ANNESS

PARTI 1

L-Annessi VIII, X, XI u XIV tar-Regolament Delegat (UE) 2023/361 huma emendati kif ġej:

Fl-Anness VIII, il-Parti 1, il-punt (1) huwa sostitwit bit-test li ġej:

“1.	Daqs taż-żona tat-tilqim: raġġ ta’ mill-inqas 50 km madwar l-istabbilimenti affettwati jew tilqim f’ċirku bejn 20 u 50 km.”

2.	Fl-Anness VIII, il-Parti 3(3), l-ewwel żewġ sentenzi huma sostitwiti b’dan li ġej: “Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3) u l-Artikolu 13(4). Movimenti tal-annimali u tal-prodotti tagħhom li jistgħu jiġu awtorizzati:”

3.	Fl-Anness VIII, il-Parti 4, il-kelma “rkupru” hija sostitwita bil-kelma “stennija”;

Fl-Anness X, il-Parti 1, il-punt (4) huwa sostitwit b’dan li ġej:

“4.	Kopertura minima: Il-kopertura tal-vaċċin trid tkun mill-inqas 95 % tal-istabbilimenti fiż-żona tat-tilqim li jirrappreżentaw mill-inqas 80 % tal-annimali fil-mira fiż-żona tat-tilqim.”

Fl-Anness X, il-Parti 3 hija sostitwita b’dan li ġej:

“PARTI 3

KUNDIZZJONIJIET SPEĊIFIĊI GĦALL-PROJBIZZJONI TAL-MOVIMENTI TAL-ANNIMALI U TAL-PRODOTTI U GĦALL-GĦOTI TA’ DEROGA F’KONFORMITÀ MAL-ARTIKOLU 13, F’ŻONA TAT-TILQIM FEJN ISIR TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-PPR

Annimali u prodotti tagħhom soġġetti għall-projbizzjoni tal-movimenti

L-istess annimali u prodotti, li jinsabu fiż-żoni tat-tilqim, bħal dawk soġġetti għal restrizzjonijiet fi stabbilimenti li jinsabu fiż-żoni ta’ protezzjoni u ta’ sorveljanza stabbiliti fil-każ ta’ tifqigħa tal-PPR prevista fl-Artikolu 27 tar-Regolament Delegat (UE) 2020/687 u bl-istess restrizzjonijiet.

Prodotti ġerminali soġġetti għall-projbizzjoni tal-ġbir: semen, ooċiti u embrijuni minn annimali tal-ispeċijiet elenkati.

Il-kundizzjonijiet għall-għoti ta’ deroga f’konformità mal-Artikolu 13(2) il-punt (b), l-Artikolu 13(3) u l-Artikolu 13(4). Movimenti tal-annimali u tal-prodotti tagħhom li jistgħu jiġu awtorizzati:

3.1.

Movimenti tal-annimali mlaqqmin u tal-prodotti tagħhom minn stabbilimenti li jinsabu fiż-żona tat-tilqim, bl-istess kundizzjonijiet ġenerali bħal dawk previsti fl-Artikolu 43 tar-Regolament Delegat (UE) 2020/687, u biss fil-każijiet koperti minn u bl-istess kundizzjonijiet speċifiċi bħal dawk previsti fl-Artikoli 44, 45, 48, 49, 51 u 53 ta’ dak ir-Regolament fir-rigward taż-żona ta’ sorveljanza.

3.2.

Movimenti tal-annimali mlaqqmin u tal-prodotti tagħhom minn stabbilimenti li jinsabu fiż-żona tat-tilqim, dment li dawk l-istabbilimenti ma jibqgħux iżommu annimali mlaqqmin.

3.3.

Movimenti tal-annimali mlaqqmin u tal-prodotti tagħhom minn stabbilimenti li jinsabu fiż-żona tat-tilqim wara li jkunu għaddew sentejn mill-waqfien tat-tilqim.”

Fl-Anness X, il-Parti 4 hija sostitwita b’dan li ġej:

“PARTI 4

PERJODI TA’ STENNIJA GĦALL-PPR WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-Parti 3 sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-PPR matul il-perjodu ta’ stennija
6 xhur wara l-iskarnar jew il-qtil tal-annimali mlaqqmin kollha	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi), f’konformità mal-Artikolu 9(1), il-punt (c)(ii) sa (iv)
24 xahar wara l-aħħar tilqim	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi), f’konformità mal-Artikolu 9(1), il-punt (c)(ii) sa (iv)”

Fl-Anness XI, il-Parti 3 hija sostitwita b’dan li ġej:

“PARTI 3

Annimali u prodotti tagħhom soġġetti għall-projbizzjoni tal-movimenti

Annimali ekwini u l-prodotti ġerminali tagħhom.

Prodotti ġerminali soġġetti għall-projbizzjoni tal-ġbir: xejn.

3.1.

Movimenti tal-annimali ekwini mlaqqmin mill-istabbiliment fejn ikunu nżammu fiż-żmien meta sar it-tilqim, dment li:

(a)	ikunu tlaqqmu aktar minn 40 jum qabel il-moviment;

(b)	ikunu għaddew minn kontroll tal-identità u eżami kliniku minn qabel kif imsemmi fl-Artikolu 91(1), il-punt (a), tar-Regolament Delegat (UE) 2020/688;

(c)	ma jkunu wera l-ebda sintomu kliniku tal-AHS fil-jum tal-eżami kliniku;

(d)	jiġu identifikati permezz ta’ transponder u jinżamm rekord tat-tilqim kontra l-AHS fid-dokument permanenti uniku tagħhom u fil-bażi tad-data tal-kompjuter imsemmija fl-Artikolu 109(1), il-punt (d), tar-Regolament (UE) 2016/429;

(e)

(i)	jinżammu fi stabbiliment protett mill-vettur kif definit fl-Artikolu 2(18) tar-Regolament Delegat (UE) 2020/689 għal perjodu ta’ mill-inqas 14-il jum qabel il-moviment u jkunu soġġetti għal test ta’ identifikazzjoni tal-aġenti għall-AHS, fi tmiem dan il-perjodu, b’riżultat favorevoli, jew

(ii)	jinżammu fi stabbiliment protett mill-vettur għal mill-inqas 40 jum qabel il-moviment;

(f)	ikunu protetti mill-attakk ta’ vetturi.”

Fl-Anness XI, il-Parti 4 hija sostitwita b’dan li ġej:

“PARTI 4

PERJODI TA’ STENNIJA GĦALL-AHS WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-Parti 3 sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-AHS matul il-perjodu ta’ stennija
12-il xahar mill-aħħar annimal li tlaqqam u sentejn mill-aħħar tifqigħa	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi fil-każ ta’ użu ta’ vaċċinazjoni DIVA), f’konformità mal-Artikolu 9(1), il-punt (c)(ii) sa (iv)”

Fl-Anness XIV, il-Parti 3, il-punt 3 huwa sostitwit b’dan li ġej:

“3.

Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3) u l-Artikolu 13(4). Movimenti tal-annimali u tal-prodotti tagħhom li jistgħu jiġu awtorizzati:

Movimenti tal-pollam jew tal-għasafar miżmuma fil-magħluq imlaqqmin u l-prodotti tagħhom fiż-żona tat-tilqim u barra minnha, biss fil-każijiet koperti mill-Artikoli 28, 29, 30, 31, 33, 34 u 37 tar-Regolament Delegat (UE) 2020/687 u bl-istess kundizzjonijiet ġenerali u speċifiċi bħal dawk previsti fihom.”

10.

Fl-Anness XIV, il-Parti 4 hija sostitwita b’dan li ġej:

“PARTI 4

PERJODI TA’ STENNIJA GĦALL-NCD WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-Parti 3 sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-NCD matul il-perjodu ta’ stennija
3 xhur wara t-tlestija tat-tilqim protettiv ta’ emerġenza jew fiż-żmien tat-tneħħija f’konformità mal-Artikolu 55 tar-Regolament Delegat 2020/687, taż-żoni ristretti stabbiliti f’konformità mal-Artikolu 21 ta’ dak ir-Regolament Delegat, skont liema seħħ l-aħħar.	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi), f’konformità mal-Artikolu 9(1), il-punt (c)(ii) sa (iv)”

PARTI 2

L-Annessi VII, IX, XII u XIII tar-Regolament Delegat (UE) 2023/361 huma emendati kif ġej:

L-Anness VII huwa sostitwit b’dan li ġej:

“

ANNESS VII

Il-marda tal-ilsien u d-dwiefer (FMD, foot and mouth disease)

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-FMD

Tip ta’ vaċċin li għandu jintuża: Vaċċini inattivati; vaċċini ħajjin attenwati ma għandhomx jintużaw.

Daqs taż-żona tat-tilqim u taż-żona tal-peritilqim:

2.1.

Żona tat-tilqim: l-ebda regola speċifika.

2.2.

Żona tal-peritilqim: Iż-żona tal-peritilqim għandha tkun ta’ wisa’ ta’ mill-inqas 10 km mill-perimetri taż-żona tat-tilqim.

Kopertura minima: Għandha tiġi adattata skont ir-razza fiċ-ċirkolazzjon, l-effettività tal-bijosigurtà fl-istabbilimenti u d-densità tal-annimali, fiż-żona tat-tilqim. Bħala linja bażi, il-kopertura tal-vaċċin għandha timmira għal mill-inqas 80 % tal-istabbilimenti fiż-żona tat-tilqim u għal 80 % tal-annimali fil-mira għal kull speċi miżmuma f’kull wieħed minn dawk l-istabbilimenti magħżula għall-applikazzjoni tat-tilqim.

Annimali/speċijiet fil-mira: L-ispeċijiet elenkati f’konformità mar-Regolament ta’ Implimentazzjoni (UE) 2018/1882.

