(1)

L-Anness II tar-Regolament ta’ Delega tal-Kummissjoni (UE) Nru 1062/2014 (2) jistabbilixxi lista ta’ sustanzi attivi eżistenti li għandhom jiġu evalwati biex possibbilment jiġu approvati għall-użu fil-prodotti bijoċidali. Dik il-lista tinkludi l-prodotti ta’ reazzjoni tal-paraformaldeid u t-2-idrossipropilammina (proporzjon 1:1) (“HPT”) għat-tipi ta’ prodott 2, 11 u 13.

(2)

L-HPT ġiet evalwata għall-użu fil-prodotti bijoċidali tat-tip ta’ prodott 2 (diżinfettanti taż-żoni privati u taż-żoni tas-saħħa pubbliċi u prodotti bijoċidali oħra), 11 (preservattivi għal-likwidi tas-sistemi tat-tkessiħ u tal-ipproċessar) u 13 (preservattivi ta’ fluwidi fix-xogħol tal-metall) kif deskritt fl-Anness V tad-Direttiva 98/8/KE tal-Parlament Ewropew u tal-Kunsill (3), li jikkorrispondu mat-tip ta’ prodott 2 (diżinfettanti u algaċidi mhux maħsuba għall-applikazzjoni diretta fuq il-bnedmin jew l-annimali), 11 (preservattivi għal-likwidi tas-sistemi tat-tkessiħ u tal-ipproċessar), u 13 (preservattivi għal fluwidi li jintużaw għall-ħdim jew għall-qtugħ) kif deskritt fl-Anness V tar-Regolament (UE) Nru 528/2012.

(3)

L-Awstrija nħatret bħala l-Istat Membru relatur, u l-awtorità kompetenti li tevalwa tagħha ssottomettiet ir-rapport tal-valutazzjoni flimkien mal-konklużjonijiet tagħha lill-Aġenzija Ewropea għas-Sustanzi Kimiċi (“l-Aġenzija”) fid-29 ta’ Settembru 2016. Wara li ġie sottomess ir-rapport tal-valutazzjoni, saru diskussjonijiet fil-laqgħat tekniċi organizzati mill-Aġenzija.

(4)

F’konformità mal-Artikolu 75(1), it-tieni subparagrafu, il-punt (a), tar-Regolament (UE) Nru 528/2012, il-Kumitat dwar il-Prodotti Bijoċidali jħejji l-opinjoni tal-Aġenzija rigward l-applikazzjonijiet għall-approvazzjoni tas-sustanzi attivi. F’konformità mal-Artikolu 7(2) tar-Regolament ta’ Delega (UE) Nru 1062/2014, moqri flimkien mal-Artikolu 75(1) u (4) tar-Regolament (UE) Nru 528/2012, il-Kumitat dwar il-Prodotti Bijoċidali adotta l-opinjonijiet tal-Aġenzija fid-29 ta’ Ġunju 2017 għal kull tip ta’ prodott ivvalutat (“l-opinjonijiet tad-29 ta’ Ġunju 2017 (4) , (5) , (6)), wara li kkunsidra l-konklużjonijiet tal-awtorità kompetenti li tevalwa.

(5)

Skont l-opinjonijiet tad-29 ta’ Ġunju 2017, l-HPT hija kklassifikata bħala karċinoġenika tal-kategorija 1B f’konformità mar-Regolament (KE) Nru 1272/2008 tal-Parlament Ewropew u tal-Kunsill (7), u għalhekk tissodisfa l-kriterju ta’ esklużjoni stipulat fl-Artikolu 5(1), il-punt (a), tar-Regolament (UE) Nru 528/2012.

(6)

Skont l-opinjonijiet tad-29 ta’ Ġunju 2017, l-HPT ma ssodisfatx il-kriterji biex tiġi kklassifikata bħala tossika għar-riproduzzjoni tal-kategorija 2 f’konformità mar-Regolament (KE) Nru 1272/2008, u għalhekk ma tqisitx li għandha proprjetajiet li jfixklu s-sistema endokrinali f’konformità mal-Artikolu 5(3) tar-Regolament (UE) Nru 528/2012, sakemm jiġu adottati l-atti delegati li jispeċifikaw il-kriterji xjentifiċi għad-determinazzjoni tal-proprjetajiet li jfixklu s-sistema endokrinali.

(7)

Ir-Regolament Delegat tal-Kummissjoni (UE) 2017/2100 (8) li jistabbilixxi l-kriterji xjentifiċi għad-determinazzjoni tal-proprjetajiet li jfixklu s-sistema endokrinali skont ir-Regolament (UE) Nru 528/2012 daħal fis-seħħ fis-7 ta’ Diċembru 2017 u ilu japplika mis-7 ta’ Ġunju 2018.

(8)

B’antiċipazzjoni tal-applikazzjoni tal-kriterji xjentifiċi l-ġodda stipulati fir-Regolament Delegat (UE) 2017/2100, u biex tiġi pprovduta ċarezza fir-rigward tal-proprjetajiet perikolużi u r-riskji li jirriżultaw mill-użu tal-HPT, fis-26 ta’ April 2018, skont l-Artikolu 75(1), it-tieni subpragrafu, il-punt (g), tar-Regolament (UE) Nru 528/2012, il-Kummissjoni talbet lill-Aġenzija (9) tirrevedi l-opinjonijiet tagħha tad-29 ta’ Ġunju 2017 u tiċċara jekk l-HPT għandhiex ukoll proprjetajiet li jfixklu s-sistema endokrinali abbażi tal-kriterji xjentifiċi stabbiliti f’dak ir-Regolament Delegat.

(9)

L-Aġenzija adottat l-opinjonijiet riveduti tagħha fit-8 ta’ Ġunju 2022 (“l-opinjonijiet tat-8 ta’ Ġunju 2022”) (10) , (11) , (12). Skont l-opinjonijiet tat-8 ta’ Ġunju 2022, ma setgħet tinsilet l-ebda konklużjoni abbażi tad-data disponibbli dwar jekk l-HPT għandhiex proprjetajiet li jfixklu s-sistema endokrinali li jistgħu jikkawżaw effetti avversi fil-bnedmin u fl-ambjent (organiżmi mhux fil-mira) abbażi tal-kriterji stabbiliti fir-Regolament Delegat (UE) 2017/2100. Madankollu, meta jitqiesu l-proprjetajiet magħrufa ta’ periklu serju ta’ din is-sustanza, li diġà tissodisfa l-kriterju ta’ esklużjoni stipulat fl-Artikolu 5(1), il-punt (a), tar-Regolament (UE) Nru 528/2012, u abbażi ta’ raġunijiet xjentifiċi, l-Aġenzija ma talbitx aktar data.

(10)

Fit-18 ta’ Lulju 2023, skont l-Artikolu 75(1), it-tieni subparagrafu, il-punt (g), tar-Regolament (UE) Nru 528/2012, il-Kummissjoni talbet lill-Aġenzija (13) tirrevedi l-opinjoni tagħha dwar it-tip ta’ prodott 13 peress li l-effikaċja tal-prodott bijoċidali rappreżentattiv ma kinitx ġiet ivvalutata kif xieraq skont id-dokument ta’ gwida applikabbli dwar l-effikaċja (14), u dan ma kienx ġie identifikat b’mod adegwat mill-awtorità kompetenti li tevalwa, la matul l-evalwazzjoni u lanqas matul ir-rieżami bejn il-pari mill-Aġenzija. Missha ntalbet u tiġi vvalutata data tal-grad 2, li tirrappreżenta l-kundizzjonijiet tal-ħajja reali. Il-Kumitat dwar il-Prodotti Bijoċidali adotta l-opinjonijiet riveduti tal-Aġenzija għat-tip ta’ prodott 13 fid-29 ta’ Mejju 2024 (15).

(11)

Skont ir-Regolament (UE) Nru 528/2012, is-sustanzi attivi li jissodisfaw kriterju ta’ esklużjoni jistgħu jiġu approvati biss jekk ikunu jissodisfaw il-kundizzjonijiet stabbiliti fl-Artikolu 4(1), u mill-inqas waħda mill-kundizzjonijiet stipulati fl-Artikolu 5(2), l-ewwel subparagrafu, ta’ dak ir-Regolament.

(12)

Mill-5 ta’ Settembru sal-4 ta’ Novembru 2017, il-Kummissjoni, bl-appoġġ tal-Aġenzija, wettqet konsultazzjoni pubblika sabiex tikkontribwixxi għall-ġbir ta’ informazzjoni dwar jekk il-kundizzjonijiet stipulati fl-Artikolu 5(2), l-ewwel subparagrafu, tar-Regolament (UE) Nru 528/2012 ġewx issodisfati.

(13)

Fis-17 ta’ Frar 2023, skont l-Artikolu 75(1), it-tieni subparagrafu, il-punt (g), tar-Regolament (UE) Nru 528/2012, il-Kummissjoni talbet lill-Aġenzija (16) tipprovdi opinjoni dwar l-evalwazzjoni tad-disponibbiltà u l-adegwatezza tal-alternattivi għall-HPT għat-tipi ta’ prodotti assoċjati. Il-Kumitat dwar il-Prodotti Bijoċidali adotta l-opinjoni relatata tal-Aġenzija fit-23 ta’ Novembru 2023 (“l-opinjoni tat-23 ta’ Novembru 2023”) (17). F’dik l-opinjoni, l-Aġenzija tat isem ġdid lill-HPT: formaldeid irrilaxxat mill-prodotti ta’ reazzjoni tal-paraformaldeid u t-2-idrossipropilammina (proporzjon 1:1) (“RP 1:1”).

(14)

L-opinjoni tat-23 ta’ Novembru 2023 u l-kontribuzzjonijiet għall-konsultazzjoni pubblika ġew diskussi mar-rappreżentanti tal-Istati Membri fil-Kumitat Permanenti dwar il-Prodotti Bijoċidali. Ir-rappreżentanti tal-Istati Membri ntalbu wkoll jindikaw jekk l-Istati Membri tagħhom iqisux li mill-inqas waħda mill-kundizzjonijiet stipulati fl-Artikolu 5(2), l-ewwel subparagrafu, tar-Regolament (UE) Nru 528/2012 tistax tiġi ssodisfata, u jiġġustifikaw dik il-pożizzjoni.

(15)

L-analiżi tad-data kollha miġbura mid-dossiers tal-applikazzjoni, mill-konsultazzjoni pubblika u mill-fehmiet espressi mill-Istati Membri tindika li bħalissa l-RP 1:1 huwa meħtieġ fl-Istati Membri kollha għal ċerti użi.

(16)

