(1)

Permezz tal-ittra tas-17 ta’ Jannar 2022, l-awtoritajiet Franċiżi infurmaw lill-Kummissjoni li l-Bord tat-Trasport ta’ Korsika (“l-OTC”, “Office des transports de la Corse”) kien ħa passi sabiex jiddetermina jekk kienx hemm ħtieġa ta’ servizz pubbliku relatata mas-servizzi marittimi bejn Korsika u Franza kontinentali. Il-Kummissjoni fetħet proċedura ta’ qabel in-notifika fid-19 ta’ Jannar 2022, irreġistrata taħt SA.101557. L-awtoritajiet Franċiżi bagħtu l-osservazzjonijiet inizjali tagħhom lill-Kummissjoni permezz ta’ ittri tad-19, tal-25 u tas-27 ta’ Jannar 2022.

(2)

Permezz ta’ ittri u ittri elettroniċi tal-4 u tal-15 ta’ Frar u tat-22 ta’ Marzu 2022, il-Kummissjoni talbet informazzjoni addizzjonali mingħand l-awtoritajiet Franċiżi. L-awtoritajiet Franċiżi ssottomettew it-tweġibiet tagħhom fil-15 ta’ Frar, u fis-7 u fil-31 ta’ Marzu 2022.

(3)

Permezz tal-ittri tal-15 ta’ Marzu, tat-8 ta’ April, u tad-19 u tal-20 ta’ Mejju 2022, l-awtoritajiet Franċiżi infurmaw lill-Kummissjoni bil-pjanijiet tagħhom li jagħtu ħames kuntratti pubbliċi ta’ servizz, għal perjodu ta’ 8 snin (2023-2030), għat-trasport marittimu ta’ merkanzija u ta’ passiġġieri bejn il-port ta’ Marsilja u kull wieħed mill-ħames portijiet ta’ Ajaccio, ta’ Bastia, ta’ Porto-Vecchio, ta’ Propriano u tal-L’Île-Rousse (“il-PSCs”, “Public Service Contracts”, jew “il-miżuri”).

(4)

Permezz tal-ittri u l-ittri elettroniċi tal-20 ta’ April, tat-30 ta’ Mejju, tat-12 ta’ Lulju, tal-11 ta’ Awwissu, tat-3, tat-18, tal-21, tat-23 u tat-30 ta’ Novembru, u tal-1 u tat-2 ta’ Diċembru 2022, il-Kummissjoni talbet informazzjoni addizzjonali mingħand l-awtoritajiet Franċiżi. Huma ssottomettew it-tweġibiet tagħhom bl-ittri u bl-ittri elettroniċi tas-7 u tat-22 ta’ Ġunju, tat-22 u tas-27 ta’ Lulju, tal-10, tat-13 u tal-14 ta’ Ottubru, tat-8, tal-10, tal-11, tas-17, tat-22, tal-24, tal-25 u tat-30 ta’ Novembru, u tal-1 u tat-2 ta’ Diċembru 2022.

(5)

Matul il-fażi ta’ qabel in-notifika, il-Kummissjoni u l-awtoritajiet Franċiżi organizzaw laqgħat fl-1, fis-17 u fit-22 ta’ Frar, fit-18 ta’ Marzu, fil-5 ta’ April, fit-28 ta’ Ġunju, fil-11 ta’ Lulju, u fil-15, fil-21 u fit-30 ta’ Novembru 2022. Bi tħejjija għal dawn il-laqgħat jew wara li seħħew, l-awtoritajiet Franċiżi pprovdew informazzjoni addizzjonali fil-21 ta’ Frar, fit-22 ta’ Marzu u fit-12 ta’ Lulju 2022.

(6)

Fl-istess ħin, il-Kummissjoni rċiviet informazzjoni ġenerali mingħand parti terza fl-14 ta’ April, fis-17, fil-21, fit-22 u fit-30 ta’ Ġunju, fil-25 ta’ Lulju, fit-2 u fit-30 ta’ Settembru, fil-5 u fis-26 ta’ Ottubru u fit-2 ta’ Diċembru 2022, kif ukoll fit-30 u fil-31 ta’ Jannar 2023.

(7)

Fis-27 ta’ Diċembru 2022, l-awtoritajiet Franċiżi nnotifikaw lill-Kummissjoni dwar il-PSCs b’mod elettroniku. Peress li din in-notifika ma kinitx kompluta, il-Kummissjoni talbet informazzjoni addizzjonali mingħand l-awtoritajiet Franċiżi fis-16 ta’ Frar 2023. L-awtoritajiet Franċiżi ssupplimentaw in-notifika tagħhom bl-ittri elettroniċi tal-5 ta’ April u tat-2 ta’ Mejju 2023.

(8)

Fit-23 ta’ Marzu 2023, Corsica Ferries ressqet ilment formali lill-Kummissjoni li bih ikkontestat il-legalità u l-kompatibbiltà tal-miżuri fir-rigward, b’mod partikolari, tal-liġi dwar l-għajnuna mill-Istat.

(9)

Il-Kummissjoni bagħtet l-ilment lill-awtoritajiet Franċiżi u talbet informazzjoni addizzjonali fil-11 ta’ April u fil-5 ta’ Ġunju 2023. L-awtoritajiet Franċiżi pprovdew il-kummenti tagħhom dwar l-ilment u informazzjoni addizzjonali fit-28 ta’ Ġunju, fit-28 ta’ Lulju u fis-27 ta’ Ottubru 2023.

(10)

Corsica Ferries ipprovdiet ukoll informazzjoni addizzjonali dwar l-ilment tagħha permezz tal-ittri elettroniċi tat-13 ta’ Ottubru u tal-20 ta’ Diċembru 2023. Il-Kummissjoni bagħtet dik l-informazzjoni addizzjonali lill-awtoritajiet Franċiżi fil-21 ta’ Diċembru 2023, u l-awtoritajiet Franċiżi wieġbu għaliha permezz ta’ ittra elettronika fis-6 ta’ Frar 2024.

(11)

Permezz ta’ deċiżjoni datata t-23 ta’ Frar 2024, il-Kummissjoni informat lill-awtoritajiet Franċiżi li hija kienet iddeċidiet li tibda l-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea (“TFUE”) fir-rigward tal-PSCs (“id-deċiżjoni tal-ftuħ”).

(12)

Id-deċiżjoni tal-ftuħ ġiet ippubblikata f’Il-Ġurnal Uffiċjali tal-Unjoni Ewropea (2). Il-Kummissjoni stiednet lill-awtoritajiet Franċiżi u lill-partijiet interessati sabiex jissottomettu il-kummenti tagħhom dwar il-PSCs.

(13)

Il-Kummissjoni rċiviet kummenti mingħand l-awtoritajiet Franċiżi fis-27 ta’ Marzu 2024. Wara li rċeviet dawk il-kummenti, il-Kummissjoni bagħtet talbiet għal informazzjoni lill-awtoritajiet Franċiżi fit-23 ta’ April, fit-13 u fit-30 ta’ Mejju, fl-14 u fil-21 ta’ Ġunju, fit-2 u fid-9 ta’ Lulju, u l-awtoritajiet Franċiżi wieġbu għalihom fit-23 u fil-31 ta’ Mejju, fit-13 ta’ Ġunju u fid-9, fil-11, fit-12 u fis-17 ta’ Lulju 2024, rispettivament.

(14)

Il-Kummissjoni rċiviet kummenti mingħand diversi partijiet interessati, jiġifieri Corsica Ferries (it-22 ta’ April 2024), Corsica Linea (id-29 ta’ April 2024), La Méridionale (id-29 ta’ April 2024) u l-Grupp Stef (id-29 ta’ April 2024) (3).

(15)

Il-Kummissjoni bagħtet lil Franza l-kummenti ta’ Corsica Ferries (fit-23 ta’ April 2024), u minn Corsica Linea, La Méridionale u l-Grupp Stef (fit-30 ta’ April 2024), u tatha l-opportunità li tirreaġixxi għal dawk il-kummenti. Franza wieġbet għall-kummenti ta’ Corsica Ferries fil-25 ta’ Ġunju u fil-11 ta’ Lulju 2024. Ma xtaqitx tikkummenta dwar is-sottomissjonijiet mill-partijiet interessati l-oħrajn.

(16)

Korsika hija gżira Franċiża li tinsab fil-Baħar Mediterran. Hija kkaratterizzata minn art muntanjuża, minn żoni protetti u b’mod partikolari minn żoni rurali kbar (4). Il-gżira għandha popolazzjoni ta’ kważi 350 000 abitant, li minnhom madwar 53 % jgħixu f’żoni urbani u 47 % f’żoni rurali (5). Din il-ġeografija restrittiva tagħmel lil Korsika wieħed mill-anqas reġjuni b’popolazzjoni densa fi Franza, b’densità tal-popolazzjoni ta’ 39 abitant għal kull km2. Din hija ferm anqas mill-medja Franċiża ta’ 105 abitant għal kull km2 (6).

(17)

Id-densità baxxa tal-popolazzjoni tfisser li hemm distanzi sinifikanti għall-ivvjaġġar bejn id-djar u l-postijiet tax-xogħol jew il-postijiet tad-divertiment. F’Korsika jsiru aktar vjaġġi u vjaġġi itwal meta mqabbla mal-medja nazzjonali (7). Barra minn hekk, skont l-INSEE (“L’Institut national de la statistique et des études économiques”), (8) it-topografija u n-natura rurali tal-muniċipalitajiet u l-iskarsezza tat-trasport pubbliku jfissru li jintużaw aktar vetturi personali għal vjaġġi ta’ kuljum (86 % meta mqabbla ma’ 72 % fi Franza metropolitana) (9).

(18)

Korsika ma għandha l-ebda infrastruttura tal-awtostradi. Għandha network tat-toroq limitat li jikkonsisti f’madwar 10 toroq territorjali kif ukoll f’toroq sussidjarji. Dawn it-toroq fihom ħafna liwjiet u jikkontribwixxu għal ħinijiet tal-ivvjaġġar itwal, (10) jikkumplikaw il-kundizzjonijiet tat-traffiku, (11) u jżidu r-riskju ta’ aċċidenti tat-traffiku. Korsika għandha l-ogħla rata ta’ fatalitajiet fit-toroq fi Franza (12). Skont l-Osservatorju Franċiż għas-Sikurezza fit-Toroq, dawn il-karatteristiċi huma aggravati mit-turiżmu. L-Osservatorju jistma li kull sena l-wasla u t-tluq ta’ madwar 500 000 karozza ttrasportata fuq servizzi marittimi skedati kważi jirdoppja t-traffiku medju ta’ kuljum fit-toroq ta’ Korsika matul il-perjodu tas-sajf (13).

(19)

L-ekonomija ta’ Korsika hija essenzjalment ibbażata fuq is-settur terzjarju (14). Fost is-servizzi tagħha, it-turiżmu (15) u l-bejgħ bl-imnut (16) huma fost il-muturi ewlenin tal-ġid u tal-ħolqien tax-xogħol fil-gżira. L-ekonomija lokali hija dipendenti ħafna fuq l-importazzjonijiet minn Franza kontinentali. Fl-2019, l-importazzjonijiet minn Franza kontinentali kienu kważi ħames darbiet ogħla mill-esportazzjonijiet (17).

(20)

Fl-opinjoni tagħha tas-17 ta’ Novembru 2020 dwar il-konċentrazzjoni tas-swieq f’Korsika u l-impatt assoċjat fuq il-kompetizzjoni lokali (“l-opinjoni tal-awtorità tal-kompetizzjoni”), (18) l-awtorità tal-kompetizzjoni Franċiża tiddikjara li “l-insularità hija l-limitazzjoni speċifika ewlenija fuq l-iżvilupp tal-ekonomija tal-gżira, peress li l-aċċess għas-swieq jista’ jitnaqqas b’kostijiet addizzjonali kkawżati mill-iżolament ġeografiku” (19). Għalhekk, l-awtorità tal-kompetizzjoni tqis li “l-insularità u d-distanza ġeografika minn Franza kontinentali jżidu l-kostijiet tal-provvista, peress li l-użu tat-trasport marittimu huwa strutturalment aktar għali”. Għalhekk, “l-operaturi ekonomiċi huma ristretti minn katina tal-provvista aktar kumplessa milli fuq l-art kontinentali” (20).

(21)

Pereżempju, fis-settur tad-distribuzzjoni tal-fjuwil, l-awtorità tal-kompetizzjoni tinnota diskrepanza sinifikanti bejn il-prezz tal-fjuwil imħallas mill-konsumaturi f’Korsika u dak imħallas fi Franza kontinentali (21). Skont l-awtorità tal-kompetizzjoni, dik id-differenza hija parzjalment spjegata mill-fatt li Korsika hija fornita bi fjuwil bil-baħar biss, u dan iżidilha l-prezz finali. It-trasport tal-fjuwils bit-triq għall-istazzjonijiet ta’ servizz huwa aktar għali wkoll, peress li t-terren muntanjuż iżid iż-żmien tat-trasport. Fl-aħħar nett, in-natura staġunali tad-domanda marbuta mal-istaġun turistiku tas-sajf tfisser li l-istokkijiet iridu jiġu ġestiti fuq bażi ta’ eżatt fil-ħin, li jwassal għar-riskju ta’ kwoti, li jistgħu jikkawżaw kostijiet addizzjonali sinifikanti, peress li l-imħażen taż-żejt ta’ Korsika għandhom kapaċità ta’ ħżin limitata (22).

(22)

Bl-istess mod, il-prodotti tal-ikel u tal-konsumatur huma ħafna aktar għaljin f’Korsika milli fil-bqija ta’ Franza, b’differenzi ta’ 14 % u ta’ 11 %, rispettivament (23). L-opinjoni tal-awtorità tal-kompetizzjoni tqis li dan huwa parzjalment dovut għal fatturi strutturali, marbutin mal-insularità u mal-istaġunalità. Il-katina tal-provvista miċ-ċentri tax-xiri fin-Nofsinhar ta’ Franza hija estiża wkoll minħabba l-użu neċessarju tat-trasport marittimu (24). Il-kapaċità ta’ ħżin limitata tal-ħwienet ta’ Korsika tfisser ukoll li l-merkanzija trid tiġi kkonsenjata aktar ta’ spiss milli fi Franza kontinentali, u ma tippermettilhomx jibbenefikaw mill-istess skontijiet miċ-ċentri tax-xiri bħall-ħwienet li jinsabu fi Franza kontinentali (25).

(23)

B’mod ġenerali, l-INSEE jinnota li Korsika hija l-ifqar reġjun ta’ Franza metropolitana: Fl-2018, 18,5 % tan-nies li jgħixu Korsika kienu jgħixu taħt is-soll tal-faqar, meta mqabbla ma’ 14 % fil-livell nazzjonali. Din is-sitwazzjoni ekonomika u soċjali marret għall-agħar ukoll bħala riżultat tal-pandemija tal-COVID-19 fl-2020 u fl-2021 (26) u l-inflazzjoni għolja li tirriżulta prinċipalment miż-żidiet fil-prezzijiet tal-enerġija u tal-ikel mill-2022 ’il quddiem (27).

(24)

Il-portijiet ta’ Franza kontinentali li jintużaw għas-servizzi tat-trasport marittimu bejn Korsika u Franza kontinentali huma l-portijiet ta’ Marsilja, ta’ Toulon u ta’ Nizza (“il-portijiet ta’ Franza kontinentali”).

(25)

Marsilja tinsab aktar minn 60 km minn Toulon (madwar 45 minuta bit-triq permezz tal-awtostrada A50, u anqas minn siegħa bil-ferrovija (28)) u kważi 200 km minn Nizza (madwar sagħtejn u nofs bit-triq permezz tal-awtostrada A8). Toulon tinsab 150 km minn Nizza (madwar siegħa u 45 minuta bit-triq permezz tal-awtostradi A57 u A8, u siegħa u 45 minuta bil-ferrovija (29)).

Illustrazzjoni 1

Il-portijiet ta’ Franza kontinentali u l-portijiet ta’ Korsika

(26)

Il-port ta’ Marsilja huwa wieħed mill-akbar fi Franza. Dan jospita numru kbir ta’ konnessjonijiet marittimi nazzjonali u internazzjonali, u jinsab qrib il-belt ta’ Marsilja, it-tieni l-akbar waħda fi Franza skont il-popolazzjoni.

(27)

L-awtorità tal-port ta’ Marsilja, il-Grand Port Maritime de Marseille, hija aġenzija industrijali u kummerċjali pubblika.

(28)

Il-port ta’ Marsilja huwa port globali b’infrastruttura li tippermetti li jiġu ġestiti t-tipi kollha ta’ traffiku. Għandu żewġ baċiri ewlenin:

(29)

Id-dokk tal-Lvant għandu erba’ terminali marittimi li jilqgħu laneċ u vapuri tal-passiġġieri u tal-merkanzija, inklużi ż-żewġ terminali nazzjonali ta’ Joliette u ta’ Arenc, li jospitaw b’mod partikolari t-traffiku marittimu kurrenti lejn Korsika (b’aktar minn 10 postijiet ta’ rmiġġ disponibbli). Dawn iż-żewġ terminali huma konnessi direttament ma’ tliet awtostradi: l-A7, li taqsam il-kuritur kollu ta’ Rhône minn Lyon sa Marsilja; l-A50, li tgħaqqad lil Marsilja ma’ Toulon fil-Lvant; u l-A55, li tgħaqqad lil Marsilja ma’ Martigues fil-Punent.

(30)

Il-port ta’ Toulon jospita konnessjonijiet marittimi nazzjonali u internazzjonali (Spanja, l-Italja). Għandu erba’ terminali madwar ir-reġjun ta’ Toulon: żewġ terminali fi Braégaillon u żewġ terminali li jinsabu fiċ-ċentru tal-belt ta’ Toulon u La Seyne-sur-Mer, rispettivament. Il-port ta’ Toulon huwa mmexxi mill-Kamra tal-Kummerċ u tal-Industrija ta’ VAR (“CCI ta’ Var”, “La chambre de commerce et d’industrie du Var”).

(31)

It-terminal tan-Nofsinhar f’Brégaillon huwa ddedikat kompletament għat-trasport ta’ pakketti tqal, filwaqt li t-terminal tat-Tramuntana (“Toulon-Brégaillon”) huwa mgħammar b’post wieħed ta’ rmiġġ sabiex jilqa’ esklużivament it-trasport tal-merkanzija. It-terminal f’La Seyne-sur-Mer jintuża esklużivament għall-bastiment tal-kruċiera, filwaqt li t-terminal taċ-ċentru tal-belt (“Toulon-Port de Commerce”), bi tliet postijiet ta’ rmiġġ, jintuża għal-laneċ, għall-bastimenti tal-kruċiera u għall-bastimenti tal-passiġġieri u tal-merkanzija. It-terminal ta’ Toulon-Port de Commerce bħalissa jilqa’ s-servizzi kollha tat-trasport marittimu bejn Toulon u Korsika. Il-port ta’ Toulon huwa relattivament qrib l-awtostrada A50 u l-istazzjon tal-ferrovija ta’ Toulon.

(32)

Il-port ta’ Nizza jinsab fiċ-ċentru tal-belt. Huwa mmexxi mill-Kamra tal-Kummerċ u tal-Industrija ta’ Nizza f’Côte d’Azur (is-CCI ta’ Nizza f’Côte d’Azur, “Chambre de Commerce et d’Industrie Nice Côte d’Azur”). Għandu żewġ terminali, kull wieħed b’żewġ postijiet ta’ rmiġġ li jistgħu jakkomodaw laneċ u bastimenti tal-passiġġieri u tal-merkanzija. Iż-żewġ terminali jintużaw prinċipalment għall-bastimenti tal-kruċiera u għat-traffiku tal-passiġġieri u, sa ċertu punt anqas, għat-traffiku tal-merkanzija. Il-port ta’ Nizza huwa relattivament ’il bogħod mill-infrastruttura tal-awtostrada (madwar għaxar kilometri), filwaqt li l-istazzjon tal-ferrovija tinsab pjuttost qrib.

(33)

Il-portijiet ta’ Korsika b’konnessjonijiet marittimi ma’ Franza kontinentali huma dawk ta’ Bastia, ta’ Ajaccio, ta’ L’Île-Rousse, ta’ Porto-Vecchio u Propriano (“il-portijiet ta’ Korsika”).

(34)

Propriano huwa l-uniku port ta’ Korsika b’rotta waħda biss li tikkollegah ma’ Franza kontinentali (ma’ Marsilja). Il-portijiet ta’ Korsika l-oħrajn kollha għandhom konnessjonijiet mat-tliet portijiet ta’ Franza kontinentali (Marsilja, Toulon, Nizza).

(35)

Il-portijiet ta’ Korsika lkoll huma ġestiti mill-Kamra tal-Kummerċ u tal-Industrija ta’ Korsika (“is-CCI ta’ Korsika”).

(36)

Il-belt ta’ Bastia tinsab fil-Grigal ta’ Korsika. Tinsab madwar 70 km mil-L’Île-Rousse (siegħa u 40 minuta bil-karozza u kważi sagħtejn bit-trasport pubbliku), li tinsab fit-Tramuntana ta’ Korsika; 145 km minn Porto-Vecchio, fix-Xlokk tal-gżira, u 150 km minn Ajaccio. Il-belt ta’ Ajaccio, f’Korsika ċentrali lejn il-Punent, tinsab madwar 70 km minn Propriano (madwar siegħa u nofs bil-karozza u sagħtejn bit-trasport pubbliku), li tinsab fil-Lbiċ ta’ Korsika, u 140 km minn Porto-Vecchio. Propriano u Porto-Vecchio jinsabu 70 km ’l bogħod minn xulxin (madwar siegħa u nofs bil-karozza u sagħtejn bit-trasport pubbliku).

(37)

Bastia, Ajaccio u L’Île-Rousse biss għandhom stazzjon tal-ferrovija. Minn Porto-Vecchio, hemm servizzi tal-karozzi tal-linja interurbani lejn Ajaccio, Propriano u Bastia, filwaqt li minn Propriano hemm servizzi tal-karozzi tal-linja interurbani lejn Ajaccio u Porto-Vecchio. Table 1 u Table 2 juru d-distanzi stmati bejn il-postijiet bit-trasport pubbliku u l-frekwenza tas-servizzi:

Tabella 1

Is-servizzi ferrovjarji f’Korsika

Tabella 2

Is-servizzi bejn l-ibliet f’Korsika (kowċijiet)

(38)

Bastia huwa l-akbar port f’Korsika f’termini ta’ volumi ta’ passiġġieri u ta’ merkanzija, u jirrappreżenta kważi 60 % tat-traffiku totali bejn Korsika u Franza kontinentali. Dan huwa port internazzjonali peress li, minbarra s-servizzi lejn Marsilja, Toulon u Nizza, jospita wkoll rotot mal-Italja.

