(1)

Fid-29 ta’ Lulju 2025, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet tar-raden tal-poliammid li joriġinaw mir-Repubblika tal-Poplu taċ-Ċina (“RPĊ” jew “il-pajjiż ikkonċernat”) abbażi tal-Artikolu 5 tar-Regolament bażiku. Hija ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (2) (“in-Notifika ta’ Bidu”).

(2)

Il-Kummissjoni bdiet l-investigazzjoni wara lment imressaq fis-16 ta’ Ġunju 2025 mill-Koalizzjoni Ad Hoc tal-Produtturi Ewropej tar-Raden tal-Poliammid (“l-ilmentaturi” jew “il-Koalizzjoni”). L-ilment sar f’isem l-industrija tal-Unjoni tar-raden tal-poliammid fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta li kienet biżżejjed sabiex tiġġustifika l-bidu tal-investigazzjoni.

(3)

Il-Kummissjoni għamlet l-importazzjonijiet tal-prodott ikkonċernat soġġetti għar-reġistrazzjoni permezz tar-Regolament ta’ Implimentazzjoni tal-Kummissjoni (UE) 2025/1984 (3) (“ir-Regolament dwar ir-reġistrazzjoni”).

(4)

Fin-Notifika tal-Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni informat speċifikament lill-ilmentaturi, lil produtturi magħrufin oħra tal-Unjoni, lill-produtturi esportaturi magħrufin u lill-awtoritajiet Ċiniżi, lill-importaturi, lill-fornituri u lill-utenti magħrufin, lin-negozjanti, kif ukoll lill-assoċjazzjonijiet li kien magħruf li kienu kkonċernati, dwar il-bidu tal-investigazzjoni, u stednithom jieħdu sehem.

(5)

Il-partijiet interessati kellhom l-opportunità li jikkummentaw dwar il-ftuħ tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(6)

Il-Kummissjoni rċeviet kummenti dwar il-bidu mingħand żewġ partijiet interessati: wieħed mill-utenti tal-prodott taħt investigazzjoni (Spitfil) u l-assoċjazzjoni li tirrappreżenta lill-produtturi Ewropej tal-fibri u tar-raden immanifatturati minn polimeri organiċi (CIRFS, European Man-Made Fibres Association).

(7)

Fil-kummenti tiegħu dwar il-bidu (4), Spitfil għamel osservazzjoni ġenerali li ċerti tipi ta’ raden tal-poliammid importati miċ-Ċina, użati esklużivament għall-proċessi ta’ niting maqsum għall-medd għal drappijiet innittjati fil-medd, ma humiex prodotti fl-Unjoni. Aktar tard, il-kumpanija segwiet bit-talba formali għall-esklużjoni mill-ambitu tal-prodott kif deskritt fit-Taqsima 2.4 aktar ’il quddiem.

(8)

Fil-kummenti tagħha dwar il-bidu (5), CIRFS appoġġat l-evidenza sottomessa fl-ilment fir-rigward tad-dannu materjali, li kienet ta’ theddida għall-eżistenza propja tas-settur tal-manifattura tar-raden tal-poliammid tal-Unjoni, ikkawżata mill-importazzjonijiet bi prezz baxx u allegatament oġġetti ta’ dumping miċ-Ċina. L-assoċjazzjoni ħeġġet lill-Kummissjoni biex tiżgura li l-livell ta’ miżuri anti-dumping potenzjali jkun biżżejjed biex jiġu nnewtralizzati bis-sħiħ il-prattiki ta’ dumping u biex jerġa’ jkun hemm kundizzjonijiet ekwi.

(9)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(10)

Fin-Notifika tal-Bidu tagħha, il-Kummissjoni ddikjarat li hija kienet għażlet b’mod proviżorju kampjun tal-produtturi tal-Unjoni. Il-Kummissjoni għażlet kampjun fuq il-bażi tal-produzzjoni u tal-bejgħ. Il-kampjun kien fih tliet produtturi tal-Unjoni u kien jirrappreżenta madwar 44,4 % tal-produzzjoni totali stmata tal-Unjoni u 37,4 % tal-kwantità ta’ bejgħ totali stmat tal-Unjoni tal-prodott taħt rieżami. Il-Kummissjoni stiednet lill-partijiet interessati biex jikkummentaw dwar il-kampjun proviżorju.

(11)

Wara l-għażla proviżorja tal-kampjun, l-ilmentatur ippropona li l-kampjun jitnaqqas għal żewġ produtturi biss, li l-volum tal-produzzjoni u tal-bejgħ tagħhom xorta jkun rappreżentattiv biżżejjed. Madankollu, il-Kummissjoni ddeċidiet li żżomm l-għażla proviżorja tagħha, filwaqt li qieset ukoll il-firxa ġeografika tal-kumpaniji inklużi fil-kampjun u kopertura usa’ tat-tipi ta’ prodotti mmanifatturati. Il-kampjun huwa rappreżentattiv tal-industrija tal-Unjoni.

(12)

Biex tiddeċiedi jekk kienx meħtieġ li jittieħed kampjun u, jekk iva, biex tagħżel kampjun, il-Kummissjoni staqsiet lil importaturi mhux relatati sabiex jipprovdu l-informazzjoni speċifikata fin-Notifika tal-Bidu.

(13)

L-ebda importatur mhux relatat ma pprovda l-informazzjoni mitluba jew qabel li jiġi inkluż fil-kampjun. Għalhekk, il-Kummissjoni ma għażlet l-ebda kampjun ta’ importaturi.

(14)

Sabiex tiddeċiedi jekk il-kampjunar kienx neċessarju u, jekk iva, biex tagħżel kampjun, il-Kummissjoni talbet lill-produtturi esportaturi kollha fir-RPĊ biex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(15)

Tmintax-il produttur esportatur fil-pajjiż ikkonċernat ipprovdew l-informazzjoni mitluba u qablu li jiġu inklużi fil-kampjun. F’konformità mal-Artikolu 17(1) tar-Regolament bażiku, il-Kummissjoni għażlet kampjun ta’ żewġ produtturi esportaturi abbażi tal-akbar volum rappreżentattiv ta’ esportazzjonijiet lejn l-Unjoni li seta’ jiġi investigat b’mod raġonevoli fiż-żmien disponibbli. F’konformità mal-Artikolu 17(2) tar-Regolament bażiku, il-produtturi esportaturi magħrufin kollha kkonċernati, u l-awtoritajiet tal-pajjiż ikkonċernat, ġew ikkonsultati dwar l-għażla tal-kampjun. L-ebda kumment dwar l-għażla tal-kampjun ma ġie sottomess.

(16)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(17)

Barra minn hekk, l-ilmentatur fl-ilment ipprovda biżżejjed evidenza prima facie ta’ distorsjonijiet fil-materja prima fir-RPĊ fir-rigward tal-prodott ikkonċernat. Għaldaqstant, kif tħabbar fin-Notifika ta’ Bidu, l-investigazzjoni kopriet dawk id-distorsjonijiet fil-materja prima biex tiddetermina jekk għandhomx jiġu applikati d-dispożizzjonijiet tal-Artikolu 7(2a) u 7(2b) tar-Regolament bażiku fir-rigward tar-RPĊ. Għal din ir-raġuni, il-Kummissjoni bagħtet kwestjonarji addizzjonali f’dan ir-rigward lill-GTĊ.

(18)

Il-Kummissjoni bagħtet ukoll kwestjonarji lill-produtturi tal-Unjoni u lill-produtturi esportaturi Ċiniżi. L-istess kwestjonarji, kif ukoll kwestjonarji għall-importaturi tal-Unjoni u għall-utenti tal-Unjoni kienu saru disponibbli online (6) fil-jum tal-bidu.

(19)

Il-Kummissjoni fittxet u vverifikat l-informazzjoni kollha li qieset meħtieġa għal determinazzjoni proviżorja ta’ dumping, id-dannu li jirriżulta u l-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

Produtturi tal-Unjoni

Produtturi esportaturi fir-RPĊ

(20)

L-investigazzjoni tad-dumping u tad-dannu kopriet il-perjodu mill-1 ta’ Lulju 2024 sat-30 ta’ Ġunju 2025 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2022 sa tmiem il-perjodu ta’ investigazzjoni (“il-perjodu kkunsidrat”).

(21)

Il-prodott soġġett għal din l-investigazzjoni huwa raden ta’ filament sintetiku kontinwu ta’ poliammidi alifatiċi, mhux offrut għall-bejgħ bl-imnut, inkluż il-monofilament sintetiku ta’ anqas minn 67 deċiteks. Il-prodott taħt investigazzjoni jinkludi l-varjanti kollha tar-raden tan-najlon jew ta’ poliammidi alifatiċi oħrajn, kemm jekk tessurizzat b’qies ta’ kull raden singlu li ma jaqbiżx il-50 tek u kemm jekk mhux tessurizzat, singlu, doppju, multiplu (mitni) jew ikkejbiljat, imfettel jew mhux imfettel (“il-prodott taħt investigazzjoni”).

(22)

Il-raden tal-poliammid b’tenaċità qawwija, li jaqa’ taħt il-kodiċi NM 5402 19 00 ma jaqax fil-ambitu tal-prodott taħt investigazzjoni.

(23)

Ir-raden tal-poliammid jintuża ħafna f’diversi industriji minħabba l-versatilità u l-proprjetajiet ta’ prestazzjoni għolja tiegħu. Dan jinkludi:

(24)

Il-prodott ikkonċernat huwa l-prodott taħt investigazzjoni li joriġina mir-RPĊ li bħalissa jaqa’ taħt il-kodiċi NM 5402 31 00 , 5402 45 00 , 5402 51 00 u 5402 61 00 (“il-prodott ikkonċernat”).

(25)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(26)

F’dan l-istadju l-Kummissjoni ddeċidiet li, għaldaqstant, dawk il-prodotti huma prodotti simili fis-sens tal-Artikolu 1(4) tar-Regolament bażiku.

(27)

Wieħed mill-utenti tal-prodott taħt investigazzjoni, Spitfil, talab esklużjoni mill-ambitu tal-prodott tal-hekk imsejjaħ “raden omm tal-poliammid”, li jintuża għall-produzzjoni tar-raden ta’ monofilament, filwaqt li jiddikjara li r-raden omm ma huwiex prodott fl-Unjoni. L-utent tenna t-talba tiegħu f’sottomissjoni addizzjonali mibgħuta ħafna wara l-iskadenza għall-kummenti hekk kif din tal-aħħar kienet prevista fit-Taqsima 2 tan-Notifika ta’ Bidu.

(28)

Il-Kummissjoni stabbiliet li r-raden omm ma huwiex prodott lest, iżda raden intermedju li għandu jiġu pproċessat aktar biex jiġi prodott ir-raden ta’ monifilament tal-poliammid. Ir-raden ta’ monofilament prodott mir-raden omm għandu l-istess karatteristiċi fiżiċi, kimiċi u tekniċi bħar-raden ta’ monofilament prodott mill-industrija tal-Unjoni, anke jekk jinkiseb permezz ta’ metodu ta’ produzzjoni differenti. Iż-żewġ tipi ta’ prodotti huma interkambjabbli u jintużaw fl-istess applikazzjonijiet downstream, jiġifieri l-industrija tal-niting għall-medd. Għalhekk, il-Kummissjoni ċaħdet b’mod proviżorju t-talba għall-esklużjoni tal-ambitu tal-prodott ta’ hawn fuq. Fir-rigward tat-tieni sottomissjoni tardiva tal-kumpanija, din se tiġi indirizzata wara d-divulgazzjoni proviżorja.

(29)

Minħabba li kien hemm provi biżżejjed disponibbli fil-bidu tal-investigazzjoni li indikaw l-eżistenza ta’ distorsjonijiet sinifikanti fis-sens tal-Artikolu 2(6a)(b) tar-Regolament bażiku fir-rigward tar-RPĊ, il-Kummissjoni qieset li kien xieraq li tiftaħ l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(30)

Konsegwentement, sabiex tiġbor id-data meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika ta’ Bidu, il-Kummissjoni stiednet lill-produtturi esportaturi kollha fir-RPĊ biex jipprovdu informazzjoni rigward l-inputs użati għall-produzzjoni tar-raden tal-poliammid. Ħdax-il produttur esportatur issottomettew l-informazzjoni rilevanti.

(31)

Sabiex tikseb l-informazzjoni li qieset neċessarja għall-investigazzjoni tagħha dwar l-allegati distorsjonijiet sinifikanti, il-Kummissjoni bagħtet kwestjonarju lill-Gvern taċ-Ċina (“GTĊ”). Barra minn hekk, fil-punt 5.3.2 tan-Notifika ta’ Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jissottomettu informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika ta’ Bidu f’Il-Ġurnal Uffiċjali tal-Unjoni Ewropea. Ma waslet l-ebda tweġiba għall-kwestjonarju mill-GTĊ u qabel l-iskadenza ma waslet l-ebda sottomissjoni mingħand kwalunkwe parti dwar l-applikazzjoni tal-Artikolu 2(6a) tar-Regolament bażiku. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fir-RPĊ.

(32)

Fin-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, hija jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku bl-iskop li tiddetermina l-valur normali fuq il-bażi ta’ prezzijiet jew valuri referenzjarji mingħajr distorsjoni.

(33)

Fl-10 ta’ Ottubru 2025, permezz ta’ nota (“l-Ewwel Nota”) il-Kummissjoni informat lill-partijiet interessati dwar is-sorsi rilevanti li kien beħsiebha tuża sabiex tiddetermina l-valur normali. F’dik in-nota, il-Kummissjoni pprovdiet lista tal-fatturi ta’ produzzjoni, bħall-materja prima, il-manodopera u l-enerġija użati fil-produzzjoni tar-raden tal-poliammid. Barra minn hekk, abbażi tal-kriterji li ggwidaw l-għażla tal-prezzijiet jew tal-valuri referenzjarji mingħajr distorsjoni, il-Kummissjoni identifikat lit-Turkija bħala pajjiż rappreżentattiv li seta’ jkun xieraq. Il-Kummissjoni rċeviet kummenti dwar l-Ewwel Nota kif imsemmi fit-Taqsimiet 3.2.4 u 3.2.5 aktar ’il quddiem.

(34)

Fit-13 ta’ Jannar 2026, il-Kummissjoni informat bit-tieni nota (“it-Tieni Nota”) lill-partijiet interessati dwar is-sorsi rilevanti li kien beħsiebha tuża għad-determinazzjoni tal-valur normali, bit-Turkija bħala l-pajjiż rappreżentattiv. Hija informat ukoll lill-partijiet interessati li kienet se tistabbilixxi l-kostijiet tal-bejgħ, ġenerali u amministrattivi (“SG & A”, Selling, General and Administrative costs) u l-profitti fuq il-bażi tal-informazzjoni disponibbli għal SASA Polyester Sanayi S.A, produttur tar-raden tal-poliester fit-Turkija. Il-Kummissjoni rċeviet kummenti għat-Tieni Nota kif imsemmi fit-Taqsimiet 3.2.4 u 3.2.5 aktar ’il quddiem.

(35)

Wara li analizzat il-kummenti u l-informazzjoni li rċeviet, il-Kummissjoni kkonkludiet li t-Turkija kienet pajjiż rappreżentattiv xieraq li minnu setgħu jinkisbu prezzijiet u kostijiet mingħajr distorsjoni għad-determinazzjoni tal-valur normali. Meta l-ebda prezz tal-importazzjoni rappreżentattiv ma kien disponibbli għal fattur ta’ produzzjoni partikolari, il-Kummissjoni rrikorriet għal valur referenzjarju internazzjonali xieraq. Ir-raġunijiet sottostanti għall-approċċ tal-Kummissjoni huma żviluppati fid-dettall fit-Taqsima 3.2.4 aktar ’il quddiem.

(36)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(37)

Madankollu, skont l-Artikolu 2(6a)(a) tar-Regolament bażiku, “[f]il-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” minn hawn ’il quddiem “SG & A”).

(38)

Kif inhu spjegat ulterjorment aktar ’il quddiem, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ u tal-produtturi esportaturi, l-applikazzjoni tal-Artikolu 2(6a) tar-Regolament bażiku kienet xierqa.

(39)

F’investigazzjonijiet reċenti dwar is-settur tal-kimika fir-RPĊ (7), il-Kummissjoni sabet li kien hemm distorsjonijiet sinifikanti fis-sens tal-Artikolu 2(6a)(b) tar-Regolament bażiku.

(40)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (8). B’mod partikolari, il-Kummissjoni kkonkludiet li, fis-settur tal-kimika, mhux biss għad hemm grad sostanzjali ta’ sjieda mill-GTĊ fis-sens tal-Artikolu 2(6a)(b), l-ewwel inċiż, tar-Regolament bażiku (9), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż, tar-Regolament bażiku (10). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett distorsiv addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (11). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tal-Artikolu 2(6a)(b), ir-raba’ inċiż, tar-Regolament bażiku, u b’hekk jiġġeneraw distorsjonijiet, b’mod partikolari meta ditti insolventi jinżammu għaddejjin u meta jiġu allokati drittijiet għall-użu tal-art fir-RPĊ (12). Bl-istess mod, il-Kummissjoni sabet distorsjonijiet tal-kostijiet tal-pagi fis-settur tal-kimika fis-sens tal-Artikolu 2(6a)(b), il-ħames inċiż, tar-Regolament bażiku (13), kif ukoll distorsjonijiet fis-swieq finanzjarji fis-sens tal-Artikolu 2(6a)(b), is-sitt inċiż, tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (14).

(41)

Bħal fl-investigazzjonijiet preċedenti rigward is-settur tal-kimika fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a), il-punt (b), tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fl-ilment, kif ukoll fid-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-finijiet tal-Investigazzjonijiet għad-Difiża tal-Kummerċ (15) (“ir-Rapport”), li jibbaża fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-prodott taħt investigazzjoni. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(42)

L-ilment allega li jeżistu distorsjonijiet sinifikanti fis-settur Ċiniż tar-raden tal-poliammid. Dan irrefera għar-Rapport u b’mod partikolari għall-fatt li s-sistema ekonomika tar-RPĊ hija “ekonomija tas-suq soċjalista” u għar-rwol attiv tal-Partit Komunista Ċiniż (“CCP”) kemm fis-settur pubbliku kif ukoll f’dak privat fir-RPĊ (16).

(43)

B’mod aktar speċifiku, l-ilment indika li:

(44)

Bħala konklużjoni, l-ilment ħa l-pożizzjoni li l-prezzijiet jew il-kostijiet, inklużi l-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħieles minħabba li huma affettwati minn intervent sostanzjali min-naħa tal-gvern skont it-tifsira tal-Artikolu 2(6a)(b) tar-Regolament bażiku. Fuq dik il-bażi, skont l-ilment, f’dan il-każ ma huwiex xieraq li jintużaw prezzijiet u kostijiet domestiċi sabiex jiġi stabbilit il-valur normali.

