(1)

L-Artikolu 119 tar-Regolament (UE) 2021/2115 jistabbilixxi r-regoli dwar it-tressiq u l-approvazzjoni tal-emendi tal-Pjanijiet Strateġiċi tal-PAK.

(2)

Ir-Regolament Delegat tal-Kummissjoni (UE) 2023/370 (2) jissupplimenta r-Regolament (UE) 2021/2115 fir-rigward ta’ proċeduri, limiti ta’ żmien għall-preżentazzjoni mill-Istati Membri ta’ talbiet għal emendi tal-Pjanijiet Strateġiċi tal-PAK, u każijiet oħra li l-għadd massimu ta’ emendi tal-Pjanijiet Strateġiċi tal-PAK ma japplikax għalihom.

(3)

Ir-Regolament (UE) 2025/2649 tal-Parlament Ewropew u tal-Kunsill (3) jemenda l-Artikolu 119 tar-Regolament (UE) 2021/2115 fir-rigward tal-proċeduri għall-emendi tal-Pjanijiet Strateġiċi tal-PAK. Huma biss l-emendi strateġiċi definiti fl-Artikolu 119(2) tar-Regolament (UE) 2021/2115 li jeħtieġu l-approvazzjoni mill-Kummissjoni. F’konformità mal-Artikolu 119(9) tar-Regolament (UE) 2021/2115 kif emendat bir-Regolament (UE) 2025/2649 emendi oħra tal-Pjanijiet Strateġiċi tal-PAK għandhom jiġu nnotifikati lill-Kummissjoni sa meta l-Istati Membri jibdew japplikawhom. Il-Kummissjoni għandha toġġezzjona l-emendi notifikati fi żmien 30 jum xogħol min-notifika tagħhom jekk issib li l-emendi mhumiex kompatibbli mar-Regolament (UE) 2021/2115 u mar-Regolament (UE) 2021/2116 tal-Parlament Ewropew u tal-Kunsill (4), kif ukoll mal-atti delegati u ta’ implimentazzjoni adottati skont dawk ir-Regolamenti.

(4)

Sabiex l-Istati Membri jkunu jistgħu jressqu t-talbiet għall-emendi strateġiċi tal-Pjanijiet Strateġiċi tal-PAK tagħhom, jeħtieġ li jiġu stabbiliti l-proċeduri u l-limiti ta’ żmien għat-tressiq tat-talbiet għall-emendi strateġiċi.

(5)

Sabiex il-Kummissjoni tivvaluta b’mod korrett it-talba għal emenda strateġika tal-Pjan Strateġiku tal-PAK, minbarra l-informazzjoni stabbilita fl-Artikolu 119(2) tar-Regolament (UE) 2021/2115 u għal kull emenda strateġika tal-Pjan Strateġiku tal-PAK, jenħtieġ li t-talba jkun fiha ir-raġunijiet għall-emenda, il-kontenut tal-emenda, u l-effetti mistennija tal-emenda.

(6)

Sabiex tiġi żgurata valutazzjoni bir-reqqa tal-emendi strateġiċi tal-Pjan strateġiku tal-PAK imressqa għall-approvazzjoni mill-Kummissjoni, u b’mod partikolari tal-pjan finanzjarju emendat, u biex jiġi evitat ir-riskju ta’ żbalji minħabba d-diversi verżjonijiet tal-Pjan Strateġiku tal-PAK li jkunu għaddejjin minn valutazzjoni parallela, jenħtieġ li l-Istat Membru kull darba jressaq talba waħda biss għal emenda strateġika permezz tas-sistema ta’ skambju elettroniku tad-data “SFC2021”. Jenħtieġ li l-Istat Membru jressaq biss talba ġdida għal emenda strateġika jew ladarba jkun irtira t-talba ta’ qabel jew meta l-Kummissjoni tkun innotifikat lill-Istat Membru bid-deċiżjoni tagħha dwar it-talba għal emenda strateġika mressqa qabel. Dan huwa meħtieġ b’mod partikolari biex tiġi żgurata ċ-ċertezza legali għall-benefiċjarji fir-rigward tal-verżjoni applikabbli tal-Pjan Strateġiku tal-PAK u għar-rabta korretta tal-pagamenti mal-pjan finanzjarju emendat applikabbli l-ġdid.

(7)

Jeħtieġ li jiġu stabbiliti r-regoli dettaljati dwar in-notifiki lill-Kummissjoni tal-emendi tal-Pjanijiet Strateġiċi tal-PAK għajr dawk imsemmija fl-Artikolu 119(2) tar-Regolament (UE) 2021/2115, li jissupplimentaw ir-regoli stabbiliti fl-Artikolu 119(9) ta’ dak ir-Regolament.

