(1)

Fil-15 ta’ Diċembru 2022 il-Kunsill adotta d-Deċiżjoni ta’ Implimentazzjoni (UE) 2022/2506 (2) li kienet ibbażata fuq proposta mill-Kummissjoni u l-memorandum ta’ spjegazzjoni tagħha, kif ukoll fuq il-komunikazzjoni tal-Kummissjoni tat-30 ta’ Novembru 2022 dwar il-miżuri ta’ rimedju nnotifikati mill-Ungerija (il-“Komunikazzjoni tat-30 ta’ Novembru 2022”) u fuq il-valutazzjoni aġġornata tal-Kummissjoni tad-9 ta’ Diċembru 2022.

(2)

Fis-27 ta’ April 2022, il-Kummissjoni bagħtet notifika bil-miktub lill-Ungerija skont l-Artikolu 6(1) tar-Regolament (UE, Euratom) 2020/2092 li qajmet tħassib u ppreżentat sejbiet rigward għadd ta’ kwistjonijiet relatati mas-sistema tal-akkwist pubbliku fl-Ungerija. Fis-27 ta’ Ġunju 2022 u permezz ta’ ittri datati t-30 ta’ Ġunju u l-5 ta’ Lulju 2022, l-Ungerija wieġbet għal dik in-notifika u ssottomettiet aktar informazzjoni. Fid-19 ta’ Lulju 2022, l-Ungerija bagħtet ittra addizzjonali li tipproponi għadd ta’ miżuri ta’ rimedju biex tindirizza s-sejbiet fin-notifika. Kif stabbilit fid-Deċiżjoni ta’ Implimentazzjoni (UE) 2022/2506, il-Kummissjoni kienet sabet irregolaritajiet sistemiċi serji, nuqqasijiet u dgħufijiet fil-proċeduri tal-akkwist pubbliku, il-konċentrazzjoni tal-għotjiet, in-nonapplikazzjoni tar-regoli dwar l-akkwist pubbliku u l-kunflitti ta’ interess għall-fondazzjonijiet tal-ġestjoni tal-assi ta’ interess pubbliku (“trusts ta’ interess pubbliku”, jew “PITs”) u l-entitajiet ġestiti minnhom, u n-nuqqas ta’ trasparenza fir-rigward tal-ġestjoni tal-fondi minn dawk it-trusts. Hemm kwistjonijiet addizzjonali fir-rigward tal-limitazzjonijiet dwar l-investigazzjoni u prosekuzzjoni effettivi ta’ attività kriminali allegata, l-organizzazzjoni tas-servizzi tal-prosekuzzjoni, u n-nuqqas ta’ qafas kontra l-korruzzjoni effettiv u li jiffunzjona. L-irregolaritajiet, in-nuqqasijiet u d-dgħufijiet identifikati tqiesu bħala mifruxa u interkonnessi.

(3)

Kif stabbilit fid-Deċiżjoni ta' Implimentazzjoni (UE) 2022/2506, il-Kunsill ivvalutat l-implimentazzjoni tal-miżuri ta’ rimedju li l-Ungerija kienet impenjat ruħha li tieħu b'reazzjoni għan-notifika tal-Kummissjoni tas-27 ta’ April 2022 skont l-Artikolu 6 tar-Regolament (UE, Euratom) 2020/2092 u tal-“Passi Ewlenin ta’ Implimentazzjoni” assoċjati magħhom, li rriflettew l-impenji ewlenin li għandhom jiġu ssodisfati fl-iskedi ta’ żmien ippreżentati mill-Ungerija (3). Il-proposta tal-Kummissjoni kienet qieset dawk il-miżuri ta’ rimedju, meħuda flimkien, fil-prinċipju kapaċi jindirizzaw is-sejbiet tagħha dwar l-Ungerija rigward l-irregolaritajiet sistemiċi, in-nuqqasijiet u d-dgħufijiet fl-akkwist pubbliku, ir-riskji ta’ kunflitti ta’ interess, u t-tħassib dwar trusts ta’ interess pubbliku, kif ukoll ir-raġunijiet addizzjonali rigward l-investigazzjoni, il-prosekuzzjoni u l-qafas kontra l-korruzzjoni, dment li l-miżuri kollha kienu implimentati b’mod korrett u effettiv (4).

(4)

Minkejja għadd ta’ passi meħuda mill-Ungerija, il-Kunsill sab li għad hemm dgħufijiet, riskji u nuqqasijiet importanti f’għadd ta’ miżuri ta’ rimedju. B’mod partikolari, dgħufijiet sinifikanti nstabu li jkomplu jimminaw serjament l-adegwatezza tal-miżuri ta’ rimedju li għandhom natura orizzontali. Dawk id-dgħufijiet kienu ta' natura orizzontali, strutturali u sistemika u huma ta’ importanza kruċjali biex jirrimedjaw il-ksur sistemiku tal-prinċipji tal-istat tad-dritt fir-rigward tal-akkwist pubbliku, l-effettività tal-azzjoni ta’ prosekuzzjoni u l-ġlieda kontra l-korruzzjoni fl-Ungerija (5).

(5)

Id-Deċiżjoni ta’ Implimentazzjoni (UE) 2022/2506 fakkret li l-miżuri ta’ rimedju meħuda mill-Ungerija, bl-eċċezzjoni unika tal-miżura ta’ rimedju rigward it-trusts ta’ interess pubbliku, kellhom jiġu vvalutati fl-intier tagħhom u abbażi ta’ valutazzjoni kwalitattiva u mhux biss kwantitattiva fid-dawl tal-adegwatezza ġenerali tagħhom biex tintemm is-sitwazzjoni li kienet wasslet għall-adozzjoni tal-miżuri baġitarji (6).

(6)

Il-Kunsill ikkonkluda li l-miżuri ta’ rimedju relevanti nnotifikati mill-Ungerija fl-2022, meħudin bħala ħaġa waħda, kif adottati u fid-dawl tad-dettalji tagħhom, u l-inċertezza li tirriżulta dwar l-applikazzjoni tagħhom fil-prattika, ma temmewx il-ksur identifikat tal-prinċipji tal-istat tad-dritt. Billi l-każijiet identifikati ta’ nuqqas ta’ konformità jirreferu għal ksur ta’ natura sistemika, il-Kunsill sab li fil-biċċa l-kbira tagħhom jaffettwaw il-ġestjoni finanzjarja tajba tal-baġit tal-Unjoni u l-protezzjoni tal-interessi finanzjarji tal-Unjoni b’mod suffiċjentement dirett (7).

(7)

Fir-rigward tal-ksur identifikat b’rabta mat-trusts ta’ interess pubbliku, il-Kunsill ikkonkluda li l-qafas regolatorju fl-Ungerija kelli dgħufijiet u l-passi meħuda ma rrimedjawx ir-riskju ta’ kunflitt ta’ interess li l-miżura ta’ rimedju kellha tindirizza. Il-miżura ta’ rimedju adottata mill-Ungerija nstabet inadegwata, u ħalliet il-baġit tal-Unjoni f’riskju serju (8).

(8)

Abbażi tal-inadegwatezza tal-miżura ta’ rimedju tal-Ungerija rigward il-ksur identifikat fir-rigward tat-trusts ta’ interess pubbliku, id-Deċiżjoni ta’ Implimentazzjoni (UE) 2022/2506 stabbiliet sospensjoni ta’ 55 % tal-impenji baġitarji taħt it-tliet programmi operazzjonali tal-politika ta’ Koeżjoni li kienu mistennija li jiġu implimentati prinċipalment permezz tal-akkwist pubbliku, (9) jiġifieri l-Programm Operazzjonali għall-Effiċjenza Ambjentali u Enerġetika Plus, il-Programm Operazzjonali għat-Trasport Integrat Plus u l-Programm Operazzjonali għall-Iżvilupp Territorjali u ta’ Saldu Plus. Barra minn hekk, għall-baġit tal-Unjoni implimentat b’ġestjoni diretta jew indiretta, dik id-Deċiżjoni ta’ Implimentazzjoni pprojbiet lill-Ungerija milli f’impenji legali ma’ kwalunkwe trust ta’ interess pubbliku stabbilit abbażi tal-Att Ungeriż IX tal-2021 dwar il-fondazzjonijiet tal-ġestjoni tal-assi ta’ interess pubbliku li jwettqu dmir pubbliku (“l-Att dwar il-PITs”) jew ma’ kwalunkwe entità miżmuma minn kwalunkwe trust ta’ interess pubbliku. Fl-aħħar nett, dik id-Deċiżjoni ta’ Implimentazzjoni stipulat li l-Ungerija kellha tinforma lill-Kummissjoni sas-16 ta’ Marzu 2023, u kull tliet xhur minn hemm ’il quddiem, dwar l-implimentazzjoni tal-miżuri ta’ rimedju li kienet impenjat ruħha għalihom.

(9)

Ir-Regolament (UE, Euratom) 2020/2092 jipprevedi li Stat Membru kkonċernat jista’, fi kwalunkwe mument, jadotta miżuri ta’ rimedju ġodda u jippreżenta lill-Kummissjoni notifika bil-miktub li tinkludi evidenza biex juri li l-kondizzjonijiet tal-Artikolu 4 tiegħu ma jkunux għadhom issodisfati.

(10)

Ir-Regolament (UE, Euratom) 2020/2092 jipprevedi wkoll li fuq talba tal-Istat Membru kkonċernat, il-Kummissjoni għandha tivvaluta mill-ġdid is-sitwazzjoni f’dak l-Istat Membru, waqt li tqis kwalunkwe evidenza li tippreżenta, kif ukoll l-adegwatezza ta’ kwalunkwe miżura ta’ rimedju ġdida li hi tadotta. Dak ir-Regolament jipprevedi wkoll li l-Kummissjoni għandha tippreżenta lill-Kunsill proposta għal deċiżjoni ta’ implimentazzjoni li tneħħi l-miżuri adottati meta hija tqis li ma għadhomx aktar issodisfati l-kondizzjonijiet tal-Artikolu 4 jew proposta għal deċiżjoni ta’ implimentazzjoni li tadatta l-miżuri adottati meta hija tqis li s-sitwazzjoni li twassal għall-adozzjoni ta’ miżuri tkun ġiet irrimedjata parzjalment. Fl-aħħar nett, dak ir-Regolament jipprevedi li meta l-Kummissjoni tqis li ma tkunx ġiet rimedjata s-sitwazzjoni li twassal għall-adozzjoni ta’ miżuri, hija għandha tindirizza lill-Istat Membru kkonċernat b’deċiżjoni motivata u tinforma lill-Kunsill dwarha.

(11)

Fit-13 ta’ Diċembru 2023, f’konformità mal-Artikolu 7(2) tar-Regolament (UE, Euratom) 2020/2092 u fin-nuqqas ta’ notifika bil-miktub mill-Ungerija li tfittex it-tneħħija tal-miżuri, il-Kummissjoni adottat fuq inizjattiva tagħha stess deċiżjoni ta’ rivalutazzjoni tas-sitwazzjoni f'dak il-pajjiż (id-“Deċiżjoni tal-Kummissjoni tal-2023”) (10). Id-Deċiżjoni tal-Kummissjoni tal-2023 sabet li, minkejja skambji regolari bejn il-Kummissjoni u l-awtoritajiet Ungeriżi, l-Ungerija ma kinitx irrimedjat is-sitwazzjoni li kienet wasslet għall-adozzjoni tal-miżuri baġitarji. Konsegwentement, il-Kummissjoni ma pproponietx lill-Kunsill biex ineħħi jew jadatta l-miżuri adottati skont l-Artikolu 2 tad-Deċiżjoni ta’ Implimentazzjoni (UE) 2022/2506.

(12)

Fit-2 ta’ Diċembru 2024, l-Ungerija ppreżentat lill-Kummissjoni notifika bil-miktub skont l-Artikolu 7(1) tar-Regolament (UE, Euratom) 2020/2092 rigward emendi għall-Att dwar il-PITs, li għandhom jitqiesu bħala miżura ta’ rimedju ġdida. Permezz ta’ dik in-notifika bil-miktub, il-gvern Ungeriż talab li l-miżura dwar it-trusts ta’ interess pubbliku adottata skont id-Deċiżjoni ta’ Implimentazzjoni (UE) 2022/2506 titneħħa kompletament jew parzjalment. L-Ungerija ma nnotifikat lill-Kummissjoni bl-ebda miżura ta’ rimedju oħra biex tindirizza s-sitwazzjoni li kienet wasslet għall-miżuri baġitarji stabbiliti f’dik id-Deċiżjoni ta’ Implimentazzjoni.

(13)

Fis-16 ta’ Diċembru 2024, il-Kummissjoni adottat deċiżjoni oħra ta’ rivalutazzjoni (id-“Deċiżjoni tal-Kummissjoni tal-2024”) (11) li tikkonkludi li s-sitwazzjoni fir-rigward tat-trusts ta’ interess pubbliku fl-Ungerija li wasslet għall-adozzjoni tad-Deċiżjoni ta’ Implimentazzjoni (UE) 2022/2506 ma kinitx ġiet rimedjata. Fid-Deċiżjoni tal-Kummissjoni tal-2024, il-Kummissjoni elenkat għadd ta’ adattamenti, jew miżuri li għandhom effett ekwivalenti, għall-miżura ta’ rimedju proposta mill-Ungerija li jkunu meħtieġa biex jiġi konkluż li s-sitwazzjoni ġiet rimedjata biżżejjed fir-rigward tat-trusts ta’ interess pubbliku u entitajiet miżmuma minnhom. Id-Deċiżjoni tal-Kummissjoni tal-2024 elenkat ukoll elementi li kienu jikkontribwixxu għall-effettività tal-miżura ta’ rimedju proposta mill-Ungerija (12).

(14)

Fid-9 ta’ Settembru 2026, l-Ungerija bagħtet lill-Kummissjoni notifika bil-miktub ġdida skont l-Artikolu 7(1) tar-Regolament (UE, Euratom) 2020/2092 (in-“Notifika bil-Miktub”), li permezz tagħha sostniet li l-kondizzjonijiet għall-adozzjoni tal-miżuri skont l-Artikolu 4 tar-Regolament (UE, Euratom) 2020/2092 ma għadhomx issodisfati. Fin-notifika bil-Miktub, il-gvern Ungeriż talab li l-miżuri baġitarji stabbiliti fid-Deċiżjoni ta’ Implimentazzjoni (UE) 2022/2506 jitneħħew kompletament u li l-obbligu ta’ rapportar relatat jitwaqqaf.

(15)

Permezz tan-Notifika bil-Miktub, l-Ungerija sostniet li l-impenji li ħadet skont il-miżuri ta’ rimedju adottati jew proposti fil-passat skont ir-Regolament (UE, Euratom) 2020/2092 ġew issodisfati bis-sħiħ u b’mod adegwat. Abbażi ta’ dak, l-Ungerija argumentat li l-irregolaritajiet, in-nuqqasijiet u d-dgħufijiet sistemiċi kollha identifikati qabel fid-Deċiżjoni ta’ Implimentazzjoni (UE) 2022/2506 ġew rimedjati b’suċċess u li l-kondizzjonijiet tal-Artikolu 4 tar-Regolament (UE, Euratom) 2020/2092 ma għadhomx issodisfati (13).

(16)

Barra minn hekk, l-Ungerija adottat aktar miżuri ta’ rimedju. Il-biċċa l-kbira tal-miżuri ta’ rimedju, tal-passat jew ġodda, ġew adottati, modifikati jew implimentati permezz tal-Att XVIII tal-2026 dwar l-emenda ta’ ċerti Atti meħtieġa għall-aċċess għall-fondi tal-Unjoni Ewropea (l-“Att Omnibus”), li ġie adottat fit-23 ta’ Ġunju 2026 (14), u bl-Att XXXV tal-2026, adottat fit-28 ta’ Lulju 2026 (15).

(17)

Għall-finijiet tal-preżentazzjoni, din id-Deċiżjoni l-ewwel tivvaluta l-miżura ta’ rimedju relatata mat-trusts ta’ interess pubbliku, imbagħad minn valutazzjonijiet relatati mal-miżuri ta’ rimedju eżistenti l-oħra u minn dawk relatati mal-miżuri ta’ rimedju ġodda addizzjonali.

(18)

Id-Deċiżjoni ta’ Implimentazzjoni (UE) 2022/2506 identifikat tħassib dwar in-nonapplikazzjoni tar-regoli dwar l-akkwist pubbliku u l-kunflitt ta’ interess għall-PITs u l-entitajiet ġestiti minnhom, u n-nuqqas ta’ trasparenza fir-rigward tal-ġestjoni tal-fondi minn dawk it-trusts (16). Il-Kunsill sab li l-qafas regolatorju tal-Ungerija għat-trusts ta’ interess pubbliku kellu dgħufijiet li ma kinux ġew rimedjati. Fil-prattika, ir-riskju ta’ kunflitti ta’ interess li l-miżura ta’ rimedju fuq il-PITs kienet maħsuba biex tindirizza baqa’ ma ġiex indirizzat.

(19)

Id-Deċiżjoni tal-Kummissjoni tal-2024 fakkret fid-dgħufijiet konkreti tal-qafas regolatorju fl-Ungerija li baqgħu pendenti. Essenzjalment, minkejja xi miżuri meħuda mill-Ungerija, uffiċjali tal-ogħla livell xorta jistgħu jkunu fuq bordijiet ta’ trusts ta’ interess pubbliku, u eżekuttivi politiċi għolja xorta jista’ jkollhom impjieg ieħor bi ħlas waqt li jkunu fuq tali bordijiet. Instab li dan ħoloq sitwazzjoni fejn eżekuttivi politiċi għolja setgħu jipparteċipaw fit-teħid ta’ deċiżjonijiet relatati mal-iżborż ta’ fondi pubbliċi lil entitajiet li fihom huma kienu stess ikunu impjegati u jista’ jkollhom setgħat ewlenin ta’ teħid ta’ deċiżjonijiet (17).

(20)

Permezz tan-Notifika bil-Miktub tagħha, l-Ungerija ppreżentat emendi kostituzzjonali u leġiżlattivi, flimkien ma’ regoli ta’ implimentazzjoni, maħsuba biex (i) itemmu l-PITs f’żewġ fażijiet, u (ii) jindirizzaw ir-riskji strutturali eżistenti ta’ kunflitti ta’ interess sakemm il-PITs kollha jintemmu. Il-Gvern Ungeriż iqis li dawn l-emendi jipprovdu l-garanziji meħtieġa biex il-baġit tal-Unjoni jiġi protett minn riskji ta’ kunflitti ta’ interess u saħansitra jmorru lil hinn minn dak li huwa strettament meħtieġ, billi jtemmu l-eżistenza nnifisha tal-PITs.

(21)

Fil-15 ta’ Ġunju 2026, l-Ungerija adottat is-Sittax-il Emenda għal-Liġi Fundamentali, li daħlet fis-seħħ fl-20 ta’ Ġunju 2026 (18). Is-Sittax-il Emenda stabbiliet il-bażi kostituzzjonali għall-proċess ta’ terminazzjoni billi (i) ħassret l-Artikolu 38(6) preċedenti tal-Liġi Fundamentali, li kien jirrikonoxxi t-trusts ta’ interess pubbliku bħala parti mill-qafas kostituzzjonali li jirregola l-assi nazzjonali, (ii) ipprovdiet li l-assi mogħtija mill-Istat lit-trusts ta’ interess pubbliku, kif ukoll ir-rikavat tagħhom u kwalunkwe assi li jissostitwuhom, iridu, mat-terminazzjoni tat-trusts ta’ interess pubbliku, imorru lura għand l-Istat mingħajr ħlas bħala suċċessur legali universali, (iii) stipulat li d-drittijiet tal-fundatur ta’ trust ta’ interess pubbliku, inkluża s-setgħa li jittermina tali entità, iridu jiġu eżerċitati mill-Istat, u (iv) stabbiliet li r-regoli dettaljati li jirregolaw l-operat, it-terminazzjoni u t-twettiq tad-dmirijiet pubbliċi jridu jiġu stabbiliti bil-liġi.

(22)

Biex tiġi implimentata s-Sittax-il Emenda, is-Sottotitolu 32 tal-Att Omnibus introduċa emendi għall-Att dwar il-PITs (l-“Att dwar il-PITs kif emendat”) (19). Fost affarijiet oħra, dawn l-emendi assenjaw id-drittijiet tal-fundatur fuq it-trusts ta’ interess pubbliku lill-Istat (20), kif irrappreżentat minn ministru maħtur bid-Deċiżjoni tal-Gvern Nru 1214/2026 (tad-29 ta’ Ġunju) (21), u stabbilew żewġ proċessi separati biex jintemmu (i) it-trusts ta’ interess pubbliku li ma jwettqux attivitajiet ta’ edukazzjoni għolja bħala dmir pubbliku (“PITs mhux tal-edukazzjoni għolja”) sal-31 ta’ Awwissu 2026 u (ii) it-trusts ta’ interess pubbliku li jwettqu attivitajiet ta’ edukazzjoni għolja bħala dmir pubbliku (“PITs tal-edukazzjoni għolja”) sal-1 ta’ Awwissu 2027 (22).