PARTI 2

KUNDIZZJONIJIET SPEĊIFIĊI GĦAS-SORVELJANZA KLINIKA U TAL-LABORATORJU MSAĦĦA LI GĦANDHOM JIĠU IMPLIMENTATI FIŻ-ŻONI TAT-TILQIM U TAL-PERITILQIM MATUL IT-TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-FMD

Sorveljanza klinika u tal-laboratorju msaħħa għandha tiġi implimentata fiż-żona tat-tilqim, li tibda mhux aktar kmieni minn 30 jum wara t-tlestija tat-tilqim protettiv ta’ emerġenza. Din is-sorveljanza għandha tinkludi:

eżami kliniku ta’ wieħed mit-tipi li ġejjin:

(a)	eżami kliniku tal-annimali kollha tal-ispeċijiet elenkati miżmuma fl-istabbilimenti kollha fiż-żona tat-tilqim;

(b)	eżami kliniku mmirat lejn speċijiet partikolari li x’aktarx juru sinjali kliniċi ċari, jekk l-awtorità kompetenti tiddeċiedi dan, abbażi tal-eżitu pożittiv ta’ valutazzjoni tar-riskju;

eżami fil-laboratorju kif ġej:

(a)

testijiet tal-antikorpi kontra proteini mhux strutturali tal-virus tal-FMD imwettqa fuq kampjuni meħuda minn annimali mlaqqmin tal-ispeċijiet elenkati u l-wild mhux imlaqqam tagħhom fl-istabbilimenti kollha fiż-żona tat-tilqim li fiha jkun sar it-tilqim; id-daqs tal-kampjun għandu jiġi kkalkulat għad-detezzjoni ta’ prevalenza tal-annimali fl-istabbiliment ta’ 5 % jew inqas, b’livell ta’ fiduċja ta’ 95 %, kemm fl-annimali mlaqqmin kif ukoll f’dawk mhux imlaqqmin;

(b)	testijiet, jew b’assaġġ għall-antikorpi kontra proteini mhux strutturali tal-virus tal-FMD, jew b’metodu approvat ieħor, imwettqa fuq kampjuni miġbura f’konformità mal-Anness I tar-Regolament Delegat (UE) 2020/687 mill-istabbilimenti kollha fiż-żona tat-tilqim li fiha ma jkunx sar it-tilqim;

(c)	meta l-annimali introdotti fl-istabbilimenti affettwati bħala parti mir-ripopolament tagħhom jintużaw bħala annimali sentinella, għandhom jitqiesu l-kundizzjonijiet għar-ripopolament tal-istabbilimenti affettwati previsti fir-Regolament Delegat (UE) 2020/687.

PARTI 3

KUNDIZZJONIJIET SPEĊIFIĊI GĦALL-PROJBIZZJONI TAL-MOVIMENTI TAL-ANNIMALI U TAL-PRODOTTI U GĦALL-GĦOTI TA’ DEROGA F’KONFORMITÀ MAL-ARTIKOLU 13, F’ŻONI TAT-TILQIM FEJN ISIR TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-FMD

Annimali u prodotti tagħhom soġġetti għall-projbizzjoni tal-movimenti

(a)	annimali tal-ispeċijiet elenkati minn stabbilimenti li jinsabu fiż-żona tat-tilqim;

(b)	laħam frisk, ħalib mhux ipproċessat u kolostru miksuba minn annimali mlaqqmin;

(c)	prodotti tal-ħalib u prodotti bbażati fuq il-kolostru prodotti mill-ħalib u mill-kolostru miksuba minn annimali mlaqqmin;

Prodotti ġerminali soġġetti għall-projbizzjoni tal-ġbir: semen għall-inseminazzjoni artifiċjali minn annimali donaturi tal-ispeċijiet elenkati miżmuma fi stabbilimenti approvati tal-prodotti ġerminali li jinsabu fiż-żona tat-tilqim.

Il-kundizzjonijiet għall-għoti ta’ deroga f’konformità mal-Artikolu 13(2),il-punt (b), l-Artikolu 13(3) u l-Artikolu 13(4)

3.1.

Mill-bidu tat-tilqim protettiv ta’ emerġenza sakemm ikunu għaddew mill-inqas 30 jum wara li jitlesta, dawn li ġejjin jistgħu jiġu awtorizzati:

(a)

movimenti għall-iskarnar ta’ annimali miżmuma tal-ispeċijiet elenkati minn stabbilimenti li jinsabu fiż-żona tat-tilqim lejn biċċerija li tinsab fiż-żona tat-tilqim jew kemm jista’ jkun qribha, fl-istess Stat Membru, bl-istess kundizzjonijiet bħal dawk stabbiliti fl-Artikolu 24, l-Artikolu 28(2), (3), (4), (5) u (7) u l-Artikolu 29(1) u (2) tar-Regolament Delegat (UE) 2020/687;

(b)	Movimenti tal-laħam frisk u tal-ħalib mhux ipproċessat miksuba minn annimali mlaqqmin bl-istess kundizzjonijiet bħal dawk previsti fl-Artikolu 24, l-Artikolu 28(2), (3), (4), (6) u (7) u l-Artikolu 33(1), il-punt (a), u l-Artikolu 33(2) tar-Regolament Delegat (UE) 2020/687;

(c)

Movimenti tal-prodotti tal-ħalib prodotti mill-ħalib miksuba minn annimali mlaqqmin jekk ikunu għaddew minn trattament effettiv għall-FMD f’konformità mal-Anness VII tar-Regolament Delegat (UE) 2020/687 u biss jekk matul il-proċess tal-produzzjoni, tal-ħżin u tat-trasport ikunu ġew separati minn prodotti mhux eliġibbli għad-dispaċċ barra miż-żona tat-tilqim skont dan ir-Regolament;

(d)

il-ġbir tas-semen għall-inseminazzjoni artifiċjali minn annimali donaturi tal-ispeċijiet elenkati miżmuma fi stabbilimenti approvati tal-prodotti ġerminali li jinsabu fiż-żona tat-tilqim għall-produzzjoni ta’ semen iffriżat, bil-kundizzjonijiet li ġejjin:

(i)	jiġi żgurat li s-semen miġbur matul dan il-perjodu jinħażen separatament għal mill-inqas 30 jum;

(ii)

qabel ma jintbagħat is-semen, jew:

—	l-annimal donatur ma jkunx tlaqqam u jiġu ssodisfati l-istess kundizzjonijiet bħal dawk stabbiliti fl-Artikolu 32, il-punti (b) u (c), tar-Regolament Delegat (UE) 2020/687; jew

—	l-annimal donatur ikun tlaqqam wara riżultat negattiv għal eżami fil-laboratorju għad-detezzjoni ta’ antikorpi kontra l-virus tal-FMD mwettaq qabel it-tilqim; kif ukoll

—

ikun inkiseb riżultat negattiv f’eżami fil-laboratorju għad-detezzjoni ta’ virus jew ġenoma virali, jew f’test approvat għad-detezzjoni ta’ antikorpi kontra proteini mhux strutturali tal-virus tal-FMD, imwettaq fi tmiem il-perjodu ta’ kwarantina għas-semen fuq kampjuni meħuda mill-annimali kollha tal-ispeċijiet elenkati preżenti f’dak iż-żmien fl-istabbiliment approvat tal-prodott ġerminali; kif ukoll

—	is-semen jikkonforma mal-kundizzjonijiet stabbiliti fil-Parti 5, il-Kapitolu I, il-punt 3, tal-Anness II tar-Regolament Delegat (UE) 2020/686.

3.2.

Matul il-perjodu li jibda mhux aktar kmieni minn 30 jum wara t-tlestija tat-tilqim protettiv ta’ emerġenza sakemm titlesta s-sorveljanza speċifika prevista fil-Parti 2 ta’ dan l-Anness, dawn li ġejjin jistgħu jiġu awtorizzati:

(a)

movimenti għall-iskarnar ta’ annimali miżmuma tal-ispeċijiet elenkati miżmuma fiż-żona tat-tilqim lejn biċċerija li tinsab fiż-żona tat-tilqim jew barra minnha iżda fl-istess Stat Membru, bl-istess kundizzjonijiet bħal dawk previsti fl-Artikolu 24 u l-Artikolu 28(5) tar-Regolament Delegat (UE) 2020/687;

(b)

Movimenti tal-laħam frisk, minbarra l-ġewwieni, miksuba minn ungulati mlaqqmin tal-ispeċijiet elenkati, minbarra annimali porċini, jekk il-laħam frisk:

—	jikkonforma mal-istess kundizzjonijiet bħal dawk stabbiliti fl-Artikolu 28(6) tar-Regolament Delegat (UE) 2020/687;

—	ikun ġie dissussat u jkunu tneħħew il-limfonodi aċċessibbli ewlenin;

—	ikun, jew ikun inkiseb minn, karkassi li jkunu ġew soġġetti għal proċess ta’ maturazzjoni f’temperatura ta’ aktar minn 2 °C għal mill-inqas 24 siegħa u l-valur pH irreġistrat fin-nofs tal-muskolu Longissimus dorsi kien ta’ inqas minn 6,0;

(c)	Movimenti tal-laħam frisk miksub minn ungulati tal-ispeċijiet elenkati, minbarra annimali porċini, miżmuma u skarnati barra miż-żona tat-tilqim;

(d)

Movimenti tal-laħam frisk, minbarra l-ġewwieni, miksuba minn annimali porċini mlaqqmin skarnati f’dan il-perjodu, jekk il-laħam frisk ikun ġie prodott bil-kundizzjonijiet previsti fl-Artikolu 24, l-Artikolu 28(2), (3), (4), (6) u (7) u l-Artikolu 33(1), il-punt (a), u l-Artikolu 33(2) tar-Regolament Delegat (UE) 2020/687;

(e)	Movimenti tal-ħalib mhux ipproċessat miksub minn annimali mlaqqmin bl-istess kundizzjonijiet bħal dawk previsti fl-Artikolu 24, l-Artikolu 28(2), (3), (4), (6) u (7) u l-Artikolu 33(1), il-punt (a), u l-Artikolu 33(2), il-punt (b), tar-Regolament Delegat (UE) 2020/687;

(f)

Movimenti tal-prodotti tal-ħalib miksuba minn annimali mlaqqmin jekk dawk il-prodotti tal-ħalib ikunu għaddew minn trattament effettiv kontra l-FMD f’konformità mal-Anness VII tar-Regolament Delegat (UE) 2020/687 u biss jekk matul il-proċess tal-produzzjoni, tal-ħżin u tat-trasport ikunu ġew separati minn prodotti mhux eliġibbli għad-dispaċċ barra miż-żona tat-tilqim skont dan ir-Regolament.

(g)	il-ġbir tas-semen għall-inseminazzjoni artifiċjali minn annimali donaturi tal-ispeċijiet elenkati miżmuma fi stabbilimenti approvati tal-prodotti ġerminali li jinsabu fiż-żona tat-tilqim bil-kundizzjonijiet stabbiliti fil-punt 3.1, is-subpunt (d).

3.3.

