(1)

Fl-24 ta’ Frar 2022, il-President tal-Federazzjoni Russa ħabbar “operazzjoni militari speċjali” fl-Ukrajna u l-forzi armati Russi bdew gwerra ta’ aggressjoni mhux provokata u mhux ġustifikata kontra l-Ukrajna. Dik il-gwerra ta’ aggressjoni illegali hija ksur sfaċċat tal-integrità territorjali, is-sovranità u l-indipendenza tal-Ukrajna, kif ukoll ksur tal-projbizzjoni fuq l-użu tal-forza minquxa fl-Artikolu 2(4) tal-Karta tan-Nazzjonijiet Uniti, li hija regola preskrittiva tad-dritt internazzjonali, u tal-prinċipji l-oħra tal-Karta tan-Nazzjonijiet Uniti.

(2)

Sa mill-bidu tal-gwerra ta’ aggressjoni mhux provokata u mhux ġustifikata tar-Russja kontra l-Ukrajna, l-Unjoni, l-Istati Membri tagħha u l-istituzzjonijiet finanzjarji Ewropej immobilizzaw appoġġ mingħajr preċedent għar-reżiljenza ekonomika, soċjali, finanzjarja u tad-difiża tal-Ukrajna. Dak l-appoġġ jikkombina l-appoġġ mill-baġit tal-Unjoni, inklużi l-assistenza makrofinanzjarja eċċezzjonali u l-appoġġ mill-Bank Ewropew tal-Investiment u mill-Bank Ewropew għar-Rikostruzzjoni u l-Iżvilupp, kompletament jew parzjalment garantiti mill-baġit tal-Unjoni, kif ukoll appoġġ finanzjarju ulterjuri mill-Istati Membri.

(3)

Id-Deċiżjoni (UE) 2022/313 (3), id-Deċiżjoni (UE) 2022/1201 (4), id-Deċiżjoni (UE) 2022/1628 (5) u r-Regolament (UE) 2022/2463 (6) tal-Parlament Ewropew u tal-Kunsill kollettivament għamlu disponibbli EUR 25 200 000 000 f’assistenza makrofinanzjarja lill-Ukrajna matul l-2022 u l-2023. Dak l-appoġġ kien jikkostitwixxi fattur ewlieni ta’ kontribuzzjoni għar-reżiljenza makroekonomika u finanzjarja tal-Ukrajna fi żmien kritiku.

(4)

Ir-Regolament (UE) 2024/792 tal-Parlament Ewropew u tal-Kunsill (7) ħoloq il-Faċilità għall-Ukrajna bħala strument eċċezzjonali għat-terminu medju li jgħaqqad flimkien l-appoġġ bilaterali pprovdut mill-Unjoni lill-Ukrajna, filwaqt li jiżgura l-koordinazzjoni u l-effiċjenza (il-“Faċilità għall-Ukrajna”). Matul il-perjodu mill-2024 sal-2027, il-Faċilità għall-Ukrajna tgħin biex jiġu indirizzati l-ħtiġijiet ta’ finanzjament tal-Ukrajna u tikkontribwixxi għall-ħtiġijiet tagħha ta’ rkupru, ta’ rikostruzzjoni u ta’ modernizzazzjoni, filwaqt li fl-istess ħin tappoġġa l-isforz ta’ riforma tal-Ukrajna bħala parti mill-perkors tagħha lejn l-adeżjoni mal-Unjoni.

(5)

Ir-Regolament (UE) 2024/2773 tal-Parlament Ewropew u tal-Kunsill (8) stabbilixxa l-Mekkaniżmu ta’ Kooperazzjoni ta’ Self għall-Ukrajna u ta assistenza makrofinanzjarja eċċezzjonali lill-Ukrajna. Dik l-assistenza kienet il-kontribuzzjoni tal-Unjoni bħala parti mill-inizjattiva tal-G7 “Self għall-Aċċellerazzjoni ta’ Dħul Straordinarju Favur l-Ukrajna” (“self ERA”), li kollettivament għenet fl-indirizzar tad-diskrepanza fil-finanzjament tal-Ukrajna għall-2025.

(6)

Il-gwerra ta’ aggressjoni tar-Russja kontra l-Ukrajna kkawżat dannu tremend fl-Ukrajna, u fil-31 ta’ Diċembru 2024 il-kostijiet għall-irkupru u għar-rikostruzzjoni ġew stmati li jlaħħqu mal-EUR 506 000 000 000. Barra minn hekk, l-Ukrajna tilfet aċċess għas-swieq finanzjarji internazzjonali u esperjenzat tnaqqis sinifikanti fid-dħul pubbliku, filwaqt li n-nefqa pubblika żdiedet sostanzjalment. Fuq dak l-isfond, jista’ jiġi previst li l-Ukrajna ser ikollha ħtiġijiet sostantivi ta’ finanzjament fis-snin li ġejjin.

(7)

Fid-9 ta’ Settembru 2025, l-Ukrajna ppreżentat talba uffiċjali lill-Fond Monetarju Internazzjonali (FMI) għal programm ġdid sabiex ikopri l-ħtiġijiet ta’ finanzjament addizzjonali mill-2026 sal-2029. Dak il-programm jiġi wara l-implimentazzjoni b’suċċess tal-programm eżistenti tal-FMI, li f’konformità miegħu, l-Ukrajna lestiet tmien rieżamijiet, iżda jqis li l-gwerra ta’ aggressjoni tar-Russja kontra l-Ukrajna kompliet. Il-kapaċità tal-FMI li jipproċedi bil-programm il-ġdid hija kontinġenti fuq ir-riċevuta ta’ aċċertamenti ta’ finanzjament suffiċjenti minn sħab oħrajn, inkluż l-Unjoni.

(8)

Minkejja l-isforzi internazzjonali kontinwi sabiex tiġi nnegozjata riżoluzzjoni paċifika għall-kunflitt, l-estensjoni tal-gwerra tal-aggressjoni tar-Russja kontra l-Ukrajna rriżultat fi ħsara sinifikanti għall-infrastruttura tad-difiża, ċivili u tal-enerġija kritika tal-Ukrajna, li teħtieġ il-mobilizzazzjoni ta’ riżorsi addizzjonali sostanzjali sabiex jiġu indirizzati l-ħtiġijiet ta’ finanzjament immedjati tal-Ukrajna.

(9)

Il-gwerra ta’ aggressjoni tar-Russja kontra l-Ukrajna tirrappreżenta theddida ġeopolitika strateġika għall-Unjoni kollha kemm hi u tirrikjedi li l-Istati Membri jibqgħu b’saħħithom u magħqudin. Għalhekk, huwa essenzjali li l-appoġġ tal-Unjoni jiġi varat malajr u li jkun jista’ jadatta b’mod flessibbli għal għajnuna immedjata u għal riabilitazzjoni fuq terminu qasir fil-perkors lejn ir-rikostruzzjoni tal-ġejjieni.

(10)

F’konformità mal-Artikoli dwar ir-Responsabbiltà tal-Istati għal Atti Internazzjonalment Illeċiti, adottati fl-2001 mill-Kummissjoni tad-Dritt Internazzjonali tan-Nazzjonijiet Uniti fit-tlieta u ħamsin sessjoni tagħha, u li ttieħdet nota tagħhom mill-Assemblea Ġenerali tan-Nazzjonijiet Uniti fir-Riżoluzzjoni 56/83, u d-dritt internazzjonali konswetudinarju, ir-Russja – bħala l-istat responsabbli – għandha l-obbligu tagħmel reparazzjoni sħiħa għad-dannu kkawżat mill-gwerra ta’ aggressjoni tagħha kontra l-Ukrajna.

(11)

Id-Deċiżjoni tal-Kunsill (PESK) 2022/335 (9) u r-Regolament tal-Kunsill (UE) 2022/334 (10) jipprojbixxu tranżazzjonijiet relatati mal-ġestjoni ta’ riżervi kif ukoll ta’ assi tal-Bank Ċentrali tar-Russja, inkluż tranżazzjonijiet ma’ kwalunkwe persuna ġuridika, entità jew korp li jaġixxu f’isem il-Bank Ċentrali tar-Russja jew fuq ordni tiegħu. Fil-konklużjonijiet tiegħu tas-27 ta’ Ġunju 2024, tas-17 ta’ Ottubru 2024 u tad-19 ta’ Diċembru 2024, il-Kunsill Ewropew iddikjara li, soġġett għad-dritt tal-Unjoni, jenħtieġ li l-assi tar-Russja jibqgħu immobilizzati sa ma r-Russja twaqqaf il-gwerra tagħha ta’ aggressjoni kontra l-Ukrajna u tikkumpensaha għad-dannu kkawżat minn dik il-gwerra.

