(1)

Il-Kunsill għandu jadotta miżuri dwar l-iffissar u l-allokazzjoni tal-opportunitajiet tas-sajd, inkluż ċerti kundizzjonijiet marbuta funzjonalment mal-opportunitajiet tas-sajd. Skont l-Artikolu 16(4) tar-Regolament (UE) Nru 1380/2013 tal-Parlament Ewropew u tal-Kunsill (1), l-opportunitajiet tas-sajd iridu jiġu ffissati f’konformità mal-objettivi tal-politika komuni tas-sajd (PKS) stipulati fl-Artikolu 2(2) ta’ dan ir-Regolament. Skont l-Artikolu 16(1) tar-Regolament (UE) Nru 1380/2013, l-opportunitajiet tas-sajd iridu jiġu allokati bejn l-Istati Membri b’tali mod li tiġi żgurata l-istabbiltà relattiva tal-attivitajiet tas-sajd ta’ kull Stat Membru għal kull stokk jew tip ta’ sajd.

(2)

Jenħtieġ għalhekk li l-qabdiet totali permissibbli (TAC) jiġu stabbiliti, f’konformità mal-Artikolu 3 tar-Regolament (UE) Nru 1380/2013, abbażi tal-aħjar parir xjentifiku disponibbli, filwaqt li jitqiesu l-aspetti bijoloġiċi u soċjoekonomiċi u jiġi żgurat ukoll trattament ġust bejn is-setturi tas-sajd, u fid-dawl tal-opinjonijiet espressi matul il-konsultazzjoni mal-partijiet ikkonċernati.

(3)

Ir-Regolament (UE) 2016/1139 tal-Parlament Ewropew u tal-Kunsill (2) jistabbilixxi pjan pluriennali għall-istokkijiet tal-bakkaljaw (Gadus morhua), l-aringi (Clupea harengus) u l-laċċ ikħal (Sprattus sprattus) fil-Baħar Baltiku u s-sajd li jisfrutta dawk l-istokkijiet. F’konformità mal-Artikolu 3(1) ta’ dak ir-Regolament, dak il-pjan għandu l-għan li jikkontribwixxi għall-ilħuq tal-objettivi tal-PKS. Il-pjan għandu wkoll l-għan li jiżgura li l-isfruttament tar-riżorsi bijoloġiċi tal-baħar jirrestawra u jżomm il-popolazzjonijiet tal-ispeċijiet mistada ’l fuq mil-livelli li jistgħu jipproduċu r-rendiment massimu sostenibbli (MSY). Il-pjan għandu wkoll l-għan li jikkontribwixxi biex jiġi żgurat li l-attivitajiet tas-sajd u tal-akkwakultura jkunu ambjentalment sostenibbli fit-tul u jkunu ġestiti b’mod li jkun konsistenti mal-objettivi li jinkisbu benefiċċji ekonomiċi, soċjali, u tal-impjiegi, u li jikkontribwixxu għad-disponibbiltà tal-provvisti tal-ikel. Dawn l-objettivi, kif speċifikat ulterjorment fl-Artikolu 2(5), il-punti (c) u (f), tar-Regolament (UE) Nru 1380/2013, jinkludu kundizzjonijiet mogħtija lil industrija tas-sajd, tal-qbid u tal-ipproċessar biex tkun vijabbli u kompetittiva u għal attivitajiet relatati mas-sajd u bbażati fuq l-art. Barra dan, għandhom l-għan li jiżguraw standard tal-għajxien ġust għal dawk dipendenti fuq l-attivitajiet tas-sajd, b’mod partikolari meta jitqiesu s-sajd kostali u l-aspetti soċjoekonomiċi.

