26.2.2015

Il-Ġurnal Uffiċjali tal-Unjoni Ewropea

CA 68/1

AVVIŻ TA’ KOMPETIZZJONIJIET ĠENERALI

AMMINISTRATURI (AD 5/AD 7) SPEĊJALIZZATI FIR-RIĊERKA ĠURIDIKA

EPSO/AD/295/15 – Ġuristi b’taħriġ fid-dritt Bulgaru (BG)

EPSO/AD/296/15 – Ġuristi b’taħriġ fid-dritt Ġermaniż (DE)

EPSO/AD/297/15 – Ġuristi b’taħriġ fid-dritt Kroat (HR)

EPSO/AD/298/15 – Ġuristi b’taħriġ fid-dritt Irlandiż (IE)

EPSO/AD/299/15 – Ġuristi b’taħriġ fid-dritt Litwan (LT)

EPSO/AD/300/15 – Ġuristi b’taħriġ fid-dritt Slovakk (SK)

(2015/C 068 A/01)

L-Uffiċċju Ewropew għas-Selezzjoni tal-Persunal (EPSO) qed jorganizza kompetizzjonijiet ġenerali abbażi ta’ kwalifiki u eżamijiet sabiex jinħolqu listi ta’ riżerva maħsuba biex jimtlew pożizzjonijiet vakanti ta’ uffiċjali fil-livell ta’ “amministraturi” (1) fl-Istituzzjonijiet tal-Unjoni Ewropea, b’mod partikolari fid-Direttorat għar-Riċerka u d-Dokumentazzjoni tal-Qorti tal-Ġustizzja fil-Lussemburgu.

Qabel tapplika, għandek taqra bir-reqqa d-dispożizzjonijiet ġenerali applikabbli għall-kompetizzjonijiet ġenerali ppubblikati f’Il-Ġurnal Uffiċjali tal-Unjoni Ewropea C 60 A tal-1 ta’ Marzu 2014 u fuq il-websajt tal-EPSO. Dawn id-dispożizzjonijiet huma parti integrali mill-avviż ta’ kompetizzjonijiet.

WERREJ

KUNTEST ĠENERALI

II.

DESKRIZZJONI TAD-DMIRIJIET

III.

KUNDIZZJONIJIET TA’ AMMISSJONI

IV.

AMMISSJONI GĦALL-KOMPETIZZJONI U SELEZZJONI ABBAŻI TAL-KWALIFIKI

INTERVISTA MILL-BOGĦOD

VI.

ĊENTRU TA’ EVALWAZZJONI

VII.

VERIFIKA TAD-DIKJARAZZJONIJIET TAL-KANDIDATI

VIII.

LISTI TA’ RIŻERVA

I. KUNTEST ĠENERALI

1.	Numru ta’ kandidati magħżula

EPSO/AD/295/15 – BG AD 5 = 2 AD 7 = 2

EPSO/AD/296/15 – DE AD 5 = 3 AD 7 = 3

EPSO/AD/297/15 – HR AD 5 = 2 AD 7 = 2

EPSO/AD/298/15 – IE AD 5 = 2 AD 7 = 2

EPSO/AD/299/15 – LT AD 5 = 2 AD 7 = 2

EPSO/AD/300/15 – SK AD5 = 2 AD7 = 2

Kummenti

Dan l-avviż jinkludi sitt kompetizzjonijiet u żewġ gradi għal kull kompetizzjoni. Int tista’ tapplika għal kompetizzjoni waħda u għal grad wieħed biss.

Din l-għażla ssir meta timla l-applikazzjoni elettronika u ma tistax tinbidel ladarba tkun ikkonfermajt u vvalidajt l-applikazzjoni tiegħek b’mod elettroniku.

Madankollu,

—	jekk applikajt għal waħda mill-kompetizzjonijiet fil-grad AD 7, U

—	jekk ma tissodisfax il-kundizzjonijiet ta’ eliġibbiltà tal-kompetizzjoni tal-grad AD 7 iżda tissodisfa dawk għall-grad AD 5 tal-istess kompetizzjoni, il-bord tas-selezzjoni jista’, bil-kunsens tiegħek (2), jittrasferixxi l-applikazzjoni tiegħek għall-grad AD 5 fl-istess kompetizzjoni.

