4.12.2009   

MT

Il-Ġurnal Uffiċjali tal-Unjoni Ewropea

CE 295/1

A.

billi l-Amministrazzjoni Integrata taz-Zona Kostali (ICZM) mhijiex biss politika ambjentali iżda wkoll proċess li dejjem għaddej immirat lejn it-titjib tal-kundizzjonijiet ekonomiċi u soċjali taz-zoni kostali u l-iżgurar tal-iżvilupp sostenibbli tal-attivitajiet kollha li għaddejjin f’dawk ir-reġjuni, bħalma huma s-sajd u l-akkwakultura,

B.

billi l-implimentazzjoni tal-ICZM hija proċess fuq medda twila ta’ żmien u bosta strateġiji nazzjonali adottati fi ħdan il-qafas tar-Rakkomandazzjoni hawn fuq imsemmija bdew jiġu implimentati biss fl-2006,

C.

billi l-ġestjoni taz-zoni kostali s’issa ġiet imwettqa f’terminu medju ta’ żmien, u ġie injurat il-fatt li dawn huma ekosistemi kumplessi li jinbidlu maż-żmien,

D.

billi d-deċiżjonijiet u l-miżuri li ttieħdu jirrigwardaw attività iżolata u ma rnexxilhomx jittrattaw il-problema tad-degradazzjoni taz-zoni kostali fil-kuntest sħiħ tagħhom,

E.

billi l-ippjanar eżistenti s’issa ffoka fuq l-art u ma rnexxilux jikkunsidra l-impatt ta’ ċerti attivitajiet kostali fuq attivitajiet oħra li għaddejjin fl-istess reġjun,

F.

billi huwa mistenni li l-istrateġiji nazzjonali tal-ICZM mhux se jkunu ta’ spiża kbira biex jiġu implimentati, filwaqt li se jipproduċu benefiċċji finanzjarji sinifikanti,

G.

billi ma rnexxiex li tiġi involuta b’mod adegwat rappreżentanza mis-setturi kollha fil-miżuri ta’ ppjanar u ta’ implimentazzjoni biex jiġu indirizzati l-problemi taz-zoni kostali, u b’riżultat ta’ dan, saret ħsara lill-interessi ta’ ċerti setturi,

H.

billi l-implimentazzjoni ta’ politika ta’ amministrazzjoni integrata tinvolvi l-ippjanar f’zoni kostali ta’ użi relatati mal-popolazzjoni, użi relatati mat-turiżmu u użi ekonomiċi u ta’ protezzjoni tal-pajsaġġ u tal-ambjent,

I.

billi għadha ma kienitx possibbli l-koordinazzjoni effettiva tal-korpi tal-ICZM ħlief f’xi każijiet iżolati,

J.

billi l-implimentazzjoni ta’ politiki għall-promozzjoni tal-ICZM tista’, f’ċerti każi, tirrikjedi nfiq fuq skala għolja, li mhux possibbli jintlaħaq mill-komunitajiet lokali, u dan jirriżulta f’appelli f’livelli amministrattivi ogħla u tardjar fl-implimentazzjoni,

K.

billi, minħabba n-natura transkonfinali ta’ bosta proċessi kostali, huma meħtieġa l-koordinazzjoni u l-koperazzjoni reġjonali, anki ma’ pajjiżi terzi,

L.

billi s-sajd u l-akkwakultura huma żewġ attivitajiet kostali li verament jiddependu fuq il-kwalità tal-ilmijiet ta’ qrib il-kosta,

M.

billi għadu ma ntlaħaqx livell ta’ żvilupp teknoloġiku fl-akkwakultura li jista’ jippermetti lil dik l-attività (li hija ta’ xorta intensiva) li tiġi mwettqa ’l bogħod minn zoni kostali,

N.

billi għandu jiġi meqjus is-sehem fundamentali, li s’issa ftit ġie rikonoxxut, tan-nisa fiz-zoni li jiddependu fuq is-sajd,

O.

billi s-sajd qrib il-kosta ilaħħaq għal 80 % tal-flotta tas-sajd Komunitarja u jikkontribwixxi għall-koeżjoni ekonomika u soċjali tal-komunitajiet kostali u l-preservazzjoni tat-tradizzjonijiet tagħhom,

P.

billi s-sajd, għalkemm mhuwiex sors ta’ tniġġis fih innifsu, ibati mill-impatt tat-tniġġis ikkawżat minn attivitajiet oħra li jkunu għaddejjin f’zoni kostali, li jkompli jdgħajjef il-vijabbilta? tiegħu,

Q.

billi s-sajd u l-akkwakultura huma ta’ importanza ekonomika u soċjali kbira, peress li huma mwettqa l-aktar f’reġjuni kostali b’ekonomiji dgħajfa, fejn ħafna minnhom huma żvantaġġati u ma jistgħux jipprovdu lir-residenti tagħhom b’opportunitajiet alternattivi ta’ xogħol,

R.

billi l-eżistenza ta’ ambjent marittimu nadif u f’saħħtu jikkontribwixxi għaż-żieda fil-produzzjoni ġejjienija tas-sajd u b’hekk itejjeb il-prospetti għal dan is-settur,

S.

billi l-akkwakultura hija bbażata sew fuq il-prinċipju ta’ żvilupp sostenibbli, u kwalunkwe impatt ambjentali huwa kkumpensat minn regoli Komunitarji,

T.

billi f’ambjent fejn l-istokkijiet tal-ħut qed jonqsu u fejn qed tiżdied id-domanda dinjija għall-ħut u għall-frott tal-baħar, l-importanza tal-akkwakultura fl-Ewropa qed tiżdied b’mod kostanti,

U.

billi mhux l-Istati Membri kollha lestew l-ippjanar reġjonali tagħhom b’konformità mal-prinċipji tal-ICZM għall-iżvilupp ibbilanċjat ta’ attivitijiet imwettqa f’dawn iz-zoni,

V.

billi hemm kompetizzjoni ħarxa għall-ispazju fiz-zoni kostali, u l-akkwakulturisti u s-sajjieda għandhom l-istess drittijiet u obbligi bħal utenti oħra,

W.

billi r-reġjuni l-aktar imbiegħda, kif definiti fl-Artikolu 299(2) tat-Trattat KE u l-Artikolu 349 tat-Trattat dwar ix-Xogħol tal-Unjoni Ewropea, jistgħu jirrikjedu l-ħolqien ta’ strateġiji integrati nazzjonali speċifiċi tal-ICZM u adattament adegwat tal-ICZM fuq livell tal-UE,

1.

Jenfasizza l-importanza ekonomika u soċjali tas-sajd u tal-akkwakultura għar-reġjuni kostali u jsejjaħ sabiex huma jirċievu għajnuna fil-qafas tal-ICZM;

2.

Juri l-ħtieġa li jkun żgurat li s-setturi tas-sajd u tal-akkwakultura jkunu involuti u rappreżentati sew f’aggruppamenti marittimi transnazzjonali, u jħeġġeġ lill-Kummissjoni biex tistimula dan il-proċess;

3.

Jisħaq li l-Fond Ewropew għas-Sajd jista’ jikkontribwixxi għal finanzjament, fuq medda twila ta’ żmien, ta’ miżuri fi ħdan il-qafas tal-ICZM peress li dan jappoġġja azzjonijiet li jistgħu jikkontribwixxu għall-iżvilupp sostenibbli tar-reġjuni tas-sajd;

4.

Juri l-ħtieġa li jiġu kjarifikati l-kompetenzi tal-korpi amministrattivi taz-zoni kostali konċernati u li jiġu stabbiliti strateġiji koordinati sabiex dawn ikunu aktar effettivi;

5.

Jirrikonoxxi d-diffikultajiet involuti fil-koordinament tal-attivitajiet tal-korpi ta’ amministrazzjoni taz-zona kostali u jistieden lill-Kummissjoni biex fil-monitoraġġ tal-implimentazzjoni tal-ICZM, u wara li jiġu konsultati l-Istati Membri, teżamina mill-ġdid jekk għandux jitwaqqaf korp ta’ koordinazzjoni jew le;

6.

Jenfasizza l-ħtieġa li jkunu involuti rappreżentanti tas-setturi tas-sajd u tal-akkwakultura fl-attivitajiet marbuta mal-ippjanar u l-iżvilupp tal-ICZM (filwaqt li wieħed jiftakar li l-involviment tagħhom fl-istrateġiji tal-iżvilupp sostenibbli se jżid il-valur miżjud tal-prodotti tagħhom) u jfakkar li l-Fond Ewropew għas-Sajd jista’ jappoġġja azzjonijiet kollettivi bħal dawn;

7.

Jirrikonoxxi s-sehem importanti tan-nisa fiz-zoni li jiddependu fuq is-sajd u għalhekk jistieden lill-Kummissjoni u lill-Istati Membri biex jikkoperaw sabiex jiġi promoss u inkorporat il-prinċipju ta’ opportunitajiet ugwali fil-fażijiet differenti tal-implimentazzjoni tal-Fond Ewropew għas-Sajd (inklużi l-fażijiet tat-tfassil, l-implimentazzjoni, il-monitoraġġ u l-evalwazzjoni), kif previst fl-Artikolu 11 tar-Regolament (KE) Nru 1198/2006;

8.

Jitlob għal koperazzjoni aktar mill-viċin bejn il-korpi kompetenti fuq livell reġjonali permezz ta’ skambjar ta’ informazzjoni relatat mal-qagħda taz-zoni kostali u l-adozzjoni ta’ strateġiji konġunti għat-titjib tal-qagħda ambjentali ta’ ekosistemi marittimi lokali;

9.

Jistieden lill-gvernijiet nazzjonali u reġjonali tar-reġjuni l-aktar imbiegħda biex iħejju strateġji integrati tal-ICZM sabiex jiggarantixxu l-iżvilupp sostenibbli tar-reġjuni kostali;

10.

Jenfasizza l-importanza, fil-kuntesti ta’ hawn fuq, ta’ ppjanar adegwat tal-ispazju;

11.

L-akkwakultura għal-skopijiet ta’ popolazzjoni mill-ġdid hija għodda essenzjali sabiex tinkiseb il-preservazzjoni ekoloġika f’ċerti zoni kostali, u għalhekk għandha tiġi promossa, stimulata u appoġġjata finanzjarjament;

12.

Jenfasizza l-importanza tal-akkwakultura fl-industrija tal-ikel għall-iżvilupp soċjali u ekonomiku f’ċerti komunitajiet kostali tal-UE;

13.

Jikkunsidra li s-setturi tas-sajd u tal-akkwakultura għandhom jiġu inklużi t-tnejn li huma f’approċċ trasversali għall-attivitajiet marittimi kollha li jseħħu f’zoni kostali sabiex jinkiseb żvilupp sostenibbli b’konformità mal-linji gwida l-ġodda tal-politika marittima;

14.

Jenfasizza l-ħtieġa li jiġu żvilupppati u implimentati strateġiji biex jiġu aġġustati l-perikli li jaffaċċaw iz-zoni kostali, inklużi l-bdil fil-klima, filwaqt li jiġi meqjus l-impatt fuq is-sajd u l-akkwakultura;

15.

Jemmen li għandhom jitkomplew l-isforzi tal-ġbir tad-data sabiex ikun hemm kontribut għall-iskambju u l-użu ta’ informazzjoni bil-għan li jitwettqu studji kumparattivi, inkluża data fuq il-qagħda tal-bijodiversità u l-istokkijiet tal-ħut;

16.

Jemmen li għandhom isiru sforzi akbar ta’ riċerka fl-akkwakultura bil-għan li jiġu introdotti sistemi ta’ kultivazzjoni bbażati fuq produzzjoni intensiva b’ċirkuwitu magħluq;

17.

Jipproponi li l-proġetti tal-akkwakultura li jużaw sorsi ta’ enerġija rinnovabbli u li ma jinvolvux zoni protetti skont il-liġi ambjentali tal-UE għandhom jingħataw prijorità fil-kuntest tal-ICZM;

18.

Jistieden lill-Kummissjoni, wara li tikkonsulta lill-Istati Membri, biex tistabbilixxi skeda ċara biex jiġi eżaminat il-progress fl-implimentazzjoni tal-ICZM fl-Unjoni Ewropea;

19.

Jagħti istruzzjonijiet lill-President tiegħu biex iressaq din ir-riżoluzzjoni lill-Kunsill u lill-Kummissjoni u lill-gvernijiet u lill-parlamenti tal-Istati Membri.

4.12.2009   

MT

Il-Ġurnal Uffiċjali tal-Unjoni Ewropea

CE 295/4

A.

billi kull persuna li tkun qed titlob l-ażil għandha d-dritt li t-talba tagħha tiġi eżaminata b'mod sħiħ u fil-fond,

B.

billi l-leġiżlazzjoni u l-prattika fir-rigward tal-ażil għadhom ivarjaw ħafna minn pajjiż għall-ieħor, u b'riżultat ta' dan, min jitlob l-ażil jirċievi trattament differenti minn Stat ta' Dublin għall-ieħor,

C.

billi s-sistema ta' Dublin hija bbażata fuq prinċipji bħal fiduċja u affidabilità reċiproċi, u jekk dawn il-prerekweżiti ma jiġux sodisfatti, jiġifieri jekk ikun hemm nuqqasijiet serji fil-ġbir tad-data jew inkonsistenzi fil-proċess tat-teħid ta' deċiżjonijiet f'ċerti Stati Membri, se tbati minn dan is-sistema kollha kemm hi,

D.

billi hemm prova li xi Stati Membri ma jiggarantixxux aċċess effettiv għall-proċedura bil-għan li jiġi determinat status ta' refuġjat,

E.

billi xi Stati Membri ma japplikawx id-Direttiva dwar l-Ilqugħ b'mod effettiv, għall-applikanti għall-ażil li jkunu qed jistennew trasferiment għal Stat Membru ieħor taħt ir-Regolament ta' Dublin, jew fil-fażi ta' ritorn lejn l-Istat Membru responsabbli,

F.

billi xi Stati Membri sistematikament iqiegħdu f'detenzjoni lil persuni li jkunu suġġetti għas-sistema ta' Dublin,

G.

billi l-livell għoli ta' talbiet multipli u l-livell baxx ta' trasferimenti mwettqa huma indikaturi tan-nuqqasijiet tas-sistema ta' Dublin u tal-bżonn li tiġi stabbilita sistema Ewropea komuni għall-ażil,

H.

billi li l-implimentazzjoni korretta tar-Regolament ta' Dublin tista' twassal għal tqassim mhux ugwali ta' responsabilità għall-persuni li jitolbu l-ażil, u dan jagħmel ħsara lil xi Stati Membri li huma partikolarment esposti għall-flussi ta' migrazzjoni għas-sempliċi raġuni marbuta mal-post ġeografiku fejn jinsabu,

I.

billi l-evalwazzjoni tal-Kummissjoni tiżvela li, fl-2005, it-tlettax-il Stat Membru fil-fruntieri tal-Unjoni kellhom jittrattaw l-isfidi dejjem jikbru li tqajmu mis-sistema ta' Dublin,

J.

billi l-Istati Membri tan-Nofsinhar qed ikollhom jaċċettaw applikazzjonijiet għall-ażil minn immigranti irregolari li jiġu salvati meta jkunu f'qagħda perikoluża fi triqithom lejn l-Ewropa,

K.

billi l-Istati Membri tan-Nofsinhar qed ikollhom jaċċettaw applikazzjonijiet għall-ażil minn immigranti irregolari li ma jingħatawx għajnuna minn pajjiżi terzi li huma obbligati li jipprovdu għajnuna ta' dan it-tip skont il-liġi internazzjonali,

L.

billi l-Istati Membri jista' ma jkollhom l-ebda interess illi jkunu konformi mal-obbligu li jirreġistraw lill-persuni li jidħlu illegalment fil-bażi tad-data Eurodac, peress illi dan jista' jirriżulta f'żieda fin-numru ta' applikazzjonijiet għall-ażil li se jkollhom jittrattaw,

M.

billi r-Regolament ta' Dublin jistabbilixxi sistema li hija mfassla biex tiddetermina l-Istat Membru responsabbli biex jittratta talba, iżda li oriġinalment ma ġietx implimentata bħala mekkaniżmu għat-“tqassim tal-piż”, u għalhekk ma jirnexxilhiex isservi ta' mekkaniżmu ta' dan it-tip,

N.

billi hu essenzjali li kwalunkwe evalwazzjoni tas-sistema ta' Dublin tiġi akkumpanjata minn mekkaniżmu għat-“tqassim tal-piż” li hu konkret, permanenti, ġust u funzjonali,

O.

billi l-kriterji tal-ewwel pajjiż ta' dħul tas-sistema ta' Dublin iqiegħdu ħafna pressjoni fuq l-Istati Membri fil-fruntieri,

P.

billi r-rati ta' rikonoxximent tal-kandidati għal status ta' refuġjati għaċ-ċittadini ta' ċerti pajjiżi terzi jvarjaw approssimament minn 0 % sa 90 % fl-Istati Membri,

Q.

billi huwa essenzjali li l-individwi li jressqu talbiet għall-ażil jiġu mgħarrfa bis-sħiħ dwar il-proċess ta' Dublin u dwar il-konsegwenzi possibbli,

R.

billi l-Artikolu 24(2) tal-Karta tad-Drittijiet Fundamentali tal-Unjoni Ewropea jgħid li fl-azzjonijiet kollha relatati mat-tfal, kemm jekk jittieħdu mill-awtoritajiet pubbliċi jew minn istituzzjonijiet privati, primarjament iridu jitqiesu l-aħjar interessi tat-tfal,

S.

billi, għalkemm l-unità tal-familja hija msemmija l-ewwel fil-ġerarkija tal-kriterji applikati fir-Regolament ta' Dublin, din id-dispożizzjoni ma tiġix applikata ta' spiss,

T.

billi hemm nuqqas evidenti ta' eżattezza fid-data statistika dwar it-trasferimenti, peress li din ma tindikax, pereżempju, ir-rata ta' talbiet għat-teħid ta' responsabilità għal applikant għall-ażil ibbażati fuq qsim irregolari tal-fruntieri, jew il-proporzjon ta' talbiet għal “teħid ta' responsabilità” meta mqabbla ma' talbiet għal “teħid lura,”

U.

billi fl-2005, disgħa mill-Istati Membri l-ġodda ddikjaraw li kienu qed jirreġistraw aktar trasferimenti “'il ġewwa” taħt ir-Regolament ta' Dublin, u Stati Membri mingħajr fruntieri tal-art esterni tal-Unjoni ddikjaraw li kienu qed jirreġistraw aktar trasferimenti “'il barra”,

V.

billi l-Kummissjoni ma setgħatx tevalwa l-ispiża għas-sistema ta' Dublin u billi din l-informazzjoni hi importanti sabiex tkun tista' tiġi evalwata l-effettività tagħha,

W.

billi l-Kunsill għall-Ġustizzja u l-Affarijiet Interni li ltaqa' fil-Lussemburgu fit-12 u t-13 ta' Ġunju 2007 stieden lill-Kummissjoni biex mill-aktar fis tippreżenta emenda għar-Regolament dwar il-Eurodac bil-għan li l-pulizija u l-awtoritajet għall-infurzar tal-liġi tal-Istati Membri, kif ukoll il-Europol, ikun jista' jkollhom aċċess taħt ċerti kundizzjonijiet għall-Eurodac, bażi tad-data li oriġinarjament inħolqot bħala għodda għall-implimentazzjoni tar-Regolament ta' Dublin,

1.

Jemmen bis-saħħa li sakemm ma jintlaħaqx livell sodisfaċenti u konsistenti madwar l-Unjoni Ewropea, is-sistema ta' Dublin dejjem se tipproduċi riżultati insodisfaċenti kemm mil-lat tekniku kif ukoll minn dak uman, u l-persuni li jitolbu l-ażil se jibqa' jkollhom raġunijiet validi biex jixtiequ jressqu t-talba tagħhom fi Stat Membru partikolari, biex b'hekk jieħdu vantaġġ mis-sistema nazzjonali għat-teħid ta' deċiżjonijiet l-aktar vantaġġjuża;

2.

Jemmen bis-saħħa li fin-nuqqas ta' sistema Ewropea għall-ażil u proċedura unika komuni u ġenwini. is-sistema ta' Dublin se tkompli ma tkunx ġusta kemm għal min jitlob l-ażil u kemm għal ċerti Stati Membri;

3.

Jafferma mill-ġdid il-bżonn urġenti għal titjib kemm tal-kwalità kif ukoll tal-konsistenza tal-proċess tat-teħid ta' deċiżjonijiet; hu konvint li Uffiċċju Ewropew għall-Appoġġ tal-Ażil jista' jkollu rwol prezzjuż f'dan ir-rigward, pereżempju billi jipprovdi taħriġ biex jintlaħaq il-livell ta' standards komuni għoljin u permezz tal-forniment ta' timijiet ta' appoġġ esperti;

4.

Jitlob lill-Kummissjoni sabiex tqis mezzi biex il-Kummissarju Għoli għar-Refuġjati tan-Nazzjonijiet Uniti (UNHCR) jiġu fornit b'finanzjament dirett biex jiġu ikkumplementatil-finanzjament ibbażat fuq proġetti sabiex ikun jista' jtejjeb ix-xogħol tiegħu ta' sorveljanza u ta' konsulenza fl-UE u jkompli jiżviluppa metodi intenzjonati għall-appoġġ tal-awtoritajiet nazzjonali fl-isforzi tagħhom għat-titjib tal-kwalità tat-teħid ta' deċiżjonijiet tagħhom;

5.

Jitlob lill-Kummissjoni sabiex tressaq proposti għal mekkaniżmi għat-“tqassim tal-piż” li jkunu jistgħu jiġu stabbiliti sabiex jitnaqqas il-piż sproporzjonat li jista' jaqa' fuq ċerti Stati Membri, b'mod partikulari l-Istati Membri fil-fruntieri, iżda li mhumiex parti mis-Sistema ta' Dublin;

6.

Jistieden lill-Kummissjoni biex, sakemm jiġu introdotti l-mekkaniżmi Ewropej għat-“tqassim tal-piż”, taħseb biex tipprevedi mekkaniżmi apparti dawk finanzjari fi ħdan ir-Regolament ta' Dublin, bil għan li tirranġa l-effetti ħżiena tal-implimentazzjoni tiegħu għall-Istati Membri ż-żgħar fil-fruntieri esterni tal-Unjoni;

7.

Jitlob lill-Kummissjoni biex tipprevedi mekkaniżmu li jorbot biex jitwaqqfu t-trasferimenti ta' applikanti għall-ażil lejn Stati Membri li ma jiggarantixxux trattament sħiħ u ġust tat-talbiet tagħhom u biex tieħu miżuri sistematiċi kontra dawk l-Istati;

8.

Jistieden lill-Kummissjoni biex tistabbilixxi relazzjonijiet ta' ħidma bilaterali sinifikanti ma' pajjiżi terzi, sabiex il-koperazzjoni tiġi ffaċilitata u biex jiġi żgurat li pajjiżi terzi ta' dan it-tip jissodisfaw l-obbligi legali internazzjonali tagħhom fir-rigward tal-Konvenzjoni ta' Ġinevra dwar l-Istatus tar-Refuġjati tat-28 ta' Lulju 1951 u s-salvataġġ ta' fuq il-baħar;

9.

Jitlob lill-Kummissjoni biex tintroduċi fir-regolament il-ġdid dispożizzjonijiet iktar ċari u stretti fir-rigward tal-mezzi li permezz tagħhom il-persuni li jkunu qed ifittxu protezzjoni jiġu infurmati bl-implikazzjonijiet tar-Regolament ta' Dublin, u biex tikkunsidra biex tfassal fuljett standard li jista' jiġi tradott f'ċertu numru ta' lingwi u jitqassam lill-Istati Membri kollha u li għandu jqis ukoll il-livelli individwali ta' litteriżmu;

10.

Jitlob lill-Kummissjoni biex temenda l-Artikoli 19 u 20 tar-Regolament ta' Dublin dwar it-teħid ta' responsabilità u t-teħid lura, sabiex tipprovdi lill-applikanti bi dritt ta' appell sospensorju awtomatiku kontra deċiżjoni ta' trasferiment tar-responsabilità lil Stat Membru ieħor taħt ir-Regolament ta' Dublin;

11.

Jafferma mill-ġdid li l-prinċipju ta' non-refoulement għandu jibqa' wieħed mill-elementi bażiċi ta' kwalunkwe sistema komuni ta' ażil fil-livell tal-Unjoni Ewropea, u jinsisti li l-implimentazzjoni tar-Regolament ta' Dublin qatt m'għandha twassal biex talba tingħalaq għal raġunijiet proċedurali u ma tinfetaħx mill-ġdid għal eżami sħiħ u ġust tat-talba oriġinali wara trasferiment permezz tal-proċess ta' Dublin; jikkunsdira li dan għandu jkun miktub ċar fir-Regolament;

12.

Jikkunsidra li t-tqassim ta' informazzjoni dwar it-trasferimenti bejn l-Istati Membri għandu jittejjeb, speċjalment fir-rigward tal-kura medika speċjali meħtieġa għall-persuni trasferiti;

13.

Jistieden lill-Kummissjoni biex tevalwa l-possibilità li individwi kkonċernati minn trasferiment lejn Stat Membru ieħor taħt is-sistema ta' Dublin jiġu ttrasferiti lejn il-pajjiż tal-oriġini tagħhom, fuq talba espliċita tagħhom u fuq il-bażi ta' konformità sħiħa mad-drittijiet proċedurali biss,

14.

Jirrakkomanda li, fil-livell tal-Unjoni Ewropea, jiġi adottat sett ta' linji gwida komuni dwar l-evalwazzjoni tal-età u li, fil-każ ta' inċertezza, għandu jingħata l-benefiċċju tad-dubju lit-tfal;

15.

Ifakkar li, fid-deċiżjonijiet kollha relatati mat-tfal, l-aħjar interessi tat-tfal iridu jkunu l-ewwel prijorità; jinsisti li minorenni mhux akkumpanjati qatt m'għandhom jiġu detenuti jew trasferiti lejn Stat Membru ieħor, sakemm ma jkunx għall-ġid tar-riunifikazzjoni tal-familja, u li jekk jirriżulta li trasferiment ta' dan it-tip ikun neċessarju, it-tfal għandhom ikunu rappreżentati u akkumpanjati kif jixraq tul il-proċedura; jilqa', għalhekk, l-intenzjoni tal-Kummissjoni li tiċċara ulterjurment l-applikabilità tar-regoli ta' Dublin għal minorenni mhux akkumpanjati;

16.

Jiddispjaċih li d-definizzjoni ta' membru tal-familja, taħt ir-Regolament attwali, hija ristretta wisq u jitlob lill-Kummissjoni biex testendi d-definizzjoni attwali sabiex din tkun tinkludi lill-qraba immedjati u l-imsieħba għal perjodu fit-tul kollha, b'mod partikulari dawk li m'għandhom l-ebda appoġġ familjari ieħor, u tfal adulti li mhumiex kapaċi jieħdu ħsieb tagħhom infushom;

17.

Jilqa' l-intenzjoni tal-Kummissjoni li testendi l-kamp ta' applikazzjoni tar-Regolament ta' Dublin sabiex dan ikun jinkludi l-protezzjoni sussidjarja, peress li din l-estensjoni tippermetti li l-applikanti għall-protezzjoni sussidjarja jingħaqdu mill-ġdid mal-membri tal-familja li jkunu ngħataw dan it-tip ta' protezzjoni jew li qed jitolbuha fi Stat Membru ieħor;

18.

Jitlob lill-Kummissjoni biex iżżid dispożizzjoni li tillimita d-detenzjoni ta' applikanti ta' Dublin għal meta ma jkunx hemm għażla oħra possibbli, biex permezz tagħha tispeċifika l-bażijiet li fuqhom tista' tintuża d-detenzjoni, kif ukoll is-salvagwardji proċedurali li għandhom jiġu previsti;

19.

Jitlob lill-Kummissjoni biex tiddikjara espliċitament fir-Regolament ta' Dublin li l-applikanti ta' Dublin huma intitolati għall-istess kundizzjonijiet talqugħ bħal persuni oħra li jkunu qed ifittxu l-ażil, skond id-Direttiva dwar l-Ilqugħ, li l-Artikolu 3(1) tagħha jistipula regoli ġenerali partikolarment dwar il-kundizzjonijiet ta' lqugħ materjali, il-kura tas-saħħa, il-libertà ta' moviment u l-iskola għall-minorenni;

20.

Jikkunsidra li l-klawżola umanitarja inkluża fl-Artikolu 15 tar-Regolament ta' Dublin tagħti flessibilità konsiderevoli lis-sistema ta' Dublin, iżda li għandha tiġi applikata b'mod iktar wiesa', sabiex tiġi evitata tbatija mhux xierqa għall-familji bħala riżultat tal-firda;

21.

Jikkunsidra li meta persuna li qed titlob l-ażil tinsab fi stat partikolarment vulnerabbli, minħabba mard sejru, diżabilità serja, età avvanzata jew tqala, u hija jew huwa huma għalhekk dipendenti fuq l-assistenza ta' qarib preżenti fit-territorju ta' Stat Membru minbarra dak li huwa responsabbli għall-eżami tal-applikazzjoni tagħhom, hija jew huwa dejjem għandhom jingħaqdu mill-ġdid ma' dak il-qarib; jitlob lill-Kummissjoni biex tikkunsidra li d-dispożizzjonijiet rilevanti tal-klawżola umanitarja fl-Artikolu 15(2) tagħmilhom obbligatorji;

22.

Jikkunsidra li għandu jiġi introdott dmir proattiv għas-Soċjetajiet tas-Salib l-Aħma u tan-Nofs Qamar l-Aħmar biex jinstabu l-membri familjari;

23.

Jilqa' l-intenzjoni tal-Kummissjoni li tispeċifika b'mod aħjar iċ-ċirkostanzi u l-proċeduri għall-applikazzjoni tal-Klawżola ta' Sovranità, b'mod partikulari sabiex tiġi introdotta l-kundizzjoni tal-kunsens tal-applikant għall-ażil;

24.

Jesprimi t-tħassib tiegħu fir-rigward tad-diskrepanzi u n-nuqqasijiet fil-ġbir ta' data li ġew żvelati mill-evalwazzjoni tal-Kummissjoni tas-sistema ta' Dublin, speċjalment f'dak li għandu x'jaqsam mar-reġistrazzjoni tal-marki tas-swaba ta' dawk li jidħlu illegalment mill-fruntieri tal-Unjoni, peress li dan jitfa' dubji serji fuq il-validità tas-sistema; jittama li r-Regolament (KE) Nru 862/2007 imsemmi hawn fuq se jagħti lil dawk kollha li għandhom sehem fil-qasam idea iktar preċiża dwar it-tħaddim tas-sistema ta' Dublin u tal-istrumenti Komunitarji l-oħra dwar il-protezzjoni internazzjonali;

25.

Jesprimi t-tħassib tiegħu li attwalment m'hemm disponibbli l-ebda evalwazzjoni tal-ispiża tas-sistema ta' Dublin; jistieden lill-Kummissjoni biex dan tirrimedjah peress li hi aspett importanti tal-evalwazzjoni tas-sistema;

26.

Jinnota b'interess it-tħassib espress mill-Kummissjoni fir-rigward tal-ġbir u l-kwalità tad-data mibgħuta lill-Unità Ċentrali tal-Eurodac, kif ukoll fir-rigward tan-nuqqas ta' konformità mal-obbligu li titħassar ċerta data u mar-regoli relatati mal-protezzjoni tad-data personali; jikkunsidra li dawn in-nuqqasijiet, li jqajmu dubji dwar l-affidabilità tal-Eurodac, għandhom jiġu indirizzati b'mod adegwat qabel ma jitqies kwalunkwe użu ieħor ta' din il-bażi tad-data;

27.

Jikkunsidra li kull Stat Membru għandu jiċċara, fuq lista magħluqa, liema aġenziji u awtoritajiet għandhom aċċess għall-bażi tad-data tal-Eurodac, u għal liema skop, sabiex jitwaqqaf kull użu illegali tad-data;

28.

Jenfasizza li l-estensjoni tal-aċċess għall-Eurodac lill-pulizija u lill-awtoritajiet għall-infurzar tal-liġi tal-Istati Membri, kif ukoll lill-Europol, iġġib magħha r-riskju li l-informazzjoni tgħaddi lil pajjiżi terzi, li jista' jkollha konsegwenzi negattivi għall-persuni li jkunu qed jitolbu l-ażil u għall-familji tagħhom; jinsab konvint li dan iżid ukoll ir-riskju li l-applikanti għall-ażil jiġu stigmatizzati;

29.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

4.12.2009   

MT

Il-Ġurnal Uffiċjali tal-Unjoni Ewropea

CE 295/10

A.

billi l-moviment liberu tal-persuni fl-Unjoni Ewropea, l-aktar fil-kuntest tal-aħħar żewġ tkabbiriet u l-estensjonijiet korrispondenti tal-Grupp ta' Schengen, wasslet għal żieda mgħaġġla fin-numru ta' persuni u vetturi li jaqsmu l-fruntieri nazzjonali kemm għal raġunijiet ta' negozju kif ukoll għal raġunijiet privati,

B.

billi l-prijorità li jitħarsu l-vittmi tal-inċidenti titlob leġiżlazzjoni dwar l-assikurazzjoni li tkun ċara, preċiża u effettiva fil-livell tal-UE,

C.

billi r-Raba' Direttiva dwar l-assikurazzjoni tal-vetturi appellat lill-Kummissjoni sabiex tirrapporta lill-Parlament Ewropew u lill-Kunsill dwar l-implimentazzjoni u l-effikaċja tal-pieni nazzjonali introdotti fir-rigward tal-proċedura tal-offerta/tweġiba maħsuba, kif ukoll dwar l-ekwivalenza tagħhom, u sabiex tippreżenta proposti jekk ikun hemm ħtieġa,

D.

billi r-Rapport tal-Kummissjoni jeżamina d-dispożizzjonijiet penali nazzjonali, l-effikaċja tal-mekkaniżmu tar-rappreżentanti tal-klejms, u d-disponibilità eżistenti tal-assikurazzjoni fuq spejjeż legali volontarji li tista' tittieħed minn vittmi potenzjali ta' inċidenti tat-traffiku b'mod addizzjonali,

E.

billi l-paragrafu 6 tal-Artikolu 4 tar-Raba' Direttiva dwar l-assikurazzjoni tal-vetturi jirregola l-proċedura tal-offerta maħsuba, li bis-saħħa tagħha l-vittmi tal-inċidenti tat-traffiku barra minn pajjiżhom għandhom id-dritt li jitolbu kumpens lir-rappreżentant tal-kumpanija ta' assikurazzjoni maħtur fil-pajjiż fejn il-vittma hija residenti,

F.

billi l-vittma trid tirċievi tweġiba maħsuba mingħand il-kumpanija tal-assikurazzjoni fi żmien tliet xhur inkella huma maħsuba sanzjonijiet,

G.

billi għadha tinħtieġ kjarifika dwar it-tħaddim ta' din id-dispożizzjoni,

H.

billi l-Kummissjoni trid tqis bis-sħiħ it-tkabbir meta timplimenta politiki tal-UE, l-aktar dwar l-ispiża għolja tal-assikurazzjoni tal-vetturi fl-Istati Membri l-ġodda,

I.

billi dispożizzjonijiet penali differenti li jikkonċernaw il-proċedura ta' offerta/tweġiba maħsuba ġew implimentati fl-Istati Membri,

J.

billi l-konsultazzjonijiet mal-awtoritajiet nazzjonali, inklużi mal-Istati Membri l-ġodda, ikkonfermaw li d-dispożizzjonijiet penali attwali, fejn jeżistu, huma adegwati u li l-implimentazzjoni tagħhom hija effettiva fl-UE kollha,

K.

madankollu, billi l-Istati Membri ma jagħmlux dispożizzjoni għal sanzjonijiet speċifiċi u jiddependu fuq id-dover ta' min jassigura li jħallas l-interessi statutorji fuq l-ammont ta' kumpens jekk l-offerta/tweġiba motivata ma ssirx fi żmien tliet xhur,

L.

billi s-sistema tar-rappreżentanti tal-klejms hija relattivament magħrufa sew fil-biċċa l-kbira tal-Istati Membri,

M.

billi biex tiġi evalwata l-kuxjenza taċ-ċittadini dwar is-sistema rappreżentattiva tal-klejms, il-konsultazzjonijiet li saru mill-Kummissjoni involvew biss lill-Istati Membri u lill-industrija tal-assikurazzjoni, mingħajr ma' ġew involuti kif xieraq iċ-ċittadini u l-assoċjazzjonijiet tal-konsumatur, jiġifieri dawk li huma l-aktar interessati li jiżguraw li din is-sistema taħdem kif suppost,

N.

billi l-assikurazzjoni fuq l-ispejjeż legali mġarrba mill-vittmi ta' inċidenti tat-traffiku hija disponibbli fil-biċċa l-kbira tal-Istati Membri; billi aktar minn 90 % tal-każijiet kollha jissolvew barra mill-qorti u spejjeż legali jiġu rimborsati f'ħafna Stati Membri. billi, flimkien ma' dan, il-kumpaniji tal-assikurazzjoni tal-ispejjeż legali diġà pprovdew, għal numru ta' snin, koperturi għal kull tip ta' każijiet bejn il-fruntieri u waqqfu d-dipartimenti propji tagħhom biex jieħdu ħsieb klejms barranin u biex jiffaċilitaw soluzzjonijiet mgħaġġla.

O.

billi l-kwistjoni dwar jekk dawn l-ispejjeż legali raġonevoli għandhomx ikunu koperti minn assikurazzjoni fuq ir-responsabilità fil-konfront ta' Vetturi ta' Partijiet Terzi fl-Istati Membri kollha, għadha mhix solvuta,

P.

madankollu, billi l-fatt li l-ispejjeż legali, fl-Istati Membri kollha, jiġu koperti mill-Assikurazzjoni tat-Terza Parti jgħin sabiex il-konsumaturi Ewropej ikunu protetti aħjar u tiżdied il-fiduċja tagħhom,

Q.

billi s-swieq tal-assikurazzjoni fl-Istati Membri l-ġodda qegħdin gradwalment jiġu żviluppati; billi, madankollu, f'għadd minn dawn l-Istati Membri, l-assikurazzjoni fuq l-ispejjeż legali hija prodott relattivament ġdid li jeħtieġ li jiġi promoss peress li l-għarfien pubbliku dwar l-ispejjeż legali hija pjuttost baxxa meta mqabbla ma' oħrajn,

R.

billi l-kopertura obbligatorja għall-ispejjeż legali għandha żżid il-kunfidenza tal-konsumatur fl-assikurazzjoni fuq ir-responsabilità fil-konfront ta' Vetturi ta' Partijiet Terzi, l-aktar f'każijiet fejn jitfittex rimedju legali, peress li l-konsumaturi f'ħafna Stati Membri ġodda huma konxji mill-ispejjeż legali għolja, li jkunu koperti minn assikurazzjoni obbligatorja,

S.

billi l-assikurazzjoni obbligatorja fuq l-spejjeż legali toħloq ammont ta' xogħol addizzjonali u iżjed kumpless għall-ġudikatura u jista' jkun li toħloq dewmien biex jissolvew tilwimiet u persentaġġ ogħla ta' klejms mhux iġġustifikati,

T.

billi l-assikurazzjoni fuq ir-responsabilità fil-konfront ta' Vetturi ta' Partijiet Terzi u l-assikurazzjoni fuq l-ispejjeż legali għandhom objettivi differenti u jaqdu funzjonijiet differenti, b'mod partikolari li filwaqt li l-assikurazzjoni fuq ir-responsabilità fil-konfront ta' Vetturi ta' Partijiet Terzi tippermetti li l-konsumatur ikun jiflaħ jidħol għall-ispiża ta' kull klejm miġjuba kontrih f'każ ta' inċident tat-traffiku, l-assikurazzjoni fuq l-ispejjeż legali tkopri l-ispejjeż legali sabiex wieħed jiftaħ klejm kontra parti terza wara inċident tat-traffiku,

U.

billi kampanji pubbliċi mill-awtoritajiet nazzjonali, mill-industrija tal-assikurazzjoni u mill-organizzazzjonijiet tal-konsumaturi huma importanti għall-iżvilupp tas-swieq nazzjonali,

1.

Jilqa' b'sodisfazzjon ir-Rapport tal-Kummissjoni u jenfasizza l-importanza li jkunu inklużi, bis-sħiħ u b'mod effettiv, l-partijiet kollha interessati, speċjalment il-konsumaturi, fil-proċess ta' konsultazzjoni fl-iżvilupp ta' politika tal-UE f'dan il-qasam;

2.

Għaldaqstant jappella għas-sehem sistematiku tal-organizzazzjonijiet tal-konsumaturi li jirrappreżentaw il-vittmi, l-aktar fil-proċess ta' evalwazzjoni tal-effikaċja tas-sistemi eżistenti fl-Istati Membri;

3.

Jilqa' b'sodisfazzjon din l-evalwazzjoni ex-post tal-miżuri leġiżlattivi sabiex jiġi żgurat li r-regoli jkunu qed jaħdmu kif mistenni u sabiex tiġi enfasizzata kull applikazzjoni ħażina li ma tkunx prevista;

4.

Jenfasizza l-importanza li tiżdied il-fiduċja tal-konsumatur fil-poloz tal-assikurazzjoni fuq il-vetturi fir-rigward ta' vjaġġar transkonfinali bil-vetturi fl-UE, speċjalment għas-sewwieqa mill-Istati Membri l-antiki li jivvjaġġaw lejn destinazzjonijiet fl-Istati Membri l-ġodda u viċi-versa;

5.

Iqis li l-promozzjoni ta' soluzzjonijiet eżistenti legali u bbażati fuq is-suq li jħarsu l-konsumatur isaħħu l-fiduċja tal-konsumatur fl-assikurazzjoni tal-vetturi;

6.

Jemmen li l-Istati Membri għandhom ukoll ir-responsabilità għat-tħaddim tajjeb tas-sistemi ta' assikurazzjoni nazzjonali tagħhom skond il-leġiżlazzjoni ġdida tal-UE li tikkonċerna l-proċedura tal-offerta/tweġiba maħsuba u l-ispejjeż legali mġarrba mill-vittmi,

7.

Jistieden lill-Kummissjoni sabiex tkompli timmoniterja mill-qrib it-tħaddim effettiv tal-mekkaniżmi tas-suq u sabiex minn żmien għall-ieħor tirrapporta lill-Parlament dwar dan;

8.

Iqis li s-sempliċi rekwiżit li l-assikuratur iħallas l-interess statutorju fil-każ ta' dewmien mhux strument li jippenalizza, u li għalhekk il-Kummissjoni teħtieġ li teżerċita aktar kontroll u tieħu miżuri xierqa f'dan ir-rispett sabiex tiżgura li, fl-Istati Membri kollha, is-swieq ikunu qed jaħdmu sew u l-konsumaturi jkunu protetti b'mod effettiv;

9.

Jenfasizza li r-rabtiet ta' ħidma bejn il-Kummissjoni, l-awtoritajiet nazzjonali, l-industrija tal-assikurazzjoni u l-konsumaturi għandhom jissaħħu sabiex ikun żgurat li jkun hemm forniment kostanti ta' dejta preċiża dwar is-sistemi attwali ta' infurzar;

10.

B'konformità mal-approċċ stabbilit b'mod ġenerali tal-UE għas-sanzjonijiet, iqis li għandu jiġi applikat il-prinċipju tas-sussidjarjetà u li m'hemmx ħtieġa għal armonizzazzjoni tad-dispożizzjonijiet penali nazzjonali;

11.

Iqis li l-entitajiet regolatorji nazzjonali huma f'pożizzjoni aħjar sabiex jiggarantixxu l-ogħla livell possibbli ta' ħarsien tal-konsumatur fuq is-swieq nazzjonali tagħhom,

12.

Għaldaqstant, b'riferenza għall-proċedura ta' offerta/tweġiba maħsuba, jirrakkomanda li l-impożizzjoni ta' sanzjonijiet u l-għażla dwar liema tipi u livelli ta' dispożizzjonijiet huma adegwati, jitħallew f'idejn l-Istati Membri;

13.

Jistieden lill-Istati Membri sabiex jiggarantixxu l-effikaċja tal-liġijiet maħsuba fil-każ li ma tiġix rispettata l-iskadenza ta' tliet xhur għat-tressiq ta' tweġiba motivata għat-talba ta' kumpens jew ta' offerta motivata ta' kumpens;

14.

iqis li huwa xieraq li jiġu kkunsidrati bir-reqqa r-raġunijiet għall-inadempjenza tal-kumpaniji tal-assikurazzjoni qabel jiġu applikati l-pieni, billi b'mod partikulari jitqiesu l-fatturi li mhumiex fil-kontroll tal-kumpaniji stess; jawgura li l-Kummissjoni tibqa' tosserva s-swieq nazzjonali u toffri l-kontribut tagħha lil dawk l-awtoritajiet nazzjonali li jitolbu l-assistenza tagħha;

15.

Itenni l-importanza li tissaħħaħ il-fiduċja taċ-ċittadini fit-tħaddim tas-sistema tar- rappreżentanti tal-klejms billi din tiġi promossa permezz ta' kampanji pubbliċi u b'miżuri adegwati oħra;

16.

Jistieden lill-Istati Membri u lill-Kummissjoni biex iżidu l-fiduċja tal-konsumaturi billi jippromwovu miżuri adegwati li jżidu l-kuxjenza u l-użu ta' ċentri ta' informazzjoni nazzjonali dwar l-assikurazzjonijiet, bħar-rekwiżit li l-assikuraturi jinkludu d-dettalji għall-kuntatt taċ-ċentru ta' informazzjoni fl-Istat Membru tagħhom fil-pakkett ta' informazzjoni tal-kuntratt;

17.

Barra minn hekk, jistieden lill-Istati Membri biex jesiġu lill-kumpaniji tal-assikurazzjoni, bħala parti mill-pakkett ta' informazzjoni pre-kuntrattwali, jipprovdu informazzjoni komprensiva lill-konsumaturi dwar kif taħdem is-sistema tar-rappreżentanti tal-klejms u x'inhuma l-użi u l-benefiċċji tagħha għall-parti assikurata.

18.

Iħeġġeġ lill-Kummissjoni sabiex tkompli timmoniterja t-tħaddim tas-sistema, u sabiex tikkoordina u tgħin, fejn ikun hemm ħtieġa jew meta l-awtoritajiet nazzjonali jitolbu għall-għajnuna;

19.

Barra minn hekk iqis, fir-rigward tal-assikurazzjoni fuq ir-responsabilità fil-konfront ta' Vetturi ta' Partijiet Terzi, li l-kopertura obbligatorja fuq l-ispejjeż legali toħloq diżinċentiv ċar fuq ir-rikors ta' ftehim barra l-qorti, potenzjalment iżżid in-numru ta' proċedimenti fil-qorti u għaldaqstant twassal għal żieda mhux ġustifikabbli fix-xogħol tal-ġudikatura, u tista' tiddistabbilizza t-tħaddim tas-suq tal-assikurazzjoni volontarja fuq l-ispejjeż legali li jeżisti u li qed jevolvi,

20.

Għaldaqstant fl-aħħar mill-aħħar iqis li l-effetti negattivi tal-introduzzjoni ta' sistema ta' kopertura obbligatorja għall-ispejjeż legali fl-assikurazzjoni fuq ir-Responsabilità fil-konfront ta' Vetturi ta' Partijiet Terzi jxejnu l-benefiċċji eventwali;

21.

Iħeġġeġ lill-Kummissjoni biex, bi sħab mal-Istati Membri, tieħu l-miżuri ulterjuri meħtieġa sabiex tqajjem kuxjenza dwar l-assikurazzjoni għall-protezzjoni legali, kif ukoll għal prodotti oħra tal-assikurazzjoni, b'mod partikolari fl-Istati Membri l-ġodda, filwaqt li tiffoka fuq it-tgħarrif tal-konsumaturi dwar il-vantaġġi li wieħed jiġi offrut u li jkollu dan it-tip ta' kopertura ta' assikurazzjoni;

22.

F'dan il-kuntest iqis l-irwol tal-entitajiet regolatorji nazzjonali bħala kruċjali għall-implimentazzjoni tal-aħjar prattiki użati fl-Istati membri l-oħra;

23.

Għaldaqstant jistieden lill-Kummissjoni biex issaħħaħ il-protezzjoni tal-konsumatur primarjament billi tħeġġeġ lill-Istati Membri sabiex jinkuraġġixxu lill-entitajiet regolatorji nazzjonali u l-kumpaniji ta' assikurazzjoni nazzjonali tagħhom biex iqajmu kuxjenza dwar id-disponibilità ta' assikurazzjoni volontarja fuq l-ispejjeż legali;

24.

Iqis li l-informazzjoni pre-kuntrattwali dwar l-assikurazzjoni tal-vetturi tista' tinkludi informazzjoni dwar l-għażla li wieħed ikun kopert għall-ispejjeż legali;

25.

Jistieden lill-Istati Membri sabiex iħeġġu lill-entitajiet regolatorji nazzjonali u lill-intermedjarji sabiex jinfurmaw lill-konsumaturi dwar riskji possibbli u dwar assikurazzjoni volontarja ulterjuri li tista' tibbenefika lill-konsumaturi, bħal pereżempju, assikurazzjoni fuq l-ispejjeż legali, kopertura ta' assistenza u assikurazzjoni fuq is-serq;

26.

Jistieden lil dawk l-Istati Membri li m'għandhomx stabbiliti sistemi ta' soluzzjoni ta' tilwim għas-soluzzjoni ta' klejms sabiex jikkunsidraw li jintroduċu sistemi bħal dawn, ibbażati fuq l-aħjar prattiki minn Stati Membri oħra;

27.

Jappella lill-Kummissjoni sabiex ma tippreġudikax ir-riżultati tal-istudji kkummissjonati fir-rigward tad-danni differenti marbuta ma' feriti fuq il-persuna li jirriżultaw mill-adozzjoni tar-Regolament Roma II (2), riżultati li jistgħu jissuġġerixxu soluzzjoni bbażata fuq l-assikurazzjoni u, b'konsegwenza, emenda għar-Raba' Direttiva dwar l-assikurazzjoni tal-vetturi;

28.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

4.12.2009   

MT

Il-Ġurnal Uffiċjali tal-Unjoni Ewropea

CE 295/13

A.

billi l-frodi fiskali għandha konsegwenzi serji għall-baġits tal-Istati Membri u għas-sistema tar-riżorsi tal-Unjoni Ewropea, twassal għal vjolazzjonijiet tal-prinċipju tat-tassazzjoni ġusta u trasparenti u x'aktarx li tikkaġuna tagħwiġ tal-kompetizzjoni, u għalhekk taffettwa l-operat tas-suq intern; billi l-intrapriżi onesti għandhom żvantaġġi għall-kompetittività tagħhom minħabba l-frodi fiskali, u t-telf tad-dħul mit-taxxa fl-aħħar mill-aħħar se jpatti għalih iċ-ċittadin Ewropew permezz ta' forom oħra ta' tassazzjoni;

B.

billi l-frodi fiskali tipperikola l-ekwità u l-ġustizzja fiskali, minħabba li n-nuqqas ta' dħul għall-finanzi pubbliċi ħafna drabi hija kkompensata b'żidiet ta' taxxa li jolqtu lil dawk l-inqas sinjuri u dawk li jħallsu t-taxxa b'mod onest, li m'għandhomx l-għażla jew l-intenzjoni li jaħarbu jew li ma josservawx l-obbligi fiskali tagħhom,

C.

billi t-tkabbir tal-kummerċ transkonfinali kkawżat mit-twaqqif tas-suq intern irriżulta f' għadd li qed jiżdied ta' tranżazzjonijiet fejn il-post ta' tassazzjoni u l-post ta' stabbiliment tal-persuna responsabbli li tħallas il-VAT qegħdin f'żewġ Stati Membri differenti,

D.

billi dawk li qed jużaw forom ġodda ta' frodi fiskali marbuta ma' tranżazzjonijiet transkonfinali, bħall-karussell jew il-frodi intra-Komunitarja minn negozjanti li ma jinstabux, ħadu vantaġġ mill-frammentazzjoni u min-nuqqasijiet tas-sistemi attwali tat-tassazzjoni, u billi jeħtieġ li jsiru bidliet fil-mod li bih topera l-VAT,

E.

billi l-evażjoni tal-VAT u l-frodi għandhom impatt fuq l-iffinanzjar tal-baġit tal-Unjoni Ewropea, billi jwasslu għal ħtieġa akbar biex l-Istati Membri jużaw ir-riżorsi proprji tagħhom fuq il-bażi tad-dħul gross nazzjonali,

F.

billi l-ġlieda kontra l-frodi, filwaqt li fil-biċċa l-kbira hija r-responsabiltà tal-Istati Membri, mhijiex problema li wieħed jista' jsib tarfha f'livell nazzjonali biss,

G.

billi l-globalizzazzjoni wasslet għal diffikultajiet akbar fil-ġlieda kontra l-frodi fiskali fuq livell internazzjonali, minħabba l-involviment akbar ta' impriżi mwaqqfa f'pajjiżi terzi fil-frodi karusell, l-espansjoni tal-kummerċ elettroniku u l-globalizzazzjoni tas-suq tas-servizzi; billi dawn il-fatturi jagħtu spinta qawwija favur it-titjib tal-koperazzjoni internazzjonali, b'mod partikulari fir-rigward tal-VAT,

H.

billi l-livell għoli ta' frodi fiskali fl-Unjoni Ewropea huwa riżultat tas-sistema tranżizzjonali attwali tal-VAT, li hija kumplessa wisq, u li minħabba fiha huwa diffiċli li t-tranżazzjonijiet intra-Komunitarji jiġu segwiti, jsiru inqas trasparenti u għalhekk aktar miftuħa għall-abbuż,

I.

billi, meta jqisu l-għażliet biex jittrattaw il-frodi fiskali, il-Kummissjoni u l-Istati Membri għandhom, kemm hu possibbli, jevitaw miżuri li jistgħu jwasslu għal piż amministrattiv sproporzjonat fuq in-negozji u fuq l-amministrazzjonijiet fiskali jew miżuri li jistgħu jkunu diskriminatorji għal xi negozjanti,

J.

billi kemm il-Kummissjoni kif ukoll il-Qorti tal-Awdituri ddikjaraw b'mod konsistenti li s-sistema għall-iskambju ta' informazzjoni bejn l-Istati Membri dwar fornimenti intrakomunitarji ta' oġġetti ma tagħtix informazzjoni relevanti jew f'waqtha dwar il-ġlieda effiċjenti kontra l-frodi tas-sistema tal-VAT; billi dan jirrikjedi regoli iktar ċari u li jorbtu aktar dwar il-koperazzjoni bejn l-Istati Membri u l-Uffiċċju Ewropew Kontra l-Frodi (OLAF),

K.

billi l-użu tat-teknoloġiji disponibbli kollha, fosthom il-ħażna u t-trażmissjoni elettronika ta' ċerta dejta rigward il-VAT u tat-taxxi tas-sisa, huwa indispensabbli għall-operat xieraq tas-sistemi fiskali tal-Istati Membri; billi għandhom jittejbu l-kundizzjonijiet għall-iskambju ta' dejta maħżuna elettronikament, u għall-aċċess dirett tal-Istati Membri għal din id-dejta, f'kull Stat Membru; billi l-awtoritajiet fiskali tal-Istati Membri għandhom jipproċessaw id-dejta persunali b'attenzjoni xierqa għal skopijiet speċifikati u fuq il-bażi tal-kunsens tal-persuna kkonċernata jew xi bażi leġittima oħra stipulata mil-liġi,

L.

billi bosta drabi n-negozjanti jingħataw biss informazzjoni mhux kompleta dwar l-istejtus tal-VAT tal-klijenti tagħhom,

M.

billi mat-tisħiħ tal-mezzi biex tinstab il-frodi fiskali għandha tissaħħaħ ukoll il-leġiżlazzjoni eżistenti dwar l-għajnuna għall-irkuprar tat-taxxi, l-ugwaljanza fit-trattament tat-taxxa u l-prattikabiltà għan-negozji,

1.

Jinnota li l-iskop ta' strateġija tal-UE rigward il-frodi fiskali jrid ikun dak li jinstab tarf tat-telf fiskali minħabba l-frodi fiskali billi jiġu identifikati l-oqsma fejn jista' jsir titjib kemm fil-leġiżlazzjoni tal-UE kif ukoll fil-koperazzjoni amministrattiva bejn l-Istati Membri, titjib li jippromwovi b'mod effettiv it-tnaqqis tal-frodi fiskali, mingħajr ma jinħolqu piżijiet mhux meħtieġa kemm għall-amministrazzjonijiet fiskali kif ukoll għal min iħallas it-taxxa;

2.

Jistieden lill-Istati Membri biex fl-aħħar jieħdu l-ġlieda kontra l-frodi fiskali b'mod serju;

3.

Ifakkar li t-twaqqif ta' sistema tal-VAT bbażata fuq il-“prinċipju tal-oriġini”, li timplika li t-tranżazzjonijiet bejn l-Istati Membri li jaqgħu taħt is-sistema tal-VAT iġorru t-taxxa mħallsa fil-pajjiż tal-oriġini minflok ma jkollhom ir-rata żero, tibqa' soluzzjoni dejjiema li permezz tagħha l-frodi fiskali tista' tiġi miġġielda b'mod effettiv; jinnota li l-“prinċipju tal-oriġini” jevita li l-prodotti kkummerċjalizzati fis-suq intern jiġu eżentati mill-VAT u għalhekk jiġu ntaxxati fil-pajjiż ta' destinazzjoni; ifakkar li sabiex tkun operattiva, sistema tal-VAT bbażata fuq il-“prinċipju tal-oriġini” teħtieġ it-twaqqif ta' sistema ta' rilaxx (clearing system), kif propost oriġinarjament mill-Kummissjoni fl-1987;

4.

Jiddispjaċih għall-attitudni ta' tfixkil ta' xi Stati Membri f'dawn l-aħħar għaxar snin, li fixklet kwalunkwe strateġija effettiva tal-UE biex tiġġieled il-frodi fiskali;

5.

Jiddispjaċih li minkejja analiżi ripetuti, talbiet u oġġezzjonijiet, il-Kunsill għadu ma addottax strateġija effettiva għall-ġlieda kontra l-frodi fiskali;

6.

Iħeġġeġ lill-Kummissjoni biex ma żżommx lura milli tiffaċċja l-problema b'mod determinat, minkejja l-fallimenti ripetuti fl-aħħar għexieren ta' snin;

7.

Jirrikonoxxi li stimi tat-telf fiskali globali (dirett u indirett) minħabba l-frodi fiskali jvarjaw minn 200 għal 250 biljun ewro, li huwa ugwali għal 2 sa 2,25 % tal-GDP fl-Unjoni Ewropea; minn dak l-ammont 40 miljun ewro huma dovuti għal frodi tas-sistema tal-VAT u huwa stmat li jinkludu 10 % tad-dħul mill-VAT, 8 % tad-dħul totali mit-taxxi tas-sisa fuq ix-xorb alkoħoliku fl-1998 u 9 % tad-dħul totali mit-taxxa tas-sisa fuq il-prodotti tat-tabakk; jiddispjaċih, madankollu, li m'hemmx ċifri preċiżi disponibbli għaliex l-istandards nazzjonali ta' rappurtaġġ ivarjaw ħafna;

8.

Jitlob biex issir analiżi ta' dejta uniformi fl-Istati Membri kollha bħala bażi għat-trasparenza u l-miżuri nazzjonali kontra l-frodi fiskali;

9.

Jiddispjaċih, li minħabba n-nuqqas ta' dejta miġbura f'livell nazzjonali, li ma jistax ikun evalwat sew la l-kobor veru tal-problema, u lanqas il-monitoraġġ tal-bidliet, kemm jekk pożittivi kif ukoll jekk negattivi;

10.

Jistieden lill-Kummissjoni biex tikkunsidra sistema armonizzata Ewropea għall-ġbir tad-dejta u li tipproduċi statistika dwar il-frodi fiskali, sabiex ssir evalwazzjoni ta' sa fejn iwassal il-fenominu li jkun korrett kemm jista' jkun;

11.

Ifakkar li l-eliminazzjoni tal-ekonomija informali ma tistax isseħħ mingħajr l-implimentazzjoni ta' inċentivi adattati; jissuġġerixxi, barra minn hekk, li l-Istati Membri għandhom jirrappurtaw, permezz tal-iskorbord ta' Liżbona, sa liema punt irnexxielhom inaqqsu l-ekonomiji informali tagħhom;

12.

Jinnota li l-frodi fiskali marbuta mal-VAT hija kwistjoni ta' preokkupazzjoni partikulari għat-tħaddim tas-suq intern peress li għandha impatt transkonfinali dirett, tinvolvi ammonti sostanzjali ta' telf ta' dħul u taffettwa l-baġit tal-UE b'mod dirett;

13.

Itenni li s-sistema attwali tal-VAT, imwaqqfa fl-1993, kellha tkun biss sistema tranżitorja u li l-Parlament kien talab lill-Kummissjoni biex tressaq proposti bil-għan li sa l-2010 tittieħed deċiżjoni finali dwar is-sistema definittiva tal-VAT;

14.

Isostni li flimkien, il-moviment ħieles tal-persuni, tal-oġġetti, tas-servizzi u tal-kapital fi ħdan is-suq intern mill-1993, kif ukoll l-avvanzi f'teknoloġija ġdida fir-rigward ta' oġġetti żgħar u ta' valur kbir, għamlu l-ġlieda kontra l-frodi tas-sistema tal-VAT aktar diffiċli, aktar u aktar minħabba l-kumplessità u l-istruttura frammentata tas-sistema attwali li tagħmilha diffiċli li t-tranżazzjonijiet jiġu ttraċċjati u għaldaqstant huwa aktar faċli biex wieħed jabbuża mis-sistema;

15.

Jinnota li qed jiżdiedu l-każi ta' frodi minn negozjanti mitlufin kif ukoll l-abbuż intenzjonat tas-sistema tal-VAT minn gruppi kriminali li jfasslu skemi biex japprofittaw min-nuqqasijiet fis-sistema; u jiġbed l-attenzjoni għall-każ ta' frodi karusell tal-VAT imnedija mill-Eurojust, li tinvolvi 18-il Stat Membru u frodi fiskali li jammontaw għal madwar EUR 2.1 biljun;

16.

Jappoġġja lill-Kummissjoni fl-isforzi tagħha biex iġġib bidla fundamentali fis-sistema attwali tal-VAT; jilqa' l-fatt li issa l-Istati Membri jqisu din il-kwistjoni bħala prijorità u jħeġġeġ lill-Istati Membri biex ikunu ppreparati li jieħdu miżuri sostantivi f'dan ir-rigward;

17.

Iqis li s-sistema attwali hija antikwata u teħtieġ bidla radikali bla ma jitqiegħed piż żejjed fuq in-negozjanti onesti minħabba l-burokrazija; huwa tal-fehma li ma jistax jinżamm l-istatus quo;

18.

Jinnota li f'sistema “reverse-charge”, il-VAT taqa' fuq il-klijent taxxabbli minflok fuq il-fornitur; jirrikonoxxi li din is-sistema għandha l-vantaġġ li tneħħi l-possibilità ta' frodi minn negozjanti mitlufin, billi l-persuna taxxabbli li tirċievi l-oġġetti titqies responsabbli għall-VAT;

19.

Jinnota li l-ħolqien ta' sistema ta' VAT doppja jmur kontra l-operat effiċjenti tas-suq intern u jkun is-sors ta' ambjent iktar kumpless li jista' jiskuraġġixxi l-investiment tan-negozji, u dan jista' jingħeleb biss fil-futur imbiegħed permezz ta' sistema “reverse charge” ġeneralizzata u obbligatorja, u mhux b'sistema mhux obbligatorja jew limitata għal xi fornimenti magħżula;

20.

Jinnota, barra minn hekk, li s-sistema “reverse charge” ma tippermettix pagamenti frazzjonati u li l-VAT totali titħallas biss fl-aħħar tal-katina ta' forniment, filwaqt li jitneħħa l-mekkaniżmu ta' awtokontroll tal-VAT; iwissi li jistgħu jitfaċċaw forom ġodda ta' frodi inklużi telf fiskali akbar fil-livell tan-negozji bl-imnut u l-użu ħażin tan-numri ta' reġistrazzjoni tal-VAT, u li l-ġlieda kontra frodi bħal din permezz ta' verifika addizzjonali tista' twassal għal piżijiet amministrattivi addizzjonali għan-negozjanti onesti; għaldaqstant iħeġġeġ il-kawtela u l-kunsiderazzjoni serja qabel ma tiddaħħal sistema “reverse charge”; jinnota, madankollu, li l-applikazzjoni ta' limitu minimu biex ikun illimitat ir-riskju ta' konsum finali mhux taxxat jgħin biex tiġi miġġielda l-frodi u jikkunsidra li l-limitu minimu ta' EUR 5 000 issuġġerit mill-Kunsill bħala raġonevoli;

21.

Jinnota, għalkemm jibqa' kawt u kritiku, li proġett pilota jista' jgħin lill-Istati Membri jifhmu aħjar ir-riskji inerenti tas-sistema “reverse charge”, u jħeġġeġ lill-Kummissjoni u lill-Istati Membri biex jistabbilixxu garanziji xierqa ħalli jiżguraw li la l-Istat Membru li qed jipparteċipa u lanqas xi Stat Membru ieħor ma jkun espost għal riskji kbar waqt li jkun fis-seħħ il-proġett pilota;

22.

Huwa tal-fehma li l-aqwa soluzzjoni biex tingħeleb il-frodi tal-VAT marbuta ma provvisti transkonfinali tkun li tiddaħħal sistema li fiha l-eżenzjoni tal-VAT għall-provvisti intrakomunitarji tkun sostitwita b'rata ta' tassazzjoni ta' 15 %; jinnota li dik is-sistema taħdem aħjar jekk il-varjetà u l-kumplessità tar-rati mnaqqsa jkunu ssimplifikati b'mod sostanzjali, filwaqt li jitnaqqas kemm jista' jkun il-piż amministrattiv kemm fuq in-negozji kif ukoll fuq l-awtoritajiet fiskali; jinnota li t-tnaqqis individwali tar-rati tal-VAT li daħal fis-seħħ qabel l-1992 għandu jiġi eżaminat bir-reqqa u evalwat biex isir magħruf jekk il-persistenza tiegħu hijiex ġustifikata fuq bażi ekonomika;

23.

Jirrikonoxxi li minħabba r-rati tal-VAT differenzjali, it-tassazzjoni tal-provvisti intrakomunitarji teħtieġ li jerġgħu jiġu bbilanċjati l-pagamenti bejn l-Istati Membri; iqis li dan l-ibbilanċjar mill-ġdid għandu jsir permezz ta' kamra tal-ikklerjar (clearing house)li tiffaċilita t-trasferiment tad-dħul bejn l-Istati Membri; jenfasizza li l-operat ta' kamra tal-ikklerjar huwa teknikament fattibbli;

24.

Huwa tal-fehma li sistema deċentralizzata ta' kmamar tal-ikklerjar tista' tkun iktar xierqa u tista' tkun żviluppata iktar malajr, sakemm tiftaħ il-possibiltajiet għall-Istati Membri biex jaqblu bilateralment dwar dettalji importanti, filwaqt li jitqiesu l-bilanċ kummerċjali individwali tagħhom, is-similaritajiet fit-tħaddim tas-sistema tal-VAT u l-mekkaniżmi tagħhom ta' kontroll kif ukoll il-fiduċja reċiproka;

25.

Jenfasizza li l-amministrazzjoni fiskali tal-Istat Membru tal-oriġini għandha tkun responsabbli biex tiġbor il-VAT mill-fornitur stabbilit fit-territorju tiegħu u biex tittrasferixxi l-ammont permezz tas-sistema ta' rilaxx lill-amministrazzjoni fiskali tal-pajjiż fejn sar l-akkwist intrakomunitarju; jirrikonoxxi li jeħtieġ li tinbena fiduċja reċiproka bejn l-amministrazzjonijiet fiskali;

26.

Jenfasizza li l-Istati Membri ma jistgħux jiġġieldu waħedhom kontra l-frodi fiskali transkonfinali; huwa tal-fehma li l-iskambju ta' informazzjoni u l-koperazzjoni bejn l-Istati Membri u mal-Kummissjoni ma kinux biżżejjed biex il-frodi fiskali tingħeleb b'mod effettiv kemm fir-rigward tal-kwalità kif ukoll fir-rigward tal-ħeffa; iqis li l-kuntatt dirett bejn l-uffiċċji lokali jew nazzjonali kontra l-frodi la hu żviluppat u lanqas implimentat biżżejjed, u dan iwassal għall-ineffiċjenza, għan-nuqqas ta' użu adegwat tal-ftehimiet għall-koperazzjoni amministrattiva u għad-dewmien fil-komunikazzjoni;

27.

Jinsisti li sabiex jitħares id-dħul fiskali tal-Istati Membri kollha fil-qafas tas-Suq Intern, l-Istati Membri għandhom jieħdu miżuri komparabbli kontra dawk li jwettqu l-frodi, indipendentement minn fejn ikun sar it-telf ta' dħul; jitlob lill-Kummissjoni sabiex tipproponi mekkaniżmi possibbli biex jippromwovu koperazzjoni ta' dan it-tip bejn l-Istati Membri;

28.

Jilqa' b'sodisfazzjon il-proposti tal-Kummissjoni għall-emenda tad-Direttiva tal-Kunsill 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud (2) u r-Regolament tal-Kunsill (KE) Nru 1798/2003 tas-7 ta' Ottubru 2003 dwar il-kooperazzjoni amministrattiva fil-qasam tat-taxxa fuq il-valur miżjud (3) sabiex mill-2010 'l quddiem jitħaffu l-ġbir u l-iskambju ta' informazzjoni dwar tranżazzjonijiet intrakomunitarji; jirrikonoxxi li r-regoli proposti dwar ir-rappurtaġġ fi żmien xahar se jżidu piż amministrattiv għan-negozji li jagħtu biss servizzi li bħalissa m'humiex suġġetti għal dik ir-regola, iżda jaċċetta li dan huwa meħtieġ minħabba l-possibiltà ta' frodi karużell f'ċerti servizzi;

29.

Iħeġġeġ lill-Kunsill biex jadotta l-miżuri proposti malajr u jistieden lill-Kummissjoni sabiex tressaq aktar proposti dwar l-aċċess awtomatizzat mill-Istati Membri l-oħra kollha għal xi informazzjoni mhux sensittiva li għandhom l-Istati Membri dwar il-persuni taxxabbli tagħhom stess (bħal fil-qasam tal-kummerċ, xi informazzjoni rigward il-fatturat), u dwar l-armonizzazzjoni tal-proċeduri għar-reġistrazzjoni u d-dereġistrazzjoni tal-persuni li jaqgħu taħt il-VAT biex jiżguraw li l-persuni taxxabbli foloz jinstabu u jiġu dereġistrati malajr; jenfasizza li l-Istati Membri għandhom jieħdu r-responsabilità biex iżommu l-informazzjoni tagħhom aġġornata, b'mod partikulari rigward id-dereġistrazzjoni u s-sejbien ta' reġistrazzjonijiet foloz;

30.

Ifakkar li l-pajjiżi li joffru taxxa preferenzjali fuq id-dħul (tax havens) jistgħu jirrappreżentaw ostakolu għall-implimentazzjoni tal-Istrateġija ta' Liżbona, jekk jagħmlu pressjoni eċċessiva biex inaqqsu r-rati tat-taxxa u, b'mod ġenerali, id-dħul mit-taxxa;

31.

Jenfasizza wkoll li fi żminijiet ta' dixxiplina baġitarja kwalunkwe erożjoni tal-bażi fiskali pprovokata mill-pajjiżi li joffru taxxa preferenzjali fuq id-dħul (tax havens) jew kompetizzjoni fiskali bla rażan jistgħu jipperikolaw il-kapaċità tal-Istati Membri biex jikkonformaw mal-Patt tal-Istabilità u t-Tkabbir;

32.

Jenfasizza li t-tneħħija tal-postijiet li joffru kenn mit-taxxa teħtieġ, inter alia, strateġija fuq tliet punti: l-indirizzar tal-evitar tat-taxxa, it-twessigħ tal-ambitu tad-Direttiva tal-Kunsill 2003/48/KE tat-3 ta' Ġunju 2003 dwar it-tassazzjoni ta' riżervi fuq id-dħul fil-forma ta' pagamenti ta' imgħaxx (4) u billi l-OECD tintalab biex, permezz tal-membri tagħha, timponi sanzjonijiet fuq il-postijiet li joffru kenn mit-taxxa li ma jikkoperawx;

33.

Jiddispjaċih li l-Istati Membri qed ifixklu r-riforma tad-Direttiva 2003/48/KE bl-oġġezzjonijiet ġodda kontinwi u tattiki ta' dewmien tagħhom u jħeġġeġ lill-Kummissjoni biex tressaq kemm jista' jkun malajr il-proposti tagħha minkejja s-sinjali ta' reżistenza;

34.

Jinnota li r-riforma tad-Direttiva 2003/48/KE għandha titratta l-lakuni u d-defiċjenzi varji tagħha, għax dawn ifixklu s-sejbien tal-evażjoni tat-taxxa u l-operazzjonijiet ta' frodi fiskali;

35.

Jitlob lill-Kummissjoni, fil-kuntest tar-riforma tad-Direttiva 2003/48/KE, biex teżamina l-għażliet għal riforma, kif ukoll tinvestiga t-twessiegħ tal-għan tad-direttiva f'dak li jirrigwarda t-tipi ta' entitajiet legali u s-sorsi ta' dħul finanzjarju;

36.

Iħeġġeġ sabiex l-Unjoni Ewropea iżżomm fl-aġenda t-tneħħija fuq livell globali tal-postijiet li joffru kenn mit-taxxa, wara li jitqiesu l-effetti ta' ħsara tagħhom fuq id-dħul fiskali tal-Istati Membri individwali; jistieden lill-Kunsill u lill-Kummissjoni biex jużaw kemm jistgħu l-qawwa kummerċjali tal-UE meta jinnegozjaw ftehimiet ta' kummerċ u ta' koperazzjoni mal-gvernijiet ta' pajjiżi li joffru taxxa preferenzjali fuq id-dħul (tax havens), sabiex jipperswaduhom ħalli jeliminaw dispożizzjonijiet u prattiki fiskali li jiffavorixxu l-evażjoni tat-taxxa u l-frodi fiskali; jilqa' b'sodisfazzjon, bħala l-ewwel pass, ir-rakkomandazzjonijiet imniżżla fil-konklużjonijiet tal-Kunsill wara l-laqgħa tiegħu tal-14 ta' Mejju 2008 biex fil-ftehimiet kummerċjali tiddaħħal klawżola dwar il-governanza tajba fi kwistjonijiet fiskali; jitlob lill-Kummissjoni biex tressaq klawżola ta' dan it-tip b'effett immedjat fin-negozjati tagħha tal-ftehimiet kummerċjali fil-ġejjieni;

37.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-gvernijiet u lill-parlamenti tal-Istati Membri.

4.12.2009   

MT

Il-Ġurnal Uffiċjali tal-Unjoni Ewropea

CE 295/19

A.

billi hemm aktar minn 100 miljun Ewropew ta' kull età, ta' kull twemmin u ta' kull nazzjonalità li jagħmlu l-volontarjat,

B.

billi stħarriġ tal-Ewrobarometru ppubblikat fi Frar 2007 wera' li 3 minn kull 10 persuni Ewropej jgħidu li huma attivi f'xogħol ta' volontarjat u li qrib it-80 % tan-nies iħossu li l-attivitajiet volontarji huma parti importanti fil-ħajja demokratika fl-Ewropa (3),

C.

billi s-settur tal-volontarjat jikkontribwixxi madwar 5 % tal-prodott gross domestiku tal-ekonomiji tal-Istati Membri, u jiżviluppa azzjonijiet innovattivi biex jidentifika u jirreaġixxi għall-bżonnijiet li jitfaċċaw fis-soċjetà,

D.

billi ċ-Ċentru Ewropew għall-Volontarjat, il-Forum Ewropew taż-Żgħażagħ, l-Assoċjazzjoni tal-Organizzazzjonijiet għas-Servizzi Volontarji, l-Organizzazzjoni Dinjija tal-Moviment tal-Iskawts, Is-Salib l-Aħmar/l-Uffiċċju tal-Unjoni Ewropea, il-volonteurope, il-Pjattaforma Ewropea għall-Anzjani (l-AGE), is-Solidar, il-Caritas Ewropea, l-ENGAGE, il-Johanniter Internazzjonali, l-Organizzazzjoni Ewropea mhux Governattiva tal-Isports u oħrajn — li flimkien jirrappreżentaw eluf ta' organizzazzjonijiet li jinvolvu miljun ta' voluntiera li kollha talbu lill-Istituzzjonijiet tal-Unjoni Ewropea biex iħabbru s-sena 2011 bħala s-Sena Ewropa tal-Volontarjat,

1.

Jistieden lill-Kummissjoni, appoġġjat mill-Istituzzjonijiet kollha tal-UE biex tħabbar is-sena 2011 bħala s-Sena Ewropea tal-Volontarjat;

2.

Jagħti istruzzjonijiet lill-President tiegħu biex jgħaddi din id-dikjarazzjoni, flimkien mal-lista tal-firmatarji, lill-Kummissjoni u lill-Kunsill.

4.12.2009   

MT

Il-Ġurnal Uffiċjali tal-Unjoni Ewropea

CE 295/21

A.

billi, il-Kummissjoni fil-White Paper tagħha “Impetu ġdid għaż-żgħażagħ Ewropej” (COM(2001)0681), li fiha l-Parlament eżamina r-riżoluzzjoni tiegħu tal-14 ta' Mejju 2002 (1), adottat l-objettiv li tiddedika aktar attenzjoni liż-żgħażagħ f'oqsma oħra ta' politika, speċjalment l-edukazzjoni u t-tagħlim tul il-ħajja, l-impjiegi, l-integrazzjoni soċjali, is-saħħa, l-awtonomija taż-żgħażagħ, il-mobilità, id-drittijiet fundamentali u n-non-diskriminazzjoni,

B.

billi l-Kunsill Ewropew tat-22 — 23 ta' Marzu 2005 adotta “Patt Ewropew għaż-Żgħażagħ” bħala wieħed mill-istrumenti li jikkontribwixxi għall-objettivi ta' Liżbona u ġedded l-impenn tiegħu f'Marzu 2008, fejn insista li hemm il-ħtieġa li jsir investiment fiż-żgħażagħ issa u fil-ġejjieni,

C.

billi l-Kummissjoni Ewropea rriflettiet il-ħtieġa li l-kwistjonijiet taż-żgħażagħ jiġu integrati orizzontalment fil-Komunikazzjoni tagħha tal-5 ta' Settembru 2007 dwar “Promozzjoni tal-parteċipazzjoni sħiħa taż-żgħażagħ fl-edukazzjoni, l-impjieg u s-soċjetà” (COM(2007)0498),

D.

billi hu adotta r-riżoluzzjonijiet tiegħu tad-19 ta' Ġunju 2007 dwar qafas regolatorju għal miżuri li jippermettu lin-nisa żgħażagħ fl-Unjoni Ewropea jgħaqqdu l-ħajja tal-familja ma' perjodu ta' studji (2) u tal-21 ta' Frar 2008 dwar il-futur demografiku tal-Ewropa (3), u b'hekk tiġi enfasizzata l-ħtieġa li ż-żgħażagħ jiġu meqjusa aktar,

1.

Jistieden lill-Kummissjoni biex tikkunsidra u tinkorpora l-impatt fuq iż-żgħażagħ u r-riżultati tad-djalogu strutturat li jsir mal-organizzazzjonijiet taż-żgħażagħ meta jkunu qed iħejju l-proposti leġiżlattivi, b'mod partikulari fl-oqsma ta' politiki msemmija fil-Premessa A;

2.

Jistieden lill-Istati Membri biex jiffokaw fuq iż-żgħażagħ meta jkunu qed jimplimentaw il-Programmi ta' Liżbona ta' Riformi Nazzjonali u biex iqisu liż-żgħażagħ fl-oqsma ta' politiki relevanti;

3.

Jagħti istruzzjonijiet lill-President tiegħu biex jgħaddi din id-dikjarazzjoni, flimkien ma'ismijiet tal-firmatarji, lill-Kunsill, lill-Kummissjoni u lill-Forum Ewropew taż-Żgħażagħ.

4.12.2009   

MT

Il-Ġurnal Uffiċjali tal-Unjoni Ewropea

CE 295/23

A.

billi l-ħtif ta' tifel jew tifla huwa fost l-aktar delitti inumani,

B.

billi t-twettiq ta' delitti bħal dawn qiegħed jiżdied fl-Ewropa u jista' jinvolvi ċ-ċaqliq tal-vittmi bejn il-fruntieri tal-istati,

C.

billi l-prospetti li tiġi salvata l-ħajja ta' tfal maħtufin jonqsu biż-żmien,

D.

billi m'hemm l-ebda sistema ta' twissija madwar l-Ewropa kollha għall-għajbien tat-tfal u lanqas xi sistemi lokali jew nazzjonali fil-parti l-kbira tal-Unjoni Ewropea,

1.

Jistieden lill-Istati Membri biex jintroduċu sistema ta' twissija għat-tfal li huma neqsin, li meta tkun attivata tkun teħtieġ li jiġu mgħoddija lill-mezzi ta' komunikazzjoni tal-aħbarijiet, lill-awtoritajiet tal-fruntieri u lill-aġenziji tad-dwana u tal-infurzar tal-liġi:

2.

Jistieden lill-Istati Membri biex jilħqu ftehimiet ta' koperazzjoni mal-pajjiżi kollha ġirien biex jiżguraw il-kapaċità li tingħata twissija ta' malajr fit-territorji kollha rilevanti;

3.

Jitlob li tiġi żviluppata organizzazzjoni komuni biex tipprovdi għajnuna u taħriġ lill-korpi nazzjonali;

4.

Jagħti istruzzjonijiet lill-President tiegħu biex jgħaddi din id-dikjarazzjoni, flimkien mal-ismijiet tal-firmatarji, lill-Kunsill u lill-Kummissjoni.

4.12.2009   

MT

Il-Ġurnal Uffiċjali tal-Unjoni Ewropea

CE 295/26

A.

billi l-UE għadha impenjata favur l-indipendenza, is-sovranità u l-integrità territorjali tal-Ġeorġja fil-konfini rikonoxxuti f'livell internazzjonali,

B.

billi t-tqassim tal-passaporti Russi liċ-ċittadini tal-Ossezja tan-Nofsinhar, l-appoġġ għall-moviment separatista kif ukoll iż-żieda fl-attivitajiet militari mis-separatisti kontra l-irħula b'popolazzjoni Ġeorġjana kabbru t-tensjoni fl-Ossezja tan-Nofsinhar, flimkien mal-manuvri militari kbar mir-Russja qrib il-fruntiera mal-Ġeorġja f'Lulju 2008,

C.

billi wara bosta ġimgħat ta' żieda fit-tensjoni u ġlied bejn il-partijiet u provokazzjonijiet min-naħa tal-forzi separatisti tal-Ossezja tan-Nofsinhar b'attakki bil-bombi, ġlied fatali, sparar u bombardamenti li kkawżaw il-mewt ta' bosta ċivili u l-feriment ta' ħafna oħrajn, fil-lejl ta' bejn is-7/8 ta' Awissu 2008 l-armata Ġeorġjana fetħet b'sorpriża attakk bl-artillerija fuq Tskhinvali segwit minn operazzjoni fuq l-art bl-użu kemm ta' tankijiet kif ukoll ta' suldati bil-għan li jerġa' jinkiseb il-kontroll tal-Ossezja tan-Nofsinhar,

D.

billi r-Russja rrispondiet immedjatament, wara tisħiħ militari twil, b'kontra-attakk kbir, billi bagħtet tankijiet tal-gwerra u infanterija, ibbumbardjat diversi nħawi fil-Ġeorġja, inkluż il-belt ta' Gori, u bblukkat il-portijiet Ġeorġjani fil-Baħar l-Iswed,

E.

billi madwar 158 000 persuna ġew imġiegħla jiċċaqalqu minħabba l-kriżi u kellhom jitilqu minn djarhom, u issa għandhom jiġu megħjuna fl-isforzi tagħhom li jmorru lura fi djarhom; billi l-preżenza ta' munizzjonijiet tat-tip “cluster”, artillerija li għadha ma splodietx u mini ta' kontra l-bniedem, kif ukoll it-twissijiet tar-Russja u n-nuqqas ta' koperazzjoni ifissru li ritorn bħal dan ikun perikoluż,

F.

billi l-infrastruttura tal-Ġeorġja ġarrbet ħsarat kbar minħabba l-azzjonijiet militari Russi u billi hemm bżonn ta' għajnuna umanitarja,

G.

billi r-riċerkaturi internazzjonali tad-drittijiet tal-bniedem u analisti militari iddokumentaw l-użu mit-truppi Russi ta' munizzjonijiet tat-tip “cluster” fil-Ġeorġja, li rriżulta f'eluf ta' biċċiet ta' artillerija li għadhom ma splodewx fiz-zoni ta' kunflitt; billi l-Ġeorġja amettiet ukoll li għamlet użu minn bombi tat-tip “cluster” fl-Ossezja tan-Nofsinhar qrib il-mina ta' Roki,

H.

billi fit-12 ta' Awissu 2008 l-Presidenti tal-Ġeorġja u tar-Russja impenjaw ruħhom bi ftehima fuq il-bażi ta' sforzi ta' medjazzjoni mill-UE li pprevediet il-waqfien mill-ġlied immedjat, l-irtirar tal-forzi Ġeorġjani u Russi għall-pożizzjonijiet li kellhom qabel is-7 ta' Awissu 2008 u l-bidu ta' taħditiet internazzjonali dwar mekkaniżmu internazzjonali li għandu jitwaqqaf minnufih sabiex jipprepara t-triq għal soluzzjoni paċifika u dejjiema għall-kunflitt,

I.

billi fid-19 ta' Awissu 2008 n-NATO ssospendiet ir-rabtiet regolari fl-ogħla livelli mar-Russja, u ddikjarat li l-azzjoni militari Russa kienet “sproporzjonata” u “inkonsistenti mal-irwol tagħha fiż-żamma tal-paċi fi nħawi tal-Ġeorġja” u li ma setgħetx tissokta l-attitudni ta' “kollox normali” sakemm it-truppi Russi jibqgħu fil-Ġeorġja,

J.

billi fit-22 ta' Awissu 2008 r-Russja rtirat it-tankijiet, l-artillerija u l-mijiet ta' truppi mill-aktar pożizzjonijiet avvanzati tagħhom fil-Ġeorġja, iżda għadha tikkontrolla l-aċċess għall-belt tal-port ta' Poti, lejn in-Nofsinhar tal-Abkażja, u l-Gvern Russu ħabbar li kien se jħalli t-truppi f'zona ta' sigurtà madwar l-Ossezja tan-Nofsinhar, billi jistabbilixxi tmien punti ta' kontroll fejn se jintbagħtu truppi Russi,

K.

billi fil-25 ta' Awissu 2008, il-kamra superjuri tal-parlament Russu adottat riżoluzzjoni li titlob lill-President jirrikonoxxi l-indipendenza tar-reġjuni seċessjonisti Ġeorġjani tal-Abkażja u tal-Ossezja tan-Nofsinhar, li, kienet segwita fis-26 ta' Awissu 2008 bid-deċiżjoni tal-President Dmitry Medvedev li r-Russja kienet se tirrikonoxxi formalment liż-żewġ reġjuni bħala stati indipendenti,

L.

billi dan il-kunflitt għandu implikazzjonijiet wiesgħa ħafna għall-istabilità u s-sigurtà fir-reġjun, li jmorru 'l hinn ħafna mir-relazzjoni diretta bejn il-partijiet kollha fil-kunflitt, bil-possibilità ta' riperkussjonijiet fuq ir-rabtiet bejn l-UE u r-Russja, fuq l-ENP, fuq ir-reġjun tal-Baħar l-Iswed u lil hinn minnu,

M.

billi l-Unjoni Ewropea għandha żżomm għaqda politika sħiħa b'reazzjoni għall-kriżi fil-Ġeorġja u għandha titkellem b'vuċi waħda, b'mod partikulari fir-relazzjonijiet mar-Russja; billi l-proċess lejn soluzzjoni paċifika u stabbli għall-kunflitti fil-Ġeorġja u fil-Kawkasu se jitlob reviżjoni komprensiva tal-Politika tal-Viċinanzi tal-UE u impenn ġdid fir-rigward tar-reġjun kollu, f'koperazzjoni mal-organizzazzjonijiet Ewropej u internazzjonali kollha, b'mod partikulari mal-OSCE,

N.

billi l-ġimgħa li għaddiet, il-Gvern Ġeorġjan waqqaf ir-relazzjonijiet diplomatiċi mar-Russja, u l-Federazzjoni Russa wieġbet għal dan billi għamlet l-istess,

1.

Huwa tal-opinjoni li ma jistax ikun hemm soluzzjoni militari għall-kunflitti fil-Kawkasu u jesprimi l-kundanna qawwija tiegħu ta' dawk kollha li għamlu użu mill-forza u mill-vjolenza sabiex ibiddlu s-sitwazzjoni fit-territorji seċessjonisti Ġeorġjani tal-Ossezja t'Isfel u tal-Abkażja;

2.

Jistieden lir-Russja biex tirrispetta s-sovranità u, l-integrità territorjali tar-Repubblika tal-Ġeorġja u l-invjolabilità tal-fruntieri rikonoxxuti internazzjonalment tagħha u għalhekk jikkundanna b'qawwa r-rikonoxximent min-naħa tal-Federazzjoni Russa tal-indipendenza tar-reġjuni seċessjonisti Ġeorġjani tal-Ossezja tan-Nofsinhar u tal-Abkażja għax imur kontra l-liġi internazzjonali;

3.

Jinnota li kwalunkwe deċiżjoni dwar l-istatus finali tal-Ossezja tan-Nofsinhar u l-Abkażja tkun tiddependi fuq ir-rispett tal-prinċipji bażiċi tal-liġi internazzjonali, inkluż l-Att Finali tal-Konferenza dwar is-Sigurta' u l-Kooperazzjoni fl-Ewropa tal-1975 (Att Finali ta' Ħelsinki), b'mod partikulari fir-rigward tar-ritorn tar-refuġjati u r-rispett għall-proprjetà tagħhom u l-garanziji u r-rispett tad-drittijiet tal-minoranzi;

4.

Jikkundanna l-azzjoni militari inaċċettabbli u sproporzjonata tar-Russja u l-inkursjoni tagħha 'l ġewwa ħafna fit-territorju Ġeorġjan, li tikser il-liġi internazzjonali; jenfasizza li m'hemmx raġunijiet leġittimi biex ir-Russja tinvadi l-Ġeorġja, biex tokkupa partijiet minnha u biex thedded li twaqqa' l-gvern ta' pajjiż demokratiku;

5.

Jiddeplora t-telf tal-ħajja u t-tbatija umana kkawżati mill-użu tal-forza b'mod indiskriminat min-naħat kollha involuti fil-kunflitt;

6.

Jesprimi tħassib serju dwar l-effett tal-mini Russi fuq l-attività soċjali u ekonomika tal-Ġeorġja, b'mod partikulari rigward l-isplużjoni tal-pont tal-ferrovija qrib Kaspi fuq il-linja ewlenija ferrovjarja li tieħu minn Tbilisi għal Poti fis-16 ta' Awissu 2008, u l-isplużjoni kkawżata lill-ferrovija tal-fjuwil ħdejn Gori fl-24 ta' Awissu 2008, li kienet qiegħda ġġorr żejt għall-esportazzjoni mill-Każakstan minn ġo Poti; jenfasizza li ż-żewġ azzjonijiet kisru l-impenn ta' waqfien mill-ġlied;

7.

Itenni t-twemmin konvint tiegħu fil-prinċipju li l-ebda pajjiż terz m'għandu veto kontra d-deċiżjoni sovrana ta' pajjiż ieħor li jissieħeb f'xi organizzazzjoni jew alleanza internazzjonali jew m'għandu d-dritt li jiddestabilizza gvern li jkun elett b'mod demokratiku;

8.

Jenfasizza li s-sħubija bejn l-Ewropa u r-Russja għandha tkun ibbażata fuq ir-rispett tar-regoli fundamentali tal-koperazzjoni Ewropea, osservati mhux bil-kliem biss iżda bl-eżempju;

9.

Ifaħħar il-Presidenza tal-UE għall-effiċjenza u l-ħeffa li bihom irreaġixxiet għall-kunflitt u l-għaqda murija mill-Istati Membri fil-medjazzjoni tagħhom bejn iż-żewġ partijiet, li ppermettielhom li jiffirmaw pjan ta' paċi għall-waqfien mill-ġlied; jilqa' b'sodisfazzjon f'dan ir-rigward il-konklużjonijiet tal-laqgħa straordinarja msemmija hawn fuq tal-Kunsill Ewropew;

10.

Iħeġġeġ bil-qawwa lir-Russja biex tosserva l-impenji kollha tagħha skond il-ftehim tal-waqfien mill-ġlied milħuq u ffirmat permezz tal-isforzi diplomatiċi tal-UE, li jibda bl-irtirar sħiħ u immedjat tat-truppi tagħha mill-Ġeorġja propja u bit-tnaqqis tal-preżenza militari tagħha fl-Ossezja tan-Nofsinhar u l-Abkażja għal forza Russa taż-żamma tal-paċi fiż-żewġ provinċji qabel faqqa' l-kunflitt; jikkundanna s-sakkeġġi mifruxa li saru mill-forzi ta' invażjoni Russi u l-merċenarji li kienu magħhom;

11.

Jitlob li titwettaq bħala kwistjoni ta' urġenza investigazzjoni internazzjonali indipendenti sabiex jiġu stabbiliti l-fatti u sabiex ċerti allegazzjonijiet isiru aktar ċari;

12.

Iħeġġeġ lil Ġeorġja, li rratifikat l-istatut ta' Ruma tal-Qorti Kriminali Internazzjonali (ICC), u lill-awtoritajiet Russi biex jagħtu l-appoġġ u jikkoperaw bis-sħiħ mal-Uffiċċju tal-Prosekutur tal-ICC rigward l-investigazzjoni tiegħu tal-ġrajjiet traġiċi u l-attakki kontra nies ċivili li saru matul il-kunflitt sabiex jiġu definiti r-responsabbiltajiet u jitressqu quddiem il-ġustizzja dawk li kienu responsabbli;

13.

Jistieden lill-awtoritajiet Russi u Ġeorġjani sabiex jipprovdu l-informazzjoni sħiħa dwar fejn il-forzi armati tagħhom tefgħu bombi tat-tip “cluster” sabiex jinbdew immedjatament l-operazzjonijiet għat-tneħħija ta' mini u sabiex jiġu evitati aktar vittmi innoċenti ċivili u sabiex jiffaċilitaw ir-ritorn sikur tal-popli spustati ;

14.

Jistieden lill-UE u lin-NATO u l-membri tagħha biex jużaw, fuq il-bażi ta' pożizzjoni komuni, il-possibiltajiet kollha ħalli jipperswadu lill-Gvern Russu biex jimxi mal-liġi internazzjonali, li hija l-kundizzjoni meħtieġa għal sehem responsabbli fil-komunità internazzjonali; ifakkar lir-Russja fir-responsabilità tagħha bħala setgħa tal-veto tan-NU fir-rigward ta' ordni globali għall-paċi;

15.

Jistieden lill-Kunsill u lill-Kummissjoni biex jirrevedu l-politika tagħhom mar-Russja, jekk din ma tissodisfax l-impenji tagħha skond il-ftehima tal-waqfien mill-ġlied; jilqa' b'sodisfazzjon, bħala konsegwenza, id-deċiżjoni tal-Kunsill Ewropew li jipposponi n-negozjati dwar il-Ftehima ta' Sħubija u Koperazzjoni sakemm it-truppi Russi ma jirtirawx għall-pożizzjonijiet tagħhom ta' qabel is-7 ta' Awissu 2008;

16.

Jistieden lill-Kummissjoni sabiex tipproponi ftehimiet ta' ffaċilitar tal-viżi u ta' riammissjoni mal-Ġeorġja talanqas ekwivalenti għal dawk għar-Russja;

17.

Jistieden lill-Istati Membri biex jirrevedu l-ħruġ tal-viżi għal attivitajiet ekonomiċi bbażati fl-Ossezja tan-Nofsinhar u l-Abkażja;

18.

Jikkundanna bil-qawwa l-qlugħ furzat ta' Ġeorġjani mill-Ossezja tan-Nofsinhar u mill-Abkażja u jappella lill-awtoritajiet de facto tal-Ossezja tan-Nofsinhar u tal-Abkażja sabiex jiggarantixxu r-ritorn sikur tal-popolazzjoni ċivili mċaqalqa, skond il-liġi umanitarja internazzjonali;

19.

Jilqa' b'sodisfazzjon l-inizjattivi meħuda mill-OSCE sabiex iżżid in-numru ta' osservaturi mhux armati; jappella sabiex il-Missjoni tal-OSCE fil-Ġeorġja tkompli tissaħħaħ, b'moviment ħieles sħiħ fil-pajjiż, u jħeġġeġ lill-Istati Membri tal-UE sabiex jikkontribwixxu favur dawn l-isforzi;

20.

Jitlob li jkun hemm kontribut b'saħħtu min-naħa tal-Unjoni Ewropea għall-mekkaniżmu internazzjonali ppjanat għas-soluzzjoni tal-kunflitt, u għaldaqstant jilqa' b'sodisfazzjon d-deċiżjoni tal-Kunsill Ewropew li tintbagħat missjoni ta' monitoraġġ tal-ESDP (Politika ta' Sigurtà u ta' Difiża Ewropea) biex tikkumplementa lill-missjonijiet tan-NU u tal-OSCE u sabiex jitlob għal mandat tan-NU jew tal-OSCE għal missjoni ta' paċi tal-ESDP;

21.

Jilqa' b'sodisfazzjon l-appoġġ attiv u kontinwu tal-UE għall-isforzi internazzjonali kollha biex tinstab soluzzjoni aħħarija u ta' paċi għall-kunflitt, b'mod partikulari l-impenn tal-Kunsill li jappoġġja l-isforzi kollha tan-NU u tal-OSCE u sforzi oħrajn biex tinstab soluzzjoni għall-kunflitt; jilqa' b'sodisfazzjon b'mod partikulari d-deċiżjoni li jinħatar Rappreżentant Speċjali tal-UE għall-kriżi fil-Ġeorġja;

22.

Jilqa' b'sodisfazzjon il-pakkett ta' għajnuna umanitarja rapida ta' EUR 6 miljun mill-Kummissjoni għall-popolazzjoni ċivili, li jrid jiġi msaħħaħ b'aktar fondi fuq il-bażi ta' evalwazzjoni tal-ħtiġijiet fil-post; jinnota l-ħtieġa urġenti ta' għajnuna għall-bini mill-ġdid wara l-kunflitt;

23.

Jilqa' b'sodisfazzjon id-deċiżjoni tal-Kunsill li jlaqqa' konferenza tad-donaturi internazzjonali għar-rikostruzzjoni tal-Ġeorġja, u jħeġġeġ lill-Kunsill u lill-Kummissjoni biex jeżaminaw il-possibilità ta' pjan ewlieni tal-UE ħalli jingħata appoġġ finanzjarju għall-bini mill-ġdid taz-zoni affettwati tal-Ġeorġja u biex tiġi stabbilita preżenza politika aktar qawwija tal-UE fil-pajjiż u fir-reġjun kollu;

24.

Jistieden lill-partijiet kollha fil-kunflitt biex jippermettu aċċess sħiħ u bla tfixkil għall-għajnuna umanitarja lill-vittmi, inklużi r-refuġjati u l-persuni spustati internament;

25.

Huwa tal-fehma li t-tiftix għas-soluzzjonijiet tal-kunflitt fil-Ġeorġja, flimkien mal-kunflitti l-oħra li għadhom bla soluzzjoni fil-Kawkasu tan-Nofsinhar, se jibbenefika minn internazzjonalizzazzjoni ikbar tal-mekkaniżmi tas-soluzzjoni tal-kunflitti; jipproponi għalhekk li l-UE tlaqqa' “Konferenza għall-Paċi madwar il-Kawkasu” bħala element ewlieni f'dan il-proċess; iqis li konferenza bħal din għandha tiddiskuti l-garanziji internazzjonali dwar ir-rispett sħiħ għad-drittijiet ċivili u politiċi u l-promozzjoni tad-demokrazija permezz tal-istat tad-dritt internazzjonali; jenfasizza li l-konferenza għandha tipprovdi wkoll opportunità biex tinstemal-vuċi tal-gruppi mhux irrappreżentati jew li kienu mġiegħla ma jsemmgħux leħinhom fir-reġjun tal-Kawkasu;

26.

Jistieden lill-Kunsill u lill-Kummissjoni biex ikomplu jiżviluppaw l-ENP billi jadattawha aħjar għall-ħtiġijiet tas-sieħba tagħna tal-Lvant, fosthom bit-tisħiħ tal-involviment tal-UE fir-reġjun tal-Baħar l-Iswed, biex jilqgħu l-proposta tal-Parlament għal Zona Ekonomika Ewropea Plus jew il-proposta Żvediża-Pollakka għal Sħubija tal-Lvant u biex iħaffu t-twaqqif ta' zona ta' kummerċ ħieles, b'mod partikulari rigward il-Ġeorġja, l-Ukrajna u r-Repubblika tal-Moldova; jinnota li l-liberalizzazzjoni tal-politika tal-UE dwar il-viża lejn dawn il-pajjiżi għandha tqis il-fatt li r-Russja ngħatat kundizzjonijiet aħjar minn tagħhom f'din iz-zona;

27.

Jenfasizza l-interrelazzjoni ta' numru ta' problemi fir-reġjun tan-Nofsinhar tal-Kawkasu u l-ħtieġa ta' soluzzjoni komprensiva f'forma ta' patt ta' stabilità, bl-involviment tal-atturi esterni ewlenin; jenfasizza l-ħtieġa li tissaħħaħ il-koperazzjoni mal-pajjiżi ġirien tal-Baħar l-Iswed billi jitwaqqaf mekkaniżmu istituzzjonali u multilaterali speċjali bħal Unjoni għall-Baħar l-Iswed, u billi tiġi organizzata konferenza internazzjonali ta' sigurtà u koperazzjoni dwar ir-reġjun tan-Nofsinhar tal-Kawkasu; għaldaqstant jitlob lill-Kummissjoni sabiex tressaq proposta speċifika lill-Parlament u lill-Kunsill dwar it-twaqqif ta' qafas multilaterali għar-reġjun tal-Baħar l-Iswed, inklużi t-Turkija u l-Ukrajna; iqis li pajjiżi ġirien bħall-Każakhstan għandhom ikunu involuti, fl-interess tal-istabilità u l-flussi tal-enerġija tar-reġjun kollu;

28.

Ifakkar li fis-Samit ta' Bukarest tat-3 ta' April 2008 , in-NATO qablet li l-Ġeorġja ssir membru tal-Alleanza;

29.

Jisħaq fuq l-importanza tal-Ġeorġja biex titjieb is-sigurtà tal-enerġija fl-UE billi tipprovdi alternattiva għar-rotta tal-ġarr tal-enerġija Russa; iqis li jkun kruċjali li l-infrastruttura eżistenti, bħall-pajp taż-żejt Baku-Tbilisi-Ceyhan, tkun imħarsa b'mod effikaċi, u jistieden lill-Kummissjoni biex toffri l-assistenza kollha meħtieġa lill-Ġeorġja għal dan il-għan; jistenna impenn qawwi min-naħa tal-UE biex tkompli taħdem fuq il-proġett tal-pajp taż-żejt Nabucco, li jaqsam it-territorju tal-Ġeorġja, u li jirrappreżenta l-alternattiva l-aktar serja għall-proġetti li saru b'koperazzjoni mar-Russja li kollha jistgħu jżidu d-dipendenza ekonomika u politika tal-Istati Membri fuq ir-Russja;

30.

Jistieden lill-Kunsill u lill-Kummissjoni sabiex ikomplu bl-isforzi tagħhom biex jadottaw il-politika komuni tal-UE rigward l-enerġija li, inter alia, tipprovdi għall-ħtieġa li jkunu ddiversifikati s-sorsi tal-provvista;

31.

Huwa tal-fehma li l-koperazzjoni fin-Nofsinhar tal-Kawkasu m'għandhiex tkun dwar zoni ta' influenza reċiprokament esklussivi bejn l-UE u r-Russja (l-hekk imsejħa 'sferi ta' interess');

32.

Hu tal-fehma li l-irwol tal-UE fil-kriżi attwali jenfasizza l-bżonn li tissaħħaħ il-politika Ewropea barranija, tad-difiza u tas-sigurtà, u jemmen li t-Trattat ta' Liżbona, li jinkludi l-ħolqien tal-pożizzjoni ta' Rappreżentant Għoli, il-klawsola ta' solidarjetà u l-Politika tas-Sigurtà tal-Enerġija tal-UE, jirrappreżenta l-mod it-tajeb biex dan isir;

33.

Jenfasizza l-ħtieġa li titħares l-istabilità tar-reġjun tan-Nofsinhar tal-Kawkasu u jistieden lill-Gvernijiet tal-Armenja u tal-Ażerbajġan sabiex jikkontribwixxu lejn l-ilħuq ta' dan l-għan, filwaqt li jirrispettaw l-impenji internazzjonali kollha tagħhom;

34.

Jafferma mill-ġdid il-prinċipju li l-governanza pluralistika u demokratika, b'partiti ta' oppożizzjoni li jaħdmu u bir-rispett għad-drittijiet tal-bniedem u ċivili, huwa l-aħjar garanzija ta' stabilità fir-reġjun kollu tan-Nofsinhar tal-Kawkasu;

35.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Istati Membri, lill-Presidenti u lill-Parlamenti tal-Ġeorġja u tal-Federazzjoni Russa, lin-NATO, lill-OSCE u lill-Kunsill tal-Ewropa.

4.12.2009   

MT

Il-Ġurnal Uffiċjali tal-Unjoni Ewropea

CE 295/31

A.

billi l-Abbozz tal-Qafas Komuni ta' Referenza akkademiku (DCFR) (8) tressaq lill-Kummissjoni lejn l-aħħar tal-2007,

B.

billi d-DCFR attwalment jinsab għaddej minn proċess ta' evalwazzjoni minn netwerk ta' bosta gruppi akkademiċi, li fosthom l-“Association Henri Capitant des amis de la culture juridique francaise” u s-“Société de législation compareé” diġà ppubblikaw “Principes contractuels communs” u “Terminologie contractuelle commune” (9),

C.

billi l-Kummissjoni nediet proċess intern ta' selezzjoni bil-għan li jiġu identifikati liema partijiet tad-DCFR se jiġu integrati fid-dokument li ġej, eż. White Paper tal-Kummissjoni dwar Qafas Komuni ta' Referenza (CFR),

D.

billi d-DCFR huwa sempliċement dokument akkademiku u l-għażla possibbli ta' liema partijiet tad-DCFR għandhom ikunu integrati fid-Dokument tal-Kummissjoni li ġej huwa eżerċizzju politiku kbir,

1.

Jilqa' b'sodisfazzjon il-preżentazzjoni tad-DCFR u jistenna d-DCFR akkademiku finali li għandu jitressaq lill-Kummissjoni sa l-aħħar ta' Diċembru 2008;

2.

Jistieden lill-Kummissjoni biex tressaq pjan preċiż u trasparenti dwar kif se jkun organizzat il-proċess ta' għażla li għandu jwassal għad-dokument tal-Kummissjoni u kkordinat b'mod partikulari fir-rigward tad-Direttorati Ġenerali (DGs) kollha involuti;

3.

Jistieden lill-Kummissjoni biex tiżgura li l-DCFR ikun disponibbli fl-aktar numru ta' lingwi rilevanti possibbli sabiex l-aċċessibilità tkun żgurata għall-partijiet kollha kkonċernati;

4.

Jistieden lill-Kummissjoni biex tqis li tassenja l-proġett lid-DĠ għall-Ġustizzja, il-Libertà u s-Sigurtà bl-involviment sħiħ tad-Dgs rilevanti kollha l-oħra, ladarba is-CFR imur sew lil hinn mil-liġi tal-konsumatur dwar il-kuntratti, u biex il-materjali u r-riżorsi umani meħtieġa jkunu disponibbli;

5.

Jinnota li d-dokument tal-Kummissjoni se jkun il-bażi għad-deċiżjoni tal-Istituzzjonijiet Ewropej u tal-partijiet kollha interessati dwar l-iskop fil-ġejjieni tas-CFR, il-kontenut u l-effett legali tiegħu, li jista' jvarja minn għodda leġiżlattiva li ma torbotx sal-ħolqien ta' strument fakultattiv fil-liġi Ewropea dwar il-kuntratti;

6.

Iqis li, indipendentement mill-forma tas-CFR fil-ġejjieni, għandhom jittieħdu miżuri li jiżguraw li dan ikun regolarment aġġornat sabiex jirrifletti l-bidliet u l-iżviluppi nazzjonali fil-liġi dwar il-kuntratti;

7.

Jinnota li meta jkunu qed jittieħdu xi deċiżjonijiet dwar il-kontenut tas-CFR, il-Kummissjoni għandha żżomm f'moħħha l-istqarrija tal-Kunsill tat-18 ta' April 2008 li s-CFR għandu jkun “għodda għal tfassil aħjar tal-liġijiet” li toħloq “sett ta' linji gwida li ma jorbtux li għandhom jintużaw mil-leġiżlaturi fil-livell Komunitarju”;

8.

Jissuġġerixxi li, jekk dan ikun il-każ, is-CFR għandu jkun kemm jista' jkun wiesa' u li jista' ma jkunx hemm bżonn li jkun eskluż xi kontenut jew materjal f'dan l-istadju;

9.

Jenfasizza għal darb'oħra li r-riżultat tal-workshops reċenti dwar is-CFR għandu jiġi rifless f'kull proċess ta' selezzjoni; jenfasizza li l-konsultazzjonijiet li għad isiru'l quddiem għandhom ikunu wiesgħa u għandhom jiggarantixxu sehem ibbilanċjat min-naħa tal-partijiet interessati kollha;

10.

Jissuġġerixxi li jekk użat bħala għodda leġiżlattiva li ma torbotx, il-partijiet rilevanti tas-CFR għandhom ikunu mehmuża ma' kull proposta jew komunikazzjoni leġiżlattiva fil-ġejjieni mill-Kummissjoni li tolqot il-liġi dwar il-kuntratti, sabiex tiżgura li din tqis il-leġiżlatura tal-Komunità;

11.

Jinnota li, meta tittieħed deċiżjoni dwar il-kontenut tas-CFR, il-Kummissjoni għandha tiftakar li s-CFR jista' jmur sew lil hinn minn sempliċement għodda leġiżlattiva u jista' jwassal għal strument fakultattiv;

12.

Jissuġġerixxi li, jekk il-format futur tas-CFR probabbli jkun dak ta' strument fakultattiv, dan għandu jkun ristrett għal dawk l-oqsma fejn il-leġiżlatur tal-Komunità kien attiv jew probabbli li jkun attiv fil-futur qrib, jew li huma marbuta mill-qrib mal-liġi dwar il-kuntratti; jissuġġerixxi li kull strument fakultattiv ikun ibbażat fuq id-DCFR; jikkunsidra li f' kull ċirkostanza, għandha tingħata attenzjoni biex ikun żgurat li l-koerenza ġenerali tal-istrument fakultattiv ma tkunx kompromessa mill-proċess ta' selezzjoni;

13.

Jinsisti li l-Parlament għandu jkun ikkonsultat bis-sħiħ u involut f'kull proċess ta'għażla li jwassal għad-dokument li ġej tal-Kummissjoni dwar is-CFR;

14.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni u lill-Kunsill.

4.12.2009   

MT

Il-Ġurnal Uffiċjali tal-Unjoni Ewropea

CE 295/33

A.

billi l-Artikolu 195 tat-Trattat KE jagħti s-setgħa lill-Ombudsman Ewropew li jirċievi lmenti minn kull ċittadin tal-Unjoni rigward sitwazzjonijiet ta' amministrazzjoni ħażina fl-attivitajiet tal-istituzzjonijiet jew tal-korpi Komunitarji,

B.

billi l-ilmenti li jitressqu miċ-ċittadini jikkostitwixxu sors importanti ta' informazzjoni dwar il-possibilità ta' ksur tal-liġi Komunitarja,

C.

billi skont l-Artikolu 211 tat-Trattat KE, il-Kummissjoni fl-irwol tagħha bħala gwardjana tat-Trattati hija responsabbli milli tiżgura li d-dispożizzjonijiet tat-Trattat u l-miżuri meħuda mill-istituzzjonijiet skont it-Trattat jiġu applikati,

D.

billi, skont l-ewwel paragrafu tal-Artikolu 226 tat-Trattat KE, jekk il-Kummissjoni tqis li Stat Membru naqas milli jissodisfa obbligu skont it-Trattat, din “għandha” tressaq opinjoni mmotivata dwar il-kwistjoni wara li tagħti lill-Istat ikkonċernat l-opportunità li jressaq l-osservazzjonijiet tiegħu u billi, skont it-tieni paragrafu ta' dak l-Artikolu, jekk l-Istat ikkonċernat ma jikkonformax mal-opinjoni fil-limitu ta' żmien stipulat mill-Kummissjoni, din “tista'” tressaq il-kwistjoni quddiem il-Qorti tal-Ġustizzja,

E.

billi l-Ombudsman, fid-Deċiżjoni tiegħu dwar l-ilment 995/98/OV, kien diġà enfasizza li, avolja l-Kummissjoni għandha s-setgħat ta' diskrezzjoni rigward il-ftuħ ta' proċeduri ta' ksur, dawn madankollu huma suġġetti għal limiti legali “stabbiliti mill-każistika tal-Qorti tal-Ġustizzja li titlob li, pereżempju, l-awtoritajiet amministrattivi jaġixxu b'mod konsistenti u f'bonafidi, jevitaw id-diskriminazzjoni, jikkonformaw mal-prinċipji tal-proporzjonalità, tal-ugwaljanza u tal-aspettattivi leġittimi u jirrispettaw id-drittijiet tal-bniedem u l-libertajiet fundamentali”,

F.

billi l-Kummissjoni enfasizzat li dan l-irwol huwa essenzjali għall-interessi taċ-ċittadini Ewropej, u rrikonoxxiet l-importanza tal-istat tad-dritt f'dan il-kuntest (3),

G.

billi l-Kummissjoni tikkonferma li l-Komunikazzjoni tagħha msemmija hawn fuq tal-20 ta' Marzu 2002 tistabbilixxi l-miżuri amministrattivi għall-benefiċċju tal-kwerelant li l-Kummissjoni timpenja ruħa li tkun konformi magħhom meta tittratta l-ilment tiegħu jew tagħha u tevalwa l-ksur ikkonċernat,

H.

billi l-Ombudsman jikkunsidra li n-nuqqas tal-Kummissjoni li tieħu deċiżjoni dwar pożizzjoni definittiva fir-rigward tal-ilment ta' ksur tal-kwerelant, jikkostitwixxi sitwazzjoni ta' amministrazzjoni ħażina,

I.

billi r-rakkomandazzjoni tal-Ombudsman lill-Kummissjoni hi li din għandha tindirizza l-ilment tal-kwerelant kemm jista' jkun malajr u b'diliġenza,

1.

Japprova r-rakkomandazzjoni tal-Ombudsman Ewropew lill-Kummissjoni;

2.

Jenfasizza li l-mod kif il-Kummissjoni tittratta lmenti mressqa minn ċittadini li fihom ikun sar allegat ksur tal-liġi Komunitarja minn Stat Membru, għandu dejjem ikun konformi mal-prinċipji ta' amministrazzjoni tajba;

3.

Jiġbed l-attenzjoni li, fil-Komunikazzjoni tal-20 ta' Marzu 2002 tagħha msemmija hawn fuq il-Kummissjoni daħlet għal ċertu impenji fir-rigward ta' kif hi tittratta lmenti ta' ksur;

4.

Jiġbed l-attenzjoni li l-Kummissjoni, fil-Komunikazzjoni tagħha, indikat li bħala regola ġenerali se tiddeċiedi jekk tiftaħx proċeduri ta' ksur jew jekk tagħlaqx fajl fi żmien sena mid-data ta' reġistrazzjoni tal-ilment u li se tinforma lill-kwerelant bil-miktub meta dan il-limitu ta' żmien jinqabeż;

5.

Jaċċetta l-fatt li f'każijiet diffiċli u kkumplikati, l-investigazzjonijiet tal-Kummissjoni jistgħu jieħdu aktar minn sena; madankollu meta jinqabeż il-limitu ta' sena, iqis li dan għandu jkun iġġustifikat biss jekk l-investigazzjonijiet ikunu għadhom verament għaddejjin;

6.

Jinnota li fil-każ attwali rigward in-nuqqas min-naħa tal-Gvern Ġermaniż sabiex jimplimenta kif xieraq id-Direttiva dwar il-Ħin tax-Xogħol (4), il-Kummissjoni kellha l-ħsieb li tittratta mal-kwerelant fid-dawl tal-proposta tagħha għal emenda tad-Direttiva u ddeċidiet li tistenna r-riżultat tad-diskussjonijiet dwar il-proposta mal-istituzzjonijiet l-oħra tal-Komunità;

7.

Ifakkar li din il-proposta tressqet f'Settembru 2004 u li m'hemm l-ebda evidenza li l-Kummissjoni ħadet aktar passi minn dakinhar sabiex tipproċedi bl-investigazzjoni tagħha;

8.

Jinnota li minflok ma ħadet waħda minn żewġ deċiżjonijiet possibbli — jew li tagħti bidu għal proċeduri formali ta' ksur jew li tagħlaq il-każ — il-Kummissjoni astjeniet milli tieħu kwalunkwe azzjoni oħra fir-rigward tal-investigazzjoni tagħha;

9.

Huwa tal-opinjoni li l-liġi Komunitarja ma tipprevedix il-possibilità li jiġu injorati liġijiet u sentenzi eżistenti fuq il-bażi li qed jiġu kkunsidrati regoli ġodda; jiġbed l-attenzjoni li l-Kummissjoni naqset ukoll li titratta kwistjonijiet fl-ilment li m'humiex relatati mal-bidliet proposti għad-Direttiva applikabbli;

10.

Jirrikonoxxi li l-Kummissjoni għandha ċerti poteri ta' diskrezzjoni rigward l-immaniġġjar tal-ilmenti u l-proċeduri ta' ksur, b'mod partikulari rigward it-tressiq ta' kwistjonijiet quddiem il-Qorti tal-Ġustizzja, iżda jirrimarka li l-Artikolu 226 tat-Trattat KE jistipula li l-Kummissjoni għandha tibda l-fażi ta' qabel il-litigazzjoni jekk tqis li Stat Membru naqas milli jissodisfa obbligu skont it-Trattat;

11.

Huwa tal-fehma li dawk is-setgħat ta' diskrezzjoni huma wkoll suġġetti għal limiti legali stipulati mill-prinċipji ġenerali tal-liġi amministrattiva, kif stabbiliti mill-każistika tal-Qorti tal-Ġustizzja, u m'għandhomx imorru lil hinn mil-limiti indikati mill-Kummisjoni nnifisha fil-komunikazzjoni tagħha msemmija hawn fuq tal-20 ta' Marzu 2002;

12.

Jerġa' jtenni t-tħassib tiegħu dwar l-ammont ta' żmien mhux iġġustifikat u eċċessiv — li ħafna drabi jestendi għal diversi snin — li l-Kummissjoni tieħu biex issegwi u tikkonkludi proċeduri ta' ksur u n-nuqqas ta' sodisfazzjon tiegħu għall-eżempji spissi ta' nuqqas ta' konformità ta' Stati Membri mad-deċiżjonijiet tal-Qorti tal-Ġustizzja; iqis li dan idgħajjef il-kredibilità tat-tfassil u l-applikazzjoni koerenti tal-liġi tal-Komunità u li jservi sabiex jiskredita l-għanijiet tal-UE;

13.

Għal darb'oħra jenfasizza l-irwol importanti tal-Istati Membri li jimplimentaw b'mod korrett il-leġiżlazzjoni Komunitarja, u jenfasizza l-fatt li l-applikazzjoni prattika tagħha hija deċiżiva għall-għanijiet taż-żieda tar-relevanza tal-Unjoni Ewropea għaċ-ċittadini tagħha;

14.

Jitlob lill-Kummissjoni sabiex tipprovdi lista bl-Istati Membri li l-leġiżlazzjoni tagħhom għadha mhix fuq l-istess linja mad-dispożizzjonijiet kollha tad-Direttiva dwar il-Ħin tax-Xogħol u sabiex tispeċifika l-azzjoni li qed tieħu f'dan ir-rigward; iħeġġeġ lill-Kummissjoni sabiex tieħu azzjoni immedjata, skont il-prerogattivi tagħha, f'kull każ u f'kull Stat Membru fejn it-traspożizzjoni jew l-implimentazzjoni tad-direttiva ma jikkonformawx mal-liġi stipulata mil-leġiżlatura u mill-Qorti tal-Ġustizzja;

15.

Iħeġġeġ lill-Kummissjoni biex tanalizza minnufih il-liġi l-ġdida Ġermaniża adottata fl-1 ta' Jannar 2004, u li daħlet fis-seħħ fl-1 ta' Jannar 2007, sabiex tistabbilixxi jekk din il-liġi hix konformi mad-dispożizzjoniet kollha tad-Direttiva dwar il-Ħin tax-Xogħol u mas-sentenzi applikabbli kollha tal-Qorti tal-Ġustizzja; jenfasizza l-bżonn li l-Kummissjoni teżamina d-dettalji tal-implimentazzjoni ta' din id-Direttiva;

16.

Jinnota li l-Kummissjoni għadha kemm irrevediet il-linjigwida tagħha dwar il-proċeduri ta' ksur; minn dan id-dokument, jifhem li lista ta' deċiżjonijiet se tiġi pprovduta minn qabel lir-Rappreżentanti Permanenti u lill-Istati Membri u li l-istqarrijiet lill-istampa dwar deċiżjonijiet ta' ksur adottati jistgħu joħorġu dakinhar tal-adozzjoni formali; mandankollu jinnota li ma saret l-ebda dispożizzjoni sabiex jiġi infurmat il-Parlament jew il-kumitati responsabbli tiegħu;

17.

Jerġa' jtenni t-talba urġenti tiegħu lill-Kummissjoni sabiex iżżomm lill-Parlament, u b'mod partikolari lill-Kumitat għall-Petizzjonijiet tiegħu, infurmat b'mod sħiħ f'kull stadju tal-proċedura dwar deċiżjonijiet fil-fajls ta' ksur;

18.

Jenfasizza li skont l-Artikolu 230 tat-Trattat KE, il-Parlament għandu d-dritt li jressaq azzjonijiet quddiem il-Qorti tal-Ġustizzja bl-istess kundizzjonijiet bħall-Kunsill u l-Kummissjoni u li l-Parlament, skont l-Artikolu 201 tat-Trattat, għandu s-setgħa li jeżerċita kontroll fuq l-attivitajiet tal-Kummissjoni.

19.

Iħeġġeġ ukoll lill-Istati Membri kollha, fid-dawl ta' dak li ntqal hawn fuq, biex japplikaw bis-sħiħ in-normi kollha dwar is-saħħa u s-sikurezza fuq il-post tax-xogħol skont il-prinċipju li, f'każ ta' dubju, l-interpretazzjoni prevalenti għandha tkun dik li tiffavorixxi l-aktar is-saħħa u s-sikurezza tal-ħaddiema (in dubio pro operario).

20.

Jitlob lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni u lill-Ombudsman Ewropew.

4.12.2009   

MT

Il-Ġurnal Uffiċjali tal-Unjoni Ewropea

CE 295/35

A.

billi l-ugwaljanza bejn in-nisa u l-irġiel tikkostitwixxi prinċipju fundamentali tal-UE, rikonoxxut mit-Trattat li jistabbilixxi l-Komunità Ewropea u mill-Karta tad-Drittijiet Fundamentali tal-Unjoni Ewropea, u billi minkejja l-progress sinifikanti li sar f'dan il-qasam, għad fadal ħafna inugwaljanzi bejn in-nisa u l-irġiel,

B.

billi l-vjolenza kontra n-nisa hi xkiel ewlieni għall-ugwaljanza bejn in-nisa u l-irġiel u hi waħda mill-vjolazzjonijiet l-aktar mifruxa tad-Drittijiet tal-Bniedem, li ma taf l-ebda limiti ġeografiċi, ekonomiċi jew soċjali; billi l-għadd ta' nisa li huma vittmi tal-vjolenza hu allarmanti,

C.

billi t-terminu “vjolenza kontra n-nisa” jindika l-atti kollha ta' vjolenza diretti kontra s-sess femminili u li jikkawżaw jew jistgħu jikkawżaw lin-nisa ħsara jew tbatija fiżika, sesswali jew psikoloġika, inkluża t-theddida ta' atti ta' dan it-tip, il-limitazzjoni jew il-privazzjoni arbitrarja tal-libertà, kemm jekk tkun fil-ħajja privata jew fil-ħajja pubblika,

D.

billi t-traffikar tal-bnedmin għal finijiet ta' sfruttament sesswali hu vjolazzjoni inaċċettabbli tad-Drittijiet tal-Bniedem, u huwa forma moderna ta' skjavitù marbuta mill-qrib ma' forom oħra ta' kriminalità, li tagħmel ħsara kbira għall-isforzi kollha li jsiru biex tiġi żgurata l-ugwaljanza bejn in-nisa u l-irġiel,

E.

billi l-promozzjoni ta' politika imprenditorjali ta' flessibilità fis-suq tax-xogħol m'għandhiex tkun primarjament orjentata lejn il-bżonnijiet tal-intrapriżi jew tal-amministrazzjonijiet pubbliċi, imma għandha l-ewwel nett tkun immirata lejn iż-żmien li n-nisa u l-irġiel għandhom bżonn biex jassumu bis-serjetà r-responsabilitajiet rispettivi tagħhom fi ħdan il-familja,

F.

billi la l-linji ta' gwida speċifiċi dwar is-sessi u lanqas il-pilastru tal-opportunitajiet indaqs ma baqgħu fl-istrateġija Ewropea għall-impjieg,

G.

billi d-differenzi bejn is-sessi fl-impjiegi jindika persistenza fin-nuqqas ta' ugwaljanza ta' tip kemm kwalitattiv kif ukoll kwantitattiv bejn in-nisa u l-irġiel,

H.

billi d-differenza fil-pagi baqgħet stabbli fil-livell ta' 15 % mill-2003, u naqset biss b'1 % mis-sena 2000,

I.

billi s-segregazzjoni settorjali u okkupazzjonali bejn in-nisa u l-irġiel mhix qed tonqos u qiegħda anke tiżdied f'ċertu pajjiżi,

J.

billi l-parteċipazzjoni tan-nisa fit-teħid tad-deċiżjonijiet hija indikatur deċiżiv tal-ugwaljanza bejn in-nisa u l-irġiel; billi l-preżenza ta' maniġers nisa f'impriżi u f'universitajiet għadha dgħajfa u l-għadd ta' politiċi jew riċerkaturi nisa qed jiżdied bil-mod ħafna biss,

K.

billi l-isterjotipi li għadhom jeżistu fir-rigward tal-għażliet edukattivi u okkupazzjonali li huma disponibbli għan-nisa jgħinu biex jinfirxu l-inugwaljanzi,

L.

billi l-objettivi ta' Liżbona dwar il-ġenerazzjoni tal-iżvilupp u dwar il-promozzjoni tal-ekonomija tas-suq soċjali jistgħu jintlaħqu biss billi jintuża kompletament il-potenzjal sinifikanti tan-nisa fis-suq tax-xogħol,

M.

billi jeżisti riskju ta' xogħol part-time“sfurzat”, b'mod partikulari għan-nisa, għażla li ta' spiss tkun imposta minħabba n-nuqqas ta' strutturi għall-kura tat-tfal li ma jkunux għaljin wisq għalihom;

N.

billi għadd ta' sfidi u diffikultajiet jaffettwa lin-nisa aktar mill-irġiel, speċifikament il-kwalità tal-impjieg, il-qagħda tal-konjuġi li ”jgħinu” f'ċertu oqsma bħall-agrikultura jew is-sajd jew l-intrapriżi żgħar tal-familja, is-saħħa u s-sigurtà fuq ix-xogħol u l-ħarsien tal-maternità, u anke riskju ogħla ta' faqar,

O.

billi kemm għan-nisa u kemm għall-irġiel, ir-rati ta' impjieg huma aktar baxxi fl-inħawi rurali u, barra minn hekk, l-għadd ta' nisa li qatt ma kienu attivi fis-suq uffiċjali tax-xogħol u li, għalhekk, qatt ma ġew irreġistrati bħala bla impjieg jew inklużi fl-istatistika dwar il-qgħad, li jwassal għal problemi finanzjarji u legali speċifiċi f'dak li għandu x'jaqsam mad-dritt għal liv ta' maternità jew ta' mard, l-akkwist tad-drittijiet għal pensjoni u l-aċċess għas-sigurtà soċjali, u anke problemi fil-każ ta' divorzju; billi l-inħawi rurali huma affetwati sew min-nuqqas ta' impjiegi ta' kwalità,

P.

billi l-kundizzjonijiet ta' xi gruppi ta' nisa, li ta' spiss jaffaċċjaw diversi diffikultajiet u riskji magħqudin, u anke diskriminazzjoni doppja — b'mod partikulari n-nisa b'diżabilità, in-nisa b'persuni dipendenti fuqhom, in-nisa anzjani, in-nisa minn minoranzi u n-nisa immigranti u l-ħabsin nisa — juru sinjali li qed imorru għall-agħar,

Q.

billi għad hemm differenzi konsiderevoli bejn in-nisa u l-irġiel fl-aspetti l-oħra kollha relatati mal-kwalità tax-xogħol, bħar-rikonċiljazzjoni tal-ħajja professjonali u privata, l-arranġamenti tax-xogħol li ma jisfruttawx kompletament il-kapaċitajiet tan-nies, u anke fil-qasam tas-saħħa u s-sikurezza fuq ix-xogħol; billi r-rata ta' impjieg tan-nisa bi tfal dipendenti tilħaq biss it-62.4 %, meta mqabbla mal-91.4 % għall-irġiel; billi l-parteċipazzjoni tan-nisa fis-suq tax-xogħol għadha karatterizzata fil-biċċa l-kbira tagħha minn sehem elevat u dejjem jikber ta' xogħol part-time — 31.4 % tan-nisa fl-UE-27 fl-2007, meta mqabbel ma' biss 7.8 % tal-irġiel — u 76.5 % tal-ħaddiema kollha part-time huma nisa; billi anke l-kuntratti għal impjiegi temporanji huma aktar komuni għan-nisa (15.1 %, 1 % aktar milli għall-irġiel); billi l-qgħad fit-tul jibqa' aktar komuni fost in-nisa (4.5 %) milli fost l-irġiel (3.5 %),

R.

billi r-riskju ta' għajxien fil-faqar hu ogħla għan-nisa milli għall-irġiel, b'mod partikulari għal dawk ta' aktar minn 65 sena (21 %, 5 % aktar milli għall-irġiel),

S.

billi r-rikonċiljazzjoni tal-ħajja professjonali, familjari u privata tibqa' kwistjoni mhux solvuta għan-nisa kif ukoll għall-irġiel,

T.

billi l-imsieħba soċjali għandhom irwol importanti fid-definizzjoni u fl-implimentazzjoni effettiva tal-azzjonijiet għall-ugwaljanza bejn in-nisa u l-irġiel fil-livelli Ewropej, nazzjonali, reġjonali, settorjali u korporattivi,

U.

billi t-tqassim tar-responsabilitajiet familjari u domestiċi bejn l-irġiel u n-nisa, speċifikament permezz tal-valorizzazzjoni tal-użu tal-liv għall-ġenituri u għall-paternità, jikkostitwixxi kundizzjoni indispendabbli biex tiġi promossa u tintlaħaq l-ugwaljanza bejn in-nisa u l-irġiel; u billi, jekk il-liv għall-maternità ma jiġix integrat meta jiġi kkalkulat iż-żmien ta' ħidma globali, ikun hemm diskriminazzjoni u żvantaġġ għan-nisa fis-suq tax-xogħol,

V.

billi l-aċċess għas-servizzi għall-kura tat-tfal, tal-anzjani u ta' persuni dipendenti oħrajn huwa essenzjali biex in-nisa u l-irġiel jieħdu sehem b'mod indaqs fis-suq tax-xogħol, fl-edukazzjoni u t-taħriġ,

W.

billi r-regolamenti tal-Fondi Strutturali jitolbu li l-Istati Membri u l-Kummissjoni għandhom jiżguraw li l-ugwaljanza bejn in-nisa u l-irġiel u l-integrazzjoni tal-perspettiva tas-sessi jkunu promossi matul l-istadji varji tal-implimentazzjoni tal-fondi,

1.