(4)

Fit-28 ta’ Mejju 2025, il-Kunsill Internazzjonali għall-Esplorazzjoni tal-Baħar (ICES) ippubblika l-parir dwar l-istokkijiet annwali tiegħu għall-istokkijiet tal-Baltiku għall-2026. Għall-bakkaljaw tal-Baltiku tal-Lvant, l-ICES sempliċiment ħareġ mill-ġdid il-parir tiegħu mogħti preċedentement għall-2025. Skont l-ICES, il-biċċa l-kbira tas-sajd fil-Baħar Baltiku għandu mill-anqas ċertu grad ta’ taħlit bejn l-istokkijiet. Dak it-taħlit jikkonċerna kemm stokkijiet ġestiti minn TAC kif ukoll stokkijiet mhux ġestiti minn TAC. L-aktar grad importanti ta’ taħlit iseħħ fost l-ispeċijiet pelaġiċi u l-ispeċijiet demersali.

(5)

Għall-2026, l-ICES jagħti l-parir ta’ qabdiet żero għall-aringa tal-Baltiku tal-Punent, għall-bakkaljaw tal-Baltiku tal-Lvant u tal-Punent, u għas-salamun (Salmo salar) fis-suddiviżjonijiet 22 sa 31 tal-ICES (“salamun fil-baċir ewlieni”). Il-bakkaljaw jinqabad b’mod aċċessorju fis-sajd kollu, l-aringa tal-Punent tinqabad b’mod aċċessorju fis-sajd dirett għal-laċċa kaħla, u s-salamun fil-baċir ewlieni jinqabad b’mod aċċessorju f’diversi sajd. Għalhekk, jekk it-TACs għal dawk l-istokkijiet kienu stabbiliti fil-livelli rrakkomandati mill-ICES, l-obbligu li jinħattu l-art il-qabdiet kollha ta’ dawk l-istokkijiet, inkluż il-qabdiet aċċessorji tagħhom fis-sajd imħallat, iwassal għall-fenomenu tal-ispeċijiet bi kwota limitanti. “Speċijiet bi kwota limitanti” huma speċijiet b’nuqqas ta’ kwota li tista’ twassal biex bastiment tas-sajd wieħed jew diversi bastiment tas-sajd jieqfu jistadu anke jekk xorta jkun baqgħalhom kwota għal speċijiet oħrajn. Sitwazzjoni ta’ kwoti limitanti taffettwa b’mod partikolari l-bastimenti li jistadu għall-pixxiċatt u għall-ispeċijiet pelaġiċi, u potenzjalment iġġegħilhom iwaqqfu l-operazzjonijiet tas-sajd fl-2026 u twassal għal għeluq prematur ta’ dak is-sajd. Abbażi tad-data mill-Osservatorju Ewropew tas-Suq tal-Prodotti tas-Sajd u tal-Akkwakultura, l-istima tal-valur tal-ewwel bejgħ għas-sajd tal-barbun tat-tbajja’ (Pleuronectes platessa), tal-laċċa kaħla u tal-aringa rilevanti li jistgħu jinqabdu fil-limiti tat-TACs u li mistennija jinqabdu fiż-żona tas-sajd rispettiva rilevanti hija ta’ EUR 25 300 000, EUR 55 700 000 u EUR 43 400 000, rispettivament. Ħafna mis-sajd, b’mod partikolari s-sajd kostali fuq skala żgħira għal speċijiet mhux ġestiti minn TAC, ikun jeħtieġ ukoll il-waqfien tal-operazzjonijiet tas-sajd fl-2026. Sabiex jinkiseb bilanċ bejn iż-żamma tas-sajd, minħabba l-implikazzjonijiet soċjoekonomiċi potenzjalment severi jekk dan ma jinstabx u tal-ħtieġa li jinkiseb status bijoloġiku tajjeb għal dawk l-istokkijiet, u filwaqt li titqies id-diffikultà tas-sajd għall-istokkijiet kollha f’sajd imħallat b’MSY, jixraq li t-TACs jinżammu esklużivament għal qabdiet aċċessorji inevitabbli għall-aringa tal-Baltiku tal-Punent, għall-bakkaljaw tal-Baltiku tal-Lvant u tal-Punent, u għas-salamun fil-baċir ewlieni.

(6)

Fir-rigward tal-istokk tal-bakkaljaw tal-Baltiku tal-Lvant, l-ICES ta l-parir ta’ qabdiet żero għal dak l-istokk sa mill-2019. Peress li l-istokk għadu fl-istess stat kritiku l-ICES reġa’ ħareġ għall-2026 il-parir tiegħu mogħti preċedentement għall-2025, li fih l-ICES wera fiduċja dwar ix-xejriet fil-bijomassa tal-istokk u l-bijomassa kienet għadha ferm taħt il-punt ta’ referenza dwar konservazzjoni (Blim), li taħtu jista’ jkun hemm kapaċità riproduttiva mnaqqsa. Għalhekk, f’konformità mal-Artikolu 3(1) tar-Regolament (UE) 2016/1139 u mal-Artikolu 16(4) tar-Regolament (UE) Nru 1380/2013, jixraq li jiġi sospiż is-sajd dirett, u li jiġu adottati miżuri rimedjali marbuta funzjonalment. F’konformità mal-Artikolu 2(1) u mal-Artikolu 2(5), il-punti (c) u (f) tar-Regolament (UE) Nru 1380/2013, jenħtieġ li l-opportunitajiet tas-sajd għal qabdiet aċċessorji inevitabbli jiġu stabbiliti f’livell baxx sabiex jiġu evitati l-implikazzjonijiet soċjoekonomiċi potenzjalment severi li jirriżultaw jekk l-opportunitajiet tas-sajd jiġu stabbiliti għal żero.

(7)

Fir-rigward tal-istokk tal-bakkaljaw tal-Baltiku tal-Punent, wara li ta l-parir ta’ livell baxx ta’ qabdiet għal diversi snin, l-ICES ta l-parir ta’ qabdiet żero għall-2026 minħabba li l-istima tal-bijomassa tal-istokk tinsab taħt il-Blim fl-2025 u li mhux ser tirkupra ’l fuq mill-Blim fl-2027. Għalhekk, f’konformità mal-Artikolu 3(1) tar-Regolament (UE) 2016/1139 u mal-Artikolu 16(4) tar-Regolament (UE) Nru 1380/2013, jixraq li jiġi sospiż is-sajd dirett u li jiġu adottati miżuri rimedjali marbuta funzjonalment. F’konformità mal-Artikolu 2(1) u mal-Artikolu 2(5), il-punti (c) u (f) tar-Regolament (UE) Nru 1380/2013, jenħtieġ li l-opportunitajiet tas-sajd għal qabdiet aċċessorji inevitabbli jiġu stabbiliti f’livell baxx biex jiġu evitati l-konsegwenzi soċjoekonomiċi li jirriżultaw jekk l-opportunitajiet tas-sajd jiġu stabbiliti għal żero.

(8)

Fir-rigward tas-salamun fil-baċir ewlieni, l-ICES żamm il-parir tiegħu ta’ ebda qbid, waqt li għall-2026, qies il-possibbiltà li sajd kostali kummerċjali u rikreattiv dirett jibqa’ jsir fis-sajf fiż-żona lejn it-Tramuntana tal-latitudni 59o 30′ N (is-suddiviżjonijiet tal-ICES minn 29 fit-Tramuntana sa 31). L-ICES naqqas ukoll il-parir dwar qabdiet tiegħu meta mqabbel mal-2025 minħabba inċertezzi addizzjonali dwar l-abbundanza tas-salamun fil-baċir ewlieni fix-xmara tas-salamun fil-baċir ewlieni l-aktar importanti. Għalhekk, f’konformità mal-Artikolu 16(4) tar-Regolament (UE) Nru 1380/2013, jixraq li jiġi stabbilit il-livell tal-opportunitajiet tas-sajd u ż-żona u l-perjodu tas-sajd f’konformità mal-parir tal-ICES, u li jinżammu l-miżuri rimedjali marbuta funzjonalment.

