30.8.2011   

MT

Il-Ġurnal Uffiċjali tal-Unjoni Ewropea

C 254/1

1.

L-Uffiċċju Ewropew Kontra l-Frodi OLAF twaqqaf fl-1999 (2). L-OLAF huwa Direttorat Ġenerali tal-Kummissjoni imma huwa funzjonalment indipendenti b’rispett għax-xogħol investigattiv tiegħu. Ir-Regolament Nru 1073/1999 (3) (minn hawn 'il quddiem imsejjaħ “ir-Regolament OLAF”) jassenja lill-OLAF l-objettiv ġenerali li jikkontribwixxi għall-ħarsien tal-interessi finanzjarji tal-Unjoni, u jikkonferixxi fuqu żewġ kompiti prinċipali: it-twettiq ta’ investigazzjonijiet amministrattivi u l-provvista lill-Istati Membri b’għajnuna sabiex iħarsu l-baġit tal-Unjoni minn frodi, inklużi kontribuzzjonijiet għat-tfassil u l-iżvilupp ta’ metodi fil-ġlieda kontra l-frodi u kwalunkwe attività illegali oħra li taffettwa l-interessi finanzjarji tal-Unjoni.

2.

Barra minn hekk, il-Kummissjoni fdat lill-OLAF bit-tħejjija tal-inizjattivi leġiżlattivi u regolatorji tal-Kummissjoni bil-għan ta’ prevenzjoni ta’ frodi, u kwalunkwe attività operattiva oħra tal-Kummissjoni b’relazzjoni mal-ġlieda kontra l-frodi, inkluża l-ġestjoni ta’ programmi ta’ finanzjament.

3.

Għall-investigazzjonijiet tiegħu għall-għan tal-ġlieda kontra l-frodi, il-korruzzjoni u kwalunkwe attività illegali oħra li taffettwa l-interessi finanzjarji tal-Unjoni, l-Uffiċċju ma jistax jiddependi fuq ir-Regolament OLAF biss. L-użu ta’ bażi legali addizzjonali huwa dejjem neċessarju biex jawtorizza lill-Uffiċċju biex iwettaq miżuri investigattivi f’każijiet speċifiċi, kemm għal investigazzjonijiet esterni fl-Istati Membri u għal investigazzjonijiet interni fi ħdan l-istituzzjonijiet, il-korpi, l-uffiċċji u l-aġenziji tal-UE (4).

4.

Barra hekk, l-OLAF huwa wkoll awtorizzat mill-Kummissjoni li jinvestiga kwalunkwe att jew attività oħra fi ksur ta’ dispożizzjonijiet tal-UE, inkluż ksur serju ta’ obbligi marbutin mal-prestazzjoni tal-attivitajiet professjonali tagħhom minn persunal u membri tal-istituzzjonijiet u l-korpi tal-Unjoni (5). Ir-Regolament OLAF mhuwiex applikabbli għal każijiet li m’għandhomx impatt fuq l-interessi finanzjarji tal-Unjoni. Minflok, l-OLAF irid jiddependi fuq l-Artikolu 86 tar-Regolamenti tal-Persunal, u/jew deċiżjonijiet interni adottati mill-istituzzjonijiet, li jipprevedu investigazzjonijiet bħal dawn.

5.

Ir-reviżjoni tar-Regolament OLAF ilu f’diskussjoni kostanti mill-2003 (6). Din il-proposta emendata hija t-tielet tentattiv għall-modifika tar-Regolament OLAF. Iż-żewġ proposti preċedenti naqqsu milli jiksbu kunsens (7). Għat-tħejjija tat-tielet proposta emendata, dokument ta’ riflessjoni dwar ir-riforma tal-OLAF inħareġ f’Lulju 2010 (8).

6.

Abbozz għad-deċiżjoni emendata tal-Kummissjoni (9) ġiet ippreżentata wkoll bil-għan li jinżamm l-istatus attwali tal-OLAF bħala Direttorat Ġenerali tal-Kummissjoni.

7.

Ma ġewx indirizzati linji gwida politiċi formulati mill-President tal-Kummissjoni (10) għall-effett li l-OLAF għandu jingħata indipendenza sħiħa ’l barra mill-Kummissjoni (11). Għall-kuntrarju, l-abbozz tad-deċiżjoni tal-Kummissjoni ssaħħaħ l-irwol tal-Kummissjoni fil-proċess ta’ għażla tad-Direttur Ġenerali tal-OLAF u jirrestrinġi l-poteri ta’ awtorità ta’ ħatra tad-Direttur Ġenerali rigward il-persunal tal-Uffiċċju. (12)

8.

