REGOLAMENT TA’ IMPLIMENTAZZJONI TAL-KUMMISSJONI (UE) 2026/330

tad-9 ta’ Frar 2026

li jemenda r-Regolament ta’ Implimentazzjoni tal-Kummissjoni (UE) 2024/2754 li jimponi dazju kumpensatorju definittiv fuq l-importazzjonijiet ta’ vetturi elettriċi ġodda bil-batterija ddisinjati għat-trasport ta’ persuni li joriġinaw mir-Repubblika tal-Poplu taċ-Ċina wara rieżami interim parzjali skont l-Artikolu 19(2) tar-Regolament (UE) 2016/1037 tal-Parlament Ewropew u tal-Kunsill

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/1037 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra importazzjonijiet sussidjati minn pajjiżi li mhumiex membri tal-Unjoni Ewropea (1) (“ir-Regolament Bażiku”), u b’mod partikolari l-Artikoli 13, 15 u 19 tiegħu,

Billi:

1. PROĊEDURA

1.1. Investigazzjonijiet preċedenti u miżuri fis-seħħ

(1)

Il-Kummissjoni Ewropea (“Il-Kummissjoni”) imponiet dazju kumpensatorju fuq l-importazzjonijiet ta’ vetturi elettriċi ġodda bil-batterija ddisinjati għat-trasport ta’ persuni li joriġinaw mir-Repubblika tal-Poplu taċ-Ċina (“il-miżuri oriġinali”) bir-Regolament ta’ Implimentazzjoni tal-Kummissjoni (UE) 2024/2754 (2). Minn hawn ’il quddiem, l-investigazzjoni li wasslet għall-impożizzjoni tal-miżuri oriġinali se tissejjaħ “l-investigazzjoni oriġinali”.

(2)

Il-premessa (1422) tar-Regolament ta’ Implimentazzjoni (UE) 2024/2754 iddikjarat li tista’ tiġi identifikata u implimentata soluzzjoni miftiehma b’mod reċiproku, fost l-oħrajn ma’ produtturi esportaturi individwali, anke wara l-impożizzjoni ta’ miżuri definittivi. F’dan il-kuntest, il-Kummissjoni rċeviet offerta ta’ impenn minn produttur esportatur tal-prodott ikkonċernat, Volkswagen (Anhui) Automotive Co., Ltd. (“VW (Anhui)”).

1.2. Bidu ta’ rieżami interim

(3)

Wara li ddeċidiet, wara li informat lill-Kumitat stabbilit bl-Artikolu 15(1) tar-Regolament (UE) 2016/1036 tal-Parlament Ewropew u tal-Kunsill (3), li kien hemm biżżejjed evidenza rigward il-kriterji rilevanti stabbiliti fl-Artikoli 13 u 19 tar-Regolament Bażiku, fl-4 ta’ Diċembru 2025 il-Kummissjoni bdiet, fuq inizjattiva tagħha stess, rieżami interim parzjali fir-rigward tal-importazzjonijiet fl-Unjoni ta’ vetturi elettriċi ġodda bil-batterija ddisinjati għat-trasport ta’ persuni li joriġinaw mir-Repubblika tal-Poplu taċ-Ċina (“il-pajjiż ikkonċernat”) abbażi tal-Artikolu 19(2) tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (4) (“in-Notifika tal-Bidu”).

(4)	L-ambitu tar-rieżami interim parzjali huwa limitat għal eżami tal-forma tal-miżura u, speċifikament, għall-eżami tal-aċċettabbiltà u l-prattiċità ta’ impenn li kien ġie offrut minn VW (Anhui), produttur esportatur fir-Repubblika tal-Poplu taċ-Ċina.

1.3. Partijiet interessati

(5)

Fin-Notifika tal-Bidu, il-partijiet interessati ġew mistiedna jikkuntattjaw lill-Kummissjoni sabiex jipparteċipaw fl-investigazzjoni. Il-partijiet interessati kellhom l-opportunità li jikkummentaw dwar il-bidu tar-rieżami interim, l-impenn li ngħata mill-produttur esportatur u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

1.4. Proċedura sussegwenti

(6)

Waslu kummenti dwar il-bidu mingħand il-Gvern taċ-Ċina (GTĊ), il-Kamra tal-Kummerċ taċ-Ċina għall-Importazzjoni u l-Esportazzjoni ta’ Makkinarju u Prodotti Elettroniċi (China Chamber of Commerce for Import and Export of Machinery and Electronic Products, “CCCME”) u Volkswagen (Anhui) flimkien mal-importatur relatat tagħha fl-UE, SEAT S.A.. Il-kummenti ġew indirizzati kif stabbilit fil-premessi li ġejjin. L-ebda waħda mill-partijiet interessati ma talbet seduta ta’ smigħ dwar il-bidu tal-investigazzjoni.

(7)

Il-GTĊ u s-CCCME asserew li s-CCCME, f’isem il-grupp ta’ produtturi esportaturi Ċiniżi, kienet diġà preċedentement ipproponiet soluzzjoni komprensiva li tirrappreżenta l-pożizzjoni kollettiva tal-industrija. Huma kkritikaw lill-Kummissjoni talli daħlet f’diskussjonijiet bilaterali ma’ intrapriżi individwali. Il-GTĊ enfasizza li l-Kummissjoni jenħtiġilha tirrispetta strettament il-prinċipju tan-nondiskriminazzjoni u tkompli d-djalogu tagħha mal-awtoritajiet Ċiniżi. Fl-aħħar nett, iż-żewġ partijiet talbu lill-Kummissjoni biex tiddivulga aktar dettalji dwar it-termini tal-impenn ta VW (Anhui).

(8)

Il-Kummissjoni fakkret li l-Artikolu 13(1)(b) tar-Regolament bażiku jsemmi li kwalunkwe esportatur jista’ jimpenja ruħu “li jirrevedi l-prezzijiet tiegħu [...] sakemm tali esportazzjonijiet ikunu jgawdu minn sussidji kumpensabbli, biex il-Kummissjoni tkun sodisfatta li l-effett ta’ dannu tas-sussidji jkun b’hekk ġie eliminat”. Dan huwa rikonoxxut ukoll fil-premessa (1422) tar-Regolament definittiv, fejn il-produtturi esportaturi individwali jissemmew ukoll b’mod espliċitu.

(9)

F’dan il-każ speċifiku, il-Kummissjoni rċeviet offerta ta’ impenn mingħand kumpanija individwali li kien fiha biżżejjed elementi biex titqies prattikabbli u konformi mal-kundizzjonijiet stabbiliti fl-Artikolu 13 tar-Regolament bażiku, li kien il-bażi tal-bidu tar-rieżami attwali. Din kienet l-unika offerta ta’ impenn sottomessa formalment lill-Kummissjoni minn mindu ġew imposti l-miżuri kumpensatorji definittivi. Għalhekk, l-approċċ tal-Kummissjoni ma jistax jitqies bħala diskriminatorju, peress li ma kien hemm l-ebda sitwazzjoni simili oħra li kien jenħtiġilha tiġi ttrattata bl-istess mod. Il-Kummissjoni ċaħdet l-asserzjoni.

(10)

Fir-rigward tat-talba ta’ dawn il-partijiet biex jiddivulgaw aktar dettalji tal-offerta ta’ impenn, il-Kummissjoni fakkret li l-partijiet interessati kollha kienu ngħataw verżjoni miftuħa dettaljata tal-offerta ta’ impenn u ppermettiet lill-partijiet interessati jifhmu b’mod raġonevoli s-sustanza tal-informazzjoni li ngħatat b’mod kunfidenzjali skont it-tifsira tal-Artikoli 13(4) u 29(2) tar-Regolament bażiku. Il-Kummissjoni fakkret ukoll li f’konformità mal-Artikolu 29(5) tar-Regolament bażiku, hija ma għandha tiżvela l-ebda informazzjoni li tkun irċeviet skont ir-Regolament bażiku u li jkun intalab trattament kunfidenzjali għaliha. Għalhekk, it-talba biex tingħata aktar informazzjoni dwar l-elementi tal-offerta ta’ impenn ġiet miċħuda.

(11)	Fil-kummenti tagħha VW (Anhui) tenniet il-karatteristiċi ewlenin tal-impenn offrut u kkonkludiet li, fil-fehma tagħha, l-offerta ta’ impenn tissodisfa l-kriterji stabbiliti fl-Artikolu 13 tar-Regolament bażiku.