(39)

Il-port ta’ Bastia għandu terminal marittimu bi tmien postijiet ta’ rmiġġ li jistgħu jakkomodaw laneċ u bastimenti tal-passiġġieri u tal-merkanzija. Bħalissa qed jiġu kkunsidrati pjanijiet għall-espansjoni jew għall-bini ta’ port akbar, peress li l-port eżistenti huwa soġġett għal konġestjoni qawwija (31). Il-port, li jinsab fiċ-ċentru tal-belt, huwa moqdi bit-triq territorjali 20 minn Bastia lejn Ajaccio.

(40)

Ajaccio huwa t-tieni l-akbar port f’Korsika f’termini ta’ volumi ta’ passiġġieri u ta’ merkanzija. Minbarra l-konnessjonijiet marittimi regolari ma’ Marsilja, ma’ Toulon u ma’ Nizza, il-port ta’ Ajaccio jospita wkoll rotot staġunali lejn Porto Torres (Sardenja), Calvi u Propriano.

(41)

Il-port ta’ Ajaccio għandu terminal marittimu b’sitt postijiet ta’ rmiġġ li jistgħu jakkomodaw laneċ u bastimenti tal-passiġġieri u tal-merkanzija. Il-port, li jinsab fiċ-ċentru tal-belt, huwa servut bit-triq territorjali 20 lejn Bastia fil-Grigal u bit-triq territorjali 40 lejn Bonifacio fil-ponta tan-Nofsinhar tal-gżira.

(42)

Il-port ta’ L’Île-Rousse, li jinsab fiċ-ċentru tal-belt, għandu terminal marittimu b’żewġ postijiet ta’ rmiġġ għal-laneċ u għall-bastimenti tal-passiġġieri u tal-merkanzija. Huwa l-uniku port ta’ Korsika awtorizzat sabiex jimmaniġġa oġġetti perikolużi tal-klassi 1 (sustanzi u oġġetti splussivi). Għandu aċċess rapidu għat-triq territorjali 30 li tgħaqqad lil Calvi (25 km lejn il-Punent) ma’ Ponte-Leccia f’Korsika ċentrali.

(43)

Il-port ta’ Porto-Vecchio, li jinsab fiċ-ċentru tal-belt, għandu terminal marittimu b’żewġ postijiet ta’ rmiġġ għal-laneċ u għall-bastimenti tal-passiġġieri u tal-merkanzija. Għandu aċċess relattivament veloċi għat-triq territorjali 10 lejn Bonifacio fin-Nofsinhar u lejn Bastia fit-Tramuntana.

(44)

Il-port ta’ Propriano, li jinsab fiċ-ċentru tal-belt, għandu terminal marittimu b’żewġ postijiet ta’ rmiġġ għal-laneċ u għall-bastimenti tal-passiġġieri u tal-merkanzija. Għandu aċċess relattivament rapidu għat-triq territorjali 40 li tgħaqqad lil Bonifacio fin-Nofsinhar u Ajaccio fit-Tramuntana.

(45)

L-awtoritajiet Franċiżi pprovdew deskrizzjoni tas-servizzi tat-trasport marittimu operati bejn l-2016 u l-2020 (32). Bejn l-2016 u l-2020, tliet operaturi marittimi mexxew servizzi tat-trasport marittimu bejn Korsika u Franza kontinentali: Corsica Ferries (minn Toulon u Nizza), Corsica Linea u La Méridionale (minn Marsilja). Ir-raba’ operatur, Moby Line, ukoll opera servizzi marittimi bejn Nizza u Korsika bejn l-2016 u l-2019.

(46)

It-trasport marittimu huwa l-mezz tat-trasport tal-merkanzija dominanti bejn Franza kontinentali u Korsika. B’mod ġenerali, il-livell tat-trasport marittimu tal-merkanzija bejn Korsika u Franza kontinentali jibqa’ relattivament stabbli matul is-sena. Ma naqasx b’mod sinifikanti matul il-kriżi tas-saħħa tal-COVID-19.

(47)

Il-merkanzija marittima tiġi ttrasportata lejn Korsika biss minn Franza kontinentali fuq ir-rotot bejn il-portijiet ta’ Franza kontinentali u ta’ Korsika.

(48)

Fir-rigward tal-portijiet ta’ Franza kontinentali, il-biċċa l-kbira tat-trasport tal-merkanzija huwa kkonċentrat fuq rotot lejn/minn Marsilja (Table 3 u Table 4). Il-port ta’ Marsilja għandu sehem mis-suq relattivament stabbli ta’ madwar 80 % tat-traffiku totali tal-merkanzija bejn Franza kontinentali u Korsika (Table 4).

Tabella 3

It-trasport tal-merkanzija bejn Franza kontinentali u Korsika skont il-port ta’ Franza kontinentali (importazzjonijiet/esportazzjonijiet, f’metri lineari  (33) )

Tabella 4

It-trasport tal-merkanzija bejn Franza kontinentali u Korsika skont il-port ta’ Franza kontinentali (importazzjonijiet/esportazzjonijiet, %)

(49)

F’dak li għandu x’jaqsam mal-portijiet ta’ Korsika, il-flussi huma kkonċentrati l-aktar fuq il-portijiet ta’ Ajaccio u ta’ Bastia (Table 5 u Table 6). Kif muri fit-Table 6, dawn iż-żewġ portijiet kellhom sehem mis-suq relattivament stabbli bejn l-2016 u l-2020 ta’ madwar 35 % (Ajaccio) u 50 % (Bastia) tat-traffiku totali tal-merkanzija bejn Franza kontinentali u Korsika.

Tabella 5

It-trasport tal-merkanzija bejn Franza kontinentali u Korsika skont il-port ta’ Korsika (importazzjonijiet/esportazzjonijiet, LM)

Tabella 6

It-trasport tal-merkanzija bejn Franza kontinentali u Korsika skont il-port ta’ Korsika (importazzjonijiet/esportazzjonijiet, %)

(50)

It-trasport marittimu tal-merkanzija bejn Franza kontinentali u Korsika jsir biss permezz tat-trasport ro-ro, (34) bl-użu tal-bastimenti xierqa, jiġifieri “Ro-Pax” (bastimenti tal-passiġġieri u tal-merkanzija) (35) u bastimenti purament ro-ro puri (“Ro-Ro”) (li jittrasportaw merkanzija biss). Minbarra ċerti oġġetti speċjali (siment, pakketti tqal, eċċ.), it-trasport bejn Korsika u Franza kontinentali jsir biss permezz tal-Ro-Pax.

(51)

Skont l-awtoritajiet Franċiżi, (36) it-trasport tal-merkanzija ro-ro huwa maqsum f’“merkanzija rmunkata” u f’“merkanzija mhux irmunkata”.

(52)

Il-merkanzija rmunkata hija ddefinita bħala t-trasport ta’ merkanzija li tuża vettura tat-triq twila aktar minn 6 metri bil-mezz ta’ propulsjoni tagħha stess (vannijiet, trakkijiet u vetturi simili, kif ukoll semitrejlers flimkien ma’ trattur). Għalhekk, dawn il-vetturi jistgħu jiġu jittellgħu direttament fuq il-bastiment u jitniżżlu direttament minnu mis-sewwieq, mingħajr il-ħtieġa ta’ mmaniġġar mill-port. It-tliet portijiet ta’ Franza kontinentali u l-portijiet ta’ Korsika kollha jimmaniġġaw merkanzija rmunkata.

(53)

Merkanzija mhux irmunkata hija ddefinita bħala t-trasport ta’ merkanzija bl-użu ta’ semitrejler (37). Matul l-imbarkazzjoni, is-semitrejler jinqala’ mit-trattur fuq il-moll tat-tluq u mbagħad jitqabbad ma’ vettura speċjali ta’ trazzjoni fil-port, qabel ma jgħaddi mill-operazzjoni ta’ rriversjar fil-port tal-wasla, fejn trattur ieħor jieħu t-trejler lejn id-destinazzjoni tiegħu. It-trasport tal-merkanzija mhux irmunkata jirrappreżenta l-akbar sehem tat-trasport marittimu tal-merkanzija bejn Korsika u Franza kontinentali (medja ta’ 64 % tal-LM totali ttrasportati bejn l-2016 u l-2020, meta mqabbla ma’ 36 % għall-merkanzija rmunkata).

(54)

Fir-rigward tal-portijiet ta’ Franza kontinentali, it-trasport tal-merkanzija rmunkata huwa prinċipalment maqsum bejn il-portijiet ta’ Marsilja u ta’ Toulon (Table 7 u Table 8). Fil-port ta’ Marsilja, il-merkanzija rmunkata kienet tirrappreżenta medja ta’ madwar 20 % tal-merkanzija totali ttrasportata lejn/minn Korsika bejn l-2016 u l-2020.

Tabella 7

It-trasport ta’ merkanzija rmunkata skont il-port ta’ Franza kontinentali (importazzjonijiet/esportazzjonijiet, LM)

Tabella 8

It-trasport ta’ merkanzija rmunkata skont il-port ta’ Franza kontinentali (importazzjonijiet/esportazzjonijiet, %)

(55)

Bejn l-2016 u l-2020, il-port ta’ Marsilja huwa l-uniku port ta’ Franza kontinentali li kien jimmaniġġa merkanzija mhux irmunkata lejn/minn Korsika. Il-portijiet kollha ta’ Korsika jimmaniġġaw merkanzija mhux irmunkata. Dan it-tip ta’ trasport jiġi mmaniġġat kompletament bejn il-portijiet ta’ Marsilja u ta’ Korsika.

(56)

Is-servizzi marittimi tal-passiġġieri joperaw bejn Korsika u Franza/l-Italja. Bħala medja, bejn l-2014 u l-2019, il-konnessjonijiet ma’ Franza kontinentali kienu jirrappreżentaw madwar 65 % tat-trasport marittimu totali tal-passiġġieri, b’aktar minn 2,7 miljun passiġġier fl-2017 u l-2018, li naqsu għal 2,52 miljun passiġġier fl-2019. Fl-2020, wara l-kriżi tas-saħħa tal-COVID-19, it-trasport marittimu tal-passiġġieri naqas bi 32 %.

(57)

Għall-kuntrarju tat-trasport marittimu tal-merkanzija, it-trasport marittimu tal-passiġġieri huwa staġunali, u d-domanda matul l-istaġun popolari (jiġifieri minn April sa Ottubru) hija ogħla milli matul il-bqija tas-sena.

(58)

Il-biċċa l-kbira tat-trasport marittimu tal-passiġġieri fil-portijiet ta’ Franza kontinentali huwa kkonċentrat f’Toulon (Table 9 u Table 10). Bejn l-2016 u l-2020, il-portijiet ta’ Marsilja u ta’ Toulon żiedu l-ishma mis-suq tagħhom bi ftit, filwaqt li ta’ Nizza naqas b’mod konsiderevoli (Table 10).

Tabella 9

It-trasport marittimu tal-passiġġieri bejn Franza kontinentali u Korsika skont il-port ta’ Franza kontinentali (numru ta’ passiġġieri)

Tabella 10

It-trasport marittimu tal-passiġġieri bejn Franza kontinentali u Korsika skont il-port ta’ Franza kontinentali (%)

(59)

Il-biċċa l-kbira tat-trasport marittimu tal-passiġġieri fil-portijiet ta’ Korsika huwa kkonċentrat f’Bastia u f’Ajaccio. Hekk kif jidher mit-Table 11 u mit-Table 12, id-distribuzzjoni tat-traffiku tal-passiġġieri fost il-portijiet ta’ Korsika baqgħet relattivament stabbli.

Tabella 11

It-trasport marittimu tal-passiġġieri bejn Franza kontinentali u Korsika skont il-port ta’ Korsika (numru ta’ passiġġieri)

Tabella 12

It-trasport marittimu tal-passiġġieri bejn Franza kontinentali u Korsika skont il-port ta’ Korsika (%)

(60)

It-trasport marittimu ġie liberalizzat fl-Unjoni Ewropea fl-1992, meta ġie adottat ir-Regolament dwar il-Kabotaġġ marittimu (“ir-Regolament dwar il-Kabotaġġ”) (38). Madankollu, l-awtoritajiet Franċiżi qatt ma applikaw liberalizzazzjoni sħiħa tas-servizzi tat-trasport marittimu fil-każ ta’ servizzi marittimi lejn Korsika, minħabba l-eżistenza ta’ ħtiġijiet tas-servizz pubbliku li jeħtieġu restrizzjoni ġenerali fuq il-libertà li jiġu pprovduti servizzi bħal dawn.

(61)

Konsegwentement, bħalissa ma hemm l-ebda trasport purament kummerċjali bejn Franza kontinentali u Korsika. Is-servizzi tat-trasport marittimu huma pprovduti jew permezz ta’ skema ta’ obbligi ta’ servizz pubbliku (“l-iskema ta’ OSP”, “public service obligations”) kif definita fl-Artikolu 2(4) u fl-Artikolu 4(2) tar-Regolament dwar il-Kabotaġġ, jew permezz ta’ kuntratt pubbliku ta’ servizz li jissodisfa d-definizzjoni stabbilita fl-Artikolu 2(3) u fl-Artikolu 4(1) tar-Regolament dwar il-Kabotaġġ.

(62)

Permezz tar-Riżoluzzjoni Nru 13/263 tal-Assemblea ta’ Korsika tal-20 ta’ Diċembru 2013, kif emendata mill-Assemblea fir-Riżoluzzjonijiet Nru 18/266 tagħha tas-27 ta’ Lulju 2018 u Nru 19/128 tal-25 ta’ April 2019, l-awtorità reġjonali ta’ Korsika (“is-CdC”, “Collectivité de Corse”) stabbiliet skema ta’ OSP li tistabbilixxi obbligi ta’ servizz pubbliku li għandhom jiġu rrispettati minn kwalunkwe operatur li jixtieq joffri servizzi tat-trasport marittimu bejn Korsika u Franza kontinentali (“l-iskema ta’ OSP tal-2019”) (39).

(63)

L-iskema ta’ OSP tal-2019 tapplika għas-servizzi tat-trasport marittimu kollha mwettqin bejn il-portijiet ta’ Korsika u t-tliet portijiet ta’ Franza kontinentali mill-1 ta’ Ottubru 2019 għal perjodu ta’ 10 snin – jiġifieri sat-30 ta’ Settembru 2029. Tipprevedi l-konformità ma’ numru ta’ obbligi, inkluż numru minimu ta’ vjaġġi bir-ritorn li għandhom jiġu operati fuq kull rotta marittima matul is-sena kollha u n-nollijiet massimi għat-trasport ta’ merkanzija/passiġġieri li l-operaturi ma jistgħux jaqbżu. L-iskema ta’ OSP tal-2019 ma tipprevedi l-ebda kumpens finanzjarju lill-operaturi tat-trasport marittimu sabiex jissodisfaw l-obbligi ta’ servizz pubbliku li timponi.

(64)

Storikament, u sal-lum, is-servizzi tat-trasport marittimu biss bejn il-portijiet ta’ Marsilja u ta’ Korsika kienu s-suġġett ta’ kuntratt pubbliku ta’ servizz. Is-servizzi tat-trasport marittimu mill-portijiet ta’ Toulon u ta’ Nizza ġew operati permezz ta’ skema ta’ OSP.

(65)

L-ewwel konċessjoni ta’ servizz pubbliku bejn l-impriża pubblika Société Nationale Corse Méditerranée (“SNCM”) u l-impriża privata Compagnie Méridionale de Navigation (issa La Méridionale), minn naħa waħda, u l-Istat Franċiż, min-naħa l-oħra, ġiet iffirmata fl-1976 sabiex tiġi żgurata l-kontinwità territorjali bejn Korsika u Franza kontinentali għal perjodu ta’ 25 sena, jiġifieri sal-2001.

(66)

B’effett mill-1 ta’ Jannar 2002, l-SNCM ipprovdiet servizz, permezz ta’ La Méridionale, bejn Marsilja u Korsika permezz ta’ kuntratt pubbliku ta’ servizz konkluż mas-CdC għal perjodu ta’ 5 snin.

(67)

Mill-1 ta’ Lulju 2007 sal-31 ta’ Diċembru 2013, SNCM u La Méridionale pprovdew dak is-servizz skont kuntratt pubbliku ġdid ta’ servizz konkluż fis-7 ta’ Ġunju 2007 (“PSC tal-2007-2013”) li jkopri l-ħames rotot kollha bejn il-port ta’ Marsilja u l-portijiet ta’ Korsika. Il-Kummissjoni ddikjarat parti mill-kumpens mogħti skont il-PSC tal-2007-2013 bħala li jikkostitwixxi għajnuna mill-Istat li kienet inkompatibbli mas-suq intern (40).

(68)

Permezz tad-deċiżjoni tal-Assemblea ta’ Korsika tas-6 ta’ Settembru 2013, is-CdC iddeċidiet li tagħti ħames kuntratti separati ta’ servizz pubbliku għal kull waħda mill-ħames rotot bejn il-port ta’ Marsilja u l-portijiet ta’ Korsika għall-perjodu 2014-2023. Is-CdC tat dawk il-kuntratti lil SNCM u lil La Méridionale. Madankollu, wara proċedimenti ta’ amministrazzjoni li tressqu kontriha fit-28 ta’ Novembru 2014 u li ġew konklużi fl-20 ta’ Novembru 2015 permezz tas-sentenza tal-Qorti Kummerċjali ta’ Marsilja, f’Diċembru 2015 SNCM irtirat mill-kuntratt. Il-biċċa l-kbira tal-assi tagħha ġew akkwiżiti fl-2016 mill-konsorzju Corsica Maritima u ġew inkorporati fil-kumpanija l-ġdida tat-trasport marittimu Corsica Linea mnedija fl-10 ta’ Diċembru 2015. Corsica Linea saret sottokuntrattur tal-kuntratt pubbliku ta’ servizz tal-2014-2023 sal-1 ta’ Ottubru 2016, meta l-kuntratti ġew itterminati permezz tas-sentenza tal-Qorti Amministrattiva ta’ Bastia, mogħtija fis-7 ta’ April 2015.

(69)

Imbagħad, il-konsorzju Corsica Linea - La Méridionale ngħata diversi kuntratti pubbliċi “temporanji” ta’ servizz għat-trasport marittimu tal-passiġġieri u tal-merkanzija bejn l-2016 u l-2022:

(70)

Il-PSCs tal-2019-2020 huma s-suġġett ta’ investigazzjoni separata dwar l-għajnuna mill-Istat mill-Kummissjoni (irreġistrata taħt SA.49207).

(71)

Il-miżuri li huma s-suġġett ta’ din il-proċedura jikkonċernaw il-kumpens finanzjarju mogħti mill-OTC skont kull wieħed mill-ħames PSCs relatati mas-servizzi marittimi lejn Korsika għall-perjodu mill-1 ta’ Jannar 2023 sal-31 ta’ Diċembru 2030. Il-PSCs jikkonċernaw il-forniment ta’ servizzi tat-trasport marittimu tal-merkanzija u tal-passiġġieri għal kull waħda mill-konnessjonijiet marittimi bejn il-port ta’ Marsilja u kull wieħed mill-portijiet ta’ Korsika (il-premessa 33). L-ammont totali tal-għajnuna huwa ta’ EUR 853 600 000.

(72)

L-għan tal-PSCs huwa li jissodisfaw il-ħtiġijiet tas-servizz pubbliku għat-trasport marittimu tal-merkanzija u tal-passiġġieri identifikati mill-awtoritajiet Franċiżi fuq kull waħda minn dawk ir-rotot.

(73)

Il-benefiċjarji tal-PSCs huma Corsica Linea u La Méridionale (“il-benefiċjarji tal-PSCs” jew “id-detenturi tal-konċessjoni”), b’mod separat jew b’mod konġunt (Table 13)

Tabella 13

Il-benefiċjarji tal-PSCs

(74)

Corsica Linea hija kumpanija ssimplifikata b’ishma konġunti li tispeċjalizza fit-trasport marittimu tal-passiġġieri u tal-merkanzija (43).

(75)

Corsica Linea hija sussidjarja tal-CM Holding Group, li jikkonsisti f’150 kumpanija u għandu 15-il azzjonist ewlieni. Timpjega aktar minn 1 000 persuna u għandha flotta ta’ disa’ bastimenti.

(76)

Il-kumpanija bħalissa topera bil-bandiera Franċiża servizzi marittimi bejn Korsika u l-port ta’ Marsilja permezz tal-PSCs, kif ukoll servizzi marittimi mill-port ta’ Marsilja lejn it-Tuneżija u l-Alġerija (44).

(77)

La Méridionale hija kumpanija pubblika b’responsabbiltà limitata li tispeċjalizza fit-trasport marittimu tal-passiġġieri u tal-merkanzija (45).

(78)

Mill-1 ta’ Ġunju 2023, la Méridionale saret sussidjarja tal-Grupp CMA CGM, wara li ġiet akkwiżita mill-Grupp STEF, li kien ilu sid il-kumpanija mill-2009. La Méridionale timpjega kważi 650 persuna u għandha flotta ta’ erba’ bastimenti (46).

(79)

Il-kumpanija bħalissa topera bil-bandiera Franċiża servizzi marittimi bejn Korsika u l-port ta’ Marsilja permezz tal-PSCs u, mill-2024, servizz marittimu skedat bejn Toulon u L’Île-Rousse taħt l-iskema ta’ OSP tal-2019. Hija topera wkoll servizzi marittimi mill-port ta’ Marsilja lejn il-Marokk.

(80)

Fin-notifika tagħhom, l-awtoritajiet Franċiżi indikaw li l-OTC huwa l-awtorità responsabbli għall-għoti tal-miżuri.

(81)

L-OTC huwa aġenzija industrijali u kummerċjali pubblika fil-livell reġjonali maħluqa mil-Liġi Nru 91-428 tat-13 ta’ Mejju 1991 li tistabbilixxi l-istatut tal-awtorità reġjonali ta’ Korsika.

(82)

L-Artikolu L. 4420-20 tal-Kodiċi Ġenerali għall-Awtoritajiet Reġjonali u Lokali (“CGCT”, “Code général des collectivités territoriales”) jistabbilixxi l-kompiti u s-setgħat tal-OTC u jindika li huwa soġġett għas-superviżjoni tas-CdC (li hija stess hija awtorità pubblika, skont l-Artikolu L. 4421-1 tas-CGCT (47)) (48). Skont l-Artikolu L. 4420-20 tas-CGCT, l-OTC huwa ppresedut minn kunsillier eżekuttiv maħtur mill-president tal-kunsill eżekuttiv tas-CdC. Ir-rappreżentant tal-Istat fis-CdC jattendi awtomatikament il-laqgħat tal-bord tat-tmexxija tal-OTC u huwa destinatarju tar-riżoluzzjonijiet tiegħu. L-OTC huwa mmexxi minn direttur maħtur fuq proposta mill-president tal-OTC permezz ta’ ordni tal-kunsill eżekuttiv. Il-bord tat-tmexxija tal-OTC huwa magħmul minn rappreżentanti ta’ organizzazzjonijiet soċjoprofessjonali u, prinċipalment, minn rappreżentanti eletti mill-Assemblea ta’ Korsika, li hija wieħed mill-korpi tas-CdC skont l-Artikolu L. 4422-1 tas-CGCT.

