(1)

Ir-Regolament Delegat tal-Kummissjoni (UE) 2025/1496 (2) emenda l-Artikolu 520a tar-Regolament (UE) Nru 575/2013 biex jipposponi d-data tal-applikazzjoni tar-rekwiżiti ta’ fondi proprji għar-riskju tas-suq mill-1 ta’ Jannar 2026 għall-1 ta’ Jannar 2027. Għalhekk jeħtieġ li l-applikazzjoni tad-dispożizzjonijiet tranżizzjonali tar-Regolament ta’ Implimentazzjoni tal-Kummissjoni (UE) 2024/3172 (3) tiġi estiża u li t-tħassir tar-Regolament ta’ Implimentazzjoni tal-Kummissjoni (UE) 2021/637 (4) jiġi differit b’sena oħra.

(2)

Ir-Regolament (UE) 2024/1623 tal-Parlament Ewropew u tal-Kunsill (5) issostitwixxa, fost l-oħrajn, l-Artikolu 434 tar-Regolament (UE) Nru 575/2013 billi introduċa ċ-ċentralizzazzjoni tad-divulgazzjonijiet pubbliċi minn istituzzjonijiet għajr dawk żgħar u mhux kumplessi fuq is-sit web tal-Awtorità Bankarja Ewropea (EBA) (punt ta’ aċċess uniku). Jenħtieġ li dik l-emenda tiġi riflessa fir-Regolament (UE) 2024/3172 billi jiġi introdott sett minimu ta’ regoli biex tiġi żgurata l-interoperabbiltà tal-formati ta’ divulgazzjoni mal-funzjonament adegwat tal-punt uniku ta’ aċċess għall-pubblikazzjoni tad-divulgazzjonijiet.

(3)

Sabiex jiġi żgurat li l-EBA tkun tista’ tiddivulga l-informazzjoni fil-punt uniku ta’ aċċess tagħha, jenħtieġ li jiġu stabbiliti formati ta’ divulgazzjoni uniformi speċifiċi. Jenħtieġ li dawk il-formati ta’ divulgazzjoni uniformi japplikaw ukoll fir-rigward tas-sottomissjoni lill-EBA tal-attestazzjoni bil-miktub meħtieġa li tiġi inkluża fid-divulgazzjonijiet ta’ istituzzjoni skont l-Artikolu 431(3) tar-Regolament (UE) Nru 575/2013.

(4)

Sabiex jiġi żgurat li l-punt ta’ aċċess uniku tal-EBA jippermetti l-komparabbiltà, it-trasparenza u l-aċċessibbiltà tad-divulgazzjonijiet ikkonċernati, jenħtieġ li l-formati ta’ divulgazzjoni uniformi jiżguraw li l-informazzjoni li tinsab fihom tkun tista’ tinqara kemm mill-bniedem kif ukoll mill-magni.

(5)

Sabiex jiġi żgurat li l-punt ta’ aċċess uniku tal-EBA jkun adattat għall-iskop tiegħu, u b’hekk jiġi żgurat li d-data sottomessa tikkonforma mal-formati xierqa tad-data, jenħtieġ li l-punt ta’ aċċess uniku tal-EBA jkun jista’ jwettaq validazzjonijiet tekniċi. Meta l-eżitu ta’ tali validazzjonijiet jirriżulta f’rifjut, jenħtieġ li l-istituzzjonijiet jiġu infurmati awtomatikament dwar ir-rifjut u r-raġunament tiegħu, sabiex ikunu jistgħu jerġgħu jissottomettu l-informazzjoni sottomessa mingħajr dewmien żejjed.

(6)

Minħabba li l-istituzzjonijiet jistgħu jeħtieġu aktar żmien biex jissottomettu l-informazzjoni meħtieġa f’konformità mal-formati l-ġodda ta’ divulgazzjoni, jenħtieġ li jitħallew, fir-rigward tas-sottomissjonijiet b’data ta’ referenza fl-2025, mezzi alternattivi ta’ divulgazzjonijiet.

(7)

L-EBA żviluppat l-għodod tal-IT għaċ-ċentralizzazzjoni tad-divulgazzjonijiet mill-istituzzjonijiet ta’ kreditu, għajr l-istituzzjonijiet żgħar u mhux kumplessi. Għal istituzzjonijiet żgħar u mhux kumplessi, l-għodod tal-IT rilevanti għadhom qed jitfasslu minħabba l-importanza li jsiru proporzjonati. Dan l-approċċ f’żewġ stadji jenħtieġ li jiżgura li l-piż amministrattiv relatat mal-konformità mal-obbligi ta’ divulgazzjoni jitnaqqas għal istituzzjonijiet żgħar u mhux kumplessi.

(8)

Għalhekk, jenħtieġ li r-Regolament ta’ Implimentazzjoni (UE) 2024/3172 jiġi emendat kif xieraq.

(9)

Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentat lill-Kummissjoni mill-EBA.

(10)

L-EBA wettqet konsultazzjonijiet pubbliċi miftuħa dwar l-abbozz tal-istandards tekniċi ta’ implimentazzjoni li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (6),

(1)

fl-Artikolu 16, il-paragrafu 2 huwa sostitwit b’dan li ġej:

(2)

wara l-Artikolu 24, jiddaħħlu l-artikoli 24a, 24b, 24c u 24d li ġejjin:

(3)

fl-Artikolu 27, il-paragrafi 1 u 2 huma ssostitwiti b’dan li ġej: