(1)

It-tetraborat tad-dissodju ġie inkluż fl-Anness I tad-Direttiva 98/8/KE tal-Parlament Ewropew u tal-Kunsill (2) bħala sustanza attiva għall-użu fil-prodotti bijoċidali tat-tip ta’ prodott 8. Skont l-Artikolu 86 tar-Regolament (UE) Nru 528/2012, ġie għalhekk ikkunsidrat bħala approvat skont dak ir-Regolament sal-31 ta’ Awwissu 2021 soġġett għall-kundizzjonijiet stabbiliti fl-Anness I tad-Direttiva 98/8/KE.

(2)

Fit-28 ta’ Frar 2020, tressqet applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni tat-tetraborat tad-dissodju għall-użu fil-prodotti bijoċidali tat-tip ta’ prodott 8 (“l-applikazzjoni”).

(3)

Fit-2 ta’ Lulju 2020, l-awtorità kompetenti tal-evalwazzjoni tan-Netherlands infurmat lill-Kummissjoni li kienet iddeċidiet, skont l-Artikolu 14(1) tar-Regolament (UE) Nru 528/2012, li evalwazzjoni sħiħa tal-applikazzjoni kienet meħtieġa. Skont l-Artikolu 8(1) ta’ dak ir-Regolament, l-awtorità kompetenti li tevalwa trid twettaq evalwazzjoni sħiħa tal-applikazzjoni fi żmien 365 jum mill-validazzjoni tagħha.

(4)

L-awtorità kompetenti li tevalwa tista’, kif xieraq, teżiġi li l-applikant jipprovdi biżżejjed data biex titwettaq l-evalwazzjoni, f’konformità mal-Artikolu 8(2) tar-Regolament (UE) Nru 528/2012. F’dak il-każ, il-perjodu ta’ 365 jum jiġi sospiż għal perjodu li ma jistax jaqbeż il-180 jum b’kollox, sakemm ma tkunx iġġustifikata sospensjoni itwal minħabba n-natura tad-data rikjesta jew minħabba ċirkostanzi eċċezzjonali.

(5)

Fi żmien 270 jum minn meta tirċievi rakkomandazzjoni mill-awtorità kompetenti li tevalwa, l-Aġenzija Ewropea għas-Sustanzi Kimiċi (“l-Aġenzija”) trid tħejji opinjoni dwar it-tiġdid tal-approvazzjoni tas-sustanza attiva u tippreżentaha lill-Kummissjoni f’konformità mal-Artikolu 14(3) tar-Regolament (UE) Nru 528/2012.

(6)

Id-Deċiżjoni ta’ Implimentazzjoni tal-Kummissjoni (UE) 2021/1290 (3) pposponiet id-data tal-iskadenza tal-approvazzjoni tat-tetraborat tad-dissodju għall-użu fil-prodotti bijoċidali tat-tip ta’ prodott 8 għat-28 ta’ Frar 2024 sabiex ikun hemm biżżejjed żmien għall-eżami tal-applikazzjoni.

(7)

Id-Deċiżjoni ta’ Implimentazzjoni tal-Kummissjoni (UE) 2024/208 (4) reġgħet ipposponiet id-data tal-iskadenza tal-approvazzjoni sal-31 ta’ Awwissu 2026, minħabba dewmien fl-evalwazzjoni tal-applikazzjoni.

(8)

Fit-13 ta’ Frar 2026, l-awtorità kompetenti tal-evalwazzjoni infurmat lill-Kummissjoni li l-evalwazzjoni ddewmet għal raġunijiet lil hinn mill-kontroll tal-applikant, marbuta mal-valutazzjoni tad-data relatata mal-effikaċja, il-proprjetajiet analitiċi u fiżikokimiċi, l-eżitu fl-ambjenta, u l-valutazzjoni tal-kriterji tal-interferenti endokrinali għas-sustanza. Mill-informazzjoni pprovduta mill-awtorità kompetenti li tevalwa, il-Kummissjoni fehmet li x’aktarx dik l-awtorità ma tippreżentax rakkomandazzjoni lill-Aġenzija qabel nofs l-2027.

(9)

Għaldaqstant, għal raġunijiet lil hinn mill-kontroll tal-applikant, l-approvazzjoni aktarx tiskadi qabel ma tkun ittieħdet deċiżjoni dwar it-tiġdid tagħha. Għalhekk, jixraq li d-data tal-iskadenza tal-approvazzjoni tiġi posposta ulterjorment għal perjodu ta’ żmien biżżejjed biex tkun tista’ tiġi eżaminata l-applikazzjoni. Wara li tqies iż-żmien meħtieġ għall-evalwazzjonijiet mill-awtorità kompetenti tal-evalwazzjoni, u għat-tħejjija u għas-sottomissjoni mill-Aġenzija tal-opinjoni tagħha u biex il-Kummissjoni tiddeċiedi jekk iġġeddidx l-approvazzjoni tat-tetraborat tad-dissodju għall-użu fil-prodotti bijoċidali tat-tip ta’ prodott 8, jenħtieġ li d-data tal-iskadenza tiġi posposta għat-28 ta’ Frar 2029.

(10)

Wara l-posponiment ulterjuri tad-data tal-iskadenza tal-approvazzjoni, it-tetraborat tad-dissodju jibqa’ approvat għall-użu fil-prodotti bijoċidali tat-tip ta’ prodott 8 soġġett għall-kundizzjonijiet stabbiliti fl-Anness I tad-Direttiva 98/8/KE,