Isem

Informazzjoni ta’ identifikazzjoni

Dikjarazzjoni tar-Raġunijiet

Data tal-elenkar

“53.

Dmitry Sergeyevich GORDEEV

(Дмитрий Сергеевич ГОРДЕЕВ)

Pożizzjoni: Imħallef tal-Moscow City Court

Data tat-twelid: 9.8.1983

Nazzjonalità: Russa

Sess: raġel

Dmitry Gordeev huwa mħallef tal-Moscow City Court u qabel kien tal-Tverskoy District Court fil-belt ta’ Moska.

Dmitry Gordeev ripetutament ħareġ deċiżjonijiet politikament motivati kontra personalitajiet tal-oppożizzjoni u difensuri tad-drittijiet tal-bniedem. L-imġiba ġudizzjarja tiegħu turi nuqqas sistematiku ta’ rispett għall-istandards fundamentali ta’ ġustizzja imparzjali. Huwa regolarment jirrifjuta li jeżamina evidenza li tiskaġuna, inkluż reġistrazzjonijiet bil-vidjo li jikkontradixxu affermazzjonijiet tal-pulizija, u jaċċetta b’mod konsistenti rapporti tal-pulizija mhux ivverifikati jew ikkupjati mill-eks kollegi tiegħu, li jiżvela preġudizzju, kunflitt ta’ interess, u nuqqas ta’ indipendenza ġudizzjarja. Id-deċiżjonijiet tiegħu jiffurmaw xejra rikonoxxibbli u mmexxija politikament allinjata mal-interessi tas-servizzi tas-sigurtà Russi. Ir-rwol tiegħu ġie deskritt bħala parti minn ‘magna repressiva’ li għandha topera mingħajr fallimenti, u dan jenfasizza l-funzjoni ċentrali tiegħu fl-implimentazzjoni ta’ prosekuzzjonijiet politikament motivati.

Permezz tal-azzjonijiet ripetuti tiegħu, Dmitry Gordeev rażżan is-soċjetà ċivili, l-oppożizzjoni demokratika, u d-difensuri tad-drittijiet tal-bniedem, dgħajjef l-indipendenza ġudizzjarja u l-istat tad-dritt, u ffaċilita b’mod attiv prosekuzzjonijiet politikament motivati. Id-deċiżjonijiet tiegħu jappoġġaw materjalment u jippermettu t-tkomplija tal-operat tal-apparat statali repressiv tar-Russja.

Għaldaqstant, Dmitry Gordeev huwa responsabbli għal ksur serju tad-drittijiet tal-bniedem, ir-repressjoni tas-soċjetà ċivili u l-oppożizzjoni demokratika, u attivitajiet li jimminaw serjament id-demokrazija u l-istat tad-dritt fir-Russja.

22.12.2025

54.

Lyudmila BALANDINA

(Людмила БАЛАНДИНА)

Pożizzjoni: Prosekutur

Data tat-twelid: 16.11.1984

Nazzjonalità: Russa

Sess: mara

Lyudmila Balandina hija prosekutur li kellha rwol ewlieni f’diversi każijiet ta’ profil għoli kkaratterizzati minn ksur serju tad-drittijiet tal-bniedem u repressjoni ta’ individwi kritiċi tal-awtoritajiet Russi jew li jappoġġaw lill-Ukrajna.

Lyudmila Balandina abbużat sistematikament mill-pożizzjoni tagħha bħala prosekutur tal-Istat biex issegwi akkużi politikament motivati, tuża retorika ideoloġika allinjata mal-propaganda tal-Kremlin, u tfittex pieni eċċessivi għal atti ta’ espressjoni paċifika. L-imġiba tagħha turi sforz kontinwu u intenzjonat biex trażżan is-soċjetà ċivili, issikket id-dissens, u tilleġittimizza n-narrattivi tal-Istat li jassimilaw il-kritika tal-Gvern Russu jew l-appoġġ għall-Ukrajna mal-estremiżmu jew it-terroriżmu.

Bit-tnedija u s-sostenn ta’ dawn il-prosekuzzjonijiet, Lyudmila Balandina kienet involuta direttament fi ksur u abbużi serji tad-drittijiet tal-bniedem, inkluż ksur tal-libertà tal-espressjoni, id-dritt għal proċess ġust, u l-projbizzjoni ta’ prosekuzzjoni arbitrarja, kif protetti skont il-Patt Internazzjonali dwar id-Drittijiet Ċivili u Politiċi u l-Konvenzjoni Ewropea dwar id-Drittijiet tal-Bniedem.

L-attivitajiet ta’ Lyudmila Balandina jimminaw serjament id-demokrazija u l-istat tad-dritt fir-Russja, billi jbiddlu s-sistema ġudizzjarja f’għodda ta’ persekuzzjoni politika u jikkontribwixxu għax-xejra usa’ ta’ repressjoni tal-Istat kontra ġurnalisti, personalitajiet kulturali, u vuċijiet tal-oppożizzjoni.

Għaldaqstant, Lyudmila Balandina hija responsabbli għal ksur serju tad-drittijiet tal-bniedem, ir-repressjoni tas-soċjetà ċivili u l-oppożizzjoni demokratika, u attivitajiet li jimminaw serjament id-demokrazija u l-istat tad-dritt fir-Russja.

22.12.2025”.