(1)

Il-linji gwida li jinsabu fl-Arranġament dwar il-Krediti għall-Esportazzjoni Uffiċjalment Appoġġati (“l-Arranġament”), żviluppati fil-qafas tal-Organizzazzjoni għall-Kooperazzjoni u l-Iżvilupp Ekonomiċi (OECD), inkluż il-Ftehim Settorjali dwar il-Krediti għall-Esportazzjoni għall-Inġenji tal-Ajru Ċivili (“il-Ftehim Settorjali għall-Inġenji tal-Ajru”) stabbilit fl-Anness III tal-Arranġament, ġew trasposti, u għalhekk saru legalment vinkolanti fl-Unjoni permezz tar-Regolament (UE) Nru 1233/2011 tal-Parlament Ewropew u tal-Kunsill (1).

(2)

F’konformità mat-Taqsima 2 tal-Appendiċi II tal-Ftehim Settorjali għall-Inġenji tal-Ajru, il-Firxiet ta’ Kreditu Medjani (“MCS”) huma wħud mill-inputs meħtieġa biex jinkiseb il-Ħlas Addizzjonali li Jirrifletti s-Suq li għandu jiġi applikat għall-kalkolu tar-Rati Minimi tal-Primjum għal tranżazzjonijiet soġġetti għall- Ftehim Settorjali għall-Inġenji tal-Ajru. Id-data użata għad-determinazzjoni tal-MCS kienet preċedentement ipprovduta fuq il-London Interbank Offered Rate (“LIBOR”). Wara l-waqfien tal-LIBOR, dik id-data bħalissa qed tiġi pprovduta fuq ir-Rata ta’ Finanzjament Garantita mil-Lum għall-Għada (“SOFR”). Il-bidla fir-rata bażi kkawżata mill-qlib minn LIBOR għal SOFR irriżultat f’valur miżjud għall-MCS, u b’hekk ippenalizzat il-primjum tar-riskju.

(3)

Il-Parteċipanti fil-Ftehim Settorjali għall-Inġenji tal-Ajru (il-“Parteċipanti”) għandhom jiddeċiedu, permezz ta’ proċedura bil-miktub, dwar emendi fl-Artikolu 28 tal-Appendiċi II għall-Ftehim Settorjali għall-Inġenji tal-Ajru. li jintroduċu Firxa ta’ Aġġustament tal-Kreditu permanenti ta’ -29 bps għall-kalkolu tal-Ħlas Addizzjonali li Jirrifletti s-Suq. Għalhekk, dawk l-emendi jikkumpensaw għaż-żieda fl-MCS li tirriżulta mill-bidla fir-rata bażi meta jaqilbu minn LIBOR għal SOFR u jipprovdu prevedibbiltà għall-manifatturi tal-inġenji tal-ajru u għal utenti oħrajn tal-Ftehim Settorjali għall-Inġenji tal-Ajru.

(4)

Jixraq li tiġi stabbilita l-pożizzjoni li għandha tittieħed f’isem l-Unjoni matul il-proċedura bil-miktub għall-adozzjoni tad-deċiżjoni tal-Parteċipanti dwar emendi għall-Artikolu 28 tal-Appendiċi II għall-Ftehim Settorjali għall-Inġenji tal-Ajru, peress li dik id-deċiżjoni ser tkun vinkolanti fuq l-Unjoni u tista’ tinfluwenza b’mod deċiżiv il-kontenut tad-dritt tal-Unjoni, permezz tar-Regolament (UE) Nru 1233/2011.

(5)

Jenħtieġ għalhekk li l-pożizzjoni tal-Unjoni tkun li tappoġġa l-emendi tal-Ftehim Settorjali għall-Inġenji tal-Ajru kif speċifikati fl-abbozz tal-emendi għall-Artikolu 28 tal-Appendiċi II għall-Ftehim Settorjali għall-Inġenji tal-Ajru mehmuż ma’ din id-Deċiżjoni,