(1)

Il-Kummissjoni nediet sejħa għal espressjonijiet ta’ interess għall-assistenza finanzjarja skont l-Azzjoni għas-Sigurtà tal-Ewropa (SAFE) permezz tal-Istrument għat-Tisħiħ tal-Industrija Ewropea tad-Difiża (l-“istrument SAFE”), filwaqt li talbet lill-Istati Membri jipprevedu ammont ta’ self massimu u minimu indikattiv. Sad-29 ta’ Awwissu 2025, 19-il Stat Membru kienu esprimew interess li jiksbu assistenza finanzjarja skont ir-Regolament (UE) 2025/1106.

(2)

Fid-9 ta’ Settembru 2025, il-Kummissjoni nnotifikat lill-Istati Membri rikjedenti dwar l-allokazzjoni tentattiva tal-ammonti ta’ self għal kull Stat Membru.

(3)

Fid-29 ta’ Novembru 2025, il-Portugall ippreżenta talba f’konformità mal-Artikolu 7(1) tar-Regolament (UE) 2025/1106 għal assistenza finanzjarja (it-“talba”) akkumpanjata minn pjan ta’ investiment għall-industrija tad-difiża Ewropea (il-“pjan”).

(4)

Il-Kummissjoni vvalutat it-talba skont il-kundizzjonijiet applikabbli stabbiliti fir-Regolament (UE) 2025/1106.

(5)

F’konformità mal-Artikolu 7 tar-Regolament (UE) 2025/1106, il-pjan kien motivat u sostanzjat kif xieraq u kien jinkludi deskrizzjoni tal-prodotti tad-difiża u ta’ prodotti oħra għall-finijiet tad-difiża, u fejn rilevanti, deskrizzjoni tal-involviment previst tal-Ukrajna fl-attivitajiet, in-nefqiet u l-miżuri ppjanati, jew tal-azzjonijiet previsti għall-benefiċċju tal-Ukrajna.

(6)

Il-Kummissjoni sabet li t-talba tissodisfa l-kundizzjonijiet imniżżla fl-Artikolu 4 tar-Regolament (UE) 2025/1106 għall-użu tal-istrument SAFE. B’mod partikolari, tiżgura li l-attivitajiet, in-nefqiet u l-miżuri relatati mal-prodotti tad-difiża jew ma’ prodotti oħra għall-finijiet tad-difiża jitwettqu permezz ta’ akkwisti komuni jew akkwisti uniċi. Tali attivitajiet, nefqiet u miżuri għandhom ikollhom ukoll wieħed, jew aktar, mill-objettivi li ġejjin: li jħaffu l-aġġustament tal-industrija tad-difiża għal bidliet strutturali, itejbu d-disponibbiltà f’waqtha tal-prodotti tad-difiża jew jiżguraw l-interoperabbiltà u l-interkambjabbiltà madwar l-Unjoni.

(7)

Il-Kummissjoni sabet ukoll li t-talba fiha deskrizzjoni tal-miżuri ppjanati maħsuba biex jiżguraw il-konformità mal-Artikolu 16 tar-Regolament (UE) 2025/1106 u mar-regoli tal-akkwist stabbiliti f’dak ir-Regolament, inkluż deskrizzjoni ta’ kif għandha tiġi żgurata dik il-konformità.

(8)

B’riżultat ta’ dan, f’konformità mal-Artikolu 8(2) tar-Regolament (UE) 2025/1106, il-Kummissjoni sabet li t-talba tissodisfa l-kundizzjonijiet stabbiliti f’dak ir-Regolament, b’mod partikolari dawk previsti fl-Artikolu 4, l-Artikolu 7(2) u l-Artikolu 16.

(9)

F’konformità mal-Artikolu 8(5) tar-Regolament (UE) 2025/1106, il-Kummissjoni qieset il-ħtiġijiet ta’ finanzjament eżistenti u mistennija tal-Portugall kif ukoll it-talbiet għal assistenza finanzjarja skont dak ir-Regolament diġà ippreżentati jew ippjanati li jiġu ppreżentati minn Stati Membri oħra, filwaqt li tapplika l-prinċipju tat-trattament ugwali, tas-solidarjetà, tal-proporzjonalità u tat-trasparenza.

(10)

Jenħtieġ li din id-Deċiżjoni tkun mingħajr preġudizzju għall-eżitu ta’ kwalunkwe proċedura skont ir-Regolament (UE) 2024/1263 tal-Parlament Ewropew u tal-Kunsill (2) u skont ir-Regolament tal-Kunsill (KE) Nru 1467/97 (3).

(11)

Din id-Deċiżjoni jenħtieġ li tkun mingħajr preġudizzju għar-regoli rilevanti adottati skont l-Artikolu 322 tat-Trattat dwar il-Funzjonament tal-Unjoni Ewropea, b’mod partikolari r-Regolamenti (UE, Euratom) 2024/2509 (4) u (UE, Euratom) 2020/2092 (5) tal-Parlament Ewropew u tal-Kunsill.

(12)

F’konformità mal-Artikolu 10(2) tar-Regolament (UE) 2025/1106, jenħtieġ li l-ftehim ta’ self li għandu jiġi konkluż mal-Portugall jistabbilixxi l-miżuri xierqa kollha meħtieġa għall-protezzjoni tal-interessi finanzjarji tal-Unjoni,