(1)

Il-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta' Fuq, min-naħa l-oħra (“il-Ftehim dwar il-Kummerċ u l-Kooperazzjoni”) (1), ilu japplika mill-1 ta' Jannar 2021. Flimkien mal-Ftehim dwar il-ħruġ tar-Renju Unit tal-Gran Brittanja u l-Irlanda ta' Fuq mill-Unjoni Ewropea u mill-Komunità Ewropea tal-Enerġija Atomika (il-“Ftehim dwar il-Ħruġ”) (2), huwa l-pedament tar-relazzjonijiet bilaterali bejn l-Unjoni u r-Renju Unit tal-Gran Brittanja u l-Irlanda ta' Fuq (ir-“Renju Unit”).

(2)

Fil-31 ta' Diċembru 2020, meta l-perjodu ta' tranżizzjoni previst fil-Ftehim dwar il-Ħruġ intemm, id-dritt tal-Unjoni ma baqax japplika għar-Renju Unit, u l-Protokoll dwar l-Irlanda/l-Irlanda ta' Fuq (issa msejjaħ il-“Qafas ta’ Windsor”) (3), li huwa parti integrali mill-Ftehim dwar il-Ħruġ, beda japplika.

(3)

Mill-1 ta' Jannar 2021, iż-żoni sanitarji u fitosanitarji tal-Unjoni, minn naħa, u tar-Renju Unit, min-naħa l-oħra, ġew separati minn xulxin, u għalhekk japplikaw leġiżlazzjoni u politiki separati. Madankollu, ir-regoli sanitarji u fitosanitarji tal-Unjoni u regoli rilevanti oħra japplikaw għar-Renju Unit u fir-Renju Unit fir-rigward tal-Irlanda ta' Fuq bis-saħħa tal-Qafas ta' Windsor.

(4)

Mill-1 ta' Jannar 2021, l-Unjoni u r-Renju Unit għandhom sistemi separati għall-iskambju ta' kwoti tal-emissjonijiet ta' gassijiet serra, ħlief fl-Irlanda ta' Fuq, fejn tapplika s-sistema tal-Unjoni għall-iskambju ta' kwoti tal-emissjonijiet ta' gassijiet serra sa fejn din hi marbuta mas-swieq tal-elettriku bl-ingrossa f'konformità mal-Artikolu 9 u l-Anness 4 tal-Qafas ta' Windsor.

(5)

L-Artikolu 764 tal-Ftehim dwar il-Kummerċ u l-Kooperazzjoni jipprevedi li l-ġlieda kontra t-tibdil fil-klima tikkostitwixxi element essenzjali tas-sħubija stabbilita mill-Ftehim dwar il-Kummerċ u l-Kooperazzjoni u għandha tikkostitwixxi element essenzjali ta’ ftehimiet supplimentari futuri.

(6)

F’konformità mal-Artikolu 392(6) tal-Ftehim dwar il-Kummerċ u l-Kooperazzjoni, l-Unjoni u r-Renju Unit għandhom jikkunsidraw serjament li jikkollegaw is-sistemi tal-ipprezzar tal-karbonju rispettivi tagħhom b'mod li jippreserva l-integrità ta' dawk is-sistemi u jipprevedi l-possibbiltà li tiżdied l-effettività tagħhom.

(7)

L-Artikolu 25(1a) tad-Direttiva 2003/87/KE tal-Parlament Ewropew u tal-Kunsill (4) jipprevedi l-possibbiltà li jiġu konklużi ftehimiet ma' pajjiżi terzi għar-rikonoxximent reċiproku tal-kwoti bejn is-sistemi għall-iskambju ta' kwoti tal-emissjonijiet ta' gassijiet serra.

(8)

Id-Direttiva 2003/87/KE tirrikjedi li kwalunkwe sistema għall-iskambju ta' kwoti tal-emissjonijiet ta' pajjiżi terzi bħal din tkun obbligatorja u bbażata fuq limiti assoluti tal-emissjonijiet. Dawk il-kriterji bħalissa huma sodisfatti mis-sistema tar-Renju Unit għall-iskambju ta' kwoti tal-emissjonijiet ta' gassijiet serra.

(9)

F’konformità mal-Artikolu 2(4) u (6) tar-Regolament (UE) 2023/956 tal-Parlament Ewropew u tal-Kunsill (5), dak ir-Regolament ma għandux japplika għal merkanzija li toriġina minn pajjiż terz li miegħu l-Unjoni kkonkludiet ftehim li jikkollega bis-sħiħ is-sistema tal-Unjoni għall-iskambju ta' kwoti tal-emissjonijiet u s-sistema għall-iskambju ta' kwoti tal-emissjonijiet ta' dak il-pajjiż terz u li jissodisfa l-kundizzjonijiet rilevanti kollha.

(10)

Bħala parti mill-eżitu tas-summit bejn ir-Renju Unit u l-Unjoni Ewropea tad-19 ta' Mejju 2025, il-Kummissjoni Ewropea rrakkomandat li jinfetħu negozjati mar-Renju Unit għal ftehimiet dwar żona sanitarja u fitosanitarja komuni u dwar il-kollegament tas-sistemi għall-iskambju ta' kwoti tal-emissjonijiet ta’ gassijiet serra tar-Renju Unit u tal-Unjoni.

(11)

Għaldaqstant jenħtieġ li jinfetħu negozjati bil-ħsieb li jiġu konklużi żewġ ftehimiet separati mar-Renju Unit: wieħed dwar żona sanitarja u fitosanitarja komuni u ieħor biex jiġu kollegati s-sistemi għall-iskambju ta' kwoti tal-emissjonijiet ta’ gassijiet serra tar-Renju Unit u tal-Unjoni. Jenħtieġ li l-Kummissjoni tiġi nnominata n-negozjatur tal-Unjoni,