(45)

Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina, minħabba l-eżistenza ta’ distorsjonijiet sinifikanti fis-sens tal-Artikolu 2(6a), il-punt (b), tar-Regolament bażiku. Dik l-analiżi kopriet l-eżami tal-interventi sostanzjali tal-gvern fl-ekonomija taċ-Ċina b’mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott ikkonċernat.

(46)

F’dan ir-rigward, il-Kummissjoni l-ewwel ivvalutat jekk is-settur tar-raden tal-poliammid fir-RPĊ huwiex qiegħed jinqeda b’mod sinifikanti minn intrapriżi li joperaw taħt is-sjieda, taħt il-kontroll jew taħt is-superviżjoni jew taħt il-gwida tal-politiki tal-awtoritajiet Ċiniżi, skont it-tifsira tal-Artikolu 2(6a)(b), l-ewwel inċiż, tar-Regolament bażiku. Is-settur tal-prodott ikkonċernat huwa moqdi kemm minn kumpaniji privati, bħal Fujian Eversun Jinjiang Co. Ltd. (26), il-Grupp Highsun Holding (27), Yiwu Huading Nylon Co. Ltd. (28) kif ukoll minn SOEs bħal Shenma Industrial Co. Ltd. (29), Hubei Sanning Chemical Co. Ltd. (30) jew Sinopec (31). Il-proporzjon eżatt tal-produtturi privati meta mqabbla ma’ dawk tal-Istat fis-suq tar-raden tal-poliammid ma setax jiġi ddeterminat. Madankollu, il-Kummissjoni sabet li diversi produtturi huma kkontrollati direttament mill-Istat. L-eżempji jinkludu Shenma Industrial Co. Ltd. (32), SOE li fl-aħħar mill-aħħar hija kkontrollata mill-Kummissjoni għas-Superviżjoni u għall-Amministrazzjoni tal-Assi tal-Istat tal-Gvern Provinċjali ta’ Henan (33) u li hija l-akbar produttur Ċiniż tan-Najlon 66 (34), polimeru użat għall-produzzjoni tar-raden tal-poliammid. Eżempju ieħor huwa Hubei Sanning Chemical Industry Co. Ltd., li fl-aħħar mill-aħħar hija kkontrollata mill-Kummissjoni Provinċjali għas-Superviżjoni u għall-Amministrazzjoni tal-Assi tal-Istat ta’ Shanxi (35). Barra minn hekk, Sinopec hija SOE kkontrollata mill-Kummissjoni għas-Superviżjoni u għall-Amministrazzjoni tal-Assi tal-Istat tal-Kunsill tal-Istat (“SASAC”, State-owned Assets Supervision and Administration Commission of the State Council) (36).

(47)

Barra minn hekk, l-interventi tas-CCP fit-teħid ta’ deċiżjonijiet operazzjonali saru n-norma, mhux biss fl-SOEs iżda wkoll f’kumpaniji privati (37), filwaqt li s-CCP jiddikjara t-tmexxija tiegħu fuq prattikament kull aspett tal-ekonomija tal-pajjiż. Tabilħaqq, l-influwenza tal-Istat permezz tal-istrutturi tas-CCP fil-kumpaniji tirriżulta effettivament f’sitwazzjoni li fiha l-operaturi ekonomiċi jkunu taħt il-kontroll u taħt is-superviżjoni tal-politiki tal-gvern, fid-dawl ta’ kemm l-istrutturi tal-Istat u tal-Partit kibru flimkien fiċ-Ċina.

(48)

L-investigazzjoni sabet li l-assoċjazzjoni nazzjonali tal-industrija li tkopri s-settur tal-kimika hija l-Federazzjoni tal-Industrija tal-Petroleum u tal-Kimika taċ-Ċina (“CPCIF, China Petroleum and Chemical Industry Federation”). Is-CPCIF taderixxi mat-tmexxija ġenerali tas-CCP, twettaq attivitajiet tal-Partit, u tipprovdi l-kundizzjonijiet neċessarji għall-attivitajiet tal-organizzazzjonijiet tal-partit (38). Barra minn hekk, “l-awtorità ta’ reġistrazzjoni u ta’ ġestjoni tal-Assoċjazzjoni hija l-Ministeru għall-Affarijiet Ċivili” (39) u l-kundizzjonijiet biex wieħed ikun eliġibbli bħala rappreżentant tas-CPCIF jinkludu li “jaderixxi mat-tmexxija tas-CCP, jappoġġa s-soċjaliżmu b’karatteristiċi Ċiniżi, jimplimenta b’mod riżolut il-linja, il-prinċipji u l-politiki tal-Partit, u jħaddan kwalitajiet politiċi tajbin (40)”.

(49)

Eversun Holding Group Co. Ltd., li hija l-kumpanija prinċipali ta’ Fujian Eversun Jinjiang Co. Ltd., hija membru tas-CPCIF (41) u hija wieħed mid-diretturi tagħha. Barra minn hekk, xi entitajiet ikkontrollati minn Sinopec huma wkoll membri tas-CPCIF (42).

(50)

B’mod aktar speċifiku, l-investigazzjoni sabet li l-assoċjazzjoni nazzjonali tal-industrija li tirrappreżenta l-produtturi tar-raden tal-poliammid hija s-CCFA. Is-CCFA taderixxi mat-tmexxija ġenerali tas-CCP, twettaq attivitajiet tal-Partit, u tipprovdi l-kundizzjonijiet neċessarji għall-attivitajiet tal-organizzazzjonijiet tal-partit (43). Barra minn hekk, “l-awtorità ta’ reġistrazzjoni u ta’ ġestjoni tal-Assoċjazzjoni hija l-Ministeru għall-Affarijiet Ċivili” (44) u l-kundizzjonijiet biex wieħed ikun eliġibbli bħala rappreżentant tas-CCFA jinkludu li “jaderixxi mat-tmexxija tas-CCP, jappoġġa s-soċjaliżmu b’karatteristiċi Ċiniżi, jimplimenta b’mod riżolut il-linja, il-prinċipji u l-politiki tal-Partit, u jħaddan kwalitajiet politiċi tajbin” (45).

(51)

Fujian Eversun Jinjiang Co., Ltd., Fujian Highsun Synthetic Fiber (li hija miżmuma mill-Grupp Highsun Holding), Yiwu Huading Nylon Co., Ltd., Sinopec u Shenma Industrial Co., Ltd. ilkoll huma membri tas-CCFA (46).

(52)

Kemm l-intrapriżi pubbliċi kif ukoll dawk privati fis-settur tal-kimika huma soġġetti għas-superviżjoni u għall-gwida tal-politika. L-aħħar dokumenti tal-politika Ċiniżi li jikkonċernaw is-settur tal-kimika u tal-petrokimika jikkonfermaw l-importanza kontinwa li l-GTĊ jattribwixxi lis-settur, inkluża l-intenzjoni li jintervjeni fis-settur biex isawru skont il-politiki tal-gvern. Eżempju ta’ dan jagħtih il-Katalogu ta’ Gwida għall-Aġġustament tal-Istruttura Industrijali fejn il-poliammidi huma elenkati bħala settur tal-industrija mħeġġeġ mill-GTĊ (47). Barra minn hekk, l-aċidu adipiku, input użat għall-produzzjoni tar-raden tal-poliammid, huwa elenkat bħala settur imħeġġeġ kemm fil-Katalogu ta’ Gwida għall-Aġġustament tal-Istruttura Industrijali (48) kif ukoll fil-Katalogu tal-Industriji Mħeġġa fir-Reġjuni tal-Punent (49). Fir-rigward tal-kaprolattam, input ieħor għall-produzzjoni tar-raden tal-poliammid, il-GTĊ għandu politika restrittiva lejn l-unitajiet ta’ produzzjoni b’kapaċità tal-produzzjoni ta’ anqas minn 100 000 tunnellata fis-sena (50).

(53)

Barra minn hekk, skont l-14-il FYP dwar l-Iżvilupp Ekonomiku u Soċjali u l-Prospetti tal-2035, l-GTĊ beħsiebu “jaċċellera t-trasformazzjoni u t-titjib ta’ industriji ewlenin bħal dawk tal-kimiċi” (51).

(54)

Barra minn hekk, l-Opinjoni ta’ Gwida dwar il-Promozzjoni tal-Iżvilupp ta’ Kwalità Għolja tal-Industriji tal-Petrokimika u tal-Kimika matul l-14-il FYP (52) (“l-Opinjoni ta’ Gwida”) tistipula wkoll li l-GTĊ se “jaċċellera t-trasformazzjoni u t-titjib ta’ industriji tradizzjonali, jiżviluppa b’ħeġġa materjali kimiċi ġodda u sustanzi kimiċi fini, [...] u jrawwem it-tranżizzjoni taċ-Ċina minn pajjiż petrokimiku u kimiku kbir għal potenza petrokimika u kimika b’saħħitha. […] Sal-2025, […] il-konċentrazzjoni tal-produzzjoni ta’ prodotti kimiċi bl-ingrossa se tkompli tittejjeb, u r-rata tal-użu tal-kapaċità se tilħaq aktar minn 80 %; is-sigurtà tal-provvista ta’ materjali kimiċi ġodda se tilħaq aktar minn 75 %” (53). Barra minn hekk, il-GTĊ għandu “jaċċellera l-iżvilupp ta’ poljolefini ta’ livell għoli, ta’ sustanzi kimiċi elettroniċi, ta’ gassijiet ta’ speċjalità industrijali, ta’ lastiku u plastik ta’ prestazzjoni għolja, ta’ fibri ta’ prestazzjoni għolja” u, fir-rigward tal-industriji downstream tar-raden tal-poliammid, il-GTĊ beħsiebu “jespandi l-varjetà u l-ispeċifikazzjonijiet ta’ materjali bħal […] poliuretani, u poliammidi” (54). Barra minn hekk, il-GTĊ għandu “jippromwovi l-aġġustament tal-istruttura industrijali: isaħħaħ il-miżuri speċifiċi u jirregola b’mod xjentifiku l-iskala tal-industrija” (55).

(55)

B’mod aktar speċifiku, l-Opinjoni ta’ Gwida dwar l-Iżvilupp ta’ Kwalità Għolja tal-Industrija tal-Fibri Kimiċi (56) tistipula li l-GTĊ għandu “jippromwovi l-iżvilupp ta’ pjattaforma ta’ innovazzjoni tal-fibra u tal-materjal kompost ta’ prestazzjoni għolja […] bl-għan li jistabbilixxi katina industrijali komprensiva li tinkludi materja prima kimika bażika, fibri ta’ prestazzjoni għolja/polimeri ta’ prestazzjoni għolja, materjali komposti u forom u pproċessar tal-prodotti, ittestjar u evalwazzjoni tal-prodotti, u applikazzjoni tal-prodotti” (57).

(56)

Eżempji simili tal-intenzjoni tal-awtoritajiet Ċiniżi li jissorveljaw u jiggwidaw l-iżviluppi tas-settur tar-raden tal-poliammid jistgħu jinstabu fil-livell provinċjali, bħal fl-14-il FYP ta’ Shandong dwar l-Iżvilupp tal-Industrija Kimika (58) li jfittex li “jippromwovi b’mod komprensiv it-titjib tal-pedamenti industrijali u l-modernizzazzjoni tal-katina industrijali, jaċċellera l-irtirar tal-kapaċità tal-produzzjoni b’lura u ineffiċjenti, u jippromwovi l-iżvilupp ta’ prodotti kimiċi fid-direzzjoni tal-funzjonalizzazzjoni, l-irfinar u d-differenzjazzjoni [u li] jiggwida lill-intrapriżi biex jingħaqdu u jorganizzaw mill-ġdid, jottimizzaw l-allokazzjoni tar-riżorsi u l-istruttura tal-katina industrijali, u jtejbu l-effiċjenza u l-profittabbiltà tal-produzzjoni” (59).

(57)

Dan l-14-il FYP ta’ Shandong ikopri wkoll speċifikament is-setturi tal-industrija upstream u downstream tar-raden tal-poliammid u jirrikjedi “li jiġi enfasizzat ir-rwol ewlieni tal-parks tas-sustanzi kimiċi u tal-intrapriżi ewlenin, u li jiġi aċċellerat l-iżvilupp tal-katina industrijali kollha mill-materja prima kimika bażika sa materjali kimiċi ġodda ta’ livell għoli […] [u] b’enfasi fuq l-iżvilupp ta’ poljolefini ta’ livell għoli, ta’ poliuretani, u ta’ poliammidi, kif ukoll ta’ prodotti ta’ materjali ġodda ta’ teknoloġija avvanzata u b’valur miżjud għoli” (60).

(58)

Eżempju ieħor tal-intenzjoni tal-awtoritajiet Ċiniżi li jissorveljaw u jiggwidaw l-iżviluppi tas-settur tar-raden tal-poliammid fil-livell provinċjali jista’ jinstab fl-14-il FYP ta’ Henan dwar l-Iżvilupp tal-Industriji Strateġiċi u Emerġenti kif ukoll l-Industriji tal-Futur (61) li jfittxu li “jaċċelleraw l-iżvilupp tal-industrija tal-materjali ġodda tan-najlon. Abbażi ta’ valutazzjoni komprensiva tal-kapaċità tar-riżorsi u tal-ambjent, jespandu b’mod razzjonali l-produzzjoni ta’ materja prima upstream bħall-aċidu adipiku, il-kaprolattam, u l-polimeru tan-najlon 66” (62).

(59)

Bl-istess mod, l-14-il FYP ta’ Chongqing dwar l-Iżvilupp ta’ Kwalità Għolja tal-Industrija tal-Manifattura jfittex “abbażi tal-vantaġġi lokali tal-kapaċità tal-produzzjoni tal-aċidu adipiku, [li] isaħħaħ l-ippjanar u l-kostruzzjoni ta’ prodotti bħal […] melħ tan-najlon 66 (melħ tal-aċidu adipiku tal-eżametilenediammina), u najlon 66 (adipammid tal-polieżametilen), u jattira u jikkultiva b’mod attiv intrapriżi fl-oqsma tan-najlon b’katina twila u ta’ najlon reżistenti għal temperatura għolja biex tinbena katina tal-industrija tal-poliammid (63).

(60)

Fir-rigward tal-fatt li l-GTĊ kien f’pożizzjoni li jinterferixxi mal-prezzijiet u mal-kostijiet permezz tal-preżenza tal-Istat f’ditti fis-sens tal-Artikolu 2(6a)(b), it-tieni inċiż, tar-Regolament bażiku, il-Kummissjoni sabet li l-kumpanija azzjonarja ta’ Fujian Eversun Jinjiang Co., Ltd., Eversun Corp, “tat importanza kbira lill-bini tal-Partit sa mill-istabbiliment tagħha. Sa mill-bidu tiegħu, il-kumitat tal-partit tal-kumpanija kellu rwol ewlieni u ppromwova kontinwament l-iżvilupp tal-kumpanija” (64). Barra minn hekk, il-president ta’ Eversun Corp. huwa wkoll membru tas-CCP (65).

(61)

Barra minn hekk, il-Grupp Highsun Holding “jippromwovi l-integrazzjoni profonda tal-ħidma tal-bini tal-Partit mal-iżvilupp tal-Grupp (66). Barra minn hekk, il-maniġer ġenerali tal-Grupp Highsun Holding huwa membru tas-CCP (67).

(62)

Il-president ta’ Shenma Industrial Co. Ltd. iservi wkoll bħala s-segretarju tal-Kumitat tal-Partit (68).

(63)

Fl-2020, Hubei Sanning Chemical Co., Ltd. żviluppat pjan biex “tkompli ssaħħaħ il-ħidma ta’ bini tal-Partit u tistinka biex issir intrapriża ta’ dimostrazzjoni ewlenija tal-partit […] fil-livell provinċjali. Barra minn hekk, il-kumpanija “kitbet il-ħidma ta’ bini tal-Partit fl-istatut ta’ assoċjazzjoni, saħqet li l-bini ta’ Partit ta’ kwalità għolja jitqies bħala “l-għeruq” u “r-ruħ” li jmexxu l-iżvilupp tal-intrapriża” (69). Barra minn hekk, il-viċi maniġer ġenerali tal-kumpanija jservi bħala s-segretarju tal-kumitat tal-Partit tal-kumpanija (70).

(64)

Bl-istess mod, il-president tal-bord tad-diretturi tal-Grupp Sinopec huwa s-segretarju tal-kumitat tal-Partit, u diversi membri tal-bord iservu bħala viċi segretarji tal-kumitat tal-Partit (71). Il-Grupp Sinopec iddikjara li beħsiebu “jiffoka fuq il-missjoni l-ġdida tal-kumpanija u fuq kompiti ġodda fil-vjaġġ il-ġdid, imexxi ’l quddiem l-ispirtu awtorivoluzzjonarju tal-Partit, isaħħaħ it-tmexxija tal-Partit u l-bini tal-Partit b’mod komprensiv u integrat, u jippromwovi b’mod sistematiku governanza komprensiva u stretta tal-Partit, sabiex jipprovdi garanzija b’saħħitha biex jinkiteb kapitlu ġdid tal-industrija tal-petrokimika moderna taċ-Ċina (72)”.

(65)

Ma kienx possibbli li tiġi stabbilita b’mod sistematiku l-eżistenza ta’ konnessjonijiet personali bejn il-produtturi Ċiniżi kollha tar-raden tal-poliammid u s-CCP. Madankollu, minħabba li l-prodott taħt investigazzjoni jirrappreżenta sottosettur tas-settur tal-kimika, il-Kummissjoni qieset li l-informazzjoni stabbilita fl-investigazzjonijiet reċenti dwar is-settur tal-kimika, kif indikat fil-premessa (40), hija rilevanti wkoll għall-prodott taħt investigazzjoni.

(66)

Barra minn hekk, fis-settur tar-raden tal-poliammid hemm fis-seħħ politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż, tar-Regolament bażiku. Il-Kummissjoni identifikat diversi dokumenti li juru li l-industrija tar-raden tal-poliammid tibbenefika mill-gwida u mill-intervent governattivi fis-settur tal-kimika, minħabba li s-settur tar-raden tal-poliammid jirrappreżenta sottosettur tas-settur tal-kimika. Barra minn hekk, il-Kummissjoni sabet ukoll dokumenti li jindirizzaw speċifikament is-settur tal-poliammid.

