(1)

Fid-29 ta’ April 2021, il-Belġju nnotifika lill-Kummissjoni bl-intenzjoni tiegħu li jidderoga minn ċerti rekwiżiti tekniċi tal-Annessi II u V tad-Direttiva (UE) 2016/1629 għal-lanċa tal-irmonk “HAVENSLEEPBOOT 21”. Il-lanċa tal-irmonk għadha kif saret operabbli u għalhekk huwa xieraq li tiġi adottata d-deċiżjoni ta’ implimentazzjoni li tippermetti l-ħruġ ta’ ċertifikat tal-Unjoni għal dak l-inġenju.

(2)

Id-deroga proposta tikkonċerna l-użu ta’ magni b’kombustjoni interna li jużaw żewġ tipi ta’ fjuwil għal-lanċa tal-irmonk “HAVENSLEEPBOOT 21”. Dawk il-magni jservu bħala l-propulsjoni tal-bastiment u bħala fjuwils jaħarqu l-metanol u ż-żejt tal-gass marittimu, b’proporzjon sa 70 % metanol u 30 % żejt tal-gass marittimu.

(3)

L-użu ta’ magni li jużaw żewġ tipi ta’ fjuwil (il-metanol u ż-żejt tal-gass marittimu) għall-propulsjoni tal-bastiment huwa teknoloġija promettenti fil-kuntest tal-użu ta’ enerġija nadifa u fjuwils alternattivi għall-bastimenti, billi jitnaqqsu l-gassijiet serra u potenzjalment is-sustanzi niġġiesa.

(4)

Id-deroga proposta tinkoraġġixxi l-innovazzjoni u tippermetti l-użu ta’ teknoloġija ġdida permezz tal-implimentazzjoni pilota ta’ magni li jużaw żewġ tipi ta’ fjuwil (il-metanol u ż-żejt tal-gass marittimu) fin-navigazzjoni interna. Din l-implimentazzjoni pilota tal-użu ta’ magni li jużaw żewġ tipi ta’ fjuwil (il-metanol u ż-żejt tal-gass marittimu) hija parti mill-varar tat-teknoloġija, li hija l-uniku mod biex tinbeda l-fażi possibbli ta’ produzzjoni ta’ serje.

(5)

Ir-rekwiżiti tekniċi għall-bastimenti tan-navigazzjoni interna huma deskritti fl-istandard Ewropew stabbilit mill-Kumitat Ewropew għat-Tfassil ta’ Standards fil-Qasam tan-Navigazzjoni Interna (“CESNI”). Dan l-istandard jissejjaħ ES-TRIN. Fiż-żmien meta ġiet iddisinjata u nbniet il-lanċa tal-irmonk, l-ES-TRIN applikabbli, kif stabbilit fl-Anness II tad-Direttiva (UE) 2016/1629, ma kienx jinkludi dispożizzjonijiet speċifiċi għall-użu flimkien ta’ metanol/żejt tal-gass marittimu fil-magni ta’ propulsjoni tal-bastiment. Abbażi tal-informazzjoni intuwittiva miksuba mill-iżvilupp tal-bastiment pilota inkwistjoni, ġew inklużi regoli ddedikati għall-użu tal-metanol abbord l-inġenju fl-ES-TRIN 2025/1 (3), li sar applikabbli biss permezz ta’ referenza għalih fl-Anness II tad-Direttiva (UE) 2016/1629 fl-1 ta’ Jannar 2026.

(6)

Fin-nuqqas ta’ dispożizzjonijiet regolatorji għall-użu kkombinat tal-metanol u taż-żejt tal-gass marittimu għall-magni ta’ propulsjoni tal-bastiment, speċjalment fil-ħin meta l-bastiment ikun qed jiġi ddisinjat u jinbena, huwa meħtieġ li jiġi żgurat livell adegwat ta’ sikurezza tal-użu propost ta’ sistema ta’ propulsjoni.

