REGOLAMENT DELEGAT TAL-KUMMISSJONI (UE) 2026/324

tal-21 ta’ Novembru 2025

li jissupplimenta lir-Regolament (UE) 2019/1700 tal-Parlament Ewropew u tal-Kunsill billi jispeċifika l-għadd u t-titlu tal-varjabbli għas-suġġett ad hoc għall-2027 “Saħħa u benesseri mentali” fid-dominju tal-introjtu u l-kundizzjonijiet tal-għajxien

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2019/1700 tal-Parlament Ewropew u tal-Kunsill tal-10 ta’ Ottubru 2019 li jistabbilixxi qafas komuni għall-istatistika Ewropea relatata ma’ persuni u unitajiet domestiċi, abbażi ta’ data fuq livell individwali miġbura minn kampjuni, li jemenda r-Regolamenti (KE) Nru 808/2004, (KE) Nru 452/2008 u (KE) Nru 1338/2008 tal-Parlament Ewropew u tal-Kunsill, u li jħassar ir-Regolament (KE) Nru 1177/2003 tal-Parlament Ewropew u tal-Kunsill u r-Regolament tal-Kunsill (KE) Nru 577/98 (1), u b’mod partikolari l-Artikolu 6(1) tiegħu,

Billi:

(1)

Id-dominju tal-introjtu u l-kundizzjonijiet tal-għajxien jipprovdi l-informazzjoni meħtieġa għas-Semestru Ewropew (2) u l-Pilastru Ewropew tad-Drittijiet Soċjali (3), b’mod partikolari dwar id-distribuzzjoni tal-introjtu, il-faqar u l-esklużjoni soċjali. Jipprovdi wkoll informazzjoni għal diversi politiki oħra tal-Unjoni relatati mal-kundizzjonijiet tal-għajxien u l-faqar. Is-suġġett ad hoc“Saħħa u benesseri mentali” li jrid jinġabar fl-2027 għandu importanza ewlenija, fid-dawl tal-implimentazzjoni tal-inizjattiva tal-Unjoni Ewropea tas-Saħħa (4) li tirrikonoxxi s-saħħa mentali bħala parti integrali mis-saħħa. Jenħtieġ li jiġu żviluppati statistika u indikaturi ġodda, u gradwalment jiġu inkorporati fit-tfassil tal-politika biex dawn ikunu jirriflettu ċerti kwistjonijiet bħal inugwaljanzi, is-saħħa fiżika u s-saħħa mentali, u biex ikunu jivvalutaw l-impatt tal-azzjonijiet u l-finanzjament.

(2)	L-għadd tal-varjabbli li jridu jinġabru ma jaqbiżx b’aktar minn 5 % lill-għadd tal-varjabbli miġbura għad-dominju tal-introjtu u l-kundizzjonijiet tal-għajxien, fil-mument meta daħal fis-seħħ ir-Regolament (UE) 2019/1700,

ADOTTAT DAN IR-REGOLAMENT:

Artikolu 1

L-għadd u t-titlu tal-varjabbli fid-dominju tal-introjtu u l-kundizzjonijiet tal-għajxien fir-rigward tas-suġġett ad hoc tal-2027 “Saħħa u benesseri mentali” għandhom ikunu kif stabbilit fl-Anness.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, il-21 ta’ Novembru 2025.

Għall-Kummissjoni

Il-President

Ursula VON DER LEYEN

(1) ĠU L 261I, 14.10.2019, p. 1, ELI: http://data.europa.eu/eli/reg/2019/1700/oj.

(2) Is-Semestru Ewropew hu l-qafas tal-Unjoni Ewropea għall-koordinazzjoni u s-sorveljanza tal-politiki ekonomiċi u soċjali.

(3) Il-Parlament Ewropew, il-Kunsill u l-Kummissjoni pproklamaw il-Pilastru Ewropew tad-Drittijiet Soċjali fl-2017 waqt is-Summit ta’ Gothenburg. Il-Pilastru jistabbilixxi 20 prinċipju ewlieni li jiggwidawna lejn Ewropa soċjali b’saħħitha li tkun ġusta, inklużiva u mimlija opportunitajiet fis-seklu 21.

(4) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “L-Unjoni Ewropea tas-Saħħa: naġixxu flimkien għas-saħħa tan-nies” (COM(2024) 206 final).

ANNESS

L-għadd u t-titlu tal-varjabbli għas-suġġett ad hoc tal-2027 “Saħħa u benesseri mentali” fid-dominju tal-introjtu u l-kundizzjonijiet tal-għajxien:

Modulu	Suġġett dettaljat	Identifikatur tal-varjabbli	Isem il-varjabbli
Saħħa u benesseri mentali	Saħħa u benesseri mentali (21 varjabbli miġbura (2 fakultattivi, 19 obbligatorji), varjabbli tekniku wieħed (fakultattiv)	PMH020	Ħassejt dwejjaq, dipressjoni jew anzjetà (għal imqar ġimagħtejn) fl-aħħar 12-il xahar
		PMH030	L-impatt tas-saħħa u l-benesseri mentali fuq l-attivitajiet soċjali
		PMH040	L-impatt tas-saħħa u benesseri mentali fuq l-abbiltà għax-xogħol
		PMH050	Ir-raġuni ewlenija għalfejn ħassejt dwejjaq, dipressjoni jew anzjetà
		PMH060	Konsulta ma’ speċjalist/professjonist tas-saħħa mentali
		PMH070	Ħtiġijiet mhux issodisfati għal konsulta ma’ speċjalist/professjonist tas-saħħa mentali
		PMH080	Ir-raġuni ewlenija għall-ħtiġijiet mhux issodisfati għal konsulta ma’ speċjalist/professjonist tas-saħħa mentali
		PMH090	Possibbiltà li tiddiskuti problemi personali
		PMH095	Edukazzjoni u taħriġ formali fl-aħħar 12-il xahar (Fakultattiva)
		PMH100	Relazzjonijiet tajbin fl-edukazzjoni u t-taħriġ mal-pari, l-għalliema u l-letturi
		PMH105	Xogħol fl-aħħar 12-il xahar (Fakultattiva)
		PMH110	Relazzjonijiet tax-xogħol tajbin mal-kollegi, il-meniġers jew it-tim
		PMH120	Bilanċ bejn ix-xogħol u l-ħajja privata
		PMH130	Assenza mix-xogħol minħabba dwejjaq, dipressjoni jew anzjetà
		PMH140	Frekwenza tal-isport
		PMH150	Frekwenza ta’ diffikultajiet tal-irqad
		PMH160	Użu tal-midja soċjali
		PMH170	Esperjenza ta’ vjolenza diġitali
		PMH180	Piż tax-xogħol tad-dar
		PMH190	Piż tar-responsabbiltajiet tat-tmexxija ta’ kuljum
		PMH200	Tħoss diskriminazzjoni kontrik
		PMH210	Piżijiet tas-saħħa u l-benesseri mentali (Fakultattiva)