Dan it-trasferiment iseħħ qabel il-verifika tat-tweġibiet tiegħek għall-kriterji ta’ selezzjoni u abbażi tad-dikjarazzjonijiet tiegħek fl-applikazzjoni elettronika.

3.	Kif tapplika?

Għandek tapplika b’mod elettroniku billi ssegwi l-proċedura indikata fuq il-websajt tal-EPSO, u b’mod partikolari fil-Manwal tal-Applikazzjoni.

Data tal-għeluq (inkluża l-validazzjoni): il-31 ta’ Marzu 2015 f’12.00 (nofsinhar), ħin ta’ Brussell

II. DESKRIZZJONI TAD-DMIRIJIET

Id-Direttorat għar-Riċerka u d-Dokumentazzjoni, magħmul minn ġuristi tal-Istati Membri kollha tal-Unjoni, joffri assistenza lill-Qorti tal-Ġustizzja, lit-Tribunal u lit-Tribunal għas-Servizz Pubbliku fl-eżerċitar tad-dmirijiet ġuriżdizzjonali tagħhom u jikkontribwixxi għad-disseminazzjoni tal-każistika fil-qasam tad-dritt tal-Unjoni Ewropea.

Id-Direttorat, b’mod partikolari, huwa mistenni jwettaq ħidmiet ta’ analiżi preliminari fir-rigward ta’ kawżi ġodda kif ukoll riċerka, bit-talba tal-Qorti jew tat-Tribunali, b’rabta mal-kawżi li għalihom dawn il-qrati jkunu ġew invokati. Tali riċerki jistgħu jirrigwardaw id-dritt tal-Unjoni Ewropea jew id-dritt ta’ Stat Membru wieħed jew aktar, u eventwalment dak ta’ pajjiżi terzi, li jiġu analizzati permezz ta’ approċċ komparattiv.

Id-Direttorat għandu rwol importanti wkoll fid-disseminazzjoni esterna tal-każistika tal-Qorti u tat-Tribunali, billi jwettaq analiżi sistematika ta’ din il-każistika u billi jfassal għodod maħsuba għar-riċerka. Barra minn hekk, huwa responsabbli minn diversi bażijiet ta’ dejta.

Il-ġuristi tad-Direttorat jikkontribwixxu għall-oqsma kollha ta’ attività msemmija hawn taħt, skont il-grad tagħhom.

Amministraturi tal-Grad AD 5 :

—	ħidmiet ta’ analiżi tal-każistika ta’ tliet qrati,

—	l-analiżi preliminari ta’ kawżi ġodda,

—	il-parteċipazzjoni fil-ħidmiet ta’ riċerka, b’mod partikolari f’dak li jirrigwarda d-dritt nazzjonali tagħhom,

—	il-parteċipazzjoni fil-monitoraġġ ta’ żviluppi ġuridiċi fil-livell nazzjonali u fil-livell tad-dritt tal-Unjoni.

Amministraturi tal-Grad AD 7 :

—

ħidmiet ta’ koordinazzjoni u ta’ reviżjoni li jinvolvu livell għoli ta’ responsabbiltà f’dak li jirrigwarda

—	l-analiżi tal-każistika tal-qrati tal-Unjoni,

—	l-analiżi preliminari ta’ kawżi ġodda; ir-riċerka u l-monitoraġġ ta’ żviluppi ġuridiċi fid-dritt nazzjonali u fid-dritt tal-Unjoni Ewropea, fid-dritt komparattiv u f’dak internazzjonali;

—	it-tmexxija ta’ proġetti ġuridiċi u s-segwitu ta’ proġetti kbar tal-informatika li biex dawn jitwettqu jkun meħtieġ għarfien espert ġuridiku ta’ livell għoli,

—	it-tfassil u/jew l-iżvilupp ta’ għodod ta’ riċerka ġuridika u ta’ disseminazzjoni tal-każistika nazzjonali u tal-Unjoni, analizzata min-naħa tad-Direttorat.

Ta’ min wieħed jenfasizza mal-ewwel żewġ karatteristiċi tal-ħidma tad-Direttorat:

1.	Minbarra l-għarfien tajjeb tad-dritt tal-Unjoni Ewropea, l-eżerċitar tad-dmirijiet jirrikjedi, min-naħa l-waħda, għarfien profond, mifrux u aġġornat tad-dritt nazzjonali tiegħu stess, u min-naħa l-oħra, ħila eċċellenti fir-riċerka ġuridika.

2.	Għall-finijet tas-servizz, il-ġuristi tad-Direttorat għar-Riċerka u d-Dokumentazzjoni jrid ikollhom għarfien tajjeb tal-lingwa Franċiża.

III. KUNDIZZJONIJIET TA’ AMMISSJONI

Fid-data tal-għeluq stabbilita għar-reġistrazzjoni elettronika , int għandek tissodisfa l-kundizzjonijiet ġenerali u speċifiċi kollha li ġejjin:

1.	Kundizzjonijiet ġenerali

(a)	Tkun ċittadin ta’ wieħed mill-Istati Membri tal-Unjoni Ewropea.

(b)	Tkun tgawdi mid-drittijiet ċivili tiegħek.

(c)	Tkun wettaqt kull obbligu impost mil-liġijiet dwar ir-reklutaġġ applikabbli fil-qasam militari.

(d)	Tipproduċi r-referenzi dwar il-karattru, meħtieġa għall-qadi tad-dmirijiet previsti.

2.	Kundizzjonijiet speċifiċi

2.1

Kwalifiki

Il-Grad AD 5

Livell ta’ edukazzjoni li jikkorrispondi għal studji universitarji konklużi ta’ mill-anqas tliet snin, iċċertifikati bid-diploma fil-liġi, indikata hawn isfel.

Il-Grad AD 7

Livell ta’ edukazzjoni li jikkorrispondi għal studji universitarji konklużi, ta’ mill-inqas erba’ snin, iċċertifikati bid-diploma fil-liġi, indikata hawn isfel.

Id-diploma fil-liġi trid tikkorrispondi mas-sistema ġuridika applikabbli għall-kompetizzjoni magħżula (ara hawn taħt).

Sabiex jiddetermina jekk il-kandidat ikunx kiseb livell li jikkorrispondi ma’ studji universitarji konklużi, il-bord ta’ selezzjoni jieħu inkunsiderazzjoni r-regoli li kienu fis-seħħ fiż-żmien li fih tkun inkisbet id-diploma.

Diploma fid-dritt Bulgaru:

Удостоверява се с българска диплома за завършено висше юридическо образование “магистър по право”.

Diploma fid-dritt Ġermaniż:

Juristische Ausbildung im deutschen Recht, die mit dem zweiten Juristischen Staatsexamen abgeschlossen wurde.

Diploma fid-dritt Kroat:

Diploma iz hrvatskog prava stečena na sveučilišnom studiju.

Diploma fid-dritt Irlandiż:

Diploma fil-liġi mogħtija minn Università Irlandiża jew kwalifika bħala avukat jew bħala konsulent legali fl-Irlanda.

Céim sa dlí ó ollscoil Éireannach nó cáilíocht mar abhcóide nó aturnae a bheith bainte amach agat in Éirinn.

Diploma fid-dritt Litwan:

Kandidatai turi turėti universitetinį išsilavinimą Lietuvos teisės srityje, patvirtintą teisės bakalauro ar teisės magistro diplomu arba juos atitinkančiu diplomu, suteikiančiu teisininko kvalifikaciją.

Diploma fid-dritt Slovakk:

Vysokoškolské štúdium v oblasti slovenského práva ukončené diplomom z odboru právo, ktorý umožňuje pokračovať vzdelávanie v doktorandskom študijnom programme.

2.2

Esperjenza professjonali

Il-Kompetizzjoni AD 5:

Ma tinħtieġ l-ebda esperjenza professjonali.

Il-Kompetizzjoni AD 7:

Tinħtieġ esperjenza professjonali ta’ mill-inqas 6 snin li tkun rilevanti għan-natura tad-dmirijiet ikkonċernati.

Esperjenza fir-riċerka ġuridika akkwistata matul it-tħejjija għad-dottorat tista’ tiġi kkunsidrata bħala esperjenza professjonali sal-limitu ta’ sentejn, dejjem jekk ikun inkiseb id-dottorat.