L-RP 1:1 ġie vvalutat għall-użu fil-prodotti bijoċidali tat-tip ta’ prodott 2 għall-użu industrijali u professjonali bħala formulazzjoni għat-tindif tas-sistemi għas-sistemi tax-xogħol tal-metall. Diversi sustanzi attivi ġew investigati bħala alternattivi potenzjali għall-RP 1:1 għal dan l-użu: kloru attiv iġġenerat mill-klorur tas-sodju permezz tal-elettroliżi, kloru attiv rilaxxat mill-ipoklorit tal-kalċju, kloru attiv rilaxxat mill-kloru, kloru attiv rilaxxat mill-aċidu ipokloruż, kloru attiv rilaxxat mill-ipoklorit tas-sodju, -ammini, N-C10-16-alkiltrimetilenedi-, prodotti tar-reazzjoni mal-aċidu kloroaċetiku (“Amfolit”), bifenil-2-ol, diidrossidu tal-kalċju/idrossidu tal-kalċju, ossidu tal-kalċju u tal-manjeżju/ġir dolomitiku, tetraidrossidu tal-kalċju u tal-manjeżju/idrossidu tal-manjeżju u tal-kalċju/ġir dolomitiku idratat, ossidu tal-kalċju/ġir/ġibs verġni, klorokresol, aċidu ċitriku, sulfat tar-ram pentaidrat, klorur tad-dideċildimetilammonju (“DDAC”), formaldeid, glutaraldeid, aċidu idrokloriku, perossidu tal-idroġenu, aċidu L-(+)-lattiku, taħlita ta’ 5-kloro-2-metil-2H-isotijażol-3-on u 2-metil-2H-isotijażol-3-on (“taħlita ta’ CMIT/MIT”), aċidu nonanojku, ożonu ġġenerat mill-ossiġenu, aċidu peraċetiku, aċidu peraċetiku ġġenerat mit-tetra-aċetiletilendiammina u l-perkarbonat tas-sodju, propan-1-ol, propan-2-ol, massa tar-reazzjoni tal-aċidu peraċetiku u l-aċidu perossiottanojku, ħall, 5-kloro-2-(4-klorofenossi)fenol (“DCCP”), formaldeid irrilaxxat mill-prodotti ta’ reazzjoni tal-paraformaldeid u t-2-idrossipropilammina (proporzjon 3:2) (“RP 3:2”). Madankollu, skont l-analiżi tal-informazzjoni miġbura, l-ebda waħda minn dawk is-sustanzi attivi ma tista’ tkun alternattiva xierqa għall-RP 1:1 għall-użu eżaminat minħabba n-nuqqas ta’ effikaċja jew kwistjonijiet ta’ kompatibbiltà teknika jew kwistjonijiet ta’ periklu. Ma ġiet identifikata l-ebda alternattiva mhux kimika għall-użu tal-RP 1:1 fil-prodotti bijoċidali tat-tip ta’ prodott 2. Id-diżinfezzjoni tas-sistemi tax-xogħol tal-metall hija meħtieġa għat-tħaddim korrett ta’ dawn is-sistemi minħabba t-taħsir possibbli tat-tagħmir (reċipjenti, tubi, filtri) u l-kontaminazzjoni sussegwenti tal-fluwidi tax-xogħol tal-metall. Hemm ukoll riskju akbar għall-ħaddiema tal-metall minħabba l-possibbiltà li l-patoġeni jikkontaminaw l-fluwidi u t-tagħmir tal-użu finali.

(17)

L-RP 1:1 ġie vvalutat għall-użu fil-prodotti bijoċidali tat-tip ta’ prodott 11 għall-preservazzjoni tal-likwidi tas-sistemi tat-tkessiħ u tal-ipproċessar, fis-sistemi magħluqa biss u mmaniġġjati minn utenti industrijali jew professjonali. Diversi sustanzi attivi ġew investigati bħala alternattivi potenzjali għall-RP 1:1 għal dan l-użu: 2-metil-2H-isotijażol-3-on (“MIT”), 1,2-benżisotijażolin-3-on (“BIT”), 2,2',2''-(eżaidro-1,3,5-triażina-1,3,5-triil)trietanol (“HHT”), 2,2-dibromo-2-ċjanoaċetammid (“DBNPA”), glutaraldeid, taħlita ta’ CMIT/MIT, aċidu peraċetiku, idroklorur tal-polyeżametilen bigwanid bil-piż molekulari skont il-medja tal-għadd (Mn) medju ta’ 1 600 u polidispersità medja (PDI) ta’ 1.8 (“PHMB”), ożonu ġġenerat mill-ossiġenu, sulfat tat-tetrakis(idrossimetil)fosfonju (2:1) (“THPS”), tetraidro-1,3,4,6-tetrakis(idrossimetil)imidażo[4,5-d]imidażol-2,5(1H,3H)-dion (“TMAD”), u RP 3:2. Madankollu, skont l-analiżi tal-informazzjoni miġbura, l-ebda waħda mis-sustanzi attivi ta’ hawn fuq ma tista’ tkun alternattiva xierqa għall-RP 1:1 għall-użu eżaminat minħabba kwistjonijiet ta’ kompatibbiltà teknika jew kwistjonijiet ta’ periklu. Ma ġiet identifikata l-ebda alternattiva mhux kimika għall-użu tal-RP 1:1 fil-prodotti bijoċidali tat-tip ta’ prodott 11. Minħabba l-korrużjoni u l-bijoinkrostazzjoni possibbli, il-preservazzjoni tal-likwidi tas-sistemi tat-tkessiħ u tal-ipproċessar fis-sistemi magħluqa hija meħtieġa għat-tħaddim korrett tagħhom u biex jiġi evitat it-tniġġis ambjentali, pereżempju, minħabba l-qsim tal-pipelines bil-korrużjoni.