L-osservazzjonijiet li jsegwu jikkunsidraw ir-rakkomandazzjonijiet li saru f’opinjonijiet preċedenti (13) tal-Qorti kif ukoll is-sejbiet tal-verifika tal-Uffiċċju, kif maħruġa fir-Rapport Speċjali Nru 2/2011 (14).

9.

Il-Qorti taqbel mal-Kummissjoni li hemm ħtieġa li titjieb l-effiċjenza, l-effikaċja u r-responsabbiltà tal-OLAF, waqt li tħares l-indipendenza investigattiva tal-uffiċċju (15).

10.

Il-Qorti jiddispjaċiha li l-Kummissjoni ma segwitx ir-rakkomandazzjoni ripetuta (16) tal-Qorti biex tissimplifika u tikkonsolida l-leġiħlazzjoni ta’ kontra l-frodi attwalment fis-seħħ u tindirizza d-dgħufijiet fil-poteri u l-proċeduri tal-OLAF f’dan il-kuntest (17). Kwalunkwe riformulazzjoni bħal din għandha tinkludi r-Regolament OLAF, ir-Regolament tal-Kunsill (KE, Euratom) Nru 2988/95 dwar il-protezzjoni tal-interessi finanzjarji (18) tal-Komunità Ewropea u r-Regolament tal-Kunsill (Euratom, KE) Nru 2185/96 dwar il-verifiki u l-ispezzjonijiet fuq il-post imwettqa mill-Kummissjoni sabiex tipproteġi l-interessi finanzjarji tal-Komunità Ewropea kontra frodi u irregolaritajiet oħra (19).

11.

Mingħajr riformulazzjoni ta’ dan it-tip, iċ-ċertezza legali hija mdgħajfa minħabba l-koeżistenza ta’ dispożizzjonijiet mrikkba, inkoerenti jew anki inkompatibbli li huma diffiċli biex jinftiehmu u jiġu applikati (ara wkoll il-paragrafi 22 sa 24 u 35).

12.

Il-Qorti ttenni r-rakkomandazzjoni (20) tagħha li l-idea tal-“interessi finanzjarji tal-Unjoni” li hija ċentrali għal-leġislazzjoni kollha ta’ kontra l-frodi għandha tiġi definita b’mod ċar.

13.

Barra minn hekk, il-Qorti tiġbed l-attenzjoni għall-ġurisprudenza tal-Qorti tal-Ġustizzja (21) li ma laqgħetx interpretazzjoni ristretta fl-2003 tal-idea “interessi finanzjarji” ibbażata fuq id-definizzjoni “irregolarità” fl-Artikolu 1(2) tar-Regolament tal-Kunsill (KE, Euratom) Nru 2988/95. Madankollu, il-Kummissjoni qatt ma pproponiet biex temenda r-Regolament fid-dawl ta’ din il-ġurisprudenza.

14.

Li jiġi emendat (22) ir-Regolament tal-Kunsill (KE, Euratom) Nru 2988/95 huwa partikolarment importanti b’rabta mal-ġlieda kontra l-frodi tal-VAT (23). Frodi ta’ dan it-tip hija theddida serja mhux biss għall-baġits tal-Istati Membri imma wkoll għall-ġbir tar-riżorsi proprji tal-Unjoni (24).

15.

Il-Qorti tapprezza l-proposta biex jiġu introdotti garanziji proċedurali u tieħu nota tal-proposta għal proċedura ta’ analiżi interna (ara wkoll il-paragrafi 37 sa 40). Madankollu l-Qorti jiddispjaċiha li l-objettiv ta’ kontroll indipendenti tal-legalità ta’ atti investigattivi li attwalment jinsabu f’progress ma jkunx inkiseb taħt il-proposta tal-Kummissjoni. Sabiex kontroll bħal dan ikun effettiv għandu jitwettaq minn korp jew persuna indipendenti tal-OLAF li għandha l-poter li toħroġ opinjonijiet li jorbtu. Dan il-kontroll ta’ atti investigattivi li attwalment jinsabu f’progress huwa partikolarment neċessarju għal każijiet fejn il-persuni kkonċernati mhumiex infurmati li huma soġġetti għal ta’ investigazzjoni sabiex jippreservaw il-kunfidenzjalità tagħha.

16.