(67)

L-industrija tal-kimika hija meqjusa b’mod konsistenti mill-GTĊ bħala industrija ewlenija (73). Dan huwa kkonfermat fil-bosta pjanijiet, direttivi u dokumenti oħrajn iffokati fuq is-sustanzi kimiċi, li jinħarġu fil-livell nazzjonali, reġjonali u muniċipali. Skont l-14-il FYP, il-GTĊ identifika l-industrija tal-kimika għall-ottimizzazzjoni u għat-titjib (74). Bl-istess mod, l-14-il FYP dwar l-Iżvilupp tal-Industrija tal-Materja Prima jistipula li l-GTĊ se “Jottimizza l-istruttura organizzazzjonali: Jagħmel l-intrapriżi ewlenin akbar u aktar b’saħħithom. […] Jappoġġa lill-intrapriżi biex jaċċelleraw il-fużjonijiet u r-riorganizzazzjonijiet transreġjonali u bi sjieda reċiproka, iżidu l-konċentrazzjoni industrijali u jwettqu operazzjonijiet internazzjonali. Fl-industrija tal-kimika, tal-petrokimika, tal-azzar, tal-metalli mhux ferrużi, tal-materjali tal-bini u f’industriji oħra, jikkultiva grupp ta’ intrapriżi ewlenin fil-katina industrijali b’dominanza ekoloġika u kompetittività ewlenija” (75).

(68)

B’mod aktar speċifiku, id-Distrett ta’ Changle, li jinsab fil-Muniċipalità ta’ Fuzhou (Fujian), żviluppa raggruppament tal-industrija tal-fibri kimiċi: “Quddiem ix-xenarju kompetittiv tal-industrija nazzjonali tan-najlon, id-Distrett ta’ Changle implimenta bis-sħiħ l-istrateġija ta’ żvilupp tal-“mexxej tal-katina + raggruppament tal-katina”. Peress li intrapriżi ewlenin bħall-Grupp Highsun Holding, Eversun Holding Group Co. Ltd., u Jinlun High Fiber qed imexxu l-iżvilupp koordinat tal-industriji upstream u downstream tal-ktajjen industrijali, id-distrett kontinwament isaħħaħ il-vantaġġi tiegħu fl-industrija tat-tessuti u fforma l-aktar katina industrijali tat-tessuti kompluta fil-pajjiż, minn materja prima petrokimika sa fibri kimiċi (76).”

(69)

Barra minn hekk, din l-istrateġija ta’ żvilupp tirriżulta minn diversi skemi ta’ appoġġ: “L-appoġġ vigoruż ta’ Changle għall-iżvilupp raggruppat tal-ktajjen tal-industrija tal-manifattura tradizzjonali: F’dawn l-aħħar snin, id-Distrett ta’ Changle implimenta [proġetti] li jħeġġu lill-intrapriżi ewlenin […] biex jaċċelleraw l-estensjoni tal-ktajjen industrijali upstream u downstream tagħhom. Bħalissa, hemm 282 intrapriża tat-tessuti ’l fuq mid-daqs deżinjat fid-distrett, b’katina industrijali relattivament kompluta. L-upstream ikopri l-produzzjoni ta’ materja prima petrokimika, filwaqt li d-downstream ikopri l-industrija tan-niting għall-medd (bizzilla), li tifforma sistema tal-industrija tat-tessuti li tintegra l-materja prima tal-fibri kimiċi, il-fibri kimiċi, l-għażil, in-niting, l-għoti tal-kulur u t-tlestija u l-ħwejjeġ. Din is-sena, id-distrett ta’ Changle jiffoka fuq “l-appoġġ ta’ intrapriżi ewlenin, il-kultivazzjoni ta’ raggruppamenti kbar, u l-iżvilupp ta’ industriji kbar,” bl-użu ta’ […] azzjonijiet speċjali bħala inizjattivi ewlenin biex jgħinu lill-Grupp Highsun Holding, lill-Grupp Eversun Holding, […] jiksbu valur tal-output ta’ RMB 100 biljun yuan” (77).

(70)

Fil-qosor, il-GTĊ għandu miżuri fis-seħħ biex iġiegħel lill-operaturi jikkonformaw mal-objettivi tal-politika pubblika li jappoġġaw l-industriji mħeġġa, inkluża l-produzzjoni tal-prodott taħt investigazzjoni. Tali miżuri jimpedixxu l-forzi tas-suq milli joperaw b’mod ħieles.

(71)

L-investigazzjoni kurrenti ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u dwar il-proprjetà fis-settur tal-kimika, skont l-Artikolu 2(6a)(b), ir-raba’ inċiż, tar-Regolament bażiku, ma jaffettwawx lill-manifatturi tal-prodott taħt investigazzjoni.

(72)

Barra minn hekk, fil-każijiet fejn tiġi implimentata l-liġi dwar il-falliment, il-proċedimenti ma jkollhomx trasparenza u jirriżultaw fi prattiki diskriminatorji (78).

(73)

Barra minn hekk, il-prodott taħt investigazzjoni huwa affettwat ukoll mid-distorsjonijiet tal-kostijiet tal-pagi fis-sens tal-Artikolu 2(6a)(b), il-ħames inċiż, tar-Regolament bażiku, kif imsemmi hawn fuq fil-premessa (40). Dawk id-distorsjonijiet jaffettwaw lis-settur kemm direttament (meta jimmanifattura l-prodott taħt investigazzjoni jew l-inputs ewlenin), kif ukoll indirettament (meta jkollu aċċess għall-inputs minn kumpaniji soġġetti għall-istess sistema tax-xogħol fir-RPĊ).

(74)

Barra minn hekk, ma ġiet ippreżentata l-ebda evidenza f’din l-investigazzjoni li turi li s-settur tar-raden tal-poliammid ma huwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż, tar-Regolament bażiku. L-Opinjoni ta’ Gwida msemmija hawn fuq li teħtieġ li “jittejbu l-politiki ta’ appoġġ, tissaħħaħ il-koordinazzjoni bejn il-politiki fiskali, finanzjarji, reġjonali, ta’ investiment, ta’ importazzjoni u ta’ esportazzjoni (…) mal-politiki tal-industrija biex tingħata setgħa sħiħa lill-pjattaforma ta’ kooperazzjoni nazzjonali bejn l-industrija u l-finanzi u biex titrawwem il-konnessjoni bejn l-intrapriżi u l-banek” (79) hija wkoll eżempju tajjeb ħafna ta’ dan it-tip ta’ intervent governattiv.

(75)

Barra minn hekk, fuq il-livell ta’ allokazzjoni tar-riżorsi finanzjarji, b’Diversi Miżuri biex jiġi Promoss Ulterjorment l-Iżvilupp tal-Investiment Privat (80), il-GTĊ ifittex li “jżid ir-riżorsi tal-baġit ċentrali biex jappoġġa proġetti ta’ investiment privat kwalifikati u biex b’mod attiv ikollu rwol ta’ gwida u ta’ tmexxija.” Il-GTĊ għandu wkoll l-intenzjoni li “jagħmel użu tajjeb minn strumenti finanzjarji ta’ politika ġdida [u] jappoġġa għadd ta’ proġetti ta’ investiment privat kwalifikati f’industriji importanti u f’oqsma ewlenin. (81)”

(76)

Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(77)

Fl-aħħar nett, il-Kummissjoni tfakkar li sabiex il-prodott taħt investigazzjoni jiġi prodott, huma meħtieġa għadd ta’ inputs. Meta l-produtturi tal-prodott taħt investigazzjoni jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/l-allokazzjoni tal-kapital. Minbarra dan, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(78)

B’konsegwenza ta’ dan, mhux biss il-prezzijiet tal-bejgħ domestiku tal-prodott taħt investigazzjoni ma humiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma affettwati wkoll minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fil-Partijiet I u II tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu ġie prodott fir-RPĊ permezz tat-taħlit ta’ firxa ta’ fatturi ta’ produzzjoni jiġi espost għal distorsjonijiet sinifikanti. L-istess japplika għall-input tal-input u l-bqija.

(79)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt investigazzjoni, inklużi l-kostijiet tal-materja prima, tal-art, tal-enerġija u tal-manodopera, ma humiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku, kif muri mill-impatt reali jew potenzjali ta’ wieħed jew aktar mill-elementi rilevanti elenkati fih.

(80)

Il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti fil-fajl tal-każ, inkluż ir-Rapport u l-evidenza addizzjonali pprovduta mill-ilmentatur, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(81)

Fl-istadju proviżorju, il-Kummissjoni ma rċeviet l-ebda kumment dwar id-distorsjonijiet sinifikanti li jaffettwaw l-industrija tal-ħjut tal-poliammid minn xi wieħed mill-produtturi esportaturi Ċiniżi.

(82)

Fid-dawl ta’ dan ta’ hawn fuq, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ. Konsegwentement, il-Kummissjoni pproċediet biex taħdem il-valur normali esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif deskritt fit-Taqsima li ġejja.

(83)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(84)

Kif spjegat fil-premessi (33) sa (34), il-Kummissjoni ħarġet żewġ noti għall-fajl dwar is-sorsi għad-determinazzjoni tal-valur normali: l-Ewwel Nota fl-10 ta’ Ottubru 2025 u t-Tieni Nota fit-13 ta’ Jannar 2026. Dawn in-noti ddeskrivew il-fatti u l-evidenza li fuqhom huma bbażati l-kriterji rilevanti, u indirizzaw ukoll il-kummenti li rċevew il-partijiet dwar dawk l-elementi u dwar is-sorsi rilevanti. Fit-Tieni Nota, il-Kummissjoni informat lill-partijiet interessati bl-intenzjoni tagħha li tuża lit-Turkija bħala pajjiż rappreżentattiv xieraq f’dan il-każ, jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(85)

Fl-Ewwel Nota, il-Kummissjoni identifikat lill-Arġentina, lill-Brażil, lill-Kolombja, lill-Indoneżja, lill-Messiku, lit-Tajlandja u lit-Turkija bħala pajjiżi b’livell simili ta’ żvilupp ekonomiku bħar-RPĊ skont il-Bank Dinji, jiġifieri kollha huma kklassifikati mill-Bank Dinji bħala pajjiżi “b’introjtu medju superjuri” abbażi tal-introjtu nazzjonali gross fejn il-produzzjoni tal-prodott taħt investigazzjoni kienet magħrufa li sseħħ.

(86)

Fil-kuntest ta’ dan il-kriterju, il-kummenti dwar l-identifikazzjoni mill-Kummissjoni tat-Turkija bħala pajjiż rappreżentattiv potenzjalment xieraq ġew sottomessi mill-Grupp Eversun. Il-Grupp Eversun allega li t-Turkija ma kinitx pajjiż rappreżentattiv xieraq minħabba l-livelli għoljin ta’ inflazzjoni tiegħu meta mqabbla mal-Indoneżja li l-ekonomija tagħha kienet akbar u r-rata ta’ inflazzjoni kienet aktar stabbli. Barra minn hekk, il-Grupp Eversun identifika kumpanija Indoneżja PT. Ever Shine Tex Tbk, li pproduċiet il-prodott taħt investigazzjoni u li għalih ir-rapporti finanzjarji kienu disponibbli faċilment. Il-Grupp Eversun talab lill-Kummissjoni tikkunsidra lill-Indoneżja bħala pajjiż rappreżentattiv xieraq.

(87)

Sabiex jiġi definit liema pajjiżi kienu f’livell simili ta’ żvilupp ekonomiku bħall-pajjiż esportatur f’kull każ, il-Kummissjoni użat pajjiżi kklassifikati fl-istess kategorija ta’ introjtu mill-Bank Dinji. Din il-bażi tad-data ppermettiet lill-Kummissjoni jkollha għadd suffiċjenti ta’ pajjiżi potenzjalment xierqa b’livell simili ta’ żvilupp biex tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku. Il-Kummissjoni nnotat li r-Regolament bażiku ma jidentifikax l-eżistenza tal-inflazzjoni bħala kriterju rilevanti għall-għażla tal-pajjiż rappreżentattiv. Il-Kummissjoni nnotat ukoll li l-fatt li l-ekonomija tal-Indoneżja kienet akbar mill-ekonomija Torka u għalhekk eqreb lejn l-ekonomija taċ-Ċina ma kienx fattur fl-għażla tal-pajjiż rappreżentattiv xieraq skont l-Artikolu 2(6a)(a) tar-Regolament bażiku. Il-kategorija rilevanti tal-Bank Dinji kienet dik tal-pajjiżi b’introjtu medju superjuri, li fiha kienet kklassifikata ċ-Ċina. Fir-rigward tad-dikjarazzjoni dwar ir-rata ta’ inflazzjoni fit-Turkija, il-Kummissjoni nnotat li Eversun ma ssottomettiex evidenza li l-inflazzjoni għamlet id-determinazzjoni tal-valuri referenzjarji mhux affidabbli. Barra minn hekk, il-Kummissjoni nnotat ukoll li l-prezzijiet tal-importazzjoni, li kienu l-bażi għall-istabbiliment tal-valuri referenzjarji għall-biċċa l-kbira tal-fatturi ta’ produzzjoni, kienu bbażati fuq tranżazzjonijiet transfruntiera li normalment saru f’muniti oħra għajr dawk tal-pajjiż importatur, u għalhekk ma kinux affettwati mill-inflazzjoni. Barra minn hekk, il-valuri referenzjarji jiġu kkonvertiti fil-munita tal-pajjiż ikkonċernat, fejn l-impatt tal-inflazzjoni, li spiss ikun relatat mal-iżvalutazzjoni tal-munita, ma jkunx sinifikanti. Għalhekk, din id-dikjarazzjoni ġiet miċħuda.

(88)

Fl-Ewwel Nota, il-Kummissjoni pprovdiet lista tal-fatturi kollha ta’ produzzjoni, bħall-materja prima, l-enerġija u l-manodopera użati fil-produzzjoni tar-raden tal-poliammid. Il-Kummissjoni nnotat ukoll li, fir-rigward tal-materja prima ewlenija, iċ-ċipep tan-najlon 6 kienu l-materja prima ewlenija użata fil-produzzjoni tar-raden tal-poliammid. Il-konsum tagħhom varja bejn [55 % sa 70 %] mill-materjali totali kkonsmati, meta mqabbel ma’ [20 % sa 35 %] tal-konsum tal-kaprolattam.

(89)

Sussegwentement, il-Kummissjoni analizzat l-importazzjonijiet tal-fatturi ewlenin ta’ produzzjoni fis-seba’ pajjiżi rappreżentattivi potenzjali, jiġifieri l-Arġentina, il-Brażil, il-Kolombja, l-Indoneżja, il-Messiku, it-Tajlandja u t-Turkija. Fir-rigward tal-Arġentina, il-Kummissjoni stabbiliet li kien hemm livell baxx ta’ importazzjonijiet ta’ kaprolattam, ta’ ċipep tan-najlon 6 u ta’ raden POY/FDY/HOY (83) u DTY/ACY/ATY/TDY/TTY (84). Fir-rigward tal-Brażil, tal-Messiku u tat-Tajlandja, il-Kummissjoni nnotat li kien hemm livell baxx ta’ importazzjonijiet tal-kaprolattam. Fir-rigward tal-Kolombja, il-Kummissjoni nnotat li l-volumi tal-importazzjoni taċ-ċipep tan-najlon 6, tar-raden POY u tar-raden DTY lejn il-Kolombja ma kinux biżżejjed u li l-prezz medju tal-importazzjoni tal-kaprolattam kien affettwat mill-importazzjonijiet Ċiniżi. Fir-rigward tal-Indoneżja, il-Kummissjoni stabbiliet li l-prezz tal-importazzjoni taċ-ċipep tan-najlon 6, il-materja prima ewlenija, kien affettwat mill-importazzjonijiet Ċiniżi.

(90)

Barra minn hekk, il-Kummissjoni investigat liema data finanzjarja kienet faċilment disponibbli għas-seba’ pajjiżi identifikati, jiġifieri l-Arġentina, il-Brażil, il-Kolombja, l-Indoneżja, il-Messiku, it-Tajlandja u t-Turkija, u nnotat li għalkemm kien hemm produtturi tar-raden tal-poliammid f’kull wieħed mill-pajjiżi rappreżentattivi potenzjali, ma setgħet tidentifika l-ebda kumpanija bħal din b’data finanzjarja faċilment disponibbli għad-determinazzjoni tal-kostijiet ġenerali tal-manifattura, tal-SG & A u tal-profitt.

(91)

Madankollu, il-Kummissjoni identifikat lil SASA Polyester Sanayi A.Ş., produttur tar-raden tal-poliester, prodott fl-istess kategorija ġenerali u settur tal-prodott taħt investigazzjoni, bħala kumpanija xierqa għall-fini tal-kalkolu tal-SG & A u tal-profitt. Il-Kummissjoni rċeviet kummenti mingħand il-Grupp Eversun u mingħand l-ilmentaturi.

(92)

Bi tweġiba għall-Ewwel Nota, il-Grupp Eversun issottometta informazzjoni finanzjarja faċilment disponibbli għal produttur Indoneżjan tar-raden tal-poliammid, PT Ever Shine Tex (85). Il-Kummissjoni nnotat li PT Ever Shine Tex kien manifattur tar-raden tal-filament tan-najlon 6, tar-raden ran-najlon 6 tessurizzat u mhux tessurizzat u tad-drappijiet tal-poliester.

(93)

L-ilmentaturi semmew l-appoġġ tagħhom għall-għażla tar-rapporti finanzjarji ta’ SASA Polyester Sanayi A.Ş. billi qiesu li huwa indikatur raġonevoli peress li dan il-produttur Tork kien jipproduċi raden mhux tessurizzat u tessurizzat tal-poliester, li kien jintuża għas-settur tat-tessuti. L-ilmentaturi allegaw li l-proċess tal-manifattura kien simili għal dak tar-raden tal-poliammid.

(94)

Fit-Tieni Nota, il-Kummissjoni analizzat id-data finanzjarja ta’ PT Ever Shine Tex u sabet li l-kumpanija fil-prinċipju kienet adattata biex jinħadmu l-SG & A u l-profitt. Madankollu, fir-rigward tal-adegwatezza tal-Indoneżja bħala pajjiż rappreżentattiv, il-Kummissjoni identifikat elementi importanti ta’ mblukkar, stabbiliti fil-premessa (95) aktar ’il quddiem, li kienu jiskwalifikaw lill-Indoneżja milli tintgħażel bħala pajjiż rappreżentattiv xieraq.

(95)

Fir-rigward taċ-ċipep tan-najlon 6, il-Kummissjoni nnotat li ġew importati kwantitajiet suffiċjenti fl-Indoneżja, li 48 % minnhom oriġinaw miċ-Ċina. Il-Kummissjoni osservat li l-prezz medju tal-importazzjoni Ċiniża kien 16 % anqas mill-prezz medju tal-importazzjoni mill-bqija tad-dinja. Il-Kummissjoni kkonkludiet li l-prezz tal-importazzjoni taċ-ċipep tan-najlon 6 mill-“bqija tad-dinja” x’aktarx li kien affettwat mill-importazzjonijiet miċ-Ċina u, għalhekk, ma kienx xieraq li jiġi applikat bħala valur referenzjarju f’konformità mal-Artikolu 2(6)(a) tar-Regolament bażiku. Barra minn hekk, il-Kummissjoni analizzat il-prezzijiet tal-importazzjoni tal-fatturi ta’ produzzjoni miżjuda ġodda (stabbiliti fil-premessa (126)) għall-Indoneżja u nnotat li 87 % tal-aċidu tereftaliku purifikat (PTA, Purified Terephthalic Acid) kien jiġi importat fl-Indoneżja miċ-Ċina. Il-prezz medju tal-importazzjoni miċ-Ċina kien 9 % anqas mill-prezz medju tal-importazzjoni mill-“bqija’ tad-dinja”. Sussegwentement, il-Kummissjoni stabbiliet li l-prezz tal-importazzjoni tar-raden tal-filament tal-poliester l-PTA mill-“bqija tad-dinja” għall-Indoneżja x’aktarx li kien affettwat mill-importazzjonijiet miċ-Ċina. L-adegwatezza tal-Indoneżja bħala pajjiż rappreżentattiv ġiet miċħuda fit-Tieni Nota.

(96)

Fir-rigward tat-Turkija, minkejja l-eżistenza ta’ diversi produtturi tar-raden tal-poliammid fit-Turkija, l-ebda wieħed minnhom ma kellu informazzjoni finanzjarja disponibbli faċilment jew kien profittabbli fil-perjodu ta’ investigazzjoni. Għalhekk, il-Kummissjoni rrikorriet għall-analiżi tal-kumpaniji Torok b’informazzjoni finanzjarja faċilment disponibbli fil-kategorija ġenerali kollha tal-prodott taħt investigazzjoni bl-għan li tikkalkola l-medja tal-kumpaniji profittabbli kollha fis-settur bi profitt raġonevoli u bl-SG & A. Il-Kummissjoni stabbiliet li l-produtturi ta’ filamenti magħmula mill-bniedem, bħar-raden tal-poliammid, ir-raden tal-poliester jew ir-raden tal-akriliku, ġew elenkati taħt il-klassifikazzjoni NACE 1310 “Tħejjija u għażil ta’ fibri tat-tessuti”. Il-Kummissjoni nnotat li d-differenza ewlenija bejn il-proċess tal-produzzjoni tar-raden tal-poliester, tal-akriliku u tal-poliammid miġbura fil-polimeru użat fil-proċess tal-produzzjoni, filwaqt li l-istadji essenzjali tal-produzzjoni baqgħu komparabbli. Skont il-klassifikazzjoni NACE 1310, il-Kummissjoni identifikat sitta u għoxrin kumpanija Torka profittabbli fil-perjodu ta’ investigazzjoni. Madankollu, kumpanija waħda biss fil-klassifikazzjoni NACE 1310, SASA Polyester Sanayi A.Ş., kellu informazzjoni finanzjarja faċilment disponibbli. Sabiex titqies l-aktar kategorija ġenerali wiesgħa u rilevanti tal-prodott taħt investigazzjoni, il-Kummissjoni analizzat ukoll jekk kienx hemm kumpaniji Torok b’informazzjoni finanzjarja faċilment disponibbli skont il-klassifikazzjoni NACE 1399 “Manifattura ta’ tessuti oħra” u 2016 “Manifattura ta’ plastik f’forma primarja” iżda eskludiet dawn il-kodiċijiet peress li jew ma kien hemm l-ebda kumpanija Torka profittabbli, jew dawn il-kumpaniji kienu jimmanifatturaw prodotti mhux komparabbli, bħal tessuti, ħwejjeġ jew drappijiet.

(97)

Fit-Tieni Nota, il-Kummissjoni kkonfermat li SASA Polyester Sanayi A.Ş. baqa’ produttur xieraq fil-kategorija ġenerali kollha tal-prodott taħt investigazzjoni għall-fini tal-kalkolu tal-SG & A u tal-profitt.

(98)

Il-Grupp Eversun argumenta li l-proċess tal-produzzjoni u l-istrutturi tal-kostijiet tar-raden tal-poliammid u tar-raden tal-poliester kienu industriji distinti minħabba li l-produzzjoni tar-raden tal-poliammid tiddependi fuq iċ-ċipep tan-najlon (li jammontaw għal 55 % sa 70 % tal-konsum totali tal-materjal), u l-materja prima prinċipali tar-raden tal-poliester kienet il-PTA. Il-Grupp Eversun iddikjara li l-kostijiet tal-akkwist, il-kumplessità tal-ipproċessar, u l-konsum tal-enerġija taż-żewġ tipi ta’ materja prima kienu sostanzjalment differenti, li min-naħa tagħhom kienu jaffettwaw il-marġnijiet ta’ profitt.

(99)

Fir-rigward tan-nuqqas ta’ adegwatezza tal-valuri referenzjarji fl-Indoneżja, il-Grupp Eversun allega li l-impatt taċ-ċaqliq fil-prezzijiet tal-materja prima kien negliġibbli meta mqabbel mad-differenzi fundamentali fil-marġnijiet ta’ profitt bejn l-industriji tar-raden tal-poliammid u tal-poliester. Il-Grupp Eversun talab lill-Kummissjoni tapplika d-data finanzjarja ta’ PT Ever Shine Tex tal-Indoneżja bħala l-bażi valida għall-kalkolu tal-marġni ta’ profitt tal-prodott taħt investigazzjoni, aktar milli SASA Polyester Sanayi A.Ş.

(100)

Minbarra l-argumenti stabbiliti fil-premessa (95), il-Kummissjoni tenniet li l-prezz tal-importazzjoni taċ-ċipep tan-najlon 6, il-materja prima ewlenija, lejn l-Indoneżja kien distort u dan il-fatt ma kienx ikkontestat mill-partijiet interessati. Peress li l-Indoneżja nstabet mhux xierqa bħala pajjiż rappreżentattiv, il-Kummissjoni ma setgħetx tapplika l-informazzjoni finanzjarja disponibbli ta’ PT Ever Shine Tex. Il-Kummissjoni sostniet li l-proċess tal-produzzjoni tar-raden tal-poliester u tal-poliammid huwa simili, kif muri mill-produtturi tal-Unjoni, u li SASA Polyester Sanayi A.Ş. baqa’ produttur xieraq fil-kategorija ġenerali kollha tal-prodott taħt investigazzjoni għall-fini tal-kalkolu tal-SG & A u tal-profitt. L-argument ġie miċħud.

(101)

Wara li ġie stabbilit li t-Turkija kienet l-uniku pajjiż rappreżentattiv xieraq disponibbli, abbażi tal-elementi kollha ta’ hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u tal-ambjent f’konformità mal-Artikolu 2(6a)(a), l-ewwel inċiż, l-aħħar sentenza, tar-Regolament bażiku.

(102)

Fid-dawl tal-analiżi ta’ hawn fuq, it-Turkija ssodisfat il-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku sabiex titqies bħala pajjiż rappreżentattiv xieraq.

(103)

Fl-Ewwel Nota, il-Kummissjoni elenkat il-fatturi ta’ produzzjoni, bħall-materjali, l-enerġija u l-manodopera użati fil-produzzjoni tal-prodott taħt investigazzjoni mill-produtturi esportaturi u stiednet lill-partijiet interessati jikkummentaw u jipproponu informazzjoni disponibbli għall-pubbliku dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-Nota.

(104)

Il-Kummissjoni rċeviet kummenti mingħand il-Grupp Eversun, il-Grupp Highsun u l-ilmentaturi.

(105)

Fir-rigward tal-valur referenzjarju tal-kaprolattam, il-Kummissjoni nnotat li l-importazzjonijiet Russi tal-kaprolattam lejn l-Unjoni waqfu fl-2023 minħabba r-reġim ta’ sanzjonijiet skont ir-Regolament tal-Kunsill (UE) Nru 833/2014 (86), filwaqt li, fl-istess ħin, l-importazzjonijiet tal-kaprolattam Russu lejn it-Turkija żdiedu b’mod sinifikanti mill-2023 ’il quddiem. Fl-Ewwel Nota, il-Kummissjoni informat li 52 % tal-importazzjonijiet tal-kaprolattam fit-Turkija kienu joriġinaw mir-Russja u li l-prezz medju tal-importazzjoni mir-Russja kien biss 4 % anqas mill-prezz medju mill-“bqija tad-dinja”. Il-Kummissjoni kkonkludiet li l-prezz tal-importazzjoni tal-kaprolattam mill-“bqija tad-dinja” x’aktarx li kien affettwat mill-importazzjonijiet mir-Russja.

(106)

L-ilmentaturi esprimew qbil mal-metodoloġija tal-Kummissjoni u ssottomettew evidenza addizzjonali li turi li l-importazzjonijiet Russi tal-kaprolattam fit-Turkija żdiedu b’mod sinifikanti mill-2022, u li l-prezzijiet tal-importazzjoni nżammu f’livelli baxxi, filwaqt li l-importazzjonijiet Russi fl-Unjoni waqfu kompletament mill-2023 ’il quddiem.

(107)

Sabiex tistabbilixxi valur referenzjarju xieraq u mingħajr distorsjoni tal-kaprolattam, il-Kummissjoni rrikorriet għall-prezz medju tal-importazzjoni mill-pajjiżi kollha lejn il-pajjiżi kollha, minbarra ċ-Ċina u l-pajjiżi mhux tad-WTO, estratti mill-Global Trade Atlas (GTA). Il-Kummissjoni nnotat li ċerti tranżazzjonijiet kien fihom valuri f’RMB bl-ebda kwantità rrapportata. Il-Kummissjoni injorat dawn it-tranżazzjonijiet peress li jżidu l-valur b’mod artifiċjali. Il-Kummissjoni stabbiliet li l-prezz medju tal-importazzjoni mill-pajjiżi kollha lejn il-pajjiżi kollha (minbarra ċ-Ċina u l-pajjiżi mhux tad-WTO) u żiedet id-dazji medji ponderati tal-importazzjoni imposti mill-akbar 12-il pajjiż importatur li jkopru 95,49 % tal-importazzjonijiet madwar id-dinja, li jammontaw għal 4,69 %.

(108)

Il-Grupp Eversun oġġezzjona għall-bażi tal-Kummissjoni għall-konklużjoni li l-prezz tal-importazzjoni tal-kaprolattam mill-“bqija tad-dinja” x’aktarx li kien affettwat mill-importazzjonijiet mir-Russja. Il-Grupp Eversun allega li l-Kummissjoni assumiet li peress li ma kien hemm l-ebda differenza sinifikanti bejn il-prezz tal-importazzjoni mir-Russja u mill-bqija tad-dinja (4 %), il-prezz tal-bqija tad-dinja kien kompletament inaffidabbli. Il-Grupp Eversun talab lill-Kummissjoni biex iġġib evidenza biex tappoġġa s-sejba li l-prezz tal-importazzjoni tal-kaprolattam ma kienx affidabbli.

(109)

Fit-Tieni Nota, il-Kummissjoni ppubblikat l-istatistiki dwar l-importazzjoni tal-kaprolattam mir-Russja fit-Turkija, estratta mill-GTA, u osservat li fl-2020 u fl-2021, ma kien hemm l-ebda importazzjoni tal-kaprolattam Russu lejn it-Turkija. Bejn l-2022 u l-2023, l-importazzjonijiet żdiedu minn 5 678 tunnellata għal 12 779 tunnellata, filwaqt li l-prezz medju tal-bejgħ naqas minn EUR 2,09/KG għal EUR 1,52/KG. Fil-perjodu ta’ investigazzjoni, l-importazzjonijiet naqsu għal 9 775 tunnellata, u l-prezz medju tal-bejgħ naqas ukoll għal EUR 1,48/KG. Barra minn hekk, il-Kummissjoni osservat li l-prezz unitarju tal-kaprolattam Russu kompla jonqos wara l-perjodu ta’ investigazzjoni, bil-prezz unitarju ta’ EUR 1,28/KG fl-2025. Fl-istess ħin, il-prezz medju tal-importazzjoni minn pajjiżi oħra żdied. Għalhekk, abbażi ta’ analiżi dinamika tal-volum u bbażata fuq il-prezz maż-żmien, u s-sehem dominanti tal-importazzjonijiet Russi ta’ 52 %, il-Kummissjoni kkonkludiet li l-prezzijiet tal-importazzjoni minn pajjiżi oħra lejn it-Turkija kienu affettwati mill-importazzjonijiet Russi. Għalhekk, id-dikjarazzjoni tal-Grupp Eversun ġiet miċħuda.

(110)

L-ilmentaturi fakkru li l-prodott taħt investigazzjoni kien jiġi prodott min-najlon 6,6, min-najlon 5,6, min-najlon 5,10 jew min-najlon 11. L-ilmentaturi sostnew li t-tipi differenti ta’ poliammidi kellhom strutturi molekulari kemxejn differenti u kostijiet differenti. L-ilmentaturi sostnew li jenħtieġ li l-Kummissjoni telenka tipi oħra ta’ polimeri tal-poliammid użati fil-produzzjoni tal-prodott taħt investigazzjoni billi jew tinkludi tipi oħra ta’ polimeri tal-poliammid individwalment fil-lista ta’ fatturi ta’ produzzjoni, jew billi tikkunsidra kategorija usa’ ta’ “polimeri tal-poliammid”, li tinkludi n-najlon 6, in-najlon 6,6 u tipi rilevanti oħra (eż. in-najlon 5,6).

(111)

Il-Kummissjoni osservat li l-istruttura tas-SA fit-Turkija ma kienet tagħmel l-ebda distinzjoni bejn tipi differenti ta’ ċipep tan-najlon. L-aktar kodiċi dettaljat fin-nomenklatura Torka kien “39.08 Poliammidi f’forom primarji: 3908.10 - Poliammid-6, -11, -12, -6,6, -6,9, -6,10 jew -6,12” (87). Għalhekk, it-tipi kollha ta’ ċipep tal-poliammid kienu diġà inklużi fil-valur referenzjarju. Il-Kummissjoni aġġornat it-titolu tal-valur referenzjarju biex tirrifletti li t-tipi kollha ta’ ċipep tan-najlon li jinsabu fil-valur referenzjarju.

(112)

Il-Grupp Highsun sostna li l-valuri referenzjarji taċ-ċipep tan-najlon fis-seba’ pajjiżi rappreżentattivi potenzjali kienu ogħla mill-prezz raġonevoli tas-suq Ċiniż taċ-ċipep tan-najlon 6, li l-Grupp Highsun kien juża fil-produzzjoni tal-prodott taħt investigazzjoni esportat lejn l-UE. Il-Grupp Highsun allega wkoll li d-data mhux ipproċessata taċ-ċippa tan-najlon 6 ippubblikata fl-Ewwel Nota kienet tinkludi data għal inputs mhux relatati maċ-ċippa tan-najlon 6, bħaċ-ċippa tan-najlon PA-9, PA-10, PA-11, PA-12, eċċ. Il-Grupp Highsun talab li tiġi eskluża d-data dwar l-importazzjoni ta’ tali inputs.

(113)

Fil-premessa (82) il-Kummissjoni kkonkludiet li, f’dan il-każ, ma kienx xieraq li jintużaw prezzijiet u kostijiet domestiċi Ċiniżi sabiex jiġi stabbilit il-valur normali. Konsegwentement, il-Kummissjoni pproċediet sabiex taħdem il-valur normali esklużivament abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku. Għalhekk, l-argument dwar kemm huwa raġonevoli l-prezz domestiku Ċiniż ġie miċħud. Il-Kummissjoni nnotat ukoll li ma kien jeżisti l-ebda livell suffiċjenti ta’ dettall fil-livell tal-kodiċi SA b’6 ċifri jew bi 8 ċifri biex issir distinzjoni bejn iċ-ċipep tan-najlon 6, iċ-ċipep tan-najlon 6,6 u tipi oħra ta’ ċipep tan-najlon. Il-Kummissjoni stabbiliet li t-tipi kollha ta’ ċipep tal-poliammid kienu diġà inklużi fil-valur referenzjarju stabbilit fit-Taqsima 3.2.5.5 u ma tressqet l-ebda evidenza li turi kif l-użu tad-data b’6 ċifri jew bi 8 ċifri kien affettwat minn inputs oħra sa punt li fih il-valur referenzjarju jsir inadegwat. L-argument ġie miċħud.

(114)

Fil-kummenti tiegħu għat-Tieni Nota, l-ilmentaturi sostnew li l-importazzjonijiet Russi ta’ ċipep tan-najlon ikklassifikati taħt il-kodiċi SA 3908 10 kienu jaqgħu fil-kamp ta’ applikazzjoni tar-Regolament (UE) Nru 833/2014 u li, flimkien mal-volumi tal-importazzjoni jiżdiedu bejn l-2022 u l-perjodu ta’ investigazzjoni, bi prezzijiet medji tal-bejgħ li kienu qed jonqsu, l-importazzjonijiet Russi taċ-ċipep tan-najlon lejn it-Turkija affettwaw b’mod negattiv il-prezz medju tal-importazzjoni taċ-ċipep tan-najlon lejn it-Turkija mill-“bqija tad-dinja”. Il-Koalizzjoni talbet li l-importazzjonijiet Russi jitneħħew mill-valur referenzjarju taċ-ċipep tan-najlon.

(115)

Fl-Ewwel Nota l-Kummissjoni stabbiliet li s-sehem tal-importazzjoni ta’ 18 % taċ-ċipep tan-najlon 6 lejn it-Turkija kien joriġina mir-Russja u li l-prezz medju ta’ CNY 11,83 għal kull kg tal-importazzjonijiet mir-Russja kien sostanzjalment anqas mill-prezz medju tal-importazzjoni mill-bqija tad-dinja (CNY 20,61/kg), eskluża ċ-Ċina. Għalhekk, il-Kummissjoni kkonkludiet li minħabba s-sehem tal-importazzjonijiet Russi u d-differenza fil-prezz bejn l-importazzjonijiet Russi u importazzjonijiet oħra, il-prezz medju tal-importazzjoni taċ-ċipep tan-najlon 6 mill-“bqija tad-dinja” x’aktarx ma li kienx affettwat mill-importazzjonijiet mir-Russja u ma eskludithomx mill-istatistiki. L-argument ġie miċħud.