(18)

L-RP 1:1 ġie vvalutat għall-użu fil-prodotti bijoċidali tat-tip ta’ prodott 13 għall-preservazzjoni tal-fluwidi tax-xogħol tal-metall jew għall-qtugħ, immaniġġjati minn utenti industrijali jew professjonali. Diversi sustanzi attivi ġew investigati bħala alternattivi potenzjali għall-RP 1:1 għal dan l-użu: 3-jodo-2-propinilbutilkarbamat (“IPBC”), BIT, bifenil-2-ol, klorokresol, DBNPA, diammina, HHT, MBIT, MIT, taħlita ta’ CMIT/MIT, fenossietanol, TMAD, u RP 3:2. Madankollu, skont l-analiżi tal-informazzjoni miġbura, l-ebda waħda mis-sustanzi attivi ta’ hawn fuq ma tista’ tkun alternattiva xierqa għall-RP 1:1 għall-użu eżaminat minħabba n-nuqqas ta’ effikaċja jew kwistjonijiet ta’ kompatibbiltà teknika jew kwistjonijiet ta’ periklu. Ma ġiet identifikata l-ebda alternattiva mhux kimika għall-użu tal-RP 1:1 fil-prodotti bijoċidali tat-tip ta’ prodott 13. Minħabba l-possibbiltà ta’ taħsir, il-preservazzjoni tal-fluwidi tax-xogħol tal-metall jew għall-qtugħ hija meħtieġa għat-tħaddim korrett ta’ dawk is-sistemi u d-disponibbiltà tal-prodotti għall-utenti downstream. Mingħajr preservazzjoni xierqa, hemm ukoll riskju akbar għall-ħaddiema tal-metall minħabba l-possibbiltà li l-patoġeni jikkontaminaw l-fluwidi tal-użu finali.

(19)

Għalhekk, l-analiżi tal-informazzjoni miġbura turi li n-nuqqas ta’ approvazzjoni tal-RP 1:1 bħala sustanza attiva għall-użu fil-prodotti bijoċidali tat-tipi ta’ prodott 2, 11, u 13 ikollu impatt negattiv sproporzjonat fuq is-soċjetà meta mqabbel mar-riskju għas-saħħa tal-bniedem, għas-saħħa tal-annimali jew għall-ambjent li jirriżulta mill-użu tas-sustanza bħala formulazzjoni għat-tindif tas-sistemi għas-sistemi tax-xogħol tal-metall (prodotti bijoċidali tat-tip ta’ prodott 2), għall-preservazzjoni tal-likwidi tas-sistemi tat-tkessiħ u tal-ipproċessar, fis-sistemi magħluqa biss (prodotti bijoċidali tat-tip ta’ prodott 11) u għall-preservazzjoni tal-fjuwils tax-xogħol tal-metall jew għall-qtugħ (prodotti bijoċidali tat-tip ta’ prodott 13). B’hekk, il-kundizzjoni stipulata fl-Artikolu 5(2), l-ewwel subparagrafu, il-punt (c), tar-Regolament (UE) Nru 528/2012 hija ssodisfata għal dawk l-użi.