(12)

Fit-12 ta’ Jannar 2026, il-Kummissjoni ddivulgat il-fatti u l-kunsiderazzjonijiet essenzjali li abbażi tagħhom kien beħsiebha taċċetta l-impenn ta’ VW (Anhui) u b’hekk temenda r-regolament li jimponi miżuri definittivi. Il-partijiet kollha ngħataw perjodu li fih setgħu jikkummentaw dwar id-divulgazzjoni.

(13)	Wara d-divulgazzjoni, il-GTĊ u VW (Anhui), flimkien ma’ SEAT S.A., taw il-kummenti tagħhom. Il-kummenti li għamlu l-partijiet interessati ġew ikkunsidrati mill-Kummissjoni u ġew meqjusa, fejn xieraq.

(14)

Fis-sottomissjoni tiegħu, il-GTĊ tenna l-kummenti li kien diġà għamel fil-bidu tal-investigazzjoni, l-enfasi li l-Kummissjoni jenħtieġ li taderixxi mal-prinċipju tan-nondiskriminazzjoni u mar-regoli tad-WTO, u evalwazzjoni oġġettiv u imparzjali ta’ kull applikazzjoni ta’ impenn fuq il-prezz ta’ intrapriżi Ċiniżi. Il-GTĊ talab ukoll li l-Kummissjoni jenħtieġ li tiddivulga aktar dettalji dwar il-klawżoli tal-impenn fuq il-prezz tal-kumpaniji rilevanti.

(15)

Peress li l-GTĊ ma ta l-ebda argumentazzjoni ġdida rigward il-fatti u l-kunsiderazzjonijiet ippreżentati fil-premessi ta’ hawn fuq, il-Kummissjoni kkonfermat il-konklużjonijiet tagħha stabbiliti fil-premessi (8) sa (10). Kif diġà ġie stabbilit fil-premessa(10), f’konformità mal-Artikolu 29(5) tar-Regolament bażiku, il-Kummissjoni ma għandha tiżvela l-ebda informazzjoni li tkun irċeviet skont ir-Regolament bażiku u li jkun intalab trattament kunfidenzjali għaliha. Għaldaqstant, il-Kummissjoni kkonfermat li t-talba biex tagħti aktar informazzjoni ġiet miċħuda.

(16)	Fis-sottomissjoni konġunta tagħhom dwar id-divulgazzjoni finali, VW (Anhui) u SEAT S.A. enfasizzaw li huma avvanzaw it-tħejjijiet għall-applikazzjoni tal-impenn propost. Il-kumpaniji affermaw mill-ġdid l-impenn tagħhom li jikkonformaw mat-termini kollha tal-offerta ta’ impenn.

(17)	L-ebda parti ma talbet seduta ta’ smigħ.

(18)	Għalhekk, il-Kummissjoni ddeċidiet li taċċetta l-offerta ta’ impenn bid-Deċiżjoni ta’ Implimentazzjoni (UE) 2026/328 (5).

(19)	Il-miżuri previsti f’dan ir-regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,

ADOTTAT DAN IR-REGOLAMENT:

Artikolu 1

Emendi tar-Regolament ta’ Implimentazzjoni (UE) 2024/2754

1. Fl-Artikolu 1(2):

“Kumpaniji oħrajn li kkooperaw (Anness)

20,7 %”

hija sostitwita bi:

“Kumpaniji oħrajn li kkooperaw (Anness I)

20,7 %”

2. Jiżdiedu l-Artikoli 2a u 2b ġodda:

“Artikolu 2a

1. Importazzjonijiet iddikjarati għar-rilaxx f’ċirkolazzjoni libera għandhom ikunu eżentati mid-dazju kumpensatorju impost mill-Artikolu 1, ġaladarba jkunu manifatturati, mibgħuta u fatturati minn kumpanija li l-impenn mingħandha huma aċċettati mill-Kummissjoni u li l-isem tagħhom huwa elenkat fid-Deċiżjoni ta’ Implimentazzjoni tal-Kummissjoni (UE) 2026/328, u jkunu ġew importati skont id-dispożizzjonijiet tal-istess Deċiżjoni ta’ Implimentazzjoni.

2.2. L-importazzjonijiet imsemmija fil-paragrafu 1 għandhom ikunu eżenti mit-taxxa kumpensatorja bil-kondizzjoni li:

(a)	għal importazzjonijiet bħal dawn, tiġi ppreżentata dikjarazzjoni ta’ impenn lid-dwana, li jkun fiha mill-inqas l-elementi stipulati fl-Anness II ta’ dan ir-Regolament; u

(b)	l-oġġetti ddikjarati u ppreżentati lid-dwana jikkorrispondu preċiżament mad-deskrizzjoni kemm fuq id-dikjarazzjoni ta’ impenn kif ukoll fuq il-fattura kummerċjali relatata mal-kunsinna ta’ importazzjoni ddikjarata għar-rilaxx f’ċirkolazzjoni libera.

Dejn mad-dwana għandu jiġġarrab fil-mument ta' aċċettazzjoni tad-dikjarazzjoni għar-rilaxx fiċ-ċirkolazzjoni libera:

(a)	kull meta jiġi stabbilit, fir-rigward tal-importazzjonijiet deskritti fil-paragrafu 1, li ma ġewx issodisfati waħda jew aktar mill-kundizzjonijiet elenkati f'dak il-paragrafu u l-paragrafu 2; jew

(b)	meta l-Kummissjoni tirtira l-aċċettazzjoni tagħha tal-impenn skont l-Artikolu 13(9) tar-Regolament (UE) 2016/1037 f’Regolament jew Deċiżjoni li tirreferi għal tranżazzjonijiet partikolari u tiddikjara bħala invalidi l-fatturi rilevanti tal-impenn.

Artikolu 2b

Il-kumpanija li l-Kummissjoni taċċetta impenji mingħandha u li isimha jkun elenkat fid-Deċiżjoni ta’ Implimentazzjoni tal-Kummissjoni (UE) 2026/328 u li tkun soġġetta għal ċerti kundizzjonijiet speċifikati hemmhekk, toħroġ ukoll fattura għal tranżazzjonijiet li ma humiex eżentati mid-dazju kumpensatorju. Din il-fattura tkun fattura kummerċjali li jkun fiha tal-inqas l-elementi stipulati fl-Anness III ta’ dan ir-Regolament.”

3. L-Anness jingħata t-titolu l-ġdid ta’ “Anness I”. L-Anness II u l-Anness III il-ġodda jiżdiedu f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, id-9 ta’ Frar 2026.

Għall-Kummissjoni

Il-President

Ursula VON DER LEYEN

(1) ĠU L 176, 30.6.2016, p. 55, ELI: http://data.europa.eu/eli/reg/2016/1037/oj.

(2) Ir-Regolament ta’ Implimentazzjoni tal-Kummissjoni (UE) 2024/2754 tad-29 ta’ Ottubru 2024 li jimponi dazju kumpensatorju definittiv fuq l-importazzjonijiet ta’ vetturi elettriċi ġodda bil-batterija ddisinjati għat-trasport ta’ persuni li joriġinaw mir-Repubblika tal-Poplu taċ-Ċina (ĠU L, 2024/2754, 29.10.2024. ELI: http://data.europa.eu/eli/reg_impl/2024/2754/oj).

(3) Ir-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ĠU L 176, 30.6.2016, p. 21, ELI: http://data.europa.eu/eli/reg/2016/1036/oj).

(4) Notifika tal-bidu ta’ rieżami interim parzjali tal-miżuri kompensatorji applikabbli għall-importazzjonijiet ta’ vetturi elettriċi bil-batterija ġodda ddisinjati għat-trasport tal-persuni, li joriġinaw mir-Repubblika tal-Poplu taċ-Ċina (ĠU C, C/2025/6545, 4.12.2025, ELI: http://data.europa.eu/eli/C/2025/6545/oj).

(5) Id-Deċiżjoni ta’ Implimentazzjoni tal-Kummissjoni (UE) 2026/328 tad-9 ta’ Frar 2026 li taċċetta impenn offrut b’rabta mal-miżuri antisussidji li jikkonċernaw l-importazzjonijiet ta’ vetturi elettriċi ġodda bil-batterija ddisinjati għat-trasport ta’ persuni li joriġinaw mir-Repubblika tal-Poplu taċ-Ċina għall-perjodu ta’ applikazzjoni ta’ miżuri definittivi (ĠU L, 2026/328, 10.2.2026, ELI: http://data.europa.eu/eli/dec_impl/2026/328/oj).