(116)

Fir-rigward tar-raden POY/FDY/HOY (88) u DTY/ACY/ATY/TDY/TTY (89), l-ilmentaturi allegaw li l-POY u d-DTY, il-fatturi ta’ produzzjoni ppubblikati fl-Ewwel Nota, misshom ġew dekomposti fil-materja prima kostitwenti tagħhom peress li kemm il-POY kif ukoll id-DTY kienu prodotti lesti jew nofshom lesti li daħlu fi stadji fakultattivi ta’ tlestija, u t-tnejn kienu jaqgħu taħt id-definizzjoni tal-prodott tal-investigazzjoni, u mhux materja prima. L-ilmentaturi allegaw li t-trattament tagħhom bħala fatturi individwali ta’ produzzjoni joħloq ir-riskju ta’ għadd doppju tal-istadji tal-ipproċessar upstream u downstream u li tiġi rrappreżentata ħażin l-istruttura reali tal-kostijiet tal-produzzjoni tar-raden tal-poliammid. L-ilmentaturi talbu lill-Kummissjoni tiddekomponi l-POY u d-DTY fil-fatturi ta’ produzzjoni kostitwenti tagħhom, jiġifieri ċ-ċipep tal-polimeru tal-poliammid, il-kost tal-enerġija u l-kost lavorattiv u kostijiet oħra tal-manifattura.

(117)

Il-Kummissjoni informat li, fejn possibbli, il-kost tal-manifattura tar-raden POY/FDY/HOY u DTY/ACY/ATY/TDY/TTY ġie dekompost fil-fatturi ta’ produzzjoni kostitwenti. Fejn mhux possibbli, minħabba n-nuqqas ta’ informazzjoni dwar il-manifattura ta’ entitajiet mhux soġġetti għal din l-investigazzjoni, il-Kummissjoni applikat il-valur referenzjarju għall-POY/FDY/HOY u għad-DTY/ACY/ATY/TDY/TTY. Għalhekk, l-argument kien irrilevanti għal partijiet tal-fatturi ta’ produzzjoni u ġie miċħud għall-bqija tal-fatturi ta’ produzzjoni.

(118)

Il-Grupp Eversun oġġezzjona wkoll għall-fatt li peress li l-Grupp primarjament ipproċessa l-erba’ tipi ta’ materja prima prinċipali (il-kaprolattam, iċ-ċipep tan-najlon 6, il-POY u d-DTY), il-kost tal-manifattura kellu jkun ibbażat fuq il-kostijiet reali rreġistrati fis-sistema kontabilistika tal-kostijiet tiegħu għal dawn l-erba’ fatturi ta’ produzzjoni.

(119)

Fir-rigward tal-Artikolu 2(6a)(a) tar-Regolament bażiku, u kif deskritt fit-Taqsima 3.2.1, il-Kummissjoni kkonkludiet li ma kienx xieraq li jintużaw il-prezzijiet u l-kostijiet domestiċi fil-pajjiż esportatur minħabba l-eżistenza ta’ distorsjonijiet sinifikanti fir-RPĊ. Il-Kummissjoni informat li, fejn possibbli, kellha l-ħsieb li tqassam il-manifattura tal-materjali fil-konsum tal-materja prima tal-input. L-argument dwar l-użu tal-kost reali rreġistrat fis-sistema kontabilistika tal-kostijiet ġie miċħud.

(120)

Fir-rigward tat-tubi tal-karta, l-ilmentaturi sostnew li l-unità tal-kejl missha nbidlet għan-numru ta’ tubi meħtieġa għal kull tunnellata ta’ poliammid prodott, minflok kg użati fil-produzzjoni tar-raden tal-poliammid.

(121)

Il-Kummissjoni informat li l-valuri referenzjarji fil-livell ta’ 6 ċifri estratti mill-GTA taħt il-kodiċijiet SA 4822 10 u 4822 90 tkejlu f’kg. L-ilmentaturi ma wrewx li l-kejl tal-valur referenzjarju tat-tubi tal-karta ma kienx xieraq. Għalhekk, il-Kummissjoni ċaħdet dan l-argument.

(122)

Fil-kummenti tagħha għall-Ewwel u għat-Tieni Nota, il-Grupp Eversun u l-Grupp Highsun sostnew li l-aġent taż-żejt użat għall-produzzjoni tar-raden tal-poliammid kien jiġi parzjalment importat minn pajjiżi terzi u li dan kien jirrifletti l-prezzijiet internazzjonali. Il-Grupp Eversun u l-Grupp Highsun ipprovdew evidenza tal-kwantitajiet ta’ din il-materja prima mixtrija fis-swieq internazzjonali.

(123)

Fir-rigward tal-prezz tal-importazzjoni tal-aġent taż-żejt minn pajjiżi terzi bi prezzijiet internazzjonali, il-Kummissjoni analizzat l-evidenza mressqa mill-Grupp Eversun u mill-Grupp Highsun matul il-verifiki fuq il-post. Il-Kummissjoni kkonkludiet li l-prezzijiet internazzjonali għall-kwantitajiet tal-aġent taż-żejt importat minn pajjiżi terzi jistgħu jiġu kkunsidrati biex jinħadem il-valur normali. Id-dikjarazzjoni ġiet aċċettata.

(124)

Fir-rigward tal-ilma mkessaħ u tal-arja kkompressata, il-fatturi ta’ produzzjoni ppubblikati fl-Ewwel Nota, l-ilmentaturi ssottomettew li l-unitajiet ta’ kejl misshom ġew riveduti. Fir-rigward tal-ilma mkessaħ, il-Koalizzjoni allegat li jkun aktar xieraq li jitqies l-input tal-enerġija elettrika meħtieġ għall-produzzjoni tal-ilma mkessaħ, aktar milli l-massa tal-ilma nnifsu. Fir-rigward tal-arja kkompressata, l-ilmentaturi allegaw li peress li l-kompressuri tal-arja kienu jaħdmu kompletament bl-elettriku, dan il-fattur seta’ jiġi integrat fil-konsum tal-elettriku.

(125)

Wara l-kummenti tal-ilmentaturi, il-Kummissjoni aġġornat il-metodoloġija tagħha, introduċiet il-valur referenzjarju għall-ilma fit-Tieni Nota u aġġornat il-valuri tal-konsum tal-elettriku biex jirriflettu l-produzzjoni tal-ilma mkessaħ u tal-arja kkompressata. L-identifikazzjoni tal-valur referenzjarju għall-ilma hija deskritta fil-premessa (143). Barra minn hekk, il-valuri referenzjarji tal-arja kkompressata u tal-ilma mkessaħ ġew irtirati. L-argument ġie aċċettat.

(126)

Wara verifiki fuq il-post, il-Kummissjoni identifikat erba’ fatturi addizzjonali ta’ produzzjoni, li ntużaw fi kwantitajiet limitati iżda li ntużaw direttament fil-proċess tal-manifattura. Dawn il-materjali addizzjonali kienu t-tħejjijiet tat-tessuti (SA 3809 91 ), ir-raden tal-ispandex (SA 5402 44 ), il-PTA (SA 2917 36 ) u d-diossidu tat-titanju (SA 2823 00 ).

(127)

Fil-kummenti tagħhom għat-Tieni Nota, l-ilmentaturi talbu aġġustamenti għall-valur referenzjarju tat-tħejjijiet tat-tessuti u tal-masterbatch. Fir-rigward tat-tħejjijiet tat-tessuti, l-ilmentaturi ssuġġerew li t-tħejjijiet tat-tessuti jiġu limitati għall-kodiċi tariffarju 380991001011, peress li t-tliet kodiċijiet l-oħra 380991001012, 380991009011 u 380991009019 ma kinux rilevanti għall-produzzjoni tal-poliammid. Fir-rigward tal-masterbatch, l-ilmentaturi allegaw li l-kodiċi tariffarju 320419000011 fin-nomenklatura tariffarja Torka kien jirreferi għaż-żebgħat tal-kubrit, li ma ntużawx fil-produzzjoni tar-raden tal-poliammid. Il-Koalizzjoni talbet li dawn il-kodiċijiet jitneħħew mill-valuri referenzjarji tat-tħejjijiet tat-tessuti u tal-masterbatch. Barra minn hekk, l-ilmentaturi allegaw li l-PTA ntuża fi kwantitajiet limitati ħafna matul il-produzzjoni tar-raden tal-poliammid u kkontestaw jekk l-inklużjoni tal-PTA fil-lista tal-fatturi ta’ produzzjoni kinitx tirrifletti l-istruttura ġenwina tal-kostijiet tal-kumpaniji Ċiniżi inklużi fil-kampjun.

(128)

Fir-rigward tat-tħejjijiet tat-tessuti u tal-masterbatch, il-Kummissjoni analizzat id-dikjarazzjonijiet sottomessi mill-ilmentaturi u kkonkludiet li kien tabilħaqq aktar xieraq li l-kodiċijiet SA jiġu ristretti ulterjorment għas-SA 380991001011 għat-tħejjijiet tat-tessuti, u għas-SA 320419000012 u 320419000019, peress li dawn il-materjali jintużaw fil-produzzjoni tal-prodott taħt investigazzjoni. Id-dikjarazzjoni ġiet aċċettata.

(129)

Fir-rigward tal-PTA, peress li din il-materja prima fil-fatt kienet tintuża fil-produzzjoni tal-prodott taħt investigazzjoni mill-produtturi esportaturi Ċiniżi inklużi fil-kampjun, il-Kummissjoni żammet il-PTA fil-lista ta’ fatturi ta’ produzzjoni. L-argument ġie miċħud.

(130)

Fit-Tieni Nota, il-Kummissjoni ddikjarat ukoll li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija tuża l-GTA biex tistabbilixxi l-kost mingħajr distorsjoni tal-biċċa l-kbira tal-fatturi ta’ produzzjoni, b’mod partikolari l-materja prima. Barra minn hekk, il-Kummissjoni ddikjarat li se tuża l-Istitut Tork tal-Istatistika (90) biex tistabbilixxi kostijiet lavorattivi mingħajr distorsjoni u t-tabelli tat-tariffi tal-elettriku bbażati fuq il-kontijiet tal-elettriku ppubblikati mill-Awtorità Regolatorja tas-Suq tal-Enerġija (EMRA, Energy Market Regulatory Authority) (91) kif ukoll il-prezz tal-gass għall-utenti industrijali fit-Turkija kif ippubblikat mill-Istitut Tork tal-Istatistika (92).

(131)

Fit-Tieni Nota, il-Kummissjoni informat ukoll lill-partijiet interessati li minħabba l-għadd kbir ta’ fatturi ta’ produzzjoni tal-produtturi esportaturi inklużi fil-kampjun li pprovdew informazzjoni kompluta u l-piż negliġibbli ta’ xi materja prima fil-kost totali tal-produzzjoni, dawn il-partiti negliġibbli kienu raggruppati taħt “materjal konsumabbli”. Barra minn hekk, il-Kummissjoni informat lill-partijiet interessati li hija se tikkalkola l-persentaġġ tal-materjal konsumabbli fuq il-kost totali tal-materja prima u se tapplika dan il-persentaġġ għall-kost ikkalkolat mill-ġdid tal-materja prima meta tuża l-valuri referenzjarji mingħajr distorsjoni stabbiliti fil-pajjiż rappreżentattiv xieraq.

(132)

Meta titqies l-informazzjoni kollha ppreżentata mill-partijiet interessati u miġbura matul iż-żjarat ta’ verifika, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni tar-raden tal-poliammid

(133)

Il-Kummissjoni inkludiet valur għall-kostijiet ġenerali tal-manifattura sabiex tkopri l-kostijiet mhux inklużi fil-fatturi ta’ produzzjoni msemmija aktar ’il fuq. Sabiex tistabbilixxi dan l-ammont, il-Kummissjoni esprimiet il-kost ġenerali tal-manifattura mġarrab mill-produttur esportatur li kkoopera għall-produzzjoni tal-prodott taħt investigazzjoni bħala persentaġġ tal-kost reali tal-materja prima użata u mbagħad applikat l-istess persentaġġ għall-kost mingħajr distorsjoni tal-istess materja prima sabiex tikseb il-kost ġenerali tal-manifattura mingħajr distorsjoni. Il-Kummissjoni qieset li, fil-kuntest ta’ din l-investigazzjoni, il-proporzjon bejn il-materja prima tal-produttur esportatur u l-kostijiet ġenerali rrapportati jista’ jintuża b’mod raġonevoli bħala indikazzjoni biex jiġu stmati l-kostijiet ġenerali mingħajr distorsjoni tal-manifattura meta titwassal sal-fabbrika tal-kumpanija.

(134)

Sabiex jiġi stabbilit il-prezz mingħajr distorsjoni ta’ materja prima kif ikkonsenjata sax-xatba ta’ produttur rappreżentattiv tal-pajjiż, il-Kummissjoni użat bħala bażi l-prezz medju ponderat tal-importazzjoni fil-pajjiż rappreżentattiv kif irrapportat fil-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet unitarji tal-importazzjonijiet mill-pajjiżi terzi kollha minbarra r-RPĊ u l-pajjiżi elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (93). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li fit-Taqsima 3.2.1 din ikkonkludiet li ma huwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni.

(135)

Għal għadd ta’ fatturi ta’ produzzjoni, il-kostijiet reali mġarrba mill-produtturi esportaturi li kkooperaw kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni. Peress li l-valur użat għal dawn ma kellu l-ebda impatt apprezzabbli fuq il-kalkoli tal-marġni tad-dumping, irrispettivament mis-sors użat, il-Kummissjoni ddeċidiet li tinkludi dawk il-kostijiet fil-materjal konsumabbli. Il-Kummissjoni kkalkolat il-persentaġġ tal-materjal konsumabbli fuq il-kost totali tal-materja prima u applikat dan il-persentaġġ għall-kost ikkalkolat mill-ġdid tal-materja prima meta użat il-prezzijiet stabbiliti mingħajr distorsjoni.

(136)

Il-Kummissjoni esprimiet il-kost tat-trasport imġarrab mill-produttur esportatur li kkoopera għall-provvista ta’ materja prima bħala persentaġġ tal-kost reali ta’ tali materja prima u mbagħad applikat l-istess persentaġġ għall-kost mingħajr distorsjoni tal-istess materja prima sabiex tikseb il-kost mingħajr distorsjoni tat-trasport. Il-Kummissjoni kkunsidrat li, fil-kuntest ta’ din l-investigazzjoni, il-proporzjon bejn il-materja prima tal-produttur esportatur u l-kostijiet tat-trasport irrapportati jista’ jintuża b’mod raġonevoli bħala indikazzjoni biex jiġu stmati l-kostijiet tat-trasport mingħajr distorsjoni tal-materja prima meta tiġi kkonsenjata lill-fabbrika tal-kumpanija.

(137)

Il-Kummissjoni analizzat il-prattiki kontabilistiċi tal-produtturi esportaturi Ċiniżi inklużi fil-kampjun li jappartjenu għall-prodotti sekondarji u għall-iskart. B’riżultat ta’ dan, il-Kummissjoni użat il-kwantitajiet ta’ prodotti ta’ skart mibjugħa u naqqset il-kost tal-produzzjoni, bl-użu tal-prezzijiet Torok tal-kodiċijiet SA applikabbli għall-iskart tar-raden tan-najlon u għall-iskart taċ-ċipep tan-najlon.

(138)

L-Uffiċċju Tork tal-Istatistika jippubblika informazzjoni dettaljata dwar il-pagi f’setturi ekonomiċi differenti fit-Turkija. Il-Kummissjoni użat l-aħħar statistiki disponibbli li tkopri l-2022 għall-kost lavorattiv medju għall-attività ekonomika skont il-kodiċi 1310 NACE “Tħejjija u għażil ta’ fibri tat-tessuti” skont il-klassifikazzjoni NACE Rev.2. Il-valur medju ta’ kull xahar tal-2022 ġie aġġustat kif xieraq għall-inflazzjoni bl-użu tal-indiċi tal-prezzijiet għall-konsumatur domestiku kif ippubblikat mill-Istitut Tork tal-Istatistika (94) biex jiġi adattat għall-Perjodu ta’ Investigazzjoni (mill-1 ta’ Lulju 2024 sat-30 ta’ Ġunju 2025) u aġġustat kif xieraq għall-klassi tad-daqs tal-kumpanija f’termini tal-għadd ta’ impjegati. L-aġġustamenti rriżultaw fil-valuri referenzjarji ta’ CNY 77,06 fis-siegħa għall-kumpaniji b’aktar minn 1 000 impjegat.

(139)

Fil-kummenti tiegħu għat-Tieni Nota, il-Grupp Highsun allega li kien hemm diversi dipartimenti fil-Grupp u li l-pagi kienu jvarjaw minn dipartiment għal ieħor, skont id-daqs u l-pożizzjoni tal-impjieg. Il-Grupp Highsun talab li l-valur referenzjarju għall-kost lavorattiv jiġi applikat biss għall-persunal li jaħdem fuq il-produzzjoni tal-prodott taħt investigazzjoni.

(140)

Il-Kummissjoni informat li hija kienet qieset in-numru totali ta’ impjegati għal kull kumpanija li jaħdmu għall-produzzjoni, għall-bejgħ u għall-amministrazzjoni tar-raden tal-poliammid. Il-Kummissjoni nnotat li l-erba’ produtturi kollha kemm huma tar-raden tal-poliammid fil-Grupp Highsun jiffurmaw entità ekonomika waħda u li n-numru verifikat ta’ impjegati li jaħdmu għall-produzzjoni, għall-bejgħ u għall-amministrazzjoni tar-raden tal-poliammid kien ta’ aktar minn 1 000 impjegat. Il-Kummissjoni sostniet li l-valur referenzjarju kien korrett. L-argument ġie miċħud.

(141)

Il-Kummissjoni użat l-istatistiki tal-prezzijiet tal-elettriku ppubblikati mill-Awtorità Regolatorja tas-Suq tal-Enerġija (EMRA) fl-istqarrijiet għall-istampa regolari tagħha. Il-Kummissjoni użat id-data tal-prezzijiet tal-elettriku industrijali f’kWh għas-settur industrijali li jkopri l-PI (mill-1 ta’ Lulju 2024 sat-30 ta’ Ġunju 2025) (95).

(142)

Il-Kummissjoni użat il-prezz tal-gass għall-utenti industrijali fit-Turkija kif ippubblikat mill-Uffiċċju Tork tal-Istatistika (96) fl-istqarrijiet għall-istampa regolari tiegħu. Il-Kummissjoni użat id-data tal-prezzijiet tal-gass fil-medda tal-konsum korrispondenti f’TL/m3 aġġustata kif xieraq għall-inflazzjoni bl-użu tal-Indiċi tal-Prezzijiet tal-Produtturi ppubblikat mill-Istitut Tork tal-Istatistika adattat għall-Perjodu ta’ investigazzjoni (Lulju 2024–Ġunju 2025), jiġifieri CNY 4,38 għal kull m3. Il-prezz huwa aġġustat għall-VAT ta’ 18 %, peress li l-prezz ikkwotat jinkludi l-VAT.