(9)

Sabiex jiġi żgurat l-użu sħiħ tal-opportunitajiet tas-sajd kostali għas-salamun fis-suddiviżjoni 32 tal-ICES, jixraq li tiġi permessa l-flessibbiltà limitata bejn iż-żoni għas-salamun bejn is-suddiviżjonijiet 22 sa 31 tal-ICES u s-suddiviżjoni 32 tal-ICES.

(10)

Sabiex jitnaqqas ir-riskju li s-salamun jiġi rrapportat ħażin bħala trota tal-baħar fis-sajd għas-salamun, jixraq li s-sajd għat-trota tal-baħar jiġi pprojbit lil hinn minn 4 mili nawtiċi mkejla mil-linji bażi, u li l-qabdiet aċċessorji tat-trota tal-baħar jiġu limitati għal 3 % tal-qabda kombinata tat-trota tal-baħar u tas-salamun.

(11)

Jenħtieġ li l-miżuri dwar is-sajd rikreattiv tal-bakkaljaw u tas-salamun fil-baċir ewlieni u l-miżuri għall-konservazzjoni tal-istokkijiet tat-trota tal-baħar u tas-salamun ikunu mingħajr preġudizzju għall-miżuri nazzjonali aktar stretti adottati f’konformità mal-Artikoli 19 u 20 tar-Regolament (UE) Nru 1380/2013.

(12)

Fir-rigward tal-aringa fil-Golf tal-Botnja, l-ICES jistma li l-bijomassa kompliet tonqos u issa tinsab fin-nofs bejn il-Blim u l-punt ta’ referenza dwar konservazzjoni (MSY Btrigger), li taħtu għandhom jittieħdu miżuri rimedjali xierqa biex jiġi żgurat ir-ritorn rapidu tal-istokk għal livelli ogħla minn dawk li kapaċi jipproduċu l-MSY. L-ICES isemmi wkoll inċertezzi fl-istima tal-gruppi ta’ età żgħira u tal-piż skont l-età. Barra minn hekk, l-ICES ikompli jinnota li l-proporzjon ta’ individwi akbar fl-età fil-popolazzjoni x’aktarx li ma jiżdiedx jekk l-opportunitajiet tas-sajd jiġu stabbiliti fil-valur tal-punt FMSY. Barra dan, l-ICES jinnota li l-istokk x’aktarx huwa vulnerabbli għat-telf tad-diversità ġenetika. Għalhekk, f’konformità mar-Regolament (UE) 2016/1139, jixraq li jiġu stabbiliti l-opportunitajiet tas-sajd skont dan u jiġi stabbilit perjodu ta’ għeluq ta’ 3 xhur fiż-żmien riproduttiv bħala miżura rimedjali marbuta funzjonalment.

(13)

Fir-rigward tal-aringa tal-Baltiku tal-Punent, l-ICES jagħti l-parir ta’ qabdiet żero għal dak l-istokk għat-tmien sena konsekuttiva. Kif kien il-każ fl-2024, l-ICES irreveda l-istimi tal-bijomassa ’l isfel għas-snin preċedenti u jistma li l-bijomassa hija biss 52 % tal-Blim fl-2025, anke jekk din żdiedet kontinwament mill-2021. Barra dan, ir-reklutaġġ għadu f’livelli storikament baxxi u l-bijomassa ma hijiex mistennija tirkupra ’l fuq mill-Blim fl-2027. F’konformità mal-Artikolu 2(1) u mal-Artikolu 2(5), il-punti (c) u (f) tar-Regolament (UE) Nru 1380/2013, jenħtieġ ukoll li l-opportunitajiet tas-sajd għal qabdiet aċċessorji inevitabbli jiġu stabbiliti f’livell baxx sabiex jiġu evitati l-konsegwenzi soċjoekonomiċi li jirriżultaw jekk l-opportunitajiet tas-sajd jiġu stabbiliti għal żero.

(14)

Fir-rigward tal-aringa tal-Baltiku ċentrali, l-ICES jistma li l-istokk kien taħt il-Blim għall-biċċa l-kbira ta’ dawn l-aħħar 30 sena. L-ICES jistma li, minħabba żieda fil-piż skont l-età u reklutaġġ aktar b’saħħtu fl-2022, l-istokk ilu ’l fuq mill-Blim mill-2024, iżda għadu ferm taħt l-MSY Btrigger. L-ICES jistma li r-reklutaġġ fl-2024 u fl-2025 jista’ jkun b’saħħtu, iżda jissottolinja li dawn l-istimi huma inċerti. Ir-reklutaġġ fl-2023 huwa taħt il-medja. Barra minn hekk, l-ICES ifakkar li r-rapportar ħażin kontinwu tal-ispeċijiet qed iżid l-inċertezza tal-parir. Għalhekk, f’konformità mar-Regolament (UE) 2016/1139, jixraq li jiġu stabbiliti l-opportunitajiet tas-sajd skont dan u jiġi stabbilit perjodu ta’ għeluq ta’ 3 xhur fiż-żmien riproduttiv bħala miżura rimedjali marbuta funzjonalment.

(15)

Fir-rigward tal-aringa fil-Golf ta’ Riga u l-barbun tat-tbajja’, l-ICES jistma li l-bijomassa hija ’l fuq mill-MSY Btrigger u li l-pressjoni tas-sajd hija taħt l-FMSY. Għalhekk, f’konformità mar-Regolament (UE) 2016/1139, jixraq li l-opportunitajiet tas-sajd jiġu stabbiliti skont dan.

(16)

Fir-rigward tal-laċċa kaħla, l-ICES jistma li, filwaqt li l-bijomassa għadha ’l fuq mill-MSY Btrigger, il-bijomassa kompliet tonqos minħabba reklutaġġ storikament baxx konfermat mill-2021 sal-2023. Il-bijomassa fl-2025 hija stmata li ser tkun fl-aktar livell baxx tagħha mill-1990, u qrib l-MSY Btrigger. L-ICES jistma li r-reklutaġġ fl-2024 seta’ kien eċċezzjonalment għoli, iżda jissottolinja li l-istima hija inċerta u li jista’ jkun li l-probabbiltà li l-bijomassa tkun taħt il-punti ta’ referenza dwar konservazzjoni hija ssottovalutata. Barra minn hekk, l-ICES ifakkar li r-rapportar ħażin li għadu jsir għall-ispeċijiet qed iżid l-inċertezza tal-parir. Għalhekk, f’konformità mar-Regolament (UE) 2016/1139, jixraq li jiġu stabbiliti l-opportunitajiet tas-sajd skont dan u li jinżamm perjodu ta’ għeluq ta’ 3 xhur fiż-żmien riproduttiv.

(17)

L-użu tal-opportunitajiet tas-sajd stabbiliti f’dan ir-Regolament ser ikun immonitorjat u kkontrollat f’konformità mar-Regolament tal-Kunsill (KE) Nru 1224/2009 (3), b’mod partikolari l-Artikoli 33 u 34 tiegħu, li jikkonċerna r-reġistrazzjoni tal-qabdiet u l-isforz tas-sajd, u n-notifika ta’ data dwar l-eżawriment tal-opportunitajiet tas-sajd lill-Kummissjoni. Għalhekk jeħtieġ li jiġu speċifikati l-kodiċijiet użati mill-Istati Membri meta jibagħtu d-data lill-Kummissjoni dwar ħatt l-art tal-istokkijiet koperti b’dan ir-Regolament.

