(1)

Fid-19 ta’ Marzu 2025, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet ta’ aċidu fosforuż li joriġinaw mir-Repubblika tal-Poplu taċ-Ċina (“RPĊ” jew “il-pajjiż konċernat”) abbażi tal-Artikolu 5 tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”).

(2)

Il-Kummissjoni bdiet l-investigazzjoni wara lment ippreżentat fit-3 ta’ Frar 2025 minn ICL Europe Coöperatief U.A. (“l-ilmentatur”). L-ilment sar f’isem l-industrija tal-Unjoni tal-aċidu fosforuż fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta li kienet biżżejjed sabiex tiġġustifika l-bidu tal-investigazzjoni.

(3)

Il-Kummissjoni għamlet l-importazzjonijiet tal-prodott ikkonċernat soġġetti għar-reġistrazzjoni bir-Regolament ta’ Implimentazzjoni tal-Kummissjoni (UE) 2025/1334 (3) (“ir-Regolament dwar ir-reġistrazzjoni”).

(4)

Fin-Notifika tal-Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni għarrfet speċifikament lill-ilmentatur, lill-produtturi magħrufa tal-Unjoni l-oħrajn, lill-produtturi esportaturi magħrufa u lill-awtoritajiet tar-Repubblika tal-Poplu taċ-Ċina, lill-importaturi u lill-utenti magħrufa dwar il-bidu tal-investigazzjoni u stednithom jipparteċipaw.

(5)

Il-partijiet interessati kellhom l-opportunità li jikkummentaw dwar il-ftuħ tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(6)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(7)

Kif imsemmi fin-Notifika tal-Bidu, il-Kummissjoni għamlet disponibbli kwestjonarji għall-uniċi żewġ produtturi magħrufa tal-Unjoni, jiġifieri lill-ilmentatur u lil Italmatch Chemicals SPA. Il-kampjunar tal-produtturi tal-Unjoni ma kienx meqjus neċessarju.

(8)

Biex tiddeċiedi jekk kienx meħtieġ li jittieħed kampjun u, jekk iva, biex tagħżel kampjun, il-Kummissjoni staqsiet lil importaturi mhux relatati sabiex jipprovdu l-informazzjoni speċifikata fin-Notifika tal-Bidu.

(9)

L-ebda importatur mhux relatat ma pprovda l-informazzjoni mitluba jew qabel li jiġi inkluż fil-kampjun. Għalhekk, il-Kummissjoni ma għażlet l-ebda kampjun ta’ importaturi.

(10)

Biex tiddeċiedi jekk il-kampjunar kienx neċessarju u, jekk iva, biex tagħżel kampjun, il-Kummissjoni talbet lill-produtturi esportaturi kollha fir-RPĊ biex jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(11)

Ħames kumpaniji fil-pajjiż ikkonċernat ipprovdew l-informazzjoni mitluba u qablu li jkunu inklużi fil-kampjun:

(12)

Bit-tweġibiet tagħhom għall-kampjunar, Linyi Chunming u Zibo Tiandan informaw lill-Kummissjoni li, minbarra l-prodott tagħhom stess, huma esportaw lejn l-Unjoni aċidu fosforuż immanifatturat minn produtturi mhux relatati oħrajn. Il-kumpaniji ddikjaraw li ma setgħux jagħmlu distinzjoni fir-rekords tagħhom bejn il-prodott tagħhom stess u l-prodott mixtri.

(13)

Fuq dik il-bażi, il-Kummissjoni qieset li l-kumpaniji ma kinux ipprovdew l-informazzjoni neċessarja dwar il-bejgħ tal-esportazzjoni lejn l-Unjoni tal-aċidu fosforuż immanifatturat mill-kumpaniji fit-tweġiba għall-kampjunar tagħhom sal-iskadenza. Fl-14 ta’ April 2025, il-Kummissjoni informat lill-kumpaniji bl-intenzjoni tagħha li tapplika l-Artikolu 18 tar-Regolament bażiku, u b’hekk tibbaża s-sejbiet fir-rigward tal-valur normali, tal-prezz tal-esportazzjoni u tal-marġni tad-dumping fuq il-fatti disponibbli. Il-kumpaniji ngħataw l-opportunità li jipprovdu kummenti.

(14)

Bi tweġiba għall-ittri tal-Artikolu 18, Linyi Chunming u Zibo Tiandan ipprovdew kjarifiki li juru li l-kumpaniji, għall-kuntrarju tad-dikjarazzjonijiet preċedenti tagħhom, kienu kapaċi jittraċċaw l-oriġini (il-produzzjoni jew ix-xiri) tal-aċidu fosforuż mibjugħ lill-Unjoni. F’dak l-istadju, dawk il-kjarifiki kienu appoġġati biżżejjed mill-evidenza. Fil-każ ta’ Linyi Chunming, dan l-eżerċizzju wassal għal tnaqqis ta’ madwar terz tal-bejgħ tagħha għall-esportazzjoni lejn l-Unjoni tal-aċidu fosforuż immanifatturat mill-kumpanija.

(15)

Konsegwentement, il-Kummissjoni ddeċidiet li ma tapplikax id-dispożizzjonijiet tal-Artikolu 18(1) tar-Regolament bażiku u inkludiet iż-żewġ kumpaniji fil-kunsiderazzjonijiet tagħha meta għażlet il-kampjun proviżorju ta’ produtturi esportaturi.

(16)

Barra minn hekk, Hebei Jia’ao rrevediet mingħajr ġustifikazzjoni xierqa t-tweġiba għall-kampjunar tagħha billi naqqset il-kwantità tal-bejgħ lejn l-Unjoni għal terz tal-kwantità rrapportata oriġinarjament. Il-Kummissjoni talbet lill-kumpanija tipprovdi informazzjoni addizzjonali li turi l-akkuratezza tat-tweġiba għall-kampjunar riveduta. Madankollu, il-kumpanija naqset milli tissottometti l-evidenza mitluba.

(17)

Għalhekk, il-Kummissjoni kkonkludiet li l-kumpanija ma kinitx ipprovdiet l-informazzjoni neċessarja dwar il-bejgħ għall-esportazzjoni lejn l-Unjoni tal-aċidu fosforuż immanifatturat mill-kumpanija fit-tweġiba għall-kampjunar tagħha sal-iskadenza. Fl-14 ta’ April 2025, il-Kummissjoni informat lill-kumpanija bl-intenzjoni tagħha li tapplika l-Artikolu 18(1) tar-Regolament bażiku u, għalhekk, li tibbaża s-sejbiet fir-rigward tal-valur normali, tal-prezz tal-esportazzjoni u tal-marġni tad-dumping fuq il-fatti disponibbli u bir-raġunijiet għal din.

(18)

Hebei Jia’ao ngħatat l-opportunità li tikkummenta dwar l-intenzjonijiet u r-raġunijiet sottostanti tal-Kummissjoni deskritti fil-premessi (16) u (17). Madankollu, il-kumpanija ma pprovdiet l-ebda kumment. Għalhekk, il-Kummissjoni qieset li l-kumpanija ma kkooperatx fl-investigazzjoni.

(19)

Permezz ta’ Note Verbale tal-14 ta’ April 2025, il-Kummissjoni informat lill-Gvern tar-Repubblika tal-Poplu taċ-Ċina (“GTĊ”) bl-intenzjoni tagħha li tapplika l-fatti disponibbli skont it-tifsira tal-Artikolu 18 tar-Regolament bażiku għal sejbiet li jikkonċernaw lil Linyi Chunming, lil Zibo Tiandan u lil Hebei Jia’ao, u tat lill-GTĊ opportunità sabiex jikkummenta. Ma wasal l-ebda kumment mingħand il-GTĊ.

(20)

Wara l-kjarifiki mfittxija u parzjalment riċevuti mill-kumpaniji Ċiniżi li kkooperaw (ara t-taqsima 1.4.3.1), il-Kummissjoni għażlet b’mod proviżorju żewġ kumpaniji fil-kampjun ta’ produtturi esportaturi fuq il-bażi tal-akbar volum rappreżentattiv ta’ esportazzjonijiet lejn l-Unjoni matul il-perjodu ta’ investigazzjoni, li seta’ jiġi investigat b’mod raġonevoli fi ħdan iż-żmien disponibbli:

(21)

Dawn il-kumpaniji kienu jirrappreżentaw 15 % tal-kwantità stmata tal-esportazzjoni ta’ aċidu fosforuż lejn l-Unjoni mir-RPĊ fil-perjodu ta’ investigazzjoni u 70 % tal-esportazzjonijiet lejn l-Unjoni mill-kumpaniji li wieġbu għall-mistoqsijiet tal-kampjunar.

(22)

Permezz ta’ Note Verbale tat-30 ta’ April, il-Kummissjoni informat lill-GTĊ bl-għażla tal-kampjun proviżorju tal-produtturi esportaturi u stednitu jikkummenta. Ma wasal l-ebda kumment mingħand il-GTĊ.

(23)

Il-Kummissjoni stiednet ukoll lill-partijiet interessati biex jikkummentaw dwar l-għażla tal-kampjun tal-produtturi esportaturi. Waslu kummenti mingħand l-ilmentatur.

(24)

L-ilmentatur argumenta li ż-żewġ kumpaniji magħżula għall-kampjun ma kinux rappreżentattivi tal-industrija Ċiniża li tipproduċi l-aċidu fosforuż, peress li ż-żewġ kumpaniji kienu jipproduċu l-aċidu fosforuż minn prodott sekondarju tal-fosfit dimetiliku (“DMHP”, Dimethyl Phosphite). L-ilmentatur argumenta li, billi ż-żewġ kumpaniji kienu jipproduċu l-aċidu fosforuż minn prodott sekondarju, il-kost tal-produzzjoni tagħhom ma jirriflettix il-kost reali tal-input ewlieni – il-prodott sekondarju tad-DMHP. Il-prezz tax-xiri tiegħu pjuttost kien jirrifletti l-iffrankar nozzjonali miksub mill-fornitur billi dan ma kellux għalfejn jiddisponi mill-prodott sekondarju bħala skart.

(25)

Wara l-kummenti tal-ilmentatur dwar il-kampjun proviżorju tal-produtturi esportaturi, il-Kummissjoni talbet lill-kumpaniji Ċiniżi kollha li kkooperaw biex jispjegaw il-proċess tal-produzzjoni tagħhom fid-dettall u jipprovdu għal kull pass tal-produzzjoni, deskrizzjoni dettaljata tal-operazzjoni tal-ipproċessar, tat-tagħmir/tal-makkinarju użat, tal-inputs użati u tal-outputs u tal-prodotti sekondarji miksuba.

(26)

Abbażi tat-tweġibiet tal-kumpaniji, il-Kummissjoni sabet li waħda biss mill-erba’ kumpaniji kienet tipproduċi l-aċidu fosforuż bl-użu tal-proċess tal-produzzjoni deskritt fil-premessa (47), jiġifieri l-idroliżi tat-triklorur tal-fosforu (PCl3). Tliet kumpaniji kienu jużaw waħda jew aktar mill-operazzjonijiet ta’ pproċessar li ġejjin:

(27)

Fil-valutazzjoni inizjali tal-Kummissjoni, l-ebda wieħed mit-tliet metodi deskritti hawn fuq ma seta’ jitqies bħala produzzjoni ta’ aċidu fosforuż. Fit-tliet każijiet kollha kemm huma, l-aċidu fosforuż kien qiegħed jinxtara f’forma dilwita, xi kultant flimkien ma’ impuritajiet. Imbagħad, kien qiegħed jiġi ppurifikat u kkonċentrat.

(28)

Fit-12 ta’ Ġunju 2025, il-Kummissjoni ppubblikat Nota għall-fajl dwar il-proċessi ta’ produzzjoni użati mill-kumpaniji Ċiniżi li kkooperaw u fittxet il-fehmiet tal-partijiet dwar jekk l-operazzjonijiet ta’ pproċessar deskritti fil-premessa (26) jistgħux jitqiesu bħala produzzjoni tal-aċidu fosforuż u jekk l-inputs użati f’dawk il-proċessi jistgħux jitqiesu bħala l-prodott taħt investigazzjoni.

(29)

L-ilmentatur biss ipprovda l-fehmiet tiegħu. Dan sostna li l-inputs użati fit-tliet operazzjonijiet ta’ pproċessar kollha kienu jikkostitwixxu l-prodott taħt investigazzjoni, peress li kien iddefinit bħala “aċidu fosforuż, f’forma solida jew likwida (milwiema), denominat ukoll bħala aċidu fosfoniku, […]”. Barra minn hekk, l-ilmentatur argumenta li l-ebda wieħed mit-tliet proċessi ma kien jirrappreżenta l-produzzjoni tal-aċidu fosforuż. Dan spjega li fit-tliet proċessi kollha, il-molekula tal-aċidu fosforuż kienet diġà ġiet prodotta permezz ta’ idroliżi tal-PCl3 fi stadju upstream tal-produzzjoni. Il-proċessi mwettqa mill-kumpaniji Ċiniżi li kkooperaw kienu jirrappreżentaw sempliċiment purifikazzjoni u/jew tnixxif tal-aċidu fosforuż likwidu. Fil-proċess li jinvolvi l-prodott sekondarju tad-DMHP biss li kien jiġi prodott volum negliġibbli ta’ aċidu fosforuż ġdid mir-residwi tad-DMHP li jinsab fis-soluzzjoni. Konsegwentement, l-ilmentatur argumenta li l-produtturi Ċiniżi kollha li jwettqu l-operazzjonijiet ta’ pproċessar deskritti fil-premessa (26) jenħtieġ li ma jitqisux bħala produtturi esportaturi.

(30)

Il-Kummissjoni analizzat l-informazzjoni li rċeviet mill-kumpaniji Ċiniżi li kkooperaw u l-kummenti sottomessi mill-ilmentatur. Tabilħaqq, ir-reazzjoni kimika li kienet toħloq il-molekula tal-aċidu fosforuż kienet isseħħ fi stadju upstream tal-katina tal-valur. Kumpaniji upstream kienu jipproduċu l-prodott investigat bħala prodott sekondarju u kienu jfornu lill-produtturi Ċiniżi li kkooperaw b’soluzzjoni li fiha prinċipalment aċidu fosforuż, xi ilma u impuritajiet. Il-kumpaniji Ċiniżi li kkooperaw kienu jwettqu operazzjonijiet minuri ta’ pproċessar limitati, b’mod partikolari, għall-purifikazzjoni u għat-trasformazzjoni ta’ prodott likwidu fi kristalli solidi.

(31)

B’riżultat ta’ dan, il-Kummissjoni ddeċidiet li t-tliet kumpaniji Ċiniżi li kkooperaw li ġejjin jenħtieġ li ma jitqisux bħala produtturi esportaturi tal-prodott taħt investigazzjoni peress li kienu qegħdin iwettqu biss operazzjonijiet ta’ pproċessar limitati:

(32)

L-uniku produttur esportatur li kien fadal, JQWT, kien jirrappreżenta anqas minn 4 % tal-volum stmat ta’ aċidu fosforuż esportat mir-RPĊ lejn l-Unjoni. Għalhekk, ma kienx rappreżentattiv biżżejjed biex iservi bħala bażi għal sejbiet li jkopru l-pajjiż kollu. Barra minn hekk, għalkemm il-kumpanija indikat li kienet se titlob eżami individwali, hija naqset milli tissottometti tweġiba għall-kwestjonarju sal-iskadenza, jiġifieri l-informazzjoni individwali tal-uniku produttur esportatur ma kinitx disponibbli.

(33)

Konsegwentement, fl-10 ta’ Lulju 2025, il-Kummissjoni informat lill-partijiet interessati dwar ir-riżultati tal-analiżi tagħha deskritta fil-premessi (30) sa (32) u li hija qieset il-grad ta’ nuqqas ta’ kooperazzjoni f’din l-investigazzjoni x’aktarx li kien se jaffettwa materjalment l-eżitu tal-investigazzjoni skont it-tifsira tal-Artikolu 17(4) tar-Regolament bażiku, u għalhekk kellha l-intenzjoni li tapplika d-dispożizzjonijiet rilevanti tal-Artikolu 18 tar-Regolament bażiku biex tistabbilixxi s-sejbiet ta’ dumping fil-livell tal-pajjiż kollu (“deċiżjoni ta’ kampjunar definittiva”).

(34)

Il-GTĊ ġie informat ukoll bid-deċiżjoni ta’ kampjunar definittiva permezz ta’ Note Verbale tal-10 ta’ Lulju 2025. Dan ma ssottometta l-ebda kumment.

(35)

Bi tweġiba għad-deċiżjoni ta’ kampjunar definittiva tal-Kummissjoni, it-tliet kumpaniji affettwati talbu seduta ta’ smigħ. Matul is-seduta ta’ smigħ, dawn argumentaw li peress li kienu s-sidien ta’ linji ta’ produzzjoni u kienu jipproċessaw l-aċidu fosforuż likwidu bħala materja prima f’aċidu fosforuż solidu, jenħtieġ li jitqiesu bħala produtturi u, għalhekk, bħala produtturi esportaturi f’din l-investigazzjoni. Iż-żewġ kumpaniji inizjalment inklużi fil-kampjun talbu li jiġi stabbilit marġni tad-dumping individwali għalihom.

(36)

It-tliet kumpaniji kkonfermaw matul is-seduta ta’ smigħ li kienu jużaw l-aċidu fosforuż likwidu bħala l-input ewlieni tagħhom fl-operazzjonijiet ta’ pproċessar li kienu jwettqu. Barra minn hekk, ma pprovdew l-ebda argument sostanzjali kontra l-konklużjoni tal-Kummissjoni li l-prodott taħt investigazzjoni kien jiġi mmanifatturat fi stadju upstream mill-fornituri tagħhom. Konsegwentement, il-Kummissjoni kkonfermat il-konklużjonijiet tagħha dwar il-grad tan-nuqqas ta’ kooperazzjoni u l-applikazzjoni sussegwenti tal-Artikolu 18 tar-Regolament bażiku biex tistabbilixxi s-sejbiet ta’ dumping fil-livell tal-pajjiż kollu.

(37)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-GTĊ.

(38)

Barra minn hekk, fl-ilment l-ilmentatur ipprovda biżżejjed evidenza prima facie ta’ distorsjonijiet tal-materja prima fir-RPĊ fir-rigward tal-prodott ikkonċernat. Għaldaqstant, kif tħabbar fin-Notifika tal-Bidu, l-investigazzjoni kopriet dawk id-distorsjonijiet fil-materja prima biex tiddetermina jekk għandhomx jiġu applikati d-dispożizzjonijiet tal-Artikolu 7(2a) u 7(2b) tar-Regolament bażiku fir-rigward tar-RPĊ. Għal din ir-raġuni, il-Kummissjoni bagħtet kwestjonarji addizzjonali f’dan ir-rigward lill-GTĊ.