(23)

Fir-rigward tal-PITs mhux ta’ edukazzjoni għolja, li huma identifikati fl-Anness 2 tal-Att dwar il-PITs kif emendat, it-Taqsima 25/A l-ġdida tal-att tippreskrivi l-adozzjoni ta’ deċiżjoni tal-gvern, ibbażata fuq deċiżjoni inizjali mill-ministru li għandu d-drittijiet tal-fundatur, li tiddetermina, fost l-oħrajn, id-data tat-terminazzjoni tal-PITs ikkonċernati sal-31 ta’ Lulju 2026, tidentifika l-kompiti residwi li jistgħu jittieħdu u jitwettqu minn organi tal-Istat (jekk ikun hemm), taħtar il-korp pubbliku li jirċievi l-assi u li jieħu f’idejh il-kompiti msemmija, u taħtar aġent tas-saldu.

(24)

Id-Deċiżjoni tal-Gvern Nru 1226/2026, adottata fl-14 ta’ Lulju 2026 (23), tipprevedi t-terminazzjoni tal-PITs kollha mhux tal-edukazzjoni għolja, b’effett mill-31 ta’ Lulju 2026. Dik id-Deċiżjoni tidentifika wkoll il-kompiti pubbliċi li għandhom jinżammu u jiġu ttrasferiti lura lill-Istat, taħtar il-ministri responsabbli u l-organi baġitarji li se jassumu dawk il-kompiti, taħtar l-aġenti tas-saldu biex jagħmlu superviżjoni tal-proċess tal-istralċ, u tiddetermina l-eżerċizzju tad-drittijiet tas-sjieda fuq il-kumpaniji u l-assi li jerġgħu lura għas-sjieda tal-Istat.

(25)

Barra minn hekk, id-Digriet tal-Gvern Nru 134/2026 (24) jistabbilixxi r-regoli dettaljati li jirregolaw it-trasferiment tad-dmirijiet pubbliċi relatati mar-riċerka storika u l-preservazzjoni tal-patrimonju mwettqa minn żewġ PITs mhux tal-edukazzjoni għolja: il-Fondazzjoni għar-Riċerka dwar l-Istorja u s-Soċjetà tal-Ewropa Ċentrali u tal-Lvant u l-Fondazzjoni Lajos Batthyany.

(26)

Fir-rigward speċifiku tal-applikazzjoni għall-finanzjament mill-Unjoni jew ir-riċeviment tiegħu, skont it-Taqsima 25/I tal-Att dwar il-PITs kif emendat, fil-każ ta’ proġetti jew skemi ta’ għotjiet kofinanzjati mill-Unjoni Ewropea, l-organi baġitarji riċeventi jissostitwixxu l-PITs mhux tal-edukazzjoni għolja wara li dawn tal-aħħar ikunu ħadu f’idejhom il-kompiti tagħhom.

(27)

Filwaqt li l-Att dwar il-PITs kif emendat jistabbilixxi t-terminazzjoni tal-PITs mhux tal-edukazzjoni għolja bħala r-regola ġenerali, huwa jipprevedi wkoll il-possibbiltà ta’ kontinwazzjoni tal-entità ġuridika, fejn fundatur mhux Statali wieħed jew aktar jitolbu dan. F’dak il-każ, il-fondazzjoni tista’ tkompli jew bħala fondazzjoni ordinarja għall-ġestjoni tal-assi rregolata mil-leġiżlazzjoni rilevanti jew bħala fondazzjoni ordinarja rregolata mill-Kodiċi Ċivili Ungeriż. Madankollu, tali kontinwazzjoni ma tippreservax l-istatus tal-entità bħala trust ta’ interess pubbliku skont l-Att dwar il-PITs kif emendat (25).

(28)

Meta ma ssir l-ebda applikazzjoni valida għall-kontinwazzjoni, l-Artikolu 25/B tal-Att dwar il-PITs kif emendat jipprevedi li l-qorti rilevanti trid tneħħi l-fondazzjoni mir-reġistru tagħha fil-31 ta’ Awwissu 2026, b’effett minn dak il-jum. F’dak ix-xenarju, it-trust ta’ interess pubbliku mhux tal-edukazzjoni għolja inkwistjoni ma tibqax teżisti għalkollox bħala entità legali. Minħabba li ma saret l-ebda applikazzjoni bħal din, il-PITs kollha mhux tal-edukazzjoni għolja identifikati fl-Anness 2 tal-Att dwar il-PITs kif emendat ġew kompletament dereġistrati bħala entitajiet legali fil-31 ta’ Awwissu 2026, b’effett minn dak il-jum, skont it-Taqsima 25/B(1) tal-Att dwar il-PITs kif emendat (26).

(29)

Fir-rigward tal-PITs tal-edukazzjoni għolja, id-Deċiżjoni tal-Gvern Nru 1219/2026, adottata fit-2 ta’ Lulju 2026 u bid-dħul fis-seħħ fit-3 ta’ Lulju 2026, ħatret lill-Ministru għall-Edukazzjoni u l-Affarijiet tat-Tfal bħala l-awtorità li teżerċita, esklużivament f’isem l-Istat Ungeriż, id-drittijiet tal-fundatur għall-PITs kollha tal-edukazzjoni għolja (27).

(30)

Barra minn hekk, permezz tan-Notifika bil-Miktub tagħha, l-Ungerija pprevediet li huwa meħtieġ proċess separat u itwal għat-terminazzjoni tal-PITs tal-edukazzjoni għolja, sabiex ma jiġux imfixkla l-operazzjonijiet ta’ kuljum tal-attivitajiet tal-edukazzjoni għolja, inkluż l-għoti ta’ boroż ta’ studju, servizzi kliniċi u attivitajiet tal-kura tas-saħħa.

(31)

Għal din ir-raġuni, għall-kuntrarju tal-każ tal-PITs mhux tal-edukazzjoni għolja, l-Att Omnibus ma jipprevedix dispożizzjonijiet speċifiċi dwar it-terminazzjoni immedjata tal-PITs tal-edukazzjoni għolja. Minflok, it-Taqsima 31/G tal-Att dwar il-PITs kif emendat, tipprevedi li att separat se jistabbilixxi r-regoli għas-soluzzjoni tal-PITs tal-edukazzjoni għolja, kif ukoll għat-twettiq tad-dmirijiet pubbliċi tagħhom u kompiti oħra, u għat-terminazzjoni tagħhom sa mhux aktar tard mill-1 ta’ Awwissu 2027.

(32)

B’mod parallel mal-emendi dwar it-terminazzjoni tal-PITs, l-Att Omnibus introduċa dispożizzjonijiet oħra li jbiddlu l-governanza tal-PITs u tal-entitajiet miżmuma tagħhom, b’enfasi fuq l-indirizzar tar-riskji ta’ kunflitti ta’ interess matul il-perjodu residwu ta’ eżistenza tal-PITs u l-entitajiet miżmuma tagħhom.

(33)

Skont in-Notifika bil-Miktub, l-emendi għall-Att dwar il-PITs jirriflettu l-adattamenti, jew miżuri li għandhom effett ekwivalenti, elenkati fid-Deċiżjoni tal-Kummissjoni tal-2025 li kien jeħtieġ li jsiru għall-emendi speċifiċi għall-Att dwar il-PITs li ġew proposti mill-Ungerija f’Diċembru 2024 kif ukoll jirriflettu elementi li kienu jikkontribwixxu għall-effettività tagħhom, kif stabbilit fil-premessi 49 u 50 ta’ dik id-deċiżjoni.

(34)

Filwaqt li skont l-Att oriġinali dwar il-PITs il-mandat ta’ membru tal-bord ta’ trustees jew ta’ membru tal-bord superviżorju kien mingħajr ebda limitu ta’ żmien, skont it-Taqsima 6(4) tal-Att dwar il-PITs kif emendat, id-durata ta’ dak il-mandat, kif ukoll tal-mandat ta’ uffiċjal eżekuttiv ta’ persuna ġuridika stabbilita jew miżmuma minn trust ta’ interess pubbliku (28), huwa limitat għal erba’ snin. Il-mandat jista’ jiġġedded darba biss, għal erba’ snin addizzjonali; it-tiġdid jista’ jsir biss f’bord uniku ta’ trustees jew bord superviżorju, jew fi ħdan persuna ġuridika waħda stabbilita jew miżmuma mit-trust ta’ interess pubbliku (29). Id-durata limitata tal-mandat tapplika wkoll għall-membri eżistenti tal-bordijiet ta’ trustees jew tal-bordijiet superviżorji li diġà ġew iddeżinjati bid-dispożizzjoni li, jekk il-mandati tagħhom ikunu damu għal aktar minn erba’ snin mid-data tad-dħul fis-seħħ tal-Att Omnibus, il-mandat tagħhom irid jintemm fil-jum tal-ħatra ta’ membru ġdid skont il-proċedura stabbilita fl-Att dwar il-PITs kif emendat (30). Sabiex tiġi żgurata l-kontinwazzjoni ordnata tal-attivitajiet tal-PITs tal-edukazzjoni għolja u l-entitajiet miżmuma tagħhom, it-Taqsima 31/I tal-Att dwar il-PITs kif emendat tistabbilixxi reġim tranżizzjonali: l-applikazzjoni ta’ din ir-regola ġenerali għall-uffiċjali eżekuttivi tal-entitajiet miżmuma mill-PITs tal-edukazzjoni għolja hija sospiża sal-1 ta’ Awwissu 2027, f’konformità mal-iskeda ta’ żmien stabbilita fit-Taqsima 31/G għat-terminazzjoni tal-PITs imsemmija.

(35)

Skont paragrafi ġodda miżjuda mat-Taqsima 15 tal-Att dwar il-PITs kif emendat, il-membri tal-bord tat-trustees u l-membri tal-bord superviżorju ta’ trust ta’ interess pubbliku jridu jiġu maħtura mid-detentur tad-drittijiet tal-fundatur permezz ta’ sejħa miftuħa għall-applikazzjonijiet. Il-kandidati jrid ikollhom lawrja ta’ edukazzjoni għolja, juru indipendenza, integrità, imparzjalità u integrità u ma jkollhom l-ebda raġuni għal kunflitti ta’ interess (31). Dawk il-membri, kif ukoll l-uffiċjali eżekuttivi ta’ persuna ġuridika stabbilita jew miżmuma minn trust ta’ interess pubbliku, jistgħu jinħatru biss jekk l-indipendenza, l-integrità, l-imparzjalità u l-integrità tagħhom jiġu stabbiliti mill-Uffiċċju tal-Awditjar tal-Istat f’opinjoni li għandha tinħareġ fi żmien 15-il jum wara li tasal it-talba mid-detentur tad-drittijiet tal-fundatur (32). Jekk l-Uffiċċju rilevanti tal-Awditjar tal-Istat isib li dawn il-kriterji ma jkunux issodisfati għal persuna li tkun diġà nħatret, il-persuna kkonċernata ma tistax teżerċita d-drittijiet li jirriżultaw mill-kariga rilevanti u lanqas tirċievi xi remunerazzjoni. Għal persuni li l-mandat tagħhom beda qabel id-dħul fis-seħħ tal-Att Omnibus, fi żmien 15-il jum tax-xogħol minn dik id-data l-persuna li teżerċita d-drittijiet tal-fundatur trid titlob lill-Uffiċċju tal-Awditjar tal-Istat biex jivverifika l-indipendenza, l-integrità, l-imparzjalità u l-integrità tagħhom. Jekk dawk il-kriterji ma jiġux issodisfati, l-Uffiċċju tal-Awditjar tal-Istat irid jibda t-terminazzjoni tal-mandat tal-persuna kkonċernata qabel ma l-persuna teżerċita d-drittijiet tal-fundatur (33).

(36)

It-Taqsima 15 (1b) tal-Att dwar il-PITs kif emendat introduċiet projbizzjoni kontra ċerti kategoriji ta’ uffiċjali li jservu bħala membri tal-bord ta’ trustees, jew tal-bord superviżorju, jew bħala uffiċjali eżekuttivi ta’ persuna ġuridika stabbilita jew miżmuma minn trust ta’ interess pubbliku (34). It-Taqsima 15 introduċiet ukoll perjodu ta’ preklużjoni ta’ sena għall-istess kategoriji ta’ uffiċjali. Il-konformità ma’ dawk id-dispożizzjonijiet għall-membri eżistenti tal-bord ta’ fiduċjarji jew tal-bord superviżorju u għall-uffiċjali eżekuttivi fil-kariga fl-aħħar mill-aħħar tiġi vverifikata mill-Awtorità tal-Integrità (35). Meta dawk id-dispożizzjonijiet ma jiġux segwiti, l-Awtorità tal-Integrità trid tibda t-terminazzjoni tal-kariga tal-persuna kkonċernata qabel dik tal-persuna li teżerċita d-drittijiet tal-fundatur (36).

(37)

It-Taqsima 15/A tal-Att dwar il-PITs kif emendat tirrikjedi li l-membri tal-bord ta’ trustees, il-membri tal-bord superviżorju, u l-uffiċjali eżekuttivi jagħmlu dikjarazzjoni tal-assi fi żmien 30 jum mill-ħatra tagħhom, kull sentejn wara dan u fi żmien 30 jum mit-terminazzjoni tal-mandat tagħhom, u kull darba jehmżu d-dikjarazzjoni tal-assi tal-qraba stretti tagħhom kif definit fil-Kodiċi Ċivili li jgħixu fl-istess unità domestika magħhom. Persuni li jonqsu milli jippreżentaw dikjarazzjoni tal-assi ma jistgħux jeżerċitaw id-drittijiet tagħhom li jirriżultaw mill-kariga tagħhom, u lanqas jirċievu xi remunerazzjoni. Dawn id-dikjarazzjonijiet tal-assi jiġu vverifikati mill-Awtorità tal-Integrità. F’każ li dikjarazzjoni tal-assi jkun fiha data falza jew fatti pprovduti intenzjonalment, l-Awtorità tal-Integrità trid tibda t-terminazzjoni tal-mandat tal-persuna kkonċernata qabel il-persuna teżerċita d-drittijiet tal-fundatur. Skont it-Taqsima 31/E(1) tal-Att dwar il-PITs kif emendat, l-obbligu li tiġi ppreżentata dikjarazzjoni tal-assi japplika wkoll għall-membri eżistenti tal-bord tat-trustees u tal-bord superviżorju, kif ukoll għall-uffiċjali eżekuttivi, inklużi dawk li l-kariga tagħhom tintemm bil-liġi wara l-iskadenza tal-mandat tagħhom.

(38)

Ir-responsabbiltà tal-Awtorità tal-Integrità li tivverifika d-dikjarazzjonijiet tal-assi kif stabbilit skont l-Att dwar il-PITs kif emendat hija riflessa fl-emendi għall-Att XXVII tal-2022 dwar il-kontroll tal-użu tal-fondi tal-baġit tal-Unjoni Ewropea (l-“Att dwar l-Awtorità tal-Integrità”) (37) li saru mill-Att Omnibus. Fost affarijiet oħra, dispożizzjonijiet ġodda jistabbilixxu proċedura ddedikata għall-verifika tad-dikjarazzjoni tal-assi, li tippermetti lill-Awtorità tal-Integrità taċċessa d-data u tikseb l-informazzjoni meħtieġa għall-verifika tagħha, kif deskritt aktar fil-premessi (59)-(62) hawn taħt.

(39)

Similarment, it-Taqsima 15/B tal-Att dwar il-PITs kif emendat tirrikjedi li l-membri tal-bord ta’ trustees, il-membri tal-bord superviżorju, u l-uffiċjali eżekuttivi jagħmlu dikjarazzjoni ta’ kunflitt ta’ interess fi żmien 30 jum mill-ħatra tagħhom, kull sentejn wara dan u fi żmien 30 jum mit-terminazzjoni tal-mandat tagħhom. Persuni li jonqsu milli jippreżentaw dikjarazzjoni ta’ kunflitt ta’ interess ma jistgħux jeżerċitaw id-drittijiet tagħhom li jirriżultaw mill-kariga tagħhom, u lanqas jirċievu xi remunerazzjoni. L-Awtorità tal-Integrità trid tivverifika d-dikjarazzjoni tal-kunflitti ta’ interess u fejn tistabbilixxi kunflitt ta’ interess trid tibda t-terminazzjoni tal-kariga tal-persuna kkonċernata qabel il-persuna teżerċita d-drittijiet tal-fundatur. It-Taqsima 31/E(1) tal-Att dwar il-PITs kif emendat deskritt fil-premessa (37) tapplika wkoll għad-dikjarazzjonijiet ta’ kunflitt ta’ interess.

(40)

Abbażi tal-valutazzjoni tal-Kummissjoni, il-Kunsill iqis li d-dispożizzjonijiet biex jiġu indirizzati r-riskji strutturali tal-kunflitti ta’ interess jirriflettu b’mod effettiv l-adattamenti, jew il-miżuri li għandhom effett ekwivalenti, meħtieġa għall-emendi speċifiċi għall-Att dwar il-PITs li l-Ungerija kienet ipproponiet f’Diċembru 2024 u l-elementi li kienu jikkontribwixxu għall-effettività tagħhom, skont il-premessi 49 u 50 tad-deċiżjoni msemmija. Dawk l-adattamenti kienu meħtieġa biex il-Kunsill iqis li s-sitwazzjoni li wasslet għall-adozzjoni tad-Deċiżjoni ta’ Implimentazzjoni (UE) 2022/2506 ġiet rimedjata biżżejjed.

(41)

Id-dispożizzjonijiet adottati mill-Ungerija daħlu fis-seħħ bejn d-29 ta’ Ġunju u l-31 ta’ Lulju 2026 (38), qabel id-data meta ġiet ippreżentata n-Notifika bil-Miktub lill-Kummissjoni, u huma mingħajr kondizzjonijiet u applikabbli għall-PITs u l-entitajiet kollha stabbiliti jew miżmuma minnhom, mingħajr ebda limitazzjoni. Fuq l-istess linja, għall-kuntrarju tal-miżura ta’ rimedju proposta f’Diċembru 2024, dawk id-dispożizzjonijiet ma jagħmlu l-ebda distinzjoni bejn ir-regoli applikabbli għall-entitajiet eliġibbli għall-appoġġ finanzjarju tal-Unjoni u dawk applikabbli għall-entitajiet li diġà qed jirċievu tali appoġġ. Dawk l-elementi jissodisfaw l-ewwel tliet inċiżi tal-premessa 49 tad-Deċiżjoni tal-Kummissjoni tal-2024.

(42)

Ir-rekwiżiti skont l-inċiżi l-oħra tal-premessa 49 tad-Deċiżjoni tal-Kummissjoni tal-2024 huma ssodisfati wkoll kif ġej:

(43)

Barra minn hekk, id-dispożizzjonijiet deskritti fil-premessi (34) u (35) jissodisfaw ukoll l-elementi addizzjonali identifikati fil-premessa 50 tad-Deċiżjoni tal-Kummissjoni tal-2024, rigward id-durata massima tal-mandat u l-possibbiltà li jiġġedded, l-introduzzjoni ta’ perjodu ta’ preklużjoni u l-inklużjoni ta’ sindki fost il-kategoriji ta’ uffiċjali inkompatibbli mas-sħubija fil-bord ta’ trustees jew fil-bord superviżorju tal-PITs u mal-pożizzjoni ta’ uffiċjal eżekuttiv.

(44)

Fl-aħħar nett, it-terminazzjoni tal-PITs, li tmur lil hinn mill-bidliet diġà deskritti għar-regoli applikabbli matul il-perjodu residwu ta’ eżistenza tal-PITs, se taqta’ r-rabta mal-entitajiet miżmuma tagħhom jew mal-entitajiet stabbiliti minnhom. Dan se jikkanċella b’mod definittiv l-istess entitajiet li kienu rregolati minn regoli suxxettibbli għal riskji ta’ kunflitti ta’ interess fir-rigward tal-implimentazzjoni tal-baġit tal-Unjoni. Konsegwentement, fil-każ tal-PITs li diġà ġew itterminati, jiġifieri PITs mhux tal-edukazzjoni għolja, il-ksur tal-prinċipji tal-istat tad-dritt identifikati skont id-Deċiżjoni ta’ Implimentazzjoni (UE) 2022/2506, flimkien mar-riskju li dawn ħolqu għall-interessi finanzjarji tal-Unjoni, ma għadhomx preżenti, anke minħabba li l-assi ġew ittrasferiti lura lill-Istat u japplikaw ir-regoli ġenerali applikabbli għall-użu tal-appoġġ tal-Unjoni inkluż ir-regoli dwar l-akkwist pubbliku, l-aċċess għad-data, il-kunflitti ta’ interess eċċ.. Fil-każ tal-PITs li se jibqgħu jeżistu sa mhux aktar tard mill-1 ta’ Awwissu 2027, jiġifieri l-PITs tal-edukazzjoni għolja, ġew stabbiliti regoli adegwati li huma applikabbli għall-individwi kollha li għandhom kariga jew li huma impjegati minn dawk il-PITs u l-persuni ġuridiċi stabbiliti jew miżmuma minnhom li jiżguraw il-konformità mad-dispożizzjonijiet tal-Artikolu 61 tar-Regolament (UE, Euratom) 2024/2509 tal-Parlament Ewropew u tal-Kunsill (39), irrispettivament mill-attivitajiet u l-funzjonijiet l-oħra tagħhom, inkluż fil-gvern Ungeriż.