2.3

Għarfien lingwistiku (3)

Id-Direttorat għar-Riċerka u d-Dokumentazzjoni jrid jiżgura l-kopertura ġeografika tal-Istati Membri kollha tal-Unjoni Ewropea sabiex jiggarantixxi assistenza legali lit-tliet qrati permezz ta’ riċerki u ta’ analiżi ġuridiċi fil-qasam tad-drittijiet nazzjonali tal-Istati rispettivi u tad-dritt tal-Unjoni.

L-għażla tal-lingwi meħtieġa għall-eżamijiet tirrifletti l-ħtiġijiet tas-servizz u, b’mod aktar speċifiku, il-ħtiġijiet ta’ rappreżentanza ta’ ġuristi li jkunu ġejjin minn sistemi ġuridiċi ta’ ċerti Stati Membri li għadhom mhux rappreżentati fis-servizz minn xi uffiċjal.

Lingwa 1

Il-lingwa ewlenija (livell minimu meħtieġ: C1) għarfien profond tal-lingwa tal-kompetizzjoni

EPSO/AD/295/15: għarfien profond tal-Bulgaru (BG)

EPSO/AD/296/15: għarfien profond tal-Ġermaniż (DE)

EPSO/AD/297/15: għarfien profond tal-Kroat (HR)

EPSO/AD/298/15: għarfien profond tal-Ingliż (EN) jew tal-Irlandiż (GA)

EPSO/AD/299/15: għarfien profond tal-Litwan (LT)

EPSO/AD/300/15: għarfien profond tas-Slovakk (SK)

Lingwa 2

It-tieni lingwa (livell minimu meħtieġ: B2)

għarfien tajjeb tal-Franċiż

Il-Qorti tal-Ġustizzja hija istituzzjoni multilingwa li tiffunzjona skont is-sistema lingwistika definita mir-Regoli ta’ Proċedura tagħha. L-għażla tal-lingwi meħtieġa għall-eżamijiet tirrifletti l-ħtiġijiet tas-servizz.

F’dak li jirrigwarda l-lingwa 1, l-eżerċitar tad-dmirijiet jirrikjedi għarfien profond, mifrux u aġġornat tad-dritt nazzjonali tal-Istat tal-kandidat. Dan l-għarfien ovvjament jimplika għarfien profond tal-lingwa jew tal-lingwi tal-Istat Membru inkwistjoni, indikati hawn fuq.

F’dak li jirrigwarda l-lingwa 2, li bilfors trid tkun il-Franċiż, jeħtieġ li jiġi enfasizzat li d-dmirijiet ta’ analiżi u ta’ riċerka, deskritti fit-Taqsima II hawn fuq, jiġu eżerċitati essenzjalment bil-lingwa Franċiża, il-lingwa ta’ ħidma tas-servizz, u li dawn jirrikjedu għarfien tajjeb, kemm orali u miktub kif ukoll attiv u passiv, ta’ din il-lingwa.

IV. AMMISSJONI GĦALL-KOMPETIZZJONI U SELEZZJONI ABBAŻI TAL-KWALIFIKI

1. Proċedura

Il-verifika tal-kundizzjonijiet ġenerali u speċifiċi kif ukoll s-selezzjoni abbażi tal-kwalifiki l-ewwel isiru skont id-dikjarazzjonijiet li tkun ipprovdejt fl-applikazzjoni tiegħek.

(a)	Ir-risposti tiegħek għall-mistoqsijiet dwar il-kundizzjonijiet ġenerali u speċifiċi jkunu pproċessati sabiex jiġi ddeterminat jekk inti tagħmilx parti mil-lista tal-kandidati li jissodisfaw il-kundizzjonijiet kollha ta’ ammissjoni għall-kompetizzjoni (ara t-Taqsima III).

(b)

Imbagħad, il-bord jagħżel mill-kandidati eliġibbli għall-kompetizzjoni, abbażi tal-kwalifiki tagħhom, sabiex jidentifika liema huma l-kandidati li għandhom l-aktar profil rilevanti (speċjalment diplomi u esperjenza professjonali) għad-dmirijiet u l-kriterji ta’ selezzjoni deskritti f’dan l-avviż ta’ kompetizzjoni. Din is-selezzjoni ssir biss abbażi tad-dikjarazzjonijiet li tkun ipprovdejt fit-taqsima “Evalwazzjoni tal-Kapaċitajiet” (“Talent Screener”) u ssir f’żewġ stadji:

—	kull kriterju tas-selezzjoni jġorr piż ta’ 1 sa 3, skont l-importanza li jallokalu l-bord,

—	il-bord ta’ selezzjoni jeżamina r-risposti tal-kandidati u jagħti marka minn 0 sa 4 għal kull risposta, skont il-kwalifiki tal-kandidat. Il-marki, immultiplikati bil-piż mogħti għal kull mistoqsija, jingħaddu ma’ xulxin sakemm tinkiseb il-marka globali.