Jilqa' r-rapport tal-Kummissjoni msemmi hawn fuq dwar l-ugwaljanza u jerġa' jtenni n-natura doppja ta' politika dwar opportunitajiet indaqs għan-nisa u l-irġiel fil-livell tal-UE: li fuq naħa tiżgura l-ugwaljanza bejn in-nisa u l-irġiel fl-oqsma politiċi kollha (gender mainstreaming), u fuq l-oħra tiżgura li jittieħdu miżuri mmirati biex titrażżan id-diskriminazzjoni kontra n-nisa, li jinkludu kampanji li jqajmu kuxjenza, l-iskambju tal-aħjar prattika, djalogi maċ-ċittadini u inizjattivi ta' sħubija bejn is-settur pubbliku u dak privat;

2.

Jenfasizza l-importanza li tiġi miġġielda l-vjolenza fuq in-nisa fil-kisba tal-ugwaljanza bejn in-nisa u l-irġiel; jitlob għalhekk lill-Istati Membri u lill-Kummissjoni biex jieħdu azzjoni miftiehma f'dan il-qasam; iħeġġeġ lill-Kummissjoni biex tikkunsidra l-possibilitajiet ta' miżuri ġodda fil-ġlieda kontra l-vjolenza fuq in-nisa;

3.

Jistieden lill-Kummissjoni u lill-Istati Membri biex jgħaqqdu l-isforzi tagħhom fil-ġlieda kontra l-kriminalità organizzata u n-networks tat-traffikar, u kif ukoll biex jadottaw miżuri leġiżlattivi, amministrattivi, edukattivi, soċjali u kulturali ġodda biex tiġi skoraġġuta t-talba għall-prostituzzjoni;

4.

Jistieden lill-Istati Membri biex, bla dewmien, jirratifikaw il-Konvenzjoni tal-Kunsill tal-Ewropa dwar il-Ġlieda kontra t-Traffikar tal-Bnedmin;

5.

Jikkunsidra li l-parteċipazzjoni ġenerali tan-nisa fit-teħid ta' deċiżjonijiet fil-livelli lokali, nazzjonali u tal-UE mhijiex biżżejjed; jistieden għalhekk lill-Kummissjoni, lill-Istati Membri u lill-partiti politiċi biex jikkunsidraw teħid ta' azzjonijiet għat-titjib tas-sitwazzjoni; jinnota li, f'dan ir-rigward, l-użu ta' kwoti elettorali għandu effetti pożittivi fuq ir-rappreżentanza tan-nisa;

6.

Jirrimarka l-korrelazzjoni bejn il-parteċipazzjoni tan-nisa fil-politika u fit-teħid tad-deċiżjonijiet u l-involviment tagħhom fl-NGOs u fl-attivitajiet tas-soċjetà ċivili; iħeġġeġ għalhekk lill-Kummissjoni u lill-Istati Membri biex jappoġġjaw azzjonijiet li jippromwovu dan l-involviment;

7.

Jenfasizza l-importanza tas-sehem attiv tan-nisa fit-trejdjunjins b'ħidmiet li jiffukaw fuq il-ħarsien tan-nisa fuq il-post tax-xogħol u li jagħtuhom id-drittijiet li huma intitolati għalihom;

8.

Jinnota l-importanza tal-kontroll tan-nisa fuq id-drittijiet sesswali u riproduttivi tagħhom fl-emanċipazzjoni tal-mara; jappoġġja għalhekk il-miżuri u l-azzjonijiet li jtejbu l-aċċess tan-nisa għas-servizzi tas-saħħa sesswali u riproduttivi u li jżidu l-għarfien tan-nisa dwar id-drittijiet tagħhom u s-servizzi disponibbli;

9.

Jitlob lill-Kummissjoni u lill-Istati Membri biex jieħdu l-miżuri meħtieġa biex jimplimentaw l-inklużjoni tad-dimensjoni tal-ġeneru fil-politiki kollha soċjali, tal-impjieg u tas-sigurtà soċjali, b'mod partikulari fl-istrateġija tal-flessigurtà, u biex jiġġieldu kontra kull forma ta' diskriminazzjoni;

10.

Jappoġġja l-miżuri promossi mill-Fond Soċjali Ewropew u l-programm PROGRESS għall-2007-2013, li jtejbu l-qagħda tan-nisa fis-suq tax-xogħol u jgħinu biex titneħħa d-diskriminazzjoni;

11.

Huwa mħasseb dwar in-nuqqas ta' progress fir-rigward tad-differenza fil-pagi bejn in-nisa u l-irġiel f'dawn l-aħħar snin; iħeġġeġ għalhekk lill-Kummissjoni u lill-Istati Membri biex jevalwaw l-istrateġiji u l-azzjonijiet f'dan il-qasam u, jekk ikun hemm bżonn, biex jistabbilixxu, flimkien mal-imsieħba soċjali, miżuri ġodda, jew approċċi ġodda fl-implimentazzjoni ta' dawk eżistenti, għat-titjib tas-sitwazzjoni; jappoġġja, f'danir-rigward, il-proposta tal-Kumitat Konsultattiv dwar l-Opportunitajiet Indaqs intenzjonata biex tissaħħaħ il-leġiżlazzjoni Ewropea applikabbli fil-qasam biex jiġi impost fuq min jimpjega l-obbligu li jitwettqu verifiki tal-pagi u li jiġu żviluppati pjanijiet ta' azzjoni adattati biex tiġi assorbita d-differenza fil-pagi; jenfasizza l-ħtieġa għal azzjoni miftehma, b'mod speċjali fil-kuntest taċ-ċiklu l-ġdid tal-Istrateġija Ewropea għat-Tkabbir u l-Impjiegi, u l-ħtieġa ta' prinċipji ta' flessigurtà komuni;

12.

Jinsab imħasseb dwar il-qagħda żvantaġġata tan-nisa fis-suq tax-xogħol, u l-konsegwenza li jakkumulaw anqas drittijiet individwali għal pensjonijiet u ħlasijiet soċjali oħra, b'mod speċjali fis-sistemi fejn id-drittijiet huma marbutin mill-qrib mal-kontributi jew mad-dħul ta' tip professjonali tal-individwu; għal din ir-raġuni, jistieden lill-Istati Membri sabiex jieħdu azzjoni effettiva maħsuba biex tinforza r-regoli tal-welfare u tal-impjieg u sabiex toħloq impjiegi bi drittijiet fis-setturi varji tal-attività, b'hekk jiġi żgurat li l-ħaddiema (partikolarment in-nisa) jaqilgħu pagi diċenti u jkunu intitolati għall-kundizzjonijiet tajbin ta' saħħa u ta' sikurezza fuq il-post tax-xogħol, għall-protezzjoni soċjali u għal-libertà tat-trejdunjin, bħala kontribuzzjoni għat-tneħħija tad-diskriminazzjoni bejn in-nisa u l-irġiel fuq il-post tax-xogħol;

13.

Jitlob lill-Istati Membri biex jappoġġjaw lill-Kummissjoni fl-azzjoni ta' kontroll tagħha dwar l-implimentazzjoni tal-miżuri nazzjonali, li l-għan tagħha hu li tiġi evalwata l-osservanza tal-prinċipju ta' ugwaljanza f'dak li għandu x'jaqsam, b'mod partikulari, mad-drittijiet legali bħas-sistemi għall-pensjoni u s-sigurtà soċjali;

14.

Jitlob lill-istituzzjonijiet Komunitarji u lill-Istati Membri biex it-22 ta' Frar jiġi ddikjarat Jum Internazzjonali għall-Ugwaljanza tal-Pagi;

15.

Huwa mħasseb dwar il-kuntrast persistenti bejn il-livell ta' edukazzjoni tal-irġiel u n-nisa fuq naħa, fejn ir-rendiment edukattiv tan-nisa huwa aħjar minn dak tal-irġiel, u s-sitwazzjoni fis-suq tax-xogħol fuq l-oħra, fejn in-nisa jaqilgħu pagi inqas, ikollhom xogħlijiet aktar prekarji u javvanzaw fil-karriera iżjed bil-mod mill-irġiel; iħeġġeġ lill-Kummissjoni u lill-Istati Membri biex jesploraw ir-raġunijiet għal dan u biex isibu soluzzjonijiet għas-sitwazzjoni;

16.

Jirrakkomanda li l-Istati Membri jippromwovu b'mod attiv it-trattament ugwali tal-istudenti tal-iskola u jieħdu passi biex jiġġieldu kontra s-segregazzjoni tax-xogħol li għadha teżisti fil-qasam tal-edukazzjoni, fejn il-persentaġġ ta' għalliema nisa fil-livelli primarji u ta' qabel l-iskola obbligatorja huwa ħafna ogħla mill-persentaġġ fil-livell sekondarju, li għadu ddominat b'mod ċar mill-irġiel u li joffri aktar vantaġġi f'termini ta' rikonoxximent, ħlas u status soċjali;

17.

Jipproponi li l-Kummissjoni tikkunsidra l-adozzjoni ta' miżuri biex iħeġġu lin-nisa u lill-irġiel biex jistudjaw suġġetti xjentifiċi u teknoloġiċi, biex iżidu l-provvista ta' professjonisti f'dan is-settur u jissodisfaw id-domanda li tidher ċara;

18.

Jitlob lill-Kummissjoni u lill-Istati Membri biex jieħdu miżuri ulterjuri sabiex itejbu l-aċċess tan-nisa għas-suq tax-xogħol u l-parteċipazzjoni tagħhom fih, b'mod partikulari fis-setturi fejn għadhom mhux rappreżentati biżżejjed, bħal dawk tat-teknoloġiji għoljin, tar-riċerka, tax-xjenzi u l-inġinerija u l-kwalità tal-impjiegi tan-nisa, b'mod partikulari permezz ta' programmi ta' taħriġ u ta' edukazzjoni tul il-ħajja fil-livelli kollha; iħeġġeġ lill-Kummissjoni u lill-Istati Membri biex jużaw il-Fondi Strutturali Ewropej biex jintlaħaq dan l-għan;

19.

Jitlob lill-Kummissjoni u lill-Istati Membri biex joqgħodu attenti għas-sitwazzjoni tal-konjuġi li jgħinu f'ċerti oqsma bħall-artiġjanat, il-kummerċ, l-agrikultura, is-sajd u l-intrapriżi żgħar tal-familja, kemm billi jadottaw il-perspettiva tal-ugwaljanza bejn is-sessi u kemm billi jikkunsidraw il-fatt li n-nisa huma f'pożizzjoni iżjed vulnerabbli mill-irġiel; jitlob lill-Kummissjoni biex, bla dewmien, tippreżenta proposta bl-għan li timmodifika d-Direttiva 86/613/KEE dwar l-applikazzjoni tal-principju ta' trattament ugwali bejn l-irġiel u n-nisali jaħdmu għal rashom, inkluż fis-settur tal-agrikoltura, u dwar il-protezzjoni ta' nisa li jaħdmu għal rashom waqt it-tqala u waqt li qegħdin irabbu t-tfal (12), bl-intenzjoni li tiġi eliminata d-diskriminazzjoni indiretta, biex jiġi żviluppat obbligu posittiv għall-ugwaljanza ta' trattament u biex tittejjeb il-qagħda legali tal-konjuġi li jgħinu;

20.

Jitlob lill-Istati Membri biex jiżviluppaw il-kunċett legali tas-sjieda maqsuma, sabiex ikunu żgurati r-rikonoxximent sħiħ tad-drittijiet tan-nisa fis-settur agrikolu, il-ħarsien xieraq fil-qasam tas-sigurtà soċjali u r-rikonoxximent tax-xogħol tagħhom;

21.

Iħeġġeġ lill-Istati Membri biex jippromwovu l-imprenditorjat tan-nisa fis-settur industrijali u biex jipprovdu appoġġ finanzjarju u strutturi għal konsulenza professjonali għan-nisa li jwaqqfu l-kumpaniji u kif ukoll taħriġ xieraq;

22.

Jistieden lill-Istati Membri biex jagħtu attenzjoni partikulari lid-disponibilità ta' faċilitajiet li jirrigwardaw il-maternità għan-nisa li jaħdmu għal rashom;

23.

Jistieden lill-Kummissjoni u lill-Istati Membri biex jagħtu attenzjoni lill-qagħda tal-għadd dejjem jikber ta' ħaddiema li formalment jaħdmu għal rashom imma li fil-verità jistgħu jiġu kklassifikati fil-kategorija ta' “ħaddiema ekonomikament dipendenti”;

24.

Jistieden lill-Istati Membri biex jirrikonoxxu lill-intrapriżi li jieħdu miżuri biex jippromwovu l-ugwaljanza bejn in-nisa u l-irġiel sabiex jiġi ffaċilitat l-bilanċ bejn il-ħajja professjonali u dik privata, b'mod li jitrawwem it-tifrix tal-aħjar prattiki f'dan il-qasam;

25.

Jistieden lill-Kummissjoni u lill-Istati Membri biex jagħtu prijorità u attenzjoni speċjali lill-gruppi ta' nisa l-iżjed vulnerabbli, b'mod speċjali lin-nisa b'diżabilitajiet, lin-nisa b'persuni dipendenti, lin-nisa anzjani, lin-nisa f'minoranza, lin-nisa immigranti u lin-nisa fil-ħabs, u biex jiżviluppaw miżuri mmirati li jkunu maħsubin għall-bżonnijiet tagħhom;

26.

Jistieden lill-Kummissjoni u lill-Istati Membri biex jadottaw u jimplimentaw il-miżuri meħtieġa biex in-nisa b'diżabilità jiġu megħjuna jagħmlu progress fl-oqsma tal-ħajja soċjali, professjonali, kulturali u politika fejn għadhom m'humiex rappreżentati biżżejjed;

27.

Jistieden lill-Kummissjoni u lill-Istati Membri biex jippromwovu l-aċċess tan-nisa immigranti għall-edukazzjoni u għall-impjieg permezz tal-adozzjoni ta' miżuri biex tiġi miġġielda d-diskriminazzjoni doppja li huma vittmi tagħha fis-suq tax-xogħol, biex jinħolqu l-kundizzjonijiet favorevoli meħtieġa biex in-nisa immigranti jkun jista' jkollhom aċċess għas-suq tax-xogħol, u jkunu jistgħu jirrikonċiljaw il-ħajja tagħhom professjonali u dik privata;

28.

Jilqa' l-konsultazzjoni bejn il-Kummissjoni u l-isħab soċjali bil-għan li jittejbu l-oqfsa leġiżlattivi u mhux leġiżlattivi tar-rikonċiljazzjoni bejn il-ħajja professjonali, il-ħajja tal-familja u l-ħajja privata; huwa ħerqan biex jara analiżi tar-riżultati ta' dik il-konsultazzjoni u ta' proposti li joriġinaw minnha, b'mod partikulari ta' proposti konnessi mal-liv tal-maternità, u mal-integrazzjoni tiegħu fil-kalkolu taż-żmien tax-xogħol globali, mal-liv tal-paternità, mal-liv ta' ġenitur, mal-liv tal-adozzjoni u mal-liv li jintuża biex wieħed jieħu ħsieb persuni dipendenti; jikkunsidra, barra minn hekk, li l-Ftehim ta' Qafas dwar il-liv ta' ġenitur tista' tittejjeb fir-rigward tal-punti li ġejjin: il-provvista ta' miżuri biex il-missirijiet jitħeġġu biex jieħdu liv ta' ġenitur, it-tisħiħ tad-drittijiet tal-ħaddiema li jieħdu liv ta' ġenitur u t-tħaffif tas-sistema tal-liv, tat-tul u tal-indennizzi għal-liv ta' ġenitur;

29.

Ifakkar li kull politika dwar ir-rikonċiljazzjoni tal-ħajja professjonali u dik familjari għandha tissejjes fuq il-prinċipju ta' għażla libera għall-individwi u tkun adattata għaċ-ċikli differenti tal-ħajja;

30.

Jitlob lill-Istati Membri biex iressqu miżuri speċifiċi kontra l-inugwaljanzi bejn in-nisa u l-irġiel ikkawżati minn xejriet interrotti ta' impjiegi, li jirriżultaw, b'mod partikolari mil-liv tal-maternità jew mil-liv li jittieħed għall-kura tal-persuni dipendenti, u biex inaqqsu l-effetti negattivi tagħom fuq il-karrieri, il-pagi u d-drittijiet tal-pensjoni;

31.

Jirrimarka li r-rikonċiljazzjoni bejn il-ħajja tax-xogħol, il-ħajja privata u l-ħajja tal-familja hija waħda mill-fatturi ewlenin fiż-żieda tal-impjiegi, u jitlob lill-Kummissjoni biex tiġbor u tqassam l-aħjar prattiki fir-rigward ta' bilanċ effettiv bejn ix-xogħol u l-ħajja privata u iżjed involviment tal-irġiel fil-ħajja tal-familja;

32.

Iħeġġeġ lill-Kummissjoni u lill-Istati Membri biex jinkoraġġixxu l-parteċipazzjoni tal-irġiel fl-implimentazzjoni tal-politiki ta' ugwaljanza bejn is-sessi, speċifikament f'dak li għandu x'jaqsam mar-rikonċiljazzjoni bejn il-ħajja professjonali, il-ħajja familjari u l-ħajja privata;

33.

Jitlob lill-Istati Membri u lill-awtoritajiet reġjonali u lokali biex, b'mod konformi mal-objettivi ta' Barċellona, itejbu d-disponibilità, il-kwalità u l-aċċessibilità tas-servizzi tal-kura tat-tfal u tas-servizzi ta' kura għal nies dipendenti, u biex jiżguraw li d-disponibilità ta' dawn is-servizzi tkun kompatibbli mal-iskedi tax-xogħol full-time tan-nisa u tal-irġiel li jkunu responsabbli minn tfal jew minn persuni dipendenti;

34.

Jistieden lil min hu responsabbli fi ħdan l-intrapriżi biex jintroduċi miżuri flessibbli ta' politika għall-familja fil-pjanijiet tagħhom ta' tmexxija tal-istaff, bil-għan li jkun iffaċilitat ir-ritorn tal-ħaddiema rġiel u nisa wara waqfa fil-karriera;

35.

Jiġbed l-attenzjoni tal-Kummissjoni u tal-Istati Membri fuq il-femminizzazzjoni tal-faqar, fi żmien meta n-nisa, b'mod speċjali dawk anzjani u l-ommijiet mhux miżżewġin, jinsabu fir-riskju tal-esklużjoni u l-faqar, u jħeġġiġhom biex jiżviluppaw miżuri biex jevitaw din it-tendenza;

36.

Jitlob lill-Kummissjoni u lill-Istati Membri biex jiżviluppaw għodod ta' taħriġ u ta' implimentazzjoni li jippermettu lill-parteċipanti kollha kkonċernati li jintegraw perspettiva bbażata fuq l-ugwaljanza ta' opportunitajiet bejn in-nisa u l-irġiel fl-oqsma ta' kompetenza rispettiva tagħhom, inkluża l-evalwazzjoni tal-impatt speċifiku tal-politiki fuq in-nisa u l-irġiel;

37.

Iħeġġeġ lill-Istati Membri u lill-awtoritajiet reġjonali u lokali biex jiżguraw l-użu effettiv tal-għodod eżistenti, bħall-manwali għall-integrazzjoni ta' opportunitajiet indaqs għan-nisa u l-irġiel fil-politiki tal-impjieg stabbiliti mill-Kummissjoni;

38.

Iħeġġeġ lill-Istati Membri biex jiżguraw taħriġ xieraq biex titqies id-dimensjoni ta' ugwaljanza bejn in-nisa u l-irġiel għall-uffiċjali responsabbli għall-implimentazzjoni tal-programmi Komunitarji fil-livelli nazzjonali, reġjonali u lokali;

39.

Jitlob lill-Kummissjoni u lill-Istati Membri biex joħolqu numru ta' indikaturi kwantitattivi u kwalitattivi, kif ukoll statistika bbażata fuq is-sessi, li jkunu affidabbli, li jkunu jistgħu jitqabblu bejniethom u li jkunu disponibbli fil-każ ta' bżonn, biex jintużaw fis-segwitu tal-implimentazzjoni tal-Istrateġija ta' Liżbona għat-Tkabbir u l-Impjiegi, b'mod li titqies id-dimensjoni tas-sessi u tiġi żgurata implimentazzjoni u segwitu xierqa għall-politiki;

40.

Jilqa' t-twaqqif ta' Istitut Ewropew għall-Ugwaljanza bejn in-Nisa u l-Irġiel u l-ħatra tal-membri tal-Kunsill Amministrattiv li pprovdiet lill-Istitut b'bord li jieħu d-deċiżjonijiet; huwa mħasseb, madankollu, dwar id-dewmien fl-għażla tad-direttur tal-Istitut, u jħeġġeġ lill-Kummissjoni biex tirrimedja s-sitwazzjoni;

41.

Jitlob lill-Kummissjoni biex, bl-għajnuna tal-Istitut Ewropew għall-Ugwaljanza bejn in-Nisa u l-Irġiel, jiġu inklużi fatti u statistika li joriġinaw mill-pajjiżi fit-triq lejn l-adeżjoni u mill-pajjiżi kandidati fir-rapporti annwali futuri dwar l-ugwaljanza bejn in-nisa u l-irġiel;

42.

Jitlob lill-Istati Membri u biex iħeġġu lill-popolazzjoni b'mod ġenerali biex tipprattika l-isport u tgħix ħajja fi stat tajjeb ta' saħħa, b' kont meħud tal-fatt li r-rati tal-parteċipazzjoni tan-nisa fl-isport huma aktar baxxi;

43.

Jagħti istruzzjonijiet lill-President tiegħu biex iressaq din ir-riżoluzzjoni lill-Kunsill, lill-Kummissjoni u lill-gvernijiet u lill-parlamenti tal-Istati Membri.

4.12.2009   

MT

Il-Ġurnal Uffiċjali tal-Unjoni Ewropea

CE 295/42

A.

billi l-Protokoll dwar il-ħarsien u l-benessri tal-annimali jeħtieġ li l-Komunità u l-Istati Membri jikkunsidraw b’mod sħiħ ir-rekwiżiti tal-benessri tal-annimali meta jifformulaw u jimplimentaw politiki ta’ agrikoltura u riċerka,

B.

billi l-proċessi tal-klonazzjoni jindikaw rati baxxi ta’ sopravivenza ta’ embriji ttrasferiti u ta’ annimali kklonati, b’għadd kbir ta’ annimali kklonati jmutu fl-istadji bikrija tal-ħajja minn insuffiċjenza kardjovaskulari, immunodefiċjenzi, insuffiċjenza tal-fwied, problemi respiratorji, u anormalitajiet tal-kliewi u muskoloskeletriċi,

C.

billi l-Awtorità Ewropea tas-Sikurezza tal-Ikel (EFSA) ikkonkludiet fl-opinjoni tagħha fl-2008 li l-livelli ta’ mortalità u l-morbożità tal-annimali kklonati huma ogħla minn dawk f’annimali prodotti sesswalment waqt li l-korrimenti u l-mard lejn l-aħħar tat-tqala x’aktarx li jaffettwaw il-benessri tal-ommijiet surrogati,

D.

billi minħabba l-livelli attwali ta’ tbatija u ta’ problemi ta’ saħħa tal-ommijiet surrogati u tal-annimali kklonati, il-Grupp Ewropew dwar l-Etika fix-Xjenza u t-Teknoloġiji l-Ġodda (EGE) jesprimi dubji dwar kemm il-klonazzjoni tal-animali għall-ikel hija etikament ġustifikata, u ma jqisx li hemm argumenti konvinċenti li jiġġustifikaw il-produzzjoni tal-ikel mill-annimali kklonati u miż-żgħar tagħhom,

E.

billi d-Direttiva tal-Kunsill 98/58/KE tal-20 ta’ Lulju 1998 dwar il-ħarsien tal-annimali mrobbija għal skopijiet ta’ biedja (1) tipprovdi li ’proċeduri ta’ tnissil naturali jew artifiċjali li jikkawżaw, jew x’aktarx li jikkawżaw, tbatija jew korriment lil kwalunkwe annimal ikkonċernat m’għandhomx jiġu pprattikati’ (Anness, paragrafu 20),

F.

billi l-klonazzjoni tnaqqas b’mod sinifikanti d-diversità ġenetika fil-popolazzjonijiet tal-bhejjem, u b’hekk iżżid il-possibilità li merħliet sħaħ jiġu eradikati b’mard li jkunu suxxettibbli għalih,

G.

billi l-EFSA fit-24 ta’ Lulju 2008 ppubblikat opinjoni xjentifika dwar l-implikazzjonijiet tal-annimali kklonati għas-sikurezza tal-ikel, is-saħħa u l-benessri tal-annimali u għall-ambjent, fejn ikkonkludiet li s-saħħa u l-benessri ta’ proporzjoni sinifikanti ta’ annimali kklonati huma affettwati b’mod negattiv, ħafna drabi b’mod sever u fatali,

H.

billi, waqt li l-għan ewlieni tal-klonazzjoni hu li jkunu prodotti kopji multipli ta’ annimali b’rati għolja ta’ tkabbir jew b’rendiment għoli, it-tnissil selettiv tradizzjonali diġà wassal għal problemi fis-saqajn u għal difetti kardjovaskulari fi qżieqeż li jikbru malajr, u li jkunu jzappu (lameness), il-mastite u l-qtil prematur ta’ baqar li jrendu ħafna; u billi l-klonazzjoni ta’ annimali li jikbru malajr u li jrendu ħafna se twassal għal livelli ogħla ta’ problemi ta’ saħħa u ta’ benessri,

I.

billi, minbarra l-fatt li l-implikazzjonijiet tal-klonazzjoni tal-annimali biex jiġu forniti bħala ikel għadhom ma ġewx studjati biżżejjed, dan iqiegħed theddida serja għad-dehra u s-sustanza tal-mudell agrikolu Ewropew, li hu bbażat fuq il-kwalità tal-prodott, il-prinċipji favur l-ambjent u r-rispett sħiħ tal-benessri tal-annimali,

1.

Jistieden lill-Kummissjoni sabiex tressaq proposti li jipprojbixxu (i) il-klonazzjoni tal-annimali għal skopijiet ta’ forniment tal-ikel, (ii) it-trobbija ta’ annimali kklonati u taż-żgħar tagħhom, (iii) it-tqegħid fis-suq ta’ laħam u prodotti tal-ħalib li ġejjin minn annimali kklonati jew miż-żgħar tagħhom u (iv) l-importazzjoni ta’ annimali kklonati, iż-żgħar tagħhom, semen u embrijoni minn annimali kklonati jew iż-żgħar tagħhom, u laħam u prodotti tal-ħalib li ġejjin minn annimali kklonati jew miż-żgħar tagħhom, waqt li jkunu kkunsidrati r-rakkomandazzjonijiet tal-EFSA u l-EGE;

2.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

4.12.2009   

MT

Il-Ġurnal Uffiċjali tal-Unjoni Ewropea

CE 295/43

A.

billi s-soċjalizzazzjoni (permezz tal-iskola, il-familja u l-ambjent soċjo-kulturali) hija proċess li joħloq identità, valuri, twemmin u attitudnijiet li jagħtu lill-individwu post u rwol fis-soċjetà li jikber fiha; billi l-kunċett tal-identifikazzjoni huwa essenzjali biex wieħed jifhem kif jaħdem dan il-proċess,

B.

billi għandu jsir iktar xogħol biex, kemm fl-iskola kif ukoll fid-dar, jiġi promoss użu raġonevoli u responabbli tat-televiżjoni u tat-teknoloġiji l-ġodda minn età żgħira,

C.

billi l-pubbliċità li titrażmetti messaġġi diskriminatorji u/jew degradanti bbażati fuq il-ġeneru u kwalunkwe forma ta’ sterjotip tal-ġeneru huma ostaklu għall-ħolqien ta’ soċjetà moderna u egalitarja,

D.

billi l-isterjotipi jistgħu jikkontribwixxu għal imġiba li tikkostitwixxi ħafna fatturi ta’ identifikazzjoni,

E.

billi r-riklamar u l-kummerċjalizzazzjoni jirriflettu kultura u jikkontribwixxu wkoll biex joħolquha,

F.

billi r-riklamar huwa parti komponeneti mill-ekonomija tas-suq u huwa wieħed mill-aspetti tar-realtà li kulħadd irid jaffaċċja fil-ħajja ta’ kuljum,

G.

billi r-riklamar xi kultant jista’ jippreżenta perspettiva karikaturata tal-ħajjiet tan-nisa u tal-irġiel,

H.

billi d-diskriminazzjoni bbażata fuq il-ġeneru fil-media hija mxerrda ħafna; billi r-riklamar u l-media li joħolqu sterjotipi tal-ġeneri jistgħu jitqiesu bħala parti minn din id-diskriminazzjoni,

I.

billi, għalhekk, l-isterjotipi marbutin mal-ġeneru fir-riklamar jirriflettu t-tqassim mhux ugwali tal-poterbejn is-sessi,

J.

billi l-istereotipi marbutin mal-ġeneru għandhom jiġu opposti fil-livelli kollha tas-soċjetà sabiex tiġi promossa l-ugwaljanza u l-koperazzjoni bejn in-nisa u l-irġiel kemm fil-qasam privat kif ukoll f’dak pubbliku,

K.

billi mill-ewwel snin tas-soċjalizzazzjoni tat-tfal l-isterjotipi marbutin mal-ġeneru jistgħu jikkontribwixxu għad-diskriminazzjoni bejn il-ġeneri li ssaħħaħ il-perpetwazzjoni ta’ inugwaljanzi bejn in-nisa u l-irġiel li jibqgħu tul il-ħajja kollha u rimarki komuni speċifiċi għal ġeneru wieħed jew l-ieħor,

L.

billi l-isterjotipi marbuta mal-ġeneru huma kontraproduttivi u jikkontribwixxu biex ikun hemm taqsim fi professjonijiet skond il-ġeneru fis-suq tax-xogħol, bir-riżultat li n-nisa ġeneralment jaqilgħu inqas mill-irġiel,

M.

billi s-soċjetà kollha għandha tkun involuta fi sforzi biex tkun evitata r-riproduzzjoni tal-isterjotipi marbutin mal-ġeneru; billi r-responsabilità biex isir dan għandha tinqasamfuq kulħadd,

N.

billi l-ostakoli li jipprevjenu it-twassil ta’ immaġni pożittivi tal-irġiel u tan-nisa fis-sitwazzjonijiet soċjali kollha għandu jitneħħa,

O.

billi t-tfal huma grupp partikolarment vulnerabbli li jibbaża l-fiduċja tiegħu mhux biss fuq l-awtorità imma wkoll fuq karattri minn miti, minn programmi fuq it-televixin, minn kotba tal-istampi, materjal edukattiv, minn logħob fuq it-televixin, minn riklami dwar il-ġugarelli, eċċ; billi t-tfal jitgħallmu billi jimitaw u jagħmlu bħal dak li jkunu għadhom kif esperjenzaw; billi, għal din ir-raġuni, l-isterjotipi marbutin mal-ġeneru fir-riklamar jinfluwenzaw l-iżvilupp individwali u jaċċentwaw l-idea li l-ġeneru ta’ persuna jiddetta x’inhu u x’mhux possibbli,

P.

billi r-riklamar permezz ta’ tipi differenti tal-media huwa partimil-ħajja tagħna ta’ kuljum; billi hija ta’ importanza partikolari li r-riklamar fil-media jkun suġġett għal regoli u/jew kodiċi ta’ kondotta eżistenti li jorbtu etikament u/jew legalment biex ikun evitat li r-riklami jikkomunikaw messaġġi diskriminatorji jew degradanti bbażati fuq sterjotipi marbutin mal-ġeneru u biex ikun evitat it-tixwix tal-vjolenza,

Q.

billi r-riklamar responsabbli jista’ jkollu influwenza pożittivi fuq il-perċezzjoni tas-soċjetà ta’ kwistjonijiet bħal: “id-dehra tal-ġisem”, “l-irwoli marbutin mal-ġeneru” u “n-normalità”; billi r-riklamar jista’ jkun għodda effettiva biex jiġu sfidati u ffaċjati l-isterjotipi,

1.