(45)

Barra minn hekk, il-PITs huma soġġetti għal rekwiżiti ta’ informazzjoni pubblika, inkluż skont l-emenda tal-Att CXII tal-2011, it-Taqsima 37/C, il-paragrafu 1, il-punt (c), li introduċiet rekwiżit espliċitu li l-fondazzjonijiet tal-ġestjoni tal-assi ta’ interess pubbliku li jwettqu dmir pubbliku u l-persuni ġuridiċi stabbiliti jew miżmuma minnhom għandhom jippubblikaw regolarment sett wiesa’ ta’ informazzjoni dwar l-attivitajiet tagħhom fir-Reġistru Ċentrali tat-Trasparenza (ara t-Taqsima 2.17 hawn taħt).

(46)

Abbażi tal-valutazzjoni tal-Kummissjoni, il-Kunsill iqis li l-Ungerija ssodisfat din il-miżura ta’ rimedju u ħadet miżuri addizzjonali li jtemmu d-dgħufijiet identifikati fid-Deċiżjoni ta’ Implimentazzjoni (UE) 2022/2506 fir-rigward tal-qafas leġiżlattiv tal-PITs.

(47)

Bħala parti mill-miżuri ta’ rimedju adottati fl-2022, l-Ungerija impenjat ruħha li tistabbilixxi Awtorità tal-Integrità ġdida bl-għan li ssaħħaħ il-prevenzjoni, id-detezzjoni u l-korrezzjoni ta’ frodi, kunflitti ta’ interess u korruzzjoni, kif ukoll illegalitajiet u irregolaritajiet oħra fl-implimentazzjoni ta’ kwalunkwe appoġġ finanzjarju tal-Unjoni. Kif stabbilit fid-Deċiżjoni ta’ Implimentazzjoni (UE) 2022/2506, il-ħolqien tal-Awtorità tal-Integrità kien ikkunsidrat bħala miżura orizzontali li għandha l-għan li tirrimedja l-ksur sistemiku tal-prinċipji tal-istat tad-dritt li jikkonċerna l-akkwist pubbliku u li jaffettwa l-interessi finanzjarji tal-Unjoni (40).

(48)

Minkejja li l-Ungerija ħadet diversi passi biex tissodisfa l-impenji tagħha, il-Kunsill, bl-adozzjoni tad-Deċiżjoni ta’ Implimentazzjoni (UE) 2022/2506, sab li d-dgħufijiet, ir-riskji u n-nuqqasijiet ikkompromettew l-effettività, l-indipendenza u l-kapaċità tal-Awtorità tal-Integrità li tirrimedja l-ksur sistemiku tal-prinċipji tal-istat tad-dritt li jikkonċerna l-akkwist pubbliku li jaffettwa l-interessi finanzjarji tal-Unjoni. B’mod partikolari, dik id-Deċiżjoni ta’ Implimentazzjoni tistabbilixxi (i) in-nuqqas ta’ regola ċara li tiddikjara li l-Awtorità tal-Integrità se żżomm il-kompetenza tagħha wara li proġett jiġi rtirat mill-finanzjament tal-Unjoni; (ii) id-dgħufijiet tas-sistema għall-istħarriġ ġudizzjarju tad-deċiżjonijiet tal-awtoritajiet kontraenti li ma jsegwux ir-rakkomandazzjonijiet tal-Awtorità tal-Integrità; (iii) id-dgħufijiet tal-proċedura ta’ tkeċċija; (iv) is-setgħat diretti, u mhux superviżorji, tal-Awtorità tal-Integrità fir-rigward tal-gruppi diversi ta’ dikjaranti, u n-nuqqas ta’ trasferiment tas-setgħat lill-Awtorità tal-Integrità biex tivverifika d-dikjarazzjonijiet tal-assi tal-membri tal-Gvern; (v) il-kamp ta’ applikazzjoni limitat relatat man-nuqqas ta' inklużjoni tal-uffiċjali b’riskju għoli kollha fil-kamp ta' applikazzjoni tas-setgħat ta’ verifika tal-Awtorità tal-Integrità fir-rigward tad-dikjarazzjonijiet tal-assi. Abbażi ta’ dan, il-Kunsill ikkonkluda li d-dgħufijiet identifikati, b’mod partikolari dawk li jillimitaw is-setgħat tal-Awtorità tal-Integrità, kienu ta’ gravità tant li jimminaw serjament il-kapaċità tal-Awtorità tal-Integrità li tirrimedja l-ksur sistemiku tal-prinċipji tal-istat tad-dritt li jikkonċerna l-akkwist pubbliku li jaffettwa l-interessi finanzjarji tal-Unjoni (41).

(49)

Permezz tan-Notifika bil-Miktub tagħha, l-Ungerija sostniet li hija indirizzat bis-sħiħ il-ħames punti elenkati fil-premessa 36 tad-Deċiżjoni ta’ Implimentazzjoni (UE) 2022/2506, b’mod partikolari billi emendat l-Att dwar l-Awtorità tal-Integrità u billi adottat dispożizzjonijiet speċifiċi bħala parti mill-Att XXXV tal-2026.

(50)

Fir-rigward tal-ewwel punt elenkat fil-premessa 36 tad-Deċiżjoni ta’ Implimentazzjoni (UE) 2022/2506, it-Taqsima 3 tal-Att dwar l-Awtorità tal-Integrità kif emendat mit-Taqsima 150 tal-Att Omnibus tippreskrivi li l-kompetenza tal-Awtorità tal-Integrità għandha tinżamm fil-każ tal-irtirar ta’ miżura, proċedura jew proġett mill-finanzjament tal-Unjoni.

(51)

Fir-rigward tat-tieni punt elenkat fil-premessa 36 tad-Deċiżjoni ta’ Implimentazzjoni (UE) 2022/2506, il-Kunsill irrefera għall-Komunikazzjoni tat-30 ta’ Novembru 2022, li sabet li, għalkemm l-Awtorità tal-Integrità kellha s-setgħa li tibda proċedimenti quddiem il-Bord tal-Arbitraġġ tal-Kuntratti Pubbliċi (il-“PPAB”) fir-rigward ta’ irregolaritajiet fl-akkwist pubbliku u li tfittex stħarriġ ġudizzjarju tad-deċiżjonijiet tal-PPAB, il-qafas legali applikabbli ma kienx jipprevedi s-sospensjoni tal-proċedura ta’ akkwist pubbliku kkonċernata sakemm joħroġ l-eżitu tal-proċedimenti tal-PPAB. Barra minn hekk, hija ma ppermettietx lill-Awtorità tal-Integrità tikkontesta n-nuqqas tal-PPAB li tadotta deċiżjoni fit-terminu stabbilit. F’dak ir-rigward, l-Att Omnibus emenda d-dispożizzjonijiet fl-Att CXLIII tal-2015 dwar l-akkwist pubbliku (“l-Att dwar l-Akkwist Pubbliku”), li jistabbilixxi li (i) meta l-Awtorità tal-Integrità tkun bdiet proċedura quddiem il-Bord tal-Arbitraġġ tal-Akkwist Pubbliku, dan tal-aħħar jeħtieġlu jordna s-sospensjoni tal-proċedura tal-akkwist pubbliku kkonċernata, jekk l-Awtorità tal-Integrità tipproponi dan, u (ii) l-Awtorità tal-Integrità tista’ titlob stħarriġ ġudizzjarju meta l-limitu ta’ żmien għal deċiżjoni tal-PPAB jiskadi mingħajr ma tkun ittieħdet deċiżjoni (42).

(52)

It-tielet punt elenkat fil-premessa 36 tad-Deċiżjoni ta’ Implimentazzjoni (UE) 2022/2506 kien jikkonċerna t-terminazzjoni tal-kariga tal-President u tal-Viċi Presidenti tal-Awtorità tal-Integrità abbażi ta’ deċiżjoni tal-qorti b’limitu ta’ żmien ta’ 30 jum, u n-nuqqas ta’ ċarezza dwar jekk appell ta’ proċedura ta’ tkeċċija jkollux effett sospensiv. L-att Omnibus emenda t-Taqsimiet 39 (6) u 39 (7) tal-Att dwar l-Awtorità tal-Integrità billi żied il-limitu ta’ żmien għal tali deċiżjoni tal-qorti għal 60 jum u billi ddikjara li jista’ jiġi ppreżentat appell b’effett sospensiv jekk il-qorti ttemm ir-relazzjoni legali ta’ membru tal-Bord tal-Awtorità tal-Integrità.

(53)

Fir-rigward tar-raba’ u l-ħames punt elenkati fil-premessa 36 tad-Deċiżjoni ta’ Implimentazzjoni (UE) 2022/2506, dwar is-setgħat tal-Awtorità tal-Integrità rigward il-verifika tad-dikjarazzjonijiet tal-assi, l-Ungerija rriformat is-sistema tad-dikjarazzjoni tal-assi tagħha u indirizzat dawn il-punti, kif spjegat aktar fit-Taqsima 2.4.3 hawn taħt.

(54)

Barra minn hekk, permezz tan-Notifika bil-Miktub tagħha, l-Ungerija ressqet diversi emendi leġiżlattivi u żviluppi ulterjuri rigward il-governanza, il-persunal u l-effiċjenza tal-Awtorità tal-Integrità.

(55)

Sabiex tittejjeb il-governanza u tiġi żgurata l-kontinwità tal-operat, it-Taqsimiet 32 (1) u (33) tal-Att dwar l-Autorità tal-Integrità kif emendat jipprevedu żieda fl-għadd ta’ membri tal-Bord tal-Awtorità tal-Integrità u regoli dwar it-teħid tad-deċiżjonijiet tal-bord. It-taqsimiet 35 (2) u 37 (2a) il-ġodda tal-Att dwar l-Awtorità tal-Integrità introduċew emendi mmirati għar-regoli li jirregolaw l-għażla tal-membri tal-Bord tal-Awtorità tal-Integrità, billi jistabbilixxu li l-Kumitat tal-Eliġibbiltà jenħtieġ li jadotta sistema ta’ klassifikazzjoni u billi jnaqqas is-setgħat diskrezzjonali tal-President tal-Uffiċċju tal-Awditjar tal-Istat fl-għażla tal-kandidati eliġibbli. It-Taqsima 37 (3) tal-Att dwar l-Awtorità tal-Integrità kif emendat tispeċifika ulterjorment il-proċedura tal-għażla, filwaqt li tiddikjara li minn fost l-applikanti, il-Kumitat tal-Eliġibbiltà jrid jiddeċiedi dwar il-lista ta’ persuni meqjusa xierqa għall-pożizzjonijiet ta’ President u Viċi President tal-Awtorità u għalhekk eliġibbli biex jiġu proposti għall-pożizzjonijiet, ikkompilata b’kunsiderazzjoni tal-merti professjonali, l-għarfien espert u l-kwalifiki, u li tistabbilixxi l-klassifikazzjoni tal-kandidati (43).

(56)

Barra minn hekk, f’konformità mal-impenji oriġinali skont din il-miżura ta’ rimedju, l-Ungerija żiedet il-persunal tal-Awtorità tal-Integrità biex tagħmlu proporzjonat mal-kompiti u l-attivitajiet tagħha, u biex iżżid l-effiċjenza tagħha (44).

(57)

L-awtorità tal-Integrità ħarġet ukoll ir-rapporti tagħha kif stabbilit fl-Att dwar l-Awtorità tal-Integrità. Fl-2023, nediet eżerċizzju ta’ valutazzjoni tar-riskju għall-integrità għall-protezzjoni tal-fondi tal-Unjoni, inkluża evalwazzjoni tas-sitwazzjoni attwali tal-integrità tas-sistema tal-akkwist pubbliku fl-Ungerija (45). Dan l-eżerċizzju pproduċa rapport li jippermetti lill-Awtorità tal-Integrità tikseb stampa komprensiva tar-riskji speċifiċi għall-integrità li jikkonċernaw l-implimentazzjoni tal-appoġġ finanzjarju mill-baġit tal-Unjoni, inkluż fil-qasam tal-akkwist, li tqies għat-tħejjija tal-ewwel rapport analitiku annwali (46). L-istess eżerċizzju twettaq fl-2024. L-awtorità tal-Integrità ħarġet ukoll ir-rapporti annwali tagħha dwar l-integrità analitika b’mod regolari (47), u l-Gvern Ungeriż ipprovda tweġibiet għalihom f’konformità mal-att imsemmi (48). Barra minn hekk, fl-10 ta’ Frar 2026, il-Bord tal-Awtorità tal-Integrità approva r-rapport ad hoc li jiffoka fuq is-sistema ċentrali tal-akkwist (49).

(58)

Id-data pprovduta mill-Ungerija rigward ir-rapporti tal-whistleblower (50) u l-investgazzjonijiet turi l-funzjonament tajjeb tal-Awtorità tal-Integrità f’konformità mar-rekwiżiti tal-miżura ta’ rimedju. L-Ungerija rrapportat ukoll dwar il-progress li sar fir-rigward tal-ftehimiet ta’ kooperazzjoni mal-korpi u l-istituzzjonijiet Ungeriżi (51). Tali progress huwa partikolarment rilevanti għall-effettività tal-kompiti u l-attivitajiet tal-Awtorità tal-Integrità.

(59)

Barra minn hekk, l-Ungerija qalet li l-Awtorità tal-Integrità stabbiliet il-kundizzjonijiet tekniċi u istituzzjonali meħtieġa għar-reġistru tal-operaturi ekonomiċi esklużi mill-proċeduri tal-akkwist pubbliku kif meħtieġ mill-Kapitolu IV tal-Att dwar l-Awtorità tal-Integrità (52). Dak kien jeħtieġ konnessjonijiet diretti tad-data mar-reġistri rilevanti, jiġifieri r-reġistru tal-informazzjoni tal-kumpaniji, ir-reġistru tas-sjieda benefiċjarja, ir-reġistru tar-rekords kriminali, u r-reġistru tal-imprendituri privati. Dawk il-konnessjonijiet ġew implimentati (53) u r-reġistru tal-interfaċċa tal-operaturi ekonomiċi tnieda fis-Sistema Elettronika Ungeriża tal-Akkwist Pubbliku (54). F’dak ir-rigward, skont it-Taqsima 69 (4) u (5) tal-Att dwar l-Awtorità tal-Integrità, ġew adottati d-Deċiżjoni tal-Gvern Nru 1246/2026 (tas-7 ta’ Awwissu) li tikkonferma d-disponibbiltà sħiħa tad-data fir-reġistru u d-Deċiżjoni Nru 1/2026 (tal-11 ta’ Awwissu) tal-Ministru tal-Ġustizzja dwar id-dħul fis-seħħ tat-taqsimiet rilevanti tal-Att dwar l-Awtorità tal-Integrità (55). Fl-ittra tiegħu tal-31 ta’ Awwissu 2026 (56), abbażi tad-data disponibbli, il-President tal-Awtorità tal-Integrità jistma li l-Awtorità tal-Integrità se jkollha twettaq aktar minn 500 proċedura ta’ reġistrazzjoni, u l-ewwel waħda minnhom inbdiet. L-Awtorità tal-Integrità se tirrapporta dwar il-progress fil-proċeduri ta’ reġistrazzjoni fir-rapport annwali li jmiss dwar l-integrità analitika (57).

(60)

Fir-rigward tal-aċċess għall-informazzjoni mill-Awtorità tal-Integrità, l-emendi għat-Taqsima 18 tal-Att dwar l-Awtorità tal-Integrità jestendu aktar il-garanziji għal aċċess effettiv għad-data u r-reġistri mill-Awtorità tal-Integrità. Skont ir-regoli emendati, matul l-investigazzjoni tagħha, l-Awtorità tal-Integrità jeħtiġilha tivvaluta l-informazzjoni rilevanti kollha u tista’ titlob data minn kwalunkwe persuna jew organizzazzjoni involuta fil-każ.

(61)

L-aċċess għad-data jista’ jiġi żgurat jew permezz ta’ talbiet formali indirizzati lill-korpi rilevanti jew, fejn legalment permess u teknikament possibbli, permezz ta’ aċċess dirett għal bażijiet tad-data jew reġistri, u b’hekk ikun jista’ jsir ġbir effiċjenti u komprensiv ta’ informazzjoni. Id-dispożizzjonijiet il-ġodda jiżguraw li matul il-proċedura tagħha, l-Awtorità tal-Integrità tista’ tipproċessa kwalunkwe data personali u, sa fejn ikun meħtieġ, data li tikkostitwixxi sigrieti protetti legalment — inklużi b’mod partikolari sigrieti tat-taxxa, bankarji u kummerċjali — kif ukoll data koperta mis-segretezza professjonali, dment li tali data tkun rilevanti għall-investigazzjoni u l-ipproċessar tagħha jkun indispensabbli għat-twettiq effettiv tagħha (58).

(62)

Barra minn hekk, il-qafas legali jistabbilixxi obbligi ċari ta’ kooperazzjoni għall-entitajiet ikkonċernati kollha. Il-kontrollur tad-data li jkun qed jiġi investigat, kif ukoll kwalunkwe organizzazzjoni jew persuna oħra kkonċernata, huma meħtieġa jikkonformaw mat-talba tal-Awtorità tal-Integrità għad-data f’limitu ta’ żmien stabbilit mill-Awtorità, li ma jaqbiżx it-30 jum, b’garanziji proċedurali minimi żgurati f’ċerti każijiet. Meta d-data mitluba ma tkunx disponibbli jew ma tkunx tista’ tiġi ddivulgata skont il-liġi applikabbli, l-entità rikjesta jeħtiġilha tinforma lill-Awtorità tal-Integrità kif xieraq fl-istess perjodu ta’ żmien. Fl-aħħar nett, biex tiġi żgurata l-effettività ta’ dawn is-setgħat, l-Awtorità tingħata setgħat effettivi għall-infurzar ġudizzjarju: f’każ ta’ nuqqas ta’ konformità mat-talbiet għad-data, l-Awtorità tista’ tibda proċedimenti amministrattivi ta’ nuqqas ta’ konformità quddiem il-qrati, bil-qrati meħtieġa jiddeċiedu fi żmien 30 jum (59). Barra minn hekk, l-Awtorità tal-Integrità għandha l-possibbiltà li titlob lill-awtoritajiet jew lill-korpi nazzjonali jibdew il-proċeduri biex jivverifikaw id-dikjarazzjonijiet u s-suspetti ta’ kunflitt ta’ interess fir-rigward tal-ġestjoni tal-fondi tal-Unjoni.

(63)

Fid-dawl tad-dispożizzjonijiet li daħlu fis-seħħ u tal-elementi stabbiliti hawn fuq, filwaqt li jitqiesu s-sejbiet fit-Taqsima 2.4.3 hawn taħt, u abbażi wkoll tal-valutazzjoni tal-Kummissjoni, il-Kunsill iqis li l-Ungerija implimentat l-impenji skont il-miżura ta’ rimedju dwar l-Awtorità tal-Integrità u indirizzat id-dgħufijiet u n-nuqqasijiet identifikati fil-premessa 36 tad-Deċiżjoni ta’ Implimentazzjoni (UE) 2022/2506.

(64)

Bħala parti mill-miżuri ta’ remedju adottati fl-2022, l-Ungerija impenjat ruħha li tistabbilixxi Task Force Kontra l-Korruzzjoni (l-“ACTF”) bil-kompitu li, fost oħrajn, teżamina l-miżuri eżistenti kontra l-korruzzjoni u telabora proposti dwar it-titjib tal-prevenzjoni, l-identifikazzjoni, l-investigazzjoni, il-prosekuzzjoni u s-sanzjonar ta’ korruzzjoni (60). Il-qafas regolatorju tal-ACTF ġie inkluż fl-Att dwar l-Awtorità tal-Integrità.

(65)

Meta jitqiesu għadd ta’ żviluppi, abbażi tal-valutazzjoni tal-Kummissjoni, fid-Deċiżjoni ta’ Implimentazzjoni (UE) 2022/2506, il-Kunsill sab li l-Ungerija ħadet il-Passi Ewlenin ta’ Implimentazzjoni rilevanti u li l-qafas regolatorju relatat mal-ACTF issodisfa l-impenji stabbiliti fil-miżura ta’ rimedju (61).

(66)

Madankollu, fid-Deċiżjoni tal-Kummissjoni tal-2023, il-Kummissjoni qieset li l-Gvern Ungeriż ma pprovdiex raġunament dettaljat biex ma jaqbilx dwar il-miżuri proposti mill-ACTF fir-rapport annwali tagħha tal-2022, għall-kuntrarju tal-impenn speċifiku meħud skont il-miżura ta’ rimedju (62).