(39)

Il-GTĊ ma wieġeb għall-ebda kwestjonarju. Għalhekk, permezz tan-Note Verbale tal-10 ta’ Lulju 2025, il-Kummissjoni informat lill-GTĊ li kien beħsiebha tuża l-fatti disponibbli skont it-tifsira tal-Artikolu 18 tar-Regolament bażiku dwar l-eżistenza ta’ distorsjonijiet sinifikanti u ta’ distorsjonijiet fil-materja prima fir-RPĊ. Il-GTĊ ingħata opportunità sabiex jikkummenta. Ma wasal l-ebda kumment mingħand il-GTĊ.

(40)

Il-Kummissjoni bagħtet kwestjonarji liż-żewġ kumpaniji Ċiniżi inizjalment inklużi fil-kampjun.

(41)

Il-kwestjonarji kollha, inklużi kwestjonarju għall-importaturi mhux relatati u kwestjonarju għall-utenti, tqiegħdu għad-dispożizzjoni online (4) fil-jum tal-bidu.

(42)

L-ilmentatur bagħat tweġiba għall-kwestjonarju qabel id-dati ta’ skadenza. It-tieni produttur tal-Unjoni, Italmatch Chemicals SPA, inizjalment ma weġibx għall-kwestjonarju. Il-kumpanija spjegat lill-Kummissjoni li dan kien minħabba l-fatt li ma kinitx tbigħ il-prodott taħt investigazzjoni fis-suq ħieles. Madankollu, fuq talba tal-Kummissjoni, fi stadju aktar tard hija pprovdiet tweġiba għall-kwestjonarju li ppermettiet lill-Kummissjoni tibbaża l-analiżi tad-dannu fuq l-industrija kollha tal-Unjoni tal-aċidu fosforuż (5).

(43)

Il-Kummissjoni fittxet u vverifikat l-informazzjoni kollha li qieset neċessarja għal determinazzjoni proviżorja tad-dannu u tal-interess tal-Unjoni. Kif spjegat fit-taqsima 1.4.3.2, id-determinazzjoni tad-dumping kienet ibbażata fuq il-fatti disponibbli.

(44)

Saret żjara ta’ verifika waħda skont l-Artikolu 16 tar-Regolament bażiku fil-bini tal-ilmentatur, ICL Europe Coöperatief U.A. (Amsterdam, In-Netherlands). Il-Kummissjoni wettqet kontroverifiki mill-bogħod (“RCC”, Remote Crosschecks) tat-tweġiba għall-kwestjonarju tat-tieni produttur tal-Unjoni, Italmatch Chemicals SPA (Ġenova, l-Italja).

(45)

L-investigazzjoni tad-dumping u tad-dannu kopriet il-perjodu mill-1 ta’ Jannar 2024 sal-31 ta’ Diċembru 2024 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2021 sa tmiem il-perjodu ta’ investigazzjoni (“il-perjodu kkunsidrat”).

(46)

Il-prodott taħt investigazzjoni huwa l-aċidu fosforuż (“PA”, Phosphorous Acid), f’forom solidi jew likwidi (milwiema), li bħalissa jaqa’ taħt il-kodiċi NM ex 2811 19 80 (kodiċi TARIC 2811 19 80 60), denominat ukoll bħala aċidu fosfoniku, li normalment jaqa’ taħt in-numri 13598-36-2 u 10294-56-1 tal-Chemical Abstracts Service (“CAS”), li joriġina mir-Repubblika tal-Poplu taċ-Ċina (“RPĊ”). In-numri tad-Dwana u tal-Istatistika (“CUS, Customs and Statistics”) li normalment jikkorrispondu għal dan il-prodott li joriġina mir-Repubblika tal-Poplu taċ-Ċina (“il-prodott taħt investigazzjoni”) huma 0021895-1 u 0043878-8.

(47)

Il-prodott taħt investigazzjoni jista’ jiġi prodott permezz ta’ żewġ metodi differenti. L-aktar wieħed użat huwa l-idroliżi tal-PCl3. Madankollu, l-aċidu fosforuż jista’ jiġi prodott ukoll permezz tal-idroliżi tat-triossidu tal-fosforu (P4O6). Hemm żewġ raġunijiet ewlenin għaliex l-idroliżi tal-PCl3 tintuża b’mod komuni. L-ewwel nett, il-PCl3 iservi bħala input f’varjetà ta’ prodotti downstream u għalhekk huwa aktar faċilment disponibbli mill-P4O6. It-tieni, il-P4O6 huwa aktar kumpless biex jiġi prodott, aktar reattiv u għalhekk anqas stabbli.

(48)

L-aċidu fosforuż jintuża f’firxa wiesgħa ta’ applikazzjonijiet, huwa l-materja prima fil-produzzjoni tal-fosfonati u ta’ sustanzi kimiċi ta’ speċjalità oħra, li għandhom firxa wiesgħa ta’ applikazzjonijiet f’diversi industriji (it-trattament tal-ilma, id-deterġenti u l-aġenti tat-tindif, l-agrikoltura, iż-żejt u l-gass, il-materjali tal-kostruzzjoni u tal-bini, l-industrija tat-tessuti u tal-ġilda, l-industrija tal-karta u tal-polpa, il-farmaċewtiċi u l-kura personali, l-industrija tal-ikel u tax-xorb).

(49)

Il-prodott ikkonċernat huwa l-prodott taħt investigazzjoni li joriġina mir-RPĊ.

(50)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(51)

F’dan l-istadju l-Kummissjoni ddeċidiet li, għaldaqstant, dawk il-prodotti huma prodotti simili fis-sens tal-Artikolu 1(4) tar-Regolament bażiku.

(52)

Linyi Chunming għamlet żewġ sottomissjonijiet. L-ewwel sottomissjoni fittxet li żżid kriterju ġdid tan-numru ta’ kontroll tal-prodott (PCN, Product Control Number) biex jidentifika l-materja prima użata fil-produzzjoni. It-tieni sottomissjoni talbet l-esklużjoni tal-aċidu fosforuż tagħha prodott bl-użu ta’ materja prima oħra meta mqabbla mal-produttur tal-Unjoni. Linyi Chunming iġġustifikat it-talba tagħha billi spjegat li l-PA prodott bl-użu tal-proċess ta’ produzzjoni speċifiku tagħha, materja prima differenti kienet tiġġenera PA b’livell ta’ purità kemxejn aktar baxx, tinvolvi kostijiet ta’ produzzjoni differenti, għandha impatt ambjentali baxx u tista’ sservi applikazzjonijiet differenti meta mqabbla mal-PA prodott mill-produtturi tal-Unjoni. Għal dawn ir-raġunijiet, il-prodott tagħha jenħtieġ li jiġi eskluż mill-investigazzjoni.

(53)

Bi tweġiba għall-ewwel dikjarazzjoni ta’ Linyi Chunming dwar l-istruttura tal-PCN, ICL ikkontestat is-sottomissjoni ta’ Linyi Chunming billi spjegat li hija kienet tqis li s-sottomissjoni ma hijiex ċara biżżejjed, b’mod partikolari l-ispjegazzjoni tal-proċess tal-produzzjoni. Barra minn hekk, instab li l-materja prima użata diġà kien fiha ċertu perċentwal ta’ aċidu fosforuż, li ġie pproċessat ulterjorment permezz ta’ passi ta’ tnixxif u ta’ purifikazzjoni biex jintlaħqu l-forom finali tal-kristall. Għal dawn ir-raġunijiet, ICL talbet lill-Kummissjoni tiċħad it-talba għal modifika tal-PCN.

(54)

Il-Kummissjoni, wara li evalwat id-dikjarazzjonijiet ta’ Linyi Chunming u s-sottomissjoni ta’ ICL, ikkonkludiet li ma kien hemm l-ebda ġustifikazzjoni biex tiġi mmodifikata l-istruttura tal-PCN jew jiġi eskluż l-aċidu fosforuż prodott permezz ta’ proċessi alternattivi. F’nota għall-fajl (6) ippubblikata fit-12 ta’ Ġunju 2025, il-Kummissjoni ċċarat li metodi ta’ produzzjoni oħra għall-aċidu fosforuż primarjament jużaw materja prima li diġà fiha l-aċidu fosforuż. Għalkemm dawn l-inputs jgħaddu minn proċess ta’ trasformazzjoni, dawn diġà jenħtieġ li jitqiesu bħala prodott taħt investigazzjoni. Għalhekk, iż-żewġ dikjarazzjonijiet ġew miċħuda.

(55)

Minħabba li kien hemm provi biżżejjed disponibbli fil-bidu tal-investigazzjoni li indikaw l-eżistenza ta’ distorsjonijiet sinifikanti fis-sens tal-Artikolu 2(6a)(b) tar-Regolament bażiku fir-rigward tar-RPĊ, il-Kummissjoni qieset li kien xieraq li tiftaħ l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(56)

Konsegwentement, sabiex tiġbor id-data meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika tal-Bidu, il-Kummissjoni stiednet lill-produtturi esportaturi kollha fir-RPĊ biex jipprovdu informazzjoni rigward l-inputs użati għall-produzzjoni tal-prodott. Kif spjegat fit-taqsima 1.4.3.2, il-grad tan-nuqqas ta’ kooperazzjoni mill-produtturi esportaturi Ċiniżi x’aktarx li kien se jaffettwa b’mod sinifikanti l-eżitu tal-investigazzjoni. Għalhekk, il-Kummissjoni applikat id-dispożizzjonijiet rilevanti tal-Artikolu 18 tar-Regolament bażiku biex tistabbilixxi s-sejbiet tad-dumping fil-livell tal-pajjiż kollu.

(57)

Sabiex tikseb l-informazzjoni li qieset neċessarja għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, fil-punt 5.3.2 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jissottomettu informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea. Ma waslet l-ebda tweġiba għall-kwestjonarju mill-GTĊ u ma waslet l-ebda sottomissjoni dwar l-applikazzjoni tal-Artikolu 2(6a) tar-Regolament bażiku sad-data ta’ skadenza. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku sabiex tiddetermina l-eżistenza tad-distorsjonijiet sinifikanti fir-RPĊ.

(58)

Fil-punt 5.3.2. tan-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, hija kienet għażlet b’mod proviżorju lill-Brażil bħala pajjiż rappreżentattiv xieraq skont l-Artikolu 2(6a)(a) tar-Regolament bażiku għall-fini tad-determinazzjoni tal-valur normali abbażi ta’ prezzijiet jew ta’ parametri referenzjarji mingħajr distorsjoni. Il-Kummissjoni ddikjarat ukoll li kienet se teżamina pajjiżi rappreżentattivi oħra li setgħu jkunu xierqa f’konformità mal-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku.

(59)

Fit-2 ta’ Settembru 2025, il-Kummissjoni informat b’nota (“in-Nota dwar is-sorsi”) lill-partijiet interessati dwar is-sorsi rilevanti li kien beħsiebha tuża biex tiddetermina l-valur normali. Fin-Nota dwar is-sorsi, il-Kummissjoni pprovdiet lista tal-fatturi ta’ produzzjoni kollha, bħall-materja prima, il-manodopera u l-enerġija użati, kif ukoll il-prodott sekondarju ġġenerat fil-produzzjoni tal-aċidu fosforuż. Barra minn hekk, abbażi tal-kriterji li jiggwidaw l-għażla tal-prezzijiet jew tal-parametri referenzjarji mingħajr distorsjoni, il-Kummissjoni identifikat lill-Brażil, lill-Indoneżja, lill-Malażja u lis-Serbja bħala pajjiżi rappreżentattivi possibbli. Wara li qieset id-disponibbiltà tal-informazzjoni neċessarja fl-erba’ pajjiżi rappreżentattivi potenzjali, il-Kummissjoni għażlet lill-Brażil bħala pajjiż rappreżentattiv xieraq. Il-Kummissjoni informat ukoll lill-partijiet interessati li se tistabbilixxi l-ispejjeż ġenerali tal-manifattura (“MOH, Manufacturing Overheads”), il-kost tal-bejgħ, ġenerali u amministrattivi (“SG&A, Selling, General and Administrative”) u l-profitti abbażi tal-informazzjoni disponibbli għal żewġ manifatturi tal-prodotti Brażiljani fl-istess kategorija ġenerali, jiġifieri Nortox S.A. u Vittia S.A.

(60)

Il-Kummissjoni rċeviet kummenti dwar in-Nota dwar is-sorsi mingħand l-ilmentatur. Dawn kienu jikkonċernaw id-determinazzjoni ta’ valur mingħajr distorsjoni tal-prodott sekondarju. Il-kummenti huma indirizzati fit-taqsima 3.2.5.2.

(61)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(62)

Madankollu, skont l-Artikolu 2(6a)(a) tar-Regolament bażiku, “[f]il-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” li minn hawn ’il quddiem jissejħu “SG&A”, Selling, General and Administrative).

(63)

Kif inhu spjegat ulterjorment hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ u tal-produtturi esportaturi, l-applikazzjoni tal-Artikolu 2(6a) tar-Regolament bażiku kienet xierqa.

(64)

F’investigazzjonijiet reċenti dwar is-settur kimiku fir-RPĊ (7), il-Kummissjoni sabet li kien hemm distorsjonijiet sinifikanti fis-sens tal-Artikolu 2(6a)(b) tar-Regolament bażiku.

(65)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (8). B’mod partikolari, il-Kummissjoni kkonkludiet li fis-settur kimiku, mhux biss għad hemm grad sostanzjali ta’ sjieda mill-GTĊ fis-sens tal-Artikolu 2(6a)(b), l-ewwel inċiż, tar-Regolament bażiku (9), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż, tar-Regolament bażiku (10). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett ta’ distorsjoni addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (11). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tal-Artikolu 2(6a)(b), ir-raba’ inċiż, tar-Regolament bażiku, u b’hekk jiġġeneraw distorsjonijiet, b’mod partikolari meta ditti insolventi jinżammu għaddejjin u meta jiġu allokati drittijiet għall-użu tal-art fir-RPĊ (12). Bl-istess mod, il-Kummissjoni sabet distorsjonijiet tal-kostijiet tal-pagi fis-settur kimiku fis-sens tal-Artikolu 2(6a)(b), il-ħames inċiż, tar-Regolament bażiku (13), kif ukoll distorsjonijiet fis-swieq finanzjarji fis-sens tal-Artikolu 2(6a)(b), is-sitt inċiż, tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (14).

(66)

Bħal fl-investigazzjonijiet preċedenti rigward is-settur tal-kimika fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a)(b), tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fl-ilment, kif ukoll fid-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet tal-Investigazzjonijiet għad-Difiża tal-Kummerċ (15) (“ir-Rapport”), li jibbaża fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-prodott taħt investigazzjoni. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(67)

L-ilment allega li jeżistu distorsjonijiet sinifikanti fis-settur Ċiniż tal-aċidu fosforuż. Dan irrefera għar-Rapport u b’mod partikolari għall-fatt li s-sistema ekonomika tar-RPĊ hija “ekonomija tas-suq soċjalista” u għar-rwol attiv tal-Partit Komunista Ċiniż (“CCP”) kemm fis-settur pubbliku kif ukoll f’dak privat fir-RPĊ.

(68)

B’mod aktar speċifiku, l-ilment indika li:

(69)

Bħala konklużjoni, l-ilment ħa l-pożizzjoni li l-prezzijiet jew il-kostijiet, inklużi l-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħieles minħabba li huma affettwati minn intervent sostanzjali min-naħa tal-gvern skont it-tifsira tal-Artikolu 2(6a)(b) tar-Regolament bażiku. Fuq dik il-bażi, skont l-ilment, f’dan il-każ ma huwiex xieraq li jintużaw prezzijiet u kostijiet domestiċi biex jiġi stabbilit il-valur normali.

(70)

Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku. Dik l-analiżi kopriet l-eżami tal-interventi sostanzjali tal-gvern fl-ekonomija taċ-Ċina b’mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott ikkonċernat.

(71)

F’dan ir-rigward, il-Kummissjoni l-ewwel ivvalutat jekk is-settur tal-aċidu fosforuż fir-RPĊ huwiex qiegħed jinqeda b’mod sinifikanti minn intrapriżi li joperaw taħt is-sjieda, taħt il-kontroll jew taħt is-superviżjoni jew taħt il-gwida tal-politiki tal-awtoritajiet Ċiniżi, skont it-tifsira tal-Artikolu 2(6a)(b), l-ewwel inċiż, tar-Regolament bażiku. Is-settur tal-prodott ikkonċernat huwa moqdi kemm minn kumpaniji privati, bħal Taizhou Yongchang Chemical Co. Ltd (24), kif ukoll minn SOEs bħall-Grupp Yuntianhua (25). Il-proporzjon eżatt ta’ produtturi privati meta mqabbla ma’ dawk tal-Istat fis-suq tal-aċidu fosforuż ma setax jiġi ddeterminat. Madankollu, il-Kummissjoni sabet li diversi produtturi huma kkontrollati direttament mill-Istat. L-eżempji jinkludu Yunnan Yuntianhua Co. Ltd. li hija kkontrollata mill-Grupp Yuntianhua (26) li 64,8 % tal-ishma tiegħu huma miżmuma mill-Kummissjoni għas-Superviżjoni u għall-Amministrazzjoni tal-Assi tal-Istat tal-Gvern Provinċjali ta’ Yunnan. Barra minn hekk, Hubei Xingfa Chemicals Group Ltd (27) hija kkontrollata mill-Grupp Yichang Xingfa (28), SOE kollha kemm hi proprjetà tal-Kummissjoni għas-Superviżjoni u għall-Amministrazzjoni tal-Assi tal-Istat tal-Gvern tal-Kontea ta’ Xingshan (29). Barra minn hekk, Hubei Yihua Chemical Industry Co. Ltd (30) hija kkontrollata minn Hubei Yihua Group Ltd., SOE li hija proprjetà sħiħa tal-Kummissjoni għas-Superviżjoni u għall-Amministrazzjoni tal-Assi tal-Istat tal-Gvern Muniċipali ta’ Yichang (31) u SD Lomon (32) fl-aħħar mill-aħħar hija kkontrollata mill-Kummissjoni għas-Superviżjoni u għall-Amministrazzjoni tal-Assi tal-Istat tal-Gvern Provinċjali ta’ Sichuan (33).

(72)

Barra minn hekk, l-interventi tas-CCP fit-teħid ta’ deċiżjonijiet operazzjonali saru n-norma, mhux biss fl-SOEs iżda anke f’kumpaniji privati (34), billi s-CCP jimponi pretensjonijiet ta’ tmexxija fuq prattikament kull aspett tal-ekonomija tal-pajjiż. Tabilħaqq, l-influwenza tal-Istat permezz tal-istrutturi tas-CCP fil-kumpaniji tirriżulta effettivament f’sitwazzjoni li fiha l-operaturi ekonomiċi jkunu taħt il-kontroll u taħt is-superviżjoni tal-politiki tal-gvern, fid-dawl ta’ kemm l-istrutturi tal-Istat u tal-Partit kibru flimkien fiċ-Ċina.

