(1)

L-Artikolu 28 tar-Regolament (UE) Nru 600/2014 jirrikjedi li l-kontropartijiet finanzjarji u l-kontropartijiet mhux finanzjarji li huma soġġetti għall-obbligu tal-ikklerjar skont it-Titolu II tar-Regolament (UE) Nru 648/2012 tal-Parlament Ewropew u tal-Kunsill (2) jikkonkludu tranżazzjonijiet ma’ tali kontropartijiet finanzjarji oħrajn jew ma’ tali kontropartijiet mhux finanzjarji oħrajn bħal dawn f’derivattivi li jappartjenu għal klassi ta’ derivattiv li tkun ġiet iddikjarata soġġetta għall-obbligu ta’ negozjar f’konformità mal-Artikolu 32 tar-Regolament (UE) Nru 600/2014 fi swieq regolati, faċilitajiet multilaterali tan-negozjar (MTFs), faċilitajiet organizzati tan-negozjar (OTFs), jew ċentri tan-negozjar ta’ pajjiżi terzi rikonoxxuti bħala ekwivalenti skont l-Artikolu 28 tar-Regolament (UE) Nru 600/2014 (l-“obbligu ta’ negozjar tad-derivattivi”). Minn dan isegwi li l-obbligu ta’ negozjar tad-derivattivi jipprojbixxi lil dawk il-kontropartijiet milli jikkonkludu tranżazzjonijiet f’dawk id-derivattivi f’ċentru tan-negozjar ta’ pajjiż terz li ma huwiex rikonoxxut bħala ekwivalenti skont l-Artikolu 28 tar-Regolament (UE) Nru 600/2014. Ir-Regolament (UE) 2024/791 tal-Parlament Ewropew u tal-Kunsill (3) emenda r-Regolament (UE) Nru 600/2014 billi, fost l-oħrajn, introduċa Artikolu 32a ġdid, li jippermetti lill-Kummissjoni tissospendi, permezz ta’ att ta’ implimentazzjoni, l-obbligu ta’ negozjar tad-derivattivi fir-rigward ta’ ċerti kontropartijiet finanzjarji, fuq talba ta’ awtorità kompetenti ta’ Stat Membru, u dment li jiġu ssodisfati l-kundizzjonijiet stabbiliti f’dak l-Artikolu.

(2)

Fit-8 ta’ Novembru 2024, il-Kummissjoni rċeviet talba mill-Autorité des Marchés financiers (AMF) biex tissospendi l-obbligu ta’ negozjar tad-derivattivi skont l-Artikolu 32a(1), il-punt (a), tar-Regolament (UE) Nru 600/2014, fir-rigward ta’ tliet kontropartijiet finanzjarji fil-ġuriżdizzjoni tagħha: BNP Paribas SA, Société Générale SA u Crédit Agricole CIB.

(3)

Fl-14 ta’ Marzu 2025, il-Kummissjoni rċeviet talba mingħand il-Bundesanstalt für Finanzdienstleistungsaufsicht (BaFin) biex tissospendi l-obbligu tan-negozjar tad-derivattivi skont l-Artikolu 32a(1), il-punt (a), tar-Regolament (UE) Nru 600/2014, fir-rigward ta’ kontroparti finanzjarja waħda fil-ġuriżdizzjoni tagħha: Deutsche Bank AG.

(4)

Skont l-Artikolu 32a(1), il-punt (a), tar-Regolament (UE) Nru 600/2014, l-awtorità kompetenti għandha turi li kontroparti finanzjarja fil-ġuriżdizzjoni tagħha taġixxi regolarment bħala ġeneratur tas-suq, fis-sens tal-Artikolu 4(1), punt (7) tad-Direttiva 2014/65/UE tal-Parlament Ewropew u tal-Kunsill (4), f’derivattiv OTC soġġett għall-obbligu ta’ negozjar tad-derivattivi. Għal dak il-għan, l-AMF u l-BaFin ipprovdew evidenza bil-miktub li tikkonferma li l-kontropartijiet finanzjarji rikjedenti huma membri ta’ ċerti MTFs tal-UE u ta’ ċerti faċilitajiet tal-eżekuzzjoni ta’ swaps (SEFs) tal-Istati Uniti rikonoxxuti bħala ekwivalenti skont l-Artikolu 28 tar-Regolament (UE) Nru 600/2014, u li jipprovdu kwotazzjonijiet bi tweġiba għat-talbiet għal kwotazzjonijiet (RFQs) tal-klijenti għal derivattivi soġġetti għall-obbligu ta’ negozjar tad-derivattivi. L-AMF u l-BaFin ipprovdew ukoll data dwar l-attività tan-negozjar tal-kontropartijiet finanzjarji rikjedenti dwar ċerti MTFs tal-UE u dwar ċerti SEFs tal-Istati Uniti rikonoxxuti bħala ekwivalenti skont l-Artikolu 28 tar-Regolament (UE) Nru 600/2014 li tindika li, bejn l-2021 u l-2024, huma regolarment irċevew RFQs għal derivattivi soġġetti għall-obbligu ta’ negozjar tad-derivattivi u regolarment wettqu tranżazzjonijiet bil-kapital proprjetarju tagħhom f’dawk l-istrumenti abbażi tal-kwotazzjonijiet li pprovdew bi tweġiba għall-RFQs tal-klijenti. Wara li rrieżaminat l-evidenza ppreżentata mill-AMF u mill-BaFin, il-Kummissjoni kkonkludiet li l-AMF u l-BaFin urew li l-kontropartijiet finanzjarji rikjedenti fil-ġuriżdizzjoni tagħhom jippreżentaw lilhom infushom fis-swieq finanzjarji fuq bażi kontinwa bħala li lesti jinnegozjaw f’isimhom stess billi jixtru u jbigħu derivattivi OTC soġġetti għall-obbligu ta’ negozjar tad-derivattivi bil-kapital proprjetarju tagħhom bi prezzijiet iddefiniti minnhom u, għalhekk, jaġixxu regolarment bħala ġeneraturi tas-suq f’derivattiv OTC soġġett għall-obbligu ta’ negozjar tad-derivattivi.

(5)

Skont l-Artikolu 32a(1), il-punt (a), tar-Regolament (UE) Nru 600/2014, l-awtorità kompetenti għandha turi li kontroparti finanzjarja fil-ġuriżdizzjoni tagħha regolarment tirċievi RFQs għad-derivattivi soġġetti għall-obbligu ta’ negozjar tad-derivattivi minn kontroparti mhux taż-ŻEE li ma jkollha l-ebda sħubija attiva f’ċentru tan-negozjar taż-ŻEE li joffri negozjar tad-derivattiv OTC soġġett għall-obbligu ta’ negozjar tad-derivattivi. Peress li l-kontropartijiet finanzjarji rikjedenti ma humiex awtorizzati jikkonkludu tranżazzjonijiet f’derivattivi soġġetti għall-obbligu ta’ negozjar tad-derivattivi f’ċentri tan-negozjar ta’ ġuriżdizzjonijiet ta’ pajjiżi terzi li ma humiex rikonoxxuti bħala ekwivalenti skont l-Artikolu 28 tar-Regolament (UE) Nru 600/2014, sal-lum, ma jistgħux jirċievu RFQs għal dawk id-derivattivi minn kontroparti mhux taż-ŻEE f’dawk il-ġuriżdizzjonijiet mhux ekwivalenti. B’mod partikolari, wara l-ħruġ tar-Renju Unit mill-Unjoni, il-kontropartijiet finanzjarji rikjedenti ma jistgħux jirċievu RFQs għal derivattivi soġġetti għall-obbligu ta’ negozjar tad-derivattivi minn kontropartijiet mhux taż-ŻEE f’ċentri tan-negozjar fir-Renju Unit. Fid-dawl ta’ dik l-impossibbiltà materjali, l-AMF u l-BaFin ivvalutaw l-attività tan-negozjar tal-kontropartijiet finanzjarji rikjedenti fiċ-ċentri tan-negozjar fir-Renju Unit qabel l-2021. L-AMF u l-BaFin ipprovdew evidenza li turi li, fit-3 snin qabel id-data effettiva tal-ħruġ tar-Renju Unit mill-Unjoni, il-kontropartijiet finanzjarji rikjedenti regolarment irċevew RFQs u wettqu tranżazzjonijiet abbażi tal-RFQs riċevuti f’derivattivi soġġetti għall-obbligu ta’ negozjar tad-derivattivi f’ċerti ċentri tan-negozjar fir-Renju Unit.

(6)

L-AMF u l-BaFin ivvalutaw ukoll attività ta’ negozjar aktar riċenti tal-kontropartijiet finanzjarji rikjedenti f’ċentri tan-negozjar fir-Renju Unit u f’SEFs tal-Istati Uniti li huma rikonoxxuti bħala ekwivalenti skont l-Artikolu 28 tar-Regolament (UE) Nru 600/2014. L-ewwel nett, l-AMF u l-BaFin ipprovdew evidenza li turi li l-kontropartijiet finanzjarji rikjedenti baqgħu attivi f’ċerti ċentri tan-negozjar fir-Renju Unit wara l-2021, minħabba li komplew jirċievu RFQs u jeżegwixxu tranżazzjonijiet abbażi tal-RFQs riċevuti f’derivattivi mhux soġġetti għall-obbligu ta’ negozjar tad-derivattivi. It-tieni, l-AMF u l-BaFin ipprovdew evidenza li turi li, bejn l-2021 u l-2024, il-kontropartijiet finanzjarji rikjedenti regolament irċevew RFQs u wettqu tranżazzjonijiet abbażi tal-RFQs riċevuti f’derivattivi soġġetti għall-obbligu ta’ negozjar tad-derivattivi f’ċerti SEFs tal-Istati Uniti rikonoxxuti bħala ekwivalenti skont l-Artikolu 28 tar-Regolament (UE) Nru 600/2014, inkluż fir-rigward ta’ kontropartijiet mhux taż-ŻEE li l-kontropartijiet finanzjarji rikjedenti ma kellhomx interazzjoni magħhom f’ċentri tan-negozjar taż-ŻEE. Barra minn hekk, l-AMF u l-BaFin ipprovdew evidenza li turi li l-kontropartijiet finanzjarji rikjedenti impenjaw ruħhom li jimplimentaw miżuri, wara s-sospensjoni tal-obbligu ta’ negozjar tad-derivattivi, biex jiżguraw li, meta jikkonkludu tranżazzjonijiet taħt dik is-sospensjoni, huma jirrispondu biss għal RFQs minn kontropartijiet mhux taż-ŻEE li ma għandhom l-ebda sħubija attiva f’ċentru tan-negozjar taż-ŻEE li joffri negozjar fid-derivattiv OTC soġġett għall-obbligu ta’ negozjar tad-derivattivi.

(7)

L-evidenza ppreżentata mill-AMF u mill-BaFin turi li huwa raġonevoli li wieħed jassumi li, jekk tingħata s-sospensjoni tal-obbligu ta’ negozjar tad-derivattivi skont l-Artikolu 32a(1), il-punt (a), tar-Regolament (UE) Nru 600/2014, il-kontropartijiet finanzjarji rikjedenti regolarment jirċievu RFQs għad-derivattivi soġġetti għall-obbligu ta’ negozjar tad-derivattivi minn kontropartijiet mhux taż-ŻEE li ma għandhom l-ebda sħubija attiva f’ċentru tan-negozjar OTC soġġett għall-obbligu ta’ negozjar tad-derivattivi. Fid-dawl tal-fatt li l-kontropartijiet finanzjarji rikjedenti, sal-lum, ma jistgħux jirċievu RFQs għal derivattivi soġġetti għall-obbligu ta’ negozjar ta’ derivattivi minn kontroparti mhux taż-ŻEE f’ġuriżdizzjoni li ma hijiex rikonoxxuta bħala ekwivalenti skont l-Artikolu 28 tar-Regolament (UE) Nru 600/2014, u meta jitqies li jenħtieġ li s-sospensjoni tal-obbligu ta’ negozjar tad-derivattivi tkun possibbli meta l-attivitajiet ta’ kontroparti finanzjarja taż-ŻEE ma’ kontroparti mhux taż-ŻEE jkunu affettwati b’mod mhux xieraq mill-ambitu tal-obbligu ta’ negozjar tad-derivattivi, il-Kummissjoni kkonkludiet li l-evidenza ppreżentata mill-AMF u mill-BaFin turi li hija ssodisfata l-kundizzjoni stabbilita fl-Artikolu 32a(1), il-punt (a), tar-Regolament (UE) Nru 600/2014.

(8)

Fit-8 ta’ Novembru 2024, il-Kummissjoni rċeviet ukoll talba mill-AMF biex tissospendi l-obbligu ta’ negozjar tad-derivattivi skont l-Artikolu 32a(1), il-punt (b), tar-Regolament (UE) Nru 600/2014 fir-rigward ta’ BNP Paribas SA.

(9)

Skont l-Artikolu 32a(1), il-punt (b), tar-Regolament (UE) Nru 600/2014, l-awtorità kompetenti għandha turi li kontroparti finanzjarja fil-ġuriżdizzjoni tagħha taġixxi regolarment bħala ġeneratur tas-suq fi swap ta’ inadempjenza ta’ kreditu li jkun soġġett għall-obbligu ta’ negozjar tad-derivattivi. L-AMF ippreżentat evidenza bil-miktub li tikkonferma li l-kontroparti finanzjarja rikjedenti hija membru ta’ ċerti MTFs tal-UE u ta’ ċerti SEFs tal-Istati Uniti rikonoxxuti bħala ekwivalenti skont l-Artikolu 28 tar-Regolament (UE) Nru 600/2014, u li twieġeb għall-RFQs tal-klijenti għal derivattivi soġġetti għall-obbligu ta’ negozjar tad-derivattivi, inklużi swaps ta’ inadempjenza ta’ kreditu. L-AMF ipprovdiet ukoll data dwar l-attività tan-negozjar tal-kontroparti finanzjarja rikjedenti dwar ċerti MTFs tal-UE u dwar ċerti SEFs tal-Istati Uniti rikonoxxuti bħala ekwivalenti skont l-Artikolu 28 tar-Regolament (UE) Nru 600/2014 li tindika li, bejn l-2021 u l-2024, hija regolarment irċeviet RFQs għal derivattivi soġġetti għall-obbligu ta’ negozjar tad-derivattivi u regolarment wettqet tranżazzjonijiet bil-kapital proprjetarju tagħha f’dawk l-istrumenti abbażi tal-kwotazzjonijiet li pprovdiet bi tweġiba għall-RFQs tal-klijenti. Wara li rrieżaminat l-evidenza sottomessa mill-AMF, il-Kummissjoni kkonkludiet li l-AMF uriet li l-kontroparti finanzjarja rikjedenti fil-ġuriżdizzjoni tagħha tippreżenta lilha nnifisha fis-swieq finanzjarji fuq bażi kontinwa bħala li lesta tinnegozja f’isimha stess billi tixtri u tbigħ swaps ta’ inadempjenza ta’ kreditu soġġetti għall-obbligu ta’ negozjar tad-derivattivi bil-kapital proprjetarju tagħha bi prezzijiet iddefiniti minn dik il-kontroparti u, għalhekk, taġixxi regolarment bħala ġeneratur tas-suq fi swap ta’ inadempjenza ta’ kreditu soġġett għall-obbligu ta’ negozjar tad-derivattivi.

(10)

Skont l-Artikolu 32a(1), il-punt (b)(i), tar-Regolament (UE) Nru 600/2014, l-awtorità kompetenti għandha turi li l-kontroparti finanzjarja rikjedenti fil-ġuriżdizzjoni tagħha għandha l-intenzjoni li tinnegozja swaps ta’ inadempjenza ta’ kreditu soġġetti għall-obbligu ta’ negozjar tad-derivattivi f’isimha stess f’ċentru tan-negozjar miftuħ biss għal kontropartijiet li huma membri tal-ikklerjar tas-CCP, kif definit fl-Artikolu 2(14) tar-Regolament (UE) Nru 648/2012 (ċentru “negozjant għal negozjant”). L-AMF ipprovdiet il-lista ta’ ċentri tan-negozjar fejn il-kontroparti finanzjarja rikjedenti jkollha l-intenzjoni li tinnegozja swaps ta’ inadempjenza ta’ kreditu soġġetti għall-obbligu ta’ negozjar tad-derivattivi f’isimha stess, konferma mill-kontroparti finanzjarja rikjedenti li l-membri kollha ta’ dawk iċ-ċentri tan-negozjar huma membri tal-ikklerjar tas-CCP, u impenn mill-kontroparti finanzjarja rikjedenti li tinnotifika lill-AMF dwar l-istatus tal-membri tal-ikklerjar tas-CCP ta’ kwalunkwe membru ġdid f’dawk iċ-ċentri tan-negozjar. Wara li rrieżaminat l-evidenza ppreżentata mill-AMF, il-Kummissjoni kkonkludiet li l-AMF uriet li l-kontroparti finanzjarja rikjedenti għandha l-intenzjoni li tinnegozja swaps ta’ inadempjenza ta’ kreditu soġġetti għall-obbligu ta’ negozjar tad-derivattivi f’isimha stess f’ċentru minn negozjant għal negozjant.

(11)

Skont l-Artikolu 32a(1), il-punt (b)(ii), tar-Regolament (UE) Nru 600/2014, l-awtorità kompetenti għandha turi li l-kontroparti finanzjarja rikjedenti fil-ġuriżdizzjoni tagħha għandha l-intenzjoni li tinnegozja swaps ta’ inadempjenza ta’ kreditu f’isimha stess soġġetti għall-obbligu ta’ negozjar tad-derivattivi ma’ kontroparti li hija ġeneratur tas-suq u li ma jkollha l-ebda sħubija attiva f’ċentru minn negozjant għal negozjant barra miż-ŻEE li joffri n-negozjar f’derivattivi OTC soġġetti għall-obbligu ta’ negozjar tad-derivattivi. L-AMF irċeviet konferma mill-kontroparti finanzjarja rikjedenti li l-membri kollha taċ-ċentri minn negozjant għal negozjant li magħhom il-kontroparti finanzjarja rikjedenti għandha l-intenzjoni li tinnegozja għandhom status ta’ ġeneratur tas-suq attiv. L-AMF ipprovdiet ukoll impenn mill-kontroparti finanzjarja rikjedenti li tinnotifika lill-AMF dwar l-istatus ta’ ġeneratur tas-suq ta’ kwalunkwe parteċipant ġdid f’dawk iċ-ċentri, u konferma bil-miktub li, sa fejn taf l-AMF, bħalissa ma hemm l-ebda ċentru minn negozjant għal negozjant fiż-ŻEE li joffri negozjar fi swaps ta’ inadempjenza ta’ kreditu soġġetti għall-obbligu ta’ negozjar tad-derivattivi. Wara li rrieżaminat l-evidenza ppreżentata mill-AMF, il-Kummissjoni kkonkludiet li l-AMF uriet li l-kontroparti finanzjarja rikjedenti għandha l-intenzjoni li tinnegozja swaps ta’ inadempjenza ta’ kreditu soġġetti għall-obbligu ta’ negozjar tad-derivattivi f’isimha stess ma’ kontroparti li hija ġeneratur tas-suq u li ma għandha l-ebda sħubija attiva f’ċentru taż-ŻEE minn negozjant għal negozjant li joffri negozjar tad-derivattivi OTC soġġetti għall-obbligu ta’ negozjar tad-derivattivi.

(12)

Skont l-Artikolu 32a(1), il-punt (b)(iii), tar-Regolament (UE) Nru 600/2014, l-awtorità kompetenti għandha turi li l-kontroparti finanzjarja rikjedenti fil-ġuriżdizzjoni tagħha tikklerja s-swaps ta’ inadempjenza ta’ kreditu msemmija f’dik id-dispożizzjoni f’CCP awtorizzat jew rikonoxxut skont ir-Regolament (UE) Nru 648/2012. L-AMF ipprovdiet lista ta’ CCPs awtorizzati jew rikonoxxuti skont ir-Regolament (UE) Nru 648/2012 fejn il-kontroparti finanzjarja rikjedenti għandha l-intenzjoni li tikklerja dawk is-swaps ta’ inadempjenza ta’ kreditu. Wara li rrieżaminat l-evidenza ppreżentata mill-AMF, il-Kummissjoni kkonkludiet li l-AMF uriet li l-kontroparti finanzjarja rikjedenti se tikklerja s-swaps ta’ inadempjenza ta’ kreditu f’CCP awtorizzat jew rikonoxxut skont ir-Regolament (UE) Nru 648/2012.

(13)

F’konformità mal-Artikolu 32a(1) tar-Regolament (UE) Nru 600/2014, il-Kummissjoni kkonsultat lill-Awtorità Ewropea tat-Titoli u s-Swieq (ESMA). Fid-9 ta’ Ottubru 2025, l-ESMA ppreżentat l-opinjoni tagħha lill-Kummissjoni, fejn qablet mal-valutazzjoni mwettqa mill-awtoritajiet kompetenti rilevanti li l-kontropartijiet finanzjarji rikjedenti jissodisfaw il-kundizzjonijiet stabbiliti f’dak l-Artikolu.

(14)

Meta vvalutat jekk għandhiex tissospendi l-obbligu ta’ negozjar tad-derivattivi, il-Kummissjoni qieset ukoll jekk tali sospensjoni jistax ikollha effett distorsiv fuq l-obbligu tal-ikklerjar skont it-Titolu II tar-Regolament (UE) Nru 648/2012. Minħabba li l-obbligu tal-ikklerjar se jkompli japplika fir-rigward tal-kontropartijiet finanzjarji li jagħmlu użu mis-sospensjoni tal-obbligu ta’ negozjar tad-derivattivi, irrispettivament minn jekk id-derivattivi li dawk il-kontropartijiet finanzjarji jinnegozjaw humiex soġġetti għall-obbligu tan-negozjar tad-derivattivi, il-Kummissjoni qieset li s-sospensjoni tal-obbligu ta’ negozjar tad-derivattivi ma jkollhiex effett distorsiv fuq l-obbligu tal-ikklerjar skont it-Titolu II tar-Regolament (UE) Nru 648/2012.

(15)

Meta jitqies li l-AMF u l-BaFin urew li l-kontropartijiet finanzjarji rikjedenti fil-ġuriżdizzjonijiet tagħhom jissodisfaw il-kundizzjonijiet stabbiliti fl-Artikolu 32a(1), il-punt (a), tar-Regolament (UE) Nru 600/2014, u li s-sospensjoni tal-obbligu tan-negozjar tad-derivattivi ma jkollhiex effett distorsiv fuq l-obbligu tal-ikklerjar skont it-Titolu II tar-Regolament (UE) Nru 648/2012, huwa xieraq li jiġi sospiż l-obbligu ta’ negozjar tad-derivattivi għall-finijiet ta’ dak l-Artikolu fir-rigward ta’ BNP Paribas SA, Société Générale SA, Crédit Agricole CIB, u Deutsche Bank AG. Minħabba li l-evidenza ppreżentata mill-AMF u mill-BaFin turi li l-kundizzjonijiet stabbiliti fl-Artikolu 32a(1), il-punt (a), tar-Regolament (UE) Nru 600/2014 huma ssodisfati fir-rigward taċ-ċentri tan-negozjar fir-Renju Unit, huwa xieraq li l-obbligu ta’ negozjar tad-derivattivi jiġi sospiż biss fir-rigward tar-Renju Unit.

