(1)

Ir-Regolament ta’ Implimentazzjoni tal-Kummissjoni (UE) 2025/897 (2) approva l-lista inizjali tal-portijiet li jikkonformaw mal-kundizzjonijiet għall-applikazzjoni tad-deroga mill-marġni ta’ tolleranza fl-istima tal-qabdiet għall-iżbark jew għat-trażbordi mhux magħżula tas-sajd pelaġiku żgħir, tas-sajd industrijali u tas-sajd għat-tonn tropikali bit-tartarun tal-borża. Dik il-lista ġiet emendata billi ġew miżjuda portijiet ġodda li jikkonformaw mad-dispożizzjonijiet rilevanti tal-Kapitolu II tar-Regolament ta’ Implimentazzjoni tal-Kummissjoni (UE) 2024/1474 (3), approvat bir-Regolament ta’ Implimentazzjoni tal-Kummissjoni (UE) 2025/2156 (4).

(2)

F’konformità mal-Artikolu 6 tar-Regolament ta’ Implimentazzjoni (UE) 2024/1474, Franza ressqet applikazzjoni lill-Kummissjoni biex tinkludi port li jinsab fit-territorju tar-Repubblika tas-Seychelles, b’mod partikolari l-Port ta’ Victoria f’Mahé, fil-lista tal-portijiet approvati bir-Regolament ta’ Implimentazzjoni (UE) 2025/897 għall-kwantitajiet mhux magħżula, żbarkati u trażbordati mis-sajd għat-tonn tropikali bit-tartarun tal-borża.

(3)

Abbażi tal-informazzjoni u tal-evidenza mressqa minn Franza fl-applikazzjoni tagħha u bħala segwitu ta’ valutazzjoni mwettqa mill-Kummissjoni kif imsemmi fl-Artikolu 7(1) tar-Regolament ta’ Implimentazzjoni (UE) 2024/1474, il-Kummissjoni sabet li l-kundizzjonijiet, stabbiliti fil-Kapitolu II ta’ dak ir-Regolament ta’ Implimentazzjoni sabiex il-port propost jiġi elenkat, ġew issodisfati.

(4)

Skont l-informazzjoni mressqa minn Franza, il-Port ta’ Victoria jissodisfa l-kundizzjonijiet meħtieġa skont l-Artikoli 4 u 5 tar-Regolament ta’ Implimentazzjoni (UE) 2024/1474 għall-elenkar tal-portijiet fil-pajjiżi terzi.

(5)

Is-Seychelles huma Parti Kontraenti għall-Ftehim dwar il-Miżuri tal-Istat tal-port li jimpedixxu, jiskoraġġixxu u jeliminaw is-sajd illegali, mhux rappurtat u Mhux Regolat (5) u l-Port ta’ Victoria hu port maħtur għall-attivitajiet ta’ żbark skont il-qafas ta’ żewġ organizzazzjoni ta’ ġestjoni tas-sajd reġjonali, b’mod partikolari l-Ftehim tas-Sajd fin-Nofsinhar tal-Oċean Indjan (6) u l-Kummissjoni dwar it-Tonn tal-Oċean Indjan (7) . Barra minn hekk is-Seychelles la huma pajjiż identifikat, la wieħed notifikat bil-possibbiltà li jiġi identifikat bħala pajjiż li ma jikkooperax skont il-Kapitolu VI tar-Regolament tal-Kunsill (KE) Nru 1005/2008 (8), u lanqas bħala pajjiż identifikat li jippermetti sajd mhux sostenibbli skont l-Artikolu 4(1), il-punt (a), tar-Regolament (UE) Nru 1026/2012 tal-Parlament Ewropew u tal-Kunsill (9).

(6)

Il-post għandu proċeduri stabbiliti li jiżguraw l-użin akkurat tal-qabdiet tas-sajd tat-tonn tropikali bit-tartarun tal-borża msemmi fl-Artikolu 14(4), il-punt (a) tar-Regolament (KE) Nru 1224/2009, u li jiżguraw li dan l-użin jitwettaq taħt ir-responsabbiltà ta’ piżatur indipendenti terz, skont il-kundizzjonijiet stabbiliti fl-Artikolu 5(1) u (2) tar-Regolament ta’ Implimentazzjoni (UE) 2024/1474.

(7)

Abbażi tal-informazzjoni mressqa, jenħtieġ li l-port li Franza qiegħda tipproponi li telenka, jiġi approvat u jiddaħħal fil-lista tal-portijiet imsemmija fl-Artikolu 14(6) tar-Regolament (KE) Nru 1224/2009.

(8)

Għalhekk, jenħtieġ li r-Regolament ta’ Implimentazzjoni (UE) 2025/897 jiġi emendat kif xieraq,