(12)

Barra minn hekk, ir-Regolament tal-Kunsill (UE) 2025/2600 (11) jipprojbixxi t-trasferiment ta’ assi jew riżervi tal-Bank Ċentrali tar-Russja fuq bażi temporanja sakemm ir-Russja twaqqaf il-gwerra ta’ aggressjoni tagħha kontra l-Ukrajna, ir-Russja tipprovdi riparazzjonijiet lill-Ukrajna sa fejn ikun meħtieġ biex tippermetti r-rikostruzzjoni mingħajr konsegwenzi ekonomiċi jew finanzjarji negattivi għall-Unjoni u l-azzjonijiet tar-Russja marbuta mal-gwerra ta’ aggressjoni tagħha kontra l-Ukrajna jkunu oġġettivament waqfu milli joħolqu riskju serju ta’ diffikultajiet severi għall-ekonomija tal-Unjoni u tal-Istati Membri tagħha.

(13)

Fil-konklużjonijiet tiegħu tat-18 ta’ Diċembru 2025, il-Kunsill Ewropew qabel li jislef EUR 90 000 000 000 lill-Ukrajna għas-snin 2026 u 2027 abbażi tas-self tal-Unjoni fis-swieq kapitali appoġġat mill-marġni ta’ manuvra tal-baġit tal-Unjoni. Il-konklużjonijiet tal-Kunsill Ewropew jistipulaw ukoll li permezz ta’ kooperazzjoni msaħħa skont l-Artikolu 20 tat-Trattat dwar l-Unjoni Ewropea (TEU), kwalunkwe mobilizzazzjoni ta’ riżorsi tal-baġit tal-Unjoni bħala garanzija għal dak is-self mhux ser ikollha impatt fuq l-obbligi finanzjarji tar-Repubblika Ċeka, l-Ungerija u s-Slovakkja. Fl-istess data, 25 Stat Membru qablu li s-self jenħtieġ li jitħallas lura mill-Ukrajna biss ladarba jiġu riċevuti riparazzjonijiet. Sa dak iż-żmien, l-assi tal-Bank Ċentrali tar-Russja jenħtieġ li jibqgħu immobilizzati u l-Unjoni jenħtieġ li tirriżerva d-dritt tagħha li tagħmel użu minnhom biex tħallas lura s-self, f’konformità sħiħa mad-dritt tal-Unjoni u dak internazzjonali. Dawk l-Istati Membri enfasizzaw l-importanza tal-elementi li ġejjin fir-rigward tas-self: it-tisħiħ tal-industriji tad-difiża Ewropej u Ukreni; l-Ukrajna tkompli tiddefendi l-istat tad-dritt, inkluż il-ġlieda kontra l-korruzzjoni; u l-karattru speċifiku tal-politika ta’ sigurtà u ta’ difiża ta’ ċerti Stati Membri u l-interessi ta’ sigurtà u ta’ difiża tal-Istati Membri kollha.

(14)

Fid-29 ta’ Jannar 2026, il-Kunsill adotta d-Deċiżjoni (UE) 2026/258 li tawtorizza kooperazzjoni msaħħa bejn il-Belġju, il-Bulgarija, id-Danimarka, il-Ġermanja, l-Estonja, l-Irlanda, il-Greċja, Spanja, Franza, il-Kroazja, l-Italja, Ċipru, il-Latvja, il-Litwanja, il-Lussemburgu, Malta, in-Netherlands, l-Awstrija, il-Polonja, il-Portugall, ir-Rumanija, is-Slovenja, il-Finlandja u l-Iżvezja dwar il-ħolqien ta’ Self għall-Ukrajna.

(15)

Minħabba l-pożizzjoni ta’ finanzjament tal-Ukrajna, il-ħtieġa kritika li l-Ukrajna jkollha r-riżorsi sabiex tiġġieled l-aggressjoni tar-Russja u, fejn possibbli, tibni mill-ġdid, huwa xieraq li l-Unjoni tipprovdi appoġġ addizzjonali sabiex tindirizza r-rekwiżiti ta’ finanzjament urġenti tal-Ukrajna u tiffaċilita l-implimentazzjoni tal-programm tal-FMI. Għal dak l-għan, huwa xieraq li jiġi stabbilit strument għall-għoti ta’ appoġġ tal-Unjoni lill-Ukrajna fl-2026 u fl-2027 fil-forma ta’ self li għandu jitħallas lura permezz tar-riparazzjonijiet dovuti mir-Russja (is-“Self ta’ Appoġġ għall-Ukrajna”).

(16)

Jenħtieġ li s-Self ta’ Appoġġ għall-Ukrajna jagħti assistenza finanzjarja lill-Ukrajna b’mod prevedibbli, kontinwu, ordnat, flessibbli u tempestiv bl-għan li jappoġġa lill-Ukrajna fil-kopertura tal-ħtiġijiet tagħha ta’ finanzjament u ta’ difiża, b’mod partikolari dawk li jirriżultaw mill-gwerra ta’ aggressjoni tar-Russja kontra l-Ukrajna. B’mod speċifiku, jenħtieġ li s-Self ta’ Appoġġ għall-Ukrajna jappoġġa l-istabbiltà makrofinanzjarja fl-Ukrajna u jiffaċilita l-finanzjament estern tagħha u jappoġġa l-kapaċitajiet industrijali tad-difiża tal-Ukrajna permezz ta’ kooperazzjoni ekonomika, finanzjarja u teknika, u b’hekk jikkontribwixxi sabiex l-Ukrajna tingħata vantaġġ militari kwalitattiv.

(17)

Jenħtieġ li, soġġett għal kundizzjonijiet, is-Self ta’ Appoġġ għall-Ukrajna jipprovdi appoġġ lill-Ukrajna fil-forma ta’ self sa EUR 90 000 000 000. Fid-dawl tal-prinċipju ta’ ġestjoni finanzjarja tajba, jenħtieġ li s-Self ta’ Appoġġ għall-Ukrajna jitqiegħed għad-dispożizzjoni mill-Kummissjoni għall-Ukrajna f’pagamenti parzjali, li jistgħu jiġu żborżati f’segment wieħed jew f’aktar.

(18)

Jenħtieġ li l-appoġġ lill-Ukrajna skont is-Self ta’ Appoġġ għall-Ukrajna isir disponibbli bil-prekundizzjoni li l-Ukrajna tkompli tħaddan u tirrispetta mekkaniżmi demokratiċi effettivi, inklużi sistema parlamentari multipartitika u l-istat tad-dritt, u li tiggarantixxi r-rispett għad-drittijiet tal-bniedem, inklużi dawk ta’ persuni f’minoranzi. Iż-żamma mal-istat tad-dritt u r-rispett lejh jenħtieġ li jinkludu l-ġlieda kontra l-korruzzjoni.

(19)

L-assistenza finanzjarja u ekonomika disponibbli taħt is-Self ta’ Appoġġ għall-Ukrajna jenħtieġ li ssir aċċessibbli għall-Ukrajna f’konformità mal-ħtiġijiet ta’ finanzjament tagħha. Għal dak l-għan, jenħtieġ li l-Ukrajna tippreżenta Strateġija għall-Finanzjament tal-Ukrajna dwar il-ħtiġijiet u s-sorsi ta’ finanzjament tagħha. Jenħtieġ li dik l-Istrateġija għall-Finanzjament tal-Ukrajna tinkludi l-informazzjoni ewlenija dwar is-sitwazzjoni baġitarja, finanzjarja u ekonomika tal-Ukrajna, kif ukoll l-appoġġ li l-Ukrajna qed tirċievi mingħand il-komunità internazzjonali.

(20)

Jenħtieġ li l-Kummissjoni tivvaluta l-Istrateġija għall-Finanzjament tal-Ukrajna mingħajr dewmien żejjed u jenħtieġ li taġixxi f’kooperazzjoni mill-qrib mal-Ukrajna. Minħabba l-iskala sinifikanti tal-ħtiġijiet tal-Ukrajna kemm għall-assistenza baġitarja kif ukoll għall-assistenza għall-kapaċitajiet industrijali tad-difiża, kif ukoll minħabba r-restrizzjonijiet li xi sħab esterni għandhom fuq il-forniment tal-appoġġ tagħhom, huwa xieraq li tiġi stabbilita distribuzzjoni indikattiva tas-Self ta’ Appoġġ għall-Ukrajna bejn dawk iż-żewġ ħtiġijiet ta’ finanzjament. Filwaqt li tiżgura li l-ħtiġijiet ta’ finanzjament tal-Ukrajna kif ġew ikkalkulati mill-FMI għall-2026 jiġu indirizzati bis-sħiħ, jenħtieġ li dik id-distribuzzjoni tkun indikattiva sabiex tirrifletti ċirkostanzi li qed jinbidlu li jista’ jkollhom impatt fuq il-ħtiġijiet ta’ finanzjament tal-Ukrajna u sabiex tiżgura li dawk il-ħtiġijiet ikomplu jiġu indirizzati b’mod prevedibbli, kontinwu, ordnat, flessibbli u tempestiv. Fil-valutazzjoni tagħha tal-Istrateġija għall-Finanzjament tal-Ukrajna, jenħtieġ li l-Kummissjoni tikkunsidra l-konsistenza tad-diskrepanza mistennija fil-finanzjament estern ma’ dik id-distribuzzjoni indikattiva.

(21)

Fid-dawl tal-importanza tal-effetti finanzjarji tal-miżuri imposti, jenħtieġ li l-Kunsill jingħata setgħat ta’ implimentazzjoni, u jenħtieġ li huwa jaġixxi fuq il-bażi ta’ proposta tal-Kummissjoni. Jenħtieġ li l-Kunsill japprova l-valutazzjoni tal-Istrateġija għall-Finanzjament tal-Ukrajna permezz ta’ deċiżjoni ta’ implimentazzjoni, li jenħtieġ li huwa jagħmel ħiltu li jadotta mingħajr dewmien żejjed. Jenħtieġ li dik id-deċiżjoni ta’ implimentazzjoni tiddetermina l-ammont ta’ assistenza li għandha ssir aċċessibbli għall-Ukrajna sabiex tgħin fl-implimentazzjoni tal-Istrateġija għall-Finanzjament tal-Ukrajna, inklużi l-ammont għall-assistenza baġitarja u l-ammont għall-appoġġ tal-kapaċitajiet industrijali tad-difiża tal-Ukrajna.

(22)

Jenħtieġ li assistenza finanzjarja u ekonomika fil-forma ta’ assistenza baġitarja titqiegħed għad-dispożizzjoni bil-ħsieb li tappoġġa lill-Ukrajna sabiex tkopri l-ħtiġijiet ta’ finanzjament tagħha. Jenħtieġ li l-assistenza finanzjarja u ekonomika skont dan ir-Regolament tagħti kontribut importanti għall-irkupru ekonomiku, it-tkabbir fit-tul u l-prosperità tal-Ukrajna ta’ wara l-gwerra, li kollha kemm huma ser ikollhom rwol importanti fi ftehim ta’ paċi futur. Sabiex tiġi żgurata l-flessibbiltà fl-indirizzar ta’ dawk il-ħtiġijiet, huwa xieraq li jintużaw diversi mezzi ta’ konsenja, fejn jenħtieġ li l-appoġġ ikun jista’ jiġi pprovdut permezz ta’ assistenza makrofinanzjarja u permezz ta’ self li għandu jiġi implimentat skont il-Kapitolu III tar-Regolament (UE) 2024/792.

(23)

Il-Faċilità għall-Ukrajna hija strument ta’ terminu medju li għandu l-objettiv li jappoġġa l-irkupru u r-rikostruzzjoni tal-Ukrajna, l-integrazzjoni gradwali fis-suq intern, kif ukoll, fost l-oħrajn, l-adozzjoni u l-implimentazzjoni tar-riformi politiċi, istituzzjonali, legali, amministrattivi, soċjali u ekonomiċi meħtieġa għall-allinjament mal-valuri tal-Unjoni u għall-allinjament progressiv mar-regoli, mal-istandards, mal-politiki u mal-prattiki (“l-acquis”) tal-Unjoni, fid-dawl ta’ sħubija mal-Unjoni fil-ġejjieni, u b’hekk jikkontribwixxi għall-istabbiltà, għas-sigurtà, għall-paċi, għall-prosperità u għas-sostenibbiltà reċiproċi. Għaldaqstant huwa xieraq li jiġu previsti ammonti li jirriżultaw mis-Self ta’ Appoġġ għall-Ukrajna li għandu jintuża permezz tal-Faċilità għall-Ukrajna. Il-Kapitolu III tar-Regolament (UE) 2024/792 jipprevedi finanzjament lill-Ukrajna malli jintlaħqu b’mod sodisfaċenti l-kundizzjonijiet stabbiliti fil-Pjan għall-Ukrajna, li jistabbilixxi l-aġenda ta’ riforma u ta’ investiment tal-Ukrajna. Jenħtieġ li l-Pjan għall-Ukrajna jiġi aġġornat sabiex jirrifletti dik l-assistenza baġitarja addizzjonali, inklużi miżuri sabiex jissaħħu l-istat tad-dritt u l-ġlieda kontra l-korruzzjoni.

(24)

Jenħtieġ li l-assistenza makrofinanzjarja tkun marbuta mal-kundizzjonijiet ta’ politika li għandhom jiġu stipulati f’memorandum ta’ qbil (MtQ). Jenħtieġ li l-MtQ jinkludi impenji ta’ riforma robusti u ambizzjużi mill-Ukrajna, inkluż dawk biex tissaħħaħ il-mobilizzazzjoni tad-dħul biex jiġu appoġġati l-ħtiġijiet ta’ finanzjament tal-Ukrajna u jiġu indirizzati l-kawżi ewlenin tal-korruzzjoni fil-finanzi pubbliċi, inkluż permezz tat-titjib tas-sostenibbiltà u l-kwalità tan-nefqa pubblika u t-tisħiħ tal-effiċjenza, it-trasparenza u r-responsabbiltà tas-sistemi ta’ ġestjoni tal-finanzi pubbliċi. Jenħtieġ li jkun possibbli li tali assistenza makrofinanzjarja tintuża mill-Ukrajna sabiex tgħin fil-finanzjament ta’ kumpens, bħala forma ta’ riparazzjoni, lil dawk l-individwi li ġarrbu dannu mill-azzjonijiet illegali tar-Russja, inkluż permezz tal-Kummissjoni għat-Talbiet għall-Ukrajna stabbilita taħt l-awspiċji tal-Kunsill tal-Ewropa. Id-Deċiżjoni ta’ implimentazzjoni tal-Kunsill li tapprova l-valutazzjoni tal-Istrateġija għall-Finanzjament tal-Ukrajna jenħtieġ li tistabbilixxi l-għadd massimu u l-valur indikattiv tal-pagamenti parzjali għall-assistenza makrofinanzjarja. Fid-dawl tal-prinċipju ta’ ġestjoni finanzjarja tajba u sabiex tiġi ffaċilitata l-ġestjoni tal-likwidità tal-awtoritajiet Ukreni u tiġi żgurata l-prevedibbiltà, fil-prinċipju jenħtieġ li jkun hemm massimu ta’ erba’ pagamenti parzjali ta’ dik l-assistenza makrofinanzjarja.

(25)

Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, u għal raġunijiet ta’ effiċjenza, jenħtieġ li l-Kummissjoni tingħata s-setgħa li tinnegozja l-kundizzjonijiet għall-assistenza makrofinanzjarja mal-awtoritajiet Ukreni taħt is-superviżjoni tal-kumitat tar-rappreżentanti tal-Istati Membri Parteċipanti (il-“kumitat”) f’konformità mar-Regolament (UE) Nru 182/2011 tal-Parlament Ewropew u tal-Kunsill (12). Meta jitqies l-impatt potenzjalment sinifikanti tal-assistenza, huwa xieraq li tintuża l-proċedura ta’ eżami kif speċifikata fir-Regolament (UE) Nru 182/2011. Meta jitqies l-ammont tas-Self ta’ Appoġġ għall-Ukrajna, jenħtieġ li l-proċedura ta’ eżami tapplika għall-adozzjoni tal-MtQ, u għal kwalunkwe tnaqqis jew kanċellazzjoni tas-Self ta’ Appoġġ għall-Ukrajna.

(26)

Is-Self ta’ Appoġġ għall-Ukrajna jenħtieġ li jipprovdi assistenza finanzjarja u ekonomika lill-Ukrajna bħala pajjiż li għaddej minn gwerra, li l-istabbiltà finanzjarja tiegħu hija intrinsikament marbuta mal-abilità tiegħu li jiddefendi lilu nnifsu kontra l-aggressjoni tar-Russja, u tiddependi fuq it-tali abbiltà. Dak il-fatt jiġġustifika li ammont speċifiku tal-assistenza finanzjarja u ekonomika lill-Ukrajna jintuża sabiex tiżdied il-kapaċità tal-Ukrajna li tlaħħaq mal-ħtiġijiet baġitarji fir-rigward tal-kapaċità tal-Ukrajna li ssaħħaħ il-kapaċitajiet ta’ difiża u militari tagħha, u b’hekk jikkontribwixxi sabiex jipprovdi vantaġġ militari kwalitattiv lill-Ukrajna. Jenħtieġ li dik l-assistenza finanzjarja u ekonomika jkollha l-għan li tippermetti lill-Ukrajna twettaq investimenti pubbliċi urġenti u kbar b’appoġġ għall-industrija tad-difiża tal-Ukrajna u tiffaċilita l-integrazzjoni tagħha fl-industrija tad-difiża Ewropea bħala rispons għas-sitwazzjoni ta’ kriżi kurrenti u fil-fażi ta’ wara din. Jenħtieġ li dik l-assistenza finanzjarja u ekonomika tikkontribwixxi, b’mod partikolari, għar-rikostruzzjoni, għall-irkupru u għall-modernizzazzjoni tal-Bażi Teknoloġika u Industrijali tad-Difiża Ukrena, bil-ħsieb li tiżdied il-prontezza industrijali fil-qasam tad-difiża tagħha, filwaqt li titqies l-integrazzjoni gradwali futura tagħha fil-Bażi Teknoloġika u Industrijali tad-Difiża Ewropea u permezz ta’ appoġġ għad-disponibbiltà tempestiva ta’ prodotti tad-difiża u ta’ prodotti oħra għall-finijiet tad-difiża, permezz ta’ kooperazzjoni bejn l-Unjoni u l-Ukrajna.

(27)

Jenħtieġ li l-assistenza finanzjarja u ekonomika sabiex jiġu appoġġati l-kapaċitajiet industrijali tad-difiża tal-Ukrajna jitqiegħdu għad-dispożizzjoni għal attivitajiet, għal nefqiet u għal miżuri relatati ma’ prodotti tad-difiża jew ma’ prodotti oħra għall-finijiet tad-difiża li jissodisfaw ċerti kriterji ta’ eliġibbiltà. Sabiex il-Bażi Industrijali u Teknoloġika tad-Difiża tal-Ukrajna tissaħħaħ b’mod urġenti, effiċjenti u awtonomu, jenħtieġ li dawk il-kriterji ta’ eliġibbiltà jiġu strutturati b’mod li jidderieġi l-attivitajiet, in-nefqiet u l-miżuri biex jappoġġaw il-kapaċitajiet industrijali tad-difiża tal-Ukrajna lejn ir-rikostruzzjoni, l-irkupru u l-modernizzazzjoni tal-Bażi Teknoloġika u Industrijali tad-Difiża Ukrena, filwaqt li titqies l-integrazzjoni gradwali futura tagħha fil-Bażi Teknoloġika u Industrijali tad-Difiża Ewropea. F’dak il-kuntest, meta jiġi eżaminat jekk il-manifatturi humiex ikkontrollati minn pajjiżi terzi jew minn entitajiet ta’ pajjiżi terzi, jenħtieġ li l-kontroll jinftiehem bħala l-abilità li tiġi eżerċitata influwenza deċiżiva fuq entità legali, direttament jew indirettament, permezz ta’ entità legali intermedja waħda jew aktar.

(28)

Sabiex l-Ukrajna tkun tista’ tuża l-assistenza finanzjarja u ekonomika b’mod li huwa l-aktar adattat għaċ-ċirkostanzi, huwa xieraq li titħalla tuża l-fondi biex tappoġġa l-kapaċitajiet industrijali tad-difiża tal-Ukrajna b’metodi ta’ implimentazzjoni differenti li jirriflettu d-diversità tal-ħtiġijiet. Il-fondi jistgħu jikkontribwixxu wkoll għall-Istrument ta’ Appoġġ għall-Ukrajna stabbilit mir-Regolament (UE) 2025/2643 tal-Parlament Ewropew u tal-Kunsill (13), għall-Qafas ta’ Investiment għall-Ukrajna stabbilit mir-Regolament (UE) 2024/792 għal oġġetti b’użu doppju jew għal programmi oħrajn tal-Unjoni. Barra minn hekk, jenħtieġ li l-fondi jippermettu lill-Ukrajna tinvolvi ruħha f’intervent massiv fid-domanda għal prodotti tad-difiża sabiex jinħolqu kundizzjonijiet xierqa sabiex jiġu inċentivati investimenti kbar fiż-żieda tal-kapaċità tal-produzzjoni u fl-iżvilupp ta’ prodotti ġodda. Għal dak l-għan, jenħtieġ li l-Ukrajna titħalla tuża l-fondi sabiex tniedi akkwisti kbar ta’ prodotti tad-difiża magħmula mill-Bażi Teknoloġika u Industrijali tad-Difiża Ukrena u mill-Bażi Teknoloġika u Industrijali tad-Difiża Ewropea permezz ta’ akkwisti skont l-Istrument ta’ Azzjoni għas-Sigurtà tal-Ewropa (l-“istrument SAFE”) stabbilit mir-Regolament tal-Kunsill (UE) 2025/1106 (14) jew, soġġetta għal validazzjonijiet, skont metodi ta’ implementazzjoni oħrajn.

(29)

Għal ċerti prodotti tad-difiża, li t-teknoloġiji sottostanti tagħhom mhumiex disponibbli b’mod wiesa’ fl-Unjoni, u li jista’ jkun diffiċli li jiġu sostitwiti fuq skala kbira, bħas-sistemi ta’ difiża mill-missili u l-faċilitaturi strateġiċi, jenħtieġ li jkun hemm kundizzjonijiet addizzjonali sabiex jiġi żgurat li l-forzi armati tal-Ukrajna għandhom l-libertà b’rabta ma’ dawk il-prodotti mingħajr ma jiġu imposti limitazzjonijiet minn pajjiżi terzi. Għaldaqstant, fir-rigward ta’ tali prodotti tad-difiża, il-manifatturi jenħtieġ li jkollhom l-abbiltà li jiddeċiedu, mingħajr l-impożizzjoni tal-ebda restrizzjoni minn pajjiżi terzi jew minn entitajiet ta’ pajjiżi terzi, fuq id-definizzjoni, l-adattament u l-evoluzzjoni tad-disinn tal-prodotti tad-difiża akkwistat, inkluż l-awtorità legali li jissostitwixxu jew ineħħu dawk il-komponenti soġġetti għal restrizzjonijiet imposti minn pajjiżi terzi jew minn entitajiet ta’ pajjiżi terzi.

(30)

Sabiex tiġi żgurata l-implimentazzjoni bla xkiel ta’ dan ir-Regolament flimkien mal-istrument SAFE, huwa xieraq li jiġu applikati rekwiżiti ta’ eliġibbiltà simili. L-istrument SAFE jappoġġa l-akkwist ta’ prodotti tad-difiża kif identifikati fir-Regolament (UE) 2025/1106. Il-lista ta’ prodotti li huma parti mill-Kategoriji 1 u 2 ġiet maqbula mill-Kunsill, u dik il-lista wriet li hija komprensiva biżżejjed biex tippermetti appoġġ għall-akkwist ta’ prodotti meħtieġa mill-Istati Membri, inklużi pjattaformi tal-ajru. Minħabba s-sitwazzjoni li qed tevolvi b’mod kostanti fil-kamp tal-battalja, huwa essenzjali li jiġi evitat li l-eżistenza ta’ lista ta’ prodotti li jistgħu jiġu appoġġati tillimita lill-Ukrajna milli tikseb l-assistenza li teħtieġ. Filwaqt li jitqies il-fatt li l-Ukrajna hija pajjiż li għaddej minn gwerra li l-kapaċità tiegħu li jiddefendi t-territorju tiegħu tista’ tiddependi fuq id-disponibbiltà ta’ prodott partikolari f’temp ta’ żmien qasir ħafna, jenħtieġ li l-Ukrajna titħalla takkwista prodotti li ma jikkonformawx ma’ dawk ir-rekwiżiti ta’ eliġibbiltà meta jew ma jkun disponibbli l-ebda prodott ekwivalenti permezz tal-akkwist inkella meta jkun hemm ħtieġa urġenti għall-konsenja ta’ prodott. Dak jista’ jinkludi iżda mhuwiex limitat għal sistemi ta’ difiża tal-ajru u mill-missili, inkluż interċettaturi, u munizzjon u spare parts tal-inġenji tal-ajru tal-ġlied u kapaċitajiet ta’ attakk fil-profond. Għal kwalunkwe deroga, iż-żmien għat-twassil tal-prodott jenħtieġ li jkun proporzjonat mal-urġenza tas-sitwazzjoni u mal-ħtiġijiet operazzjonali immedjati tal-Ukrajna. Għal dak l-għan, jenħtieġ li l-Ukrajna tipprovdi lill-Kummissjoni l-informazzjoni raġonevolment disponibbli għaliha biex turi li hija meħtieġa deroga, minħabba li sakemm il-gwerra tkun għadha għaddejja, u l-ħtiġijiet tal-Ukrajna jkunu tant urġenti, jenħtieġ li l-Ukrajna ma tkunx mitluba twettaq riċerka estensiva tas-suq. Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, u għal raġunijiet ta’ effiċjenza, jenħtieġ li l-Kummissjoni tingħata s-setgħa li teżamina tali talbiet għal derogi taħt is-superviżjoni tal-kumitat f’konformità mar-Regolament (UE) Nru 182/2011. Meta jitqies l-impatt potenzjalment sinifikanti tal-assistenza, huwa xieraq li tintuża l-proċedura ta’ eżami kif speċifikata fir-Regolament (UE) Nru 182/2011. Minħabba s-sitwazzjoni eċċezzjonali kkawżata mill-gwerra ta’ aggressjoni tar-Russja kontra l-Ukrajna u l-ħtieġa għad-disponibbiltà f’waqtha tal-prodotti tad-difiża, huwa xieraq li jiġi invokat il-każ ġustifikat kif xieraq imsemmi fl-Artikolu 3(3) tar-Regolament (UE) Nru 182/2011 biex il-kumitat ikun jista’ jagħti opinjoni f’limitu ta’ żmien li l-president tal-kumitat jista’ jistabbilixxi skont l-urġenza tal-kwistjoni. Fejn meħtieġ, jenħtieġ li tintuża l-proċedura bil-miktub imsemmija fl-Artikolu 3(5) ta’ dak ir-Regolament.

(31)

Sabiex il-pajjiżi terzi jkunu jistgħu jikkontribwixxu għall-assistenza lill-Ukrajna filwaqt li fl-istess ħin jissalvagwardaw l-interessi tas-sigurtà u tad-difiża tal-Unjoni u tal-Istati Membri u filwaqt li jitqiesu l-ftehimiet eżistenti skont l-istrument SAFE, huwa xieraq li tiġi prevista l-possibbiltà li l-kriterji tal-eliġibbiltà jiġu estiżi għal pajjiżi terzi li mhumiex il-Ukrajna u l-Istati taż-ŻEE-EFTA li ma jmorrux kontra l-interessi tas-sigurtà u tad-difiża tal-Unjoni u tal-Istati Membri tagħha, dment li dawk il-pajjiżi terzi jkunu kkonkludew ftehim mal-Unjoni f’konformità mal-Artikolu 17 tar-Regolament (UE) 2025/1106 jew, meta ma jkunux ikkonkludew tali ftehim, dment li tali pajjiżi jkunu daħlu fi Sħubija għas-Sigurtà u d-Difiża mal-Unjoni, ikunu qed jipprovdu appoġġ finanzjarju u militari sinifikanti lill-Ukrajna, u jkunu qed jipprovdu kontribuzzjoni finanzjarja ġusta u proporzjonata, b’rispett għall-prinċipju li kwalunkwe ftehim ma’ pajjiż terz irid ikun ibbażat fuq bilanċ ta’ drittijiet u obbligi u jenħtieġ li pajjiż terz ma jkollux l-istess drittijiet u lanqas ma jgawdi l-istess benefiċċji bħal Stat Membru parteċipanti. Tali possibbiltà, għalhekk, jenħtieġ li tkun limitata għal prodotti tad-difiża speċifiċi filwaqt li jitqiesu l-ħtiġijiet operazzjonali immedjati tal-Ukrajna, b’enfasi, b’mod partikolari, fuq sistemi ta’ difiża tal-ajru u tal-missili, munizzjon u missili, droni u sistemi relatati kontra d-droni, sistemi tal-artillerija, inkluż mezzi ta’ attakki fil-profond bi preċiżjoni, faċilitaturi strateġiċi bħal, iżda mhux limitati għal, trasport bl-ajru strateġiku, riforniment ta’ fjuwil fl-ajru, sistemi C4ISTAR kif ukoll assi u servizzi spazjali.

(32)

Fir-rigward ta’ pajjiżi terzi li kkonkludew ftehim mal-Unjoni f’konformità mal-Artikolu 17 tar-Regolament (UE) 2025/1106, jenħtieġ li l-Kummissjoni tingħata s-setgħa li tadotta atti delegati f’konformità mal-Artikolu 290 tat-Trattat dwar il-Funzjonament tal-Unjoni Ewropea (TFUE) biex tissupplimenta dan ir-Regolament. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (15). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(33)

Fid-dawl tal-importanza tal-effetti finanzjarji tal-miżuri imposti u biex tiġi żgurata l-konsistenza bejn l-oqsma differenti tal-azzjoni esterna tal-Unjoni, jenħtieġ li l-Kunsill jingħata setgħat ta’ implimentazzjoni li jenħtieġ li jaġixxi abbażi ta’ proposta tal-Kummissjoni rigward il-possibbiltà li r-regoli ta’ eliġibbiltà jiġu estiżi għal pajjiżi terzi li ma jkunux ikkonkludew tali ftehim mal-Unjoni f’konformità mal-Artikolu 17 tar-Regolament (UE) 2025/1106. Jenħtieġ li l-Kunsill jaġixxi permezz ta’ deċiżjoni ta’ implimentazzjoni, li jenħtieġ li huwa jagħmel ħiltu li jadotta mingħajr dewmien żejjed. Jenħtieġ li dik id-deċiżjoni ta’ implimentazzjoni tiddetermina, fir-rigward ta’ kull pajjiż terz, liema prodotti tad-difiża għandhom isiru aċċessibbli għall-Ukrajna, filwaqt li tqis l-ammont tal-kontribuzzjoni finanzjarja li tkun saret mill-pajjiz terz inkwistjoni u l-grad ta’ appoġġ finanzjarju u militari lill-Ukrajna.

(34)

Dan ir-Regolament huwa mingħajr preġudizzju għad-dritt internazzjonali applikabbli li jipprojbixxi l-użu, l-iżvilupp jew il-produzzjoni ta’ ċerti prodotti u teknoloġiji tad-difiża.

(35)

L-implimentazzjoni tal-assistenza sabiex jiġu appoġġati l-kapaċitajiet industrijali tad-difiża tal-Ukrajna jenħtieġ li titwettaq f’konformità mal-prinċipji ta’ ġestjoni finanzjarja tajba li tiżgura l-protezzjoni tal-interessi finanzjarji tal-Unjoni kif stipulat fl-Artikolu 223(4) tar-Regolament (UE, Euratom) 2024/2509 tal-Parlament Ewropew u tal-Kunsill (16). Ir-rekwiżiti dettaljati f’dan ir-rigward jistgħu jiddaħħlu f’arranġament li għandu jiġi ffirmat bejn il-Kummissjoni u l-Ukrajna. Barra minn hekk, għall-ġestjoni tal-assistenza finanzjarja u ekonomika riċevuta sabiex jiġu appoġġati l-kapaċitajiet industrijali tad-difiża tal-Ukrajna, jenħtieġ li l-Ukrajna tiftaħ kont uniku li permezz tiegħu tiġi ġestita dik l-assistenza, u jenħtieġ li l-Kummissjoni tkun tista’ timmonitorja dak il-kont.

(36)

Sabiex tappoġġa l-implimentazzjoni tal-assistenza bl-għan li jiġu appoġġati l-kapaċitajiet industrijali tad-difiża tal-Ukrajna, jenħtieġ li l-Kummissjoni tistabbilixxi Grupp ta’ Esperti dwar il-Kapaċitajiet Industrijali tad-Difiża tal-Ukrajna. Jenħtieġ li dak il-Grupp ta’ Esperti jagħti pariri lill-Kummissjoni dwar kwistjonijiet relatati mal-assistenza sabiex jiġu appoġġati l-kapaċitajiet industrijali tad-difiża tal-Ukrajna.

(37)

Jenħtieġ li l-Kummissjoni timmonitorja l-implimentazzjoni tal-assistenza sabiex jiġu appoġġati l-kapaċitajiet industrijali tad-difiża tal-Ukrajna, inkluż b’mod partikolari t-twassil tal-prodotti. Għal dak l-għan, jenħtieġ li jiġu stabbiliti diversi arranġamenti ta’ monitoraġġ sabiex jirriflettu l-metodi differenti ta’ implimentazzjoni.

(38)

Id-Direttiva 2009/81/KE tal-Parlament Ewropew u tal-Kunsill (17) tikkonċerna, fost affarijiet oħra, l-istabbiliment ta’ qafas leġiżlattiv xieraq dwar il-koordinazzjoni tal-proċeduri ta’ akkwist għall-aġġudikazzjoni ta’ kuntratti sabiex jiġu ssodisfatti r-rekwiżiti ta’ sigurtà tal-Istati Membri u l-obbligi li jirriżultaw mit-TFUE. Sabiex jintlaħaq dak l-għan, id-Direttiva 2009/81/KE tipprevedi, b’mod partikolari, l-indirizzar ta’ sitwazzjonijiet ta’ kriżi, b’mod partikolari billi tipprovdi dispożizzjonijiet speċifiċi applikabbli f’każijiet ta’ urġenza li jirriżultaw minn kriżi, bħat-tqassir tal-perjodi għar-riċevuta ta’ offerti u l-possibbiltà li tintuża l-proċedura nnegozjata mingħajr pubblikazzjoni minn qabel ta’ avviż dwar kuntratt. Madankollu, f’ċerti każijiet ta’ urġenza, dawk ir-regoli jistgħu ma jkunux biżżejjed, speċjalment meta l-urġenza li tirriżulta mill-kriżi tkun tista’ tiġi indirizzata biss billi l-Ukrajna u tal-anqas Stat Membru Parteċipanti wieħed jwettqu akkwist komuni. F’dawk il-każijiet, spiss l-unika soluzzjoni li tiżgura l-interessi ta’ sigurtà ta’ dawk il-pajjiżi tkun li jiftħu ftehim jew kuntratt qafas eżistenti ta’ Stat Membru Parteċipanti għall-awtoritajiet kontraenti tal-Ukrajna, anke meta l-Ukrajna oriġinarjament ma kinitx parti għalih u anki jekk dik il-possibbiltà ma kinitx prevista fil-ftehim jew fil-kuntratt qafas oriġinali. Peress li dawk il-possibbiltajiet ma humiex previsti fid-Direttiva 2009/81/KE fiż-żmien tad-dħul fis-seħħ ta’ dan ir-Regolament, dan ir-Regolament jipprevedi l-possibbiltà ta’ komplementar ta’ jew deroga minn dik id-Direttiva fis-sitwazzjoni ta’ kriżi kurrenti li tirriżulta mill-gwerra ta’ aggressjoni tar-Russja kontra l-Ukrajna, dment li jinkiseb il-qbil tal-impriża li tkun ikkonkludiet il-ftehim qafas jew kuntratt. Fir-rigward ta’ kwantitajiet addizzjonali għall-Ukrajna, jenħtieġ li l-awtoritajiet kontraenti Ukreni jgawdu l-istess kundizzjonijiet bħall-awtorità kontraenti oriġinali li tkun ikkonkludiet il-ftehim qafas jew kuntratt oriġinali. Barra minn hekk, jenħtieġ li jittieħdu miżuri ta’ trasparenza xierqa sabiex jiġi żgurat li jiġu informati l-partijiet potenzjalment interessati kollha.

(39)

L-istrument SAFE jipprovdi assistenza finanzjarja lill-Istati Membri, filwaqt li jippermettilhom iwettqu investimenti pubbliċi urġenti u kbar b’appoġġ għall-industrija Ewropea tad-difiża b’rispons għas-sitwazzjoni ta’ kriżi li tirriżulta mid-deterjorament serju fil-kuntest tas-sigurtà tal-Unjoni. B’dak l-istrument, l-Unjoni bdiet tappoġġa lill-Istati Membri sabiex ikunu jistgħu jagħmlu ordnijiet malajr, u b’hekk is-settur industrijali tad-difiża jiġi inċentivat sabiex jinvesti, fuq terminu qasir ħafna, fit-tisħiħ tal-kapaċitajiet tal-produzzjoni sabiex ikun jista’ jaqdi l-ħtiġijiet tal-Istati Membri sal-2030. Barra minn hekk, jenħtieġ li dan ir-Regolament jappoġġa t-tqegħid ta’ ordnijiet Ukreni mal-Bażi Teknoloġika u Industrijali tad-Difiża Ewropea sabiex jappoġġa l-kooperazzjoni bejn il-Bażi Teknoloġika u Industrijali tad-Difiża Ewropea u l-Bażi Teknoloġika u Industrijali tad-Difiża Ukrena. Tali domanda eċċezzjonalment għolja għal firxa wiesgħa ta’ prodotti tad-difiża ġġib magħha riskju imminenti ta’ impatt negattiv serju fuq il-funzjonament xieraq tas-suq intern. Sabiex jiġi indirizzat dak ir-riskju u fid-dawl tal-objettiv ta’ dan ir-Regolament, filwaqt li titqies is-sitwazzjoni speċifika tal-Ukrajna, il-miżuri ta’ prijoritizzazzjoni fil-livell tal-Unjoni li għandhom l-għan li jiżguraw id-disponibbiltà tal-prodotti tad-difiża kkonċernati jistgħu jirriżultaw indispensabbli sabiex jiġi żgurat il-funzjonament xieraq tas-suq intern għall-prodotti tad-difiża u tal-ktajjen tal-provvista tiegħu. F’dak ir-rigward, jenħtieġ li l-Kummissjoni tkun tista’ tuża, fuq talba ta’ Stat Membru Parteċipanti, talbiet klassifikati bħala prijorità għall-iffaċilitar tal-provvista ta’ prodotti tad-difiża sabiex jintlaħaq l-objettiv ta’ dan ir-Regolament.

(40)

