(1)

Il-Bank Ċentrali Ewropew (BĊE) huwa responsabbli għall-funzjonament effettiv u konsistenti tal-Mekkaniżmu Superviżorju Uniku (MSU). Huwa jissorvelja l-funzjonament tas-sistema u jiżgura applikazzjoni konsistenti ta’ standards għoljin ta’ superviżjoni u l-konsistenza ta’ eżiti superviżorji fi ħdan l-Istati Membri parteċipanti. Il-BĊE jista’ joħroġ linji gwida lill-awtoritajiet nazzjonali kompetenti (ANK), li għandhom jiġu osservati fit-twettiq ta’ kompiti superviżorji u fl-adozzjoni ta’ deċiżjonijiet superviżorji mill-ANK.

(2)

Il-BĊE jiżgura l-applikazzjoni konsistenti ta’ rekwiżiti prudenzjali għall-istituzzjonijiet ta’ kreditu fi ħdan l-Istati Membri parteċipanti skont ir-Regolament (UE) Nru 1024/2013 u r-Regolament (UE) Nru 468/2014 tal-Bank Ċentrali Ewropew (BĊE/2014/17) (2).

(3)

Filwaqt li l-ANK huma primarjament responsabbli għar-rieżami tal-arranġamenti, il-proċessi, il-mekkaniżmi u l-istrateġiji implimentati mill-istituzzjonijiet ta’ kreditu li huma kklassifikati bħala inqas sinifikanti biex jiżguraw ġestjoni tajba u kopertura tar-riskji tagħhom — inklużi l-politiki ta’ proviżjonament tagħhom u t-trattament tal-assi f’termini ta’ rekwiżiti ta’ fondi proprji — il-BĊE, fir-rwol ta’ sorveljanza tiegħu fi ħdan l-MSU, jenħtieġ li jippromwovi l-applikazzjoni konsistenti ta’ standards superviżorji għoljin fl-eżekuzzjoni ta’ tali rieżamijiet. F’dan il-kuntest, applikazzjoni konsistenti ta’ standards superviżorji għoljin għar-rieżami superviżorju tal-ġestjoni u l-kopertura ta’ skoperturi mhux produttivi (NPEs) għal entitajiet inqas sinifikanti taħt superviżjoni fl-MSU kollu tikkontribwixxi għall-objettivi usa’ li jiġi żgurat li: (a) approċċ superviżorju prudenzjali koerenti u effettiv fir-rigward tal-istituzzjonijiet ta’ kreditu kollha fl-Istati Membri parteċipanti; b) il-ktieb wieħed tar-regoli għas-servizzi finanzjarji jiġi applikat b’mod konsistenti għall-istituzzjonijiet ta’ kreditu kollha fl-Istati Membri parteċipanti; u (c) l-istituzzjonijiet ta’ kreditu kollha fl-Istati Membri parteċipanti huma soġġetti għal superviżjoni tal-ogħla kwalità.

(4)

L-iżgurar ta’ ġestjoni u kopertura adegwati tal-NPEs kien prijorità importanti fi ħdan l-MSU sa mill-bidu tiegħu. Il-BĊE segwa approċċ superviżorju għall-NPEs ibbażat fuq il-qafas imfassal mil-leġiżlatur tal-Unjoni, u b’kont meħud tal-linji gwida interpretattivi adottati mill-Awtorità Bankarja Ewropea. Bħala parti minn dan l-approċċ superviżorju, il-BĊE kkomunika aspettattivi ta’ kopertura superviżorja għall-NPEs miżmuma minn entitajiet sinifikanti taħt superviżjoni. Dawk l-aspettattivi jirreferu għall-NPEs fejn l-iskopertura tkun oriġinat qabel is-26 ta’ April 2019 u li għalhekk mhumiex soġġetti għar-rekwiżit ta’ tnaqqis skont ir-Regolament (UE) Nru 575/2013 tal-Parlament Ewropew u tal-Kunsill (3). Għal entitajiet inqas sinifikanti taħt superviżjoni, il-kopertura ta’ tali NPEs sal-lum ma kenitx soġġetta għal prattiki superviżorji uniformi fl-MSU kollu. Il-kopertura tal-NPEs kienet soġġetta għall-approċċi definiti mill-ANK għall-attivitajiet superviżorji rispettivi tagħhom.

(5)

Kif muri mill-esperjenza miksuba mill-BĊE fil-kuntest tal-approċċ superviżorju segwit fir-rigward tal-entitajiet sinifikanti taħt superviżjoni, kopertura suffiċjenti u f’waqtha tal-NPEs tippromwovi ġestjoni proattiva ta’ dawk l-iskoperturi, it-tnaqqis tal-istokk tagħhom, u l-livelli ta’ proviżjonament li huma proporzjonati mar-riskji assoċjati mal-età tagħhom u l-evoluzzjoni tal-ammonti rekuperabbli.