(143)

Il-Kummissjoni użat it-tariffa tal-ilma mitluba mill-Presidenza tal-Uffiċċju tal-Investiment tar-Repubblika tat-Turkija abbażi ta’ sorsi mill-amministrazzjoni tal-ilma u tad-drenaġġ ta’ Istanbul, l-Amministrazzjoni tal-Ilma u d-Drenaġġ ta’ Eskişehir u l-Amministrazzjoni tal-Ilma u d-Drenaġġ ta’ Antalya (97). Il-Kummissjoni użat l-aħħar statistika disponibbli kif ippubblikata minn din l-organizzazzjoni. Il-valur ta’ riferiment kien ibbażat fuq il-kost tal-ilma u tal-ilma mormi fuq bażi għal kull m3.

(144)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(145)

L-ispejjeż ġenerali tal-manifattura mġarrba mill-produtturi esportaturi li kkooperaw ġew espressi bħala sehem mill-kostijiet tal-manifattura effettivament imġarrba mill-produtturi esportaturi. Dan il-persentaġġ ġie applikat għall-kostijiet tal-manifattura mingħajr distorsjoni.

(146)

Sabiex jiġi stabbilit ammont mingħajr distorsjoni u raġonevoli għall-SG & A, għall-kostijiet u għall-profitt, il-Kummissjoni bbażat fuq id-data finanzjarja għall-2024 għal SASA Polyester Sanayi A.Ş., disponibbli fil-bażi tad-data ORBIS, ikkorroborata bir-rapporti finanzjarji awditjati disponibbli fuq is-sit web tal-kumpanija, it-tnejn għall-2024.

(147)

Fuq din il-bażi, l-SG & A espressi bħala persentaġġ tal-Kostijiet tal-Oġġetti Mibjugħa (“COGS”, Costs of Goods Sold) u li ġew applikati għall-kostijiet tal-produzzjoni mingħajr distorsjoni, ammontaw għal 7,15 %. Il-profitt, espress bħala persentaġġ tas-COGS u applikat għall-kostijiet tal-produzzjoni mingħajr distorsjoni, ammonta għal 14,35 %.

(148)

Abbażi ta’ dan ta’ hawn fuq, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(149)

L-ewwel nett, il-Kummissjoni stabbiliet il-kostijiet tal-manifattura mingħajr distorsjoni. Il-Kummissjoni applikat il-kostijiet unitarji mingħajr distorsjoni għall-konsum reali tal-fatturi individwali ta’ produzzjoni tal-produttur esportatur li kkoopera inkluż fil-kampjun. Dawn ir-rati ta’ konsum ġew ivverifikati matul il-verifika. Il-Kummissjoni mmultiplikat il-fatturi tal-użu bil-kostijiet mingħajr distorsjoni għal kull unità osservata fil-pajjiż rappreżentattiv, kif deskritt fit-Taqsima 3.2.1.

(150)

Sabiex jiġu stabbiliti kostijiet tal-produzzjoni mingħajr distorsjoni, kif spjegat fil-premessa (145), il-Kummissjoni l-ewwel żiedet il-kostijiet ġenerali tal-manifattura mal-kost tal-manifattura mingħajr distorsjoni, abbażi tal-proporzjon bejn il-kostijiet ġenerali tal-manifattura u l-kostijiet tal-materjal kif irrapportat minn kull produttur esportatur inkluż fil-kampjun.

(151)

Għall-kostijiet tal-produzzjoni stabbiliti kif deskritt fil-premessa preċedenti, il-Kummissjoni applikat l-SG & A u l-profitt kif innotat fil-premessi (146) sa (147).

(152)

Il-kostijiet SG & A espressi bħala persentaġġ tal-Kostijiet tal-Oġġetti Mibjugħa (“COGS”) u applikati għall-kostijiet mingħajr distorsjoni tal-produzzjoni, ammontaw għal 7,15 %. Il-profitt, espress bħala persentaġġ tas-COGS u applikat għall-kostijiet tal-produzzjoni mingħajr distorsjoni, ammonta għal 14,35 %.

(153)

Abbażi ta’ dan, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(154)

Il-produtturi esportaturi inklużi fil-kampjun esportaw lejn l-Unjoni jew direttament lil klijenti indipendenti, permezz ta’ produtturi esportaturi relatati fil-kumpaniji Ċiniżi inklużi fil-kampjun, jew permezz ta’ kumpaniji relatati li jaġixxu bħala negozjanti.

(155)

Għall-produtturi esportaturi li esportaw il-prodott ikkonċernat direttament lil klijenti indipendenti fl-Unjoni, permezz ta’produtturi esportaturi relatati fil-kumpaniji Ċiniżi inklużi fil-kampjun, jew permezz ta’ negozjanti relatati, il-prezz tal-esportazzjoni kien il-prezz effettivament imħallas jew li għandu jitħallas għall-prodott ikkonċernat meta jinbiegħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(156)

L-Artikolu 2(10) tar-Regolament bażiku jirrikjedi li l-Kummissjoni tagħmel paragun ġust bejn il-valur normali u l-prezz tal-esportazzjoni fl-istess livell ta’ kummerċ u li tikkunsidra d-differenzi fil-fatturi li jaffettwaw il-prezzijiet u l-komparabbiltà tal-prezzijiet. Fil-każ inkwistjoni, il-Kummissjoni għażlet li tqabbel il-valur normali u l-prezz tal-esportazzjoni tal-produtturi esportaturi inklużi fil-kampjun fil-livell ta’ kummerċ ta’ kif joħroġ mill-fabbrika. Kif spjegat aktar aktar ’il quddiem, fejn xieraq, il-valur normali u l-prezz tal-esportazzjoni ġew aġġustati sabiex: (i) jiġu nnettjati lura għal-livell ta’ kif joħroġ mill-fabbrika; u (ii) isiru konċessjonijiet għad-differenzi fil-fatturi li ġew iddikjarati, u li ntwerew, li jaffettwaw il-prezzijiet u l-komparabbiltà tal-prezzijiet.

(157)

Kif spjegat fil-premessa (148), il-valur normali ġie stabbilit fil-livell ta’ kummerċ ta’ kif joħroġ mill-fabbrika bl-użu tal-kostijiet tal-produzzjoni flimkien mal-ammonti għall-SG & A u għall-profitt, li tqiesu bħala raġonevoli għal dak il-livell ta’ kummerċ. Għalhekk, l-ebda aġġustament ma kien neċessarju biex il-valur normali jiġi nnettjat lura għal-livell ta’ kif joħroġ mill-fabbrika.

(158)

Il-Kummissjoni ma sabet l-ebda raġuni biex tagħmel kwalunkwe konċessjoni għall-valur normali, u dawn il-konċessjonijiet lanqas ma ġew iddikjarati minn xi wieħed mill-produtturi esportaturi inklużi fil-kampjun.

(159)

Sabiex il-prezz tal-esportazzjoni jiġi nnettjat lura għal-livell ta’ kif joħroġ mill-fabbrika, saru aġġustamenti minħabba: id-dazju doganali, imposti oħrajn fuq l-importazzjoni, il-merkanzija, l-assigurazzjoni, l-immaniġġar, it-tagħbija u spejjeż anċillari.

(160)

Saru konċessjonijiet għall-fatturi li ġejjin li jaffettwaw il-prezzijiet u l-komparabbiltà tal-prezzijiet: kost tal-kreditu, imposti bankarji, tariffi u kummissjonijiet tad-dikjarazzjoni tal-esportazzjoni.

(161)

Sar ukoll aġġustament għall-kummissjonijiet skont l-Artikolu 2(10)(i) tar-Regolament bażiku għal INylon E-commerce Co., Ltd., Hong Kong Jinjiang Group Co. Ltd., in-negozjanti relatati ta’ Eversun Group, u Xinhui Meida Nylon Co., Ltd. (HK), u n-negozjant relatat ta’ Highsun Group. L-investigazzjoni stabbiliet li l-funzjonijiet tan-negozjanti relatati kienu simili għal dawk ta’ aġent li jaħdem fuq bażi ta’ kummissjoni. Tabilħaqq, il-kumpaniji kkonċernati kisbu profitt għas-servizzi tagħhom u nnegozjaw firxa wiesgħa ta’ oġġetti għajr il-prodott ikkonċernat. Barra minn hekk, huma ħadmu mal-produttur esportatur relatat tagħhom ikkonċernat abbażi ta’ kuntratt, li kien jinkludi klawżola ta’ arbitraġġ. Konsegwentement, il-Kummissjoni qieset li kien ġustifikat li jsir aġġustament fil-prezz tal-esportazzjoni skont l-Artikolu 2(10)(i) tar-Regolament bażiku għall-marġni kummerċjali li jirċievu n-negozjanti relatati.

(162)

L-aġġustament għall-kummissjoni kostruita kien jikkonsisti fil-kostijiet SG & A mġarrba min-negozjanti relatati u, minħabba r-relazzjoni bejn il-produttur esportatur u n-negozjant, profitt nozzjonali. Għal dawn tal-aħħar, fin-nuqqas ta’ kooperazzjoni minn importaturi mhux relatati f’din l-investigazzjoni, il-Kummissjoni użat il-profitt tal-importaturi mhux relatati ta’ 6.89 % li nstab f’investigazzjoni preċedenti dwar l-importazzjonijiet ta’ alkoħols tal-polivinil (polyvinyl alcohols, “PVA”) li joriġinaw miċ-Ċina (98). L-alkoħol tal-polivinil huwa polimeru petrokimiku li jintuża, fost l-oħrajn, fid-daqs tal-medd tat-tessuti. Il-ħjut tal-poliammid huma prodotti minn polimeri petrokimiċi, bħall-kaprolattam, u jintużaw fl-industrija tat-tessuti. Il-livell ta’ profitt misjub fl-investigazzjoni tal-alkoħol tal-polivinil kien, għalhekk, provviżorjament ikkunsidrat raġonevoli li jintuża f’dan il-każ minħabba li kien realizzat minn importaturi mhux relatati involuti wkoll fil-kummerċ ta’ prodotti petrokimiċi.

(163)

Għaż-żewġ Gruppi ta’ produtturi esportaturi li kkooperaw inklużi fil-kampjun, il-Kummissjoni qabblet il-valur normali medju ponderat ta’ kull tip tal-prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, f’konformità mal-Artikolu 2(11) u (12) tar-Regolament bażiku.

(164)

Fuq din il-bażi, il-marġnijiet tad-dumping medji ponderati proviżorji, espressi bħala persentaġġ tal-prezz CIF (Cost, Insurance and Freight) fil-fruntiera tal-Unjoni, bid-dazju mhux imħallas, huma ta’ 57,7 % għall-Grupp Eversun u ta’ 90,1 % għall-Grupp Highsun. Għall-produtturi esportaturi li kkooperaw li mhumiex inklużi fil-kampjun, il-Kummissjoni kkalkolat il-marġni tad-dumping medju ponderat, f’konformità mal-Artikolu 9(6) tar-Regolament bażiku. Għalhekk, dak il-marġni ġie stabbilit fuq il-bażi tal-marġnijiet tal-produtturi esportaturi inklużi fil-kampjun.

(165)

Fuq din il-bażi, il-marġni tad-dumping proviżorju tal-produtturi esportaturi li kkooperaw u li ma humiex inklużi fil-kampjun huwa ta’ 67,1 %.

(166)

Għall-produtturi esportaturi l-oħrajn kollha fir-RPĊ, il-Kummissjoni stabbiliet il-marġni tad-dumping fuq il-bażi tal-fatti disponibbli, f’konformità mal-Artikolu 18 tar-Regolament bażiku. Għal dan il-għan, il-Kummissjoni ddeterminat il-livell ta’ kooperazzjoni tal-produtturi esportaturi. Il-livell ta’ kooperazzjoni huwa l-volum tal-esportazzjonijiet tal-produtturi esportaturi li kkooperaw lejn l-Unjoni espress bħala proporzjon tal-importazzjonijiet totali mill-pajjiż ikkonċernat lejn l-Unjoni fil-perjodu ta’ investigazzjoni, li ġew stabbiliti abbażi tal-Eurostat.

(167)

Il-livell ta’ kooperazzjoni f’dan il-każ huwa għoli minħabba li l-produtturi esportaturi li kkooperaw ammontaw għal madwar 87,5 % tal-importazzjonijiet totali matul il-perjodu ta’ investigazzjoni. Fuq din il-bażi, il-Kummissjoni ddeċidiet li tistabbilixxi l-marġni tad-dumping għall-produtturi esportaturi li ma kkooperawx fil-livell tal-kumpanija inkluża fil-kampjun bl-ogħla marġni tad-dumping.

(168)

Għalhekk, il-marġni tad-dumping residwu ġie stabbilit għal 90,1 %.

(169)

Il-marġnijiet tad-dumping proviżorji, espressi bħala persentaġġ tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(170)

Matul il-perjodu ta’ investigazzjoni, fl-Unjoni l-prodott simili kien jiġi mmanifatturat minn 10 produtturi (99). Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(171)

Peress li ċ-ċifri li jikkonċernaw l-industrija totali tal-Unjoni ġew stmati abbażi tar-rapporti sensittivi (100), iċ-ċifri tal-konsum u tal-makroindikaturi għall-analiżi tad-dannu jingħataw f’meded għal raġunijiet ta’ kunfidenzjalità. Fil-każ tal-mikroindikaturi, jintużaw il-meded ukoll minħabba l-fatt li tliet produtturi Ewropej inklużi fil-kampjun jappartjenu għal żewġ gruppi biss.

(172)

Il-produzzjoni totali tal-Unjoni matul il-perjodu ta’ investigazzjoni ġiet stabbilita fil-medda ta’ [66 000 sa 74 000] tunnellata. Il-Kummissjoni stabbiliet iċ-ċifra abbażi tal-informazzjoni kollha disponibbli dwar l-industrija tal-Unjoni, bħat-tweġibiet għall-kwestjonarju tal-produtturi inklużi fil-kampjun u t-tweġiba għall-makrokwestjonarju pprovduta mill-ilmentatur, li kien fiha data pprovduta minn membri tal-Koalizzjoni mhux inklużi fil-kampjun u stimi bbażati fuq ir-rapporti msemmija hawn fuq. Kif indikat fil-premessa (10), il-produtturi tal-Unjoni inklużi fil-kampjun kienu jirrappreżentaw 44,4 % tal-produzzjoni totali tal-Unjoni tal-prodott simili.

(173)

Il-Kummissjoni sabet li parti insinifikanti mill-produzzjoni tal-produtturi tal-Unjoni inklużi fil-kampjun kienet maħsuba għal użu kaptiv. Fid-dawl ta’ dawn il-kwantitajiet mhux sinifikanti [0,1 % sa 0,6 % tal-produzzjoni], tqies improbabbli li dawn jista’ jkollhom xi effett fuq l-istampa tad-dannu jew tal-kawżalità. Għalhekk, il-Kummissjoni ma għamlitx analiżi separata tas-suq kaptiv għall-indikaturi differenti tad-dannu.

(174)

Il-Kummissjoni eżaminat ċerti indikaturi ekonomiċi relatati mal-industrija tal-Unjoni abbażi tad-data għas-suq ħieles. Dawn l-indikaturi huma: il-volum ta’ bejgħ u l-prezzijiet tal-bejgħ fis-suq tal-Unjoni; is-sehem mis-suq; it-tkabbir; il-volum u l-prezzijiet tal-esportazzjoni; il-profittabbiltà; ir-redditu fuq l-investiment; u l-fluss tal-flus.

(175)

Madankollu, indikaturi ekonomiċi oħrajn jistgħu jiġu eżaminati b’mod sinifikanti biss billi ssir referenza għall-attività kollha, inkluż l-użu kaptiv tal-industrija tal-Unjoni. Dawn huma: il-produzzjoni; il-kapaċità tal-produzzjoni, l-użu tal-kapaċità; l-investimenti; l-istokks; l-impjiegi; il-produttività; il-pagi; u l-kapaċità li jiġi ġġenerat il-kapital. Huma jiddependu mill-attività kollha, kemm jekk il-produzzjoni tkun kaptiva kif ukoll jekk tinbiegħ fis-suq ħieles.

(176)

Il-Kummissjoni stabbiliet il-konsum tal-Unjoni abbażi ta’ (i) data tal-Eurosta u (ii) il-bejgħ ivverifikat tal-industrija tal-Unjoni.

(177)

Il-konsum tal-Unjoni żviluppa kif ġej:

Tabella 2

Konsum tal-Unjoni (tunnellati)

(178)

Fil-perjodu kkunsidrat, il-konsum tal-Unjoni naqas bi 15 % fil-perjodu ta’ investigazzjoni meta mqabbel ma’ sena tal-bidu tal-2022. L-akbar tnaqqis seħħ bejn is-snin 2022 u 2023, u wara x-xejra ta’ tnaqqis kompliet b’żieda żgħira fit-tieni nofs tal-perjodu ta’ investigazzjoni.

(179)

Il-Kummissjoni stabbiliet il-volum tal-importazzjonijiet abbażi tad-data tal-Eurostat. Is-sehem mis-suq tal-importazzjonijiet ġie stabbilit billi tqabblu l-volumi tal-importazzjoni mal-konsum tas-suq ħieles tal-Unjoni kif iddeterminat fit-Taqsima 4.2.

(180)

L-importazzjonijiet lejn l-Unjoni mill-pajjiż ikkonċernat żviluppaw kif ġej:

Tabella 3

Kwantità ta’ importazzjonijiet u sehem mis-suq

(181)

Fis-suq li kien qed jiċkien, l-importazzjonijiet mir-RPĊ żdiedu f’termini assoluti b’14 %, li rriżulta fiż-żieda tas-sehem mis-suq Ċiniż fis-suq tal-Unjoni minn [19-sa 21] % għal [25 sa 29] % matul il-perjodu kkunsidrat, jew b’madwar terz.

(182)

Il-Kummissjoni stabbiliet il-prezzijiet tal-importazzjonijiet abbażi ta’ data tal-Eurostat. It-twaqqigħ tal-prezz tal-importazzjonijiet ġie stabbilit fuq il-bażi ta’ informazzjoni verifikata pprovduta mill-produtturi esportaturi inklużi fil-kampjun fil-pajjiżi kkonċernati u mill-produtturi tal-Unjoni inklużi fil-kampjun.