Jenħtieġ li t-talbiet klassifikati bħala prijorità jikkonsistu f’talbiet mill-Kummissjoni, fuq inizjattiva ta’ Stat Membru Parteċipanti, lill-operaturi ekonomiċi rilevanti stabbiliti fl-Unjoni sabiex jaċċettaw jew jipprijoritizzaw ordnijiet ta’ prodotti rilevanti għall-kriżijiet. Sabiex jintużaw biss meta jkunu neċessarji u proporzjonati għall-fini li jiġi żgurat li l-ktajjen tal-provvista tad-difiża jkunu jistgħu joperaw b’mod normali, jenħtieġ li dawk it-talbiet klassifikati bħala prijorità jkollhom l-għan li jappoġġaw lill-Ukrajna li tiffaċċa diffikultajiet serji jew fit-tqegħid ta’ ordni jew fl-eżekuzzjoni ta’ kuntratt għall-provvista ta’ prodotti tad-difiża. Jenħtieġ li l-operaturi ekonomiċi jkollhom il-possibbiltà li jirrifjutaw li jkunu soġġetti għal talba klassifikata bħala prijorità. Jenħtieġ li talba klassifikata bħala prijorità tittieħed fuq il-bażi ta’ data oġġettiva, fattwali, li tista’ titkejjel u sostanzjata. Jenħtieġ li tqis l-interessi leġittimi tal-impriżi u l-kost u l-isforz meħtieġa għal kwalunkwe bidla fis-sekwenza tal-produzzjoni. Meta jiġi aċċettat, jenħtieġ li l-obbligu li titwettaq it-talba klassifikata bħala prijorità jieħu preċedenza fuq l-obbligi ta’ prestazzjoni skont id-dritt privat jew pubbliku. Fid-dawl tal-importanza li tiġi żgurata l-provvista ta’ prodotti tad-difiża, li huma indispensabbli għall-funzjonament korrett tas-suq intern u tal-ktajjen tal-provvista tiegħu, jenħtieġ li l-konformità mal-obbligu li tiġi eżegwita talba klassifikata bħala prijorità ma tinvolvix obbligazzjoni għal partijiet terzi għad-danni li jistgħu jirriżultaw minn kwalunkwe ksur tal-obbligi kuntrattwali rregolati bid-dritt ta’ Stat Membru, sa fejn il-ksur tal-obbligi kuntrattwali kien neċessarju għall-konformità mal-prijoritizzazzjoni mandata. Meta l-operatur ekonomiku jkun aċċetta b’mod espliċitu talba klassifikata bħala prijorità u l-Kummissjoni tkun adottat att ta’ implimentazzjoni wara tali aċċettazzjoni, jenħtieġ li l-operatur ekonomiku jikkonforma mal-kundizzjonijiet kollha ta’ dak l-att ta’ implimentazzjoni. Jenħtieġ li n-nuqqas ta’ konformità mill-operatur ekonomiku mal-kundizzjonijiet stabbiliti fl-att ta’ implimentazzjoni jirriżulta f’telf tal-benefiċċju ta’ rinunzja tar-responsabbiltà kuntrattwali. Meta n-nuqqas ta’ konformità jkun intenzjonat jew attribwibbli għal negliġenza gravi, jenħtieġ li l-Kummissjoni tkun tista’ timponi multa fuq l-operatur ekonomiku kkonċernat, soġġetta għall-prinċipju tal-proporzjonalità.

(41)

Minħabba li jenħtieġ li ammonti speċifiċi jitqiegħdu għad-dispożizzjoni għall-assistenza baġitarja u għall-assistenza sabiex jiġu appoġġati l-kapaċitajiet industrijali tad-difiża tal-Ukrajna, jenħtieġ li fl-implimentazzjoni rispettiva tagħhom jiġu żgurati l-koerenza u l-komplementarjetà.

(42)

Jenħtieġ li dan ir-Regolament japplika mingħajr preġudizzju għall-karattru speċifiku tal-politika ta’ sigurtà u ta’ difiża ta’ ċerti Stati Membri.

(43)

Dan ir-Regolament ma japplikax għal Stati Membri li ma jipparteċipaw fil-kooperazzjoni msaħħa. F’dak il-kuntest, jenħtieġ li jitfakkar li n-nuqqas ta’ parteċipazzjoni ta’ ċerti Stati Membri fil-kooperazzjoni msaħħa ma jeżentahomx mill-obbligu li jiżguraw l-infurzar sħiħ tal-Artikolu 325 TFUE u l-acquis tal-Unjoni bl-għan li jiżguraw il-protezzjoni tal-interessi finanzjarji tal-Unjoni, inkluż ir-Regolament tal-Kunsill (KE, Euratom) Nru 2988/95 (18), ir-Regolament (UE, Euratom) Nru 883/2013 tal-Parlament Ewropew u tal-Kunsill (19), id-Direttiva (UE) 2017/1371 tal-Parlament Ewropew u tal-Kunsill (20), ir-Regolament (UE, Euratom) 2024/2509 u, fejn applikabbli, ir-Regolament tal-Kunsill (UE) 2017/1939 (21). Għaldaqstant, jenħtieġ li dawk l-Istati Membri u l-entitajiet ekonomiċi taħt il-ġuriżdizzjoni tagħhom jikkollaboraw bis-sħiħ mal-Qorti tal-Awdituri, mal-Uffiċċju Ewropew ta’ Kontra l-Frodi (OLAF), mal-Kummissjoni u, fejn applikabbli mal-Uffiċċju tal-Prosekutur Pubbliku Ewropew (“l-UPPE”), fl-eżerċizzju tal-kompetenzi tagħhom.

(44)

Jenħtieġ li l-Ftehim dwar is-Self ta’ Appoġġ għall-Ukrajna li għandu jiġi konkluż bejn il-Kummissjoni u l-awtoritajiet Ukreni jkun fih dispożizzjonijiet allinjati mad-drittijiet, mar-responsabbiltajiet u mal-obbligi previsti fil-Ftehim Qafas taħt il-Faċilità għall-Ukrajna msemmija fl-Artikolu 9 tar-Regolament (UE) 2024/792 iffirmat bejn l-Unjoni u l-Ukrajna li daħal fis-seħħ fl-20 ta’ Ġunju 2024. Dawk id-dispożizzjonijiet ser jiżguraw li l-interessi finanzjarji tal-Unjoni marbutin mas-Self ta’ Appoġġ għall-Ukrajna jkunu protetti b’mod effiċjenti, billi jipprovdi l-miżuri xierqa relatati mal-prevenzjoni tal-frodi, tal-korruzzjoni u ta’ kwalunkwe irregolarità oħra marbuta mal-assistenza, u l-miżuri xierqa relatati mal-ġlieda kontra dawn. Il-Ftehim dwar is-Self ta’ Appoġġ għall-Ukrajna ser jagħti wkoll, f’konformità mar-Regolament (UE, Euratom) 2024/2509, id-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri u, fejn applikabbli, lill-UPPE, inkluż minn partijiet terzi involuti fl-implimentazzjoni tal-fondi tal-Unjoni matul u wara l-perjodu ta’ disponibbiltà tas-Self ta’ Appoġġ għall-Ukrajna. Jenħtieġ li l-Ukrajna tirrapporta wkoll irregolaritajiet fir-rigward tal-użu tal-fondi lill-Kummissjoni, f’konformità mal-proċeduri previsti fil-Ftehim Qafas taħt il-Faċilità għall-Ukrajna.

(45)

Minħabba s-sitwazzjoni diffiċli tal-Ukrajna kkawżata mill-gwerra ta’ aggressjoni tar-Russja kontriha u sabiex tappoġġa lill-Ukrajna fil-perkors ta’ stabbiltà fit-tul tagħha, huwa xieraq li l-Unjoni tipprovdi s-Self ta’ Appoġġ għall-Ukrajna bħala self b’rikors limitat li għandu jsir dovut u pagabbli meta l-Ukrajna tirċievi flus jew assi nonmonetarji għar-riparazzjonijiet tal-gwerra, indennizzi jew kwalunkwe saldu finanzjarju, għajr territorju, mingħand ir-Russja.

(46)

Jenħtieġ li r-rilaxx ta’ fondi skont is-Self ta’ Appoġġ għall-Ukrajna jkun kontinġenti fuq il-valutazzjoni pożittiva mill-Kummissjoni ta’ talba għal fondi sottomessa mill-Ukrajna. Għall-assistenza makrofinanzjarja, jenħtieġ li l-valutazzjoni tal-kundizzjonijiet tkun mingħajr preġudizzju għall-valutazzjoni tal-issodisfar tal-kundizzjonijiet skont programmi u strumenti oħrajn tal-Unjoni. Għall-assistenza sabiex jiġu appoġġati l-kapaċitajiet industrijali tad-difiża tal-Ukrajna, jenħtieġ li r-rilaxx ta’ fondi jkun marbut ma’ kuntratti jew ma’ ftehimiet għal attivitajiet, għal nefqiet u għal miżuri li jappoġġaw il-kapaċitajiet industrijali tad-difiża tal-Ukrajna relatati ma’ prodotti tad-difiża jew ma’ prodotti oħra għall-finijiet tad-difiża.

(47)

Jenħtieġ li dan ir-Regolament jistabbilixxi dispożizzjonijiet xierqa għall-finanzjament tas-Self ta’ Appoġġ għall-Ukrajna.

(48)

Fil-kuntest tal-ħtiġijiet ta’ finanzjament tal-Ukrajna, ikun xieraq li l-assistenza finanzjarja tiġi organizzata skont l-istrateġija ta’ finanzjament diversifikata prevista fl-Artikolu 224 tar-Regolament (UE, Euratom) 2024/2509.

(49)

F’konformità mal-appoġġ sod ta’ 25 Kap ta’ Stat u ta’ Gvern matul il-Kunsill Ewropew tat-18 ta’ Diċembru 2025, jenħtieġ li s-Self ta’ Appoġġ għall-Ukrajna jitħallas lura mill-Ukrajna ladarba jaslu riparazzjonijiet mir-Russja, u l-Unjoni tirriżerva d-dritt tagħha li tuża l-assi Russi immobilizzati fl-Unjoni biex tħallas lura s-self, f’konformità sħiħa mad-dritt tal-Unjoni u ma’ dak internazzjonali.

(50)

Permezz ta’ deroga mill-Artikolu 31(3) tar-Regolament (UE) 2021/947 tal-Parlament Ewropew u tal-Kunsill (22), jenħtieġ li l-obbligazzjoni finanzjarja mis-self skont dan ir-Regolament ma tiġix appoġġata mill-Garanzija għall-Azzjoni Esterna, stabbilita minn dak ir-Regolament. Jenħtieġ li l-appoġġ fil-forma ta’ self skont dan ir-Regolament jikkostitwixxi assistenza finanzjarja skont it-tifsira tal-Artikolu 223(1) tar-Regolament (UE, Euratom) 2024/2509. Meta jitqiesu r-riskji finanzjarji u l-preżenza ta’ garanziji, jenħtieġ li ma jiġi kkostitwit l-ebda proviżjonament għall-appoġġ fil-forma ta’ self skont dan ir-Regolament, li għandu jiġi ggarantit lil hinn mil-limiti massimi, u, permezz ta’ deroga mill-Artikolu 214(1) tar-Regolament (UE, Euratom) 2024/2509, jenħtieġ li ma tiġi stabbilita l-ebda rata ta’ proviżjonament.

(51)

Minħabba s-sitwazzjoni fl-Ukrajna, ikkawżata mill-gwerra ta’ aggressjoni tar-Russja kontra l-Ukrajna u biex tiġi appoġġata fil-perkors ta’ stabbiltà fit-tul tagħha, huwa xieraq li ssir deroga mill-Artikolu 223(4), il-punt (e), tar-Regolament (UE, Euratom) 2024/2509 sabiex l-Unjoni tingħata l-possibbiltà li tipprovdi sussidju għall-kostijiet tat-teħid b’self biex tkopri l-kostijiet li altrimenti jiġġarrbu mill-Ukrajna. Dawk il-kostijiet jinkludu l-kostijiet tas-servizzjar tad-dejn (il-kost tal-finanzjament u l-kost tal-ġestjoni tal-likwidità) u l-kostijiet amministrattivi relatati. Is-sussidju għall-kostijiet tat-teħid b’self li jingħata jitqies xieraq biex tiġi żgurata l-effettività tal-appoġġ taħt il-Faċilità dwar is-Self ta’ Appoġġ għall-Ukrajna skont it-tifsira tal-Artikolu 223(1) tar-Regolament (UE, Euratom) 2024/2509, b’mod partikolari biex tiġi evitata pressjoni fuq il-finanzi pubbliċi tal-Ukrajna.

(52)

F’konformità mal-Artikolu 332 TFUE, in-nefqa għajr il-kostijiet amministrattivi involuti għall-istituzzjonijiet li jirriżultaw mill-kooperazzjoni msaħħa jenħtieġ li tiġġarrab mill-Istati Membri Parteċipanti. Għal dak l-għan, l-Istati Membri li ma jipparteċipawx fil-kooperazzjoni msaħħa jenħtieġ li jkunu intitolati għal aġġustament f’konformità mal-Artikolu 11 tar-Regolament tal-Kunsill (UE, Euratom) Nru 609/2014 (23) fir-rigward ta’ kwalunkwe nefqa operazzjonali mġarrba mill-baġit tal-Unjoni, li tinkludi b’mod partikolari l-kostijiet tas-servizzjar tad-dejn, kif ukoll talbiet għall-garanzija. Il-kostijiet amministrattivi involuti għall-istituzzjonijiet fl-implimentazzjoni tal-kooperazzjoni msaħħa jenħtieġ li jitħallsu mill-baġit tal-Unjoni mingħajr ebda aġġustament għall-Istati Membri li ma jipparteċipawx fil-kooperazzjoni msaħħa.

(53)

Jenħtieġ li l-appoġġ tal-Unjoni lill-Ukrajna skont dan ir-Regolament jiġi ġestit mill-Kummissjoni.

(54)

Jenħtieġ li l-assistenza lill-Ukrajna taħt is-Self ta’ Appoġġ għall-Ukrajna tkun addizzjonali u komplementari għall-appoġġ tal-Unjoni pprovdut skont il-Faċilità għall-Ukrajna. Jenħtieġ li, kull fejn ikun possibbli, il-Kummissjoni tipprova li timminimizza l-piż amministrattiv u ta’ rapportar fuq l-Ukrajna.

(55)

Jenħtieġ li l-Kummissjoni tqis kif xieraq id-Deċiżjoni tal-Kunsill 2010/427/UE (24) u r-rwol tas-Servizz Ewropew għall-Azzjoni Esterna, fejn xieraq.

(56)

Jenħtieġ li l-kumitat kompetenti tal-Parlament Ewropew ikun jista’ jistieden lill-Kummissjoni tiddiskuti fid-djalogu dwar is-Self ta’ Appoġġ għall-Ukrajna kwistjonijiet li jikkonċernaw l-implimentazzjoni ta’ dan ir-Regolament. Jenħtieġ li l-Kummissjoni tqis l-elementi li jirriżultaw mill-fehmiet espressi permezz tad-djalogu dwar is-Self ta’ Appoġġ għall-Ukrajna, inkluż r-riżoluzzjonijiet tal-Parlament Ewropew jekk jiġu pprovduti.

(57)

Sabiex jiġi żgurat li l-Parlament Ewropew u l-Kunsill ikunu jistgħu jsegwu l-implimentazzjoni ta’ dan ir-Regolament, jenħtieġ li l-Kummissjoni tinformahom b’mod regolari dwar l-iżviluppi relatati mal-assistenza tal-Unjoni lill-Ukrajna skont dan ir-Regolament u tipprovdilhom id-dokumenti rilevanti.

(58)

Sabiex tiġi żgurata l-effettività kontinwa tal-arranġamenti stabbiliti minn dan ir-Regolament, jenħtieġ li l-Kummissjoni tirrieżamina b’mod regolari l-adegwatezza tagħhom u tirrapporta lill-Parlament Ewropew u lill-Kunsill dwarha, u b’hekk tiggarantixxi t-trasparenza u r-responsabbiltà.

(59)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011.

(60)

Minħabba li l-objettiv ta’ dan ir-Regolament, jiġifieri li tingħata assistenza finanzjarja u ekonomika lill-Ukrajna għall-2026 u għall-2027 b’mod prevedibbli, kontinwu, ordnat u tempestiv bl-għan li l-Ukrajna tiġi appoġġata sabiex tkopri l-ħtiġijiet ta’ finanzjament tagħha li jirriżultaw mill-gwerra ta’ aggressjoni tar-Russja kontra l-Ukrajna, ma jistax jinkiseb b’mod suffiċjenti mill-Istati Membri iżda, minflok, minħabba l-iskala u l-effetti tiegħu, jista’ jinkiseb aħjar fil-livell tal-Unjoni, l-Unjoni tista’ tadotta miżuri permezz ta’ kooperazzjoni msaħħa, f’konformità mal-prinċipju tas-sussidjarjetà kif stipulat fl-Artikolu 5 TUE. F’konformità mal-prinċipju tal-proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(61)

Fid-dawl tal-urġenza li tirriżulta miċ-ċirkostanzi eċċezzjonali kkawżati mill-gwerra ta’ aggressjoni mhux provokata u mhux ġustifikata tar-Russja kontra l-Ukrajna, jitqies li huwa xieraq li tiġi invokata l-eċċezzjoni għall-perjodu ta’ tmien ġimgħat prevista fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-TUE, mat-TFUE u mat-Trattat li jistabbilixxi l-Komunità Ewropea tal-Enerġija Atomika.

(62)

Fid-dawl tas-sitwazzjoni fl-Ukrajna, jenħtieġ li dan ir-Regolament jidħol fis-seħħ b’urġenza fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,