxi kollegamenti ma’ libreriji komparabbli madwar id-dinja. F’Novembru 2016, ospitat konferenza importanti dwar ir-rwol tal-qrati kostituzzjonali fil-governanza f’diversi livelli. B’mod parallel, l-unità ppubblikat seba’ studji dwar il-qrati kostituzzjonali ta’ diversi stati tal-UE u mhux u dwar il-Qorti tal-Ġustizzja tal-Unjoni Ewropea.

88.

Fl-2016, l-attività leġiżlattiva żdiedet b’mod sostanzjali, peress li l-Parlament kien qed joqrob lejn nofs il-leġiżlatura 2014-2019 tiegħu. Dan wassal biex il-produzzjoni fl-oqsma tal-Valutazzjonijiet tal-Impatt u l-Valur Miżjud Ewropew kienet konsiderevolment ogħla milli kienet fis-snin preċedenti.

89.

Fl-2016, ġew ippubblikati seba’ rapporti dwar kemm jiġi jiswa’ nuqqas ta’ azzjoni min-naħa tal-Ewropa (35), inklużi rapporti dwar l-ikkompletar tas-suq uniku, l-ekonomija kollaborattiva, ir-reżiljenza tal-Unjoni Bankarja, iż-żona ta’ riċerka integrata, il-kriminalità organizzata u l-korruzzjoni u kemm jiswew il-kontrolli fil-fruntieri fiż-żona Schengen (kemm jiġi jiswa’ jekk il-Ftehim ta’ Schengen ma jibqax japplika). Fl-2016, tlestew ħames “Valutazzjonijiet tal-Valur Miżjud Ewropew” dwar kwistjonijiet, inklużi mekkaniżmu tal-UE favur l-istat tad-dritt u d-drittijiet fundamentali, ir-rikonoxximent transkonfinali tal-adozzjonijiet, u l-koordinament tal-politiki dwar it-taxxa korporattiva fl-UE. Barra minn hekk ġew ippubblikati żewġ testi ta’ tgħarrif dwar il-Valur Miżjud Ewropew fl-Azzjoni, li jirrilevaw il-valur miżjud tal-politiki eżistenti tal-UE, dwar il-Politika ta’ Sigurtà u ta’ Difiża Komuni u dwar il-politika tal-UE dwar l-iżvilupp.

90.

Hekk kif il-produzzjoni leġiżlattiva tal-Kummissjoni laħqet ir-ritmu operattiv tagħha, l-2016 kien ikkaratterizzat minn żieda importanti ferm fl-għadd tal-proposti leġiżlattivi li tressqu lill-Parlament u konsegwentement fl-għadd ta’ valutazzjonijiet tal-impatt tal-Kummissjoni li kienu jirrikjedu evalwazzjoni: l-amministrazzjoni tal-Parlament ipproduċiet 36 evalwazzjoni inizjali — kważi tliet darbiet aktar milli pproduċiet fl-2015.

91.

Barra minn hekk, ir-regoli l-ġodda dwar ir-rapporti ta’ implimentazzjoni li ġew adottati mill-Konferenza tal-Presidenti f’April 2016 ikkontribwew għal żieda sinifikanti fl-għadd tal-“Valutazzjonijiet tal-Implimentazzjoni Ewropea”: fl-2016 ġew prodotti 13-il valutazzjoni ta’ dan it-tip.

92.

Matul is-sena ġiet organizzata firxa estensiva ta’ studji, sessjonijiet ta’ ħidma u attivitajiet oħra orjentati lejn il-ġejjieni, fuq talba tal-Panel ta’ Valutazzjoni tal-Għażliet Xjentifiċi u Teknoloġiċi (STOA) li jinkludi 25 Membru tal-Parlament Ewropew, maħtura minn disa’ kumitat parlamentari. Fl-2016, ġew prodotti 10 pubblikazzjonijiet f’dan il-qasam, li ġew ippubblikati fuq is-sit tal-Parlament fuq l-internet.

93.

Biex nagħlqu, f’April 2015 ġiet stabbilita unità ġdida responsabbli biex tistudja t-Tendenzi Globali, bl-intenzjoni li tidentifika, issegwi u tanalizza t-tendenzi globali fuq żmien medju u twil, b’mod speċjali l-bidliet fl-ambjenti ekonomiċi, soċjali u politiċi internazzjonali, li jistgħu jaffettwaw lill-Unjoni Ewropea fis-snin li ġejjin. Din iżżomm lill-Membri informati dwar it-tendenzi ta’ dan it-tip u l-implikazzjonijiet potenzjali tagħhom fuq il-politiki, billi tippubblika noti ta’ tgħarrif u torganizza seminars. Dawn il-pubblikazzjonijiet jinkludu Tendenzjometru Globali ġdid, li għandu jiġi prodott minn tal-anqas darbtejn fis-sena, u li janalizza l-bidliet li potenzjalment ikunu importanti għall-Unjoni. Matul l-2016 l-unità ppubblikat l-ewwel nota ta’ tgħarrif tagħha dwar perspettiva fit-tul rigward il-migrazzjoni u l-UE, u segwietha bl-ewwel edizzjoni tat-Tendenzjometru Globali l-ġdid.

94.

L-2016 kien ikkaratterizzat minn livell għoli ta’ attività leġiżlattiva u mhux. Apparti l-attivitajiet ċentrali tradizzjonali matul il-fażi leġiżlattiva, il-kumitati u s-segretarjati tagħhom komplew jinvestu ammont konsiderevoli ta’ ħidma fid-definizzjoni tal-prijoritajiet interistituzzjonali, kif ukoll fil-fażi ta’ konsultazzjoni u fil-fażi ta’ skrutinju. F’dan il-kuntest, ġew organizzati 391 laqgħa tal-kumitati parlamentari u 135 laqgħa tat-trilogu fl-2016.

95.

B’mod partikolari, ġew ipprovduti għarfien espert u appoġġ komprensivi għat-tħejjija tal-pożizzjoni tal-Parlament dwar l-ewwel proposta li qatt saret għar-reviżjoni tal-Qafas Finanzjarju Pluriennali (QFP), permezz tat-tmexxija tal-Kumitat għall-Baġits u l-involviment ta’ għadd kbir ta’ partijiet ikkonċernati. Dan ippermetta li ssir analiżi fil-fond dwar il-funzjonament tal-QFP attwali u li jiġi adottat rapport b’ambitu mifrux sew, bl-inklużjoni ta’ linji gwida li ppermettew li jsiru diskussjonijiet estensivi u li pprovdew kontribut prezzjuż għall-proposta tal-Kummissjoni.

96.

Fl-2016, ġie pprovdut ukoll għarfien espert sostanzjali fil-proċess ta’ reviżjoni tar-Regoli ta’ Proċedura permezz tat-tmexxija tal-grupp ta’ ħidma tal-Kumitat AFCO u permezz ta’ tim ta’ proġett fil-livell amministrattiv imwaqqaf biex jappoġġalu ħidmietu.

97.

Nhar it-13 ta’ April 2016, ġie ffirmat ftehim interistituzzjonali ġdid dwar it-tfassil aħjar tal-liġijiet. L-amministrazzjoni tal-Parlament ikkontribwiet b’mod estensiv u b’suċċess għall-preparamenti għan-negozjati u, wara li ġie ffirmat, ħadmet b’mod attiv għall-implimentazzjoni ta’ dan il-ftehim u biex jingħata segwitu.

98.

Sehem sostanzjali ferm tal-għarfien espert meħtieġ għall-ħidma tal-kumitati jiġi prodott internament u, f’dawn l-aħħar snin, qiegħed jiżdied. Fl-2016, ġew prodotti madwar 382 (fl-2015: 352 u fl-2014: 218) studju intern u dokument ta’ tgħarrif (inkluż madwar 100 aġġornament ta’ wħud li diġà kienu jeżistu).

99.

Fl-2016, il-ħames kumitati u sottokumitati fil-qasam tal-politiki esterni żviluppaw skrutinju u monitoraġġ rinforzati tal-politika barranija tal-UE, fost affarijiet oħra, permezz tal-iskrutinju tal-implimentazzjoni tal-istrumenti ta’ finanzjament u sorveljanza baġitarja aktar estensiva, skambji ta’ fehmiet regolari mal-Viċi President/ir-Rappreżentant Għoli għall-Politika Barranija tal-Kummissjoni Ewropea, il-Kummissarji responsabbli mir-relazzjonijiet esterni, is-SEAE (36) u l-uffiċjali ta’ livell għoli tal-Kummissjoni rigward il-kwistjonijiet ġeografiċi u settorjali ta’ natura kruċjali. Fil-qasam leġiżlattiv, il-kumitati żvolġew rwol essenzjali fil-ħidma tat-tim tan-negozjati tal-Parlament f’għadd ta’ laqgħat tat-trilogu, anke rigward fajls sensittivi (pereżempju, ir-regolament dwar il-minerali ta’ kunflitt, ir-regolament aġġornat kontra t-tortura).

100.

Il-Parlament ħa sehem ukoll fin-negozjati interistituzzjonali dwar l-arranġamenti għall-kooperazzjoni u l-kondiviżjoni ta’ informazzjoni fir-rigward tal-ftehimiet internazzjonali. Barra minn hekk, komplew jiġu implimentati l-arranġamenti operattivi dwar l-aċċess għad-dokumenti relatati mat-TTIP, li ppermettew li jiġi ttrattat ammont sostanzjali ta’ dokumenti u pprovdew aċċess bla preċedent għad-dokumenti relatati man-negozjati kummerċjali li jkunu għaddejjin.

101.

L-amministrazzjoni tal-Parlament implimentat ukoll il-ftehim amministrattiv li ntlaħaq mas-SEAE fir-rigward tal-kondiviżjoni tar-rapportar politiku, fost affarijiet oħra, billi installat kamra tal-qari sikura u tieħu ħsieb il-ġestjoni tagħha ta’ kuljum, u billi bdiet tuża s-sistema għat-trażmissjoni bil-posta elettronika b’sigurtà.