(16)

Meta wieħed iqis li l-AMF uriet li l-kontroparti finanzjarja rikjedenti fil-ġuriżdizzjoni tagħha tissodisfa l-kundizzjonijiet stabbiliti fl-Artikolu 32a(1), il-punt (b), tar-Regolament (UE) Nru 600/2014, u li s-sospensjoni tal-obbligu ta’ negozjar tad-derivattivi ma jkollhiex effett distorsiv fuq l-obbligu ta’ kklerjar skont it-Titolu II tar-Regolament (UE) Nru 648/2012, huwa xieraq li jiġi sospiż l-obbligu ta’ negozjar tad-derivattivi għall-finijiet ta’ dak l-Artikolu fir-rigward ta’ BNP Paribas SA. Minħabba li l-evidenza ppreżentata mill-AMF turi li l-kundizzjonijiet stabbiliti fl-Artikolu 32a(1), il-punt (b), tar-Regolament (UE) Nru 600/2014 huma ssodisfati fir-rigward taċ-ċentri tan-negozjar fir-Renju Unit, huwa xieraq li l-obbligu ta’ negozjar tad-derivattivi jiġi sospiż biss fir-rigward tar-Renju Unit.

(17)

Skont l-Artikolu 32a(4) tar-Regolament (UE) Nru 600/2014, l-att ta’ implimentazzjoni li jissospendi l-obbligu ta’ negozjar tad-derivattivi għandu jkun akkumpanjat mill-evidenza ppreżentata mill-awtoritajiet kompetenti li jitolbu s-sospensjoni. L-evidenza mogħtija mill-awtoritajiet kompetenti biex juru l-konformità mal-kundizzjonijiet stabbiliti fl-Artikolu 32a(1) tar-Regolament (UE) Nru 600/2014 tinkludi data dwar in-negozjar li tikkostitwixxi data tan-negozju proprjetarja u skambji bil-miktub li fihom data personali. Għalhekk, jeħtieġ li dik l-evidenza tiġi ppreżentata b’mod li jipproteġi lill-kontropartijiet finanzjarji minn riskji kummerċjali mhux dovuti u li jissalvagwardja d-data personali, filwaqt li tiġi żgurata wkoll il-konsistenza u tkun tista’ tiġi vvalutata l-evidenza fid-dawl tal-kundizzjonijiet stabbiliti fl-Artikolu 32a(1) ta’ dak ir-Regolament.

(18)

Sabiex il-Kummissjoni tkun tista’ tirrieżamina regolarment jekk ir-raġunijiet għas-sospensjoni tal-obbligu ta’ negozjar tad-derivattivi jibqgħux japplikaw, kull 5 snin, jenħtieġ li l-awtoritajiet kompetenti tal-kontropartijiet finanzjarji jipprovdu lill-Kummissjoni b’evidenza aġġornata dwar ir-raġunijiet għas-sospensjoni tal-obbligu ta’ negozjar tad-derivattivi.

(19)

Sabiex il-Kummissjoni tkun tista’ tivvaluta minnufih jekk jenħtieġx li s-sospensjoni tal-obbligu ta’ negozjar tad-derivattivi tiġi revokata, l-awtoritajiet kompetenti tal-kontropartijiet finanzjarji jenħtieġ li jkollhom arranġamenti superviżorji effettivi fis-seħħ biex jidentifikaw minnufih il-ksur tal-konformità mal-kundizzjonijiet stabbiliti fl-Artikolu 32a(1), il-punti (a) u (b), tar-Regolament (UE) Nru 600/2014 u jinfurmaw minnufih lill-Kummissjoni dwar dak il-ksur identifikat.

(20)

Il-miżuri previsti f’dan ir-Regolament huma f’konformità mal-opinjoni tal-Kumitat Ewropew tat-Titoli,