(183)

Il-prezz medju ponderat tal-importazzjonijiet mill-pajjiż ikkonċernat lejn l-Unjoni żviluppa kif ġej:

Tabella 4

Prezzijiet tal-importazzjoni (EUR/tunnellata)

(184)

Il-prezzijiet tal-importazzjonijiet Ċiniżi naqsu b’20 % matul il-perjodu kkunsidrat.

(185)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(186)

It-tqabbil tal-prezzijiet sar fuq bażi ta’ tip b’tip għat-tranżazzjonijiet fl-istess livell ta’ kummerċ, bl-aġġustament dovut, meta neċessarju, u wara tnaqqis tar-ribassi u tat-tariffi tal-kummissjoni. Ir-riżultat tat-tqabbil kien espress bħala persentaġġ tal-fatturat teoretiku tal-produtturi tal-Unjoni inklużi fil-kampjun matul il-perjodu ta’ investigazzjoni. Dan wera marġni medju ponderat tat-twaqqigħ tal-prezz ta’ bejn 42,4 % u 48,2 % permezz tal-importazzjonijiet mill-pajjiż ikkonċernat fis-suq tal-Unjoni.

(187)

F’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet oġġett ta’ dumping fuq l-industrija tal-Unjoni kien jinkludi valutazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(188)

Kif imsemmi fil-premessa (10), intuża l-kampjunar għad-determinazzjoni tad-dannu possibbli mġarrab mill-industrija tal-Unjoni.

(189)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tad-data li tinsab fit-tweġiba għall-makrokwestjonarju. Id-data kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun. Id-data kienet relatata mal-produtturi tal-Unjoni inklużi fil-kampjun. Iż-żewġ settijiet ta’ data nstabu li jirrappreżentaw is-sitwazzjoni ekonomika tal-industrija tal-Unjoni.

(190)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(191)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(192)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 5

Produzzjoni, kapaċità tal-produzzjoni u użu tal-kapaċità

(193)

Il-volum tal-produzzjoni naqas b’25 % fil-perjodu kkunsidrat. L-akbar tnaqqis seħħ bejn is-snin 2022 u 2023. Fis-snin ta’ wara, il-produzzjoni żdiedet bi ftit, iżda baqgħet ferm aktar baxxa milli fil-bidu tal-perjodu kkunsidrat. It-tnaqqis sinifikanti fil-produzzjoni affettwa wkoll il-kapaċità tal-produzzjoni, li tnaqqset b’9 % fl-istess perjodu. L-użu tal-kapaċità naqas ukoll bi 18 %, anke f’sitwazzjoni ta’ kapaċità mnaqqsa.

(194)

Il-kwantità ta’ bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 6

Kwantità ta’ bejgħ u sehem mis-suq

(195)

Bħall-evoluzzjoni tal-volumi tal-produzzjoni, it-tnaqqis qawwi fil-volumi tal-bejgħ seħħ fis-snin 2022 u 2023. Din ix-xejra negattiva kompliet fl-2024, segwita minn titjib żgħir fil-perjodu ta’ investigazzjoni. Madankollu, b’mod ġenerali, l-industrija tal-Unjoni tilfet 22 % tal-bejgħ fil-perjodu ta’ investigazzjoni meta mqabbla mal-bidu tal-perjodu kkunsidrat. Dan it-tnaqqis kien aktar b’saħħtu mit-tnaqqis fil-konsum (-15 %).

(196)

Konsegwentement, is-sehem mis-suq tal-industrija tal-Unjoni niżel b’4 punti perċentwali minn [61 sa 68] % fl-2022 għal [57 sa 64] % fil-perjodu ta’ investigazzjoni.

(197)

L-industrija tal-Unjoni ċkienet matul il-perjodu kkunsidrat, b’mod partikolari fl-2023 u fl-2024 meta mqabbla mal-2022. L-industrija tal-Unjoni wriet ħjiel ta’ reżiljenza fil-perjodu ta’ investigazzjoni, meta, bid-detriment ta’ tnaqqis fil-prezzijiet, kienet kapaċi żżid il-volumi tal-bejgħ bi ftit meta mqabbla mas-snin preċedenti.

(198)

L-impjiegi u l-produttività żviluppaw kif ġej matul il-perjodu kkunsidrat:

Tabella 7

Impjiegi u produttività

(199)

Matul il-perjodu kkunsidrat, l-impjiegi fl-industrija tal-Unjoni naqsu b’10 %. L-industrija tal-Unjoni ppruvat iżżomm il-persunal imħarreġ ħafna u kwalifikat bl-aspettattiva li s-sitwazzjoni tas-suq tinnormalizza, u li jerġgħu lura l-volumi tal-produzzjoni ogħla.

(200)

Madankollu, mill-premessa preċedenti u mill-premessa (193) jirriżulta li l-produttività naqset matul il-perjodu kkunsidrat.

(201)

Il-marġnijiet tad-dumping kollha kienu ogħla b’mod sinifikanti mil-livell de minimis. L-impatt tad-daqs tal-marġnijiet reali tad-dumping fuq l-industrija tal-Unjoni kien sostanzjali, b’kunsiderazzjoni tal-volum u l-prezzijiet tal-importazzjonijiet mill-pajjiż ikkonċernat.

(202)

Din hija l-ewwel investigazzjoni anti-dumping dwar il-prodott ikkonċernat. Għaldaqstant, ma kienx hemm data disponibbli biex jiġu vvalutati l-effetti ta’ dumping possibbli fil-passat.

(203)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 8

Prezzijiet tal-bejgħ fl-Unjoni

(204)

Il-prezzijiet tal-bejgħ tal-industrija tal-Unjoni tnaqqsu mill-kompetizzjoni mill-importazzjonijiet Ċiniżi. Il-prezzijiet naqsu b’9 % matul il-perjodu kkunsidrat.

(205)

Madankollu, wara l-2023, l-industrija tal-Unjoni rnexxielha tirristruttura u tnaqqas il-kostijiet tagħha. Il-kostijiet medji tal-produzzjoni naqsu bejn l-2023 u l-perjodu ta’ investigazzjoni b’10 % u fil-perjodu kkunsidrat kollu b’4 %.

(206)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 9

Kostijiet lavorattivi medji għal kull impjegat

(207)

Il-kostijiet lavorattivi medji żdiedu b’14 % matul il-perjodu kkunsidrat. Fl-2023 u fl-2024 biss, il-produtturi tal-Unjoni rnexxielhom iżommu l-kostijiet lavorattivi stabbli.

(208)

Il-livelli tal-istokks tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Stokks

(209)

Billi l-industrija tal-Unjoni rreaġixxiet għall-volum tal-bejgħ imnaqqas billi naqqset il-volum tal-produzzjoni tagħha, is-sehem tal-istokkijiet tal-għeluq fuq il-volum tal-produzzjoni baqa’ pjuttost stabbli (madwar 25 %) matul il-perjodu kkunsidrat kollu.

(210)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Profittabbiltà, fluss tal-flus, investimenti u redditu fuq l-investimenti

(211)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala persentaġġ tal-fatturat ta’ dak il-bejgħ. Bl-eċċezzjoni tal-2022, l-industrija tal-Unjoni kienet qed tagħmel it-telf fil-perjodu kkunsidrat.

(212)

Il-fluss tal-flus nett huwa l-abbiltà tal-produtturi tal-Unjoni li jiffinanzjaw l-attivitajiet tagħhom huma stess. F’konformità mal-iżvilupp tal-profittabbiltà, il-fluss tal-flus naqas ukoll, speċjalment fil-perjodu ta’ investigazzjoni. Il-fluss negattiv tal-flus fis-sena tal-bidu tal-2022 kien dovut għaċ-ċirkostanzi speċjali relatati mar-rivalutazzjoni tal-inventarji f’waħda mill-kumpaniji inklużi fil-kampjun.

(213)

Ir-redditu fuq l-investimenti huwa l-profitt f’persentaġġ tal-valur kontabilistiku nett tal-investimenti. Ir-redditu fuq l-investimenti kien pożittiv fl-2022 iżda naqas b’mod sinifikanti fis-snin ta’ wara tal-perjodu kkunsidrat.

(214)

Minn dan ta’ hawn fuq jirriżulta li l-kapaċità tal-produtturi tal-Unjoni inklużi fil-kampjun li jiġġeneraw il-kapital kienet affettwata b’mod negattiv mit-tnaqqis fil-profittabbiltà u fil-fluss tal-flus nett.

(215)

L-industrija tal-Unjoni tilfet volumi sinifikanti ta’ bejgħ u erba’ punti perċentwali tas-sehem mis-suq f’suq tal-Unjoni li kien qiegħed jiċkien. Barra minn hekk, l-industrija tal-Unjoni saret tagħmel it-telf fil-perjodu kkunsidrat, wara li kienet għadha profittabbli fis-sena tal-bidu tal-2022. Din l-evoluzzjoni negattiva kompliet minkejja l-isforzi tal-industrija tal-Unjoni biex tirristruttura u tnaqqas il-kostijiet tagħha. Is-sitwazzjoni tat-telf affettwat b’mod negattiv ukoll indikaturi finanzjarji oħra bħall-fluss tal-flus, l-investimenti netti u r-redditu fuq l-investimenti. It-tnaqqis ta’ dawn l-indikaturi kien qed jitqawwa fil-perjodu ta’ investigazzjoni. Barra minn hekk, it-tnaqqis fil-bejgħ irriżulta fi tnaqqis fil-produzzjoni u tnaqqis sfurzat tal-kapaċità tal-produzzjoni kif ukoll fl-impjiegi.

(216)

Abbażi ta’ dak li ntqal hawn fuq, il-Kummissjoni kkonkludiet b’mod proviżorju li l-industrija tal-Unjoni ġarrbet dannu materjali fis-sens tal-Artikolu 3(5) tar-Regolament bażiku.

(217)

F’konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet li huma oġġett ta’ dumping mill-pajjiż ikkonċernat ikkawżawx dannu materjali lill-industrija tal-Unjoni. F’konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħra setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi għajr l-importazzjonijiet oġġett ta’ dumping mill-pajjiż ikkonċernat ma kienx attribwit għall-importazzjonijiet oġġett ta’ dumping. Dawn il-fatturi huma: l-importazzjonijiet minn pajjiżi terzi, il-prestazzjoni tal-esportazzjoni tal-industrija tal-Unjoni u t-tnaqqis fid-domanda.

(218)

Matul il-perjodu kkunsidrat, l-industrija tal-Unjoni tilfet volumi sinifikanti ta’ bejgħ fis-suq tal-Unjoni, billi l-volumi ta’ bejgħ tal-Unjoni tagħha naqsu b’22 %. Fl-istess żmien li l-konsum naqas bi 15 %, is-sehem mis-suq tal-industrija tal-Unjoni naqas minn [61 sa 68] % fl-2022 għal [57 sa 64] % fil-perjodu ta’ investigazzjoni.

(219)

It-tnaqqis fis-sehem mis-suq tal-industrija tal-Unjoni jista’ jiġi attribwit għal żieda parallela fl-importazzjonijiet mill-pajjiż ikkonċernat, peress li ma kien hemm l-ebda sors sinifikattiv ieħor ta’ importazzjonijiet li akkwista s-sehem fis-suq matul il-perjodu kkunsidrat. Tabilħaqq, l-importazzjonijiet miċ-Ċina żiedu s-sehem mis-suq minn [19 sa 21] % għal [25 sa 29] %. L-importazzjonijiet miċ-Ċina komplew jikbru u jiksbu sehem mis-suq għad-detriment tal-industrija tal-Unjoni.

(220)

Fl-istess ħin, il-prezzijiet tal-importazzjonijiet Ċiniżi waqqgħu l-prezzijiet tal-industrija tal-Unjoni b’aktar minn 40 % matul il-perjodu ta’ investigazzjoni. Il-prezzijiet tal-importazzjoni Ċiniżi naqqsu l-prezzijiet tal-industrija tal-Unjoni, u affettwaw b’mod avvers l-indikaturi finanzjarji tagħha, minkejja l-isforzi tal-produtturi tal-Unjoni biex inaqqsu l-kostijiet tagħhom.

(221)

Minħabba l-volumi tal-bejgħ mitlufa, l-industrija tal-Unjoni esperjenzat ukoll tnaqqis sinifikanti fil-kwantitajiet tal-produzzjoni. Biex tibqa’ kompetittiva, l-industrija tal-Unjoni kienet imġiegħla tnaqqas il-prezzijiet tal-bejgħ tagħha (b’9 % fil-perjodu kkunsidrat), li affettwa b’mod negattiv il-profittabbiltà, li minbarra s-sena 2022, dejjem kienet negattiva fil-perjodu kkunsidrat, u laħqet l-aktar livell baxx fil-perjodu ta’ investigazzjoni.

(222)

Għalhekk, ġie konkluż b’mod proviżorju li l-importazzjonijiet oġġett ta’ dumping tar-raden tal-poliammid miċ-Ċina kkawżaw dannu materjali lill-industrija tal-Unjoni.

(223)

Il-kwantità tal-importazzjonijiet minn pajjiżi terzi oħrajn żviluppat kif ġej matul il-perjodu kkunsidrat:

Tabella 12

Importazzjonijiet minn pajjiżi terzi

(224)

Il-Kummissjoni analizzat ix-xejriet fl-importazzjonijiet mill-pajjiżi ewlenin għajr iċ-Ċina li huma preżenti fis-suq Ewropew tar-raden tal-poliammid, jiġifieri: Iżrael, il-Vjetnam u t-Turkija.

(225)

Matul il-perjodu kkunsidrat kollu, Iżrael biss kellu sehem mis-suq ta’ aktar minn 2 %. Madankollu, il-prezzijiet tal-importazzjonijiet minn Iżrael kienu konsistentement ogħla mill-prezzijiet tal-industrija tal-Unjoni. Barra minn hekk, l-importazzjonijiet minn Iżrael urew xejra ta’ tnaqqis fil-perjodu kkunsidrat.

(226)

Minkejja l-prezzijiet baxxi tal-importazzjoni mill-Vjetnam, l-importazzjonijiet minn dan il-pajjiż qatt ma laħqu sehem mis-suq ta’ aktar minn 2 % fil-perjodu kkunsidrat u, għalhekk, ma kkontribwewx għad-dannu mġarrab mill-industrija tal-Unjoni.

(227)

L-importazzjonijiet mit-Turkija matul il-perjodu kkunsidrat kienu stabbli, kontinwament taħt is-sehem mis-suq ta’ 1,5 %, u l-prezzijiet tiegħu kienu komparabbli ma’ dawk tal-produtturi tal-Unjoni.

(228)

L-importazzjonijiet mill-pajjiżi terzi l-oħra kollha naqsu matul il-perjodu kkunsidrat u l-prezzijiet tagħhom kienu b’mod ġenerali f’livelli ogħla mill-prezzijiet tal-produtturi tal-Unjoni.

(229)

Abbażi ta’ dan, il-Kummissjoni kkonkludiet proviżorjament li l-importazzjonijiet mill-pajjiżi terzi ma kkontribwewx għad-dannu materjali li sofriet l-industrija tal-Unjoni.

(230)

Matul il-perjodu kkunsidrat il-volum tal-esportazzjonijiet tal-produtturi tal-Unjoni inklużi fil-kampjun żviluppa kif ġej:

Tabella 13

Prestazzjoni tal-esportazzjoni tal-produtturi tal-Unjoni inklużi fil-kampjun

(231)

Il-volumi tal-bejgħ tal-esportazzjoni tal-industrija tal-Unjoni naqsu bi 52 % matul il-perjodu kkunsidrat (bl-akbar tnaqqis fl-2022 u fl-2023), iżda dawn il-volumi ma kinux sostanzjali, meta mqabbla mal-volumi tal-bejgħ totali tal-industrija tal-Unjoni. It-tnaqqis fil-volumi tal-esportazzjoni fit-termini relattivi kien ifisser li l-persentaġġ tal-bejgħ tal-esportazzjoni fil-bejgħ totali tal-produtturi tal-Unjoni naqas minn 7 % għal 4 %. Barra minn hekk, il-prezzijiet medji tal-bejgħ tal-esportazzjoni kienu simili għall-prezzijiet tal-bejgħ tal-Unjoni matul il-perjodu kkunsidrat.

(232)

Fuq din il-bażi, il-Kummissjoni kkonkludiet b’mod proviżorju li t-tnaqqis fil-volum tal-esportazzjoni ma kkontribwiex għad-dannu.

(233)

Kif spjegat fit-Taqsima 4.2, is-suq tal-Unjoni varja fil-perjodu kkunsidrat bi tnaqqis ta’ 15 % fil-perjodu ta’ investigazzjoni fir-rigward tal-2022. Irrispettivament mill-fluttwazzjonijiet fis-suq, is-sehem tal-importazzjonijiet Ċiniżi kompla jiżdied anke f’perjodi ta’ tnaqqis u, barra minn hekk, l-industrija tal-Unjoni ma setgħetx iżżomm is-sehem mis-suq. Tnaqqis fil-volumi tal-bejgħ tal-industrija tal-Unjoni proporzjonat għat-tnaqqis fid-domanda kien ikun ta’ bejn 8 000 u 10 000 tunnellata, filwaqt li fir-realtà, minħabba ż-żieda fl-importazzjonijiet Ċiniżi, it-tnaqqis essenzjalment irdoppja u ammonta għal 16 000 sa 20 000 tunnellata. Għalhekk, il-Kummissjoni kkonkludiet b’mod proviżorju li t-tnaqqis fid-domanda fis-suq ma mmitigax ir-rabta kawżali.

(234)

Il-Kummissjoni ddistingwiet u sseparat l-effetti tal-fatturi kollha magħrufin fuq is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta’ dumping. Il-Kummissjoni sabet li l-importazzjonijiet minn pajjiżi terzi (minbarra ċ-Ċina), u l-prestazzjoni tal-esportazzjoni tal-industrija tal-Unjoni ma kkontribwewx għad-dannu materjali mġarrab mill-industrija tal-Unjoni.

(235)

It-tnaqqis fil-konsum seta’ kkontribwixxa għad-dannu iżda mhux sal-punt li jkisser ir-rabta kawżali, peress li l-volumi tal-bejgħ mitlufa għall-importazzjonijiet miċ-Ċina qabżu t-tnaqqis fil-konsum.