(18)

L-Artikoli 3 u 4 tar-Regolament tal-Kunsill (KE) Nru 847/96 (4) jipprevedu flessibbiltà minn sena għal sena għal kwoti ta’ stokkijiet soġġetti kemm għal TACs prekawzjonarji kif ukoll għal dawk analitiċi. Skont l-Artikolu 2 ta’ dak ir-Regolament, meta jiffissa t-TACs, il-Kunsill għandu jiddeċiedi l-istokkijiet li għalihom ma japplikawx l-Artikoli 3 u 4, b’mod partikolari abbażi tal-istatus bijoloġiku tagħhom. Barra minn hekk, l-Artikolu 15(9) tar-Regolament (UE) Nru 1380/2013 jipprevedi aktar flessibbiltà minn sena għal sena għall-istokkijiet kollha li huma soġġetti għall-obbligu ta’ ħatt l-art. Sabiex tiġi evitata flessibbiltà eċċessiva li timmina l-ilħuq tal-objettivi tal-PKS, jenħtieġ li l-flessibbiltà minn sena għal sena għall-kwoti skont l-Artikoli 3 u 4 tar-Regolament (KE) Nru 847/96 u l-Artikolu 15(9) tar-Regolament (UE) Nru 1380/2013 ma tapplikax b’mod kumulattiv. Jenħtieġ li l-flessibbiltà minn sena għal sena skont l-Artikolu 15(9) tar-Regolament (UE) Nru 1380/2013, meta rilevanti, tiġi eskluża abbażi tal-istatus bijoloġiku tal-istokkijiet.

(19)

Il-bijomassa tal-istokkijiet tal-bakkaljaw tal-Baltiku tal-Lvant, tal-bakkaljaw tal-Baltiku tal-Punent u tal-aringa tal-Baltiku tal-Punent tinsab taħt il-Blim. Għal dawn l-istokkijiet kollha, fl-2026, jenħtieġ li jiġu permessi biss il-qabdiet aċċessorji u s-sajd xjentifiku. Għalhekk, u minħabba r-reżiljenza relattivament baxxa tal-ekosistema tal-Baħar Baltiku, l-Istati Membri li għandhom sehem mill-kwota tat-TACs rispettivi ħadu l-impenn li fl-2026 ma japplikawx il-flessibbiltà minn sena għal sena skont l-Artikolu 15(9) tar-Regolament (UE) Nru 1380/2013 għal dawk l-istokkijiet sabiex il-qabdiet fl-2026, ma jaqbżux it-TACs rispettivi. Barra dan, fin-Nofsinhar tal-latitudni 59o 30′ N, il-bijomassa ta’ kważi l-istokkijiet kollha tas-salamun fil-baċir ewlieni tax-xmajjar tinsab taħt il-punt ta’ referenza ta’ limitu għall-produzzjoni tas-salamun żgħir (Rlim) u fl-2026 huma permessi l-qabdiet aċċessorji u s-sajd xjentifiku biss. L-Istati Membri rilevanti ħadu għalhekk impenn simili rigward il-flessibbiltà minn sena għal sena b’rabta mal-qabdiet tas-salamun fil-baċir ewlieni fl-2026.

(20)

