(1)

Fit-30 ta’ Settembru 2025, ġiet ippreżentata talba lill-Kummissjoni għar-reġistrazzjoni ta’ inizjattiva taċ-ċittadini Ewropej intitolata “L-Istilel tal-UE fuq il-Passaport Tiegħi (STAR-PASS)”.

(2)

L-għan tal-inizjattiva kif espress mill-organizzaturi huwa li, “nistiednu lill-Kummissjoni Ewropea tiffaċilita l-introduzzjoni mill-Istati Membri tal-UE ta’ għażla addizzjonali għad-disinn tal-qoxra tal-passaporti, offruti liċ-ċittadini li japplikaw għal passaport ġdid”. Huma jqisu li din l-għażla, li “teżisti flimkien mal-qoxra attwali kulur burgundy tal-passaport”, għandha “jkollha sfond blu biċ-ċirku tal-istilel tad-deheb — is-simbolu tal-UE” u l-kliem “UNJONI EWROPEA” jidher b’mod prominenti. L-anness tal-inizjattiva jipprovdi dettalji ulterjuri dwar l-isfond tagħha, is-suġġett tagħha u l-objettivi tagħha.

(3)

Il-Kummissjoni tqis li tista’ tadotta proposta għal att legali dwar id-disinn tal-qoxra tal-passaporti abbażi tal-Artikolu 77(2)(b) tat-Trattat dwar il-Funzjonament tal-Unjoni Ewropea, li jagħti s-setgħa lill-Parlament Ewropew u lill-Kunsill, li jaġixxu skont il-proċedura leġiżlattiva ordinarja, biex jadottaw miżuri dwar il-kontrolli li għalihom huma soġġetti l-persuni li jaqsmu l-fruntieri esterni.

(4)

Għal din ir-raġuni, il-Kummissjoni hija tal-fehma li l-ebda parti mill-inizjattiva ma taqa’ manifestament barra mill-qafas tas-setgħat tal-Kummissjoni li tippreżenta proposta għal att legali tal-Unjoni għall-fini tal-implimentazzjoni tat-Trattati.

(5)

Dik il-konklużjoni ma taffettwax il-valutazzjoni dwar jekk il-kundizzjonijiet sostantivi konkreti meħtieġa biex il-Kummissjoni taġixxi, inkluża l-konformità mal-prinċipji tal-proporzjonalità u tas-sussidjarjetà u l-kompatibbiltà mad-drittijiet fundamentali, ikunux issodisfati f’dan il-każ.

(6)

Il-grupp ta’ organizzaturi pprovda evidenza xierqa li huwa jissodisfa r-rekwiżiti stipulati fl-Artikolu 5(1) u (2) tar-Regolament (UE) 2019/788 u ħatar il-persuni ta’ kuntatt f’konformità mal-Artikolu 5(3), l-ewwel subparagrafu, ta’ dak ir-Regolament.

(7)

L-inizjattiva la hija manifestament abbużiva, frivola jew vessatorja u lanqas ma tmur manifestament kontra l-valuri tal-Unjoni kif stabbiliti fl-Artikolu 2 tat-Trattat dwar l-Unjoni Ewropea jew kontra d-drittijiet minquxin fil-Karta tad-Drittijiet Fundamentali tal-Unjoni Ewropea.

(8)

L-inizjattiva intitolata “L-Istilel tal-UE fuq il-Passaport Tiegħi (STAR-PASS)” għandha għalhekk tiġi rreġistrata.

(9)

Il-konklużjoni li l-kundizzjonijiet għar-reġistrazzjoni skont l-Artikolu 6(3) tar-Regolament (UE) 2019/788 huma ssodisfati, ma timplikax li l-Kummissjoni b’xi mod jew ieħor tikkonferma l-korrettezza fattwali tal-kontenut tal-inizjattiva emendata, li hija r-responsabbiltà unika tal-grupp ta’ organizzaturi tal-inizjattiva. Il-kontenut tal-inizjattiva jesprimi biss il-fehmiet tal-grupp ta’ organizzaturi, u bl-ebda mod ma jista’ jitqies li jirrifletti l-fehmiet tal-Kummissjoni,