102.

Fir-rigward tad-Delegazzjonijiet Interparlamentari, ingħatat attenzjoni partikolari biex titkompla l-implimentazzjoni konsistenti tal-metodi u l-modalitajiet ta’ ħidma relatati mal-iskrutinju u li ġew introdotti fl-2015 u riveduti fil-bidu tal-2016.

103.

Din kienet immirata biex tiżgura l-valutazzjoni u l-monitoraġġ effikaċi tal-ftehimiet internazzjonali, il-livell ta’ implimentazzjoni tal-istrumenti finanzjarji tal-UE, l-impatt tal-programmi u l-proġetti ffinanzjati mill-UE, is-segwitu li jingħata għar-rakkomandazzjonijiet maħruġa mill-missjonijiet ta’ osservazzjoni elettorali, is-sitwazzjoni tad-drittijiet tal-bniedem u l-monitoraġġ tal-leġiżlazzjoni fis-seħħ jew fil-fażi tat-tfassil. B’kollox matul il-perjodu referenzjarju ġew prodotti 66 rapport dwar missjonijiet fid-dettall, li huma magħrufa wkoll bħala “dokumenti ta’ rapportar”, u li l-biċċa l-kbira tagħhom kienu ffokati fuq il-monitoraġġ tal-ftehimiet internazzjonali (23) u l-istrumenti finanzjarji (16), is-segwitu għar-rakkomandazzjonijiet tal-missjonijiet ta’ osservazzjoni elettorali (7) u l-impatt tal-leġiżlazzjoni fis-seħħ jew fil-fażi ta’ tfassil (6). Tħejjew ukoll linji gwida ad hoc bl-intenzjoni li jiġu ssemplifikati t-tħejjija u t-trażmissjoni tad-dokumenti ta’ rapportar u li jittejbu l-aspetti l-oħra tal-ħidma tad-delegazzjonijiet (inkluż il-ġbir tad-data għal finijiet ta’ statistika).

104.

Id-dipartiment tematiku fil-qasam tal-politiki esterni kompla bl-approċċ integrat tiegħu fl-attività ta’ komunikazzjoni tiegħu billi ppubbliċizza ħidmietu fuq is-sit tat-Think Tank tal-PE fuq l-internet, is-sit komuni tad-dipartimenti tematiċi fuq l-intranet u billi kkontribwixxa għal deskrizzjoni ġenerali ta’ kull xahar tal-attivitajiet tad-dipartimenti tematiċi. Barra minn hekk, f’Ġunju 2016 huwa nieda l-bullettin tiegħu ta’ kull xahar.

105.

Bl-intenzjoni li jiżviluppa aktar kollegamenti mal-komunitajiet akkademiċi, dawk tal-grupp ta’ riflessjoni u l-organizzazzjonijiet internazzjonali rilevanti, l-unità tad-dipartiment tematiku organizzat 13-il pjattaforma tematika, żewġ forums dwar id-diplomazija u żewġ diskussjonijiet madwar mejda. Huwa intensifika l-kooperazzjoni u l-iskambju ta’ informazzjoni mad-Dipartimenti dwar l-Affarijiet Politiċi u d-Diplomazija Pubblika tan-NATO u l-laqgħat informali fil-livell tal-konsulenti saru ħaġa regolari (biennali).

106.

Il-maġġoranza tal-attivitajiet relatati mal-appoġġ għad-demokrazija ġew organizzati fis-sitt pajjiżi prijoritarji adottati mill-Grupp għas-Sostenn għad-Demokrazija u Koordinazzjoni tal-Elezzjonijiet (l-Ukrajna, il-Moldova, it-Tuneżija, il-Marokk, it-Tanzanija u l-Myanmar) u fir-reġjun prijoritarju (il-Balkani tal-Punent u t-Turkija). FL-2016 ġew organizzati disa’ delegazzjonijiet ta’ osservazzjoni elettorali (fl-Uganda, il-Perù, il-Mongolja, iż-Żambja, il-Gabon, il-Ġordan, il-Georgia, il-Moldova u l-Ghana).

107.

B’mod partikolari, f’Marzu 2016, il-Parlament organizza l-Ġimgħa tal-Ukrajna, avveniment ta’ tlitt ijiem għat-tnedija tal-attivitajiet għall-bini tal-kapaċitajiet mal-Verkhovna Rada. Ħadu sehem fil-programm 80 Membru u persunal ta’ livell għoli. B’riżultat tal-Ġimgħa tal-Ukrajna, il-Parlament iffirma Memorandum ta’ Qbil mal-Verkhovna Rada biex tinbena sħubija mill-qrib fl-iżvilupp ta’ attivitajiet għall-bini tal-kapaċitajiet ma’ pajjiż li qiegħed fil-quċċata tal-prijoritajiet politiċi għall-Parlament.

108.

Il-programm ta’ appoġġ tal-2016 għall-parlamenti tal-Balkani tal-Punent u tat-Turkija pprova sessjonijiet għall-bini tal-kapaċitajiet rigward firxa estensiva ta’ temi ta’ politiki, bħall-politika dwar l-immigrazzjoni u l-ażil jew in-nondiskriminazzjoni tal-persuni b’diżabilità. Dan saħħaħ id-djalogu parlamentari u intensifika s-sjieda reġjonali. Id-deputati u l-persunal tal-parlamenti tal-pajjiżi kandidati ġew esposti għall-politiki u l-proċessi deċiżjonali tal-UE, permezz ta’ dibattiti mal-Membri parteċipanti, li għenuhom jifhmu u jirrispettaw il-valuri tal-UE u l-kriterji għall-adeżjoni.

109.

Il-proġett e-Parliament huwa mmirat biex jipprovdi lill-Membri b’għodda għall-awturi biex ifasslu r-rapporti u jintegrawhom fil-katina ta’ produzzjoni tat-testi leġiżlattivi. Għandu x’jaqsam ukoll mad-disinn mill-ġdid tal-applikazzjonijiet tal-Plenarja. Matul l-2016, tlestiet l-introduzzjoni progressiva tal-minuti verbatim u l-bord tal-governanza għal e-Parliament adotta l-programm ta’ ħidma sal-2019 (tmiem il-leġiżlatura).

110.

Proġett ieħor (ICT4MEPs) itejjeb is-servizzi tat-teknoloġiji tal-informazzjoni u tal-komunikazzjoni li jiġu offruti lill-Membri u lill-persunal tagħhom filwaqt li jkunu fil-kostitwenzi tagħhom billi jipprovdu aċċess aktar estensiv għar-riżorsi u l-applikazzjonijiet tal-Parlament. Il-Fażi 1 tal-proġett ġiet implimentata f’Ottubru 2016, u pprovdiet ġestjoni tal-aċċess għal massimu ta’ 1 000 Assistent Lokali. Barra minn hekk, ġie attivat numru telefoniku bla ħlas fit-28 Stat Membru biex joffri firxa aktar estensiva ta’ appoġġ li jkopri ż-żoni orarji kollha tal-UE, bl-Ingliż, bil-Franċiż u bil-Ġermaniż. Huwa mmirat biex jipprovdi firxa sħiħa ta’ servizzi addizzjonali li se jkunu disponibbli minn barra l-Parlament, matul l-2017. Fl-2016 żdiedu funzjonalitajiet ġodda għas-sistemi aċċessibbli minn barra l-Parlament, bħat-tibdil tal-password.

111.

F’nota mis-Segretarju Ġenerali lill-Bureau bid-data tat-30 ta’ Novembru 2016, ġiet deskritta l-qagħda attwali tal-proġetti u l-attivitajiet ewlenin fil-qasam tal-komunikazzjoni u l-akkoljenza tal-viżitaturi li seħħew minn tmiem l-2014 ’l hawn. Dawn il-proġetti u l-attivitajiet saru apparti l-attività ta’ komunikazzjoni ta’ kuljum. Huma jħaddnu attenzjoni qawwija fuq it-tisħiħ tal-istrateġija tal-Parlament dwar il-viżitaturi, ir-relazzjonijiet mal-media, il-forniment ta’ għarfien espert lill-Membri u strateġija dejjem tespandi għall-iżvilupp ta’ kollegamenti mal-multiplikaturi importanti tal-informazzjoni fl-Istati Membri.

112.

Fir-rigward tal-isforz għall-adattament tal-fluss ta’ ħidma fil-qasam tal-komunikazzjoni għall-kuntest medjatiku dejjem jevolvi, il-Parlament segwa mill-qrib ir-rinnovament tal-attivitajiet medjatiċi u l-approċċ kumplessiv favur tranżizzjoni minn kopertura orjentata lejn il-pjattaformi għal waħda tematika u orjentata lejn l-udjenza.

113.

Is-sit tal-Parlament fuq l-internet joffri biżibiljuta’ informazzjoni liċ-ċittadini, lill-Membri, lill-persunal, lill-media, lill-partijiet ikkonċernati u lill-viżitaturi, kif ukoll għodda mill-aktar avvanzata li tippermetti komunikazzjoni aktar b’saħħitha fuq l-internet. F’dan il-kuntest, fl-2016 bdiet l-organizzazzjoni mill-ġdid tas-sit bl-aħbarijiet tal-Parlament.

114.

Barra minn hekk, ir-riforma ta’ EuroparlTV kienet is-suġġett ta’ diversi noti lill-Grupp ta’ Ħidma tal-Bureau dwar l-Informazzjoni u l-Komunikazzjoni u issa waslet fil-fażijiet finali. B’segwitu għal varjetà ta’ studji u evalwazzjoni, is-servizz ta’ produzzjoni videografika tal-Parlament beda jipproduċi b’mod aktar immirat, b’analiżi qabel il-produzzjoni tal-istazzjonijiet ta’ distribuzzjoni u l-udjenzi biex tingħata spinta lis-suċċess tal-filmati u l-involviment fir-rigward tagħhom.

115.