Jenfasizza l-importanza li n-nisa u l-irġiel jingħataw l-istess opportunitajiet biex jiżviluppaw bħala individwi;

2.

Jinnota l-eżistenza kontinwa u mifruxa sew ta’ sterjotipi maskili u femminili minkejja d-diversi programmi Komunitarji li jippromwovu l-ugwaljanza bejn il-ġeneri;

3.

Jinnota li iktar riċerka tgħin biex jinxteħet dawl fuq ir-rabta bejn l-isterjotipi marbutin mal-ġeneru fir-riklamar u l-inugwaljanza bejn il-ġeneri;

4.

Jitlob lill-Kunsill, lill-Kummissjoni u lill-Istati Membri biex jisfruttaw u jxerrdu r-riċerka msemmija hawn fuq u r-riżultati tagħha;

5.

Jenfasizza l-importanza li l-Istati Membri jonoraw l-impenji li ħadu permezz tal-Patt Ewropew għall-Ugwaljanza bejn is-Sessi msemmi hawn fuq

6.

Jitlob lill-Kunsill, lill-Kummissjoni u lill-Istati Membri biex jaderixxu mal-linji gwida adottati permezz ta’ diversi programmi Komunitarji, bħall-EQUAL, u mal-linji gwida li jiffokaw fuq l-ugwaljanza bejn il-ġeneri;

7.

Jitlob lill-Kunsill u lill-Kummissjoni biex jimmoniterjaw l-implimentazzjoni ta’ dispożizzjonijiet li jeżistu diġà fil-liġi Kommunitarja dwar id-diskriminazzjoni marbuta mal-ġeneru u t-tixwix li jġib mibegħda minħabba l-ġeneru;

8.

Jitlob lill-Kunsill u lill-Kummissjoni u lill-Istati Membri biex jiżviluppaw programmi ta’ azzjoni madwar l-UE li jqajmu kuxjenza kontra l-insulti sessisti jew immaġni degradanti tan-nisa u tal-irġiel fir-riklamar u fil-kummerċjalizzazzjoni;

9.

Jistieden lill-Istati Membri biex jistudjaw u jirraportaw dwar l-immaġni tan-nisa u tal-irġiel fir-riklamar u fil-kummerċjalizzazzjoni;

10.

Jisħaq li l-isterjotipi fir-riklamar fuq il-programmi tat-televiżjoni tat-tfal huma problema partikolari minħabba l-impatt potenzjali tagħhom fuq is-soċjalizzazzjoni tal-ġeneru u, sussegwentement, fuq l-opinjoni tat-tfal dwarhom innifishom, dwar il-membri tal-familja tagħhom u dwar id-dinja ta’ barra;

11.

Jinnota li l-isforzi biex jiġu miġġielda l-isterjotipi fil-media u fir-riklamar għandhom ikunu akkumpanjati minn strateġiji u miżuri edukattivi biex tiġi kkultivata l-kuxjenza minn età bikrija u jiġu żviluppati l-fakultajiet kritiċi mill-adoloxxenza ’l quddiem;

12.

Jisħaq fuq l-irwol fundamentali li għandu jkollha is-sistema tal-edukazzjoni fl-iżvilupp tal-fakultajiet kritiċi tat-tfal fir-rigward tal-immaġni u tal-media b’mod ġenerali, sabiex ikunu evitati l-effetti mhux mixtieqa tar-ripetizzjoni tal-isterjotipi marbuta mal-ġeneru fil-kummerċjalizzazzjoni u fir-riklamar;

13.

Jinnota l-bżonn li l-irwoli tradizzjonali tal-ġeneri jiġu sfidati sabiex tinkiseb ugwaljanza bejn il-ġeneri;

14.

Jiġbed l-attenzjoni b’mod partikulari fuq il-bżonn li jiġu eliminati mill-kotba, mill-ġugarelli, mil-logħob tal-kompjuter, mill-internet u mit-teknoloġiji l-ġodda tal-informazzjoni u tal-komunikazzjoni, kif ukoll minn riklamar permezz ta’ tipi differenti ta’ media, messaġġi li jmorru kontra d-dinjità tal-bniedem u li jingħataw sterjotipi marbutin mal-ġeneru;

15.

Jinnota bi tħassib estrem ir-riklamar tas-servizzi sesswali, li jsaħħaħ l-isterjotipi tan-nisa bħala oġġetti, fil-pubblikazzjonijiet, bħall-gazzetti lokali, li t-tfal jaraw u jiksbu b’faċilità;

16.

Jinnota l-bżonn li jsir taħriġ kontinwu ta’ għall-u, b’kollaborazzjoni mal-professjonisti tal-media, taħriġ li jqajjem kuxjenza għas-soċjetà dwar l-effetti negattivi tal-isterjotipi marbutin mal-ġeneru;

17.

Jiġbed l-attenzjoni għall-fatt li l-użu tat-televiżjoni u tat-teknoloġiji l-ġodda qed jiżdied fost it-tfal u l-adoloxxenti, li dan l-użu jibda minn età bikrija ħafna u li kull ma jmur it-tfal qed jaraw dejjem iktar it- televiżjoni mingħajr ma jkunu kkontrollati;

18.

Jinnota li t-tpinġijiet li joħorġu mir-riklamar u mill-kummerċjalizzazzjoni ta’ immaġni ideali tal-ġisem jista’ jkollhom effett negattiv fuq l-awtostima tan-nisa u tal-irġiel, b’mod partikulari tat-tfajliet u ta’ dawk li huma suxxettibbli għal problemi tal-alimentazzjoni bħall-anorexia nervosa u l-bulimia nervosa; jitlob lil dawk li jirriklamaw biex jikkunsidraw sew l-użu tagħhom ta’ nisa rqaq iżżejjed biex jirriklamaw prodotti;

19.

19 Jitlob lill-Istati Membri biex permezz ta’ mezzi xierqa jiżguraw li l-kummerċjalizzazzjoni u r-riklamar jiggarantixxu r-rispett tad-dinjità tal-bniedem u l-integrità tal-persuna, li ma jkunux diskriminatorji, la b’mod dirett u lanqas b’mod indirett, li ma jkunux jinkludu tixwix li jqajjem il-mibegħda bbażata fuq il-ġeneru, ir-razza jew l-oriġini etnika, ir-reliġjon jew it-twemmin, id-diżabilità, l-età jew l-orjentazzjoni sesswali, u li ma jkunux jinkludu materjal li, meta ġġudikat fuq il-kuntest tiegħu, iħeġġeġ jew jippromwovi l-vjolenza kontra n-nisa jew jagħmilha tidher isbaħ milli hi;

20.

Jirrikonoxxi l-ħidma li saret diġa’ mir-regolaturi tal-media f’xi Stati Membri biex jesploraw l-effetti tal-isterjotipar ibbażat fuq il-ġeneru u jinkoraġġixxi lir-regolaturi fl-Istati Membri kollha biex jaqsmu ma’ xulxjin l-aħjar prassif’ dan il-qasam;

21.

Ifakkar lill-Kummissjoni li d-Direttiva 2004/113/KE imsemmija hawn fuq, meta ġiet proposta għall-ewwel darba mill-Kummissjoni kienet tkopri wkoll id-diskriminazzjoni fil-media; jitlob lill-Kummissjoni biex iżżid l-isforzi tagħha kontra d-diskriminazzjoni;

22.

Jenfasizza l-bżonn li jkun hemm eżempji pożittivi mill-perspettiva dwar il-ġeneru fid-dinja tal-media u tar-riklamar sabiex jintwera li l-bidla hija possibbli u mixtieqa; jikkunsidra li l-Istati Membri għandhom jistabbilixxu fomalment l-għoti ta’ premju minn min jirriklama lil membri tal-industrija tagħhom stess, u ta’ premju mogħti mill-pubbliku, għal riklami li l-iktar jiksru l-isterjotipi marbutin mal-ġeneru u jippreżenta immaġni pożittiva jew waħda li tafferma l-istatus tan-nisa, tal-irġiel u tar-relazzjoni bejniethom;

23.

Jenfasizza l-bżonn li jinxterdu l-prinċipji ta’ ugwaljanza bejn il-ġeneri permezz tal-media permezz ta’ pubblikazzjonijiet u programmi, imfassla għal gruppi differenti ta’ etajiet, biex l-aħjar prassi jiġu popolarizzati u biex jiġu rrispettati d-differenzi bejn il-ġeneri;

24.

Jenfasizza l-bżonn għal dibattitu kontinwu dwar il-kummerċjalizzazzjoni u r-riklamar u l-irwol tagħhom fil-ħolqien u fil-perpetwazzjoni ta’ sterjotipi marbutin mal-ġeneru;

25.

Jitlob lill-Istati Membri biex ifasslu u jniedu inizjattivi edukattivi, żviluppati fl-ispirtu ta’ tolleranza u ta’ evitar tal-forom kollha ta’ sterjotipi, biex jippromwovu l-kultura ta’ ugwaljanza bejn il-ġeneri permezz tal-programmi edukattivi xierqa;

26.

Jenfasizza li l-isterjotipi dwar il-ġeneru għandhom jiġu eliminati;

27.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-gvernijiet u l-parlamenti tal-Istati Membri.

4.12.2009   

MT

Il-Ġurnal Uffiċjali tal-Unjoni Ewropea

CE 295/47

A.

billi f'dawn l-aħħar snin l-Iżrael affaċja bosta attakki terroristiċi serji kontra l-popolazzjoni ċivili tiegħu u billi l-awtoritajiet Iżraeljani ħadu numru ta' miżuri biex jimpedixxu dawk l-azzjonijiet terroristiċi, inkluż l-arrest ta' militanti Palestinjani suspettati, iżda billi l-ġlieda kontra t-terroriżmu mhix ġustifikazzjoni għall-vjolazzjoni tal-liġi umanitarja,

B.

billi llum il-ġurnata iktar minn 11 000 Palestinjan, inklużi mijiet ta' nisa u tfal, qegħdin jinżammu f'ħabsijiet u f'ċentri ta' detenzjoni Iżraeljani u billi l-biċċa l-kbira ta' dawk id-detenuti kienu arrestati fit-Territorji Palestinjani Okkupati,

C.

billi skont il-Konvenzjoni tad-Drittijiet tat-Tfal, li l-Iżrael iffirma, tifel jew tifla huwa definit bħala persuna taħt l-età ta' 18-il sena; billi madankollu, it-tfal Palestinjani mill-età ta' 16-il sena huma meqjusa bħala adulti skont ir-regolamenti militari tal-Iżrael li jirregolaw it-Territorji Palestinjani Okkupati, u spiss jinżammu f'kundizzjonijiet xejn xierqa,

D.

billi 198 Palestinjan inħelsu mill-Gvern Iżraeljan fil-25 ta' Awissu 2008 bħala sinjal ta' rieda tajba u ta' bini tal-fiduċja reċiproka u billi għaddejjin iktar negozjati bejn iż-żewġ naħat bl-għan li jintlaħaq ftehim iżjed komprensiv dwar il-ħelsien ta' priġunieri oħra,

E.

billi riċentement ittieħdu passi pożittivi mill-Gvernijiet ta' Iżrael u tal-Libanu biex jibdlu priġunieri mal-fdalijiet ta' suldati Iżraeljani,

F.

billi l-Iżrael qed iżomm madwar 1 000 priġunier abbażi ta' “ordnijiet ta' detenzjoni amministrattiva”, bid-dritt tal-appell iżda bla ebda akkuża, proċess tal-qorti u drittijiet ta' difiża; billi tali “ordnijiet ta' detenzjoni amministrattiva” jistgħu jkunu, u f'xi każi tabilħaqq ikunu, mtawla għal ħafna snin,

G.

billi rapporti dwar id-drittijiet tal-bniedem jiddikjaraw li l-priġunieri Palestinjani huma suġġetti għal abbuż u l-użu tat-tortura,

H.

billi sikwit ikun impossibbli jew diffiċli ħafna għall-maġġoranza l-kbira tal-priġunieri Palestinjani miżmuma fil-ħabsijiet li jinsabu fit-territorju Iżraeljan biex jeżerċitaw id-dritt tagħhom għal żjarat mill-familji tagħhom, minkejja t-talbiet tal-Kumitat Internazzjonali tas-Salib l-Aħmar lill-Iżrael,

I.

billi l-kwistjoni tal-priġunieri politiċi għandha implikazzjonijiet politiċi, soċjali u umanitarji importanti, u l-arrest ta' 48 membru elett tal-Kunsill Leġiżlattiv Palestinjan u kunsilliera lokali oħra ġab konsegwenzi serji għall-iżviluppi politiċi fit-territorju Palestinjani Okkupati, billi d-'Dokument tal-Priġunieri', adottat f'Mejju 2006 minn mexxejja politiċi Palestinjani ta' fazzjonijiet differenti li qegħdin il-ħabs, serva bħala bażi għar-rikonċiljazzjoni nazzjonali u witta t-triq għat-twaqqif ta' gvern ta' unità nazzjonali,

J.

billi r-relazzjonijiet bejn il-Komunitajiet Ewropej u l-Iżrael, skont l-Artikolu 2 tal-Ftehim ta' Assoċjazzjoni bejn l-UE u l-Iżrael, huma bbażati fuq ir-rispett għad-drittijiet tal-bniedem u fuq il-prinċipji demokratiċi li jikkostitwixxu element essenzjali ta' dik il-ftehim; billi l-Pjan ta' Azzjoni UE-Iżrael jenfasizza r-rispett għad-drittijiet tal-bniedem u għal-liġi umanitarja internazzjonali bħala valuri fost il-valuri komuni għall-partijiet,

1.

Jilqa' b'sodisfazzjon id-deċiżjoni reċenti tal-Gvern Iżraeljan li jeħles numru ta' priġunieri Palestinjani, billi dan huwa ġest pożittiv għat-tisħiħ tal-awtorità tal-Awtorità Palestinjana u biex tinħoloq klima ta' fiduċja reċiproka;

2.

Jitlob biex jittieħdu passi minn Ħamas u l-Iżrael bl-għan li jinħeles immedjatament il-kapural Iżraeljan Gilad Shalit;

3.

Jenfasizza li l-kwistjoni tal-priġunieri Palestinjani hija waħda li tħalli impatt kbir ħafna kemm fuq is-soċjetà Palestinjana u kemm fuq il-kunflitt bejn l-Iżraeljani u l-Palestinjani u jikkunsidra li, f'dan il-kuntest, il-ħelsien ta' numru sostanzjali ta' priġunieri Palestinjani, kif ukoll il-ħelsien immedjat tad-detenuti li huma membri tal-Kunsill Leġiżlattiv Palestinjan, inkluż Marwan Barghouti, jista' jservi bħala pass pożittiv biex tkun stabbilita l-klima ta' fiduċja reċiproka meħtieġa biex isir progress sostanzjali fin-negozjati għall-paċi;

4.

Jappoġġa t-tħassib leġġittimu tal-Iżrael rigward is-sigurtà; jemmen li l-istat tad-dritt irid ikun irrispettat bis-sħiħ fit-trattament tal-priġunieri kollha, peress li dan huwa pass kruċjali għall-pajjiż demokratiku;

5.

Jistieden lill-Iżrael biex jiggarantixxi li l-istandards minimi tad-detenzjoni jkunu rrispettati, li d-detenuti kollha jitressqu quddiem qorti għall-proċess ġudizzjarju, li jitwaqqaf l-użu tal -ordni ta' etenzjoni amministrattiva', u li jkunu implimentati miżuri adegwati għall-minorenni u d-drittijiet għaż-żjarat lill-priġunieri, f'konformità sħiħa mal-istandards internazzjonali inkluża l-Konvenzjoni dwar id-Drittijiet tat-Tfal u l-Konvenzjoni tan-NU kontra t-Tortura u Trattament jew Pieni oħra Krudili, Inumani jew Degradanti;

6.

Jesprimi t-tħassib tiegħu dwar is-sitwazzjoni tal-priġunieri Palestinjani nisa u priġunieri vulnerabbli, li kif qed jingħad huma suġġetti għal trattament ħażin u nuqqas ta' aċċess għall-kura tas-saħħa;

7.

Jistieden lill-Awtorità Palestinjana biex tagħmel kull sforz biex timpedixxi kwalunkwe azzjoni vjolenti jew terroristika, b'mod partikulari minn ex-priġunieri, b'mod partikulari t-tfal;

8.

Jesprimi t-twemmin tiegħu li t-titjib fir-relazzjonijiet bejn l-UE u l-Iżrael għandu jkun konsistenti ma' u marbut mal-konformità min-naħa tal-Iżrael mal-obbligi kollha skont il-liġi internazzjonali;

9.

Jilqa' b'sodisfazzjon id-deċiżjoni meħuda fit-tmien laqgħa tal-Kunsill ta' Assoċjazzjoni UE-Iżrael li jiġi stabbilit Sottokumitat b'setgħat sħaħ dwar id-Drittijiet tal-Bniedem biex jieħu post il-Grupp ta' Ħidma dwar id-Drittijiet tal-Bniedem attwali; jitlob sabiex jiġu kkonsultati b'mod estensiv u involuti bis-sħiħ l-organizzazzjonijiet għad-drittijiet tal-bniedem u l-organiżazzjonijiet mhux governattivi fl-Iżrael u t-Territorji Palestinjani Okkupati fil-monitoraġġ tal-progress tal-Iżrael biex jikkonforma mal-obbligi tiegħu skont il-liġi internazzjonali;

10.

Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-Gvern Iżraeljan, lill-Knesset, lill-President tal-Awtorità Palestinjana, lill-Kunsill Leġiżlattiv Palestinjan, lir-Rappreżentant Għoli għall-Politika Barranija u s-Sigurtà Komuni, lill-gvernijiet u lill-parlamenti tal-Istati Membri, lis-Segretarju Ġenerali tan-NU, lir-Rappreżentant tal-Kwartett għal-Lvant Nofsani, lill-President tal-Assemblea Parlamentari Ewro-Mediterranja, lill-Kummissarju Għoli tan-NU għad-Drittijiet tal-Bniedem u lill-Kumitat Internazzjonali tas-Salib l-Aħmar.

4.12.2009   

MT

Il-Ġurnal Uffiċjali tal-Unjoni Ewropea

CE 295/49

A.

billi l-Artikolu 11(1) tat-TEU jirrikonoxxi r-rispett għad-drittijiet tal-bniedem bħala wieħed mill-objettivi tal-Politika Komuni għall-Affarijiet Barranini u s-Sigurtà, u billi l-Artikolu 21 il-ġdid tat-TEU, kif introdott mill-Artikolu 1(24) tat-Trattat ta' Liżbona, jirrikonoxxi li “l-azzjonijiet tal-Unjoni fix-xena internazzjonali għandhom ikunu ggwidti mill-prinċpji li wasslu għall-ħolqien, l-iżvilupp u t-tkabbir tagħha stess, u li hi tipprova tippromwovi madwar id-dinja: id-demokrazija, l-istat tad-dritt, l-universalità u l-indiviżibilità tad-drittijiet tal-bniedem u l-libertajiet fundamentali, ir-rispett lejn id-dinjità tal-bniedem, il-prinċipji tal-ugwaljanza u s-solidarjetà u r-rispett lejn il-prinċipji tal-Karta tan-Nazzjonijiet Uniti u l-liġi internazzjonali”,

B.

billi s-sanzjonijiet huma applikati sabiex jintlaħqu objettivi speċifiċi stipulati fl-Artikolu 11 tat-TEU, li jinkludu, iżda mhumiex limitati għal, promozzjoni tar-rispett għad-drittijiet tal-bniedem u l-libertajiet fundamentali, id-demokrazija, l-istat tad-dritt u t-tmexxija tajba,

C.

billi l-Prinċipji Bażiċi dwar l-Użu ta' Miżuri Restrittivi (Sanzjonijiet) fuq imsemmija huma l-ewwel dokument pragmatiku li jiddefinixxi l-qafas li fi ħdanu l-UE timponi s-sanzjonijiet; billi, madankollu, l-UE ilha tagħmel hekk mill-bidu tas-snin tmenin u b'mod partikulari, wara d-dħul fis-seħħ tat-TEU fl-1993; billi dan id-dokument formalment jistabbilixxi sanzjonijiet bħala strument tas-CFSP u, bħala riżultat, jirrappreżenta punt ta' tluq għal politika tal-UE dwar is-sanzjonijiet,

D.

billi din il-politika ta' sanzjonijet hija bbażata fuq il-ħames objettivi li ġejjin fi ħdan is-CFSP: biex ikunu ssalvagwardjati l-valuri komuni, l-interessi fundamentali, l-indipendenza u l-integrità tal-Unjoni f'konformità mal-prinċipji tal-Karta tan-Nazzjonijiet Uniti; biex tissaħħaħ is-sigurtà tal-Unjoni b'kull mod; biex tinżamm il-paċi u tissaħħaħ is-sigurtà internazzjonali, f'konformità mal-prinċipji tal-Karta tan-Nazzjonijiet Uniti u l-Att Finali ta' Ħelsinki, kif ukoll l-objettivi tal-Karta ta' Pariġi, inklużi dawk tal-fruntieri esterni; biex tiġi promossa l-koperazzjoni internazzjonali; biex tiġi żviluppata u kkonsolidata d-demokrazija u l-istat ta' dritt kif ukoll ir-rispett tad-drittijiet tal-bniedem u l-libertajiet fundamentali,

E.

billi l-kunsens internazzjonali qed jikber li ħsara serja u volontarja kkawżata lill-ambjent thedded il-paċi u s-sigurtà tad-dinja u tikkostitwixxi ksur tad-drittijiet tal-bniedem,

F.

billi l-UE hija mpenjata għall-implimentazzjoni sistematika ta' sanzjonijiet deċiżi mill-Kunsill tas-Sigurtà tan-Nazzjonijiet Uniti skond il-Kapitolu VII tal-Karta tan-NU u fl-istess waqt timponi sanzjonijiet awtonomi fl-assenza ta' mandate tal-Kunsill tas-Sigurtà tan-NU, f'każi fejn il-Kunsill tas-Sigurtà tan-NU ma jkollux is-setgħa li jieħu azzjoni jew ikun imċaħħad milli jagħmel dan minħabba nuqqas ta' ftehim fost il-membri tiegħu; jisħaq, f'dan ir-rigward, l-obbligu li kemm in-NU u kif ukoll l-UE għandhom li jimponu sanzjonijiet bi qbil mal-liġi internazzjonali,

G.

billi l-politika tas-sanzjonijiet tal-UE għalhekk tinkorpora jew timxi fuq is-sanzjonijiet tal-Kunsill tas-Sigurtà tan-NU, iżda l-ambitu u l-objettivi tagħha huma usa' minn dawk tal-politika tal-Kunsill tas-Sigurtà tan-NU (il-paċi u s-sigurtà internazzjonali),

H.

billi s-sanzjonijiet huma wieħed mill-istrumenti li l-UE jista' tuża biex timplimenta l-politika tagħha dwar id-drittijiet tal-bniedem; ifakkar li l-użu tas-sanzjonijiet għandu jkun l-aħħar tentattiv, fil-lista ta' prijoritajiet, biex jintlaħqu l-għanijiet speċifiċi tas-CFSP u għandu jkun konsistenti mal-istrateġija ġenerali tal-Unjoni fil-qasam ikkonċernat, billi l-effikaċja tas-sanzjonijiet tiddependi mill-applikazzjoni simultanja tagħhom mill-Istati Membri kollha,

I.

billi ma hemm ebda definizzjoni ta' awtorità ta' x'inhi sanzjoni, skont il-liġi internazzjonali jew il-liġi tal-UE/KE; billi madankollu, fi ħdan il-qafas tas-CFSP, sanzjonijiet jew miżuri restrittivi huma meqjusa bħala miżuri li jinterrompu jew inaqqsu r-relazzjonijiet diplomatiċi jew ekonomiċi kollha, jew xi parti minnhom, ma' xi pajjiż terz, wieħed jew aktar minn wieħed, u jippruvaw jiksbu bidla f'ċerti attivitajiet jew politiki, bħal vjolazzjonijiet tal-liġi internazzjonali jew tad-drittijiet tal-bniedem, jew politiki li ma jirrispettawx l-istat tad-dritt jew il-prinċipji demokratici minn gvernijiet ta' pajjiżi terzi, entitajiet mhux statali jew persuni ġuridiċi u legali,

J.

billi t-tipi ta' miżuri ristrettivi jinkludu varjetà ta' miżuri bħal embargi tal-armi, restrizzjonijiet kummerċjali, sanzjonijiet finanzjari/ekonomiċi, iffriżar ta' assi, projbizzjoni ta' titjir, restrizzjonijiet għad-dħul f'pajjiż, sanzjonijiet diplomatiċi, bojkotts ta' avvenimenti sportivi jew kulturali, l-iġġammjar ta' stazzjonijiet tar-radju jew tat-televiżjoni u sospensjoni ta' koperazzjoni ma' pajjiż terz,

K.

billi, b'konformità mal-prattika ġenerali l-UE, din ir-riżoluzzjoni ma tagħmel ebda distinzjoni bejn it-termini “sanzjonijiet” u “miżuri ristrettivi”; billi din ir-riżoluzzjoni tiddefinixxi mill-ġdid il-miżuri xierqa li jinsabu fl-Artikolu 96 tal-Ftehima Cotonou (16),

L.

billi s-sanzjonijiet infushom tal-UE huma bbażati fuq għadd ta' bażijiet legali li jiddependu min-natura speċifika tal-miżuri restrittivi u n-natura legali tar-relazzjonijiet mal-pajjiż terz konċernat, kif ukoll mis-setturi u l-objettivi kkonċernati; billi dawn il-fatturi jiddeterminaw kemm il-proċedura għall-adozzjoni tas-sanzjonijiet — li bosta drabi, għalkemm mhux dejjem, tkun teħtieġ Pożizzjoni Komuni tas-CFSP u għalhekk l-unanimità fil-Kunsill — kif ukoll il-proċedura leġiżlattiva li trid tiġi segwita sabiex tagħmel is-sanzjonijiet legalment vinkolanti u infurzabbli, billi l-proċedura komuni hija dik stipulata fl-Artikolu 301 tat-Trattat KE,

M.

billi l-projbizzjoni tal-viża u l-embargi fuq l-armi saru l-aktar sanzjonijiet komuni imposti fi ħdan is-CFSP u huma wieħed mill-ewwel passi fis-sekwenza ta' sanzjonijiet tal-UE; billi dawn iż-żewġ tipi ta' miżuri huma l-uniċi miżuri implimentati direttament mill-Istati Membri minħabba l-fatt li ma jirrikjedux leġiżlazzjoni dwar sanzjonijiet speċifiċi fi ħdan it-Trattat KE; billi, min-naħa l-oħra, is-sanzjonijiet finanzjarji (l-iffriżar tal-assi) u s-sanzjonijiet kummerċjali jirrikjedu l-adozzjoni ta' leġiżlazzjoni dwar sanzjonijiet speċifiċi,

N.

billi, skont il-prinċipji bażiċi dwar l-użu ta' miżuri restrittivi (sanzjonijiet) fuq imsemmija u skont il-linji gwida dwar is-suġġett, sanzjonijiet immirati jistgħu ikunu aktar effettivi minn sanzjonijiet aktar ġenerali, u huma għaldaqstant preferibbli, l-ewwel nett għaliex jevitaw konsegwenzi negattivi għal porzjon akbar tal-popolazzjoni u, t-tieni nett, għaliex jaffettwaw direttament lin-nies responsabbli u għaldaqstant ikollhom aktar ċans li jwasslu għall-bdil fil-politika segwita minn dawk in-nies,

O.

ir-rikonoxximent tal-eżistenza ta' miżuri li, filwaqt li huma adottati mill-Kunsill fil-Konklużjoni tal-Presidenza, mhumiex imsejħa “sanzjonijiet” u huma differenti, fl-istess waqt, mill-miżuri risterttivi l-oħrajn elenkati bħala għodda tas-CFSP,

P.

billi r-relazzjonijiet ekonomiċi bejn l-UE u l-pajjiżi terzi spiss huma rregolati minn ftehimiet settorjali bilaterali u multi laterali li l-UE hija mitluba tirrispetta waqt lit kun qed tapplika s-sanzjonijiet; billi, fejn ikun jenħtieġ, l-UE għandha għalhekk tissospendi u tiċħad il-ftehima rilevanti qabel ma tapplika sanzjonijiet eknomiċi li mhumiex kompatibbli mad-drittijiet mogħtija lill-pajjiż terz inkwistjoni permezz ta' ftehima eżistenti,

Q.

billi r-relazzjonijiet bejn l-UE u pajjiżi terzi huma bosta drabi regolati minn ftehimiet bilaterali jew multilaterali li jippermettu lil waħda mill-partijiet biex tieħu l-miżuri xierqa f'każijiet ta' vjolazzjoni mill-parti l-oħra ta' element essenzjali tal-ftehima, bħar-rispett tad-drittijiet tal-bniedem, il-liġi internazzjonali, il-prinċipji demokratiċi u l-istat tad-dritt (klawsola tad-drittijiet tal-bniedem), bil-Ftehima ta' Cotonou tkun eżempju prominenti ta' dan,

R.

billi l-introduzzjoni u l-implimentazzjoni tal-miżuri ristrettivi għandhom jikkonformaw mad-drittijiet tal-bniedem u mal-liġi umanitarja internazzjonali, inkluż proċess adattat u d-dritt għal rimedju effettiv, kif ukoll proporzjonalità, u għandha tipprovdi għall-eżenzjonijiet xierqa sabiex tqis il-ħtiġijiet umani bażiċi tal-persuni fil-mira, bħal aċess għall-edukazzjoni primarja, aċċess għal ilma tax-xorb u aċċess għal kura medika bażika inkluża mediċina bażika; billi politika ta' sanzjonijiet trid tikkunsidra b'mod sħiħ l-istandards stabbiliti fil-Konvenzjoni ta' Ġinevra, fil-Konvenzjoni dwar id-Drittijiet tat-Tfal u l-Patt Internazzjonali dwar id-Drittijiet Ekonomiċi, Soċjali u Politiċi, kif ukoll ir-riżoluzzjonijiet tan-NU li jikkonċernaw il-ħarsien taċ-ċivili u tat-tfal fil-kunflitti bl-armi,

S.

billi il-kredibilità tal-UE u tal-Istati Membri individwali tagħha tkun kompromessa meta is-sanzjonijiet tal-UE jidhru li jkunu qed jinkisru, u billi Robert Mugabe ġie mistieden għal-Lqagħa Għolja bejn l-UE u l-Afrika bejn it-8 u d-9 ta' Diċembru 2007 minkejja li kien formalment ipprojbit li jidħol fi kwalunkwe territorju tal-Istati membri tal-UE skond il-Pożizzjoni Komuni tal-Kunsill 2004/161/CFSP tad-19 ta' Frar 2004 li ġġedded miżuri ristrettivi kontra ż-Żimbabwe kif estiża (17) l-aktar riċenti mill-Pożizzjoni Komuni tal-Kunsill 2008/135/CFSP tat-18 ta' Frar 2008 (18),

1.

