ANNESS

L-Anness II tad-Deċiżjoni 2010/788/PESK huwa emendat kif ġej:

(1)	fit-Taqsima “A. Persuni”, titħassar l-entrata 41;

(2)

fit-Taqsima “A. Persuni”, l-entrati 12, 20, 28, 36, 40, 42, 43 u 44 huma sostitwiti bl-entrati korrispondenti li ġejjin:

	Isem	Informazzjoni ta’ Identifikazzjoni	Raġunijiet	Data tal-elenkar
“12.	Justin BITAKWIRA	magħruf ukoll bħala Bihona-Hayi Pożizzjoni: deputat nazzjonali, responsabbli għall-Wazalendo f’Kivu t’Isfel Data tat-twelid: 5.12.1960 Post tat-twelid: Lemera, DRC Nazzjonalità: RDK Sess: raġel Funzjoni jew professjoni: politiku, eks Ministru nazzjonali u President tal-Alleanza għar-Repubblika u l-Kuxjenza Nazzjonali	Justin Bitakwira huwa politiku Kongoliż, eks Ministru tal-gvern u membru tal-partit politiku ‘Unjoni għan-Nazzjon Kongoliż’. Fi Frar 2025, inħatar mill-President Tshisekedi biex ikun responsabbli għall-Wazalendo f’Kivu t’Isfel fil-Parlament Nazzjonali. Fid-diskorsi pubbliċi tiegħu, huwa ripetutament inċita l-vjolenza u ħeġġeġ id-diskriminazzjoni u l-ostilità lejn il-komunità ta’ Banyamulenge, li sfat fil-mira u ġiet attakkata minn gruppi armati. Dawk id-diskorsi u n-narrattivi xewwiexa jikkontribwixxu biex jalimentaw il-konflitt u l-vjolenza fir-RDK, b’mod partikolari fir-reġjun ta’ Hauts-Plateaux ikkaratterizzat minn konflitti interkomunali. Għalhekk Justin Bitakwira huwa responsabbli għas-sostenn tal-konflitt armat, l-instabbiltà u n-nuqqas ta’ sigurtà fir-RDK permezz tal-inċitament għall-vjolenza.	8.12.2022
20.	Charles SEMATAMA	magħruf ukoll bħala Sebanyana Funzjoni/grad: Kmandant, Kap Militari ta’ Twirwaneho Data tat-twelid: 1975 Post tat-twelid: Kalunyo village, madwar il-lokalitajiet ta’ Kamombo, South Kivu, DRC Nazzjonalità: RDK Sess: raġel	Charles Sematama huwa eks uffiċjal tal-forzi armati Kongoliżi (FARDC) u għandu l-kariga ewlenija ta’ Kmandant u Mexxej Militari tal-grupp armat mhux governattiv Twirwaneho li jopera f’Kivu t’Isfel, li jgħid li jirrappreżenta l-Komunità ta’ Banyamulenge. Twirwaneho jsostni l-konflitt armat, l-instabbiltà u n-nuqqas ta’ sigurtà fir-RDK u huwa responsabbli għal abbużi serji tad-drittijiet tal-bniedem f’dak il-pajjiż, b’mod partikolari permezz tar-reklutaġġ volontarju jew furzat tat-tfal biex jipparteċipaw b’mod attiv f’ostilitajiet, attakki kontra persuni ċivili u l-forzi armati Kongoliżi (FARDC), u qtil, bħall-attakki kontra persuni ċivili fir-raħal ta’ Mikenge f’Novembru 2021 li qatlu mill-inqas sitt persuni. Barra minn hekk, Charles Sematama kien involut direttament f’sessjonijiet ta’ propaganda kif ukoll fir-reklutaġġ furzat u l-użu ta’ tfal, inkluż bħala skorti armati. Minħabba l-pożizzjoni ewlenija tiegħu fi Twirwaneho u l-involviment dirett fir-reklutaġġ furzat u l-użu ta’ tfal, Charles Sematama huwa għalhekk involut fl-ippjanar, id-direzzjoni jew it-twettiq ta’ atti li jikkostitwixxu ksur jew abbużi serji tad-drittijiet tal-bniedem fir-RDK. Huwa responsabbli wkoll għas-sostenn tal-konflitt armat, l-instabbiltà u n-nuqqas ta’ sigurtà fir-RDK.	28.7.2023