(73)

L-investigazzjoni sabet li l-assoċjazzjoni nazzjonali tal-industrija li tkopri s-settur kimiku hija l-Federazzjoni tal-Industrija tal-Petroleum u Kimika taċ-Ċina (“CPCIF, China Petroleum and Chemical Industry Federation”). Is-CPCIF taderixxi mat-tmexxija ġenerali tas-CCP, twettaq attivitajiet tal-Partit, u tipprovdi l-kundizzjonijiet neċessarji għall-attivitajiet tal-organizzazzjonijiet tal-partit (35). Barra minn hekk, “l-awtorità ta’ reġistrazzjoni u ta’ ġestjoni tal-Assoċjazzjoni hija l-Ministeru għall-Affarijiet Ċivili” (36) u l-kundizzjonijiet biex wieħed ikun eliġibbli bħala rappreżentant tas-CPCIF jinkludu li “jaderixxi mat-tmexxija tas-CCP, jappoġġa s-soċjaliżmu b’karatteristiċi Ċiniżi, jimplimenta b’konvinzjoni l-linja, il-prinċipji u l-politiki tal-Partit, u jħaddan kwalitajiet politiċi tajbin” (37).

(74)

Il-Grupp Yichang Xingfa huwa membru tas-CPCIF u huwa wieħed mill-viċi presidenti tagħha (38). Barra minn hekk, il-Grupp Yuntianhua huwa membru tas-CPCIF u huwa wieħed mid-diretturi eżekuttivi tagħha (39). Barra minn hekk, Yihua Chemical Industry Co. Ltd hija membru tas-CPCIF (40).

(75)

B’mod aktar speċifiku, l-investigazzjoni sabet li l-assoċjazzjoni nazzjonali tal-industrija li tirrappreżenta l-produtturi tal-aċidu fosforuż hija l-Assoċjazzjoni tal-Industrija tal-Fertilizzanti tal-Fosforu taċ-Ċina (“CPFIA, China Phosphorus Compound Fertilizer Industry Association”) (41). (“). Is-CPFIA taderixxi mat-tmexxija ġenerali tas-CCP, twettaq attivitajiet tal-Partit, u tipprovdi l-kundizzjonijiet meħtieġa għall-attivitajiet tal-organizzazzjonijiet tal-partit (42). Barra minn hekk, “l-awtorità ta’ reġistrazzjoni u ta’ ġestjoni tal-Assoċjazzjoni hija l-Ministeru għall-Affarijiet Ċivili” (43) u l-kundizzjonijiet biex wieħed ikun eliġibbli bħala rappreżentant tas-CPFIA jinkludu li “jaderixxi mat-tmexxija tas-CCP, jappoġġa s-soċjaliżmu b’karatteristiċi Ċiniżi, jimplimenta b’konvinzjoni l-linja, il-prinċipji u l-politiki tal-Partit, u jħaddan kwalitajiet politiċi tajbin” (44).

(76)

Hubei Xingfa Chemicals Group Ltd, Yuntianhua Group u Hubei Yihua Group Ltd. huma membri u diretturi eżekuttivi tas-CPFIA (45).

(77)

Kemm l-intrapriżi pubbliċi kif ukoll dawk privati fis-settur kimiku huma soġġetti għas-superviżjoni u għall-gwida tal-politiki. L-aħħar dokumenti tal-politiki Ċiniżi li jikkonċernaw is-settur kimiku u petrokimiku jikkonfermaw l-importanza kontinwa li l-GTĊ jattribwixxi lis-settur, inkluż l-intenzjoni li jintervjeni fis-settur biex isawru skont il-politiki tal-gvern. Eżempju ta’ dan jagħtih l-14-il FYP dwar l-Iżvilupp Ekonomiku u Soċjali u l-Prospetti tal-2035, li skont dawn il-GTĊ beħsiebu “jaċċellera t-trasformazzjoni u t-titjib ta’ industriji ewlenin bħal dawk tas-sustanzi kimiċi” (46).

(78)

Barra minn hekk, l-Opinjoni ta’ Gwida dwar il-Promozzjoni tal-Iżvilupp ta’ Kwalità Għolja tal-Industriji Petrokimiċi u Kimiċi matul l-14-il FYP (47) (“l-Opinjoni ta’ Gwida”) tistipula wkoll li l-GTĊ se “jaċċellera t-trasformazzjoni u t-titjib ta’ industriji tradizzjonali, jiżviluppa b’ħeġġa materjali kimiċi ġodda u sustanzi kimiċi fini, […] u jrawwem it-tranżizzjoni taċ-Ċina minn pajjiż petrokimiku u kimiku kbir għal potenza petrokimika u kimika b’saħħitha. […] Sal-2025, […] il-konċentrazzjoni tal-produzzjoni ta’ prodotti kimiċi bl-ingrossa se tkompli tittejjeb, u r-rata tal-użu tal-kapaċità se tilħaq aktar minn 80 %; is-sigurtà tal-provvista ta’ materjali kimiċi ġodda se tilħaq aktar minn 75 %” (48). Barra minn hekk, il-GTĊ għandu “jippromwovi l-aġġustament tal-istruttura industrijali: isaħħaħ il-miżuri speċifiċi u jirregola b’mod xjentifiku l-iskala tal-industrija [u] jikkontrolla strettament żidiet ġodda fil-kapaċità […] fl-industrija tal-fosforu isfar” (49).Il-fosforu isfar huwa input għall-produzzjoni tal-aċidu fosforuż.

(79)

Dan ir-rekwiżit għall-kontroll tas-settur tal-input tal-fosforu isfar huwa kkonfermat ukoll fl-14-il FYP dwar l-Iżvilupp tal-Industrija tal-Materja Prima (50) kif ukoll fl-14-il FYP dwar l-Iżvilupp tal-Industrija Ekoloġika (51).

(80)

Barra minn hekk, il-Katalogu ta’ Gwida tal-2024 għall-Aġġustament Strutturali tal-Industrija (52) jelenka t-“teknoloġija tal-produzzjoni tal-fosforu isfar permezz ta’ gagazza mberrda bl-ilma taħt pressjoni għolja f’sistema magħluqa kompletament” bħala “industrija mħeġġa”.

(81)

Barra minn hekk, il-Pjan ta’ Implimentazzjoni għall-Promozzjoni tal-Użu Effiċjenti u ta’ Valur Għoli tar-Riżorsi Fosforużi għandu l-għan li “jimplimenta l-kompiti ewlenin tal-pjanijiet nazzjonali rilevanti, iwettaq użu effiċjenti u ta’ valur għoli tar-riżorsi tal-fosforu, u jsaħħaħ il-vantaġġ kompetittiv tal-katina industrijali kollha” u jistipula li l-GTĊ “fuq il-bażi tal-ħtiġijiet strateġiċi nazzjonali rilevanti, jippromwovi l-integrazzjoni profonda tal-produzzjoni, l-apprendiment, ir-riċerka u l-applikazzjoni, l-enfasi fuq li jingħelbu t-teknoloġiji u t-tagħmir ewlenin li jirrestrinġu l-iżvilupp ta’ kwalità għolja tal-industrija kiminka tal-fosforu, jikkultiva b’ħeġġa l-produttività ta’ kwalità ġdida u jibni katina tal-provvista industrijali indipendenti u kontrollabbli” (53).

(82)

Eżempji simili tal-intenzjoni tal-awtoritajiet Ċiniżi li jissorveljaw u jiggwidaw l-iżviluppi tas-settur tal-aċidu fosforuż jistgħu jinstabu fil-livell provinċjali, bħal fl-14-il FYP ta’ Shandong dwar l-Iżvilupp tal-Industrija Kimika (54) li jfittex li “jippromwovi b’mod komprensiv it-titjib tal-pedamenti industrijali u l-modernizzazzjoni tal-katina industrijali, jaċċellera l-irtirar tal-kapaċità tal-produzzjoni li għadha lura u li hija ineffiċjenti, u jippromwovi l-iżvilupp ta’ prodotti kimiċi fid-direzzjoni tal-funzjonalizzazzjoni, tal-irfinar u tad-differenzjazzjoni. Jiggwida lill-intrapriżi lejn il-fużjoni u r-riorganizzazzjoni, jottimizza l-allokazzjoni tar-riżorsi u l-istruttura tal-katina industrijali, u jtejjeb l-effiċjenza tal-produzzjoni u l-profittabilità” (55).

(83)

B’mod aktar speċifiku, l-14-il FYP ta’ Hubei dwar l-Iżvilupp Ekonomiku u Soċjali u l-Perspettivi tal-2035 jirrikjedi li “jiġu ttrasformati u aġġornati industriji tradizzjonali bħall-industrija kimika tal-fosforu (56)”.

(84)

Barra minn hekk, l-14-il FYP ta’ Hubei dwar l-Iżvilupp ta’ Kwalità Għolja tal-Industrija tal-Manifattura jirrikjedi wkoll li “jiġu ttrasformati u aġġornati industriji tradizzjonali tal-kimika bħalma huma […] kimiċi mill-fosforu [u] issir konċentrazzjoni fuq l-iżvilupp ta’ kimiċi ta’ kwalità għolja (57)”.

(85)

Barra minn hekk, l-14-il FYP ta’ Hubei dwar l-Iżvilupp ta’ Kwalità Għolja tal-Industrija tal-Materjali Ġodda jikkonferma li l-GTĊ biħsiebu jiżviluppa l- “bażi ġdida tal-industrija tal-materjali ta’ Yichang [biex] jottimizza, jaġġorna u jimmodernizza l-katina tal-industrija tal-fosforu, b’enfasi fuq l-iżvilupp tas-settur tal-materjali l-ġodda tal-industrija kimika fina tal-fosforu (58).”

(86)

Eżempju ieħor tal-intenzjoni tal-awtoritajiet Ċiniżi li jissorveljaw u jiggwidaw l-iżviluppi tas-settur tal-aċidu fosforuż fil-livell provinċjali jista’ jinstab fl-14-il FYP ta’ Guizhou dwar l-Iżvilupp ta’ Raggruppamenti Strateġiċi u Emerġenti tal-Industrija jistipula li l-GTĊ se “jaċċellera l-iżvilupp tal-industrija kimika tal-fosfat fin; jippromwovi l-iżvilupp tal-industrija kimika u r-raffinar tal-fosfat, jiżviluppa u juża b’mod xjentifiku u razzjonali r-riżorsi tal-blat tal-fosfat, […] jiżviluppa b’mod vigoruż […] il-prodotti ta’ wara l-ipproċessar tal-fosforu isfar, [u] se jiffoka fuq l-iżvilupp ta’ sustanzi kimiċi speċjalizzati tal-fosforu bħall-fosforu isfar ta’ grad elettroniku, soluzzjonijiet ta’ inċiżjoni u retardanti tal-fjammi, u se jagħmel ħiltu biex jestendi l-katina tal-industrija tal-ipproċessar profond tal-fosforu isfar (59)”.

(87)

Fir-rigward tal-fatt li l-GTĊ kien f’pożizzjoni li jinterferixxi mal-prezzijiet u mal-kostijiet permezz tal-preżenza tal-Istat f’ditti fis-sens tal-Artikolu 2(6a)(b), it-tieni inċiż, tar-Regolament bażiku, il-Kummissjoni sabet li l-attivitajiet tal-bini tal-Partit fil-Grupp Yuntianhua kellhom l-għan li “juru l-mod ta’ ħsieb il-ġdid, il-miżuri l-ġodda u r-riżultati l-ġodda tal-bini ta’ Partit popolari integrati f’operazzjonijiet ta’ produzzjoni u ta’ negozju […] sabiex jiġu ttrasformati b’mod effettiv il-vantaġġi ewlenin tal-bini tal-Partit f’momentum b’saħħtu biex jiġi promoss l-iżvilupp ta’ kwalità għolja tal-Grupp” (60).

(88)

Barra minn hekk, il-president ta’ Yunnan Yuntianhua Co. Ltd. iservi bħala s-Segretarju tal-Kumitat tal-Partit, filwaqt li d-direttur eżekuttiv u l-viċi president tal-kumpanija jservi wkoll bħala l-Viċi Segretarju tal-Kumitat tal-Partit (61).

(89)

Il-President ta’ Hubei Xingfa Group Ltd. iservi wkoll bħala l-President tal-kumpanija omm, il-Grupp Yichang Xingfa, u bħala l-Viċi Segretarju tal-Kumitat tal-Partit tagħha. Barra minn hekk, wieħed mid-Diretturi ta’ Hubei Xingfa Group Ltd. iservi wkoll bħala l-Maniġer Ġenerali tal-kumpanija omm, il-Grupp Yichang Xingfa, u bħala l-viċi segretarju tagħha tal-Kumitat tal-Partit (62).

(90)

Il-president ta’ Hubei Yihua Chemical Industry Co. Ltd. iservi wkoll bħala s-segretarju tal-Kumitat tal-Partit u l-maniġer ġenerali tal-kumpanija jservi bħala l-viċi segretarju tal-Kumitat tal-Partit (63).

(91)

Ma kienx possibbli li tiġi stabbilita b’mod sistematiku l-eżistenza ta’ konnessjonijiet personali bejn il-produtturi Ċiniżi kollha tal-aċidu fosforuż u s-CCP. Madankollu, minħabba li l-prodott taħt investigazzjoni jirrappreżenta sottosettur tas-settur kimiku, il-Kummissjoni qieset li l-informazzjoni stabbilita fl-investigazzjonijiet reċenti dwar is-settur kimiku, kif indikat fil-premessa (65), hija rilevanti wkoll għall-prodott taħt investigazzjoni.

(92)

Barra minn hekk, fis-settur tal-aċidu fosforuż hemm fis-seħħ politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż, tar-Regolament bażiku. Il-Kummissjoni identifikat diversi dokumenti li juru li l-industrija tal-aċidu fosforuż tibbenefika mill-gwida u mill-intervent governattivi fis-settur kimiku, minħabba li l-aċodu fosforuż jirrappreżenta sottosettur tas-settur kimiku. Barra minn hekk, il-Kummissjoni sabet ukoll dokumenti li jindirizzaw speċifikament is-settur tal-fosforu.

(93)

L-industrija kimika hija meqjusa b’mod konsistenti bħala industrija ewlenija mill-GTĊ (64). Dan huwa kkonfermat fil-bosta pjanijiet, direttivi u dokumenti oħra ffokati fuq is-sustanzi kimiċi, li jinħarġu fil-livell nazzjonali, reġjonali u muniċipali. Skont l-14-il FYP, il-GTĊ indika l-industrija kimika għall-ottimizzazzjoni u t-titjib (65). Bl-istess mod, l-14-il FYP dwar l-Iżvilupp tal-Industrija tal-Materja Prima jistipula li l-GTĊ se “Jottimizza l-istruttura organizzazzjonali: Jagħmel l-intrapriżi ewlenin akbar u aktar b’saħħithom. […] Jappoġġa lill-intrapriżi biex jaċċelleraw il-fużjonijiet u r-riorganizzazzjonijiet transreġjonali u bi sjieda reċiproka, iżidu l-konċentrazzjoni industrijali u jwettqu operazzjonijiet internazzjonali. Fl-industrija kimika, petrokimika, tal-azzar, tal-metalli mhux ferrużi, tal-materjali tal-bini u industriji oħra, jikkultiva grupp ta’ intrapriżi ewlenin fil-katina industrijali b’dominanza ekoloġika u kompetittività ewlenija” (66).

(94)

B’mod aktar speċifiku, in-Nota ta’ Spjegazzjoni għall-Pjan ta’ Implimentazzjoni għall-Promozzjoni ta’ Użu Effiċjenti u ta’ Valur Għoli tar-Riżorsi Fosforiċi tiddikjara li “huwa urġenti li ssir enfasi fuq stadji u reġjuni differenti tal-katina tal-industrija u li jiġu implimentati politiki speċifiċi sabiex jiġu ottimizzati l-istruttura tal-prodott, l-istruttura tal-kumpanija u t-tqassim reginali” (67). In-nota ta’ Spjegazzjoni tispeċifika wkoll li l-GTĊ biħsiebu “jikkultiva raggruppamenti industrijali vantaġġużi, filwaqt li jħeġġeġ lill-provinċji ta’ Yunnan, Guizhou, Hubei u Sichuan jibnu raggruppamenti tal-manifattura avvanzati [u] jibnu sensiela ta’ intrapriżi ta’ kwalità għolja biex itejbu l-estrazzjoni tal-fosfat, iżidu l-konċentrazzjoni tal-produzzjoni kimika primarja tal-fosforu, jippromwovu l-iżvilupp ikkoordinat tal-industriji upstream u downstream, […] jikkultivaw kumpaniji kimiċi ewlenin tal-fosforu b’kontroll fuq ir-riżorsi u dominanza fuq il-katina tal-industrija, jaċċelleraw il-kultivazzjoni ta’ “ġganti żgħar” speċjalizzati u innovattivi u jimmanifatturaw promoturi uniċi, isaħħu r-raggruppamenti industrijali karatteristiċi tal-intrapriżi kimiċi u ta’ daqs medju tal-fosforu, u jippromwovu t-trasformazzjoni u t-titjib tal-katina tal-industrija” (68).

(95)

Fil-qosor, il-GTĊ għandu miżuri fis-seħħ biex iġiegħel lill-operaturi jikkonformaw mal-objettivi tal-politika pubblika li jappoġġaw lill-industriji mħeġġa, inkluża l-produzzjoni tal-prodott taħt investigazzjoni. Miżuri bħal dawn jimpedixxu lill-forzi tas-suq milli joperaw b’mod ħieles.

(96)

L-investigazzjoni attwali ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà fis-settur kimiku, skont l-Artikolu 2(6a)(b), ir-raba’ inċiż, tar-Regolament bażiku, ma jaffettwawx lill-manifatturi tal-prodott taħt investigazzjoni.

(97)

Barra minn hekk, il-prodott taħt investigazzjoni huwa affettwat ukoll mid-distorsjonijiet tal-kostijiet tal-pagi fis-sens tal-Artikolu 2(6a)(b), il-ħames inċiż, tar-Regolament bażiku, kif imsemmi hawn fuq fil-premessa (65). Dawk id-distorsjonijiet jaffettwaw lis-settur kemm direttament (meta jipproduċi l-prodott taħt investigazzjoni jew l-inputs prinċipali), kif ukoll indirettament (meta jkollu aċċess għal inputs minn kumpaniji soġġetti għall-istess sistema tal-manodopera fir-RPĊ) (69).

