REGOLAMENT TA’ IMPLIMENTAZZJONI TAL-KUMMISSJONI (UE) 2026/1549

tas-6 ta’ Lulju 2026

li jissospendi l-miżuri ta’ politika kummerċjali li jikkonċernaw ċerti prodotti mill-Istati Uniti tal-Amerka imposti mir-Regolament ta’ Implimentazzjoni (UE) 2020/1646 wara l-aġġudikazzjoni ta’ tilwima kummerċjali skont il-Fehim dwar is-Soluzzjoni tat-Tilwim tal-Organizzazzjoni Dinjija tal-Kummerċ

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 654/2014 tal-Parlament Ewropew u tal-Kunsill tal-15 ta’ Mejju 2014 dwar l-eżerċizzju tad-drittijiet tal-Unjoni għall-applikazzjoni u l-infurzar ta’ regoli kummerċjali internazzjonali u li jemenda r-Regolament tal-Kunsill (KE) Nru 3286/94 li jistabbilixxi l-proċeduri tal-Komunità fil-qasam ta’ politika kummerċjali komuni sabiex jiżgura l-eżerċizzju tad-drittijiet tal-Komunità skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (1), u b’mod partikolari l-Artikolu 7(3) tiegħu,

Billi:

(1)	Fis-7 ta’ Novembru 2020, il-Kummissjoni adottat ir-Regolament ta’ Implimentazzjoni (UE) 2020/1646 (2) li jipprevedi l-applikazzjoni ta’ dazji doganali addizzjonali fuq l-importazzjonijiet fl-Unjoni ta’ għadd ta’ prodotti li joriġinaw fl-Istati Uniti.

(2)

Il-premessa 9 tar-Regolament ta’ Implimentazzjoni (UE) 2020/1646 tipprovdi li l-Kummissjoni għandha l-intenzjoni li tissospendi l-applikazzjoni tar-Regolament f’każ ta’ sospensjoni mill-Istati Uniti tal-kontromiżuri kontra l-importazzjonijiet ta’ ċerti prodotti mill-Unjoni Ewropea, fir-rigward tat-tilwim tad-WTO dwar inġenji tal-ajru ċivili kbar.

(3)

Fid-9 ta’ Marzu 2021, wara fehim li ntlaħaq mal-Istati Uniti biex jiġu sospiżi b’mod reċiproku l-miżuri kollha għal perjodu ta’ erba’ xhur, il-Kummissjoni adottat ir-Regolament ta’ Implimentazzjoni (UE) 2021/425 (3) li jissospendi l-miżuri ta’ politika kummerċjali li jikkonċernaw ċerti prodotti mill-Istati Uniti tal-Amerka imposti mir-Regolament ta’ Implimentazzjoni (UE) 2020/1646 wara l-aġġudikazzjoni ta’ tilwima kummerċjali skont il-Ftehim dwar is-Soluzzjoni tat-Tilwim tal-Organizzazzjoni Dinjija tal-Kummerċ li ssospenda l-applikazzjoni tar-Regolament ta’ Implimentazzjoni (UE) 2020/1646 sal-10 ta’ Lulju 2021.

(4)

Fit-8 ta’ Lulju 2021, wara fehim ulterjuri li ntlaħaq mal-Istati Uniti biex il-miżuri kollha jiġu sospiżi b’mod reċiproku għal perjodu ta’ 5 snin, il-Kummissjoni adottat ir-Regolament ta’ Implimentazzjoni (UE) 2021/1123 (4) li ssospenda r-Regolament ta’ Implimentazzjoni (UE) 2020/1646 mill-11 ta’ Lulju 2021 sal-10 ta’ Lulju 2026.

(5)

Meta jitqies li l-Istati Uniti ma imponewx mill-ġdid miżuri ta’ ritaljazzjoni, u bil-ħsieb tan-nuqqas ta’ xi bidla sostantiva fiċ-ċirkostanzi fattwali u legali sottostanti għat-tilwim tad-WTO dwar inġenji tal-ajru ċivili kbar, jippersistu l-kundizzjonijiet li ġġustifikaw is-sospensjoni tal-miżuri tal-Unjoni. Għalhekk, huwa xieraq li jiġi estiż il-perjodu ta’ sospensjoni tal-miżuri stabbiliti bir-Regolament (UE) 2020/1646.