(20)

L-Aġenzija kkonkludiet li ma hemm l-ebda riskju inaċċettabbli għas-saħħa tal-bniedem u għall-ambjent mill-użu tal-prodotti bijoċidali li fihom l-RP 1:1 għat-tipi ta’ prodott 2, 11 u 13, meta jitwarrab in-nuqqas ta’ konklużjoni dwar jekk l-RP 1:1 għandux proprjetajiet li jfixklu s-sistema endokrinali li jistgħu jikkawżaw effetti avversi fil-bnedmin u fl-ambjent (organiżmi mhux fil-mira) abbażi tal-kriterji stabbiliti fir-Regolament Delegat (UE) 2017/2100, u meta l-miżuri ta’ mitigazzjoni tar-riskju jiġu applikati biex l-esponiment tal-bnedmin, tal-annimali u tal-ambjent għall-RP 1:1 jiġi limitat kemm jista’ jkun. Madankollu, l-Aġenzija ma waslet għall-ebda konklużjoni dwar il-livell tar-riskji mill-użu tal-RP 1:1 għas-saħħa tal-bniedem u għall-ambjent meta jitqiesu l-proprjetajiet tiegħu li jfixklu s-sistema endokrinali minħabba l-informazzjoni nieqsa.

(21)

Għalhekk, fl-aħħar mill-aħħar, abbażi tad-data disponibbli fl-applikazzjonijiet, ma ntweriex li l-prodotti bijoċidali rappreżentattivi li fihom l-RP 1:1 għat-tipi ta’ prodott 2, 11 u 13 mistennija li, huma stess jew b’riżultat tar-residwi tagħhom, ma jkollhomx effetti inaċċettabbli fuq is-saħħa tal-bniedem u fuq l-ambjent, u li mistennija li jissodisfaw il-kriterji stipulati fl-Artikolu 19(1), il-punt (b)(iii) u (iv), tar-Regolament (UE) Nru 528/2012.

(22)

Madankollu, il-fattur stipulat fl-Artikolu 19(5) tar-Regolament (UE) Nru 528/2012 jenħtieġ li jitqies meta jiġu kkunsidrati l-kundizzjonijiet għall-approvazzjoni stipulati fl-Artikolu 4(1) ta’ dak ir-Regolament. F’konformità mal-Artikolu 19(5) ta’ dak ir-Regolament, u minkejja l-paragrafi 1 u 4 ta’ dak l-Artikolu, prodott bijoċidali jista’ jiġi awtorizzat meta l-kundizzjonijiet stabbiliti fil-paragrafu 1, il-punt (b)(iii) u (iv) ta’ dak l-Artikolu ma jiġux issodisfati bis-sħiħ u meta n-nuqqas ta’ awtorizzazzjoni tal-prodott bijoċidali jirriżulta f’impatti negattivi sproporzjonati għas-soċjetà meta mqabbla mar-riskji għas-saħħa tal-bniedem, għas-saħħa tal-annimali jew għall-ambjent li jirriżultaw mill-użu tal-prodott bijoċidali bil-kundizzjonijiet stabbiliti fl-awtorizzazzjoni, li huwa simili għall-kundizzjoni stipulata fl-Artikolu 5(2), l-ewwel subparagrafu, il-punt (c), tar-Regolament (UE) Nru 528/2012. Peress li l-kundizzjoni stipulata fl-Artikolu 5(2), l-ewwel subparagrafu, il-punt (c), ta’ dak ir-Regolament hija ssodisfata għal ċerti użi tal-RP 1:1 għal kull tip ta’ prodott ivvalutat, il-kundizzjoni stipulata fl-Artikolu 19(5) ta’ dak ir-Regolament titqies issodisfata wkoll għall-istess użi. Għalhekk, il-kundizzjonijiet stipulati fl-Artikolu 4(1) tar-Regolament (UE) Nru 528/2012 flimkien mal-kundizzjonijiet stipulati fl-Artikolu 5(2), l-ewwel subparagrafu, il-punt (c) ta’ dak ir-Regolament jitqiesu ssodisfati.

(23)

Għalhekk, jixraq li l-RP 1:1 jiġi approvat għall-użu fil-prodotti bijoċidali tat-tipi ta’ prodott 2, 11 u 13, dment li jikkonforma ma’ ċerti kundizzjonijiet.

(24)

Billi l-RP 1:1 jissodisfa l-kriterju ta’ esklużjoni stabbilit fl-Artikolu 5(1), il-punt (a), tar-Regolament (UE) Nru 528/2012, jenħtieġ li l-approvazzjoni tkun għal perjodu mhux itwal minn 5 snin, kif stipulat fit-tieni sentenza tal-Artikolu 4(1) ta’ dak ir-Regolament.

(25)

Skont il-punt 10 tal-Anness VI tar-Regolament (UE) Nru 528/2012, il-valutazzjoni tal-prodott bijoċidali jenħtieġ li tkun tinkludi evalwazzjoni dwar jekk il-kundizzjoni tal-Artikolu 5(2), l-ewwel subparagrafu, il-punt (c), ta’ dak ir-Regolament hijiex issodisfata fit-territorju tal-Istat Membru rispettiv. Jenħtieġ li jiġi previst li l-prodotti bijoċidali tat-tipi ta’ prodott 2, 11 u 13 li fihom l-RP 1:1 jistgħu jiġu awtorizzati biss għall-użu fl-Istati Membri, jekk tiġi ssodisfata l-kundizzjoni stipulata fl-Artikolu 5(2), l-ewwel subparagrafu, il-punt (c), tar-Regolament (UE) Nru 528/2012.

(26)

Barra minn hekk, skont l-Artikolu 4(3), il-punti (d) u (g), u l-Artikolu 58(2), tar-Regolament (UE) Nru 528/2012, biex jiġi żgurat livell għoli ta’ sikurezza għas-saħħa tal-bniedem, għas-saħħa tal-annimali u għall-ambjent, u biex jiġi żgurat trattament ugwali bejn l-oġġetti ttrattati manifatturati fl-Unjoni u l-oġġetti ttrattati importati, l-introduzzjoni fis-suq tal-oġġetti ttrattati bl-RP 1:1 jew li intenzjonalment jinkorporawh jenħtieġ li tkun soġġetta għal xi restrizzjonijiet u kundizzjonijiet. B’mod partikolari, f’konformità mal-kundizzjonijiet stipulati fl-approvazzjoni għall-awtorizzazzjoni tal-prodotti bijoċidali tat-tipi ta’ prodott 2, 11 u 13 li fihom l-RP 1:1, l-uniċi oġġetti ttrattati bl-RP 1:1 jew li jinkorporawh li jenħtieġ li jitħallew jiġu introdotti fis-suq huma dawk fejn l-RP 1:1 ikun intuża bħal formulazzjoni għat-tindif tas-sistemi għas-sistemi tax-xogħol tal-metall, dawk fejn l-RP 1:1 ikun intuża għall-preservazzjoni tal-likwidi tas-sistemi tat-tkessiħ u tal-ipproċessar - fis-sistemi magħluqa biss, u fluwidi tax-xogħol tal-metall jew għall-qtugħ.

(27)

Jenħtieġ li jitħalla jgħaddi perjodu raġonevoli qabel ma tiġi approvata sustanza attiva, sabiex il-partijiet interessati jkunu jistgħu jieħdu l-miżuri ta’ tħejjija meħtieġa biex jissodisfaw ir-rekwiżiti l-ġodda.

(28)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Prodotti Bijoċidali,