Wara t-tlestija tas-sorveljanza speċifika prevista fil-Parti 2 ta’ dan l-Anness, jistgħu jiġu awtorizzati dawn li ġejjin:

(a)	movimenti għall-iskarnar ta’ annimali tal-ispeċijiet elenkati miżmuma fiż-żona tat-tilqim lejn biċċerija li tinsab fiż-żona tat-tilqim jew barra minnha, iżda fl-istess Stat Membru, bl-istess kundizzjonijiet bħal dawk stabbiliti fl-Artikolu 24 u l-Artikolu 28(5) tar-Regolament Delegat (UE) 2020/687;

(b)

Movimenti tal-annimali mhux imlaqqmin tal-ispeċijiet elenkati, fiż-żona tat-tilqim jew barra minnha, iżda fl-istess Stat Membru, f’konformità mad-dispożizzjonijiet li ġejjin:

(i)	fi żmien 24 siegħa qabel it-tagħbija, l-annimali kollha tal-ispeċijiet elenkati fl-istabbiliment ikunu ġew soġġetti għal eżami kliniku u ma jkunux urew sinjali kliniċi tal-FMD,

(ii)	l-annimali baqgħu barra mill-istabbiliment tal-oriġini ta’ mill-inqas 30 jum li matulhom l-ebda annimal tal-ispeċijiet elenkati ma ġie introdott fl-istabbiliment,

(iii)

l-annimali maħsuba għall-moviment kienu jew soġġetti individwalment, b’riżultati negattivi, għal testijiet għad-detezzjoni ta’ antikorpi kontra l-virus tal-FMD fi tmiem il-perjodu ta’ 30 jum previst f’(ii), jew inkella tlesta stħarriġ seroepidemjoloġiku tal-popolazzjoni fuq dak l-istabbiliment irrispettivament mill-ispeċijiet ikkonċernati;

(iv)	l-annimali ma jridux ikunu esposti għal xi sors ta’ infezzjoni matul it-trasportazzjoni tagħhom mill-istabbiliment tal-oriġini għall-post tad-destinazzjoni.

(c)

Movimenti tal-għoġġiela mhux imlaqqmin, wild ta’ baqar imlaqqmin lejn:

(i)	stabbiliment fiż-żona tat-tilqim tal-istess stat ta’ saħħa bħall-istabbiliment tal-oriġini;

(ii)	biċċerija għall-iskarnar immedjat;

(iii)

stabbiliment iddeżinjat mill-awtorità kompetenti, li minnu l-wild għandu jintbagħat direttament għall-biċċerija;

(iv)	kwalunkwe stabbiliment, wara li jkun ġie soġġett, b’riżultat negattiv, għal test għad-detezzjoni ta’ antikorpi kontra l-virus tal-FMD, imwettaq fuq kampjun ta’ demm li jkun ittieħed qabel id-dispaċċ mill-istabbiliment tal-oriġini.

(d)	Movimenti tal-laħam frisk, prodotti tal-laħam, ħalib mhux ipproċessat, prodotti tal-ħalib f’konformità mal-punt 3.2, il-punti (b) sa (f);

(e)	ġbir tas-semen f’konformità mal-punt 3.1, il-punt (d).

PARTI 4

PERJODU TA’ STENNIJA GĦALL-FMD WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-Parti 3 sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-FMD matul il-perjodu ta’ stennija
3 xhur wara li l-aħħar annimal imlaqqam fiż-żona tat-tilqim ikun inqatel jew ġie skarnat, minbarra l-annimali msemmija fl-Artikolu 13(2) tar-Regolament 2020/687	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi), f’konformità mal-Artikolu 9(1), il-punti (c)(ii) sa (iv) u l-Parti 2 ta’ dan l-Anness

”

L-Anness IX huwa sostitwit b’dan li ġej:

“

ANNESS IX

Infezzjoni bil-virus tal-marda tal-infafet fil-ġilda (LSD, lumpy skin disease)

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-LSD

1. Tipi ta’ żoni tat-tilqim

1.1.

Żona tat-tilqim I: żona tat-tilqim fejn ma hemm l-ebda restrizzjoni marbuta mat-tifqigħat tal-LSD;

1.2.

Żona tat-tilqim II: żona tat-tilqim fejn japplikaw restrizzjonijiet b’rispons għat-tifqigħat tal-LSD;

2. Daqs taż-żoni tat-tilqim u taż-żona tal-peritilqim

2.1.

Żona tat-tilqim I: l-ebda rekwiżit speċifiku;

2.2.

Żona tat-tilqim II: mill-inqas iż-żoni inklużi fiż-żoni ta’ protezzjoni, ta’ sorveljanza u ta’ żoni ristretti oħra stabbiliti wara l-konferma tal-LSD f’konformità mal-Artikolu 21 tar-Regolament Delegat (UE) 2020/687;

2.3.

Żona tal-peritilqim: l-ebda rekwiżit speċifiku.

Tip ta’ vaċċin li għandu jintuża jew jingħata prijorità: għandha tingħata prijorità lill-użu ta’ vaċċini ħajjin attenwati omologi.

Kopertura minima: Il-kopertura tal-vaċċin trid tkun ta’ mill-inqas 90 % tal-istabbilimenti li jirrappreżentaw 75 % tal-popolazzjoni tal-annimali fil-mira taż-żona tat-tilqim.

Annimali/speċijiet fil-mira: annimali bovini miżmuma.

PARTI 2

L-ebda rekwiżit addizzjonali speċifiku.

PARTI 3

ANNIMALI U PRODOTTI SOĠĠETTI GĦALL-PROJBIZZJONI TAL-MOVIMENTI U L-KUNDIZZJONIJIET GĦALL-GĦOTI TA’ DEROGA F’KONFORMITÀ MAL-ARTIKOLU 13 F’ŻONA TAT-TILQIM FEJN ISIR TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-LSD

1. Annimali u prodotti tagħhom soġġetti għall-projbizzjoni ta’ movimenti miż-żoni tat-tilqim

(a)	annimali bovini mhux għall-iskarnar dirett;

(b)	prodotti ġerminali minn annimali bovini;

(c)	ġlud ta’ annimali bovini.

2. Prodotti ġerminali soġġetti għall-projbizzjoni tal-ġbir: xejn.

3. Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3), u l-Artikolu 13(4), il-punt (b)

Mingħajr preġudizzju għar-restrizzjonijiet fuq il-moviment li japplikaw f’konformità mal-Artikolu 27(1) tar-Regolament Delegat (UE) 2020/687, u minkejja l-kundizzjonijiet għall-għoti tad-derogi stabbiliti fl-Artikolu 28(2) sa (5) u l-Artikolu 28(7) tar-Regolament Delegat (UE) 2020/687, il-movimenti tal-annimali bovini li ġejjin u tal-prodotti tagħhom jistgħu jiġu awtorizzati:

3.1.

Movimenti tal-annimali bovini miż-żona tat-tilqim II lejn:

(a)

kwalunkwe destinazzjoni fl-istess Stat Membru jekk:

(i)	l-annimali bovini jkunu nżammu fl-istabbiliment tal-oriġini tagħhom mit-twelid jew għal perjodu kontinwu ta’ mill-inqas 28 jum qabel id-data tad-dispaċċ;

(ii)	l-annimali bovini jkunu tlaqqmu kontra l-LSD mill-inqas 28 jum qabel id-data tad-dispaċċ u jkunu għadhom fil-perjodu ta’ immunità f’konformità mal-istruzzjonijiet tal-manifattur tal-vaċċin f’dik id-data jew fil-perjodu ta’ immunità indotta mill-immunità materna;

(iii)

l-annimali bovini l-oħrajn kollha miżmuma fl-istess stabbiliment tal-oriġini bħall-annimali bovini li għandhom jiġu mċaqalqa jkunu tlaqqmu kontra l-LSD mill-inqas 28 jum qabel id-data tad-dispaċċ u jkunu għadhom fil-perjodu ta’ immunità f’konformità mal-istruzzjonijiet tal-manifattur tal-vaċċin f’dik id-data jew ikunu għadhom fil-perjodu ta’ immunità indotta minn immunità materna;

(iv)	ikun twettaq eżami kliniku, b’riżultati favorevoli, tal-annimali bovini kollha miżmuma fl-istabbiliment tal-oriġini, inklużi l-annimali bovini li għandhom jiġu mċaqalqa;

(b)

kwalunkwe destinazzjoni fi Stati Membri oħra, jekk, minbarra l-kundizzjonijiet stabbiliti fil-punt (a):

(i)	il-programm ta’ tilqim kontra l-LSD jkun tlesta fiż-żona tat-tilqim tal-oriġini tal-annimali bovini, f’konformità mal-pjan ta’ tilqim, mill-inqas 28 jum qabel id-data tad-dispaċċ;

(ii)	l-annimali bovini jikkonformaw ma’ garanziji tas-saħħa tal-annimali, abbażi tal-eżitu favorevoli ta’ valutazzjoni tar-riskju ta’ miżuri kontra t-tixrid tal-LSD, meħtieġa mill-awtorità kompetenti tal-Istat Membru tal-oriġini u awtorizzata mill-awtorità kompetenti tal-Istati Membri tad-destinazzjoni;

3.2.

Movimenti tal-annimali bovini miż-żona tat-tilqim I lejn kwalunkwe destinazzjoni fl-istess Stat Membru jew fi Stati Membri oħra, jekk:

(a)	ikun twettaq eżami kliniku, b’riżultati favorevoli, tal-annimali bovini kollha miżmuma fl-istabbiliment tal-oriġini, inklużi l-annimali bovini li għandhom jiġu mċaqalqa;

(b)

l-annimali bovini:

(i)	ikunu tlaqqmu kontra l-LSD mill-inqas 28 jum qabel id-data tad-dispaċċ jew ikunu għadhom fil-perjodu ta’ immunità indotta mill-immunità materna fid-data tad-dispaċċ; jew

(ii)

ma jkunux tlaqqmu kontra l-LSD u ma jkunux fil-perjodu ta’ immunità indotta mill-immunità materna, it-tilqim kontra l-LSD ikun waqaf fiż-żona tat-tilqim tal-oriġini tal-annimali bovini, f’konformità mal-pjan ta’ tilqim, u l-annimali bovini jkunu ġew soġġetti, b’riżultati negattivi, għal test ta’ detezzjoni tal-virus tal-LSD jew test seroepidemjoloġiku għad-detezzjoni ta’ antikorpi speċifiċi kontra l-virus tal-LSD;

3.3.

Movimenti tal-prodotti ġerminali tal-annimali bovini miż-żoni tat-tilqim lejn kwalunkwe destinazzjoni, dment li l-annimali donaturi jkunu ġew eżaminati klinikament 28 jum qabel id-data tal-ġbir, kif ukoll matul il-perjodu kollu tal-ġbir, ma wrew l-ebda sintomu kliniku tal-LSD u jew:

(a)	ikunu tlaqqmu kontra l-LSD mill-inqas 28 jum qabel id-data tad-dispaċċ u jkunu għadhom fil-perjodu ta’ immunità f’konformità mal-istruzzjonijiet tal-manifattur tal-vaċċin f’dik id-data, jew

(b)

kienu soġġetti, b’riżultati negattivi, għal:

(i)

test seroepidemjoloġiku għad-detezzjoni ta’ antikorpi speċifiċi kontra l-virus tal-LSD, imwettaq fuq kampjuni tad-demm miġbura:

—	fl-ewwel jum tal-ġbir u mill-inqas 28 jum wara l-perjodu tal-ġbir fir-rigward tas-semen, jew

—	fil-jum tal-ġbir fir-rigward tal-embrijuni u l-ooċiti;

(ii)

jekk jinżamm fiż-żona tat-tilqim II, test tar-reazzjoni katina bil-polimerażi (PCR) għad-detezzjoni tal-LSD, imwettaq fuq kampjuni tad-demm miġbura:

—	fl-ewwel jum tal-ġbir u mill-inqas kull 14-il jum wara dan matul il-perjodu tal-ġbir fir-rigward tas-semen, jew

—	fil-jum tal-ġbir fir-rigward tal-embrijuni u l-ooċiti;

3.4.