Imbagħad, il-bord ta’ selezzjoni jistabbilixxi klassifika tal-kandidati skont dawn il-marki globali. L-għadd ta’ kandidati (4) mistiedna għall-intervista mill-bogħod jikkorrispondi, skont il-kompetizzjoni u skont il-grad, għal bejn wieħed u ieħor 8,5 darbiet u għal massimu 9 darbiet, l-għadd ta’ kandidati magħżula (ara t-Taqsima I, il-punt 1). Dan in-numru jiġi ppubblikat fuq il-websajt tal-EPSO (http://blogs.ec.europa.eu/eu-careers.info/).

2. Kriterji ta’ selezzjoni

Fil-qafas tas-selezzjoni abbażi tal-kwalifiki, il-bord ta’ selezzjoni jikkunsidra l-elementi li ġejjin:

1.	Ir-riżultati miksuba meta tingħata/jingħataw id-diploma/diplomi meħtieġa għall-aċċess għall-kompetizzjoni.

2.	Il-kwalifiki u d-diplomi postuniversitarji fl-oqsma tad-dritt komparattiv, tad-dritt internazzjonali jew tad-dritt tal-Unjoni Ewropea.

3.	Il-kwalifiki u d-diplomi postuniversitarji fid-dritt, f’oqsma differenti minn dawk imsemmija fil-punt 2 hawn fuq.

L-esperjenza professjonali rilevanti għan-natura tad-dmirijiet, b’mod partikolari fil-qasam tar-riċerka ġuridika fid-dritt nazzjonali, fid-dritt komparattiv jew f’dak tal-Unjoni, inkluża l-esperjenza akkwistata fl-eżerċitar ta’ professjoni ġuridika, bħal dik ta’ avukat jew maġistrat, li timplika attività ta’ riċerka.

5.	Il-pubblikazzjonijiet fil-qasam ġuridiku.

Għall-valutazzjoni tal-punti 2 u 3, jiġu kkunsidrati d-durata tal-istudji li normalment tintalab biex jingħataw il-kwalifiki jew id-diplomi inkwistjoni, kif ukoll ir-riżultati miksuba. Kull kwalifika jew diploma tista’ tissemma’ darba waħda biss.

V. INTERVISTA MILL-BOGĦOD

1.	L-istedina

Jekk inti tkun wieħed mill-kandidati li

—	skont id-dikjarazzjonijiet tagħhom fl-applikazzjoni elettronika, jissodisfaw il-kundizzjonijiet ta’ ammissjoni ġenerali u speċifiċi tat-Taqsima III u

—	ikunu kisbu waħda mill-aħjar marki fis-selezzjoni abbażi tal-kwalifiki,

tiġi mistieden biex tieħu sehem f’intervista strutturata mill-bogħod bil-lingwa 2 tiegħek (FR). Din l-intervista strutturata mill-bogħod (il-parti 1) tiġi kkombinata mal-intervista strutturata li ssir fiċ-ċentru ta’ evalwazzjoni (il-parti 2). Dawn iż-żewġ intervisti jiffurmaw l-eżami (d) li għandu l-għan li jevalwa l-kompetenzi speċifiċi tiegħek fil-qasam ġuridiku f’dak li jirrigwarda d-dmirijiet deskritti, u abbażi tal-kriterji ta’ selezzjoni indikati f’dan l-Avviż ta’ Kompetizzjoni. Il-livell ta’ komunikazzjoni orali tiegħek bil-Franċiż jiġi evalwat ukoll matul din l-intervista mill-bogħod.

Sabiex tieħu sehem f’intervista mill-bogħod, trid bilfors tirriżerva data fiż-żmien stipulat, li jiġi indikat lilek permezz tal-profil tal-EPSO tiegħek.

Marki

Kompetenzi speċifiċi (l-eżami d – il-parti 1)

d – il-parti 1) intervista fil-qasam: minn 0 sa 20 punt

il-minimu meħtieġ: 10 punti

L-intervista fil-qasam (l-eżami (d) – il-parti (1)) hija eliminatorja u l-punti miksuba jingħaddu mal-punti tat-testijiet l-oħra taċ-ċentru ta’ evalwazzjoni, sabiex tkun tista’ tingħata marka finali.

(d) – il-parti (1) komunikazzjoni orali bil-Franċiż: minn 0 sa 10 punti

il-minimu meħtieġ: 7 punti

Il-komunikazzjoni orali bil-Franċiż hija eliminatorja iżda l-punti miksuba ma jingħaddux mal-punti tat-testijiet l-oħra taċ-ċentru ta’ evalwazzjoni, sabiex tkun tista’ tingħata marka finali.

Jekk il-kandidat ma jkunx kiseb il-minimu meħtieġ għall-komunikazzjoni orali bil-Franċiż, il-kompetenzi speċifiċi tiegħu ma jiġux evalwati.

Imbagħad, il-bord ta’ selezzjoni jistabbilixxi klassifika tal-kandidati skont il-marki li jingħataw waqt l-intervista fil-qasam. L-għadd ta’ kandidati (5) mistiedna għaċ-ċentru ta’ evalwazzjoni (6) jikkorrispondi, skont il-kompetizzjoni u skont il-grad, għal mhux iktar minn tliet darbiet l-għadd ta’ kandidati magħżula (ara t-Taqsima I, il-punt 1). Dan in-numru jiġi ppubblikat fuq il-websajt tal-EPSO (http://blogs.ec.europa.eu/eu-careers.info/).

VI. ĊENTRU TA’ EVALWAZZJONI

1.	L-istedina

Jekk tkun fost dawk il-kandidati li jkunu kisbu waħda mill-aħjar marki fl- intervista fil-qasam int tiġi mistieden biex tieħu sehem fiċ-ċentru ta’ evalwazzjoni li normalment isir il-Lussemburgu u li jkun mifrux fuq jumejn (7).

Jekk tkun fost il-kandidati ammessi għaċ-ċentru ta’ evalwazzjoni, trid iġġib miegħek il-fajl tal-applikazzjoni tiegħek komplut, li jkun jinkludi d-dokumenti ta’ sostenn tad-diplomi u tal-esperjenzi professjonali tiegħek, meta tiġi għaċ-ċentru ta’ evalwazzjoni (8).

Kundizzjonijiet: Ara l-punt 2.1.7 tar-regoli ġenerali applikabbli għall-kompetizzjonijiet miftuħa.

2.	Ċentru ta’ evalwazzjoni

Inti tkun soġġett għal tliet tipi ta’ evalwazzjoni li l-kontenut tagħhom huwa vvalidat mill-bord ta’ selezzjoni:

—

il-ħiliet tiegħek marbuta mar-raġunament jiġu evalwati permezz tat-testijiet li ġejjin:

(a)	it-test tar-raġunament verbali

(b)	it-test tar-raġunament numeriku

(c)	it-test tar-raġunament astratt

—

il-kompetenzi speċifiċi tiegħek fil-qasam tad-dritt tal-Unjoni Ewropea u tad-dritt nazzjonali jiġu evalwati permezz tat-testijiet li ġejjin:

(d)	– il-parti (2) intervista strutturata dwar il-kompetenzi f’dan il-qasam,

(e)	studju tal-każ relatat ma’ qasam tad-dritt tal-Unjoni flimkien ma’ analiżi ta’ kwistjonijiet ġuridiċi li jikkonċernaw b’mod partikolari d-dritt nazzjonali tal-kandidat.

—

il-kompetenzi ġenerali tiegħek (9) jiġu evalwati permezz tat-testijiet li ġejjin:

(e)	studju tal-każ relatat ma’ qasam tad-dritt tal-Unjoni flimkien ma’ analiżi ta’ kwistjonijiet ġuridiċi li jikkonċernaw b’mod partikolari d-dritt nazzjonali tal-kandidat.

(f)	eżerċizzju fi grupp

(g)	intervista strutturata

Tajjeb li tkun taf li l-livell ta’ komunikazzjoni miktuba tiegħek bil-Franċiż jiġi evalwat tul l-eżerċizzju e) kollu.

