(1)

Skont l-Artikolu 6(1) tar-Regolament (UE) Nru 952/2013, l-iskambji kollha ta’ informazzjoni bejn l-awtoritajiet doganali u bejn l-operaturi ekonomiċi u l-awtoritajiet doganali, u l-ħażna ta’ tali informazzjoni, kif teżiġi l-leġiżlazzjoni doganali, għandhom isiru bl-użu ta’ tekniki tal-ipproċessar elettroniku tad-data.

(2)

Id-Deċiżjoni ta’ Implimentazzjoni tal-Kummissjoni (UE) 2023/2879 (2) tistabbilixxi l-programm ta’ ħidma relatat mal-iżvilupp u l-varar tas-sistemi elettroniċi previsti fil-Kodiċi Doganali tal-Unjoni (“il-programm ta’ ħidma”). Il-programm ta’ ħidma jelenka s-sistemi elettroniċi li għandhom jiġu żviluppati u d-dati meta dawk is-sistemi mistennija jsiru operattivi. Fost l-oħrajn, dak il-programm jispeċifika l-implimentazzjoni u l-varar tas-sistema tal-Prova tal-Istatus tal-Unjoni (PoUS, Proof of Union Status) f’konformità mal-Artikoli 6(1), 16, 153 u 278(3), il-punt (c), tar-Regolament (UE) Nru 952/2013.

(3)

Id-Deċiżjoni ta’ Implimentazzjoni (UE) 2023/2879 tistabbilixxi l-15 ta’ Awwissu 2025 bħala d-data tal-varar tal-fażi 2 tas-sistema tal-PoUS.

(4)

Skont dik id-Deċiżjoni ta’ Implimentazzjoni, il-fażi 2 tas-sistema tal-PoUS tkopri r-rabta bejn dik is-sistema u s-Single Window Nazzjonali Marittima (“MNSW”, Maritime National Single Window) li għandha tinħoloq minn kull Stat Membru u tiġi integrata fis-sistema ta’ Single Window Marittima Ewropea (“EMSWe”, European Maritime Single Window environment), kif previst fir-Regolament (UE) 2019/1239 tal-Parlament Ewropew u tal-Kunsill (3), li, f’konformità mal-Artikolu 26 tiegħu, japplika mill-15 ta’ Awwissu 2025. Il-varar sħiħ tal-fażi 2 tas-sistema tal-PoUS hija għalhekk marbuta mal-konnessjoni minn sistema għal oħra bejn is-sistema tal-PoUS u l-MNSWs.

(5)

Fil-Komunikazzjoni dwar l-aġġornament tal-2024 tal-Pjan ta’ Implimentazzjoni Pluriennali għall-istabbiliment ta’ sistema ta’ Single Window Marittima Ewropea (4) (“il-Komunikazzjoni dwar l-EMSWe”), il-Kummissjoni indikat li l-implimentazzjoni tas-Single Windows Nazzjonali Marittimi avvanzat aktar bil-mod milli kien ippjanat oriġinarjament u anke l-adozzjoni ta’ leġiżlazzjoni sekondarja ħadet aktar żmien milli kien mistenni. B’riżultat ta’ dan, għalkemm l-implimentazzjonijiet nazzjonali qed jitlestew gradwalment, il-bidu tal-operazzjonijiet tas-Single Windows Nazzjonali Marittimi mhux se jiġi sinkronizzat bejn l-Istati Membri u jenħtieġ li jseħħ b’mod indikattiv fuq perjodu ta’ mhux aktar minn 18-il xahar mid-data tal-applikazzjoni tar-Regolament (UE) 2019/1239.

(6)

Bħala riżultat tal-implimentazzjoni tard tal-MNSWs, il-Belġju, il-Bulgarija, id-Danimarka, il-Ġermanja, l-Estonja, l-Irlanda, Franza, il-Kroazja, l-Italja, Ċipru, il-Latvja, in-Netherlands, il-Polonja, il-Portugall, is-Slovenja, il-Finlandja u l-Iżvezja ma setgħux jimplimentaw il-konnessjoni bejn l-MNSW rispettiva tagħhom u s-sistema tal-PoUS sal-15 ta’ Awwissu 2025. Għalhekk, dawk l-Istati Membri talbu formalment lill-Kummissjoni, f’konformità mal-Artikolu 6(4), it-tieni subparagrafu, tar-Regolament (UE) Nru 952/2013, biex tippermettilhom, b’deroga mill-Artikolu 6(1), l-ewwel subparagrafu, ta’ dak ir-Regolament, ikomplu jużaw mezzi għall-iskambju u l-ħażna ta’ informazzjoni għajr it-tekniki tal-ipproċessar elettroniku tad-data, biex jipprovdu l-istatus doganali tal-merkanzija, kif stabbilit fl-Artikolu 199(1), il-punt (c), tar-Regolament ta’ Implimentazzjoni tal-Kummissjoni (UE) 2015/2447 (5), sabiex l-operaturi jitħallew ikomplu jużaw, f’dawk l-Istati Membri, il-manifest tal-kumpanija tat-tbaħħir imsemmi fl-Artikolu 199(2) ta’ dak ir-Regolament.

(7)

Għalhekk, jenħtieġ li l-Belġju, il-Bulgarija, id-Danimarka, il-Ġermanja, l-Estonja, l-Irlanda, Franza, il-Kroazja, l-Italja, Ċipru, il-Latvja, in-Netherlands, il-Polonja, il-Portugall, is-Slovenja, il-Finlandja u l-Iżvezja jingħataw deroga, skont l-Artikolu 6(4) tar-Regolament (UE) Nru 952/2013, fir-rigward tal-mezzi biex jipprovdu l-istatus doganali tal-merkanzija, għall-obbligu li jintużaw tekniki tal-ipproċessar elettroniku tad-data għall-iskambji kollha ta’ informazzjoni bejn l-awtoritajiet doganali u bejn l-operaturi ekonomiċi u l-awtoritajiet doganali, u l-ħażna ta’ tali informazzjoni, stabbilita bl-Artikolu 6(1) ta’ dak ir-Regolament.

(8)

Id-durata ta’ dik id-deroga tiddependi minn meta se jiġu stabbiliti l-funzjonalitajiet relatati mal-obbligi ta’ rapportar tad-dwana speċifikati fil-Parti A, il-punt A7, tal-Anness tar-Regolament (UE) 2019/1239. Fid-dawl ta’ dan u wara li ġiet ikkunsidrata l-Komunikazzjoni dwar l-EMSWe, id-deroga jenħtieġ li ddum sal-1 ta’ Marzu 2027.

(9)

Il-Belġju, il-Bulgarija, id-Danimarka, il-Ġermanja, l-Estonja, l-Irlanda, Franza, il-Kroazja, l-Italja, Ċipru, il-Latvja, in-Netherlands, il-Polonja, il-Portugall, is-Slovenja, il-Finlandja u l-Iżvezja jenħtieġ li jissottomettu rapporti perjodiċi dwar il-progress tagħhom fl-istabbiliment tal-konnessjoni bejn is-sistema tal-PoUS u l-MNSWs rispettivi tagħhom.

(10)

Minħabba li skont id-Deċiżjoni ta’ Implimentazzjoni (UE) 2023/2879, il-fażi 2 tas-sistema tal-PoUS jenħtieġ li tiġi varata sal-15 ta’ Awwissu 2025 u r-Regolament (UE) 2019/1239 japplika mill-15 ta’ Awwissu 2025 ukoll, u sabiex jiġi evitat vojt legali, jenħtieġ li din id-Deċiżjoni tapplika wkoll minn dik id-data,