Movimenti tal-ġlud miż-żoni tat-tilqim lejn kwalunkwe destinazzjoni, dment li jkunu ġew soġġetti għal trattament għall-mitigazzjoni tar-riskju kif stabbilit fl-Anness VII tar-Regolament Delegat (UE) 2020/687.

4. Kundizzjonijiet relatati mal-mezzi tat-trasport li jintużaw għall-moviment tal-annimali bovini miż-żoni tat-tilqim

(a)	il-mezzi tat-trasport jinkludu biss l-annimali bovini tal-istess stat ta’ saħħa;

(b)	jikkonformaw mar-rekwiżiti stabbiliti fl-Artikolu 24(1) tar-Regolament Delegat (UE) 2020/687;

(c)	dawn jitnaddfu u jiġu ddiżinfettati f’konformità mal-Artikolu 24(2) tar-Regolament Delegat (UE) 2020/687 taħt il-kontroll jew is-superviżjoni tal-awtorità kompetenti tal-Istat Membru.

PARTI 4

PERJODI TA’ STENNIJA GĦAL-LSD WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-LSD matul il-perjodu ta’ stennija
8 xhur wara l-aħħar tilqim jew id-diżinfezzjoni tal-aħħar stabbiliment affettwat, skont liema jkun seħħ l-aħħar	Sorveljanza klinika u tal-laboratorju (identifikazzjoni tal-patoġeni, u detezzjoni tal-antikorpi f’annimali mhux imlaqqmin), f’konformità mal-Artikolu 9(1), il-punt (c)(ii) sa (iv)

”

L-Anness XII huwa sostitwit b’dan li ġej:

“

ANNESS XII

Id-deni klassiku tal-ħnieżer (CSF, classical swine fever) fl-annimali porċini miżmuma

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAS-CSF

Daqs taż-żona tat-tilqim: L-ebda kundizzjoni speċifika.

Daqs taż-żona tal-peritilqim: L-ebda kundizzjoni speċifika.

Tip ta’ vaċċin li għandu jintuża jew jingħata prijorità: Vaċċini ħajjin attenwati għandhom jingħataw prijorità. Vaċċini oħra jistgħu jintużaw biss għal raġunijiet debitament ġustifikati.

Kopertura minima: Il-kopertura tal-vaċċin trid tkun mill-inqas 95 % tal-istabbilimenti fiż-żona tat-tilqim li jirrappreżentaw 80 % tal-annimali xierqa fil-mira f’kull wieħed minn dawk l-istabbilimenti.

Annimali/speċijiet fil-mira: L-annimali tal-ispeċijiet elenkati, f’konformità mar-Regolament ta’ Implimentazzjoni (UE) 2018/1882, miżmuma fiż-żona tat-tilqim.

PARTI 2

Għandha tiġi implimentata sorveljanza klinika u tal-laboratorju msaħħa fiż-żoni tal-peritilqim u tat-tilqim biex jiġu identifikati l-istabbilimenti li jżommu l-annimali tal-ispeċijiet elenkati li kellhom kuntatt mal-virus tas-CSF mingħajr ma wrew sinjali kliniċi tal-marda.

Meta jkunu għaddew mill-inqas 30 jum mit-tlestija tat-tilqim protettiv ta’ emerġenza, għandha tinbeda s-sorveljanza li ġejja:

Fiż-żona tal-peritilqim: kull stabbiliment li jżomm l-annimali tal-ispeċijiet elenkati għandha ssirlu żjara mill-inqas darba minn veterinarju uffiċjali li għandu jwettaq kampjunar għas-sorveljanza tal-laboratorju b’testijiet ta’ identifikazzjoni tal-patoġeni mmirati lejn l-annimali porċini miżmuma mejtin li jkollhom aktar minn 60 jum. Fin-nuqqas ta’ tali annimali mejtin li jkollhom aktar minn 60 jum, il-kampjunar jista’ jitwettaq fuq kwalunkwe annimal porċin miżmum li miet jew li nqatel wara l-ftam.

Fiż-żona tat-tilqim: kull stabbiliment fejn ikun sar it-tilqim għandha ssirlu żjara minn veterinarju uffiċjali li għandu jwettaq kampjunar:

(i)	minn annimali mlaqqmin tal-ispeċijiet elenkati għas-seroloġija biex tiġi vvalutata l-effettività tat-tilqim;

(ii)

minn tal-inqas l-ewwel żewġ annimali porċini miżmuma mejtin kull ġimgħa li jkollhom aktar minn 60 jum għall-identifikazzjoni tal-patoġeni. Fin-nuqqas ta’ tali annimali mejtin li jkollhom aktar minn 60 jum, il-kampjunar jista’ jitwettaq fuq kwalunkwe annimal porċin miżmum li miet jew li nqatel wara l-ftam.

PARTI 3

1. Annimali u prodotti tagħhom soġġetti għall-projbizzjoni tal-movimenti

L-annimali, il-prodotti ġerminali u l-prodotti ta’ oriġini mill-annimali minn stabbilimenti li jinsabu fiż-żona tat-tilqim, huma soġġetti għall-projbizzjoni tal-movimenti barra miż-żona tat-tilqim:

(a)	annimali porċini mlaqqmin;

(b)	semen, ooċiti u embrijuni minn annimali porċini donaturi mlaqqmin;

(c)	laħam frisk u prodotti tal-laħam, inklużi l-budellati, miksuba minn annimali porċini mlaqqmin;

2. Prodotti ġerminali soġġetti għall-projbizzjoni tal-ġbir

Semen, ooċiti u embrijuni għal inseminazzjoni artifiċjali minn annimali porċini donaturi mlaqqmin miżmuma fi stabbilimenti approvati tal-prodotti ġerminali li jinsabu fiż-żona tat-tilqim.

3. Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3), u l-Artikolu 13(4)

Movimenti tal-annimali u tal-prodotti tagħhom li jistgħu jiġu awtorizzati:

3.1.

movimenti tal-annimali porċini mlaqqmin, direttament mill-istabbiliment tal-oriġini lejn:

(a)	biċċerija li tinsab kemm jista’ jkun qrib iż-żona tat-tilqim, bl-istess kundizzjonijiet bħal dawk previsti fl-Artikolu 24, l-Artikolu 28(2), (3), (4), (5) u (7) u l-Artikolu 29(1) u (2) tar-Regolament Delegat (UE) 2020/687; jew

(b)

fejn bħala riżultat tal-projbizzjoni fil-punt 1 jinqalgħu problemi relatati mal-benesseri tal-annimali fi stabbiliment fejn jinżammu l-annimali porċini, lejn stabbiliment kemm jista’ jkun qrib iż-żona tat-tilqim, dment li:

(i)	il-kundizzjonijiet ġenerali stabbiliti fl-Artikolu 24, l-Artikolu 28(2), (3), (4), (5) u (7) tar-Regolament Delegat (UE) 2020/687 huma ssodisfati;

(ii)	l-istabbiliment tad-destinazzjoni jappartjeni għall-istess katina tal-provvista u

(iii)

l-annimali porċini mlaqqmin għandhom jiġu mċaqalqa biex jitlesta ċ-ċiklu tal-produzzjoni;

(c)	impjant approvat tal-prodotti sekondarji tal-annimali, bl-istess kundizzjonijiet bħal dawk previsti fl-Artikolu 24, l-Artikolu 28(2), (3), (4), (5) u (7) u l-Artikolu 37 tar-Regolament Delegat (UE) 2020/687;

3.2.

moviment tal-laħam frisk mill-annimali porċini mlaqqmin f’konformità mal-Artikolu 33(1), il-punt (a), tar-Regolament Delegat (UE) 2020/687 u prodotti tal-laħam, inkluż il-budellat, jekk ikunu għaddew minn wieħed mit-trattamenti għall-mitigazzjoni tar-riskju stabbiliti fl-Anness VII tar-Regolament Delegat (UE) 2020/687;

PARTI 4

PERJODI TA’ STENNIJA GĦAS-CSF WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tas-CSF matul il-perjodu ta’ stennija
3 xhur wara li l-annimali porċini kollha mlaqqmin ikunu ġew skarnati jew maqtula, minbarra l-annimali porċini miżmuma msemmija fl-Artikolu 13(2) tar-Regolament Delegat (UE) 2020/687 meta jkun hemm mezzi, ivvalidati f’konformità mal-Manwal Terrestri tad-WOAH, li jiddistingwu bejn annimali porċini miżmuma mlaqqmin u dawk infettati.	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi), f’konformità mal-Artikolu 9(1), il-punti (c)(ii) sa (iv) u l-Parti 2 ta’ dan l-Anness

”

L-Anness XIII huwa sostitwit b’dan li ġej:

“

ANNESS XIII

L-Influwenza Avjarja b’Patoġeniċità Għolja (HPAI)

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-HPAI

Daqs taż-żona tat-tilqim: raġġ ta’ mill-inqas 3 km madwar l-istabbilimenti affettwati.

Daqs taż-żona tal-peritilqim: wisa’ ta’ mill-inqas 7 km mill-perimetri taż-żona tat-tilqim.

Tip ta’ vaċċin li għandu jintuża: Vaċċini li ma jkunx fihom virus ħaj tal-influwenza avjarja (il-vaċċini li fihom il-virus ħaj tal-influwenza avjarja, kemm jekk attenwat kif ukoll jekk le, ma għandhomx jintużaw).

Kopertura minima: L-ebda kundizzjoni speċifika.

Annimali/speċijiet fil-mira: pollam u/jew għasafar miżmuma fil-magħluq miżmuma fl-istabbilimenti inklużi fil-pjan uffiċjali ta’ tilqim.

PARTI 2

KUNDIZZJONIJIET SPEĊIFIĊI GĦAS-SORVELJANZA TAL-LABORATORJU MSAĦĦA LI GĦANDHOM JIĠU IMPLIMENTATI FIŻ-ŻONI TAT-TILQIM U TAL-PERITILQIM MATUL IT-TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-HPAI

Għall-fini tas-sorveljanza msaħħa kif stabbilit f’din il-Parti, “qatgħa” tfisser il-pollam jew l-għasafar miżmuma fil-magħluq kollha tal-istess stat ta’ saħħa li jinżammu fl-istess spazju u li jaqsmu l-istess spazju ta’ arja.

