(1)

Il-kolekalċiferol ġie approvat bħala sustanza attiva għall-użu fil-prodotti bijoċidali tat-tip ta’ prodott 14 bir-Regolament ta’ Implimentazzjoni tal-Kummissjoni (UE) 2019/637 (2), soġġett għall-kundizzjonijiet stabbiliti fl-Anness ta’ dak ir-Regolament.

(2)

L-approvazzjoni tal-kolekalċiferol għall-użu fil-prodotti bijoċidali tat-tip ta’ prodott 14 (“l-approvazzjoni”) kellha tiskadi fit-30 ta’ Ġunju 2024. Fit-22 ta’ Diċembru 2022, ġiet sottomessa applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni (“l-applikazzjoni”).

(3)

Fis-7 ta’ Awwissu 2023, l-awtorità kompetenti li tevalwa tal-Iżvezja infurmat lill-Kummissjoni li skont l-Artikolu 14(1) tar-Regolament (UE) Nru 528/2012, kienet iddeċidiet li ma kinitx meħtieġa evalwazzjoni sħiħa tal-applikazzjoni. Skont l-Artikolu 14(2), it-tieni subparagrafu, ta’ dak ir-Regolament, l-awtorità kompetenti li tevalwa trid twettaq evalwazzjoni tal-applikazzjoni fi żmien 180 jum minn meta l-Aġenzija Ewropea għas-Sustanzi Kimiċi (“l-Aġenzija”) taċċetta l-applikazzjoni f’konformità mal-Artikolu 13(3) ta’ dak ir-Regolament.

(4)

Fis-16 ta’ Diċembru 2023, l-awtorità kompetenti li tevalwa ssottomettiet rakkomandazzjoni dwar it-tiġdid tal-approvazzjoni tal-kolekalċiferol lill-Aġenzija.

(5)

F’konformità mal-Artikolu 75(1), it-tieni subparagrafu, il-punt (a), tar-Regolament (UE) Nru 528/2012, il-Kumitat dwar il-Prodotti Bijoċidali jħejji l-opinjoni tal-Aġenzija rigward l-applikazzjonijiet għat-tiġdid tal-approvazzjoni tas-sustanzi attivi. Il-Kumitat dwar il-Prodotti Bijoċidali adotta l-opinjoni tal-Aġenzija fis-27 ta’ Frar 2024 (3), wara li kkunsidra l-konklużjonijiet tal-awtorità kompetenti li tevalwa.

(6)

Fl-1 ta’ Lulju 2024, skont l-Artikolu 75(1), il-punt (g), tar-Regolament (UE) Nru 528/2012, il-Kummissjoni talbet lill-Aġenzija (4) tirrevedi l-opinjoni tagħha sabiex tinvestiga l-użu tas-sustanza mill-pubbliku ġenerali (mhux professjonisti) u tikkonkludi b’ċertezza jekk hemmx alternattivi xierqa biex il-kolekalċiferol jiġi sostitwit għat-trattament fuq ġewwa tal-ġrieden tad-djar, eż. bl-użu ta’ nases mekkaniċi.

(7)

Id-Deċiżjoni ta’ Implimentazzjoni tal-Kummissjoni (UE) 2024/733 (5) ipposponiet id-data tal-iskadenza tal-approvazzjoni tal-kolekalċiferol għall-użu fil-prodotti bijoċidali tat-tip ta’ prodott 14 għall-31 ta’ Diċembru 2025, sabiex ikun hemm biżżejjed żmien biex titlesta l-proċedura sħiħa tal-eżami tal-applikazzjoni.

(8)

Fit-30 ta’ April 2025, l-Aġenzija infurmat lill-Kummissjoni li qed tippjana li tissottometti l-opinjoni riveduta lill-Kummissjoni fit-tielet trimestru tal-2025.

(9)

Għaldaqstant, għal raġunijiet lil hinn mill-kontroll tal-applikant, l-approvazzjoni aktarx tiskadi qabel ma tkun ittieħdet deċiżjoni dwar it-tiġdid tagħha. Għalhekk, jixraq li d-data tal-iskadenza tal-approvazzjoni tiġi posposta ulterjorment għal perjodu ta’ żmien biżżejjed biex jitlesta l-eżami tal-applikazzjoni. Filwaqt li jitqiesu l-limiti ta’ żmien biex l-Aġenzija tħejji u tissottometti l-opinjoni riveduta tagħha u ż-żmien meħtieġ biex il-Kummissjoni tiddeċiedi jekk iġġeddidx l-approvazzjoni tal-kolekalċiferol għall-użu fil-prodotti bijoċidali tat-tip ta’ prodott 14, jenħtieġ li d-data tal-iskadenza tiġi posposta għall-31 ta’ Diċembru 2026.

(10)

Wara l-posponiment ulterjuri tad-data tal-iskadenza tal-approvazzjoni, il-kolekalċiferol jibqa’ approvat għall-użu fil-prodotti bijoċidali tat-tip ta’ prodott 14, soġġett għall-kundizzjonijiet stabbiliti fl-Anness tar-Regolament ta’ Implimentazzjoni (UE) 2019/637,