Jiddeplora l-fatt li s'issa għadhom ma saru ebda evalwazzjoni jew studju tal-impatt tal-politika tal-UE dwar is-sanzjonijiet u għalhekk huwa diffiċli ħafna li jitkejlu l-effetti u l-effikaċja tagħhom b'mod prattiku u li wieħed jasal għall-konklużjonijiet meħtieġa; jitlob lill-Kunsill u lill-Kummissjoni biex jagħmlu dan ix-xogħol ta' evalwazzjoni; jikkunsidra, madankollu, li l-politika tas-sanzjonijiet użata kontra l-Afrika ta' Isfel kienet effettiva sabiex tgħin ittemm l-apartheid;

2.

Iqis li d-differenzi fil-bażijiet legali għall-implimentazzjoni tal-politika dwar is-sanzjonijiet tal-UE, li jinvolvu proċeduri differenti ta' teħid ta' deċiżjonijiet, implimentazzjoni differenti u livelli ta' superviżjoni differenti, qed idgħajfu t-trasparenza u l-koerenza tal-politika tal-UE dwar is-sanzjonijiet u, b'riżultat ta' dan, il-kredibilità tagħha;

3.

Iqis li sabiex is-sanzjonijiet ikunu effettivi l-introduzzjoni tagħhom għandha tidher li hija leġittima fl-opinjoni pubblika, kemm dik Ewropea kif ukoll dik internazzjonali, u wkoll fil-pajjiżi fejn huma mistennija li jsiru l-bidliet; jisħaq li konsultazzjoni mal-Parlament waqt il-proċess ta' teħid ta' deċiżjonijiet tagħtihom aktar leġittimità;

4.

Jinnota wkoll li s-sanzjonijiet jista' jkollhom valur simboliku bħala espressjoni ta' kundanna morali mill-UE u b'hekk jikkontribwixxu biex isaħħu l-viżibilità u l-kredibilità tal-politika barranija tal-UE; iwissi, madankollu, sabiex ma ssirx wisq enfażi fuq l-idea tas-sanzjonijiet bħala miżuri simboliċi, minħabba li dan jista' jwassal sabiex jitnaqqas totalment il-valur tagħhom;

5.

Iqis li r-rikors għas-sanzjonijiet għandu jiġi kkunsidrat fil-każ ta' azzjonijiet minn awtoritajiet jew entitajiet mhux statali jew persuni fiżiċi u legali li jagħmlu ħsara serja għas-sigurtà u d-drittijiet tal-bniedem jew fejn possibiltajiet oħra kuntrattwali u/jew diplomatiċi ġew imfittxija jew ma jkunux jistgħu jitkomplew, minħabba azzjonijiet ta' partijiet terzi;

6.

Huwa tal-fehma li kull degradazzjoni volontarja u irriversibbli tal-ambjent tikkostitwixxi theddida għas-sigurtà, kif ukoll vjolazzjoni serja tad-drittijiet tal-bniedem; għalhekk, jitlob lill-Kunsill u lill-Kummissjoni biex jinkludu kwalunkwe ħsara volontarja u irriversibbli għall-ambjent bħala mottiv li jista' jwassal għall-adozzjoni ta' sanzjonijiet;

7.

Jirrikonoxxi li l-istrumenti ġenerali ta' sanzjonijiet tal-UE huma ġeneralment użati b'mod flessibbli skond il-ħtieġa fuq bażi ta' kull każ għalih; madankollu jiddeplora l-fatt li bosta drabi l-UE applikat il-politika għas-sanzjonijiet tagħha b'mod inkonsistenti billi ttrattat b'mod differenti pajjiżi terzi minkejja li r-rekord tagħhom rigward id-drittijiet tal-bniedem u d-demokrazija huwa l-istess, u b'hekk qed tagħti lok għal kritika li hija qiegħda tapplika standards differenti;

8.

Jemmen li, f'dan ir-rigward, l-applikazzjoni u l-evalwazzjoni ta' sanzjonijiet min-naħa tal-Unjoni Ewropea fir-rigward ta' ksur ta' drittijiet ta' bniedem, għandhom bħala prinċipju jkunu aktar dominanti fuq il-ħsara li tirriżulta mill-applikazzjoni tagħhom fl-interessi tal-Unjoni Ewropea u ċ-ċittadini tagħha;

9.

Jiddispjaċih li n-nuqqas ta' qbil fl-Unjoni Ewropea dwar il-politika li għandha tiġi applikata fir-rigward ta' ċerti pajjiżi, bħal Kuba, jew ir-riluttanza tal-Istati Membri biex ifixklu lill-imsieħba kummerċjali kbar bħar-Russja, wasslu sabiex l-Unjoni tadotta biss “sanzjonijiet informali” fil-konklużjonijiet tal-Presidenza, li jwasslu għall-applikazzjoni żbilanċjata jew inkoerenti tas-sanzjonijiet tal-Unjoni; jirrikonoxxi madankollu li l-miżuri li jidhru fil-konklużjonijiet tal-Kunsill, bħar-rapport tal-iffirmar tal-ftehimiet ma' ċerti pajjiżi, bħas-Serbja, jistgħu jagħmlu pressjoni effettiva fuq il-pajjiżi terzi sabiex dawn jikkolaboraw bi sħiħ mal-mekkaniżmi internazzjonali;

10.

ifakkar li, f'dak li jikkonċerna lil Kuba, il-pożizzjoni komuni li ġiet adottata fl-1996, li ġiet mġedda kull tant żmien, tirrifletti l-pjan għal transizzjoni paċifika lejn id-demokrazija, għadha fis-seħħ bis-sħiħ u ma hi suġġett ta' ebda kontroversja fl-istituzzjonijiet Ewropej; jisgħobbih li, sal-lum, ma kien hemm ebda titjib sinifikattiv f'dak li għandu x'jaqsam mad-drittijiet tal-bniedem; jieħu nota tad-deċiżjoni tal-Kunsill tal-20 ta' Ġunju 2008 biex jitneħħew is-sanzjonijiet informali li jirrigwardjaw lil Kuba, filwaqt li sejjħet għall-ħelsien minnufih u bla kondizzjonijiet tal-priġunieri politiċi kollha, li jiġi ffaċilitat l-aċċess għall-ħabsijiet u li jiġi rratifikat u implimentat il-Patt Internazzjonali dwar id-Drittijiet Ċivili u Politiċi; jinnota li l-Kunsill se jiddeċiedi fi żmieni sena jekk huwiex se jkompli bid-djalogu politiku ma' Kuba, skond jekk ikunx hemm jew le titjib sinifikanti fir-rigward tad-drittijiet tal-bniedem; ifakkar li l-pożizzjoni tal-Kunsill hija waħda li torbot fuq l-istituzzjonijiet tal-Unjoni Ewropea fir-rigward tad-djalogu kemm mal-awtoritajiet Kubani kif ukoll mar-rappreżentanti tas-soċjetà ċivili; itenni l-pożizzjoni tiegħu fir-rigward tar-rebbieħa tal-premju Sakharov Oswaldo Payá Sardiñas u l-grupp magħruf bħala “Damas de Blanco” (“Nisa bl-Abjad”);

11.

Iqis li l-argument tal-“ineffettività” tas-sanzjonijiet ma tistax tintuża bħala argument favur li dawn jitwaqqfu u li minflok għandha tintuża għar-rijorjentament u l-evalwazzjoni mill-ġdid tas-sanzjoni nnfisiha; barra minn hekk, huwa tal-fehma li t-tkomplija jew le tas-sanzjonijiet għandha tiddependi biss minn jekk l-objettivi ġewx milħuqa jew le u jqis li t-tip ta' dawn is-sanzjonijiet jista' jisaħħaħ jew jinbidel fuq il-bażi ta' evalwazzjoni tagħhom; iqis li għal dan il-għan, is-sanzjonijiet għandhom dejjem ikunu akkumpanjati minn parametri ċari;

12.

Iqis li l-effettività tas-sanzjonijiet għandha tiġi analizzata f'bosta livelli, kemm fil-livell tal-effettività intrinsika tal-miżuri, jiġifieri l-kapaċità tagħhom li jħallu impatt fuq l-attivitajiet privati jew professjonali tal-persuni li għandhom l-iskop li jolqtu, kif ukoll fuq membri tar-reġim li jrid jintlaqat, jew fuq l-operat tiegħu, u wkoll fil-livell tal-effettività politika tagħhom, jiġifieri kemm huma kapaċi jwaqqfu jew jibdlu l-attivitajiet jew il-politiki li kienu l-kawża li ġew adottati;

13.

Jemmen li l-effettività ta' sanzjoni tiddependi fuq il-kapaċità tal-Unjoni li żżommha għall-perjodu sħiħ u, f'dan ir-rigward, jiddeplora l-użu ta' dispożizzjonijiet bħall-klawżoli “sunset” li jinvolvu t-tmiem awtomatiku tas-sanzjonijiet;

14.

Jopponi l-applikazzjoni f'kull ċirkostanza, ta' sanzjonijiet ġeneralizzati u indiskriminatorji fil-konfront ta' kwalunkwe pajjiż, billi dan l-approċċ de facto jwassal għall-iżolament total ital-popolazzjoni; iqis li, sakmm ma jiġux ikkoordinati ma' strumenti politiċi oħra, is-sanzjonijiet ekonomiċi jista' jkollhom suċċess biss b'diffikultà kbira fl-iffaċilitar ta' riforma politika fi ħdan ir-reġim ikkonċernat; għalhekk jinsisti li kwalunkwe sanzjoni imposta fuq awtoritajiet governattivi għandha tkun akkumpanjata sistematikament minn appoġġ għas-soċjetà ċivili tal-pajjiż ikkonċernat;

15.

Jiġbed l-attenzjoni li l-biċċa l-kbira tas-sanzjonijiet tal-UE qed jiġu imposti minħabba tħassib dwar is-sigurtà; jenfasizza madanakollu li ksur tad-drittijiet tal-bniedem għandu jikkostitwixxi bażi suffiċjenti għall-applikazzjoni ta' sanzjonijiet minħabba li jirrapreżenta wkoll theddida għas-sigurtà u l-istabilità;

16.

Jiġbed l-attenzjoni li l-iskop ewlieni tas-sanzjonijiet huwa li jwassal għal bidla tal-politika jew tal-attivitajiet skond l-objettivi tal-Pożizzjoni Komuni tas-CFSP jew skond il-konklużjonijiet adottati mill-Kunsill jew id-deċiżjoni internazzjonali li fuqha huma bbażati s-sanzjonijiet;

17.

Jinsisti fuq il-fatt li l-Kunsill, billi jadotta l-Prinċipji Bażiċi msemmija hawn fuq dwar l-Użu ta' Misuri Ristrettivi (Sanzjonijiet), impenja ruħu li juża sanzjonijiet bħala parti minn approċċ politiku komprensiva u integrata; jenfasizza li f'dan ir-rigward, li dan l-approċċ fl-istess ħin jinkludi djalogu politiku, inċentivi u kundizzjonalità u jista' jinvolvi wkoll, jekk ma jkunx hemm għażla oħra, l-użu ta' miżuri koersivi, kif stabbiliti fil-Prinċipji Basiċi; iqis li d-drittijiet tal-bniedem u l-klawsoli tad-demokrazija, is-sistemi ta' preferenzi ġeneralizzati u l-għajnuna għall-iżvilupp għandhom jintużaw bħala għodod ta' dan l-approċċ politiku komprensiv u integrat;

18.

Jenfasizza li l-implimentazzjoni tal-klawsola dwar id-drittijiet tal-bniedem ma tistax titqies bħala awtonoma jew bħala sanzjoni unilaterali tal-UE minħabba li toħroġ direttament mill-ftehima bilaterali jew multilaterali li tistabblixxi impenn reċiproku għar-rispett tad-drittijiet tal-bniedem; iqis li l-miżuri xierqa li ttieħdu b'konformità ma' din il-klawsola jikkonċernaw biss l-implimentazzjoni tal-ftehima kkonċernata billi kull parti ngħatat il-bażi legali għas-sospensjoni jew l-annullament tal-ftehima; iqis għalhekk, li l-implimentazzjoni tad-drittijiet tal-bniedem u s-sanzjonijiet awtonomi jew unilaterali neċessarjament jikkomplementaw lil xulxin;

19.

Għalhekk, jilqa' b'sodisfazzjon l-inklużjoni sistematika tal-klawsoli dwar id-drittijiet tal-bniedem u jinsisti dwar l-inkorporazzjoni ta' mekkaniżmu ta' implimentazzjoni speċifiku fil-ftehimiet bilaterali ġodda kollha ffirmati ma' pajjiżi terzi, inklużi ftehimiet dwar setturi speċifiċi; ifakkar, f'dan ir-rigward, l-importanza tar-rakkomandazzjonijiet maħruġa bil-għan li jwasslu għal implimentazzjoni iktar effettiva u sistematika tal-klawsola, jiġifieri l-ifformolar ta'-objettivi u ta' kriterji ta' riferenza u ta' evalwazzjoni regolari, u jtenni t-talba tiegħu sabiex il-klawsoli dwar id-drittijiet tal-bniedem jiġu implimentati permezz ta' proċedura aktartrasparenti ta' konsultazzjoni bejn il-partijiet, inklużi il-Parlament Ewropew u s-soċjetà ċivili, li ssemmi il-mekkaniżmi politikċi u legali li għandhom jintuża fil-każ ta' talba għas-sospensjoni ta' kooperazzjoni bilaterali fuq il-bażi ta' ksur ripetut u/jew sistematiku tal-liġi internazzjonali; jagħti l-appoġġ tiegħu għall-mudell ta' proċedura stabbilit bil-Ftehima ta' Cotonou bħala reazzjoni għal ksur serju tad-drittijiet tal-bniedem, tal-prinċipji demokratiċi, u tal-istat tad-dritt; jemmen li s-sistema ta' djalogu politiku intensiv (l-Artikolu 8 tal-Ftehima ta' Cotonou) u ta' konsultazzjonijiet (l-Artikolu 96 tal-Ftehima ta' Cotonou), qabel u wara l-adozzjoni tal-miżuri adattati, f'bosta każijiet serviet ta' strument li rnexxa biex titjieb is-sitwazzjoni attwali;

20.

Iħeġġeġ lill-Kummissjoni u lill-Istati Membri biex ma jipproponux ftehimiet ta' kummerċ ħieles u/jew ta' assoċjazzjoni — anki bi klawżoli dwar id-drittijiet tal-bniedem — lil gvernijiet ta' pajjiżi fejn hemm għadd kbir ħafna ta' ksur tad-drittijiet tal-bniedem, skond ir-rapporti tal-Uffiċċju tal-Kummissarju Għoli għad-Drittijiet tal-Bniedem tan-Nazzjonijiet Uniti;

21.

Iqis li n-nuqqas ta' miżuri xierqa u restrittivi fil-każ ta' sitwazzjoni kkaratterizzata minn ksur persistenti tad-drittijiet tal-bniedem idgħajjef b'mod serju l-istrateġija dwar id-drittijiet tal-bniedem, il-politika ta' sanzjonijiet u l-kredibilità tal-Unjoni;

22.

Iqis li politika tas-sanzjonijiet tkun iktar effettiva meta tkun tifforma parti minn strateġija soda tad-drittijiet tal-bniedem; jerġa' jtenni t-talba tiegħu lill-Kunsill u lill-Kummissjoni biex jiżviluppaw strateġija speċifika dwar id-drittijiet tal-bniedem u dwar is-sitwazzjoni fil-qasam tad-demokrazijaf'kull dokument strateġiku ta' kull pajjiż u f'kull dokument ieħor tal-istess natura;

23.

Iqis li fil-każ tal-impożizzjoni ta' sanzjonijiet, id-djalogi u l-konsultazzjonijiet dwar id-drittijiet tal-bniedem għandhom neċessarjament u sistematikament jinkludu diskussjonijiet dwar il-progress li jkun sar għall-kisba tal-objettivi u l-kriterji ta' riferenza (benchmarks) stabbiliti fiż-żmien tal-adozzjoni tal-miżuri ristrettivi; iqis, fl-istess waqt, li l-objettivi miksuba fid-djalogi u l-konsultazzjonijiet dwar id-drittijiet tal-bniedem m'għandhom f'ebda ċirkustanza jieħdu post il-kisba tal-objettivi li fuqhom jibbażaw is-sanzjonijiet;

24.

Huwa tal-opinjoni li azzjoni koordinata mill-komunità internazzjonali għandha impatt iktar qawwi milli azzjonijiet individwali u mhux ugwali bejn l-Istati jew bejn entitajiet reġjonali; għalhekk, jilqa' b'sodisfazzjon il-fatt li l-politika ta' sanzjonijiet tal-Unjoni Ewropea għandha tkompli tiddependi fuq il-preferenza għas-sistema tan-NU;

25.

Jistieden lill-Kunsill, fin-nuqqas ta' sanzjonijiet tal-Kunsill tas-Sigurtà tan-Nazzjonijiet Uniti, biex jikkopera mal-Istati mhux fl-UE li qed japplikaw sanzjonijiet, biex jaqsmu l-informazzjoni, u biex jikkoordinaw is-sanzjonijiet tagħhom fuq livell internazzjonali biex jevitaw l-evażjoni ta' sanzjonijiet u biex jimmassimizzaw l-effettività u l-implimentazzjoni tas-sanzjonijiet tal-UE u ta' oħrajn;

26.

Iqis li l-UE għandha tfittex koperazzjoni ma' organizzazzjonijiet reġjonali oħra, bħall-Unjoni Afrikana u l-Assoċjazzjoni ta' Nazzjonijiet tax-Xlokk tal-Ażja (ASEAN), għall-promozzjoni tad-drittijiet tal-bniedem u biex tiżgura kordinazzjoni tal-azzjonijiet dwar is-sanzjonijiet;

27.

Jistieden lill-Unjoni Ewropea biex tiżviluppa b'mod sistematiku djalogu mal-Istati li ma japplikawx is-sanzjonijiet, bi l-għan li tintlaħaq pożizzjoni komuni dwar il-miżuri ristrettivi, b'mod partikolari fuq livell reġjonali; jiġbed l-attenzjoni li bħal ma wriet is-sitwazzjoni fil-Burma/Myanmar, is-sanzjonijiet ta' sikwiet ma jwasslux għat-tibdil politiku jew għat- tibdil fl-attivitajiet li tant huma meħtieġa meta l-Komunità internazzjonali tkun maqsuma u meta l-parteċipanti ewlenin tal-Komunità ma jipparteċipawx fl-implimentazzjoni tas-sanzjonijiet;

28.

Jistieden lill-Kunsill u lill-Kummissjoni sabiex sitematikament jinkludu fl-aġenda għal djalogi politiki ma' stati li jipparteċipaw fis-sanzjonijiet il-kwistjoni tal-irwol tagħhom fil-konfront tar-reġim jew tal-parteċipanti li mhumiex parti mill-istat, sew jekk individwi, organizzazzjonijiet jew inkella kumpaniji;

29.

Iqis li l-prospett tal-iffirmar ta' ftehima ta' kummerċ ħieles mar-reġjuni li fihom jinsab pajjiż li huwa l-mira għandu jintuża bħala “karrotta” u mezz ta' pressjoni u li ftehima bħal din għandha, fi kwalunkwe każ, teskludi l-pajjiż li fil-konfront tiegħu qed jiġau applikati sanzjonijiet;

30.

Jenfasizza l-bżonn ta' analiżi profonda ta' kull sitwazzjoni speċifika qabel l-adozzjoni ta' sanzjonijiet, sabiex ikun evalwat l-impatt potenzjali ta' sanzjonijiet differenti u biex ikun determinat liema huma s-sanzjonijiet l-iktar effettivi fl-isfond tal-fatturi l-oħra kollha u tal-esperjenzi komparabbli; iqis li analiżi bħal din tkun iktar iġġustifikata minħabba li huwa diffiċli li wieħed imur lura la darba l-proċess ta' sanzjonijiet inkun inbeda mingħajr ma ssir ħsara la għall-kredibilità tal-UE u lanqas għat-turija ta' appoġġ li l-UE għandha tagħti lill-popolazzjoni tal-pajjiż terz ikkonernat, b'kunsiderazzjoni għall-possibilità għall-awtoritajiet ta' dak il-pajjiż biex jimplimentaw id-deċiżjoni tal-UE; f'dan ir-rigward jinnota l-prattika attwali li fi ħdanhom l-adegwatezza, in-natura u l-effettività tas-sanzjonijiet proposti jiġu diskussi fil-Kunsill fuq il-bażi ta' evalwazzjoni mill-Kapijiet tal-Missjoni fil-pajjiż ikkonċernat, u jitlob l-inklużjoni ta' rapport ta' espert indipendenti f'din l-evalwazzjoni;

31.

Madankollu, jenfasizza li din l-analiżi m'għandhiex tintuża biex iddawwen l-adozzjoni tas-sanzjonijiet; jenfasizza f'dan ir-rigward li l-proċedura maqsuma f'żewġ partijiet għall-impożizzjoni ta' sanzjonijiet taħt is-CFSP tipprovdi ambitu għal reazzjoni politika urġenti, inizjalment permezz tal-adozzjoni ta' pożizzjoni komuni li għandha tiġi stabbilita wara analiżi iktar dettaljata tar-Regolament, fejn jiġu stabbiliti n-natura u l-ambitu eżatti tas-sanzjonijiet;

32.

Jitlob li jkun hemm l-inklużjoni sistematika fl-istrumenti legali tal-kriterji ta' referenza ċari u preċiżi għat-tneħħija ta' sanzjonijiet; jinsisti, b'mod partikolari, li l-kriterji ta' referenza jiġu stabbiliti fuq il-bażi ta' evalwazzjoni indipendenti u li dawk il-kriterji m'għandhomx jinbdilu aktar tard minħabba bidliet politiki fil-Kunsill;

33.

Jitlob lill-Kunsill u lill-Kummissjoni biex iwettqu proċess eżemplari ta' evalwazzjoni tas-sanzjonijiet, proċess li speċjalment jistabbilixxi l-inklużjoni sistematika ta' klawsola ta' evalwazzjoni li timplika li l-iskema ta' sanzjonijiet tkun riveduta skond il-kriterji ta' referenza u wara li jivverifikaw jekk l-objettivi tas-sanzjonijiet ikunux intlaħqu; jinsisti fuq il-fatt li d-dikjarazzjonijiet ta' intenzjoni jew ir-rieda li jkunu stabbiliti proċeduri li jwasslu għal riżultati pożittivi — bħad-djalogi dwar id-drittijiet tal-bniedem — għandhom jintlaqgħu b'sodisfazzjon iżda jisħaq li fl-ebda ċirkustanza, matul l-evalwazzjoni tas-sanzjonijiet, dawn ma jistgħu jkunu sostitwiti mill-progress tanġibbli u ġenwin bi l-għan li jkunu ssodisfati l-kriterji ta' riferenza;

34.

Iqis li l-embargo fuq l-armi impost fuq iċ-Ċina juri l-koerenza u l-konsistenza tal-Unjoni, billi dan l-embargo oriġinarjament kien ġie deċiż wara l-massakru ta' Tienanmen fl-1989, u li sa llum l-UE għadha ma rċevitx spjegazzjoni dwar dan il-massakru, u għalhekk ma hemm l-ebda raġuni biex jitneħħa dan l-embargo;

35.

Jistieden lill-formazzjoni “Sanctions” tal-Grupp ta' Kunsilliera għar-Relazzjonijiet Esterni (RELEX/Sanction) sabiex josserva b'mod sħiħ il-mandat tiegħu; jinsisti b'mod partikolari dwar il-ħtieġa li titwettaq riċerka qabel u wara l-adozzjoni ta' sanzjonijiet, sabiex tiġi pprovudta b'mod regolari informazzjoni aġġornata dwar l-iżvilupp tas-sitwazzjoni u li jintużaw l-aħjar prattiki rigward l-implimentazzjoni u l-applikazzjoni ta' miżuri ristrettivi;

36.

Jirrikonoxxi li l-istati u kif ukoll organizzazzjonijiet internazzjonali u reġjonali għandhom jinżammu responsabbli għal azzjonijiet internazzjonali inkorretti fl-implimentazzjoni ta' sanzjonijiet u jisħaq f'dan ir-rigward dwar il-ħtieġa ta' mekkaniżmu ġudizzjarju bil-għan li jiggarantixxi konformità mal-liġi internazzjonali u mal-liġi umanitarja;

37.

Jitlob li l-Parlament Ewropew ikun involut fl-istadji kollha tal-proċessi ta' sanzjonijiet: fil-proċessi ta' teħid ta' deċiżjonijiet dwar l-impożizzjoni ta' sanzjonijiet, fl-għażla tal-iktar sanzjonijiet xierqa għas-sitwazzjoni, kif ukoll fid-definizzjoni ta' kriterji ta' referenza u fl-evalwazzjoni tal-implimentazzjoni tagħhom fi ħdan il-qafas tal-mekkaniżmu ta' reviżjoni u t-tneħħija tas-sanzjonijiet;

38.

Jiddeplora l-fatt li, minħabba n-nuqqas ta' evalwazzjoni, huwa impossibbli li wieħed jevalwa l-effikaċja tal-miżuri fil-mira; jirrikonoxxi, madanakollu, it-tħassib umanitarju qawwi tal-Unjoni Ewropea li wassalha biex tabbanduna sanzjonijiet ekonomiċi ġenerali bħal dawk li fil-passat kienet applikat fuq l-Iraq, u minflok timponi sanzjonijiet “intelliġenti”, iktar immirati, maħsuba biex ikollhom impatt massimu fuq dawk li hija tixtieq tinfluwenza l-imġiba tagħhom, filwaqt li tillimita kemm jista' jkun possibbli l-effetti fuq il-livell umanitarju jew il-konsegwenzi negattivi fuq il-persuni mhux immirati jew fuq il-pajjiżi ġirien;

39.

Iqis li s-sanzjonijiet ekonomiċi applikati indipendentement minn strumenti politiċi oħra ftit li xejn huma suxxettibbli li jwasslu lir-reġim immirat biex jagħmel tibdiliet politiċi importanti; jenfasizza barra minn hekk li restrizzjonijiet ekonomiċi estiżi jistgħu jfissru danni ekonomċi u umanitarji kbar eċċessivi u għalhekk jerġa' jtenni l-appoġġ tiegħu favur sanzjonijiet ekonomiċi mmirati aħjar u maħsuba b'aktar attenzjoni, b'mod li essenzjalment ikollhom impatt fuq il-mexxejja prinċipali tar-reġimi kkonċernati u fuq l-awturi ta' ksur tad-drittijiet tal-bniedem;

40.

Jenfasizza li s-sanzjonijiet ekonomiċi għandhom qabel kollox ikunu mmirati lejn dawk is-setturi li ma jħaddmux ħafna nies u li jkunu ta' rilevanza limitata għall-intrapriżi ż-żgħar u ta' daqs medju, billi dawn tal-aħħar huma importanti kemm għall-iżvilupp ekonomiku kif ukoll għat-tqassim mill-ġdid tad-dħul;

41.

Jappoġġja r-rikors għal sanzjonijiet finanzjarji mmirati kontra l-mexxejja ewlenin tar-reġimi fil-mira u l-membri tal-familja immedjata tagħhom, sanzjonijiet li jolqtu direttament id-dħul tal-persuni sanzjonati; jenfasizza l-ħtieġa li dawn is-sanzjonijiet ikunu akkumpanjati minn miżuri xierqa kontra operaturi ekonomiċi tal-UE li jikkooperaw ma' persuni bħal dawn; jenfasizza li s-sanzjonijiet immirati fuq prodotti bażiċi u maħsuba għal sors preċiż jew prinċipali tad-dħul tar-reġim qed jirriskjaw li jkollhom effetti aktar profondi u mingħajr diskriminazzjoni fuq il-popolazzjoni u jinkoraġġixxu l-iżvilupp ta' “ekonomija sewda”;

42.

Iqis li sanzjonijiet ekonomiċi u finanzjarji, anke meta dawn ikunu immirati, għandhom ikunu applikati mill-persuni fiżiċi u l-persuni legali kollha li jiżvolġu attivitajiet kummerċjali fl-UE, inklużi ċittadini ta' pajjiżi terzi u ċittadini tal-UE jew persuni legali reġistrati jew stabbiliti skond il-leġiżlazzjoni ta' Stat Membru tal-UE li jiżvolġu attivitajiet kummerċjali barra mill-UE;

43.

Jitlob li jkun hemm l-applikazzjoni limitata tal-“eżenzjonijiet straordinarji” għall-iffriżar tal-assi; jixtieq li tinħoloq proċedura speċifika għall-oġġezzjonijiet fil-każ meta Stat Membru jkun jixtieq jagħti eżenzjoni għall-iffriżar tal-assi, minħabba li l-effiċjenza tal-miżura ristrettiva hija mxekkla min-nuqqas ta' proċedura bħal din minħabba li l-Istati Membri huma meħtieġa biss li jinfurmaw minn qabel lill-Kummissjoni dwar din it-tip ta' eżenzjoni;

44.

Jitlob li jkun hemm azzjoni biex titjieb l-applikazzjoni tas-sanzjonijiet finanzjarji mmirati tal-Unjoni Ewropea sabiex ikun garantit li, fil-prattika, dawn is-sanzjonijiet iċaħħdu kompletament lill-persuni u lill-entitajiet immirati milli jkollhom aċċess għas-servizzi finanzjarji kollha relevanti għall-ġurisdizzjoni tal-Komunità, inklużi dawk li jgħaddu mill-banek ta' kumpens tal-Unjoni jew milli jagħmlu użu mod ieħor mis-servizzi finanzjarji interni tal-UE; jenfasizza l-ħtieġa li jkun hemm aktar flessibilità fit-tqassim ta' listi ta' sanzjonijiet ġewwa l-UE u fl-Istati Membri lill-persuni kollha milquta mill-obbligi stipulati mit-Tielet Direttiva dwar il-Ħasil tal-Flus (19); jipproponi li kull Stat Membru jinnomina istituzzjoni li tkun responsabbli biex ixxerred din l-informazzjoni;

45.

Jitlob li jkun hemm koperazzjoni msaħħa mill-Kunsill u mill-Kummissjoni mal-maniġment tas-SWIFT u mal-azzjonisti Ewropej sabiex jinkisbu riżultati aħjar fl-iffriżar ta' kontijiet fuq il-lista s-sewda u l-eliminazzjoni ta' trasferimenti ta' flus minn/għal kontijiet bħal dawn;

46.

Jistieden lill-Kunsill u lill-Kummissjoni biex jinvestigaw il-possibilitajiet u l-metodi biex jintuża b'mod kostruttiv id-dħul friżat ta' awtoritajiet immirati, pereżempju billi d-dħul ikun allokat għall-vittmi ta' vjolazzjonijiet tad-drittijiet tal-bniedem jew għal skopijiet ta' żvilupp fi ħdan l-qafas tal-Kapitolu VII tal-Karta tan-NU;

47.

Jiġbed l-attenzjoni li l-embargoes huma forma ta' sanzjoni maħsuba biex twaqqaf il-fluss ta' armi u ta' tgħamir militari f'żoni fejn hemm kunflitt jew għal reġimi li probbabilment jużawhom għar-ripressjoni interna jew għal aggressjoni kontra pajjiż barrani kif stipulat fil-Kodiċi ta' Kondotta dwar l-esportazzjonijiet tal-armi;

48.