Is-sorveljanza tal-laboratorju għad-detezzjoni bikrija tal-okkorrenza ta’ infezzjoni bil-virus selvaġġ tal-HPAI għandha tiġi implimentata permezz ta’ metodi ta’ identifikazzjoni tal-patoġeni, fiż-żoni tat-tilqim u tal-peritilqim, kif ġej:

Fl-istabbilimenti fejn ikun sar it-tilqim:

(a)

mill-inqas kull 3 ġimgħat, b’minn tal-inqas kampjunar tal-għasafar mejtin kollha, sa 15-il għasfur minn kull qatgħa, li jkunu nġabru fi żmien 48 siegħa qabel il-kampjunar. L-għadd ta’ għasafar inklużi fil-kampjun għal kull qatgħa, it-tip ta’ għasafar inklużi fil-kampjun u l-frekwenza tal-kampjunar iridu jippermettu d-detezzjoni tal-infezzjoni bil-virus tal-HPAI fil-qatgħa mlaqqmin bi probabbiltà ta’ mill-inqas 99 % u b’livell ta’ fiduċja ta’ mill-inqas 95 %.

(b)	permezz ta’ kampjunar tal-għasafar mejtin kollha, sa 15-il għasfur għal kull qatgħa, meta tinqabeż ir-rata tal-mortalità mistennija ta’ kuljum għal dik il-qatgħa.

Fl-istabbilimenti tal-pollam fejn ma jkunx sar it-tilqim:

(a)	b’sorveljanza passiva tal-ispeċijiet Galliformes, u

(b)	permezz ta’ kampjunar ta’ kull ġimgħa tal-għasafar mejtin kollha, sa 15-il għasfur għal kull qatgħa tal-ispeċijiet Anseriformes, li jkunu nġabru fi żmien ġimgħa.

PARTI 3

ANNIMALI U PRODOTTI SOĠĠETTI GĦALL-PROJBIZZJONI TAL-MOVIMENTI U L-KUNDIZZJONIJIET GĦALL-GĦOTI TA’ DEROGA F’KONFORMITÀ MAL-ARTIKOLU 13 f’żona tat-tilqim fejn isir tilqim protettiv ta’ emerġenza għall-prevenzjoni u l-kontroll tal-HPAI

Annimali u prodotti tagħhom soġġetti għall-projbizzjoni tal-movimenti: pollam jew għasafar miżmuma fil-magħluq imlaqqmin u l-prodotti tagħhom fiż-żona tat-tilqim u barra minnha.

Prodotti ġerminali soġġetti għall-projbizzjoni tal-ġbir: mhux applikabbli.

Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3), u l-Artikolu 13(4)

Movimenti tal-pollam jew tal-għasafar miżmuma fil-magħluq imlaqqmin u l-prodotti tagħhom fiż-żona tat-tilqim u barra minnha jistgħu jiġu awtorizzati biss fil-każijiet koperti mill-Artikoli 28, 29 u 30, l-Artikolu 31(1) u l-Artikoli 33, 34 u 37 tar-Regolament Delegat (UE) 2020/687 u bl-istess kundizzjonijiet ġenerali u speċifiċi bħal dawk previsti fihom.

Wara t-tmiem tal-perjodu ta’ stennija, il-miżuri previsti fil-Parti 5, il-punti 2 sa 4, għandhom jibqgħu fis-seħħ fl-istabbilimenti li jżommu annimali mlaqqmin, sakemm iżommuhom imlaqqmin.

PARTI 4

Perjodi ta’ STENNIJA għall-HPAI WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-HPAI matul il-perjodu ta’ stennija
28 jum wara t-tlestija tat-tilqim protettiv ta’ emerġenza jew fiż-żmien tat-tneħħija f’konformità mal-Artikolu 55 tar-Regolament Delegat 2020/687, taż-żoni ristretti stabbiliti f’konformità mal-Artikolu 21 ta’ dak ir-Regolament Delegat, skont liema seħħ l-aħħar.	Sorveljanza klinika u tal-laboratorju (identifikazzjoni tal-patoġeni), f’konformità mal-Artikolu 9(1), il-punt (c)(ii) sa (iv) u l-Parti 2 ta’ dan l-Anness.

PARTI 5

KUNDIZZJONIJIET SPEĊIFIĊI GĦAT-TILQIM PREVENTIV TAL-HPAI

Sorveljanza msaħħa li għandha tiġi implimentata fil-każ ta’ tilqim preventiv:

2.1.

Għall-fini tas-sorveljanza kif stabbilit fil-punti 2.2 u 2.3, “qatgħa” tfisser il-pollam jew l-għasafar miżmuma fil-magħluq kollha tal-istess stat ta’ saħħa li jinżammu fl-istess spazju u li jaqsmu l-istess spazju ta’ arja.

2.2.

Is-sorveljanza passiva trid tiġi implimentata fl-istabbilimenti kollha fejn jinżammu l-pollam jew l-għasafar miżmuma fil-magħluq fiż-żona fejn ikun ġie implimentat it-tilqim preventiv kontra l-HPAI meta jiġu osservati xi sinjali kliniċi jew leżjonijiet post-mortem li jindikaw l-HPAI jew meta jkun hemm bidla fil-parametri normali tal-produzzjoni u tas-saħħa bħar-rata tal-mortalità u bħall-konsum tal-għalf u tal-ilma.

2.3.

Wara l-bidu tat-tilqim, is-sorveljanza attiva li ġejja trid titwettaq mill-inqas kull 30 jum minn veterinarju uffiċjali jew taħt ir-responsabbiltà tiegħu fl-istabbilimenti kollha fejn jinżammu l-pollam jew l-għasafar miżmuma fil-magħluq imlaqqmin, għad-detezzjoni tal-okkorrenza tal-infezzjoni bil-virus selvaġġ tal-HPAI:

(a)	eżami kliniku li jinkludi verifika tar-rekords tal-produzzjoni u tar-rekords tas-saħħa tal-istabbiliment għal kull qatgħa, inkluża evalwazzjoni tal-istorja klinika tiegħu u tal-eżamijiet kliniċi tal-pollam jew tal-għasafar miżmuma fil-magħluq;

(b)	kampjunar għall-ittestjar permezz ta’ metodi ta’ identifikazzjoni tal-patoġeni tal-għasafar mejtin kollha, sa 15-il għasfur għal kull qatgħa, li jkunu nġabru fi żmien 48 siegħa qabel il-kampjunar;

(c)	mill-perjodu ta’ riskju għoli għall-infezzjoni bil-virus tal-HPAI, l-ittestjar meħtieġ fil-punt (b) jista’ jitwettaq biss f’kampjun rappreżentattiv biżżejjed ta’ stabbilimenti fejn jinżammu l-pollam jew l-għasafar miżmuma fil-magħluq imlaqqmin;

(d)

l-għadd ta’ stabbilimenti inklużi fil-kampjun għall-fini ta’ sorveljanza kif meħtieġ fil-punti (b) u (c) u l-frekwenza tal-kampjunar iridu jikkonformaw ma’:

(i)

ir-rekwiżiti minimi li ġejjin:

Speċijiet	% tal-istabbilimenti mlaqqmin li għandhom jiġu inklużi fil-kampjun	Frekwenza tal-kampjunar (jiem)
Tiġieġ li jbid	100	30
Tiġieġ li jbid	25	7
Papri	100	30
Papri	50	7
Dundjani	100	30
Dundjani	25	7

jew

(ii)	kwalunkwe disinn tal-kampjunar xjentifikament validu li jiżgura b’livell ta’ fiduċja b’minn tal-inqas 95 % li l-popolazzjoni tal-pollam u tal-għasafar miżmuma fil-magħluq imlaqqmin tkun ħielsa mill-HPAI, b’sensittività b’minn tal-inqas 90 % għad-detezzjoni bikrija tal-infezzjoni bil-virus tal-HPAI.

2.4.

L-għasafar miżmuma fil-magħluq imlaqqmin minn stabbilimenti konfinati u minn stabbilimenti li jżommu sa 50 għasfur miżmum fil-magħluq huma eżentati mis-sorveljanza mitluba fil-punt 2.3, is-subpunti (b), (c) u (d).

2.5.

Is-sorveljanza prevista fil-punti 2.2 u 2.3 trid tibqa’ fis-seħħ fl-istabbilimenti li jżommu annimali mlaqqmin sakemm iżommuhom imlaqqmin. B’deroga, fil-każ ta’ għasafar miżmuma fil-magħluq mlaqqmin li jgħixu fit-tul jew dawk minn stabbilimenti konfinati, is-sorveljanza prevista fil-punti 2.2 u 2.3 trid tinżamm għal perjodu ta’ 12-il xahar mid-data meta jkun ġie applikat l-aħħar tilqim.

Annimali u prodotti tagħhom soġġetti għall-projbizzjoni tal-movimenti f’konformità mal-Artikolu 14(1): pollam jew għasafar miżmuma fil-magħluq imlaqqmin u bajd għat-tifqis u prodotti ta’ oriġini mill-annimali tagħhom.

Il-kundizzjonijiet għall-għoti ta’ deroga f’konformità mal-Artikolu 14(2), il-punt (b)

4.1.

Il-kundizzjonijiet għall-għoti ta’ deroga għall-movimenti tal-pollam jew tal-għasafar miżmuma fil-magħluq imlaqqmin inklużi flieles ta’ ġurnata u bajd għat-tifqis derivati minn tali pollam jew għasafar miżmuma fil-magħluq:

(a)

Dawn huma pollam jew għasafar miżmuma fil-magħluq imlaqqmin li għalihom ir-riżultati tas-sorveljanza passiva u attiva, implimentati f’konformità mal-punt (2) ta’ din il-Parti, ikunu negattivi għad-detezzjoni ta’ infezzjoni bil-virus selvaġġ tal-HPAI, jew huma flieles ta’ ġurnata u bajd għat-tifqis derivati minn tali pollam jew għasafar miżmuma fil-magħluq, u:

(i)	fil-każ tal-pollam, dawn jiġu mċaqalqa lejn biċċerija għall-iskarnar immedjat; jew

(ii)

dawn jiġu mċaqalqa mill-istabbilimenti tagħhom lejn stabbilimenti oħra:

—	fejn isir it-tilqim; jew

—	fejn jinżammu biss pollam jew għasafar miżmuma fil-magħluq imlaqqmin; jew

—	fejn tista’ tiġi żgurata s-separazzjoni sħiħa bejn pollam jew għasafar miżmuma fil-magħluq imlaqqmin u dawk mhux imlaqqmin;

kif ukoll

(iii)

il-pollam jew l-għasafar miżmuma fil-magħluq, inklużi flieles ta’ ġurnata u bajd għat-tifqis derivati minn tali pollam jew għasafar miżmuma fil-magħluq, imsemmija fis-subpunti (i) u (ii) ma jiġux imċaqalqa lejn Stat Membru ieħor;

jew

(b)

dawn huma għasafar miżmuma fil-magħluq imlaqqmin minn stabbilimenti konfinati li jiġu mċaqalqa lejn stabbiliment konfinat fi Stat Membru ieħor dment li:

(i)	l-awtorizzazzjoni ta’ tali tip ta’ movimenti tkun ingħatat mill-awtorità kompetenti tal-Istat Membru tad-destinazzjoni;

(ii)	fi żmien 72 siegħa qabel il-moviment ikunu ġew soġġetti għal kampjunar għall-ittestjar permezz ta’ metodi ta’ identifikazzjoni tal-patoġeni b’riżultati favorevoli;

jew

(c)

dawn huma pollam imlaqqam mibgħut għall-iskarnar immedjat lejn Stat Membru ieħor, dment li:

(i)	is-sorveljanza applikata fl-istabbiliment tal-oriġini f’konformità mal-punt (2) ta’ din il-Parti jkollha riżultati favorevoli;

(ii)

il-pollam tal-kunsinna li għandha tintbagħat ikunu ġew spezzjonati klinikament b’riżultati favorevoli minn veterinarju uffiċjali fi żmien 72 siegħa qabel il-ħin tat-tagħbija, u jkunu nkisbu riżultati favorevoli mill-ittestjar permezz ta’ metodi ta’ identifikazzjoni tal-patoġeni fuq kampjuni miġbura mill-qatgħa tal-oriġini ta’ mhux aktar minn 15-il għasfur mejjet fi żmien 72 siegħa qabel il-ħin tat-tluq ta’ dik il-kunsinna;

jew

(d)

dawn huma bajd għat-tifqis derivat minn pollam jew għasafar miżmuma fil-magħluq imlaqqmin:

(i)	li joriġinaw minn qatgħa għat-tgħammir imlaqqma li għaliha s-sorveljanza passiva u attiva f’konformità mal-punt (2) ta’ din il-Parti jkollha riżultati favorevoli;

(ii)	li jkunu ġew iddiżinfettati qabel id-dispaċċ f’konformità ma’ metodu approvat mill-awtorità kompetenti;

(iii)

li jiġu ttrasportati direttament lejn il-mafqas destinatarju;

(iv)	li jkunu jistgħu jiġu ttraċċati ġewwa l-mafqas;

(v)	u li l-moviment tagħhom, fil-każ li jiġu mċaqalqa lejn Stat Membru ieħor, ikun ġie nnotifikat mill-awtorità kompetenti tal-Istat Membru tal-oriġini lill-awtorità kompetenti tal-Istat Membru tad-destinazzjoni;

jew

(e)

dawn huma flieles ta’ ġurnata derivati minn pollam imlaqqam:

(i)	li joriġinaw minn qatgħa għat-tgħammir imlaqqma li għaliha s-sorveljanza passiva u attiva msaħħa f’konformità mal-punt (2) ta’ din il-Parti jkollha riżultati favorevoli;

(ii)	li jitqiegħdu f’bini jew f’barrakka tal-pollam fejn ma jkun hemm l-ebda pollam residenti;

(iii)

u li l-moviment tagħhom, fil-każ li jiġu mċaqalqa lejn Stat Membru ieħor, ikun ġie nnotifikat mill-awtorità kompetenti tal-Istat Membru tal-oriġini lill-awtorità kompetenti tal-Istat Membru tad-destinazzjoni.

(f)

b’deroga mit-tielet inċiż tal-punt 4.1(a)(ii), l-għasafar miżmuma fil-magħluq imlaqqmin minn stabbilimenti konfinati mċaqalqa lejn stabbiliment konfinat ieħor għal finijiet ta’ tnissil jistgħu jinżammu flimkien ma’ għasafar miżmuma fil-magħluq mhux imlaqqmin li huma parti mill-istess programm ta’ tnissil;

4.2.

Il-kundizzjonijiet għall-għoti ta’ deroga għall-moviment tal-bajd għall-konsum mill-bniedem u laħam derivat minn pollam imlaqqam:

(a)

Il-bajd joriġina minn qatgħa mlaqqma li għaliha s-sorveljanza fil-punt (2) ta’ din il-Parti jkollha riżultati favorevoli u jiġu ttrasportati direttament lejn:

(i)	ċentru tal-ippakkjar iddeżinjat mill-awtorità kompetenti dment li jkun ippakkjat f’imballaġġ li jintrema jew f’imballaġġ li jista’ jitnaddaf u jiġi ddiżinfettat b’tali mod li jiddiżattiva l-virus tal-HPAI; jew

(ii)	stabbiliment għall-manifattura ta’ prodotti tal-bajd kif stabbilit fit-Taqsima X, il-Kapitolu II tal-Anness III tar-Regolament (KE) Nru 853/2004 biex ikun immaniġġjat u ttrattat f’konformità mal-Kapitolu XI tal-Anness II tar-Regolament (KE) Nru 852/2004.

(b)	Il-moviment tal-laħam miksub minn pollam f’konformità mal-kundizzjonijiet stabbiliti fil-punti 4.1(a)(i), 4.1(a)(iii) u 4.1(c) jista’ jiġi awtorizzat mingħajr kundizzjonijiet ulterjuri.

”

PARTI 3

L-Annessi XV, XVI, XVII u XVIII li ġejjin jiżdiedu mar-Regolament Delegat (UE) 2023/361.

“

ANNESS XV

Id-deni klassiku tal-ħnieżer (CSF, classical swine fever) fl-annimali porċini selvaġġi

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAS-CSF

Daqs taż-żona tat-tilqim:

L-awtorità kompetenti għandha tiddetermina ż-żona tat-tilqim abbażi ta’:

(a)	il-popolazzjoni stmata tal-annimali porċini selvaġġi, id-distribuzzjoni spazjali tagħha u l-istruttura tal-pajsaġġ;

(b)	il-fatturi ta’ riskju li jikkontribwixxu għat-tixrid tas-CSF, b’mod partikolari, ir-riskju li jiġi introdott fl-istabbilimenti tal-annimali porċini miżmuma;

(c)	ir-riżultati tal-kampjunar.

Daqs taż-żona tal-peritilqim: L-ebda kundizzjoni speċifika.

Kopertura minima: iridu jiġu adattati skont il-vaċċin użat, għall-kundizzjonijiet lokali u għall-karatteristiċi tal-popolazzjoni stmata tal-annimali porċini selvaġġi, id-distribuzzjoni spazjali tiegħu u l-istruttura tal-pajsaġġ.

Annimali/speċijiet fil-mira: L-annimali porċini selvaġġi tal-ispeċijiet elenkati, f’konformità mar-Regolament ta’ Implimentazzjoni (UE) 2018/1882, fiż-żona tat-tilqim.

Il-kaċċa u attivitajiet oħra li x’aktarx jikkawżaw l-ispostament tal-popolazzjonijiet tal-annimali porċini selvaġġi: Iridu jiġu rregolati fiż-żona tat-tilqim mill-inqas sa tmiem il-perjodu ta’ stennija previst fil-parti 4. L-annimali porċini selvaġġi kkaċċjati jridu jiġu ttestjati b’testijiet ta’ identifikazzjoni tal-patoġeni u ta’ detezzjoni tal-antikorpi.

PARTI 2

KUNDIZZJONIJIET SPEĊIFIĊI GĦAS-SORVELJANZA KLINIKA U TAL-LABORATORJU MSAĦĦA LI GĦANDHA TIĠI IMPLIMENTATA FIŻ-ŻONA TAT-TILQIM MATUL IT-TILQIM TA’ EMERĠENZA GĦALL-PREVENZJONI U L-KONTROLL TAS-CSF FL-ANNIMALI PORĊINI SELVAĠĠI

Fiż-żona tat-tilqim, wara li titlesta l-immunizzazzjoni orali, il-klassi tal-età tal-annimali porċini selvaġġi li trid tiġi eżaminata b’mod seroepidemjoloġiku għad-detezzjoni ta’ infezzjoni ġdida jew emerġenti mill-ġdid tiddependi mill-istaġun li fih ikun tlesta t-tilqim u t-tul ta’ żmien mit-tlestija.

Għandha tiġi implimentata sorveljanza speċifika fl-annimali porċini selvaġġi fiż-żona tat-tilqim biex jiġi vverifikat is-suċċess tal-operazzjoni tat-tilqim. Din is-sorveljanza għandha tinkludi sorveljanza tal-laboratorju msaħħa għall-valutazzjoni tal-livelli ta’ immunità u għad-detezzjoni ta’ kwalunkwe persistenza tal-virus fil-popolazzjoni tal-annimali porċini selvaġġi; dan jinkludi l-identifikazzjoni tal-patoġeni u d-detezzjoni tal-antikorpi fl-annimali porċini selvaġġi kollha kkaċċjati, maqtula u misjuba mejtin jew morda.

PARTI 3

ANNIMALI U PRODOTTI SOĠĠETTI GĦALL-PROJBIZZJONI TAL-MOVIMENTI F’KONFORMITÀ MAL-ARTIKOLU 13 F’ŻONA TAT-TILQIM FEJN ISIR TILQIM PROTETTIV TA’ EMERĠENZA GĦALL-PREVENZJONI U L-KONTROLL TAS-CSF FL-ANNIMALI PORĊINI SELVAĠĠI

1. Annimali soġġetti għall-projbizzjoni tal-movimenti

Annimali porċini selvaġġi.

2. Prodotti soġġetti għall-projbizzjoni tal-movimenti

Laħam frisk, prodotti tal-laħam u kwalunkwe prodott ieħor ta’ oriġini mill-annimali, prodotti sekondarji tal-annimali u prodotti derivati miksuba minn annimali porċini selvaġġi u iġsma ta’ annimali porċini selvaġġi.

3. Il-kundizzjonijiet għall-għoti ta’ deroga f’konformità mal-Artikolu 13(3)

3.1.

