(1)

Ir-Regolament (KE) Nru 853/2004 jistabbilixxi regoli speċifiċi ta’ iġjene għall-ikel li joriġina mill-annimali għall-operaturi tan-negozju tal-ikel. B’mod partikolari, is-Sezzjoni I, il-Kapitolu VI, tal-Anness III tar-Regolament (KE) Nru 853/2004, tistabbilixxi l-ħtiġijiet għall-użu għall-konsum mill-bniedem tal-laħam tal-ungulati domestiċi li nqatlu b’emerġenza barra l-biċċerija. Is-Sezzjoni I, il-Kapitolu VI, il-punt 1 tal-Anness III tar-Regolament (KE) Nru 853/2004 tirrikjedi li huma biss l-annimali li mill-bqija jkunu b’saħħithom li jkunu sofrew disgrazzja illi żammithom milli jittieħdu fil-biċċerija għal raġunijiet ta’ kura tal-annimal li jistgħu jkunu suġġetti għall-qtil b’emerġenza.

(2)

L-esperjenza miksuba mill-Kummissjoni wriet li xi awtoritajiet kompetenti tal-Istati Membri jinterpretaw dawn il-ħtiġijiet b’mod aktar strett minn oħrajn, u dan iwassal għal implimentazzjoni li ma tkunx uniformi ta’ dawn il-ħtiġijiet fl-Unjoni. B’mod partikolari, l-“annimali li mill-bqija jkunu b’saħħithom” u “disgrazzja” mhumiex definiti jew deskritti fir-regoli tal-Unjoni li jwasslu għal differenza problematika fl-interpretazzjoni mill-Istati Membri. Pereżempju, l-Istati Membri li japplikaw approċċ strett jinterpretaw l-“annimali li mill-bqija jkunu b’saħħithom” bħala annimali li ma jkollhomx infezzjoni ġenerali, bl-esklużjoni ta’ mard metaboliku emerġenti bħall-ipokalċimija mill-qtil b’emerġenza, jew jinterpretaw “disgrazzja” bħala waħda fiżika biss (eż. riġel miksur). Stati Membri oħra japplikaw interpretazzjoni usa’, filwaqt li jqisu kwalunkwe disgrazzja, li ma tikkawżax riskju għas-saħħa pubblika għal-laħam bħala permessa għall-qtil b’emerġenza u li tirriżulta fl-użu tal-laħam għall-konsum mill-bniedem. Għalhekk huwa meħtieġ li tiġi emendata s-Sezzjoni I, il-Kapitolu VI, tal-Anness III tar-Regolament (KE) Nru 853/2004 biex tiġi żgurata applikazzjoni armonizzata tal-użu tal-laħam mill-qtil b’emerġenza għall-konsum mill-bniedem, filwaqt li jiġi żgurat livell għoli ta’ protezzjoni tal-konsumatur fir-rigward tas-sikurezza tal-ikel.

(3)

Barra minn hekk, il-Kapitolu I tal-Anness I tar-Regolament tal-Kunsill (KE) Nru 1/2005 (2) jistabbilixxi r-regoli tekniċi għall-adegwatezza għat-trasport tal-annimali u, f’ċerti każijiet, jipprojbixxi t-trasport tal-ungulati domestiċi ħajjin lejn il-biċċerija. F’dawk il-każijiet meta r-regoli relatati mal-qtil b’emerġenza fl-Anness III tar-Regolament (KE) Nru 853/2004 ma jippermettux l-użu tal-laħam, l-uniku mod biex tiġi evitata t-tbatija matul it-trasport huwa billi l-annimal jiġi ewtanizzat eż. billi jinqatel mingħajr ma jkun hemm konformità mal-ħtiġijiet fil-Kapitolu IV tas-Sezzjoni I tal-Anness III tar-Regolament (KE) Nru 853/2004. Dan jirriżulta fil-klassifikazzjoni ta’ dan il-laħam bħala mhux tajjeb għall-konsum mill-bniedem, għalkemm jista’ ma jkunx ta’ riskju għas-saħħa pubblika. Dan jikkawża telf ekonomiku bla bżonn u jwassal għal ħela filwaqt li l-laħam tal-annimal jista’ ma jirrappreżentax riskju għas-saħħa pubblika. Meta l-laħam tagħhom ikun b’xi mod ieħor tajjeb għall-konsum mill-bniedem, huwa fi qbil mal-objettivi tar-Regolament (KE) Nru 853/2004 li l-kundizzjonijiet għall-possibbiltà li jintuża l-laħam tal-annimali li jkunu nqatlu b’emerġenza jiġu allinjati ma’ dawk li jipprojbixxu t-trasport tal-annimali fl-Anness I, il-Kapitolu I tar-Regolament (KE) Nru 1/2005.

(4)

L-Artikoli 43 u 45 tar-Regolament ta’ Implimentazzjoni tal-Kummissjoni (UE) 2019/627 (3) jistabbilixxu l-miżuri li għandhom jittieħdu f’każijiet ta’ nuqqas ta’ konformità ma’ ċerti ħtiġijiet għall-annimali ħajjin, u għal-laħam frisk. Il-konformità ma’ dawn il-ħtiġijiet tiggarantixxi li l-laħam ikun tajjeb għall-konsum mill-bniedem inkluż f’każ tal-annimali li jkunu nqatlu b’emerġenza. L-ispezzjoni ante-mortem, kif definita fl-Artikolu 17(c) tar-Regolament (UE) 2017/625 tal-Parlament Ewropew u tal-Kunsill (4), trid titwettaq qabel kull qatla u tipprovdi indikazzjoni dwar jekk l-annimali ħajjin u l-laħam frisk humiex mistennija li jikkonformaw ma’ dawn il-ħtiġijiet.

(5)

Jekk it-trasport tal-annimali lejn il-biċċerija ma jkunx possibbli minħabba raġunijiet tal-benesseri tal-annimali u r-riżultati tal-ispezzjoni ante-mortem tal-annimali jitqiesu bħala sodisfaċenti, jenħtieġ li l-laħam ta’ dawn l-annimali li jkunu nqatlu b’emerġenza jitħalla għall-konsum mill-bniedem b’ċerti kundizzjonijiet. Għaldaqstant jenħtieġ li s-Sezzjoni I, il-Kapitolu VI tal-Anness III tar-Regolament (KE) Nru 853/2004 tiġi emendata kif xieraq,

“1.

Annimal irid ma jkunx tajjeb għat-trasport lejn biċċerija skont ir-regoli tekniċi dwar l-adegwatezza għat-trasport stabbiliti fil-Punt 2 tal-Kapitolu I tal-Anness I tar-Regolament tal-Kunsill (KE) Nru 1/2005 (*1).

2.

Il-veterinarju uffiċjali jrid iwettaq spezzjoni ante-mortem tal-annimal, waqt li jivverifika b’mod partikolari l-konformità mal-ħtiġijiet għal: