1.   SFOND U LOĠIKA

L-Organizzazzjoni għall-Projbizzjoni ta’ Armi Kimiċi (l-“OPCW”) hija l-korp eżekuttiv tal-Konvenzjoni dwar il-Projbizzjoni tal-Iżvilupp, il-Produzzjoni, il-Ħażna u l-Użu ta’ Armi Kimiċi u dwar il-Qerda tagħhom (is-“CWC”). Is-CWC daħlet fis-seħħ fid-29 ta’ April 1997 u attwalment hemm 193 Stat Parti, li jirrifletti sħubija kważi universali.

Il-missjoni tal-OPCW hija li tikseb dinja ħielsa mill-armi kimiċi permezz tal-qerda vverifikata ta’ ħażniet ta’ armi kimiċi ddikjarati u l-prevenzjoni tal-emerġenza mill-ġdid tal-produzzjoni u l-użu ta’ armi kimiċi. Sa mill-1997, l-OPCW ivverifikat il-qerda tal-armi kimiċi kollha maħżuna ddikjarati minn pajjiżi madwar id-dinja li jikkorrispondu għal 72 304 tunnellati metriċi.

Mill-2004 ’l hawn, l-OPCW irċeviet appoġġ mill-Unjoni Ewropea (UE) b’mod konsistenti permezz tal-baġit tal-Politika Estera u ta’ Sigurtà Komuni (PESK). Il-Memorandum ta’ Qbil bejn l-UE u l-OPCW tal-20 ta’ Frar 2024 kompla jsaħħaħ din is-sħubija kruċjali li kienet essenzjali għall-promozzjoni u l-implimentazzjoni tal-objettivi ewlenin tal-OPCW, u b’hekk qed jikkontribwixxi għall-paċi u s-sigurtà internazzjonali. Żviluppi reċenti, bħall-waqgħa tar-reġim ta’ Assad fis-Sirja u l-gwerra li għaddejja fl-Ukrajna, jenfasizzaw l-importanza tal-mandati u l-missjonijiet tal-OPCW.

Fis-Sirja, is-Segretarjat ilu jopera sa minn Ottubru 2013, meta s-Sirja ssieħbet fil-Konvenzjoni, fost l-oħrajn permezz ta’ missjonijiet iddedikati — it-Tim ta’ Valutazzjoni tad-Dikjarazzjonijiet (DAT), il-Missjoni ta’ Tiftix tal-Fatti fis-Sirja (FFM), u t-Tim ta’ Investigazzjoni u Identifikazzjoni (IIT) — f’konformità mal-mandati riċevuti skont il-Konvenzjoni u permezz tad-deċiżjonijiet tal-organi tat-tfassil tal-politika tal-OPCW u r-riżoluzzjonijiet rilevanti tal-Kunsill tas-Sigurtà tan-Nazzjonijiet Uniti. Sa mill-waqgħa tar-reġim ta’ Assad fit-8 ta’ Diċembru 2024 u l-preżenza ta’ gvern interim lest li jimpenja ruħu fil-kwistjoni tal-armi kimiċi fis-Sirja, għall-kuntrarju tal-awtoritajiet preċedenti, hemm ħtieġa u fl-istess ħin opportunità biex finalment tiġi aċċessata l-informazzjoni kollha mhux iddikjarata mill-awtoritajiet preċedenti fir-rigward tal-programm tagħhom tal-armi kimiċi, sabiex tiġi żgurata s-sigurtà tas-siti relatati mal-armi kimiċi u l-kontenut tagħhom, u biex kwalunkwe element rilevanti jinqered mis-Sirja u jiġi vverifikat bħala tali mis-Segretarjat tal-OPCW. Hemm ukoll opportunità biex jitkomplew l-investigazzjonijiet relatati mal-użu ta’ armi kimiċi fis-Sirja, inkluż l-identifikazzjoni tal-awturi, kif espress mill-President Interim tas-Sirja waqt il-laqgħa tiegħu f’Damasku mad-Direttur Ġenerali tal-OPCW fit-8 ta’ Frar 2025.

Fl-Ukrajna, it-theddida tal-użu ta’ armi kimiċi għada hemm u l-attivitajiet tal-OPCW, inkluż l-assistenza teknika kif mitluba mill-Ukrajna, huma essenzjali, mill-forniment ta’ tagħmir protettiv u ta’ detezzjoni u taħriġ tal-ewwel rispons, sat-twettiq ta’ evalwazzjoni ta’ kampjuni relatati ma’ allegazzjonijiet tal-użu ta’ sustanzi kimiċi tossiċi misjuba fil-kamp tal-battalja fl-Ukrajna.

