(1)

Skont l-Artikolu 11 tar-Regolament (KE) Nru 549/2004, l-Istati Membri jridu jfasslu pjanijiet, fil-livell nazzjonali jew fil-livell tal-blokok ta’ spazju tal-ajru funzjonali (“FABs”, Functional Airspace Blocks), li jinkludu miri ta’ prestazzjoni, għal kull perjodu ta’ referenza tal-iskema ta’ prestazzjoni u ta’ imposti għas-servizzi ta’ navigazzjoni bl-ajru u għall-funzjonijiet tan-network. Dawk il-pjanijiet iridu jinkludu miri ta’ prestazzjoni lokali li huma konsistenti mal-miri ta’ prestazzjoni għall-Unjoni kollha għall-perjodu ta’ referenza kkonċernat.

(2)

Fit-12 ta’ Ġunju 2024, il-Kummissjoni adottat miri ta’ prestazzjoni għall-Unjoni kollha għar-raba’ perjodu ta’ referenza (“RP4”, Fourth Reference Period, 2025–2029). Dawk il-miri ta’ prestazzjoni għall-Unjoni kollha ġew stabbiliti fid-Deċiżjoni ta’ Implimentazzjoni tal-Kummissjoni (UE) 2024/1688 (4).

(3)

Fl-1 ta’ Ottubru 2024, il-Belġju, il-Ġermanja, Franza, il-Lussemburgu, in-Netherlands u l-Iżvizzera (l-“Istati FABEC”) ippreżentaw lill-Kummissjoni abbozz ta’ pjan ta’ prestazzjoni għall-RP4 adottat b’mod konġunt fil-livell tal-Blokk tal-Ispazju tal-Ajru Funzjonali tal-Ewropa Ċentrali (“FABEC”, Functional Airspace Block Europe Central). Wara l-verifika tal-kompletezza ta’ dak l-abbozz tal-pjan ta’ prestazzjoni mill-Kummissjoni, l-Istati tal-FABEC ppreżentaw abbozz aġġornat tal-pjan ta’ prestazzjoni (“l-abbozz tal-pjan ta’ prestazzjoni tal-FABEC”) fil-15 ta’ Novembru 2024.

(4)

Il-Kummissjoni sabet li l-miri ta’ prestazzjoni tal-kosteffiċjenza inklużi fl-abbozz tal-pjan ta’ prestazzjoni tal-FABEC għaż-żoni tal-imposti en route tal-Belġju u tal-Lussemburgu, tal-Ġermanja, tan-Netherlands u tal-Iżvizzera ma jissodisfawx il-kriterji ta’ valutazzjoni stabbiliti fil-punt 1 tal-Anness IV tar-Regolament ta’ Implimentazzjoni (UE) 2019/317 u għalhekk ma humiex konsistenti mal-miri ta’ prestazzjoni għall-Unjoni kollha għall-RP4.

(5)

Fis-16 ta’ Mejju 2025, il-Kummissjoni għalhekk innotifikat lill-Belġju, lill-Ġermanja, lil Franza, lil-Lussemburgu u lin-Netherlands dwar is-sejbiet rigward l-inkonsistenza tal-miri ta’ prestazzjoni msemmija fil-premessa 4 permezz tad-Deċiżjoni ta’ Implimentazzjoni tal-Kummissjoni (UE) 2025/1040 (5), filwaqt li l-Iżvizzera ġiet innotifikata b’dawk is-sejbiet permezz tad-Deċiżjoni ta’ Implimentazzjoni tal-Kummissjoni (UE) 2025/1039 (6). F’dawk id-Deċiżjonijiet, il-Kummissjoni ħarġet rakkomandazzjonijiet lill-Istati tal-FABEC bil-ħsieb li tiġi żgurata l-konsistenza tal-miri ta’ prestazzjoni tagħhom mal-miri ta’ prestazzjoni għall-Unjoni kollha għall-RP4.

(6)

Fl-14 ta’ Awwissu 2025, l-Istati tal-FABEC ippreżentaw abbozz rivedut ta’ pjan ta’ prestazzjoni tal-FABEC għall-RP4 għal valutazzjoni mill-Kummissjoni. Wara l-verifika tal-kompletezza ta’ dak il-pjan, il-Belġju, il-Ġermanja, Franza, il-Lussemburgu, in-Netherlands u l-Iżvizzera ppreżentaw verżjoni aġġornata tal-abbozz rivedut tal-pjan ta’ prestazzjoni (l-“abbozz rivedut tal-pjan ta’ prestazzjoni tal-FABEC”) fis-17 ta’ Ottubru 2025.

(7)

F’konformità mal-Artikolu 15(1) tar-Regolament ta’ Implimentazzjoni (UE) 2019/317, il-Kummissjoni vvalutat il-konsistenza tal-miri ta’ prestazzjoni lokali li hemm fl-abbozz rivedut tal-pjan ta’ prestazzjoni tal-FABEC abbażi tal-kriterji ta’ valutazzjoni stabbiliti fil-punt 1 tal-Anness IV ta’ dak ir-Regolament ta’ Implimentazzjoni, filwaqt li qieset iċ-ċirkostanzi lokali fejn kien rilevanti.

(8)

Din id-Deċiżjoni tippreżenta d-dubji tal-Kummissjoni dwar il-konsistenza tal-miri ta’ prestazzjoni tal-kosteffiċjenza tan-Netherlands inklużi fl-abbozz rivedut tal-pjan ta’ prestazzjoni tal-FABEC mal-miri ta’ prestazzjoni għall-Unjoni kollha għall-RP4.

(9)

Il-valutazzjoni tal-abbozz rivedut tal-pjan ta’ prestazzjoni tal-FABEC mill-Kummissjoni rriżultat ukoll f’dubji dwar il-konsistenza tal-miri ta’ prestazzjoni tal-kosteffiċjenza għaż-żona tal-imposti en route tal-Iżvizzera. Bħala pajjiż terz soġġett għall-iskema ta’ prestazzjoni u ta’ imposti skont il-Ftehim bejn il-Komunità Ewropea u l-Konfederazzjoni Żvizzera dwar it-Trasport bl-Ajru (7), il-Kummissjoni nnotifikat lill-Iżvizzera separatament dwar is-sejbiet relatati u dwar il-ftuħ ta’ eżami ddettaljat dwar il-miri ta’ prestazzjoni tal-kosteffiċjenza għaż-żona tal-imposti tagħha (8).

(10)

Il-Bord ta’ Analiżi tal-Prestazzjoni (PRB, Performance Review Board), li jassisti lill-Kummissjoni fl-implimentazzjoni tal-iskemi ta’ prestazzjoni u ta’ imposti skont l-Artikolu 13(2) tar-Regolament (UE) 2024/2803, ippreżenta lill-Kummissjoni l-opinjoni tiegħu dwar il-miri ta’ prestazzjoni inklużi fl-abbozz rivedut tal-pjan ta’ prestazzjoni tal-FABEC fir-rigward tal-konsistenza ta’ dawk il-miri mal-miri ta’ prestazzjoni għall-Unjoni kollha. Is-sejbiet stabbiliti f’din id-Deċiżjoni kienu bbażati fuq informazzjoni mill-valutazzjoni teknika ddettaljata stabbilita fl-opinjoni tal-PRB (9).

(11)

L-abbozz rivedut tal-pjan ta’ prestazzjoni tal-FABEC jistabbilixxi miri ta’ prestazzjoni tal-kosteffiċjenza riveduti għaż-żona tal-imposti en route tan-Netherlands, flimkien mal-valuri ta’ referenza għall-kost unitarju ddeterminat (DUC, Determined Unit Cost) għas-snin 2019 u 2024. Il-miri ta’ prestazzjoni tal-kosteffiċjenza riveduti u l-valuri ta’ referenza huma ppreżentati fit-tabella ta’ hawn taħt meta mqabbla man-numri korrispondenti inklużi fl-abbozz tal-pjan ta’ prestazzjoni tal-FABEC ippreżentat fl-2024.

(12)

Il-Kummissjoni tinnota li l-miri ta’ prestazzjoni tal-kosteffiċjenza tan-Netherlands ġew riveduti ’l isfel għal kull sena tal-RP4, li jikkostitwixxi titjib meta mqabbel mal-abbozz tal-pjan ta’ prestazzjoni tal-FABEC ippreżentat fl-2024. Dak it-titjib, li jissarraf f’DUC annwali aktar baxx għaż-żona tal-imposti, huwa kompletament dovut għat-tnaqqis tal-kostijiet iddeterminati kif espressi f’termini reali fil-prezzijiet tal-2022 (“EUR 2022”). In-Netherlands irrevedew ukoll ’l isfel il-valuri ta’ referenza għad-DUC inkluż, għall-2024, biex iqisu l-kostijiet reali rreġistrati għas-sena kalendarja.