Lingwi

Il-lingwa 1 għat-testijiet (a), (b) u (c)

Il-lingwa 2 (FR) għat-testijiet (d), (e), (f) u (g)

Kull kompetenza ġenerali tiġi eżaminata kif ġej:

	Studju ta’ każ	Eżerċizzju fi grupp	Intervista strutturata
Analiżi u soluzzjoni tal-problemi	x	x
Komunikazzjoni	x		x
Kwalità u riżultati	x		x
Tagħlim u żvilupp		x	x
Prijoritizzazzjoni u organizzazzjoni	x	x
Reżiljenza		x	x
Ħidma f’tim		x	x
Ħiliet fit-tmexxija		x	x

Il-marki

Ħiliet ta’ raġunament

(a)	verbali: minn 0 sa 20 punt

(b)	numeriku minn 0 sa 10 punti

(c)	astratt minn 0 sa 10 punti

It-testijiet (a), (b) u (c) mhumiex eliminatorji iżda l-punti miksuba jingħaddu mal-punti tat-testijiet l-oħra taċ-ċentru ta’ evalwazzjoni.

Kompetenzi speċifiċi ((d) – il-parti (2) u (e))

(d) – il-parti (2) minn 0 sa 40 punt

il-minimu meħtieġ: 20 punt

Il-punti miksuba fl-eżami (d) – il-parti (1) jingħaddu ma’ dawk tal-parti (2) sabiex tkun tista’ tingħata l-marka totali għall-eżami (d):

minn 0 sa 60 punt

il-minimu meħtieġ: 30 punt għall-partijiet 1 u 2 f’daqqa

(e)	minn 0 sa 60 punt il-minimu meħtieġ: 30 punt

(e)	il-komunikazzjoni miktuba bil-Franċiż: minn 0 sa 10 punti il-minimu meħtieġ: 7 punti

Kompetenzi ġenerali ((e),(f) u (g))

minn 0 sa 80 punt għall-kompetenzi ġenerali kollha (10 punti għal kull kompetenza)

il-minimu meħtieġ:

3 punti għal kull kompetenza u

40 punt għat-8 kompetenzi ġenerali kollha f’daqqa

VII. VERIFIKA TAD-DIKJARAZZJONIJIET TAL-KANDIDATI

Meta joħorġu r-riżultati tat-testijiet taċ-ċentru ta’ evalwazzjoni, id-dikjarazzjonijiet li jsiru mill-kandidati fl-applikazzjoni elettronika jiġu vverifikati mill-EPSO għall-konformità tagħhom mal-kundizzjonijiet ġenerali u mill-bord ta’ selezzjoni għall-konformità tagħhom mal-kundizzjonijiet speċifiċi abbażi tad-dokumenti ta’ sostenn ipprovduti mill-kandidati.

L-applikazzjonijiet tal-kandidati li jkunu kisbu l-minimu meħtieġ u l-aħjar marki fit-testijiet kollha taċ-ċentru ta’ evalwazzjoni jiġu vverifikati f’ordni dixxendenti ta’ mertu. Dawn il-kandidati jridu jkunu kisbu wkoll il-minimu meħtieġ fl-evalwazzjonijiet tal-komunikazzjoni orali u miktuba bil-Franċiż. Din il-verifika tibqa’ ssir sakemm jintlaħaq l-għadd ta’ kandidati li jistgħu jitniżżlu fil-lista ta’ riżerva u li effettivament jissodisfaw il-kundizzjonijiet kollha ta’ ammissjoni. Id-dokumenti ta’ sostenn tal-kandidati li jikklassifikaw taħt dan il-limitu ma jiġux eżaminati.

Għall-evalwazzjoni tal-kwalifiki, id-dokumenti ta’ sostenn jiġu kkunsidrati biss biex jikkonfermaw ir-risposti diġà mogħtija fit-taqsima “Evalwazzjoni tal-Kapaċitajiet”. Jekk matul din il-verifika jinstab li dawn id-dikjarazzjonijiet mhumiex ikkonfermati mid-dokumenti ta’ sostenn rilevanti, il-kandidati kkonċernati jiġu esklużi mill-kompetizzjoni.