(6)	Madankollu, jenħtieġ li l-Kummissjoni żżomm is-sospensjoni taħt rieżami fid-dawl ta’ żviluppi ulterjuri fir-relazzjonijiet kummerċjali mal-Istati Uniti u, f’konformità mal-Artikolu 7(3) tar-Regolament (UE) Nru 654/2014, tista’ tieħu azzjonijiet ulterjuri.

(7)	Il-miżuri previsti f’dan ir-Regolament huma f’konformità mal-opinjoni tal-Kumitat dwar l-Ostakli għall-Kummerċ, stabbilit bir-Regolament (UE) 2015/1843 tal-Parlament Ewropew u tal-Kunsill (5),

ADOTTAT DAN IR-REGOLAMENT:

Artikolu 1

L-applikazzjoni tar-Regolament ta’ Implimentazzjoni (UE) 2020/1646 hija b’dan sospiża.

Artikolu 2

Dan ir-Regolament għandu jidħol fis-seħħ fil-11 ta’ Lulju 2026.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,is-6 ta’ Lulju 2026.

Għall-Kummissjoni

Il-President

Ursula VON DER LEYEN

(1) ĠU L 189, 27.6.2014, p. 50, ELI: http://data.europa.eu/eli/reg/2014/654/oj.

(2) Ir-Regolament ta’ Implimentazzjoni tal-Kummissjoni (UE) 2020/1646 tas-7 ta’ Novembru 2020 dwar miżuri ta’ politika kummerċjali li jikkonċernaw ċerti prodotti mill-Istati Uniti tal-Amerka wara l-aġġudikazzjoni ta’ tilwima kummerċjali skont il-Fehim dwar is-Soluzzjoni tat-Tilwim tal-Organizzazzjoni Dinjija tal-Kummerċ (ĠU L 373, 9.11.2020, p. 1, ELI: http://data.europa.eu/eli/reg_impl/2020/1646/oj).

(3) Ir-Regolament ta’ Implimentazzjoni tal-Kummissjoni (UE) 2021/425 tad-9 ta’ Marzu 2021 li jissospendi l-miżuri ta’ politika kummerċjali li jikkonċernaw ċerti prodotti mill-Istati Uniti tal-Amerka imposti mir-Regolament ta’ Implimentazzjoni (UE) 2020/1646 wara l-aġġudikazzjoni ta’ tilwima kummerċjali skont il-Fehim dwar is-Soluzzjoni tat-Tilwim tal-Organizzazzjoni Dinjija tal-Kummerċ (ĠU L 84, 11.3.2021, p. 16, ELI: http://data.europa.eu/eli/reg_impl/2021/425/oj).

(4) Ir-Regolament ta’ Implimentazzjoni tal-Kummissjoni (UE) 2021/1123 tat-8 ta’ Lulju 2021 li jissospendi l-miżuri ta’ politika kummerċjali li jikkonċernaw ċerti prodotti mill-Istati Uniti tal-Amerka imposti mir-Regolament ta’ Implimentazzjoni (UE) 2020/1646 wara l-aġġudikazzjoni ta’ tilwima kummerċjali skont il-Fehim dwar is-Soluzzjoni tat-Tilwim tal-Organizzazzjoni Dinjija tal-Kummerċ (ĠU L 243, 9.7.2021, p. 43, ELI: http://data.europa.eu/eli/reg_impl/2021/1123/oj).

(5) Ir-Regolament (UE) 2015/1843 tal-Parlament Ewropew u tal-Kunsill tas-6 ta’ Ottubru 2015 li jistabbilixxi l-proċeduri tal-Unjoni fil-qasam tal-politika kummerċjali komuni sabiex jiżgura l-eżerċizzju tad-drittijiet tal-Unjoni skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ ( ĠU L 272, 16.10.2015, p. 1, ELI: http://data.europa.eu/eli/reg/2015/1843/oj).