(13)

Il-kostijiet iddeterminati riveduti għaż-żona tal-imposti f’EUR 2022 huma murija fit-tabella ta’ hawn taħt:

(14)

Kif muri fit-tabella ta’ hawn taħt, il-previżjoni tat-traffiku riveduta applikata għaż-żona tal-imposti tan-Netherlands, li hija bbażata fuq il-previżjoni bażi ta’ STATFOR tal-Eurocontrol ta’ Frar 2025, irriżultat f’għadd aktar baxx ta’ unitajiet ta’ servizzi previsti għal kull sena tal-RP4, meta mqabbla mal-previżjoni tat-traffiku ppreżentata fl-abbozz tal-pjan ta’ prestazzjoni tal-FABEC ippreżentat fl-2024. Għalhekk, ir-reviżjoni tal-previżjoni tat-traffiku għaż-żona tal-imposti kellha impatt negattiv fuq il-kosteffiċjenza, li parzjalment annulla l-effett pożittiv tat-tnaqqis tal-kostijiet iddeterminati msemmija fil-premessi 12 u 13.

(15)

Il-Kummissjoni vvalutat il-konsistenza tal-miri tal-kosteffiċjenza riveduti proposti għaż-żona tal-imposti en route tan-Netherlands abbażi tal-kriterji stabbiliti fil-punti 1.4(a), (b) u (c) tal-Anness IV tar-Regolament ta’ Implimentazzjoni (UE) 2019/317.

(16)

Fir-rigward tal-kriterju stabbilit fil-punt 1.4(a) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li x-xejra tad-DUC en route fil-livell taż-żona tal-imposti ta’ +0,3 % matul l-RP4 hija inqas tajba mix-xejra mal-Unjoni kollha ta’ -1,2 % matul l-istess perjodu.

(17)

Fir-rigward tal-kriterju stabbilit fil-punt 1.4(b) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li x-xejra fit-tul tad-DUC en route fil-livell taż-żona tal-imposti matul it-tielet perjodu ta’ referenza (“RP3”) u l-RP4 ta’ +2,2 % hija inqas tajba mix-xejra fit-tul mal-Unjoni kollha ta’ -1,0 % matul l-istess perjodu.

(18)

In-Netherlands talbu lill-Kummissjoni tikkunsidra l-impatt tal-gwerra ta’ aggressjoni tar-Russja kontra l-Ukrajna bħala parti mill-kalkolu tax-xejra fit-tul tad-DUC en route. Skont in-Netherlands, il-bidliet fit-traffiku li jirriżultaw mill-gwerra fl-Ukrajna wasslu għal tnaqqis strutturali ta’ titjiriet li jgħaddu mill-ispazju tal-ajru Netherlandiż, u għandhom effett negattiv persistenti fuq il-volumi tat-traffiku fl-RP4. In-Netherlands jistmaw li t-telf ta’ titjiriet li jgħaddu mit-territorju minħabba l-impatt tal-gwerra fl-Ukrajna jirrappreżenta 8,4 % tal-unitajiet tas-servizzi taż-żona tal-imposti totali, bl-użu tal-metodoloġija tal-kalkolu applikata mill-PRB fir-rigward ta’ Stati Membri oħra affettwati mill-istess ċirkostanzi.

(19)

Wara li kkunsidrat l-opinjoni tal-PRB, il-Kummissjoni tikkunsidra li hija meħtieġa analiżi ulterjuri, għall-fini tal-kriterju ta’ valutazzjoni msemmi fil-premessa 17, sabiex iġi stabbilit sa liema punt in-Netherlands effettivament ġarrbu telf strutturali ta’ titjiriet li jgħaddu mit-territorju bħala riżultat taċ-ċirkostanzi dovuti għall-gwerra fl-Ukrajna. Tabilħaqq, ma huwiex possibbli li jiġi konkluż f’dan l-istadju jekk il-varjazzjoni osservata fit-traffiku rrapportata min-Netherlands hijiex effettivament dovuta għal bidla fil-flussi tat-traffiku minħabba l-gwerra fl-Ukrajna jew tistax minflok tiġi attribwita għal fatturi oħra. Għalhekk, f’dan l-istadju tal-valutazzjoni, il-Kummissjoni ma kkalkolatx mill-ġdid ix-xejra tad-DUC fit-tul tan-Netherlands fuq l-RP3 u l-RP4 fid-dawl tat-telf strutturali tat-traffiku invokat min-Netherlands bħala konsegwenza tal-gwerra fl-Ukrajna.

(20)

Fir-rigward tal-kriterju stabbilit fil-punt 1.4(c) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li l-valur ta’ referenza għad-DUC ta’ EUR 101,95 tan-Netherlands fl-EUR 2022 huwa 9,0 % ogħla mill-valur ta’ referenza medju ta’ EUR 93,56 fl-EUR 2022 tal-grupp komparatur rilevanti stabbilit fl-Artikolu 7, il-punt (e), tad-Deċiżjoni ta’ Implimentazzjoni (UE) 2024/1688.

(21)

Fir-rigward tal-kriterju ta’ valutazzjoni msemmi fil-premessa 20, fl-abbozz rivedut tal-pjan ta’ prestazzjoni tal-FABEC in-Netherlands iqisu li jenħtieġ li titqies id-differenza osservata fil-parità tal-kapaċità tal-akkwist bejn l-Istati fil-grupp komparatur. Wara li titqies l-opinjoni tal-PRB, hija meħtieġa analiżi aktar iddettaljata sabiex jiġi vvalutat l-impatt tad-differenzi invokati tal-parità tal-kapaċità tal-akkwist fuq il-bażijiet tal-kostijiet tal-fornituri tas-servizzi tan-navigazzjoni bl-ajru (ANSPs, Air Navigation Service Providers) ikkonċernati. Tali analiżi ulterjuri jenħtieġ li tikkunsidra wkoll kwalunkwe fattur operazzjonali jew ekonomiku rilevanti ieħor li jkollu impatt sinifikanti fuq il-komparabbiltà bejn l-ANSPs fil-grupp komparatur stabbilit fl-Artikolu 7, il-punt (e), tad-Deċiżjoni ta’ Implimentazzjoni (UE) 2024/1688.

(22)

Barra minn hekk, il-Kummissjoni eżaminat jekk id-devjazzjonijiet imsemmija fil-premessi 16, 17 u 20 jistgħux jitqiesu meħtieġa u proporzjonati f’konformità mal-punt 1.4(d) tal-Anness IV tar-Regolament ta’ Implimentazzjoni (UE) 2019/317. Għalhekk, il-Kummissjoni vvalutat jekk id-devjazzjonijiet osservati mix-xejra tad-DUC għall-Unjoni kollha u mix-xejra fit-tul tad-DUC għall-Unjoni kollha msemmija fil-premessi 16 u 17 humiex esklużivament dovuti għal kostijiet iddeterminati addizzjonali relatati mal-miżuri meħtieġa għall-kisba tal-miri ta’ prestazzjoni fil-qasam ewlieni tal-prestazzjoni tal-kapaċità jew għal kostijiet tar-ristrutturar skont it-tifsira tal-Artikolu 2, il-punt (18), tar-Regolament ta’ Implimentazzjoni (UE) 2019/317.

(23)

Il-PRB ikkalkula d-differenzi stmati bejn il-kostijiet iddeterminati għall-RP4 stabbiliti min-Netherlands fl-abbozz rivedut tal-pjan ta’ prestazzjoni tal-FABEC u l-kostijiet iddeterminati li jkunu meħtieġa biex tiġi ssodisfata x-xejra tad-DUC għall-Unjoni kollha għall-RP4 u x-xejra fit-tul tad-DUC għall-Unjoni kollha għall-RP3 u għall-RP4 flimkien. Abbażi tas-sejbiet tal-PRB, il-kostijiet iddeterminati totali għall-RP4 proposti min-Netherlands huma madwar EUR 77,1 M inqas f’EUR 2022 mil-livell meħtieġ biex tiġi ssodisfata x-xejra tad-DUC għall-Unjoni kollha, li tirrappreżenta diskrepanza annwali medja ta’ EUR 15,4 M f’EUR 2022. Differenza aktar sinifikanti li tammonta matul l-RP4 kollu għal madwar EUR 370 M f’EUR 2022 hija osservata meta mqabbla mal-livell meħtieġ biex tiġi ssodisfata x-xejra fit-tul tad-DUC għall-Unjoni kollha, li tikkorrispondi għal diskrepanza medja annwali ta’ madwar EUR 74 M f’EUR 2022.

(24)

Fir-rigward tal-kriterju stabbilit fil-punt 1.4(d)(i) tal-Anness IV tar-Regolament ta’ Implimentazzjoni (UE) 2019/317, il-Kummissjoni tinnota li fl-abbozz rivedut tal-pjan ta’ prestazzjoni tal-FABEC, in-Netherlands jirreferu għall-kostijiet iddeterminati addizzjonali mġarrba matul l-RP4 mill-ANSPs en route, il-Kontroll tat-Traffiku tal-Ajru fin-Netherlands (LVNL, Luchtverkeersleiding Nederland) u ċ-Ċentru ta’ Kontroll taż-Żona Superjuri ta’ Maastricht (MUAC, Maastricht Upper Area Control Centre), b’rabta mal-miżuri għall-kisba tal-miri tal-kapaċità (“miżuri tal-kapaċità”).

(25)

In-Netherlands ifakkru, fl-abbozz rivedut tal-pjan ta’ prestazzjoni tal-FABEC, li l-LVNL u l-MUAC jipprovdu servizzi fi spazju tal-ajru kumpless ħafna u mħaddem b’densità għolja. Skont in-Netherlands, l-enfasi matul l-RP4 hija li tinżamm kwalità għolja ta’ servizzi lill-utenti tal-ispazju tal-ajru fil-kuntest taż-żieda kostanti tat-traffiku prevista. Għal dan l-għan, kemm l-LVNL kif ukoll l-MUAC għandhom iħarrġu u jirreklutaw għadd sinifikanti ta’ kontrolluri tat-traffiku tal-ajru (ATCOs, Air Traffic Controllers) ġodda u jimplimentaw firxa ta’ investimenti li jsaħħu l-kapaċità fis-sistemi u fil-kunċetti operazzjonali. In-Netherlands jindikaw li t-tnaqqis jew id-dewmien tal-miżuri tal-kapaċità ppjanati ikun iwassal għal deterjorament tal-kwalità tas-servizzi fl-ispazju tal-ajru Netherlandiż u jista’ jkollu wkoll effetti kollaterali detrimentali fuq in-network Ewropew tal-ġestjoni tat-traffiku tal-ajru b’mod ġenerali.

(26)

Barra minn hekk, in-Netherlands jenfasizzaw li l-livelli ta’ servizz meħtieġa għas-servizzi tan-navigazzjoni bl-ajru fl-ispazju tal-ajru Netherlandiż, inkluż f’termini ta’ persunal u investimenti, huma ddeterminati abbażi tad-domanda tat-traffiku tal-ħinijiet l-aktar intensivi. L-operazzjonijiet tas-servizzi tan-navigazzjoni bl-ajru (ANS, Air Navigation Services) huma ddisinjati biex jakkomodaw, bi grad għoli ta’ affidabbiltà operazzjonali, il-livelli massimi konsekuttivi tal-wasla u tat-tluq tal-Ajruport ta’ Schiphol ta’ Amsterdam, segwiti minn perjodi ta’ domanda tat-traffiku aktar baxxa, matul jum tal-operazzjonijiet regolari. In-Netherlands jirrapportaw li d-domanda tat-traffiku matul il-ħinijiet l-aktar intensivi laħqet il-livelli tagħha ta’ qabel il-COVID, filwaqt li l-volum ġenerali tat-traffiku fl-ispazju tal-ajru Netherlandiż għadu f’livell aktar baxx.

(27)

In-Netherlands jispjegaw li d-domanda tat-traffiku tal-ħinijiet l-aktar intensivi fl-Ajruport ta’ Schiphol ta’ Amsterdam hija ogħla b’mod sinifikanti milli fl-ajruporti primarji tal-Istati l-oħra inklużi fil-grupp komparatur imsemmi fil-premessa 20. In-Netherlands jistmaw li l-konsenja mil-LVNL tal-kapaċità tal-ħinijiet l-aktar intensivi meħtieġa biex takkomoda t-traffiku lejn u mill-Ajruport ta’ Schiphol ta’ Amsterdam, tirrappreżenta kost annwali addizzjonali ta’ madwar EUR 40 M. Ma kienx possibbli għall-PRB, abbażi tal-informazzjoni disponibbli, li jivverifika dik l-istima u s-suppożizzjonijiet sottostanti. Għadu wkoll mhux ċar jekk dak l-ammont ġiex ikkalkolat b’rabta mal-forniment ta’ servizzi tan-navigazzjoni bl-ajru en route biss jew jekk jinkludix ukoll il-kostijiet relatati mas-servizzi tan-navigazzjoni bl-ajru fit-terminal. Għalhekk, huma meħtieġa informazzjoni u analiżi ulterjuri sabiex issir konklużjoni rigward din il-kwistjoni.

(28)

Il-Kummissjoni tosserva li n-Netherlands ippreżentaw u kkwantifikaw total ta’ seba’ miżuri tal-kapaċità għal-LVNL u għall-MUAC fl-abbozz rivedut tal-pjan ta’ prestazzjoni tal-FABEC. Matul l-RP4 kollu kemm hu, dawk il-miżuri tal-kapaċità jammontaw għal kostijiet iddeterminati ta’ EUR 159,9 M espressi f’termini reali fil-prezzijiet tal-2022. Minn dawk il-kostijiet iddeterminati addizzjonali rrapportati, 84 % huma relatati mal-miżuri tal-kapaċità stabbiliti mil-LVNL, filwaqt li l-miżuri tal-kapaċità implimentati mill-MUAC jirrappreżentaw biss sehem ta’ 16 %.

(29)

Il-Kummissjoni inizjalment eżaminat u analizzat hawn taħt il-miżuri tal-kapaċità li ġejjin irrapportati min-Netherlands fir-rigward tal-LVNL u tal-MUAC:

(30)

Il-Miżura 1 tinkludi t-taħriġ ta’ ATCOs ġodda mil-LVNL għaċ-ċentru ta’ kontroll tal-erja (ACC, Area Control Centre) tiegħu, primarjament biex jissostitwixxu l-għadd sinifikanti ta’ ATCOs ippjanati li jirtiraw matul l-RP4 iżda wkoll biex jakkomodaw it-tkabbir tat-traffiku previst u biex jappoġġaw il-modernizzazzjoni tas-sistemi. L-LVNL qed jippjana reklutaġġ annwali ta’ 27 student tal-ATCO u għandu l-għan li jkollu rata medja ta’ suċċess ta’ aktar minn 75 % għat-taħriġ. L-għadd ta’ ATCOs li jaħdmu f’setturi en route fl-ACC ta’ Amsterdam huwa mistenni li jiżdied minn 82 ekwivalenti għall-full time (FTEs, Full-Time Equivalents) fl-2024 għal 85 FTEs fl-2029, u b’hekk juri żieda moderata ta’ 3 FTEs matul l-RP4. Il-kostijiet meqjusa fl-ambitu tal-Miżura 1 jinkludu kemm is-salarji tal-istudenti tal-ATCO kif ukoll kostijiet oħra mġarrba fir-rigward tat-taħriġ tagħhom.

(31)

Il-Miżura 1 tinkludi wkoll l-iżvilupp ulterjuri mil-LVNL tal-faċilitajiet ta’ taħriġ tiegħu, is-simulaturi tat-taħriġ fil-kontroll tat-traffiku tal-ajru u l-applikazzjonijiet relatati. B’riżultat ta’ dan, huwa mistenni b’mod partikolari li sehem akbar mit-taħriġ tal-ATCO se jitwettaq permezz ta’ simulaturi tal-kontroll tat-traffiku tal-ajru mtejba bħala attivitajiet ta’ “apprendiment awtonomu”, u b’hekk titnaqqas il-ħtieġa ta’ taħriġ fuq il-post tax-xogħol aktar intensiv fl-użu tar-riżorsi li jinvolvi għalliema, jiġifieri ATCOs liċenzjati. Dan it-titjib huwa rrapportat li jżid il-kapaċità tat-taħriġ, u b’hekk jappoġġa l-impjieg ta’ għadd adegwat ta’ ATCOs biex jintlaħqu l-miri tal-kapaċità tal-RP4.

(32)

Il-Miżura 1 tirrappreżenta kost totali ta’ aktar minn EUR 88,1 M f’termini nominali matul l-RP4. Il-Kummissjoni tinnota li l-Miżura 1 waħedha tammonta għal madwar nofs il-kostijiet totali tal-miżuri tal-kapaċità (inklużi kemm l-LVNL kif ukoll il-MUAC) invokati min-Netherlands.

(33)

Il-Miżura 2 tinkludi l-kostijiet imġarrba għall-varar mil-LVNL ta’ sistema ġdida tal-ATM, imsejħa “ICAS”.

(34)

Is-sistema l-ġdida tal-ATM ICAS hija mistennija li twassal għal titjib tekniku kbir li jippermetti kapaċità akbar tal-ispazju tal-ajru u li jippermetti l-implimentazzjoni ta’ soluzzjonijiet operazzjonali avvanzati bħall-operazzjonijiet ibbażati fuq it-trajettorja 4D u l-ġestjoni tat-tagħrif mifruxa mas-sistema kollha. L-implimentazzjoni tas-sistema ICAS hija ppjanata wkoll biex tappoġġa l-istrutturar u l-użu ottimali tal-ispazju tal-ajru Netherlandiż, segwiti permezz tal-Programm Netherlandiż ta’ Tfassil mill-Ġdid tal-Ispazju tal-Ajru. Barra minn hekk, se tipprovdi interfaċċa diretta mas-Sistema Lokali u Sottoreġjonali għall-Ġestjoni tal-Ispazju tal-Ajru u għall-Prenotazzjoni tal-Ispazju tal-Ajru (LARA, Local and Sub-Regional Airspace Management Airspace Reservation System) tal-Eurocontrol.

(35)

Il-proġett li għandu l-għan li jvara s-sistema tal-ATM ICAS diġà tnieda fl-RP3. Madankollu, il-proġett iffaċċja dewmien minħabba ċ-ċirkostanzi kkawżati mill-pandemija tal-COVID-19 u minħabba sforzi addizzjonali meħtieġa għat-tranżizzjoni mis-sistema eżistenti tal-ATM tal-LVNL. Is-sistema l-ġdida tal-ATM ICAS hija, skont l-informazzjoni fl-abbozz rivedut tal-pjan ta’ prestazzjoni tal-FABEC, ippjanata li tibda topera sa mhux aktar tard mill-2028.