(98)

Barra minn hekk, ma ġiet ippreżentata l-ebda evidenza f’din l-investigazzjoni li turi li s-settur tal-aċidu fosforuż ma huwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż, tar-Regolament bażiku. L-Opinjoni ta’ Gwida msemmija hawn fuq li tirrikjedi li “jittejbu l-politiki ta’ appoġġ, tissaħħaħ il-koordinazzjoni bejn il-politiki fiskali, finanzjarji, reġjonali, ta’ investiment, ta’ importazzjoni u ta’ esportazzjoni […] mal-politiki tal-industrija biex tingħata setgħa sħiħa lill-pjattaforma ta’ kooperazzjoni nazzjonali bejn l-industrija u l-finanzi u biex titrawwem il-konnessjoni bejn l-intrapriżi u l-banek” (70) hija wkoll eżempju tajjeb ħafna ta’ dan it-tip ta’ intervent governattiv. Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(99)

Fl-aħħar nett, il-Kummissjoni tfakkar li sabiex il-prodott taħt investigazzjoni jiġi prodott, huma meħtieġa numru ta’ inputs. Meta l-produtturi tal-prodott taħt investigazzjoni jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/l-allokazzjoni tal-kapital. Minbarra dan, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(100)

B’konsegwenza ta’ dan, mhux biss il-prezzijiet tal-bejgħ domestiku tal-prodott taħt investigazzjoni ma humiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma affettwati wkoll minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fil-Partijiet I u II tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu ġie prodott fir-RPĊ permezz tal-kombinament ta’ firxa ta’ fatturi ta’ produzzjoni huwa espost għal distorsjonijiet sinifikanti. L-istess japplika għall-input tal-input u għall-bqija.

(101)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt investigazzjoni, inklużi l-kostijiet tal-materja prima, tal-art, tal-enerġija u tal-manodopera, ma humiex ir-riżultat tal-forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku, kif muri mill-impatt reali jew potenzjali ta’ wieħed jew aktar mill-elementi rilevanti elenkati fih.

(102)

Il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti fil-fajl tal-każ, inkluż ir-Rapport u l-evidenza addizzjonali pprovduta mill-ilmentatur, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(103)

F’dan l-istadju, il-Kummissjoni ma rċiviet l-ebda kumment dwar id-distorsjonijiet sinifikanti li jaffettwaw l-industrija tal-aċidu fosforuż minn kwalunkwe wieħed mill-produtturi esportaturi Ċiniżi.

(104)

Fid-dawl ta’ dan ta’ hawn fuq, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ. Konsegwentement, il-Kummissjoni pproċediet biex tibni l-valur normali esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew parametri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif deskritt fit-taqsima li ġejja.

(105)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(106)

Kif spjegat fil-premessi (59) u (60), il-Kummissjoni ħarġet Nota dwar is-sorsi għad-determinazzjoni tal-valur normali fit-2 ta’ Settembru 2025. In-Nota dwar is-sorsi ddeskriviet il-fatti u l-evidenza li huma l-bażi tal-kriterji rilevanti u informat lill-partijiet interessati bl-intenzjoni li tqis l-isem tal-pajjiż bħala pajjiż rappreżentattiv xieraq f’dan il-każ jekk tiġi kkonfermata l-eżistenza ta’ distorsjonijiet sinifikanti skont ir-Regolament bażiku, l-Artikolu 2(6a).

(107)

Fin-Nota dwar is-sorsi, il-Kummissjoni identifikat lill-Brażil, lill-Indoneżja, lill-Malażja u lis-Serbja bħala pajjiżi b’livell simili ta’ żvilupp ekonomiku bħar-RPĊ skont il-Bank Dinji, jiġifieri kollha huma kklassifikati mill-Bank Dinji bħala pajjiżi “b’introjtu medju superjuri” fuq bażi tal-introjtu nazzjonali gross fejn kien magħruf li jiġi mmanifatturat il-prodott taħt investigazzjoni jew prodott fl-istess kategorija ġenerali.

(108)

Fin-Nota dwar is-sorsi, il-Kummissjoni spjegat li abbażi tal-istatistiki dwar l-esportazzjoni, il-prodott taħt investigazzjoni kien jidher li jiġi prodott biss fil-Brażil. L-Indoneżja, il-Malażja u s-Serbja dehru li kienu jipproduċu aċidi oħra bbażati fuq il-fosforu.

(109)

Ma wasal l-ebda kumment f’dan ir-rigward.

(110)

Fin-Nota dwar is-sorsi, il-Kummissjoni analizzat id-disponibbiltà u l-kwalità tad-data li tista’ tintuża biex jiġi stabbilit il-kost mingħajr distorsjoni tal-materja prima, kif ukoll tad-data finanzjarja tal-produtturi tal-prodott taħt investigazzjoni jew ta’ prodott fl-istess kategorija ġenerali.

(111)

Il-Kummissjoni identifikat l-aktar materja prima importanti. Fid-dawl tan-nuqqas ta’ kooperazzjoni minn produtturi ġenwini tal-aċidu tal-fosforuż fir-RPĊ, il-Kummissjoni użat l-informazzjoni inkluża fl-ilment bħala l-fatti disponibbli.

(112)

Skont l-ilment, l-aktar materja prima importanti użata għall-produzzjoni tal-aċidu fosforuż kienet il-fosforu isfar li jammonta għal [55-60] % tal-kost totali tal-produzzjoni. Input importanti ieħor kien il-kloru li jammonta għal [8-11] %. Il-valur tal-aċidu idrokloriku ġġenerat bħala prodott sekondarju kien jirrappreżenta [17-20] % tal-kost tal-materja prima.

(113)

Mill-erba’ pajjiżi identifikati bħala pajjiżi rappreżentattivi potenzjali, il-Brażil biss kien jimporta l-fosforu isfar, il-kloru u l-aċidu idrokloriku fi kwantitajiet rappreżentattivi. Kwantitajiet negliġibbli ta’ fosforu isfar (anqas minn 0,5 %) importati lejn il-Brażil kienu joriġinaw mir-RPĊ.

(114)

Min-naħa l-oħra, u minbarra d-disponibbiltà limitata tal-importazzjonijiet tal-fosforu isfar, kwantitajiet sinifikanti ta’ ċerta materja prima importata fl-Indoneżja (kważi 32 % tal-fosforu isfar, 52 % tas-soda kawstika u aktar minn 30 % tal-aċidu idrokloriku) u fis-Serbja (kważi 100 % tal-fosforu isfar) kienu joriġinaw mir-RPĊ.

(115)

Il-Kummissjoni vvalutat ukoll l-eżistenza ta’ distorsjonijiet tas-suq permezz ta’ restrizzjonijiet fuq l-esportazzjoni u/jew fuq l-importazzjoni imposti fuq il-prodott taħt investigazzjoni, kif ukoll fuq il-materja prima ewlenija (72).

(116)

La l-materja prima ewlenija, u lanqas il-prodott taħt investigazzjoni ma kienu soġġetti għal xi restrizzjoni kummerċjali magħrufa li tagħmel il-prezzijiet domestiċi tal-inputs ewlenin fil-Brażil, u b’hekk il-prezzijiet tal-importazzjoni użati bħala indikatur, sors mhux xieraq ta’ kost mingħajr distorsjoni.

(117)

Fl-Indoneżja, il-materja prima ewlenija kollha, kif ukoll il-prodott taħt investigazzjoni, kienu soġġetti għal-liċenzjar tal-esportazzjoni u tal-importazzjoni. Ir-reġim tal-liċenzjar kien anqas strett fl-2021 għall-kumpaniji b’reputazzjoni tajba (73).

(118)

Il-Malażja kienet talbet liċenzji tal-importazzjoni fuq ċerti prodotti bbażati fuq in-nikotina, fuq sustanzi kimiċi u fuq għajnuniet għas-sostituzzjoni tat-tipjip, inkluż il-fosforu, mill-2016 (74).

(119)

L-importazzjonijiet u l-esportazzjonijiet tal-materja prima ewlenija u tal-prodott taħt investigazzjoni ma kinux soġġetti għal xi restrizzjoni kummerċjali magħrufa fis-Serbja.

(120)

L-importazzjonijiet tal-materja prima ewlenija u tal-prodott taħt investigazzjoni li joriġinaw mill-erba’ pajjiżi rappreżentattivi potenzjali ma kinux soġġetti għal miżuri anti-dumping, antisussidji jew ta’ salvagwardja introdotti minn pajjiżi terzi.

(121)

Għall-kuntrarju tal-indikazzjonijiet inizjali tal-aċidu fosforuż li qiegħed jiġi prodott fil-Brażil, la l-Kummissjoni u lanqas l-ilmentatur ma setgħu jidentifikaw produtturi tal-prodott taħt investigazzjoni b’informazzjoni finanzjarja faċilment disponibbli.

(122)

L-ilmentatur asserixxa li l-kumpaniji attivi fl-industrija agrokimika fejn l-aċidu fosforuż intuża bħala prekursur fil-manifattura tal-agrokimiċi jenħtieġ li jitqiesu bħala produtturi ta’ prodott fl-istess kategorija ġenerali. It-tnejn li huma, jiġifieri l-prodott taħt investigazzjoni u l-agrokimiċi, huma mmirati lejn klijenti simili.

(123)

Abbażi ta’ dan, il-Kummissjoni identifikat il-kodiċi 20.20 tan-NACE Rev.2 (75) – Manifattura ta’ pestiċidi u prodotti agrokimiċi oħra bħala kodiċi rilevanti għall-klassifikazzjoni tal-industrija. Barra minn hekk, meta jitqies li l-aċidu fosforu huwa sustanza kimika inorganika, il-Kummissjoni qieset il-kodiċi 20.13 tan-NACE Rev. 2 – Manifattura ta’ sustanzi kimiċi bażiċi inorganiċi oħra rilevanti wkoll.

(124)

Fir-rigward tal-Brażil, il-Kummissjoni identifikat rapporti finanzjarji faċilment disponibbli ta’ Nortox S.A. u Vittia S.A. Barra minn hekk, id-data finanzjarja ta’ tliet manifatturi Brażiljani oħra ta’ prodotti fl-istess kategorija ġenerali kienet faċilment disponibbli fil-bażi tad-data Orbis (76). Fir-rigward tad-data finanzjarja disponibbli fil-bażi tad-data Orbis, il-Kummissjoni sabet li l-kumpaniji rrapportaw ammonti mhux raġonevoli ta’ kost SG&A u/jew ta’ profitt. Għalhekk, il-Kummissjoni kkonkludiet li l-informazzjoni finanzjarja dwar Nortox S.A. u Vittia S.A. biss jenħtieġ li tintuża bħala sors ta’ kost SG&A u ta’ profitt mingħajr distorsjoni.

(125)

Barra minn hekk, fil-bażi tad-data Orbis, il-Kummissjoni identifikat data finanzjarja disponibbli faċilment għal produttur wieħed mill-Indoneżja, 11 mill-Malażja u wieħed mis-Serbja ta’ prodotti fl-istess kategorija ġenerali.

(126)

Fid-dawl tal-kunsiderazzjonijiet ta’ hawn fuq, b’mod partikolari l-eżistenza ta’ parametri referenzjarji faċilment disponibbli għall-aktar materja prima importanti użata fil-produzzjoni tal-aċidu fosforuż, il-Kummissjoni informat lill-partijiet interessati li kien beħsiebha tuża lill-Brażil bħala pajjiż rappreżentattiv xieraq, u l-informazzjoni finanzjarja ta’ Nortox S.A. u ta’ Vittia S.A., f’konformità mal-Artikolu 2(6a)(a), l-ewwel inċiż, tar-Regolament bażiku sabiex jinkisbu l-prezzijiet jew il-parametri referenzjarji mingħajr distorsjoni għall-kalkolu tal-valur normali.

(127)

Il-partijiet interessati ġew mistiedna jikkummentaw dwar l-adegwatezza tal-Brażil bħala pajjiż rappreżentattiv u ta’ Nortox S.A. u ta’ Vittia S.A. bħala produtturi ta’ prodotti fl-istess kategorija ġenerali fil-pajjiż rappreżentattiv.

(128)

Ma wasal l-ebda kumment dwar l-eżistenza ta’ data disponibbli faċilment fl-erba’ pajjiżi rappreżentattivi potenzjali.

(129)

Wara li ġie stabbilit li l-Brażil kien l-uniku pajjiż rappreżentattiv xieraq disponibbli, abbażi tal-elementi kollha msemmija hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-Artikolu 2(6a)(a), l-ewwel inċiż, tar-Regolament bażiku.

(130)

Il-Kummissjoni stabbiliet li kien hemm produzzjoni ta’ prodott fl-istess kategorija ġenerali f’erba’ pajjiżi f’livell ta’ żvilupp ekonomiku simili għar-RPĊ, jiġifieri l-Brażil, l-Indoneżja, il-Malażja u s-Serbja. Madankollu, l-informazzjoni dwar il-prezzijiet tal-importazzjoni tal-materja prima ewlenija użata fil-produzzjoni tal-aċidu fosforuż kienet disponibbli biss għall-Brażil. Instab li dawk l-importazzjonijiet kienu fi kwantitajiet rappreżentattivi u l-prezzijiet tagħhom ma kinux distorti minn importazzjonijiet sostanzjali mir-RPĊ jew mill-eżistenza ta’ restrizzjonijiet kummerċjali. L-informazzjoni finanzjarja għall-perjodu ta’ investigazzjoni li fiha d-data neċessarja kollha, bħall-kost tal-prodotti mibjugħa, l-ammonti raġonevoli għall-kost SG&A u l-profitt, id-dettalji ta’ diversi kategoriji ta’ dħul, l-informazzjoni dettaljata dwar il-kost tal-bejgħ, kienet disponibbli faċilment għal żewġ produtturi tal-prodotti mill-Brażil fl-istess kategorija ġenerali.

(131)

Għall-kuntrarju ta’ dan, l-informazzjoni disponibbli għall-Indoneżja, għall-Malażja u għas-Serbja kienet nieqsa f’ħafna aspetti. L-aktar importanti, ma kien hemm l-ebda importazzjoni jew importazzjonijiet baxxi ħafna tal-materja prima ewlenija. Barra minn hekk, l-importazzjonijiet ta’ dik il-materja prima kollha jew ftit minnha kienu soġġetti għal restrizzjonijiet fuq l-esportazzjoni u fuq l-importazzjoni fl-Indoneżja u fil-Malażja. Barra minn hekk, il-ftit importazzjonijiet tal-fosforu isfar lejn is-Serbja li joriġinaw kważi esklużivament mir-RPĊ. Fl-aħħar nett, id-data finanzjarja għall-kumpaniji li jimmanifatturaw prodotti fl-istess kategorija ġenerali fl-Indoneżja, fil-Malażja u fis-Serbja kienet disponibbli għall-perjodu ta’ investigazzjoni. Madankollu, uħud mill-kumpaniji ma kisbux ammonti raġonevoli ta’ kost SG&A u ta’ profitt.

(132)

Fid-dawl tal-analiżi ta’ hawn fuq, il-Brażil kien jissodisfa l-kriterji stipulati fl-Artikolu 2(6a)(a), l-ewwel inċiż, tar-Regolament bażiku sabiex jitqies bħala pajjiż rappreżentattiv xieraq.

(133)

Fin-Nota dwar is-sorsi, il-Kummissjoni elenkat il-fatturi ta’ produzzjoni bħall-materjali, l-enerġija u l-manodopera użati fil-produzzjoni tal-prodott taħt investigazzjoni u ddikjarat li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija kienet se tuża l-GTA (77) biex tistabbilixxi l-kost mingħajr distorsjoni tal-biċċa l-kbira tal-fatturi ta’ produzzjoni, b’mod partikolari l-materja prima. Barra minn hekk, il-Kummissjoni ddikjarat li kienet se tuża l-istatistiki tal-Brażil kif ukoll dawk internazzjonali biex tistabbilixxi l-kostijiet mingħajr distorsjoni tal-manodopera u tal-enerġija.

(134)

Il-Kummissjoni stiednet lill-partijiet interessati jikkummentaw u jipproponu informazzjoni pubblikament disponibbli dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-nota. Kif imsemmi fil-premessa (60), l-ilmentatur biss issottometta l-fehmiet tiegħu dwar il-valur mingħajr distorsjoni tal-prodott sekondarju.

(135)

Permezz tal-informazzjoni kollha sottomessa mill-partijiet interessati u l-fatti disponibbli fil-fajl tal-investigazzjoni, ġew identifikati l-fatturi ta’ produzzjoni li ġejjin u s-sorsi tagħhom sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni tal-prodott taħt investigazzjoni

(136)

Il-Kummissjoni inkludiet valur għall-kostijiet ġenerali tal-manifattura sabiex tkopri l-kostijiet mhux inklużi fil-fatturi ta’ produzzjoni msemmija aktar ’il fuq. Biex tistabbilixxi dan l-ammont, il-Kummissjoni użat ir-rapporti finanzjarji ta’ vitia S.A. li kien fihom l-informazzjoni meħtieġa. Il-metodoloġija hija spjegata kif xieraq fit-Taqsima 3.2.5.7.

(137)

Biex jiġi stabbilit il-prezz mingħajr distorsjoni tal-materja prima kif ikkonsenjata sal-fabbrika ta’ produttur fil-pajjiż rappreżentattiv, il-Kummissjoni użat bħala bażi l-prezz tal-importazzjoni fil-pajjiż rappreżentattiv kif irrapportat fil-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet ta’ unità tal-importazzjonijiet mill-pajjiżi terzi kollha bl-esklużjoni tar-RPĊ u l-pajjiżi li mhumiex membri tad-WTO, elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (78). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li fit-taqsima 3.2.1 din ikkonkludiet li ma kienx xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni. Wara li ġew esklużi l-importazzjonijiet mir-RPĊ fil-pajjiż rappreżentattiv, il-volum tal-importazzjonijiet minn pajjiżi terzi oħrajn baqa’ rappreżentattiv.

(138)

Fir-rigward tad-dazji fuq l-importazzjoni, il-Kummissjoni żiedet id-dazji fuq l-importazzjoni mal-prezz medju ponderat tal-importazzjoni ta’ kull materja prima abbażi tal-kodiċi tal-komodità tagħha u tal-pajjiż ta’ oriġini rispettiv. Sabiex tiddetermina r-rata tad-dazju fuq l-importazzjoni applikabbli, il-Kummissjoni qagħdet fuq l-informazzjoni miġbura mill-Market Access Map (79).

(139)

Meta wieħed iqis in-nuqqas ta’ kooperazzjoni mill-produtturi esportaturi Ċiniżi, il-Kummissjoni użat informazzjoni disponibbli għall-pubbliku biex tistma l-kost normalment imġarrab minn kumpanija fil-Brażil għat-trasport ta’ inputs bejn fornitur u l-bini tiegħu. Wara l-irregolaritajiet żvelati fl-għoti ta’ punteġġ lil ċerti pajjiżi (80) fir-rapport Doing Business, il-Bank Dinji ħareġ rapport ġdid fl-2024 bl-użu ta’ metodoloġiji mtejba. Madankollu, ir-rapport Business Ready (B-Ready”) (81) la kopra lill-Brażil fl-2024 u lanqas ma inkluda studju dwar il-kost domestiku tat-trasport tal-esportazzjonijiet u tal-importazzjonijiet. Għalhekk, il-Kummissjoni qagħdet fuq l-aktar rapport (82) Doing Business (83) reċenti u applikat aġġustament skont l-inflazzjoni (84).