Il-Qorti tiġbed l-attenzjoni li l-Artikolu 280(4) preċedenti tal-KE ġie miktub mill-ġdid biex sar l-Artikolu 325(4) TFUE, li issa espliċitament jeħtieġ li l-Parlament Ewropew u l-Kunsill jadottaw il-miżuri neċessarji biex ikunu jistgħu jagħtu ħarsien effettiv u ekwivalenti tal-interessi finanzjarji tal-Unjoni fl-istituzzjonijiet, il-korpi, l-uffiċċji u l-aġenziji kollha tal-Unjoni. Attwalment l-investigazzjonijiet OLAF huma suġġetti għal kondizzjonijiet li ma jaqblux, imniżżla f’deċiżjonijiet interni individwali mill-istituzzjonijiet, il-korpi, l-uffiċċji u l-aġenziji tal-Unjoni (25). Waqt li l-Qorti tifhem li n-natura inerenti ta’ ċertu istituzzjonijiet, korpi, uffċċji jew aġenziji tal-Unjoni tista’ teħtieġ li tiġi kkunsidrata, temmen ukoll li deċiżjonijiet interni bħal dawn jistgħu ma jkunux neċessarjament ġustifikabbli fil-każijiet kollha u jistgħu jirriżultaw li l-ambitu tal-attivitajiet investigattivi OLAF jiġu limitati u b’hekk jipperikolaw il-ħarsien effettiv u ekwivalenti tal-interessi finanzjarji tal-Unjoni.

17.

Minħabba li huwa bbażat fuq l-Artikolu 325 TFUE, l-ambitu tar-Regolament OLAF huwa limitat għal investigazzjonijiet ikkonċernati ma’ rregolaritajiet li jaffettwaw l-interessi finanzjarji tal-Unjoni. Hemm ħtieġa għal regoli ċari biex jiġu investigati każijiet interni ta’ kondotta ħażina serja li ma jikkonċernawx l-interessi finanzjarji tal-Unjoni imma jistgħu jkunu suġġetti għal proċedimenti dixxiplinari u/jew kriminali, jew għal proċedimenti quddiem il-Qorti Ewropea tal-Ġustizzja. Leġiżlazzjoni eżistenti f’dan ir-rigward hija konċiża ħafna u tapplika biss għal persunal ikkonċernat mir-Regolamenti tal-Persunal u l-Kondizzjonijiet tal-Impjieg applikabbli għall-Aġenti l-Oħra tal-Unjoni Ewropea (26). Il-Qorti temmen li l-leġiżlatur għandu jikkunsidra jekk l-għażliet humiex disponibbli taħt it-Trattat sabiex jiżguraw li l-każijiet kollha ta’ kondotta ħażina serja huma investigati b’mod xieraq.

18.

Il-Qorti tikkunsidra li, jekk meħudin bħala ħaġa sħiħa, l-emendi jonqsu li jiżguraw li d-dispożizzjonijiet tar-Regolament OLAF huma konċiżi, ċari u konsistenti daqskemm jista’ jkun possibbli. Eżempju f’dan ir-rigward huwa l-użu tat-termini “l-Uffiċċju” u “d-Direttur Ġenerali tal-Uffiċċju” li milli jidher ma jsegwi l-ebda loġika partikolari (27) u huwa aktar kumplikat bl-introduzzjoni ta’ dispożizzjonijiet speċifiċi għad-delega tal-poteri tad-Direttur Ġenerali lil persunal ieħor tal-Uffiċċju. Eżempju ieħor huwa l-kliem vag tal-Artikolu 4(6) ġdid propost li jistipula li “l-Uffiċċju għandu juża mezzi alternattivi adatti ta’ informazzjoni” biex jipprovdi notifika lil istituzzjoni ta’ każijiet fejn l-ogħla livell ta’ maniġment jew politika huwa kkonċernat minn investigazzjoni.

19.

Il-Qorti tirrikmanda li jinbidel il-mod kif inkiteb l-Artikolu 1 tar-Regolament OLAF biex jisħaq b’mod ċar dwar il-prijorità tal-funzjoni investigattiva ewlenija tal-OLAF fuq kompiti oħrajn. L-effikaċja tal-OLAF tiddependi b’mod kritiku fuq dedikazzjoni ta’ sehem ikbar tar-riżorsi għal attivitajiet ta’ investigazzjoni.

20.

Il-Qorti tilqa’ l-intenzjoni għad-definizzjoni ta’ numru ta’ kunċetti ewlenin fit-test ġdid propost tal-Artikolu 2. Madankollu, il-proposta hija inkompluta minħabba li tkopri biss it-termini “investigazzjonijiet amministrattivi”, “persuna kkonċernata” u “Regolamenti tal-Persunal”. Definizzjonijiet, jew referenzi għat-testi legali relevanti fejn definizzjonijiet bħal dawn jeżistu diġà (28), ta’ termini bażiċi oħrajn bħal “frodi”, “korruzzjoni”, “kriminalità serja”, “irregolarità”, “l-awtorità kompetenti tal-Istat Membru”, “direttament involut”, “xhud”, “informatur”, “intervista” u “dikjarazzjoni” għandhom jiġu inklużi wkoll. Barra minn hekk, ir-Regolament għandu jiddefinixxi x’jinftiehem minn “investigazzjonijiet amministrattivi tal-Istati Membri” u għandu juża terminoloġija distintiva biex ikopri sitwazzjonijiet fejn l-allegazzjonijiet inizjali kontra persuna kkonċernata ma setgħux ikunu sostanzjati (29).

21.

Il-Qorti tiġbed l-attenzjoni għall-fatt li l-definizzjoni tal-kunċett ta’ “investigazzjoni amministrattiva” mogħti fl-Artikolu 2 propost hija inkonsistenti mal-mod kif inkiteb l-Artikolu 3(2). L-Artikolu 2 jillimita l-kompitu tal-OLAF li jistabilixxi n-natura irregolari tal-attivitajiet taħt investigazzjoni (30). L-Uffiċċju mhuwiex meħtieġ li jistabbilixxi jekk saritx irregolarità bħala konsegwenza ta’ att jew nuqqas intenzjonali. L-Artikolu 3(2) jipprovdi li l-OLAF għandu jimmira li jistabbilixxi li kien hemm frodi, korruzzjoni jew kwalunkwe attività oħra illegali. Bħala konsegwenza, l-OLAF ikun irid jinvestiga responsabbiltajiet individwali ta’ persuni naturali li mhumiex parti mill-istituzzjonijiet, il-korpi, l-uffiċċji jew l-aġenziji tal-UE għal atti li x’aktarx jirriżultaw f’sanzjonijiet penali.

22.

L-Artikolu 3 attwali tar-Regolament OLAF jipprovdi li, għar-raġuni tal-investigazzjonijiet esterni tiegħu, l-OLAF jeżerċita l-poter mogħti lilu fuq il-Kummissjoni skont ir-Regolament (Euratom, KE) Nru 2185/96 biex iwettaq kontrolli u spezzjonijiet fuq il-post fuq operaturi ekonomiċi. L-Artikolu 3(2) ġdid propost u l-emenda proposta għall-Artikolu 4(3) jestendu l-użu li jista’ jsir mill-proċeduri mniżżla fir-Regolament (Euratom, KE) Nru 2185/96 għal numru ta’ sitwazzjonijiet li mhumiex previsti fir-Regolament (31).

23.

Fl-istess ħin, l-Artikolu 3(2) ġdid propost jillimita t-twettiq ta’ kontrolli u spezzjonijiet fuq il-post għal każijiet relatati ma’ nefqa mhux ġustifikata, waqt li r-Regolament (Euratom, KE) Nru 2185/96 japplika wkoll f’każijiet ta’ irregolaritajiet li jippreġudikaw dħul li jakkumula mir-riżorsi proprji miġbura direttament f’isem l-Unjoni.

24.

Hekk kif li lanqas riformulazzjoni tal-leġiżlazzjoni kontra l-frodi (ara l-paragrafu 11 hawn fuq) u lanqas kwalunkwe emenda tar-Regolament (Euratom, KE) Nru 2185/96 m’hija proposta, mhux se tkun ċara lill-qarrej ta’ dan ir-regolament li dan japplika wkoll għal għanijiet oħrajn u taħt kundizzjonijiet differenti minn dawk imniżżla. Hekk kif il-Qorti nnotat fl-Opinjoni tagħha Nru 7/2006 (32), dan imur kontra l-Ftehim Interistituzzjonali tat-22 ta’ Diċembru 1998 dwar linji gwida komuni għall-kwalità tal-abbozzar tal-leġiżlazzjoni tal-Komunità li teħtieġ lil dak li jagħmel l-abbozz ta’ atti biex jikkunsidra l-persuni li lilhom huma intenzjonati li japplikaw bil-għan li jippermettuhom jidentifikaw id-drittijiet u l-obbligi tagħhom b’mod mhux ambigwu (33). Jekk ma jistax jintlaħaq ftehim dwar ir-riformulazzjoni, il-Kummissjoni għandha tipproponi l-emendi konsegwenzjali għar-Regolament (Euratom, KE) Nru 2185/96 skont il-paragrafu 19 tal-Ftehim.

25.

Il-Qorti tisħaq li l-Artikolu 4(3) TUE jeħtieġ li l-Istati Membri jieħdu kull miżura ġenerali jew partikolari xierqa, sabiex jiżguraw li l-obbligi li jirriżultaw mill-atti tal-istituzzjonijiet tal-Unjoni jitwettqu. Il-Qorti tieħu nota tal-Artikolu 3(3) ġdid propost li jimmira li jiżgura li l-persunal OLAF huwa mogħti aċċess, taħt l-istess termini u kondizzjonijiet bħall-awtoritajiet kompetenti tal-Istati Membri u f’konformità mal-liġi nazzjonali, għall-informazzjoni u d-dokumenti kollha relatati mal-kwistjoni taħt investigazzjoni li huma neċessarji għall-kontrolli u l-ispezzjonijiet fuq il-post li jridu jsiru b’mod effikaċji u effiċjenti. Il-Qorti tifhem li dan ir-rekwiżit jirrelata mhux biss għal informazzjoni u dokumenti miżmuma minn operaturi ekonomiċi (34) imma wkoll għal kwalunkwe informazzjoni f’pussess mill-awtoritajiet u korpi involuti fil-ġestjoni konġunta tal-fondi tal-Unjoni.