(36)

Il-kostijiet irrapportati għall-Miżura 2 jammontaw għal madwar EUR 33,7 M f’termini nominali matul l-RP4.

(37)

Il-Miżura 3 tinkludi bosta titjibiet operazzjonali distinti u aġġornamenti tekniċi mwettqa mil-LVNL fl-RP4, inklużi b’mod partikolari l-elementi li ġejjin:

(38)

Il-Miżura 3 ġiet miżjuda min-Netherlands fl-abbozz rivedut tal-pjan ta’ prestazzjoni tal-FABEC bħala ġustifikazzjoni addizzjonali għad-devjazzjonijiet osservati mix-xejriet tad-DUC għall-Unjoni kollha. Il-kostijiet irrapportati taħt il-Miżura 3 huma primarjament relatati mad-deprezzament tas-sistemi tekniċi rilevanti, u jammontaw għal total ta’ madwar EUR 26,5 M f’termini nominali matul l-RP4.

(39)

Il-Miżura 4 tikkonċerna t-taħriġ ta’ ATCOs ġodda mill-MUAC għall-fini li jiġi żgurat li l-livelli ġenerali tal-persunal tal-ATCO tagħha jibqgħu adegwati biex jakkomodaw id-domanda dejjem tikber tat-traffiku matul l-RP4 u lil hinn minnu.

(40)

Skont l-informazzjoni pprovduta fl-abbozz rivedut tal-pjan ta’ prestazzjoni tal-FABEC, l-MUAC se jiffaċċja għadd kbir ta’ ATCOs li jitilqu mis-servizz operazzjonali matul il-bqija tal-RP4, minħabba li terz tal-ATCOs kollha impjegati mill-MUAC qed joqorbu lejn l-età tal-irtirar. Għalhekk, it-taħriġ ta’ ATCOs ġodda mill-MUAC se jkollu l-għan ewlieni li jissostitwixxi l-ġenerazzjoni ta’ ATCOs kurrenti li se jirtiraw fis-snin li ġejjin.

(41)

Ma hemm l-ebda diżaggregazzjoni, fl-abbozz rivedut tal-pjan ta’ prestazzjoni tal-FABEC, tal-għadd ta’ ATCOs tal-MUAC bejn iż-żoni tal-imposti tal-Belġju-Lussemburgu, tal-Ġermanja u tan-Netherlands. B’mod ġenerali, għall-MUAC kollu kemm hu, l-għadd ta’ ATCOs fl-operazzjonijiet huwa ppjanat li jiżdied minn 296 FTE fl-2024 għal 306 FTEs fl-2029, li għalhekk jammonta għal żieda ta’ 10 FTEs matul l-RP4.

(42)

In-Netherlands irrapportaw, għaż-żona tal-imposti tagħhom, kost totali ta’ EUR 18,5 M f’termini nominali matul l-RP4 għall-Miżura 4.

(43)

Il-Miżura 5 tinkludi firxa wiesgħa ta’ proġetti operazzjonali u tekniċi mnedija mill-MUAC bl-għan li tittejjeb il-kapaċità tal-ispazju tal-ajru u użu effiċjenti tal-ispazju tal-ajru. Dawk il-proġetti huma maqsuma, fl-abbozz rivedut tal-pjan ta’ prestazzjoni tal-FABEC, fil-kategoriji li ġejjin:

(44)

Għalkemm it-tliet kategoriji ta’ azzjonijiet mill-MUAC imsemmija hawn fuq huma rrapportati separatament fl-abbozz rivedut tal-pjan ta’ prestazzjoni tal-FABEC, il-proġetti relatati ġew raggruppati flimkien mill-Kummissjoni taħt il-Miżura 5 sabiex jiġi ffaċilitat ir-rieżami ġenerali tagħhom. L-azzjonijiet ippreżentati taħt il-Miżura 5 flimkien jammontaw għal kost totali ta’ EUR 9,4 M f’termini nominali matul l-RP4.

(45)

B’mod ġenerali, il-ħames miżuri tal-kapaċità invokati min-Netherlands biex jiġġustifikaw devjazzjoni mix-xejriet tal-kosteffiċjenza għall-Unjoni kollha huma sinifikanti kemm f’termini ta’ daqs kif ukoll f’termini ta’ impatt finanzjarju. Analiżi aktar iddettaljata ta’ dawk il-miżuri tal-kapaċità hija meħtieġa biex jiġu vvalutati l-ambitu, il-kostijiet u l-proporzjonalità tagħhom fid-dawl tal-kisba tal-miri tal-kapaċità.

