(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ din l-awtorizzazzjoni.

(2)

Preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 ġie awtorizzat għal perjodu ta’ 10 snin bħala addittiv tal-għalf għall-ispeċijiet kollha ta’ pollam għas-simna jew imrobbija għall-bajd jew imrobbija għat-tnissil bir-Regolament ta’ Implimentazzjoni tal-Kummissjoni (UE) 2020/1762 (2).

(3)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni ta’ preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

L-applikazzjoni tikkonċerna l-awtorizzazzjoni tal-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 bħala addittiv tal-għalf għall-ispeċijiet kollha tal-pollam għall-bajd jew għat-tnissil, u titlob li l-addittiv jiġi kklassifikat fil-kategorija “addittivi żootekniċi” u fil-grupp funzjonali “stabbilizzaturi tal-flora intestinali”.

(5)

F’konformità mal-Artikolu 13(3) tar-Regolament (KE) Nru 1831/2003, tressqet applikazzjoni għall-modifika tat-termini tal-awtorizzazzjoni tal-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 kif stabbilit fir-Regolament ta’ Implimentazzjoni (UE) 2020/1762 fir-rigward tal-użu għall-ispeċijiet kollha tal-pollam għas-simna jew imrobbija għall-bajd jew imrobbija għat-tnissil. Dik l-applikazzjoni kienet tikkonċerna l-modifika tat-termini tal-awtorizzazzjoni eżistenti bl-introduzzjoni ta’ formulazzjoni ġdida b’żieda ta’ 10 darbiet fil-konċentrazzjoni tal-aġenti attivi fl-addittiv (minn 3,2 × 109 għal 3,2 × 1010 unitajiet li jiffurmaw kolonji (CFU, colony forming units)/g ta’ addittiv).

(6)

Fl-opinjoni tagħha tal-20 ta’ Marzu 2025 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li skont il-kundizzjonijiet tal-użu proposti, il-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 huwa sikur għall-ispeċijiet fil-mira, inkluż l-ispeċijiet tal-pollam għall-bajd u għat-tnissil, kif ukoll għall-konsumaturi u għall-ambjent. L-Awtorità kkonkludiet ukoll li l-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840, fiż-żewġ forom tal-addittiv, mhuwiex irritanti għall-għajnejn iżda jitqies bħala sensitizzatur respiratorju u tal-ġilda, u kwalunkwe esponiment mill-ġilda u mill-apparat respiratorju jitqies bħala riskju. Barra minn hekk, l-Awtorità kkonkludiet li l-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 għandu l-potenzjal li jkun effikaċi fil-pollam kollu f’ammont ta’ 1,6 × 109 CFU/kg ta’ għalf u 5,4 × 108 CFU/L ta’ ilma tax-xorb. Ma kinitx tal-fehma li hemm bżonn ta’ rekwiżiti speċifiċi ta’ monitoraġġ ta’ wara l-introduzzjoni fis-suq.

(7)

Il-Laboratorju ta’ Referenza stabbilit bir-Regolament (KE) Nru 1831/2003 kien tal-fehma li l-konklużjonijiet u r-rakkomandazzjonijiet li ntlaħqu f’valutazzjoni preċedenti dwar applikazzjoni oħra għall-awtorizzazzjoni tal-istess addittiv u vverifikati mill-Awtorità fl-opinjoni tagħha tal-20 ta’ Marzu 2020 (4) huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (a), tar-Regolament tal-Kummissjoni (KE) Nru 378/2005 (5), ma kienx meħtieġ rapport ta’ evalwazzjoni tal-Laboratorju ta’ Referenza.

(8)

Fid-dawl ta’ dan ta’ hawn fuq, il-Kummissjoni hija tal-fehma li l-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dak il-preparat jiġi awtorizzat għall-ispeċijiet kollha tal-pollam għall-bajd jew għat-tnissil. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq saħħet l-utenti tal-addittiv.

(9)

Barra minn hekk, il-Kummissjoni hija tal-fehma li l-awtorizzazzjoni tal-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 xorta tissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003 meta t-termini ta’ dik l-awtorizzazzjoni jiġu mmodifikati fir-rigward tal-użu għall-ispeċijiet kollha tal-pollam għas-simna jew imrobbija għall-bajd jew imrobbija għat-tnissil, billi tintroduċi formulazzjoni ġdida b’żieda ta’ 10 darbiet fil-konċentrazzjoni tal-aġenti attivi fl-addittiv (minn 3,2 × 109 għal 3,2 × 1010 unitajiet li jiffurmaw kolonji (CFU)/g ta’ addittiv). Għalhekk, jenħtieġ li r-Regolament ta’ Implimentazzjoni (UE) 2020/1762 jiġi emendat kif xieraq.

(10)

Billi r-raġunijiet ta’ sikurezza ma jeħtiġux l-applikazzjoni immedjata tal-modifiki fil-kundizzjonijiet tal-awtorizzazzjoni tal-preparat ta’ Bacillus subtilis DSM 32324, Bacillus subtilis DSM 32325 u Bacillus amyloliquefaciens DSM 25840 għall-ispeċijiet kollha tal-pollam għas-simna jew imrobbija għall-bajd jew imrobbija għat-tnissil, jixraq li jiġi previst perjodu tranżizzjonali biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mill-modifika tal-awtorizzazzjoni.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,