Ir-Regolament tal-Kunsill (UE) 2025/202 (5) jistabbilixxi t-TAC għall-merluzz tan-Norveġja (Trisopterus esmarkii) fid-diviżjoni 3a tal-ICES (Skagerrak-Kattegat), fl-ilmijiet tar-Renju Unit u tal-Unjoni tas-subżona 4 tal-ICES u fl-ilmijiet tar-Renju Unit tad-diviżjoni 2a tal-ICES (il-Baħar tat-Tramuntana). L-Unjoni u r-Renju Unit kellhom konsultazzjonijiet bilaterali fl-20 ta’ Ottubru 2025 dwar it-TAC għall-merluzz tan-Norveġja f’dawk iż-żoni għall-perjodu mill-1 ta’ Novembru 2025 sal-31 ta’ Ottubru 2026. Dawk il-konsultazzjonijiet saru skont l-Artikolu 498(2) tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (6). L-Unjoni ħadet sehem f’dawk il-konsultazzjonijiet abbażi tal-ispeċifikazzjonijiet għall-pożizzjoni tal-Unjoni approvati mill-Kunsill fl-14 ta’ Ottubru 2025, skont l-Artikolu 2 tad-Deċiżjoni tal-Kunsill (UE) 2021/1875 (7). L-Unjoni u r-Renju Unit qablu dwar TAC abbażi tal-parir tal-ICES għall-merluzz tan-Norveġja fis-subżona 4 u fid-diviżjoni 3a tal-ICES għal dak il-perjodu, liema pariri ġie ppubblikat fl-10 ta’ Ottubru 2025. L-eżitu tal-konsultazzjonijiet ġie ddokumentat fir-Rekord bil-Miktub, li ġie ffirmat mill-Kapijiet tad-Delegazzjonijiet tal-Unjoni u tar-Renju Unit fl-24 ta’ Ottubru 2025.Jenħtieġ li t-TAC għall-perjodu mill-1 ta’ Novembru 2025 sal-31 ta’ Ottubru 2026 tiġi iffissata fil-livell stabbilit f’dak ir-Rekord bil-Miktub.

(21)

Ir-Regolament (UE) 2025/202 jistabbilixxi l-qabda totali permissibbli (TAC) għall-alonga (Thunnus alalunga) fil-Baħar Mediterran għall-2025. Fid-29 ta’ Settembru 2025, it-Turkija qablet li tittrasferixxi lill-Unjoni 50 kg tal-kwota tagħha għall-alonga fil-Baħar Mediterran għall-2025, f’konformità mar-regoli applikabbli adottati mill-Kummissjoni Internazzjonali għall-Konservazzjoni tat-Tonn tal-Atlantiku fir-rigward tat-trasferimenti. Jenħtieġ li dak it-trasferiment jiġi implimentat fid-dritt tal-Unjoni.

(22)

Għalhekk jenħtieġ li r-Regolament (UE) 2025/202 jiġi emendat kif xieraq.

(23)

Sabiex tiġi evitata l-interruzzjoni tal-attivitajiet tas-sajd u jitħares l-għajxien tas-sajjieda, jenħtieġ li d-dispożizzjonijiet ta’ dan ir-Regolament relatati mal-Baħar Baltiku japplikaw mill-1 ta’ Jannar 2026.Jenħtieġ li d-dispożizzjonijiet li jemendaw ir-Regolament (UE) 2025/202 relatati mal-merluzz tan-Norveġja fi Skagerrak-Kattegat u fil-Baħar tat-Tramuntana japplikaw b’mod retroattiv mill-1 ta’ Novembru 2025 sal-31 ta’ Ottubru 2026, billi dak huwa l-istaġun tas-sajd għall-merluzz tan-Norveġja. Jenħtieġ li d-dispożizzjonijiet li jemendaw ir-Regolament (UE) 2025/202 marbuta mal-alonga tal-Mediterran japplikaw b’mod retroattiv mill-1 ta’ Jannar 2025 sabiex jinżamm il-perjodu ta’ rappurtar għat-TAC, li beda japplika mill-1 ta’ Jannar 2025. Tali applikazzjoni retroattiva ma taffettwax il-prinċipji taċ-ċertezza legali u l-protezzjoni tal-aspettattivi leġittimi, għaliex il-kwoti skont dawk it-TACs għadhom ma ġewx eżawriti, jew żdiedu. Għal raġunijiet ta’ urġenza, jenħtieġ li dan ir-Regolament jidħol fis-seħħ immedjatament wara l-pubblikazzjoni tiegħu f’Il-Ġurnal Uffiċjali tal-Unjoni Ewropea,