(1)

Il-ġidri tan-nagħaġ u l-ġidri tal-mogħoż huwa marda virali infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tat-trobbija tal-annimali, billi tikkawża tfixkil fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi. F’każ ta’ tifqigħa tal-ġidri tan-nagħaġ u l-ġidri tal-mogħoż f’annimali kaprini u ovini, hemm riskju serju li dak il-mard jinxtered fi stabbilimenti oħra ta’ annimali kaprini jew ovini.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, kif ukoll ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tinkludi żona ta’ protezzjoni, żona ta’ sorveljanza, u jekk ikun meħtieġ, żona ristretta ulterjuri madwar iż-żoni ta’ protezzjoni u ż-żoni ta’ sorveljanza jew maġenbhom.

(3)

Id-Deċiżjoni ta’ Implimentazzjoni tal-Kummissjoni (UE) 2025/2415 (4) ġiet adottata fil-qafas tar-Regolament (UE) 2016/429 u tistabbilixxi ċerti miżuri ta’ emerġenza relatati mal-infezzjoni tal-ġidri tan-nagħaġ u mal-ġidri tal-mogħoż fir-Rumanija. B’mod aktar partikolari, l-Artikolu 1 tad-Deċiżjoni ta’ Implimentazzjoni (UE) 2025/2415 tipprevedi li ż-żona ristretta, li tinkludi żoni ta’ protezzjoni u żoni ta’ sorveljanza, li għandha tiġi stabbilita mir-Rumanija, f’konformità mal-Artikolu 21 tar-Regolament Delegat (UE) 2020/687, trid tinkludi mqar iż-żoni elenkati fl-Anness ta’ dik id-Deċiżjoni ta’ Implimentazzjoni, u l-miżuri li jeħtieġ li jiġu applikati fiż-żoni ta’ protezzjoni u fiż-żoni ta’ sorveljanza, iridu jiġu applikati mqar sad-dati elenkati f’dak l-Anness.

(4)

Mill-adozzjoni tad-Deċiżjoni ta’ Implimentazzjoni (UE) 2025/2415, ir-Rumanija nnotifikat lill-Kummissjoni b’żewġ tifqigħat addizzjonali tal-ġidri tan-nagħaġ u tal-ġidri tal-mogħoż fi stabbilimenti li jżommu annimali ovini u kaprini, li jinsabu fil-kontea ta’ Teleorman, barra miż-żoni ta’ protezzjoni u ta’ sorveljanza diġà elenkati fl-Anness tad-Deċiżjoni (UE) 2025/2415.

(5)

Għalhekk, iż-żona ristretta, li tinkludi żoni ta’ protezzjoni u żoni ta’ sorveljanza fir-Rumanija, deskritti fl-Anness tad-Deċiżjoni ta’ Implimentazzjoni (UE) 2025/2415, jenħtieġ li tiġi aġġustata, fl-ispazju u fiż-żmien, sabiex jiġi evitat it-tixrid aktar tal-marda fit-territorju tar-Rumanija u fil-bqija tal-Unjoni. Barra minn hekk, fid-dawl ta’ dawn il-kunsiderazzjonijiet, meta jiġu applikati għas-sitwazzjoni epidemjoloġika attwali li tikkonċerna l-ġidri tan-nagħaġ u l-ġidri tal-mogħoż fir-Rumanija, jeħtieġ li tiġi stabbilita żona ristretta ulterjuri fil-kontej ta’ Teleorman, Olt u Dolj minħabba li bħalissa huma l-kontej f’livell ogħla ta’ riskju ta’ tixrid, sabiex jiġi evitat aktar tixrid tal-marda.

