(1)

Ir-Regolament (KE) Nru 1831/2003 jipprevedi l-awtorizzazzjoni tal-addittivi għall-użu fin-nutrizzjoni tal-annimali u r-raġunijiet u l-proċeduri għall-għoti jew għaċ-ċaħda ta’ din l-awtorizzazzjoni.

(2)

Il-blue patentat V ġie awtorizzat għal għaxar snin bħala addittiv tal-għalf għall-annimali li ma jipproduċux l-ikel bir-Regolament ta’ Implimentazzjoni tal-Kummissjoni (UE) Nru 643/2013 (2).

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tal-blue patentat V bħala addittiv tal-għalf għall-annimali li ma jipproduċux l-ikel, bit-talba li l-addittiv jiġi kklassifikat fil-kategorija tal-addittivi “addittivi sensorji” u fil-grupp funzjonali “koloranti, sustanzi li jżidu jew jagħtu lura l-kulur fl-għalf”. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Kif previst fl-Artikolu 5(1) tar-Regolament (KE) Nru 1831/2003, l-applikant ta’ awtorizzazzjoni għal addittiv tal-għalf għandu juri b’mod adegwat u suffiċjenti, f’konformità mar-regoli ta’ implimentazzjoni msemmija fl-Artikolu 7 ta’ dak ir-Regolament, li l-kundizzjonijiet għall-awtorizzazzjoni stabbiliti fl-Artikolu 5(2) u (3) ta’ dak ir-Regolament ġew issodisfati. Fir-rigward tal-applikazzjonijiet għat-tiġdid tal-awtorizzazzjoni, ir-Regolament tal-Kummissjoni (KE) Nru 429/2008 (3) jirrikjedi, b’mod partikolari, li l-applikant jippreżenta evidenza li, fid-dawl tal-għarfien xjentifiku attwali, l-addittiv ikun għadu sikur fil-kundizzjonijiet approvati għall-ispeċijiet fil-mira, għall-konsumaturi, għall-ħaddiema u għall-ambjent.

(5)

Fl-opinjoni tagħha tat-13 ta’ Marzu 2024 (4), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-applikant ma pprovdiex evidenza li l-addittiv attwalment fis-suq jikkonforma mal-kundizzjonijiet eżistenti tal-awtorizzazzjoni (kriterji tal-purità: minimu ta’ 90 % ta’ koloranti totali, ikkalkulat bħala l-imlieħ tas-sodju, tal-kalċju jew tal-potassju). L-Awtorità ma setgħetx tikkonkludi jekk il-blue patentat V għadux sikur għall-ispeċijiet fil-mira minħabba n-nuqqas ta’ konformità mal-ispeċifikazzjonijiet awtorizzati għall-użu tal-addittiv fl-għalf u n-nuqqas ta’ data għall-valutazzjoni tal-anewġeniċità potenzjali tal-addittiv.

(6)

B’ittra tal-1 ta’ Lulju 2024, il-Kummissjoni tat opportunità lill-applikant biex jissottometti informazzjoni supplimentari biex jindirizza l-kwistjonijiet imsemmija fl-opinjoni tal-EFSA. L-applikant wieġeb fl-20 ta’ Settembru 2024 li ma kellu ebda intenzjoni li jipprovdi data addizzjonali għat-tiġdid tal-awtorizzazzjoni tal-blue patentat V.

(7)

Mill-opinjoni tal-Awtorità tat-13 ta’ Marzu 2024 jirriżulta li l-applikant ma weriex b’mod adegwat u suffiċjenti li l-blue patentat V għadu sikur meta jintuża bħala addittiv tal-għalf għall-annimali li ma jipproduċux l-ikel fil-kategorija tal-addittivi “addittivi sensorji” u l-grupp funzjonali “koloranti, sustanzi li jżidu jew jagħtu lura l-kulur fl-għalf”.

(8)

Fid-dawl ta’ dan ta’ hawn fuq, il-blue patentat V ma jissodisfax il-kundizzjonijiet għat-tiġdid tal-awtorizzazzjoni previsti fl-Artikolu 5 tar-Regolament (KE) Nru 1831/2003. Għaldaqstant, it-tiġdid tal-awtorizzazzjoni ta’ dik is-sustanza bħala addittiv tal-għalf, li jappartjeni għall-kategorija “addittivi sensorji” u l-grupp funzjonali “koloranti, sustanzi li jżidu jew jagħtu lura l-kulur fl-għalf”, għall-użu għall-annimali li ma jipproduċux l-ikel, jenħtieġ li jiġi miċħud.

(9)

Għalhekk, is-sustanza blue patentat V u l-għalf li fih minnha jenħtieġ li jiġu rtirati mis-suq malajr kemm jista’ jkun, sa fejn għandu x’jaqsam l-użu għall-annimali li ma jipproduċux l-ikel. Madankollu, jenħtieġ li jitħalla perjodu limitat għall-irtirar mis-suq tal-istokk eżistenti ta’ dawk il-prodotti, sabiex l-operaturi jkunu jistgħu jikkonformaw kif suppost mal-obbligu tal-irtirar.

(10)

B’konswegwenza taċ-ċaħda tat-tiġdid tal-awtorizzazzjoni tal-blue patentat V bħala addittiv tal-għalf għall-annimali li ma jipproduċux l-ikel, jenħtieġ li jitħassar ir-Regolament ta’ Implimentazzjoni (UE) Nru 643/2013.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,