28.	Justin Gacheri MUSANGA	magħruf ukoll bħala Gaceri MUSANGA, CS BRAVO SIERRA, BRAVO THREE Funzjoni/grad: Brigadier Ġeneral tal-March 23 Movement/Congolese Revolutionary Army (M23/ARC), Kmandant tan-North-West Defense Zone Post tat-twelid: Masisi, DRC Sess: raġel Missier: Erasto Ntibaturana (Mexxej konswetudinarju tal-Hutu Busumba)	Justin Gacheri Musanga għandu pożizzjoni ewlenija bħala Brigadier Ġeneral tal-M23/ARC, grupp armat mhux governattiv li jopera fil-Lvant tar-RDK. L-M23/ARC isostni l-konflitt armat, l-instabbiltà u n-nuqqas ta’ sigurtà fir-RDK, b’mod partikolari permezz tal-inċitament tal-vjolenza. Barra minn hekk, huwa responsabbli għal abbużi serji tad-drittijiet tal-bniedem, inkluż qtil ta’ persuni ċivili, attakki u vjolenza sesswali kontrihom, kif ukoll reklutaġġ ta’ tfal. Minħabba l-pożizzjoni ewlenija tiegħu fl-M23/ARC, Justin Gacheri Musanga huwa għalhekk involut fl-ippjanar, id-direzzjoni jew it-twettiq ta’ atti li jikkostitwixxu ksur jew abbużi serji tad-drittijiet tal-bniedem fir-RDK. Huwa responsabbli wkoll għas-sostenn tal-konflitt armat, l-instabbiltà u n-nuqqas ta’ sigurtà fir-RDK.	26.7.2024
36.	Bertrand BISIMWA	Funzjoni/grad: Mexxej (President) tal-fergħa politika tal-‘Mouvement du 23 mars’ (M23) Data tat-twelid: 8.9.1972 Post tat-twelid: Bukavu, Democratic Republic of the Congo Nazzjonalità: Kongoliż Sess: raġel	Bertrand Bisimwa għandu pożizzjoni ewlenija bħala President tal-Moviment tal-March 23 Movement (M23), moviment armat mhux governattiv. Il-M23 isostni l-konflitt armat, l-instabbiltà u n-nuqqas ta’ sigurtà fir-RDK, b’mod partikolari billi jinċita l-vjolenza u juża amministrazzjoni parallela fil-Lvant tar-RDK, ħaġa li tikkostitwixxi ksur tal-integrità territorjali tar-RDK. Barra minn hekk, huwa responsabbli għal abbużi serji tad-drittijiet tal-bniedem, inkluż qtil ta’ ċivili u attakki u vjolenza sesswali kontrihom, kif ukoll għar-reklutaġġ ta’ tfal. Minħabba l-pożizzjoni ewlenija tiegħu fl-M23, Bertrand Bisimwa huwa involut fl-ippjanar, id-direzzjoni jew it-twettiq ta’ atti li jikkostitwixxu ksur jew abbużi serji tad-drittijiet tal-bniedem fir-RDK. Huwa responsabbli wkoll għas-sostenn tal-konflitt armat, l-instabbiltà u n-nuqqas ta’ sigurtà fir-RDK, speċjalment billi kkontribwixxa għall-installazzjoni ta’ amministrazzjonijiet paralleli fil-Lvant tar-RDK.	17.3.2025
40.	Eugène NKUBITO	Funzjoni/grad: Kmandant it-tielet diviżjoni (Maġġur Ġeneral) tar-Rwanda Defence Force (RDF) Sess: raġel Nazzjonalità: Rwandiż Numru tas-servizz RDF: 218	Il-Maġġur Ġeneral Eugène Nkubito ilu minn Ġunju 2023 jokkupa pożizzjoni ewlenija bħala Kmandant tat-Tielet Diviżjoni tar-Rwanda Defence Force (RDF), skjerata fil-Lvant tar-RDK u b’mod aktar speċifiku fil-provinċja ta’ Kivu ta’ Fuq. Il-preżenza tal-RDF fir-RDK għandha bħala l-għan tagħha li ssaħħaħ l-operazzjonijiet tal-March 23 Movement/l-Congolese Revolutionary Army (M23/ARC), grupp armat mhux governattiv li jopera fil-Kongo tal-Lvant billi jipprovdi truppi u materjal. Il-preżenza tal-RDF tikkostitwixxi ksur tal-integrità territorjali tar-RDK u ssostni l-konflitt armat, l-instabbiltà u n-nuqqas ta’ sigurtà fir-reġjun. Hija responsabbli wkoll għal abbużi serji tad-drittijiet tal-bniedem, inkluż kastig kollettiv, u ssostni abbużi serji tad-drittijiet tal-bniedem imwettqa mill-membri ta’ M23. Minħabba r-rwol ta’ kmand tiegħu fit-Tielet Diviżjoni tal-Forza tal-RDF skjerata fil-Lvant tar-RDK, Eugène Nkubito huwa responsabbli li jsostni l-konflitt armat, l-instabbiltà u n-nuqqas ta’ sigurtà fir-reġjun.	17.3.2025
42.	Jean-Bosco NZABONIMPA MUPENZI	Funzjoni/grad: Rappreżentant tal-AFC/M23 għall-Finanzi f’Kivu t’Isfel Post tat-twelid: Rubaya, Masisi, North Kivu Nazzjonalità: Kongoliż Sess: raġel Entitajiet assoċjati: March 23 Movement/Congolese Revolutionary Army (M23/ARC)	Jean-Bosco Nzabonimpa Mupenzi huwa r-Rappreżentant għall-Finanzi f’Kivu t’Isfel tal-March 23 Movement/Congolese Revolutionary Army (M23/ARC) li jopera fir-Repubblika Demokratika tal-Kongo (RDK). Minn Jannar 2024 huwa opera fil-provinċja ta’ Kivu ta’ Fuq qabel ma nħatar f’pożizzjoni ġdida f’Kivu t’Isfel f’Marzu 2025. L-M23 huwa grupp armat ribelli responsabbli għall-konflitt armat attwali. Isostni wkoll il-konflitt armat, l-instabbiltà u l-insigurtà fir-reġjun kif ukoll l-abbużi u ksur serji tad-drittijiet tal-bniedem imwettqa minn membri tal-M23, inkluż qtil ta’ ċivili u attakki u vjolenza sesswali kontrihom, kif ukoll reklutaġġ ta’ tfal. Jean-Bosco Nzabonimpa Mupenzi jappoġġa lill-grupp armat M23, b’mod partikolari billi jmexxi d-Dipartiment tal-Finanzi u l-Produzzjoni tal-M23, kif ukoll billi jieħu sehem fit-taħriġ ta’ rekluti ġodda. Minħabba l-pożizzjoni ewlenija tiegħu fl-M23, Jean-Bosco Nzabonimpa Mupenzi huwa involut fl-ippjanar, id-direzzjoni, jew it-twettiq ta’ atti li jikkostitwixxu ksur jew abbużi serji tad-drittijiet tal-bniedem fir-RDK. Huwa responsabbli wkoll għas-sostenn tal-konflitt armat, l-instabbiltà u n-nuqqas ta’ sigurtà fir-RDK.	17.3.2025
43.	Francis KAMANZI	Funzjoni/grad: Direttur Ġenerali tar-Rwanda Cooperative Agency, eks Uffiċjal Kap Eżekuttiv tar-Rwanda Mines, Petroleum and Gas Board (RMB) Nazzjonalità: Rwandiż Sess: raġel	Francis Kamanzi kellu pożizzjoni ewlenija bħala Uffiċjal Kap Eżekuttiv tar-Rwanda Mines, Petroleum and Gas Board (RMB) minn Frar 2024 sa Lulju 2025, meta nħatar Direttur Ġenerali tar-Rwanda Cooperative Agency (‘RCA’). L-RCA taqa’ taħt ir-responsabbiltà tal-Ministeru għall-Kummerċ u l-Industrija. Waħda mir-responsabbiltajiet ewlenin tal-RCA hija li tirregola u tissorvelja l-organizzazzjonijiet kooperattivi. Fosthom, 141 kooperattiva joperaw fis-settur tal-minjieri, is-settur ewlieni tar-Rwanda li jaqla’ dħul mill-esportazzjoni. Għalhekk, Francis Kamanzi għadu involut fl-isfruttament jew fil-kummerċ tar-riżorsi naturali. Il-minerali għadhom qed jiġu estratti f’żoni ta’ estrazzjoni kkontrollati mill-March 23 Movement (M23) u ttraffikati lejn ir-Rwanda għall-benefiċċju kemm tal-Alleanza Fleuve Congo/M23 kif ukoll tal-ekonomija tar-Rwanda, fejn dawn il-minerali ta’ konflitt jitħalltu mal-produzzjoni tar-Rwanda. Minħabba l-eks pożizzjoni ewlenija tiegħu fl-RMB u l-pożizzjoni tiegħu ta’ Direttur Ġenerali tal-RCA, Francis Kamanzi huwa responsabbli għall-isfruttament tal-kunflitt armat, l-instabbiltà jew l-insigurtà fir-RDK, inkluż permezz tal-isfruttament jew il-kummerċ illeċitu ta’ riżorsi naturali.	17.3.2025
44.	Joseph MUSANGA BAHATI	magħruf ukoll bħala ‘Erasto’; ‘Bahati Erasto’; ‘Colonel Erasto’; ‘Colonel Bahati Musanga’ Funzjoni/grad: Gvernatur ta’ Kivu ta’ Fuq Data tat-twelid: 18.8.1978 Post tat-twelid: Bashali-Mokoto (Busumba) Nazzjonalità: Kongoliż Sess: raġel Entitajiet assoċjati: March 23 Movement/Alliance Fleuve Congo (M23/AFC)	Joseph Musanga Bahati huwa persuna importanti fl-istruttura tal-grupp ribelli tal-March 23 Movement (M23) u fl-Alliance Fleuve Congo. Kellu l-pożizzjoni ta’ Kap tal-Finanzi tal-M23 għal diversi snin. Fi Frar 2025, huwa nħatar gvernatur ta’ Kivu ta’ Fuq bħala parti mill-‘amministrazzjoni’ illegali ġdida imposta mill-M23, bi ksur tas-sovranità Kongoliża. L-istabbiliment ta’ amministrazzjoni parallela fir-RDK jikkostitwixxi ksur tal-integrità territorjali tar-RDK. Isostni wkoll il-konflitt armat, l-instabbiltà u l-insigurtà fir-reġjun kif ukoll l-abbużi u ksur serji tad-drittijiet tal-bniedem imwettqa minn membri tal-M23. Minħabba l-pożizzjoni ewlenija tiegħu fl-M23, Joseph Musanga Bahati huwa involut fl-ippjanar, id-direzzjoni jew it-twettiq ta’ atti li jikkostitwixxu ksur jew abbużi serji tad-drittijiet tal-bniedem fir-RDK. Huwa responsabbli wkoll għas-sostenn tal-konflitt armat, l-instabbiltà u n-nuqqas ta’ sigurtà fir-RDK.	17.3.2025”