(46)

Mingħajr preġudizzju għall-eżitu tal-analiżi ulterjuri msemmija fil-premessa 45, xorta jibqa’ l-fatt li l-kostijiet addizzjonali rrapportati min-Netherlands għall-miżuri tal-kapaċità msemmija fil-premessi 29 sa 44 jiġġustifikaw biss parzjalment id-diskrepanza annwali medja osservata matul l-RP4 mix-xejra tal-kosteffiċjenza fit-tul għall-Unjoni kollha kif ikkwantifikata fil-premessa 23. Għalhekk, dik id-devjazzjoni ma tistax tiġi attribwita esklużivament għall-kostijiet iddeterminati addizzjonali tal-miżuri tal-kapaċità ppreżentati, irrispettivament minn jekk dawk il-miżuri humiex fl-intier tagħhom meqjusa meħtieġa u proporzjonati għall-kisba tal-miri tal-kapaċità lokali.

(47)

B’hekk, il-kriterju stabbilit fil-punt 1.4(d)(i) tal-Anness IV tar-Regolament ta’ Implimentazzjoni (UE) 2019/317 ma huwiex issodisfat fir-rigward tan-Netherlands.

(48)

Fir-rigward tal-kriterju stabbilit fil-punt 1.4(d)(ii) tal-Anness IV tar-Regolament ta’ Implimentazzjoni (UE) 2019/317, huwa biżżejjed li jissemma li fl-abbozz rivedut tal-pjan ta’ prestazzjoni tal-FABEC, in-Netherlands ma ppreżentaw l-ebda miżura ta’ ristrutturar li tkun tiġġustifika devjazzjoni mix-xejra tad-DUC għall-Unjoni kollha jew mix-xejra fit-tul tad-DUC għall-Unjoni kollha. B’hekk, il-kriterju stabbilit fil-punt 1.4(d)(ii) ma huwiex issodisfat fir-rigward tan-Netherlands.

(49)

Bħala konklużjoni, il-Kummissjoni tikkunsidra li n-Netherlands ma indirizzawx b’mod adegwat, fl-abbozz rivedut tal-pjan ta’ prestazzjoni tal-FABEC, ir-rakkomandazzjonijiet stabbiliti fl-Artikolu 3 tad-Deċiżjoni ta’ Implimentazzjoni (UE) 2025/1040 fir-rigward tal-miri tal-prestazzjoni tal-kosteffiċjenza għaż-żona tal-imposti en route tagħhom.

(50)

B’mod partikolari, il-Kummissjoni tinnota li l-miri ta’ prestazzjoni tal-kosteffiċjenza riveduti proposti min-Netherlands la huma konsistenti max-xejra tad-DUC tal-RP4 għall-Unjoni kollha, u lanqas max-xejra fit-tul tad-DUC għall-Unjoni kollha. Il-Kummissjoni tosserva wkoll li l-kostijiet iddeterminati għaż-żona tal-imposti ma tnaqqsux b’mod suffiċjenti bil-ħsieb li tiġi żgurata l-konsistenza mal-miri ta’ prestazzjoni għall-Unjoni kollha.

(51)

Fl-aħħar, il-Kummissjoni ma sabitx, abbażi tal-elementi u tal-ġustifikazzjonijiet ipprovduti fl-abbozz rivedut tal-pjan ta’ prestazzjoni tal-FABEC, li d-devjazzjoni mix-xejra fit-tul tad-DUC għall-Unjoni kollha tista’ tiġi attribwita esklużivament għal kostijiet addizzjonali mġarrba għal miżuri tal-kapaċità. Informazzjoni u analiżi ulterjuri jkunu meħtieġa sabiex jiġu eżaminati kunsiderazzjonijiet operazzjonali u ekonomiċi oħra li tqajmu min-Netherlands biex jiġġustifikaw id-devjazzjonijiet osservati fil-premessi 16, 17 u 20 fir-rigward tal-kriterji tal-valutazzjoni stabbiliti fil-punti 1.4(a), (b) u (c) tal-Anness IV tar-Regolament ta’ Implimentazzjoni (UE) 2019/317.

(52)

Abbażi tas-sejbiet stabbiliti fil-premessi 15 sa 51, il-Kummissjoni għalhekk tikkunsidra, f’dan l-istadju tal-valutazzjoni tal-abbozz rivedut tal-pjan ta’ prestazzjoni tal-FABEC, li għad hemm dubji dwar il-konsistenza tal-miri ta’ prestazzjoni tal-kosteffiċjenza riveduti proposti min-Netherlands.

(53)

Għalhekk, il-Kummissjoni ddeċidiet li tibda l-eżami ddettaljat stabbilit fl-Artikolu 15(3) tar-Regolament ta’ Implimentazzjoni (UE) 2019/317 fir-rigward tal-miri ta’ prestazzjoni tal-kosteffiċjenza għaż-żona tal-imposti en route tan-Netherlands,