(1)

Bejn il-21 ta’ Marzu 2025 u l-4 ta’ April 2025, is-Slovakkja kkonfermat u nnotifikat sitt tifqigħat tal-marda tal-ilsien u d-dwiefer. L-ispeċijiet affettwati kienu l-ifrat.

(2)

Is-Slovakkja ħadet minnufih, u b’mod effiċjenti, kull miżura tas-saħħa tal-annimali u kull miżura veterinarja meħtieġa skont ir-Regolament (UE) 2016/429 tal-Parlament Ewropew u tal-Kunsill (2) u r-Regolament Delegat tal-Kummissjoni (UE) 2020/687 (3).

(3)

Bil-ħsieb li jiġi evitat it-tixrid tal-marda tal-ilsien u d-dwiefer, fil-21 ta’ Marzu 2025 is-Slovakkja ħarġet miżura straordinarja ta’ emerġenza (4) li tipprojbixxi, fit-territorju tagħha, kwalunkwe moviment ta’ frat, ta’ nagħaġ, ta’ mogħoż, ta’ ħnieżer u ta’ annimali oħra bid-dwiefer mifruqa, inkluż l-annimali tar-razzett.

(4)

Barra minn hekk, is-Slovakkja ħadet miżuri ta’ kontroll, ta’ monitoraġġ u ta’ prevenzjoni u stabbiliet żoni ta’ protezzjoni u ta’ sorveljanza (“iż-żoni regolati”) skont id-Deċiżjonijiet ta’ Implimentazzjoni tal-Kummissjoni (UE) 2025/496 (5), (UE) 2025/613 (6), (UE) 2025/654 (7), (UE) 2025/672 (8), (UE) 2025/696 (9), (UE) 2025/795 (10), (UE) 2025/827 (11) u (UE) 2025/1097 (12).

(5)

Is-Slovakkja għarrfet lill-Kummissjoni li l-miżuri tas-saħħa u l-miżuri veterinarji meħtieġa, li kienu ġew applikati biex jitrażżan u jinqered it-tixrid tal-marda, kienu laqtu għadd ta’ operaturi u li dawk l-operaturi kienu ġarrbu telf ta’ introjtu li ma kienx eliġibbli għall-kontribuzzjoni finanzjarja tal-Unjoni skont ir-Regolament (UE) 2021/690 tal-Parlament Ewropew u tal-Kunsill (13).

(6)

Fis-26 ta’ Awwissu 2025, il-Kummissjoni rċeviet talba formali mingħand is-Slovakkja għall-finanzjament parzjali ta’ ċerti miżuri eċċezzjonali skont l-Artikolu 220(3) tar-Regolament (UE) Nru 1308/2013 għat-tifqigħat ikkonfermati bejn il-21 ta’ Marzu 2025 u l-4 ta’ April 2025.

(7)

L-implimentazzjoni tal-miżuri tas-saħħa tal-annimali u tal-miżuri veterinarji msemmija fil-premessi 3 u 4 wasslet għat-telf ta’ ħalib mhux ipproċessat prodott li ma setax jiġi kkonsenjat minħabba restrizzjonijiet fuq il-moviment u għal żieda fil-kostijiet minħabba perjodi itwal ta’ trobbija u ta’ tismin tal-ħnieżer, tal-ħnienes u tal-majjali nisa.

(8)

Skont l-Artikolu 220(5) tar-Regolament (UE) Nru 1308/2013, il-finanzjament parzjali tal-Unjoni jenħtieġ li jkun ekwivalenti għal 60 % tan-nefqa mġarrba mis-Slovakkja għall-miżuri eċċezzjonali rilevanti ta’ appoġġ għas-suq. Jenħtieġ li l-kwantitajiet massimi ta’ ħalib mhux ipproċessat u l-għadd massimu ta’ annimali eliġibbli għall-finanzjament fil-qafas ta’ kull miżura eċċezzjonali ta’ appoġġ għas-suq jiġu stabbiliti mill-Kummissjoni wara li din tiskrutinizza t-talba li rċeviet mingħand is-Slovakkja rigward ir-restrizzjonijiet relatati mat-tifqigħat.

