(1)

Skont l-Artikolu 104(1), it-tieni subparagrafu, il-punt (a), tar-Regolament (UE) 2021/2116, l-Artikolu 4(1), il-punt (b), l-Artikolu 5, l-Artikolu 7(3), l-Artikoli 9, 17, 21 u 34, l-Artikolu 35(4), l-Artikoli 36, 37, 38, 40 sa 43, 51, 52, 54, 56, 59, 63, 64, 67, 68, 70 sa 75, 77, 91 sa 97, 99 u 100, l-Artikolu 102(2) u l-Artikoli 110 u 111 tar-Regolament (UE) Nru 1306/2013 tal-Parlament Ewropew u tal-Kunsill (2) jibqgħu japplikaw, fir-rigward tal-Fond Agrikolu Ewropew għall-Iżvilupp Rurali (FAEŻR), b’rabta man-nefqa mġarrba mill-benefiċjarji u l-pagamenti li saru mill-aġenzija tal-pagamenti fil-qafas tal-implimentazzjoni tal-programmi għall-iżvilupp rurali skont ir-Regolament (UE) Nru 1305/2013 tal-Parlament Ewropew u tal-Kunsill (3) għas-sena finanzjarja 2025.

(2)

Skont l-Artikolu 64, it-tieni paragrafu, il-punt (a) tar-Regolament ta’ Implimentazzjoni tal-Kummissjoni (UE) 2022/128 (4), l-Artikolu 2, l-Artikolu 3(1), l-ewwel subparagrafu, l-Artikolu 3(2), l-Artikolu 4(1), il-punt (b), l-Artikolu 5, l-Artikolu 6, l-Artikolu 7, l-Artikoli 21 sa 25, l-Artikolu 27, l-Artikolu 28, l-Artikolu 29, l-Artikolu 30(1), il-punti (a), (b) u (c), l-Artikolu 30(2), (3) u (4), u l-Artikoli 31 sa 40 tar-Regolament ta’ Implimentazzjoni tal-Kummissjoni (UE) Nru 908/2014 (5) jibqgħu japplikaw, fir-rigward tal-FAEŻR, b’rabta man-nefqa mġarrba mill-benefiċjarji u l-pagamenti li saru mill-aġenzija tal-pagamenti fil-qafas tal-implimentazzjoni tal-programmi tal-iżvilupp rurali skont ir-Regolament (UE) Nru 1305/2013 għas-sena finanzjarja 2025.

(3)

Skont l-Artikolu 53 tar-Regolament (UE) 2021/2116 u abbażi tal-kontijiet annwali sottomessi mill-Istati Membri, li magħhom intbagħtet l-informazzjoni meħtieġa għall-approvazzjoni tal-kontijiet u opinjoni tal-awditjar dwar il-kompletezza, l-akkuratezza u l-veraċità tal-kontijiet u tar-rapporti stabbiliti mill-korpi ta’ ċertifikazzjoni, il-Kummissjoni trid tapprova l-kontijiet tal-aġenziji tal-pagamenti msemmija fl-Artikolu 9 ta’ dak ir-Regolament qabel il-31 ta’ Mejju tas-sena li tiġi wara s-sena baġitarja inkwistjoni.

(4)

F’konformità mal-Artikolu 35 tar-Regolament (UE) 2021/2116, is-sena finanzjarja tibda fis-16 ta’ Ottubru tas-sena N-1 u tispiċċa fil-15 ta’ Ottubru tas-sena N. Meta jiġu approvati l-kontijiet għas-sena finanzjarja 2025, bl-iskop li l-perjodu ta’ referenza għan-nefqa tal-FAEŻR jiġi allinjat ma’ dak tal-Fond Agrikolu Ewropew ta’ Garanzija, jenħtieġ li titqies in-nefqa mġarrba mill-Istati Membri bejn is-16 ta’ Ottubru 2024 u l-15 ta’ Ottubru 2025, f’konformità mal-Artikolu 11(1) tar-Regolament ta’ Implimentazzjoni (UE) 2022/128.

(5)

Din id-Deċiżjoni tikkonċerna l-approvazzjoni tal-kontijiet tal-aġenziji tal-pagamenti tal-Istati Membri fir-rigward tan-nefqa fi ħdan il-Pjan Strateġiku tal-PAK iffinanzjata mill-FAEŻR fil-perjodu 2023–2027 għas-sena finanzjarja 2025. In-nefqa relatata mal-aħħar sena ta’ eżekuzzjoni (mis-16 ta’ Ottubru 2024 sal-31 ta’ Diċembru 2025) tal-perjodu ta’ programmazzjoni 2014–2022 tal-FAEŻR, f’konformità mal-Artikolu 37(1) tar-Regolament (UE) Nru 1306/2013, se tkun soġġetta għal deċiżjoni ta’ approvazzjoni wara t-30 ta’ Ġunju 2026.

(6)

L-Artikolu 35(2), it-tieni subparagrafu, tar-Regolament ta’ Implimentazzjoni (UE) 2022/128 jipprevedi li l-ammonti li jistgħu jiġu rkuprati mingħand kull Stat Membru jew li jkunu pagabbli lilu, f’konformità mad-deċiżjoni dwar l-approvazzjoni tal-kontijiet imsemmija fl-Artikolu 35(1) ta’ dak ir-Regolament ta’ Implimentazzjoni, iridu jiġu stabbiliti billi l-pagamenti intermedji għas-sena finanzjarja kkonċernata jitnaqqsu min-nefqa rikonoxxuta għal dik is-sena f’konformità ma’ dak l-Artikolu 35(1). Skont l-Artikolu 35(2), it-tielet subparagrafu, ta’ dak ir-Regolament ta’ Implimentazzjoni, il-Kummissjoni trid tnaqqas dak l-ammont mill-pagament intermedju li jmiss jew iżżidu miegħu.

(7)

Il-Kummissjoni ċċekkjat l-informazzjoni li ssottomettew l-Istati Membri u kkomunikat ir-riżultati tal-iċċekkjar tagħha lill-Istati Membri, flimkien mal-emendi li qed tipproponi.

(8)

Għall-aġenziji tal-pagamenti kollha, il-kontijiet annwali u d-dokumenti mehmuża magħhom jippermettu li l-Kummissjoni tieħu deċiżjoni dwar il-kompletezza, l-akkuratezza u l-veraċità tal-kontijiet annwali sottomessi.

(9)

Ir-regoli dwar l-iskadenzi tal-pagamenti għall-miżuri taħt l-iżvilupp rurali fil-kuntest tas-sistema integrata ta’ amministrazzjoni u kontroll prevista fl-Artikolu 44(2) tar-Regolament (UE) 2021/2116 japplikaw mis-sena tat-talba 2023. It-tnaqqisiet għan-nuqqas ta’ konformità mal-aħħar skadenzi għall-pagamenti, ikkalkulati f’konformità mal-Artikolu 5 tar-Regolament Delegat tal-Kummissjoni (UE) 2022/127 (6), iżommu mal-proċedura stabbilita fl-Artikolu 39 tar-Regolament (UE) 2021/2116 u jridu jitqiesu f’din id-Deċiżjoni għas-sena finanzjarja 2025. Meta jkun xieraq, dawk it-tnaqqisiet jistgħu jiġu eżaminati bil-proċeduri għall-approvazzjoni tal-konformità skont l-Artikolu 55 tar-Regolament (UE) 2021/2116.

(10)

Skont l-Artikolu 54(2) tar-Regolament (UE) Nru 1306/2013, fir-rigward ta’ dejn li jirriżulta minn irregolaritajiet relatati man-nefqa msemmija fl-Artikolu 104(1) tar-Regolament (UE) 2021/2116, l-Istat Membru kkonċernat irid iġarrab 50 % mill-konsegwenzi finanzjarji tan-nuqqas ta’ rkupru tal-irregolaritajiet jekk l-irkupru ma jkunx sar fi żmien 4 snin mid-data tat-talba għall-irkupru jew fi żmien 8 snin f’każ li l-irkupru jitressaq fil-qrati nazzjonali. L-Artikolu 54(4) tar-Regolament (UE) Nru 1306/2013 jistipula li flimkien mal-kontijiet annwali li għandhom jissottomettu lill-Kummissjoni, skont l-Artikolu 29 tar-Regolament ta’ Implimentazzjoni (UE) Nru 908/2014, l-Istati Membri jridu jehmżu tabella ċertifikata li tirrifletti l-ammonti li jridu jiġġarrbu minnhom skont l-Artikolu 54(2) tar-Regolament (UE) Nru 1306/2013. Ir-regoli dwar l-applikazzjoni tal-obbligu tal-Istati Membri li jirrapportaw l-ammonti li jridu jiġu rkuprati huma stipulati fir-Regolament ta’ Implimentazzjoni (UE) Nru 908/2014. L-Anness II tar-Regolament ta’ Implimentazzjoni (UE) Nru 908/2014 jistabbilixxi l-mudell tat-tabella li l-Istati Membri jridu jużaw biex jipprovdu l-informazzjoni dwar l-ammonti li jridu jiġu rkuprati. Jenħtieġ li l-Kummissjoni tiddeċiedi dwar il-konsegwenzi finanzjarji tan-nuqqas ta’ rkupru tal-irregolaritajiet li jmorru lura għal iżjed minn 4 snin jew għal iżjed minn 8 snin, rispettivament, abbażi tat-tabelli li l-Istati Membri jkunu mlew.

(11)

Skont l-Artikolu 54(3) tar-Regolament (UE) Nru 1306/2013, fir-rigward ta’ djun li jirriżultaw minn irregolaritajiet relatati man-nefqa msemmija fl-Artikolu 104(1) tar-Regolament (UE) 2021/2116, għal raġunijiet debitament ġustifikati, l-Istati Membri jistgħu jiddeċiedu li ma jeħdux passi għall-irkupru. Din id-deċiżjoni tista’ tittieħed biss jekk il-kostijiet li jkunu ġġarrbu diġà, u dawk li x’aktarx ikunu se jiġġarrbu, b’kollox ikunu aktar mill-ammont li jrid jiġi rkuprat, jew jekk l-irkupru jkun impossibbli minħabba l-insolvenza, reġistrata u rikonoxxuta skont id-dritt nazzjonali, tad-debitur jew tal-persuni legalment responsabbli mill-irregolarità. Jekk id-deċiżjoni tittieħed fi żmien 4 snin mid-data tat-talba għall-irkupru, jew fi żmien 8 snin f’każ li l-irkupru jitressaq fil-qrati nazzjonali, jenħtieġ li 100 % tal-konsegwenzi finanzjarji tan-nuqqas ta’ rkupru jiġġarrbu mill-baġit tal-Unjoni. L-ammonti li dwarhom Stat Membru partikolari jkun iddeċieda li ma jiħux passi għall-irkupru u r-raġunijiet għal din id-deċiżjoni jridu jiġu inklużi fil-kontijiet annwali msemmija fl-Artikolu 54(4) ta’ dak ir-Regolament. Għalhekk, jenħtieġ li dawn l-ammonti ma jiġġarrbux mill-Istati Membri kkonċernati iżda jiġġarrbu konsegwentement mill-baġit tal-Unjoni.

(12)

Jenħtieġ li din id-Deċiżjoni tqis ukoll l-ammonti li għad iridu jiġu imposti fuq l-Istati Membri b’rabta mal-perjodi ta’ programmazzjoni 2007–2013 u 2014–2022 għall-FAEŻR, li għalihom l-Artikolu 54(2) tar-Regolament (UE) Nru 1306/2013 ikompli japplika skont l-Artikolu 104(1), it-tieni subparagrafu, il-punt (c), tar-Regolament (UE) 2021/2116.

(13)

F’konformità mal-Artikolu 53 tar-Regolament (UE) 2021/2116, jenħtieġ li din id-Deċiżjoni tkun mingħajr preġudizzju għad-deċiżjonijiet li l-Kummissjoni jaf tieħu sussegwentement skont l-Artikoli 54 u 55 ta’ dak ir-Regolament,