26.

Artikolu 3(4) ġdid huwa propost, li jobbliga Stati Membri biex jistabbilixxu servizz ta’ koordinazzjoni kontra l-frodi li se tiżgura koperazzjoni effettivi u skambju ta’ informazzjoni mal-Uffiċċju. Waqt li koordinazzjoni mtejba hi milqugħa, servizz ta’ koordinazzjoni biss mhux se tkun suffiċjenti biex tindirizza d-diffikultajiet li l-OLAF jiffaċċja meta jwettaq kontrolli u spezzjonijiet fuq il-post fil-qasam ta’ nefqa diretta. Il-problema f’dan il-qasam speċifiku hi li mhux l-Istati Membri kollha waqqfu jew stabbilixxew awtoritajiet bil-poteri neċessarji biex jappoġġjaw il-miżuri investigattivi tal-OLAF b’mod effiċjenti (35). Il-Qorti tissuġġerixxi li l-Artikolu 3(3) ġdid propost għandu jiġi emendat b’tali mod li l-OLAF jista’ jiġi megħjun minn awtorita’ ta’ infurzar xierqa, sabiex ikun jista’ jagħmel il-kontrolli u l-ispezzjonijiet tiegħu (36).

27.

Il-Qorti tirrikmanda li Artikolu 4 emendat dwar investigazzjonijiet interni għandu jkollu referenza ċara għar-Regolamenti tal-Persunal minħabba l-importanza tagħhom għal investigazzjonijiet interni tal-OLAF. L-Artikolu 22a tar-Regolamenti tal-Persunal jeħtieġ l-għoti ta’ kwalunkwe evidenza lill-OLAF li jagħti lok għal preżunzjoni tal-eżistenza ta’ attività illegali possibbli, inkluż frodi jew korruzzjoni, u l-Anness IX tar-Regolament tal-Persunal jipprovdi regoli għat-twettiq ta’ investigazzjonijiet amministrattivi bil-għan għal proċedimenti dixxiplinari.

28.

L-Artikolu 5 propost dwar il-ftuħ ta’ investigazzjonijiet għandu dispożizzjoni li huma mitkubin b’mod vag. L-Artikolu 5(1) jista’ jiġi interpretat fis-sens li l-Uffiċċju għandu l-libertà li ma jinvestigax frodi jew korruzzjoni suspettati jew atti illegali oħrajn li jaffettwaw l-interessi finanzjarji fi ħdan l-istituzzjonijiet, il-korpi, l-uffiċċji u l-aġenziji tal-UE, anke meta jeżistu suspetti suffiċjenti.

29.

Barra minn hekk, ġew imdaħħla emendi fl-Artikolu 5(4) u (5) li jikkomplementaw il-proċeduri mniżżla fl-Artikoli 22a u 22b tar-Regolamenti tal-Persunal għal każijiet fejn membru tal-persunal jipprovdi informazzjoni lill-Uffiċċju relatata ma’ frodi jew irregolarità suspettata. Għal raġunijiet ta’ ċarezza, ikun iktar xieraq li jiġu proposti emendi bħal dawn lir-Regolamenti tal-Persunal minflok, billi jiġi kunsidrat ukoll li l-ambitu tagħhom huwa aktar wiesa’ minn dak tar-Regolament OLAF (ara l-paragrafu 4).

30.

Il-Qorti tilqa’ l-mod ġdid propost ta’ kif għandu jinkiteb l-Artikolu 5(4) li jeħtieġ li d-Direttur Ġenerali tal-Uffiċċju jieħu deċiżjoni dwar jekk għandhiex tinfetaħ investigazzjoni fi żmien xahrejn tal-wasla mill-Uffiċċju ta’ talba minn waħda mill-istituzzjonijiet, il-korpi, l-uffiċċji jew l-aġenziji tal-Unjoni jew minn Stat Membru kkonċernat. Il-Qorti tirrikmanda li għandu jiġi stabbilit ukoll tul ta’ żmien massimu għal valutazzjonijiet għal każijiet fejn l-Uffiċċju jiġi pprovdut b’informazzjoni inizjali minn sorsi oħrajn.

31.