(140)

Fir-rigward tal-aċidu idrokloriku, il-prodott sekondarju, il-Kummissjoni użat il-metodoloġija deskritta fil-premessi (137) u (138), ħlief li l-kost tat-trasport ma ġiex miżjud mal-prezz tal-importazzjoni. Il-Kummissjoni qieset li peress li l-prodott sekondarju kien prodott minn produttur nozzjonali Brażiljan tal-aċidu fosforu, jiġifieri ma kellux għalfejn jinġieb fil-bini tiegħu minn fornitur, il-valur tiegħu mingħajr distorsjoni kien rifless biżżejjed fil-prezz tal-ħatt l-art tal-prodott sekondarju.

(141)

Fil-kummenti tiegħu dwar in-Nota dwar is-sorsi, l-ilmentatur argumenta li l-aċidu idrokloriku ġie nnegozjat f’diversi gradi ta’ purità li influwenzaw il-prezz tiegħu. Skont l-ilmentatur, l-aċidu idrokloriku miksub bħala prodott sekondarju fil-manifattura tal-aċidu fosforu huwa ta’ grad industrijali baxx b’konċentrazzjoni ta’ madwar 30 %. L-ilmentatur implika li n-nomenklatura tariffarja tal-Brażil ma ppermettietx li ssir distinzjoni bejn id-diversi gradi ta’ purità tal-aċidu idrokloriku. Iddikjara wkoll li l-importazzjonijiet lejn il-Brażil kien fihom ukoll aċidu idrokloriku ta’ purità għolja bbażat fuq il-prezzijiet għoljin tal-importazzjoni ta’ unità. L-ilmentatur issuġġerixxa li jenħtieġ li l-Kummissjoni tikkunsidra biss dawk l-importazzjonijiet ta’ aċidu idrokloriku fejn il-prezz unitarju ma jaqbiżx it-USD 0,30/kg peress li dan il-livell tal-prezz kien jikkorrispondi għall-prezz tal-aċidu idrokloriku ta’ grad industrijali bbażat fuq l-għarfien tal-ilmentatur.

(142)

Il-Kummissjoni kkunsidrat li l-ilmentatur ma pprovda l-ebda evidenza biex jappoġġa d-dikjarazzjonijiet tiegħu dwar il-konċentrazzjoni tas-soltu tal-prodott sekondarju, l-aċidu idrokloriku, miksub fil-manifattura tal-aċidu fosforuż, il-purità tal-aċidu idrokloriku importat lejn il-Brażil jew il-prezz tipiku tal-aċidu idrokloriku ta’ grad industrijali. Barra minn hekk, ma kienx ċar jekk il-prezz tipiku ddikjarat tal-aċidu idrokloriku ta’ grad industrijali kienx prevalenti wkoll fis-suq Brażiljan peress li l-Brażil intgħażel bħala pajjiż rappreżentattiv xieraq. Fl-aħħar nett, il-Kummissjoni kkunsidrat li l-prezzijiet għoljin b’mod mhux tas-soltu ta’ ċerti importazzjonijiet setgħu kienu kkawżati mill-kwantitajiet baxxi ta’ importazzjoni minflok minn differenzi sinifikanti fil-purità tal-aċidu idrokloriku. Fid-dawl tal-kwantitajiet baxxi ta’ dawk l-importazzjonijiet bi prezz għoli, dawn kellhom biss impatt negliġibbli fuq il-prezz medju ponderat tal-importazzjonijiet. Konsegwentement, il-Kummissjoni ċaħdet id-dikjarazzjoni.

(143)

Għal numru ta’ fatturi ta’ produzzjoni, il-kostijiet reali mġarrba mill-ilmentatur kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni. Billi l-valur użat għal dawn ma kellu l-ebda impatt apprezzabbli fuq il-kalkoli tal-marġni tad-dumping, il-Kummissjoni ddeċidiet li tinkludi dawk il-kostijiet f’materjali konsumabbli kif spjegat fil-premessa (157).

(144)

L-Insitituto Brasileiro de Geografia e Estatística (“IBGE”) (85) jippubblika informazzjoni dettaljata dwar il-pagi f’setturi ekonomiċi differenti fil-Brażil. Il-Kummissjoni użat l-aħħar statistiki disponibbli, jiġifieri informazzjoni dwar in-numru ta’ impjegati, il-kost tas-salarju annwali totali u l-imposti soċjali, il-kost tal-kumpensi u tal-benefiċċji, li jkopru l-perjodu ta’ investigazzjoni, biex tiddetermina l-kost medju tal-manodopera fis-settur industrijali 20.12 – Il-manifattura ta’ sustanzi intermedji għall-fertilizzanti (86).

(145)

Barra minn hekk, il-Kummissjoni użat l-informazzjoni bħala medja dwar is-sigħat maħduma kull ġimgħa għal kull persuna impjegata fil-Brażil fl-2024 kif ippubblikata mill-ILOSTAT (87).

(146)

Il-prezz tal-elettriku għall-kumpaniji (utenti industrijali) fil-Brażil huwa ppubblikat mill-Ministeru għall-Minjieri u għall-Enerġija tal-Brażil (88) (Ministério de Minas e Energia).

(147)

Ir-rati ppubblikati fil-bullettin ta’ kull xahar kienu jinkludu l-“Imposto sobre Circulação de Mercadorias e Serviços” (“ICMS”), taxxa imposta mill-Istati Brażiljani fuq iċ-ċirkolazzjoni tal-merkanzija u fuq il-provvista ta’ servizzi tat-trasport u tal-komunikazzjoni interstatali u intermuniċipali. Din it-taxxa tista’ tintalab lura mill-utenti industrijali u, għalhekk, tnaqqset mill-parametru referenzjarju stabbilit. Billi l-ICMS inġabret bir-rata li tvarja minn 17 % sa 18 % skont l-Istat, matul il-perjodu ta’ investigazzjoni, il-Kummissjoni kkalkolat mill-ġdid il-parametri referenzjarji tal-elettriku, filwaqt li naqqset medja ta’ 17,5 % tal-ICMS.

(148)

Il-Kummissjoni dderivat il-kost mingħajr distorsjoni tal-fwar mill-kost mingħajr distorsjoni tal-gass naturali abbażi tal-prezz imħallas mill-utenti industrijali fil-perjodu ta’ investigazzjoni kif ippubblikat fil-bullettini ta’ kull xahar mill-Ministeru tal-Brażil għall-Minjieri u għall-Enerġija (89).

(149)

Il-prezz tal-gass naturali kien jinkludi t-taxxi (90). Madankollu, f’dan l-istadju ma kien hemm l-ebda evidenza li dawk it-taxxi kienu simili għal taxxa fuq il-bejgħ/VAT, li normalment tista’ tintalab lura mill-kumpanija u, għalhekk, ma saritx parti mill-kost tal-kumpanija.

(150)

Il-Kummissjoni kkalkolat il-prezz tal-fwar fil-Brażil billi użat il-metodoloġija ssuġġerita mill-U.S Department for Energy (91). Din il-metodoloġija tipprovdi kost għall-fwar ibbażat fuq l-input tas-sħana meħtieġ biex jiġi prodott. Il-Kummissjoni bbażat il-kalkolu tagħha fuq il-gass naturali bħala l-input tas-sħana kif issuġġerit ukoll fl-ilment. Bl-użu tal-informazzjoni inkluża fl-ilment, il-Kummissjoni ddeterminat il-kost mingħajr distorsjoni ta’ fwar bi pressjoni baxxa, li jikkorrispondi għal 150 psig fil-metodoloġija tal-kalkolu.

(151)

Il-Kummissjoni żiedet ukoll il-kost operazzjonali li jammonta għal madwar 10 % tal-kost totali tal-produzzjoni tal-fwar, u l-kost SG & A u l-profitt ta’ produttur u distributur Brażiljan tal-gass naturali, il-kumpanija Petrobras.

(152)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(153)

Biex tistabbilixxi valur mingħajr distorsjoni tal-MOH u minħabba n-nuqqas ta’ kooperazzjoni mill-produtturi esportaturi, il-Kummissjoni użat il-fatti disponibbli f’konformità mal-Artikolu 18 tar-Regolament bażiku. Il-Kummissjoni qagħdet fuq informazzjoni dwar l-MOH li tinsab fir-rapporti finanzjarji ta’ Vittia, S.A (92)., wieħed mill-manifatturi Brażiljani tal-prodotti fl-istess kategorija ġenerali.

(154)

Biex tistabbilixxi valur mingħajr distorsjoni tal-kost SG&A u tal-profitt, il-Kummissjoni użat l-informazzjoni finanzjarja ta’ żewġ manifatturi Brażiljani ta’ prodotti fl-istess kategorija ġenerali, Nortox S.A (93). u Vittia S.A. L-informazzjoni finanzjarja kienet faċilment disponibbli, awditjata, konsolidata, kienet tkopri l-perjodu ta’ investigazzjoni u wriet livelli raġonevoli ta’ kost SG&A u ta’ profitt.

(155)

Abbażi ta’ dak li ntqal hawn fuq, il-Kummissjoni ħadmet il-valur normali fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(156)

L-ewwel, il-Kummissjoni stabbiliet il-kostijiet mingħajr distorsjoni tal-manifattura. Fin-nuqqas ta’ kooperazzjoni mill-produtturi esportaturi, il-Kummissjoni bbażat fuq l-informazzjoni pprovduta mill-ilmentatur fl-ilment dwar l-użu ta’ kull fattur ta’ produzzjoni (il-materjali, l-enerġija u l-manodopera) għall-manifattura tal-aċidu fosforuż. Il-konsum unitarju ta’ kull fattur ta’ produzzjoni ġie mmultiplikat bil-kost mingħajr distorsjoni abbażi ta’ data mill-pajjiż rappreżentattiv, kif deskritt fit-taqsima 3.2.5. Abbażi ta’ dan, il-Kummissjoni ddeterminat kost dirett totali mingħajr distorsjoni.

(157)

Kif spjegat fit-taqsima 3.2.5.3, il-Kummissjoni ttrattat il-kost ta’ ċerti materjali u sorsi tal-enerġija negliġibbli bħala materjali konsumabbli. Il-Kummissjoni esprimiet il-kost tal-materjali konsumabbli mġarrab mill-ilmentatur bħala perċentwal tal-kost dirett totali tal-ilmentatur, jiġifieri l-kost tal-materjali, tal-enerġija u tal-manodopera. Dan il-perċentwal li jammonta għal [4-4,5 %] imbagħad ġie applikat flimkien mal-kost dirett totali mingħajr distorsjoni.

(158)

It-total tal-kost mingħajr distorsjoni tal-materja prima, tal-enerġija, tal-manodopera u tal-materjali konsumabbli jirrappreżenta l-kost mingħajr distorsjoni tal-manifattura.

(159)

Ladarba ġie stabbilit il-kost mingħajr distorsjoni tal-manifattura, il-Kummissjoni żiedet l-MOH, il-kost SG & A u l-profitt kif innotat fit-taqsima 3.2.5.7.

(160)

L-MOH ġew iddeterminati abbażi tar-rapporti finanzjarji ta’ Vittia S.A. Dawn kienu jammontaw għal 6,6 % tal-Kostijiet tal-Merkanzija Mibjugħa (“COGS, Costs of Goods Sold”). F’dan il-kalkolu, is-COGS jitqiesu bħala ekwivalenti għall-kost tal-produzzjoni, jiġifieri l-kost tal-manifattura flimkien mal-MOH. Għalhekk, il-kost tal-manifattura mingħajr distorsjoni żdied b’tali mod li l-MOH kien jirrappreżenta 6,6 % tal-kost tal-produzzjoni mingħajr distorsjoni li jirriżulta.

(161)

Billi żiedet l-MOH mingħajr distorsjoni mal-kost tal-manifattura mingħajr distorsjoni, il-Kummissjoni stabbiliet il-kost tal-produzzjoni mingħajr distorsjoni.

(162)

Il-kost SG & A u l-profitt ġew iddeterminati abbażi tar-rapporti finanzjarji ta’ Nortox S.A. u ta’ Vittia S.A. kif spjegat fit-taqsima 3.2.5.7. Il-kost SG & A u l-profitt kienu jammontaw għal 31,1 % u għal 19,2 % tas-COGS rispettivament. Il-perċentwali rispettivi tal-kost SG & A u l-profitt mingħajr distorsjoni ġew applikati flimkien mal-kost tal-produzzjoni mingħajr distorsjoni biex wieħed jasal għall-valur normali mingħajr distorsjoni qabel aġġustament għall-prodotti sekondarji.

(163)

Fl-aħħar nett, mill-valur normali mingħajr distorsjoni msemmi fil-premessa (162), il-Kummissjoni naqqset il-valur mingħajr distorsjoni tal-aċidu idrokloriku prodott sekondarju ddeterminat kif spjegat fil-premessa (140) biex jitqies il-porzjon tal-kost u tal-profitt li jenħtieġ li jiġi allokat għal prodott sekondarju miksub matul il-manifattura tal-aċidu fosforuż.

(164)

Abbażi ta’ dan, il-Kummissjoni ħadmet il-valur normali fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku. Il-valur normali maħdum kien ta’ 28 850,04 CNY/tunnellata.

(165)

Fin-nuqqas ta’ kooperazzjoni mill-produtturi esportaturi mir-RPĊ, il-prezz tal-esportazzjoni ġie ddeterminat abbażi tal-istatistiki dwar l-importazzjoni kif spjegat fil-premessa (182). Il-prezz tal-kost, assigurazzjoni u nol (CIF, Cost, Insurance and Freight) tal-importazzjoni fil-fruntiera tal-Unjoni rreġistrat fil-bażi tad-data Surveillance 3 (94) kien ta’ 13 558,63 CNY/tunnellata.

(166)

L-Artikolu 2(10) tar-Regolament bażiku jirrikjedi li l-Kummissjoni tagħmel tqabbil ġust bejn il-valur normali u l-prezz tal-esportazzjoni fl-istess livell ta’ kummerċ u li tikkunsidra d-differenzi fil-fatturi li jaffettwaw il-prezzijiet u l-komparabbiltà tal-prezzijiet. Fil-każ preżenti, il-Kummissjoni għażlet li tqabbel il-valur normali u l-prezz tal-esportazzjoni ddeterminat fuq livell tal-pajjiż kollu fil-livell ta’ kummerċ ta’ kif joħroġ mill-fabbrika. Kif spjegat aktar hawn taħt, meta xieraq, il-valur normali u l-prezz tal-esportazzjoni ġew aġġustati sabiex jitnaqqsu lura għal-livell ta’ kif joħorġu mill-fabbrika.

(167)

Kif spjegat fil-premessa (164), il-valur normali ġie stabbilit fil-livell ta’ kummerċ ta’ kif joħroġ mill-fabbrika bl-użu tal-kostijiet ta’ produzzjoni flimkien mal-ammonti għall-kost SG & A u għall-profitt, li tqiesu raġonevoli għal dak il-livell ta’ kummerċ. Għalhekk, ma kien hemm bżonn tal-ebda aġġustament biex il-valur normali jiġi lura nett għal-livell ta’ kif joħroġ mill-fabbrika.

(168)

Sabiex il-valur normali jitnaqqas lura għal-livell ta’ kummerċ ta’ kif joħroġ mill-fabbrika, saru aġġustamenti għat-trasport tal-merkanzija bil-baħar u għall-assigurazzjoni skont l-Artikolu 2(10)(e) tar-Regolament bażiku.

(169)

Il-prezz tal-esportazzjoni fil-livell ta’ kif joħroġ mill-fabbrika kien jammonta għal 12 195,27 CNY/tunnellata.

(170)

Kif innotat fil-premessa (33), il-Kummissjoni kkonkludiet li l-grad ta’ nuqqas ta’ kooperazzjoni f’din l-investigazzjoni x’aktarx li jaffettwa materjalment l-eżitu tal-investigazzjoni skont it-tifsira tal-Artikolu 17(4) tar-Regolament bażiku, u għalhekk kellha l-ħsieb li tistabbilixxi sejbiet ta’ dumping fil-livell tal-pajjiż kollu.

(171)

Il-marġni tad-dumping proviżorju, espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, huwa kif ġej:

(172)

Il-prodott simili kien manifatturat minn żewġ produtturi fl-Unjoni matul il-perjodu ta’ investigazzjoni. Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(173)

Peress li l-industrija tal-Unjoni tikkonsisti biss minn żewġ produtturi tal-Unjoni, iċ-ċifri għall-analiżi tad-dannu jingħataw f’firxiet għal raġunijiet ta’ kunfidenzjalità.

(174)

Il-produzzjoni totali tal-Unjoni matul il-perjodu ta’ investigazzjoni kienet bejn [8 400 sa 9 200] tunnellata. Il-Kummissjoni stabbiliet iċ-ċifra abbażi tat-tweġibiet għall-kwestjonarju taż-żewġ produtturi tal-Unjoni.

(175)

Sabiex tistabbilixxi jekk l-industrija tal-Unjoni ġarrbitx dannu u sabiex tiddetermina l-konsum u d-diversi indikaturi ekonomiċi relatati mas-sitwazzjoni tal-industrija tal-Unjoni, il-Kummissjoni eżaminat jekk l-użu sussegwenti tal-produzzjoni tal-industrija tal-Unjoni tal-prodott simili kellux jitqies fl-analiżi u, jekk iva, sa liema punt.

(176)

L-aċidu fosforuż jintuża bħala materjal intermedjarju fil-produzzjoni tal-fosfonati u ta’ sustanzi kimiċi ta’ speċjalità oħra, li għandhom firxa wiesgħa ta’ applikazzjonijiet f’diversi industriji (tat-trattament tal-ilma, tad-deterġenti u l-aġenti tat-tindif, tal-agrikoltura, taż-żejt u l-gass, tal-materjali tal-kostruzzjoni u tal-bini, tal-industrija tat-tessuti u tal-ġilda, tal-industrija tal-karta u tal-polpa, tal-farmaċewtiċi u l-kura personali, tal-industrija tal-ikel u tax-xorb).

(177)

Il-Kummissjoni sabet li l-produzzjoni totali tal-aċidu fosforuż ta’ wieħed miż-żewġ produtturi tal-Unjoni kienet destinata għal użu kaptiv. Il-prodott spiss kien sempliċiment ittrasferit (mingħajr fattura) u/jew ikkonsenjat bil-prezzijiet tat-trasferiment fl-istess grupp ta’ kumpaniji li jinsabu f’pajjiżi terzi, jiġifieri barra l-Unjoni. Id-distinzjoni bejn is-suq kaptiv u s-suq ħieles hija rilevanti għall-analiżi tad-dannu minħabba li l-prodotti maħsuba għal użu kaptiv mhumiex esposti għal kompetizzjoni diretta mill-importazzjonijiet. B’kuntrast ma’ dan, il-produzzjoni maħsuba għall-bejgħ fis-suq ħieles hija f’kompetizzjoni diretta mal-importazzjonijiet tal-prodott ikkonċernat.