VIII. LISTI TA’ RIŻERVA

1.	Il-kandidati fil-lista ta’ riżerva

Il-bord ta’ selezzjoni jniżżel ismek fil-lista ta’ riżerva:

—	jekk tkun fost il-kandidati li jkunu kisbu l-minimu meħtieġ u waħda mill-aħjar marki fit-testijiet kollha minn a) sa g) kif ukoll il-minimu meħtieġ fl-evalwazzjonijiet tal-komunikazzjoni orali u miktuba bil-Franċiż (ara l-għadd ta’ kandidati magħżula, it-Taqsima I, il-punt 1) (10),

—	u jekk fid-dawl tad-dokumenti ta’ sostenn, inti tkun tissodisfa l-kundizzjonijiet kollha ta’ ammissjoni (ara t-Taqsima III).

2.	Klassifika

Il-listi ta’ riżerva jiġu stabbiliti skont il-kompetizzjoni u skont il-grad u f’ordni alfabetika.

(1) F’dan l-avviż, kull referenza għall-persuna tas-sess maskil hija wkoll għall-persuna tas-sess femminil.

(2) Inti tintalab tagħti dan il-kunsens waqt ir-reġistrazzjoni elettronika.

(3) Ara l-Qafas Komuni Ewropew ta’ Referenza għal-Lingwi (QKERL) (http://europass.cedefop.europa.eu/mt/resources/european-language-levels-cefr)

(4) Fil-każ li, diversi kandidati jkunu kisbu l-istess marka għall-aħħar post disponibbli, dawn il-kandidati jkunu mistiedna kollha għall-intervista mill-bogħod.

(5) Fil-każ li, diversi kandidati jkunu kisbu l-istess marka għall-aħħar post disponibbli, dawn il-kandidati jkunu mistiedna kollha għaċ-ċentru ta’ evalwazzjoni.

(6) Il-kandidati li ma jkunux mistiedna għaċ-ċentru ta’ evalwazzjoni jirċievu r-riżultati tal-evalwazzjoni tagħhom kif ukoll il-piż attribwit għal kull mistoqsija mill-bord ta’ selezzjoni.

(7) Minħabba raġunijiet ta’ organizzazzjoni, it-testijiet marbuta mar-raġunament jistgħu jsiru f’ċentri fl-Istati Membri, indipendentement mit-testijiet l-oħra taċ-ċentru ta’ evalwazzjoni.

(8) Id-data tal-konvokazzjoni għaċ-ċentru ta’ evalwazzjoni tiġi kkomunikata lilek fi żmien xieraq permezz tal-profil tiegħek tal-EPSO.

(9) Dawn il-kompetenzi huma mfissra fid-detall fil-punt 1.2 tad-dispożizzjonijiet ġenerali applikabbli għall-kompetizzjonijiet ġenerali.

(10) F’każ li diversi kandidati jkunu kisbu l-istess marka għall-aħħar post disponibbli, dawn il-kandidati jitniżżlu kollha fil-lista ta’ riżerva.

		ISSN 1977-0987
Il-Ġurnal Uffiċjali tal-Unjoni Ewropea		C 68A

Edizzjoni bil-Malti	Informazzjoni u Avviżi	Volum 58 26 ta' Frar 2015

Avviż Nru	Werrej	Paġna
	V Avviżi
	PROĊEDURI AMMINISTRATTIVI
	L-Uffiċċju Ewropew għas-Selezzjoni tal-Persunal (EPSO)
2015/C 068A/01	Avviż ta’ kompetizzjonijiet ġenerali — Amministraturi (AD 5/AD 7) speċjalizzati fir-riċerka ġuridika — EPSO/AD/295/15 – Ġuristi b’taħriġ fid-dritt Bulgaru (BG) — EPSO/AD/296/15 – Ġuristi b’taħriġ fid-dritt Ġermaniż (DE) — EPSO/AD/297/15 – Ġuristi b’taħriġ fid-dritt Kroat (HR) — EPSO/AD/298/15 – Ġuristi b’taħriġ fid-dritt Irlandiż (IE) — EPSO/AD/299/15 – Ġuristi b’taħriġ fid-dritt Litwan (LT) — EPSO/AD/300/15 – Ġuristi b’taħriġ fid-dritt Slovakk (SK)	1