(1)

L-etofenprox ġie inkluż fl-Anness I tad-Direttiva 98/8/KE tal-Parlament Ewropew u tal-Kunsill (2) bħala sustanza attiva għall-użu fil-prodotti bijoċidali tat-tip ta’ prodott 8. Skont l-Artikolu 86 tar-Regolament (UE) Nru 528/2012, ġie għalhekk meqjus bħala approvat skont dak ir-Regolament soġġett għall-kundizzjonijiet stipulati fl-Anness I tad-Direttiva 98/8/KE.

(2)

L-approvazzjoni tal-etofenprox għall-użu fil-prodotti bijoċidali tat-tip ta' prodott 8 kienet se tiskadi fil-31 ta’ Jannar 2020. Fis-27 ta’ Lulju 2018, ġiet ippreżentata applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid ta’ dik l-approvazzjoni.

(3)

Bid-Deċiżjoni ta’ Implimentazzjoni tal-Kummissjoni (UE) 2019/994 (3) l-Kummissjoni pposponiet id-data tal-iskadenza tal-approvazzjoni tal-etofenprox għall-użu fil-prodotti bijoċidali tat-tip ta’ prodott 8 sal-31 ta’ Ottubru 2022, sabiex ikun hemm biżżejjed żmien għall-eżami tal-applikazzjoni għat-tiġdid ta’ dik l-approvazzjoni. Bid-Deċiżjoni ta’ Implimentazzjoni tal-Kummissjoni (UE) 2022/1487 (4), il-Kummissjoni pposponiet ulterjorment id-data tal-iskadenza ta’ dik l-approvazzjoni sal-31 ta’ Ottubru 2026, minħabba dewmien marbut mal-istudji meħtieġa biex jivvalutaw il-kriterji għad-determinazzjoni tal-proprjetajiet li jfixklu s-sistema endokrinali tal-etofenprox.

(4)

L-etofenprox ġie wkoll approvat bħala sustanza attiva għall-użu fil-prodotti bijoċidali tat-tip ta’ prodott 18 bir-Regolament ta’ Implimentazzjoni tal-Kummissjoni (UE) Nru 1036/2013 (5), soġġett għall-ispeċifikazzjonijiet u għall-kundizzjonijiet stabbiliti fl-Anness ta’ dak ir-Regolament ta’ Implimentazzjoni.

(5)

L-approvazzjoni tal-etofenprox għall-użu fil-prodotti bijoċidali tat-tip ta' prodott 18 kienet se tiskadi fit-30 ta’ Ġunju 2025. Fil-25 ta’ Ottubru 2023, ġiet ippreżentata applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid ta’ dik l-approvazzjoni.

(6)

Bid-Deċiżjoni ta’ Implimentazzjoni tal-Kummissjoni (UE) 2025/434 (6), il-Kummissjoni pposponiet id-data tal-iskadenza tal-approvazzjoni tal-etofenprox għall-użu fil-prodotti bijoċidali tat-tip ta’ prodott 18 sal-31 ta’ Diċembru 2027, sabiex ikun hemm biżżejjed żmien għall-eżami tal-applikazzjoni għat-tiġdid tal-approvazzjoni tal-etofenprox għall-użu fil-prodotti bijoċidali tat-tip ta’ prodott 18.

(7)

Madankollu, fit-12 ta’ Ġunju 2025, l-applikant li ppreżenta l-applikazzjonijiet għat-tiġdid tal-approvazzjoni tal-etofenprox għall-użu fil-prodotti bijoċidali tat-tipi ta’ prodott 8 u 18 informa lill-Kummissjoni li rtira ż-żewġ applikazzjonijiet tiegħu.

(8)

Konsegwentement, peress li ma ġiex stabbilit li l-etofenprox għadu jissodisfa l-kundizzjonijiet stabbiliti fl-Artikolu 4(1) tar-Regolament (UE) Nru 528/2012, skont id-Deċiżjoni ta’ Implimentazzjoni tal-Kummissjoni (UE) 2026/378 (7) ma ġedditx l-approvazzjoni tal-etofenprox għall-użu fil-prodotti bijoċidali tat-tipi ta’ prodott 8 u 18. Għalhekk, huwa xieraq li jitħassru d-Deċiżjonijiet ta’ Implimentazzjoni (UE) 2022/1487 u (UE) 2025/434 li jipposponu d-dati tal-iskadenza tal-approvazzjoni tal-etofenprox għall-użu fil-prodotti bijoċidali tat-tipi ta’ prodott 8 u 18, rispettivament,