(83)

Fil-linji gwida stabbiliti mis-CdC, (49) l-OTC huwa responsabbli għall-iżvilupp, għall-koordinazzjoni u għall-implimentazzjoni tal-politika reġjonali tat-trasport bl-ajru u marittimu bejn Korsika u Franza kontinentali. Skont l-Artikolu L. 4420-20 tas-CGCT, l-OTC jikkonkludi, mal-kumpaniji maħturin sabiex joperaw ir-rotot tal-ajru u tal-baħar neċessarji sabiex tiġi żgurata l-kontinwità territorjali, il-kuntratti pubbliċi ta’ servizz li jistabbilixxu n-nollijiet, il-kundizzjonijiet tal-prestazzjoni, il-kwalità tas-servizz u l-proċeduri ta’ monitoraġġ.

(84)

L-Artikolu L. 4420-20 tas-CGCT jiddikjara f’dak ir-rigward li l-OTC jiffinanzja l-kuntratti permezz tal-għotja għall-kontinwità territorjali prevista fl-Artikolu L. 4425-26 tas-CCT, li titħallas lilu mis-CdC. Din l-għotja titħallas mill-Istat lis-CdC f’konformità mal-Artikolu L. 4425-23 tas-CGCT. L-għotja għall-kontinwità territorjali, li tammonta għal EUR 187 miljun fis-sena, tiffinanzja l-arranġamenti ta’ kontinwità territorjali bl-ajru u marittima bejn Korsika u Franza kontinentali (50).

(85)

Din it-taqsima l-ewwel tiddeskrivi (i) il-proċeduri mibdijin mill-awtoritajiet Franċiżi sabiex jikkaratterizzaw l-eżistenza ta’ ħtieġa ta’ servizz pubbliku. Imbagħad tiddeskrivi l-konklużjonijiet li waslu għalihom l-awtoritajiet Franċiżi dwar l-eżistenza ta’ tali ħtieġa għal (ii) trasport marittimu tal-passiġġieri u (iii) trasport marittimu tal-merkanzija.

(86)

Minħabba l-iskadenza, fil-31 ta’ Diċembru 2022, tal-PSCs tal-2021-2022 (il-premessa 69), l-awtoritajiet Franċiżi wettqu, minn Diċembru 2021, analiżi ta’ jekk kienx għad hemm ħtieġa ta’ servizz pubbliku fost l-utenti għas-servizzi tat-trasport marittimu bejn Korsika u Franza kontinentali, u speċjalment bejn Marsilja u l-ħames portijiet ta’ Korsika.

(87)

L-awtoritajiet Franċiżi indikaw li l-metodu sabiex jiġi ddeterminat jekk kienx għad hemm ħtieġa bħal din għat-trasport marittimu tal-merkanzija u tal-passiġġieri kellu jitwettaq fi tliet stadji.

(88)

L-ewwel stadju kien li tiġi identifikata u kkwantifikata d-domanda tal-utenti għas-servizzi tat-trasport marittimu. Għal dak l-għan, l-awtoritajiet Franċiżi organizzaw żewġ konsultazzjonijiet pubbliċi.

(89)

L-għan tat-tieni stadju kien li jiġi aċċertat jekk is-suq jistax jissodisfa bis-sħiħ jew parzjalment id-domanda identifikata tal-utenti. L-awtoritajiet Franċiżi organizzaw ukoll konsultazzjoni pubblika f’dak ir-rigward.

(90)

L-awtoritajiet Franċiżi kkummissjonaw lid-ditta ta’ konsulenza ekonomika Gecodia sabiex twettaq dawn l-ewwel żewġ stadji. B’mod partikolari, Gecodia kienet responsabbli għall-ġbir u għall-ipproċessar tal-informazzjoni miġbura mill-utenti u mill-operaturi, u għall-kompilazzjoni ta’ sommarju tat-tweġibiet li waslu wara l-konsultazzjonijiet pubbliċi mwettqin mill-OTC. Gecodia kienet responsabbli wkoll għat-twettiq ta’ studji addizzjonali sabiex jiġi ddeterminat jekk kienx hemm xi ħtieġa għal servizz pubbliku fir-rigward tat-trasport marittimu bejn Korsika u Franza kontinentali.

(91)

Fl-aħħar tat-tieni stadju, Gecodia ssottomettiet ir-rapport finali tagħha tal-14 ta’ Marzu 2022 lill-OTC (“ir-rapport ta’ Gecodia”). Ir-rapport ta’ Gecodia janalizza d-domanda u l-provvista tas-suq, u jasal għal konklużjonijiet dwar l-eżistenza ta’ ħtieġa ta’ servizz pubbliku għat-trasport marittimu bejn Korsika u Franza kontinentali.

(92)

It-tielet stadju tfassal sabiex jgħin fl-identifikazzjoni tal-approċċ li l-anqas li jaffettwa l-funzjonament xieraq tas-suq intern sabiex tiġi ssodisfata l-ħtieġa identifikata tas-servizz pubbliku. L-għan ta’ dan l-istadju finali kien li jiġi żgurat li d-deċiżjonijiet tas-CdC dwar kif għandha tiġi ssodisfata l-ħtieġa identifikata ta’ servizz pubbliku kienu l-anqas restrittivi għall-kompetizzjoni. It-tielet stadju se jiġi deskritt fit-Taqsima 3.5.

(93)

Bl-għan li jitlesta l-ewwel stadju msemmi fil-premessa 88, fis-7 ta’ Diċembru 2021 l-awtoritajiet Franċiżi nedew konsultazzjoni pubblika fost l-utenti tat-trasport marittimu tal-merkanzija u tal-passiġġieri fuq ir-rotot bejn il-port ta’ Marsilja u l-ħames portijiet ta’ Korsika (“il-konsultazzjoni mal-utenti”).

(94)

Il-konsultazzjoni, li damet xahar, stiednet lil dawk l-utenti kollha u lil kwalunkwe persuna interessata oħra sabiex jissottomettu l-kummenti tagħhom dwar is-servizzi tat-trasport marittimu inkwistjoni. Il-konsultazzjoni mal-utenti ġiet ippubblikata fuq is-sit web tal-OTC u dehret fl-istampa lokali u reġjonali.

(95)

Kienet tinvolvi diversi kwestjonarji, li kull wieħed minnhom kien jikkonsisti f’madwar 20 mistoqsija, indirizzati lil diversi kategoriji ta’ utenti. Il-konsultazzjoni kienet akkumpanjata wkoll minn dokument li jappoġġa l-investigazzjoni pubblika, li stabbilixxa l-karatteristiċi ġenerali tas-servizzi tat-trasport marittimu bejn Korsika u Franza kontinentali, (51) u ta deskrizzjoni qasira u preliminari tad-diversi kategoriji ta’ utenti tat-trasport marittimu tal-merkanzija u tal-passiġġieri bejn Korsika u Franza kontinentali.

(96)

L-awtoritajiet Franċiżi nedew ukoll konsultazzjoni mal-portijiet ta’ Franza kontinentali (Marsilja, Toulon u Nizza) fit-22 ta’ Jannar 2022 għal perjodu ta’ xahar (“il-konsultazzjoni mal-portijiet”). Dik il-konsultazzjoni kienet tinkludi kwestjonarju li essenzjalment staqsa lill-awtoritajiet tal-portijiet dwar il-karatteristiċi tal-infrastruttura tagħhom, kemm għat-trasport tal-merkanzija kif ukoll għat-trasport tal-passiġġieri.

(97)

Bl-għan li jitlesta t-tieni stadju msemmi fil-premessa 89, fid-19 ta’ Jannar 2022 l-awtoritajiet Franċiżi nedew konsultazzjoni mal-operaturi tas-servizzi tat-trasport marittimu għal perjodu ta’ ħames ġimgħat (“il-konsultazzjoni mal-operatur”). Din il-konsultazzjoni kienet disponibbli u aċċessibbli fuq is-sit web tas-CdC.

(98)

Fil-paġna introduttorja għall-konsultazzjoni mal-operaturi, l-awtoritajiet Franċiżi talbu lill-kumpaniji tat-tbaħħir ikkonċernati jiċċaraw l-intenzjonijiet tagħhom fir-rigward tas-servizzi skedati lejn Korsika mill-1 ta’ Jannar 2023. Il-konsultazzjoni mal-operaturi kienet tinkludi wkoll kwestjonarju li kellu jimtela mill-operaturi. Kien hemm ukoll dokument ta’ akkumpanjament, li jistabbilixxi b’mod sħiħ il-kontenut tad-dokument ta’ appoġġ għall-konsultazzjoni mal-utenti tas-7 ta’ Diċembru 2021 (il-premessa 95) u preżentazzjoni qasira tar-riżultati tal-konsultazzjoni mal-utenti. Fl-aħħar nett, il-konsultazzjoni stiednet lill-kumpaniji tat-tbaħħir interessati jipprovdu informazzjoni dwar il-kapaċità u l-volum ta’ passiġġieri u ta’ merkanzija li jistgħu jġorru fin-nuqqas ta’ kuntratt pubbliku ta’ servizz bejn l-2023 u l-2028.

(99)

Din is-subtaqsima tiddeskrivi l-konklużjonijiet li waslu għalihom l-awtoritajiet Franċiżi dwar (i) l-eżistenza tad-domanda mill-utenti tat-trasport marittimu tal-passiġġieri bejn Korsika u Franza kontinentali u (ii) l-identifikazzjoni tal-falliment tas-suq li jissodisfa dik id-domanda.

(100)

Is-subtaqsimiet li ġejjin jiddeskrivu l-analiżijiet imwettqin mill-awtoritajiet Franċiżi relatati mad-domanda kwalitattiva mill-passiġġieri tat-trasport marittimu bejn Korsika u Franza kontinentali u d-domanda kwantitattiva minn dawk l-utenti.

(101)

Din is-subtaqsima tippreżenta l-ewwel ir-riżultati tal-konsultazzjoni mal-utenti; it-tieni, ir-riżultati tal-konsultazzjoni mal-portijiet; u fl-aħħar nett, il-konklużjonijiet tar-rapport ta’ Gecodia li jissupplimentaw ir-riżultati tal-konsultazzjonijiet pubbliċi.

(102)

Fid-dokument ta’ appoġġ għall-konsultazzjoni mal-utenti (il-premessa 95), l-awtoritajiet Franċiżi l-ewwel spjegaw li, fir-rigward tat-trasport marittimu tal-passiġġieri, (52) kellha ssir distinzjoni bejn il-passiġġieri li jgħixu f’Korsika (53) u l-passiġġieri mhux residenti (54). Huma qiesu wkoll li, fost il-passiġġieri li jgħixu f’Korsika, kien hemm domanda speċifika għat-trasport marittimu minn kategorija partikolari ta’ utenti, jiġifieri passiġġieri li jivvjaġġaw għal raġunijiet mediċi (“passiġġieri mediċi”), li kienet separata mid-domanda ġenerali tal-passiġġieri. Id-dokument ta’ appoġġ għall-konsultazzjoni mal-utenti nnota wkoll li l-OTC kien identifika ħtieġa għal servizz pubbliku tat-trasport marittimu għal dawn il-kategoriji ta’ utenti skont il-PSCs tal-2021-2022.

(103)

Għalhekk, il-konsultazzjoni mal-utenti talbet lill-utenti jwieġbu żewġ kwestjonarji: wieħed indirizzat lill-passiġġieri kollha (residenti u mhux residenti ta’ Korsika); l-ieħor, aktar speċifiku, indirizzat lill-passiġġieri mediċi biss (55).

(104)

Il-kwestjonarju mibgħut lill-passiġġieri kollha (residenti/mhux residenti ta’ Korsika) kien fih madwar 20 mistoqsija, bi tweġibiet issuġġeriti (f’xi każijiet l-utenti setgħu jagħżlu tweġibiet multipli), u ż-żmien meħtieġ sabiex jitlesta l-kwestjonarju kien stmat għal ħames minuti.

(105)

L-ewwel mistoqsija talbet lill-utenti jipprovdu informazzjoni dwar ir-rotta/rotot marittimi lil Korsika li użaw bejn il-port ta’ Marsilja u l-ħames portijiet ta’ Korsika (56). Il-mistoqsijiet 2 sa 6 fittxew informazzjoni dwar il-profil tal-utenti (kategorija soċjoprofessjonali, residenti/mhux residenti ta’ Korsika, ir-raġuni(jiet) għall-vjaġġ, (57) il-frekwenza tal-vjaġġ (58) u l-ħtiġijiet tal-ivvjaġġar (59)). Il-mistoqsijiet 7 sa 9 staqsew lill-utenti dwar is-sodisfazzjon tagħhom bil-ħinijiet tat-tluq u tal-wasla f’Korsika (sodisfaċenti jew mhux sodisfaċenti; jekk mhux sodisfaċenti, il-passiġġieri riedu tluq jew wasla aktar kmieni jew aktar tard?) u l-frekwenza tas-servizzi tat-trasport marittimu offruti fuq ir-rotot marittimi użati. Il-mistoqsijiet 10 sa 14 kienu jikkonċernaw in-noll għas-servizzi inkwistjoni għar-residenti ta’ Korsika u fittxew, b’mod partikolari, li jifhmu jekk dak in-noll kienx xieraq jew kienx jenħtieġ li jinbidel.

(106)

Il-mistoqsijiet minn 15 sa 19 stiednu lill-utenti jikkummentaw dwar l-alternattivi għall-port ta’ Marsilja li setgħu jużaw. B’mod partikolari, dawn il-mistoqsijiet tfasslu sabiex jaċċertaw:

(107)

Il-mistoqsijiet 20 sa 22 kienu jikkonċernaw is-sostitwibbiltà bejn it-trasport marittimu u t-trasport bl-ajru. B’mod aktar speċifiku, il-mistoqsijiet kellhom l-għan li jaċċertaw, rispettivament, kemm-il darba l-utenti jqabblu t-titjiriet u l-qsim bil-baħar fil-ħin tal-prenotazzjoni, (63) ir-raġuni ewlenija għall-għażla tal-ivvjaġġar bil-baħar minflok bil-ajruplan, (64) u jekk, fil-każ ta’ żieda ta’ 5-10 % fin-noll, kinux ippreparati li jużaw servizzi tat-trasport bl-ajru (iva jew le).

(108)

Il-kwestjonarju għall-passiġġieri mediċi kien jinkludi kemm mistoqsijiet speċifiċi kif ukoll mistoqsijiet identiċi għal dawk fil-kwestjonarju ġenerali (il-premessa 103) (65). Fost il-mistoqsijiet speċifiċi, il-mistoqsija 3 kienet tikkonċerna l-grupp ta’ età tal-utenti; il-mistoqsija 4 kienet tikkonċerna n-numru ta’ vjaġġi bir-ritorn magħmulin kull sena mill-utenti; il-mistoqsija 5 kienet tikkonċerna l-preżenza jew in-nuqqas ta’ preżenza ta’ persuna li takkumpanja; il-mistoqsija 6 kienet tikkonċerna l-ħtieġa ta’ spazju tal-kabina u tal-parkeġġ abbord il-bastiment; il-mistoqsija 7 kienet tikkonċerna t-trattament mediku mwettaq; u l-mistoqsija 12 kienet tikkonċerna l-livell ta’ kopertura tal-assigurazzjoni tas-saħħa għall-kostijiet relatati mat-trattament mediku.

(109)

B’mod ġenerali, il-kwestjonarji ppermettew lill-utenti jibagħtu kontributi b’test liberu fuq consultationpublique@ofc-corse.fr.

(110)

L-awtoritajiet Franċiżi jiddikjaraw li rċivew aktar minn 1 000 tweġiba għall-konsultazzjoni mal-utenti, li minnhom 987 setgħu jintużaw (686 kienu minn residenti ta’ Korsika u 301 minn passiġġieri mhux residenti).

(111)

B’kuntrast ma’ dan, waslu biss 42 tweġiba għall-kwestjonarju indirizzat lill-passiġġieri mediċi. Minħabba n-numru baxx ta’ tweġibiet li waslu, ir-riżultati ta’ dik il-konsultazzjoni ma ġewx ikkunsidrati mill-awtoritajiet Franċiżi.

(112)

It-tweġibiet għall-kwestjonarju mibgħut mill-awtoritajiet Franċiżi lill-passiġġieri kollha jistgħu jinġabru fil-qosor kif ġej:

(113)

Is-sommarju juri wkoll li 54 % tal-passiġġieri residenti (41 % ta’ dawk mhux residenti) iqabblu sistematikament il-qsim disponibbli fil-port ta’ Marsilja mal-portijiet l-oħrajn ta’ Franza kontinentali (69). Madankollu, ir-rati ta’ tqabbil ivarjaw minn rotta għal oħra: għal ċerti rotot bħal Marsilja-L’Île-Rousse jew Marsilja-Porto-Vecchio, ir-rispondenti residenti jqabblu sistematikament ma’ qsim ieħor disponibbli fil-portijiet ta’ Franza kontinentali (70 % u 60 % rispettivament għar-residenti, 66 % u 35 % rispettivament għal dawk mhux residenti), filwaqt li r-rati ta’ tqabbil għar-rotta Marsilja-Propriano huma baxxi (70).

(114)

Barra minn hekk, irrispettivament mir-rotta kkonċernata, ir-raġuni ewlenija kemm għall-passiġġieri residenti kif ukoll għal dawk mhux residenti li jagħżlu l-port ta’ Marsilja hija l-qrubija tiegħu għad-destinazzjoni finali tagħhom (53 % u 50 % rispettivament). Fil-każ ta’ żieda ipotetika ta’ bejn 5 u 10 % fin-noll għall-qsim fuq il-baħar minn Marsilja, tal-anqas 60 % tar-rispondenti (residenti u mhux residenti) jgħidu li jkunu lesti li jaqilbu għal Toulon u 35 % anke għal Nizza (71). Fl-aħħar nett, kważi 70 % tar-rispondenti residenti użaw il-portijiet ta’ Toulon jew ta’ Nizza fl-2019 għall-vjaġġi tagħhom lejn/minn Korsika (meta mqabbla ma’ 52 % tar-rispondenti mhux residenti) (72). Ir-raġuni ewlenija għall-użu ta’ dawn iż-żewġ portijiet l-oħrajn hija n-nollijiet orħos permezz ta’ Toulon jew Nizza (57 % tar-residenti, 56 % ta’ dawk mhux residenti) (73).

(115)

Fl-aħħar nett, fir-rigward tas-sostitwibbiltà tat-trasport bl-ajru u tat-trasport marittimu, il-konsultazzjoni mal-utenti wriet li 56 % tal-passiġġieri residenti (79 % ta’ dawk mhux residenti) ma jaqabblux titjiriet mal-vjaġġi fuq id-dgħajjes fil-ħin tal-prenotazzjoni (74). Dawn il-proporzjonijiet huma akbar għal ċerti rotot, bħal Marsilja-Propriano (75). Fir-rigward tal-mistoqsija 21 (il-premessa 107), ir-raġuni ewlenija kemm għar-residenti ta’ Korsika (83 % tar-rispondenti) kif ukoll għal dawk mhux residenti (76 %) li jagħżlu qsim fuq il-baħar aktar milli għall-ivvjaġġar bl-ajru fuq ir-rotot kollha hija l-ħtieġa li jivvjaġġaw b’vettura. Fir-rigward tal-possibbiltà li jaqilbu għat-trasport bl-ajru fil-każ ta’ żieda ipotetika ta’ 5-10 % fin-noll tal-vjaġġi fuq il-baħar, ftit aktar minn nofs ir-rispondenti jgħidu li ma jaqilbux (76).

(116)

Il-kwestjonarju li jakkumpanja l-konsultazzjoni mal-portijiet kien jinkludi tliet partijiet dwar it-traffiku tal-passiġġieri.

(117)

L-ewwel parti tal-kwestjonarju (il-mistoqsijiet 1.1 sa 1.5) stiednet lill-awtoritajiet tal-port jikkummentaw dwar il-karatteristiċi tad-domanda tal-utenti, kif identifikati u ppreżentati fid-dokument ta’ appoġġ għall-konsultazzjoni mal-utenti (il-premessa 95). B’mod aktar speċifiku, l-ewwel parti talbet lill-awtoritajiet sabiex:

(118)

It-tieni parti tal-kwestjonarju talbet lill-awtoritajiet tal-port sabiex jipprovdu deskrizzjoni sħiħa tal-infrastruttura tal-portijiet li x’aktarx jassenjaw lis-servizzi tat-trasport marittimu bejn Korsika u Franza kontinentali.

(119)

It-tielet parti (il-mistoqsijiet 4.1 sa 4.8) essenzjalment staqsiet lill-awtoritajiet tal-port dwar il-kapaċità tal-infrastruttura tagħhom li jimmaniġġaw it-traffiku tal-passiġġieri. B’mod aktar speċifiku, talbuhom jindikaw:

(120)

L-awtoritajiet Franċiżi ġabru kontributi mingħand l-awtoritajiet tal-port ta’ Toulon (CCI ta’ Var) u ta’ Nizza (CCI ta’ Nizza f’Côte d’Azur). L-awtoritajiet Franċiżi spjegaw ukoll matul il-proċedura ta’ investigazzjoni formali li l-awtorità tal-port ta’ Marsilja (Grand Port Maritime de Marseille) kienet diġà pprovdiet kontribut b’test liberu fil-21 ta’ Diċembru 2021 bħala parti mill-konsultazzjoni mal-utenti, u li hija ssottomettiet l-istess kontribut bi tweġiba għall-konsultazzjoni mal-portijiet, mingħajr ma wieġbet speċifikament għall-kwestjonarju previst fil-konsultazzjoni mal-port. Madankollu, l-awtoritajiet Franċiżi spjegaw li l-kontribut mill-port ta’ Marsilja kien fih l-informazzjoni rilevanti mitluba fil-kwestjonarju dwar il-portijiet (83).

(121)

Fir-rigward tal-ewwel parti tal-kwestjonarju, l-ebda wieħed mit-tliet portijiet ma kkontestat id-distinzjoni bejn id-diversi kategoriji ta’ passiġġieri identifikati minn Franza. Fir-rigward taż-żona ta’ klijentela tagħhom, il-portijiet ta’ Marsilja u ta’ Toulon iqisu li jattiraw klijenti minn Franza kollha u lil hinn minnha, filwaqt li l-port ta’ Nizza jindika li ż-żona ta’ klijentela tiegħu hija primarjament reġjonali.

(122)

It-tliet portijiet iqisu li l-infrastruttura tal-port tagħhom hija sostitwibbli fir-rigward tat-trasport tal-passiġġieri. Fir-rigward tal-kompetizzjoni bejn il-portijiet ta’ Franza kontinentali, Toulon u Marsilja jiddikjaraw li huma jikkompetu b’mod miftuħ ma’ xulxin, bil-port ta’ Toulon jiddikjara li huwa l-“mexxej mhux ikkontestat fit-trasport tal-passiġġieri”. Huma jindikaw, l-istess bħall-awtorità tal-port ta’ Nizza nnifisha, li l-port ta’ Nizza għadu lura wara Marsilja u Toulon, bħala riżultat tat-tnaqqis sinifikanti fit-traffiku tal-passiġġieri f’dawn l-aħħar snin.

(123)

Fir-rigward tat-tielet parti tal-kwestjonarju:

(124)

Barra minn hekk, matul il-proċedura ta’ investigazzjoni formali l-awtoritajiet Franċiżi spjegaw ukoll li l-awtorità tal-port ta’ Korsika, is-CCI ta’ Korsika, kienet ipprovdiet ukoll kontribut b’test liberu fis-7 ta’ Jannar 2022 bħala parti mill-konsultazzjoni mal-utenti. Dan il-kontribut b’test liberu pprovda informazzjoni dwar il-karatteristiċi tal-ħames portijiet ta’ Korsika użati għas-servizzi marittimi lejn Korsika.

(125)

Is-CCI ta’ Korsika ma tindika l-ebda restrizzjoni partikolari fuq it-trasport tal-passiġġieri. Madankollu, issemmi konġestjoni konsiderevoli fil-portijiet ta’ Korsika, b’mod partikolari ta’ Bastia (sitwazzjoni kritika s-sena kollha), u ta’ Ajaccio u ta’ Porto-Vecchio (livelli għoljin ta’ konġestjoni fis-sajf).

(126)

Minbarra l-konsultazzjonijiet pubbliċi, l-awtoritajiet Franċiżi inkarigaw ukoll lil Gecodia bit-twettiq ta’ analiżijiet addizzjonali tad-domanda tal-passiġġieri għas-servizzi marittimi lejn Korsika. Il-konklużjonijiet ta’ dawn l-analiżijiet huma deskritti fis-subtaqsimiet ta’ hawn taħt.

(127)

L-ewwel nett, ir-rapport ta’ Gecodia analizza jekk, mill-perspettiva tal-passiġġieri, vjaġġ bl-ajru jistax jitqies bħala sostitwibbli għal vjaġġ bid-dgħajsa sabiex tiġi ssodisfata l-ħtieġa għat-trasport bejn Korsika u Franza kontinentali. Ir-rapport jikkonkludi li dan ma kienx il-każ.

(128)

Ir-rapport ta’ Gecodia jibbaża din il-konklużjoni, l-ewwel nett, fuq il-prattika tat-teħid ta’ deċiżjonijiet tal-Kummissjoni Ewropea, (86) li tindika li s-sostitwibbiltà hija virtwalment mhux eżistenti fil-każ ta’ passiġġieri li jivvjaġġaw bil-vettura tagħhom stess jew b’ammont sostanzjali ta’ bagalji. Dan huwa l-każ f’Korsika, peress li l-proporzjon bejn in-numru ta’ passiġġieri u n-numru ta’ vetturi ħfief tat-tipi kollha fuq il-bastimenti huwa ta’ madwar 0,7 għall-passiġġieri residenti u 0,4 għall-passiġġieri mhux residenti (87).

(129)

It-tieni, ir-rapport ta’ Gecodia jirreferi għar-riżultati tal-konsultazzjoni mal-utenti, li fil-biċċa l-kbira għandha t-tendenza li turi li t-trasport bl-ajru u bil-baħar ma huwiex sostitwibbli mill-perspettiva tal-utenti (il-premessa 115).

(130)

It-tielet, ir-rapport ta’ Gecodia jiddikjara li l-vjaġġi bid-dgħajsa huma ħafna itwal minn dawk bl-ajru (bejn 6 sigħat u 12-il siegħa skont liema portijiet, l-aktar billejl, meta mqabbla ma’ siegħa bl-ajru) (88). L-istess japplika għall-frekwenzi, bis-servizzi tal-ajru li huma ħafna aktar frekwenti mis-servizzi marittimi (89). Għalhekk, skont ir-rapport ta’ Gecodia, vjaġġ bil-baħar ma jistax jitqies bħala alternattiva għall-passiġġieri b’restrizzjonijiet ta’ ħin.

(131)

Fuq il-bażi tar-rapport ta’ Gecodia, l-awtoritajiet Franċiżi kkonkludew li kien hemm domanda kwalitattiva għat-trasport marittimu fost ir-residenti u dawk mhux residenti ta’ Korsika li jivvjaġġaw bejn Korsika u Franza kontinentali.

(132)

Ir-rapport ta’ Gecodia analizza jekk kienx hemm differenza sostantiva fid-domanda għat-trasport marittimu tal-passiġġieri skont il-profil tal-utent jew l-għażla tagħhom tal-port tal-wasla ta’ Franza kontinentali.

(133)

Ir-rapport ta’ Gecodia jikkonkludi l-ewwel nett li, fir-rigward tat-trasport marittimu tal-passiġġieri bejn Korsika u Franza kontinentali, trid issir distinzjoni bejn il-passiġġieri li jgħixu f’Korsika u l-passiġġieri mhux residenti. Skont ir-rapport:

(134)

Għal dawk ir-raġunijiet, b’mod ġenerali, id-domanda għat-trasport marittimu fost ir-residenti ta’ Korsika hija differenti minn dik fost dawk li ma humiex residenti.

(135)

Barra minn hekk, ir-rapport ta’ Gecodia jqis li minn perspettiva ġeografika:

(136)

L-awtoritajiet Franċiżi indirizzaw kwestjonarju speċifiku lill-passiġġieri mediċi sabiex jidentifikaw kwalunkwe karatteristika ta’ domanda minn din il-kategorija ta’ utent. Huma rċivew ftit tweġibiet għal dan il-kwestjonarju (il-premessa 111). Għalhekk, l-awtoritajiet Franċiżi kellhom analiżi supplimentari mwettqin minn Gecodia sabiex jiġi vverifikat jekk kienx hemm domanda speċifika minn passiġġieri mediċi.

(137)

Ir-rapport ta’ Gecodia l-ewwel jirreferi għall-qafas legali li jirregola l-ivvjaġġar mediku bejn Korsika u Franza kontinentali. Dan jispjega li t-trasport mediku bejn Korsika u Franza kontinentali huwa s-suġġett ta’ politika koordinata mill-awtoritajiet pubbliċi. Is-CdC, l-Istat (permezz tal-aġenzija reġjonali tas-saħħa ta’ Korsika) u l-korpi tal-assigurazzjoni tas-saħħa (permezz tal-fondi tal-assigurazzjoni tas-saħħa primarja ta’ Corse-du-Sud (2A) u Haute-Corse (2B) – “CPAM”, “Caisse primaire d’assurance maladie”) ħadu azzjoni koordinata sabiex inaqqsu l-ostakli għall-aċċess għall-kura tas-saħħa għall-persuni minn Korsika li jeħtieġu li jirċievu jew ikomplu trattament li ma jkunx disponibbli f’Korsika.

(138)

Skont ir-rapport ta’ Gecodia, ir-regoli dwar il-kopertura tal-kostijiet tat-trasport huma bbażati fuq l-Artikoli R. 322-10 sa R. 322-10-9 tal-Kodiċi tas-Sigurtà Soċjali (“CSS”, “Code de la sécurité sociale”). L-Artikolu R. 322-10 tas-CSS jelenka l-każijiet li fihom l-kostijiet tat-trasport ta’ persuna assigurata li hija obbligata tivvjaġġa sabiex tirċievi trattament jew tgħaddi minn eżaminazzjonijiet xierqa għall-kundizzjoni tagħha jistgħu jkunu koperti mill-iskema tal-assigurazzjoni tas-saħħa (92). Dan jinkludi sitwazzjonijiet li fihom il-persuna assigurata tuża t-trasport sabiex tivvjaġġa lejn post li jinsab aktar minn 150 km ’il bogħod, li huwa l-każ għal persuna assigurata li tivvjaġġa minn Korsika lejn Franza kontinentali sabiex tirċievi trattament. L-Artikolu R. 322-10-2 tas-CSS jiddikjara li, fil-każijiet kollha, il-kopertura tal-kostijiet tat-trasport mill-iskema tal-assigurazzjoni tas-saħħa “hija soġġetta għall-preżentazzjoni mill-persuna assigurata ta’ riċetta medika għat-trasport u ta’ fattura maħruġa mit-trasportatur jew prova tat-trasport. Ir-riċetta medika trid tindika r-raġuni għat-trasport u l-mezz tat-trasport użat...”

(139)

Ir-rapport ta’ Gecodia jikkonkludi li huwa t-tabib li jiddetermina l-aktar mod xieraq ta’ trasport għall-pazjent, skont l-istat tas-saħħa u l-livell ta’ awtonomija tiegħu (l-Artikolu L. 322-5 tas-CSS), u li dik l-għażla hija stess soġġetta għal awtorizzazzjoni minn qabel mis-CPAM. Barra minn hekk, l-Artikolu R. 322-10-4 tas-CSS jirrikjedi li ssir eżaminazzjoni medika biex jiġi vverifikat li t-trattament ma jistax jiġi pprovdut f’faċilità li tinsab mhux aktar minn 150 km ’il bogħod. Fi kliem ieħor, skont ir-rapport ta’ Gecodia, huma koperti biss il-kostijiet tat-trasport għal speċjalitajiet jew għal trattament mhux disponibbli f’Korsika. Fl-aħħar nett, l-Artikolu R. 322-10-5 tas-CSS jiddikjara li r-rimborż tal-kostijiet tat-trasport huwa kkalkolat fuq il-bażi tad-distanza bejn il-post inizjali tal-kura tal-pazjent u l-eqreb faċilità ta’ trattament ordnata.

(140)

Fuq il-bażi ta’ din l-informazzjoni, l-awtoritajiet Franċiżi waslu għal żewġ konklużjonijiet.

(141)

L-ewwel nett, il-mezz tat-trasport użat, jiġifieri l-bastiment jew l-ajruplan, jiġi ordnat mit-tabib u huwa soġġett għal ftehim mis-CPAMs għar-rimborż tal-kostijiet tat-trasport. Għalhekk, il-passiġġieri mediċi ma jistgħux jagħżlu l-mezz tat-trasport jekk ikunu jixtiequ rimborż tal-kostijiet tat-trasport tagħhom.

(142)

L-awtoritajiet Franċiżi jqisu li dan juri n-nuqqas ta’ sostitwibbiltà bejn it-trasport bl-ajru u t-trasport marittimu mill-perspettiva tal-passiġġieri mediċi. L-għażla ta’ mod wieħed jew ieħor tat-trasport hija imposta fuqhom skont il-qafas legali nazzjonali li jirregola r-rimborż tal-ispejjeż mediċi.

(143)

It-tieni, l-ivvjaġġar mediku kopert mill-assigurazzjoni tas-saħħa jikkonċerna pazjenti li ma jistgħux isibu trattament xieraq f’Korsika, u li għalhekk għandhom ħtieġa urġenti li jivvjaġġaw lejn Franza kontinentali sabiex jirċievu trattament xieraq hemmhekk. Ir-rapport ta’ Gecodia jiddikjara li jrid jiġi pprovdut trattament xieraq, bil-liġi, fiċ-ċentru mediku li huwa ġeografikament l-eqreb tal-post fejn il-pazjent jirċievi kura medika f’Korsika. Għalhekk, ir-rapport ta’ Gecodia jassumi li l-passiġġieri mediċi huma sensittivi ħafna għad-distanza u għandhom it-tendenza li jiffavorixxu lill-portijiet fil-postijiet bl-eqreb ċentru ta’ trattament ordnat, sabiex jevitaw li l-kostijiet tal-ivvjaġġar tagħhom ma jiġux rimborżati, jew jiġu rimborżati parzjalment biss, mis-CPAMs.

(144)

Ir-rapport ta’ Gecodia isemmi li numru ta’ servizzi tal-kura medika relatati ma’ attivitajiet tal-isptar fil-mediċina, fil-kirurġija u fl-ostetrika (“MCO”, “médecine, chirurgie et obstétrique”), fil-kura ta’ segwitu u fir-riabilitazzjoni (“SSR”, “soins de suivi et de réadaptation”) u fil-psikjatra (“PSY”, “psychiatrie”) ma humiex disponibbli f’Korsika. Fuq il-bażi tad-data miġbura mill-aġenzija teknika għall-informazzjoni dwar l-ammissjoni fl-isptar (“ATIH” , “Agence technique d’information sur l’hospitalisation”) għall-perjodu 2015-2020, l-awtoritajiet Franċiżi kkonfermaw li hemm fluss lejn Franza kontinentali ta’ pazjenti li jgħixu f’Korsika li qed jirċievu kura bħal din. Id-data pprovduta fir-rapport ta’ Gecodia turi li bħala medja r-residenti ta’ Korsika kienu jirrappreżentaw kważi 15 000 soġġorn fi sptar (MCO) fis-sena fi Franza kontinentali, żewġ terzi minnhom fid-dipartiment ta’ Bouches-du-Rhône (Marsilja); Ir-residenti ta’ Korsika qattgħu kważi 34 000 jum fis-sena fit-trattament għall-SSR fi Franza kontinentali, nofshom fid-dipartiment ta’ Bouches-du-Rhône; u rċivew kważi 1 700 trattament tal-PSY fis-sena, kważi nofshom fid-dipartiment ta’ Bouches-du-Rhône.

(145)

Fuq din il-bażi, ir-rapport ta’ Gecodia jikkonkludi li hemm domanda speċifika mill-passiġġieri mediċi għat-trasport marittimu bejn Korsika u Franza kontinentali, filwaqt li jitqiesu, b’mod partikolari, il-kundizzjonijiet għar-rimborż tal-kostijiet tat-trasport u l-post taċ-ċentri xierqa għal trattament li ma huwiex disponibbli f’Korsika.

(146)

Ir-rapport ta’ Gecodia ħares ukoll lejn il-ħtiġijiet tal-passiġġieri mediċi f’termini ta’ destinazzjoni fi Franza kontinentali.

(147)

F’dan il-kuntest, l-awtoritajiet Franċiżi talbu lis-CPAMs sabiex jipprovduhom b’data dwar in-numru ta’ talbiet għal approvazzjoni minn qabel li huma aċċettaw għall-kopertura tal-kostijiet tat-trasport mill-iskema tal-assigurazzjoni tas-saħħa. Skont id-data miksuba mis-CPAM 2A (aktar minn 15 000 awtorizzazzjoni mogħtija), (93) aktar minn 80 % kienu jikkonċernaw vjaġġ wieħed jew aktar lejn Marsilja, meta mqabblin ma’ anqas minn 14 % lejn Nizza, 1,1 % lejn Pariġi u inqas minn 0,3 % lejn Toulon (94).

(148)

Għalhekk, ir-rapport ta’ Gecodia kkonkluda li d-domanda mill-passiġġieri mediċi x’aktarx li tkun biss għall-portijiet ta’ Franza kontinentali qrib id-destinazzjoni finali tagħhom fi Franza kontinentali (faċilitajiet ta’ kura ordnati mit-tabib). Il-maġġoranza l-kbira tal-passiġġieri mediċi jivvjaġġaw lejn Marsilja.

(149)

Sabiex jikkwantifikaw id-domanda tal-passiġġieri (residenti u mhux residenti ta’ Korsika), l-awtoritajiet Franċiżi bbażaw kemm fuq id-data storika kif ukoll fuq il-projezzjonijiet għall-perjodu 2023-2030.

(150)

L-awtoritajiet Franċiżi analizzaw id-domanda storika fost il-passiġġieri residenti u l-passiġġieri mhux residenti ta’ Korsika fuq il-bażi tad-data disponibbli mill-2016 sal-2021. Fir-rigward tad-domanda mistennija għall-perjodu 2023-2030, l-awtoritajiet Franċiżi għamlu projezzjonijiet fuq il-bażi tad-domanda osservata fl-2019 (bl-2020 u bl-2021 li huma s-snin affettwati mill-kriżi tal-COVID-19). Huma vvalutaw il-bidla fid-domanda għat-trasport marittimu minn passiġġieri residenti u mhux residenti fuq il-bażi tar-rata medja ta’ tkabbir annwali tad-domanda għat-trasport fit-tul (2015-2030) ippubblikata mill-Ministeru għat-Tranżizzjoni Ekoloġika f’Lulju 2016, (95) u aġġornata f’Ottubru 2021 (96).

(151)

Id-domanda mistennija għat-trasport marittimu fl-2030 hija ppreżentata fit-Table 14.

Tabella 14

Id-domanda tal-passiġġieri skont ir-rotta fl-2030

(152)

Fir-rigward tal-passiġġieri mediċi, l-awtoritajiet Franċiżi ma kellhomx data diretta dwar in-numru ta’ pazjenti u ta’ persuni li jakkumpanjawhom li ġew ittrasportati, id-destinazzjoni tagħhom jew il-mezz tat-trasport użat. F’dak ir-rigward, ir-rapport ta’ Gecodia jiddikjara li l-aġenzija tas-saħħa reġjonali ta’ Korsika u s-CPAMs ġew mistoqsija dwar din id-data. L-aġenzija reġjonali tas-saħħa ta’ Korsika qalet li ma kellhiex din l-informazzjoni. Is-CPAMs iċċaraw li s-sistema ta’ informazzjoni tagħhom ma kinitx tipprovdi data affidabbli u kompluta.

(153)

Għalhekk, l-awtoritajiet Franċiżi reġgħu bnew stima ta’ dawn il-vjaġġi billi użaw data indiretta.

(154)

L-awtoritajiet Franċiżi l-ewwel ibbażaw fuq id-data tal-ATIH (il-premessa 144) dwar in-numru ta’ trattamenti jew ta’ soġġorni mediċi (għal trattament mhux disponibbli f’Korsika) irreġistrati għar-residenti ta’ Korsika fi Franza kontinentali (u, b’mod aktar speċifiku, fir-reġjun ta’ Provence-Alpes-Côte-d’Azur, fejn jinsabu l-bliet ta’ Marsilja, ta’ Toulon u ta’ Nizza). L-awtoritajiet Franċiżi stmaw in-numru ta’ passiġġieri mediċi u ta’ persuni li jakkumpanjawhom fuq il-bażi tan-numru ta’ trattamenti jew ta’ soġġorni mediċi rreġistrati għall-attivitajiet tal-SSR, tal-MCO u tal-PSY għar-residenti ta’ Korsika fir-reġjun kollu ta’ Provence-Alpes-Côte-d’Azur (97). B’kollox, waslu għal stima ta’ medja ta’ 65 000 passiġġier mediku fis-sena għal kull trattament mediku relatat mal-attivitajiet tal-SSR, tal-MCO u tal-PSY. Id-dipartiment ta’ Bouches-du-Rhône (Marsilja) waħdu jirrappreżenta medja ta’ madwar 53 000 passiġġier fis-sena matul il-perjodu 2015-2019.

(155)

Din l-istima tinkludi wkoll il-persuni li jakkumpanjawhom. L-awtoritajiet Franċiżi qiesu li persuna waħda ta’ akkumpanjament kienet preżenti b’mod sistematiku għal passiġġieri mediċi taħt l-età ta’ 19-il sena u ta’ aktar minn 75 sena, u fil-gruppi ta’ età l-oħrajn persuna waħda minn kull tnejn kienet akkumpanjata. B’riżultat ta’ dan, huma stabbilew li vjaġġ mediku (ta’ ritorn) minn pazjent ta’ Korsika joħloq ħtieġa de facto għat-trasport ta’ 1,4 passiġġier (vjaġġ ta’ ritorn), filwaqt li titqies il-ħtieġa għall-persuni li jakkumpanjawhom. Skont Franza, din is-suppożizzjoni kienet konsistenti mad-data empirika miġbura mis-CPAM 2A, billi mill-15 237 talba għal approvazzjoni minn qabel aċċettati mis-CPAM 2A, 41,5 % (6 318) kienu jinvolvu persuna li takkumpanja u minn dawk it-6 318-il talba, 7,5 % kienu jinvolvu wkoll it-tieni persuna li takkumpanja.

(156)

Imbagħad, l-awtoritajiet Franċiżi stmaw in-numru ta’ vjaġġi bil-baħar b’żewġ modi.

(157)

L-ewwel approċċ kien li jinkiseb in-numru ta’ passiġġieri mediċi billi jitnaqqas in-numru ta’ passiġġieri mediċi li vvjaġġaw bl-ajruplan min-numru totali stmat ta’ passiġġieri mediċi. Id-data dwar il-passiġġieri mediċi li vvjaġġaw bl-ajru bejn Korsika u d-dipartiment ta’ Bouches-du-Rhône (Marsilja), disponibbli għall-awtoritajiet Franċiżi għall-perjodu 2016-2019, (98) turi li l-ivvjaġġar bl-ajru kien jammonta għal madwar 38 000 passiġġier fis-sena bħala medja (madwar 70 % tat-total stmat ta’ 53 000 passiġġier mediku, il-premessa 154). Fuq il-bażi ta’ dawn il-kalkoli, l-awtoritajiet Franċiżi kkonkludew li t-trasport marittimu jista’ jirrappreżenta sa 30 % tal-vjaġġi tal-passiġġieri mediċi lejn id-dipartiment ta’ Bouches-du-Rhône.

(158)

It-tieni approċċ kien li jiġu analizzati l-15 237 talba għal approvazzjoni minn qabel mibgħutin lis-CPAM 2A mir-residenti ta’ Korsika bejn l-2020 u l-2021 għar-rimborż tal-kostijiet tat-trasport relatati mal-ivvjaġġar mediku. L-analiżi ta’ dawn it-talbiet għal approvazzjoni minn qabel, li trid tinkludi r-riċetta medika li tindika l-mod tat-trasport ordnat mit-tabib skont il-kundizzjoni tal-pazjent (il-premessi 136 sa 148), żvelat li madwar 4 % minnhom kienu jikkonċernaw it-trasport marittimu.

(159)

Fuq il-bażi ta’ dawn iż-żewġ approċċi, il-proporzjon ta’ passiġġieri mediċi li jivvjaġġaw bil-baħar min-numru totali ta’ passiġġieri mediċi li jivvjaġġaw lejn Marsilja jvarja bejn 4 % u 30 %. Sabiex jiġu rrikonċiljati ż-żewġ approċċi u jiġi żgurat li l-firxa tad-domanda minn dawn il-passiġġieri tiġi vvalutata b’mod konservattiv, l-awtoritajiet Franċiżi finalment jistmaw li 10 % tal-passiġġieri mediċi vvjaġġaw bid-dgħajsa (madwar 5 400 passiġġier mediku fis-sena minn total ta’ 53 000 passiġġier mediku fis-sena stmati mill-awtoritajiet Franċiżi għad-dipartiment ta’ Bouches-du-Rhône fl-2019).

(160)

Fl-aħħar nett, l-awtoritajiet Franċiżi assenjaw in-numru ta’ passiġġieri mediċi lid-diversi portijiet ta’ Korsika fuq il-bażi tad-diżaggregazzjoni tal-attività tal-MCO skont ir-reġjun (li mappa tagħha hija disponibbli fuq is-sit tal-ATIH).

(161)

Sabiex tiġi stmata d-domanda annwali mill-passiġġieri mediċi li għandha tiġi ssodisfata bejn l-2023 u l-2030, l-awtoritajiet Franċiżi qiesu li, sabiex titqies iż-żieda mistennija fil-popolazzjoni u l-popolazzjoni li qed tixjieħ, minn naħa waħda, u l-iżvilupp tal-provvista tal-kura tas-saħħa f’Korsika, min-naħa l-oħra, id-domanda prevista bejn l-2023 u l-2030 tibqa’ stabbli fuq il-bażi tal-vjaġġi mediċi tal-passiġġieri stmati għall-2019. It-Table 15 turi l-istima ta’ vjaġġi mediċi bid-dgħajsa bejn il-portijiet ta’ Korsika u l-port ta’ Marsilja.

Tabella 15

Stima tal-vjaġġi mediċi bid-dgħajsa ta’ pazjenti li jgħixu f’Korsika u l-persuni li jakkumpanjawhom (passiġġieri annwali) bejn Korsika u Marsilja

(162)

Wara li jistmaw id-domanda kwalitattiva u kwantitattiva mid-diversi kategoriji ta’ utenti tat-trasport marittimu tal-passiġġieri bejn Korsika u Franza kontinentali, l-awtoritajiet Franċiżi ppruvaw jiddeterminaw sa liema punt il-provvista tas-suq tista’ tissodisfa dik id-domanda.

(163)

Il-konsultazzjoni mal-operaturi fil-bidu kienet tinkludi kwestjonarju, li kien fih erba’ mistoqsijiet ġenerali dwar it-trasport tal-passiġġieri:

(164)

Jekk it-tweġiba għat-tielet mistoqsija kienet “iva” għal rotta waħda jew aktar, il-kwestjonarju mbagħad ippropona lista ta’ mistoqsijiet aktar speċifiċi dwar is-servizz li l-operatur kieku jintroduċi. L-operaturi kellhom jipprovdu din l-informazzjoni għal kull rotta li għaliha kienu ddikjaraw li setgħu jipproponu servizz kummerċjali skont l-iskema ta’ OSP tal-2019.

(165)

Pereżempju, jekk operatur iddikjara li kien kapaċi jipprovdi servizz kummerċjali fuq ir-rotta Marsilja-Ajaccio, kellu jwieġeb il-mistoqsijiet li ġejjin:

(166)

Tliet operaturi wieġbu għall-konsultazzjoni mal-operaturi: Corsica Linea, La Méridionale u Corsica Ferries.

(167)

Corsica Linea u La Méridionale ddikjaraw li kieku ma joffru l-ebda servizz kummerċjali bejn Korsika u Franza kontinentali skont l-iskema ta’ OSP tal-2019.

(168)

Corsica Ferries issottomettiet is-servizz kummerċjali li kienet tuża fin-nuqqas ta’ kuntratt pubbliku ta’ servizz għat-trasport tal-passiġġieri. B’appoġġ għat-tweġibiet tagħha għall-kwestjonarju, Corsica Ferries issottomettiet diversi files Excel li jispjegaw, fost l-oħrajn, il-kapaċitajiet tal-bastimenti tagħha u s-servizz kummerċjali li kieku tipprovdi.

(169)

Bi tweġiba għall-mistoqsija 1 tal-konsultazzjoni mal-operaturi, Corsica Ferries indikat li t-tweġibiet tagħha għall-kwestjonarju, kif ukoll il-file Excel tad-data relatata mas-servizz tat-trasport tagħha, kienu tfasslu fin-nuqqas ta’ kwalunkwe indikazzjoni fid-dokumenti pprovduti mis-CdC tal-ħtiġijiet u tar-rekwiżiti ta’ kontinwità territorjali. Fid-dawl ta’ dawn l-inċertezzi, Corsica Ferries ma kinitx immudellat, fil-file Excel tagħha dwar il-kapaċità tal-bastimenti tagħha, kwalunkwe żieda jew tnaqqis fil-kapaċità offruta matul il-perjodu 2023-2028: għalhekk, il-kapaċità rrapportata kienet identika matul il-perjodu taħt analiżi.

(170)

Bi tweġiba għall-mistoqsija 4, Corsica Ferries iddikjarat li, fin-nuqqas ta’ kuntratt pubbliku ta’ servizz, mill-1 ta’ Jannar 2023 hija kieku topera servizzi ta’ trasport tal-passiġġieri bejn il-portijiet kollha ta’ Franza kontinentali (Marsilja, Nizza, Toulon) u l-portijiet kollha ta’ Korsika ħlief il-port ta’ Propriano. B’mod aktar speċifiku, kieku toffri servizzi kummerċjali matul il-jum u matul il-lejl (merkanzija u passiġġieri), li jinkludu:

(171)

Corsica Ferries infurmat lill-awtoritajiet Franċiżi li kellha flotta ta’ 13-il bastiment, li ma kinux assenjati għal rotta partikolari. Il-kumpanija ddikjarat ukoll li 15 % tal-qsim tagħha, fuq ir-rotot kollha, isir matul il-jum (it-tluq bejn is-6 a.m. u l-4 p.m. għall-wasla bejn is-2 p.m. u nofsillejl fiż-żewġ direzzjonijiet).

(172)

Fir-rigward tal-kapaċità tal-bastimenti tagħha għas-servizzi tat-trasport tal-passiġġieri, Corsica Ferries ipprovdiet lill-awtoritajiet Franċiżi bl-informazzjoni stabbilita fit-Table 16.

Tabella 16

Is-servizz potenzjali ta’ Corsica Ferries skont l-iskema ta’ OSP tal-2019 (passiġġieri annwali) fin-nuqqas ta’ PSCs

(173)

Corsica Ferries iddikjarat ukoll li l-offerta tagħha (mill-port ta’ Marsilja) tkun valida biss fin-nuqqas ta’ kuntratt pubbliku ta’ servizz bejn Korsika u Franza kontinentali.

(174)

Wara li analizzaw il-kapaċità li kienet tuża Corsica Ferries, l-awtoritajiet Franċiżi kkonkludew li, fin-nuqqas ta’ PSCs, is-suq jista’ jissodisfa d-domanda mbassra fil-perjodu 2023-2028 mill-passiġġieri residenti (minbarra passiġġieri mediċi) u dawk mhux residenti għal servizzi marittimi bejn il-portijiet ta’ Ajaccio, ta’ Bastia, ta’ L’Île-Rousse u ta’ Porto-Vecchio u l-portijiet ta’ Franza kontinentali.

(175)

Madankollu, l-awtoritajiet Franċiżi jinnotaw li Corsica Ferries kieku ma sservix il-port ta’ Propriano. Għalhekk, jikkonkludu li hemm falliment tas-suq sħiħ għat-trasport marittimu bejn il-port ta’ Propriano u l-portijiet ta’ Franza kontinentali, kemm għall-passiġġieri residenti kif ukoll għal dawk mhux residenti.

(176)

Barra minn hekk, fir-rigward tad-domanda mill-passiġġieri mediċi, l-awtoritajiet Franċiżi jqisu li l-kumpanija Corsica Ferries isservi l-port ta’ Marsilja darbtejn fil-ġimgħa biss mill-portijiet ta’ Ajaccio u ta’ Bastia, u tliet darbiet fix-xahar mill-portijiet ta’ Porto-Vecchio u ta’ L’Île-Rousse. Barra minn hekk, kif indikat fil-premessa 170, Corsica Ferries kieku ma sservix il-port ta’ Propriano. Għalhekk, huma jqisu li s-servizz offrut minn Corsica Ferries ma kienx regolari biżżejjed għall-port ta’ Marsilja, li huwa l-port preferut għall-passiġġieri mediċi.

(177)

Fid-dawl ta’ falliment tas-suq bejn il-port ta’ Propriano u l-portijiet ta’ Franza kontinentali għat-trasport marittimu ta’ passiġġieri residenti u mhux residenti, l-awtoritajiet Franċiżi kkonkludew li kien hemm ħtieġa ta’ servizz pubbliku li jkopri d-domanda kwantitattiva stmata kollha bejn l-2023 u l-2030 minn/lejn il-port ta’ Propriano, kif indikat fit-Table 14.

(178)

Fid-dawl ta’ falliment tas-suq bejn kull wieħed mill-portijiet ta’ Korsika u l-port ta’ Marsilja għat-trasport marittimu ta’ passiġġieri mediċi minħabba l-inadegwatezza tas-servizzi tat-trasport li jiġu pprovduti minn Corsica Ferries, l-awtoritajiet Franċiżi kkonkludew li kien hemm ħtieġa ta’ servizz pubbliku li jkopri d-domanda kollha minn passiġġieri mediċi li jivvjaġġaw lejn Marsilja bejn l-2023 u l-2030, kif indikat fit-Table 15.

(179)

Din is-subtaqsima tiddeskrivi l-konklużjonijiet li waslu għalihom l-awtoritajiet Franċiżi dwar (i) l-eżistenza tad-domanda mill-utenti tat-trasport marittimu tal-merkanzija bejn Korsika u Franza kontinentali u (ii) id-deskrizzjoni ta’ falliment tas-suq mill-issodisfar ta’ din id-domanda.

(180)

Is-subtaqsimiet li ġejjin jiddeskrivu l-analiżijiet imwettqin mill-awtoritajiet Franċiżi relatati kemm mad-domanda kwalitattiva mill-utentii tat-trasport marittimu tal-merkanzija bejn Korsika u Franza kontinentali kif ukoll mad-domanda kwantitattiva minn dawk l-utenti.

(181)

Din is-subtaqsima tippreżenta l-ewwel ir-riżultati tal-konsultazzjoni mal-utenti; it-tieni, ir-riżultati tal-konsultazzjoni mal-portijiet; fl-aħħar nett, il-konklużjonijiet tar-rapport ta’ Gecodia li jissupplimentaw ir-riżultati tal-konsultazzjonijiet pubbliċi.

(182)

Fid-dokument ta’ appoġġ ta’ konsultazzjoni mal-utenti (il-premessa 95), l-awtoritajiet Franċiżi għamlu distinzjoni preliminari bejn it-trasport ta’ merkanzija rmunkata u t-trasport ta’ merkanzija mhux irmunkata (102).

(183)

Il-konsultazzjoni mal-utenti kienet tinkludi kwestjonarju indirizzat lill-utenti kollha tat-trasport marittimu tal-merkanzija. Il-kwestjonarju kien fih lista ta’ madwar 20 mistoqsija, bit-tweġibiet proposti (f’xi każijiet l-utenti jistgħu jimmarkaw tweġibiet multipli) u ħin stmat ta’ tlestija ta’ ħames minuti.

(184)

L-ewwel tliet mistoqsijiet fittxew informazzjoni ġenerali dwar il-profili tal-utenti. L-ewwel mistoqsija talbet lill-utenti jipprovdu informazzjoni dwar ir-rotta/rotot marittimi lil Korsika li użaw bejn il-port ta’ Marsilja u l-ħames portijiet ta’ Korsika (103). It-tieni mistoqsija fittxet informazzjoni dwar is-settur ta’ attività tal-utenti u l-kodiċi postali tal-uffiċċju ewlieni tagħhom. It-tielet mistoqsija talbet lill-utenti għall-opinjoni tagħhom dwar id-distinzjoni bejn it-trasport ta’ merkanzija rmunkata u t-trasport ta’ merkanzija mhux irmunkata, u talbuhom jipprovdu informazzjoni dwar il-volum ta’ merkanzija rmunkata u/jew mhux irmunkata ttrasportata fuq ir-rotta inkwistjoni fl-2019.

(185)

Il-mistoqsijiet minn 4 sa 13 staqsew lill-utenti dwar is-sodisfazzjon tagħhom bis-servizzi tat-trasport marittimu offruti fuq ir-rotta/i kkonċernata/i. B’mod aktar speċifiku, staqsew:

(186)

Il-mistoqsijiet minn 14 sa 20 stiednu lill-utenti jagħtu l-valutazzjoni tagħhom tal-għażla tal-port ta’ Franza kontinentali għas-servizz. B’mod partikolari, dawn il-mistoqsijiet staqsew:

(187)

Fl-aħħar nett, il-mistoqsija 21 staqsiet lill-utenti dwar l-adegwatezza ta’ servizz tat-trasport li juża bastimenti kompletament iddedikati għall-merkanzija (Ro-Ro) meta mqabbel mas-servizz kurrenti (Ro-Pax).

(188)

Sa tmiem il-perjodu ta’ konsultazzjoni, l-awtoritajiet Franċiżi kienu rċivew biss ħames tweġibiet għall-kwestjonarju. Fid-dawl ta’ dan in-numru baxx, Gecodia kkuntattjat direttament diversi kumpaniji tat-trasport u tal-loġistika li jużaw is-servizzi tal-merkanzija marittima bejn Korsika u Franza kontinentali, sabiex tgħaddi l-kwestjonarju direttament magħhom bit-telefown.

(189)

L-awtoritajiet Franċiżi jiddikjaraw li l-Gecodia kkuntattjat 21 kumpanija tat-trasport li jirrappreżentaw madwar 90 % tat-traffiku totali tal-merkanzija mhux irmunkata u 70 % tal-merkanzija rmunkata li tgħaddi bejn Korsika u Franza kontinentali. It-trasportaturi tal-merkanzija mistħarrġa kienu jużaw prinċipalment rotot minn Marsilja, filwaqt li aktar minn nofshom użaw ukoll rotot minn Toulon. It-trasportaturi tal-merkanzija wieġbu għal kull waħda mir-rotot li użaw bejn Korsika (kull wieħed mill-portijiet ta’ Korsika) u Franza kontinentali (kull wieħed mill-portijiet ta’ Franza kontinentali), u għal kull tip ta’ merkanzija (merkanzija rmunkata u mhux irmunkata).

(190)

Fir-rigward tal-merkanzija mhux irmunkata, (109) it-tweġibiet għall-kwestjonarju jistgħu jinġabru fil-qosor kif ġej:

(191)

Fir-rigward tal-merkanzija rmunkata, it-tweġibiet għall-kwestjonarju jistgħu jinġabru fil-qosor kif ġej:

(192)

Il-kwestjonarju li jakkumpanja l-konsultazzjoni mal-portijiet kien jinkludi tliet partijiet dwar it-traffiku tal-merkanzija.

(193)

L-ewwel parti tal-kwestjonarju stiednet lill-awtoritajiet tal-port jikkummentaw dwar il-karatteristiċi tad-domanda tal-utenti, kif identifikati u ppreżentati fid-dokument ta’ appoġġ għall-konsultazzjoni mal-utenti (il-premessa 95). B’mod aktar speċifiku, l-ewwel parti talbet lill-awtoritajiet tal-portijiet sabiex:

(194)

It-tieni parti tal-kwestjonarju talbet lill-awtoritajiet tal-port sabiex jipprovdu deskrizzjoni sħiħa tal-infrastruttura tal-portijiet li x’aktarx jużaw lis-servizzi tat-trasport marittimu bejn Korsika u Franza kontinentali.

(195)

It-tielet parti (il-mistoqsijiet 5.1 sa 5.8 għall-merkanzija mhux irmunkata u l-mistoqsijiet 6.1 sa 6.8 għall-merkanzija rmunkata) essenzjalment staqsew lill-awtoritajiet tal-port dwar il-kapaċità tal-infrastruttura tagħhom sabiex jimmaniġġaw it-traffiku tal-merkanzija. B’mod aktar speċifiku, talbuhom jindikaw:

(196)

Kif indikat fil-premessa 120, l-awtoritajiet Franċiżi ġabru kontributi mingħand l-awtoritajiet tal-port ta’ Toulon, ta’ Marsilja u ta’ Nizza.

(197)

Fir-rigward tal-ewwel parti tal-kwestjonarju, it-tliet portijiet iqisu li l-approċċ meħud mill-awtoritajiet Franċiżi fid-distinzjoni bejn merkanzija rmunkata u mhux irmunkata huwa xieraq. Fir-rigward taż-żona ta’ klijentela tagħhom għat-trasport tal-merkanzija, il-portijiet ta’ Nizza u ta’ Toulon iqisu li ż-żona ta’ klijentela tagħhom hija biss lokali u limitata għaż-żona immedjata taż-żona interna, filwaqt li l-port ta’ Marsilja jqis li huwa jattira t-trasport ta’ merkanzija minn Franza kollha, u b’mod partikolari t-trasport ta’ merkanzija li tgħaddi mill-wied ta’ Rhône.

(198)

Fir-rigward tal-kundizzjonijiet tal-kompetizzjoni, il-port ta’ Nizza jqis li l-infrastruttura tiegħu, li tinsab fiċ-ċentru tal-belt, u n-nisġa industrijali u kummerċjali dgħajfa madwar Nizza ma jippermettulux, u mhux se jippermettulu fuq perjodu ta’ 7 snin, li jissodisfa d-domanda għat-trasport tal-merkanzija bejn Korsika u Franza kontinentali. Il-port ta’ Toulon jiddikjara wkoll li l-port ta’ Marsilja huwa l-mexxej mhux ikkontestat fis-suq tal-merkanzija, u li jista’ biss jippożizzjona ruħu sabiex jikkomplementa lil Marsilja. Il-port ta’ Toulon jindika li l-livell ta’ kompetizzjoni bejn Marsilja u Toulon huwa “b’saħħtu, minkejja l-kapaċità baxxa ta’ Toulon, li jfisser li ma jistax jikkompeti verament f’dan is-suq”. Il-port ta’ Marsilja jqis li l-pożizzjoni ġeografika tiegħu, fil-qalba tal-ġunzjonijiet tal-awtostradi u tal-binarji ferrovjarji u qrib iċ-ċentri ewlenin tal-loġistika u tat-trasport, kif ukoll l-aċċess faċli ħafna għall-infrastruttura tiegħu minn tliet awtostradi jagħtuh vantaġġ kbir għat-trasport tal-merkanzija.

(199)

Fir-rigward tat-tielet parti tal-kwestjonarju:

(200)

Kif indikat fil-premessa 124, is-CCI ta’ Korsika pprovdiet ukoll kontribut b’test liberu matul il-konsultazzjoni mal-utenti. Is-CCI ta’ Korsika pprovdiet diversi biċċiet ta’ informazzjoni dwar it-trasport tal-merkanzija fil-portijiet ta’ Korsika.

(201)

B’mod ġenerali, is-CCI ta’ Korsika tenfasizza l-problemi ta’ kapaċità li jiltaqgħu magħhom il-portijiet kollha ta’ Korsika, bl-eċċezzjoni tal-port ta’ Propriano. Din is-sitwazzjoni teħtieġ regolarment eżenzjonijiet prefattorali matul il-perjodu tas-sajf sabiex il-vetturi tqal tal-merkanzija jitħallew isuqu f’jiem ta’ traffiku kbir fit-toroq (jiem “ħomor”). B’mod aktar speċifiku, is-CCI ta’ Korsika tosserva li:

(202)

Minbarra l-konsultazzjonijiet pubbliċi, l-awtoritajiet Franċiżi talbu wkoll lil Gecodia sabiex twettaq analiżijiet addizzjonali fuq talba mill-utenti tat-trasport tal-merkanzija għas-servizzi marittimi lejn Korsika.

(203)

Kif indikat fil-premessa 95, l-awtoritajiet Franċiżi kienu indikaw fid-dokument ta’ appoġġ tal-konsultazzjoni mal-utenti li kellha ssir distinzjoni bejn it-trasport ta’ merkanzija rmunkata u t-trasport ta’ merkanzija mhux irmunkata, b’mod partikolari minħabba r-restrizzjonijiet differenti ta’ mmaniġġar li dan it-traffiku jinvolvi.

(204)

L-istudju li sar minn Gecodia jikkonferma din id-distinzjoni bejn merkanzija rmunkata u merkanzija mhux irmunkata. Gecodia wettqet ukoll analiżi tal-ambitu ġeografiku tad-domanda tal-utenti għat-trasport tal-merkanzija rmunkata u mhux irmunkata bil-baħar, sabiex tiddetermina jekk kienx hemm domanda tal-utenti għal port wieħed jew aktar ta’ Franza kontinentali sabiex jittrasporta l-merkanzija tagħhom bejn Korsika u Franza kontinentali. B’mod partikolari, fit-twettiq ta’ din l-analiżi tqiesu l-parametri li ġejjin:

(205)

Ir-rapport ta’ Gecodia jqis li hemm differenza sostanzjali bejn il-merkanzija rmunkata u l-merkanzija mhux irmunkata.L-ewwel nett, merkanzija mhux irmunkata tfisser li s-semitrejler irid jinqala’ mit-trakk sabiex jitgħabba fuq il-bastiment, li jeħtieġ tagħmir speċjalizzat u intervent mill-ħaddiema tal-baċir. It-tieni, il-port irid ikollu biżżejjed kapaċità (żoni ta’ mmaniġġar) sabiex jaħżen is-semitrejlers qabel it-tagħbija. Fl-aħħar nett, it-tagħbija tas-semitrejlers ma tistax isseħħ fl-istess ħin tal-imbarkazzjoni tal-passiġġieri u tat-trakkijiet, li jfisser li l-bastiment għandu waqfa twila. Madankollu, waqfa twila tillimita l-użu ta’ bnajka, u għalhekk il-port irid ikollu diversi bnajkiet sabiex jaqdi diversi destinazzjonijiet fl-istess ħin. Ir-rapport ta’ Gecodia jibbaża fuq ir-riżultati tal-konsultazzjonijiet mal-utenti u mal-portijiet sabiex jappoġġa l-adegwatezza ta’ din id-distinzjoni.

(206)

Barra minn hekk, ir-rapport ta’ Gecodia jindika li, mill-perspettiva tat-trasportaturi tal-merkanzija, il-merkanzija rmunkata u l-merkanzija mhux irmunkata għandhom karatteristiċi differenti. Meta t-trasport tal-merkanzija rmunkata ikun jeħtieġ flotta kbira ta’ tratturi semitrejler sabiex jiġi żgurat it-trasport ta’ kuljum ta’ diversi trejlers, (120) it-trasport tal-merkanzija mhux irmunkata jippermetti li l-flotta ta’ tratturi tiġi ottimizzata fir-rigward tan-numru ta’ semitrejlers, u b’hekk it-trasportatur ikun jista’ jagħmel diversi vjaġġi bir-ritorn bi trattur wieħed bejn il-port u l-bażi loġistika tiegħu f’jum wieħed. Ir-rapport ta’ Gecodia jiddikjara li, matul il-konsultazzjoni mal-utenti, it-trasportaturi tal-merkanzija ġeneralment iddikjaraw li għamlu bejn erba’ u sitt vjaġġi bir-ritorn f’jum bi trattur għal merkanzija mhux irmunkata.

(207)

Għalhekk, ir-rapport ta’ Gecodia jikkonkludi li, għal trasportatur, il-bidla minn merkanzija mhux irmunkata għal merkanzija rmunkata tinvolvi kostijiet sinifikanti f’termini ta’ persunal u ta’ xiri ta’ tratturi semitrejler addizzjonali. Għalhekk, it-trasport ta’ merkanzija rmunkata u merkanzija mhux irmunkata jinvolvi żewġ tipi differenti ta’ domanda.

(208)

Madankollu, ir-rapport ta’ Gecodia jindika li hemm xi affarijiet komuni bejn il-merkanzija rmunkata u l-merkanzija mhux irmunkata. B’mod partikolari, ir-rapport ta’ Gecodia jiddikjara li l-konsenji (merkanzija rmunkata jew mhux irmunkata) iridu jsiru filgħodu qabel ħin impost mill-klijent tat-trasportatur tal-merkanzija, soġġett għal penali jekk il-konsenja tkun tard jew trid tiġi skedata mill-ġdid. Għalhekk, ir-rapport ta’ Gecodia jenfasizza l-importanza tal-ilqugħ fil-portijiet fl-aktar ħin kmieni possibbli (bejn is-6 a.m. u s-7 a.m.) sabiex ikunu jistgħu jitwasslu lid-destinatarji fil-ħin, irrispettivament mill-ispeditur (supermarkets, kostruzzjoni, kurrieri jew operaturi tal-merkanzija bl-ingrossa). Fil-każ ta’ merkanzija mhux irmunkata, huwa meħtieġ ukoll ilqugħ bikri ħafna fil-port għal semitrejlers mingħajr tagħbija (li jirritornaw lejn Franza kontinentali), minħabba l-ħin meħtieġ sabiex is-semitrejlers żbarkati jiġu rritornati lejn il-bażijiet loġistiċi (bejjiegħa bl-imnut jew trasportaturi tal-merkanzija), jitgħabbew u mbagħad jiġu rritornati l-port. Barra minn hekk, fiż-żewġ każijiet, is-servizzi marittimi regolari jridu jiġu żgurati sabiex tiġi ggarantita l-provvista tal-merkanzija lejn Korsika u r-ritorn ta’ semitrejlers/trakkijiet lejn Franza kontinentali.

(209)

Ir-rapport ta’ Gecodia jqis li l-utenti tat-trasport tal-merkanzija mhux irmunkata jużaw il-port ta’ Marsilja esklużivament u li, għalhekk, dan il-port ma huwiex sostitwibbli mal-portijiet l-oħrajn ta’ Franza kontinentali ta’ Toulon u ta’ Nizza.

(210)

L-ewwel nett, ir-rapport ta’ Gecodia jiddikjara li l-portijiet ta’ Marsilja (121) u ta’ Toulon-Brégaillon biss għandhom l-infrastruttura neċessarja sabiex jakkomodaw dan it-tip ta’ traffiku, li ma huwiex il-każ għall-portijiet ta’ Toulon-Port de Commerce u ta’ Nizza. Toulon-Brégaillon għandu wkoll kapaċità limitata għal post ta’ rmiġġ wieħed, li ma jippermettix li dan jipprovdi aktar minn qsim wieħed ta’ kuljum lejn Korsika, minħabba r-restrizzjonijiet tad-durata tal-waqfa u tal-ħin tat-tluq għal merkanzija mhux irmunkata (122). Għalhekk, jista’ jkun li teżisti s-sostitwibbiltà bejn il-portijiet ta’ Marsilja u ta’ Toulon-Brégaillon għal dan it-tip ta’ traffiku, iżda fuq mhux aktar minn rotta waħda biss.

(211)

It-tieni, skont ir-rapport ta’ Gecodia, il-konsultazzjoni mal-utenti fil-biċċa l-kbira tikkonferma li, għall-merkanzija mhux irmunkata, it-trasportaturi tal-merkanzija qatt jew rarament jikkunsidraw alternattiva għall-port ta’ Marsilja meta jippjanaw il-vjaġġi tagħhom. L-ebda wieħed mir-rispondenti ma indika li żieda fil-prezz ta’ 5-10 % fil-port ta’ Marsilja kieku twassalhom sabiex jaqilbu għall-portijiet ta’ Toulon, minħabba li jekk jitilqu minn Toulon ma jkunux jistgħu jottimizzaw l-operazzjonijiet ta’ kuljum tagħhom.

(212)

Fir-rigward tal-awtoritajiet tal-port, is-CCI ta’ Nizza f’Côte d’Azur iddikjarat li ż-żona ta’ klijentela tal-port hija biss lokali u li “l-port ta’ Nizza, bl-infrastruttura tiegħu fil-belt u n-nisġa industrijali u kummerċjali dgħajfa tiegħu, huwa żvantaġġat u qatt ma hu se jkun jista’ jissodisfa d-domanda għall-merkanzija lejn Korsika, peress li Toulon u Marsilja huma aktar adattati għall-ħtiġijiet”. Barra minn hekk, ir-rapport ta’ Gecodia jenfasizza d-dikjarazzjoni magħmula mill-port ta’ Toulon matul il-konsultazzjoni mal-portijiet, li skont din il-port ta’ Toulon jista’ biss jippożizzjona ruħu sabiex jikkomplementa l-port ta’ Marsilja, minħabba ż-żona ta’ klijentela limitata tiegħu taż-żona interna ta’ Toulon u l-livelli limitati ta’ kapaċità tat-terminali marittimi tiegħu.

(213)

It-tielet, ir-rapport ta’ Gecodia josserva li, sabiex jiġu żgurati konsenji lill-ħwienet, unitajiet kbar ta’ distribuzzjoni jiddependu prinċipalment fuq imħażen reġjonali jew nazzjonali. Fil-każ ta’ Korsika, aktar minn 90 % tal-provvisti lill-ħwienet tad-dipartiment ta’ Korsika jintbagħtu permezz ta’ dawn il-bażijiet loġistiċi, b’tali mod li l-biċċa l-kbira tal-oġġetti importati f’Korsika joriġinaw miċ-ċentri loġistiċi fir-reġjun ta’ PACA (Provence-Alpes-Côte d’Azur) (123). Ir-rapport ta’ Gecodia jispjega li l-imħażen u l-pjattaformi loġistiċi huma kkonċentrati l-aktar fil-Majjistral u madwar Marsilja, kif ukoll fil-kuritur ta’ Rhône. F’dan ir-rigward, l-awtoritajiet Franċiżi jirreferu għall-istudju konġunt imwettaq f’Ottubru 2021 mill-aġenzija tal-ippjanar urban taż-żona metropolitana ta’ Marsilja u mill-aġenzija tal-ippjanar urban tar-reġjun ta’ Aix-Durance, li jistabbilixxi l-pożizzjoni ġeografika ta’ dawn l-imħażen u l-pjattaformi (124). Dan l-istudju juri l-konċentrazzjoni għolja ħafna tal-flussi loġistiċi lejn Marsilja. Għalhekk, ir-rapport ta’ Gecodia jqis li l-għażla tal-port ta’ Marsilja hija fil-biċċa l-kbira ġġustifikata mill-qrubija tal-port għas-siti tat-tagħbija u mill-preżenza tal-infrastruttura xierqa.

(214)

Skont ir-rapport ta’ Gecodia, il-qrubija tal-maġġoranza tal-bażijiet loġistiċi u tal-imħażen għall-port ta’ Marsilja għandha żewġ implikazzjonijiet. L-ewwel nett, fuq il-bażi tas-simulatur tal-kostijiet ippubblikat mill-kumitat nazzjonali tat-toroq, l-użu tal-port ta’ Toulon-Brégaillon għat-trasportaturi kollha tal-merkanzija bbażati madwar Marsilja jew fil-kuritur ta’ Rhône jirriżulta f’kost addizzjonali medju ta’ EUR 11/LM għal kull vjaġġ ta’ semitrejler meta mqabbel mal-port ta’ Marsilja (125). It-tieni, minbarra din il-kost addizzjonali tat-triq, ikun hemm żieda fil-kost tal-produzzjoni għat-trasportaturi tal-merkanzija. Dan għaliex, minħabba d-distanza akbar li jkollhom ikopru, it-trasportaturi tal-merkanzija jkollhom inaqqsu bin-nofs in-numru ta’ vjaġġi bir-ritorn għal kull trattur li jistgħu jagħmlu f’jum wieħed bejn il-bażi loġistika tagħhom u l-port tat-tluq/tal-wasla, li jfisser li jkollhom jiksbu tratturi addizzjonali sabiex iżommu l-istess volum ta’ attività.

(215)

Ir-rapport ta’ Gecodia jikkonkludi li, mill-perspettiva tal-utenti tat-trasport marittimu tal-merkanzija mhux irmunkata, il-port ta’ Marsilja ma huwiex sostitwibbli mal-portijiet ta’ Toulon jew ta’ Nizza għas-servizzi marittimi lejn Korsika.

(216)

Ir-rapport ta’ Gecodia jqis li, mill-perspettiva tal-utenti tat-trasport marittimu tal-merkanzija rmunkata, il-port ta’ Marsilja jista’ jiġi ssostitwit biss bit-terminal Toulon-Port de Commerce (minbarra s-sostitwibbiltà ma’ Nizza u mat-terminali l-oħrajn ta’ Toulon), u parzjalment biss sa fejn xi utenti tat-trasport marittimu tal-merkanzija rmunkata ma jqisux li dan it-terminal huwa alternattiva għall-port ta’ Marsilja.

(217)

L-ewwel nett, ir-rapport ta’ Gecodia jiddikjara li l-merkanzija rmunkata ma teħtieġ l-ebda infrastruttura partikolari tal-port, peress li s-semitrejler jitgħabba mis-sewwieq tiegħu direttament fuq il-bastiment bħala vettura waħda. Għalhekk, kull wieħed mit-tliet portijiet ta’ Franza kontinentali jista’ jakkomoda merkanzija rmunkata mingħajr restrizzjonijiet partikolari (126). Madankollu, ir-rapport ta’ Gecodia jinnota li, matul il-konsultazzjoni mal-portijiet, il-port ta’ Toulon iddikjara li huwa diffiċli li jiġi akkomodat aktar traffiku tal-merkanzija rmunkata matul is-sena, peress li l-kapaċità tal-port diġà hija ta’ 80 % mimlija mit-traffiku eżistenti ta’ Corsica Ferries, filwaqt li l-port ta’ Nizza ddikjara li xtaq jagħti prijorità lit-traffiku tal-passiġġieri.

(218)

It-tieni, ir-rapport ta’ Gecodia jinnota li l-ebda wieħed mir-rispondenti għall-konsultazzjoni mal-utenti ma indika li żieda fil-prezz ta’ 5-10 % f’Marsilja twassal sabiex il-merkanzija rmunkata tagħhom tiġi ddevjata lejn Toulon (u saħansitra anqas lejn Nizza). Għalhekk, minn dik il-konsultazzjoni jidher li t-trasportaturi tal-merkanzija ma jqisux rotta alternattiva meta jippjanaw il-vjaġġi tagħhom. L-għażla tal-port ta’ Marsilja hija fil-biċċa l-kbira ġġustifikata mill-qrubija tiegħu għas-siti tat-tagħbija tat-trasportaturi tal-merkanzija u mill-infrastruttura tal-port disponibbli.

(219)

It-tielet, bl-istess mod bħal fil-każ tal-merkanzija mhux irmunkata, ir-rapport ta’ Gecodia jispjega li, minħabba l-qrubija tal-bażijiet loġistiċi tal-biċċa l-kbira tat-trasportaturi tal-merkanzija għall-port ta’ Marsilja (il-premessa 213), it-trasferiment ta’ xi utenti, li l-bażijiet loġistiċi tagħhom jinsabu qrib Marsilja, lejn il-port ta’ Toulon ikun jirriżulta f’distanzi itwal u fi f’kostijiet tat-trasport addizzjonali (EUR 4,5/LM). Dawn il-kostijiet addizzjonali jistgħu jżidu l-kostijiet tal-produzzjoni għal trasportatur b’sa 17 % (127). Ir-rapport ta’ Gecodia jiddikjara li dawn is-sejbiet huma konsistenti mad-dikjarazzjonijiet magħmulin mill-portijiet ta’ Nizza u ta’ Toulon matul il-konsultazzjoni mal-portijiet, li skont din dawk iż-żewġ portijiet jattiraw biss traffiku lokali, limitat għaż-żona interna immedjata tagħhom. L-awtoritajiet Franċiżi jindikaw ukoll li n-noll marittimu mħallas mit-trasportaturi tal-merkanzija jingħadda bis-sħiħ lill-klijenti tagħhom u li, konsegwentement, il-varjazzjoni fin-noll tat-trasport marittimu minn port ta’ Franza kontinentali għal ieħor ma għandha l-ebda effett fuq il-kost tal-produzzjoni għat-trasportaturi tal-merkanzija.

(220)

Fl-aħħar nett, ir-rapport ta’ Gecodia jippreżenta analiżi kwantitattiva li turi li żieda fin-noll ta’ kull xahar għal kull metru lineari ta’ merkanzija rmunkata f’Marsilja ma twassalx għal trasferiment tat-traffiku tal-merkanzija rmunkata lejn il-portijiet ta’ Toulon. B’mod aktar speċifiku, ir-rapport ta’ Gecodia investiga żewġ każijiet riċenti ta’ xokkijiet persistenti fil-prezzijiet fuq ir-rotot ta’ Marsilja, (128) filwaqt li n-noll ta’ kull xahar għal kull metru lineari baqa’ ġeneralment stabbli f’Toulon (129). Ir-rapport ta’ Gecodia jispjega li, bejn Lulju 2018 u Mejju 2019, ix-xokk ’il fuq fil-prezzijiet ma wassalx għal reazzjoni min-naħa tat-trasportaturi tal-merkanzija, peress li s-sehem mis-suq ta’ Toulon baqa’ stabbli matul dak il-perjodu.

(221)

Għalhekk, ir-rapport ta’ Gecodia jikkonkludi li l-portijiet ta’ Toulon u ta’ Marsilja huma biss parzjalment sostitwibbli fir-rigward tat-trasport marittimu ta’ merkanzija rmunkata bejn Korsika u Franza kontinentali.

(222)

Ir-rapport ta’ Gecodia stima d-domanda annwali futura għat-trasport marittimu tal-merkanzija rmunkata u mhux irmunkata matul il-perjodu 2023-2030 għal kull waħda mir-rotot bejn il-port ta’ Marsilja u l-portijiet ta’ Korsika.

(223)

Id-domanda storika għall-merkanzija mhux irmunkata ġiet stabbilita fuq il-bażi tad-data miġbura mill-kumpaniji tat-tbaħħir. Sabiex tiġi vvalutata d-domanda mbassra għall-2023-2030, it-tkabbir annwali osservat bejn l-2010 u l-2019 (2,3 % fis-sena) ġie applikat għat-traffiku fl-2019. Id-domanda mbassra ġiet stabbilita kif ġej:

Tabella 17

Id-domanda għall-merkanzija mhux irmunkata skont ir-rotta marittima (f’LM) minn Marsilja osservata għall-perjodu 2018-2020 u stmata għall-perjodu 2023–2030

(224)

Id-domanda kwantitattiva għat-trasport marittimu ta’ merkanzija rmunkata ġiet stmata fuq il-bażi tal-istess parametri bħad-domanda kwantitattiva għat-trasport marittimu ta’ merkanzija mhux irmunkata (il-premessi 222 u 223).

(225)

Kif spjegat fit-Taqsima 3.4.2.1.1.3.3, ir-rapport ta’ Gecodia kkonkluda li l-port ta’ Marsilja u l-port ta’ Nizza ma humiex sostitwibbli fir-rigward tat-trasport marittimu ta’ merkanzija rmunkata u li l-portijiet ta’ Marsilja u ta’ Toulon huma biss parzjalment sostitwibbli f’dak ir-rigward.

(226)

L-awtoritajiet Franċiżi qiesu, fuq il-bażi tar-rapport ta’ Gecodia, li s-sehem tad-domanda mill-utenti tat-trasport tal-merkanzija rmunkata li jqisu li l-port ta’ Marsilja ma huwiex sostitwibbli mal-port ta’ Toulon jirrappreżenta 80 % tad-domanda storika għall-merkanzija rmunkata bejn Marsilja u Korsika fl-2019, filwaqt li l-20 % li jifdal iqisu lil Toulon bħala alternattiva għall-port ta’ Marsilja.

(227)

L-awtoritajiet Franċiżi spjegaw li din l-istima ta’ 80 % ġiet minn dikjarazzjonijiet mit-trade union tat-trasportaturi tal-merkanzija ta’ Korsika u minn Corsica Linea, magħmulin fil-kuntest ta’ konsultazzjoni tas-suq datata l-2020. B’mod aktar speċifiku, it-trade union (li tammonta għal [20-50] % tal-volum ta’ LM ta’ merkanzija rmunkata ttrasportata bejn Korsika u Franza kontinentali) u Corsica Linea indikaw, rispettivament, li 84 %/85 % tal-merkanzija rmunkata oriġinat mid-dipartiment ta’ Bouches-du-Rhône (li Marsilja hija l-port prinċipali tiegħu) jew kienet destinata hemmhekk.

(228)

Wara li ddeterminat id-domanda speċifika stmata għall-merkanzija rmunkata fil-port ta’ Marsilja, l-awtoritajiet Franċiżi kkwantifikaw din id-domanda għas-snin li ġejjin. Id-domanda kwantitattiva għall-merkanzija rmunkata mill-grupp ta’ utenti li ma jqisux l-ebda alternattiva għall-port ta’ Marsilja (jiġifieri 80 % tad-domanda stmata għall-2023-2030 bejn Marsilja u Korsika) hija ppreżentata fit-Table 18.

Tabella 18

Id-domanda għall-merkanzija rmunkata skont ir-rotta marittima (f’LM) minn Marsilja osservata għall-perjodu 2018-2020 u stmata għall-perjodu 2023-2030

(229)

Barra minn hekk, peress li l-merkanzija rmunkata teħtieġ ukoll it-trasport tas-sewwieqa (li jikkostitwixxu kategorija ta’ passiġġieri), l-awtoritajiet Franċiżi identifikaw ukoll domanda għat-trasport tas-sewwieqa. L-awtoritajiet Franċiżi qiesu li d-domanda mis-sewwieqa kienet proporzjonali għall-volum ta’ merkanzija rmunkata ttrasportata, u li dan il-proporzjon kien kostanti maż-żmien.

(230)

Sabiex jiġi stmat, għal kull rotta marittima, il-proporzjon ta’ sewwieqa għal LM ta’ merkanzija rmunkata, l-awtoritajiet Franċiżi bbażaw fuq il-valur medju osservat għall-perjodu 2018-2021. Dan il-proporzjon ġie applikat għad-domanda stmata għall-merkanzija rmunkata għall-2030. Konsegwentement, skont l-awtoritajiet Franċiżi, id-domanda għat-trasport tas-sewwieqa hija kif ġej:

Tabella 19

It-traffiku marittimu tas-sewwieqa (in-numru ta’ sewwieqa) minn Marsilja osservat għall-perjodu 2018-2021 u stmat għall-perjodu 2023-2030

(231)

Wara li jistmaw id-domanda kwalitattiva u kwantitattiva mid-diversi kategoriji ta’ utenti tat-trasport marittimu tal-merkanzija bejn Korsika u Franza kontinentali, l-awtoritajiet Franċiżi ppruvaw jiddeterminaw sa liema punt il-provvista tas-suq tista’ tissodisfa dik id-domanda.

(232)

L-operaturi tat-trasport marittimu kellhom iwieġbu għall-istess mistoqsijiet stabbiliti fil-premessi 163 sa 165 fir-rigward tas-servizz tal-merkanzija li kienu jużaw fin-nuqqas ta’ kuntratt pubbliku ta’ servizz. B’mod partikolari, l-operaturi tat-trasport marittimu ntalbu jimlew file Excel li jipprovdi informazzjoni separata dwar il-volumi ta’ merkanzija rmunkata u mhux irmunkata li kieku jġorru.

(233)

Tliet operaturi wieġbu għall-konsultazzjoni mal-operaturi: Corsica Linea, La Méridionale u Corsica Ferries.

(234)

Corsica Linea u La Méridionale ddikjaraw li, fin-nuqqas ta’ kuntratt pubbliku ta’ servizz, kieku ma joffru l-ebda servizz kummerċjali bejn Korsika u Franza kontinentali.

(235)

Corsica Ferries issottomettiet l-offerta kummerċjali li kieku tagħmel fin-nuqqas ta’ kuntratt pubbliku ta’ servizz għat-trasport tal-merkanzija. B’appoġġ għat-tweġibiet tagħha għall-kwestjonarju, Corsica Ferries issottomettiet diversi files Excel li jispjegaw, fost l-oħrajn, il-kapaċità tal-bastimenti tagħha u l-offerta kummerċjali li kieku timplimenta.

(236)

Bi tweġiba għall-mistoqsija 2 tal-konsultazzjoni mal-operaturi, li talbet lill-operaturi jesprimu l-fehmiet tagħhom dwar l-adegwatezza tad-distinzjoni bejn merkanzija rmunkata u mhux irmunkata, Corsica Ferries indikat in-natura artifiċjali u ineffettiva tad-distinzjoni sistematika magħmula mill-OTC bejn merkanzija rmunkata u mhux irmunkata, li kienet tiddependi mid-daqs, mill-organizzazzjoni u mill-għażliet ta’ kull trasportatur tal-merkanzija aktar milli mis-servizz ipprovdut mill-kumpaniji tat-tbaħħir. Corsica Ferries enfasizzat ukoll li, skont l-awtoritajiet Franċiżi, merkanzija rmunkata kienet tfisser li kellu jkun hemm sewwieq abbord il-bastiment, filwaqt li fi ħdan il-merkanzija rmunkata, kien hemm distinzjoni bejn merkanzija rmunkata akkumpanjata (b’sewwieq) u merkanzija rmunkata mhux akkumpanjata (mingħajr sewwieq).

(237)

Fit-tweġiba tagħha, Corsica Ferries iddikjarat li s-servizz li toffri fin-nuqqas ta’ kuntratt pubbliku ta’ servizz ma jagħmilx distinzjoni bejn il-kapaċitajiet tat-trasport offruti skont it-tip ta’ merkanzija prevista. B’hekk, il-file tad-data Excel li ssottomettiet wera l-kapaċitajiet kumulattivi tat-trasport tal-merkanzija tal-kumpanija, jiġifieri inkluża kemm merkanzija mhux irmunkata kif ukoll dik irmunkata, mingħajr ma ssir distinzjoni bejn it-tnejn.

(238)

Corsica Ferries għamlet ukoll l-istess kritika msemmija fil-premessa 169.