(8)

Sabiex jiġi żgurat trattament bla xkiel tat-talbiet għall-emendi strateġiċi u tan-notifiki ta’ emendi oħra tal-Pjanijiet Strateġiċi tal-PAK, jenħtieġ li jiġu stabbiliti r-regoli dwar it-trattament tat-talbiet imressqa fl-istess ħin għal emenda strateġika u tan-notifiki ta’ emendi oħra. Sabiex jitħaffef u jiġi aċċellerat it-trattament ta’ emendi oħra tal-Pjanijiet Strateġiċi tal-PAK, jenħtieġ li l-Istat Membru jkollu l-possibbiltà li jinkludi l-emendi l-oħra nnotifikati li l-Kummissjoni oġġezzjonat għalihom f’konformità mal-Artikolu 119(9), it-tielet subparagrafu, tar-Regolament (UE) 2021/2115 f’talba li tkun għaddejja għal emenda strateġika. Sabiex jiġi żgurat li l-Kummissjoni jkollha biżżejjed żmien biex twettaq valutazzjoni bir-reqqa tat-talba għal emenda strateġika li magħha jiżdiedu dawn l-emendi notifikati l-oħra li l-Kummissjoni tkun oġġezzjonat għalihom, jenħtieġ li l-Istat Membru jkun meħtieġ jgħarraf lill-Kummissjoni fi żmien jumejn xogħol minn meta jirċievi l-oġġezzjonijiet tal-Kummissjoni dwar deċiżjoni biex jiżdiedu dawn l-emendi notifikati l-oħra ma’ talba għal emenda strateġika li tkun tressqet fl-istess ħin jew wara n-notifika ta’ dawk l-emendi l-oħra lill-Kummissjoni. Jeħtieġ ukoll li jiġu stabbiliti r-regoli dwar l-osservazzjonijiet tal-Kummissjoni f’każ li emendi oħra li l-Kummissjoni tkun oġġezzjonat għalihom qabel kellhom jiżdiedu ma’ talba li tkun għaddejja għal emenda strateġika. Barra minn hekk, jenħtieġ li jiġu stabbiliti r-regoli dwar il-kalkolu tal-limiti ta’ żmien għall-azzjoni mill-Kummissjoni fir-rigward tat-talbiet għal emenda strateġika li magħhom jiżdiedu emendi oħra li l-Kummissjoni tkun oġġezzjonat għalihom.

(9)

Sabiex tiġi żgurata ċ-ċertezza legali, biex jitħarsu d-drittijiet tal-bdiewa u ta’ benefiċjarji oħra u jiġi ggarantit funzjonament bla xkiel u effiċjenti tal-interventi kollha, jenħtieġ li l-Istati Membri jressqu it-talbiet tagħhom għal emenda strateġika tal-Pjan Strateġiku tal-PAK u tan-notifiki tagħhom ta’ emendi oħra tal-Pjanijiet Strateġiċi tal-PAK sabiex ikun hemm biżżejjed żmien għall-valutazzjoni tagħhom mill-Kummissjoni filwaqt li jiġi żgurat li jidħlu fis-seħħ, b’mod partikolari fir-rigward tal-bdiewa u benefiċjarji oħra, f’konformità mar-rekwiżiti stabbiliti fl-Artikolu 119(8) tar-Regolament (UE) 2021/2115.

(10)

Sabiex jiġu żgurati l-ipproċessar u d-dħul fis-seħħ f’waqthom tal-emendi tal-Pjanijiet Strateġiċi tal-PAK qabel tmiem il-perjodu għall-eliġibbiltà tan-nefqa, huwa meħtieġ li jiġu stabbiliti l-limiti ta’ żmien għat-tressiq tat-talbiet għall-emendi strateġiċi u n-notifiki ta’ emendi oħra tal-Pjanijiet Strateġiċi tal-PAK relatati mat-tipi ta’ interventi msemmija fl-Artikolu 42 tar-Regolament (UE) 2021/2115 u relatati mat-tipi ta’ interventi msemmija fil-Kapitolu IV ta’ dak ir-Regolament.

(11)

Jeħtieġ li jiġi stabbilit limitu ta’ żmien għat-tressiq tat-talbiet għal emenda strateġika tal-Pjan Strateġiku tal-PAK relatata mat-trasferiment tal-allokazzjonijiet finanzjarji skont l-Artikolu 17(5), l-Artikolu 88(7) u l-Artikolu 103(1) u (6) tar-Regolament (UE) 2021/2115, sabiex tiġi żgurata l-implimentazzjoni f’waqtha ta’ dawk it-trasferimenti tal-allokazzjonijiet finanzjarji kif ukoll l-implimentazzjoni tal-interventi ffinanzjati minn dawk l-allokazzjonijiet finanzjarji.

