(1)

L-Anness XIII tar-Regolament (UE) 2019/1241 jistabbilixxi r-regoli fil-livell reġjonali fir-rigward tal-miżuri ta’ mitigazzjoni biex jitnaqqsu l-qabdiet aċċessorji ta’ speċijiet sensittivi inklużi ċ-ċetaċji, billi jingħataw dettalji dwar iż-żoni ristretti, il-perjodi u l-limitazzjonijiet tal-irkaptu.

(2)

Fost l-oħrajn, dak ir-Regolament jipprevedi miżuri speċifiċi biex jitnaqqsu l-qabdiet aċċessorji tad-dniefel komuni u ċetaċji żgħar oħra fil-Golf tal-Biskalja (is-subżona 8 tal-ICES). Dawn il-miżuri jinkludu: (i) l-użu ta’ apparat akustiku deterrenti għax-xbieki tat-tkarkir pelaġiku ta’ nofs l-ilma u x-xbieki tat-tkarkir tal-qiegħ bil-paranzi kollha, (ii) għeluq tas-sajd mit-22 ta’ Jannar sal-20 ta’ Frar u (iii) sett ta’ miżuri anċillari għall-ġbir ta’ data xjentifika dwar il-qabdiet aċċessorji ta’ ċetaċji żgħar fil-ġurnal ta’ abbord, kif ukoll reġistrazzjonijiet magħmula billi jiġu koperti ċerti perċentwali tal-isforz tas-sajd b’osservaturi jew sistemi elettroniċi ta’ monitoraġġ li jinkorporaw kameras abbord.

(3)

Dawk il-miżuri speċifiċi, introdotti fir-Regolament (UE) 2019/1241 bir-Regolament Delegat tal-Kummissjoni (UE) 2024/3089 (2), jiskadu fil-31 ta’ Diċembru 2025. Permezz ta’ rakkomandazzjoni konġunta ppreżentata fis-6 ta’ Ġunju 2025, il-grupp reġjonali tal-Ilmijiet tal-Lbiċ (il-Belġju, Spanja, Franza, in-Netherlands u l-Portugall) jitlob l-estensjoni tal-miżuri rilevanti attwalment stabbiliti fl-Anness XIII tar-Regolament (UE) 2019/1241 għaċ-ċetaċji żgħar fil-Golf tal-Biskalja.

(4)

Peress li dawn il-miżuri jikkontribwixxu għat-tnaqqis tal-qabdiet ċċessorji tad-denfil komuni fil-Golf tal-Biskalja, jenħtieġ li dawn jiġu estiżi sal-31 ta’ Diċembru 2026.

(5)

Minbarra li titlob l-estensjoni tal-miżuri eżistenti, ir-rakkomandazzjoni konġunta tas-6 ta’ Ġunju 2025 tipproponi żieda fil-kopertura tal-osservaturi tal-isforz tas-sajd totali mkejjel f’jiem fuq il-baħar għal mill-inqas 7 % għall-pariti (GTR) u l-għeżula tal-qiegħ (ankrati) (GNS) bejn Jannar u Marzu.

(6)

Peress li l-miżuri ta’ ġestjoni huma l-istess bħal dawk li applikaw fl-2025 u l-miżuri ta’ monitoraġġ tjiebu, il-konklużjonijiet tal-parir tal-STECF ta’ Lulju 2024 (3) dwar il-miżuri ta’ ġestjoni u monitoraġġ għadhom validi, il-Kummissjoni tqis li l-estensjoni tal-miżuri sa tmiem l-2026 hija ġġustifikata.

(7)

Il-Grupp ta’ Esperti dwar is-Sajd u l-Akkwakultura ġie kkonsultat fit-8 ta’ Lulju 2025.

(8)

Dan ir-Regolament Delegat huwa mingħajr preġudizzju għal miżuri addizzjonali għall-protezzjoni tad-dniefel komuni u ċetaċji żgħar oħra li l-Kummissjoni tista’ tadotta skont id-dritt tal-Unjoni, inkluż fir-rigward tal-infurzar tad-Direttiva tal-Kunsill 92/43/KEE (4) jew, f’każ ta’ raġunijiet imperattivi ta’ urġenza debitament ġustifikati relatati ma’ theddida serja għall-konservazzjoni tar-riżorsi bijoloġiċi tal-baħar jew għall-ekosistema tal-baħar skont l-Artikolu 12 tar-Regolament (UE) Nru 1380/2013 tal-Parlament Ewropew u tal-Kunsill (5), u miżuri nazzjonali aktar stretti li l-Istati Membri jistgħu jadottaw għal dak l-għan fl-ilmijiet tagħhom f’konformità mar-Regolamenti (UE) Nru 1380/2013 u (UE) 2019/1241.

(9)

Peress li l-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu. Peress li l-miżuri li jridu jiġu estiżi jiskadu fil-31 ta’ Diċembru 2025, dan ir-Regolament jenħtieġ li japplika b’effett mill-1 ta’ Jannar 2026 sabiex tiġi żgurata l-kontinwità legali.

(10)

Għaldaqstant, jenħtieġ li r-Regolament (UE) 2019/1241 jiġi emendat skont dan,