(1)

Skont l-Artikolu 3 tar-Regolament ta’ Implimentazzjoni tal-Kummissjoni (UE) 2017/39 (2), l-Istati Membri li jixtiequ jieħdu sehem fl-iskema ta’ għajnuna tal-Unjoni għall-provvista tal-frott u l-ħxejjex għall-iskejjel u tal-ħalib għall-iskejjel fl-istabbilimenti edukattivi (“l-iskema għall-iskejjel”), sal-31 ta’ Jannar ta’ kull sena, iridu jippreżentaw lill-Kummissjoni t-talba tagħhom għall-għajnuna tal-Unjoni b’rabta mas-sena skolastika li jkun imiss u, jekk applikabbli, jaġġornaw it-talba għall-għajnuna tal-Unjoni b’rabta mas-sena skolastika attwali.

(2)

Sabiex tkun żgurata l-implimentazzjoni effettiva tal-iskema għall-iskejjel, l-allokazzjoni tal-għajnuna tal-Unjoni għall-frott u l-ħxejjex għall-iskejjel u għall-ħalib għall-iskejjel fost l-Istati Membri li jieħdu sehem, jenħtieġ li tkun iffissata abbażi tal-ammonti indikati fit-talba għall-għajnuna tal-Unjoni minn dawk l-Istati Membri u tqis it-trasferimenti bejn l-allokazzjonijiet indikattivi tal-Istati Membri msemmija fl-Artikolu 23a(4), il-punt (a), tar-Regolament (UE) Nru 1308/2013 tal-Parlament Ewropew u tal-Kunsill (3).

(3)

L-Istati Membri kollha għarrfu lill-Kummissjoni bit-talba tagħhom għall-għajnuna tal-Unjoni għall-perjodu bejn l-1 ta’ Awwissu 2026 u l-31 ta’ Lulju 2027, u speċifikaw l-ammont tal-għajnuna mitluba għall-frott u l-ħxejjex għall-iskejjel u għall-ħalib għall-iskejjel. Fil-każ tal-Belġju, Malta u n-Netherlands, l-ammonti mitluba qiesu t-trasferimenti bejn l-allokazzjonijiet indikattivi.

(4)

Sabiex jiġi sfruttat il-potenzjal kollu tal-fondi disponibbli, l-għajnuna tal-Unjoni li ma ntalbitx jenħtieġ li tiġi riallokata lil dawk l-Istati Membri li ħadu sehem fl-iskema għall-iskejjel li fit-talba tagħhom għall-għajnuna tal-Unjoni jindikaw li lesti jużaw aktar mill-allokazzjoni indikattiva tagħha jekk ikunu disponibbli riżorsi addizzjonali.

(5)

Il-Bulgarija, iċ-Ċekja, id-Danimarka, il-Ġermanja, l-Estonja, l-Irlanda, Spanja, il-Kroazja, Ċipru, il-Latvja, il-Litwanja, il-Lussemburgu, l-Ungerija, in-Netherlands, l-Awstrija, ir-Rumanija, is-Slovenja u s-Slovakkja għarrfu li lesti jużaw aktar mill-allokazzjoni indikattiva għall-frott u l-ħxejjex għall-iskejjel. Madankollu, l-ebda Stat Membru ma talab anqas mill-allokazzjoni indikattiva għall-frott u l-ħxejjex għall-iskejjel. Il-Bulgarija, iċ-Ċekja, il-Ġermanja, l-Estonja, l-Irlanda, Spanja, il-Kroazja, l-Italja, il-Latvja, il-Litwanja, il-Lussemburgu, l-Awstrija, il-Portugall, ir-Rumanija, is-Slovenja u s-Slovakkja għarrfu li lesti jużaw aktar mill-allokazzjoni indikattiva għall-ħalib għall-iskejjel. Madankollu, l-ebda Stat Membru ma talab anqas mill-allokazzjoni indikattiva għall-ħalib għall-iskejjel.

(6)

Abbażi tal-informazzjoni mgħarrfa mill-Istati Membri, l-allokazzjoni definittiva tal-għajnuna tal-Unjoni għall-frott u l-ħxejjex għall-iskejjel u għall-ħalib għall-iskejjel jenħtieġ li tiġi ffissata għall-perjodu bejn l-1 ta’ Awwissu 2026 u l-31 ta’ Lulju 2027.

(7)

Id-Deċiżjoni ta’ Implimentazzjoni tal-Kummissjoni (UE) 2025/680 (4) iffissat l-allokazzjoni definittiva tal-għajnuna tal-Unjoni għall-frott u l-ħxejjex għall-iskejjel u għall-ħalib għall-iskejjel fost l-Istati Membri li jixtiequ jieħdu sehem fl-iskema għall-iskejjel għall-perjodu bejn l-1 ta’ Awwissu 2025 u l-31 ta’ Lulju 2026.

(8)

Xi Stati Membri aġġornaw it-talba tagħhom għall-għajnuna tal-Unjoni b’rabta mas-sena skolastika 2025/2026: il-Ġermanja u l-Ungerija għarrfu bit-trasferimenti bejn l-allokazzjoni definittiva għall-frott u l-ħxejjex għall-iskejjel u l-allokazzjoni definittiva għall-ħalib għall-iskejjel. Spanja talbet anqas mill-allokazzjoni definittiva għall-frott u l-ħxejjex għall-iskejjel. Iċ-Ċekja, il-Ġermanja, l-Estonja, l-Irlanda, il-Latvja, il-Litwanja, il-Lussemburgu, l-Awstrija, ir-Rumanija u s-Slovakkja għarrfu li lesti jużaw aktar mill-allokazzjoni definittiva għall-frott u l-ħxejjex għall-iskejjel. Spanja u n-Netherlands talbu anqas mill-allokazzjoni definittiva għall-ħalib għall-iskejjel. Iċ-Ċekja, l-Estonja, l-Irlanda, il-Latvja, il-Litwanja, il-Lussemburgu, l-Awstrija, il-Portugall, ir-Rumanija u s-Slovakkja għarrfu li lesti jużaw aktar mill-allokazzjoni definittiva għall-ħalib għall-iskejjel.

(9)

Għalhekk, jenħtieġ li d-Deċiżjoni ta’ Implimentazzjoni (UE) 2025/680 tiġi emendata kif xieraq.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,