(178)

Il-Kummissjoni eżaminat ċerti indikaturi ekonomiċi għall-analiżi makroekonomika kemm minn ICL kif ukoll minn Italmatch. Fid-dawl tan-nuqqas ta’ bejgħ fis-suq ħieles minn Italimatch, l-analiżi mikroekonomika (il-prezz tal-bejgħ, is-COP, il-fluss tal-flus u r-redditu tal-investimenti) kienet ibbażata biss fuq id-data ta’ ICL.

(179)

Il-Kummissjoni stabbiliet il-konsum tal-Unjoni abbażi ta’ (i) l-istatistiki dwar l-importazzjoni ta’ Surveillance 3 (ara t-taqsima 4.4.1) u (ii) l-volumi tal-bejgħ ivverifikati tal-industrija tal-Unjoni.

(180)

Il-konsum tal-Unjoni żviluppa kif ġej:

Tabella 2

Konsum tal-Unjoni (tunnellati)

(181)

Il-konsum tal-Unjoni laħaq il-quċċata tiegħu fl-2021 minħabba l-irkupru ekonomiku wara l-COVID. Sussegwentement, il-konsum naqas progressivament fl-2022 u fl-2023, u wara dan reġa’ rkupra bil-qawwa fil-perjodu ta’ investigazzjoni (madankollu, xorta 21 % taħt il-livell tal-2021). L-aktar tnaqqis sinifikanti seħħ bejn l-2022 u l-2023, bi tnaqqis ta’ bejn 3 000 u 3 300 tunnellata (-32 punt perċentwali).

(182)

Fil-Eurostat, l-importazzjonijiet ta’ aċidu fosforuż huma kklassifikati taħt kodiċi TARIC ġeneriku (2811 19 80 90), li jinkludi ħafna prodotti oħra. Għalhekk, fl-ilment l-ilmentatur uża rapport ta’ intelligence tas-suq. Madankollu, din id-data kienet protetta bid-drittijiet tal-awtur u ma kinitx disponibbli għall-pubbliku. Barra minn hekk, din kienet ibbażata fuq il-kwantitajiet ta’ esportazzjoni rrapportati miċ-Ċina aktar milli fuq il-kwantitajiet ta’ importazzjoni lejn l-UE u ma kienx hemm deskrizzjoni tal-merkanzija kkonċernata.

(183)

Il-Kummissjoni sabet li l-użu ta’ data statistika mill-bażi tad-data dwar l-importazzjonijiet Surveillance 3 ikun jippermetti kalkolu aktar akkurat tal-importazzjonijiet tal-prodott ikkonċernat. Din id-data ġeneralment tipprovdi deskrizzjoni ċara tal-oġġetti deskritti, li tippermetti lill-Kummissjoni tidentifika u tiżola biss it-tranżazzjonijiet tal-importazzjoni tal-aċidu fosforu. Għalkemm id-dettalji speċifiċi tal-prodott ma kinux disponibbli għat-tranżazzjonijiet kollha, speċjalment matul il-perjodi ta’ qabel il-perjodu ta’ investigazzjoni, il-Kummissjoni setgħet tapplika xi stimi raġonevoli biex tlesti l-istampa.

(184)

Il-Kummissjoni pprovdiet divulgazzjoni sħiħa tal-metodoloġija applikata biex jiġu stabbiliti l-importazzjonijiet tal-aċidu fosforu f’Nota għall-fajl (95).

(185)

Is-sehem mis-suq tal-importazzjonijiet ġie stabbilit billi tqabblu l-volumi tal-importazzjoni mal-konsum tas-suq ħieles tal-Unjoni kif iddeterminat fit-taqsima 4.2.

(186)

Abbażi tal-metodoloġija deskritta hawn fuq, kif stabbilit fin-Nota għall-Fajl imsemmija, l-importazzjonijiet fl-Unjoni mill-pajjiż ikkonċernat żviluppaw kif ġej:

Tabella 3

Kwantità ta’ importazzjoni u sehem mis-suq

(187)

It-Tabella 3 turi li matul il-perjodu kkunsidrat l-importazzjonijiet mir-RPĊ naqsu b’14 % f’termini assoluti. F’termini ta’ sehem mis-suq, l-importazzjonijiet mir-RPĊ żdiedu minn [52–58] % għal [57–63] % matul il-perjodu kkunsidrat, jew b’madwar ħames punti perċentwali.

(188)

Il-Kummissjoni stabbiliet il-prezzijiet tal-importazzjonijiet abbażi tad-data ta’ Surveillance 3, kif spjegat fit-taqsima 4.4.1 hawn fuq. It-twaqqigħ tal-prezz tal-importazzjonijiet ġie stabbilit abbażi tal-prezz medju tal-importazzjoni li jirriżulta mir-RPĊ, aġġustat għal-livell tal-UE sal-konsenja, u l-prezz medju tal-bejgħ tat-tipi kollha ta’ prodotti kristallini mibjugħa mill-ilmentatur.

(189)

Il-prezz medju ponderat tal-importazzjonijiet mill-pajjiż ikkonċernat lejn l-Unjoni żviluppa kif ġej:

Tabella 4

Prezzijiet tal-importazzjonijiet (EUR/tunnellata)

(190)

Il-prezz medju tal-importazzjonijiet lejn l-Unjoni mill-pajjiż ikkonċernat naqas bi 18 % b’mod ġenerali matul il-perjodu kkunsidrat.

(191)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(192)

It-tqabbil tal-prezz sar fuq l-istess livell tal-kummerċ, li ġie aġġustat kif xieraq meta neċessarju, u wara t-tnaqqis tat-tariffi tal-kummissjonijiet. Ir-riżultat tat-tqabbil kien espress bħala perċentwal tal-fatturat teoretiku tal-produttur tal-Unjoni matul il-perjodu ta’ investigazzjoni. Dan wera marġni medju ponderat tat-twaqqigħ tal-prezz ta’ bejn 23 % u 27 % permezz tal-importazzjonijiet mill-pajjiż ikkonċernat fis-suq tal-Unjoni. Instab twaqqigħ tal-prezz għall-aċidu fosforuż importat kollu li joriġina miċ-Ċina.

(193)

F’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet oġġett ta’ dumping fuq l-industrija tal-Unjoni kien jinkludi valutazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(194)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi tad-dannu makroekonomiċi u mikroekonomiċi abbażi tad-data inkluża fit-tweġibiet għall-kwestjonarju tal-produtturi tal-Unjoni. Id-data makroekonomika kienet relatata bis-sħiħ maż-żewġ produtturi tal-Unjoni, iżda nieqsa mill-bejgħ fis-suq ħieles minn Italmatch, għal ċerta data mikroekonomika, il-Kummissjoni kellha tibbaża biss fuq it-tweġiba għall-kwestjonarju tal-ilmentatur. Iż-żewġ settijiet ta’ data nstabu li jirrappreżentaw is-sitwazzjoni ekonomika tal-industrija tal-Unjoni.

(195)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(196)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(197)

L-analiżi tal-Kummissjoni tad-data statistika żvelat li, matul il-perjodu ta’ investigazzjoni, l-aċidu fosforuż kien importat biss f’forma solida/kristallizzata miċ-Ċina, filwaqt li l-industrija tal-Unjoni kienet tbigħ il-prodott taħt investigazzjoni kemm f’forma solida kif ukoll f’forma likwida. Biex tiġi żgurata l-komparabbiltà, il-Kummissjoni kkonvertiet il-volumi ta’ diversi indikaturi fil-forma solida, fejn meħtieġ.

(198)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 5

Produzzjoni, kapaċità tal-produzzjoni u użu tal-kapaċità

(199)

Ix-xejra tal-volum tal-produzzjoni wriet tnaqqis minn bejn 9 600 u 10 700 tunnellata fl-2021 għal bejn 5 300 u 5 900 tunnellata fl-2023 (– 45 %), segwita minn żieda għal bejn 8 000 u 8 900 tunnellata fl-2024. Il-kapaċità tal-produzzjoni baqgħet stabbli f’bejn 11 900 u 13 200 tunnellata matul il-perjodu kkunsidrat, filwaqt li x-xejra tal-użu tal-kapaċità tal-produzzjoni naqset minn bejn 75 % u 83 % fl-2021 għal bejn 42 % u 46 % fl-2023 u mbagħad żdiedet għal bejn 63 % u 69 % fl-2024.

(200)

Il-kwantità ta’ bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 6

Kwantità ta’ bejgħ u sehem mis-suq

(201)

Il-bejgħ mill-industrija tal-Unjoni fis-suq tal-Unjoni naqas minn bejn 4 500 u 5 100 tunnellata fl-2021 għal bejn 2 500 u 2 800 tunnellata fl-2023 (– 45 %) u mbagħad żdied għal bejn 3 100 u 3 600 tunnellata fl-2024. B’mod ġenerali, il-bejgħ tal-industrija tal-Unjoni fis-suq domestiku tagħha naqas b’31 % li huwa aktar b’saħħtu mit-tnaqqis fil-konsum (– 21 %).

(202)

Konsegwentement, is-sehem mis-suq tal-industrija tal-Unjoni niżel minn bejn 41 % u 45 % fl-2021 għal bejn 35 % u 39 % fil-perjodu ta’ investigazzjoni.

(203)

L-industrija tal-Unjoni ġarrbet tkabbir negattiv matul il-perjodu kkunsidrat, b’mod partikolari fl-2022 u fl-2023 meta mqabbla mal-2021. L-industrija tal-Unjoni wriet ħjiel ta’ reżiljenza fil-perjodu ta’ investigazzjoni, meta, bid-detriment ta’ tnaqqis fil-prezzijiet, kienet kapaċi żżid il-volumi tal-bejgħ meta mqabbla mas-snin preċedenti.

(204)

L-impjiegi u l-produttività żviluppaw kif ġej matul il-perjodu kkunsidrat:

Tabella 7

Impjiegi u produttività

(205)

Matul il-perjodu kkunsidrat, l-impjiegi fl-Unjoni baqgħu stabbli. Minkejja volumi tal-produzzjoni aktar baxxi matul il-perjodu kkunsidrat, l-industrija tal-Unjoni żammet il-persunal imħarreġ ferm u bi kwalifiki għoljin billi kienet qed tistenna sakemm is-sitwazzjoni tas-suq tinnormalizza, u l-volumi tal-produzzjoni ogħla jirritornaw.

(206)

Mill-premessa preċedenti u mill-premessa (204) jirriżulta li l-produttività naqset b’mod sinifikanti matul il-perjodu kkunsidrat, bħala riżultat tat-tnaqqis fil-volumi tal-produzzjoni.

(207)

Il-marġnijiet tad-dumping kollha kienu ogħla b’mod sinifikanti mil-livell de minimis. L-impatt tad-daqs tal-marġnijiet reali tad-dumping fuq l-industrija tal-Unjoni kien sostanzjali, b’kunsiderazzjoni tal-volum u l-prezzijiet tal-importazzjonijiet mill-pajjiż ikkonċernat.

(208)

Din hija l-ewwel investigazzjoni anti-dumping dwar il-prodott ikkonċernat. Għaldaqstant, ma kienx hemm data disponibbli biex jiġu vvalutati l-effetti ta’ dumping possibbli fil-passat.

(209)

Il-prezzijiet medji ponderati tal-bejgħ tal-unitajiet tal-ilmentatur lill-konsumaturi mhux relatati fl-Unjoni żviluppaw kif ġej matul il-perjodu kkunsidrat:

Tabella 8

Prezzijiet tal-bejgħ fl-Unjoni

(210)

Il-prezzijiet medji tal-bejgħ tal-ilmentatur fis-suq tal-Unjoni rduppjaw b’mod eċċezzjonali bejn l-2021 u l-2022 u mbagħad naqsu b’mod sinifikanti fis-sentejn ta’ wara, meta mqabbla mal-livell tal-prezzijiet tal-2022. Il-prezzijiet medji ogħla tal-bejgħ irriflettew parzjalment iż-żieda fil-kost tal-produzzjoni u sitwazzjoni partikolari tas-suq fl-2022 u fl-2023 meta ċ-Ċina esperjenzat sentejn problematiċi minħabba tfixkil fil-katina tal-provvista tal-materja prima domestika u żieda qawwija fil-kostijiet tat-trasport tal-merkanzija bil-baħar lejn l-Unjoni.

(211)

Il-kost ta’ unità tal-produzzjoni żdied b’67 % bejn l-2021 u l-2022, u mbagħad naqas bi 32 punt perċentwali fl-2023. Fil-perjodu ta’ investigazzjoni, il-kost ta’ unità tal-produzzjoni kien 30 % ogħla meta mqabbel mal-2021.

(212)

Il-kostijiet lavorattivi medji tal-industrija tal-Unjoni żviluppaw kif ġej matul il-perjodu kkunsidrat:

Tabella 9

Kostijiet lavorattivi medji għal kull impjegat

(213)

Il-kost lavorattiv medju għal kull impjegat żdied b’4 % bejn l-2021 u l-2022. Iż-żieda fis-salarju li seħħet fl-2022 kienet riżultat tal-bonusijiet dovuti mħallsa għal ċertu persunal pertinenti għall-prestazzjoni finanzjarja tas-sena. Fl-2023 u fil-perjodu ta’ investigazzjoni, il-kost lavorattiv medju għal kull impjegat naqas b’5 % meta mqabbel mal-2021 minħabba t-tnaqqis fil-bonusijiet u s-sostituzzjoni ta’ impjegati b’esperjenza b’kost lavorattiv għoli ma’ forza tax-xogħol ġdida.

(214)

Il-livelli tal-istokks tal-industrija tal-Unjoni żviluppaw kif ġej matul il-perjodu kkunsidrat:

Tabella 10

L-istokks

(215)

Il-livell tal-istokks tal-għeluq segwa x-xejra ’l isfel tal-produzzjoni fl-ewwel sentejn. Imbagħad żdied fl-2023 billi reġa’ lura għall-istess livell tal-2021 sakemm fl-aħħar naqas fil-perjodu ta’ investigazzjoni.

(216)

Bħala perċentwal tal-volumi tal-produzzjoni, il-livell tal-istokks naqas minn bejn 3 % sa 4 % fl-2021 għal bejn 1 % u 3 % fl-2022. Fl-2023, l-istokks eżawriti kellhom jiġu riforniti. Fil-perjodu ta’ investigazzjoni, l-istokks tal-għeluq espressi bħala perċentwal tal-produzzjoni rritornaw għall-istess livell tal-2021.

(217)

Matul il-perjodu kkunsidrat kollu, il-livelli tal-istokks tal-għeluq kienu negliġibbli. Filwaqt li dan jista’ jidher li jindika ġestjoni effiċjenti tal-inventarju, in-nuqqas ta’ ħażniet sinifikanti, fil-fatt, affettwa l-flessibbiltà operazzjonali tal-industrija tal-Unjoni. Huwa essenzjali li jinżamm inventarju adegwat biex jiġu ġestiti b’mod effettiv il-fluttwazzjonijiet fid-domanda.

(218)

Il-profittabilità, il-fluss tal-flus, l-investimenti u r-redditu fuq l-investimenti tal-ilmentatur żviluppaw kif ġej matul il-perjodu kkunsidrat:

Tabella 11

Profittabilità, fluss tal-flus, investimenti u redditu fuq l-investimenti

(219)

Il-Kummissjoni stabbiliet il-profittabilità tal-industrija tal-Unjoni billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal mill-fatturat ta’ dak il-bejgħ. L-industrija tal-Unjoni kienet qiegħda tagħmel telf fis-sena 2021, fl-2022 il-profittabilità żdiedet għal [29–33] %, naqset fl-2023 għal [13–16] % u fil-perjodu ta’ investigazzjoni l-ilmentatur għamel profitt żgħir ta’ [1–2] %.

(220)

Il-profittabilità matul il-perjodu ta’ sentejn bejn l-2022 u l-2023 kienet influwenzata miċ-ċirkostanzi ekonomiċi ġġenerati mit-tnaqqis fir-ritmu tad-domanda u minn tnaqqis temporanju fl-importazzjonijiet mir-RPĊ, ikkawżat mill-kostijiet għoljin tat-trasport tal-merkanzija bil-baħar biex il-prodott jitwassal fl-Unjoni. Fl-2022 u fl-2023, minkejja l-kriżi tal-enerġija li feġġet wara l-bidu tal-gwerra ta’ aggressjoni tar-Russja kontra l-Ukrajna fl-2022 u t-tfixkil fil-katina tal-provvista tal-materja prima fl-Ewropa (li affettwat ukoll il-produzzjoni Ċiniża – ara t-taqsima 5.2.1), l-industrija tal-Unjoni rnexxielha tgħaddi ż-żieda fil-kostijiet lill-utenti fl-Unjoni. Iż-żieda osservata fil-kostijiet tal-produzzjoni kienet eċċezzjonalment għolja EUR [1 200–1 400] għal kull tunnellata fl-2022 u EUR[300–500] għal kull tunnellata fl-2023.

(221)

Il-profittabilità tal-industrija tal-Unjoni matul il-perjodu ta’ investigazzjoni baqgħet ftit ogħla mill-punt ta’ ekwilibriju, konsegwenza tal-impatt taż-żieda qawwija fl-importazzjonijiet oġġett ta’ dumping. L-industrija tal-Unjoni tilfet il-kontroll fuq l-ipprezzar tal-prodott, ikkawżat mid-disponibbiltà tal-aċidu fosforuż mill-pajjiż ikkonċernat bi prezzijiet baxxi ħafna, li wassal għal sitwazzjoni ta’ soppressjoni tal-prezzijiet matul il-perjodu ta’ investigazzjoni.

(222)

Il-fluss tal-flus nett huwa l-abbiltà tal-produtturi tal-Unjoni li jiffinanzjaw l-attivitajiet tagħhom huma stess. Ix-xejra fil-fluss tal-flus nett segwiet ix-xejra tal-profittabilità, din żviluppat b’mod pożittiv matul il-perjodu kkunsidrat, li ppermetta lill-industrija tal-Unjoni tinvesti fiż-żamma u fis-sostituzzjoni neċessarji tal-makkinarju iżda prinċipalment fl-2022.

(223)

Matul il-perjodu kkunsidrat, il-fluss annwali ta’ investimenti fil-prodott taħt investigazzjoni li saru mill-industrija tal-Unjoni beda jiżdied prinċipalment fl-2022, wara ż-żieda fil-livelli ta’ profittabilità. L-investimenti laħqu madwar 300 000–500 000 EUR fit-tieni parti tal-perjodu kkunsidrat, b’investimenti relatati mal-manutenzjoni u mas-sostituzzjoni tal-makkinarju fl-impjant tal-produzzjoni.

(224)

Ir-redditu fuq l-investimenti huwa l-profitt f’persentaġġ tal-valur kontabilistiku nett tal-investimenti. Dan kien negattiv fl-2021, tjieb b’mod sinifikanti bejn l-2020 u l-2022 b’mod allinjat maż-żieda fil-profittabilità biex fl-aħħar naqas għal [9–11] % matul il-perjodu ta’ investigazzjoni.