(67)

Permezz tan-Notifika bil-Miktub tagħha, l-Ungerija ppreżentat ukoll evidenza li turi li l-ACTF hija kompletament u effettivament operazzjonali kif meħtieġ mill-miżura ta’ rimedju u li l-Att Omnibus ippromulga diversi proposti mressqa mill-ACTF li jmorru wkoll lil hinn mill-impenji li saru skont il-miżura ta’ rimedju oriġinali.

(68)

Fit-2 ta’ Marzu 2026, f’konformità mat-Taqsima 51 (1) tal-Att dwar l-Awtorità tal-Integrità (li jirregola wkoll l-Att) u f’konformità mal-impenn meħud fil-miżura ta’ rimedju (63), l-ACTF adottat r-rapport annwali tal-2025 u ppubblikatu fuq is-sit web tagħha (64). Fit-13 ta’ Awwissu 2026, f’konformità mal-miżura ta’ rimedju u f’konformità mat-Taqsima 52 tal-Att dwar l-Awtorità tal-Integrità, il-gvern Ungeriż wieġeb għall-proposti f’dak ir-rapport filwaqt li qishom, b’mod partikolari meta ħejja l-istrateġija nazzjonali l-ġdida għall-prevenzjoni tal-korruzzjoni (65). Huwa pprovda ukoll raġunament aktar dettaljat bi tweġiba għar-rapporti annwali tal-ACTF fid-dawl tad-Deċiżjoni tal-Kummissjoni tal-2023.

(69)

Filwaqt li l-ACTF ma rnexxilux jadotta rapport annwali fl-2025, ir-riformi interni saħħew l-istruttura operazzjonali u l-metodi ta’ ħidma tal-ACTF. Fit-2 ta’ Marzu 2026, għal darb’oħra ġie adottat rapport annwali (66).

(70)

Barra minn hekk, l-Att dwar l-Awtorità tal-Integrità kif emendat mill-Att Omnibus jimplimenta l-proposti mressqa mill-ACTF fir-Rapport Annwali tiegħu tal-2024 biex itejjeb l-effiċjenza tal-ACTF (67).

(71)

Barra minn hekk, it-Taqsima 54 tal-Att dwar l-Awtorità tal-Integrità kif emendat mill-Att Omnibus tistabbilixxi li l-membri li jirrappreżentaw l-organi tal-Istat għandhom jinħatru għal terminu ta’ mhux aktar minn ħames snin, iżda l-ħatra tagħhom tista’ tiġi rtirata fi kwalunkwe ħin (68). Barra minn hekk, fost il-membri li jirrappreżentaw l-organi tal-Istat, persuna maħtura mid-Direttur Ġenerali tad-Direttorat Ġenerali għall-Awditjar tal-Fondi Ewropej (“EUTAF”) tista’ tipparteċipa wkoll fil-ħidma bħala mistiedna permanenti (69). Il-membri li jirrappreżentaw l-organi tal-Istat se jkomplu jirċievu l-ebda kumpens separat; minflok, il-membri li jirrappreżentaw atturi mhux governattivi huma intitolati għal onorarju li jikkorrispondi għall-ammont ta’ remunerazzjoni pprovdut għall-membri li jirrappreżentaw organizzazzjonijiet mhux governattivi tal-Kumitati ta’ Monitoraġġ tal-programmi operazzjonali tal-Ungerija (70). Barra minn hekk, jekk ikun assenti, membru li jirrappreżenta attur mhux governattiv jista’ jagħti mandat ta’ rappreżentanza lil membru ieħor li d-drittijiet u l-obbligi tiegħu jridu jkunu identiċi għall-membru assenti (71).

(72)

It-Taqsima 58 emendata tal-Att dwar l-Awtorità tal-Integrità tistipula li l-mandat tal-membri li jirrappreżentaw atturi mhux governattivi jista’ jiġi tterminat bl-irtirar tal-istedina għalihom jekk ma jibqgħux jissodisfaw il-kriterji tal-għażla, jew għandu jiskadi ex lege 5 snin wara l-ħatra tagħhom (72), terminu li japplika wkoll għall-membri mhux governattivi maħtura qabel. It-Taqsima 61(5) tal-Att dwar l-Awtorità tal-Integrità kif emendat mill-Att Omnibus jiċċara li l-ACTF innifisha tistabbilixxi r-regoli ta’ proċedura tagħha li jirregolaw l-organizzazzjoni u l-operat tagħha, u l-pjan ta’ ħidma annwali tagħha, fuq proposta mill-President tagħha, li huwa l-President tal-Awtorità tal-Integrità (73).

(73)

Fir-rigward tal-operat kurrenti tal-ACTF, skont il-President tal-Awtorità tal-Integrità fil-kapaċità tiegħu bħala President tal-ACTF, l-ACTF reġa’ lura għall-kompożizzjoni sħiħa tiegħu wara l-ħatra ta’ membru mhux governattiv ġdid. Fl-istess ħin, ir-rappreżentanti tal-gvern inbidlu sostanzjalment wara t-twaqqif tal-Gvern il-ġdid. L-ACTF kellha l-laqgħa inawgurali tagħha fit-8 ta’ Lulju 2026 u bdiet t-tħejjijiet għall-implimentazzjoni tal-emendi leġislattivi li daħlu fis-seħħ fis-26 ta’ Awwissu 2026, inkluż ir-reviżjoni tar-Regoli ta’ Proċedura tagħha u l-ippjanar tal-ħidma tematika tagħha għall-2026 (74). Meta jitqiesu d-Deċiżjoni ta’ Implimentazzjoni (UE) 2022/2506, l-emendi leġiżlattivi u l-iżviluppi ppreżentati f’din it-taqsima, abbażi tal-valutazzjoni tal-Kummissjoni, il-Kunsill iqis li l-Ungerija implimentat bis-sħiħ il-miżura ta’ rimedju dwar l-ACTF.

(74)

Bħala parti mill-miżuri ta’ rimedju adottati fl-2022, l-Ungerija impenjat ruħha li ssaħħaħ il-qafas kontra l-korruzzjoni billi tadotta sensiela ta’ strateġiji u atti li jikkonċernaw il-ġlieda kontra l-frodi u l-korruzzjoni u billi tirriforma s-sistema tad-dikjarazzjonijiet tal-assi. Din il-miżura ta’ rimedju għandha natura orizzontali u sistemika sabiex tiġġieled kontra l-korruzzjoni u tiżgura t-trasparenza fl-isfera politika. Il-Kunsill għalhekk ikkunsidraha bħala waħda mill-miżuri ta’ rimedju ċentrali (75). Xi punti tar-riforma l-aktar riċenti, rigward il-verifika tad-dikjarazzjonijiet tal-assi, kienu parti mill-impenji meħuda skont il-miżura ta’ rimedju dwar l-Awtorità tal-Integrità msemmija fit-Taqsima 2.2.

(75)

L-Ungerija impenjat ruħha li sat-30 ta’ Settembru 2022 tadotta strateġija kontra l-frodi u kontra l-korruzzjoni għall-appoġġ tal-Unjoni li tiddefinixxi r-rwoli u r-responsabbiltajiet fir-rigward tal-prevenzjoni, l-identifikazzjoni u l-korrezzjoni ta’ frodi, kunflitti ta’ interess u korruzzjoni ta’ entitajiet involuti fl-implimentazzjoni ta’ kwalunkwe appoġġ finanzjarju tal-Unjoni. Id-Deċiżjoni ta’ Implimentazzjoni (UE) 2022/2506 irreferiet għall-valutazzjoni tal-Kummissjoni u qieset li, minkejja li ma ssodisfatx l-iskadenza miftiehma, l-Ungerija ssodisfat l-impenji stabbiliti fil-miżura ta’ rimedju (76).

(76)

Permezz tan-Notifika bil-Miktub tagħha, l-Ungerija ppreżentat evidenza li hija adottat verżjoni riveduta ta’ din l-istrateġija u l-pjan ta’ azzjoni relatat fl-2024, li tkopri l-appoġġ finanzjarju kollu tal-Unjoni inklużi l-fondi agrikoli (77) u li l-implimentazzjoni b’mod ġenerali tinsab fit-triq it-tajba (78). L-istrateġija riveduta tkompli tipprevedi r-rwoli u r-responsabbiltajiet relatati mal-prevenzjoni, l-identifikazzjoni u l-korrezzjoni tal-frodi, il-kunflitti ta’ interess u l-korruzzjoni tal-entitajiet differenti involuti fl-implimentazzjoni tal-appoġġ finanzjarju tal-Unjoni fl-Ungerija u tippreżenta valutazzjoni komprensiva tar-riskji, il-fatturi u l-prattiki ewlenin ta’ frodi, kunflitti ta’ interess u korruzzjoni. Il-pjan ta’ azzjoni li jikkomplementa l-istrateġija jiddefinixxi azzjonijiet speċifiċi u skadenzi għat-twettiq tagħhom, jidentifika l-korpi responsabbli u l-indikaturi għall-implimentazzjoni u l-monitoraġġ tagħhom u jistabbilixxi l-arranġamenti meħtieġa għar-rieżami regolari tal-pjan ta’ azzjoni (79).

(77)

Barra minn hekk, fl-2022, il-Gvern Ungeriż impenja ruħu wkoll li jadotta Strateġija Nazzjonali ġdida Kontra l-Korruzzjoni (l-“NACS”) u Pjan ta’ Azzjoni (l-“AP”), u li jimplimenta bis-sħiħ l-azzjonijiet kollha tal-NACS eżistenti għall-perjodu 2020-2022 sat-30 ta’ Ġunju 2023 (80). F’Diċembru 2023, id-Deċiżjoni tal-Kummissjoni tal-2023 irrapportat li l-proċess biex tiġi ffinalizzata l-NACS il-ġdida kien għadu għaddej u ċerti nuqqasijiet kellhom jiġu indirizzati qabel l-adozzjoni; lanqas ma kien ċar jekk il-Gvern Ungeriż kienx ikkonsulta sistematikament mal-partijiet ikkonċernati rilevanti. Dak iż-żmien, il-Kummissjoni kkonkludiet li l-qafas kontra l-korruzzjoni ma kienx issaħħaħ kif impenjat sa issa, peress li l-adozzjoni tal-NACS il-ġdida u l-AP relatat, inkluża l-adozzjoni ta’ reġim ta’ sanzjonar dissważiv, iddewmet (81).

(78)

Permezz tan-Notifika bil-Miktub tagħha, l-Ungerija rrapportat dwar l-implimentazzjoni sħiħa tal-NACS 2020-2022 kif ukoll dwar l-involviment tal-ACTF, il-konsultazzjoni tal-organizzazzjonijiet nazzjonali, l-OECD u l-GRECO biex jitħejjew l-NACS u l-AP sussegwenti (82). L-Ungerija ppreżentat evidenza li hija adottat l-NACS fuq terminu medju għall-2024-2025 u l-AP għall-implimentazzjoni tiegħu, b’dewmien ta’ seba’ xhur u nofs, fl-14 ta’ Frar 2024, li daħal fis-seħħ l-għada, u stabbilit kumitat ta’ monitoraġġ biex jiżgura s-segwitu tal-implimentazzjoni tal-NACS u l-AP (83). Skont ir-rapport tal-gvern Ungeriż dwar l-evalwazzjoni tal-implimentazzjoni tal-NACS u l-AP (84), filwaqt li nkisbu għadd ta’ riżultati fuq skala iżgħar, l-implimentazzjoni kienet nieqsa fir-rigward ta’ partijiet importanti tal-NACS u l-AP. Xi impenji ewlenin ma ġew issodisfati xejn, pereżempju riforma sistemika tar-regoli dwar il-lobbjar u r-revolving doors, filwaqt li oħrajn ġew implimentati parzjalment biss, pereżempju fir-rigward tar-regoli dwar ir-rigali tal-protokoll u l-kodiċijiet professjonali, jew ġew implimentati biss ferm wara d-dati ta’ skadenza tal-NACS u l-PA, kif kien b’mod partikolari l-każ fir-rigward tal-impenji relatati mad-dikjarazzjoni tal-assi (85).

(79)

Minbarra l-isforzi mwettqa mill-Ungerija matul dawn l-aħħar xhur, l-Ungerija ppreżentat l-intenzjoni tagħha li tadotta NACS u AP ġodda sal-15 ta’ Novembru 2026 filwaqt li qieset is-sejbiet mill-implimentazzjoni tal-NACS 2024-2025, il-proposti tal-ACTF, u f’konsultazzjoni mal-partijiet ikkonċernati rilevanti (86). L-NACS u l-AP il-ġodda jenħtieġ li jipproponui miżuri biex jindirizzaw in-nuqqasijiet li fadal.

(80)

Kif stabbilit fid-Deċiżjoni ta’ Implimentazzjoni (UE) 2022/2506, il-Kunsill sab li l-Ungerija, f’konformità mal-miżura ta’ rimedju, kienet estendiet il-kamp ta’ applikazzjoni personali tad-dikjarazzjonijiet tal-assi biex jinkludi persuni fdati b’funzjonijiet politiċi għolja u membri tal-Assemblea Nazzjonali, kif ukoll il-qraba tagħhom li jgħixu fl-istess dar. Madankollu, sabet ukoll li għad hemm dgħufijiet, riskji u nuqqasijiet importanti fil-qafas regolatorju għad-dikjarazzjonijiet tal-assi fl-Ungerija, b’mod partikolari (i) in-nuqqas ta’ ċarezza u ċertezza legali relatati mal-obbligi ta’ divulgazzjoni għall-proprjetà immobbli inkluża l-proprjetà barra mill-ġuriżdizzjoni tal-Ungerija; (ii) in-nuqqas ta’ ċarezza dwar il-kamp ta’ applikazzjoni personali, materjali u temporali tad-dikjarazzjoni tal-assi, l-introjtu u l-interessi ekonomiċi ta’ ċerti eżekuttivi, uffiċjali u Membri tal-Assemblea Nazzjonali, u għall-konjuġi jew il-koabitanti u t-tfal tagħhom li jgħixu fl-istess unità domestika; (iii) in-nuqqas li tiġi inkluża fil-qafas leġiżlattiv referenza espliċita għall-istabbiliment ta’ sistema ta’ dikjarazzjonijiet tal-assi ppreżentati b’mod elettroniku f’format diġitali, li għandha tinħażen f’bażi tad-data pubblika li tista’ titfittex mingħajr tariffi jew il-ħtieġa ta’ reġistrazzjoni.

(81)

Il-Kunsill ikkonkluda li d-dgħufijiet identifikati ħolqu lakuni possibbli fil-liġi u konsegwentement dgħajfu l-effettività tal-miżura ta’ rimedju (87). Dawk id-dgħufijiet baqgħu ma ġewx indirizzati fi tmiem l-2023, meta ġiet adottata d-Deċiżjoni tal-Kummissjoni tal-2023 (88).

(82)

Marbuta mad-dikjarazzjonijiet tal-assi, fir-rigward tal-verifika tagħhom, il-Kunsill sab permezz tad-Deċiżjoni ta’ Implimentazzjoni (UE) 2022/2506 li l-effettività tal-miżura ta’ rimedju dwar l-Awtorità tal-Integrità iċċitata fit-Taqsima 2.2 hawn fuq ġiet kompromessa minn, fost affarijiet oħra, (i) in-nuqqas ta’ setgħat diretti, għall-kuntrarju tas-setgħat superviżorji, tal-Awtorità tal-Integrità fir-rigward tad-diversi gruppi ta’ dikjaranti, u n-nuqqas ta’ trasferiment tas-setgħat lill-Awtorità tal-Integrità biex tivverifika d-dikjarazzjonijiet tal-assi tal-membri tal-Gvern, u (ii) il-kamp ta’ applikazzjoni limitat relatat man-nuqqas ta’ inklużjoni tal- uffiċjali b’riskju għoli kollha fil-kamp ta’ applikazzjoni tas-setgħat ta’ verifika tal-Awtorità tal-Integrità fir-rigward tad-dikjarazzjonijiet tal-assi. Dawn id-dgħufijiet ukoll baqgħu ma ġewx indirizzati fi tmiem l-2023, meta ġiet adottata d-Deċiżjoni tal-Kummissjoni tal-2023 (89).

(83)

Permezz tan-Notifika bil-Miktub tagħha, l-Ungerija ppreżentat evidenza biex turi li issa hemm fis-seħħ sistema regolatorja komprensiva u konsistenti għad-dikjarazzjonijiet tal-assi (90).

(84)

L-Awtorità tal-Integrità għandha setgħat estensivi fir-rigward tal-investigazzjonijiet u l-verifika tad-dikjarazzjonijiet tal-assi, kif ukoll is-segwitu amministrattiv għar-riżultati tagħha (91).

(85)

L-ewwel nett, it-Taqsima 19/A (1) tal-Att dwar l-Awtorità tal-Integrità kif emendat issa tistabbilixxi b’mod ċar lista ta’ uffiċjali b’riskju għoli soġġetti għall-verifika tad-dikjarazzjonijiet tal-assi mill-Awtorità tal-Integrità (92). B’approċċ ibbażat fuq ir-riskju, l-Awtorità tal-Integrità, fil-qafas tal-valutazzjoni tar-riskju tal-integrità tagħha, hija meħtieġa tidentifika kontinwament dawk l-uffiċjali b’riskju għoli soġġetti għall-obbligi tad-dikjarazzjoni tal-assi li għalihom il-livell tar-riskju tal-integrità huwa għoli, sabiex tiddetermina l-prijorità u l-frekwenza tal-verifiki (93).

(86)

Skont it-Taqsima 19/A (2) (a) tal-Att dwar l-Awtorità tal-Integrità kif emendat, l-Awtorità tal-Integrità għandha l-kompetenza esklużiva li tivverifika direttament id-dikjarazzjonijiet tal-assi ta’ eżekuttivi politiċi għolja li mhumiex Membri tal-Assemblea Nazzjonali skont it-Taqsima 183 tal-Att CXXV tal-2018 dwar l-Amministrazzjoni tal-Gvern (l-“Att dwar l-Amministrazzjoni tal-Gvern”) (94), kif ukoll il-qraba tagħhom li jgħixu fl-istess unità domestika. Għal uffiċjali oħra ta’ riskju għoli, din il-kompetenza hija kondiviża ma’ korpi oħra maħtura biex jivverifikaw id-dikjarazzjonijiet tal-assi fl-atti settorjali rispettivi. Fl-aħħar każ, l-Awtorità tal-Integrità tista’ tivverifika direttament id-dikjarazzjonijiet tal-assi u ma tiddependix fuq awtoritajiet oħra li jivverifikaw fuq talba, setgħa li, għal dikjarazzjonijiet tal-assi mhux pubbliċi, tmur lil hinn mill-impenji oriġinali.

(87)

L-Awtorità tal-Integrità tista’ twettaq il-proċedura ta’ verifika b’mod indipendenti jew bħala parti mill-proċedura investigattiva tagħha u jenħtieġ li tniedi proċeduri regolarment ex officio abbażi tal-valutazzjoni tar-riskju tal-integrità tagħha. Regoli dettaljati jiżguraw l-aċċess tal-Awtorità tal-Integrità għad-dikjarazzjonijiet tal-assi miżmuma minn korpi oħra u l-proċedura tal-involviment tal-persuna kkonċernata mill-investigazzjoni, inkluża l-possibbiltà li l-Awtorità tal-Integrità titlob informazzjoni u dokumenti addizzjonali (95).

(88)

Sabiex tivverifika d-dikjarazzjonijiet tal-assi, l-Awtorità tal-Integrità tgawdi minn aċċess wiesa’ għad-data u għall-informazzjoni. F’dan ir-rigward, l-Awtorità tal-Integrità bħalissa għandha aċċess dirett u illimitat għal 44 reġistru (96) permezz tal-Bus tas-Servizz Governattiv Ċentrali; tista’ titlob ukoll aċċess għall-informazzjoni kollha meqjusa meħtieġa għall-verifika tagħha, abbażi tad-dispożizzjonijiet deskritti fil-premessi (60) sa (62) hawn fuq. Fi tmiem il-proċess ta’ verifika, l-Awtorità tal-Integrità tevalwa s-sejbiet tagħha f’rapport u, skont l-eżitu, tibda proċedura ta’ sanzjonijiet (ara fid-dettall il-premessi (96)-(99)) (97).

(89)

It-tieni, fir-rigward tal-obbligi ta’ divulgazzjoni fid-dikjarazzjonijiet tal-assi, l-Anness 1 tal-Att XXXVI tal-2012 dwar l-Assemblea Nazzjonali (l-“Att dwar l-Assemblea Nazzjonali”) (98) kif emendat mill-Att Omnibus issa jistipula b’mod ċar li l-proprjetà immobbli barra mill-ġuriżdizzjoni tal-Ungerija għandha tiġi rrapportata wkoll fid-dikjarazzjoni tal-assi.

(90)

It-tielet, fir-rigward tal-kamp ta’ applikazzjoni personali, materjali u temporali tad-dikjarazzjonijiet tal-assi ta’ ċerti uffiċjali, it-Taqsima 183 (1) tal-Att dwar l-Amministrazzjoni tal-Gvern u t-Taqsima 90 (1), (2) tal-Att dwar l-Assemblea Nazzjonali, kif emendat, jipprevedu li eżekuttivi politiċi għolja mingħajr mandat bħala membru tal-Assemblea Nazzjonali u membri tal-Assemblea Nazzjonali, inklużi eżekuttivi politiċi għolja skont it-Taqsima 184 tal-Att dwar l-Amministrazzjoni tal-Gvern, iridu jippreżentaw dikjarazzjoni tal-assi fi żmien 30 jum wara li jieħdu l-kariga, u minn hemm’ il quddiem kull sena sal-31 ta’ Jannar, li tirrifletti s-sitwazzjoni mill-31 ta’ Diċembru tas-sena preċedenti, kif ukoll fi żmien 30 jum wara t-terminazzjoni tal-mandat tagħhom (b’perjodu ta’ żamma ta’ tliet snin).

(91)

Il-qraba skont it-tifsira tal-Att V tal-2013 dwar il-Kodiċi Ċivili (il-“Kodiċi Ċivili”) (99) li jgħixu fl-istess unità domestika ma’ dawn l-uffiċjali jridu jippreżentaw dikjarazzjonijiet tal-assi mhux pubbliċi bl-istess kontenut. Il-kompetenza għall-verifika tad-dikjarazzjonijiet tal-assi tal-qraba ssegwi r-regoli applikabbli għall-uffiċjal (100). Lil hinn mir-rekwiżiti tal-miżura ta’ rimedju, uffiċjali oħra b’riskju għoli huma soġġetti wkoll għall-istess rekwiżiti fir-rigward tad-dikjarazzjonijiet tal-assi tagħhom, u r-regoli għall-qraba li jgħixu fl-istess unità domestika japplikaw ukoll għal dawk l-uffiċjali l-oħra b’riskju għoli fejn il-liġijiet settorjali jirreferu għar-regoli fl-Att dwar l-Assemblea Nazzjonali (101).

(92)

Ir-raba’, fir-rigward tas-sistema tad-dikjarazzjonijiet tal-assi ppreżentati b’mod elettroniku f’format diġitali, li għandhom jinħażnu f’bażi tad-data pubblika li tista’ titfittex, it-Taqsima 90 tal-Att dwar l-Assemblea Nazzjonali kif emendat tistabbilixxi r-regoli dwar is-sottomissjoni elettronika tad-dikjarazzjonijiet tal-assi tal-membri tal-Assemblea Nazzjonali u tirrikjedi li l-Uffiċċju tal-Assemblea Nazzjonali jiżgura t-tħaddim tas-sistema ta’ reġistrazzjoni elettronika u tal-interfaċċa tal-utent relatata għad-dħul strutturat tad-data. Id-dispożizzjoni tagħmilha ċara li tapplika għad-dikjarazzjonijiet tal-assi ta’ kull min jippreżenta d-dikjarazzjonijiet tal-assi tiegħu f’konformità mar-regoli stabbiliti mill-Att dwar l-Assemblea Nazzjonali kif ukoll il-qraba tiegħu li jgħixu fl-istess unità domestika, li d-dikjarazzjonijiet tagħhom iridu jkunu mehmuża ma’ dawk tal-uffiċjali. Ir-regoli settorjali għal uffiċjali differenti b’riskju għoli (102) jikkomplementaw din il-loġika, inkluża t-Taqsima 183 (1) tal-Att dwar l-Amministrazzjoni tal-Gvern kif emendat, għal uffiċjali politiċi għolja mingħajr mandat bħala membru tal-Assemblea Nazzjonali. Dan imur lil hinn mill-impenji aktar limitati fil-miżura ta’ rimedju fir-rigward tal-kamp ta’ applikazzjoni personali.

(93)

Skont l-Artikolu 94 (2) tal-Att dwar l-Assemblea Nazzjonali kif emendat, il-kopja pubblika tad-dikjarazzjoni tal-assi (esklużi dawk tal-qraba) hija ppubblikata mill-Kumitat dwar l-Immunità tal-Assemblea Nazzjonali fuq is-sit web tal-Assemblea Nazzjonali, aċċessibbli għal kulħadd mingħajr ħlas u mingħajr ebda rekwiżit ta’ reġistrazzjoni (103). Fil-każ ta’ dikjarazzjonijiet tal-assi ppreżentati bejn l-1 ta’ Awwissu 2022 u s-26 ta’ Awwissu 2026 (qabel id-dħul fis-seħħ tar-regoli l-ġodda), l-aċċess huwa żgurat b’mod li jista’ jsir tiftix fih fuq is-sit web tal-Assemblea Nazzjonali mingħajr tariffa jew reġistrazzjoni.

(94)

Permezz tan-Notifika bil-Miktub tagħha, l-Ungerija ppreżentat evidenza addizzjonali li s-sistema qed issir operazzjonali. Il-Gvern ħatar lill-kumpanija biex tiżviluppa s-sistema elettronika tad-dikjarazzjoni tal-assi (104), u s-sistema, inklużi l-funzjonijiet ta’ tiftix meħtieġa, saret operazzjonali f’Awwissu 2026. Funzjonalitajiet imtejba ulterjuri (105) għandhom ikunu disponibbli sa tmiem l-2026, biex ikun disponibbli għad-dikjarazzjonijiet tal-assi dovuti sal-31 ta’ Jannar 2027.

(95)

Fl-aħħar nett, f’konformità mal-impenji tagħha, l-Ungerija stabbiliet reġim ta’ sanzjonijiet relatat mal-ksur tal-obbligi tad-dikjarazzjoni tal-assi. Fir-rigward tas-sanzjonijiet kriminali, it-Taqsima 305/A tal-Att C tal-2012 dwar il-Kodiċi Kriminali (il-“Kodiċi Kriminali”) (106) kif emendat mill-Att Omnibus tistabbilixxi r-responsabbiltà kriminali ta’ kwalunkwe persuna (i) li, wara li tintalab mill-entità kompetenti, tonqos, it-tort tagħha stess, milli tikkonforma mal-obbligu tad-dikjarazzjoni tal-assi tagħha fil-limitu ta’ żmien preskritt mil-liġi, jew (ii) li, waqt li tikkonforma mal-obbligu tad-dikjarazzjoni tal-assi tagħha, taħbi s-sitwazzjoni finanzjarja tagħha billi tagħmel dikjarazzjoni li jkun fiha informazzjoni falza dwar fatt materjali, billi żżomm lura milli tiddikjara fatt veru, jew bi kwalunkwe mezz ieħor.

(96)

Jekk japplikawx sanzjonijiet amministrattivi jiddependi mir-rapport tal-Awtorità tal-Integrità fi tmiem proċedura ta’ verifika ta’ dikjarazzjoni tal-assi. Skont it-Taqsima 19/A (8) tal-Att dwar l-Awtorità tal-Integrità kif emendat, hemm tliet eżiti possibbli:

(97)

Fir-rigward tal-persuni li għalihom l-Awtorità tal-Integrità għandha l-kompetenza esklużiva li tivverifika d-dikjarazzjonijiet tal-assi, fil-każ ta’ tkeċċija, l-Awtorità tal-Integrità tinforma lill-President tal-Assemblea Nazzjonali (għat-tkeċċija tal-Prim Ministru) jew lill-Prim Ministru (għall-eżekuttivi politiċi għolja l-oħra kollha mingħajr mandat bħala membru tal-Assemblea Nazzjonali) dwar l-eżitu tal-investigazzjoni tagħha li mbagħad jibda l-proċedura ta’ tkeċċija (108). Fir-rigward tal-impożizzjoni ta’ multi, l-Awtorità tal-Integrità tista’ tniedi proċedimenti ex officio hija stess (109).

(98)

Fir-rigward tal-persuni li għalihom l-Awtorità tal-Integrità għandha kompetenza kondiviża biex tivverifika d-dikjarazzjonijiet tal-assi, il-liġijiet settorjali jikkomplementaw ir-regoli proċedurali għas-sanzjonijiet amministrattivi. Meta t-tkeċċija diretta mibdija mill-Awtorità tal-Integrità jew l-impożizzjoni ta’ multa direttament mill-Awtorità tal-Integrità ma tkunx possibbli minħabba l-istatus kostituzzjonali u l-protezzjoni tal-uffiċċju tal-persuna kkonċernata, jew minħabba li l-funzjonijiet ikkonċernati jappartjenu għal fergħat kostituzzjonalment indipendenti protetti mid-diviżjoni tas-setgħat tal-Istat, dawn ir-regoli settorjali jipprevedu sanzjonijiet amministrattivi li għandhom jiġu imposti mill-korp kompetenti (110). Jekk, matul it-twettiq tal-proċedura mitluba mill-Awtorità tal-Integrità, il-korp kompetenti jilħaq konklużjoni differenti mill-Awtorità tal-Integrità, huwa għandu l-obbligu li jipprovdi dikjarazzjoni dettaljata tar-raġunijiet għal dan u li jinforma lill-Awtorità tal-Integrità kif xieraq. L-Awtorità tal-Integrità tagħmel ir-rapport tagħha, kif ukoll l-informazzjoni riċevuta, disponibbli għall-pubbliku mar-rapport (111). Meta l-Awtorità tal-Integrità tkun tista’ tiddeċiedi dwar il-multa direttament, hija tagħmel id-deċiżjoni tagħha disponibbli għall-pubbliku, inkluż l-isem u l-mandat tal-persuna kkonċernata (112).

(99)

L-awtorità tal-Integrità tista’ titlob li nuqqasijiet minuri jew negliġibbli jiġu kkoreġuti skont it-Taqsima 19/A (8) b) bb) tal-Att dwar l-Awtorità tal-Integrità kif emendat. Fil-każ ta’ uffiċjali b’riskju għoli li għalihom japplikaw direttament ir-regoli tal-Att dwar l-Assemblea Nazzjonali jew b’referenza f’atti settorjali (inkluż għal uffiċjali politiċi għolja skont it-Taqsima 183 tal-Att dwar l-Amministrazzjoni tal-Gvern), l-Att tal-Assemblea Nazzjonali jikkomplementa din ir-regola u jipprevedi li l-korrezzjoni ssir mingħajr dewmien, iżda mhux aktar tard minn 15-il jum, permezz ta’ dikjarazzjoni supplimentari (113).

(100)

Kif deskritt fit-Taqsima 2.4.1, l-Ungerija saħħet il-qafas tagħha kontra l-korruzzjoni u adottat l-istrateġija kontra l-frodi u kontra l-korruzzjoni għall-appoġġ tal-Unjoni u l-pjan ta’ azzjoni relatat kif ukoll ir-reviżjoni tagħhom kif oriġinarjament impenjat ruħha li tagħmel. Madankollu, minħabba n-nuqqasijiet rigward l-NACS u l-AP tal-2024-2025, mhux l-impenji kollha ġew sodisfati u għalhekk il-miżura ta’ rimedju ma tistax titqies sodisfata kompletament. F’dak ir-rigward, jenħtieġ li l-miżura ta’ rimedju tiġi vvalutata fid-dawl tal-importanza relattiva tagħha li tipproteġi l-baġit tal-Unjoni u l-miżuri ta’ rimedju ċentrali l-oħra rigward il-ġlieda kontra l-korruzzjoni, kif ukoll kwalunkwe miżura ta’ rimedju ġdida oħra relatata.

(101)

Kif deskritt fit-Taqsima 2.4.2., l-Ungerija stabbiliet sistema komprensiva ta’ dikjarazzjoni tal-assi, b’reġim ta’ sanzjonijiet dissważivi u proporzjonati. L-Awtorità tal-Integrità, maħluqa bħala waħda mill-miżuri ta’ rimedju ċentrali (114), li ġiet ivvalutata fil-premessa (62) hawn fuq bħala ssodisfata, irċeviet setgħat estensivi biex tivverifika d-dikjarazzjonijiet tal-assi u ssegwi l-verifika, li jmorru lil hinn mill-impenji inizjali tal-Ungerija u jagħmlu s-sistema ta’ verifika aktar robusta. Għalhekk, u abbażi tal-valutazzjoni tal-Kummissjoni, il-Kunsill iqis li l-Ungerija ssodisfat l-impenji meħuda skont din il-miżura ta’ rimedju fir-rigward tad-dikjarazzjonijiet tal-assi u kkomplementathom b’salvagwardji addizzjonali għat-tisħiħ tal-qafas kontra l-korruzzjoni.

(102)

Bħala parti mill-miżuri rimedjali adottati fl-2022, l-Ungerija impenjat ruħha li tistabbilixxi proċedura ġdida ta’ stħarriġ ġudizzjarju li tikkonċerna reati kriminali speċjali relatati mal-eżerċizzju ta’ awtorità pubblika jew mal-ġestjoni ta’ proprjeta’ pubblika (115). Essenzjalment, għal reati kriminali speċifiċi relatati mal-korruzzjoni u prattiki relatati mal-korruzzjoni, il-proċedura l-ġdida kienet li tippermetti stħarriġ ġudizzjarju tad-deċiżjoni tas-servizz tal-prosekuzzjoni jew tal-awtorità investigattiva li tiċħad rapport ta’ reat jew ittemm il-proċedimenti kriminali (116). Il-Kunsill qies dik il-miżura ta’ rimedju bħala miżura orizzontali li għandha l-għan li tirrimedja problemi strutturali bl-effettività tal-azzjoni ta’ prosekuzzjoni fl-Ungerija u li tiżgura li jittieħdu miżuri effettivi u deterrenti biex tiġi żgurata l-protezzjoni tal-interessi finanzjarji tal-Unjoni, f’konformità mal-Artikolu 325 tat-Trattat dwar il-Funzjonament tal-Unjoni Ewropea. Għalhekk hija waħda mill-miżuri ta’ rimedju ċentrali biex ikun indirizzat it-tħassib imqajjem mill-Kummissjoni (117).

(103)

L-Ungerija impenjat ruħha wkoll li (i) talloka karigi dedikati addizzjonali sal-31 ta’ Diċembru 2022 lill-qorti responsabbli għall-istħarriġ ġudizzjarju tad-deċiżjoni tas-servizz tal-prosekuzzjoni jew tal-awtorità investigattiva li tiċħad rapport ta’ reat jew ittemm il-proċedimenti kriminali, u (ii) twettaq rieżami dwar il-funzjonament tal-proċedura sal-31 ta’ Diċembru 2023, u, jekk ikun meħtieġ, tipprevedi l-adozzjoni ta’ emendi għall-qafas leġiżlattiv wara konsultazzjonijiet mal-Kummissjoni sat-30 ta’ Ġunju 2024 (118). Dawk iż-żewġ impenji kellhom jiġu implimentati wara d-data tad-Deċiżjoni ta’ Implimentazzjoni (UE) 2022/2506.

(104)

Permezz tad-Deċiżjoni ta’ Implimentazzjoni (UE) 2022/2506, il-Kunsill sab li, minkejja l-introduzzjoni ta’ proċedura ġdida ta’ stħarriġ ġudizzjarju fl-Att XC tal-2017 dwar il-Kodiċi tal-Proċedura Kriminali (il-“Kodiċi tal-Proċedura Kriminali”) (119), dispożizzjonijiet speċifiċi ppermettew marġni ta’ diskrezzjoni fil-proċedura li tista’ tikkomprometti l-effettività u l-adegwatezza ġenerali tal-miżura ta’ rimedju. B’mod partikolari, (i) ir-regoli applikabbli ma iddikjarawx b’mod ċar il-konsegwenzi legali għall-prosekutur ta’ deċiżjoni ġudizzjarja li tannulla d-deċiżjoni tiegħu wara mozzjoni għal stħarriġ; (ii) għall-każijiet fejn tista’ tiġi ppreżentata mozzjoni għal prosekuzzjoni, il-Kodiċi tal-Proċedura Kriminali kien jirrikjedi eżami tar-raġuni għall-mozzjoni għal prosekuzzjoni mill-qorti tal-proċess in camera u mingħajr ma tinstema’ evidenza, li tkun addizzjonali għall-eżami preliminari tar-raġunijiet formali; (iii) il-Kodiċi tal-Proċedura Kriminali ma ċċarax il-kamp ta’ applikazzjoni fil-ħin tar-regoli l-ġodda u, b’mod partikolari, naqas milli jiċċara li l-proċedura l-ġdida tapplika wkoll għal reati kriminali mhux preskritti imwettqa qabel l-1 ta’ Jannar 2023 (120). Il-Kummissjoni kkonfermat dik il-valutazzjoni fid-Deċiżjoni tal-Kummissjoni tal-2023 (121).

(105)

Permezz tan-Notifika bil-Miktub tagħha, l-Ungerija qalet li t-tliet punti ġew rimedjati mill-emendi għall-Kodiċi tal-Proċedura Kriminali introdotti bl-Att Omnibus (122). L-Ungerija ddikjarat li l-objettiv ġenerali huwa li jissaħħaħ il-qafas legali proċedurali, li tissaħħaħ it-trasparenza tal-proċedimenti kriminali u r-rwol proċedurali tal-Awtorità tal-Integrità, u li tiġi żgurata sorveljanza ġudizzjarja aktar effettiva.

(106)

Fir-rigward tal-ewwel punt taħt il-premessa (104) ta’ hawn fuq, it-Taqsima 817/G (3) tal-Kodiċi tal-Proċedura Kriminali kif emendata tipprevedi li wara deċiżjoni rilevanti tal-qorti f’mozzjoni għal reviżjoni, is-servizz tal-prosekuzzjoni jew l-awtorità investigattiva jridu jkomplu l-proċedimenti abbażi tar-raġunament tal-imsemmija deċiżjoni tal-qorti u, fil-każ ta’ nuqqas ta’ detezzjoni ta’ kwistjonijiet speċifiċi, jirrimedjaw in-nuqqasijiet identifikati fl-istess deċiżjoni tal-qorti. Il-proċedimenti ma jistgħux jerġgħu jintemmu jekk, f’każ ta’ nuqqas ta’ detezzjoni, id-defiċjenzi identifikati fid-deċiżjoni tal-qorti ma jkunux ġew rimedjati, sakemm dan ma kienx possibbli minħabba raġunijiet lil hinn mill-kontroll tas-servizz tal-prosekuzzjoni jew tal-awtorità investigattiva.

(107)

Barra minn hekk, f’dan il-każ, l-awtorità investigattiva għandha, fi żmien xahrejn mill-bidu tal-investigazzjoni jew mit-tkomplija tal-proċedimenti, u minn hemm ’il quddiem kull xahrejn, tippreżenta l-fajls tal-investigazzjoni lis-servizz tal-prosekuzzjoni u fl-istess ħin tirrapporta dwar il-progress tal-investigazzjoni. Barra minn hekk, is-servizz tal-prosekuzzjoni jrid jibgħat il-fajls kollha tal-kawżi speċifikati mil-liġi li jappartjenu għar-rapport tal-awtorità investigattiva, lill-qorti kompetenti biex tiddeċiedi dwar il-mozzjoni għal reviżjoni.

(108)

Meta, abbażi tal-fajls ippreżentati, il-qorti kompetenti biex tiddeċiedi l-mozzjoni għal reviżjoni tistabbilixxi li l-investigazzjoni manifestament ma tqisx ir-raġunament tad-deċiżjoni tal-qorti, hija trid tirreferi għall-kap tas-servizz tal-prosekuzzjoni għall-miżuri li għandhom jittieħdu. Ir-rapport sussegwenti dwar il-progress tal-investigazzjoni jrid wkoll jinforma lill-qorti, li tiddeċiedi dwar il-mozzjoni għal reviżjoni, dwar il-miżuri meħuda b’reazzjoni għal tali indikazzjoni.

(109)

Fl-aħħar nett, f’każ ta’ terminazzjoni ripetuta tal-proċedimenti u soġġett għall-kundizzjonijiet speċifikati fl-Att XC tal-2017 kif emendat, il-proċedura ta’ stħarriġ ġudizzjarju tiftaħ id-dritt li jiġi ppreżentat att ta’ akkuża lill-qorti kompetenti li għandha tiddeċiedi dwar il-merti tal-kawża wara li tkun semgħet l-evidenza.

(110)

Fir-rigward tat-tieni punt taħt il-premessi (103) u (104) hawn fuq, l-Ungerija qalet li l-qorti kompetenti biex tiddeċiedi l-mozzjoni għal reviżjoni ripetuta tista’ tiċħad il-mozzjoni b’ordni mhux konklużiva abbażi biss ta’ prerekwiżiti formali (123). Wara dan, il-qorti kompetenti biex tiddeċiedi l-mozzjoni għal reviżjoni ripetuta tista’ twettaq biss eżami limitat tar-raġunijiet ta’ mozzjoni għal prosekuzzjoni. Hija trid teżamina jekk il-persuna speċifikata bħala akkużata fil-mozzjoni għal prosekuzzjoni tistax tkun raġonevolment issuspettata li wettqet ir-reat kriminali. Dik il-valutazzjoni hija bbażata fuq il-proċess tal-kawża u d-data, id-dokumenti u d-dikjarazzjonijiet mehmuża mill-persuna intitolata li tippreżenta l-mozzjoni għal prosekuzzjoni. Barra minn hekk, jekk il-qorti kompetenti biex tiddeċiedi l-mozzjoni għal reviżjoni ripetuta ssib li l-akkużat jidher li għandu immunità u jekk l-immunità ma titneħħiex, il-qorti trid tiċħad il-mozzjoni għal prosekuzzjoni, kompletament jew parzjalment (124). Skont l-Ungerija, din is-soluzzjoni tiżgura li r-rieżami tal-merti ma jservix bħala deċiżjoni preliminari mill-qorti li aktar tard tiddeċiedi dwar il-merti tal-każ, iżda jiffunzjona bħala rieżami ġudizzjarju separat. B’dak il-mod, il-funzjonijiet ġudizzjarji jinżammu separati, l-imparzjalità tal-proċedimenti tiġi salvagwardjata, u l-konsistenza tas-salvagwardji inerenti fil-proċedura separata tiġi żgurata wkoll.

