(1)

Il-Konvenzjoni dwar l-Avjazzjoni Ċivili Internazzjonali (il-“Konvenzjoni ta’ Chicago”), li tirregola t-trasport internazzjonali bl-ajru, daħlet fis-seħħ fl-4 ta’ April 1947. Hija stabbiliet l-Organizzazzjoni tal-Avjazzjoni Ċivili Internazzjonali (ICAO).

(2)

L-Istati Membri kollha huma Stati kontraenti tal-Konvenzjoni ta’ Chicago u membri tal-ICAO, filwaqt li l-Unjoni għandha status ta’ osservatur f’ċerti korpi tal-ICAO. Attwalment sitt Stati Membri huma rrappreżentati fil-Kunsill tal-ICAO.

(3)

Skont l-Artikolu 54 tal-Konvenzjoni ta’ Chicago, il-Kunsill tal-ICAO għandu jadotta Standards u Prattiki Rakkomandati (SARPs) internazzjonali u jiddeżinjhom bħala Annessi għall-Konvenzjoni ta’ Chicago.

(4)

Is-SARPs dwar is-sigurtà tal-avjazzjoni ġew adottati mill-Kunsill tal-ICAO bħala l-Anness 17 tal-Konvenzjoni ta’ Chicago.

(5)

Il-Kunsill tal-ICAO, fil-238 sessjoni tiegħu, għandu jadotta l-emenda proposta 19 għall-Anness 17 – Sigurtà tal-Avjazzjoni – tal-Konvenzjoni ta’ Chicago (“Emenda 19”). L-Emenda 19 ser ittejjeb għadd ta’ SARPs, tintroduċi definizzjonijiet ġodda u tirrevedi ċerti definizzjonijiet eżistenti, u ser tallinja xi prattiki aktar mill-qrib ma’ prattiċi eżistenti fl-Unjoni, b’mod partikolari fil-qasam tal-kontrolli u tat-tfittxijiet tas-sigurtà tal-inġenji tal-ajru.

(6)

Jixraq li tiġi stabbilita l-pożizzjoni li għandha tittieħed f’isem l-Unjoni fi ħdan il-Kunsill tal-ICAO, billi l-emenda 19, ladarba tiġi adottata, tkun obbligatorja skont id-dritt internazzjonali f’konformità mal-Artikolu 90 tal-Konvenzjoni ta’ Chicago, u tista’ tinfluwenza b’mod deċiżiv il-kontenut tad-dritt tal-Unjoni, notevolment ir-Regolament (KE) Nru 300/2008 tal-Parlament Ewropew u tal-Kunsill (1), ir-Regolament ta’ Implimentazzjoni tal-Kummissjoni (UE) 2015/1998 (2) u d-Deċiżjoni ta’ Implimentazzjoni tal-Kummissjoni C(2015) 8005 (3).

(7)

Jenħtieġ li l-pożizzjoni li għandha tittieħed f’isem l-Unjoni fil-238 sessjoni tal-Kunsill tal-ICAO, jew fi kwalunkwe sessjoni sussegwenti, tkun li tappoġġa l-Emenda 19. Jenħtieġ li dik il-pożizzjoni tiġi espressa mill-Istati Membri li huma membri tal-Kunsill tal-ICAO, filwaqt li jaġixxu konġuntament fl-interess tal-Unjoni.

(8)

Jekk l-Emenda 19 tiġi adottata mill-Kunsill tal-ICAO, l-adozzjoni ta’ dik l-emenda għandha titħabbar mis-Segretarju Ġenerali tal-ICAO permezz tal-proċedura ta’ Ittra lill-Istati tal-ICAO. F’każ bħal dan, jenħtieġ li l-pożizzjoni li trid tittieħed f’isem l-Unjoni wara l-adozzjoni tkun li ma tiġi rreġistrata l-ebda diżapprovazzjoni u li jkun hemm konformità mal-Emenda 19. Fejn id-dritt tal-Unjoni jkun differenti mis-SARPs li jkunu għadhom kif ġew adottati wara d-data tal-applikazzjoni prevista ta’ dawk is-SARPs, jenħtieġ li kwalunkwe differenza bejn id-dritt tal-Unjoni u dawk is-SARPs partikolari tiġi notifikata lill-ICAO. Il-pożizzjoni li għandha tittieħed f’isem l-Unjoni b’rabta ma’ tali differenza jenħtieġ li tkun ibbażata fuq dokument bil-miktub ippreżentat mill-Kummissjoni lill-Kunsill għad-diskussjoni u l-approvazzjoni. Jenħtieġ li dik il-pożizzjoni tiġi espressa mill-Istati Membri kollha, filwaqt li jaġixxu flimkien fl-interess tal-Unjoni,