(225)

L-industrija tal-Unjoni tilfet volumi sinifikanti ta’ bejgħ u [4–7] punti perċentwali tas-sehem mis-suq f’suq tal-Unjoni li kien qiegħed jiċkien. F’termini ta’ pprezzar, l-industrija tal-Unjoni kienet qiegħda tagħmel it-telf fl-2021 u kienet biss ftit profittabbli fil-perjodu ta’ investigazzjoni, iżda kienet profittabbli fl-2022 u fl-2023. Madankollu, il-profitti miksuba f’dawk is-sentejn kienu dovuti għal ċirkostanzi eċċezzjonali u fil-perjodu ta’ investigazzjoni, il-profittabilità tal-industrija tal-Unjoni kienet biss ftit ogħla mill-punt ta’ ekwilibriju.

(226)

Fuq il-bażi ta’ dak li ntqal aktar ’il fuq, il-Kummissjoni f’dan l-istadju kkonkludiet li l-industrija tal-Unjoni sofriet dannu materjali skont it-tifsira tal-Artikolu 3(5) tar-Regolament bażiku.

(227)

F’konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet li huma oġġett ta’ dumping mill-pajjiż ikkonċernat ikkawżawx dannu materjali lill-industrija tal-Unjoni. F’konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħra setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kwalunkwe dannu possibbli kkawżat minn fatturi għajr l-importazzjonijiet oġġett ta’ dumping mill-pajjiż ikkonċernat ma kienx attribwit għall-importazzjonijiet oġġett ta’ dumping. Dawn il-fatturi huma: l-effetti tal-importazzjonijiet oġġett ta’ dumping, l-effetti taż-żieda qawwija fil-prezzijiet tal-fosforu isfar, l-effetti tal-importazzjonijiet minn pajjiżi terzi oħra, il-prestazzjoni tal-esportazzjoni tal-industrija tal-Unjoni, iż-żieda fil-kost tal-produzzjoni u tnaqqis fil-konsum tal-Unjoni.

(228)

Matul il-perjodu kkunsidrat, l-industrija tal-Unjoni tilfet volumi sinifikanti ta’ bejgħ fis-suq tal-Unjoni, billi l-volumi ta’ bejgħ tal-Unjoni tiegħu naqsu b’31 %. Hekk kif il-konsum naqas b’21 %, is-sehem mis-suq tal-industrija tal-Unjoni naqas minn [41 %–45 %] għal [35 %–39 %]. Minħabba li l-konsum naqas b’21 %, is-sehem mis-suq tal-industrija tal-Unjoni naqas minn [40,5 %–45 %] għal [35,4 %– 39,3 %].

It-tnaqqis fis-sehem mis-suq tal-industrija tal-Unjoni jista’ jiġi attribwit bis-sħiħ għal żieda parallela fl-importazzjonijiet mill-pajjiż ikkonċernat, peress li ma kien hemm l-ebda sors sinifikattiv ieħor ta’ importazzjonijiet. Tabilħaqq, iċ-Ċina żiedet is-sehem mis-suq tagħha minn [52 %–58 %] għal [57 %–63 %]. Fl-istess ħin, il-prezzijiet tal-importazzjonijiet Ċiniżi waqqgħu l-prezzijiet tal-industrija tal-Unjoni b’aktar minn 25 % matul il-perjodu ta’ investigazzjoni. Dan irriżulta f’soppressjoni sinifikanti tal-prezzijiet fis-suq tal-Unjoni.

(229)

Minħabba l-volumi tal-bejgħ mitlufa, l-industrija tal-Unjoni esperjenzat ukoll tnaqqis sinifikanti fil-kwantitajiet tal-produzzjoni. Biex tibqa’ kompetittiva, l-industrija tal-Unjoni kienet imġiegħla tnaqqas il-prezzijiet tal-bejgħ tagħha (b’35 % fis-sena 2023 u bi 15 % fis-sena 2024), li affettwa b’mod negattiv il-profittabilità. Fil-perjodu ta’ investigazzjoni, il-profittabilità tagħha kienet biss ftit ogħla mill-punt ta’ ekwilibriju.

(230)

Għalhekk, ġie konkluż b’mod proviżorju li l-importazzjonijiet oġġett ta’ dumping ta’ aċidu fosforuż miċ-Ċina kkawżaw dannu materjali lill-industrija tal-Unjoni.

(231)

Il-fosforu isfar huwa l-materja prima ewlenija, u jammonta għal aktar minn 50 % tal-kost tal-produzzjoni tal-aċidu fosforuż. Din il-materja prima esperjenzat żieda qawwija straordinarja fil-prezzijiet matul il-perjodu kkunsidrat. Għalhekk, il-Kummissjoni vvalutat l-effett dannuż possibbli taż-żieda fil-prezz tal-fosforu isfar fuq is-sitwazzjoni ekonomika tal-industrija tal-Unjoni.

Tabella 12

Evoluzzjoni tal-prezz tal-fosforu isfar (USD/kg)

(232)

Il-Kummissjoni sabet li globalment, il-prezz tal-fosforu isfar żdied b’mod anormali fis-suq fil-bidu tal-perjodu kkunsidrat. Din iż-żieda fil-prezz kienet globali u għalhekk affettwat lill-produtturi Ċiniżi wkoll.

(233)

L-industrija tal-Unjoni rnexxielha tgħaddi ż-żieda fil-kost lill-klijenti tagħha fl-2022, meta l-importazzjonijiet Ċiniżi kienu f’livelli komparabbli mal-2021, u anke fl-2023, meta l-importazzjonijiet miċ-Ċina naqsu bi 38 % (ara t-tabella 3). Billi l-prezz tal-fosforu isfar naqas b’mod sinifikanti fil-perjodu ta’ investigazzjoni, filwaqt li s-sitwazzjoni ekonomika tal-industrija tal-Unjoni marret għall-agħar fl-istess perjodu, il-fluttwazzjonijiet fil-prezzijiet tal-fosforu isfar ma naqqsux ir-rabta ta’ kawżalità bejn l-importazzjonijiet oġġett ta’ dumping u d-dannu tal-industrija tal-Unjoni.

(234)

Il-kwantità ta’ importazzjonijiet minn pajjiżi terzi, matul il-perjodu kkunsidrat, kif ġej:

Tabella 13

Importazzjonijiet minn pajjiżi terzi

(235)

L-importazzjonijiet minn pajjiżi terzi kienu jammontaw għal [0,5 % –1,5 %] ta’ konsum fil-perjodu ta’ investigazzjoni u anqas minn 1 % għat-tliet snin l-oħra fil-perjodu kkunsidrat (u kienu jammontaw għal [106–119-il] tunnellata fil-perjodu ta’ investigazzjoni). B’tali livell baxx ta’ importazzjonijiet minn pajjiżi terzi, il-Kummissjoni kkonkludiet li l-importazzjonijiet mill-Indoneżja ma attenwawx ir-rabta kawżali bejn l-importazzjonijiet li huma l-oġġett ta’ dumping u d-dannu materjali li sofriet l-industrija tal-Unjoni.

(236)

Il-volum tal-esportazzjonijiet tal-industrija tal-Unjoni żviluppa kif ġej matul il-perjodu kkunsidrat:

Tabella 14

Il-prestazzjoni tal-esportazzjoni tal-industrija tal-Unjoni

(237)

Bħala medja, il-volumi tal-esportazzjonijiet kienu jammontaw għal 3 % tal-bejgħ ġenerali tal-aċidu fosforuż tal-industrija tal-Unjoni matul il-perjodu kkunsidrat. Barra minn hekk, it-tnaqqis fil-bejgħ għall-esportazzjoni kien ferm aktar evidenti mit-tnaqqis fil-bejgħ tal-Unjoni, anke f’termini relattivi. Barra minn hekk, il-prezzijiet tal-esportazzjonijiet tal-industrija tal-Unjoni nstabu konsistentement ogħla minn dawk fis-suq tal-Unjoni. Għalhekk il-Kummissjoni kkonkludiet b’mod proviżorju li l-prestazzjoni tal-esportazzjonijiet tal-industrija tal-Unjoni ma kkontribwietx għad-dannu mġarrab mill-industrija tal-Unjoni.

(238)

L-investigazzjoni wriet korrelazzjoni bejn iż-żieda fl-importazzjonijiet oġġett ta’ dumping mill-pajjiż ikkonċernat u d-dannu materjali mġarrab mill-industrija tal-Unjoni. Iż-żieda sinifikanti fil-volumi tal-importazzjonijiet u bi prezzijiet aktar baxxi eżerċitat pressjoni għolja fuq il-prezzijiet fis-suq tal-Unjoni u wasslet għal tnaqqis sinifikanti fil-volumi tal-produzzjoni u tal-bejgħ tal-industrija tal-Unjoni u fis-sehem mis-suq tas-suq domestiku tagħha.

(239)

Mill-2023, il-prezzijiet tal-importazzjonijiet medji Ċiniżi kienu anqas mill-prezzijiet tal-bejgħ medji tal-industrija tal-Unjoni. Fl-istess ħin, is-sehem mis-suq tal-importazzjonijiet Ċiniżi, li diġà kien ta’ [52 %–58 %] fil-bidu tal-perjodu kkunsidrat, kompla jiżdied bi 8 %. It-telf tal-volum tal-bejgħ u, konsegwentement, tal-volum tal-produzzjoni wassal għal żieda fil-kostijiet fissi li ssarrfet f’żidiet konsiderevoli fil-kostijiet ta’ unità tal-industrija tal-Unjoni. L-industrija tal-Unjoni allinjat il-prezzijiet tagħha mal-kost miżjud tal-produzzjoni, iżda dan wassal għal livell ta’ prezz li ma kienx kompetittiv mal-importazzjonijiet Ċiniżi oġġett ta’ dumping li kompla jiżdied b’mod sinifikanti f’termini assoluti u relattivi bi prezzijiet li kienu anqas mill-kost u mill-prezzijiet tal-bejgħ tal-industrija tal-Unjoni. Din is-sitwazzjoni ħolqot soppressjoni sinifikanti tal-prezzijiet fis-suq tal-Unjoni, li wasslet għal tnaqqis fil-bejgħ, fis-sehem mis-suq u fil-profittabilità.

(240)

Għalhekk, il-Kummissjoni stabbiliet rabta ta’ kawżalità bejn l-importazzjonijiet oġġett ta’ dumping miċ-Ċina u d-dannu mġarrab mill-industrija tal-Unjoni.

(241)

Il-Kummissjoni ddistingwiet u sseparat l-effetti tal-fatturi kollha magħrufin fuq is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta’ dumping. Madankollu, l-effett ta’ dawn il-fatturi fuq l-iżviluppi negattivi tal-industrija tal-Unjoni ma kienx sinifikanti.

(242)

Abbażi ta’ dan ta’ hawn fuq, il-Kummissjoni kkonkludiet f’dan l-istadju li l-importazzjonijiet oġġett ta’ dumping mill-pajjiż ikkonċernat ikkawżaw dannu materjali lill-industrija tal-Unjoni u li l-fatturi l-oħra, meqjusa b’mod individwali jew b’mod kollettiv, ma naqqsux ir-rabta ta’ kawżalità bejn l-importazzjonijiet oġġett ta’ dumping u d-dannu materjali.

(243)

F’dan il-każ, l-ilmentaturi sostnew l-eżistenza ta’ distorsjonijiet fil-materja prima skont it-tifsira tal-Artikolu 7(2a) tar-Regolament bażiku. Għalhekk, sabiex titwettaq il-valutazzjoni fuq il-livell xieraq ta’ miżuri, il-Kummissjoni l-ewwel stabbiliet l-ammont ta’ dazju neċessarju biex jiġi eliminat id-dannu mġarrab mill-industrija tal-Unjoni fin-nuqqas ta’ distorsjonijiet skont l-Artikolu 7(2a) tar-Regolament bażiku. Imbagħad eżaminat jekk il-marġni tad-dumping ikkalkolat fuq livell tal-pajjiż kollu (ara t-Taqsima 3.5 hawn fuq) ikunx ogħla mill-marġni tad-dannu tagħhom, ara l-premessi minn (244) sa (250) hawn taħt.

(244)

Id-dannu jitneħħa jekk l-industrija tal-Unjoni setgħet tikseb profitt fil-mira billi tbigħ bi prezz fil-mira fis-sens tal-Artikolu 7(2c) u 7(2d) tar-Regolament bażiku.

(245)

F’konformità mal-Artikolu 7(2c) tar-Regolament bażiku, sabiex tistabbilixxi l-profitt fil-mira, il-Kummissjoni qieset il-fatturi li ġejjin: il-livell ta’ profittabilità qabel iż-żieda fl-importazzjonijiet mill-pajjiż taħt investigazzjoni, il-livell ta’ profittabilità meħtieġ sabiex ikopri l-kostijiet u l-investimenti kollha, ir-riċerka u l-iżvilupp (R & Ż) u l-innovazzjoni, u l-livell ta’ profittabilità li wieħed għandu jistenna f’kundizzjonijiet ta’ kompetizzjoni normali. Jenħtieġ li tali marġni ta’ profitt ma jkunx anqas minn 6 %.

(246)

Bħala l-ewwel pass, il-Kummissjoni stabbiliet profitt bażiku li jkopri l-kostijiet kollha f’kundizzjonijiet normali ta’ kompetizzjoni abbażi tal-profittabilità miksuba qabel iż-żieda fl-importazzjonijiet mill-pajjiż taħt investigazzjoni, jiġifieri fis-snin mill-2017 sal-2019. Dan il-marġni ta’ profitt ġie stabbilit għal 9,96 %.

(247)

Abbażi ta’ dan, il-prezz mhux dannuż huwa ta’ EUR [2 400–2 800] għal kull tunnellata, li jirriżulta mill-applikazzjoni tal-marġni ta’ profitt imsemmi hawn fuq ta’ 10 % għall-kost tal-produzzjoni matul il-perjodu ta’ investigazzjoni tal-ilmentatur.

(248)

F’konformità mal-Artikolu 7(2d) tar-Regolament bażiku, bħala pass finali, il-Kummissjoni vvalutat il-kostijiet futuri li jirriżultaw mill-Ftehimiet Ambjentali Multilaterali, u l-protokolli tagħhom, li l-Unjoni hija parti minnhom, u tal-Konvenzjonijiet tal-ILO elenkati fl-Anness Ia li l-industrija tal-Unjoni se ġġarrab matul il-perjodu ta’ applikazzjoni tal-miżura skont l-Artikolu 11(2). Madankollu, l-industrija tal-Unjoni ma rrapportat l-ebda kost futur bħal dan.

(249)

Abbażi ta’ dan, il-Kummissjoni kkalkolat prezz mhux dannuż ta’ EUR [2 400–2 800] għal kull tunnellata għall-prodott simili tal-industrija tal-Unjoni billi applikat il-marġni ta’ profitt fil-mira msemmi hawn fuq (ara l-premessa (246)) għall-kost tal-produzzjoni tal-ilmentatur matul il-perjodu ta’ investigazzjoni.

(250)

Imbagħad il-Kummissjoni ddeterminat il-livell ta’ marġni tad-dannu abbażi ta’ tqabbil tal-prezz medju ponderat tal-importazzjoni għall-pajjiż ikkonċernat, kif stabbilit għall-kalkoli tat-twaqqigħ tal-prezz, mal-prezz medju ponderat mhux dannuż tal-prodott simili mibjugħ mill-ilmentatur fis-suq tal-Unjoni matul il-perjodu ta’ investigazzjoni. Kwalunkwe differenza li tirriżulta minn dan it-tqabbil ġiet espressa bħala persentaġġ tal-valur CIF medju ponderat tal-importazzjoni.

(251)

Kif spjegat fin-Notifika tal-Bidu, l-ilmentatur ipprovda biżżejjed evidenza lill-Kummissjoni li fil-pajjiż ikkonċernat hemm distorsjonijiet fil-materja prima rigward il-prodott taħt investigazzjoni. Għaldaqstant, f’konformità mal-Artikolu 7(2a) tar-Regolament bażiku, din l-investigazzjoni eżaminat id-distorsjonijiet allegati biex tivvaluta, jekk rilevanti, jekk dazju inferjuri għall-marġni tad-dumping ikunx biżżejjed biex jelimina d-dannu.

(252)

Skont l-evidenza fl-ilment, il-fosforu isfar, li jammonta għal [55 - 60 %] tal-kost tal-produzzjoni tal-prodott ikkonċernat, huwa soġġett għal taxxa ta’ 20 % fir-RPĊ.

(253)

Għalhekk, kif imħabbar fin-Notifika tal-Bidu, f’konformità mal-Artikolu 7(2a) tar-Regolament bażiku, il-Kummissjoni eżaminat l-allegata distorsjoni u kwalunkwe distorsjoni oħra koperta mill-Artikolu 7(2a) tar-Regolament bażiku fir-RPĊ, kif ukoll l-impatt ta’ tali distorsjoni(jiet) fuq il-produzzjoni tal-aċidu fosforuż fir-RPĊ. Meta wieħed iqis in-nuqqas ta’ kooperazzjoni mill-GTĊ u mill-produtturi esportaturi fir-RPĊ, il-Kummissjoni bbażat is-sejbiet tagħha fuq il-fatti disponibbli skont l-Artikolu 18 tar-Regolament bażiku, b’mod partikolari l-informazzjoni disponibbli għall-pubbliku dwar id-dokumenti regolatorji rilevanti li jimponu restrizzjonijiet li jammontaw għal distorsjonijiet tal-materja prima koperti mill-Artikolu 7(2a) tar-Regolament bażiku u l-informazzjoni li tinsab fl-ilment.

(254)

Il-Kummissjoni l-ewwel identifikat il-materja prima prinċipali użata fil-produzzjoni tal-prodott ikkonċernat. Bħala materja prima prinċipali hija kkunsidrata dik il-materja prima li hija probabbli li tirrappreżenta mill-anqas 17 % tal-kost tal-produzzjoni tal-prodott ikkonċernat. Il-Kummissjoni stabbiliet li l-fosforu isfar biss issodisfa dik il-kundizzjoni.

(255)

Imbagħad il-Kummissjoni eżaminat jekk il-prezz Ċiniż tal-fosforu isfar kienx distort minn waħda mill-miżuri elenkati fl-Artikolu 7(2a) tar-Regolament bażiku: skemi ta’ pprezzar doppju, dazji fuq l-esportazzjoni, soprataxxa fuq l-esportazzjoni, kwoti fuq l-esportazzjoni, projbizzjoni tal-esportazzjoni, taxxa fiskali fuq l-esportazzjonijiet, rekwiżiti ta’ liċenzjar, prezz minimu tal-esportazzjoni, taxxa fuq il-valur miżjud (“VAT”), tnaqqis jew irtirar tar-rifużjoni, restrizzjoni fuq il-punt tal-iżdoganar tal-merkanzija għall-esportaturi, lista ta’ esportaturi kwalifikati, obbligu tas-suq domestiku, estrazzjoni ristretta.

(256)

L-ilmentatur irrefera għall-Avviż tal-Kummissjoni tat-Tariffi Doganali tal-Kunsill tal-Istat dwar l-Aġġustament tat-Tariffi tal-Esportazzjoni fuq Ċerti Prodotti [2009] Nru 6 (96), li ddikjara li “tariffa tal-esportazzjoni ta’ 20 % se tkompli tiġi imposta fuq il-fosforu isfar”. Il-Kummissjoni kkonfermat li l-miżura kienet għadha fis-seħħ matul il-perjodu ta’ investigazzjoni (97).

(257)

Il-Kummissjoni stabbiliet li l-prezz domestiku Ċiniż tal-fosforu isfar kien distort minn miżura elenkati fl-Artikolu 7(2a) tar-Regolament bażiku, speċifikament taxxa fuq l-esportazzjoni.

(258)

Imbagħad, il-Kummissjoni qabblet il-prezz Ċiniż tal-fosforu isfar mal-prezzijiet fis-suq/swieq internazzjonali rappreżentattiv(i). L-ilment irrefera għall-indiċi tal-prezzijiet disponibbli għall-pubbliku ppubblikat mill-fornitur tal-intelligence tas-suq Business AnalytIQ. Dan is-sors ipprovda prezzijiet tal-fosforu isfar fiċ-Ċina, fl-Istati Uniti, fl-Ewropa u fix-Xlokk tal-Asja għall-perjodu ta’ investigazzjoni fuq bażi ta’ kull xahar. Barra minn hekk, il-Kummissjoni użat il-valur mingħajr distorsjoni tal-fosforu isfar stabbilit fil-pajjiż rappreżentattiv, il-Brażil. Il-Kummissjoni sabet li l-prezzijiet f’dawk is-swieq internazzjonali kienu bejn 22 % (l-Ewropa) u 67 % (il-Brażil) ogħla milli fir-RPĊ.

(259)

Fl-aħħar nett, il-Kummissjoni eżaminat jekk il-fosforu isfar affettwat mit-taxxa fuq l-esportazzjoni deskritta fil-premessa (256) irrappreżentatx mill-anqas 17 % tal-kost tal-produzzjoni tal-prodott ikkonċernat. Meta wieħed iqis in-nuqqas ta’ kooperazzjoni mill-produtturi esportaturi fir-RPĊ, il-Kummissjoni bbażat fuq il-kost tal-produzzjoni tal-ilmentatur. Għall-fini ta’ dan il-kalkolu, intuża prezz mingħajr distorsjoni tal-materja prima kif stabbilit fis-swieq internazzjonali msemmija fil-premessa (258). Il-Kummissjoni stabbiliet li l-fosforu isfar kien jammonta għal aktar minn 50 % tal-kost reali tal-produzzjoni tal-ilmentatur.

(260)

Għalhekk, il-Kummissjoni kkonkludiet li l-fosforu isfar kien soġġett għal distorsjoni skont it-tifsira tal-Artikolu 7(2a) tar-Regolament bażiku.

(261)

F’konformità mal-Artikolu 7(2b) tar-Regolament bażiku, il-Kummissjoni eżaminat jekk setgħetx tikkonkludi b’mod ċar li kien fl-interess tal-Unjoni li tiddetermina l-ammont ta’ dazji proviżorji f’konformità mal-Artikolu 7(2a) tar-Regolament bażiku. Id-determinazzjoni tal-interess tal-Unjoni kienet ibbażata fuq apprezzament tal-informazzjoni pertinenti kollha għal din l-investigazzjoni, inklużi l-kapaċitajiet ta’ riżerva fil-pajjiż esportatur, il-kompetizzjoni għall-materja prima u l-effett fuq il-ktajjen ta’ provvista għall-kumpaniji tal-Unjoni.

(262)

Il-Kummissjoni stabbiliet li l-produtturi Ċiniżi tal-aċidu fosforuż għandhom kapaċitajiet ta’ produzzjoni żejda eċċezzjonalment kbar, li joħolqu riskju serju ta’ esportazzjonijiet kontinwi lejn is-suq tal-Unjoni anke wara l-impożizzjoni possibbli ta’ miżuri. Skont l-evidenza fl-ilment, instabet li l-kapaċità installata totali fir-RPĊ kienet aktar minn erbgħin darba akbar mid-daqs tal-konsum tal-Unjoni. Madwar 23 % ta’ din il-kapaċità baqgħet ma tintużax matul il-perjodu ta’ investigazzjoni u għalhekk tista’ tiġi diretta mill-ġdid faċilment għall-esportazzjonijiet lejn l-Unjoni.

(263)

Il-Kummissjoni analizzat il-kundizzjonijiet tas-suq għall-materja prima ewlenija użata fil-produzzjoni tal-aċidu fosforuż. Il-fosforu isfar, il-materjal ta’ input ewlieni fil-produzzjoni tal-aċidu fosforuż, huwa soġġett fiċ-Ċina għal dazju fuq l-esportazzjoni ta’ 20 %. Din il-miżura tirrestrinġi l-provvista internazzjonali u żżomm il-prezzijiet domestiċi Ċiniżi baxxi b’mod artifiċjali, u tagħti vantaġġ fil-kost lill-produtturi Ċiniżi. Il-fosforu isfar jirrappreżenta [55 - 60 %] tal-kost tal-produzzjoni tal-aċidu fosforuż. Din id-diskrepanza sinifikanti fil-kost tfixkel il-kompetizzjoni u tpoġġi lill-produtturi tal-Unjoni fi żvantaġġ strutturali.

(264)

Il-Kummissjoni analizzat l-impatt potenzjali tal-impożizzjoni ta’ miżuri fuq il-ktajjen tal-provvista tal-Unjoni, inklużi l-effetti fuq is-suq downstream u d-disponibbiltà tal-prodott ikkonċernat fl-Unjoni. Din il-valutazzjoni kienet ibbażata fuq l-informazzjoni pprovduta mill-partijiet interessati li kkooperaw. Utent wieħed biss issottometta tweġiba kompluta għall-kwestjonarju, u għalhekk il-Kummissjoni qagħdet primarjament fuq id-data pprovduta minn dak l-utent. L-analiżi wriet li l-impożizzjoni ta’ miżuri ma jkollhiex impatt avvers materjali fuq il-profittabilità ta’ dak l-utent, li tibqa’ f’livell sostenibbli, li jippermettilu jkompli l-operazzjonijiet tiegħu mingħajr tfixkil sinifikanti. Barra minn hekk, il-Kummissjoni stabbiliet li l-industrija tal-Unjoni żżomm biżżejjed kapaċità mhux użata biex iżżid il-produzzjoni u b’hekk tissodisfa sehem akbar mid-domanda tal-Unjoni.

(265)

Wara li vvalutat l-informazzjoni pertinenti kollha għal din l-investigazzjoni, il-Kummissjoni kkonkludiet li huwa fl-interess tal-Unjoni li tistabbilixxi l-ammont ta’ dazji proviżorji f’konformità mal-Artikolu 7(2a) tar-Regolament bażiku.

(266)

Wara l-valutazzjoni ta’ hawn fuq, id-dazji anti-dumping proviżorji jenħtieġ li jiġu stabbiliti, f’konformità mal-Artikolu 7(2a) tar-Regolament bażiku, fil-livell li ġej:

(267)

Wara li ddeċidiet li tapplika l-Artikolu 7(2a) tar-Regolament bażiku, il-Kummissjoni eżaminat ukoll jekk setgħetx tikkonkludi b’mod ċar li ma kienx fl-interess tal-Unjoni li tadotta miżuri f’dan il-każ, minkejja d-determinazzjoni ta’ dumping dannuż, f’konformità mal-Artikolu 21 tar-Regolament bażiku. Id-determinazzjoni tal-interess tal-Unjoni kienet ibbażata fuq evalwazzjoni tal-interessi varji kollha involuti, inklużi dawk tal-industrija, tal-importaturi u tal-utenti tal-Unjoni.

(268)

Il-produttur tal-Unjoni li ppreżenta l-ilment, li jirrappreżenta l-produzzjoni kollha tal-Unjoni disponibbli fis-suq ħieles, ikkoopera bis-sħiħ fl-investigazzjoni u esprima l-interess tiegħu fl-impożizzjoni ta’ miżuri. Anki l-produttur l-ieħor tal-Unjoni, Italimatch, ikkoopera bis-sħiħ billi pprovda tweġibiet dedikati għall-kwestjonarju.

(269)

L-impożizzjoni ta’ dazji hija mistennija tirrestawra kundizzjonijiet ta’ kummerċ ġust fis-suq tal-Unjoni u tippermetti lill-industrija tal-Unjoni tirkupra mid-dannu materjali mġarrab matul il-perjodu ta’ investigazzjoni. B’mod partikolari, il-miżuri jippermettu lill-produttur tal-Unjoni jerġa’ jikseb il-volumi tal-bejgħ u s-sehem mis-suq mitlufa, itejjeb il-profittabilità u jiżgura l-operat sostenibbli tal-faċilitajiet tal-produzzjoni. Għalhekk, l-impożizzjoni ta’ miżuri x’aktarx li jkollha impatt pożittiv fuq il-vijabbiltà u fuq il-kompetittività fit-tul tal-industrija tal-Unjoni.

(270)

Fin-nuqqas ta’ miżuri, il-produtturi esportaturi Ċiniżi jkomplu jesportaw il-prodott ikkonċernat lejn l-Unjoni bi prezzijiet oġġett ta’ dumping, u b’hekk ikomplu jagħfsu l-prezzijiet fis-suq tal-Unjoni u jkissru l-profittabilità tal-industrija tal-Unjoni. Dan idgħajjef l-kapaċità tagħha li tinvesti, tinnova u żżomm il-produzzjoni, u fl-aħħar mill-aħħar jhedded il-vijabbiltà tagħha.

(271)

Għalhekk, ġie konkluż li l-impożizzjoni ta’ miżuri fuq importazzjonijiet li joriġinaw mir-RPĊ tkun fl-interess tal-industrija tal-Unjoni.

(272)

Il-Kummissjoni ma rċeviet l-ebda tweġiba għall-kwestjonarju mingħand l-importaturi jew il-kummerċjanti tal-Unjoni. Importatur wieħed (S. Goldmann GmbH & Co. KG, il-Ġermanja) ipprovda sottomissjoni bil-miktub, li fiha esprima l-oppożizzjoni tiegħu għall-miżuri.

(273)

Goldmann iddikjara li l-miżuri kieku jagħtu lill-ilmentatur pożizzjoni monopolistika li x’aktarx iżżid il-kostijiet tiegħu stess u tipperikola wkoll il-katina tal-provvista fl-Unjoni, peress li ICL ma tistax tkopri d-domanda kollha. Fir-rigward tas-sigurtà tal-katina tal-provvista, il-Kummissjoni kkonkludiet li l-uniċi sorsi ta’ aċidu fosforuż huma l-ilmentatur u l-produtturi Ċiniżi. It-telf tal-industrija tal-Unjoni ikun jagħmel lir-RPĊ l-uniku sors ta’ aċidu fosforuż. Fir-rigward tal-pożizzjoni monopolistika tal-industrija tal-Unjoni, il-Kummissjoni kkonkludiet li l-miżuri jerġgħu jistabbilixxu kundizzjonijiet kummerċjali ġusti għall-partijiet kollha; l-industrija downstream xorta tista’ tfittex sorsi ta’ provvista tal-materjal mir-RPĊ, iżda bi prezzijiet ġusti mhux oġġett ta’ dumping.

(274)

Għalhekk, il-Kummissjoni kkonkludiet li ma ġiet sottomessa l-ebda evidenza suffiċjenti li turi li l-impożizzjoni ta’ dazji anti-dumping fuq l-importazzjonijiet ta’ aċidu fosoruż li joriġinaw mir-RPĊ ikollha effett avvers dejjiemi fuq il-profittabilità tal-importaturi jew tal-kummerċjanti.

(275)

Utent wieħed, Giovanni Bozzetto SpA, ippreżenta ruħu matul l-investigazzjoni u pprovda tweġiba għall-kwestjonarju u sottomissjoni bil-miktub, li fiha esprima l-oppożizzjoni tiegħu għall-miżuri. L-aċidu fosforuż huwa materja prima fost diversi oħrajn għal Bozzetto fil-produzzjoni tal-formulazzjonijiet tad-deterġenti u tat-trattament tal-ilma.

(276)

Abbażi tad-data rrapportata fit-tweġiba għall-kwestjonarju tal-kumpanija u tal-importazzjonijiet totali mir-RPĊ murija fit-Tabella 3, il-Kummissjoni stabbiliet li Bozzetto kien jirrappreżenta 15 % sa 25 % tal-importazzjonijiet kollha tal-prodott ikkonċernat mir-RPĊ lejn l-Unjoni.

(277)

Bozzetto ddikjara li l-miżuri kieku jagħtu lill-ilmentatur pożizzjoni monopolistika li x’aktarx iżżid il-kostijiet tiegħu stess u tipperikola wkoll il-katina tal-provvista fl-Unjoni, peress li l-ilmentatur ma jistax ikopri d-domanda kollha.

(278)

Fir-rigward tal-effetti fuq is-sigurtà tal-katina tal-provvista, il-Kummissjoni nnotat li l-miżuri anti-dumping ma humiex maħsuba biex jimblukkaw l-importazzjonijiet, iżda pjuttost biex jerġgħu jistabbilixxu kundizzjonijiet ta’ kummerċ ġust għall-partijiet kollha; l-industrija downstream xorta tista’ tfittex sorsi ta’ provvista tal-materjal miċ-Ċina, u b’hekk l-industrija tal-Unjoni ma tgawdix minn pożizzjoni monopolistika. Min-naħa l-oħra, it-telf tal-industrija tal-Unjoni kieku jagħmel liċ-Ċina l-uniku sors ta’ aċidu fosforuż.

(279)

Bozzetto esprima t-tħassib tiegħu dwar il-kapaċità tal-produtturi Ċiniżi integrati vertikalment li jevitaw il-miżuri, billi jipproċessaw aktar aċidu fosforuż f’fosfonati u jesportaw il-prodott downstream fl-Unjoni b’mod li jfixkel il-kompetizzjoni fis-suq tal-fosfonati tal-Unjoni. Il-produtturi tas-sustanzi kimiċi ta’ pajjiżi terzi għall-prodotti downstream kieku jiksbu vantaġġ kompetittiv fuq il-produtturi tal-Unjoni peress li jkomplu jixtru l-aċidu fosforuż Ċiniż mingħajr dazji AD u b’hekk ibigħu l-prodott finali bi prezz aktar baxx fl-Unjoni. Barra minn hekk, l-importaturi tal-aċidu fosforuż minn pajjiżi terzi jkunu jistgħu jwettqu attivitajiet ta’ assemblaġġ immirati għall-prodott li joriġina miċ-Ċina u jevitaw il-miżuri billi jesportaw il-prodott fis-suq tal-Unjoni.

(280)

Fir-rigward taċ-ċirkomvenzjoni potenzjali u taż-żieda qawwija fl-importazzjonijiet fis-swieq tal-prodotti downstream, il-Kummissjoni għandha għodod biex tindirizza dawn il-kwistjonijiet jekk jinqalgħu.

(281)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti li ma kienx fl-interess tal-Unjoni li timponi miżuri fuq l-importazzjonijiet ta’ aċidu fosforuż li joriġinaw mir-RPĊ f’dan l-istadju tal-investigazzjoni.

(282)

Abbażi tal-konklużjonijiet li waslet għalihom il-Kummissjoni fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, jenħtieġ li jiġu imposti miżuri proviżorji sabiex jiġi evitat dannu ulterjuri lill-industrija tal-Unjoni mill-importazzjonijiet oġġett ta’ dumping.

(283)

Jenħtieġ li jiġu imposti miżuri anti-dumping proviżorji fuq l-importazzjonijiet ta’ aċidu fosforuż li joriġinaw mir-RPĊ, f’konformità mal-Artikolu 7(2a) tar-Regolament bażiku. Il-Kummissjoni kkonkludiet fil-premessa (266) li l-livell xieraq biex jitneħħa d-dannu jenħtieġ li jkun il-marġni tad-dumping.

(284)

Abbażi ta’ dan ta’ hawn fuq, jenħtieġ li r-rata tad-dazju anti-dumping proviżorju, espressa skont il-prezz CIF fil-fruntiera tal-Unjoni, bid-dazju doganali mhux imħallas, tiġi stabbilita fil-livell ta’ 122,8 %.

(285)

Din ir-rata tad-dazju hija esklużivament applikabbli għall-importazzjonijiet tal-prodott ikkonċernat li joriġina mill-pajjiż ikkonċernat.

(286)

Kif imsemmi fil-premessa (3), il-Kummissjoni għamlet l-importazzjonijiet tal-prodott ikkonċernat soġġetti għar-reġistrazzjoni. Ir-reġistrazzjoni saret bil-għan li possibbilment jinġabru d-dazji b’mod retroattiv f’konformità mal-Artikolu 10(4) tar-Regolament bażiku.

(287)

Fid-dawl tas-sejbiet fl-istadju proviżorju, jenħtieġ li r-reġistrazzjoni tal-importazzjonijiet ma titkompliex.

(288)

F’dan l-istadju tal-proċediment ma ttieħdet l-ebda deċiżjoni dwar applikazzjoni retroattiva possibbli tal-miżuri anti-dumping.

(289)

F’konformità mal-Artikolu 19a tar-Regolament bażiku, il-Kummissjoni informat lill-partijiet interessati dwar l-impożizzjoni ppjanata ta’ dazji proviżorji. Din l-informazzjoni saret disponibbli wkoll għall-pubbliku ġenerali permezz tas-sit web tad-DĠ Kummerċ U Sigurtà Ekonomika. Il-partijiet interessati ngħataw tlett ijiem ta’ xogħol sabiex jipprovdu kummenti dwar l-akkuratezza tal-kalkoli ddivulgati b’mod speċifiku lilhom.

(290)

Tliet kumpaniji Ċiniżi li kkooperaw issottomettew kummenti sal-iskadenza. Madankollu, il-kummenti ma kinux jikkonċernaw l-akkuratezza tal-kalkoli. Għalhekk dawk il-kummenti se jiġu indirizzati kif xieraq fl-istadju definittiv tal-investigazzjoni.

(291)

Fl-interessi ta’ amministrazzjoni tajba, il-Kummissjoni se tistieden lill-partijiet interessati jippreżentaw kummenti bil-miktub u/jew jitolbu seduta mal-Kummissjoni u/jew mal-Uffiċjal tas-Smigħ fil-proċeduri kummerċjali fi żmien skadenza fissa.

(292)

Is-sejbiet li jikkonċernaw l-impożizzjoni ta’ dazji proviżorji huma proviżorji u jistgħu jiġu emendati fl-istadju definittiv tal-investigazzjoni,