LINJA GWIDA (UE) 2026/690 TAL-BANK ĊENTRALI EWROPEW

tat-22 ta’ Jannar 2026

li temenda l-Linja Gwida (UE) 2016/65 dwar il-haircuts fil-valutazzjoni applikati fl-implimentazzjoni tal-qafas tal-politika monetarja tal-Eurosistema (BĊE/2015/35) (BĊE/2026/2)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel inċiż tal-Artikolu 127(2) tiegħu,

Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, u b’mod partikolari l-Artikolu 3.1, l-ewwel inċiż, l-Artikoli 9.2, 12.1, 14.3, u 18.2 u l-Artikolu 20, l-ewwel paragrafu tiegħu,

Billi:

(1)

Skont l-Artikolu 18.1 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew, il-Bank Ċentrali Ewropew (BĊE) u l-banek ċentrali nazzjonali tal-Istati Membri li l-munita tagħhom hija l-euro (iktar ’il quddiem il-“BĊNi”) jistgħu jwettqu operazzjonijiet ta’ kreditu ma’ istituzzjonijiet ta’ kreditu u parteċipanti oħrajn fis-suq, bis-self ikun ibbażat fuq kollateral adegwat. Il-kundizzjonijiet ġenerali li taħthom il-BĊE u l-BĊNi jinsabu lesti biex jidħlu f’operazzjonijiet ta’ kreditu, inklużi l-kriterji li jiddeterminaw l-eliġibbiltà ta’ kollateral għall-finijiet ta’ operazzjonijiet ta’ kreditu tal-Eurosistema, huma stabbiliti fil-Linja Gwida (UE) 2015/510 tal-Bank Ċentrali Ewropew (BĊE/2014/60) (1).

(2)

L-assi kollha li huma eliġibbli għal operazzjonijiet ta’ kreditu tal-Eurosistema huma soġġetti għal miżuri speċifiċi tal-kontroll tar-riskju sabiex l-Eurosistema tkun protetta kontra telf finanzjarju f’ċirkostanzi li fihom il-kollateral jkollu jiġi rrealizzat minħabba avveniment ta’ inadempjenza ta’ kontroparti. Il-qafas ta’ kontroll tar-riskju tal-Eurosistema jgħaddi minn rieżamijiet regolari biex tiġi żgurata protezzjoni adegwata, li tirriżulta f’emendi kif meħtieġ għall-atti legali rilevanti, sabiex jiġu riflessi l-eżiti ta’ tali rieżamijiet.

(3)

Fid-29 ta’ Novembru 2024, il-Kunsill Governattiv iddeċieda li jrawwem armonizzazzjoni u simplifikazzjoni akbar tal-qafas kollaterali tal-Eurosistema, filwaqt li jippreserva l-firxa tiegħu. Dik id-deċiżjoni timplika, b’mod partikolari, l-integrazzjoni fil-qafas kollaterali ġenerali ta’ ċerti assi temporanji, jiġifieri (a) assi negozjabbli ddenominati f’dollari Amerikani, liri sterlini u yen Ġappuniż; u (b) titoli ggarantiti b’assi bit-tieni l-aħjar klassifikazzjoni tal-iskala 3 tal-kwalità tal-kreditu fuq l-iskala ta’ klassifikazzjoni armonizzata tal-Eurosistema u li jissodisfaw il-kriterji ta’ eliġibbiltà stipulati fil-qafas kollaterali temporanju.

(4)	Huwa meħtieġ li jiġi ċċarat l-haircut fil-valutazzjoni applikata għal pretensjonijiet ta’ kreditu li jinkludu opzjoni biex jiġi mmodifikat it-tip ta’ pagament ta’ imgħax matul il-perjodu tal-validità tagħhom.

(5)	Għaldaqstant, il-Linja Gwida (UE) 2016/65 tal-Bank Ċentrali Ewropew (BĊE/2015/35) (2) għandha tiġi emendata kif xieraq,

ADOTTA DIN IL-LINJA GWIDA:

Artikolu 1

Emendi

Il-Linja Gwida (UE) 2016/65 (BĊE/2015/35) hija emendata kif ġej:

fl-Artikolu 4, għandu jiddaħħal il-punt (aa) li ġej:

“(aa)

assi negozjabbli ddenominati f’lira sterlina, yen jew dollaru Amerikan għandhom ikunu soġġetti għal tnaqqis fil-valutazzjoni addizzjonali ta’: (a) 16 % fuq assi ddenominati f’lira sterlina jew dollaru Amerikan; u (b) 26 % fuq assi ddenominati f’yen;”;

L-Artikolu 5 huwa emendat kif ġej:

(a)

fil-paragrafu 2, il-punt (e) huwa ssostitwit b’dan li ġej:

“(e)

il-haircut fil-valutazzjoni applikata għal pretensjoni ta’ kreditu b’aktar minn tip wieħed ta’ ħlas ta’ imgħax għandha tiddependi biss minn ħlasijiet tal-imgħax matul il-ħajja li jkun fadal tal-pretensjoni ta’ kreditu. Jekk ikun hemm aktar minn tip wieħed ta’ ħlas ta’ imgħax matul il-ħajja li jkun fadal tat-talba ta’ kreditu, il-ħlasijiet tal-imgħax li jibqa’ għandhom jiġu kkunsidrati bħala ħlasijiet b’rata fissa, bil-maturità rilevanti għall-haircut tkun il-maturità residwa tat-talba ta’ kreditu. Jekk il-ftehim tal-pretensjoni ta’ kreditu jkun fih kwalunkwe opzjoni biex jinbidel it-tip ta’ pagament tal-imgħax matul il-ħajja li jifdal tal-pretensjoni ta’ kreditu, jew jekk il-ftehim tal-pretensjoni ta’ kreditu jipprevedi kwalunkwe bidliet tat-tip ta’ pagament tal-imgħax matul il-ħajja li jifdal tal-pretensjoni ta’ kreditu li jkunu kontinġenti fuq l-okkorrenza ta’ event predefinit, il-pagamenti tal-imgħax li jifdal għandhom jiġu ttrattati wkoll bħala pagamenti b’rata fissa, bil-maturità rilevanti għall-haircut tkun il-maturità residwa tal-pretensjoni ta’ kreditu.”;

(b)	il-paragrafi 5 u 7 huma mħassra;

fl-Anness, it-Tabella 2a hija mibdula b’dan li ġej:

“Tabella 2a

Livelli ta’ haircuts fil-valutazzjoni applikati għal assi negozjabbli eliġibbli fil-kategoriji ta’ haircut V

(f’%)
Kwalità tal-kreditu	Ħajja Medja Ppeżata (*1)	Kategorija V Haircut fil-valutazzjoni
Passi 1 u 2	[0,1)	4,0
	[1,3)	5,0
	[3,5)	7,0
	[5,7)	9,0
	[7,10)	12,0
	[10,15)	18,0
	[15,30)	20,0
	[30,∞)	22,0
Pass 3	[0,1)	7,0
	[1,3)	10,0
	[3,5)	13,0
	[5,7)	15,0
	[7,10)	18,0
	[10,15)	27,0
	[15,30)	31,0
	[30,∞)	33,0

Artikolu 2

Dħul fis-seħħ u implimentazzjoni

1. Din il-Linja Gwida għandha tidħol fis-seħħ fil-jum tan-notifika tagħha lill-BĊNi.

2. Il- BĊNi għandhom jieħdu l-miżuri meħtieġa sabiex jikkonformaw ma’ din il-Linja Gwida u għandhom japplikawhom mit-30 ta’ Marzu 2026. Huma għandhom jinnotifikaw lill-BĊE bit-testi u l-mezzi relatati ma’ dawk il-miżuri sa mhux aktar tard mill-4 ta’ Marzu 2026.

Artikolu 3

Destinatarji

Din il-Linja Gwida hija indirizzata lill-banek ċentrali kollha tal-Eurosistema.

Magħmul fi Frankfurt am Main, it-22 ta’ Jannar 2026.

Għall-Kunsill Governattiv tal-BĊE

Il-President tal-BĊE

Christine LAGARDE

(1) Linja Gwida (UE) 2015/510 tal-Bank Ċentrali Ewropew tad-19 ta’ Diċembru 2014 dwar l-implimentazzjoni tal-qafas tal-politika monetarja tal-Eurosistema (Linja Gwida dwar id-Dokumentazzjoni Ġenerali) (BĊE/2014/60) (ĠU L 91, 2.4.2015, p. 3, ELI: http://data.europa.eu/eli/guideline/2015/510/oj).

(2) Linja Gwida (UE) 2016/65 tal-Bank Ċentrali Ewropew tat-18 ta’ Novembru 2015 dwar il-haircuts fil-valutazzjoni applikati fl-implimentazzjoni tal-qafas tal-politika monetarja tal-Eurosistema (BĊE/2015/35) (ĠU L 14, 21.1.2016, p. 30, ELI: http://data.europa.eu/eli/guideline/2016/65/oj).

(*1) jiġifieri [0,1) WAL (weighted average life) ta’ inqas minn sena, [1,3) WAL ta’ sena jew aktar u inqas minn tliet snin, eċċ.”