Ġiet diskussa nota dwar ir-relazzjonijiet ta’ fiduċja mal-ġurnalisti permezz tad-diversi attivitajiet u prodotti ta’ kuljum mill-uffiċjali tal-istampa tal-Parlament, filwaqt li tfakkar li l-għan ewlieni tal-attivitajiet tal-Parlament għall-istampa huwa li jżidu l-viżibilità tal-Parlament.

116.

Il-kooperazzjoni bejn is-segretarjati tal-kumitati u l-uffiċċju tal-informazzjoni tal-Parlament ġiet intensifikata bil-ħsieb li jiġi organizzat djalogu aktar sistematiku mal-partijiet ikkonċernati rigward il-kwistjonijiet leġiżlattivi li qed jiġu diskussi fil-Parlament fil-qafas tal-proġett tad-djalogu mal-partijiet ikkonċernati. Dan il-proġett huwa mmirat biex jattiva lill-partijiet ikkonċernati fl-Istati Membri u jinvolvihom fil-proċess leġiżlattiv tal-Parlament permezz ta’ djalogu attiv mar-rapporteurs.

117.

Pass notevoli ieħor kien l-approċċ innovattiv li jitrawwem kuntatt mal-iskejjel madwar l-Istati Membri tal-UE permezz tal-Programm tal-Iskejjel Ambaxxaturi. Il-proġett huwa mmirat biex joħloq netwerk dejjem jikber ta’ skejjel li jkunu qed jinteraġixxu mal-Parlament, mal-Membri u mal-Uffiċċji tal-Informazzjoni tal-Parlament. L-iskejjel interessati jkollhom japplikaw biex isiru parti min-netwerk u mbagħad iwettqu attivitajiet ta’ tagħlim li jkattru l-għarfien rigward id-demokrazija parlamentari Ewropea u l-valuri taċ-ċittadinanza Ewropea. Il-Grupp ta’ Ħidma approva t-tnedija ta’ fażi pilota f’sitt Stati Membri għas-sena skolastika 2015/2016, u ta valutazzjoni pożittiva tal-eżitu. Sussegwentement, il-Bureau approva t-tnedija tal-Programm tal-Iskejjel Ambaxxaturi tal-Parlament Ewropew fl-Istati Membri kollha nhar it-3 ta’ Ottubru 2016.

118.

Il-Parlament qed jagħmel ħiltu biex itejjeb l-esperjenza tal-viżitaturi kemm fil-bini tiegħu fi Brussell u fi Strasburgu, kif ukoll fl-Uffiċċji tal-Informazzjoni tiegħu fl-Istati Membri. Tul dawn l-aħħar snin, qamet il-ħtieġa li jiġu installati arranġamenti ta’ akkoljenza effikaċi, informattivi u koerenti, kif ukoll faċilitajiet oħra lill-viżitaturi kollha fid-diversi ċentri ta’ attrazzjoni tiegħu. Fl-2016, il-Parlament kompla jtejjeb l-offerta tiegħu għall-viżitaturi fi Brussell, fi Strasburgu u fl-uffiċċji tal-informazzjoni, b’applikazzjoni tal-istrateġija dwar il-viżitaturi adottata mill-Bureau nhar is-27 ta’ April 2015.

119.

Il-proġetti speċifiċi għall-viżitaturi jinkludu Dar l-Istorja Ewropea, li x-xogħlijiet ta’ kostruzzjoni fuqha ntemmu fl-2016 u li huwa ppjanat li tiftaħ f’Mejju 2017. Fil-livell kunċettwali u akkademiku, din se toffri ħarsa intellettwalment rigoruża, li tkun però xorta friska u tkopri varjetà ta’ perspettivi, lejn l-istorja tal-kontinent Ewropew, minn prospettiva Ewropea minflok waħda nazzjonali. Fil-livell mużeoloġiku, Dar l-Istorja Ewropea tgħabbiet bil-kompitu bla preċedent li tibda kollezzjoni ġdida importanti mix-xejn.

120.

Minn tmiem l-2016 ’l hawn, punt ta’ akkoljenza ġdid għall-gruppi jinsab fil-Bini Atrium fi Brussel. L-iskop ewlieni ta’ dan il-proġett kien ġestjoni aħjar tal-fluss ta’ viżitaturi mistennija wara li tiftaħ Dar l-Istorja Ewropea. Huwa jagħti xbieha inizjali akkoljenti u amikevoli lill-gruppi tal-viżitaturi li jkunu mistiedna jżuru l-Parlament Ewropew. Iż-Żona ta’ Akkoljenza għall-Viżitaturi tiggarantixxi li l-wasla tal-viżitaturi fil-Parlament tintlaqa’ b’sigurtà.

121.

Waqt il-laqgħa tiegħu tat-18 ta’ Mejju 2015, il-Bureau approva l-kunċett wara ċ-Ċentru ta’ Akkoljenza għall-Viżitaturi “Station Europe” li ġie installat fl-2016. Dan il-proġett ikkonverta l-istazzjon ferrovjarju l-antik Bruxelles-Luxembourg f’punt ta’ orjentament għall-mogħdija għall-viżitaturi tal-Parlament, b’applikazzjonijiet interattivi u faċli biex jintużaw, u juża l-ewwel sular bħala spazju għall-avvenimenti u r-riċevimenti.

122.

L-arranġament ta’ kooperazzjoni propost mal-awtoritajiet Belġjani rigward l-użu tad-dar l-antika tal-artist Antoine Wiertz u l-ġnien tagħha ġie ppreżentat lill-Bureau waqt il-laqgħa tiegħu tat-8 ta’ Ġunju 2015. Il-ġnien Wiertz imiss direttament mal-Bini Paul-Henri Spaak u huwa faċilment aċċessibbli mill-entrati prinċipali tal-Parlament. Il-Bureau fada lis-Segretarju Ġenerali bil-kompitu li jiftaħ diskussjonijiet preliminari mal-entità “Musées royaux des Beaux-Arts de Belgique”, li hija responsabbli mill-Mużew Wiertz, u mal-uffiċċju “Régie des bâtiments de Belgique”, li huwa responsabbli għall-bini tal-mużew, bil-parteċipazzjoni tal-presidenti u tal-kopresidenti tal-Grupp ta’ Ħidma dwar il-Politika ta’ Informazzjoni u Komunikazzjoni, u tal-Grupp ta’ Ħidma dwar il-Bini, it-Trasport u Parlament Ekoloġiku, dwar kif possibilment jistgħu jintużaw il-ġnien u d-dar l-antika tal-artist. Il-proġett kompla fl-2016 u l-Istat Belġjan ippropona lill-Parlament l-iffirmar ta’ kuntratt lokatizju fit-tul għal 50 sena, bil-prezz simboliku ta’ EUR 1,00.

123.

Proġett importanti ieħor li qed jieħu l-forma huwa l-modernizzazzjoni taż-żoni ta’ akkoljenza aċċessibbli għall-pubbliku fl-Uffiċċji tal-Informazzjoni tal-Parlament, li bdiet bil-ftuħ taċ-ċentri “Europa Experience” fl-2016 f’Berlin u fl-2017 f’Ljubljana, u dalwaqt se tiġi segwita bil-modernizzazzjoni tal-faċilitajiet fi Strasburgu.

124.

Il-Parlament irawwem l-interazzjoni maċ-ċittadini permezz ta’ avvenimenti rikorrenti u okkażjonali, b’mod partikolari:

125.

Il-Premju LUX għandu żewġ objettivi: li jqawwi ċ-ċirkolazzjoni tal-films Ewropej madwar l-Ewropa u jqanqal dibattitu u diskussjoni madwar l-Ewropa rigward kwistjonijiet soċjetali. Għal dawn l-għanijiet, il-Premju Ċinematografiku LUX jippromwovi d-distribuzzjoni tat-tliet films fil-kompetizzjoni billi jipprovdi sottotitoli għal kull wieħed minnhom fl-24 lingwa uffiċjali tal-UE u jipproduċi pakkett ċinematografiku diġitali għal kull film għal kull pajjiż. Iċ-ċelebrazzjonijiet għall-għaxar anniversarju tal-Premju LUX saru fl-10 ta’ Ottubru 2016.

126.

Il-Parlament jappoġġa d-drittijiet tal-bniedem billi kull sena jagħti l-Premju Sakharov għal-Libertà tal-Ħsieb, li ġie stabbilit fl-1988. Il-premju jingħata lill-individwi li jkunu taw kontribut eċċezzjonali għall-ġlieda favur id-drittijiet tal-bniedem madwar id-dinja, b’mod li tinġibed l-attenzjoni lejn il-ksur tad-drittijiet tal-bniedem, kif ukoll jingħata appoġġ lir-rebbieħa u lill-kawża tagħhom. Ir-rebbieħa tal-2016 kienu Nadia Murad Basee Taha u Lamiya Aji Bashar, li t-tnejn issopravvivew għal skjavitù sesswali mill-hekk imsejjaħ “Stat Iżlamiku” u saru kelliema għan-nisa milquta mill-kampanja ta’ vjolenza sesswali tal-Istat Iżlamiku. Huma jaqbżu pubblikament għall-komunità Yazidi fl-Iraq, li hija minoranza reliġjuża li ġiet soġġetta għal kampanja ġenoċidali mill-militanti tal-Istat Iżlamiku.

127.

Mill-2008 ’l hawn, il-Parlament kull sena jagħti l-Premju taċ-Ċittadin Ewropew lill-proġetti u l-inizjattivi li jiffaċilitaw il-kooperazzjoni transkonfinali jew li jippromwovu l-fehim reċiproku fi ħdan l-UE. Il-premju, li għandu valur simboliku, huwa intenzjonat ukoll biex jirrikonoxxi l-ħidma ta’ dawk li, permezz tal-attivitajiet tagħhom ta’ kuljum, jippromwovu l-valuri Ewropej. Fl-2016, il-Parlament onora lil 50 persuna u organizzazzjoni minn 26 pajjiż tal-UE. Wara li saru ċ-ċerimonji ta’ premjazzjoni nazzjonali, f’Ottubru 2016 saret ċerimonja ċentrali fi Brussell.