(6)

Għalhekk, l-approċċ superviżorju tal-ANK fir-rigward tal-kopertura tal-NPEs miżmuma minn entitajiet inqas sinifikanti taħt superviżjoni jenħtieġ li jkopri r-rieżami tal-politiki ta’ proviżjonament u t-trattament tal-assi f’termini tar-rekwiżiti ta’ fondi proprji ta’ dawk l-entitajiet taħt superviżjoni.

(7)

Approċċ superviżorju bħal dan għall-kopertura tal-NPEs jitqies bħala għodda effettiva biex jittaffew żewġ riskji ewlenin. L-ewwel wieħed huwa l-persistenza ta’ stokks materjali ta’ NPEs b’età kbira (imsejħa wkoll NPEs legati) u kopertura limitata tal-provvisti, li jikkostitwixxu sorsi dejjiema ta’ aktar telf potenzjali u jirrestrinġu l-kapaċità tal-banek għal self ġdid. It-tieni wieħed huwa l-possibbiltà ta’ inkonsistenzi fit-trattament prudenzjali ta’ dawk l-NPEs li huma soġġetti għar-rekwiżit ta’ tnaqqis skont ir-Regolament (UE) Nru 575/2013 u dawk li mhumiex, meta dawk l-inkonsistenzi ma jkunux ġustifikati minn ċirkostanzi speċifiċi.

(8)

Dawk iż-żewġ riskji ewlenin huma materjali. Il-proporzjonijiet aggregati tal-NPEs kemm għal entitajiet sinifikanti kif ukoll għal dawk inqas sinifikanti taħt superviżjoni b’mod ġenerali wrew xejra ’l isfel sostnuta sa mill-bidu tal-MSU. Din ix-xejra kienet aktar evidenti għal entitajiet sinifikanti taħt superviżjoni u ntemmet fl-2024. Fid-dawl tal-proporzjonijiet tal-NPE potenzjalment urġenti mill-ġdid, jitqies li, minħabba l-livelli ġenerali sodisfaċenti ta’ kapital u ż-żmien twil li l-entitajiet taħt superviżjoni inqas sinifikanti reċentement kellhom biex jagħmlu progress fit-tnaqqis u l-kopertura tal-NPEs legati fuq inizjattiva tagħhom stess, approċċ superviżorju armonizzat tal-ANK fir-rigward tal-kopertura tal-NPEs miżmuma minn istituzzjonijiet inqas sinifikanti huwa proporzjonat għall-objettiv superviżorju li jiġu indirizzati ż-żewġ riskji ewlenin relatati ma’ dawk l-NPEs, sabiex tissaħħaħ ir-reżiljenza ta’ entitajiet taħt superviżjoni inqas sinifikanti għal żviluppi negattivi potenzjali fl-ambjent makroekonomiku u deterjorament assoċjat fil-kwalità tal-kreditu.

(9)

Biex jivvalutaw il-kopertura minn entitajiet taħt superviżjoni inqas sinifikanti ta’ skoperturi mhux produttivi li huma fl-ambitu ta’ din il-Linja Gwida, huwa meħtieġ li l-ANK jiksbu data dettaljata fir-rigward tal-kopertura ta’ tali skoperturi. Tali data mhijiex attwalment inkluża fl-informazzjoni li l-istituzzjonijiet huma meħtieġa jirrapportaw taħt ir-Regolament ta’ Implimentazzjoni tal-Kummissjoni (UE) 2021/451 (4), u għaldaqstant l-ANK għandhom jenħtieġu li l-entitajiet taħt supervivżjoni inqas sinifikanti jirrapportawha għal kull data ta’ referenza ta’ rapportar rilevanti,

(1)

“data ta’ referenza tar-rapportar” tfisser il-31 ta’ Diċembru ta’ sena kalendarja partikolari;

(2)

“skopertura mhux produttiva fil-kamp ta’ applikazzjoni ta’ din il-Linja Gwida” tfisser skopertura li tissodisfa l-kundizzjonijiet għal deroga mill-Artikolu 36(1), il-punt (m), tar-Regolament (UE) Nru 575/2013 kif previst fl-Artikolu 469a ta’ dak ir-Regolament;

(3)

“garanzija teknika” tfisser, fir-rigward ta’ skopertura, garanzija li tiggarantixxi l-kapaċità tad-debitur li jikkonforma ma’ obbligi kuntrattwali mhux ekonomiċi bħall-provvista ta’ oġġetti jew l-eżekuzzjoni ta’ xogħlijiet lejn parti terza u li ma għandhiex il-karattru ta’ sostituzzjoni ta’ kreditu.