L-UE ilha mill-2021 tipprovdi appoġġ siewi lill-OPCW permezz tal-forniment ta’ prodotti u servizzi pprovduti mis-SatCen. Għall-effettività operazzjonali tal-OPCW, huwa importanti li l-appoġġ permezz ta’ prodotti u servizzi tas-SatCen jiġi sostnut, wara li tiskadi d-Deċiżjoni tal-Kunsill (PESK) 2021/2073 tal-25 ta’ Novembru 2021  (1).

Għalhekk, din il-proposta għandha tiġi kkunsidrata flimkien mad-Deċiżjoni tal-Kunsill (PESK) 2023/1344 tas-26 ta’ Ġunju 2023  (2) u l-attivitajiet taħt ir-Riżultat 3 (“Reazzjonijiet effettivi għall-allegazzjonijiet ta’ użu ta’ armi kimiċi”), kif ukoll mad-Deċiżjoni tal-Kunsill (PESK) 2024/1984 tal-15 ta’ Lulju 2024  (3). L-attivitajiet fid-Deċiżjoni tal-Kunsill (PESK) 2023/1344 huma primarjament relatati mal-operazzjonijiet tal-OPCW fil-kwartieri ġenerali, filwaqt li din il-proposta tiffoka fuq l-operazzjonijiet tal-OPCW barra l-kwartieri ġenerali (skjeramenti, żjarat tekniċi, taħriġ u l-forniment ta’ tagħmir lill-awtoritajiet rilevanti fis-Sirja u l-Ukrajna). L-attivitajiet fid-Deċiżjoni tal-Kunsill (PESK) 2024/1984 huma primarjament rigward l-ipproċessar tad-data u t-trasferiment tal-għarfien fi ħdan l-Organizzazzjoni, filwaqt li din il-proposta tiffoka fuq l-iskjerament ta’ missjonijiet u l-forniment ta’ tagħmir lis-Sirja u l-Ukrajna.

2.   OBJETTIV ĠENERALI

L-objettiv ġenerali ta’ din l-azzjoni huwa li tikkontribwixxi għall-paċi u s-sigurtà internazzjonali, il-fiduċja u t-trasparenza, u għall-implimentazzjoni tal-Istrateġija tal-UE kontra l-Proliferazzjoni tal-Armi ta’ Qerda Massiva, billi tappoġġa l-attivitajiet tal-missjonijiet relatati mas-Sirja u l-Ukrajna biex, permezz tal-OPCW, jiġu żgurati risponsi effettivi għar-riskji tal-proliferazzjoni u l-użu ta’ armi kimiċi, filwaqt li l-Istati Parti jingħataw is-setgħa biex jiżguraw l-irfigħ tar-responsabbiltà f’każijiet ta’ użu ta’ armi kimiċi, abbażi tal-ħidma u r-rapporti tal-OPCW. Il-forniment ta’ prodotti u servizzi tas-SatCen isaħħaħ il-kapaċitajiet għal dawn l-attivitajiet inkarigati lill-OPCW kif ukoll l-akkuratezza tas-sigurtà u tal-verifika.

3.   OBJETTIVI SPEĊIFIĊI

L-objettivi speċifiċi tal-azzjoni huma:

a.

il-parteċipazzjoni fl-eliminazzjoni vverifikata b’mod komplet fil-livell internazzjonali tal-programm Sirjan tal-armi kimiċi u l-istabbiliment tal-fatti u l-identifikazzjoni tal-awturi relatati mal-użu ta’ armi kimiċi, f’konformità mad-deċiżjonijiet rilevanti tal-organi tat-tfassil tal-politika tal-OPCW;

b.

l-għoti ta’ assistenza konsistenti permezz tas-CWC biex l-Ukrajna jkun jista’ jkollha l-kapaċitajiet tekniċi ċivili meħtieġa biex tiżgura rispons effettiv għal inċidenti li jinvolvu aġenti tal-gwerra kimika u sustanzi kimiċi industrijali tossiċi, inkluż it-twettiq ta’ evalwazzjoni ta’ kampjuni relatati ma’ allegazzjonijiet tal-użu ta’ sustanzi kimiċi tossiċi misjuba fil-kamp tal-battalja fl-Ukrajna;

c.	l-espansjoni tal-kapaċitajiet operazzjonali tal-OPCW permezz tal-forniment ta’ prodotti u servizzi tas-SatCen, b’appoġġ għall-attivitajiet inkarigati lill-OPCW.

4.   ATTIVITAJIET U RIŻULTATI

a.

Sirja: i. Attività: Skjeramenti ta’ timijiet tekniċi (għal perjodu ta’ xahar kull wieħed) fuq perjodu ta’ sentejn biex jassistu lill-awtoritajiet Sirjani: — fil-produzzjoni ta’ inventarju dettaljat ta’ armi kimiċi, siti ta’ armi kimiċi (4), tagħmir, munizzjon u komponenti oħra tal-programm Sirjan tal-armi kimiċi. Huwa stmat li t-timijiet ser ikollhom bżonn iżuru u jivvalutaw aktar minn 100 post madwar is-Sirja biex jiġbru, jittraduċu, jivverifikaw u janalizzaw id-dokumenti, kif ukoll biex jintervistaw lill-persunal rilevanti li kien involut fil-programm tal-armi kimiċi tar-reġim Sirjan preċedenti. It-tim tekniku tal-OPCW ser joħroġ rapporti kif meħtieġ biex jinforma t-teħid ta’ deċiżjonijiet mill-organi tat-tfassil tal-politika tal-OPCW; — fl-iżvilupp ta’ pjanijiet, modalitajiet u inventarju dettaljat għall-qerda vverifikata tal-armi kimiċi li fadal tas-Sirja, inkluż l-identifikazzjoni ta’ tagħmir u faċilitajiet relatati; — fid-determinazzjoni tal-użu ta’ sustanzi kimiċi tossiċi bħala armi u l-identifikazzjoni tal-awturi. It-tim tekniku tal-OPCW ser joħroġ rapporti biex jipprovdi informazzjoni għat-teħid ta’ deċiżjonijiet u azzjoni mill-organi tat-tfassil tal-politika tal-OPCW, l-awtoritajiet Sirjani, u atturi internazzjonali oħra (bħall-Mekkaniżmu Internazzjonali, Imparzjali u Indipendenti — MIII). Riżultati: — Dikjarazzjoni sħiħa u kompleta tal-programm Sirjan tal-armi kimiċi skont l-obbligu li l-awtoritajiet proviżorji Sirjani wirtu taħt is-CWC; — Pjanijiet għall-qerda ta’ armi kimiċi li jistgħu jiġu eżegwiti biex jiġu kkunsidrati b’mod formali mill-Kunsill Eżekuttiv tal-OPCW; — L-istabbiliment ta’ bażijiet b’evidenza tal-użu ta’ armi kimiċi fis-Sirja biex il-vittmi jirċievu ġustizzja u l-awturi tar-reati jinżammu responsabbli. Noti: L-istabbiliment tal-faċilitajiet operattivi meħtieġa (faċilitajiet tal-uffiċċji siguri, spazju ta’ ħżin, tagħmir ta’ komunikazzjoni) biex jappoġġaw skjeramenti estiżi sikuri, siguri u effettivi minn timijiet tekniċi tal-OPCW kif ukoll persunal ta’ appoġġ involut fil-kisba tar-riżultati relatati mas-Sirja ta’ dan il-proġett, ser ikunu meħtieġa jiżguraw li r-riżultati previsti jinkisbu fil-ħin u b’mod kosteffettiv. Il-baġit ser jipprovdi għadd massimu ta’ jiem ta’ esperti, kumpens għas-sussistenza ta’ kuljum u għall-kostijiet tat-trasport li għandhom jiġu allokati għal dawn l-attivitajiet ta’ skjerament. Porzjon tal-baġit ser ikopri wkoll kwalunkwe servizz u tagħmir meħtieġa biex jitwettqu dawn l-attivitajiet, inkluż il-kostijiet rilevanti tal-uffiċċji tal-proġett.

b.

Ukrajna: i. Attività 1: Il-forniment ta’ taħriġ tekniku mfassal apposta u tagħmir protettiv u analitiku relatat fl-Ukrajna u barra mill-Ukrajna f’faċilitajiet speċjalizzati (bħaċ-Ċentru tal-OPCW għall-Kimika u t-Teknoloġija) għall-persuni tal-ewwel rispons, l-investigaturi, u esperti rilevanti oħra Ukreni fl-oqsma tar-rispons għal inċidenti, il-ġbir ta’ evidenza, u l-analiżi: — Taħriġ: huma ppjanati erba’ sessjonijiet ta’ taħriġ għal 20 parteċipant Ukren matul il-perjodu tal-Azzjoni tal-UE. It-taħriġ ser ikopri l-għarfien espert fl-Armi Kimiċi u l-kxif, il-protezzjoni, id-dekontaminazzjoni, il-kampjunar u l-analiżi tal-aġenti kimiċi. — Tipi ta’ Tagħmir: it-tagħmir li jikkomplementa t-taħriġ ser jiġi pprovdut, bħal “FirstDefender” u materjali/apparati ta’ detezzjoni ta’ armi kimiċi relatati, ilbies protettiv, maskri protettivi, kits għall-ittestjar tal-qies tal-maskri, kits ta’ dekontaminazzjoni, kits ta’ kampjunar u ta’ analiżi, kits awżiljarji ta’ għodod tax-xogħol fuq il-post (eż. GPS). Riżultat: Il-persuni tal-ewwel rispons, l-investigaturi, u l-esperti rilevanti Ukreni jistgħu, permezz ta’ għarfien espert u tħejjija mtejba, jittrattaw b’mod aktar effettiv każijiet u allegazzjonijiet ta’ użu ta’ sustanzi kimiċi tossiċi, jipprevjenu t-telf ta’ ħajjiet u ta’ korriment u jippromwovu t-trasparenza u r-responsabbiltà. ii. Attività 2: It-twettiq ta’ żjarat ta’ assistenza teknika (TAV) jekk u meta jkunu mitluba mill-Ukrajna biex tirċievi u tanalizza kampjuni, permezz tan-network indipendenti u ċċertifikat fil-livell internazzjonali tal-Laboratorji Nominati tal-OPCW, miġbura minn investigaturi Ukreni u relatati ma’ allegazzjonijiet ta’ użu ta’ sustanzi kimiċi tossiċi bħala armi, inkluż fir-rigward ta’ allegazzjonijiet ta’ użu ta’ Aġenti għall-Kontroll tal-Irvellijiet fuq l-ewwel linja. Riżultati: Il-forniment ta’ rapporti lill-awtoritajiet Ukreni biex l-Ukrajna tiddeċiedi ulterjorment dwar kif dawn ir-rapporti għandhom jintużaw fl-investigazzjonijiet nazzjonali tagħha dwar l-użu ta’ sustanzi kimiċi tossiċi bħala armi, inkluż it-twettiq ta’ evalwazzjoni ta’ kampjuni relatati ma’ allegazzjonijiet ta’ użu ta’ sustanzi kimiċi tossiċi misjuba fil-kamp tal-battalja fl-Ukrajna, kif ukoll għall-komunità internazzjonali, b’appoġġ għall-protezzjoni tas-CWC u l-isforzi tal-irfigħ tar-responsabbiltà.

c.

SatCen (5): i. Attività: Il-forniment ta’ prodotti u servizzi tas-SatCen (6) biex jiġi appoġġat l-ippjanar operazzjonali sikur u effettiv ta’ timijiet tekniċi tal-OPCW li jkunu qed iħejju għal skjeramenti għal kwalunkwe operazzjoni ta’ kontinġenza, biex jitwettqu investigazzjonijiet, taħriġ jew attivitajiet oħra skont il-mandat taħt il-Konvenzjoni mill-organi tat-tfassil tal-politika tal-OPCW jew mitluba mill-Istati Parti. Riżultat: L-iskjeramenti tat-tim tekniku tal-OPCW jitwettqu b’effiċjenza, sikurezza u sigurtà massimi; u l-prodotti u s-servizzi jipprovdu indikazzjonijiet utli għas-sostanzjar ta’ evidenza tas-sejbiet irrapportati mit-timijiet tekniċi tal-OPCW.

5.   BENEFIĊJARJI FINALI

a.	L-Istati Parti tas-CWC;

b.	L-uffiċjali tal-gvern u esperti fis-Sirja u l-Ukrajna;

c.	Il-vittmi tal-użu ta’ armi kimiċi fis-Sirja u l-Ukrajna;

d.	Il-persunal tal-OPCW skjerat fuq missjonijiet ta’ kontinġenza.

6.   TUL TA’ ŻMIEN

It-tul ta’ żmien totali stmat tal-azzjoni huwa 24 xahar.