(1)

Sal-iskadenza stabbilita fl-Artikolu 8(1), il-punt (a), u fl-Artikolu 20(1), il-punt (a), tar-Regolament (KE) Nru 1829/2003, il-Kummissjoni ġiet innotifikata bid-data li fiha l-ikel u l-ingredjenti tal-ikel prodotti mill-qamħirrum ġenetikament modifikat T25, l-għalf li fih il-qamħirrum ġenetikament modifikat T25, li jikkonsisti minnu jew li huwa prodott minnu, u ż-żrieragħ mill-qamħirrum T25 għall-kultivazzjoni ġew introdotti fis-suq għall-ewwel darba fl-Unjoni.

(2)

Id-Deċiżjoni ta’ Implimentazzjoni tal-Kummissjoni (UE) 2015/697 (2) ġeddet l-awtorizzazzjoni għall-introduzzjoni fis-suq ta’ ikel u ingredjenti tal-ikel prodotti mill-qamħirrum ġenetikament modifikat T25 u għalf li fih il-qamħirrum ġenetikament modifikat T25, li jikkonsistu minnu jew li huwa prodott minnu. Id-Deċiżjoni ta’ Implimentazzjoni (UE) 2015/697 awtorizzat ukoll l-introduzzjoni fis-suq ta’ ikel u ingredjenti tal-ikel li fihom jew li jikkonsistu mill-qamħirrum ġenetikament modifikat T25 u ta’ prodotti, għajr ikel u għalf, li fihom jew li jikkonsistu mill-qamħirrum ġenetikament modifikat T25, għall-istess użi bħal kwalunkwe qamħirrum ieħor, bl-eċċezzjoni tal-kultivazzjoni.

(3)

Fit-22 ta’ Marzu 2024, BASF SE, ibbażata fil-Ġermanja, f’isem BASF Agricultural Solutions Seed US LLC, ibbażata fl-Istati Uniti tal-Amerka (“l-applikant”), issottomettiet applikazzjoni lill-Kummissjoni, f’konformità mal-Artikoli 11 u 23 tar-Regolament (KE) Nru 1829/2003, għat-tiġdid ta’ dik l-awtorizzazzjoni.

(4)

Fit-8 ta’ Awwissu 2025, l-Awtorità Ewropea dwar is-Sigurtà fl-Ikel (“l-Awtorità”) ħarġet opinjoni favorevoli dwar il-qamħirrum ġenetikament modifikat T25 (3) f’konformità mal-Artikoli 6 u 18 tar-Regolament (KE) Nru 1829/2003. Ikkonkludiet li l-applikazzjoni għat-tiġdid ma kienx fiha evidenza ta’ xi perikli ġodda, ta’ esponiment immodifikat jew ta’ inċertezzi xjentifiċi li jibdlu l-konklużjonijiet tal-valutazzjoni tar-riskju oriġinali dwar il-qamħirrum ġenetikament modifikat T25, maħruġa mill-Awtorità fl-2013 (4).

(5)

Fl-opinjoni xjentifika tagħha, l-Awtorità qieset il-mistoqsijiet u t-tħassibiet kollha mressqa mill-Istati Membri fil-kuntest tal-konsultazzjoni mal-awtoritajiet nazzjonali kompetenti kif previst fl-Artikolu 6(4) u fl-Artikolu 18(4) tar-Regolament (KE) Nru 1829/2003.

(6)

L-Awtorità kkonkludiet ukoll li l-pjan ta’ monitoraġġ għall-effetti ambjentali sottomess mill-applikant, li jikkonsisti minn pjan ta’ sorveljanza ġenerali, jaqbel mal-użi intiżi tal-prodotti.

(7)

Fid-dawl tal-konklużjonijiet tal-Awtorità, jenħtieġ li tiġġedded l-awtorizzazzjoni għall-introduzzjoni fis-suq ta’ ikel u għalf li fihom il-qamħirrum ġenetikament modifikat T25, li jikkonsistu minnu, jew li huma prodotti minnu, u ta’ prodotti li fihom jew li jikkonsistu minnu għal użi għajr għall-ikel jew għall-għalf, bl-eċċezzjoni tal-kultivazzjoni.

(8)

Permezz tal-ittra tal-24 ta’ April 2025, BASF Belgian Coordination Center Comm V, ibbażata fil-Belġju, infurmat lill-Kummissjoni li BASF Agricultural Solutions Seed US LLC biddlet l-isem għal BASF Agricultural Solutions US LLC mit-30 ta’ Settembru 2024.

(9)

Ġie assenjat identifikatur uniku lill-qamħirrum ġenetikament modifikatT25, f’konformità mar-Regolament tal-Kummissjoni (KE) Nru 65/2004 (5), fil-kuntest tat-tiġdid tal-awtorizzazzjoni tiegħu bid-Deċiżjoni ta’ Implimentazzjoni (UE) 2015/697. Dak l-identifikatur uniku jenħtieġ li jibqa’ jintuża.

(10)

Ma jidher li hu meħtieġ l-ebda rekwiżit speċifiku tat-tikkettar fir-rigward tal-prodotti koperti minn din id-Deċiżjoni, għajr dawk previsti fl-Artikolu 13(1) u fl-Artikolu 25(2), il-punti (a) u (b), tar-Regolament (KE) Nru 1829/2003, u fl-Artikolu 4(6) tar-Regolament (KE) Nru 1830/2003 tal-Parlament Ewropew u tal-Kunsill (6). Madankollu, biex ikun żgurat li l-użu ta’ prodotti li fihom il-qamħirrum ġenetikament modifikat T25, jew li jikkonsistu minnu, jibqa’ fil-limiti tal-awtorizzazzjoni mogħtija b’din id-Deċiżjoni, jenħtieġ li t-tikketti ta’ tali prodotti, bl-eċċezzjoni tal-ikel u tal-ingredjenti tal-ikel, ikollhom indikazzjoni ċara li mhumiex maħsuba għall-kultivazzjoni.

(11)

Jenħtieġ li d-detentur tal-awtorizzazzjoni jressaq rapporti annwali dwar l-implimentazzjoni u dwar ir-riżultati tal-attivitajiet stabbiliti fil-pjan ta’ monitoraġġ għall-effetti ambjentali. Jenħtieġ li dawk ir-riżultati jiġu ppreżentati f’konformità mar-rekwiżiti stabbiliti fid-Deċiżjoni tal-Kummissjoni 2009/770/KE (7).

(12)

L-opinjoni tal-Awtorità ma tiġġustifikax l-impożizzjoni ta’ kundizzjonijiet jew ta’ restrizzjonijiet speċifiċi għall-introduzzjoni fis-suq, għall-użu u għall-manipulazzjoni, u lanqas ta’ rekwiżiti ta’ monitoraġġ ta’ wara t-tqegħid fis-suq rigward il-konsum tal-ikel u tal-għalf li fihom il-qamħirrum ġenetikament modifikat T25, li jikkonsistu minnu, jew li huma prodotti minnu, jew għall-ħarsien ta’ ekosistemi/ambjenti jew żoni ġeografiċi partikolari, kif previst fl-Artikolu 6(5), il-punt (e), u fl-Artikolu 18(5), il-punt (e), tar-Regolament (KE) Nru 1829/2003.

(13)

Jenħtieġ li l-informazzjoni rilevanti kollha dwar l-awtorizzazzjoni tal-prodotti koperta minn din id-Deċiżjoni, tiddaħħal fir-reġistru Komunitarju tal-ikel u tal-għalf ġenetikament modifikati msemmi fl-Artikolu 28(1) tar-Regolament (KE) Nru 1829/2003.

(14)

Din id-Deċiżjoni trid tiġi nnotifikata permezz taċ-Ċentru ta’ Skambju ta’ Informazzjoni dwar il-Bijosikurezza lill-Partijiet tal-Protokoll ta’ Cartagena dwar il-Bijosigurtà lill-Konvenzjoni dwar id-Diversità Bioloġika, skont l-Artikolu 9(1) u l-Artikolu 15(2), il-punt (c), tar-Regolament (KE) Nru 1946/2003 tal-Parlament Ewropew u tal-Kunsill (8).

(15)

Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni fil-limitu ta’ żmien stipulat mill-President tiegħu. Dan l-att ta’ implimentazzjoni tqies li huwa meħtieġ u l-President ressqu lill-kumitat ta’ appell għal deliberazzjoni ulterjuri. Il-kumitat tal-appell ma tax opinjoni,

(a)

ikel u ingredjenti tal-ikel li fihom il-qamħirrum ġenetikament modifikat ACS-ZMØØ3-2, li jikkonsistu minnu jew li huma prodotti minnu;

(b)

għalf li fih il-qamħirrum ġenetikament modifikat ACS-ZMØØ3-2, li jikkonsisti minnu, jew li huwa prodott minnu;

(c)

prodotti li fihom il-qamħirrum ġenetikament modifikat ACS-ZMØØ3-2 jew li jikkonsistu minnu, għal użi għajr dawk previsti fil-punti (a) u (b), bl-eċċezzjoni tal-kultivazzjoni.