B’deroga mir-restrizzjonijiet fuq il-moviment stabbiliti skont il-punt 2, l-awtorità kompetenti tista’ tawtorizza l-moviment tal-laħam frisk, prodotti tal-laħam u kwalunkwe prodott ieħor ta’ oriġini mill-annimali, prodotti sekondarji tal-annimali u prodotti derivati fiż-żona tat-tilqim u barra minnha, dment li jiġu ssodisfati l-kundizzjonijiet li ġejjin:

(a)	valutazzjoni tar-riskju mwettqa mill-awtorità kompetenti turi li tali moviment ma joħloqx riskju ta’ tixrid tas-CSF;

(b)	l-iġsma ta’ annimali porċini selvaġġi jiġu ttestjati għall-preżenza tal-virus tas-CSF, b’riżultati negattivi miksuba qabel kwalunkwe moviment ulterjuri għall-ipproċessar jew għat-trattament;

(c)	il-moviment tal-iġsma ta’ annimali porċini selvaġġi lejn l-istabbiliment tal-ipproċessar u tal-ħżin isir taħt miżuri stretti ta’ bijosigurtà;

(d)	l-ipproċessar u l-ħżin tal-iġsma ta’ annimali porċini selvaġġi u tal-prodotti derivati tagħhom isiru fi stabbilimenti ddeżinjati mill-awtorità kompetenti, filwaqt li tiġi żgurata l-konformità mal-miżuri ta’ bijosigurtà u ta’ kontroll tas-CSF;

(e)

jew:

(i)	il-prodotti jgħaddu mit-trattamenti għall-mitigazzjoni tar-riskju kif stabbilit fl-Anness VII tar-Regolament Delegat (UE) 2020/687; jew

(ii)

il-laħam frisk, il-prodotti tal-laħam u kwalunkwe prodott ieħor ta’ oriġini mill-annimali minn annimali porċini selvaġġi u iġsma ta’ annimali porċini selvaġġi jiġu mċaqalqa fiż-żona ristretta:

—	għall-użu domestiku privat; jew

—

mill-kaċċaturi għall-provvista ta’ kwantitajiet żgħar tal-kaċċa porċina selvaġġa jew tal-laħam tal-kaċċa selvaġġa li joriġina mill-porċini direttament lill-konsumatur finali jew lill-istabbilimenti lokali tal-bejgħ bl-imnut li jfornu direttament lill-konsumatur finali, kif previst fl-Artikolu 1(3), il-punt (e), tar-Regolament (KE) Nru 853/2004;

3.2.

L-awtorità kompetenti għandha tiddokumenta u timmonitorja l-movimenti awtorizzati kollha skont din id-deroga u tiżgura l-konformità mal-kundizzjonijiet stabbiliti fil-paragrafu 3.1.

PARTI 4

PERJODI TA’ STENNIJA GĦAS-CSF WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tas-CSF matul il-perjodu ta’ stennija
12-il xahar wara d-data tat-tmiem tal-aħħar kampanja ta’ tilqim fl-annimali porċini selvaġġi, u appoġġata mill-konklużjonijiet favorevoli tal-implimentazzjoni ta’ strateġija ta’ ħruġ li wriet in-nuqqas ta’ ċirkolazzjoni tal-virus tas-CSF.	Sorveljanza klinika u tal-laboratorju (identifikazzjoni tal-patoġeni fl-annimali porċini selvaġġi misjuba mejtin jew maqtula) f’konformità mal-Artikolu 9(1), il-punt (c)(ii) sa (iv) u l-Parti 2 ta’ dan l-Anness

ANNESS XVI

Id-deni tal-ħnieżer Afrikan (ASF, African swine fever) fl-annimali porċini miżmuma

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-ASF FL-ANNIMALI PORĊINI MIŻMUMA

Daqs taż-żona tat-tilqim: L-ebda kundizzjoni speċifika.

Daqs taż-żona tal-peritilqim: L-ebda kundizzjoni speċifika.

Tip ta’ vaċċin li għandu jintuża: Vaċċini tal-ASF li għandhom awtorizzazzjoni ċentralizzata għall-kummerċjalizzazzjoni mogħtija mill-Kummissjoni f’konformità mal-Artikolu 44(9) tar-Regolament 2019/6

Kopertura minima: Il-kopertura tal-vaċċin trid tkun mill-inqas 95 % tal-istabbilimenti fiż-żona tat-tilqim li jirrappreżentaw 80 % tal-annimali fil-mira f’kull wieħed minn dawk l-istabbilimenti.

Annimali/speċijiet fil-mira: L-annimali tal-ispeċijiet elenkati, f’konformità mar-Regolament ta’ Implimentazzjoni (UE) 2018/1882, miżmuma fiż-żona tat-tilqim.

PARTI 2

Is-sorveljanza klinika u tal-laboratorju msaħħa għandha tiġi implimentata fiż-żoni tal-peritilqim u tat-tilqim għad-detezzjoni tal-istabbilimenti li jżommu l-annimali tal-ispeċijiet elenkati li kellhom kuntatt mal-virus tal-ASF (ASFV) mingħajr ma wrew sinjali kliniċi tal-marda.

Meta jkunu għaddew mill-inqas 30 jum mit-tlestija tat-tilqim protettiv ta’ emerġenza, għandha tinbeda s-sorveljanza li ġejja:

Fiż-żona tal-peritilqim, kull stabbiliment għandha ssirlu żjara mill-inqas darba minn veterinarju uffiċjali li għandu jwettaq kampjunar għas-sorveljanza tal-laboratorju b’testijiet ta’ identifikazzjoni tal-patoġeni mmirati lejn l-annimali porċini miżmuma mejtin li jkollhom aktar minn 60 jum. Fin-nuqqas ta’ tali annimali mejtin li jkollhom aktar minn 60 jum, il-kampjunar jista’ jitwettaq fuq kwalunkwe annimal porċin miżmum li miet jew li nqatel wara l-ftam.

Fiż-żona tat-tilqim, kull stabbiliment fejn ikun sar it-tilqim għandha ssirlu żjara minn veterinarju uffiċjali li għandu jwettaq il-kampjunar:

(i)	għas-seroloġija minn annimali mlaqqmin tal-ispeċijiet elenkati biex tiġi vvalutata l-effettività tat-tilqim.

(ii)

għall-identifikazzjoni tal-patoġeni minn tal-inqas l-ewwel żewġ annimali porċini miżmuma mejtin kull ġimgħa li jkollhom aktar minn 60 jum. Fin-nuqqas ta’ tali annimali mejtin li jkollhom aktar minn 60 jum, il-kampjunar jista’ jitwettaq fuq kwalunkwe annimal porċin miżmum li miet jew li nqatel wara l-ftam.

PARTI 3

1. Annimali u prodotti tagħhom soġġetti għall-projbizzjoni tal-movimenti

L-annimali, il-prodotti ġerminali u l-prodotti ta’ oriġini mill-annimali minn stabbilimenti li jinsabu fiż-żona tat-tilqim, fiż-żona tat-tilqim u barra minnha:

(a)	annimali porċini miżmuma;

(b)	semen, ooċiti u embrijuni minn annimali porċini miżmuma donaturi;

(c)	fresh meat and meat products, including casings, obtained from kept porcine animals.

2. Prodotti ġerminali soġġetti għall-projbizzjoni tal-ġbir

Semen, ooċiti u embrijuni għal inseminazzjoni artifiċjali minn annimali porċini donaturi mlaqqmin miżmuma fi stabbilimenti approvati tal-prodotti ġerminali li jinsabu fiż-żona tat-tilqim.

3. Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3), u l-Artikolu 13(4)

Movimenti tal-annimali u tal-prodotti tagħhom li jistgħu jiġu awtorizzati:

3.1.

movimenti tal-annimali porċini miżmuma, direttament mill-istabbiliment tal-oriġini fiż-żona tat-tilqim:

(a)	lejn biċċerija għall-iskarnar immedjat li tinsab fiż-żona tat-tilqim; jew

(b)	lejn biċċerija għall-iskarnar immedjat li tinsab kemm jista’ jkun qrib iż-żona tat-tilqim, fl-istess Stat Membru, bl-istess kundizzjonijiet bħal dawk previsti fl-Artikolu 24, l-Artikolu 28(2), (3), (4), (5) u (7) u l-Artikolu 29(1) u (2) tar-Regolament Delegat (UE) 2020/687;

(c)	impjant approvat tal-prodotti sekondarji tal-annimali għall-qtil u għar-rimi, bl-istess kundizzjonijiet bħal dawk previsti fl-Artikolu 24, l-Artikolu 28(2), (3), (4), (5) u (7) u l-Artikolu 37 tar-Regolament Delegat (UE) 2020/687;

3.2.

moviment tal-laħam frisk mill-annimali porċini miżmuma f’konformità mad-dispożizzjonijiet tal-Artikolu 33(1), il-punt (a), tar-Regolament Delegat (UE) 2020/687 u ta’ prodotti tal-laħam minn annimali porċini miżmuma, inklużi l-budellati, jekk ikunu għaddew minn wieħed mit-trattamenti għall-mitigazzjoni tar-riskju stabbiliti fl-Anness VII tar-Regolament Delegat (UE) 2020/687.

PARTI 4

PERJODI TA’ STENNIJA GĦAS-CSF WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-ASF matul il-perjodu ta’ stennija
tliet xhur wara li l-annimali porċini kollha mlaqqmin ikunu ġew skarnati jew maqtula, minbarra l-annimali porċini miżmuma msemmija fl-Artikolu 13(2) tar-Regolament 2020/687 meta jkun hemm mezzi, ivvalidati f’konformità mal-Manwal Terrestri tad-WOAH, li jiddistingwu bejn annimali porċini miżmuma mlaqqmin u dawk infettati.	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi) f’konformità mal-Artikolu 9(1), il-punt (c)(ii) sa (iv) u l-Parti 2 ta’ dan l-Anness

ANNESS XVII

Id-deni tal-ħnieżer Afrikan (ASF, African swine fever) fl-annimali porċini selvaġġi

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TAT-TILQIM TA’ EMERĠENZA GĦALL-PREVENZJONI U L-KONTROLL TAL-ASF FL-ANNIMALI PORĊINI SELVAĠĠI

Daqs taż-żona tat-tilqim: L-awtorità kompetenti għandha tiddetermina ż-żona tat-tilqim abbażi ta’:

(a)	il-popolazzjoni stmata tal-annimali porċini selvaġġi, id-distribuzzjoni spazjali tagħha u l-istruttura tal-pajsaġġ;

(b)	il-fatturi ta’ riskju li jikkontribwixxu għat-tixrid tal-ASF, b’mod partikolari, ir-riskju li jiġi introdott fl-istabbilimenti tal-annimali porċini miżmuma;

(c)	ir-riżultati tal-kampjunar.

Daqs taż-żona tal-peritilqim: L-ebda kundizzjoni speċifika.

Tip ta’ vaċċin li għandu jintuża jew jingħata prijorità: Vaċċini tal-ASF li għandhom awtorizzazzjoni ċentralizzata għall-kummerċjalizzazzjoni mogħtija mill-Kummissjoni f’konformità mal-Artikolu 44(9) tar-Regolament 2019/6.

Annimali/speċijiet fil-mira: L-annimali porċini selvaġġi tal-ispeċijiet elenkati, f’konformità mar-Regolament ta’ Implimentazzjoni (UE) 2018/1882, fiż-żona tat-tilqim.

Il-kaċċa u attivitajiet oħra li x’aktarx jikkawżaw l-ispostament tal-popolazzjonijiet tal-annimali porċini selvaġġi: Iridu jiġu rregolati fiż-żona tat-tilqim mill-inqas sa tmiem il-perjodu ta’ stennija previst fil-parti 4. L-annimali porċini selvaġġi kkaċċjati jridu jiġu ttestjati b’testijiet ta’ detezzjoni tal-antikorpi u b’testijiet ta’ identifikazzjoni tal-patoġeni.