(7)

Id-dokumentazzjoni teknika ppreżentata mat-talba għal deroga (“id-dokumentazzjoni teknika”) tħejjiet minn Lloyd’s Register, li hija soċjetà ta’ klassifikazzjoni rikonoxxuta għall-bastimenti tal-passaġġi fuq l-ilma interni skont l-Artikolu 21 tad-Direttiva (UE) 2016/1629. Dawk l-ispeċifikazzjonijiet tekniċi ġew żviluppati filwaqt li tqiesu d-dispożizzjonijiet rilevanti tal-Kapitolu 30 tal-ES-TRIN 2023/1 (Dispożizzjonijiet speċjali applikabbli għall-inġenji mgħammra b’sistemi ta’ propulsjoni jew b’sistemi awżiljarji li jaħdmu bil-fjuwils b’punt ta’ fjammabbiltà ta’ 55oC jew inqas) u l-Anness 8 tal-ES-TRIN 2023/1 (Dispożizzjonijiet supplimentari applikabbli għall-inġenji mgħammra b’sistemi ta’ propulsjoni jew b’sistemi awżiljarji li jaħdmu bil-fjuwils b’punt ta’ fjammabbiltà ta’ 55oC jew inqas).

(8)

Abbażi tad-dokumentazzjoni teknika, il-Grupp ta’ Ħidma dwar ir-rekwiżiti tekniċi tas-CESNI (“il-Grupp ta’ Ħidma”) eżamina l-użu kkombinat tal-metanol u taż-żejt tal-gass marittimu bħala fjuwils għall-magni ta’ propulsjoni tal-bastiment u l-miżuri ta’ sikurezza stabbiliti fid-deroga proposta. Ir-riżultati ta’ dak l-eżami tekniku huma stabbiliti fl-ispeċifikazzjonijiet tekniċi annessi ma’ din id-Deċiżjoni, li hija bbażata fuq id-dokument CESNI/PT (20) 21 rev. 3.

(9)

Il-konklużjoni tal-eżami tekniku li sar mill-Grupp ta’ Ħidma kienet li, wara li tqiesu l-miżuri u l-proċeduri ppjanati stabbiliti fid-dokumentazzjoni teknika, it-tħaddim, il-bunkering u l-manutenzjoni tas-sistema jistgħu jitwettqu b’mod sikur. Għalhekk, jista’ jiġi ddikjarat li huwa żgurat livell adegwat ta’ sikurezza, kif imsemmi fl-Artikolu 25(1), il-punt (b), tad-Direttiva (UE) 2016/1629, dment li jiġu ssodisfati l-kundizzjonijiet stabbiliti fl-Anness. Għalhekk, id-deroga proposta tista’ tingħata.

(10)

Madankollu, sabiex jiġi appoġġat l-iżvilupp ta’ dispożizzjonijiet futuri possibbli għall-approvazzjoni tat-tip tal-magni b’kombustjoni interna li jaħdmu bil-metanol, f’konformità mar-Regolament (UE) 2016/1628 tal-Parlament Ewropew u tal-Kunsill (4), u minbarra r-rekwiżiti ta’ rapportar stabbiliti fil-punt 8 tad-dokument CESNI/PT (20) 21 rev. 3, jenħtieġ li jiġu pprovduti wkoll rapporti dwar l-emissjonijiet tal-formaldeid. Peress li hemm nuqqas ta’ esperjenza prattika dwar l-emissjonijiet tal-formaldeid ta’ dan it-tip ta’ magni, jenħtieġ li f’dak il-kuntest il-Belġju jqis l-obbligi tiegħu li jirriżultaw mid-Direttivi tal-Kunsill 89/391/KEE (5) u 98/24/KE (6) kif ukoll mid-Direttiva 2004/37/KE tal-Parlament Ewropew u tal-Kunsill (7).

(11)

Id-deroga proposta tikkonċerna l-ħruġ ta’ ċertifikat tal-Unjoni għan-navigazzjoni interna għal skopijiet ta’ prova li jinkorpora speċifikazzjonijiet tekniċi ġodda li jidderogaw mill-Annessi II u V tad-Direttiva (UE) 2016/1629. Tali derogi jridu jingħataw biss għal perjodu limitat, li f’dan il-każ jenħtieġ li jkun ta’ 5 snin mill-adozzjoni ta’ din id-Deċiżjoni,