(111)

Fir-rigward tat-tielet punt taħt il-premessa (104) hawn fuq, l-Att Omnibus jistabbilixxi li d-dispożizzjonijiet stabbiliti fil-Kapitolu CV/A tal-Kodiċi tal-Proċedura Kriminali japplikaw ukoll għal reati kriminali (mhux preskritti) imwettqa qabel l-1 ta’ Jannar 2023. Bħala garanzija addizzjonali, il-Kapitolu CV/A japplika wkoll għal rapport ta’ reat ippreżentat wara l-31 ta’ Diċembru 2022 jekk dak ir-rapport ta’ reat jikkonċerna l-istess att bħall-att soġġett għal rapport ta’ reat preċedenti li jkun ġie ppreżentat u miċħud (jew fejn l-investigazzjoni tkun intemmet) qabel l-1 ta’ Jannar 2023 (125).

(112)

Fir-rigward taż-żewġ impenji skont il-premessa (103) hawn fuq, inħolqu żewġ karigi ġudizzjarji ġodda fit-Taqsima tal-Investigazzjoni tal-Qorti Distrettwali Ċentrali ta’ Buda, li hija l-qorti kompetenti biex tordna l-bidu jew il-kontinwazzjoni ta’ proċedimenti kriminali skont il-kapitolu CV/A tal-Att XC tal-2017. L-avviżi korrispondenti ta’ karigi battala ġew ippubblikati fl-ewwel ħarġa speċjali tal-Gazzetta Ġudizzjarja fl-2023. Iż-żewġ karigi mtlew b’ħatra fil-15 ta’ Lulju 2023. Barra minn hekk, mill-1 ta’ Frar 2023, l-Ungerija ħolqot żewġ karigi ġodda ta’ segretarju tal-qorti fil-ġuriżdizzjoni tal-Qorti Reġjonali tal-Belt Kapitali ta’ Budapest. Skont l-Ungerija, l-għadd kurrenti ta’ mħallfin jippermetti r-rotazzjoni kontinwa tal-assenjazzjonijiet tal-kawżi u t-tmexxija tad-diviżjoni timmonitorja kontinwament il-konformità mal-ipproċessar f’waqtu tal-kawżi.

(113)

L-Ungerija qalet li r-rieżami dwar il-funzjonament tal-proċedura ma tlestiex sal-31 ta’ Diċembru 2023. Filwaqt li fl-2021 ġie stabbilit obbligu li jitwettaq tali rieżami (126), ġie adottat rapport biss fis-17 ta’ Ġunju 2026 (127), wara li ntbagħtu kwestjonarji lill-pulizija, lill-Amministrazzjoni Nazzjonali tat-Taxxa u tad-Dwana bħala awtoritajiet investigattivi, lill-Uffiċċju tal-Prosekutur Ġenerali, u lill-Uffiċċju Nazzjonali għall-Ġudikatura, keinu involuti l-Awtorità tal-Integrità u l-Kamra tal-Avukati Ungeriża fit-tħejjija tar-rieżami, u saret konsultazzjoni mal-Kunsill Ġudizzjarju Nazzjonali. Ir-rapport ikkonkluda li ma kienet meħtieġa l-ebda emenda għall-qafas leġiżlattiv, meta jitqiesu l-emendi introdotti mill-Att Omnibus (fl-abbozz fiż-żmien tal-adozzjoni tar-rapport) f’konformità mal-kummenti li waslu għand l-Awtorità tal-Integrità, il-Kamra tal-Avukati Ungeriża u l-Uffiċċju tal-Prosekutur Ġenerali.

(114)

Kif spjegat f’din it-taqsima, l-Ungerija indirizzat id-dgħufijiet pendenti identifikati fid-Deċiżjoni ta’ Implimentazzjoni (UE) 2022/2506 u pprovdiet persunal adegwat lid-Diviżjoni tal-Investigazzjoni tal-Qorti Distrettwali Ċentrali ta’ Buda. Filwaqt li r-rieżami tal-proċedura speċjali twettaq biss f’Ġunju 2026, u mhux sa tmiem l-2023 kif kien l-impenn oriġinarjament, dan ma jaffettwax il-fatt li l-emendi meħtieġa għall-proċedura speċjali ġew adottati b’mod effettiv u li l-objettivi tagħha issa ntlaħqu. Barra minn hekk, kif deskritt aktar hawn taħt fit-Taqsima 2.18, il-parteċipazzjoni tal-Ungerija fil-kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“UPPE”) ikkontribwiet b’mod pożittiv għat-twettiq ta’ din il-miżura ta’ rimedju, peress li dan tal-aħħar isaħħaħ il-qafas usa’ kontra l-korruzzjoni u l-prosekuzzjoni li fih topera l-miżura ta’ rimedju.

(115)

Għalhekk, abbażi tal-valutazzjoni tal-Kummissjoni, il-Kunsill iqis li l-Ungerija ssodisfat l-impenji meħuda skont din il-miżura ta’ rimedju.

(116)

Bħala parti mill-miżuri ta’ rimedju adottati fl-2022, l-Ungerija impenjat ruħha li ssaħħaħ il-mekkaniżmi ta’ awditjar u kontroll biex tiggarantixxi l-użu tajjeb tal-appoġġ tal-Unjoni billi fil-leġiżlazzjoni nazzjonali rilevanti inkludiet dispożizzjonijiet biex issaħħaħ ir-regoli u l-proċeduri biex tipprevjeni, tidentifika u tikkoreġi b’mod aktar effettiv il-kunflitti ta’ interess fl-użu tal-fondi tal-Unjoni f’konformità mal-Artikolu 61 tar-Regolament (UE, Euratom) 2024/2509, inkluż mekkaniżmu ta’ kontroll effettiv fuq il-validità tad-dikjarazzjonijiet ta’ kunflitt ta’ interess.

(117)

Id-Deċiżjoni ta’ Implimentazzjoni (UE) 2022/2506 sabet li l-Ungerija kienet ħadet għadd ta’ passi biex tissodisfa l-impenji tagħha. B’mod partikolari, l-Ungerija stabbiliet id-Direttorat tal-Awditjar Intern u l-Integrità (id-“DIAI”) biex issaħħaħ il-mekkaniżmi tal-awditjar u tal-kontroll u biex tiggarantixxi l-użu tajjeb tal-fondi tal-UE u pprevedietlu garanziji ta’ indipendenza u effettività. L-Ungerija emendat ukoll il-qafas regolatorju li jirregola l-EUTAF (128). Madankollu, id-Deċiżjoni tal-Kummissjoni tal-2023 irreferiet għal nuqqasijiet fl-implimentazzjoni ta’ diversi impenji skont din il-miżura ta’ rimedju (129).

(118)

L-Ungerija qalet li hija adottat sett ċar ta’ regoli u proċeduri relatati mal-prevenzjoni, d-detezzjoni u l-korrezzjoni ta’ sitwazzjonijiet ta’ kunflitti ta’ interess (130) f’konformità mal-Artikolu 61 tar-Regolament (UE, Euratom) 2024/2509 u l-Avviż tal-Kummissjoni relatat (131). Dawn ir-regoli jirrigwardaw ukoll il-kompiti u l-obbligi għall-korpi involuti fil-ġestjoni u l-kontroll tal-fondi tal-Unjoni u r-rwol tagħhom fil-prevenzjoni, id-detezzjoni u l-korrezzjoni tal-kunflitti ta’ interess (132).

(119)

Fir-rigward tal-qafas operazzjonali li jikkonċerna l-uffiċċju tad-DIAI, l-Ungerija introduċiet bosta titjib fil-funzjonament u r-riżorsi prattiċi tagħha, sabiex tkun tista’ tittratta b’mod aktar effettiv il-kompiti u r-responsabbiltajiet tagħha. F’dan ir-rigward, f’Lulju 2026, tlestiet verżjoni aġġornata tal-metodoloġija biex jiġi żgurat li l-investigazzjonijiet tal-kunflitti ta’ interess ikunu effettivi (133). Barra minn hekk, l-Ungerija qalet li d-DIAI kienet qed twettaq kontinwament l-attivitajiet tagħha f’konformità mal-mandat tagħha u tikkontribwixxi l-għarfien espert tagħha fil-qafas imsaħħaħ tal-kunflitti ta’ interess (134).

(120)

Fir-rigward tal-funzjonament tal-EUTAF, li l-qafas regolatorju u l-operat tiegħu ġew ivvalutati li jissodisfaw l-impenji skont il-miżura ta’ rimedju fl-2022 (135), id-Direttur Ġenerali tiegħu kkonferma fl-ittra tiegħu (136) li l-EUTAF kien qed jaħdem b’mod effiċjenti u li l-baġit tiegħu huwa adegwat. Id-Direttur Ġenerali tal-EUTAF ikkonferma wkoll li għandu r-riżorsi finanzjarji u umani meħtieġa biex jissalvagwardja l-indipendenza tiegħu u jwettaq il-kompiti tiegħu, kif meħtieġ mill-miżura ta’ rimedju (137).

(121)

F’konformità mal-impenn meħud skont din il-miżura ta’ rimedju, l-Ungerija introduċiet sistema ta’ dikjarazzjoni tal-kunflitt ta’ interess għall-persunal involut fit-teħid ta’ deċiżjonijiet dwar proġetti individwali u regoli ċari dwar il-kunflitt ta’ interess li japplikaw għall-persunal kollu fit-tħejjija, l-implimentazzjoni u l-awditjar u l-kontroll tal-appoġġ tal-UE (138), kif ukoll għar-riċevituri finali, l-awtoritajiet kontraenti, il-kuntratturi, is-sottokuntratturi u d-ditti ta’ konsulenza involuti. L-Ungerija qalet ukoll li hija prevista simplifikazzjoni ta’ din il-leġiżlazzjoni biex jitnaqqas il-piż amministrattiv fuq in-naħa tal-benefiċjarju (139).

(122)

Fir-rigward tar-rotazzjoni tal-persunal f’karigi sensittivi, iċ-Ċentru Nazzjonali għall-Iżvilupp irid jiżgura kemm ir-rotazzjoni kif ukoll is-sorveljanza tal-persunal f’karigi sensittivi, speċjalment dawk li jittrattaw l-irregolaritajiet, il-kontrolli u l-valutazzjoni tar-riskju (140). Metodoloġija ta’ rotazzjoni ċentrali ġiet adottata fit-2 ta’ Ġunju 2023 u aġġornata fit-23 ta’ Frar 2026; dan jiddefinixxi l-objettivi, il-kamp ta’ applikazzjoni u l-proċeduri għar-rotazzjoni, li jkopru mhux biss il-persunal fil-ġestjoni tal-irregolaritajiet, il-kontrolli u l-valutazzjoni tar-riskju, iżda wkoll karigi li jinvolvu kuntatt dirett mal-benefiċjarji jew inkella deżinjati bħala sensittivi mill-maniġment superjuri (141).

(123)

Biex ittejjeb l-ewwel metodoloġija tat-2 ta’ Ġunju 2023 u tiżgura arranġamenti ta’ sorveljanza aktar b’saħħithom għall-karigi sensittivi, l-Ungerija ħarġet it-tieni metodoloġija fit-8 ta’ Jannar 2026 (142). L-organizzazzjonijiet ippreżentaw pjanijiet ta’ azzjoni relatati fi Frar 2026 u jridu jirrapportaw kull sena sal-15 ta’ Ottubru (143).

(124)

Barra minn hekk, l-Ungerija qalet li qed tippjana li tgħaqqad iż-żewġ metodoloġiji ċentrali li jistabbilixxu l-proċeduri għar-rotazzjoni u għas-sorveljanza tal-persunal f’pożizzjonijiet sensittivi meta jerġgħu jiġu rieżaminati, li huwa mistenni li jseħħ fil-bidu tal-2027 (144). Dan l-approċċ se jimxi lejn sistema ta’ sorveljanza usa’ u bbażata fuq ir-riskju, ikkomplementata minn taħriġ, kanali ta’ whistleblowing u miżuri korrettivi, li jirriflettu l-fehma li l-kontrolli eżistenti diġà jipprovdu protezzjoni sostanzjali.

(125)

Abbażi tal-valutazzjoni tal-Kummissjoni, tal-impenji li diġà ġew implimentati fl-2022 u tal-emendi u l-iżviluppi leġiżlattivi reċenti, il-Kunsill iqis li l-Ungerija ssodisfat din il-miżura ta’ rimedju.

(126)

Bħala parti mill-miżuri ta’ rimedju adottati fl-2022, l-Ungerija impenjat ruħha li tnaqqas is-sehem tal-proċeduri tal-offerti ffinanzjati mill-fondi tal-Unjoni u magħluqa fl-2022 b’offerti waħdiena ta’ inqas minn 15 %, kif imkejjel bil-metodoloġija tat-Tabella ta’ Valutazzjoni tas-Suq Intern, sal-31 ta’ Diċembru 2022 u li żżomm din il-mira mingħajr limitu taż-żmien. F’każ li s-sehem ta’ offerti waħdiena jaqbeż il-15 % fi kwalunkwe sena kalendarja partikolari jew jekk l-Ungerija kellha tidentifika riskju serju li jinqabeż il-livell meħtieġ matul is-sena kurrenti, l-Ungerija impenjat ruħha li tipproponi miżuri addizzjonali fi żmien erba’ xhur biex tiffaċilita t-tnaqqis tal-akkwisti b’offerta waħdiena biex terġa’ ġġibhom taħt il-limitu ta’ 15 % u tinforma lill-Awtorità tal-Integrità u lill-Kummissjoni. Id-Deċiżjoni ta’ Implimentazzjoni (UE) 2022/2506 sabet li l-Ungerija kienet ħadet il-Pass Ewlieni ta’ Implimentazzjoni meħtieġ, u ma identifikat l-ebda dgħufija jew nuqqas (145). Id-Deċiżjoni tal-Kummissjoni tal-2023 ħadet nota li l-Ungerija kienet irrapportat li naqqset is-sehem tal-proċeduri tal-offerti b’offerti waħdiena ffinanzjati mill-fondi tal-UE għal inqas minn 15 % fl-2022 (146).

(127)

Permezz tan-Notifika bil-Miktub tagħha, l-Ungerija qalet li sal-lum, il-mira intlaħqet kull sena (147).

(128)

Abbażi tal-valutazzjoni tal-Kummissjoni, il-Kunsill iqis li l-Ungerija ssodisfat din il-miżura ta’ rimedju.

(129)

Bħala parti mill-miżuri ta’ rimedju adottati fl-2022, b’mod simili għall-miżura ta’ rimedju deskritta fil-premessa (126) hawn fuq, l-Ungerija impenjat ruħha li (i) tnaqqas gradwalment (fi tliet stadji) sal-31 ta’ Diċembru 2024 is-sehem tal-proċeduri tal-offerti tal-akkwist pubbliku ffinanzjati mill-baġit nazzjonali u magħluqa f’sena kalendarja b’offerti waħdiena ta’ inqas minn 15 %, kif imkejjel f’konformità mal-metodoloġija tat-Tabella ta’ Valutazzjoni tas-Suq Uniku, (ii) tissodisfa mingħajr kundizzjonijiet il-mira msemmija hawn fuq għas-snin sussegwenti u żżommha mingħajr limitu ta’ żmien, u (iii) f’każ li s-sehem tal-offerti waħdiena jaqbeż il-15 % fi kwalunkwe sena kalendarja partikolari, li tipproponi miżuri addizzjonali fi żmien erba’ xhur biex tiffaċilita t-tnaqqis tal-akkwisti b’offerti waħdiena lura taħt il-limitu ta’ 15 % u tinforma lill-Awtorità tal-Integrità u lill-Kummissjoni. Id-Deċiżjoni ta’ Implimentazzjoni (UE) 2022/2506 ma analizzatx jew ma vvalutatx din il-miżura ta’ rimedju, peress li l-Kummissjoni impenjat ruħha li timmonitorja l-implimentazzjoni tagħha abbażi ta’ rapportar trimestrali mill-Ungerija (148).

(130)

Permezz tan-Notifika bil-Miktub tagħha, l-Ungerija qalet li l-mira li jitnaqqas is-sehem tal-proċeduri tal-offerti tal-akkwist pubbliku ffinanzjati mill-baġit nazzjonali u magħluqa f’sena kalendarja b’offerti waħdiena ta’ inqas minn 15 % ma ntlaħqitx. Minflok, is-sehem tal-proċeduri tal-offerti tal-akkwist pubbliku ffinanzjati mill-baġit nazzjonali b’offerti waħdiena kien ta’ 31,3 % fl-2022, 28,95 % fl-2023, 22,3 % fl-2024, u 22 % fl-2025 (149).

(131)

F’konformità mal-miżura ta’ rimedju, l-Ungerija adottat miżuri addizzjonali fl-2024, fl-2025 u fl-2026 biex tiffaċilita t-tnaqqis tal-akkwisti b’offerta waħdiena lura taħt il-livell limitu ta’ 15 %. B’mod partikolari, l-Ungerija ssupplimentat il-Pjan ta’ Azzjoni biex iżżid il-livell ta’ kompetizzjoni fl-akkwist pubbliku b’miżuri addizzjonali għal dan l-għan fuq bażi annwali (150). Madankollu, sa issa dawn il-miżuri ma tawx ir-riżultat maħsub.

(132)

Abbażi tal-valutazzjoni tal-Kummissjoni, il-Kunsill isib li filwaqt li r-rata naqset b’mod konsiderevoli, il-mira qatt ma ntlaħqet. Fl-istess ħin, l-Ungerija żammet lill-Kummissjoni infurmata b’mod f’waqtu u adottat miżuri għal tliet snin konsekuttivi biex tipprova tilħaq il-mira. Filwaqt li l-miżura ta’ rimedju ma tistax titqies sodisfatta kompletament, jenħtieġ li l-miżura ta’ rimedju tiġi vvalutata fid-dawl tal-importanza relattiva tagħha li tipproteġi l-baġit tal-Unjoni u l-miżuri ta’ rimedju ċentrali l-oħra rigward l-akkwist publiku kif ukoll kwalunkwe miżura ta’ rimedju ġdida oħra rigward l-akkwist pubbliku.

(133)

Bħala parti mill-miżuri ta’ rimedju adottati fl-2022, l-Ungerija impenjat ruħha li tiżviluppa għodda ġdida ta’ monitoraġġ u rapportar għall-kejl tas-sehem tal-proċeduri ta’ akkwist li jirriżultaw f’offerti waħdiena ffinanzjati minn riżorsi nazzjonali jew minn appoġġ tal-Unjoni jew mit-tnejn li huma sat-30 ta’ Settembru 2022 u li żżomm din l-għodda għall-perjodu ta’ żmien illimitat . Il-Ministeru responsabbli għall-akkwist pubbliku ngħata l-kompitu li jħejji rapport bil-miktub ibbażat fuq l-informazzjoni miġbura mill-għodda u jippubblikaha kull sena fuq is-sit web tas-Sistema Elettronika tal-Akkwist Pubbliku (l-“EPS”), aċċessibbli għall-pubbliku mingħajr reġistrazzjoni u mingħajr ħlas. Permezz tad-Deċiżjoni ta’ Implimentazzjoni (UE) 2022/2506, il-Kunsill sab li l-għodda ta’ rapportar tal-offerti waħdiena kienet ġiet żviluppata u kienet operazzjonali kif meħtieġ mill-miżura ta’ rimedju (151).

(134)

Permezz tan-Notifika bil-Miktub tagħha, l-Ungerija qalet li r-rapport tal-awditjar tal-EUTAF tas-26 ta’ Ġunju 2026 (152), ibbaża wkoll fuq l-awditi preċedenti tagħha, jikkonferma li l-għodda ta’ monitoraġġ u rapportar għadha kompletament funzjonali u operazzjonali, li l-funzjonalitajiet tagħha huma f’konformità mal-metodoloġija tat-Tabella ta’ Valutazzjoni tas-Suq Uniku, u li d-data fis-sistema hija akkurata u kompluta. Barra minn hekk, l-Ungerija pprovdiet evidenza li d-Dipartiment tal-Monitoraġġ tal-Akkwist Pubbliku taċ-Ċentru Nazzjonali għall-Iżvilupp, li permezz tiegħu l-Ministru tal-Finanzi jwettaq ir-responsabbiltà tiegħu għall-akkwist pubbliku, issodisfa l-obbligu ta’ rapportar imsemmi hawn fuq f’kull sena partikolari (153).