(9)

Sabiex jiġi evitat kull riskju ta’ kumpens żejjed, jenħtieġ li l-ammonti massimi u l-ammont b’rata fissa tal-finanzjament parzjali tal-Unjoni jkunu bbażati fuq studji tekniċi u ekonomiċi jew fuq dokumenti tal-kontabbiltà u jiġu ffissati f’livell xieraq għal kull annimal u għal kull kilogramma ta’ ħalib mhux ipproċessat.

(10)

Sabiex jiġi evitat kull riskju ta’ finanzjament doppju, jenħtieġ li t-telf li jiġġarrab mill-benefiċjarji ma jiġix ikkumpensat b’għajnuna mill-Istat jew b’assigurazzjoni, u jenħtieġ li l-finanzjament parzjali tal-Unjoni skont dan ir-Regolament ikun limitat għall-annimali u l-prodotti eliġibbli li għalihom ma tkun inkisbet l-ebda kontribuzzjoni finanzjarja tal-Unjoni skont ir-Regolament (UE) 2021/690.

(11)

Jenħtieġ li l-livell u d-durata tal-miżuri eċċezzjonali ta’ appoġġ għas-suq previsti f’dan ir-Regolament ikunu limitati għal dak li huwa strettament meħtieġ biex is-suq jingħata appoġġ. B’mod partikolari, jenħtieġ li l-miżuri eċċezzjonali ta’ appoġġ għas-suq japplikaw biss għall-produzzjoni tal-ħalib mhux ipproċessat u l-laħam tal-majjal fl-azjendi li jinsabu fiż-żoni regolati u għad-durata tal-miżuri tas-saħħa tal-annimali u tal-miżuri veterinarji stabbiliti fil-leġiżlazzjoni tal-Unjoni u fil-leġiżlazzjoni Slovakka li huma rilevanti għat-tifqigħat.

(12)

Sabiex tkun żgurata l-flessibbiltà f’każ li l-għadd ta’ annimali eliġibbli għall-kumpens ikun differenti mill-għadd massimu stabbilit f’dan ir-Regolament, li huwa bbażat fuq stimi, il-kumpens jista’ jiġi aġġustat sa ċerti limiti, dment li jitħares l-ammont massimu tan-nefqa parzjalment iffinanzjata mill-Unjoni.

(13)

Sabiex tiġi żgurata l-effettività ta’ din il-miżura eċċezzjonali, jenħtieġ li l-benefiċjarji jirċievu malajr l-appoġġ finanzjarju ta’ emerġenza. Barra minn hekk, jenħtieġ li jiġu żgurati monitoraġġ f’waqtu tal-baġit kif ukoll segwitu aġġornat u użu effiċjenti tar-riżerva għall-agrikoltura, u b’hekk tiġi massimizzata d-disponibbiltà tagħha u tissaħħaħ il-ħila ta’ rispons fil-pront għall-kriżijiet emerġenti. Għalhekk, jixraq li jiġi definit perjodu ta’ eliġibbiltà biex l-Istati Membri jħallsu dan l-appoġġ lill-benefiċjarji. Kwalunkwe pagament li jsir wara data tat-tmiem speċifika jenħtieġ li jitqies ineliġibbli għall-finanzjament tal-Unjoni.

(14)

Għalhekk, jenħtieġ li l-Unjoni tiffinanzja n-nefqa mġarrba mis-Slovakkja skont din il-miżura eċċezzjonali biss meta tali nefqa ssir sa ċerta data tat-tmiem tal-eliġibbiltà. Għalhekk, jenħtieġ li l-appoġġ għal din il-miżura eċċezzjonali jitħallas sal-31 ta’ Ottubru 2026.

(15)

Peress li l-pagamenti li jsiru wara l-31 ta’ Ottubru 2026 ma jridu jitqiesu eliġibbli fl-ebda ċirkostanza, l-Artikolu 5(2) tar-Regolament Delegat tal-Kummissjoni (UE) 2022/127 (14), li jipprevedi tnaqqis proporzjonali tal-pagamenti ta’ kull xahar li jsiru wara l-iskadenza, jenħtieġ li ma japplikax.

(16)

Sabiex jiġu żgurati l-eliġibbiltà u l-korrettezza tal-pagamenti, jenħtieġ li s-Slovakkja twettaq verifiki ex ante.

(17)

Sabiex jiġi żgurat li s-Slovakkja timplimenta l-miżuri stabbiliti f’dan ir-Regolament immedjatament, jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(18)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,