(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti u għall-modifika ta’ din l-awtorizzazzjoni.

(2)

Preparazzjoni ta’ Weizmannia faecalis DSM 32016 ġiet awtorizzata għal perjodu ta’ 10 snin bħala addittiv tal-għalf għall-użu fl-għalf għall-ħnienes Suidae miftuma u mhux miftuma, għall-pollam tas-simna u għall-għasafar ornamentali bir-Regolament ta’ Implimentazzjoni tal-Kummissjoni (UE) 2020/1755 (2) u bħala addittiv tal-għalf għall-użu fl-għalf u fl-ilma tax-xorb għall-ispeċijiet kollha ta’ pollam imrobbija għall-bajd jew għat-tnissil u għall-użu fl-ilma tax-xorb għall-ispeċijiet kollha ta’ pollam tas-simna, għall-għasafar ornamentali, għall-ħnienes Suidae miftuma u mhux miftuma bir-Regolament ta’ Implimentazzjoni tal-Kummissjoni (UE) 2024/1054 (3).

(3)

F’konformità mal-Artikolu 13(3) tar-Regolament (KE) Nru 1831/2003, fit-8 ta’ Awwissu 2024 tressqet applikazzjoni għall-modifika tat-termini tal-awtorizzazzjoni tal-preparazzjoni ta’ Weizmannia faecalis DSM 32016 bħala addittiv tal-għalf għall-użu fl-għalf u fl-ilma tax-xorb għall-ispeċijiet kollha tal-pollam tas-simna, imrobbija għat-tnissil u għall-bajd u għall-għasafar ornamentali, li titlob li jkun permess l-użu simultanju ta’ dik il-preparazzjoni mal-koċċidjostat amprolju, u taħlita ta’ koċċidjostati narasin u nikarbażina, li huma awtorizzati bħala addittivi tal-għalf. Flimkien mat-talba, intbagħtet id-data ta’ sostenn rilevanti.

(4)

Fl-opinjoni tagħha tal-25 ta’ Ġunju 2025 (4), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-modifika proposta fit-termini tal-awtorizzazzjoni tal-preparazzjoni ta’ Weizmannia faecalis DSM 32016 ma tbiddilx il-konklużjonijiet li waslet għalihom qabel fir-rigward tas-sikurezza ta’ dak l-addittiv għall-ispeċijiet fil-mira, għall-konsumaturi u għall-ambjent. L-awtorità kkonkludiet ukoll li l-preparazzjoni ta’ Weizmannia faecalis DSM 32016 mhijiex irritant tal-ġilda jew tal-għajnejn iżda jenħtieġ li titqies bħala sensitizzatur respiratorju u tal-ġilda, u l-inalazzjoni u l-esponiment dermali jitqiesu bħala riskju. Ikkonkludiet ukoll li l-użu ta’ dik il-preparazzjoni huwa kompatibbli mal-koċċidjostat amprolju u t-ttaħlita ta’ koċċidjostati narasin u nikarbażina skont il-kundizzjonijiet tal-użu awtorizzati bħalissa. L-Awtorità ma kkunsidratx li hemm bżonn ta’ rekwiżiti speċifiċi għall-monitoraġġ ta’ wara l-introduzzjoni fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 kien tal-fehma li l-konklużjonijiet u r-rakkomandazzjonijiet li ntlaħqu f’valutazzjoni preċedenti dwar applikazzjoni oħra għall-awtorizzazzjoni tal-istess addittiv u vverifikati mill-Awtorità fl-opinjoni tagħha tal-25 ta’ Mejju 2020 (5) huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (a), tar-Regolament tal-Kummissjoni (KE) Nru 378/2005 (6), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li l-preparazzjoni ta’ Weizmannia faecalis DSM 32016 għadha tissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003 meta timmodifika t-termini tal-awtorizzazzjoni stabbiliti fir-Regolamenti ta’ Implimentazzjoni (UE) 2020/1755 u (UE) 2024/1054, billi tispeċifika l-kompatibbiltà tal-użu ta’ dik il-preparazzjoni mal-koċċidjostat amprolju u taħlita ta’ koċċidjostati narasin u nikarbażina. Barra minn hekk, meta jitqies li dawk il-koċċidjostati ma jistgħux jiġu awtorizzati bħala addittivi tal-għalf għal kull waħda mill-ispeċijiet jew kategoriji elenkati fl-Annessi I u II, l-użu simultanju tagħhom fil-preparazzjoni ta’ Weizmannia faecalis DSM 32016 jenħtieġ li jkun possibbli biss f’konformità mal-kundizzjonijiet ta’ awtorizzazzjoni rispettivi tagħhom bħala addittivi tal-għalf.

(7)

Għalhekk, jenħtieġ li r-Regolamenti ta’ Implimentazzjoni (UE) 2020/1755 u (UE) 2024/1054 jiġu emendati kif xieraq.

(8)

Billi l-applikazzjoni immedjata tal-modifiki tal-kundizzjonijiet tal-awtorizzazzjoni tal-preparazzjoni ta’ Weizmannia faecalis DSM 32016 għall-ispeċijiet kollha tal-pollam tas-simna, imrobbija għat-tnissil u għall-bajd u għall-għasafar ornamentali mhijiex meħtieġa minħabba raġunijiet ta’ sikurezza, jixraq li jitħalla perjodu ta’ tranżizzjoni biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mill-modifika tal-awtorizzazzjoni kkonċernata.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,