PARTI 2

Għandha tiġi implimentata sorveljanza speċifika fl-annimali porċini selvaġġi fiż-żona tat-tilqim biex jiġi vverifikat is-suċċess tal-operazzjoni tat-tilqim.

Din is-sorveljanza għandha tinkludi sorveljanza tal-laboratorju msaħħa għall-valutazzjoni tal-livelli ta’ immunità u għad-detezzjoni ta’ kwalunkwe persistenza tal-virus fil-popolazzjoni tal-annimali porċini selvaġġi; dan jinkludi l-identifikazzjoni tal-patoġeni u d-detezzjoni tal-antikorpi fl-annimali porċini selvaġġi kollha kkaċċjati, maqtula u misjuba mejtin jew morda.

PARTI 3

1. Annimali soġġetti għall-projbizzjoni tal-movimenti

Annimali porċini selvaġġi.

2. Prodotti soġġetti għall-projbizzjoni tal-movimenti

3. Il-kundizzjonijiet għall-għoti ta’ deroga f’konformità mal-Artikolu 13(3)

3.1.

(a)	valutazzjoni tar-riskju mwettqa mill-awtorità kompetenti turi li tali moviment ma joħloqx riskju ta’ tixrid tal-ASF;

(b)	l-iġsma ta’ annimali porċini selvaġġi jiġu ttestjati għall-preżenza tal-virus tal-ASF, b’riżultati negattivi miksuba qabel kwalunkwe moviment ulterjuri għall-ipproċessar jew għat-trattament;

(c)	il-moviment tal-iġsma ta’ annimali porċini selvaġġi lejn l-istabbiliment tal-ipproċessar u tal-ħżin isir taħt miżuri stretti ta’ bijosigurtà;

(d)	l-ipproċessar u l-ħżin tal-iġsma ta’ annimali porċini selvaġġi u tal-prodotti derivati tagħhom isiru fi stabbilimenti ddeżinjati mill-awtorità kompetenti, filwaqt li tiġi żgurata l-konformità mal-miżuri ta’ bijosigurtà u ta’ kontroll tal-ASF;

(e)

jew:

(i)	il-prodotti jgħaddu mit-trattamenti għall-mitigazzjoni tar-riskju kif stabbilit fl-Anness VII tar-Regolament Delegat (UE) 2020/687; jew

(ii)

—	għall-użu domestiku privat; jew

—

3.2.

L-awtorità kompetenti għandha tiddokumenta u timmonitorja l-movimenti awtorizzati kollha skont din id-deroga u tiżgura l-konformità mal-kundizzjonijiet stabbiliti fil-punt 3.1.

PARTI 4

PERJODI TA’ STENNIJA GĦAS-CSF WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-ASF matul il-perjodu ta’ stennija
12-il xahar wara d-data tat-tmiem tal-aħħar kampanja ta’ tilqim fl-annimali porċini selvaġġi, u appoġġata mill-konklużjonijiet favorevoli tal-implimentazzjoni ta’ strateġija ta’ ħruġ li wriet in-nuqqas ta’ ċirkolazzjoni tal-virus tal-ASF.	Sorveljanza klinika u tal-laboratorju (identifikazzjoni tal-patoġeni fl-annimali porċini selvaġġi misjuba mejtin jew maqtula) f’konformità mal-Artikolu 9(1), il-punt (c)(ii) sa (iv) u l-Parti 2 ta’ dan l-Anness

ANNESS XVIII

Ġidri tan-nagħaġ u ġidri tal-mogħoż (SPGP, Sheep pox and goat pox)

PARTI 1

KUNDIZZJONIJIET SPEĊIFIĊI GĦALL-IMPLIMENTAZZJONI TA’ TILQIM PROTETTIV TA’ EMERĠENZA GĦALL-PREVENZJONI U L-KONTROLL TAL-ĠIDRI TAN-NAGĦAG U L-ĠIDRI TAL-MOGĦOŻ

Daqs taż-żona tat-tilqim: L-ebda regola speċifika.

Daqs taż-żona tal-peritilqim: L-ebda kundizzjoni speċifika.

Tip ta’ vaċċin li għandu jintuża: L-ebda regola speċifika.

Kopertura minima: Il-kopertura tal-vaċċin trid tkun mill-inqas 95 % tal-istabbilimenti fiż-żona tat-tilqim li jirrappreżentaw mill-inqas 80 % tal-annimali fil-mira fiż-żona tat-tilqim.

Annimali/speċijiet fil-mira: Annimali tal-ispeċijiet elenkati f’konformità mar-Regolament ta’ Implimentazzjoni (UE) 2018/1882 miżmuma fiż-żona tat-tilqim, inklużi mill-inqas annimali ovini u kaprini.

PARTI 2

Sorveljanza klinika msaħħa: sorveljanza għal sinjali kliniċi tal-ġidri tan-nagħaġ u l-ġidri tal-mogħoż kif ukoll għal żieda fil-mortalità fir-ruminanti żgħar.

PARTI 3

Annimali u prodotti tagħhom soġġetti għall-projbizzjoni tal-movimenti:

L-istess annimali u prodotti, li jinsabu fiż-żoni tat-tilqim, bħal dawk soġġetti għal restrizzjonijiet fi stabbilimenti li jinsabu fiż-żoni ta’ protezzjoni u ta’ sorveljanza stabbiliti fil-każ ta’ tifqigħa tal-ġidri tan-nagħaġ u l-ġidri tal-mogħoż, kif previst fl-Artikolu 27 tar-Regolament Delegat (UE) 2020/687.

Prodotti ġerminali soġġetti għall-projbizzjoni tal-ġbir: semen, ooċiti u embrijuni minn annimali tal-ispeċijiet elenkati.

Il-kundizzjonijiet għall-għoti ta’ deroga f’konformità mal-Artikolu 13(2), il-punt (b), l-Artikolu 13(3), u l-Artikolu 13(4).

Il-movimenti li jistgħu jiġu awtorizzati huma dawn li ġejjin:

3.1.

Movimenti tal-annimali mlaqqmin u tal-prodotti tagħhom, bl-istess kundizzjonijiet bħal dawk previsti fl-Artikolu 43 tar-Regolament Delegat (UE) 2020/687.

3.2.

Movimenti tal-annimali mhux imlaqqmin u l-prodotti tagħhom, dment li l-istabbilimenti tal-oriġini tagħhom ma jibqgħux iżommu annimali mlaqqmin.

PARTI 4

PERJODI TA’ STENNIJA GĦALL-ĠIDRI TAN-NAGĦAĠ U L-ĠIDRI TAL-MOGĦOŻ WARA TILQIM PROTETTIV TA’ EMERĠENZA

L-awtorità kompetenti għandha żżomm fiż-żona tat-tilqim il-kundizzjonijiet previsti fil-parti 3 ta’ dan l-Anness sakemm:

Perjodu ta’ stennija	Tip ta’ sorveljanza li għandha tiġi implimentata biex jintwera n-nuqqas ta’ okkorrenza tal-ġidri tan-nagħaġ u l-ġidri tal-mogħoż matul il-perjodu ta’ stennija
30 jum wara d-diżinfezzjoni tal-aħħar stabbiliment affettwat u l-iskarnar jew il-qtil tal-annimali mlaqqmin kollha	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi) f’konformità mal-Artikolu 9(1), il-punt (c)(ii) sa (iv) u l-Parti 2 ta’ dan l-Anness
8 xhur wara l-aħħar tilqim jew id-diżinfezzjoni tal-aħħar stabbiliment affettwat, skont liema jkun seħħ l-aħħar	Sorveljanza klinika u tal-laboratorju (identifikazzjoni tal-patoġeni u detezzjoni tal-antikorpi) f’konformità mal-Artikolu 9(1), il-punt (c)(ii) sa (iv) u l-Parti 2 ta’ dan l-Anness

”

PARTI 4

Il-Lista tal-Annessi hija sostitwita b’dan li ġej:

“LISTA TAL-ANNESSI

L-Anness I dwar il-mard tal-kategorija A u B li għalih l-użu tal-vaċċini għandu jkun ipprojbit mill-Istati Membri u dwar l-użu ta’ ċerti prodotti mediċinali veterinarji, għajr vaċċini, għall-prevenzjoni u l-kontroll tal-mard tal-kategorija A u B.

L-Anness II dwar il-kriterji għall-użu ta’ vaċċin għall-prevenzjoni u l-kontroll ta’ marda tal-kategorija A fl-annimali.

L-Anness III dwar l-informazzjoni li għandha tiġi inkluża fil-pjan uffiċjali ta’ tilqim.

L-Anness IV dwar l-informazzjoni preliminari li għandha tiġi pprovduta lill-Istati Membri l-oħra u lill-Kummissjoni qabel it-tilqim.

L-Anness V dwar ir-rekords minimi rigward it-tilqim.

L-Anness VI dwar l-informazzjoni minima li għandha tiġi pprovduta mill-awtorità kompetenti lil Stati Membri oħra u lill-Kummissjoni dwar l-implimentazzjoni tat-tilqim.

L-Anness VII dwar it-tilqim kontra l-marda tal-ilsien u d-dwiefer (FMD).

L-Anness VIII dwar it-tilqim kontra infezzjoni bil-virus tad-Deni tal-Wied tar-Rift (RVF).

L-Anness IX dwar it-tilqim kontra infezzjoni bil-virus tal-marda tal-infafet fil-ġilda (LSD).

10.

L-Anness X dwar it-tilqim kontra infezzjoni bil-virus tal-pesta tar-ruminanti żgħar (PPR).

11.

L-Anness XI dwar it-tilqim kontra l-marda Afrikana taż-żwiemel (AHS).

12.

L-Anness XII dwar it-tilqim kontra d-deni klassiku tal-ħnieżer (CSF) fl-annimali porċini miżmuma.

13.

L-Anness XIII dwar it-tilqim kontra l-influwenza avjarja b’patoġeniċità għolja (HPAI).

14.

L-Anness XIV dwar it-tilqim kontra infezzjoni bil-virus tal-marda ta’ Newcastle (NCD).

15.

L-Anness XV dwar it-tilqim kontra d-deni klassiku tal-ħnieżer (CSF) fl-annimali porċini selvaġġi.

16.

L-Anness XVI dwar it-tilqim kontra d-deni tal-ħnieżer Afrikan (ASF) fl-annimali porċini miżmuma.

17.

L-Anness XVII dwar it-tilqim kontra d-deni tal-ħnieżer Afrikan (ASF) fl-annimali porċini selvaġġi.

18.

L-Anness XVIII dwar it-tilqim kontra l-ġidri tan-nagħaġ u l-ġidri tal-mogħoż (SPGP).”