(1)

Ir-Regolament (UE) 2025/2649 tal-Parlament Ewropew u tal-Kunsill (2) emenda r-Regolament (UE) 2021/2115, fost l-oħrajn, fir-rigward ta’ ċerti rekwiżiti relatati mad-definizzjonijiet, l-istandards tal-Kundizzjoni Agrikola u Ambjentali Tajba (“KAAT”) u ċerti tipi ta’ intervent, u introduċa tip ġdid ta’ intervent taħt l-iżvilupp rurali. Dak ir-Regolament emenda wkoll ir-Regolament (UE) 2021/2116 tal-Parlament Ewropew u tal-Kunsill (3), b’mod partikolari fir-rigward ta’ ċerti rekwiżiti relatati mas-sistema ta’ kontroll għall-kundizzjonalità.

(2)

Ir-Regolament ta’ Implimentazzjoni tal-Kummissjoni (UE) 2021/2289 (4) jistabbilixxi regoli dettaljati dwar il-preżentazzjoni tal-kontenut tal-Pjanijiet Strateġiċi tal-PAK.

(3)

L-Artikolu 31(5) u l-Artikolu 70(3) tar-Regolament (UE) 2021/2115, kif emendat bir-Regolament (UE) 2025/2649, jippermettu lill-Istati Membri jipprovdu pagamenti għal impenji li jikkonformaw mal-istandards 2 u 9 tal-KAAT peress li ma għadhomx jirrikjedu li dawk l-impenji jmorru lil hinn minn dawk l-istandards. Għalhekk, għal raġunijiet ta’ kompletezza u komparabbiltà, huwa xieraq li l-Istati Membri, meta jiddeċiedu li jipprovdu pagamenti għal impenji li jikkonformaw mar-rekwiżiti ta’ dawk l-istandards tal-KAAT, ikunu meħtieġa jispeċifikaw fil-Pjanijiet Strateġiċi tal-PAK tagħhom għal liema rekwiżiti jistgħu jipprovdu pagamenti. Barra minn hekk, peress li dawk l-Artikoli, kif emendati bir-Regolament (UE) 2025/2649, ma għadhomx jipprevedu li għandu jingħata appoġġ għal rekwiżiti ġodda tad-dritt nazzjonali li jmorru lil hinn mir-rekwiżiti tad-dritt tal-Unjoni għal perjodu massimu ta’ 24 xahar, jenħtieġ li dawk l-elementi jitħassru wkoll mill-Anness I tar-Regolament ta’ Implimentazzjoni (UE) 2021/2289.

(4)

L-Artikolu 4(3) tar-Regolament (UE) 2021/2115, kif emendat bir-Regolament (UE) 2025/2649, jippermetti lill-Istati Membri jestendu, bħala parti mid-definizzjoni ta’ bur permanenti, il-perjodu li matulu żona għandha tkun taħt użu kontinwu biex tkabbar il-ħaxix jew foraġġ erbaċew ieħor minn ħames snin sa seba’ snin. Dan jippermetti wkoll lill-Istati Membri jiddeċiedu li ż-żoni użati għat-tkabbir ta’ ħaxix jew foraġġ erbaċew ieħor, li kienu kklassifikati bħala raba’ li jinħadem fl-1 ta’ Jannar 2026 u li ma jkunux inħartu, ġew mgħassqa, jew inżergħu mill-ġdid b’ħaxix differenti għal perjodu ta’ ħames jew seba’ snin, ma għandhomx jiġu kklassifikati bħala bur permanenti. Sabiex jiġi żgurat li l-Pjanijiet Strateġiċi tal-PAK ikun fihom id-deċiżjonijiet kollha meħuda mill-Istati Membri fir-rigward tad-definizzjoni ta’ bwar permanenti, huwa xieraq li jiġi emendat l-Anness I tar-Regolament ta’ Implimentazzjoni (UE) 2021/2289 biex l-Istati Membri jkunu meħtieġa jipprovdu informazzjoni dwar dawk id-deċiżjonijiet rigward id-definizzjoni ta’ bwar permanenti fil-Pjanijiet Strateġiċi tal-PAK.

(5)

Ir-Regolament (UE) 2025/2649 daħħal Artikolu 78a ġdid fir-Regolament (UE) 2021/2115 li jintroduċi tip ġdid ta’ intervent għal pagamenti ta’ kriżi lill-bdiewa wara diżastri naturali, avvenimenti klimatiċi avversi jew avvenimenti katastrofiċi. Għalhekk, jenħtieġ li l-punt 5 tal-Anness I tar-Regolament ta’ Implimentazzjoni (UE) 2021/2289 jiġi emendat biex jinkludi l-informazzjoni speċifika għal dan it-tip ta’ intervent fil-Pjanijiet Strateġiċi tal-PAK.

(6)

Ir-Regolament (UE) 2021/2115, kif emendat bir-Regolament tal-Kunsill (UE) 2025/2649, jeżenta lill-benefiċjarji tal-pagamenti skont l-Artikolu 28 ta’ dak ir-Regolament mis-sistema ta’ kundizzjonalità. Għalhekk, jenħtieġ li r-rekwiżit li jiġu deskritti l-kontrolli simplifikati għar-rekwiżiti ta’ kundizzjonalità għall-bdiewa żgħar fil-Pjanijiet Strateġiċi tal-PAK jitħassar mill-Anness I tar-Regolament ta’ Implimentazzjoni (UE) 2021/2289.

(7)

Għalhekk, jenħtieġ li r-Regolament ta’ Implimentazzjoni (UE) 2021/2289 jiġi emendat kif xieraq.

(8)

Sabiex l-Istati Membri jkunu jistgħu jippreżentaw talbiet għal emendi strateġiċi u notifiki ta’ emendi oħra tal-Pjanijiet Strateġiċi tal-PAK li jkun fihom l-informazzjoni kollha meħtieġa malajr kemm jista’ jkun wara d-dħul fis-seħħ tar-Regolament (UE) 2025/2649 u biex jiġi żgurat li l-Pjanijiet Strateġiċi tal-PAK ikun fihom l-informazzjoni kollha meħtieġa biex il-Kummissjoni tkun tista’ tivvaluta u tipproċessa tali talbiet għal emendi strateġiċi u notifiki ta’ emendi oħra b’mod effettiv fil-limiti ta’ żmien stabbiliti fl-Artikolu 119 tar-Regolament (UE) 2021/2115, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(9)

Meta jitqies li dan ir-Regolament jistabbilixxi regoli dwar il-kontenut tal-Pjanijiet Strateġiċi tal-PAK, jenħtieġ li dan ir-Regolament japplika mill-1 ta’ Jannar 2026 biex jiġu żgurati kundizzjonijiet ekwi u ċertezza legali għall-Istati Membri, għall-bdiewa u għall-partijiet ikkonċernati.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat tal-Politika Agrikola Komuni,