128.

Is-servizz tat-Talbiet għal Informazzjoni miċ-Ċittadini (AskEP) iwieġeb għat-talbiet ta’ informazzjoni mill-membri tal-pubbliku ġenerali dwar il-Parlament u, b’mod aktar estensiv, dwar il-kwistjonijiet relatati mal-UE. Fil-leġiżlatura 2014-2019, il-Parlament kien xhud għal żieda sinifikanti fil-volum tat-talbiet, prinċipalment b’riżultat ta’ kampanji li jidhru kkoordinati ta’ mobilizzazzjoni biex jintbagħtu talbiet dwar kwistjonijiet topiċi. Fl-attività normali tagħha, l-unità twieġeb għall-korrispondenza bil-lingwa uffiċjali li ċ-ċittadin ikun bagħat l-ittra jew l-email tiegħu biha. Fl-2016, is-servizz irċieva 8 967 ittra jew email individwali miċ-ċittadini, u 82 923 talba bħala parti minn kampanji organizzati.

129.

Fuq is-sit tal-Parlament fuq l-internet, ġiet żviluppata pjattaforma apposta, li ssejħet AskEP.net, fejn hemm pubblikament disponibbli varjetà ta’ “Tweġibiet tal-PE” għall-mistoqsijiet frekwenti li jsiru. Attwalment tkopri madwar 50 suġġett. Qed isiru arranġamenti paralleli biex jiġi installat terminal interattiv rigward il-kwistjonijiet taċ-ċittadini fil-Parlamentarium.

130.

Fl-2016, beda programm ta’ ħidma pluriennali ġdida għall-għotjiet fil-qasam tal-komunikazzjoni, li jkopri żewġt oqsma, il-Media u l-Avvenimenti, għall-perjodu 2016-2019. Huwa jikkonsisti fil-kofinanzjament tal-proġetti, magħżula permezz ta’ sejħa għal proposti bi qbil mar-Regolament Finanzjarju, li jkunu mmirati biex iqajmu l-kuxjenza rigward ir-rwol tal-Parlament, kif ukoll is-setgħat u n-natura politika tiegħu, jiddisseminaw l-informazzjoni dwar il-Parlament u l-attivitajiet tiegħu, u jkattru l-għarfien u l-fehim tat-tliet pilastri li l-Parlament jopera madwarhom, speċifikament il-politika, l-istrateġiji u l-valuri.

131.

L-għotjiet fil-qasam tal-Media (televiżjoni, radju, internet) jiġu implimentati abbażi tal-ftehimiet ta’ sħubija pluriennali ma’ għadd limitat ta’ mezzi medjatiċi fl-Istati Membri li jilħqu biss ammont minimu ta’ nies, filwaqt li l-għotjiet fil-qasam tal-Avvenimenti jingħataw direttament lill-organizzazzjonijiet eliġibbli bbażati fl-Istati Membri. Fil-kategorija tal-Media, ġew konklużi 102 sħubijiet u ngħataw 48 għotja fl-2016 għal ammont totali ta’ EUR 3,9 miljun, mid-79 applikazzjoni li waslu. Fil-kategorija tal-Avvenimenti, ingħataw 18-il għotja fl-2016 għal valur totali ta’ EUR 0,8 miljun, mill-64 proposta li waslu.

132.

Ir-regoli dwar il-ħlas tal-kontribuzzjonijiet finanzjarji għall-gruppi tal-viżitaturi sponsorjati ġew riveduti permezz ta’ deċiżjoni tal-Bureau f’Ottubru 2016 sabiex jitqawwew it-trasparenza tal-proċess u l-obbligu li jingħata rendikont tal-azzjonijiet f’dan ir-rigward.

133.

Il-politika immobiljari hija politika fuq żmien twil li ma ssegwix ir-ritmu annwali tal-baġit tal-UE. Sabiex tinkiseb l-aħjar riżultati possibbli fuq żmien twil, hemm bżonn ta’ ppjanar fuq perjodu bejn il-ħames u l-10 snin, dejjem waqt li titqies l-evoluzzjoni tal-bżonnijiet fuq prospettiva ta’ 20-25 sena. Il-proġetti immobiljari spiss jirrikjedu finanzjament fuq diversi snin; għaldaqstant huwa fundamentali li jkun hemm ippjanar xieraq għal ġestjoni finanzjarja tajba.

134.

L-akkwiżizzjoni tal-bini ilha l-politika ewlenija tal-Parlament fir-rigward tal-investiment infrastrutturali minn mindu bdiet tapplika d-deċiżjoni tal-1992 tal-Kunsill Ewropew ta’ Edinburgu li stabbiliet is-sedi tal-istituzzjonijiet tal-UE. Ir-rinnovament tal-bini min-naħa l-oħra huwa attività relattivament ġdida li, minħabba l-fatt li l-korp tal-bini qed jiqdiem, se tikber fl-importanza. Fis-snin li ġejjin, huwa mistenni li se jkun hemm rinnovamenti importanti tal-binjiet il-kbar, bħall-Bini Paul-Henri Spaak.

135.

Se jkun hemm bżonn li l-Bureau jieħu deċiżjoni dwar ir-rinnovament tal-Bini Paul-Henri Spaak u l-miżuri relatati.

136.

Fl-2016, il-proġetti immobiljari fit-tliet postijiet tax-xogħol u fl-uffiċċji tal-informazzjoni komplew kif deskritt hawn taħt:

137.

F’Ġunju 2014, għalkemm kien fadal xi xogħlijiet x’jiġu ffinalizzati mis-sid, madwar 1 000 membru tal-persunal daħlu fil-bini fi Square de Meeûs. Dan iċ-ċaqliq kien l-ewwel stadju kruċjali fil-proċess biex spazju addizzjonali jitqiegħed għad-dispożizzjoni tal-gruppi politiċi fil-binjiet prinċipali u ppermetta li jiġi evitat ċaqliq importanti ta’ uffiċċji tal-Membri matul il-leġiżlatura.

138.

Bejn id-data meta l-bini ġie okkupat f’Ġunju 2014 u April 2016, ix-xogħlijiet li kienu taħt ir-responsabilità tas-sid ġew iffinalizzati. Intlaħaq ftehim mas-sid li kien jikkonsisti fl-aċċettazzjoni provviżorja tal-bini, ħlas għall-okkupanza tal-bini minn Ġunju 2014 u d-dħul fis-seħħ tal-kuntratt ta’ użufrutt. Il-Bureau approva dan il-ftehim waqt il-laqgħa tiegħu tal-14 ta’ Diċembru 2015; il-kuntratt ta’ użufrutt fuq 12-il sena kien diġà ġie approvat fl-2013.

139.

L-ewwel fażi tal-kostruzzjoni tal-Bini Martens ġiet iffinalizzata fl-2016 u t-trasferiment mill-promotur lill-Parlament sar lejn tmiem Ġunju 2016. Fit-tieni fażi tal-proġett, li għaddejja attwalment, il-Parlament huwa responsabbli għax-xogħlijiet ta’ sistemazzjoni u adattament. It-tielet fażi se tinvolvi l-installazzjoni tal-għamara u t-tagħmir. Huwa previst li dawn l-attivitajiet jitlestew u li l-bini jiġi kkonsenjat fl-ewwel semestru tal-2018.

140.

Waqt il-laqgħa tiegħu tas-7 ta’ Ottubru 2015, il-Bureau awtorizza lis-Segretarju Ġenerali jiffinalizza n-negozjati biex jiġi ffirmat kuntratt ta’ użufrutt fuq żmien twil għaċ-Ċentru għat-Taħriġ Professjonali l-ġdid. Għal dan l-għan, se jiġġarraf il-bini Montoyer 63 li teknikament sar obsolet u ċ-ċentru għat-taħriġ se jinbena fl-istess post. Fil-bidu tal-2016 ġie ffirmat kuntratt ta’ użufrutt fuq 21 sena. Għall-24 xahar li se jkun hemm bżonn biex jinbena ċ-ċentru għat-taħriġ, temporanjament qed jinkera l-bini Belmont Court mingħand l-istess fornitur.

141.

Waqt il-laqgħa tiegħu tat-12 ta’ Settembru 2016, il-Bureau ddeċieda li jeżerċita l-fakultà li jixtri l-bini Montoyer 75 bil-prezz ta’ EUR 1,00. Fl-2005, il-Parlament kien iffirma kuntratt għal kirja twil bil-fakultà li jixtri wara li l-pagamenti tal-kirja li jkunu saru fuq perjodu ta’ 10 snin ikunu koprew is-somma ta’ kemm ikun jiswa l-bini.

142.

Waqt il-laqgħa tiegħu tal-11 ta’ Novembru 2016, il-Bureau approva l-estensjoni tal-iskola materna ta’ Wayenberg. Inizjalment, l-iskola materna fetħet fl-2005 u l-Parlament huwa sid il-post. Huwa ppjanat li x-xogħlijiet se jitlestew fl-2019.

143.

It-trasferiment provviżorju tal-bini Eastman li jospita Dar l-Istorja Ewropea sar fl-2016. Fil-livell arkitettoniku, il-proġett ħa bini eżistenti li ma kienx ġie ddisinjat bħala mużew u ttrasformah f’eżempju ta’ arkitettura u disinn kontemporanji fl-avangwardja li joffru ambjent addattat għal mużew importanti ġdid.

144.

Il-proġett KAD (Konrad Adenauer) jikkostitwixxi l-assi ewlenija tal-politika immobiljari tal-Parlament fil-Lussemburgu. Il-Bini KAD il-ġdid se jikkonsolida l-attivitajiet fil-Lussemburgu f’kumpless immobiljari wieħed bil-ħsieb li jiġu rrazjonalizzati l-ispejjeż. Il-proġett jinkludi żewġ fażijiet: il-kostruzzjoni fuq is-sit “tal-Lvant” u l-kostruzzjoni fuq is-sit “tal-Punent”. Skont il-kalendarju previst, ix-xogħlijiet fuq is-sit tal-Lvant se jitlestew fl-2018 u dawk fuq is-sit tal-Punent fl-2021. B’segwitu għad-deċiżjoni tal-Bureau tas-6 ta’ Lulju 2015, id-deċiżjoni dwar il-ġejjieni tal-bini KAD l-antik tħalliet għall-bidu tal-leġiżlatura li jmiss. Hekk kif għamel fis-snin preċedenti, fl-2016 il-Kumitat għall-Baġits awtorizza trasferiment ta’ tmiem is-sena għall-prefinanzjament tal-proġett. Dan it-trasferiment ammonta għal EUR 53,5 miljun (ara t-Taqsima I.H. dwar it-trasferimenti).

145.

Sakemm isir disponibbli l-Bini KAD il-ġdid, hemm bżonn li l-kirja fuq il-Bini GEOS tiġi estiża. Għaldaqstant, ġiet innegozjata estensjoni se tmiem l-2018.

146.

Le bâtiment Havel a été construit en 1955 et a été la propriété du Conseil de l’Europe. En 2012, il a été acquit par le Parlement et a ensuite fait l’objet d’une rénovation complète avec une mise aux normes en vigueur. Ce projet comporte deux parties; la rénovation du bâtiment proprement dit et une passerelle de liaison avec le bâtiment PFLIMLIN et aménagements des abords. Le projet a bien avancé en 2016 et la mise en service est prévue pour le printemps 2017.

147.

Fi Strasburgu qed jinbena wkoll Parlamentarium fil-qafas tal-modernizzazzjoni taż-żoni ta’ akkoljenza. Ix-xogħlijiet bdew fl-2016 u għamlu progress tajjeb. Il-ftuħ huwa ppjanat fl-2017.

148.

F’Berlin, ix-xogħlijiet fuq il-kostruzzjoni ta’ mini Parlamentarium imsejjaħ “Europa Experience” fil-pjan terran ta’ Dar l-Ewropa ġew iffinalizzati fl-2016. L-“Europa Experience” nfetħet f’Mejju 2016 u toffri l-possibilità lill-viżitaturi biex isiru jafu aktar dwar il-politika fil-livell Ewropew.

149.

F’Ljubljana, ix-xogħlijiet ta’ sistemazzjoni speċifika f’Dar l-Ewropa l-ġdida ġew approvati nhar is-27 ta’ Settembru 2016. L-okkażjoni ntużat biex jiġu installati elementi interattivi tal-“Europa Experience” fl-ispazju pubbliku sabiex isir iktar attraenti. Lejn nofs Ottubru 2016, is-servizzi ċċaqalqu lejn il-bini l-ġdid.

150.

Waqt l-2016, ġew iffirmati l-klawżoli dwar l-estensjoni tal-kirjiet għal Djar l-Ewropa f’Varsavja, Pariġi u Barċellona.

151.

Ix-xogħlijiet għall-estensjoni tal-kapaċità ta’ Dar Jean Monnet f’Bazoches u t-titjib tal-istandard tal-faċilitajiet tagħha tlestew fl-2016. Il-bini se jintuża b’mod aktar estensiv mill-Parlament għal għadd ta’ programmi emblematiċi fl-oqsma tat-tagħlim u l-iżvilupp, kif ukoll għal avvenimenti oħra.

152.

Ġiet implimentata programmazzjoni pluriennali tax-xogħlijiet ta’ manutenzjoni u tiswija. Għall-2016, jistgħu jissemmew xi punti notevoli:

153.

Fi Brussell, nistgħu nsemmu l-istudju dwar il-possibilitajiet biex jittejbu l-użu tal-liftjiet u t-traffiku vertikali tal-utenti tal-Bini Spinelli (għaddej), it-tlestija tal-ewwel fażi ta’ rinnovament tat-tagħmir elettriku tal-Bini Wiertz, ir-rinnovament tal-kaldarun għat-tisħin tal-Bini Remard u x-xogħlijiet indispensabbli biex jiġi garantit li l-kaldarun għat-tisħin tal-Bini Spaak ikompli jservi. Ir-rinnovament tal-kabina fejn jgħaddi l-elettriku b’voltaġġ għoli fil-Bini Atrium tlesta. Ix-xogħlijiet preparatorji rigward is-sejħiet għal offerti għall-modernizzazzjoni tas-sistemi ta’ ġestjoni teknika ċentralizzata u tal-apparat li jirrileva n-nirien.

154.

Fi Strasburgu, l-azzjonijiet ewlenin li saru fl-2016 huma r-rinnovament tal-uffiċċju u s-sostituzzjoni tal-pompi tat-tisħin fil-Bini Weiss, kif ukoll ir-rinnovament tas-sistemi ta’ sigurtà kontra n-nirien u s-sistemi ta’ ġestjoni teknika ċentralizzata fil-Bini Madariaga.

155.

B’segwitu għall-inċident tas-saqaf fl-Emiċiklu ta’ Strasburgu u r-rikostruzzjoni immedjata tiegħu fl-2008, il-Parlament bi prekawzjoni kompla bl-ispezzjonijiet tas-soqfa tas-swali, il-kmamar u ż-żoni ta’ ċirkolazzjoni l-aktar importanti fil-Bini Weiss. B’segwitu għal dawn l-ispezzjonijiet, instabu għadd ta’ difetti u każijiet ta’ nuqqas ta’ konformità mal-istandards u r-regoli fil-qasam tal-kostruzzjoni. Il-Parlament fetaħ kawża kontra l-assiguratur tiegħu u l-impriżi li ħadmu fuq il-kostruzzjoni tal-elementi li saritilhom il-ħsara, id-diriġenza responsabbli mix-xogħol u d-diriġenza responsabbli għal-kostruzzjoni, kif ukoll kontra l-uffiċċji ta’ kontroll responsabbli biex jissorveljaw il-kostruzzjoni. Peress li l-qasam huwa wieħed ta’ natura teknika ferma, il-Qorti ddeżinjat tim ta’ tliet esperti u fdatlu l-kompitu li jistabbilixxi l-kawżi tal-inċidenti u jevalwa d-dannu li sar lill-Parlament. Dan it-tim ta’ esperti indirizza wkoll problema oħra li ġiew skoperta: l-istat ħażin tal-protezzjoni tal-istruttura mettallika (materjal ta’ iżolament) li tirfed is-saqaf tal-bini. Dan ix-xogħol ta’ perizja ġie konkluż nhar il-31 ta’ Marzu 2016, u ppermetta li l-proċediment ġudizzjarju jkompli bl-intenzjoni li jew jintlaħaq qbil amikevoli jew inkella tittieħed deċiżjoni ġudizzjarja. Peress li l-aspett tekniku tad-dossier ġie konkluż, ix-xogħlijiet ewlenin setgħu jinbdew fl-2016 u se jintemmu fl-2017.

156.

Fir-rigward tal-attivitajiet ta’ manutenzjoni fil-Lussemburgu, minħabba l-ottimizzazzjoni tas-servizzi ta’ tindif, kif ukoll l-aġġudikazzjoni ta’ żewġ kuntratti ġodda relatati mas-servizzi ta’ tindif u l-manutenzjoni tal-ispazji ppjantati, ġie iffrankat ammont konsiderevoli ta’ riżorsi fis-snin 2015 u 2016 meta mqabbla mal-2014 (meta bdiet l-ottimizzazzjoni tas-servizzi). Id-dħul fis-seħħ tal-kuntratt dwar xogħlijiet strutturali u ta’ finitura fi Frar 2016 ippermetta li tiżdied il-kwalità tas-servizz, jitnaqqas id-dewmien qabel intervent, jinkisbu l-aħjar prezzijiet u tiġi ssemplifikata l-ġestjoni amministrattiva.

157.

Il-Parlament jirrikonoxxi li għandu dmir li jagħti kontribut pożittiv għall-iżvilupp sostenibbli bħala objettiv fuq żmien twil, mhux biss permezz tar-rwol politiku tiegħu u r-rwol tiegħu fil-proċeduri leġiżlattivi, iżda anke fil-kuntest ta’ kif jopera u d-deċiżjonijiet li jieħu minn ġurnata għall-oħra.

158.

Minħabba dan l-impenn fil-livell ambjentali, il-Parlament juża l-Iskema ta’ Mmaniġġjar u Awditjar Ekoloġiċi (EMAS), li hija strument ta’ ġestjoni tal-Unjoni Ewropea għall-organizzazzjonijiet privati u pubbliċi biex jevalwaw u jtejbu l-prestazzjoni tagħhom fil-livell ambjentali bi qbil mar-Regolament (KE) 1221/2009 tal-Parlament Ewropew u tal-Kunsill tal-25 ta’ Novembru 2009 dwar il-parteċipazzjoni volontarja ta’ organizzazzjonijiet fi skema Komunitarja ta’ ġestjoni u verifika ambjentali (EMAS) li jħassar ir-Regolament (KE) Nru 761/2001 u d-Deċiżjonijiet tal-Kummissjoni 2001/681/KE u 2006/193/KE (37). Il-Parlament ilu minn Diċembru 2007 rreġistrat mal-EMAS fit-tliet postijiet tax-xogħol tiegħu. Fl-2016, ir-reġistrazzjoni ġiet estiża b’suċċess sas-17 ta’ Diċembru 2019.

159.

Bi qbil mal-Manwal Ambjentali tal-Parlament, il-Bureau stabbilixxa l-Politika Ambjentali li ġiet iffirmata mill-President u mis-Segretarju Ġenerali f’isem l-Istituzzjoni, inizjalment fl-2007 u f’forma riveduta fl-2010. Peress li l-Politika Ambjentali suppost tiġġedded waqt kull leġiżlatura, fl-2016 il-Bureau approva dokument rivedut li ġie ffirmat mill-President u s-Segretarju Ġenerali.

160.

Kumplessivament, is-Sistema ta’ Ġestjoni Ekoloġika fil-Parlament irnexxiet. Il-Parlament stabbilixxa objettivi biex inaqqas l-emissjonijiet ta’ CO2, il-konsum tal-elettriku, il-konsum tal-gass, taż-żejt għat-tisħin u tat-tisħin distrettwali, il-konsum tal-karti u tal-ilma, u l-produzzjoni ta’ skart, kif ukoll biex iżid ir-rata tal-iskart irriċiklat. Mill-2006, il-biċċa l-kbira tal-indikaturi ambjentali maru għall-aħjar.

161.

Wieħed mill-objettivi ewlenin tal-Parlament huwa li, sal-2020, inaqqas l-emissjonijiet ta’ karbonju bi 30 %. Sa Settembru 2015, il-Parlament kien diġà kiseb tnaqqis konsiderevoli ta’ 27,2 % meta mqabbel mal-2006. Filwaqt li l-politika ambjentali tal-Parlament hija bbażata l-ewwel nett fuq il-prevenzjoni jew il-limitazzjoni tal-emissjonijiet, il-miżura ta’ kumpens għall-emissjonijiet ta’ karbonju hija waħda utli u kompensatorja fil-ġlieda kontra t-tibdil fil-klima. Għalkemm il-miżuri ta’ kumpens ma jistgħux jitqiesu meta tkun qed tiġi kkalkulata u possibilment imnaqqsa l-impronta tal-karbonju residwa, jistgħu jiġu applikati f’dawk il-każijiet fejn l-emissjonijiet ta’ karbonju proprji jkunu inevitabbli jew ma jistgħux ikomplu jitnaqqsu.

162.

Il-kumpens għall-emissjonijiet ta’ CO2 ifisser li jinxtraw krediti ta’ kumpens li jpaċu l-emissjonijiet ta’ CO2 tax-xerrej innifsu. Il-krediti ta’ dan it-tip jinkisbu permezz ta’ appoġġ finanzjarju għall-proġetti fl-oqsma tal-enerġija rinnovabbli jew tal-effiċjenza enerġetika, li jkunu mmirati biex inaqqsu l-emissjonijiet tal-gassijiet bl-effett ta’ serra f’kuntest globali.

163.

Il-Parlament iddeċieda inizjalment fl-2011 li jimplimenta skema ta’ kumpens għall-emissjonijiet ta’ CO2. Wara li qies l-esperjenza miksuba tul is-snin, f’Ottubru 2015, il-Bureau ddeċieda dwar approċċ ġdid lejn il-miżuri ta’ kumpens għall-emissjonijiet ta’ karbonju. Din id-deċiżjoni tqis ukoll ir-rakkomandazzjonijiet tal-Qorti Ewropea tal-Awdituri inklużi fir-Rapport Speċjali Nru 14 (38) tagħha ta’ Ottubru 2014. B’differenza milli kien jiġri preċedentement, l-approċċ il-ġdid jipprevedi l-kumpens għall-ammont totali tal-emissjonijiet ta’ karbonju tal-Parlament, inklużi l-emissjonijiet mit-titjiriet li l-Membri tal-Parlament jagħmlu bejn il-pajjiż ta’ oriġini tagħhom u Brussell jew Strasburgu. Barra minn hekk, jippermetti li jkun hemm proġetti bi prijorità fil-Grupp ta’ Stati Afrikani, tal-Karibew u tal-Paċifiku u jinkorpora l-“Gold Standard” li għandu rikonoxximent estensiv bħala standard ta’ kwalità għall-proġetti ta’ kumpens fil-pajjiżi li qed jiżviluppaw.

164.

Fl-2016, l-approċċ il-ġdid lejn il-miżuri ta’ kumpens għall-emissjonijiet ta’ karbonju ġie applikat u l-Pjan ta’ Azzjoni EMAS għas-sena ġie implimentat b’suċċess. Il-Pjan ta’ Azzjoni EMAS għall-2017, ibbażat fuq l-Istrateġija EMAS fuq żmien medju għall-2016-2020, ġie adottat mill-Grupp ta’ Tmexxija Inter-DĠ dwar il-Ġestjoni Ambjentali.

165.

Element partikolari mill-Politika Ambjentali tal-Parlament huwa l-impenn favur l-“Akkwist Pubbliku Ekoloġiku” (APE) li, fil-Komunikazzjoni tal-Kummissjoni Ewropea dwar Akkwist pubbliku għal ambjent aħjar, ġie ddefinit bħala: “…proċess li permezz tiegħu l-awtoritajiet pubbliċi jiksbu prodotti, servizzi u xogħlijiet li jkollhom inqas impatt fuq l-ambjent matul iċ-ċiklu tal-ħajja tagħhom meta mqabbla ma’ prodotti, servizzi u xogħlijiet li kieku jinkisbu u li jkollhom l-istess funzjoni primarja” (39). F’dan l-aħħar deċennju, l-APE sar aspett dejjem iżjed importanti tal-attivitajiet tal-korpi pubbliċi fl-Ewropa. F’Ġunju 2016, ġiet approvata l-“Gwida tal-PE għall-Implimentazzjoni tal-Akkwist Pubbliku Ekoloġiku”. Din tfasslet biex tgħin lill-uffiċjali tal-awtorizzazzjoni fil-Parlament jniedu b’suċċess politiki u proċeduri fl-ambitu tal-akkwist ekoloġiku. Tispjega l-possibilitajiet li joffru l-istrumenti ġuridiċi fis-seħħ (ir-Regolament Finanzjarju u r-Regoli tal-Applikazzjoni tiegħu) b’mod prattiku, u teżamina soluzzjonijiet sempliċi u effikaċi li jkunu jistgħu jintużaw fil-proċeduri ta’ akkwist pubbliku.

166.

B’segwitu għall-esperjenzi li nkisbu matul il-fażi ta’ ttestjar tas-Servizz ta’ Assistenza tal-Parlament fil-qasam tal-Akkwist Pubbliku Ekoloġiku, li twaqqaf biex jakkumpanja l-approċċ APE, fl-2016 tnediet proċedura ta’ akkwist interistituzzjonali għal dan il-proġett, li akkomunat is-saħħa tax-xiri ta’ diversi istituzzjonijiet Ewropej.

167.

Fl-2016 saru diversi attivitajiet ta’ komunikazzjoni u ta’ sensibilizzazzjoni bħall-avveniment “Jum id-Dinja” u l-“Ġimgħa l-Ħadra Interistituzzjonali” u f’Ottubru 2016 il-Parlament ingħata t-Tikketta Belġjana “Entreprise Eco Dynamique”.

168.

Fl-2016 tkomplew l-isforzi ta’ riforma mmirati biex jimmodernizzaw l-operazzjonijiet ta’ forniment tal-ikel fil-Parlament sal-2019, kif stabbilit fid-deċiżjoni tal-Bureau tal-10 ta’ Ġunju 2013, “Il-politika futura dwar il-forniment tal-ikel tal-Parlament għall-2014-2019 — Linji gwida għall-modernizzazzjoni”.

169.

Element importanti tal-politika dwar il-forniment tal-ikel huwa l-kuntratti ta’ “prezz fiss” mhux issussidjati. Fi Strasburgu, nhar l-1 ta’ Novembru 2016, daħal fis-seħħ kuntratt ġdid mhux issussidjat mill-Parlament. Fi Brussell, fornitur ġdid kien diġà beda jopera fl-2015 taħt kuntratt mhux issussidjat. Fil-Lussemburgu, il-kalendarju tal-bidliet kuntrattwali se jiġi allinjat mal-konklużjoni tal-kostruzzjoni tal-Bini KAD il-ġdid.

170.

L-offerta tal-ikel gradwalment ġiet iddiversifikata u nfetħu kantins u ristoranti ġodda fi Brussell u fi Strasburgu. Fil-Bini Spinelli, f’Settembru 2016 infetaħ punt għall-bejgħ ta’ ikel organiku u f’Novembru 2016 infetaħ ristorant stil Mediterranju. F’Novembru 2016 reġa’ fetaħ ukoll il-punt għall-bejgħ tas-sandwiches. Fil-binjiet Square de Meeûs u Trèves, inħolqu żewġ kantins ġodda. Fi Strasburgu, f’Marzu 2016 infetaħ punt għall-bejgħ ta’ ikel frisk take away u f’Awwissu 2016 ġiet estiża l-kantin fil-Bini Weiss. Minn Lulju 2016 qed jitħaddem proġett pilota fil-Bar des Députés li sar iservi ikel sħun kontinwament b’restrizzjonijiet ta’ ħin sabiex jipprovdi għal drawwiet alimentari u ħinijiet tal-ikel differenti.

171.

B’mod li jittejbu s-saħħa u l-benessri fuq il-post tax-xogħol, ġie deċiż li jiġu promossi għażliet alimentari aħjar għas-saħħa u li jingħata appoġġ għall-alternattivi alimentari aktar sostenibbli fil-faċilitajiet tal-ikel tal-Parlament. Għaldaqstant, l-aktar kuntratti reċenti fir-rigward tar-ristoranti/forniment tal-ikel u s-servizzi ta’ distribuzzjoni awtomatizzata inkludew rekwiżiti dwar l-aspetti tal-kummerċ ġust, it-tranżizzjoni lejn dieta aħjar, stili ta’ ħajja li jkunu aħjar għas-saħħa u, importanti ħafna, il-ġlieda kontra l-ħela tal-ikel. Is-sejħiet għal offerti integraw kriterji għall-konsum ta’ ikel sostenibbli, bħal prodotti staġjonali, il-benesseri tal-annimali u offerta veġetarjana.

172.

L-għoti tal-ikel li ma jinbigħx lill-karità ftit fti qiegħed jidħol ukoll bħala prattika tajba fil-kantins u l-punti ta’ bejgħ tal-Parlament. Element ieħor tal-politika dwar il-forniment tal-ikel huwa t-tnaqqis ulterjuri tal-użu tal-ilma minerali fil-fliexken waqt il-laqgħat u l-installazzjoni ta’ funtani għax-xorb fiż-żoni ta’ passaġġ.

173.

Il-miżuri fil-qasam tat-teknoloġiji tal-informazzjoni u tal-komunikazzjoni biex jittejbu s-servizzi għas-seduta plenarja u l-forniment ta’ dawn it-teknoloġiji lill-Membri fl-uffiċċji tal-kostitwenza tagħhom jinsabu deskritti hawn fuq fit-Taqsima III.B.4 ta’ dan ir-rapport. Qed titkompla wkoll il-modernizzazzjoni ta’ oqsma oħra tal-infrastruttura tal-Parlament fil-qasam tat-teknoloġiji tal-informazzjoni u tal-komunikazzjoni, u f’Novembru 2016 ir-rapport ta’ nofs it-terminu dwar l-implimentazzjoni tal-Orjentazzjonijiet Strateġiċi għall-perjodu 2014–2019 ġie ppreżentat lill-Grupp ta’ Ħidma tal-Bureau dwar it-Teknoloġiji tal-Informazzjoni u tal-Komunikazzjoni.

174.

Skont dan ir-rieżami ta’ nofs it-terminu, il-kisbiet fir-rigward tal-pilastri strateġiċi ewlenin l-ewwel nett jinkludu l-evoluzzjoni tal-infrastruttura tat-teknoloġiji tal-informazzjoni u tal-komunikazzjoni, is-sostituzzjoni ta’ apparat li qed jiqdiem u l-eliminazzjoni gradwali tal-applikazzjonijiet li m’għadhomx meħtieġa. Il-miżuri f’dan il-qasam segwew l-evoluzzjoni tat-teknoloġiji tal-informazzjoni u tal-komunikazzjoni tul dawn l-aħħar snin, u jinkludu l-attivazzjoni ta’ 18 000 sett telefoniku li jużaw teknoloġija IP u l-eliminazzjoni ta’ 1 800 fax grazzi għas-servizz il-ġdid li jibgħat faxes elettronikament permezz tal-posta elettronika. Eżempju ieħor huwa l-aċċessibilità ta’ servizz WiFi għall-viżitaturi fil-Parlament bħala pass ieħor lejn Parlament aktar inklużiv fil-livell diġitali. Fir-rigward tal-eliminazzjoni gradwali tal-applikazzjonijiet li m’għadhomx meħtieġa, fl-2016 ġew identifikati 60 applikazzjoni li saru obsoleti u li jinsabu fil-fażi ta’ verifika finali sabiex jiġu deattivati.

175.

Pilastru strateġiku ewlieni importanti ieħor huwa t-tisħiħ tas-sigurtà tat-teknoloġiji tal-informazzjoni u tal-komunikazzjoni f’dinja ta’ komunikazzjoni miftuħa, u l-isforzi f’dan il-qasam komplew fl-2016. Il-qasam tas-sigurtà tat-teknoloġiji tal-informazzjoni u tal-komunikazzjoni jinkludi l-elementi tal-governanza tas-sigurtà, il-politiki dwar is-sigurtà u l-inġinerija, u l-valutazzjonijiet tas-sigurtà fl-ambitu ta’ dawn it-teknoloġiji, kif ukoll il-kapaċitajiet ta’ ċiberdifiża u l-kultura ta’ ċibersigurtà. F’dan il-qafas, il-Bureau approva l-ħatra tal-Uffiċjal Kap fil-qasam tas-Sigurtà Informatika f’Ottubru 2016.

176.

L-iżvilupp ulterjuri ta’ approċċ ta’ innovazzjoni huwa għan strateġiku tal-Parlament, u fi Frar 2016, inħoloq is-servizz tal-innovazzjoni bil-missjoni li jippromwovi, iqanqal u jintroduċi l-innovazzjoni teknoloġika. Is-servizz tal-innovazzjoni jwettaq missjoni ta’ monitoraġġ permanenti tat-teknoloġija sabiex jidentifika l-opportunitajiet bil-potenzjal li jkunu rilevanti għall-attivitajiet tal-Parlament minn stadju bikri.

177.

Fl-2016, ġew implimentati wkoll diversi proġetti fil-qasam tat-teknoloġiji tal-informazzjoni u tal-komunikazzjoni li kienu kkunsidrati bħala strateġiċi. B’mod partikolari, għandu jiġi indikat li tlestiet l-ewwel migrazzjoni teknika. L-integrazzjoni tal-intranet tal-PE u tal-intranets tad-Direttorati Ġenerali fil-Pjattaforma (SIFE) il-ġdida għadha għaddejja u l-Pjattaforma qed tiġi aġġornata. Il-proċess ta’ validazzjoni tal-kontenut min-naħa tad-Direttorati Ġenerali għadu għaddej.

178.

Il-proġett “Il-mobilità bħala metodu ta’ ħidma pluridimensjonali” jipprovdi kuntest biex jiġu allinjati u mqanqla l-vantaġġi li kumplessivament tista’ ġġib magħha l-mobilità lill-Parlament. L-istudju dwar l-impatt tal-mobilità fuq il-proċessi tal-Parlament tlesta fl-2016. Intlaħaq qbil dwar ir-rwoli u r-responsabilitajiet u fl-2017 il-Kumitat ta’ Tmexxija se jadotta approċċ maqsum f’fażijiet fir-rigward tal-implimentazzjoni tal-proġett. L-għan huwa li jiġi żviluppat katalogu ta’ servizzi għall-mobilità.

179.

Il-proġett “Id-diġitalizzazzjoni tal-katina tal-akkwist pubbliku” huwa mmirat lejn it-tranżizzjoni għal proċeduri ta’ ħidma kompletament elettroniċi, inkluż it-tressiq tad-dokumenti fil-qasam tal-akkwist pubbliku, sabiex “iż-żmien sal-kuntratt” jitqassar billi tintuża sistema li tqiegħdet għad-dispożizzjoni mill-Kummissjoni Ewropea. Id-disinn tal-“Katina tal-akkwist pubbliku” ġie approvat; is-sistema għal aċċess elettroniku komplut u dirett ġiet implimentata fl-2016. Matul is-sena ġew organizzati sessjonijiet ta’ ħidma fir-rigward tal-għodda e-Submission, e-Request u e-Invoicing. Il-passi li jmiss se jiffokaw fuq l-aspetti fil-qasam tas-sigurtà u l-funzjonalità tal-għodda e-Submission u ta’ dik li tkopri l-fażi ta’ qabel l-akkwist.

180.

Proġett importanti ieħor tal-Parlament huwa l-proġett il-ġdid għas-Sistema ta’ Ġestjoni Finanzjarja, li jinsab deskritt hawn taħt fit-Taqsima III.E.1.

181.

Apparti l-kisbiet diġà msemmija fir-rigward tal-pilastri strateġiċi ewlenin, fl-2016 il-Parlament kompla bil-kooperazzjoni mill-qrib mal-istituzzjonijiet l-oħra tal-UE. Ġew implimentati diversi proġetti komuni, u qasam importanti ta’ kooperazzjoni huwa s-sigurtà tat-teknoloġiji tal-informazzjoni u tal-komunikazzjoni. Barra minn hekk, intlaħaq qbil dwar format XML komuni għall-iskambju ta’ kontenut leġiżlattiv strutturat u ta’ dokumenti bejn l-istituzzjonijiet tal-UE.

182.

Is-Sistema ta’ Ġestjoni Finanzjarja għandha l-għan li ttejjeb il-viżibilità u d-disponibilità ta’ informazzjoni kruċjali għad-deċiżjonijiet dwar ir-riżorsi umani, informatiċi u finanzjarji disponibbli u l-użu tagħhom, iżżid l-effikaċja tal-proċeduri finanzjarji ċentrali essenzjali billi tistandardizzahom u tawtomatizzahom, u tipprovdi soluzzjoni għall-problema li ċerti applikazzjonijiet informatiċi eżistenti daqt isiru obsoleti, speċifikament is-sistemi tal-kontabilità ġenerali u baġitarja u s-sistema ta’ ħlas.

183.

Fl-2016, ġie konkluż l-istadju tal-eżami tal-alternattivi u ġie kkonfermat li s-sistema SAP hija l-aħjar għażla. L-istruttura tal-ġestjoni u l-governanza tal-proġett ġiet riveduta f’Ottubru 2016 u s-sjieda tal-proġett ġiet trasferita lejn id-Direttorat Ġenerali għall-Finanzi (DĠ FINS).

184.

Fir-rigward tad-drittijiet finanzjarji u soċjali tal-Membri, waqt il-laqgħa tiegħu tas-26 ta’ Ottubru 2015, il-Bureau adotta approċċ ġdid bl-għan li jqawwi l-orjentament lejn il-klijent u jnaqqas il-piż amministrattiv għall-Membri. Żewġ strumenti se jiżvolġu rwol deċiżiv biex jinkiseb dan l-objettiv: il-Portal u l-e-Portal.

185.

Il-Portal huwa punt ta’ servizz uniku fejn huma integrati s-servizzi kollha relatati mal-formalitajiet marbuta mad-drittijiet finanzjarji u soċjali u sar kompletament operattiv f’Lulju 2016 filwaqt li l-kontroparti elettronika tiegħu, l-e-Portal, ilha aċċessibbli minn Jannar 2015. Il-Portal jipprovdi lill-Membri b’informazzjoni fil-qosor rigward ir-regoli fis-seħħ u l-istatus ta’ drittijiethom. Jistgħu jitressqu l-formoli ta’ applikazzjoni u l-verifiki preliminari jsiru immedjatament. F’fażi sussegwenti, il-fajls jiġu vverifikati minn persunal amministrattiv speċjalizzat f’kull unità b’approċċ personalizzat.

186.

