(1)

Ir-Regolament (UE) 2016/429 jipprevedi li biex il-konsenji tal-annimali, tal-prodotti ġerminali u tal-prodotti li joriġinaw mill-annimali jidħlu fl-Unjoni, iridu jkunu ġejjin minn pajjiż terz jew minn territorju, jew minn żona jew minn kompartiment tiegħu, elenkati f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jistabbilixxi r-rekwiżiti tas-saħħa tal-annimali li jridu jkunu konformi magħhom il-konsenji ta’ ċerti speċijiet u kategoriji tal-annimali, ta’ prodotti ġerminali u ta’ prodotti li joriġinaw mill-annimali, li jkunu ġejjin minn pajjiżi terzi jew minn territorji, jew żoni tagħhom, jew minn kompartimenti tagħhom fil-każ tal-annimali tal-akkwakultura, biex jidħlu fl-Unjoni.

(3)

Ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi ta’ pajjiżi terzi, jew territorji, jew żoni tagħhom li minnhom huwa permess id-dħul fl-Unjoni tal-ispeċijiet u tal-kategoriji partikolari tal-annimali, tal-prodotti ġerminali u tal-prodotti li joriġinaw mill-annimali kkonċernati. Dawk il-listi u ċerti regoli ġenerali li jikkonċernaw dawk il-listi huma stabbiliti fl-Annessi I sa XXII ta’ dak ir-Regolament ta’ Implimentazzjoni.

(4)

L-Anness IV tar-Regolament ta’ Implimentazzjoni (UE) 2021/404 jistabbilixxi l-lista ta’ pajjiżi terzi jew territorji, jew żoni tagħhom, awtorizzati għad-dħul fl-Unjoni ta’ konsenji ta’ annimali ekwini. Il-Malażja hija elenkata f’dak l-Anness u assenjata lill-Grupp Sanitarju E. Id-dħul fl-Unjoni ta’ konsenji ta’ żwiemel irreġistrati minn dak il-pajjiż terz, madankollu, ilu sospiż mis-7 ta’ Settembru 2020 wara tifqigħa tal-marda Afrikana taż-żwiemel (AHS, African horse sickness) f’dak il-pajjiż terz.

(5)

Minn Ġunju 2021, ma kien hemm l-ebda tifqigħa rrapportata tal-AHS fil-Malażja u, fl-2023, l-istatus ta’ pajjiż ħieles mill-AHS ta’ dak il-pajjiż terz reġa’ ingħata mill-Organizzazzjoni Dinjija għas-Saħħa tal-Annimali (WOAH). Sadanittant, il-Malażja pprovdiet lill-Kummissjoni b’biżżejjed informazzjoni teknika li tissostanzja t-talba tagħha biex tiġi awtorizzata mill-ġdid għad-dħul fl-Unjoni ta’ konsenji ta’ żwiemel irreġistrati. Il-Kummisjoni vvalutat din l-informazzjoni li wriet li l-Malażja eradikat b’suċċess l-AHS wara t-tifqigħa fl-2020, u tista’ tagħmel kontrolli u attivitajiet adegwati tas-saħħa tal-annimali mmirati biex jinżamm l-istatus ta’ ħelsien mill-AHS tal-pajjiż. Għalhekk, jenħtieġ li l-Anness IV tar-Regolament ta’ Implimentazzjoni (UE) 2021/404 jiġi emendat kif xieraq.

(6)

Għalhekk, jenħtieġ li r-Regolament ta’ Implimentazzjoni (UE) 2021/404 jiġi emendat skont dan.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,