(1)

L-Artikolu 6(1) tar-Regolament (UE) Nru 952/2013 jirrikjedi li l-iskambji kollha ta’ informazzjoni bejn l-awtoritajiet doganali u bejn l-operaturi ekonomiċi u l-awtoritajiet doganali, u l-ħażna ta’ din l-informazzjoni, kif teżiġi l-leġiżlazzjoni doganali, isiru bl-użu ta’ tekniki tal-ipproċessar elettroniku tad-data. Għal dan il-fini u f’konformità mal-Artikolu 6(2) ta’ dak ir-Regolament, il-Kummissjoni tfassal rekwiżiti komuni tad-data.

(2)

L-Artikolu 6(4) tar-Regolament (UE) Nru 952/2013 jipprevedi l-possibbiltà għall-Kummissjoni li tadotta deċiżjonijiet, f’każijiet eċċezzjonali, biex Stat Membru wieħed jew aktar ikunu jistgħu jidderogaw mill-użu ta’ tekniki tal-ipproċessar elettroniku tad-data għall-iskambju u l-ħażna ta’ informazzjoni jekk tali deroga tkun ġustifikata mis-sitwazzjoni speċifika tal-Istat Membru rikjedenti u tingħata għal perjodu speċifiku ta’ żmien.

(3)

Id-Deċiżjoni ta’ Implimentazzjoni tal-Kummissjoni (UE) 2023/2879 (2) tistabbilixxi l-programm ta’ ħidma relatat mal-iżvilupp u l-varar tas-sistemi elettroniċi previsti fil-Kodiċi Doganali tal-Unjoni (“il-programm ta’ ħidma”). Il-programm ta’ ħidma jelenka s-sistemi elettroniċi li għandhom jiġu żviluppati u d-dati meta dawk is-sistemi mistennija jsiru operattivi. Fost oħrajn, dak il-programm jispeċifika l-implimentazzjoni u l-perjodu tat-tnedija tas-Sistema ta’ Kontroll tal-Importazzjoni 2 (“ICS2”) f’konformità mal-Artikolu 6(1), u l-Artikoli 16, 46, 47 u 127 sa 132, tar-Regolament (UE) Nru 952/2013.

(4)

Barra minn hekk, l-Artikolu 278(3), il-punt (b), tar-Regolament (UE) Nru 952/2013 jispeċifika l-iskadenza sa meta mezzi għajr it-tekniki tal-ipproċessar elettroniku tad-data jistgħu jintużaw fuq bażi tranżizzjonali biex jiġu implimentati d-dispożizzjonijiet rigward id-dikjarazzjonijiet fil-qosor tad-dħul u l-analiżi tar-riskju f’relazzjoni mad-dħul ta’ merkanzija fit-territorju doganali tal-Unjoni.

(5)

F’konformità mal-Artikolu 7 tal-Ftehim dwar il-Ħruġ (3) u l-Artikolu 13 tal-Qafas ta’ Windsor (4), ir-Renju Unit fir-rigward tal-Irlanda ta’ Fuq huwa intitolat ukoll li jitlob deroga skont l-Artikolu 6(4) tar-Regolament (UE) Nru 952/2013.

(6)

F’konformità mal-programm ta’ ħidma, l-Istati Membri għandhom ikunu lesti sa mhux aktar tard mill-1 ta’ Settembru 2025 biex jiskambjaw u jaħżnu d-dikjarazzjonijiet fil-qosor tad-dħul (“ENS”, entry summary declarations) miġbura mill-operaturi ekonomiċi għall-merkanzija ttrasportata bit-triq u bil-ferrovija, inkluża l-merkanzija f’kunsinni postali ttrasportati b’dawn il-mezzi ta’ trasport. Minn din id-data, li hija t-tmiem tal-perjodu tat-tnedija tal-pass 3 tar-rilaxx 3 tas-Sistema ta’ Kontroll tal-Importazzjoni 2 tal-KDU (“ICS2”), l-Istati Membri jridu jipprovdu lill-operaturi ekonomiċi l-possibbiltà li jaqbdu mas-sistema u, mid-data tal-konnessjoni tagħhom, jitolbuhom jippreżentaw dikjarazzjonijiet fil-qosor tad-dħul billi jużaw dik is-sistema.

(7)

Madankollu, fl-Unjoni Ewropea ħarġu fid-dieher diversi ċirkustanzi speċifiċi u l-effetti kontinwi tagħhom. Il-gwerra li għaddejja fl-Ukrajna u l-ħtieġa li jiġi żgurat funzjonament mingħajr interruzzjoni tal-korsiji ta’ Solidarjetà Ukreni, il-ħtieġa li l-ICS2 tiġi integrata mas-sistemi tal-fruntieri intelliġenti, l-għadd kbir ta’ operaturi ekonomiċi li għandhom diffikultajiet biex jiksbu reġistrazzjoni minn Stat Membru għall-konnessjoni mas-sistemi tal-IT, il-kumplessità u s-sinifikat uniċi tal-introduzzjoni tas-sistema ICS2 u r-riżorsi meħtieġa għall-interoperabbiltà mas-sistemi u l-interfaċċi nazzjonali, kemm għall-Istati Membri kif ukoll għall-operaturi ekonomiċi, kif ukoll in-natura speċifika u kumplessa tal-mekkaniżmi tat-trasport affettwati minn din l-introduzzjoni, li tinkludi forom multimodali, urew li jaffettwaw b’mod sproporzjonat lil xi Stati Membri u lil operaturi ekonomiċi aktar minn oħrajn. L-Istati Membri affettwati huma dawk li għalihom is-sigurtà u s-sikurezza, relatati mat-trasport ta’ merkanzija bit-triq u bil-ferrovija, huma ta’ tħassib kbir u għalhekk dawn l-Istati Membri jeħtieġu soluzzjoni robusta biex jiżguraw iċ-ċertezza legali, il-kontinwità tan-negozju u tranżizzjoni bla xkiel biex jiġu ssodisfati r-rekwiżiti tar-Rilaxx 3 tal-ICS2, il-pass 3.

(8)

Dawn iċ-ċirkostanzi speċifiċi żammew lil ċerti Stati Membri, u lir-Renju Unit fir-rigward tal-Irlanda ta’ Fuq, milli jimplimentaw ir-rekwiżiti l-ġodda tad-dikjarazzjoni fil-qosor tad-dħul mirfuda mill-Pass 3 tar-Rilaxx 3 tal-ICS2 sal-1 ta’ Settembru 2025. Għalhekk, f’Awwissu 2025, l-Irlanda, il-Greċja, Spanja, Franza, l-Italja, il-Litwanja, l-Ungerija, il-Finlandja u r-Renju Unit fir-rigward tal-Irlanda ta’ Fuq, talbu formalment li jużaw mezzi għall-iskambju u l-ħażna ta’ informazzjoni għajr it-tekniki tal-ipproċessar elettroniku tad-data f’konformità mal-Artikolu 6(4), it-tieni subparagrafu, tar-Regolament (UE) Nru 952/2013.

(9)

F’konformità mal-Artikolu 6(4), it-tielet subparagrafu, tar-Regolament (UE) Nru 952/2013, jenħtieġ li tali derogi ma jaffettwawx l-iskambju ta’ informazzjoni bejn dawk li lilhom tkun indirizzata u Stati Membri oħra u lanqas ma jaffettwaw l-iskambju u l-ħażna ta’ informazzjoni fi Stati Membri oħra, jew fir-Renju Unit fir-rigward tal-Irlanda ta’ Fuq, għall-finijiet tal-applikazzjoni tal-leġiżlazzjoni doganali.

(10)

L-Irlanda, il-Greċja, Spanja, Franza, l-Italja, il-Litwanja, l-Ungerija, il-Finlandja u r-Renju Unit fir-rigward tal-Irlanda ta’ Fuq iridu jinnotifikaw lill-Kummissjoni dwar il-progress li sar fl-implimentazzjoni tar-rekwiżiti l-ġodda tad-dikjarazzjoni fil-qosor tad-dħul skont ir-Rilaxx 3 tal-ICS2 fir-rigward tal-merkanzija ttrasportata bit-triq u bil-ferrovija bħala parti mill-proċess ta’ rapportar tal-progress stabbilit fl-Artikolu 278a tar-Regolament (UE) Nru 952/2013. Għandhom jiġu żgurati wkoll il-komunikazzjoni u l-kondiviżjoni tal-informazzjoni dwar l-ippjanar nazzjonali kif imsemmi fl-Artikolu 4 tad-Deċiżjoni ta’ Implimentazzjoni (UE) 2023/2879.

(11)

Minħabba s-sinifikat tas-sistema ICS2 fl-istabbiliment ta’ approċċ integrat tal-Unjoni biex tissaħħaħ il-ġestjoni tar-riskju doganali u biex jiġu żgurati s-sigurtà u s-sikurezza ta’ qabel il-wasla, filwaqt li jiġi ffaċilitat il-fluss liberu tal-kummerċ leġittimu, kif ukoll minħabba n-natura u l-kumplessità tas-sistema ICS2, il-bidliet meħtieġa għall-allinjament mar-rekwiżiti tal-Kodiċi Doganali tal-Unjoni għandhom riperkussjonijiet ukoll fuq sistemi tal-IT relatati jew dipendenti oħra. Għalhekk jenħtieġ li d-durata tad-deroga tinżamm għal minimu strett. Fid-dawl ta’ dan u wara li jitqiesu l-impatti taċ-ċirkostanzi speċifiċi li kkawżaw dewmien fl-iżviluppi tal-IT li għaddejjin bħalissa tar-Rilaxx 3 tal-ICS 2 fl-Istati Membri u l-istat attwali ta’ dawk l-iżviluppi, id-deroga jenħtieġ li ddum sa mhux aktar tard mill-31 ta’ Diċembru 2025.

(12)

Peress li t-tmiem tal-perjodu tat-tnedija għall-pass 3 tar-rilaxx 3 tal-ICS2 huwa l-1 ta’ Settembru 2025, jenħtieġ għalhekk li din id-Deċiżjoni ta’ Implimentazzjoni tapplika minn dik id-data,