(135)

Abbażi tal-valutazzjoni tal-Kummissjoni, il-Kunsill iqis li l-Ungerija ssodisfat din il-miżura ta’ rimedju.

(136)

Bħala parti mill-miżuri ta’ rimedju adottati fl-2022, sabiex tiżdied it-trasparenza fl-akkwist pubbliku, l-Ungerija impenjat ruħha li toħloq u tippubblika fuq is-sit web tal-EPS tagħha bażi tad-data li jkun fiha informazzjoni dwar l-avviżi kollha ta’ aġġudikazzjoni tal-kuntratt ta’ proċeduri ta’ akkwist pubbliku f’forma strutturata, inkluż in-numri ta’ identifikazzjoni tal-kumpaniji u l-ismijiet ta’ kull membru individwali tal-konsorzji u s-sottokuntratturi. Dik il-bażi ta’ data għandha tiġi aġġornata regolarment, disponibbli għall-pubbliku biex titniżżel u mingħajr ħlas. Id-Deċiżjoni ta’ Implimentazzjoni (UE) 2022/2506 sabet li l-miżura ta’ rimedju ġiet sodisfatta (154). Il-Komunikazzjoni tat-30 ta’ Novembru 2022 irreferiet għal żviluppi ulterjuri li jirrikjedu data ta’ implimentazzjoni itwal (155).

(137)

Permezz tan-Notifika bil-Miktub tagħha, l-Ungerija pprovdiet evidenza li l-EPS baqgħet kompletament funzjonali u li l-bażi tad-data hija aġġornata, tista’ titniżżel u tinqara mill-magni u aċċessibbli liberament għall-pubbliku (156).

(138)

Minbarra l-implimentazzjoni tal-impenji, kif deskritt fit-Taqsima 2.19 hawn taħt, l-emendi previsti fl-Att Omnibus introduċew il-kunċett ta’ “operatur ekonomiku trasparenti” biex jiġi żgurat li s-sid benefiċjarju u l-istruttura tas-sjieda tal-offerenti jiġu ddivulgati fl-akkwisti pubbliċi kollha anke f’każ ta’ strutturi kumplessi ta’ sjieda. Dik l-informazzjoni hija viżibbli wkoll fl-EPS.

(139)

Abbażi tal-valutazzjoni tal-Kummissjoni, il-Kunsill iqis li l-Ungerija kienet qed iżżomm l-EPS f’konformità mal-impenji meħuda u għamlet aktar titjib biex ittejjeb it-trasparenza.

(140)

Bħala parti mill-miżuri ta’ rimedju adottati fl-2022, l-Ungerija impenjat ruħha li tiżviluppa qafas għall-kejl tal-prestazzjoni biex tivvaluta l-effiċjenza u l-kosteffettività tal-akkwisti pubbliċi, li kellu jkun operazzjonali sat-30 ta’ Novembru 2022. Barra minn hekk, l-Ungerija impenjat ruħha li żżomm mingħajr kundizzjonijiet l-użu regolari tal-qafas tal-kejl tal-prestazzjoni u l-pubblikazzjoni tar-riżultati tiegħu għal perjodu ta’ żmien illimitat (157). Id-Deċiżjoni ta’ Implimentazzjoni (UE) 2022/2506 sabet li l-Ungerija kienet issodisfat l-impenji tagħha għal din il-miżura ta’ rimedju (158).

(141)

Permezz tan-Notifika bil-Miktub tagħha, l-Ungerija kkonfermat li l-qafas tal-kejl tal-prestazzjoni baqa’ fis-seħħ u qed jintuża (159). Grupp ta’ ħidma, li jinkludi esperti indipendenti u rappreżentanti ta’ organizzazzjonijiet mhux governattivi, kien involut bis-sħiħ fl-iżvilupp tal-qafas u kompla jkollu rwol attiv fit-tħejjija ta’ analiżi annwali (160). Barra minn hekk, l-Ungerija ppreżentat evidenza li r-rapporti dwar ir-riżultati tal-qafas Ungeriż għall-kejl tal-prestazzjoni tal-akkwist pubbliku ilhom jiġu ppubblikati kull sena mill-2023 fuq is-sit web tal-EPS.

(142)

Abbażi tal-valutazzjoni tal-Kummissjoni, il-Kunsill iqis li l-Ungerija ssodisfat din il-miżura ta’ rimedju.

(143)

Bħala parti mill-miżuri ta’ rimedju adottati fl-2022, l-Ungerija impenjat ruħha li sal-31 ta’ Marzu 2023 tadotta pjan ta’ azzjoni komprensiv (il-“Pjan ta’ Azzjoni”) li għandu l-għan li jtejjeb il-livell ta’ kompetizzjoni fl-akkwist pubbliku, li għandu jiġi rieżaminat fuq bażi annwali, u b’riżultat ta’ dan jistgħu jsiru bidliet fl-azzjonijiet eżistenti jew jistgħu jiġu introdotti azzjonijiet ġodda. Il-Pjan ta’ Azzjoni, ir-rieżami tiegħu, u s-sitwazzjoni attwali annwali tal-implimentazzjoni tal-miżuri tiegħu jsiru disponibbli għall-pubbliku mingħajr dewmien. Id-Deċiżjoni ta’ Implimentazzjoni (UE) 2022/2506 ma analizzatx jew ma vvalutatx din il-miżura ta’ rimedju, peress li l-Kummissjoni impenjat ruħha li timmonitorja l-implimentazzjoni tagħha abbażi ta’ rapportar trimestrali mill-Ungerija (161).

(144)

Fil-31 ta’ Marzu 2023, l-Ungerija adottat il-Pjan ta’ Azzjoni li kien jinkludi 14-il miżura mmirati lejn it-titjib tal-kompetizzjoni fl-akkwist pubbliku (162). Fid-deċiżjoni tal-Kummissjoni tal-2023, il-Kummissjoni qieset li l-azzjonijiet stabbiliti fil-Pjan ta’ Azzjoni dehru xierqa biex jindirizzaw ħafna min-nuqqasijiet indirizzati fil-passat u jekk jiġu implimentati kif suppost, x’aktarx li jtejbu t-trasparenza, il-kwalità tad-data u l-aċċess għall-informazzjoni. Madankollu, il-Kummissjoni nnotat li l-Ungerija, kif impenjat ruħha li tagħmel skont il-miżura ta’ rimedju, jenħtieġ li tiżgura l-monitoraġġ effettiv tal-progress fl-implimentazzjoni tal-azzjonijiet skont il-Pjan ta’ Azzjoni. Dak jinkiseb billi jiġu stabbiliti objettivi annwali speċifiċi u li jistgħu jitkejlu u billi jiġu assenjati indikaturi rilevanti għal kull azzjoni (163).

(145)

Permezz tan-Notifika bil-Miktub tagħha, l-Ungerija pprovdiet evidenza ta’ tliet reviżjonijiet annwali tal-Pjan ta’ Azzjoni sa issa (164). Mid-data tat-trażmissjoni tan-Notifika bil-Miktub, l-Ungerija rrapportat l-implimentazzjoni sħiħa ta’ 28 azzjoni, bi 11-il azzjoni li għadhom għaddejjin u azzjoni waħda magħluqa mingħajr ma laħqet l-għan tagħha (165). L-aħħar reviżjoni annwali tal-Pjan ta’ Azzjoni ġiet adottata fit-23 ta’ Marzu 2026 u ssupplimentat il-Pjan ta’ Azzjoni b’ħames miżuri addizzjonali biex tiżdied il-kompetizzjoni fl-akkwist pubbliku (166).

(146)

Il-pjan ta’ Azzjoni, kif rivedut, jidher li jinkludi aġġornamenti rilevanti u sinifikanti, li juru li kien hemm evalwazzjoni tajba tas-sitwazzjoni fil-prattika, inklużi kundizzjonijiet speċifiċi għas-settur. Dawk l-aġġornamenti huma mfassla biex jindirizzaw in-nuqqas identifikat u jikkonfermaw li l-monitoraġġ tal-progress fl-implimentazzjoni tal-pjan ta’ azzjoni kien effettiv.

(147)

Abbażi tal-valutazzjoni tal-Kummissjoni, il-Kunsill iqis li l-Ungerija kompliet tissodisfa l-impenji tagħha fir-rigward tal-istabbiliment, ir-rieżami annwali u l-implimentazzjoni tal-Pjan ta’ Azzjoni.

(148)

Bħala parti mill-miżuri ta’ rimedju adottati fl-2022, l-Ungerija impenjat ruħha li tipprovdi taħriġ mingħajr ħlas fl-akkwist pubbliku għal mill-inqas 2 200 intrapriża mikro, żgħira u ta’ daqs medju (“SMEs”), sabiex tiffaċilita l-parteċipazzjoni tagħhom fi proċeduri ta’ akkwist pubbliku. Id-Deċiżjoni ta’ Implimentazzjoni (UE) 2022/2506 ma analizzatx jew ma vvalutatx din il-miżura ta’ rimedju, peress li l-Kummissjoni impenjat ruħha li timmonitorja l-implimentazzjoni tagħha abbażi ta’ rapportar trimestrali mill-Ungerija (167).

(149)

L-ewwel skadenza li kellha tintlaħaq kienet il-31 ta’ Marzu 2024. Sa dik id-data, il-Gvern kellu jipprovdi okkażjonijiet ta’ taħriġ għal 1 000 SME. Il-Gvern impenja ruħu wkoll li jipprovdi tali taħriġ għal mill-inqas 1 200 SME oħra sat-30 ta’ Ġunju 2026. L-Ungerija impenjat ruħha wkoll li timmonitorja u tevalwa l-effiċjenza u l-valur miżjud tal-programm u li tistabbilixxi mekkaniżmu ta’ segwitu biex titlob feedback mill-parteċipanti. Ir-riżultati tal-mekkaniżmu ta’ segwitu kellhom jikkontribwixxu għad-deċiżjoni, li kellha tittieħed sal-31 ta’ Lulju 2026, dwar jekk għandux jitkompla l-programm ta’ taħriġ u jekk kinux meħtieġa xi bidliet fih.

(150)

Fid-Deċiżjoni tal-Kummissjoni tal-2023, il-Kummissjoni qieset li l-implimentazzjoni ta’ din il-miżura ta’ rimedju kienet qed tagħmel progress f’waqtu (168).

(151)

Permezz tan-Notifika bil-Miktub tagħha, l-Ungerija qalet li l-iskema ta’ taħriġ saret operazzjonali fit-30 ta’ Ġunju 2023 (169). Filwaqt li l-ewwel skadenza ma ntlaħqitx – 268 SME biss kienu temmew b’suċċess it-taħriġ sal-31 ta’ Marzu 2024 – 1 342 SME kienu għamlu dan sat-30 ta’ Settembru 2024 u mill-31 ta’ Marzu 2026 aktar minn 2 500 SME kienu pparteċipaw f’taħriġ bis-saħħa tal-programm (170).

(152)

L-Ungerija ġabret feedback estensiv mill-utenti u evalwat l-effiċjenza u l-valur miżjud tal-programm. Abbażi ta’ dak, l-Ungerija ddeċidiet li tkompli l-programm fil-futur b’xi modifiki u titjib b’kont meħud tal-informazzjoni miġbura matul il-perjodu ta’ implimentazzjoni (171).

(153)

Abbażi tal-valutazzjoni tal-Kummissjoni, il-Kunsill isib li filwaqt li l-ewwel mira interim ta’ intrapriżi mħarrġa ntlaħqet wara d-data oriġinali skedata, il-mira finali ntlaħqet. Il-Kunsill jilqa’ l-impenn kontinwu tal-Ungerija li tipprovdi opportunitajiet ta’ taħriġ biex tissaħħaħ il-kompetizzjoni u, b’mod partikolari, il-kompetittività tal-SMEs, fl-akkwist pubbliku.

(154)

Bħala parti mill-miżuri ta’ rimedju adottati fl-2022, l-Ungerija impenjat ruħha li sal-31 ta’ Marzu 2023 tistabbilixxi u tniedi skema ta’ appoġġ li tipprovdi kumpens ta’ somma f’daqqa – abbażi ta’ kriterji tal-għażla oġġettivi, mhux diskriminatorji u trasparenti – għal mill-inqas 1 800 SME eliġibbli sat-30 ta’ Ġunju 2026 għall-kostijiet tagħhom assoċjati mal-parteċipazzjoni tagħhom fi proċeduri ta’ akkwist pubbliku, bl-għan li tiffaċilita l-parteċipazzjoni tagħhom fl-akkwist pubbliku u tnaqqas l-ostakli għad-dħul tagħhom.

(155)

Barra minn hekk, l-Ungerija impenjat ruħha li twettaq evalwazzjoni ta’ nofs it-terminu sat-30 ta’ Settembru 2024 u evalwazzjoni finali fi tmiem il-programm ta’ appoġġ sal-31 ta’ Lulju 2026, inkluż il-valur miżjud u l-effettività tal-programm u s-setturi kkonċernati. Id-Deċiżjoni ta’ Implimentazzjoni (UE) 2022/2506 la analizzat u lanqas ivvalutat din il-miżura ta’ rimedju, peress li l-Kummissjoni impenjat ruħha li timmonitorja l-implimentazzjoni tagħha abbażi ta’ rapportar trimestrali mill-Ungerija (172).

(156)

Fid-Deċiżjoni tal-Kummissjoni tal-2023, il-Kummissjoni enfasizzat nuqqasijiet fit-tfassil tal-iskema ta’ appoġġ li jpoġġu f’riskju l-konformità mal-impenji fil-miżura ta’ rimedju (173).

(157)

Permezz tan-Notifika bil-Miktub tagħha, l-Ungerija qalet li sa tmiem il-perjodu ta’ programmazzjoni 1 477 parteċipant biss kienu rċevew appoġġ (174). Wara diskussjonijiet mal-Kummissjoni, is-sejħa oriġinali għall-applikazzjonijiet (tal-31 ta’ Marzu 2023) ġiet emendata fil-11 ta’ Jannar 2024 bl-għan li tittejjeb l-enfasi fuq l-intrapriżi mikro u żgħar. Fl-20 ta’ Diċembru 2024, saret emenda oħra biex jiġi indirizzat it-tħassib dwar l-allegazzjonijiet ta’ frodi mqajma fil-media (175). L-evalwazzjoni ta’ nofs it-terminu twettqet b’dewmien sinifikanti u kienet ibbażata biss fuq kampjun żgħir ta’ kwestjonarji mimlija mill-parteċipanti (176), li llimita l-użu tagħha għat-tieni fażi tal-programm. Għall-evalwazzjoni finali, li ġiet kemxejn imdewma, ma nġabar l-ebda feedback ulterjuri mill-parteċipanti, u b’hekk perjodu ta’ 11-il xahar tħalla skopert (177).

(158)

Abbażi tal-valutazzjoni tal-Kummissjoni, il-Kunsill isib li l-miżura ta’ rimedju ma tistax titqies issodisfata kompletament. F’dak ir-rigward, jenħtieġ li l-miżura ta’ rimedju tiġi vvalutata fid-dawl tal-importanza relattiva tagħha li tipproteġi l-baġit tal-Unjoni u l-miżuri ta’ rimedju ċentrali l-oħra rigward l-akkwist pubbliku kif ukoll kwalunkwe miżura ta’ rimedju ġdida oħra fir-rigward tal-akkwist pubbliku.

(159)

Bħala parti mill-miżuri ta’ rimedju adottati fl-2022, l-Ungerija impenjat ruħha li tapplika proċeduri għall-użu sistematiku u estiż tal-funzjonalitajiet kollha tal-għodda unika għall-estrazzjoni tad-data u għall-kejl tar-riskju (“Arachne”, issa “Arachne+”) li l-Kummissjoni tqiegħed għad-dispożizzjoni tal-Istati Membri għal kwalunkwe appoġġ mill-Unjoni u għall-perjodi kollha ta’ programmazzjoni, biex jiġu evitati u identifikati b’mod effettiv il-kunflitti ta’ interess, il-frodi, il-korruzzjoni, il-finanzjament doppju u irregolaritajiet oħra. Il-korpi tal-awditjar u tal-kontroll rilevanti kollha ukoll kellhom jingħataw aċċess sħiħ għas-settijiet tad-data mtellgħin fl-għodda (178).

(160)

Filwaqt li d-Deċiżjoni ta’ Implimentazzjoni (UE) 2022/2506 sabet li l-miżura kienet issodisfata f’dak iż-żmien (179), id-Deċiżjoni tal-Kummissjoni tal-2023 sabet li mhux id-data kollha għall-finanzjament kollu tal-Unjoni kienet tidher imtella’, u ġew indikati nuqqasijiet fl-użu ta’ Arachne fil-prattika (180).

(161)

Permezz tan-Notifika bil-Miktub tagħha, l-Ungerija qalet li l-emendi tal-qafas regolatorju (181) għamluha obbligatorja (i) li kull xahrejn l-awtoritajiet itellgħu d-data kollha għall-oqsma tad-data stabbiliti fir-regolamenti applikabbli tal-UE fil-ħin f’Arachne+ (inkluż ukoll għall-Politika Agrikola Komuni [“PAK”]), (ii) li l-korpi kollha ta’ ġestjoni, kontroll u awditjar jużaw Arachne+ b’mod estensiv, li jwettqu kontrolli addizzjonali meta Arachne+ tindika riskju, u li jkunu marbutin bis-sinjali ta’ riskju ta’ Arachne+ fil-proċeduri tat-teħid tad-deċiżjonijiet tagħhom, kif ukoll (iii) li jiżguraw li l-korpi tal-awditjar rispettivi fl-Ungerija u fis-servizzi u l-korpi ta’ kontroll rilevanti tal-Kummissjoni jkollhom aċċess sħiħ għall-funzjonalitajiet ta’ Arachne+.

(162)

Billi rrikonoxxiet li d-data tal-PAK ma ġietx applowdjata b’mod sħiħ jew f’waqtu jew b’mod regolari, l-Ungerija ppreżentat pjan ta’ azzjoni li jinkludi l-identifikazzjoni u d-deskrizzjoni tal-kompiti, il-partijiet responsabbli, kif ukoll l-iskadenzi, ir-riżorsi meħtieġa, il-kriterji ta’ suċċess, u l-metodu u l-iskeda ta’ żmien għall-monitoraġġ tal-applowdjar tad-data tal-PAK u l-użu tal-għodda mill-awtoritajiet u l-korpi rilevanti (182), bl-aħħar azzjonijiet li għandhom jiġu implimentati sal-31 ta’ Diċembru 2026 (183). Permezz tan-Notifika bil-Miktub tagħha, l-Ungerija qalet li se tipprovdi aktar aġġornamenti dwar l-implimentazzjoni tal-pjan ta’ azzjoni sa tmiem l-2026 barra mill-qafas tal-proċedura skont ir-Regolament (UE, Euratom) 2020/2092 (184).

(163)

F’konformità mal-impenn oriġinali skont din il-miżura ta’ rimedju, għall-appoġġ tal-Unjoni skont ir-Regolament (UE) 2021/1060 (bl-eċċezzjoni tal-għan territorjali Ewropew) u l-RRF, fil-31 ta’ Awwissu 2026, l-EUTAF ħareġ rapport tal-awditjar b’opinjoni tal-awditjar mhux kwalifikata dwar l-adegwatezza tal-proċeduri li jiżguraw it-tlugħ ta’ sett sħiħ ta’ informazzjoni f’Arachne+ kull xahrejn, li d-data fil-fatt ittellgħet fl-intier tagħha u li hemm arranġamenti fis-seħħ mill-awtoritajiet nazzjonali biex jiżguraw li jsegwu b’mod sistematiku l-punteġġ tar-riskju ġġenerat minn Arachne+ (185).

(164)

Abbażi tal-valutazzjoni tal-Kummissjoni, il-Kunsill isib li filwaqt li d-data għal xi appoġġ finanzjarju tal-Unjoni għad trid tittella’ fl-għodda u l-arranġamenti prattiċi biex jiġi żgurat li tittella’ d-data kollha għall-oqsma tad-data stabbiliti fir-regolamenti applikabbli tal-Unjoni f’Arachne+ u l-użu sħiħ u effettiv tagħha fil-prattika għall-appoġġ tal-PAK fl-intier tiegħu se jitlestew biss sa tmiem l-2026, l-Ungerija emendat l-atti leġiżlattivi meħtieġa u wriet impenn biex tindirizza malajr u serjament in-nuqqasijiet pendenti permezz ta’ pjan ta’ azzjoni. Filwaqt li l-miżura ta’ rimedju ma tistax titqies issodisfata kompletament, jenħtieġ li tiġi vvalutata billi jitqiesu l-miżuri ta’ rimedju l-oħra kollha.

(165)

Bħala parti mill-miżuri ta’ rimedju adottati fl-2022, l-Ungerija impenjat ruħha li ssaħħaħ il-kooperazzjoni mal-Uffiċċju Ewropew ta’ Kontra l-Frodi (“OLAF”) billi taħtar awtorità nazzjonali kompetenti biex tassisti lill-OLAF meta jwettaq kontrolli fuq il-post u meta operatur ekonomiku soġġett għal dawk il-kontrolli jirrifjuta li jikkoopera. L-Ungerija impenjat ruħha wkoll li tintroduċi sanzjoni dissważiva tat-tip finanzjarju li tiġi imposta f’każ li operatur ekonomiku jirrifjuta li jikkoopera mal-OLAF għall-finijiet tal-kontrolli u l-ispezzjonijiet tal-OLAF fuq il-post. Fid-Deċiżjoni ta’ Implimentazzjoni (UE) 2022/2506, il-Kunsill ikkunsidra li l-Ungerija kienet issodisfat l-impenji tagħha għal din il-miżura ta’ rimedju (186).

(166)

Permezz tan-Notifika bil-Miktub tagħha, l-Ungerija qalet li, peress li ma ġiet identifikata l-ebda dgħufija jew nuqqas addizzjonali fir-rigward ta’ din il-miżura ta’ rimedju, jenħtieġ li tibqa’ titqies issodisfata: l-amministrazzjoni Nazzjonali tat-Taxxa u tad-Dwana għadha l-awtorità nazzjonali kompetenti biex tassisti lill-OLAF fit-twettiq ta’ kontrolli fuq il-post fl-Ungerija, b’regoli li jippermettu lill-OLAF iwettaq b’mod effettiv il-kontrolli tiegħu fuq il-post u tipi differenti ta’ spezzjonijiet, b’mod partikolari billi jiżgura infurzar bħat-tneħħija ta’ affarijiet minn fuq il-post, jitlob informazzjoni, jidentifika l-permessi għall-kontroll u d-dħul sabiex jissalvagwardja l-evidenza. Fl-2022, l-Ungerija diġà kienet introduċiet tip ta’ sanzjoni finanzjarja dissważiva f’każ li operatur ekonomiku jirrifjuta li jikkoopera mal-OLAF għall-finijiet tal-kontrolli u tal-ispezzjonijiet fuq il-post (187).

(167)

Abbażi tal-valutazzjoni tal-Kummissjoni, il-Kunsill iqis li l-Ungerija ssodisfat din il-miżura ta’ rimedju.

(168)

Bħala parti mill-miżuri ta’ rimedju adottati fl-2022, l-Ungerija impenjat ruħha li sal-31 ta’ Ottubru 2022 tadotta att leġiżlattiv li jiżgura trasparenza mtejba tal-infiq pubbliku billi jistabbilixxi obbligu għall-korpi pubbliċi kollha li jippubblikaw b’mod proattiv sett definit minn qabel ta’ informazzjoni dwar l-użu tal-fondi pubbliċi f’reġistru ċentrali (188), aċċessibbli mingħajr ħlas.

(169)

Id-Deċiżjoni ta’ Implimentazzjoni (UE) 2022/2506, il-Kunsill sab li l-Ungerija kienet ħadet il-Passi Ewlenin ta’ Implimentazzjoni rilevanti, minkejja dewmien fl-implimentazzjoni tagħhom. Madankollu, għad hemm dgħufija fil-qafas regolatorju li timmina l-effettività tiegħu, b’mod partikolari n-nuqqas ta’ obbligu għall-awtoritajiet kontraenti kollha li jippubblikaw informazzjoni fin-nuqqas ta’ data dwar il-“korp responsabbli” għan-nefqa pubblika, l-awtorità kontraenti jew il-fornituri tas-servizzi, il-fornituri, u l-fornituri tal-kapaċità fis-sett minimu ta’ data li għandha tittella’ fir-reġistru ċentrali (189).

(170)

Permezz tan-Notifika bil-Miktub tagħha, l-Ungerija sostniet li l-emendi leġiżlattivi indirizzaw iż-żewġ dgħufijiet identifikati fid-Deċiżjoni ta’ Implimentazzjoni (UE) 2022/2506, jiġifieri (i) l-iskop personali tal-entitajiet li jippubblikaw data fuq il-pjattaforma tar-Reġistru tad-Data Pubblika tal-Informazzjoni Ċentrali u (ii) is-settijiet minimi ta’ data disponibbli (190).

(171)

L-ewwel nett, it-Taqsima 37/C (1) tal-Att CXII tal-2011 dwar id-Dritt ta’ Awtodeterminazzjoni Informattiva u dwar il-Libertà tal-Informazzjoni (“l-Att dwar il-Libertà tal-Informazzjoni”) kif emendat mill-Att Omnibus, espandiet l-ambitu personali għall-pubblikazzjoni biex tkopri b’mod estensiv il-korpi li jwettqu dmirijiet pubbliċi (li jkopru mill-inqas il-persuni ġuridiċi inklużi fir-reġistru tat-teżor, l-operaturi ekonomiċi ta’ proprjetà pubblika, u l-fondazzjonijiet stabbiliti minnhom, il-fondazzjonijiet tal-ġestjoni tal-assi stabbiliti mill-Istat, il-PITs u l-persuni ġuridiċi stabbiliti jew miżmuma minnhom, in-Network ta’ Riċerka HUN-REN).

(172)

It-tieni, it-Taqsima 37/C (3) tal-Att dwar il-Libertà tal-Informazzjoni kif emendat mill-Att Omnibus tespandi l-kategoriji ta’ data għall-pubblikazzjoni fuq il-pjattaforma tar-Reġistru Ċentrali tad-Data Pubblika tal-Informazzjoni, f’konformità mal-impenji oriġinali.

(173)

F’konformità mal-impenn li s-settijiet tad-data jiġu ppubblikati fir-reġistru ċentrali f’format miftuħ, interoperabbli u li jinqara mill-magni, li jippermetti t-tniżżil massiv u li d-data tiġi ssortjata, imfittxija, estratta, imqabbla u użata mill-ġdid (191), it-Taqsima 37/C (1) tal-Att dwar il-Libertà tal-Informazzjoni ġiet emendata mit-Taqsima 27(1) tal-Att Omnibus u daħlet fis-seħħ fis-26 ta’ Awwissu 2026. Fil-31 ta’ Awwissu 2026, l-Ungerija lestiet ukoll l-iżvilupp tal-funzjonalitajiet tar-reġistru.

(174)

Għalhekk, abbażi tal-valutazzjoni tal-Kummissjoni, il-Kunsill iqis li l-Ungerija ssodisfat l-impenji meħuda skont din il-miżura ta’ rimedju.

(175)

Minbarra li rapportat dwar l-issodisfar tal-miżuri ta’ rimedju adottati fl-2022, permezz tan-Notifika bil-Miktub tagħha, l-Ungerija rreferiet għan-notifika tagħha lill-Kummissjoni, fid-29 ta’ Mejju 2026, dwar l-intenzjoni tagħha li tipparteċipa fil-kooperazzjoni msaħħa dwar l-istabbiliment tal-UPPE. L-Ungerija talbet li r-Regolament tal-Kunsill (UE) 2017/1939 (192) japplika fl-Ungerija fir-rigward ta’ reati fil-kompetenza tal-UPPE mwettqa qabel ma l-Ungerija ngħaqdet mal-kooperazzjoni msaħħa, fl-1 ta’ Ġunju 2021 jew wara, id-data li fiha l-UPPE assuma l-kompiti investigattivi u ta’ prosekuzzjoni tiegħu.

(176)

Permezz tad-Deċiżjoni tal-Kummissjoni (UE) 2026/1701 (193) , il-Kummissjoni kkonfermat il-parteċipazzjoni tal-Ungerija fil-kooperazzjoni msaħħa fl-istabbiliment tal-UPPE u li r-Regolament (UE) 2017/1939 japplika fl-Ungerija fir-rigward ta’ kwalunkwe reat li jaqa’ taħt il-kompetenza tal-UPPE mwettaq wara l-1 ta’ Ġunju 2021 (194).

(177)

Permezz tan-Notifika bil-Miktub tagħha, l-Ungerija sostniet li l-adeżjoni reċenti tagħha mal-UPPE, flimkien mal-miżura ta’ rimedju li temenda l-proċedura kriminali speċjali deskritta hawn fuq fit-Taqsima 2.5, jikkontribwixxu b’mod sinifikanti biex jiġu indirizzati d-dgħufijiet identifikati fid-Deċiżjoni ta’ Implimentazzjoni (UE) 2022/2506 fir-rigward tal-effettività tal-azzjoni ta’ prosekuzzjoni, b’attenzjoni speċifika għall-investigazzjoni u l-prosekuzzjoni effettivi ta’ reati relatati mal-korruzzjoni u reati kriminali li jaffettwaw l-interessi finanzjarji tal-Unjoni, kif ukoll il-ħtieġa li tissaħħaħ il-ġlieda kontra l-korruzzjoni (195). Jenħtieġ li l-parteċipazzjoni fl-UPPE titqies bħala miżura ta’ rimedju addizzjonali meħuda biex jiġu indirizzati b’mod trasversali n-nuqqasijiet identifikati fid-Deċiżjoni ta’ Implimentazzjoni (UE) 2022/2506. L-Ungerija bħalissa qed tistabbilixxi l-qafas legali u istituzzjonali nazzjonali għall-parteċipazzjoni tagħha fl-UPPE.

(178)

Abbażi tal-valutazzjoni tal-Kummissjoni, il-Kunsill iqis li l-parteċipazzjoni fl-UPPE hija miżura ta’ rimedju ta’ natura ċentrali li tkompli ssaħħaħ l-effettività tal-investigazzjoni u l-prosekuzzjoni ta’ reati kriminali kontra l-interessi finanzjarji tal-Unjoni fl-Ungerija u b’hekk tikkontribwixxi b’mod orizzontali għall-protezzjoni tal-baġit tal-Unjoni.

(179)

Minbarra r-rapportar dwar l-issodisfar tal-miżuri ta’ rimedju adottati fl-2022, permezz tan-Notifika bil-Miktub tagħha l-Ungerija ppreżentat l-adozzjoni ta’ diversi emendi għall-Att dwar l-Akkwist Pubbliku biex (i) iżżid il-proċeduri tal-kompetizzjoni u tat-trasparenza, u (ii) tindirizza r-riskji ta’ korruzzjoni u kunflitti ta’ interess fil-qasam tal-akkwist pubbliku (196).

(180)

Skont l-emendi għall-Att dwar l-Akkwist Pubbliku, l-awtoritajiet kontraenti issa huma meħtieġa jippubblikaw kull sena data dwar l-eżekuzzjoni tal-kuntratt, jagħmlu d-dokumenti tal-akkwist disponibbli flimkien mal-avviż li jniedi l-proċedura mingħajr il-ħtieġa ta’ reġistrazzjoni minn qabel fl-EPS (197), u, fil-każ ta’ konċessjonijiet, jirreġistraw bil-miktub u jippubblikaw ir-riżultati tal-istħarriġ preliminari tas-suq, il-kalkoli relatati mar-redditu fuq l-investiment tal-konċessjonarju, u l-miżuri meħuda biex tiġi ssalvagwardjata l-kompetizzjoni (198).

(181)

Miżuri regolatorji ġodda għall-prevenzjoni tal-korruzzjoni jinkludu l-esklużjoni ta’ operaturi ekonomiċi li ma jikkwalifikawx bħala “operaturi ekonomiċi trasparenti” kif definiti mit-Taqsima 3 il-punt 10a tal-Att dwar l-Akkwist Pubbliku kif emendat mit-Taqsima 78 tal-Att Omnibus (199) mill-proċeduri ta’ akkwist, il-possibbiltà espliċita għall-awtoritajiet kontraenti li jistabbilixxu kundizzjonijiet kontra l-korruzzjoni relatati mal-eżekuzzjoni tal-kuntratti (200), u l-inklużjoni obbligatorja ta’ klawżola kuntrattwali li tirrikjedi li l-offerent rebbieħ jikkoopera fil-mitigazzjoni tar-riskji ta’ reati ta’ korruzzjoni (201).

(182)

Ir-regoli emendati dwar il-kunflitti ta’ interess jistabbilixxu preżunzjoni ta’ tali kunflitt meta persuna li taġixxi f’isem awtorità kontraenti tkun sid benefiċjarju ta’ operatur ekonomiku li jipparteċipa fil-proċedura u jipprevedu li l-qraba tal-uffiċjali ta’ grad għoli msemmija fl-Att dwar l-Akkwist Pubbliku għandhom jitqiesu li jkunu f’sitwazzjoni ta’ kunflitt ta’ interess (202).

(183)

Abbażi tal-valutazzjoni tal-Kummissjoni, il-Kunsill iqis li l-emendi li saru fil-qafas tal-akkwist pubbliku huma miżuri pożittivi biex jissaħħu b’mod effettiv it-trasparenza u l-kompetizzjoni fl-akkwist pubbliku fl-Ungerija u biex jissaħħaħ aktar il-qafas legali ġenerali kontra l-korruzzjoni fl-Ungerija.

(184)

Minbarra r-rapportar dwar l-issodisfar tal-miżuri ta’ rimedju adottati fl-2022, permezz tan-Notifika bil-Miktub tagħha l-Ungerija ppreżentat l-adozzjoni ta’ regoli ġodda biex issaħħaħ il-protezzjoni tal-interessi finanzjarji tal-Unjoni u tal-baġit tal-Unjoni billi tiżgura t-trasparenza tas-sidien benefiċjarji u tiċċara l-użu tal-fondi pubbliċi (203).

(185)

L-Att Omnibus emenda diversi dispożizzjonijiet f’atti oħra biex: (i) jirrevedi d-definizzjoni ta’ sid benefiċjarju biex tinkludi dispożizzjonijiet speċifiċi dwar fondi ta’ investiment privat li għandhom l-obbligu li jikkomunikaw min hu s-sid benefiċjarju tagħhom f’konformità mar-Regolament (UE) 2024/1624 (204); (ii) jinkludi ġurnalisti u organizzazzjonijiet tas-soċjetà ċivili fil-lista ta’ persuni fiżiċi jew ġuridiċi meqjusa li għandhom interess leġittimu fl-aċċess għad-data dwar is-sjieda benefiċjarja, fejn l-organizzazzjonijiet tas-soċjetà ċivili b’mod partikolari jkollhom interess leġittimu ex lege fl-aċċess għall-informazzjoni dwar is-sjieda benefiċjarja (205); (iii) tiżgura li l-korpi responsabbli għall-ġestjoni u l-kontroll tal-fondi tal-Unjoni fl-Ungerija jkollhom il-possibbiltà li jiġbru informazzjoni dwar is-sidien benefiċjarji tal-fondi ta’ ekwità privata u jivverifikawhom mill-inqas mill-1 ta’ Frar 2020 (206); (iv) jiċċara u jestendi l-kamp ta’ applikazzjoni ta’ tali regoli għall-uffiċjali u l-entitajiet pubbliċi (207).

(186)

Abbażi tal-valutazzjoni tal-Kummissjoni, il-Kunsill iqis li l-adozzjoni tar-regoli l-ġodda ssaħħaħ il-protezzjoni tal-interessi finanzjarji tal-Unjoni u tal-baġit tal-Unjoni, tkompli ssaħħaħ it-trasparenza u l-qafas legali kontra l-korruzzjoni fir-rigward tal-użu tal-fondi tal-Unjoni fl-Ungerija.

(187)

Fid-dawl tal-elementi u l-analiżi ta’ hawn fuq, u abbażi tal-valutazzjoni tal-Kummissjoni, il-Kunsill iqis li l-Ungerija ħadet għadd ta’ passi biex tissodisfa l-miżuri ta’ rimedju li adottat fl-2022 u biex tindirizza d-dgħufijiet, ir-riskji u n-nuqqasijiet importanti li fadal f’għadd ta’ miżuri ta’ rimedju.

(188)

L-Ungerija ppreżentat evidenza biex turi li l-issodisfar tal-miżuri ta’ rimedju li għandhom natura orizzontali, strutturali u sistemika u huma ta’ importanza kruċjali biex jirrimedjaw il-ksur sistemiku tal-prinċipji tal-istat tad-dritt fir-rigward tal-akkwist pubbliku, l-effettività tal-azzjoni ta’ prosekuzzjoni u l-ġlieda kontra l-korruzzjoni fl-Ungerija (ara t-Taqsimiet 2.2, 2.4 u 2.5 hawn fuq).

(189)

L-Ungerija adottat ukoll miżuri ta’ rimedju ġodda ta’ importanza ċentrali simili, minħabba l-effetti tagħhom fl-oqsma affettwati mill-ksur tal-prinċipji tal-istat tad-dritt u l-finanzjament relatat tal-Unjoni f’riskju. B’mod partikolari, il-parteċipazzjoni tal-Ungerija fl-UPPE ssaħħaħ l-investigazzjoni effettiva u l-azzjoni ta’ prosekuzzjoni fir-rigward ta’ reati kriminali li jaffettwaw l-interessi finanzjarji tal-Unjoni, u b’hekk tikkontribwixxi għall-protezzjoni tal-baġit tal-Unjoni b’mod trażversali (208). Il-fatt li, wara t-talba mill-Ungerija, il-Kummissjoni ddeċidiet li r-Regolament (UE) 2017/1939 japplika fl-Ungerija fir-rigward ta’ reati mwettqa fl-1 ta’ Ġunju 2021 jew wara jfisser li l-investigazzjonijiet tal-UPPE jistgħu jkopru l-perjodu kollu mill-adozzjoni tad-Deċiżjoni ta’ Implimentazzjoni (UE) 2022/2506. Barra minn hekk, ir-regoli l-ġodda dwar is-sjieda benefiċjarja jappoġġaw il-ġlieda kontra l-korruzzjoni permezz ta’ standards ta’ responsabbiltà msaħħa li jippermettu l-iskrutinju pubbliku (209).

(190)

Barra minn hekk, bil-miżuri ta’ rimedju li hemm bħalissa fis-seħħ, l-Ungerija ħadet passi deċiżivi biex ittejjeb it-trasparenza u l-kompetizzjoni fl-akkwist pubbliku permezz ta’ għadd ta’ azzjonijiet koordinati u mmirati, kemm fl-implimentazzjoni kontinwa ta’ ċerti miżuri ta’ rimedju matul l-aħħar snin (210) kif ukoll fil-passi l-ġodda meħuda bl-aħħar riforma tal-Att dwar l-Akkwist Pubbliku (211).

(191)

Dak huwa wkoll l-approċċ li l-Ungerija segwiet fir-rigward tan-nuqqasijiet identifikati preċedentament tal-qafas regolatorju nazzjonali dwar il-PITs, li ġie emendat biex mhux biss jindirizza r-riskji ta’ kunflitti ta’ interess, iżda biex progressivament itemm il-PITs għalkollox.

(192)

Filwaqt li ftit miżuri naqsu milli jissodisfaw fl-intier tagħhom l-impenji u l-għanijiet oriġinarjament previsti (212), f’ħafna każijiet, l-Ungerija marret lil hinn minn dak li impenjat ruħha li tagħmel fl-2022. B’mod partikolari, is-sistema tad-dikjarazzjoni tal-assi li issa hija fis-seħħ tagħti setgħat ta’ verifika ferm aktar estensivi lill-Awtorità tal-Integrità u testendi l-obbligi għall-preżentazzjoni ta’ dikjarazzjoni tal-assi kif ukoll sanzjonijiet għan-nuqqas ta’ konformità magħhom, li kienu oriġinarjament previsti biss għal grupp iżgħar ta’ persuni, għal firxa wiesgħa ta’ uffiċjali b’riskju għoli. Is-setgħat tal-Awtorità tal-Integrità ssaħħu wkoll f’każijiet oħra, b’mod partikolari fir-rigward tal-aċċess għad-data, li huwa kruċjali għaliha biex twettaq il-kompiti ta’ sorveljanza tagħha b’mod effettiv. Dawk l-impenji addizzjonali, flimkien mal-miżuri ta’ rimedju l-ġodda, iservu aħjar u b’mod effettiv l-iskop li l-miżuri ta’ rimedju puntwali speċifiċi kienu qed jippruvaw jiksbu.

(193)

Konsegwentement, fid-dawl tal-valutazzjoni mwettqa hawn fuq, jenħtieġ li jiġi konkluż li l-miżuri ta’ rimedju notifikati mill-Ungerija, meqjusa fl-intier tagħhom, kif adottati u fid-dawl tad-dettalji tagħhom, jirrimedjaw b’mod effettiv il-ksur identifikat tal-prinċipji tal-istat tad-dritt u jipproteġu l-baġit tal-Unjoni.

(194)

Għalhekk il-Kunsill iqis li l-kundizzjonijiet stabbiliti fl-Artikolu 4 tar-Regolament (UE, Euratom) 2020/2092 ma għadhomx issodisfati u li l-miżuri adottati bid-Deċiżjoni ta’ Implimentazzjoni (UE) 2022/2506 jenħtieġ li jitneħħew skont l-Artikolu 7(2) tar-Regolament (UE, Euratom) 2020/2092. Konsegwentement, jenħtieġ li d-Deċiżjoni ta’ Implimentazzjoni (UE) 2022/2506 titħassar,