(236)

Abbażi ta’ dan ta’ hawn fuq, il-Kummissjoni kkonkludiet f’dan l-istadju li l-importazzjonijiet oġġett ta’ dumping mill-pajjiż ikkonċernat ikkawżaw dannu materjali lill-industrija tal-Unjoni u li l-fatturi l-oħrajn, meqjusa b’mod individwali jew b’mod kollettiv, ma naqqsux ir-rabta kawżali bejn l-importazzjonijiet oġġett ta’ dumping u d-dannu materjali. Id-dannu huwa ċar, b’mod partikolari fir-rigward tal-produzzjoni u tal-volumi tal-bejgħ, tas-sehem mis-suq, tal-profittabbiltà, tal-fluss tal-flus, u tar-redditu fuq l-investimenti.

(237)

Sabiex tiddetermina l-livell tal-miżuri, il-Kummissjoni eżaminat jekk dazju aktar baxx mill-marġni tad-dumping ikunx biżżejjed sabiex jitneħħa d-dannu kkawżat mill-importazzjonijiet oġġett ta’ dumping lill-industrija tal-Unjoni.

(238)

Id-dannu jitneħħa jekk l-industrija tal-Unjoni tkun tista’ tikseb profitt fil-mira billi tbigħ bi prezz fil-mira fis-sens tal-Artikolu 7(2c) u 7(2d) tar-Regolament bażiku.

(239)

F’konformità mal-Artikolu 7(2c) tar-Regolament bażiku, sabiex tistabbilixxi l-profitt fil-mira, il-Kummissjoni qieset il-fatturi li ġejjin: il-livell ta’ profittabbiltà qabel iż-żieda fl-importazzjonijiet mill-pajjiż li qiegħed jiġi investigat, il-livell ta’ profittabbiltà meħtieġ sabiex ikopri l-kostijiet u l-investimenti kollha, ir-riċerka u l-iżvilupp (R&Ż) u l-innovazzjoni, u l-livell ta’ profittabbiltà li wieħed għandu jistenna f’kundizzjonijiet ta’ kompetizzjoni normali. Jenħtieġ li tali marġni ta’ profitt ma jkunx anqas minn 6 %.

(240)

Bħala l-ewwel pass, il-Kummissjoni stabbiliet profitt bażiku li jkopri l-kostijiet sħaħ f’kundizzjonijiet normali ta’ kompetizzjoni. Billi l-industrija tal-Unjoni ġarrbet telf matul il-biċċa kbira tal-perjodu kkunsidrat, u l-profitti fl-2022 kienu baxxi ħafna, u d-data tal-industrija tal-Unjoni ma setgħetx tintuża, il-Kummissjoni stabbiliet marġni ta’ profitt minimu raġonevoli ta’ 6 %. Dan il-profitt fil-mira kien allinjat ukoll mal-profitt fil-mira pprovdut fl-ilment.

(241)

Produttur tal-Unjoni inkluż fil-kampjun ipprovda evidenza li l-livell tiegħu ta’ investimenti, ta’ R&Ż u ta’ innovazzjoni matul il-perjodu kkunsidrat kien ikun ogħla f’kundizzjonijiet normali ta’ kompetizzjoni. Il-Kummissjoni vverifikat din l-informazzjoni u kkonkludiet li d-dokumentazzjoni u l-komunikazzjonijiet interni pprovduti wrew li l-kumpanija ma wettqitx ċerti investimenti minħabba s-sitwazzjoni fis-suq tal-Unjoni. Biex tirrifletti dan fil-profitt fil-mira, il-Kummissjoni kkalkolat id-differenza bejn l-ispejjeż tal-investimenti, tar-R&Ż u tal-innovazzjoni (“IRI”, investments, R&D and innovation) f’kundizzjonijiet normali ta’ kompetizzjoni kif ipprovduti mill-produttur tal-Unjoni inkluż fil-kampjun u vverifikati mill-Kummissjoni bl-ispejjeż reali tal-IRI matul il-perjodu kkunsidrat. Tali differenza, espressa bħala persentaġġ tal-fatturat, kienet ta’ [1,8 sa 3,0] %.

(242)

Dak il-persentaġġ żdied mal-profitt bażiku msemmi fil-premessa (240), li wassal għal profitt fil-mira ta’ [7,2 sa 9,0] % għat-tipi ta’ prodotti mmanifatturati minn dak il-produttur tal-Unjoni inkluż fil-kampjun.

(243)

F’konformità mal-Artikolu 7(2d) tar-Regolament bażiku, bħala pass finali, il-Kummissjoni vvalutat il-kostijiet futuri li jirriżultaw mill-Ftehimiet Ambjentali Multilaterali, u l-protokolli tagħhom, li l-Unjoni hija parti minnhom, u tal-Konvenzjonijiet tal-ILO elenkati fl-Anness Ia li l-industrija tal-Unjoni se ġġarrab matul il-perjodu ta’ applikazzjoni tal-miżura skont l-Artikolu 11(2). Tnejn mit-tliet produtturi tal-Unjoni inklużi fil-kampjun ipprovdew evidenza li ġarrbu kost tal-konformità, bħad-data interna u r-rapport tal-awditjar tal-kost tal-konformità. Abbażi tal-evidenza disponibbli, li kienet appoġġata mill-għodod ta’ rapportar u mit-tbassir tal-kumpaniji, il-Kummissjoni stabbiliet kost addizzjonali ta’ [42 sa 60] EUR/tunnellata, li kien rifless fil-prezz mhux dannuż imsemmi fil-premessa (244) għat-tipi ta’ prodotti mmanifatturati minn żewġ produtturi tal-Unjoni inklużi fil-kampjun.

(244)

Abbażi ta’ dan, il-Kummissjoni kkalkolat prezz mhux dannuż ta’ [5 500 sa 6 200] EUR/tunnellata fuq medja ponderata għall-prodott simili tal-industrija tal-Unjoni billi applikat il-marġni ta’ profitt fil-mira msemmi hawn fuq (ara l-premessa (242)) għall-kost tal-produzzjoni tal-produtturi tal-Unjoni fil-kampjun matul il-perjodu ta’ investigazzjoni u mbagħad żiedet l-aġġustamenti skont l-Artikolu 7(2d) fuq bażi ta’ tip b’tip.

(245)

Imbagħad, il-Kummissjoni ddeterminat il-livell tal-marġni tad-dannu abbażi ta’ tqabbil tal-prezz medju ponderat tal-importazzjoni tal-produtturi esportaturi li kkooperaw inklużi fil-kampjun fir-RPĊ, kif stabbilit għall-kalkoli tat-twaqqigħ tal-prezz, flimkien mal-prezz medju ponderat mhux dannuż tal-prodott simili mibjugħ mill-produtturi tal-Unjoni inklużi fil-kampjun fis-suq tal-Unjoni matul il-perjodu ta’ investigazzjoni. Kwalunkwe differenza li tirriżulta minn dan it-tqabbil ġiet espressa bħala persentaġġ tal-valur CIF medju ponderat tal-importazzjoni.

(246)

Il-livell ta’ eliminazzjoni tad-dannu għal “kumpaniji oħra li kkooperaw” u għall-“importazzjonijiet l-oħrajn kollha li joriġinaw mill-pajjiż ikkonċernat” huwa definit bl-istess mod bħall-marġni tad-dumping għal dawn il-kumpaniji u l-importazzjonijiet (ara t-Taqsima 3.5 hawn fuq).

(247)

Kif spjegat fin-Notifika tal-Bidu, l-ilmentatur ipprovda biżżejjed evidenza lill-Kummissjoni li fil-pajjiż ikkonċernat hemm distorsjonijiet fil-materja prima rigward il-prodott taħt investigazzjoni. Għaldaqstant, f’konformità mal-Artikolu 7(2a) tar-Regolament bażiku, din l-investigazzjoni eżaminat id-distorsjonijiet allegati biex tivvaluta, jekk rilevanti, jekk dazju inferjuri għall-marġni tad-dumping ikunx biżżejjed biex jelimina d-dannu.

(248)

Madankollu, billi l-marġnijiet adegwati biex jitneħħa d-dannu kienu ogħla mill-marġnijiet tad-dumping, il-Kummissjoni qieset li, f’dan l-istadju, ma kienx neċessarju li tiġi indirizzata din il-kwistjoni.

(249)

Wara l-valutazzjoni ta’ hawn fuq, jenħtieġ li d-dazji anti-dumping proviżorji jiġu stabbiliti kif ġej f’konformità mal-Artikolu 7(2) tar-Regolament bażiku:

(250)

Wara li ddeċidiet li tapplika l-Artikolu 7(2) tar-Regolament bażiku, il-Kummissjoni eżaminat jekk setgħetx tikkonkludi b’mod ċar li ma kienx fl-interess tal-Unjoni li tadotta miżuri f’dan il-każ, minkejja d-determinazzjoni ta’ dumping dannuż, f’konformità mal-Artikolu 21 tar-Regolament bażiku. Id-determinazzjoni tal-interess tal-Unjoni kienet ibbażata fuq apprezzament tal-interessi varji kollha involuti, inklużi dawk tal-industrija, tal-importaturi u tal-utenti tal-Unjoni.

(251)

L-investigazzjoni wriet li l-industrija tal-Unjoni ġarrbet dannu materjali kkawżat mill-volum dejjem jikber ta’ importazzjonijiet oġġett ta’ dumping mir-RPĊ. Id-dannu mmaterjalizza b’mod partikolari fi tnaqqis qawwi fil-volumi tal-produzzjoni u tal-bejgħ u erożjoni kontinwa tal-marġni ta’ profitt tiegħu, minħabba l-pressjoni ta’ tnaqqis tal-prezzijiet ikkawżata minn dawn l-importazzjonijiet. Jekk ma jiġux imposti l-miżuri anti-dumping, l-industrija tal-Unjoni tkompli tagħmel it-telf, li jkompli jikkomprometti l-vijabbiltà tagħha. Għall-kuntrarju, l-impożizzjoni tal-miżuri tgħin biex terġa’ tinkiseb il-kompetizzjoni ġusta fis-suq tal-Unjoni u b’hekk tippermetti lill-industrija tal-Unjoni tirkupra.

(252)

Għalhekk, il-Kummissjoni kkonkludiet li l-impożizzjoni tal-miżuri tkun fl-interess tal-industrija tal-Unjoni.

(253)

F’din il-proċedura anti-dumping, importatur wieħed biss issottometta tweġiba parzjali għal kwestjonarju għall-importaturi. Madankollu, din it-tweġiba ma kien fiha l-ebda parti deskrittiva u lanqas xi opinjoni. Madankollu, il-kumpanija pprovdiet data li turi li l-importazzjoni tagħha miċ-Ċina kienet minima u s-sitwazzjoni finanzjarja tagħha kienet tajba ħafna.

(254)

Fid-dawl ta’ dan ta’ hawn fuq, il-Kummissjoni kkonkludiet li l-miżuri mhux se jkollhom effett negattiv sproporzjonat fuq l-importaturi u fuq in-negozjanti mhux relatati.

(255)

L-ebda wieħed mill-utenti li rreġistraw bħala parti interessata ma mela kwestjonarju tal-utent jew għamel xi sottomissjoni fir-rigward tal-impożizzjoni potenzjali ta’ miżuri anti-dumping jew tal-proċedura nnifisha, bl-eċċezzjoni tat-talba għall-esklużjoni mill-ambitu tal-prodott deskritta fil-premessa (27). Barra minn hekk, żewġ utenti, mhux irreġistrati bħala partijiet interessati, bagħtu ittri li jispjegaw li miżuri potenzjali jaffettwawhom b’mod negattiv u/jew l-industrija downstream, iżda ma ppreżentaw l-ebda evidenza u lanqas ma ppreżentaw xi data.

(256)

Fid-dawl ta’ dan ta’ hawn fuq, il-Kummissjoni kkonkludiet li l-miżuri ma jkollhomx effett negattiv sproporzjonat fuq l-utenti tal-prodott taħt investigazzjoni.

(257)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti li, f’dan l-istadju tal-investigazzjoni, ma kienx fl-interess tal-Unjoni li timponi miżuri fuq l-importazzjonijiet tar-raden tal-poliammid li joriġinaw mir-RPĊ.

(258)

Abbażi tal-konklużjonijiet li waslet għalihom il-Kummissjoni fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, jenħtieġ li jiġu imposti miżuri proviżorji sabiex jiġi evitat dannu ulterjuri lill-industrija tal-Unjoni mill-importazzjonijiet oġġett ta’ dumping.

(259)

Jenħtieġ li jiġu imposti miżuri anti-dumping proviżorji fuq importazzjonijiet ta’ raden tal-poliammid li joriġinaw mir-Repubblika tal-Poplu taċ-Ċina, f’konformità mal-Artikolu 7(2a) tar-Regolament bażiku. Il-Kummissjoni kkonkludiet fil-premessa (249) li l-livell xieraq biex jitneħħa d-dannu jenħtieġ li jkun il-marġni tad-dumping.

(260)

Ir-rati tad-dazju anti-dumping proviżorju, espressi fuq il-prezz CIF fil-fruntieri tal-Unjoni, bħala dazju doganali mhux imħallas, jenħtieġ li jkunu kif ġej:

(261)

Ir-rati tad-dazju anti-dumping tal-kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għaldaqstant, dawn jirriflettu s-sitwazzjoni li nstabet matul din l-investigazzjoni fir-rigward ta’ dawn il-kumpaniji. Dawn ir-rati tad-dazju huma applikabbli esklużivament għall-importazzjonijiet tal-prodott ikkonċernat li joriġinaw mill-pajjiż ikkonċernat u prodott mill-entitajiet legali msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b’mod speċifiku fil-parti operazzjonali u fl-Anness ta’ dan ir-Regolament, inklużi l-entitajiet relatati ma’ dawk imsemmija speċifikament, jenħtieġ li jkunu soġġetti għar-rata tad-dazju applikabbli għall-“importazzjonijiet l-oħrajn kollha li joriġinaw mir-Repubblika tal-Poplu taċ-Ċina. Jenħtieġ li dawn ma jkunu soġġetti għall-ebda waħda mir-rati tad-dazju anti-dumping individwali.

(262)

Sabiex jiġu mminimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali biex tiġi żgurata l-applikazzjoni tad-dazji anti-dumping individwali. L-applikazzjoni tad-dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-Regolament. Sakemm tiġi ppreżentata fattura bħal din, jenħtieġ li l-importazzjonijiet ikunu soġġetti għad-dazju anti-dumping applikabbli għall-“importazzjonijiet l-oħrajn kollha li joriġinaw mir-Repubblika tal-Poplu taċ-Ċina.

(263)

Filwaqt li l-preżentazzjoni ta’ din il-fattura hija meħtieġa biex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, din mhijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jeħtiġilhom iwettqu l-kontrolli tas-soltu tagħhom u, bħal fil-każijiet l-oħrajn kollha, jistgħu jirrikjedu dokumenti addizzjonali (dokumenti tat-trasport bil-baħar, eċċ.) biex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata aktar baxxa tad-dazju tkun ġustifikata, f’konformità mal-liġi doganali.

(264)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’ċirkostanzi bħal dawn u dment li jiġu ssodisfati l-kundizzjonijiet, tista’ tinbeda investigazzjoni antiċirkomvenzjoni. Din l-investigazzjoni tista’, fost l-oħrajn, teżamina l-ħtieġa tat-tneħħija ta’ rata/i tad-dazju individwali u l-impożizzjoni konsegwenti ta’ dazju għall-pajjiż kollu.

(265)

Kif imsemmi fil-premessa (3), il-Kummissjoni għamlet l-importazzjonijiet tal-prodott ikkonċernat soġġetti għal reġistrazzjoni. Ir-reġistrazzjoni saret bil-għan li possibbilment jinġabru d-dazji b’mod retroattiv f’konformità mal-Artikolu 10(4) tar-Regolament bażiku.

(266)

Fid-dawl tas-sejbiet fl-istadju proviżorju, jenħtieġ li r-reġistrazzjoni tal-importazzjonijiet tieqaf/ma titkompliex.

(267)

F’dan l-istadju tal-proċediment ma ttieħdet l-ebda deċiżjoni dwar l-applikazzjoni retroattiva possibbli tal-miżuri anti-dumping.

(268)

F’konformità mal-Artikolu 19a tar-Regolament bażiku, il-Kummissjoni informat lill-partijiet interessati dwar l-impożizzjoni ppjanata ta’ dazji proviżorji. Din l-informazzjoni ġiet magħmula disponibbli wkoll għall-pubbliku ġenerali fuq is-sit web tad-DĠ TRADE. Il-partijiet interessati ngħataw 3 ijiem ta’ xogħol sabiex jipprovdu kummenti dwar l-akkuratezza tal-kalkoli ddivulgati b’mod speċifiku lilhom. Waslu kummenti mingħand Eversun Group u Highsun Group.

(269)

Eversun Group sostna li, fil-każ ta’ negozjant relatat, il-Kummissjoni fil-kalkolu ta’ ċerti kostijiet ta’ kreditu, limitati għal għadd żgħir ta’ tranżazzjonijiet, ma kinitx qieset it-termini ta’ pagament xierqa. F’dan ir-rigward, il-Kummissjoni kkoreġiet l-aġġustament tal-kostijiet ta’ kreditu li, madankollu, ma kellux effett fuq il-livell tal-marġni tad-dumping ta’ Eversun Group.

(270)

Highsun Group sostna li l-produttur Xinhui Dehua Nylon Chips Co., Ltd. tħalla barra mil-lista ta’ kumpaniji tad-dazji proposti u kellu ċerti kummenti oħra rigward il-valutazzjoni komparattiva tax-xogħol.

(271)

Fir-rigward tas-sottomissjoni ta’ Highsun Group, il-Kummissjoni kkoreġiet il-lista ta’ kumpaniji, billi inkludiet il-kumpanija msemmija hawn fuq fl-Artikolu 1(2) tar-regolament. Il-kummenti l-oħra sottomessi minn Highsun Group ma kinux jikkonċernaw il-preċiżjoni tal-kalkoli, iżda pjuttost il-metodoloġiji użati mill-Kummissjoni fid-determinazzjoni tal-marġni tad-dumping rispettiv tagħhom. Għalhekk, dawk il-kummenti se jiġu kkunsidrati, flimkien mas-sottomissjonijiet l-oħra kollha, wara l-pubblikazzjoni tal-miżuri proviżorji.

(272)

Fl-interessi ta’ amministrazzjoni tajba, il-Kummissjoni se tistieden lill-partijiet interessati jippreżentaw kummenti bil-miktub u/jew jitolbu seduta mal-Kummissjoni u/jew mal-Uffiċjal tas-Smigħ fil-proċeduri kummerċjali fi żmien skadenza fissa.

(273)

Is-sejbiet li jikkonċernaw l-impożizzjoni ta’ dazji proviżorji huma proviżorji u jistgħu jiġu emendati fl-istadju definittiv tal-investigazzjoni,