(6)

Id-daqs taż-żoni ta’ protezzjoni, taż-żoni ta’ sorveljanza u taż-żoni ristretti ulterjuri, u d-durata tal-miżuri li se jiġu applikati fihom huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429, inkluż is-sitwazzjoni epidemjoloġika fir-rigward tal-ġidri tan-nagħaġ u tal-ġidri tal-mogħoż fiż-żoni affettwati minn dik il-marda u s-sitwazzjoni epidemjoloġika kumplessiva tal-ġidri tan-nagħaġ u tal-ġidri tal-mogħoż fl-Istat Membru kkonċernat minn dik il-marda kif ukoll il-livell ta’ riskju għat-tixrid aktar ta’ dik il-marda, u huma konformi mar-regoli stabbiliti fir-Regolament Delegat (UE) 2020/687. Id-durata tal-miżuri tqis ukoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (5).

(7)

Minbarra dan, fis-sitwazzjoni epidemjoloġika attwali, hemm riskju kbir ta’ aktar tixrid tal-ġidri tan-nagħaġ u tal-ġidri tal-mogħoż, fir-Rumanija u fil-bqija tal-Unjoni, b’mod partikolari minħabba l-fatt li, skont l-informazzjoni pprovduta mir-Rumanija, hemm rikorrenza ta’ dik il-marda f’żona li diġà ġiet affettwata qabel, bi ftit li xejn informazzjoni dwar l-oriġini tat-tifqigħa u t-tixrid possibbli bejn it-tifqigħat, li jindika li l-marda setgħet diġà ċċirkolat f’żoni oħra tar-Rumanija, mingħajr ma ġie individwata u mingħajr l-ebda miżura restrittiva fis-seħħ biex jiġi evitat jew jitnaqqas it-tixrid tagħha.

(8)

Għalhekk, jeħtieġ li jiġu adottati miżuri addizzjonali ta’ emerġenza sabiex jittaffa r-riskju tat-tixrid aktar tal-marda fit-territorju tar-Rumanija u fi Stati Membri oħra, kif ukoll biex jiġi evitat kwalunkwe ostaklu mhux ġustifikat għall-kummerċ. Għal dan l-għan, jeħtieġ li jiġi żgurat li l-movimenti tal-annimali ovini u kaprini miż-żoni ta’ protezzjoni, miż-żoni ta’ sorveljanza u miż-żoni ristretti ulterjuri, stabbiliti fit-territorju tar-Rumanija, lejn destinazzjonijiet barra mill-perimetri esterni taż-żona ristretta ulterjuri jkunu pprojbiti, sat-23 ta’ Diċembru 2025.

(9)

Fid-dawl tas-sitwazzjoni epidemjoloġika, jeħtieġ ukoll li jiġu identifikati ż-żoni fit-territorju tar-Rumanija fejn jenħtieġ li japplikaw miżuri ulterjuri bħal dawk applikabbli għaż-żoni ristretti ulterjuri, kif previst fir-Regolament Delegat (UE) 2020/687, u fejn il-movimenti tal-annimali ovini u kaprini barra mill-perimetri esterni ta’ dawk iż-żoni huma pprojbiti, mill-24 ta’ Diċembru 2025 sal-31 ta’ Jannar 2026.

(10)

Minħabba l-urġenza tas-sitwazzjoni epidemjoloġika fl-Unjoni fir-rigward tat-tixrid tal-ġidri tan-nagħaġ u tal-ġidri tal-mogħoż u l-ħtieġa li jiġi evitat li l-marda tinxtered aktar mill-istabbilimenti affettwati fir-Rumanija lejn partijiet oħra ta’ dak l-Istat Membru, jew lejn kwalunkwe Stat Membru ieħor, jenħtieġ li l-miżuri ta’ emerġenza stabbiliti f’din id-Deċiżjoni ta’ Implimentazzjoni jibdew japplikaw mill-aktar fis.

(11)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

L-Artikoli 1 u 2 huma sostitwiti b’dan li ġej:

2.

Jiddaħħal l-Artikolu 2 a li ġej:

3.

L-Anness huwa sostitwit bit-test stabbilit fl-Anness ta’ din id-Deċiżjoni.