Il-mod ġdid ta’ kif għandu jinkiteb l-Artikolu 6(6) jistipula li, fejn jinstab li investigazzjoni ma tistax tingħalaq fi żmien 12-il xahar wara li tkun infetħet, l-Uffiċċju għandu jinforma lill-Kumitat ta’ Sorveljanza bir-raġunijiet f’intervalli ta’ sitt xhur; attwalment informazzjoni bħal din trid tingħata biss darba wara disa’ xhur. Il-mod kif tinkiteb din id-dispożizzjoni ġdida mhuwiex ċar u jista’ jiġi interpretat fis-sens li l-Kumitat ta’ Sorveljanza jrid jiġi infurmat għall-ewwel darba wara 18-il xahar.

32.

Biex tiġi indirizzata l-kwistjoni tat-tul twil ta’ żmien ta’ investigazzjonijiet OLAF b’mod aktar effikaċi (37), ikun xieraq li jiddaħħal tul ta’ żmien standard ta’ 12-il xahar, li jista’ jiġi estiż sa sitt xhur kull darba biss fuq il-bażi ta’ deċiżjoni meħuda mid-Direttur Ġenerali tal-Uffiċċju wara li jinforma l-Kumitat ta’ Sorveljanza (38).

33.

L-Artikolu 7a(2) ġdid propost fuq garanziji proċedurali jwaqqaf regoli għall-intervista ta’ xhieda u persuni kkonċernati. Għandu jiġi kjarifikat li l-persuna li ssirilha l-intervista għandha d-dritt tirrifjuta l-approvazzjoni għar-rekordjar tal-intervista mħejji mill-Uffiċċju. Barra hekk, għandha tkun espliċita jekk hemmx obbligu għal persuni li mhumiex parti mill-istituzzjonijiet, il-korpi, l-uffiċċji jew l-aġenziji tal-UE biex jaċċettaw l-invit tal-OLAF għal intervista jew għall-iffirmar biex intervista bħal din tiġi rekordjata. Finalment, qabel ma jittieħdu d-dikjarazzjonijiet fil-kuntest ta’ kontrolli fuq il-post, il-persuni li se jkunu intervistati għandhom ikunu infurmati dwar id-drittijiet tagħhom; u għandhom jingħataw aċċess għar-reġistrazzjoni tad-dikjarazzjonijiet tagħhom kif imfassla mill-Uffiċċju.

34.

Fil-fehma tal-Qorti, l-Artikolu 7a(4) propost m’għandux jagħti lok għal eċċezzjonijiet għar-regola li l-persuna kkonċernata hija intitolata li tuża l-lingwa uffiċjali tal-Unjoni tal-għażla tiegħu/tagħha f’intervista mal-investigaturi tal-Uffiċċju.

35.

Il-Qorti tinnota li l-mod ta’ kitba propost għall-Artikolu 7a(4) jippermetti użu aktar estensiv tal-għażla għad-differiment tat-twettiq tal-obbligu biex issaqsi l-persuna konċernata biex tesprimi l-opinjonijiet tagħha. It-test propost jistipula li d-Direttur Ġenerali jista’ jieħu deċiżjoni bħal din meta jintlaħqu żewġ kondizzjonijiet: li każ jinvolvi l-użu ta’ proċedimenti investigattivi li jaqgħu taħt il-mandat ta’ awtorità ġudizzjarja nazzjonali u li huwa “neċessarji li tkun ippreservata l-konfidenzjalità tal-investigazzjoni”. Dan il-mod ta’ kitba mhuwiex konformi mal-Artikolu 1(2) tal-Anness IX tar-Regolament tal-Persunal li huwa iktar ristrettiv f’dan ir-rigward minħabba li jillimita l-użu ta’ din l-għażla għal każijiet li jitolbu segretezza assoluta.

36.

Ladarba l-OLAF għażel li jiddifferixxi seduta ta’ smigħ, l-investigaturi huma ta’ spiss ipprekludati milli jsaqsu l-persuni kkonċernati biex jagħtu l-opinjonijiet tagħhom sakemm ikomplu l-proċedimenti ta’ awtorità ġudizzjarja nazzjonali. Bħala konsegwenza, l-OLAF ma jistax jagħlaq il-każ, anke f’sitwazzjonijiet fejn ma jistgħux isiru aktar attivitajiet investigattivi mill-Uffiċċju. Minħabba li proprjament sitwazzjonijiet bħal dawn mhumiex konformi mar-rekwiżit imniżżel fl-Artikolu 6(5) tar-Regolament OLAF li investigazzjonijiet iridu jsiru b’mod kontinwu, dispożizzjonijiet xierqa għandhom jiddaħħlu biex jiġu trattati.

37.

L-Artikolu 7b l-ġdid jipprovdi għal proċedura ta’ analiżi interna fuq talba ta’ kwalunkwe persuna naturali kkonċernata b’investigazzjoni OLAF rigward ir-rispett ta’ garanziji proċedurali mill-investigaturi tal-Uffiċċju. Huwa maħsub li membru(i) tal-persunal OLAF fdat(i) bil-proċedura tal-analiżi mhux se jieħdu istruzzjonijiet minn ħadd u jistgħu jinfurmaw lill-Kumitat ta’ Sorveljanza jekk jikkunsidraw li miżura meħuda mid-Direttur Ġenerali titfa’ dubju fuq l-indipendenza tagħhom.

38.

Madankollu, il-Qorti tikkunsidra li l-indipendenza sħiħa meħtieġa fil-post mhijiex garantita minħabba li dawk fdati bil-proċedura tal-analiżi jibqħu taħt l-awtorità tad-Direttur Ġenerali. Barra hekk, mhuwiex ċar jekk, u meta, il-Kumitat ta’ Sorveljanza se jirċievi kopji tal-opinjoni li l-persuna responsabbli għall-analiżi ta’ każ tefa’ lid-Direttur Ġenerali u tat-tweġiba rraġunata li ntbagħtet lill-persuna kkonċernata.

39.

Il-proċedura tal-analiżi proposta kieku se tiġi varata biss fuq it-talba tal-persuna kkonċernata. Mhux se tkopri każijiet fejn il-persuni kkonċernati ma jafux li huma suġġetti għal investigazzjoni OLAF minħabba li l-informazzjoni tagħhom ġiet diferita sabiex tippreżenta il-kunfidenzjalità tal-investigazzjoni.

40.

Minflok, il-Qorti tissuġġerixxi l-ħolqien tal-funzjoni ta’ uffiċjal tal-analiżi. M’ghandux ikun la maħtur mid-Direttur Ġenerali u lanqas ikun suġġett għall-awtorità tiegħu. L-uffiċjal tal-analiżi m’għandux ikun mitlub biss li joħroġ opinjonijiet li jorbtu, fuq it-talba tal-persuni kkonċernati, imma għandu jingħata l-poter li joħroġ opinjonijiet bħal dawn fil-każijiet kollha fejn it-trasmissjoni ta’ informazzjoni lill-awtoritajiet ġudizzjarji nazzjonali hija prevista mid-Direttur Ġenerali jew fejn l-investigazzjonijiet idumu għal iktar minn sentejn. Għal dan il-għan, l-uffiċjal tal-analiżi għandu jkollu aċċess sħiħ għall-fajls tal-każijiet rilevanti tal-OLAF. Għandu jindirizza l-opinjonijiet tiegħu kemm lid-Direttur Ġenerali u lill-Kumitat ta’ Sorveljanza.

41.

L-Artikolu 10a propost idaħħal dispożizzjonijiet għall-Uffiċċju biex jikkopera mal-Eurojust, il-Europol u organizzazzjonijiet internazzjonali. L-obbligi tal-OLAF biex jinformaw lill-Eurojust dwar reat serju suspettat fil-forma ta’ frodi, korruzzjoni jew attivitajiet illegali oħrajn huma deskritti b’mod vag. Il-Qorti tirrikkmanda li l-kriterji tal-objettiv għandhom jiddaħħlu biex jidentifikaw każijiet xierqa għal kollaborazzjoni, simili għal dawk li hemm fil-“Ftehim prattiku dwar arranġamenti ta’ kooperazzjoni bejn Eurojust u OLAF’ (39).

42.

B’rigward għall-emendi proposti lill-Artikolu 11 dwar il-Kumitat ta’ Sorveljanza, il-Qorti tilqa’ l-proposta li l-Kumitat se, fil-ġejjieni, jissorvelja l-funzjonament tal-iskambju ta’ informazzjoni bejn l-Uffiċċju u l-istituzzjonijiet, il-korpi, l-uffiċċji u l-aġenziji. Il-Qorti tirrikkmanda li l-monitoraġġ tal-Kumitat għandu jestendi wkoll għall-iskambji ta’ informazzjoni bejn l-Uffiċċju u l-awtoritajiet tal-Istati Membri, inkluż l-iskambju ta’ informazzjoni permezz tal-Eurojust.

43.

Skont l-Artikolu 11(1) ġdid propost, il-firxa ta’ aċċess tal-Kumitat ta’ Sorveljanza għal informazzjoni dwar investigazzjonijiet u għal fajls tal-każijiet OLAF għandha titħalla interament għad-diskrezzjoni tad-Direttur Ġenerali tal-Uffiċċju. Il-Qorti tirrikkmanda kjarifika li l-Kumitat jeħtieġ aċċess għal fajls tal-każijiet OLAF sabiex ikun jista’ jiskopri każijiet ta’ interferenza mal-indipendenza tal-Uffiċċju.

44.