(12)

Sabiex jiġi żgurat skambju sigur u effiċjenti tad-dokumenti bejn l-Istati Membri u l-Kummissjoni rigward it-talbiet għall-emendi strateġiċi u n-notifiki ta’ emendi oħra tal-Pjanijiet Strateġiċi tal-PAK, jenħtieġ li s-sistema ta’ skambju elettroniku tad-data “SFC2021” imsemmija fl-Artikolu 3 tar-Regolament ta’ Implimentazzjoni tal-Kummissjoni (UE) 2021/2289 (5) tintuża għal dawk l-iskambji mill-Kummissjoni u mill-Istati Membri.

(13)

Sabiex tiġi żgurata l-flessibbiltà għall-Istati Membri meta l-Pjanijiet Strateġiċi tal-PAK jeħtieġu jiġu emendati minħabba l-miżuri ta’ emerġenza li jindirizzaw diżastri naturali, avvenimenti katastrofiċi jew avvenimenti klimatiċi avversi rikonoxxuti formalment bħala tali mill-awtorità pubblika nazzjonali kompetenti, il-bidliet minħabba bidla sinifikanti u f’daqqa tal-kundizzjonijiet soċjoekonomiċi tal-Istat Membru jew tar-reġjun, jew il-bidliet minħabba l-miżuri eċċezzjonali kontra d-disturbi fis-suq, il-mard tal-annimali u l-pesti tal-pjanti u biex dawk it-talbiet għall-emenda strateġika tal-Pjan Strateġiku tal-PAK jiġu pproċessati b’mod effettiv u f’waqtu, huwa meħtieġ li jiġu definiti l-każijiet li għalihom ma japplikax l-għadd massimu ta’ talbiet għal emenda strateġika tal-Pjan Strateġiku tal-PAK stabbilit fl-Artikolu 119(7) tar-Regolament (UE) 2021/2115. Jenħtieġ li dawn il-każijiet jinkludu l-bidliet mhux previsti tal-qafas legali tal-Unjoni, u, fejn meħtieġ, id-diżimpenji awtomatiċi, kif ukoll il-modifiki tal-istrumenti finanzjarji li joperaw f’ambjent tas-suq dinamiku fejn jistgħu jkunu meħtieġa bidliet regolari tal-implimentazzjoni xierqa ta’ dawn l-istrumenti finanzjarji. Barra minn hekk, jenħtieġ li t-talbiet għall-emendi strateġiċi li jkun fihom biss emendi oħra nnotifikati li l-Kummissjoni oġġezzjonat għalihom f’konformità mal-Artikolu 119(9) tar-Regolament (UE) 2021/2115 ma jgħoddux għall-għadd massimu tat-talbiet għal emenda strateġika tal-Pjan Strateġiku tal-PAK stabbilit fl-Artikolu 119(7) ta’ dak ir-Regolament.

(14)

Għalhekk, jenħtieġ li r-Regolament Delegat (UE) 2023/370 jitħassar. Sabiex tiġi żgurata l-implimentazzjoni effettiva tal-Artikolu 3 tar-Regolament (UE) 2025/2649, li jistabbilixxi d-dispożizzjonijiet tranżitorji dwar it-talbiet għall-emenda tal-Pjanijiet Strateġiċi tal-PAK imressqa skont l-Artikolu 119 tar-Regolament (UE) 2021/2115 kif applikabbli qabel id-dħul fis-seħħ tar-Regolament (UE) 2025/2649, jenħtieġ li dak ir-Regolament Delegat jissokta japplika għat-talbiet għall-emenda tal-Pjan Strateġiku tal-PAK imressqa mill-Istati Membri lill-Kummissjoni qabel l-1 ta’ Jannar 2026.

(15)

Jenħtieġ li tiġi stabbilita dispożizzjoni tranżizzjonali biex jiġi żgurat li t-talbiet għall-emenda strateġika tal-Pjan Strateġiku tal-PAK ikunu jistgħu jitressqu biss ladarba tiġi rtirata talba għal emenda mressqa qabel l-1 ta’ Jannar 2026 jew wara li l-Kummissjoni tinnotifika lill-Istat Membru bid-deċiżjoni tagħha dwar dik it-talba għall-emenda.