(239)

Bi tweġiba għall-mistoqsija 4, Corsica Ferries iddikjarat li, fin-nuqqas ta’ kuntratt pubbliku ta’ servizz, mill-1 ta’ Jannar 2023 hija kieku topera servizzi ta’ trasport tal-merkanzija bejn il-portijiet kollha ta’ Franza kontinentali (Marsilja, Ajaccio, Toulon) u l-portijiet kollha ta’ Korsika, bl-eċċezzjoni tal-port ta’ Propriano. B’mod aktar speċifiku, kieku toffri servizzi kummerċjali matul il-jum u matul il-lejl (merkanzija u passiġġieri), li jinkludu:

(240)

Corsica Ferries infurmat lill-awtoritajiet Franċiżi li kellha flotta ta’ 13-il bastiment, li ma humiex assenjati għal rotta partikolari. Il-kumpanija ddikjarat ukoll li 15 % tal-qsim tagħha, fuq ir-rotot kollha, isir matul il-jum (it-tluq bejn is-6 a.m. u l-4 p.m. għall-wasla bejn is-2 p.m. u nofsillejl fiż-żewġ direzzjonijiet).

(241)

Fir-rigward tal-kapaċità tal-bastimenti tagħha għas-servizzi tat-trasport tal-merkanzija, Corsica Ferries ipprovdiet lill-awtoritajiet Franċiżi bl-informazzjoni stabbilita fit-Table 20.

Tabella 20

It-trasport marittimu tal-merkanzija ta’ Corsica Ferries skont ir-rotta marittima (f’LM) minn Marsilja u minn Toulon osservat għall-perjodu 2016-2019 u stmat għall-perjodu 2023-2028 fin-nuqqas ta’ PSCs

(242)

Corsica Ferries iddikjarat ukoll li l-offerta proposta tkun valida biss fin-nuqqas ta’ kwalunkwe kuntratt pubbliku ta’ servizz bejn Korsika u Franza kontinentali.

(243)

Wara li analizza l-kapaċità (retrospettiva u prospettiva) applikata minn Corsica Ferries, ir-rapport finali kkonkluda li, fin-nuqqas ta’ PSCs, il-provvista tas-suq ma tissodisfax id-domanda kollha tal-utenti għal merkanzija mhux irmunkata u rmunkata.

(244)

Fir-rigward tal-merkanzija mhux irmunkata, ir-rapport ta’ Gecodia kkunsidra li l-offerta ta’ Corsica Ferries ikkonformat ma’ ċerti konklużjonijiet li wasal għalihom ir-rapport, sa fejn Corsica Ferries ipproponiet li tittrasporta merkanzija mhux irmunkata fuq bastimenti tal-passiġġieri u tal-merkanzija (Ro-Pax) mill-port ta’ Toulon ħames darbiet fil-ġimgħa fuq ir-rotot Marsilja-Ajaccio u Marsilja-Bastia, u tliet darbiet fil-ġimgħa għall-portijiet sekondarji ta’ Korsika. Madankollu, huma biss (i) Toulon-Brégaillon (u mhux Toulon-Port de Commerce) li għandhom l-infrastruttura neċessarja sabiex jimmaniġġaw merkanzija mhux irmunkata, u (ii) Toulon-Brégaillon tista’ takkomoda bastimenti Ro-Ro biss, u għal mhux aktar minn rotta waħda (il-premessa 210).

(245)

Barra minn hekk, ir-rapport ta’ Gecodia kien tal-fehma li l-offerta proposta minn Corsica Ferries ma kinitx adegwata sabiex tissodisfa d-domanda tal-utenti għat-trasport marittimu ta’ merkanzija mhux irmunkata minħabba n-numru insuffiċjenti ta’ frekwenzi ta’ kull ġimgħa offruti bejn Marsilja u Korsika. Skont ir-rapport ta’ Gecodia, Corsica Ferries inizjalment illimitat lilha nnifisha sabiex toffri żewġ vjaġġi bir-ritorn ta’ kull ġimgħa bejn il-port ta’ Marsilja u l-portijiet ta’ Ajaccio u ta’ Bastia, filwaqt li l-utenti kienu jeħtieġu vjaġġi bir-ritorn kważi ta’ kuljum sabiex jittrasportaw il-merkanzija mhux irmunkata tagħhom. Barra minn hekk, ir-rapport ta’ Gecodia nnota li l-frekwenzi proposti bejn il-port ta’ Marsilja u l-portijiet ta’ L’Île-Rousse u ta’ Porto-Vecchio kienu limitati għal tliet vjaġġi bir-ritorn ta’ kull xahar, filwaqt li l-utenti kellhom bżonn trasport marittimu ta’ kull ġimgħa. Fl-aħħar nett, ir-rapport ta’ Gecodia sab li Corsica Ferries ma pproponiet l-ebda servizz kummerċjali bejn il-port ta’ Marsilja u l-port ta’ Propriano, minkejja l-fatt li l-utenti kellhom bżonn trasport marittimu ta’ kull ġimgħa.

(246)

Fir-rigward tal-merkanzija rmunkata, ir-rapport ta’ Gecodia qies, għall-istess raġunijiet stabbiliti fil-premessi 244 u 245, li Corsica Ferries ipproponiet frekwenzi insuffiċjenti bejn il-port ta’ Marsilja u l-portijiet ta’ Korsika sabiex tissodisfa d-domanda għall-merkanzija rmunkata li ma kinitx tikkunsidra xi alternattiva għall-port ta’ Marsilja (jiġifieri 80 % tat-traffiku tal-merkanzija rmunkata totali bejn Marsilja u Korsika). L-awtoritajiet Franċiżi indikaw ukoll li, fid-dawl tad-dikjarazzjonijiet tas-CCI ta’ Var dwar il-livell ta’ saturazzjoni tal-infrastruttura tagħha u d-diffikultà għat-terminal Toulon-Port de Commerce sabiex iżid it-traffiku tal-merkanzija rmunkata kurrenti tiegħu, l-offerta ta’ Corsica Ferries, li pprovdiet ukoll żieda fil-kapaċità tagħha minn Toulon, dehret li ma kinitx realistika.

(247)

Fuq il-bażi ta’ dan ta’ hawn fuq, l-awtoritajiet Franċiżi kkonkludew li hemm bżonn ta’ servizz pubbliku għat-trasport marittimu tal-merkanzija rmunkata u mhux irmunkata li jikkorrispondi għad-domanda stmata bejn l-2023 u l-2030 bejn Marsilja u kull wieħed mill-ħames portijiet ta’ Korsika, kif ippreżentata fit-Table 21.

Tabella 21

Il-ħtieġa ta’ servizz pubbliku għat-trasport marittimu tal-merkanzija (f’LM) minn Marsilja stmata għall-perjodu 2023-2030

(248)

Wara li stabbilew l-eżistenza ta’ diversi ħtiġijiet ta’ servizz pubbliku fil-qasam tat-trasport marittimu tal-merkanzija u tal-passiġġieri, l-awtoritajiet Franċiżi fittxew li jiddeterminaw l-istrument legali neċessarju u l-obbligi ta’ servizz pubbliku xierqa sabiex jissodisfaw dawk il-ħtiġijiet li kienu l-anqas li jaffettwaw il-libertajiet essenzjali għall-funzjonament xieraq tas-suq intern (il-premessa 92).

(249)

L-awtoritajiet Franċiżi l-ewwel eżaminaw il-possibbiltà li tissaħħaħ l-iskema ta’ OSP tal-2019 (il-premessa 62) għal rotot jew għal utenti li għalihom ġiet identifikata ħtieġa għal servizz pubbliku tat-trasport marittimu. Madankollu, huma ħassew li approċċ bħal dan kellu diversi limitazzjonijiet.

(250)

L-ewwel nett, l-awtoritajiet Franċiżi kienu tal-fehma li l-iskema ta’ OSP tal-2019 ma kinitx tagħmel tajjeb għan-nuqqas ta’ provvista privata sabiex tiġi ssodisfata d-domanda identifikata. Huma qiesu li, fin-nuqqas ta’ kuntratt pubbliku ta’ servizz, l-offerta proposta ta’ Corsica Ferries skont l-iskema ta’ OSP tal-2019 mill-port ta’ Marsilja diġà kienet inadegwata sabiex tissodisfa l-ħtiġijiet kollha identifikati minn Franza (it-Taqsimiet 3.4.2.3 u 3.4.3.3) u li, għalhekk, tisħiħ tal-iskema ta’ OSP tal-2019 ma kien ikollu l-ebda effett.

(251)

It-tieni, l-awtoritajiet Franċiżi sabu li l-ħinijiet tat-tluq u tal-wasla tal-bastimenti bejn Franza kontinentali u Korsika kienu karatteristiċi importanti tad-domanda għat-trasport marittimu tal-merkanzija u tal-passiġġieri (il-premessi 112, 190, 191 u 208). Skont Franza, ir-Regolament dwar il-Kabotaġġ ma ppermettiex lill-Istati Membri jistabbilixxu l-ħinijiet tal-wasla u tat-tluq tal-bastimenti fi skema ta’ OSP. Skont l-Artikolu 4(2) tar-Regolament, meta jimponu obbligi ta’ servizz pubbliku, l-Istati Membri huma limitati għar-rekwiżiti li jikkonċernaw il-portijiet li għandhom jiġu servuti, għar-regolarità, għall-kontinwità, għall-frekwenza, għall-kapaċità li jiġi pprovdut is-servizz, għar-rati li għandhom jintalbu u għall-ekwipaġġ tal-bastiment.

(252)

Fl-aħħar nett, l-awtoritajiet Franċiżi qiesu li skema bħal din, li kieku kellha tkun akkumpanjata minn kumpens, ma tippermettix lis-CdC tikkontrolla l-kostijiet assoċjati mas-servizz pubbliku, peress li ma tkunx tista’ tistma dawk il-kostijiet (li jiġu kkumpensati wara li jkun ġie pprovdut is-servizz) minħabba n-numru inċert ta’ qsim li jkun se jsir.

(253)

Għal dawn ir-raġunijiet kollha, l-awtoritajiet Franċiżi qiesu li l-konklużjoni tal-PSCs kienet neċessarja sabiex jiġu stabbiliti r-rekwiżiti xierqa tas-servizz pubbliku tat-trasport marittimu sabiex jiġu ssodisfati l-ħtiġijiet tas-servizz pubbliku identifikati għal kull rotta marittima bejn il-port ta’ Marsilja u l-portijiet ta’ Korsika.

(254)

L-awtoritajiet Franċiżi qiesu li l-ħtiġijiet tas-servizz pubbliku identifikati kienu jeħtieġu l-konklużjoni ta’ PSCs li jistabbilixxu l-obbligi ta’ servizz pubbliku li ġejjin.

(255)

L-ewwel nett, l-awtoritajiet Franċiżi ddeċidew li jagħtu kuntratt pubbliku ta’ servizz għal kull rotta marittima koperta minn ħtieġa identifikata ta’ servizz pubbliku. Kull kuntratt pubbliku ta’ servizz kellu jinkludi l-obbligu li jiġu operati servizzi tat-trasport marittimu tal-merkanzija rmunkata u mhux irmunkata, kif ukoll it-trasport tal-passiġġieri (sewwieqa u passiġġieri mediċi) bejn il-port ta’ Marsilja u kull wieħed mill-portijiet ta’ Korsika, mingħajr waqfiet intermedji. Barra minn hekk, il-kuntratt pubbliku ta’ servizz għar-rotta Marsilja-L’Île-Rousse kellu jinkludi wkoll l-obbligu li jinġarru oġġetti perikolużi (L’Île-Rousse huwa l-uniku port ta’ Korsika awtorizzat li jirċievi oġġetti bħal dawn), filwaqt li r-rotta Marsilja-Propriano kellha tinkludi l-obbligu li jiġu ttrasportati passiġġieri residenti u mhux residenti, kif ukoll passiġġieri mediċi u sewwieqa. L-awtoritajiet Franċiżi spjegaw li dawn l-obbligi rriżultaw strettament min-nuqqasijiet tas-suq identifikati matul il-konsultazzjoni mal-operaturi.

(256)

It-tieni, l-awtoritajiet Franċiżi qiesu li kien neċessarju li jiġu imposti skedi speċifiċi f’kull PSC, bit-tluq ta’ filgħaxija lejn/mill-portijiet ta’ Korsika u l-wasliet bikrija ta’ filgħodu f’Korsika jew f’Marsilja. Dawk l-iskedi jkunu kompletament konformi mad-domanda tal-utenti stabbilita permezz tal-konsultazzjoni mal-utenti (passiġġieri/merkanzija) u l-konklużjonijiet tar-rapport ta’ Gecodia dwar l-organizzazzjoni tal-katina loġistika bejn Korsika u Franza kontinentali (il-premessa 208). Dawn l-obbligi huma ppreżentati għal kull rotta fit-Table 22.

Tabella 22

L-obbligi tal-iskeda għat-traffiku tal-merkanzija u tal-passiġġieri fil-PSCs fiż-żewġ direzzjonijiet (Marsilja-Korsika u Korsika-Marsilja)

(257)

It-tielet, l-awtoritajiet Franċiżi qiesu li huwa neċessarju li jiġu stabbiliti obbligi tal-frekwenza, li l-għan tagħhom huwa li jiżguraw ir-regolarità tas-servizzi f’konformità mal-ħtiġijiet identifikati (il-premessi 112 u 208) u flessibbiltà suffiċjenti fil-provvista tas-servizz pubbliku fid-dawl ta’ fluttwazzjonijiet sinifikanti fid-domanda. L-awtoritajiet Franċiżi qiesu li l-PSCs jenħtieġ li jinkludu tliet obbligi tal-frekwenza għal kull rotta marittima kkonċernata:

(258)

Dawn l-obbligi tal-frekwenza għal kull PSC huma stabbiliti fit-Table 23. Dawn il-frekwenzi huma, b’mod partikolari, akbar għar-rotot marittimi ta’ Bastia u ta’ Ajaccio, peress li dawn iż-żewġ portijiet jirrappreżentaw proporzjon sinifikanti ta’ traffiku tal-passiġġieri u tal-merkanzija lejn Korsika (il-premessi 54, 55 u 59).

Tabella 23

L-obbligi tal-frekwenza għat-traffiku tal-merkanzija u tal-passiġġieri fil-PSCs

(259)

Kif jaħdmu dawn l-obbligi ta’ frekwenza jista’ jintwera bl-eżempju li ġej. Kif muri fit-Table 23, id-detentur tal-konċessjoni huwa meħtieġ jopera sitt vjaġġi bir-ritorn ta’ kull ġimgħa fuq ir-rotta Marsilja-Ajaccio fl-istaġun kwiet u sebgħa fl-eqqel staġun. Għalhekk, il-frekwenza minima ta’ vjaġġi bir-ritorn ta’ kull ġimgħa li trid tiġi rrispettata tinvolvi 130 vjaġġ bir-ritorn fl-istaġun kwiet u 214-il vjaġġ bir-ritorn fl-eqqel staġun, b’total ta’ 344 vjaġġ bir-ritorn. L-operatur huwa meħtieġ iwettaq 365 vjaġġ bir-ritorn kull sena: id-differenza bejn it-365 vjaġġ bir-ritorn meħtieġa fis-sena u t-344 vjaġġ bir-ritorn meħtieġa kull ġimgħa hija n-numru ta’ vjaġġi bir-ritorn (19-il vjaġġ bir-ritorn) li għandhom jitwettqu mill-operatur matul is-sena (minbarra n-numru minimu ta’ vjaġġi bir-ritorn ta’ kull ġimgħa meħtieġa) iżda li l-operatur huwa liberu li jippjana fil-jiem tas-sena li jixtieq. Madankollu, il-karatteristika speċjali ta’ dawn id-19-il vjaġġ bir-ritorn hija li jistgħu jiġu skedati mill-ġdid fuq talba tal-awtoritajiet Franċiżi (“vjaġġi bir-ritorn li jistgħu jiġu skedati mill-ġdid”). L-iskedar mill-ġdid jista’ jseħħ, pereżempju, jekk l-awtoritajiet isibu li, f’jum partikolari, id-domanda tkun baxxa ħafna u jkun xieraq li s-servizz jiġi pospost għal jum ieħor. Għalhekk, dawn il-vjaġġi bir-ritorn li jistgħu jiġu skedati mill-ġdid huma kkaratterizzati mill-flessibbiltà tagħhom u jipprovdu lill-awtoritajiet Franċiżi b’għodda flessibbli sabiex jadattaw il-provvista tas-servizz pubbliku għall-fluttwazzjonijiet fid-domanda jew għal avvenimenti mhux previsti.

(260)

Fi kliem ieħor, l-awtoritajiet Franċiżi jistabbilixxu numru minimu ta’ vjaġġi bir-ritorn annwali li għandhom jitwettqu sabiex tiġi ssodisfata l-ħtieġa kwantitattiva u kwalitattiva għal servizz pubbliku (kemm għall-passiġġieri kif ukoll għall-merkanzija), inkluż l-obbligu għall-operatur (i) li jwettaq vjaġġi bir-ritorn fissi u minimi ta’ kull ġimgħa sabiex tiġi żgurata r-regolarità tas-servizzi tat-trasport marittimu u (ii) vjaġġi bir-ritorn li jistgħu jiġu skedati mill-ġdid sabiex tiġi żgurata l-flessibbiltà tas-servizzi bl-għan li tiġi ssodisfata l-ħtieġa tas-servizz pubbliku.

(261)

Barra minn hekk, sabiex titlesta s-sistema, l-awtoritajiet Franċiżi qiesu li huwa neċessarju li jiġu introdotti obbligi ta’ vjaġġi bir-ritorn addizzjonali għal ċerti rotot marittimi. Dawn il-vjaġġi bir-ritorn jikkorrispondu għan-numru ta’ vjaġġi bir-ritorn li jistgħu jsiru minbarra n-numru minimu ta’ vjaġġi bir-ritorn kull sena. L-iskop tal-vjaġġi bir-ritorn addizzjonali huwa r-rispons għal żieda f’daqqa eċċezzjonali fit-traffiku. Dawn jiġu organizzati fuq talba unika tal-awtoritajiet Franċiżi jekk ikunu sabu li d-domanda għall-merkanzija f’jum partikolari (u għall-merkanzija biss – il-vjaġġi bir-ritorn addizzjonali ma jikkonċernawx lill-passiġġieri) taqbeż il-kapaċità massima ta’ ġarr tal-bastimenti magħmula disponibbli f’dak il-jum. Għalhekk, l-iskop tal-vjaġġi bir-ritorn addizzjonali huwa li jiġi evitat li l-merkanzija titħalla fuq il-moll, li jwassal għal dewmien fil-konsenja f’Korsika. Kif muri fit-Table 23, l-awtoritajiet Franċiżi ppjanaw vjaġġi bir-ritorn addizzjonali għal tliet rotot (Ajaccio, Bastia u L’Île-Rousse), fejn il-probabbiltà li jiġu organizzati vjaġġi bir-ritorn bħal dawn hija l-ogħla.

(262)

Fl-aħħar nett, l-awtoritajiet Franċiżi qiesu li kien neċessarju li jiġu imposti kapaċitajiet minimi ta’ ġarr għal bastimenti għal kull qsim. Dawn l-obbligi jikkorrispondu għall-kapaċità minima għal kull qsim li l-operatur irid iġorr sabiex jissodisfa l-ħtieġa ta’ servizz pubbliku kwantitattiva ta’ kuljum stmata mill-awtoritajiet Franċiżi għat-trasport tal-passiġġieri (residenti u mhux residenti għar-rotta marittima Marsilja-Propriano, u tal-passiġġieri mediċi għar-rotot kollha) u tal-merkanzija (irmunkata u mhux irmunkata, inklużi s-sewwieqa).

(263)

Sabiex jiksbu l-kapaċitajiet minimi tal-passiġġieri għal kull qsim, l-awtoritajiet Franċiżi bbażaw fuq id-domanda annwali mbassra mistennija fl-2030 għal kull kategorija ta’ passiġġieri u r-rotta (it-Table 14 u t-Table 19), filwaqt li qiesu n-numru ta’ qsim meħtieġ fis-sena (it-Table 23). Barra minn hekk, għat-trasport tal-passiġġieri mediċi u tas-sewwieqa, l-awtoritajiet Franċiżi qiesu li l-vjaġġ isir kuljum ħlief fi tmiem il-ġimgħa għall-portijiet ewlenin ta’ Ajaccio u ta’ Bastia, u 3 ijiem fil-ġimgħa għall-portijiet l-oħrajn ta’ Korsika. Ir-riżultat finali (in-numru ta’ passiġġieri għal kull qsim) huwa ppreżentat fit-Table 24.

Tabella 24

L-obbligi ta’ kapaċità minima għat-traffiku tal-passiġġieri fil-PSCs

(264)

Fl-aħħar nett, sabiex tinkiseb id-domanda mill-passiġġieri mediċi għal kull qsim (inklużi l-persuni li jakkumpanjawhom), huma qiesu li l-vjaġġ kien isir kuljum ħlief fi tmiem il-ġimgħa għall-portijiet ewlenin ta’ Ajaccio u ta’ Bastia, u 3 ijiem fil-ġimgħa lejn il-portijiet l-oħrajn ta’ Korsika. Il-livell magħżul jiġi aġġustat għall-ittondjar. Ir-riżultat finali (in-numru ta’ passiġġieri mediċi għal kull qsim u rotta marittima) huwa ppreżentat fit-Table 25.

Tabella 25

Id-domanda stmata mill-passiġġieri mediċi u mill-persuni li jakkumpanjawhom li jivvjaġġaw bid-dgħajsa bejn Korsika u Marsilja (passiġġieri għal kull qsim)

(265)

Fir-rigward tal-kapaċità minima ta’ ġarr għall-merkanzija għal kull qsim, l-awtoritajiet Franċiżi ddikjaraw li kienu stabbilewha kif ġej.

(266)

Sabiex jiġu kkalkolati l-kapaċitajiet tal-merkanzija meħtieġa fil-ġimgħa, l-awtoritajiet Franċiżi ħadu bħala referenza l-ħtieġa stmata ta’ servizz pubbliku ta’ kull ġimgħa għall-merkanzija f’Lulju 2030 (li tikkostitwixxi l-ogħla livell ta’ ħtieġa ta’ servizz pubbliku identifikat matul il-perjodu kopert mill-miżuri inkwistjoni). Għar-rotot lejn Ajaccio u lejn Bastia, l-awtoritajiet Franċiżi assumew li 90 % tat-trasport tal-merkanzija jsir f’jiem tax-xogħol li jaħdbu matul il-ġimgħa, filwaqt li din iċ-ċifra tiżdied għal 100 % għar-rotot lejn it-tliet portijiet l-oħrajn ta’ Korsika. Billi jikkombinaw il-volum meħtieġ ta’ merkanzija ta’ kull ġimgħa man-numru ta’ vjaġġi bir-ritorn minimi ta’ kull ġimgħa imposti (jiġifieri sitt vjaġġi bir-ritorn kull ġimgħa matul il-perjodu tax-xitwa fuq ir-rotot Marsilja-Ajaccio u Marsilja-Bastia, u tliet vjaġġi bir-ritorn ta’ kull ġimgħa lejn il-portijiet l-oħrajn), l-awtoritajiet Franċiżi kisbu l-kapaċità minima meħtieġa għal kull qsim tal-merkanzija, kif indikat fit-Table 26.

Tabella 26

L-obbligi ta’ kapaċità minima għat-traffiku tal-merkanzija fil-PSCs

(267)

Wara l-identifikazzjoni ta’ ħtieġa ta’ servizz pubbliku u minħabba l-ħtieġa li jintuża kuntratt pubbliku ta’ servizz sabiex tiġi ssodisfata kif suppost, is-CdC nediet il-proċedura ta’ aġġudikazzjoni ta’ kuntratt għall-PSCs fit-28 ta’ April 2022.

(268)

F’dan il-każ, permezz tar-Riżoluzzjoni Nru 22/050 tat-28 ta’ April 2022 tal-Assemblea ta’ Korsika, is-CdC iddeċidiet li tuża PSCs “rotta b’rotta” għall-operat tas-servizzi tat-trasport marittimu għall-merkanzija (inklużi oġġetti perikolużi) u għall-passiġġieri bejn il-port ta’ Marsilja u l-portijiet ta’ Ajaccio (Lott 1), Bastia (Lott 2), Porto-Vecchio (Lott 3), Propriano (Lott 4) u L’Île-Rousse (Lott 5) għal perjodu ta’ 7 snin (bil-possibbiltà ta’ massimu ta’ 12-il xahar addizzjonali, jiġifieri perjodu massimu ta’ 8 snin) bejn l-1 ta’ Jannar 2023 u l-31 ta’ Diċembru 2030.

(269)

L-ambitu tal-PSCs kien jinkludi l-obbligi ta’ servizz pubbliku kollha stabbiliti fit-Taqsima 3.5.2 ta’ din id-deċiżjoni.

(270)

L-Artikolu 2.4 tar-regoli tal-offerti (132) stipula li “l-karatteristiċi minimi ta’ kull kuntratt huma kif ġej: in-nollijiet massimi applikabbli għar-residenti ta’ Korsika u għat-trasport tal-merkanzija, il-kapaċità ta’ ġarr tal-bastimenti, l-iskedi ta’ żmien u l-frekwenzi tas-servizz, id-durata tal-kuntratt, l-ammont massimu ta’ kumpens finanzjarju mħallas mill-OTC”.

(271)

L-Artikolu 9.2 tar-regoli tal-offerti jistipula li “kull offerta se tiġi eżaminata fuq il-bażi ta’ kriterji li jippermettu li tiġi ddeterminata l-aħjar offerta f’termini ta’ benefiċċju ekonomiku ġenerali għas-[CdC]. Dawn il-kapaċitajiet se jiġu vvalutati b’mod ġenerali għall-konsorzji.

(272)

Is-sejħa pubblika għall-offerti ġiet ippubblikata fis-6 ta’ Mejju 2022, (134) bi skadenza għar-riċevuta tal-applikazzjonijiet u tal-offerti tal-25 ta’ Lulju 2022.

(273)

Qabel l-iskadenza għas-sottomissjoni tal-offerti, Corsica Ferries għamlet numru ta’ mistoqsijiet lis-CdC bl-għan li tikseb kjarifika dwar diversi punti tar-regoli tal-offerti. Peress li s-CdC ma weġbitx, jew ma weġbitx b’mod suffiċjenti, il-mistoqsijiet tagħha, Corsica Ferries ressqet talba quddiem l-imħallef tal-Qorti Amministrattiva ta’ Bastia għal miżuri proviżorji prekuntrattwali li permezz tagħhom talbet li l-proċedura ta’ aġġudikazzjoni tal-PSC tiġi annullata minħabba ksur mis-CdC tal-obbligi relatati mar-reklamar u mas-sejħiet għall-offerti kompetittivi imposti fuq l-awtorità kontraenti (135).

(274)

Bid-Digriet Nru 2200797 tal-20 ta’ Lulju 2022, l-imħallef għal miżuri proviżorji fil-Qorti Amministrattiva ta’ Bastia kkunsidra, fil-biċċa l-kbira, li d-diffikultajiet imqajmin minn Corsica Ferries ma kinux jaqgħu taħt il-kompetenza tal-qorti. Fir-rigward tal-bqija, l-imħallef ċaħad il-ksur imsemmi minn Corsica Ferries minħabba li, fl-opinjoni tal-imħallef, kien possibbli għall-kandidati interessati li jissottomettu offerta li tikkonforma mar-rekwiżiti tekniċi kollha stabbiliti fid-dokumenti tal-offerti. Imbagħad, Corsica Ferries appellat kontra s-sentenza inkwistjoni quddiem il-Kunsill tal-Istat. F’sentenza tal-25 ta’ Novembru 2022, il-Kunsill tal-Istat iddikjara l-appell inammissibbli (Société Corsica Ferries, Nru 466415).

(275)

Fl-aħħar nett, Corsica Ferries iddeċidiet li ma tiħux sehem fil-proċedura ta’ aġġudikazzjoni ta’ kuntratt għall-PSC, wara b’mod partikolari qieset li ma kellhiex bastimenti li jissodisfaw ir-rekwiżiti tekniċi kollha stabbiliti mis-CdC fil-PSCs

(276)

Is-CdC rċiviet tliet applikazzjonijiet:

(277)

Il-kumitat tad-delega tas-servizz pubbliku fetaħ l-offerti fis-26 ta’ Lulju 2022. Wara l-opinjoni ta’ dak il-kumitat, datata t-2 ta’ Awwissu 2022, it-tliet kandidati ġew ammessi sabiex jissottomettu offerta. Fil-31 ta’ Awwissu 2022, wara li analizza l-offerti tagħhom, il-kumitat irrakkomanda l-ftuħ tal-proċedura nnegozjata ma’ dawk il-kandidati.

(278)

Skont Franza, is-CdC mexxiet in-negozjati mal-kandidati kif ġej:

(279)

Il-kumitat ta’ delega tas-servizz pubbliku responsabbli għas-sottomissjoni tal-offerti finali ltaqa’ fit-23 ta’ Novembru 2022.

(280)

Permezz tar-Riżoluzzjoni Nru 22/188 tal-20 ta’ Diċembru 2022, l-Assemblea ta’ Korsika approvat l-għażla tal-konsorzju Corsica Linea - La Méridionale għal-Lott 1, ta’ Corsica Line għal-Lottijiet 2, 4 u 5 u ta’ La Méridionale għal-Lott 3. It-Table 27 tippreżenta l-ammont ta’ kumpens finanzjarju għal kull lott.

Tabella 27

L-ammont totali ta’ kumpens finanzjarju għal kull lott tal-PSC (f’miljuni ta’ EUR)

(281)

L-iskop ta’ din it-taqsima huwa li tiddeskrivi l-klawżoli kuntrattwali tal-PSCs. Dawn il-klawżoli huma ġeneralment komuni għall-ħames PSCs.

(282)

L-Artikoli 1 u 2 tal-ħames PSCs jispeċifikaw li, bħala parti mill-kontinwità territorjali bejn il-portijiet ta’ Korsika u l-port ta’ Marsilja, id-detentur tal-konċessjoni huwa fdat bit-twettiq ta’ obbligi ta’ servizz ta’ interess ekonomiku ġenerali (“SGEI”, “Service of General Economic Interest”) relatati ma’:

(283)

L-Artikolu 1 jipprevedi wkoll li kwalunkwe servizz ta’ trasport tal-merkanzija jew tal-passiġġieri pprovdut mid-detentur tal-konċessjoni li ma jaqax fl-ambitu tal-SGEI jaqa’ fl-ambitu tas-“servizz kummerċjali jew mhux SGEI”.

(284)

L-Artikolu 4 jispeċifika li d-dokumenti kuntrattwali li jorbtu lill-partijiet huma l-kuntratt u l-annessi tiegħu (u, fuq il-bażi tal-Artikolu 1, kwalunkwe emenda għalih). F’każ ta’ kontradizzjoni, il-kuntratt jieħu preċedenza fuq l-annessi.

(285)

L-Anness 1 tal-ħames PSCs jagħti dettalji dwar il-karatteristiċi tas-servizzi marittimi assoċjati. Dawn huma deskritti fit-Taqsima 3.5.2 ta’ din id-deċiżjoni.

(286)

L-Artikolu 17 tal-PSCs jiddikjara li, fir-rigward tat-trasport tal-merkanzija u għal kull qsim, id-detentur tal-konċessjoni ma jridx iħalli t-trejlers fuq il-bnajka, sakemm it-trasportatur tal-merkanzija ma jitlobx dan jew sakemm il-kapaċità tal-bastiment ma tkunx partikolarment saturata, sabiex jiġi żgurat li d-domanda mill-utenti professjonali tiġi ssodisfata u sabiex tiġi ggarantita l-kontinwità territorjali. Dik id-dispożizzjoni żżid li “sabiex tiġi ottimizzata l-organizzazzjoni tat-traffiku, l-awtorità kontraenti tista’ tiskeda mill-ġdid vjaġġi bir-ritorn, f’konformità man-numru totali ta’ vjaġġi bir-ritorn kull sena stabbilit fl-Anness 1 tal-kuntratt. Dan l-iskedar mill-ġdid isir fil-kuntest tal-kumitat tekniku msemmi fl-Artikolu 10.2” (ara wkoll il-premessa 290).

(287)

L-Artikolu 18 tal-kuntratti għar-rotot minn/lejn Ajaccio, Bastia u L’Île-Rousse jistipula li “fid-dawl tal-ħtieġa li jiġi pprovdut is-servizz pubbliku, l-awtorità kontraenti tista’ titlob lid-detentur tal-konċessjoni jwettaq vjaġġi bir-ritorn addizzjonali fuq bażi ad hoc, li n-numru massimu u l-kundizzjonijiet tagħhom huma stabbiliti fl-Anness 1. L-implimentazzjoni ta’ dawn il-vjaġġi bir-ritorn addizzjonali se tiġi eżaminata mill-kumitat tekniku previst fl-Artikolu 10.2”. Fil-prattika, skont l-awtoritajiet Franċiżi, dawn il-vjaġġi bir-ritorn jiġu organizzati biss jekk, fil-laqgħa ta’ kull ġimgħa tal-kumitat tekniku, l-awtoritajiet Franċiżi jsibu li l-bastimenti għandhom kapaċità sħiħa u li hemm domanda addizzjonali għal tal-anqas 40 trejler. Wara l-laqgħa tal-kumitat tekniku, permezz ta’ ittra d-detentur tal-konċessjoni jifformalizza l-proposti tiegħu għall-vjaġġi bir-ritorn addizzjonali f’konformità mal-ħtieġa espressa mill-awtorità kontraenti u jirċievi konferma bil-posta għal kwalunkwe vjaġġ bir-ritorn addizzjonali miftiehem. Il-perjodu minimu ta’ avviż mogħti mill-awtorità kontraenti lill-kuntrattur huwa stmat “fil-ġimgħa” sabiex ikun kemm jista’ jkun qrib ix-xejriet tal-impenn; l-awtoritajiet Franċiżi indikaw li, fil-prattika, id-domanda għat-trasport tal-merkanzija tkun ġeneralment magħrufa tal-anqas 15-il jum minn qabel.

(288)

L-Artikolu 20 tal-PSCs jiddikjara li d-detentur tal-konċessjoni jista’, soġġett għall-aċċettazzjoni mill-awtorità kontraenti, jissostitwixxi bastiment wieħed b’bastiment ieħor magħmul disponibbli mid-detentur tal-konċessjoni sabiex jeżegwixxi l-kuntratt, dment li, b’mod partikolari, il-bastiment ta’ sostituzzjoni jikkonforma mad-dispożizzjonijiet stabbiliti fl-Anness 1.

(289)

L-Artikolu 22 tal-PSCs jirrikjedi li l-bastimenti użati għall-implimentazzjoni tal-kuntratt, kif ukoll is-servizzi pprovduti mid-detentur tal-konċessjoni, jikkonformaw mal-istandards dwar l-aċċessibbiltà għall-PMM. Il-kundizzjonijiet ta’ akkoljenza għal dawn il-persuni huma stabbiliti fl-Anness 5 tal-PSCs.

(290)

L-Artikolu 10.2 tal-PSCs jipprevedi li kumitat ta’ monitoraġġ tekniku, magħmul fost l-oħrajn minn rappreżentanti tal-OTC, mid-detentur tal-konċessjoni, mill-maniġer tal-infrastruttura tal-port u mit-trasportaturi tal-merkanzija, jiltaqa’ kull ġimgħa sabiex jimmonitorja l-eżekuzzjoni tas-servizz u kwalunkwe aġġustament li jista’ jkun meħtieġ.

(291)

L-Artikolu 11.1 tal-PSCs jipprevedi li, fil-każ ta’ forza maġġuri jew ta’ avvenimenti imprevisti, il-partijiet jaħdmu flimkien sabiex jidentifikaw miżuri maħsubin sabiex jirrestawraw il-bilanċ ekonomiku tal-PSCs.

(292)

L-Artikolu 3 tal-PSCs jiddikjara li l-kuntratt jidħol fis-seħħ fl-1 ta’ Jannar 2023 u jiskadi fil-31 ta’ Diċembru 2029. Dan iżid li l-partijiet jistgħu jaqblu dwar estensjoni possibbli għal massimu ta’ 12-il xahar, b’mod partikolari fin-nuqqas ta’ aġġudikazzjoni ta’ kuntratt ta’ konċessjoni ġdid fi tmiem il-kuntratt. Għalhekk, id-durata massima possibbli tal-kuntratt hija ta’ 8 snin.

(293)

L-Artikolu 30 tal-PSCs jistabbilixxi l-prinċipji ġenerali dwar il-kumpens għall-obbligi ta’ SGEI. Jiddikjara b’mod partikolari li:

(294)

L-Artikolu 31 tal-PSCs jirrikjedi li l-bilanċ ekonomiku ta’ kull rotta jiġi stabbilit fl-Anness 9 sottomess mid-detentur tal-konċessjoni, li jiddetermina l-prestazzjoni prevista tal-PSCs, bir-riskju proprju tad-detentur tal-konċessjoni.

(295)

L-Artikolu 32 tal-PSCs jipprevedi li d-detentur tal-konċessjoni jirċievi direttament id-dħul kollu li jirriżulta mill-eżekuzzjoni tal-SGEI, b’mod partikolari:

(296)

Barra minn hekk, l-Artikolu 32 tal-PSCs jipprevedi wkoll li, għall-perjodu 2023-2028, is-surplus tar-riżultat kummerċjali mhux tal-SGEI meta mqabbel mal-Anness 9 irid jintuża bħala kwistjoni ta’ prijorità mid-detentur tal-konċessjoni sabiex jiffinanzja investimenti li jiffavorixxu soluzzjonijiet tekniċi sabiex jitnaqqsu l-emissjonijiet ta’ gassijiet serra u, b’mod aktar ġenerali, sabiex jiġu segwiti l-objettivi tat-titjib tal-kwalità ambjentali tal-SGEI, kif previst fl-Artikolu 11.2 tal-PSCs. Is-surpluses li ma jintużawx f’sena finanzjarja speċifika jiġu kkapitalizzati sakemm isiru l-investimenti jew sa tmiem il-kuntratt. Is-surpluses mhux użati jitħallsu lura bis-sħiħ lill-awtorità kontraenti mal-iskadenza normali jew bikrija tal-kuntratt. L-użu ta’ dawn is-surpluses jiġi rrieżaminat mill-kumitat ambjentali, ekonomiku u legali msemmi fl-Artikolu 10.1 tal-PSCs.

(297)

L-Artikolu 33.2 tal-PSCs jispeċifika li l-iskeda tan-nollijiet għat-trasport ta’ merkanzija fil-qafas tal-SGEI hija stabbilita fl-Anness 8, li jistabbilixxi n-nollijiet li ġejjin u jipprevedi li, għall-merkanzija rmunkata, il-qsim tal-ewwel sewwieq huwa inkluż fl-iskeda tan-nollijiet:

Tabella 28

In-nollijiet massimi applikabbli għat-trasport tal-merkanzija fil-qafas tal-PSCs

(298)

L-Artikolu 33.3 tal-PSCs jipprevedi li l-iskeda tan-nollijiet għat-trasport tar-residenti ta’ Korsika skont l-SGEI hija dik li tirriżulta mill-applikazzjoni tal-iskema ta’ OSP tal-2019. Barra minn hekk, in-nollijiet applikati għall-passiġġieri mhux residenti ta’ Korsika skont l-SGEI huma ddeterminati liberament mid-detentur tal-konċessjoni iżda ma jistgħux jaqbżu n-nollijiet massimi stabbiliti f’dik l-iskema.

Tabella 29

In-nollijiet applikabbli għat-trasport tal-passiġġieri skont il-PSCs

(299)

L-Artikolu 34.1 tal-PSCs jipprevedi li d-detentur tal-konċessjoni jġarrab il-kostijiet operatorji kollha mhux tal-fjuwil (inklużi l-persunal, l-imposti tal-portijiet, l-oġġetti tal-ikel li għandhom jinbiegħu) u li għandu jiġi applikat marġni għal dawk il-kostijiet operatorji kif stabbilit fl-Anness 9.

(300)

L-Artikolu 34.2 tal-PSCs jipprevedi li l-kostijiet ta’ investiment assoċjati mal-bastimenti huma stabbiliti fuq il-bażi tal-flotta assenjata mid-detentur tal-konċessjoni sabiex jopera r-rotot koperti mill-PSCs.

(301)

L-Artikolu 35.1 tal-PSCs jipprevedi li l-kumpens finanzjarju għall-operat u għall-investiment (“CFEI”, “compensation financière pour l’exploitation et l’investissement”) imħallas kull sena mill-OTC lid-detentur tal-konċessjoni jikkonsisti f’żewġ komponenti:

(302)

L-Artikolu 35.3 tal-PSCs jipprevedi li l-Anness 9 jiġi aġġornat kull sena sabiex iqis il-bidliet fl-inflazzjoni reali u jiddeskrivi l-metodu għall-kalkolu ta’ dak l-aġġornament, filwaqt li jitqies, b’mod partikolari, it-titjib fl-effiċjenza.

(303)

L-Artikolu 36.2 tal-PSCs jipprevedi li l-kost tal-fjuwil neċessarju għall-forniment tas-servizzi tat-trasport marittimu (esklużi l-vjaġġi bir-ritorn addizzjonali) huwa soġġett għal mekkaniżmu ta’ ħħeġġar tal-fjuwil għal perjodu ta’ mhux aktar minn 24 xahar. Wara dan il-perjodu, id-detentur tal-konċessjoni jkun responsabbli għan-negozjar ta’ kuntratt ta’ ħħeġġar ġdid billi jitlob tal-anqas tliet kwotazzjonijiet. Id-detentur tal-konċessjoni jibgħat il-kwotazzjonijiet lill-awtorità kontraenti u jindika l-fornitur tas-servizz li jixtieq juża. Permezz ta’ deroga, malli jiskadi l-kuntratt inizjali għall-iħħeġġar tal-fjuwil, l-OTC jista’ jiddeċiedi li jimplimenta mekkaniżmu li jippermetti l-kondiviżjoni tal-kostijiet tal-fjuwil (skont il-kundizzjonijiet imsemmijin fl-Artikolu 11.1 tal-PSCs). Dan il-mekkaniżmu jieħu post il-kuntratt ta’ ħħeġġar il-ġdid li għandu jiġi konkluż mid-detentur tal-konċessjoni. Barra minn hekk, il-varjazzjonijiet fil-kostijiet tal-fjuwil ma humiex riflessi fl-iskedi tan-nollijiet. Il-kost unitarju tal-fjuwil inkluż fil-kont operatorju proviżorju (l-Anness 9) għall-perjodu korrispondenti u l-mekkaniżmu assoċjat huma deskritti fl-Anness 10.

(304)

L-Artikolu 37.1 tal-PSCs jistipula li kull sena l-OTC jeħtieġlu iħallas il-kumpens finanzjarju lid-detentur tal-konċessjoni għall-kostijiet tal-fjuwil assoċjati mal-forniment tal-SGEI (“CFC”, “compensation des frais de carburant”). Il-kumpens finanzjarju massimu tas-CFC huwa stabbilit fl-Anness 9.

(305)

L-Artikolu 38.1 tal-PSCs jipprevedi l-kumpens massimu b’rata fissa għal vjaġġi bir-ritorn addizzjonali (“CFsup”, “compensation forfaitaire pour allers-retours supplémentaires”). Dan il-kumpens jikkonsisti fi tliet komponenti:

(306)

Barra minn hekk, l-Artikolu 38.1 tal-PSCs jispeċifika li l-kumpens għal vjaġġ bir-ritorn addizzjonali, jekk jitwettaq, ikun l-aktar ammont baxx bejn (i) l-ammont mistenni ta’ kumpens għal kull vjaġġ bir-ritorn indikat fl-Anness 9 (kont operatorju proviżorju), u (ii) l-ammont li jirriżulta mill-kont operatorju aġġornat, li jinkludi l-kostijiet netti reali mġarrbin fl-operat ta’ vjaġġ bir-ritorn addizzjonali u li huwa parti mir-rapport annwali sottomess mill-kuntratturi tal-OTC (imsemmi fl-Artikolu 46 tal-PSCs).

(307)

L-Artikoli 35.1 u 37.1 tal-PSCs jipprevedu wkoll li, sa fejn id-detentur tal-konċessjoni juża l-bastimenti sabiex joffri attivitajiet kummerċjali barra mill-SGEI, il-koeffiċjent tal-allokazzjoni msemmi fl-Anness 9 jintuża sabiex tiġi stabbilita l-kontabilità tal-kostijiet u jiġi stabbilit l-ammont ta’ kumpens finanzjarju b’rata fissa. Dan il-koeffiċjent tal-allokazzjoni huwa stabbilit għad-durata tal-kuntratt u huwa vinkolanti fuq il-partijiet.

(308)

Skont l-informazzjoni pprovduta mill-awtoritajiet Franċiżi, (140) l-allokazzjoni tal-kostijiet għall-SGEI u s-servizz kummerċjali saret (u ġiet ippreżentata lill-offerenti bħala parti mill-proċedura ta’ aġġudikazzjoni ta’ kuntratt għall-PSCs) fuq il-bażi tal-prinċipji li ġejjin, li, skont Franza, diġà ġew rikonoxxuti mill-Kummissjoni f’każijiet preċedenti (141):

(309)

Kif indikat fit-Table 30, fil-kuntest tal-PSCs, id-detenturi tal-konċessjoni allokaw bħala medja [60-75] % tal-kostijiet operatorji għall-attivitajiet tal-SGEI, bl-eċċezzjoni tal-PSC b’rabta mar-rotta Marsilja-Propriano, li fih 100 % tal-kostijiet ġew allokati għall-SGEI.

Tabella 30

Is-sehem tal-kostijiet allokati lill-SGEI fil-PSCs