Sabiex issaħħaħ l-irwol indipendenti tal-Kumitat ta’ Sorveljanza, il-Qorti tirrikkmanda li l-Artikolu 11(6) propost għandu jipprovdi li s-segretarjat tal-Kumitat irid jaġixxi biss skont l-istruzzjonijiet tal-Kumitat u b’mod indipendenti mill-OLAF, u ma jistax jinħatar minn jew ikun suġġett tal-awtorità tad-Direttur Ġenerali (40).

45.

Il-Qorti tirrikkmanda li titqies is-sentenza tal-Qorti tal Prim’Istanza ta’ Lulju 2008 (41), li sostniet li funzjoni importanti tal-Kumitat ta’ Sorveljanza kienet li jħares id-drittijiet tal-persuni li huma s-suġġett tal-investigazzjonijiet tal-OLAF. Il-Qorti tinnota li l-irwol tal-Kumitat f’dan ir-rigward x’aktarx se jitnaqqas hekk kif taħt l-Artikolu 11(7) ġdid propost, id-Direttur Ġenerali tal-OLAF mhux se jkun iktar (42) obbligat li jinforma l-Kumitat dwar każijiet li jeħtieġu li informazzjoni tintbagħat lill-awtoritajiet ġudizzjarji ta’ Stat Membru qabel ma’ jiġu komunikati. Fl-opinjoni tal-Qorti, dan jista’ jiġi kumpensat bl-introduzzjoni tal-funzjoni ta’ uffiċjal tal-analiżi li jirrapporta lill-Kumitat (ara l-paragrafu 40).

46.

L-Artikolu 11a ġdid propost jintroduċi skambju regolari ta’ fehmiet f’livell politiku biex tiġi diskussal-politika ta’ investigazzjonijiet tal-Uffiċċju li tobbliga lill-Uffiċċju fl-Artikolu 11a(4) “jieħu azzjoni xierqa fil-kunsiderazzjoni tal-opinjonijiet espressi fl-iskambju ta’ fehmiet”. Proċedura bħal din tista’ tiġi interpretata li ddgħajjef l-indipendenza tad-Direttur Ġenerali biex jidentifika u jiddefinixxi l-prijoritajiet ta’ investigazzjoni tal-Uffiċċju (43). Barra minn hekk, proċedura bħal din tista’ tevolvi f’tip ta’ bord ta’ tmexxija de facto tal-Uffiċċju mingħajr definizzjoni ċara tar-responsabbiltajiet ta’ dawk li qed jieħdu sehem fiha u mingħajr l-ebda indikazzjoni ta’ qafas proċedurali għal eżerċizzju ta’ dan it-tip.

47.

Jekk l-Artikolu 11a ġdid propost għandu l-intenzjoni li jikseb involviment ikbar mill-Istituzzjonijiet kollha fit-tħaddim tal-Uffiċċju, il-bidla tal-OLAF f’uffiċċju interistituzzjonali (44) tkun għażla aħjar. Soluzzjoni bħal din kieku tirrifletti wkoll il-bidliet miġjuba mill-Artikolu 325 TFUE rigward ħarsien effettiv u ekwivalenti tal-interessi finanzjarji tal-Unjoni fl-istituzzjonijiet, il-korpi, l-uffiċċji u l-aġenziji kollha tal-Unjoni.

48.

Il-Qorti ma tara l-ebda raġunijiet validi għall-proposta tal-Kummissjoni biex tneħħi mill-Artikolu 12(3) attwali l-obbligu li l-kisbiet tal-investigazzjonijiet li saru mill-Uffiċċju għandhom jiġu rappurtati lill-Qorti tal-Awdituri.

49.

Il-Qorti tinnota l-Artikolu 12(5) ġdid propost li jagħti poter lid-Direttur Ġenerali biex jiddelega l-eżerċizzju ta’ ċerti funzjonijiet tiegħu lil membri oħrajn tal-persunal tal-Uffiċċju, partikolarment f’deċiżjonijiet li jikkonċernaw investigazzjonijiet miftuħa jew poteri biex tiġi ġestita t-twettiq ta’ investigazzjonijiet. Il-Qorti tiġbed l-attenzjoni għar-riskju li l-proposta tista’ tirriżulta fit-tnaqqis ta’ responsabbiltajiet ewlenin tad-Direttur Ġenerali.

50.

L-Artikolu 12(6) ġdid propost jistipula li d-Direttur Ġenerali se jkun megħjun minn “korp intern” li hu għandu jikkonsulta dwar il-ftuħ ta’ investigazzjoni, qabel l-għeluq ta’ investigazzjoni u kull meta jħoss li huwa xieraq. Il-Qorti tiġbed l-attenzjoni għar-riskju li proċedura ta’ konsultazzjoni bħal din tista’ twaqqaf lid-Direttur Ġenerali milli jaġixxi b’mod rapidu f’sitwazzjonijiet ta’ urġenza.