(1)

Fit-23 ta’ Jannar 2026, il-Greċja, l-Awstrija, il-Kroazja, Ċipru u s-Slovenja, bħala membri, issottomettew applikazzjoni lill-Kummissjoni f’konformità mal-Artikolu 14(1) tad-Deċiżjoni (UE) 2022/2481 biex jiġi stabbilit il-Konsorzju għall-Infrastruttura Diġitali Ewropea għal Koalizzjoni tal-Ħiliet fiċ-Ċibersigurtà (CSC-EDIC).

(2)

Bħala l-Istat Membru ospitanti, il-Greċja għamlet dikjarazzjoni f’konformità mal-Artikolu 14(1), il-punt (d), tad-Deċiżjoni (UE) 2022/2481 biex tirrikonoxxi lill-CSC-EDIC bħala korp internazzjonali skont it-tifsira tal-Artikolu 143(1), il-punt (g), u skont l-Artikolu 151(1), il-punt (b), tad-Direttiva tal-Kunsill 2006/112/KE (2) u bħala organizzazzjoni internazzjonali skont it-tifsira tal-Artikolu 11(1), il-punt (b), tad-Direttiva tal-Kunsill (UE) 2020/262 (3).

(3)

Il-Kummissjoni vvalutat l-applikazzjoni skont l-Artikolu 14(2) tad-Deċiżjoni (UE) 2022/2481. Ikkonkludiet li l-applikazzjoni fiha l-elementi kollha meħtieġa mill-Artikolu 14(1) tad-Deċiżjoni (UE) 2022/2481. Filwaqt li tqis l-objettivi ġenerali tal-Programm ta’ Politika dwar id-Deċennju Diġitali, b’mod partikolari l-kontribut tal-EDIC propost għall-iżvilupp ta’ ekosistema komprensiva u sostenibbli ta’ infrastrutturi diġitali interoperabbli, u kunsiderazzjonijiet prattiċi relatati mal-implimentazzjoni tal-proġett multinazzjonali, b’mod partikolari l-kapaċità teknika, finanzjarja u amministrattiva tal-EDIC propost, il-Kummissjoni kkonkludiet li l-EDIC propost jissodisfa r-rekwiżiti speċifiċi kollha stabbiliti fl-Artikoli 13 sa 21 tad-Deċiżjoni (UE) 2022/2481.

(4)

F’konformità mal-Istatuti mehmuża mal-applikazzjoni, il-kompitu prinċipali tas-CSC-EDIC se jkun li jimplimenta proġett multinazzjonali fil-qasam tal-ħiliet u t-taħriġ fiċ-ċibersigurtà identifikati fl-Anness tad-Deċiżjoni (UE) 2022/2481. L-EDIC se jappoġġa l-implimentazzjoni tal-objettivi stabbiliti fil-Komunikazzjoni tal-Kummissjoni tat-18 ta’ April 2023 imsejħa “Inxejnu d-distakk tat-talent fiċ-ċibersigurtà biex nixprunaw il-kompetittività, it-tkabbir u r-reżiljenza tal-UE” (COM(2023) 207 final) (“L-Akkademja tal-Ħiliet fiċ-Ċibersigurtà”), biex jissaħħu l-kapaċitajiet tal-Unjoni għall-edukazzjoni, it-taħriġ u l-iżvilupp tal-forza tax-xogħol fil-qasam taċ-ċibersigurtà. Skont dan il-kompitu prinċipali, is-CSC-EDIC se jindirizza d-diskrepanza fil-ħiliet taċ-ċibersigurtà li tant qed tikber u jippromwovi l-bini ta’ kapaċità fost l-awtoritajiet pubbliċi, l-industrija u l-intrapriżi żgħar u medji fl-Istati Membri, ħalli jiżdiedu l-kompetittività, it-tkabbir u r-reżiljenza tal-Unjoni. Biex jintlaħaq dan l-objettiv, is-CSC-EDIC se jwettaq ukoll azzjonijiet proattivi li jippromwovu t-titjib tal-ħiliet u t-taħriġ mill-ġdid tal-professjonisti fiċ-ċibersigurtà u għal tranżizzjoni lejn iċ-ċibersigurtà, filwaqt li jiżgura l-allinjament mal-ħtiġijiet tal-forza tax-xogħol u d-diskrepanzi fil-ħiliet u l-konformità regolatorja tal-industriji tal-Unjoni u tal-amministrazzjonijiet nazzjonali. Barra minn hekk, dan se jappoġġa l-implimentazzjoni tal-istrumenti legali Ewropej rilevanti u l-aderenza magħhom. Din il-ħidma tallinja mal-viżjoni tal-Unjoni tal-Ħiliet adottata fil-5 ta’ Marzu 2025.

(5)

Is-CSC-EDIC se jikkoordina kif xieraq l-attivitajiet tiegħu mal-Aġenzija tal-Unjoni Ewropea għaċ-Ċibersigurtà (ENISA), b’għodod żviluppati mill-ENISA bħall-Qafas Ewropew għall-Ħiliet fiċ-Ċibersigurtà, u filwaqt li jqis kif xieraq il-kompiti tal-ENISA stabbiliti fir-Regolament (UE) 2019/881 tal-Parlament Ewropew u tal-Kunsill (4) u r-rwol propost tal-ENISA fil-proposta tal-Kummissjoni għal Att tat-2 dwar iċ-Ċibersigurtà (COM(2026) 11 final). Is-CSC-EDIC se jkompli jaħtaf l-opportunitajiet li tiftaħ din il-proposta. Se jikkoordina wkoll maċ-Ċentru Ewropew ta’ Kompetenza fil-qasam taċ-Ċibersigurtà (ECCC), skont ir-Regolament (UE) 2021/887 tal-Parlament Ewropew u tal-Kunsill (5), b’mod partikolari fir-rigward tal-avvanz tal-kapaċitajiet industrijali, teknoloġiċi u tar-riċerka. Biex ikunu żgurati komplementarjetà u sinerġija bejn l-inizjattivi, is-CSC-EDIC se jistabbilixxi arranġamenti ta’ kollaborazzjoni mal-ENISA u mal-ECCC.

(6)

Il-miżuri previsti f’din id-Deċiżjoni huma f’konformità mal-opinjoni tal-Kumitat stabbilit bl-Artikolu 23(1) tar-Regolament (UE) 2022/2481.

(7)

Għal applikazzjoni fil-pront tal-miżuri previsti f’din id-Deċiżjoni, jiġifieri biex is-CSC-EDIC jibda jiffunzjona, kif inhu meħtieġ b’mod urġenti għall-implimentazzjoni ordnata tal-Akkademja tal-Ħiliet fiċ-Ċibersigurtà, din id-Deċiżjoni jenħtieġ li tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea,