(1)

Fit-23 ta’ Ġunju 2025, l-Unjoni kkonkludiet Sħubija għas-Sigurtà u d-Difiża mal-Kanada. Il-Kanada talbet formalment lill-Unjoni biex tidħol f’negozjati għall-konklużjoni ta’ ftehim bilaterali, skont fl-Artikolu 17 tar-Regolament tal-Kunsill (UE) 2025/1106 (1), li jistabbilixxi l-Istrument ta’ Azzjoni għas-Sigurtà tal-Ewropa (SAFE) permezz tat-Tisħiħ tal-Industrija Ewropea tad-Difiża.

(2)

Fit-18 ta’ Settembru 2025, il-Kunsill awtorizza lill-Kummissjoni tiftaħ negozjati mar-Renju Unit tal-Gran Brittanja u l-Irlanda ta’ Fuq u mal-Kanada għall-konklużjoni ta’ żewġ ftehimiet distinti li jippermettu l-parteċipazzjoni ta’ entitajiet legali stabbiliti f’dawk il-pajjiżi u prodotti li joriġinaw mit-territorji tagħhom fl-akkwist skont l-Istrument SAFE stabbilit bir-Regolament (UE) 2025/1106 (l-“Istrument SAFE”).

(3)

In-negozjati bejn l-Unjoni u l-Kanada ġew konklużi b’suċċess bl-inizjalar tal-Ftehim. Il-Kummissjoni nnegozjat Ftehim bilaterali bejn l-Unjoni Ewropea u l-Kanada li jistabbilixxi l-kundizzjonijiet għall-parteċipazzjoni ta’ entitajiet legali Kanadiżi u prodotti li joriġinaw mill-Kanada fl-akkwist skont l-Istrument SAFE.

(4)

Il-konklużjoni ta’ dan il-Ftehim tippermetti kooperazzjoni industrijali akbar fil-qasam tad-difiża u tirrifletti x-xewqa kondiviża li tiġi approfondita r-relazzjoni bejn l-Unjoni Ewropea u l-Kanada fil-qasam tas-sigurtà u d-difiża u li titrawwem sħubija aktar mill-qrib, ibbilanċjata u ta’ benefiċċju reċiproku bejn l-Unjoni Ewropea u l-Kanada biex tiġi appoġġata l-kooperazzjoni prattika fil-qasam tad-difiża.

(5)

Għaldaqstant, jenħtieġ li l-Ftehim jiġi ffirmat.

(6)

Jenħtieġ li l-Ftehim jiġi applikat fuq bażi proviżorja, sakemm jidħol fis-seħħ,