Ir-reviżjoni tad-Dispożizzjonijiet Ġenerali ta’ Implimentazzjoni u tar-Regoli Interni b’segwitu għad-dħul fis-seħħ tar-Regolamenti tal-Persunal il-ġodda kompliet fl-2016. Il-bidliet kollha relatati mal-ġestjoni tal-karrieri ġew implimentati. Id-Direttorat Ġenerali għall-Persunal fassal regoli interni ġodda dwar il-valutazzjoni tal-persunal, l-għoti tal-punti ta’ mertu, kif ukoll aġġornament tal-kodiċi ta’ kondotta, li huma soġġetti għal konsultazzjoni ulterjuri u approvazzjoni. Ir-rieżami tar-regoli dwar il-missjonijiet għadu għaddej.

187.

L-opportunitajiet indaqs jibqgħu wieħed mill-elementi essenzjali tal-politika dwar il-ġestjoni tar-riżorsi umani tal-Parlament. Nhar is-27 ta’ April 2015, il-Bureau approva l-pjan ta’ azzjoni għall-promozzjoni tal-ugwaljanza bejn il-ġeneri u d-diversità għal din il-leġiżlatura, jiġifieri sal-2019. Il-pjan ta’ azzjoni jiddeskrivi objettivi speċifiċi u fl-2016 kompliet l-implimentazzjoni tal-miżuri relatati.

188.

Waqt il-laqgħa tiegħu tat-12 ta’ Settembru 2016, il-Bureau approva l-introduzzjoni ta’ skema ta’ telexogħol okkażjonali għas-Segretarjat Ġenerali tal-Parlament. Anke l-gruppi politiċi jistgħu jiddeċiedu li japplikaw din l-iskema. Filwaqt li jissalvagwardja l-interessi tas-servizz u l-organizzazzjoni effikaċi tal-ħidma tal-istituzzjoni, il-Parlament xtaq jimplementa arranġamenti flessibbli u moderni għall-ġestjoni tal-persunal sabiex itejjeb il-prestazzjoni u l-motivazzjoni tal-persunal billi jippromwovi bilanċ aħjar bejn ix-xogħol u l-ħajja privata. L-attakki terroristiċi fi Franza u l-Belġju u t-tfixkil li rriżulta għall-ħidma tal-persunal tal-Parlament kienu raġuni oħra biex jitwaqqaf qafas legali biex il-persunal tal-Parlament ikun jista’ jaħdem mid-dar. It-telexogħol okkażjonali għandu jippermetti li l-membri tal-persunal jaħdmu mid-dar fuq bażi ad hoc, għal massimu ta’ tlitt ijiem kalendarji konsekuttivi u għal mhux aktar minn 36 jum ta’ xogħol għal kull sena kalendarja.

189.

Il-Bureau, fil-laqgħa tiegħu tas-26 ta’ Ottubru, adotta emendi għall-Miżuri ta’ Implimentazzjoni tal-Istatut tal-Membri, speċifikament fir-rigward tal-assistenza parlamentari. Dawn daħlu fis-seħħ nhar l-1 ta’ Jannar 2016 u fost affarijiet oħra inkludew dawn il-bidliet: 25 % tal-allowance għall-assistenza parlamentari trid tiġi riżervata għar-reklutaġġ ta’ assistenti parlamentari akkreditati, b’mod li l-allokazzjoni tal-infiq fuq l-assistenti u l-fornituri ta’ servizzi lokali tiġi limitata għal 75 %. Dan il-provvediment huwa maħsub biex itejjeb il-bilanċ bejn l-assistenti lokali u l-assistenti akkreditati, li ġiet indikata l-ħtieġa għalih fil-mument tal-kwittanza fir-rigward tas-sena 2013. L-ammont assolut tal-kuntratti għal assistenza parlamentari fis-seħħ għal kull Membru ma jridx ikun iktar minn tliet — f’każijiet eċċezzjonali jista’ jkun hemm erbgħa.

190.

Fir-rigward tal-assistenti lokali, b’riżultat tal-emendi, is-salarji u l-ħlasijiet tal-assistenti lokali saru soġġetti għal limiti minimi ta’ referenza, bl-għan li jitrażżan ir-riskju li l-paga tista’ tvarja b’mod eċċessiv mill-paga medja fl-Istati Membri. Barra minn hekk, flimkien mat-talba għal reklutaġġ, irid jitressaq fajl komplut li jippermetti li jiġi vverifikat li l-ħidma li suppost se ssir minn assistent lokali tkun waħda ġenwina u li jiġu limitati r-riskji ta’ kunflitti ta’ interess.

191.

L-emendi huma maħsuba biex jiċċaraw li l-Membri jistgħu wkoll jagħmlu użu minn persuni fiżiċi jew ġuridiċi biex jipprovdulhom servizzi sabiex jiksbu servizzi speċifiċi u identifikati b’mod ċar marbuta direttament mal-eżerċitar tal-mandat parlamentari tagħhom. L-obbligu li jiġu ppubblikati l-ismijiet tal-persuni fiżiċi u ġuridiċi kollha li l-ispejjeż tagħhom jitħallsu mill-allowance ta’ assistenza parlamentari qed jiġi estiża għad-durata tal-kuntratt ta’ dawn il-persuni. Dan qed jiġri bi qbil mal-prinċipju tat-trasparenza previst mit-Trattati (40) li l-importanza tiegħu tfakkar, b’mod partikolari, mill-Ombudsman Ewropew (41).

192.

B’segwitu għar-referendum li sar fit-23 ta’ Ġunju 2016 fir-Renju Unit (“il-vot favur Brexit”), il-Bureau ddiskuta l-konsegwenzi waqt il-laqgħa tiegħu tal-4 ta’ Lulju 2016. Il-President issottolinja li, sakemm ir-Renju Unit jibqa’ membru sħiħ tal-Unjoni Ewropea, il-Membri u l-persunal Brittaniċi tal-Parlament Ewropew se jgawdu mill-istess drittijiet u obbligi li għandhom il-Membri u l-persunal l-oħra kollha tal-istituzzjoni.

193.

Ir-referendum kellu impatt konsiderevoli fuq is-segretarjati tal-kumitati, l-unitajiet ta’ riċerka u s-servizzi orizzontali tad-Direttorati Ġenerali politiċi, li ntalbu jsegwu dan il-proċess u jħejju materjal analitiku abbażi ta’ ħidma ta’ ġbir ta’ informazzjoni biex jikkunsidraw l-impatt tat-tluq tar-Renju Unit fuq l-oqsma ta’ politika u l-leġiżlazzjoni fl-oqsma rispettivi tagħhom. Il-ħidma ġejjiena rigward din il-kwistjoni hija ta’ natura legali kumplessa ħafna, iżda l-għarfien espert li ġie akkumulat fis-segretarjati tal-kumitati u d-dipartimenti tematiċi qiegħed lest biex jiġi mobilizzat matul il-fażijiet sussegwenti tal-proċess ta’ tluq abbażi tad-deċiżjonijiet politiċi li jittieħdu.

194.

Waqt li kienu qed jiġu riveduti r-Regolamenti tal-Persunal u jiġi adottati l-perspettivi finanzjarji għall-2014-2020, ġie adottat ftehim interistituzzjonali li jipprevedi tnaqqis annwali ta’ 1 % tal-karigi indikati fil-pjan ta’ stabbiliment ta’ kull istituzzjoni għal ħames snin. B’applikazzjoni ta’ dan il-ftehim, ġew eliminati 57 kariga mill-pjan ta’ stabbiliment għall-2016. Żewġ karigi addizzjonali ġew eliminati mill-pjan ta’ stabbiliment tal-Parlament biex ġew trasferitit lill-Kummissjoni Ewropea fil-qafas tal-implimentazzjoni ta’ proġetti informatiċi interistituzzjonali.

195.

Barra minn hekk il-Parlament talab li jinħolqu 39 kariga supplimentari fil-pjan ta’ stabbiliment fl-2016 biex jiġu indirizzati bżonnijiet speċifiċi, b’mod partikolari ir-rinforz tas-segretarjati tal-kumitati parlamentari b’mod li tiżdied il-kapaċità ta’ skrutinju fuq l-awtorità eżekuttiva, b’mod partikolari fir-rigward tal-atti delegati, kif ukoll ir-rinforz tas-servizzi ta’ sigurtà fil-bini tal-Parlament.

196.

L-implimentazzjoni tal-ftehim interistituzzjonali dwar it-tnaqqis annwali ta’ 1 % tal-membri tal-persunal minn kull istituzzjoni għal ħames snin għandha tibqa’ għaddejja sal-2018 f’dak li jirrigwarda lill-Parlament. Madankollu, meta jitqiesu l-bżonnijiet speċifiċi tal-Parlament li wassla biex jinħolqu karigi ġodda fl-2014 u l-2016, il-miżuri ta’ tnaqqis tal-karigi se jiġu estiżi għal sena oħra, sal-2019.

197.

Kollox ma’ kollox, tħassru 20 kariga mill-pjan ta’ stabbiliment tal-baġit inizjali tal-2016 fil-livell tas-Segretarjat, filwaqt li żdiedu 43 kariga temporanja fil-livell tal-gruppi politiċi. Fil-qafas tal-baġit emendatorju nru 3 tal-Unjoni Ewropea għas-sena finanzjarja 2016, ġew allokati 34 kariga addizzjonali fil-livell SC u waħda fil-livell AD lill-Parlament. Dan ir-rinforz kien meħtieġ biex tiġi assigurata s-sigurtà tal-punti strateġiċi ġewwa l-bini tal-Parlament minn gwardji armati.

198.

Il-modifiki prinċipali li saru għall-istruttura organizzattiva u għad-diriġenza tal-Parlament huma miġbura fil-qosor fit-tabella hawn taħt:

Tabella 19

Sinteżi tar-ristrutturar fis-Segretarjat tal-Parlament fl-2016

Tabella 1.

Tabella 2.

Tabella 3.

Tabella 4.

Tabella 5.

Tabella 6.

Tabella 7.

Tabella 8.

Tabella 9.

Tabella 10.

Tabella 11.

Tabella 12.

Tabella 13.

Tabella 14.

Tabella 15.

Tabella 16.

Tabella 17.

Tabella 18.

Tabella 19.

Grafika 1.

Grafika 2.

Grafika 3.

Grafika 4.