(16)

Sabiex l-Istati Membri jkunu jistgħu jressqu t-talbiet għall-emendi strateġiċi u n-notifiki ta’ emendi oħra tal-Pjanijiet Strateġiċi tal-PAK li jkun fihom l-informazzjoni kollha meħtieġa malajr kemm jista’ jkun wara d-dħul fis-seħħ tar-Regolament (UE) 2025/2649 u biex il-Kummissjoni tkun tista’ tivvaluta u tipproċessa dawn it-talbiet għall-emendi strateġiċi u n-notifiki ta’ emendi oħra b’mod effettiv fil-limiti ta’ żmien stabbiliti fl-Artikolu 119 tar-Regolament (UE) 2021/2115, jenħtieġ li r-regoli dwar it-tressiq tan-notifiki u t-talbiet għall-emendi strateġiċi tal-Pjanijiet Strateġiċi tal-PAK, il-limiti ta’ żmien għat-tressiq tat-talbiet għall-emendi strateġiċi u n-notifika ta’ emendi oħra tal-Pjanijiet Strateġiċi tal-PAK kif ukoll ir-regoli dwar każijiet ulterjuri ta’ talbiet għal emenda strateġika tal-Pjan Strateġiku tal-PAK li ma jgħoddux għall-għadd massimu tat-talbiet għall-emendi strateġiċi li jinsabu f’dan ir-Regolament, jidħlu fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(17)

Sabiex l-Istati Membri jkunu jistgħu jibdew jemendaw il-Pjanijiet Strateġiċi tal-PAK tagħhom fi qbil mal-Artikolu 119 tar-Regolament (UE) 2021/2115, kif emendat bl-Artikolu 1, il-punt (28) tar-Regolament (UE) 2025/2649, is-sistema ta’ skambju elettroniku tad-data “SFC2021” imsemmija fl-Artikolu 3 tar-Regolament ta’ Implimentazzjoni (UE) 2021/2289 għandha titfassal mill-ġdid. Sabiex jiġi żgurat skambju sigur u effiċjenti tad-dokumenti bejn l-Istati Membri u l-Kummissjoni rigward it-talbiet għall-emendi strateġiċi u n-notifiki ta’ emendi oħra tal-Pjanijiet Strateġiċi tal-PAK, jenħtieġ li l-Istati Membri jkunu jistgħu jibdew jużaw il-verżjoni l-ġdida tas-sistema tal-iskambju elettroniku tad-data “SFC2021” mill-1 ta’ Jannar 2026, li hija d-data tad-dħul fis-seħħ tar-Regolament (UE) 2025/2649. Meta jitqies li dan ir-Regolament jistabbilixxi regoli dwar il-proċedura u dwar il-limiti ta’ żmien għat-talbiet għal emenda strateġika tal-Pjanijiet Strateġiċi tal-PAK u n-notifiki ta’ emendi oħra tal-Pjanijiet Strateġiċi tal-PAK, li għalihom għandha tintuża s-sistema l-ġdida ta’ skambju elettroniku tad-data “SFC2021”, jenħtieġ li dan ir-Regolament japplika mill-istess data bħad-data tad-dħul fis-seħħ tar-Regolament (UE) 2025/2649, b’mod partikolari l-1 ta’ Jannar 2026, biex jiġu żgurati tħejjija u tressiq bla xkiel u f’waqthom tal-emendi strateġiċi u n-notifika ta’ emendi oħra permezz tal-“SFC 2021” u biex tiġi żgurata t-trasparenza lejn il-bdiewa, il-partijiet ikkonċernati u l-pubbliku,

(a)

il-proċeduri għat-tressiq tat-talbiet għall-emendi strateġiċi tal-Pjanijiet Strateġiċi tal-PAK u l-proċeduri tan-notifiki ta’ emendi oħra tal-Pjanijiet Strateġiċi tal-PAK;

(b)

il-limiti taż-żmien għat-tressiq tat-talbiet għall-emendi strateġiċi tal-Pjanijiet Strateġiċi tal-PAK u għall-proċeduri tan-notifiki ta’ emendi oħra tal-Pjanijiet Strateġiċi tal-PAK;

(c)

każijiet oħra li għalihom ma japplikax l-għadd massimu ta’ talbiet għall-emendi strateġiċi tal-Pjanijiet Strateġiċi tal-PAK imsemmija fl-Artikolu 119(7) tar-Regolament (UE) 2021/2115.

(a)

it-talbiet għal emenda strateġika kif imsemmi fl-Artikolu 119(2) tar-Regolament (UE) 2021/2115;

(b)

in-notifiki ta’ emendi oħra kif imsemmi fl-Artikolu 119(9) tar-Regolament (UE) 2021/2115;

(c)

il-korrezzjonijiet ta’ żbalji klerikali jew żbalji ovvji jew korrezzjonijiet ta’ natura purament editorjali msemmija fl-Artikolu 119(12) tar-Regolament (UE) 2021/2115.