ANNESS

Jiżdiedu l-Annessi II u III ġodda mar-Regolament ta’ Implimentazzjoni (UE) 2024/2754 kif ġej:

“ANNESS II

L-elementi li ġejjin għandhom ikunu indikati fid-Dikjarazzjoni ta’ Impenn li tkopri l-bejgħ tal-Kumpanija lill-Unjoni Ewropea ta’ oġġetti, li huma soġġetti għall-Impenn:

(1)	L-intestatura “DIKJARAZZJONI TA’ IMPENN LI TKOPRI L-OĠĠETTI SOĠĠETTI GĦAL IMPENN”;

(2)	L-isem tal-Kumpanija li toħroġ id-Dikjarazzjoni ta’ Impenn;

(3)	In-numru tal-Fattura Kummerċjali li miegħu hija relatata d-Dikjarazzjoni ta’ Impenn;

(4)	Id-data tal-ħruġ tal-Fattura Kummerċjali li magħha hija relatata d-Dikjarazzjoni ta’ Impenn;

(5)	Il-kodiċi addizzjonali TARIC li taħtu l-prodotti koperti mid-Dikjarazzjoni tal-Impenn għandhom jiġu rilaxxati mid-dwana fil-fruntiera tal-Unjoni Ewropea (kif speċifikat fir-Regolament li jimponi d-dazju kumpensatorju definittiv);

(6)

Id-deskrizzjoni preċiża f’lingwaġġ sempliċi tal-oġġetti u:

—	il-kodiċi TARIC,

—	il-kwantità (li għandha tingħata f’għadd ta’ vetturi);

(7)	Isem il-kumpanija li taġixxi ta’ importatur li lilha tinħareġ direttament il-fattura mill-Kumpanija;

(8)

Isem l-uffiċjal tal-Kumpanija li jkun ħareġ il-fattura d-Dikjarazzjoni ta’ Impenn u d-dikjarazzjoni ffirmata li ġejja:

“Jiena, hawn taħt iffirmat/a, niċċertifika li l-bejgħ għal esportazzjoni diretta lejn l-Unjoni Ewropea tal-oġġetti koperti b’din id-Dikjarazzjoni ta’ Impenn qiegħed isir fl-ambitu u taħt il-kundizzjonijiet tal-Impenn offrut minn [Kumpanija], u aċċettat mill-Kummissjoni Ewropea permezz [tar-Regolament] [tad-Deċiżjoni]. Jiena niddikjara li l-informazzjoni mogħtija f’din id-Dikjarazzjoni ta’ Impenn hija sħiħa u korretta.”

Barra minn hekk, id-Dikjarazzjoni ta’ Impenn għandha tkun akkumpanjata mid-dettalji rilevanti tat-talba għat-traċċar tal-kunsinna kif maħruġa taħt il-pjattaforma TRON mid-DĠ KUMMERĊ U SIGURTÀ EKONOMIKA tal-Kummissjoni Ewropea.

ANNESS III

L-elementi li ġejjin għandhom jiġu indikati fil-Fattura Kummerċjali li takkumpanja l-bejgħ tal-Kumpanija fl-Unjoni Ewropea ta’ oġġetti, li huma soġġetti għal dazji kumpensatorji:

(1)	L-intestatura “FATTURA KUMMERĊJALI LI TAKKUMPANJA OĠĠETTI SOĠĠETTI GĦAL DAZJI KUMPENSATORJI”;

(2)	Isem il-Kumpanija li toħroġ il-Fattura Kummerċjali u l-isem tal-Kumpanija li timmanifattura l-merkanzija;

(3)	In-Numru tal-Fattura Kummerċjali;

(4)	Id-data tal-ħruġ tal-Fattura Kummerċjali;

(5)	Il-kodiċi addizzjonali TARIC li skontu l-oġġetti fil-fattura għandhom jiġu approvati mid-dwana fil-fruntieri tal-Unjoni Ewropea;

(6)

Id-deskrizzjoni preċiża f’lingwaġġ sempliċi tal-oġġetti u:

speċifikazzjonijiet tekniċi tan-numru tal-kodiċi tal-prodott tal-kumpanija (CPC),

in-numru tal-kodiċi tal-prodott tal-kumpanija (CPC),

il-kodiċi TARIC,

il-kwantità (li għandha tingħata f’għadd ta’ vetturi);

(7)

Id-deskrizzjoni tat-termini tal-bejgħ, fosthom:

il-prezz totali,

it-termini tal-pagament applikabbli,

it-termini tal-konsenja applikabbli,

ir-roħs u l-iskonti totali;

(8)	Isem u l-firma tal-uffiċjal tal-Kumpanija li ħareġ il-Fattura Kummerċjali.

”