Jitlob li jkun hemm koperazzjoni kkoordinata bejn l-Istati Membri u l-Kummissjoni dwar l-implimentazzjoni tal-embargoes tal-armi tal-UE li huma applikati minn kull Stat Membru;

49.

Jistieden lill-Istati Membri biex jadottaw pożizzjoni komuni dwar l-esportazzjonijiet tal-armi li tagħmel il-Kodiċi ta' Kondotta dwar l-esportazzjonijiet tal-armi attwali wieħed li jorbot legalment;

50.

Iħeġġeġ lill-Kunsill, lill-Kummissjoni u lill-Istati Membri biex ikomplu jaħdmu għat-titjib tal-kapaċitajiet ta' monitoraġġ u infurzar tan-NU u jappoġġja l-opinjoni li għandu jkun stabbilit tim permanenti tan-NU biex jevalwa l-kummerċ ta' prodotti bażiċi kunflinġenti u l-valur tas-sanzjonijiet relatati magħhom;

51.

Ifakkar li restrizzjonijiet ta' ammissjoni (projbizzjonijiet ta' vjaġġar, projbizzjonijiet ta' visas) jikkostitwixxu wieħed mill-passi inizjali fis-sekwenza ta' sanzjonijiet tal-UE, inkluż il-projbizzjoni ta' persuni fuq il-lista s-sewda jew ta' entitajiet mhux tal-Istat milli jattendu laqgħat uffiċjali tal-UE u anke milli jivjaġġaw lejn l-UE għal raġunijiet privati;

52.

Jinnota bi tħassib li l-Istati Membri ma osservawx b'mod sħiħ il-projbizzjonijiet ta' visas fl-UE; jistieden lill-Istati Membri biex jadottaw approċċ miftiehem fl-applikazzjoni ta' restrizzjonijiet tal-ivjaġġar u l-klawsoli ta' eżenzjoni relevanti;

53.

Iqis il-fatt li s-sanzjonijiet awtonomi kontra t-terroriżmu tal-UE u l-implimentazzjoni tal-UE tas-sanzjonijiet kontra t-terroriżmu tal-Kunsill tas-Sigurtà tan-Nazzjonijet Uniti huma s-suġġett ta' diversi każijiet quddiem il-Qorti tal-Ġustizzja u l-Qorti ta' Prim' Istanza;

54.

Ifakkar fl-obbligazzjoni tal-Istati Membri biex ifasslu sanzjonijiet skond l-Artikolu 6(2) tat-TEU, li jirrikjedi li l-Unjoni tirrispetta d-drittijiet fondamentali, kif garantiti mill-Konvenzjoni Ewropea dwar id-Drittijiet tal-Bniedem u kif jirriżultaw mit-tradizzjonijiet kostituzzjonali komuni fl-Istati Membri; jenfasizza li l-proċeduri attwali għall-elenkar ta' listi suwed (blacklisting) kemm fil-livell tal-UE u kemm fil-livell tan-NU huma neqsin mill-perspettiva ta' sigurtà legali u minn rimedji legali;iħeġġeġ lill-Kunsill biex jagħmel il-konklużjonijiet kollha meħtieġa u biex japplika b'mod sħiħ id-deċiżjonijiet finali mogħtija mill-Qorti tal-Prim Istanza f'dak li jirrigwarda s-sanzjonijiet awtonomi tal-UE f'dan il-qasam;

55.

Jistieden lill-Kunsill u lill-Kummissjoni biex jirrevedu il-proċedura eżistenti għall-kumplikazzjoni tal-listi s-suwed u għat-tneħħija minn fuq il-listi, sabiex ikunu rispettati d-drittijiet tal-bniedem u primarjament standards internazzjonali fir-rigward tal-kisba ta' rimedju effettiv quddiem entità indipendenti u imparzjali inkluż id-dritt għal proċeduri legali ġusti, li jimplika d-dritt ta' notifika u tagħrif adegwat dwar l-akkużi mressqa kontra l-individwu jew l-entità kkonċernata u tad-deċiżjonijiet meħuda kif ukoll tad-dritt ta' kumpens għal kull vjolazzjoni tad-drittijiet tal-bniedem; jistieden lill-Istati Membri tal-UE biex jippromwovu din ir-reviżjoni fil-mekkaniżmi tan-NU sabiex ikun żgurat rispett tad-drittijiet fundamentali meta jkunu applikati sanzjonijiet immirati fil-ġlieda kontra t-terroriżmu;

56.

Iqis li l-Artikolu 75 tat-Trattat tat-TFEU jkun opportunità li l-Parlament Ewropew għandu jaħtaf biex jirrimedja n-nuqqasijiet tal-prattika attwali rigward l-inklużjoni ta' ismijiet fil-listi s-suwed u jappoġġja l-ħidmiet parlamentari li għaddejjin bħalissa maħsuba biex ikunu inklużi fl-aġenda tal-programm leġiżlattiv għall-2009;

57.

Jesprimi dispjaċir li l-ebda waħda mill-entitajiet ġudizzjarji ma hija f'pożizzjoni li tevalwa kemm il-listi s-suwed huma xierqa minħabba li l-evidenza li twassal għall-elenkar ta' listi suwed hija bbażata fuq tagħrif miżmum mis-servizzi sigrieti, li ipso facto joperaw b'mod sigriet; madankollu, iqis li din id-diskrezzjoni fundamentali m'għandhiex tiġi trasformata f'impunità f'każijiet fejn ikun hemm ksur tal-liġi internazzjonali; jistieden f'dan ir-rigward lill-Istati Membri biex jippermettu kontroll parlamentari effettiv fuq ix-xogħol tas-servizzi sigrieti; iqis li f'dan ir-rigward jinħtieġ li l-Parlament Ewropew jiġi assoċjat max-xogħol li twettaq il-Konferenza tal-Kumitati ta' Superviżjoni tal-Entitajiet ta' Intelliġenza tal-Istati Membri li diġà hija implimentata;

58.

Itenni madankollu li s-sistema ta' listi antiterroristiċi, sakemm tirrispetta l-każistika reċenti stabbilita mill-Qorti tal-Ġustizzja, hija strument effiċjenti tal-politika għal kontra t-terroriżmu tal-Unjoni Ewropea;

59.

Jisħaq li t-terroriżmu huwa theddida għas-sikurezza u l-libertà u għalhekk iħeġġeġ lill-Kunsill jirrevedi u jaġġorna l-lista ta' organizzazzjonijiet terrositiċi, hekk li jqis l-attivitajiet tagħhom fil-kontinenti kollha;

60.

Jinnota li l-UE dejjem ippromwoviet approċċ pożittiv lejn l-użu tas-sanzjonijiet bil-għan li tinkoraġġixxi l-bidla; jisħaq, għal dan il-għan, huwa importanti li tingħata prijorità lil azzjoni globali integrata permezz ta' strateġija progressiva ta' pressjonijiet u inċentivi;

61.

Iqis li strateġija miftuħa u politika ta' sanzjonijiet ma jeskludux waħda lill-oħra; huwa tal-fehma għalhekk li l-politika ta' sanzjonijiet tal-UE tista' tgħin biex ittejjeb ir-rispett għad-drittijiet tal-bniedem fil-pajjiżi milquta b'sanzjonijiet meta jiġu riveduti għall-iskop preciż li tiġi introdotta politika ta' azzjoni pożittiva; f'dan ir-rigward dan jinnota ċ-ċiklu ta' sanzjonijiet imposti fuq l-Użbekistan minn Novembru 2007 sa April 2008: filwaqt li s-sanzjonijiet imposti ssuktaw għal sena oħra minħabba li naqsu milli jissodisfaw il-kriterji inizjali rigward l-investigazzjonijiet dwar il-massakru Andijan u r-rispett għad-drittijiet tal-bniedem, il-Kunsill iddeċieda li jissospendi l-implimentazzjoni tal-projbizzjoni tal-visas, li ħalliet lill-gvern tal-Użbekistan sitt xhur biex jissodisfaw sett ta' kriterji tad-drittijiet tal-bniedem, filwaqt li baqgħet preżenti t-theddida li awtomatikament terġa' tkun stabbilita l-projbizzjoni tal-visas; jinnota li t-taħlita ta' impenji u sanzjonijiet produċiet xi żviluppi pożittivi grazzi għall-possibilità awtomatika li terġa tkun stabbilita l-projbizzjoni tal-visas; jenfasizza li dawn il-kundizzjonijiet għandhom ikunu kapaċi li jkunu ssodisfati f'perjodu ta' żmien limitat u relevanti għar-reġim ta' sanzjoni ġenerali; jiddispjaċih madankollu li ma kien għad hemm ebda żviluppi pożittivi sostanzjali u li n-nuqqas ta' koperazzjoni mal-Gvern ta' Użbek qed ikompli;

62.

Jitlob immedjatament li s-sanzjonijiet ikunu sistematikament akkumpanjati, fil-qafas ta' strateġija multi-fold, minn miżuri pożittivi msaħħa li jappoġġjaw lis-soċjetà ċivili, li jiddefendu d-drittijiet tal-bniedem u kull tip ta' proġett li jippromwovi d-drittijiet tal-bniedem u d-demokrazija; jitlob li l-programi u l-istrumenti tematiċi (EIDHR (20), non-state actors, investing in people), jikkontribwixxu b'mod sħiħ għat-twettiq ta' dan l-objettiv;

63.

Jitlob lill-Kunsill u lill-Kummissjoni sabiex jaħtfu l-opportunità prevista mir-ratifika tat-Trattat ta' Liżbona u mill-ħolqien sussegwenti tas-Servizz Ewropew għal Azzjoni Esterna sabiex jiggarantixxu minimu ta' konsistenza fil-varji strumenti ta' azzjoni esterna tal-UE bħala element ewlieni sabiex il-politika ta' sanzjonijiet tal-UE tkompli ssir effiċjenti;

64.

Jistieden lill-Kunsill u lill-Kummissjoni biex jagħmlu evalwazzjoni komprensiva u ddettaljata tal-politika ta' sanzjonijiet tal-UE biex jiġi determinat x'influwenza din għandha u x'miżuri jistgħu jittieħdu biex tissaħħaħ; iħeġġeġ lill-Kunsill u lill-Kummissjoni biex jissottomettu program għal miżuri bħal dawn; jistieden lill-Kunsill u lill-Kummissjoni biex jevalwaw l-impatt ta' sanzjonijiet fuq il-politika ta' żvilupp tal-pajjiżi taħt eżami u fuq il-politika kummerċjali tal-UE;

65.

Jistieden lill-Kummissjoni biex tiżgura li l-istrateġiji tal-assistenza għall-iżvilupp skond l-Istrument ta' Koperazzjoni għall-Iżvilupp u l-Fond Ewropew għall-Iżvilupp ikunu konsistenti mas-sistemi eżistenti tas-sanzjonijiet u mad-djalogi dwar id-drittijiet tal-bniedem; jistieden lill-Kummissjoni biex tiżgura li l-kundizzjonijiet għall-appoġġ tal-baġit ġenerali, fosthom dawk skond il-’kuntratti tal-Għanijiet tal-Iżvilupp għall-Millennju’, ikunu marbuta b'mod espliċitu mad-drittijiet tal-bniedem u mal-kriterji tad-demokrazija;

66.

Jistieden lill-Kunsill u lill-Kummissjoni biex jieħdu vantaġġ mill-opportunità offruta mir-ratifikazzjoni tat-Trattat ta' Liżbona, il-ħatra ta' Rappreżentant Għoli tal-Unjoni għall-Affarijiet Barranin u għall-Politika ta' Sigurtà — li fl-istess ħin se jkun Viċi-President tal-Kummissjoni u jippresiedi l-Kunsill għall-Affarijiet Barranin — u l-ħolqien sussegwenti tas-Servizz Ewropew ta' Azzjoni Esterna sabiex l-azzjoni esterna tal-UE ssir aktar koerenti u konsistenti, biex titjieb il-ħila esperta tas-servizzi relevanti tal-UE li jaħdmu fl-oqsma tas-sanzjonijiet u biex tissaħħaħ il-koperazzjoni bejn is-servizzi differenti;

67.

Jitlob fl-istess ħin li jkun hemm koperazzjoni msaħħa bejn l-awtoritajiet kompetenti tal-Istati Membri u l-Kummissjoni biex tkun żgurata implimentazzjoni iktar koerenti u effettiva tal-miżuri ristrettivi;

68.

Jistieden ukoll lil dawk l-Istati Membri li huma membri tal-Kunsill tas-Sigurtà tan-NU b'mod sistematiku sabiex ifittxu li jpoġġu s-sanzjonijiet maħruġa mill-Unjoni Ewropea f'livell internazzjonali skond l-Artikolu 19 tat-TEU;

69.

Jistieden lill-Istati Membri, fl-azzjonijiet tagħhom fi ħdan il-Kunsill għas-Sigurtà tan-Nazzjonijiet Uniti, sabiex ma jiksur obbligi ta' drittijiet tal-bniedem li jkunu daħlu għalihom, b'mod partikolari fi ħdan il-Konvenzjoni Ewropea għad-Drittijiet tal-Bniedem;

70.

Jimpenja lill-entitajiet parlamentari tiegħu, u b'mod speċjali lid-delegazzjonijiet permanenti u ad hoc, sabiex jutilizzaw il-kuntatti mal-parlamenti tal-pajjiżi li ma jaqblux mas-sanzjonijiet biex ifiehmu aħjar is-sistemi eżistenti ta' sanzjonijiet tal-UE li jkunu rilevanti għar-reġjun ikkonċernat u biex jeżaminaw il-possibilitajiet ta' azzjoni kkoordinata għall-promozzjoni tad-drittijiet tal-bniedem;

71.

Jistieden lill-Kummissjoni biex tistabbilixxi netwerk ta' esperti indipendenti li jkun inkarigat li jipproponi skond il-bżonn lill-Kunsill, il-miżuri ristrettivi l-iktar pertinenti u li jagħmel rapport regolari dwar l-iżvilupp tas-sitwazzjoni rigward il-kriterji ta' referenza u tal-objettivi stabbiliti u biex meta jkun hemm bżonn, jissuġġerixxi t-titjib li għandu jsir għall-implimentazzjoni tas-sanzjonijiet; iqis li t-twaqqif ta' dan in-netwerk se jtejjeb it-trasparenza u d-diskussjonijiet dwar sanzjonijiet ġenerali u se jsaħħaħ ukoll l-implimentazzjoni u l-monitoraġġ kontinwu ta' sanzjonijiet f'każijiet partikolari; iqis fl-istess ħin li l-Kummissjoni għandu jkollha rwol aktar proattiv fid-definizzjoni ta' politika ċara tal-UE dwar is-sanzjonijiet;

72.

Iqis li l-leġittimità tal-politika ta' sanzjonijiet li tikkostitwixxi element ewlieni u sensibbli tas-CFSP, għandha tkun imsaħħa mill-involviment tal-Parlament fl-istadji kollha tal-proċedura skond l-Artikolu 21 tat-Trattat KE, b'mod partikolari fit-tfassil u l-implimentazzjoni ta' sanzjonijiet fil-forma ta' konsultazzjoni sistematika ma' u rapporti regolari mill-Kummissjoni u l-Kunsill u min-netwerk ta' esperti indipendenti;; iqis ukoll li l-Parlament għandu jkun involut ukoll fis-superviżjoni tal-osservazzjoni tal-kriterji ta' riferenza minn dawk li huma suġġetti għal sanzjonijiet; jitlob lis-sotto-kumitat tad-drittijiet tal-bniedem biex jissistematizza u jissuperviżjona l-ħidmiet f'dan il-qasam għal kull sanzjoni li l-objettivi u l-kriterji ta' riferenza tagħha jikkonċerna d-drittijiet tal-bniedem;

73.

Jagħti istruzzjonijiet lill-President tiegħu biex iressaq din ir-riżoluzzjoni lill-Kunsill u lill-Kummissjoni, lill-gvernijiet u lill-parlamenti tal-Istati Membri u lis-Segretarji Ġenerali tan-Nazzjonijiet Uniti u tal-Kunsill tal-Ewropa.

1.

Within the meaning of this Article, the term ‘Party’ refers to the Community and the Member States of the European Union, of the one part, and each ACP State, of the other part.

2.

4.12.2009   

MT

Il-Ġurnal Uffiċjali tal-Unjoni Ewropea

CE 295/62

A.

billi s-saħħa materna (MDG 5) hija l-qasam li fih sar l-inqas progress minn fost l-MDGs kollha u għalhekk, huwa fost l-għanijiet li x'aktarx li mhux se jintlaħqu sal-2015, b'mod partikulari fl-Afrika 'l isfel mis-Saħara u fin-Nofsinhar tal-Ażja,

B.

billi aktar minn nofs miljun mara jmutu kull sena waqt it-tqala jew il-hlas, u 99 % minn dawn l-imwiet iseħħu f'pajjiżi li qed jiżviluppaw; billi f'20 sena, ir-rata fl-Afrika 'l isfel mis-Saħara bilkemm inbidlet u naqset biss b'0.1 % fis-sena fir-reġjun u hemm ir-riskju li mara minn kull sittax tmut waqt it-tqala jew waqt il-ħlas; billi l-imwiet marbuta mal-maternità huma l-indikatur l-aktar ċar ta' inugwaljanzi dinjija fir-rigward tas-saħħa,

C.

billi, minbarra l-inugwaljanza ġeografika, l-esperjenza u r-riċerka dwar l-imwiet marbuta mal-maternità juru disparitajiet sinifikanti fir-rati tal-imwiet marbuta mal-maternità skont l-għana, ir-razza u l-etniċità, il-lokazzjoni urbana jew rurali, il-livell ta' edukazzjoni, kif ukoll skont ir-reliġjonijiet differenti fi ħdan il-pajjiżi, inklużi l-pajjiżi industrijalizzati, disparità li hija l-akbar fl-istatistika kollha tas-saħħa pubblika,

D.

billi l-G8 ftiehem dwar pakkett dwar is-saħħa li se jgħin fit-taħriġ u l-impjegar ta' miljun u nofs ħaddiem fis-settur tas-saħħa fl-Afrika u li għandu jiżgura li 80 % tal-ommijiet ikollhom l-assitenza ta' ħaddiem tas-saħħa mħarreġ waqt il-ħlas; billi dan jinkludi impenn tad-daqs ta' 2.3 ħaddiema għal kull 1 000 ruħ f'36 pajjiż Afrikan li qed ibatu minn nuqqas kritiku; billi, madankollu, ma tissemma l-ebda limitazzjoni tal-għaxar biljun dollaru li skont l-attivisti fis-soċjetà ċivili jkunu meħtieġa biex, kull sena, jiġu salvati l-ħajjiet ta' sitt miljun omm u tifel,

E.

billi l-imwiet u l-morbożità marbuta mal-maternità jikkostitwixxu emerġenza dinjija fir-rigward tas-saħħa: kull sena huwa stmat li madwar 536 000 nisa jmutu waqt il-ħlas, filwaqt li mara minn kull għoxrin ikollha kumplikazzjonijiet serji, li jvarjaw minn infezzjonijiet kroniċi għal kundizzjonijiet bħall-fistula ostetrika li jwasslu għal diżabilità, kif ukoll għal diżabilitajiet tul il-ħajja,

F.

billi mhuwiex misteru għaliex in-nisa jmutu waqt it-tqala u l-ħlas — il-kawżi tal-imwiet marbuta mal-maternità huma ċari u magħrufa sew, kif inhuma magħrufa l-mezzi biex ikunu evitatati,

G.

billi l-imwiet marbuta mal-maternità jistgħu jiġu evitati bil-għoti ta' kura sikura għall-ommijiet, aċċess effettiv għall-kontraċezzjoni u aborti legali u sikuri,

H.

H billi l-imwiet marbuta mal-maternità jistgħu jkunu evitati billi jiżdied l-aċċess għal metodi ta' ppjanar tal-familja u l-użu tagħhom, permezz tal-aċċess għal kura materna sikura u ta' kwalità, partikolarment waqt it-twelid, waqt il-ħlas b'kura ostetrika ta' emerġenza, u fil-perjodu ta' wara l-ħlas, kif ukoll billi jittejbu s-saħħa u n-nutrizzjoni tan-nisa u l-pożizzjoni tagħhom fis-soċjetà,

I.

billi dan l-approċċ ta' prevenzjoni jinkludi t-taħriġ tan-nisa u tal-ħaddiema fil-qasam tas-saħħa biex jagħrfu l-kumplikazzjonijiet waqt it-tqala u l-ħlas u biex jitolbu l-kura xierqa, jirrikjedi netwerk ta' faċilitajiet tas-saħħa xierqa li jistgħu jintużaw f'perjodu raġonevoli ta' żmien bl-infrastruttura u t-trasport disponibbli, u jirrikjedi li tingħata kura xierqa f'dawn il-faċilitajiet tas-saħħa fil-qrib, minn staff imħarreġ, b'immaniġġjar effettiv u bil-provvista ta' elettriku, ilma u provvisti mediċi anke fiz-zoni rurali,

J.

billi l-imwiet marbuta mal-maternità li jistgħu jkunu evitati jikkostitwixxu vjolazzjonijiet tad-dritt għall-ħajja tan-nisa u tat-tfajliet adolexxenti, kif stipulat f'għadd ta' impenji internazzjonali għad-drittijiet tal-bniedem, inkluża d-Dikjarazzjoni Universali tan-NU dwar id-Drittijiet tal-Bniedem, u l-kawżi tal-imwiet u l-morbożità marbuta mal-maternità jistgħu jinvolvu wkoll vjolazzjonijiet ta' drittijiet tal-bniedem oħra, inkluż id-dritt għall-ogħla standard possibbli ta' saħħa fiżika u mentali u d-dritt għan-non-diskriminazzjoni fl-aċċess għall-kura tas-saħħa bażika,

K.

billi d-dritt għall-awtonomija sesswali u riproduttiva jinkludi d-dritt li mara tiżżewweġ, li jkollha familja u li jkollha relazzjonijiet sesswali b'mod volontarju, u d-dritt tal-ħelsien mill-vjolenza u l-isfurzar sesswali,

L.

billi hija r-responsabilità tal-gvernijiet li jipprovdu huma stess jew permezz ta' oħrajn, servizzi ta' kura tas-saħħa bħala dritt, u billi anke dawk il-gvernijiet b'riżorsi limitati jistgħu jieħdu miżuri immedjati li jkollhom impatt fuq is-saħħa materna,

M.

billi, fl-aħħar mill-aħħar, huwa anwqas probabbli li l-kawżi tal-imwiet marbuta mal-maternità u tal-kundizzjonijiet marbuta mal-ħlas ikunu prattiċi jew strutturali, iżda x'aktarx li jiddependu mill-valur baxx u mill-istejtus baxx mogħti lin-nisa, li ġeneralment huma żvantaġġjati fis-soċjetà, u billi huwa magħruf li, f'pajjiżi b'livelli simili ta' żvilupp ekonomiku, aktar ma l-istejtus tan-nisa jkun għoli, anqas ma tkun ir-rata tal-imwiet marbuta mal-maternità,

N.

billi n-nisa huma partikolarment vulnerabbli waqt it-tqala jew il-ħlas minħabba diversi forom ta' diskriminazzjoni, inklużi disparitajiet bejn in-nisa u l-irġiel fid-dar, prattiki tradizzjonali li jkunu ta' ħsara għan-nisa, il-vjolenza fuq in-nisa, in-nuqqas ta' kontroll rigward is-saħħa riproduttiva u d-drittijiet riproduttivi tagħhom, it-tiċħid tat-trabi tfajliet u l-isterjotipi ta' nisa prinċipalment bħala ommijiet u persuni li jieħdu ħsieb lil oħrajn; billi s-CEDAWġiet irratifikata mill-Istati Membri kollha tal-UE,

O.

billi l-Assemblea Ġenerali tan-NU inkludiet “l-aċċess universali għas-saħħa riproduttiva mill-2015” bħala waħda mill-għanijiet tal-millenju tal-komunità internazzjonali taħt l-MDG 5 — it-tnaqqis tal-imwiet marbuta mal-Maternità,

P.

billi, (komunità internazzjonali wedgħet riżorsi ġodda waqt ICPD, u identifikat “is-saħħa riproduttiva” (inklużi l-ippjanar tal-familja u s-servizzi tas-saħħa għall-ommijiet) bħala prijorità ċentrali fl-isforzi internazzjonali għall-iżvilupp,

Q.

billi, minflok żdied l-appoġġ, l-iffinanzjar totali mid-donaturi għall-ippjanar tal-familja bħalissa huwa ferm aktar baxx milli kien fl-1994, billi niżel minn USD 723 miljun fl-1995 għal USD 442 miljun fl-2004, f'termini assoluti tad-Dollaru,

R.

billi l-UE ħadet impenji regolari u konsistenti sabiex jintlaħaq l-MDG 5, l-aktar riċentement fl-“Aġenda tal-UE għall-Azzjoni dwar l-MDGs” msemmija hawn fuq,

S.

billi minkejja s-serjetà ta' din il-problema u l-ksur tad-drittijiet tal-bniedem, is-servizzi tas-saħħa għall-ommijiet baqgħu fil-qiegħ tal-aġenda internazzjonali, tilfu l-importanza minħabba l-interventi dwar mard speċifiku, u dan wassal għall-marġinalizzazzjoni tal-imwiet marbuta mal-maternità, filwaqt li r-rati għolja ta' HIV kkontribwixxew sabiex il-progress lejn it-tnaqqis tal-imwiet u l-morbożità marbuta mal-maternità jistaġna jew jiddeterjora,

1.

Jesprimi preokkupazzjoni kbira għall-fatt li l-Imwiet marbuta mal-Maternità (MDG 5) huma l-uniku MDG li dwaru mhux biss ma sarx progress mill-2000, partikolarment fl-Afrika 'l isfel mis-Saħara u fin-Nofsinhar tal-Ażja, iżda li 20 sena ilu ċ-ċifri kienu bħalma huma illum;

2.

Jinnota li mal-edukazzjoni, it-tisħiħ tal-pożizzjoni tan-nisa jikkontribwixxi b'mod sinifikanti għat-titjib tas-saħħa materna (MDG 5);

3.

Jistieden lill-Kunsill u lill-Kummissjoni, qabel il-Laqgħa Għolja tan-NU dwar l-MDGs, biex jagħtu prijorità lill-azzjoni biex jintlaħqu l-għanijiet tal-MDG 5;

4.

Jistieden lill-Kunsill u lill-Kummissjoni sabiex inaqqsu d-differenza bejn ir-rati tal-imwiet marbuta mal-maternità f'pajjiżi industrijalizzati u li qed jiżviluppaw, permezz ta' żieda fl-investiment u fl-azzjoni sabiex jittejbu r-riżorsi umani għas-saħħa, u jkun hemm aktar riżorsi u impenn fit-tisħiħ tas-sistemi tas-saħħa u tal-infrastruttura bażika tas-saħħa kif ukoll allokazzjonijiet għall-monitoraġġ u s-sorveljanza tal-funzjonijiet bażiċi tas-saħħa pubblika, tal-azzjoni komunitarja u ta' funzjonijiet oħra meħtieġa ta' appoġġ;

5.

Jistieden lill-Kunsill u lill-Kummissjoni biex jintensifikaw l-isforzi biex jeliminaw l-imwiet u l-morbożità marbuta mal-maternità li jistgħu jiġu evitati permezz ta' żvilupp, implimentazzjoni u evalwazzjoni regolari tal-“pjanijiet direzzjonali” u tal-pjanijiet ta' azzjoni għat-tnaqqis tal-piż globali tal-imwiet u l-morbożità marbuta mal-maternità, li jadottaw approċċ sistematiku, sostenut, u bbażat fuq l-ekwità u fuq id-drittijiet tal-bniedem, appoġġjat u faċilitat b'mod adegwat minn finanzjament u mekkaniżmi istituzzjonali b'saħħithom;

6.

Jistieden lill-Kunsill u lill-Kummissjoni biex jespandu l-provvista tas-servizzi tas-saħħa materna fil-kuntest tal-kura primarja tas-saħħa, fuq il-bażi tal-kunċett ta' għażla infurmata, edukazzjoni dwar il-maternità bla periklu, kura ffukata u effettiva għal qabel it-twelid, programmi dwar in-nutriment tal-ommijiet, għajnuna adegwata għall-ħlas li tevita r-rikors eċċessiv għal operazzjonijiet ċesarji u tipprovdi għal emerġenzi ostetriċi, servizzi ta' riferiment għall-kumplikazzjoniiet marbuta mat-tqala, mal-ħlas u mal-abort, u kura u ppjanar tal-familja għal wara t-twelid;

7.

Jistieden lill-Kunsill u lill-Kummissjoni biex jippromwovu l-aċċess għan-nisa kollha għal informazzjoni u servizzi komprensivi marbuta mas-saħħa sesswali u riproduttiva;

8.

Jistieden lill-Kunsill u lill-Kummissjoni biex jadottaw u jiżviluppaw l-indikaturi u l-punti ta' riferiment li juma diġà stabbiliti sew għat-tnaqqis tal-imwiet marbuta mal-maternità (inklużi l-allokazzjonijiet ta'l-assisstenza uffiċjali għall-Iżvilupp (ODA)) u biex jistabbilixxu mekkaniżmi ta' monitoraġġ u ta' responsabilità li jistgħu jwasslu għal titjib kostanti tal-politiki u l-programmi eżistenti;

9.

Jistieden lill-Kunsill u lill-Kummissjoni biex jiggarantixxu li s-servizzi tal-kura tas-saħħa riproduttiva jkunu għall-but ta' kulħadd, disponibbli, aċċessibbli, u ta' kwalità tajba, u biex jiddedikaw ir-riżorsi massimi disponibbli għall-politiki u l-programmi dwar l-imwiet marbuta mal-maternità;

10.

Jistieden lill-Kunsill u lill-Kummissjoni biex jiżguraw li tinġabar dejta ta' min joqgħod fuqha u fiż-żmien opportun li tmexxi l-implimentazzjoni tal-miżuri rigward l-imwiet u l-morbożità marbuta mal-maternità;

11.

Jistieden lill-Kunsill u lill-Kummissjoni biex jipprovdu taħriġ, bini ta' kapaċità u infrastruttura għal għadd xieraq ta' persuni mħarrġa għal waqt it-twelid, u biex jiżguraw li kull mara tqila u kull tfajla jkollha aċċess għal persuni bħal dawn u li “pjanijiet direzzjonali” u pjanijiet ta' azzjoni nazzjonali jirriflettu din il-mira, dan l-eżitu jew dan il-għan;

12.

Jitlob li jissaħħu l-programmi nazzjonali tas-saħħa għat-testijiet għall-HIV qabel u waqt it-tqala, għat-trattament antiretrovirali għal nisa tqal li huma pożittivi għall-HIV u għal miżuri ta' prevenzjoni kontra l-HIV, bħal programmi ta' informazzjoni u edukazzjoni;

13.

Iħeġġeġ lill-UE biex tibqa' tkun minn ta' quddiem fl-isforzi li jappoġġjaw id-drittijiet tas-saħħa sesswali u riproduttiva billi żżomm livelli ta' finanzjament għall-implimentazzjoni tal-Programm ta' Azzjoni tal-ICPD, u jiddispjaċih li filwaqt li l-Afrika 'l isfel mis-Saħara għandha l-ogħla rati ta' mwiet marbuta mal-maternità, għandha wkoll ir-rata l-aktar baxxa ta' użu ta' kontraċettivi fid-dinja (19 %), u 30 % tal-imwiet kollha marbuta mal-maternità fir-reġjun huma kkawżati minn aborti mhux sikuri;

14.

Jemmen li sabiex jintlaħqu l-miri tal-MDGs dwar l-aċċess universali għas-saħħa riproduttiva sal-2015, jeħtieġ li l-livell ta' finanzjament mill-UE jiżdied, inkella se jibqgħu jmutu nisa minħabba t-tqala u kawżi marbuta mat-tqala;

15.

Jistieden lill-Kunsill u lill-Kummissjoni biex jiżviluppaw programmi u politiki biex jindirizzaw il-fatturi determinanti fundamentali tas-saħħa li huma essenzjali għall-prevenzjoni tal-imwiet marbuta mal-maternità, bħall-parteċipazzjoni fi proċessi tat-teħid tad-deċiżjonijiet marbuta mas-saħħa, tagħrif fuq is-saħħa sesswali u riproduttiva, il-litteriżmu, in-nutrizzjoni, in-non-diskriminazzjoni u r-regoli soċjali li huma l-bażi tal-ugwaljanza bejn is-sessi;